ខេត្តកំពង់ចាម៖លោក អូស្មាន ហាស្សាន់ ទេសរដ្ឋមន្រ្តីទទួលបន្ទុកបេសកកម្មពិសេសបានថ្លែងបន្តថា ថ្វីត្បិតតែស្ថានភាពនៃជំងឺកូវីដ១៩ នាដំណាក់កាលបច្ចុប្បន្ននេះ មានការថប់ថយចុះក៏ពិតមែន តែយើងមិនត្រូវមានការធ្វេសប្រហែសនោះឡើយ គឺត្រូវបន្តការអនុវត្តគម្លាតសុវត្ថិភាពបុគ្គល និងគម្លាតសុវត្ថិភាពសង្គម ព្រមទាំងធ្វើអនាម័យ ជាប់ជាប្រចាំ ឲ្យបានគ្រប់ៗគ្នា ពោលគឺត្រូវយកចិត្តទុកដាក់ បន្តអនុវត្ត ឲ្យបានខ្ជាប់ខ្ជួន ទៅតាមការណែនាំ របស់ក្រសួងសុខាភិបាល។ ដូច្នេះសូមពលរដ្ឋ ខ្មែរឥស្លាម ប្រុងប្រយ័ត្ន ការឆ្លងជំងឺកូវីដ១៩។
លោកទេសរដ្ឋមន្ត្រី ក៏បានលេីកឡេីងផងដែរថា ការស្លៀកពាក់ស្បៃបិទជិតទាំងក្បាល និងមុខ ត្បិតមានពលរដ្ឋខ្លះនៅប្រទេសឥស្លាមក្នុងតំបន់មួយចំនួន ជាពិសេសនៅមជ្ឈឹមបូព៌ា ដែលអនុវត្តយកការគ្របមុខសម្រាប់ស្រ្តី ពេលចេញទៅតំបន់សាធារណៈនោះ គ្រាន់តែជាការយល់ឃើញមួយជ្រុងជាមួយនឹងប្រពៃណីរបស់ពួកគាត់ ស្របតាមស្ថានភាពនៅប្រទេសគាត់តែប៉ុណ្ណោះដែលមិនមែនជាកាតព្វកិច្ចនៃច្បាប់ឥស្លាមនោះទេ។ ស្ថានភាពនៅកម្ពុជាយើងពីដើមមកពុំមានឡើយការស្លៀកពាក់បែបនេះ ទាំងក្របខណ្ឌប្រពៃណី រឺក្របខណ្ឌសាសនាឥស្លាម គ្រាន់តែទើបបច្ចុប្បន្នយើងឃើញថាមានមួយចំនួនតូច បានយកការអនុវត្តប្រពៃណីនេះ ហើយយល់ឃើញថា ជាកាតព្វកិច្ចក្នុងច្បាប់ឥស្លាម តែតាមពិតស្រ្តីឥស្លាម គេអនុញ្ញាតអោយបើកទម្រង់មុខ និងប្រអប់ដៃ ដោយមិនមានបញ្ហាអ្វីឡើយ។
លោក អូស្មាន ហាស្សាន់ ថ្លែងយ៉ាងដូច្នេះ
នៅព្រឹកមិញនេះនាឱកាសអញ្ជើញជួបសំណេះសំណាល និងនាំយកអំណោយជាកញ្ចប់អាហារ សម្រាប់ទទួលទានខែបួសរ៉ាម៉ាឌន ជូនដល់បងប្អូនប្រជាពលរដ្ឋសាសនិកខ្មែរឥស្លាម ដែលជួបការលំបាកក្នុងជីវភាព ចំនួន១០០គ្រួសារ នៅសង្កាត់សំបួរមាស ក្រុងកំពង់ចាម ខេត្តកំពង់ចាម។ ដោយក្នុងមួយគ្រូសារទទួលបាន អង្ករ១០គីឡូ និងគ្រឿងឧបភោគបរិភោគមួយចំនួន មានដូចជា ស្ករសរ ត្រីខ ទឹកដោះគោ ប្រេងឆា អំបិល និងដំណាប់ផ្លែល្មេី០១កញ្ចប់ផងដែរ៕SRP
ទីប្រឹក្សា ឆាវឆាវ
៩ ឧសភា ២០២០
