ខេត្តសៀមរាប – Page 245

ខេត្តសៀមរាប៖លោកតេង ច័ន្ទណាត ស្នងការនគរបាលខេត្តសៀមរាប បានថ្លែងអំណរគុណយ៉ាងជ្រាលជ្រៅ ចំពោះកិច្ចសហប្របត្តិការរយៈពេលកន្លងមក ជាពិសេសចំពោះការផ្តល់នូវសម្ភារៈកំព្យុទ័រទំនើបចំនួន ៤គ្រឿង និងកាម៉ារ៉ាថតរូបទំនើប ចំនួន ៤គ្រឿង។ លោកស្នងការក៏បានស្នើសុំអោយនគរបាលសហព័ន្ធអូស្ត្រាលីជួយពង្រឹងសមត្ថភាពនគរបាលខេត្តសៀមរាប អោយបានច្រើនថែមទៀត ទាំងជួយបណ្តុះបណ្តាលពីវិធីសាស្រ្ត និងជួយសម្របសម្រួលជាជំនួយផ្នែកសម្ភារ: មធ្យោបាយ បច្ចេកទេស ដល់នគរបាលខេត្ត ដើម្បីបម្រើក្នុងកិច្ចប្រតិបត្តិការបង្ក្រាបបទល្មើសពាក់ព័ន្ធនឹងគ្រឿងញៀន បទល្មើសបច្ចេកវិទ្យា និងបទល្មើសពាក់ព័ន្ធទៅនឹងការប្រយុទ្ធប្រឆាំងការជួញដូរលើកុមារ និងការលាងលុយកខ្វក់។

លោកតេង ច័ន្ទណាត បានលើកឡើងពីលទ្ធផលនៃការអនុវត្តន៍ការងារកន្លងមកនឹងខិតខំប្រឹងប្រែងបន្តក្នុងកិច្ចសហប្រតិបត្តិការរវាងនគរបាលទាំងពីរ ឲ្យកាន់តែជិតស្និទ្ធ និងមានប្រសិទ្ធភាពថែមទៀតផងដែរ។

លោកតេង ច័ន្ទណាត មានប្រសាសន៍យ៉ាងដូច្នេះ នៅថ្ងៃទី១៤ ខែវិច្ឆិកា ម្សិលមិញ ក្នុងឱកាស អញ្ជើញចូលរួម ក្នុងពិធីសំណេះសំណាល ពិភាក្សាការងារ និងទទួលសម្ភារបច្ចេកវិទ្យា ជាមួយ លោក អែនធើនី មឹកក្វាយ (Anthony Maguire) នាយនគរបាលជាន់ខ្ពស់ នគរបាលសហព័ន្ធអូស្ត្រាលី និងលោក សារុំ សីលា ជំនួយការស៊ើបអង្កេត និងជាមន្ត្រីសម្របសម្រួល នៅស្នងការដ្ឋាននគរបាលខេត្តសៀមរាប។

ឆ្លៀតក្នុងឱកាសនោះ លោក អែនធើនី មឹកក្វាយ (Anthony Maguire) ក៏បានរៀបរាប់ពីប្រវត្តិសង្ខេបការងាររបស់លោកកន្លងមក និងកិច្ចសហការសម្របសម្រួល កន្លងមកជាមួយនគរបាលកម្ពុជា ក្នុងការផ្លាស់ប្តូរព័ត៌មាន ដើម្បីបង្ក្រាបបទល្មើសពាក់ព័ន្ធ នឹងគ្រឿងញៀន បទល្មើសបច្ចេកវិទ្យា និងបទល្មើសពាក់ព័ន្ធ ទៅនឹងការប្រយុទ្ធប្រឆាំងការជួញដូរលើកុមារ ហើយក៏បានផ្លាស់ប្តូរបទពិសោធន៍លើការងារជំនាញការលាងលុយកខ្វក់ផងដែរ៕SRP

ភ្នំពេញ៖សម្តេចតេជោ ហ៊ុន សែន បានថ្លែងរំលឹកសារជាថ្មីម្តងទៀតថា «បើគ្មានការរំដោះនៅថ្ងៃទី៧ ខែមករា ឆ្នាំ១៩៧៩នោះទេ» ប្រជាជនខ្មែរយើងក៏ពុំមានជីវិតរបស់នៅដល់សព្វថ្ងៃនេះដែរ ដែលនេះគឺជាការពិតមិនអាចប្រកែកបានឡើយ។

សម្តេចបានថ្លែងដូចនេះនៅព្រឹកថ្ងៃទី១៥ ខែធ្នូ ឆ្នាំ២០២១នេះ នៅក្នុងពិធីសម្ពោធដាក់ឱ្យប្រើប្រាស់ជាផ្លូវការសណ្ឋាគារ ហាយ៉ាត់ រីជិនស៊ី ភ្នំពេញ «HYATT REGENCY PHNOM PENH» ស្ថិតនៅសង្កាត់ជ័យជំនះ ខ័ណ្ឌដូនពេញ រាជធានីភ្នំពេញ របស់ក្រុមហ៊ុន ជីប ម៉ុង ដែលបានទិញម៉ាកយីហោមកពីអាមេរិក។

សម្តេចតេជោ ហ៊ុន សែន បានគូសបញ្ជាក់ថា អ្នកដែលមិនទទួលស្គាល់ការពិតនៃថ្ងៃរំដោះជាតិ៧មករា មិនចាំបាច់ស្តាប់សម្តេចថ្លែងទេ ហើយអ្នកទាំងអស់នោះក៏មិនសមជាមនុស្សដែរ គឺសមជាសត្វតិរិច្ឆាន។

សម្តេចហ៊ុន សែន ក៏បានរំលឹកផងដែរពីសោកនាដកម្មដែលប្រជាជនខ្មែរឆ្លងកាត់ក្នុងរបបប្រល័យពូជសាសន៍ និងក្រោយថ្ងៃរំដោះ៧មករា ដែលកម្ពុជាពេលនោះពុំមានអ្វីទាល់តែសោះ ប៉ុន្តែបច្ចុប្បន្ននេះមានការអភិវឌ្ឍរីកចម្រើនលើគ្រប់វិស័យ មានទឹកស្អាតគ្របដណ្តប់ដល់ទីជនបទនាៗ ភាគច្រើនផងដែរ៕SRP

ខេត្តសៀមរាប៖ក្មេងប្រុសអាយុជាង១០ឆ្នាំម្នាក់បានបាញ់សម្លាប់ខ្លួនឯង បង្កឲ្យមានការភ្ញាក់ផ្អើលយ៉ាងខ្លាំងដល់សមត្ថកិច្ចនិងប្រជាពលរដ្ឋ។

របាយការណ៍របស់សមត្ថកិច្ចបានឲ្យដឹងថា ហេតុការណ៍បានកើតឡើង នៅវេលម៉ោង១៥ថ្ងៃទី១៤ ខែធ្នូ ឆ្នាំ២០២១នេះនៅត្រង់ចំណុចផ្ទះក្នុងបន្ទប់ទឹក ស្ថិតក្នុងក្រុមទី១២ ស្ថិតនៅភូមិដកពោធិ៍ សង្កាត់ស្លក្រាម ក្រុងសៀមរាប។

សមត្ថកិច្ចបានបញ្ជាក់ថា ករណីធ្វើអត្តឃាតសម្លាប់ខ្លួនឯងបាញ់អាវុធ១គ្រាប់ចំសៀតផ្កាខាងឆ្វេងបណ្តាលឲ្យធ្លាយមកសៀតផ្កាខាងស្តាំ។ ជនរងគ្រោះឈ្មោះ វឿន សុីតនីណាថាន់ ភេទប្រុស អាយុ១៣ឆ្នាំមុខរបរសិស្ស ដោយបានយកអាវុធម៉ាក SIG SAUR លេខតួ27 11U-S ជាអាវុធរបស់ឪពុកមុខរបរ កងរាជអាវុធហត្ថ ខេត្តសៀមរាប។

បើតាមសមត្ថកិច្ចបានបញ្ជាក់បន្ថែមថាមូលហេតុតាមការឆ្លើយបំភ្លឺរបស់ឪពុកម្តាយជនរងគ្រោះជាមនុស្សមានជំងឺបាក់ទឹកចិត្ត។

ករណីនេះសមត្ថកិច្ចជំនាញបានធ្វើកោសល្យវិច័យឃេីញថា ជនរងគ្រោះពិតជាធ្វេីអត្តឃាតដោយបាញ់សម្លាប់ខ្លួនឯងពិតប្រាកដមែន។ ជនរងគ្រោះត្រូវបានឪពុកម្តាយយកទៅធ្វេីបុណ្យតាមប្រពៃណីនៅវត្តល្អក់ ភូមិត្រពាំងទឹម ឃុំកណ្ដែក ស្រុកប្រាសាទបាគង ខេត្តសៀមរាប៕SRP

ខេត្តសៀមរាប៖លោកស្រីម៉ែន សំអន រដ្ឋមន្រ្តីក្រសួងទំនាក់ទំនង ជាមួយរដ្ឋសភា-ព្រឹទ្ធសភា និងអធិការកិច្ច បានលើកឡើងថា ព្រឹត្តិការណ៍នេះពិតជាបានរំលឹក និងដាស់តឿនប្រជាពលរដ្ឋ ក្នុងពេលបច្ចុប្បន្ន និងអនាគត ឲ្យចងចាំនិងប្តេជ្ញាចិត្ត ត្រូវចេះថែរក្សាការពារតំបន់អង្គរទាំងមូល ដើម្បីជាការតបស្នងសងគុណ ជូនដល់បុព្វការីជន ព្រះមហាក្សត្រគ្រប់ព្រះអង្គ ឥស្សរជនជាតិ អ្នកជំនាញការជាតិ និងអន្តរជាតិ ព្រមទាំងជនរួមជាតិគ្រប់ជំនាន់ ដែលបានលះបង់ប្រាជ្ញា ស្មារតី ដើម្បីបុព្វហេតុនៃកិច្ចការអភិរក្ស និងអភិវឌ្ឍន៍រមណីយដ្ឋានអង្គរដោយចីរភាព និងមហាអស្ចារ្យដែលមិនអាចបំភ្លេចបានរហូតមកដល់បច្ចុប្បន្ននេះ។

លោកស្រីម៉ែន សំអន ក៏បានលឹកពីប្រវត្តិអតីតកាលកន្លងមក ដែលបានធ្វើឲ្យប្រាង្គប្រាសាទ អង្គរ ដែលជាដួងព្រលឹងជាតិ និង ជាអត្តសញ្ញានៃនិមត្តិរូបជាតិខ្មែរ ដែលត្រូវបានរងការបោះបង់ មិនបានធ្វើការរំលឹកគុណអង្គរនោះឡើយ។ ការរំលឹកគុណអង្គរនាពេលនេះ ក៏កើតចេញពីស្មារតីជ័យជំនះ៧មករា ១៩៧៩ ក្រោមដំបូលសន្តិភាព នៃ គោលនយោបាយឈ្នះឈ្នះរបស់សម្តេចហ៊ុន សែនផងដែរ។ លោកស្រីថាការបង្កើតជាបុណ្យរំលឹកគុណអង្គរនេះឡើង ក្នុងការស្តារឡើងវិញនូវវិស័យទេសចរ នៅខេត្តសៀមរាប ក្នុងបរិបទកូវិដ១៩ ក្រោយការបើកឡើងវិញក្នុងការទទួលភ្ញៀវទេសចរជាតិ អន្តរជាតិ ដែលទទួលបានការ ចាក់វ៉ាក់សាំងពេញលេញ ចូលមកទស្សនាកម្សាន្តនៅរមណីយដ្ឋានអង្គរ ក៏ដូចតំបន់រមណីយដ្ឋានផ្សេងៗទៀតក្នុងព្រះរាជាណាចក្រកម្ពុជា។ ម្យ៉ាងទៀតនៅក្នុងឆ្នាំនេះ គឺជាការអបអរសាទរនៃពិធីរំលឹកខួបគម្រប់២៩ឆ្នាំ នៃការដាក់រមណីយដ្ឋានអង្គរ ចូលក្នុងបញ្ជីបេតិកភណ្ឌពិភពលោក នៃអង្គការយូណេស្កូផងដែរ។

លោកស្រី ក៏បាននាំយកថវិការបស់សម្តេចតេជោ និងសម្តេចកិត្តិព្រឹទ្ធបណ្ឌិត ចំនួន ៤០លាន និងថវិការបស់រដ្ឋបាលខេត្តសៀមរាប ៥លានរៀល សរុបចំនួន ៤៥លាន ប្រគល់ជូនសម្រាប់ចាត់ចែងក្នុងកម្មវិធី ព្រមទាំងបាននិមន្តព្រះសង្ឃចំនួន ១០៨អង្គ ធ្វើការរាប់បាត្រឧទ្ទិសកុសលថ្វាយជូនដល់បុព្វបុរសដូនតា ដែលបានសាងសង់ប្រាង្គប្រាសាទនៅលើ ទឹកដីអង្គរនៃយើង ព្រមទាំងឧទ្ទិសជូនដល់យុទ្ធជនយុទ្ធនារី ដែលបានពិលីជីវិតក្នុងបុព្វហេតុជាតិ ដើមី្បការពារបូរណភាពទឹកដី នៃព្រះរាជាណាចក្រកម្ពុជាផងដែរ។

លោកស្រី ម៉ែន សំអន មានប្រសាសន៍បែបនេះ ក្នុង ពិធីបួងសួងបើកព្រឹត្តិការណ៍បុណ្យរំលឹកគុណអង្គររ និង ជាការអបអរសាទរពិធីរម្លឹកខួបគម្រប់២៩ឆ្នាំ នៃការដាក់រមណីយដ្ឋានអង្គរ ចូលក្នុងបញ្ជីបេតិកភណ្ឌពិភពលោក នាព្រឹកថ្ងៃទី មិញនេះ នៅមុខប្រាង្គប្រាសាទអង្គរ។

សូមជម្រាបថា ព្រឹត្តិការនេះក៏បានរៀបចំពិធីបួងសួងទៅតាមទំនៀមទំលាប់បែបសាសនាមានការបូជាទៀនធូបផ្កាភ្ញី ក្នុងគោលបំណងដើម្បីរំលឹកនឹកដល់គុណបុណ្យមហាវីរ:ដូនតា ដែលជាបុព្វបុរសបានបន្សល់ទុកនូវមរតកដ៏មានតម្លៃមហាសាលដ៏ល្បីល្បាញ់ ដែលបានចុះបញ្ជីជាសម្បត្តិបេតិកភ័ណ្ឌពិភពលោក។ បញ្ជាក់ពិធីរំលឹកគុណអង្គរនេះនឹងត្រូវប្រារព្ធឡើងក្នុងថ្ងៃទី១៤ ខែធ្នូ ជារៀងរាល់ឆ្នាំ៕SRP