ខេត្តកំពង់ចាម – Page 119

ខេត្តកំពង់ចាម៖លោក អ៊ុន ចាន់ដា អភិបាលខេត្តកំពង់ចាម នៅរសៀលថ្ងៃទី១៨ ខែឧសភា នេះ បានទទួលអំណោយ ថវិកានិងសម្ភារពីសប្បុរសជននានា។

លោកអ៊ុន ចាន់ដា បានថ្លែងអំណរគុណយ៉ាងជ្រាលជ្រៅ ចំពោះសប្បុរសជនទាំងអស់ ដែលបាននាំយកអំណោយមនុស្សធម៌ មកជួយឧបត្ថម្ភដល់រដ្ឋបាលខេត្ត សម្រាប់យកទៅ ជួយសម្រួលដល់ទុក្ខលំបាក របស់ប្រជាពលរដ្ឋ ដែលរងគ្រោះដោយគ្រោះមហន្តរាយផ្សេងៗ និងប្រេីប្រាស់ក្នុងយុទ្ធនាការប្រយុទ្ធប្រឆាំងនឹងជំងឺកូវីដ-១៩ ជាពិសេសការផ្គត់ផ្គង់ ដល់ប្រជាពលរដ្ឋដែលប្រឈមនឹងការខ្វះខាត និងពលករចំណូលស្រុក ដែលកំពុងធ្វើចត្តាឡីស័ក ក្នុងភូមិសាស្ត្រខេត្តកំពង់ចាម។

អភិបាលខេត្ត ក៏បានជូនពរ និងសង្ឃឹមជឿជាក់ថា បងប្អូនសប្បុរសជន ឬម្ចាស់ក្រុមហ៊ុននានា នឹងបន្តជួយឧបត្ថម្ភគាំទ្រដល់រដ្ឋបាលខេត្ត ក្នុងការចូលរួមប្រយុទ្ធប្រឆាំងនឹងជំងឺឆ្លងកូវីដ-១៩ ជាបន្តផងដែរ។

គួរបញ្ជាក់ផងដែរថា ក្នុងពិធីប្រគល់ និងទទួលអំណោយនេះ សាខាកាកបាទក្រហមកម្ពុជាខេត្តកំពង់ចាម បានទទួលការឧបត្ថម្ភគាំទ្រពី ស្នងការរដ្ឋាននគរបាលខេត្តកំពង់ចាម នូវថវិកា ចំនួន ១៦លាន ៨០ម៉ឺនរៀល។ លោក លូ គឹមឈន់ ប្រតិភូរាជរដ្ឋាភិបាលកម្ពុជា ឧបត្ថម្ភថវិកា ចំនួន ២០លានរៀល។ លោក សុីម គង់ អភិបាលស្រុកស្រីសន្ធរ ឧបត្ថម្ភថវិកា ចំនួន ៦ ៦៦៥ ០០០រៀល។
ដោយឡែក គណៈកម្មការប្រយុទ្ធប្រឆាំងនឹងជំងឺកូវីដ-១៩ បានទទួលការឧបត្ថម្ភពីព្រះមន្ត្រីសង្ឃ នូវអង្ករ ចំនួន ១តោន និងទឹកបរិសុទ្ធ ចំនួន ៣២០៥យួរ។ សមាគមកាតូលិកភូមិភាគកំពង់ចាម ឧបត្ថមម៉ាស ចំនួន ៥ម៉ឺនម៉ាស។ ធនាគារវឌ្ឍនៈ ឧបត្ថម្ភម៉ាស ចំនួន ២០កេស និងអាល់កុល ៣កាន។សាខាក្រុមហ៊ុនដឹកជញ្ជូនវីរះប៊ុនថាំខេត្តកំពង់ចាម ឧបត្ថម្ភ ថវិកាចំនួន ៤០ម៉ឺនរៀល ទឹកបរិសុទ្ធ៥០យួរ និងម៉ាសចំនួន ១កេស៕SRP

ខេត្តកំពង់ចាម៖ប្រជាពលរដ្ឋរងគ្រោះដោយខ្យល់កន្ត្រាក់ ចំនួន ៧០គ្រួសារ មកពីឃុំព្រែកកុយ ឃុំរាយប៉ាយ និងឃុំព្រែកក្របៅ ស្រុកកងមាស ខេត្តកំពង់ចាម បានទទួលអំណោយរបស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ធានកាកបាទក្រហមកម្ពុជា។

ការទទួលបានអំណោយនៅព្រឹកថ្ងៃទី១៨ មិញនេះ តាមរយ:លោកអ៊ុន ចាន់ដា ភិបាលខេត្តកំពង់ចាម។

លោក អ៊ុន ចាន់ដា បានចូលរួមសម្តែងនូវការសោកស្តាយជាមួយគ្រួសាររងគ្រោះ ចំពោះឧប្បត្តិហេតុធម្មជាតិដែលកើតឡើងដោយស្មានមិនដល់នេះ ក្នុងស្ថានភាព ដែលជីវភាពបងប្អូនកំពុងតែរងការលំបាកដោយការឆ្លងរាតត្បាតនៃជម្ងឺកូវីដ-១៩។ លោកអ៊ុន ចាន់ដា បានពាំនាំនូវការផ្ដាំផ្ញើសួរសុខទុក្ខពីសំណាក់ សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលជានិច្ចកាល សម្តេច តែងតែយកចិត្តទុកដាក់គិតគូរចំពោះសុខទុក្ខប្រជាពលរដ្ឋរងគ្រោះ និងងាយរងគ្រោះ ដោយមិនប្រកាន់វណ្ណៈ ជំនឿសាសនា ឬនិន្នាការនយោបាយអ្វីឡើយ ហើយលោក បានចាត់តំណាង ចុះអន្តរាគមន៍ ផ្តល់ជំនួយសង្រ្គោះ ជួយសម្រាលទុក្ខលំបាក ទាន់ពេលវេលា។

អភិបាលខេត្ត ក៏បាន សំណូមពរ ដល់ប្រជាពលរដ្ឋ រងគ្រោះទាំងអស់ ត្រូវ ខិតខំប្រកបរបរចិញ្ចឹមជីវិត ដើម្បីលើកកម្ពស់ជីវភាពគ្រួសារ។ លោកក៏បានអំពាវនាវដល់ប្រជាពលរដ្ឋទាំងអស់ ត្រូវ បង្កើនការ ការពារខ្លួន ឲ្យជៀសផុតពីការឆ្លង ជំងឺកូវីដ-១៩ ដោយត្រូវអនុវត្ត ឲ្យ បានខ្ជាប់ខ្ជួននូវវិធានសុខាភិបាល ” ៣ការពារ ៣កុំ ” ពិសេស ការលាងសម្អាតដៃជាប្រចាំ, ការអនុវត្តន៍កាតព្វកិច្ចពាក់ម៉ាស់ , កាតព្វកិច្ចរក្សាគម្លាតសុវត្ថិភាពសង្គម និងគម្លាតសុវត្ថិភាពបុគ្គល តាមអនុក្រឹត្យរបស់រាជរដ្ឋាភិបាល និងសេចក្តីជូនដំណឹង របស់ក្រសួងសុខាភិបាល ក្នងដំណាក់កាលនៃការឆ្លងរាលដាលនៃជំងឺកូវីដ-១៩ ក្នុងសហគមន៍។

គួរ បញ្ជាក់ ថា អំណោយដែលបានផ្ដល់ជូន គ្រួសាររងគ្រោះ ទាំង ៧០គ្រួសារ ក្នុង១គ្រួសារ ទទួលបាន ៖ អង្ករ ២៥គីឡូក្រាម , មី ១កេស, ទឹកត្រី ១យួរ ,ទឹកសុីអុីវ ១យួរ, ត្រីខ ១០កំប៉ុង , ឃីត ១ និង អាវយឺត ២ ។ ចំពោះ ថវិកា បានផ្តល់ជូនតាមកម្រិតនៃការខូចខាតផងដែរ ៕SRP

ខេត្តកំពង់ចាម៖លោក អ៊ុន ចាន់ដា អភិបាល ខេត្តកំពង់ចាម បានដាក់ចេញបទបញ្ជា ដល់មន្ត្រីពាក់ព័ន្ធទាំងអស់ ត្រូវធ្វើការទប់ស្កាត់រាល់ការរំលោភ ឈូសឆាយ ដុតរាន និងការលក់ដូរ ដោយខុសច្បាប់ ដីព្រៃលិចទឹក។

ការដាក់ចេញនូវបទបញ្ជា ធ្វើឡើងថ្ងៃទី១៧ ខែឧសភា ឆ្នាំ២០២១នេះ នៅសាលាខេត្ត ក្នុងកិច្ចប្រជុំដោះស្រាយ ករណីទន្ទ្រាន ឈូសឆាយដីព្រៃលិចទឹក ដែលជាសម្បត្តិរបស់រដ្ឋមួយកន្លែង ស្ថិតនៅក្នុងឃុំព្រែកដំបូក ស្រុកស្រីសន្ធរ ខេត្តកំពង់ចាម។

លោកអ៊ុន ចាន់ដា បានមានប្រសាសន៍ ទៅកាន់អង្គប្រជុំនាឱកាសនោះថា ដីព្រៃលិចទឹកគឺជាជម្រក(សម្បុក)ត្រីពង នៅរដូវទឹកលិច និងជាតំបន់ជីវចម្រុះ ដែលត្រូវអភិរក្ស។

អភិបាលខេត្ត បានរំលឹកថា កន្លងមករដ្ឋបាលខេត្តកំពង់ចាម បានចេញសេចក្តីណែនាំ និងផ្សព្វផ្សាយ ព្រមទាំងបានចុះត្រួតពិនិត្យជាប់ជាប្រចាំ និងបានទប់ស្កាត់រាល់ការរំលោភ ការឈូសឆាយ ការដុតរាន និងការលក់ដូរដោយខុសច្បាប់ ព្រោះដីព្រៃលិចទឹក ជាទ្រព្យសម្បត្តិសាធារណ:របស់រដ្ឋ ព្រមទាំងមានសារ:សំខាន់ក្នុងការបម្រើផលប្រយោជន៍ដល់បងប្អូនប្រជាសហគមន៍ និងសម្រាប់អភិវឌ្ឍន៍ប្រទេសជាតិផងដែរ។ ប៉ុន្តែទន្ទឹមនេះ ដីព្រៃលិចទឹក ក៏នៅតែមានជនខិលខូចមួយចំនួនបានប្រើប្រាស់គ្រប់មធ្យោបាយដើម្បីប្រែក្លាយដីតំបន់នោះ មកជាកម្មសិទ្ធិឯកជនទៅវិញ៕SRP

ខេត្តកំពង់ចាម៖លោក អ៊ុន ចាន់ដា អភិបាលខេត្តកំពង់ចាម និងជាប្រធានគណៈកម្មការខេត្តប្រយុទ្ធប្រឆាំងជំងឺកូវីដ-១៩ នៅព្រឹកមិញនេះ បានដឹកនាំក្រុមការងារចុះពិនិត្យស្រាវជ្រាវ រកអ្នកពាក់ព័ន្ធ ជាបនបន្ទាន់ដើម្បីធ្វើតេស្តរកវីរុសកូវីដ-១៩ និងបន្តចុះពិនិត្យស្ថានភាពបិទខ្ទប់ ភូមិអកទៀង ស្ថិតនៅក្នុងឃុំតាំងក្រាំង ស្រុកបាធាយ ដែលមានពលរដ្ឋវិជ្ជមានកូវីដ-១៩។

ការចុះពិនិត្យនេះ បន្ទាប់ពីទទួលលទ្ធផលវិជ្ជមានកូវីត-១៩ លើកម្មករ កម្មការិនី ចំនួន៧នាក់ និងអ្នកប៉ះពាល់ជាង២០០នាក់ នៅរោងចក្រ លី ឈាងខប ស្ថិតនៅក្នុងភូមិបាធាយ ឃុំបាធាយ ស្រុកបាធាយ។

អភិបាលខេត្តកំពង់ចាម បានថ្លែងថា បន្ទាប់ពីរកឃើញករណីវិជ្ជមានកូវីដ-១៩ លើកម្មករ កម្មការិនី ចំនួន ៧នាក់ ក្នុងនោះក៏មានអ្នកពាក់ព័ន្ធជាង២០០នាក់ ដែលចាំបាច់ត្រូវឲ្យរោងចក្រកាត់ដេរ លី ឈាងខបនេះ ផ្អាកសកម្មភាពជាបណ្ដោះអាសន្ន រយៈពេល១៤ថ្ងៃ គឺចាប់ពីថ្ងៃទី១០ រហូតដល់ថ្ងៃទី២៣ ខែឧសភា ឆ្នាំ២០២១នេះ ដេីម្បីឲ្យកម្មករកម្មការិនីពាក់ព័ន្ធទាំងនោះ ធ្វើចត្តាឡីស័កតាមការកំណត់។

គួរបញ្ជាក់ថា រដ្ឋបាលខេត្តកំពង់ចាម បានចេញសេចក្តីប្រកាសព័ត៌មាន ស្តីពីករណីរកឃើញវិជ្ជមានកូវីដ-១៩ ចំនួន ១៦នាក់ ៖ ក្នុងនោះលទ្ធផលតេស្តរហ័សរកឃេីញវិជ្ជមានកូវីដ-១៩ ចំនួន ១១នាក់ គឺនៅស្រុកស្រីសន្ធរ ២នាក់, កងមាស ២នាក់ និងស្រុកបាធាយ ចំនួន ៧នាក់ ដោយឡែកលទ្ធផលបញ្ចាក់ពីវិទ្យាស្ថានសុខភាពសាធារណៈ ចំនួន ៥នាក់ទៀត ក្នុងនោះនៅស្រុកចំការលើ ៤នាក់ និងស្រុកកំពង់សៀម ១នាក់ និងករណីជាសះស្បើយ ចំនួន ៩នាក់ ផងដែរ កាលពីថ្ងៃទី៩ ខែឧសភា ឆ្នាំ២០២១នេះ៕SRP

ខេត្តកំពង់ចាម៖ប៉ូលិសខេត្តកំពង់ចាម បានសហការគ្នា ចាប់ខ្លួនមនុស្សចំនួន៥នាក់ ពាក់ព័ន្ធករណីលួចមានស្ថានទម្ងន់ទោស (បាញ់ដោយអាវុធខ្លី) ដោយធ្លាប់ធ្វើសកម្មភាពចំនួន១៥លើក «ក្នុងភូមិសាស្ត្រខេត្តកំពង់ចាម»។

ការចាប់ខ្លួនធ្វើឡើងកាលនៅថ្ងៃទី០៦ ខែឧសភា ឆ្នាំ២០២១ នៅក្នុងខេត្តកំពង់ចាម តាមបញ្ជារបស់បញ្ជាលោក នេត សាវឿន អគ្គស្នងការនគរបាលជាតិ។

នគរបាលខេត្ដកំពង់ចាមបានបញ្ជាក់ថាករណីនេះជំហ៊ានដំបូងបានចាប់ខ្លួនជនសង្ស័យបានចំនួន០៣នាក់៖ ១.ឈ្មោះ ឡាំ ឆុន ហៅ ឈុន វីរះ ហៅ ឡុងសម្បត្តិ ហៅឡុងធា ភេទប្រុសអាយុ៤៥ឆ្នាំមុខរបរមិនពិតប្រាកដ មានទីលំនៅភូមិក្រាំងដូង ឃុំសំរោង ស្រុកបន្ទាយមាស ខេត្តកំពត។

២.ឈ្មោះ ដេត សុផល ភេទប្រុស អាយុ៤៣ឆ្នាំ មុខរបរមិនពិតប្រាកដ មានទីលំនៅភូមិអំពិលតាពក ឃុំអំពិលតាពក ស្រុកអូររាំងឪ ខេត្តត្បូងឃ្មុំ។

៣.ឈ្មោះ ហោ ស្រីអូន ភេទស្រី អាយុ៤៨ឆ្នាំមានទីលំនៅភូមិវាលស្បូវ ឃុំអំពិល ស្រុកកំពង់សៀម ខេត្តកំពង់ចាម។ ដោយដកហូតវត្ថុតាងរួមមាន៖ ម៉ូតូជាមធ្យោបាយជិះធ្វើសកម្មភាព ចំនួន០៣គ្រឿង (ធុនសេ១២៥ ចំនួន០២គ្រឿង និងម៉ូតូម៉ាក វីហ្សិន ចំនួន០១ គ្រឿង) , ស្លាកលេខម៉ូតូចំនួន១៤ ស , អាវុធខ្លីចំនួន០១ដើម (ម៉ាក k59 ) , គ្រាប់ចំនួន១០គ្រាប់ , សោកាច់ចំនួន២៣គ្រាប់ និងសម្ភារវត្ថុតាងពាក់ព័ន្ធមួយចំនួនទៀត។

ផ្អែកតាមចម្លើយសារភាពរបស់ជនសង្ស័យបានឆ្លើយថា កន្លងមកពួកវាធ្លាប់ធ្វើសកម្មភាព ចំនួន១៥លើក (ក្នុងភូមិសាស្ត្រខេត្តកំពង់ចាម) ហើយម៉ូតូដែលធ្វើសកម្មភាពយកបានពីអំពើលួច គឺបានយកទៅលក់ឲ្យ មុខសញ្ញាទទួលផលចោរកម្ម នៅរាជធានីភ្នំពេញ។

នគរបាលបានបន្តថានៅថ្ងៃទី៧ ខែឧសភា ឆ្នាំ២០២១ បានបន្តចុះស្រាវជ្រាវបង្ក្រាបឃាត់ខ្លួនបានមុខសញ្ញាទទួលផលចោរកម្មបានចំនួន០២នាក់ទៀត នៅចំណុចតាមផ្លូវវិមានឈ្នះ ឈ្នះ ស្ថិតនៅសង្កាត់ព្រែកព្នៅ ខ័ណ្ឌព្រែកព្នៅ រាជធានីភ្នំពេញ។

១-ឈ្មោះ សួន រស្មី ភេទប្រុស អាយុ២៨ឆ្នាំ មានទីលំនៅភូមិប្រាំបីមុំ ឃុំប្រាំបីមុំ ស្រុកទ្រាំង ខេត្តតាកែវ។

២-ឈ្មោះ អ៊ួង សុខគា ភេទប្រុស អាយុ២៣ឆ្នាំ មានទីលំនៅភូមិចុងបឹង ឃុំម្កាក់ ស្រុកអង្គស្នួល ខេត្តកណ្ដាល។

ដកហូតសម្ភារវត្ថុតាងរួមមាន៖១-រថយន្តចំនួន០១គ្រឿង ម៉ាក កាម៉ារី ពណ៌ស ពាក់ផ្លាក់លេខ ២AQ-៩០៦៨ (ប្រើប្រាស់ស្លាកលេខក្លែងក្លាយ) ។

២-ទូរស័ព្ទដៃចំនួន០២គ្រឿង។ ៣-អត្តសញ្ញាណប័ណ្ណនគរបាលជាតិ (ក្លែងក្លាយ) មានឈ្មោះ បូ សំបេត ឋានន្តរស័ក្កិ អនុសេនីយ៍ឯក ឋានៈ មន្ត្រី អត្ថលេខ ៥៧៤៤៧ ។

បច្ចុប្បន្នជនសង្ស័យ រួមនឹងវត្ថុតាងត្រូវបានចងក្រងសំណុំរឿងតាមនីតិវិធី និងបានបញ្ជូនទៅ សាលាដំបូងខេត្តកំពង់ចាម អនុវត្តតាមផ្លូវច្បាប់៕SRP