ខេត្តព្រៃវែង៖ ប្តីប្រពន្ធពីរនាក់ដែលជាអ្នកលក់ផ្លែឈើតាមចិញ្ចើមថ្នល់ ត្រូវបានជនបែកថ្នាំម្នាក់ វាយសំពងស្ទើស្លាប់ ដោយសារតែទៅហាមឃាត់ជនបែកថ្នាំនោះ មិនអោយវាយកម្ទេចទូ ATM ធនាគារ។
ហេតុការណ៍នេះបានកើតឡើង កាលពីវេលាម៉ោង១រំលងអាទ្រាធ យប់ថ្ងៃទី០៨ ឈានចូលព្រឹកថ្ងៃទី០៩សីហា នៅតាមបណ្តោយផ្លូវជាតិលេខ១ ក្នុងភូមិ១ ឃុំព្រែកខ្សាយ(ខ) ស្រុកពាមរក៌៍ខេត្តព្រៃវែង។
ជនរងគ្រោះជាប្តីមានឈ្មោះ ជឹម ឡេង អាយុ៥៣ឆ្នាំ រងរបួសបែកលើចិញ្ចើមចំនួន២កន្លែង និងស្រ្តីជាប្រពន្ធឈ្មោះ ឡេ ថាន់ទៀង អាយុ៥០ឆ្នាំ រងរបួសធ្ងន់ បែករយះក្បាលខាងមុខត្រង់ថ្ងាស១កន្លែង និងក្បាលផ្នែកខាងក្រោយ១កន្លែង ហើយត្រូវបានក្រុមគ្រួសារបញ្ជូនយកទៅសង្គ្រោះបន្ទាន់ នៅរាជធានីភ្នំពេញទាំងយប់។ ចំណែកជនបង្កមានឈ្មោះ ខៀវ រតនា ភេទប្រុស អាយុ២៩ឆ្នាំ មានទីលំនៅក្នុងភូមិស្ទឹងស្លូត ឃុំអ្នកលឿង ស្រុកពាមរក៍ត្រូវបានសមត្ថកិច្ចអះអាងថា ជាមនុស្សបែកថ្នាំ និងត្រូវបានសមត្ថកិច្ចធ្វើការឃាត់ខ្លួនភ្លាមៗ បន្ទាប់ពីធ្វើសកម្មភាពវាយសំពងទៅលើជនរងគ្រោះ។
សមត្ថកិច្ចស្រុកពាមរក៍ បានអោយដឹងថា មុនពេលកើតហេតុនោះ ជនបង្កដែលជាមនុស្សបែកថ្នាំ បានដើរស្រែកឡូឡាវង្វេងវង្វាន់តែម្នាក់ឯងពេញផ្លូវ ហើយបន្ទាប់មកសុខៗស្រាប់តែកាន់ឈើជ្រុង ចូលទៅវាយកម្ទេចរានព្រះភូមិនៅក្នុងធនាគារប្រៃសណីយ៍កម្ពុជា ដែលនៅជាប់ផ្លូវជាតិលេខ១ និងរកវាយសន្តិសុខនៅយាមក្នុងធនាគារទៀត ហើយបន្ទាប់មកក៏ចេញមករកវាយទូ ATM ដែលនៅខាងក្រៅទៀត ដោយឃើញបែបនេះ ជនរងគ្រោះទាំង២នាក់ប្តីប្រពន្ធ បានស្រែកហាមឃាត់ជនបែកថ្នាំនោះ ធ្វើអោយជននោះខឹង ក៏ស្ទុះមកវាយសន្ធាប់លើជនរងគ្រោះ បណ្តាលអោយរងរបួសបែបនេះតែម្តង។
ប្រភពដដែលនេះបានបញ្ជាក់ថា ក្រោយឃើញសកម្មភាពបែបនេះ សន្តិសុខដែលយាមនៅខាងក្នុងធនាគារនោះ បានរាយការណ៍មកសមត្ថកិច្ចប៉ូស្តិ៍រដ្ឋបាល ចុះទៅអន្តរាគមនិងចាប់ខ្លួនជនបង្កបានភ្លាមៗ។ បច្ចុប្បន្ននេះ កំពុងកសាងសំណុំរឿងចាត់ការបន្តទៅតាមនិតិវិធី៕SRP
