ខេត្តកំពង់ចាម – Page 184

ខេត្តកំពង់ចាម៖លំនៅឋានប្រជាពលរដ្ឋ ដែលសាងសង់ឡើងអំពីឈើ ប្រក់ក្បឿង ចំនួន២ខ្នង ក្នុងនោះ១ខ្នងត្រូវបានអគ្គិភ័យឆាបឆេះអស់ទាំងស្រុង និង១ខ្នងទៀត ត្រូវរងការខូចខាតអស់មួយផ្នែក ខណៈម្ចាស់ផ្ទះ និងអ្នកជិតខាងមិនអាចជួយពន្លត់ទាន់ពេល បណ្តាលឲ្យបាត់បង់ទ្រព្យសម្បត្តិអស់ជាច្រើន តែមិនបណ្ដាលឲ្យមនុស្សស្លាប់ ឬរងរបួសអ្វីឡើយ។
ករណីនេះបានកើតមានឡើង កាលពីវេលាម៉ោង៩ និង៣០នាទីព្រឹក ថ្ងៃទី០៦ ខែឧសភា ឆ្នាំ២០២០ ស្ថិតនៅក្នុងភូមិព្រែកកុយ ឃុំព្រែកកុយ ស្រុកកងមាស ខេត្តកំពង់ចាម។

លោក ថុង ភូរីវុធ អធិការរងនគរបាលស្រុកកងមាស បានឲ្យដឹងថា ចចំពោះហេតុការណ៍នេះ បណ្ដាលឲ្យឆេះផ្ទះប្រជាពលរដ្ឋ ឈ្មោះ ថន សុធារី ភេទស្រី អាយុ៤៥ឆ្នាំ ដែលមានទំហំ៨ x៩ម៉ែត្រ ធ្វើអំពីឈើ ប្រក់ក្បឿង ឆេះអស់ទាំងស្រុង និងបណ្ដាលឲ្យខូចខាតគ្រឿងអលង្ការមានដូចជា ខ្សែរក ខ្សែរដៃធ្វើអំពីមាសចំនួន០៣តម្លឹងកន្លះ និងខ្សែរក កងដៃផ្លាកទីន ចំនួន០៣តម្លឹង ប្រាក់១៦០០ដុល្លារ ទូឈើដាក់ខោអាវចំនួន០៣ តុចំនួន០៣ និងគ្រែប្រអប់ចំនួន០៣ ផងដែរ។ ដោយឡែកផ្ទះប្រជាពលរដ្ឋ ឈ្មោះ តូច ប៊ុនថន ភេទប្រុស អាយុ៧៤ឆ្នាំ មានទំហំ១០ x១០ម៉ែត្រ ធ្វើអំពីឈើ ប្រក់ក្បឿង បណ្ដាលឲ្យខូចខាតជញ្ជាំង និងដំបូល មួយចំហៀង។ ដែលសមត្ថកិច្ចបានដាក់ការសន្និដ្ឋានជំហានដំបូង ចំពោះករណីគ្រោះអគ្គិភ័យនេះ គឺបណ្ដាលមកពីការទុស្សេខ្សែភ្លើង។
ក្រោយពីទទួលបានព័ត៌មានភ្លាម លោកវរសេនីយ៍ឯក ជា ជួន អធិការនគរបាលស្រុកកងមាស បានចាត់តាំងអោយលោកវរសេនីយ៍ទោ ថុង ភូរីវុធ អធិការរងទទួលដឹកនាំការងារផ្នែកព្រហ្មទណ្ឌ ដឹកនាំកម្លាំងជំនាញអធិការដ្ឋាន ចេញរថយន្ដពន្លត់អគ្គិភ័យ ០១គ្រឿង និងទាក់ទងរថយន្តអគ្គិភ័យរបស់អធិការដ្ឋាននគរបាលស្រុកបាធាយ ០១គ្រឿងទៀត ចុះទៅអន្ដរាគមន៍ជួយពន្លត់ ដោយប្រេីប្រាស់ទឹកអស់២ឡាន ហើយភ្លេីងក៏បានរលត់អស់១០០% នៅវេលាម៉ោង១១និង០០នាទី ដោយមិនបានឆាប់ឆេះរាលដាលដល់លំនៅឋានប្រជាពលរដ្ឋដ៏ទៃទៀតឡើយ៕SRP

ខេត្តកំពង់ចាម៖អភិបាលខេត្តកំពង់ចាម លោកអ៊ុន ចាន់ដា បានដាក់ចេញនូវផែនការដល់មន្ត្រីជំនាញពាក់ព័ន្ធនិងអាជ្ញាធរ ដែនដីនីមួយៗដែលនៅស្របតាមបណ្តោយដងផ្លូវជាតិលេខ៦និងផ្លូវជាតិលេខ ៧ចាប់ពីចំណុចស្ពានគីហ្សូណា ព្រំប្រទល់ ខេត្តត្បូងឃ្មុំ -ក្រុងកំពង់ចាម រហូតដល់ស្រុកបាធាយ ជាប់ព្រំប្រទល់ ខេត្តកណ្តាលត្រូវរៀបចំសណ្តាប់ធ្នាប់នៅតាមដងផ្លូវ ទាំង២ខ្សែ ខាងលើនេះ ធ្វើយ៉ាងណាត្រូវរៀបចំឲ្យមាន សោភ័ណភាព ស្រស់ស្អាត ។

ដើម្បីអនុវត្តលើការងារនេះ ឲ្យមានប្រសិទ្ធភាពខ្ពស់ លោកអភិបាលខេត្តបានជំរុញដល់មន្ត្រីពាក់ព័ន្ធឲ្យមានការយកចិត្តទុកដាក់សហការគ្នារៀបចំទាំងខ្សែបណ្ដាញអគ្គិសនីខ្វាត់ខ្វែងផ្ទាំងស្លាកសញ្ញាប៉ាណូឆ្លងកាត់ផ្លូវថ្នល់និងអ្នកលក់ដូរគ្មាន សណ្ដាប់ធ្នាប់នៅតាមទីសាធារណៈ ដើម្បីសម្រួលដល់ការធ្វើដំណើររបស់ភ្ញៀវទេសចរជាតិ និងអន្តរជាតិ ក្នុងការធ្វើដំណើរឆ្លងកាត់ ឬចូលទស្សនាកម្សាន្ត នៅតំបន់រមណីយដ្ឋាននានា ក្នុងខេត្តកំពង់ចាម។នេះបើតាមមន្ត្រីរដ្ឋបាលសាលាខេត្តថ្លែងប្រាប់អ្នកសារព័ត៌មាន។

សូមបញ្ជាក់ថានៅព្រឹកមិញនេះលោកអ៊ុន ចាន់ដា អភិបាលខេត្តកំពង់ចាម បានអញ្ជើញចុះពិនិត្យការរៀបចំសណ្តាប់ធ្នាប់ នៅតាមបណ្ដោយដងផ្លូវជាតិលេខ៦និងផ្លូវជាតិលេខ៧ត្រង់ចំណុច ទីប្រជុំជននានា ចាប់ពីគល់ស្ពានគីហ្សូណា រហូតដល់ ព្រំប្រទល់ខេត្តកណ្ដាល៕SRP

ខេត្តកំពង់ចាម៖លោកឧត្តមសេនីយ៍ទោ ឯម កុសល ស្នងការនគរបាលខេត្តកំពង់ចាម នៅរសៀលថ្ងៃទី២ខែឧសភា ម្សិលមិញបានអញ្ជើញនាំយកអំណោយ របស់ នាយឧត្ដមសេនីយ៍ សន្តិបណ្ឌិត អគ្គស្នងការនគរបាលជាតិ ប្រគល់ជូនប្រជាពលរដ្ឋ ជួបទុក្ខលំបាក០១គ្រួសារ ដែលមានឈ្មោះ ឈុន រិន ភេទប្រុស អាយុ៤៤ឆ្នាំ ពិការភាព ដោយសារគ្រោះថ្នាក់ចរាចរណ៍ (ពោះម៉ាយ) មានកូនប្រុសអាយុ៨ឆ្នាំម្នាក់នៅមើលថែទាំ និងស្នាក់នៅជាមួយម្ដាយបង្កើត ដែលមានសមាជិកគ្រួសារចំនួន៨នាក់ នៅភូមិតាប៉ោង៣ ឃុំតាប្រុក ស្រុកចំការលើ ខេត្តកំពង់ចាម។
លោកស្នងការក៏បានធ្វេីការទំនាក់ទំនងទៅមន្ទីរពេទ្យ ដេីម្បីពិគ្រោះបញ្ហាជំងឺរបស់គាត់ ក្រែងអាចមានវិធីជួយសម្រួលដល់ការព្យាបាលឲ្យបានល្អប្រសេីរជាងនេះផងដែរ។
លោកឧត្តមសេនីយ៍ទោ ឯម កុសល បានថ្លែងថាពិតជាគួរឲ្យសង្វេគណាស់ ពេលខ្ញុំបានទៅជួបផ្ទាល់ ជាមួយប្អូនប្រុស ពិការភាព ដើរមិនរួច ដោដោយសារតែគ្រោះថ្នាក់ចរាចរណ៍ ហើយជីវភាពក៏មានការផ្លាស់ប្ដូរ ប្រពន្ធក៏ដាច់ចិត្តចាកចេញ បន្សល់ទុកកូនប្រុសអាយុ៨ឆ្នាំ គ្មានលទ្ធភាពសូម្បីបញ្ជូនកូនទៅសាលារៀន និងត្រូវនៅជួយមេីលថែទាំឪពុករបស់ខ្លួនទៀត។
លោក ឈុន រិន ដែលជាជនពិការភាព ក៏បានគោរពថ្លែងអំណរគុណ ចំពោះថ្នាក់ដឹកនាំគ្រប់លំដាប់ថ្នាក់ ពិសេស នាយឧត្តមសេនីយ៍ សន្តិបណ្ឌិត អគ្គស្នងនគរបាលជាតិ លោកឧត្តមសេនីយ៍ស្នងការនគរបាលខេត្តកំពង់ចាម និងសហការី ដែលបានអញ្ជេីញដោយផ្ទាល់ និងបាននាំយកថវិកា សម្ភារប្រេីប្រាស់ គ្រឿងឧបភោគបរិភោគមួយចំនួន ដេីម្បីជួយសម្រួលដល់ការលំបាករបស់ខ្លួន។
ឆ្លៀតក្នុងឱកាសនោះដែរ លោកឧត្តមសេនីយ៍ស្នងការ ក៏បានធ្វើការអំពាវនាវដល់សាធារណជន បងប្អូនប្រជាពលរដ្ឋទាំងអស់ ដែលបានធ្វេីចរាចរណ៍តាមដងផ្លូវ ត្រូវចូលរួមគោរពច្បាប់ចរាចរណ៍ឲ្យបានគ្រប់ៗគ្នា ព្រោះការចូលរួមការពារ ប្រសេីរជាងព្យាបាល។
គួរបញ្ជាក់ផងដែរថា អំណោយដែលត្រូវប្រគល់ជូននាឱកាសនោះ រួមមាន ថវិកា ចំនួន៨០០,០០០រៀល, អង្ករ ០២បេ (១០០គីឡូ), មី ០៤កេស, ទឹកសុទ្ធ ០២កេស, ទឹកផ្លែឈើ ០២កេស, ទឹកត្រី ០២យួរ, ទឹកស៊ីអុីវ ០២យួរ, ត្រីខ ០២យួរ, ក្រម៉ា ០៥, ម៉ាស់៥០ និងសម្ភារៈប្រើប្រាស់មួយចំនួនទៀត សរុបជាថវិកាចំនួន១,៦២០,០០០រៀល ផងដែរ៕SRP

ខេត្តកំពង់ចាម៖លោក ហេង វណ្ណនី អភិបាលរងខេត្ត បានឲ្យដឹងថា ពាក់ព័ន្ធនឹងករណីគ្រោះធម្មជាតិ សម្រាប់ខេត្តកំពង់ចាម មានក្រុង-ស្រុក ចំនួន០៦ លើ១០ក្រុង-ស្រុក ដែលទទួលរងផលប៉ះពាល់ ដោយសារការបាក់ស្រុតច្រាំងទន្លេ ជារៀងរាល់ឆ្នាំ ដែលក្នុងនោះរួមមាន នៅក្នុងស្រុកស្ទឹងត្រង់ មានចំនួន៥ឃុំ ស្រុកកំពង់សៀម មានចំនួន៦ឃុំ ស្រុកកោះសូទិន មាន៤ឃុំ ក្រុងកំពង់ចាម មាន១សង្កាត់ ស្រុកកងមាស មាន៥ឃុំ និងស្រុកស្រីសន្ធរ មាន៥ឃុំ។

អភិបាលរងខេត្តបានបញ្ជាក់ថា ពាក់ព័ន្ធនឹងគ្រោះធម្មជាតិនេះដែរ ជាក់ស្តែងក្នុងឆ្នាំ២០១៩កន្លងទៅ ខេត្តកំពង់ចាម ទទួលរងផលប៉ះពាល់ដោយសារការបាក់ស្រុតច្រាំងទន្លេ មានប្រវែងប្រមាណជា២២.១៧៦ម៉ែត្រ និងទទឹងចាប់ពី៥ ទៅ៣០ម៉ែត្រ បណ្តាលឲ្យរុះរើផ្ទះចំនួន១២២ខ្នង ក្នុងនោះផ្ទះចំនួន២១ខ្នង ពុំទាន់បានសាងសង់ឡើងវិញនៅឡើយទេ និងផ្ទះដែលប្រឈមនឹងការរុះរើ មានរហូតចំនួន៥៥៩ខ្នង និងសាលាឃុំ១កន្លែង ហេីយក៏មានការប៉ះពាល់ដល់ហេដ្ឋាចរនាសម្ព័ន្ធ និងផ្ទៃដីកសិកម្ម របរបស់បងប្អូនប្រជាពលរដ្ឋមួយចំនួនផងដែរ។
លោកបញ្ជាក់បែបនេះ ដោយបានតំណាងលោក អ៊ុន ចាន់ដា អភិបាលខេត្តកំពង់ចាម និងជាប្រធានគណៈកម្មាធិការគ្រប់គ្រងគ្រោះមហន្តរាយខេត្ត អញ្ជើញចូលរួមបេីកកិច្ចប្រជុំគណៈកម្មការត្រួតពិនិត្យ វាយតម្លៃ ការៀបចំតាំងទីលំនៅថ្មី របស់បងប្អូនប្រជាពលរដ្ឋ ដែលរងផលប៉ះពាល់ដោយកត្តាធម្មជាតិ ការបាក់ស្រុតច្រាំងទន្លេ ក្នុងខេត្តកំពង់ចាម នៅរដ្ឋបាលសាលាខេត្តនា
ព្រឹកមិញនេះដោយមានការអញ្ជើញចូលរួមពីសំណាក់មន្ត្រីជំនាញ ថ្នាក់ដឹកនាំមន្ទីរអង្គភាពពាក់ព័ន្ធ និងរដ្ឋបាលក្រុង-ស្រុកដែលពាក់ព័ន្ធផងដែរ៕SRP