ខេត្តកំពង់ចាម – Page 172

ខេត្តកំពង់ចាម៖ សម្តេចព្រះអគ្គមហាសង្ឃរាជាធិបតីកិត្តិឧទ្ទេសបណ្ឌិត ទេព វង្ស សម្តេចព្រះមហាសង្ឃរាជាគណៈមហានិកាយ នៃព្រះរាជាណាចក្រកម្ពុជា បានយាងនិមន្តចុះសាកសួសុខទុក្ខ និងផ្តល់ជូននូវព្រះរាជអំណោយ ដល់ប្រជាពលរដ្ឋងាយរងគ្រោះ និងជួបការលំបាក ក្នុង ដំណាក់កាល ទប់ស្កាត់ ការ ឆ្លង រីករាល ដាល នៃ ជំងឺ កូវីដ ១៩ ចំនួន១៣២ គ្រួសារ នៅភូមិ១១ ឃុំចំការអណ្តូង ស្រុកចំការលើ ដែល បានធ្វើ ឡើង នាព្រឹក ថ្ងៃ ទី ១៩ ខែមិថុនា ឆ្នាំ ២០២០ ដោយ មាន ការ អញ្ជើញ ចូល រួម ពី លោក ខ្លូត ផន ប្រធាន ក្រុមប្រឹក្សា ខេត្ត និង លោក អ៊ុន ចាន់ដា អភិបាលខេត្ត កំពង់ចាម ព្រមទាំង ថ្នាក់ដឹកនាំ ព្រះសង្ឃ មន្ត្រី រាជការ និង ពុទ្ធបរិស័ទ ជាច្រើន អង្គ នាក់ ផង ដែរ ។

សម្ដេចព្រះ អគ្គ មហា សង្ឃ រាជាធិបតី ទេព វង្ស បាន មាន ព្រះរាជ បន្ទូល សំណេះសំណាល សាកសួរសុខទុក្ខ ប្រជាពលរដ្ឋ ដែល ចូលរួម ក្នុង ពិធី នេះ ទាំងអស់ ដោយ បាន សំដែង ព្រះ ហឫទ័យ មេត្ដាធម៌ និង ផ្ដល់ នូវដំបូន្មាន ជា ច្រើន ដោយ មានព្រះបន្ទួលលើកឡើងអំពីពុទ្ធិប្រវត្តិស្តីពីការអប់រំទូន្មានទៅតាមផ្លូវព្រះពុទ្ធ ព្រះសម្មាសម្ពុទ្ធព្រះបរមគ្រូនៃយើង ក៏ដូចជាការអប់រំទៅតាមបែបអាណាចក្រផងដែរ។ បន្ទាប់ មក ព្រះ អង្គ បាន ប្រទាន ព្រះរាជ អំណោយ ជា សំភារ និង ថវិកា ចំពោះ ប្រជាពលរដ្ឋ ដែល ងាយ រងគ្រោះ និង ជួប ការ លំបាក ទាំង ១៣២គ្រួសារ ដោយ ក្នុងមួយគ្រួសារៗទទួលបាន អង្ករ២៥ គីឡូក្រាម, មី០១កេះ, ត្រីខមួយយួរ , និងថវិកាចំនួន៣០,០០០ រៀល។ ព្រមទាំង បាន ប្រគេនទានព្រះវស្សា គ្រឿងឧបភោគ និងបច្ច័យដល់វត្តចំនួន៣ ក្នុងឃុំចំការអណ្តូង ស្រុកចំការលើ នោះផងដែរ ។

ជាមួយគ្នា នោះ លោក អ៊ុន ចាន់ដា អភិបាលខេត្ត កំពង់ចាម ក៏បាន អំពាវនាវ ដល់ បងប្អូន ប្រជាពលរដ្ឋ ឲ្យ បន្ត ការ ប្រុងប្រយ័ត្ន ចំពោះ ការ ឆ្លង រីករាល ដាល នៃ ជំងឺ កូវីដ ១៩ ដោយ ត្រូវ អនុវត្ត តាម ការ ណែនាំ របស់ ក្រសួង សុខាភិបាល ឲ្យ បាន ជាប់ ជា ប្រចាំ ដើម្បីជៀសឲ្យផុតពីការឆ្លងរាតត្បាត នៃជម្ងឺ ដ៏ កាច សាហាវ នេះ ដែលពិភពលោក នៅមិនទាន់មានថ្នាំ ការពារ នៅឡើយទេ ៕SRP

ខេត្តកំពង់ចាម៖លោក អ៊ុន ចាន់ដា អភិបាលខេត្តកំពង់ចាម នៅព្រឹកថ្ងៃព្រហស្បតិ៍ទី១៨ខែមិថុនានេះបានអញ្ជើញចូលរួមប្រារព្ធពិធីបែបសាសនាបួងសួងសូមពរសេចក្ដីសុខចម្រើន ពីម្ចាស់ទឹក ម្ចាស់ដី ដើម្បីបន្តការកសាងអគាររដ្ឋបាលថ្មី របស់សាលាខេត្តកំពង់ចាម ក្រោយពីបានផ្អាកការសាងសង់មួយរយៈ។
នាឱកាសនោះដែរ លោក អ៊ុន ចាន់ដា បានអញ្ជើញអុចធូបបួងសួងសូមពរ សេចក្ដីសុខពី រូបសំណាកព្រះអង្គខ្មៅ ក៏ដូចជាបារមី វត្ថុស័ក្ដិសិទ្ធទាំងអស់ ដែលបីបាច់ថែរក្សាសាលាខេត្តទាំងមូល សូមឲ្យកិច្ចដំណើរការសាងសង់បន្ត នូវអគារដ្ឋបាលថ្មី ប្រព្រឹត្តទៅប្រកបដោយសេចក្ដីសុខ សេចក្ដីចម្រើន និងសម្រេចលទ្ធផលជោគជ័យ ទៅតាមការគ្រោងទុក។
លោកអ៊ុន ចាន់ដា បានបញ្ជាក់ថា ដោយមើលឃើញ ពីការលំបាករបស់មន្ត្រី ដែលកំពុងបម្រើការងារនៅសាលាខេត្ត ក៏ដូចជា ការផ្តល់នូវទីកន្លែងសមរម្យ សម្រាប់មន្ត្រីបំពេញការងារប្រចាំថ្ងៃ ក្នុងការបម្រើសេវាសាធារណៈ ដល់បងប្អូនប្រជាពលរដ្ឋ និងសាធារណៈជន ដែលមកទទួលសេវាសាធារណៈ នៅសាលាខេត្តនោះ គណៈអភិបាល បានឯកភាព និងអនុញ្ញាតឲ្យបន្តការសាងសង់ អគាររដ្ឋបាលថ្មីនេះឡើងវិញជាបន្តទៀត។
គួរបញ្ជាក់ផងដែរថា គម្រោងអាគារថ្មី នៃរដ្ឋបាលសាលាខេត្តនេះ ត្រូវបានសាងសង់ឡើងអំពីបេតុងអាមេ ជញ្ជាំងរៀបឥដ្ឋ និងតំបូលប្រក់ក្បឿង ដែលមានទំហំបណ្តាយជាង៥៣ម៉ែត្រ ទទឹង២៤ម៉ែត្រ និងកម្ពស់៣ជាន់ មានទីតាំងនៅក្នុងបរិវេណសាលាខេត្ត ស្ថិតក្នុងភូមិទី៧ សង្កាត់កំពង់ចាម ក្រុងកំពង់ចាម។ ក្រៅពីអគារថ្មីនេះដែរ រដ្ឋបាលខេត្តកំពង់ចាម ក៏មានអគារចាស់ជាច្រើន ត្រូវបានធ្វើការជួសជុលកែលម្អ ទុកសម្រាប់មន្ត្រីបម្រើការងារ ជារៀងរាល់ថ្ងៃ ផងដែរ៕SRP

ខេត្តកំពង់ចាម៖លោកនាយកល្អ គ្រូបង្រៀនល្អ និងគ្រូឆ្នេីម នៅតាមសាលាបឋមសិក្សានានា ក្នុងខេត្តកំពង់ចាម ចំនួន១៥នាក់ ទទួលបានប័ណ្ណសសេីរ ពានរង្វាន់ សម្តេចតេជោ ហ៊ុន សែន។
ការផ្តល់ពានរង្វាន់ជ័យលាភីនេះត្រូវបានធ្វេីឡើងនារសៀលថ្ងៃទី១៥ ខែមិថុនា ឆ្នាំ២០២០នេះ នៅសាលាគរុកោសល្យ និងវិក្រិតការខេត្តកំពង់ចាម ក្រោមវត្តមានលោក ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា ដោយមានការអញ្ជើញចូលរួមពី លោក អ៊ុន ចាន់ដា អភិបាលខេត្តកំពង់ចាម ថ្នាក់ដឹកនាំមន្ទីរពាក់ព័ន្ធ និងលោកគ្រូ អ្នកគ្រូ ជាច្រើនរូបផងដែរ។ឆ្លៀតក្នុងឱកាសនោះដែរ លោកហង់ ជួនណារ៉ុន បានថ្លែងថា តាមរយៈការផ្តល់ពានរង្វាន់នេះ គឺជាការលើកទឹកចិត្តចំពោះការខិតខំប្រឹងប្រែង របស់លោកគ្រូ អ្នកគ្រូ ហើយក៏ សូមឲ្យបន្តការខិតខំប្រឹងប្រែងនេះតទៅទៀត ពីព្រោះថានាយកល្អ គ្រូបង្រៀនល្អ និងសាលារៀនល្អស្អាត គឺជាមូលដ្ឋានគ្រឹះនៃការអប់រំសិក្សា។ ជាមួយគ្នានោះ លោកបណ្ឌិតសភាចារ្យ បានធ្វើការថ្លែងអរគុណដល់គណៈគ្រប់គ្រងសាលា លោកគ្រូ អ្នកគ្រូ ទាំងអស់ដែលបានខិតខំបង្រៀន ទាំងការបង្រៀនដោយផ្ទាល់ មុនពេលផ្ទុះនូវជម្ងឺកូវីដ១៩ និងការសិក្សាពីចម្ងាយក្ដី ដើម្បីចូលរួមកែខៃគុណភាពអប់រំសិក្សា ឲ្យបានល្អប្រសើរឡើងថែមមួយកម្រិតទៀត ព្រោះបើគ្មានការទំនាក់ទំនងរវាងគ្រូ និងសិស្សទេនោះ ប្រសិទ្ធភាពនៃការបង្រៀនក៏មិនមានជាលក្ខណៈពេញលេញនោះដែរ។

គួរបញ្ចាក់ផងដែរថា លោកគ្រូ អ្នកគ្រូ ដែលទទួលបានពានរង្វាន់ និងបណ្ណ័សសេីរពី សម្តេច អគ្គមហាសេនាបតី តេជោ ហ៊ុន សែន ក្នុងខេត្តកំពង់ចាម មានចំនួន១៥នាក់ ក្នុងនោះមាន នាយកសាលាដែលដឹកនាំល្អ ចំនួន៥នាក់ គ្រូល្អចំនួន៣នាក់ គ្រូឆ្នេីមភាសាខ្មែរចំនួន៤នាក់ និងគ្រូឆ្នេីមគណិតចំនួន៣នាក់ផងដែរ៕SRP

ខេត្តកំពង់ចាម៖លោក អ៊ុន ចាន់ដា អភិបាលខេត្តកំពង់ចាមនៅព្រឹកថ្ងៃទី១៥ ខែមិថុនា ឆ្នាំ២០២០នេះ បានអញ្ជើញចុះពិនិត្យការរដ្ឋានសាងសង់ច្រាំងទន្លេ នៅក្រោយសាលាសង្កាត់កំពង់ចាម និងនៅច្រាំងទន្លេ ក្នុងភូមិពង្រលិច ឃុំពង្រ ស្រុកកោះសូទិន។

គួរបញ្ជាក់ផងដែរថា ការសាងសង់ខឿនច្រាំងទន្លេនៅជាប់ខាងក្រោយសាលាសង្កាត់កំពង់ចាម ប្រវែង១៨៥ម៉ែត្រ ស្ថិតនៅក្នុងក្រុងកំពង់ចាម ដោយចំណាយកញ្ចប់ថវិការបស់រដ្ឋបាលខេត្តកំពង់ចាម ត្រូវបានបើកការដ្ឋានសាងសង់កាលពីថ្ងៃទី២៣ ខែមីនា ឆ្នាំ២០២០ កន្លងទៅថ្មីៗនេះ។
ដោយឡែកច្រាំងទន្លេ នៅក្នុងភូមិពង្រលិច ឃុំពង្រ ស្រុកកោះសូទិន បានរងការបាក់ស្រុតកាលពីពេលថ្មីៗនេះ បណ្តាលឲ្យប៉ះពាល់ហេដ្ឋរចនាសម័្ពន្ធផ្លូវកៅស៊ូនៅចំណុចនោះផងដែរ។ ដោយមើលឃើញពីផលប៉ះពាល់ និងការគំរាមកំហែងនៅតំបន់នោះ លោក អ៊ុន ចាន់ដា បានឲ្យក្រុមការងារបច្ចេកទេសមន្ទីរធនធានទឹក និងឧតុនិយម ចុះសិក្សាលក្ខណៈបច្ចេកទេសយ៉ាងម៉ត់ចត់។ ជាមួយគ្នានេះ រដ្ឋបាលខេត្ត បានអនុញ្ញាតិឲ្យ វិស័យឯកជនដែលមានបទពិសោធន៍លើការងារសាងសង់ច្រាំង ធ្វើការសាងសង់ខឿនការពារច្រាំងទន្លេនៅទីតាំងខាងលើនេះ ដោយប្រើប្រាស់កញ្ចប់ថវិកាប្រចាំឆ្នាំរបស់រដ្ឋបាលខេត្ត។
បងប្អូនប្រជាពលរដ្ឋដែលធ្វើដំណើរឆ្លងកាត់តំបន់នោះ ពិសេសអ្នកដែលរស់នៅជុំវិញតំបន់រងគ្រោះដោយការបាក់ស្រុតច្រាំងទន្លេនេះ បានថ្លែងអំណរគុណចំពោះលោកអភិបាលខេត្ត ដែលបានយកចិត្តទុកដាក់ គិតគូពីសុខទុក្ខរបស់ប្រជាពលរដ្ឋ ដោយបានសាងសង់ខឿនការពារច្រាំងទន្លេនេះឡើង ដើម្បីបញ្ចៀសនូវផលវិបាកនាពេលខាងមុខផងដែរ៕SRP