ខេត្តសៀមរាប

ខេត្តសៀមរាប៖មានការបែកធ្លាយភាពមិនប្រក្រតីប្រធានមន្ទីរសង្គមកិច្ច អតីតយុទ្ធជន និងយុវនីតិសម្បទា ខេត្តសៀមរាប រឿងកឹបកេងថវិកាជាតិតាមរយ:។

នេះបើតាមព័ត៌មានក្នុងស្រុកមួយដែលបានបង្ហោះផ្សព្វផ្សាយជាសាធារណៈនៅថ្ងៃសុក្រ ទី ២៨ ខែមិថុនា ២០២៤នេះ។

យោងការតាមសារព័ត៌មានក្នុងស្រុកបានចុះផ្សាយថា
លោក គង់ សំអឿន ប្រធានមន្ទីរសង្គមកិច្ច អតីតយុទ្ធជន និងយុវនីតិសម្បទា ខេត្តសៀមរាប ចាប់តាំងពីចូលកាន់តំណែងដំបូង រហូតដល់ពេលនេះ គិតទៅទើបបានតែ២ឆ្នាំ តិចតួច ប៉ុន្តែទឹកលុយដែលលោកទទួលបានពីការកឹបកេងថវិកាជាតិ តាមរយ:ឃុបឃិត ស៊ីដាច់ លុយទិញសម្ភារ: អំណោយ សម្រាប់ចែកជូនអ្នកកក្រីក្រ និងមនុស្សចាស់ រួមមាន៖មី អង្ករ ត្រីខកំប៉ុង។ល។ ដោយក្នុង១ឆ្មាំៗស៊ីដាច់អស់មិនតិចជាង៣០០លានរៀលនោះទេ លើទឹកប្រាក់ចំណាយ សរុបខ្ទង់៥០០លានរៀល។

ប្រភពបានបញញជាក់ថា នៅឆ្នាំ២០២៤ នេះ ការទិញទំនិញ មានថវិកាច្រើនជាងឆ្នាំមុនទៅទៀត ហើយមកដល់ពេលនេះ ថវិកាខ្ទង់ ៥០០លានរៀលទៅ៦០០លានរៀល ត្រូវបានទូទាត់ និងថវិកាមួយចំនួនធំ បានរត់ចូលហោប៉ៅរបស់លោកប្រធានមន្ទីររូបនេះដោយស្ងាត់ស្ងៀម។

តាមប្រភពបានបន្តថា ប្រភពចំណូលរបស់លោក គង់ សំអឿន ប្រធានមន្ទីរសង្គមកិច្ច អតីតយុទ្ធជន និងយុវនីតិសម្បទា ខេត្តសៀមរាប គឺមានច្រើន នៅឆ្នាំ២០២៣ ពិសេសនៅឆ្នាំ ២០២៤នេះ។ ក្រៅពីថវិកាចំណាយផ្នែកទិញ មី អង្ករ ចែកអំណោយនោះ គឺ មានចំណាយផ្នែកសំណង់ រួមនិងការចំណាយផ្នែករដ្ឋបាល ដោយការចំណាយទាំងនោះ លោកប្រធានមន្ទីរទទួលបានផល់ប្រយោជន៏មួយផ្នែកធំ ជាហេតុធ្វើអោយលោកប្រធាន មន្ទីរ គង់ សំអឿន ល្មមអាចធ្វើអ្នកមានបានមួយរូបផងដែរនៅខេត្តសៀមរាប។

សូមរំលឹកថា លោក គង់ សំអឿន ក្របខ័ណ្ឌមន្ត្រីថ្នាក់លេខ២ ត្រូវបានប្រកាស ចូលកាន់មុខតំណែងជាប្រធានមន្ទីរសង្គមកិច្ច អតីតយុទ្ធជន និងយុវនីតិសម្បទា ខេត្តសៀមរាប ជំនួស លោក អោ ម៉ៅ ត្រូវបានផ្ទេរភារកិច្ចទៅបម្រើការងារនៅទីស្តីការក្រសួងសង្គមកិច្ច អតីតយុទ្ធជន និងយុវនីតិសម្បទា កាលថ្ងៃទី៦ ខែឧសភា ឆ្នាំ២០២២ រហូតដល់ពេលនេះមានរយ:២ឆ្នាំ ១ខែហើយ។

ទោះជាយ៉ាងណា សារព័ត៌មានដែលលាតត្រដាង នូវអង្គភាពមិនប្រក្រតី លោក គង់ សំអឿន ប្រធានមន្ទីរ សង្គមកិច្ច អតីតយុទ្ធជន និងយុវនីតិសម្បទា ខេត្តសៀមរាប មិនទាន់ទទួលបានការបំភ្លឺពីលោក គង់ សំអឿន ប្រធានមន្ទីររូបនេះនៅឡើយ។

ទីភ្នាក់ងារសារព័ត៌មាន សៀមរាប ប៉ុស្តិ៍ នៅមិនទាន់ទទួលបានការបំភ្លឺពីលោក គង់ សំអឿន ប្រធានមន្ទីរ សង្គមកិច្ច អតីតយុទ្ធជន និងយុវនីតិសម្បទា ខេត្តសៀមរាប នៅឡើយទេរហូតដល់ម៉ោងផ្សាយនៅព្រឹកថ្ងៃសៅរ៍នេះ៕SRP

ខេត្តសៀមរាប៖អភិបាលខេត្តសៀមរាប លោក ប្រាក់ សោភ័ណ បានដាក់បទបញ្ជា ឲ្យអាជ្ញាធរជំនាញពាក់ព័ន្ធទាំងអស់ ត្រូវបន្តបង្ក្រាប ទប់ស្កាត់នូវបញ្ហាក្មេងទំនេីង និងគ្រឿងញៀន។

អភិបាលខេត្តសៀមរាប ក៏បានលើកឡើងពីបញ្ហានៅតាមស្រុកមួយចំនួន មានហ្វូងដង្កូវស៉ីស្រូវរបស់បងប្អូនប្រជាពលរដ្ឋ។ ក្នុងន័យនេះ អភិបាលខេត្តក៏បាទបញ្ជាក់ថា ក្រុមការងារបច្ចេកទេស របស់មន្ទីរកសិកម្ម ក៏បាននឹងកំចាត់បាននៅតាមបណ្តាក្រុង ស្រុកមួយចំនួន ដែលកើតមាន ហ្វូងដង្កូវស៉ីស្រូវរបស់ពលរដ្ឋផងដែរ។

លោកប្រាក់ សោភ័ណ អភិបាលខេត្តសៀមរាប មានប្រសាសន៍យ៉ាងដូច្នេះ នៅក្នុងកិច្ចប្រជុំសាមញ្ញលេីកទី១ របស់ក្រមប្រឹក្សាខេត្តសៀមរាប អាណត្តិទី៤ ក្រោមអធិបតីភាពលោក លី សំរិទ្ធ ប្រធានក្រុមប្រឹក្សាខេត្ត។

ក្នុងក្នុងកិច្ចប្រជុំ របស់ក្រមប្រឹក្សាខេត្ត នៅថ្ងៃពុធនេះ លោកលី សំរិទ្ធ បានថ្លែងអំណរគុណដល់ អភិបាលខេត្ត បានបង្ហាញនូវសមិទ្ធផល ក៏ដូចជាផែនការ របស់រដ្ឋបាលខេត្ត ជូនដល់អង្គប្រជុំ នេះជាមួយកាយវិការមួយដ៏ប្រពៃ ដែលក្រុមប្រឹក្សានិងគណៈអភិបាលខេត្ត ត្រូវរួមគ្នាជាធ្លុងមួយ ដេីម្បីបន្តអភិវឌ្ឍន៍ខេត្តសៀមរាប ឱ្យកាន់តែរីកចម្រេីនថែមទៀត។

ប្រធានក្រុមប្រឹក្សាខេត្តក៏បានបញ្ជាក់ដល់អង្គប្រជុំផងដែរថា កិច្ចប្រជុំសាមញ្ញលេីកទី២ របស់ក្រុមប្រឹក្សាខេត្ត គឺរៀបចំមិនឱ្យតិចជាង២៥ថ្ងៃ និងលេីស ៣៥ឡេីយ ដូចនេះកិច្ចប្រជុំលេីកទី២ នឹងជម្រាបជូនក្នុងលិខិតអញ្ជេីញ៕SRP

លោកបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ក្នុងឋានៈជាប្រធានគណៈបញ្ជាការសន្តិសុខអចិន្ត្រៃយ៍សម្រាប់ការបោះឆ្នោត បានមានប្រសាសន៍ផ្ដល់តម្លៃខ្ពស់ចំពោះមរតក នៃការខិតខំកសាង និងរក្សាបរិយាកាសសន្តិសុខ ក្នុងដំណើរការបោះឆ្នោត នៅកម្ពុជា របស់ថ្នាក់ដឹកនាំជំនាន់មុន។

ការថ្លែងរបស់លោកបានធ្វើឡើងក្នុងពិធីបិទសន្និបាតបូកសរុបការងារបោះឆ្នោត ជ្រើសតាំងសមាជិកព្រឹទ្ធសភា នីតិកាលទី៥ និងការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី៤ របស់គណៈកម្មាធិការជាតិរៀបចំការបោះឆ្នោត (គ.ជ.ប) រៀបចំនៅក្រុងសៀមរាប ខេត្តសៀមរាប នារសៀលថ្ងៃចន្ទ ម្សិលមិញ។

បើតាមលោកស សុខា ការបោះឆ្នោតនៅកម្ពុជា ជាពិសេសក្នុងរយៈពេល ១០ឆ្នាំចុងក្រោយនេះ ទាំងការបោះឆ្នោតសកល និងអសកល ត្រូវបានមជ្ឈដ្ឋានជាតិ និងអន្តរជាតិ ទាំងអ្នកសង្កេតការណ៍ និងប្រជាពលរដ្ឋកម្ពុជាផ្ទាល់ ទទួលស្គាល់ជាឱឡារិកថា បានប្រព្រឹត្តទៅប្រកបដោយសន្តិសុខ និងសណ្ដាប់ធ្នាប់យ៉ាងល្អប្រសើរ ពោលគឺគ្មានឡើយអំពើហិង្សានយោបាយ ឬការបង្កហេតុផ្សេងៗ។

ក្នុងន័យនេះលោកបានគូសបញ្ជាក់ថា ក្នុងជានាមអ្នកបន្តវេន ដែលទទួលខុសត្រូវលើកិច្ចការសន្តិសុខបោះឆ្នោត លោក នឹងបន្តផ្ដល់កិច្ចសហការ ឱ្យបានល្អជាមួយ គ.ជ.ប ដើម្បីបន្តធានាអនុវត្តរដ្ឋធម្មនុញ្ញ ពិសេសគោលការណ៍ លទ្ធិប្រជាធិបតេយ្យ សេរីពហុបក្ស ដែលប្រជាពលរដ្ឋ មានភាពជាម្ចាស់ក្នុងការបោះឆ្នោតជ្រើសរើសតំណាងរបស់ខ្លួន ជាទៀតទាត់ស្របតាមច្បាប់។

លោក ប្រាជ្ញ ចន្ទ ប្រធានគណៈកម្មាធិការជាតិរៀបចំការបោះឆ្នោត បានមានប្រសាសន៍ថា ការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ និងការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី៤ ក្នុងឆ្នាំ២០២៤នេះ បានប្រព្រឹត្តទៅជាបន្តបន្ទាប់ ក្នុងបរិយាកាសដែលស្ថានភាពសង្គម សេដ្ឋកិច្ច និងនយោបាយ នៅកម្ពុជាមានការវិត្តល្អប្រសើរ ពិសេសគណបក្សនយោបាយ និងអង្គការជាតិ និងអន្តរជាតិ ភាគច្រើន បានចេញសេចក្ដីថ្លែងការណ៍គាំទ្រ និងកោតសរសើរ។

លោកបានធ្វើមូលវិចារការវាយតម្លៃ ជារួមរបស់ភាគីពាក់ព័ន្ធ ថាការបោះឆ្នោត ទាំងពីរចុងក្រោយនេះ មានបរិយាកាសសន្តិសុខ និងរបៀបរៀបរយល្អ គ្មានអំពើហិង្សា គ្មានការគំរាមកំហែង ពិសេសបានប្រព្រឹត្តទៅដោយសុវត្ថិភាព ឯករាជ្យ មិនលម្អៀង មានវិជ្ជាជីវៈ និងមានតម្លាភាព។ លោក ក៏បានថ្លែងអំណរគុណគណៈបញ្ជាការសន្តិសុខអចិន្ត្រៃយ៍ សម្រាប់ការបោះឆ្នោត រួមទាំងអាជ្ញាធរមូលដ្ឋានគ្រប់ថ្នាក់ ដែលផ្ដល់កិច្ចសហការយ៉ាងល្អលើការងារសន្តសុខបោះឆ្នោត៕SRP

ខេត្តសៀមរាប៖មន្ត្រីនគរបាលចំនួនពីររូប សមាជិកក្រុមប្រឹក្សា សង្កាត់១នាក់ និងបក្សពួក ត្រូវបានសាលាដំបូងខេត្តសៀមរាបសម្រេចចោទប្រកាន់ ឃុំខ្លួន។

ក្នុងសេចក្ដីប្រកាសចោទប្រកាន់របស់សាលាដំបូងខេត្តសៀមរាបបានបង្ហាញថា ការចោទប្រកាន់លើជនជាតិវៀតណាម ១នាក់ និងជនជាតិខ្មែរ ៥នាក់ ពីបទ កាន់កាប់ និងប្រើប្រាស់ អត្តសញ្ញាណប័ណ្ណសញ្ជាតិខ្មែរដោយខុសច្បាប់ ធ្វើអត្តសញ្ញាណប័ណ្ណសញ្ជាតិខ្មែរ ឱ្យជនដែលមិនមានសញ្ជាតិខ្មែរ ប្រើប្រាស់ឯកសារសាធារណៈក្លែង និងក្លែងបន្លំឯកសារសាធារណៈ

អ្នកនាំពាក្យអយ្យការអមសាលាដំបូងខេត្តសៀមរាប មានកិត្តិយសសូមជម្រាបជូនសាធារណជនឱ្យ បានជ្រាបថា៖ នៅថ្ងៃទី២៣ ខែមិថុនា ឆ្នាំ២០២៤ អយ្យការអមសាលាដំបូងខេត្តសៀមរាប បានចាត់ការលើ សំណុំរឿងព្រហ្មទណ្ឌលេខ៨៨០ ចុះថ្ងៃទី២៣ ខែមិថុនា ឆ្នាំ២០២៤ ទាក់ទងនឹងជនជាតិវៀតណាម ១នាក់ និងជនជាតិខ្មែរ ៥នាក់ មានគ្នាសរុបចំនួន ៦នាក់ សមត្ថកិច្ចបានឃាត់ខ្លួនចំនួន ៤នាក់ និងបក្សពួក ២នាក់បានគេចខ្លួន។ ក្រោយពីបានសួរចម្លើយជនសង្ស័យ និងពិនិត្យភស្តុតាងនានា ក្នុងសំណុំរឿង តំណាងអយ្យការបាន សម្រេចធ្វើការចោទប្រកាន់លើជនសង្ស័យ៖

១.ជនជាតិវៀតណាម១នាក់ ពីបទ កាន់កាប់ និងប្រើប្រាស់អត្តសញ្ញាណប័ណ្ណសញ្ជាតិខ្មែរ ដោយ ខុសច្បាប់ និងប្រើប្រាស់ឯកសារសាធារណៈក្លែង ប្រព្រឹត្តនៅចំណុចសង្កាត់សំបួរ ក្រុងសៀមរាប ខេត្តសៀមរាប កាលពីអំឡុងខែតុលា ឆ្នាំ២០២៣ និងថ្ងៃទី១៤ ខែមិថុនា ឆ្នាំ២០២៤ បទល្មើសព្រហ្មទណ្ឌ ដែលមានចែងឱ្យផ្តន្ទាទោសតាមបញ្ញត្តិមាត្រា ៣០ នៃច្បាប់ស្តីពីសញ្ជាតិ និងមាត្រា ៦៣០ នៃក្រមព្រហ្មទណ្ឌ។

២.ជនជាតិខ្មែរ៥នាក់ (ក្នុងនោះមានមុខរបរជា មន្ត្រីនគរបាលជាតិ២នាក់ សមាជិកក្រុមប្រឹក្សា សង្កាត់១នាក់ និង២នាក់ជាប្រជាពលរដ្ឋបានគេចខ្លួន) ពីបទ ធ្វើអត្តសញ្ញាណប័ណ្ណសញ្ជាតិខ្មែរឱ្យជនដែល មិនមានសញ្ជាតិខ្មែរ និងក្លែងបន្លំឯកសារសាធារណៈ ប្រព្រឹត្តនៅចំណុចសង្កាត់សំបូរ ក្រុងសៀមរាប ខេត្តសៀមរាប កាលពីអំឡុងខែតុលា ឆ្នាំ២០២៣ បទល្មើសព្រហ្មទណ្ឌដែលមានចែងឱ្យផ្តន្ទាទោសតាម បញ្ញត្តិមាត្រា ៣០ នៃច្បាប់ស្តីពីសញ្ជាតិ និងមាត្រា ៦២៩ នៃក្រមព្រហ្មទណ្ឌ តាមដីកាសន្និដ្ឋានបញ្ជូនរឿង ឱ្យស៊ើបសួរលេខ ១៣៣៨ អយធ ចុះថ្ងៃទី២៣ ខែមិថុនា ឆ្នាំ២០២៤ បញ្ជូនទៅចៅក្រមស៊ើបសួរនៃសាលា ដំបូងខេត្តសៀមរាប ដើម្បីចាត់ការបន្តតាមនីតិវិធីច្បាប់៕SRP

ខេត្តសៀមរាប៖ស្ត្រីម្នាក់បានស្លាប់និងម្នាក់ទៀតបានរងរបួសក្នុងហេតុការណ៍គ្រោះថ្នាក់ចរាចរណ៍។

ហេតុការណ៍បានកើតឡើង នៅថ្ងៃទី ១៥ ខែ មិថុនា ឆ្នាំ ២០២៤ វេលា ម៉ោង០៣ និង១០នាទី នៅត្រង់ចំណុច ខាងជើងស្តុបស៉ីវុត្ថា ចម្ងាយ 80មែត្រ ស្ថិតនៅ ភូមិ សាលាកន្សែង សង្កាត់ ស្វាយដង្គំ ក្រុងសៀមរាប លើផ្លូវព្រះសីហមុនី រវាងរថយន្តនិងម៉ូតូ។

សមត្ថកិច្ចបានឲ្យដឹងថា គ្រោះថ្នាក់ចរាចរណ៍នេះ
ម៉ូតូម៉ាក Zoomer X ពណ៌ស លឿងផ្លាកលេខ 1C -7981 ឧត្តរមានជ័យ បើកបរដោយឈ្មោះ រឿន ថារី ភេទស្រីអាយុ 19 ឆ្នាំនៅភូមិពង្រ ឃុំពង្រ ស្រុកចុងកាល់ ខេត្តឧត្តរមានជ័យ អ្នករួមដំណើរឈ្មោះ អ៉ី ថូង ភេទ ស្រី អាយុ 19 នៅភូមិជើងទៀន ឃុំជើងទៀន ស្រុកចុងកាល់ ខេត្តឧត្តរមានជ័យ  ទិសដៅពីត្បូងទៅជើង)។

ចំណែករថយន្ត ម៉ាកMitsubishi ពណ៌ក្រហមស ផ្លាកលេខ  3B -1863 ភ្នំពេញុំអ្នកបើកបរឈ្មោះ រី សារ៉ុងភេទប្រុសអាយុ 32 ឆ្នាំ។នៅភូមិកណ្ដៀង ឃុំស្វាយរំពារ ស្រុកបសេដ្ឋ ខេត្តកំពង់ស្ពឺ (ទិសដៅពីកើតបត់ឆ្វេងទៅត្បូង)។

សមត្ថកិច្ចបានបន្តថា ករណីនេះ បណ្តាលឲ្យ
ភាគីម៉តូ
– របួសធ្ងន់ម្នាក់(ស្រី)
-ស្លាប់ ឈ្មោះរឿន ថារី(ស្រី)

– ម៉ូតូខូចខាត (មធ្យម)
-រថយន្តខូចខាត(មធ្យម។

សាកសព ត្រូវបាន ប្រគល់ជូនក្រុមគ្រួសារយកទៅធ្វើបុណ្យតាមប្រពៃណី។ វត្ថុតាងរក្សាទុកនៅការិយាល័យនគរបាលចរាចរណ៍ផ្លូវគោក។ មូលហេតុ រថយន្តក្រុងដឹកអ្នកដំណើរបត់ឆ្វេង ខ្វះការប្រុងប្រយ័ត្ន៕SRP

ខេត្តសៀមរាប៖ឯកឧត្តម ប្រាក់ សោភ័ណ អភិបាលខេត្តសៀមរាប ដាក់បទបញ្ជា ជំរុញឱ្យគណៈបញ្ជាការឯកភាព រដ្ឋបាលក្រុង ស្រុក និងកងកម្លាំងសមត្ថកិច្ចពាក់ព័ន្ធទាំងអស់ ត្រូវបន្តរួមគ្នាបង្ក្រាបបទល្មើសនានា និងពង្រឹងការ អនុវត្តគោលនយោបាយ ភូមិ ឃុំ សង្កាត់ មានសុវត្ថិភាពឱ្យកាន់តែមានប្រិទ្ធភាព បន្ថែមទៀត ដើម្បីរក្សាបាននូវសុវត្ថិភាពសន្តិសុខ សណ្ដាប់ធ្នាប់ ជូនដល់ប្រជាពលរដ្ឋ នៅក្នុងមូលដ្ឋាន ស្របតាមចក្ខុវិស័យរបស់រាជរដ្ឋាភិបាល ក្នុងការប្រយុទ្ធប្រឆាំង រាល់សកម្មភាព ដែលបង្កឱ្យមានអសន្តិសុខ ដល់សង្គមជាតិ។

ការដាក់បទបញ្ជា ពីសំណាក់អភិបាលខេត្តសៀមរាប នៅថ្ងៃសុក្រនេះ ក្នុងឱកាស អញ្ជើញប្រកាស
ប្រធានក្រុមប្រឹក្សាក្រុងសៀមរាប និងសមាជិកក្រុមប្រឹក្សា ២១រូប អាណត្តិទី៤ ឲ្យចូលកាន់មុខតំណែងជាផ្លូវការ។

នៅសាលប្រជុំសាលាក្រុងសៀមរាប នៅថ្ងៃទី 14 ខែមិថុនា ឆ្នាំ 2024 នេះ ឯកឧត្តម ប្រាក់ សោភ័ណ
បានបញ្ជាក់បន្ថែមថា ការផ្តល់សេវាសាធារណៈ នានាជូនប្រជាពលរដ្ឋ ជាអាទិភាព ដែលត្រូវយកចិត្តទុកដាក់ជាប្រចាំ ដើម្បីធានាឱ្យ ប្រជាពលរដ្ឋ គ្រប់រូប និងសង្គមជាតិទាំងមូល មានសុខ សុវត្ថិភាព ល្អ លើកកម្ពស់ សោភណភាព អនាម័យបរិស្ថាន និងកាត់បន្ថយភាពក្រីក្រ និងគ្រោះថ្នាក់ ដែលបណ្តាលមកពីគ្រោះមហន្តរាយ និងជំងឺរាតត្បាតផ្សេងៗ ព្រមទាំងលើកទឹកចិត្ត ឱ្យមានការដោះស្រាយ វិវាទនៅមូលដ្ឋានក្រៅប្រព័ន្ធតុលាការ ដើម្បីបង្កភាពអនុគ្រោះដល់ដំណើរការអភិវឌ្ឍសេដ្ឋកិច្ច សង្គមកិច្ចនៅក្នុងមូលដ្ឋាន។

អភិបាលខេត្ត ក៏បានសង្កត់ធ្ងន់ថា ដើម្បីតបទៅនឹងគុណតម្លៃ នៃការជឿទកចិត្ត របស់ប្រជាពលរដ្ឋ ដែលបានចាត់តំណាង ឱ្យបោះឆ្នោតជ្រើសរើស ប្រធាន និងសមាជិកក្រុមប្រឹក្សាក្រុង នាពេលនេះ អាជ្ញាធរមូលដ្ឋានទាំងអស់ ត្រូវខិតខំបម្រើផលប្រយោជន៍ និងសេចក្តីត្រូវការរបស់ប្រជាពលរដ្ឋ ទាំងអស់ដោយស្មើភាព តម្លាភាព គណនេយ្យភាព សមធម៌ និងបរិយាបន្ន ជាពិសេសមិនត្រូវប្រកាន់និន្នាការនយោបាយណាមួយនោះឡើយ។

អភិបាលខេត្តសៀមរាបរូបនេះបានបញ្ជាក់ថា ត្រូវពង្រឹងស្មារតីសាមគ្គីភាព ឯកភាពផ្ទៃក្នុង ឱ្យបានល្អនៅក្នុងក្រុមប្រឹក្សា គណៈអភិបាល មន្ត្រីរាជការ និងកងកម្លាំងមានសមត្ថកិច្ច គ្រប់លំដាប់ថ្នាក់ ដោយឈរលើមូលដ្ឋាននៃការលើកកម្ពស់ ប្រសិទ្ធភាព ការងារ ការគោរពច្បាប់ គោរពគោលការណ៍នានា របស់រដ្ឋ និងពង្រឹងរបៀបរបបធ្វើការ ដើម្បីលើកកម្ពស់ការទទួលខុសត្រូវ និងភាពជាម្ចាស់ការ របស់មន្រ្តីនៅក្នុងការ បំពេញតួនាទី ភារកិច្ចរបស់ខ្លួន សំដៅអភិវឌ្ឍមូលដ្ឋាន និងឆ្លើយតប ចំពោះតម្រូវការរបស់ប្រជាពលរដ្ឋ ក្នុងដែនសមត្ថកិច្ច របស់ខ្លួនទាំងមូល៕SRP

ខេត្តសៀមរាប៖ត្រឹមតែលុយប៉ុណ្ណឹងសោះ បែជា ម្ចាស់សួនក្រអូបឃុនរាមបន្ទាយស្រី លោកវណ្ណ វណ្ណារ៉ា ហាក់បីលាក់មុខ មិនព្រមចេញមុខ ទទួលខុសត្រូវជួបជាមួយម្ចាស់លុយដែលខ្លួនបានជំពាក់ ចេញសែកនោះទេ។

លោកស្រីទូច ដាឡែន បានប្រាប់សារព័ត៌មានសៀមរាប ប៉ុស្តិ៍ ថា៖ លោកវណ្ណ វណ្ណារ៉ា ម្ចាស់សួនក្រអូបឃុនរាមបន្ទាយស្រី បានខ្ចីលុយលោកស្រីចំនួន 6 ពាន់ដុល្លារ តាំងពីឆ្នាំ 2021 ដោយបានដំកល់សែកមួយសន្លឹក ជាវត្ថុអះអាង។

តាមរយៈលិខិតចូលមកសារព័ត៌មាន សៀមរាប ប៉ុស្តិ៍ ស្រីទូច ដាឡែន បានស្នើសុំ ឱ្យអង្គភាពសារព័ត៌មាន សៀមរាប ប៉ុស្តិ៍ ជួយចុះផ្សាយ អំពី កូនបំណុលរបស់លោកស្រី ដែលមានឈ្មោះ លោកវណ្ណ វណ្ណារ៉ា ម្ចាស់សួនក្រអូបឃុនរាមបន្ទាយស្រី។

ក្នុងលិខិត ដែលបានពឹងពាក់ឲ្យសារព័ត៌មានសៀមរាប ប៉ុស្តិ៍ ជួយចុះផ្សាយ លោកវណ្ណ វណ្ណារ៉ា ម្ចាស់សួនក្រអូបឃុនរាមបន្ទាយស្រី ក្នុងទំព័រសារព័ត៌មានសៀមរាប ប៉ុស្តិ៍ ក្នុងការបើកមុខ របស់លោកវណ្ណ វណ្ណារ៉ា ផងដែរ។

លោកស្រី ទូច ដាឡែន បានបញ្ជាក់ថា ចាប់តាំងពីលោកវណ្ណ វណ្ណារ៉ា បានខ្ចីលុយលោកស្រីមក គឺលោកវណ្ណ វណ្ណារ៉ា មិនបានសងលុយមកលោកស្រីវិញនោះទេ ថែមទាំងប្លុកហ្វេសប៊ុកនិងតេឡេក្រាម ធ្វើឱ្យលោកស្រីមិនអាចទាក់ទង លោកវណ្ណ វណ្ណារ៉ា បានជុំវិញការជំពាក់លុយនេះ។

ពាក់ព័ន្ធទៅនឹង ការចោទប្រកាន់ សំណាក់លោកស្រីទូច ដាឡែន ចោទថា លោកវណ្ណ វណ្ណារ៉ា ជំពាក់លុយមិនព្រមសងបែបនេះ លោកវណ្ណ វណ្ណារ៉ា ធ្លាប់បានប្រាប់សារព័ត៌មាន សៀមរាប ប៉ុស្តិ៍ ដោយលោកទទួលស្គាល់ថា ពិតជាបានជំពាក់លុយ លោកស្រីទូច ដាឡែន ពិតប្រាកដមែន ថែមទាំងអោយលោកស្រីទូច ដាឡែន ប្ដឹងរូបលោកថែមទៀតផង។

បន្ថែមពីនេះ លោកវណ្ណ វណ្ណារ៉ា បានប្រាប់សារព័ត៌មានសៀមរាប ប៉ុស្ដិ៍ តាមប្រព័ន្ធតេឡេក្រាមថា « រឿងនេះមិនពាក់ពន្ធ័និងបងទេ ព្រោះបងមិនមែនតុលាការ ចាំមេធាវីខាងខ្ញុំរៀបចំឯកសាររួចរាល់ហើយគេនិងផ្តល់ដំណឹងជូន ព្រោះយើងមានរឿងត្រូវជជែកគ្នាដែរទាំងខាងបងនិងម្ចាស់លុយ សូមអគុណបង🙏»។

សូមបញ្ជាក់ នៅក្នុងលិខិតរបស់ ស្រីទូច ដាឡែន ដែលបានស្នើសុំឲ្យសារព័ត៌មាន សៀមរាប ប៉ុស្តិ៍ចុះផ្សាយ ជុំវិញ លោកវណ្ណ វណ្ណារ៉ា ជំពាក់លុយហើយគេចវេសមិនព្រមទំនាក់ទំនងសងនោះ លោកស្រីសុំទទួលខុសត្រូវ ព្រោះរៀបរាប់ខាងលើ៕SRP

ខេត្តសៀមរាប៖លោកស្រី កែ សុខចិន្ដា បានធ្វើលិខិត ចំនួនពីរទំព័រ ឆ្លើយតប ចំពោះអង្គភាព សារព័ត៌មាន សៀមរាប ប៉ុស្ដិ៍ ដែលបានចុះផ្សាយថារំលោភយកដីរបស់គេ។

ការចុះផ្សាយរបស់គេហទំព័រ សៀមរាប ប៉ុស្តិ៍ គឺយោងតាមការបញ្ជាក់របស់លោក ទ្រិញ ឡាក់ឃាំង ដែលជាប្រភពច្បាស់លាស់ មានឯកសារគ្រប់គ្រាន់ បានផ្ដល់ឱ្យសារព័ត៌មាន សៀមរាប ប៉ុស្តិ៍ មិនមែនអង្គភាពសារព័ត៌មាន សៀមរាប ប៉ុស្តិ៍ ជាអ្នកអត្ថាធិប្បាយខ្លួនឯងនោះទេ។

លិខិតចំនួនពីរទំព័រ មានស្នាមមេដៃអស់លោកស្រី កែ សុខចិន្ដា មន្ទីរព័ត៌មានខេត្តសៀមរាប ផ្ញើចូលមកអង្គភាព សៀមរាប ប៉ុស្តិ៍ នៅព្រឹកថ្ងៃទី 13 ខែមិថុនាឆ្នាំ 2024 មានដូចខាងក្រោម៖

ខេត្តសៀមរាប៖ក្នុងពិធីសន្និបាតសាមញ្ញ របស់សមាគមអ្នកបើកបរដឹកភ្ញៀវទេសចរ ប្រចាំអាកាសយានដ្ឋានអន្តរជាតិសៀមរាបអង្គរ នៅថ្ងៃអាទិត្យ ម្សិលមិញ លោក សុខ ថុល អភិបាលរងខេត្តសៀមរាប បានផ្តល់អនុសាសន៍ ដល់សមាជិក សមាជិកសមាគម អ្នកដឹកភ្ញៀវទេសចរ ប្រចាំអាកាសយានដ្ឋានអន្តរជាតិសៀមរាបអង្គរ ត្រូវអនុវត្តនូវគោលការណ៍ចំនួន៧ចំណុចដូចខាងក្រោម៖

1- ត្រូវមានអាកប្បកិរិយា សុភាពរាបសាររាក់ទាក់ និងហាមទារលុយពីភ្ញៀវទេសចរ លើសពីការកំណ ត់ ដើម្បីផ្តល់ទំនុកចិត្តដល់ភ្ញៀវទេសចរអន្តរជាតិ ខណៈបច្ចុប្បន្ននេះចំនួនភ្ញៀវទេសចរមក ទស្សនាខេត្តសៀមរាប នៅមានកម្រិតនៅឡើយ។ ជាការពិតណាស់ អាកប្បកិរិយា ទន់ភ្លន់ សុភាពរាបសារ គឺជាការទាក់ទាញចំណាប់អារម្មណ៍ របស់ភ្ញៀវទេសចរ ដែលទើបមកដល់ខេត្តសៀមរាប និងដើម្បីឱ្យភ្ញៀវទេសចរគិតថា ប្រជាពលរដ្ឋខ្មែរ មានស្នាមញញឹម រួសរាក់ទាក់ មានសុជីវធម៌ ជាជនជាតិមួយដែលគួរឱ្យចង់រាប់អាន។

2- មិនត្រូវដឹកភ្ញៀវទេសចរទៅខុសគោលដៅ និងមិនត្រូវទាមទារប្រាក់បន្ថែម ដែលសមាគមបានកំណត់នោះឡើយ។ ប្រការនេះធ្វើឱ្យមានបាតុភាពមិនល្អកើតមានឡើង ដែលនាំឱ្យមានផល អវិជ្ជមានដល់វិស័យទេសចរណ៍ របស់យើង ដែលកំពុងតែងើបឡើងវិញក្រោយពីវិបត្តិជាសកល នៃជំងឺកូវីដ-១៩ ក្រោមការខិតខំប្រឹងប្រែងរបស់រាជរដ្ឋាភិបាល និងក្រសួង-ស្ថាប័នពាក់ព័ន្ធ។

3- ត្រូវពង្រឹងឱ្យបានជាប់ជាប្រចាំនូវភាសាបរទេស និងជួយផ្សព្វផ្សាយអំពីវប្បធម៌ ទូទៅរបស់ខ្មែរ ជាពិសេស ទាក់ទងនឹងប្រាសាទ ណែនាំអំពីរមណីយដ្ឋានទេសចរណ៍ នានា នៅក្នុងខេត្តដល់ភ្ញៀវទេសចរ និងពីការរីកចម្រើន ប្រទេសកម្ពុជា ជាពិសេសខេត្តសៀមរាបរបស់យើង។

4- ត្រូវតែមានភាពស្មោះត្រង់៖ ភ្ញៀវគឺជាទ្រព្យរបស់យើង មានភ្ញៀវមានលុយ។ ចុះបើយើងគ្មានភាពស្មោះត្រង់ជាមួយភ្ញៀវ នោះគេនឹងមិនមកទស្សនាខេត្តសៀមរាប ក៏ដូចជាកម្ពុជាទៀតនោះទេ។ ភាពស្មោះត្រង់របស់យើង វាមិនអាចធ្វើឱ្យយើងក្លាយជាអ្នកមានបានភ្លាមៗនោះទេ តែវានឹងធ្វើឱ្យភ្ញៀវនឹកឃើញយើង ឱ្យតម្លៃយើង ហើយគាត់នឹងមកទស្សនាខេត្តរបស់យើងម្តង ឬច្រើនដងទៀត ប្រសិនណាគាត់ខកចិត្ត ជាមួយនឹងប្រជាជន នៃប្រទេសផ្សេង ដែលមិនមានការ ស្មោះត្រង់ជាមួយពួកគាត់។

5- ត្រូវមានធម៌មេត្តាក្នុងខ្លួន៖ ជាអ្នកបម្រើសេវាដឹកជញ្ជូនភ្ញៀវទេសចរ ត្រូវចាំថាបើគ្មានធម៌មេត្តា ក្នុងខ្លួនទេ គឺគ្មាននរណាចង់មកនៅក្បែរយើងនោះដែរ។ ជាអ្នកបម្រើសេវាដឹកភ្ញៀវ សូមកុំមើល ងាយភ្ញៀវ ប្រមាថភ្ញៀវ វាយតម្លៃភ្ញៀវតែសំបកខាងក្រៅឱ្យសោះ។

6- ត្រូវមានការអធ្យាស្រ័យយោគយល់៖ ចំណុចនេះចង់បញ្ជាក់ថា យើងជាអ្នកដឹកជញ្ជូនភ្ញៀវពេល ដឹងថាការដឹកភ្ញៀវទេសចរទៅកាន់តំបន់រមណីយដ្ឋាននានាក្នុងខេត្ត ឬក្រៅខេត្តមិនចំណេញ ឬក៏ចំណេញតិចតួចក្តី ប៉ុន្តែនៅតែផ្តល់សេវាប្រកបដោយការទទួលខុសត្រូវខ្ពស់។ អ្នកដែល បម្រើសេវាដល់ភ្ញៀវទេសចររបៀបនេះ គឺជាអ្នកដែលមានការអធ្យាស្រ័យ ជាមួយភ្ញៀវ។ ភ្ញៀវ ណាដែលមិនចេះយើងប្រាប់ ភ្ញៀវណា មិនយល់យើងជួយ ហើយភ្ញៀវណាមិនដឹងយើងពន្យល់ អ្នកដឹកភ្ញៀវប្រភេទនេះ គឺជាបំណងប្រាថ្នា របស់ភ្ញៀវទេសចរគ្រប់គ្នា ដែលចូលមកខេត្តរបស់យើង ព្រោះគេទុកចិត្តយើង គែទទួលបានអារម្មណ៍ល្អពីយើង គេទទួលបាននូវភាពកក់ក្តៅពី យើង។

7- ត្រូវចេះរក្សាចំណងមិត្តភាពរវាងភ្ញៀវ ដែលបានមកទស្សនាខេត្តរបស់យើងឱ្យជាញាតិ៖ យើង ជាអ្នករកស៊ីទទួលទានលើវិស័យទេសចរណ៍ ពិសេសអ្នកដឹកភ្ញៀវទេសចរនេះតែម្តង គឺត្រូវចេះ រក្សានូវចំណងមិត្តភាពរវាងភ្ញៀវដែលបានមកទស្សនាខេត្តរបស់យើង ក៏ដូចជាប្រទេសកម្ពុជា ឱ្យដូចជាញាតិរបស់យើង។ ភ្ញៀវខ្លះគេមិនជឿយើងទាំងស្រុងនោះទេ តែគេជឿភ្ញៀវគ្នាគេនោះ ទៅវិញច្រើនជាង បើសិនជាយើងមិនចេះរក្សាញាតិ នោះទេ គ្មាននរណាមកអួតអំពីយើងនោះទេ ហើយត្រូវចាំថាភ្ញៀវ បើគេមិនស្រឡាញ់ គេមិនចូលចិត្តយើង សូមកុំរំពឹង គ្រាន់តែឈ្មោះរបស់យើង ក៏គេមិនចង់រំលឹកផង ហើយកុំសង្ឃឹមថាគេទៅណែនាំអ្នកដទៃទៀតមកទស្សនាខេត្តសៀមរាបឱ្យសោះ។

អភិបាលរងខេត្តរូបនេះ បានបញ្ជាក់ថា រដ្ឋបាលខេត្តបានបន្តពង្រឹង និងបង្កើនប្រសិទ្ធភាពការងារ បម្រើនសេវាសាធារណៈ ជូនប្រជាពលរដ្ឋ ការងារ បង្កើនផលរបស់ប្រជាកសិករ លើផលិតកម្ម កសិកម្ម និងកសិ-ឧស្សាហកម្ម ការងារសន្តិសុខ និងសុវត្ថិភា ព ជូនភ្ញៀវជាតិ-អន្តរជាតិ និងបងប្អូនប្រជាពលរដ្ឋ ការរៀបចំលើកកម្ពស់ និងកែលម្អរសោភ័ណភាព ក្រុង និងខេត្ត ឱ្យសក្តិសម ជាទីក្រុងវប្បធម៌ ប្រវតិ្តសាស្រ្ត ដ៏ចំណាស់របស់កម្ពុជា ការពង្រឹងគុណភាព សេវាកម្ម ទេសចរណ៍ របស់ប្រតិបត្តិករទេសចរណ៍ ប្រកប ដោយគុណភាព គុណតម្លៃ និងស្នាមញញឹមផងដែរ៕SRP

ខេត្តសៀមរាប៖អាជ្ញាធរបានដាក់គោលដៅ១០ចំណុចស្តីពីការពង្រឹងការគ្រប់គ្រង ការថែរក្សា និងការការពារធនធានធម្មជាតិ នៅខេត្តសៀមរាប។

កិច្ចប្រជុំ នៅថ្ងៃទី៧ ខែមិថុនា ឆ្នាំ២០២៤ ក្រោមវត្តមានលោក អ៉ឹង គឹមលាង អភិបាលរងខេត្ត តំណាងដ៏ខ្ពង់ខ្ពស់ ឯកឧត្តម ប្រាក់ សោភ័ណ អភិបាលខេត្តសៀមរាប បានដឹកនាំ ដោយមានការចូលរួមពីលោក លោកស្រី មន្ទីរ អង្គភាព ជំនាញពាក់ព័ន្ធផងដែរ។

ក្នុងកិច្ចប្រជុំ ស្តីពីការពង្រឹងការគ្រប់គ្រង ការថែរក្សា និងការការពារធនធានធម្មជាតិ នេះអាជ្ញាធរបានធ្វេីការការណែនាំ ដូចខាងក្រោម៖

១.ចាត់វិធានការចាំបាច់ក្នុងការពង្រឹងការគ្រប់គ្រងធនធាន ធម្មជាតិ ដើម្បីបង្ការ ទប់ស្កាត់ និងបង្ក្រាបបទល្មើសធនធានធម្មជាតិតាមគ្រប់រូបភាពនៅក្នុងភូមិសាស្ត្ររបស់ខ្លួន។

២.ត្រូវដាក់ចេញនូវ ផែនការ និងវិធានការបង្ការ ទប់ស្កាត់ និងបង្ក្រាបសកម្មភាពកាប់បំផ្លាញព្រៃឈើដោយខុសច្បាប់នៅក្នុងតំបន់ ការពារ និងអភិរក្សធម្មជាតិស្ថិតក្នុងភូមិសាស្ត្ររបស់ខ្លួន ដោយប្រើប្រាស់នូវមធ្យោបាយសរុប និងកម្លាំងសរុបព្រមទាំងធ្វើការបែងចែក និងប្រគល់ការទទួលខុសត្រូវដល់អង្គភាព និងមន្ត្រីពាក់ព័ន្ធឱ្យទទួលបន្ទុកអនុវត្ត ភារកិច្ចរៀងៗខ្លួនក្រោមការត្រួតពិនិត្យ និងតាមដានជាប្រចាំ។ ប្រសិនបើមានភាពអសកម្មក្នុងការអនុវត្តវិធានការបង្ការ ទប់ស្កាត់ និងបង្ក្រាបសកម្មភាព កាប់បំផ្លាញព្រៃឈើ ដោយខុសច្បាប់ក្នុងតំបន់ការពារ និងតំបន់អភិរក្សធនធានធម្មជាតិ ត្រូវរាយការណ៍ និងលើកសំណើមកក្រសួងមហាផ្ទៃ ឬក្រសួង ស្ថាប័នពាក់ព័ន្ធ ដើម្បីសម្រួលភារកិច្ចមន្ត្រីដែលត្រូវទទួលខុសត្រូវនៅតំបន់នោះ ឬចាត់ វិធានការសម្រួលភារកិច្ចមន្ត្រីដែលទទួលខុសត្រូវតំបន់នោះក្នុងក្របខ័ណ្ឌសមត្ថកិច្ចរបស់ខ្លួន។

៣.ក្នុងករណីចាំបាច់ ឬមានបទល្មើសពាក់ព័ន្ធនឹងព្រៃឈើ និងធនធានធម្មជាតិណាមួយកើត ឡើងដែលហួសពីសមត្ថភាពដោះស្រាយរបស់ខ្លួន ត្រូវស្នើសុំការអន្តរាគមន៍តាមឋានានុក្រមជាបន្ទាន់ពីគណៈកម្មការជាតិដើម្បីទប់ស្កាត់ និងបង្ក្រាបបទ ល្មើសធនធានធម្មជាតិ។

៤.រដ្ឋបាលឃុំ សង្កាត់ និងភូមិ ដែលជាអ្នកនៅផ្ទាល់នឹងមូលដ្ឋានត្រូវចូលរួមឱ្យបានសកម្មក្នុងការបង្ការ ទប់ស្កាត់ និងបង្ក្រាបសកម្មភាពកាប់បំផ្លាញព្រៃឈើដោយខុសច្បាប់ និងត្រូវរាយការណ៍ជាបន្ទាន់នៅពេលកើតមានសកម្មភាពកាប់បំផ្លាញព្រៃឈើដោយខុស ច្បាប់ក្នុងតំបន់ការពារ និងអភិរក្សធម្មជាតិក្នុងដែនសមត្ថកិច្ចរបស់ខ្លួន។

៥.ត្រូវខិតខំស្រាវជ្រាវស្វែងរក មេខ្លោង មេខ្យល់ ជនល្មើសដែលនៅពីក្រោយខ្នង អ្នកផ្តល់ថវិកាគាំទ្រញុះញង់ឱ្យមានការកាប់បំផ្លាញព្រៃ ទន្ទ្រានកាន់កាប់ដីដោយខុសច្បាប់ ដោយអនុវត្តវិធានការច្បាប់ឱ្យបានម៉ឺងម៉ាត់។ ទន្ទឹមនោះត្រូវចាត់វិធានការ រដ្ឋបាល ឬវិធានការច្បាប់ យោងទៅតាមកម្រិតនៃបទល្មើសចំពោះមន្ត្រីរាជការ និងកងកម្លាំងប្រដាប់អាវុធ ដែលឃុបឃិត ឬពាក់ព័ន្ធក្នុងការប្រព្រឹត្តបទល្មើសបំផ្លាញធនធានធម្មជាតិ។

៦.មិនត្រូវចុះហត្ថលេខាទទួលស្គាល់សិទ្ធិកាន់កាប់ដីធ្លី ដែលពុំ មានឯកសារ និងអំណះអំណាងគ្រប់គ្រាន់តាមផ្លូវច្បាប់ ជាពិសេសការបញ្ជាក់លើឯកសារសុំសិទ្ធិកាន់កាប់ និងឯកសារទិញ-លក់ដី ដោយខុសច្បាប់ក្នុងតំបន់ការពារ និងតំបន់អភិរក្សធនធានធម្មជាតិ។ ត្រូវមោឃភាព ឬបដិសេធនូវរាល់ឯកសារទិញលក់ និងឯកសារផ្ទេរសិទ្ធិ កាន់កាប់ដីធ្លីដែលស្ថិតនៅក្នុងតំបន់ការពារ និងអភិរក្សធនធានធម្មជាតិ ហើយត្រូវដកហូតដីធ្លីទាំងនោះរក្សា ទុកជាទ្រព្យសម្បត្តិរដ្ឋ ព្រមទាំងចាត់វិធានការយ៉ាងម៉ឺងម៉ាត់ចំពោះមន្ត្រីមានសមត្ថកិច្ចណាដែលបញ្ជាក់ ឬចុះហត្ថលេខាលើឯកសារ លិខិតស្នាមមិនស្របច្បាប់នានា តាមច្បាប់ជាធរមាន។

៧.ត្រូវខិតខំអប់រំ ណែនាំ និងបកស្រាយបំភ្លឺអំពីស្ថានភាពនៃការកាន់កាប់ដីធ្លីរបស់ប្រជាពលរដ្ឋ ព្រមទាំងគោលការណ៍របស់រាជរដ្ឋាភិបាលក្នុងការខិតខំប្រឹងប្រែងដោះស្រាយដីធ្លីរបស់ប្រជាពលរដ្ឋ ក៏ដូចជាអប់រំឱ្យប្រជាពលរដ្ឋយល់ច្បាស់ពីឧបាយកលបំផុស អូសទាញរបស់ពួកមេខ្យល់ ឬជនខិលខូចមួយចំនួនដែលឆ្លៀតឱកាសកេងយកផលប្រយោជន៍ ឬកេង ចំណេញផ្នែកនយោបាយពីបញ្ហាដីធ្លីនេះ។

៨.ត្រូវខិតខំលើកទឹកចិត្តដល់ប្រជាពលរដ្ឋ សហគមន៍មូលដ្ឋាន អង្គការសង្គមស៊ីវិល និងអ្នកពាក់ ព័ន្ធនានាចូលរួមទប់ស្កាត់ លុបបំបាត់ និងផ្តល់ព័ត៌មានបទល្មើសធនធានធម្មជាតិគ្រប់ប្រភេទនៅតំបន់ការពារ និងអភិរក្សធនធានធម្មជាតិដែលស្ថិតក្នុងដែនសមត្ថកិច្ចរបស់ខ្លួន ព្រមទាំងត្រូវរៀបចំប្រព័ន្ធ HOTLINE ដើម្បី ទទួលព័ត៌មាន ឬបណ្ដឹងពីប្រជាពលរដ្ឋលើបញ្ហានេះ។

៩.ត្រូវសហការជាមួយស្ថាប័នពាក់ព័ន្ធដើម្បីដំឡើងឱ្យបាន ផែនទីកំណត់ព្រំ និងការបោះបង្គោលព្រំ ដើម្បីឱ្យប្រជាពលរដ្ឋយល់ដឹងអំពីដីព្រៃអភិរក្ស និងតំបន់ការពារធម្មជាតិ។

១០.ក្នុងការចាត់ចែងអនុវត្តវិធានការនានា ពាក់ព័ន្ធនឹងការពង្រឹងការគ្រប់គ្រងតំបន់អភិរក្ស និង តំបន់ការពារធនធានធម្មជាតិ រដ្ឋបាលរាជធានី ខេត្ត ត្រូវរាយការណ៍ និងស្នើសុំយោបល់ពីក្រសួង ស្ថាប័នមាន សមត្ថកិច្ចពាក់ព័ន្ធនីមួយៗ៕SRP

ខេត្តសៀមរាប៖ម្ចាស់ដីកសិកម្មស្របច្បាប់ ដែលទទួលបានប្រទាន​កម្ម​ ជាកម្មសិទ្ធិ ពីសម្តេចអគ្គមហាសេនាបតីតេជោហ៊ុនសែន នាយករដ្ឋមន្ត្រីនៃព្រះរាជាណាចក្រកម្ពុជា តាមរយៈលិខិតលេខ៣៨ ស.ជ.ណ.ដប ចុះថ្ងៃទី១៧ ខែមករា ឆ្នាំ២០២២ បានធ្វើការព្រមានចាត់វិធាន​ការផ្លូវច្បាប់ លើអធិការរង​ នៃអធិការនគរបាលស្រុកវ៉ារិន មួយរូបនិងគូកន​ ប្រសិនបើមិនព្រមដកខ្លួនចេញ ពីការចូលទៅរំលោភកាន់កាប់ដីរបស់គាត់ជិត៣៥ហិកតាទេនោះ។

អធិការរងនៃអធិការនគរបាលស្រុកវ៉ារិន ដែលរងការចោទថា បានចូលទៅរំលោភបំពានកាន់កាប់គ្រប់គ្រងលើដីស្របច្បាប់របស់ប្រជាពលរដ្ឋ ជិត៣៥ ហិកតា មាន​ឈ្មោះនី​ សាវ៉ុន ប្រពន្ធឈ្មោះ យ៉ឺន គឹមយឿន និងគូ កនម្នាក់ទៀត ឈ្មោះកែ សុខចិន្តា ភេទស្រី។

លោកទ្រិញ ឡាក់ឃាំង តំណាងឲ្យឪពុកម្តាយក្មេក ដែលមានកូនបង្កើតប្រុសស្រី១១នាក់ ដែលជាម្ចាស់ដីស្របច្បាប់ នៅព្រឹកថ្ងៃទី០៤ ខែមិថុនា ឆ្នាំ២០២៤ បានប្រាប់«ទីភ្នាក់ងារសារ​ព័ត៌មាន សៀមរាប ប៉ុស្តិ៍» ថា ដីរបស់លោកដែលកំពុងរងការរំលោភបំពាននេះ ជាប្រភេទដីកសិកម្ម មានព្រំប្រទល់ជាប់គ្នាក្នុងស្រុកបន្ទាយស្រីនិងស្រុកវ៉ារិន។ ដីខាងលើនេះឪពុកនិងម្តាយក្មេក របស់លោកបានគ្រប់គ្រងអាស្រ័យផលតាំងពីឆ្នាំ ២០០៥មកម្លេះ។ ដីនៅ ក្នុងស្រុកបន្ទាយស្រី​ ក្នុងឆ្នាំ​២០១២.២០១៣ គឺបានចុះបញ្ជីដីធ្លីជាប្រព័ន្ធ LMAP រួចរាល់ហើយដោយក្រុមនិស្សិតស្មគ្រ័ចិត្ត។

លោកទ្រិញ ឡាក់ឃាំង បានបន្តថា នៅថ្ងៃទី២៧​ ខែឧសភា​ ឆ្នាំ២០២២​ ម្តាយរបស់លោក រួមទាំងប្រជាពលរដ្ឋ ១២៧ គ្រួសារទៀត បានទទួលវិញញាបនបត្រសម្គាល់អចលនវត្ថុ ស្រប​ច្បាប់ ពីមន្ទីររៀបចំដែនដីនគរូបនីយកម្មសំណង់និងសូរិយោដីខេត្តសៀមរាប ដូចមានក្នុងVEDIO និងរូបភាពខាងក្រោម។ បច្ចុប្បន្ននេះ ស្រាប់តែលេចមុខឈ្មោះកែ សុខចិន្តា​. ឈ្មោះនី​ សាវ៉ុន និងប្រពន្ធឈ្មោះ យ៉ឺន គឹមយឿន ចូលមកគ្រប់គ្រងកាន់កាប់ដីហើយអះអាងថា ជាដីរបស់ពួកខ្លួន ខណ:ដីរបស់គ្រួសាររបស់លោកមានប័ណ្ណសម្គាល់គាត់រួចហើយ។

លោកទ្រិញ ឡាក់ឃាំង បានបន្ថែមទៀតថា ឈ្មោះកែ សុខចិន្តា អះអាងថាមានលិខិតស្នាមត្រឹមត្រូវចំនួន៤០ហិតា ស្ថិតនៅខាងស្រុកវ៉ារិនទាំងអស់។

លោកទ្រិញ​ ឡាក់ឃាំង​ អោយដឹងទៀតថា ដីរបស់គ្រួសារឪពុកក្មេកលោកដែលអធិការរងឈ្មោះនី សាវ៉ុន និងប្រពន្ធឈ្មោះយ៉ឺនគឹមយឿន រំលោភកាន់កាប់ប្រហែល៦.៥០ ហិកតាជាប្លង់រឹង ស្ថិតក្នុងស្រុកបន្ទាយស្រី និង២ហិកតា ជាប្លង់ភូមិឃុំស្ថិតក្នុងស្រុកវ៉ារិន។ ចំណែកឈ្មោះ កែ សុខចិន្តា រំលោភកាន់កាប់ប្រហែល១៨ហិកតា ជាប្លង់រឹង ស្ថិតក្នុងស្រុកបន្ទាយស្រី និង៧ហិកតាជាប្លង់ភូមិឃុំស្ថិតក្នុងស្រុកវ៉ារិន ត្បិតដីរបស់លោកមានព្រំប្រទល់ជាប់គ្នានៃស្រុកទាំងពីខាងលើ។

ដោយឃើញក្រុមមនុស្សខាងលើ ចូលមករំលោភ​បំពានលើដី ស្របច្បាប់បែបនេះ រូបលោក ក៏បានដាក់​ពាក្យសុំអន្តរាគមន៍ ទៅអភិបាលនៃគណអភិបាលខេត្តសៀមរាប ដើម្បីមានវិធានការ តាមរយ:លិខិតចុះថ្ងៃទី ២១ ខែកញ្ញា ឆ្នាំ២០២៣។

ជាមួយគ្នានោះ រដ្ឋបាលខេត្តសៀមរាប ក៏បានចេញលិខិតលេខ៧៦១/២៣លសអោយអភិបាលស្រុកទាំងពីរ សហការគ្នាពិនិត្យនិងស្រាវជ្រាវ អោយបានច្បាស់លាស់ និងផ្តល់ជារបាយការណ៍ ដើម្បីរដ្ឋបាលខេត្តឆ្លើយតបម្ចាស់ស្នើសុំវិញ។

លោកទ្រិញ ឡាក់ឃាំង បានអោយដឹងទៀតថា​ លោកបានធ្វើលិខិតបំភ្លឺ និងបានភ្ជាប់នូវឯកសារគតិយុត្តិជាច្រើន ដាក់ជូនលោកអភិបាលស្រុកទាំងពីរ និងលោកបានចូលរួមប្រជុំជាមួយលោកអភិបាលរងស្រុកបន្ទាយស្រី និងលោកអភិបាលរងស្រុកវ៉ារិនចំនួនពី២ដង ដោយលើកទីមួយ នៅទីតាំងដី នឹងលើកទីពីរនៅសាលប្រជុំស្រុកវ៉ារិននាថ្ងៃទី៣១ ខែឧសភា ឆ្នាំ២០២៤ ដោយលោកអភិបាលរងស្រុកវ៉ារិនបានមានប្រសាសន៍ថា លោកអាចសម្របសម្រួលរឿងដី ដែលស្ថិតនៅដែនសមត្ថកិច្ចខ្លួនប៉ុណ្ណោះ ចំពោះបញ្ហាដែលភាគីណាមួយមានប័ណ្ណរឹង សូមឲ្យប្តឹងជំទាស់ទៅតុលាការទៅ លោកអាចសម្របសម្រួល បាន តែដីមិនទាន់មានប័ណ្ណកម្មសិទ្ធិតែប៉ុណ្ណោះ បន្ទាប់មកទៀត នៅថ្ងៃទី៣ ខែមិថុនា ឆ្នាំ២០២៤ ខាងស្រុកវ៉ារិន ក៏បានអញ្ជើញភាគីទាំងអស់ ទៅទីតាំងដីពេលទៅដល់ទីតាំងដីស្រាប់តែភាគី យុឺន គឹមយឿន និងឈ្មោះ កែ សុខចិន្តា រួមទាំងបុរសម្នាក់ទៀតបក្សពួក បានបញ្ជាលោកអភិបាលរងស្រុកវ៉ារិន ឈ្មោះស៊ុយ សាង នាំមន្ត្រីរបស់ខ្លួន និងក្រុមមនុស្ស ដែលរំលោភបំពានដី របស់លោកទៅចុចវាស់វែងបាញ់ប្លង់លើដី របស់លោកទាំងស្រុកវ៉ារិន និងស្រុកបន្ទាយ​ស្រីទៅវិញ។ ដែលទង្វើហួសពីដែនសមត្ថកិច្ចរបស់ខ្លួននេះបង្ហាញថា មានចេតនាបើកភ្លើងខៀវ ក្នុងការឃុបឃិត រំលោកបំពានលើពលរដ្ឋស្លូតត្រង់។

ក្រៅពីសំណូមពរ ក៏ដូចជាការទទូចសុំ អាជ្ញាធរគ្រប់ជាក់ថ្នាក់ ពិនិត្យនិងផ្តល់ភាពយុត្តិធម៌ លោក ទ្រិញ ឡាក់ឃាំង ក៏ត្រៀមចាត់វិធានការ ដោយដាក់ពាក្យប្តឹងទៅតុលាការផងដែរ ប្រសិនបើ បុគ្គលទាំង៣រូបខាង​លើ មិនព្រមដកខ្លួនចេញពីការរំលោភបំពាន ត្បិតដីខាងលើនេះជាដីស្របច្បាប់ ដែលទទួលបានពីការប្រទានកម្មរបស់សម្តេចតេជោ ហ៊ុន​ ​សែន​ យ៉ាងពិតប្រាកដ។

ជុំករណីនេះ ទីភ្នាក់ងារ សារព័ត៌មាន សៀមរាប ប៉ុស្តី នៅមិន​ទាន់ទទួលបានការបកស្រាយបំភ្លឺពីលោក នី​ សាវ៉ុន និងឈ្មោះ យ៉ឺន គឹមយឿន រួមឈ្មោះកែ សុខចិន្តា នៅឡើយរហូតដល់ម៉ោងផ្សាយនៅព្រឹកថ្ងៃពុធនេះ៕SRP

ខេត្តសៀមរាប៖ក្នុងជំនួបសម្តែងការគួរសមនិងពិភាក្សាការងារ រវាងរដ្ឋបាលខត្ត ជាមួយឯកអគ្គរដ្ឋទូតឥណ្ឌូនេស៊ីប្រចាំកម្ពុជា នៅថ្ងៃទី២៩ ខែឧសភា ឆ្នាំ២០២៤ ឯកឧត្តមបណ្ឌិត Santo Darmosumarto ឯកអគ្គរដ្ឋទូតឥណ្ឌូនេស៊ីប្រចាំកម្ពុជា បានបញ្ជាក់ផងដែរថា ឥណ្ឌូនេស៊ី-កម្ពុជា គឺជាមិត្ដដ៏ជិតស្និទ្ធ មិត្តពិតប្រាកដ និងទុកចិត្តគ្នា ហើយតាមរយៈការពង្រឹងទំនាក់ទំនង និងកិច្ចសហប្រតិបត្តិការជាបន្តបន្ទាប់រវាងថ្នាក់ដឹកនាំនៃប្រទេសទាំងពីរ ចំណងមិត្តភាពនេះបានប្រែក្លាយទៅជាមិត្តភាពដែលមិនអាចកាត់ថ្លៃបាន និងជំរុញកិច្ចសហប្រតិបត្តិការរវាងគ្នានឹងគ្នាឱ្យបានកាន់តែស្អិតរមួតបន្ថែមទៀត។

នៅសាលាខេត្តសៀមរាប ឯកឧត្តមបណ្ឌិត សង្ឃឹមយ៉ាងមុតមាំថានឹងបានចូលរួមសហការជាមួយរដ្ឋបាលខេត្ត បង្កើតព្រឹត្តិការផ្លាស់ប្តូរវប្បធម៌គ្នាទៅវិញទៅមក ដើម្បីលើកស្ទួយវិស័យទេសចរណ៍ ផ្លាស់ប្តូរសិល្បៈរវាងប្រទេសទាំង២ និងជំរុញឱ្យមានសម្ព័ន្ធមេត្រីភាព (temple sister)រវាងខេត្តសៀមរាប និងឥណ្ឌូនេស៊ី បន្តជួយគាំទ្រ ផ្សព្វផ្សាយ លើវិស័យអប់រំ តាមរយះការផ្សព្វផ្សាយអាហាររូបករណ៍នានា និងជម្រុញឱ្យមានជើងហោះហើរត្រង់មកកាន់ខេត្តសៀមរាប និងពីខេត្តសៀមរាបទៅប្រទេសឥណ្ឌូនេស៊ីផងដែរ។

ឯកឧត្តម ប្រាក់ សោភ័ណ អភិបាលខេត្តសៀមរាប
បានថ្លែងអំណរគុណដល់ ឯកឧត្តម បណ្ឌិត Santo Darmosumarto ឯកអគ្គរដ្ឋទូតឥណ្ឌូនេស៊ី ប្រចាំកម្ពុជានិងគណៈប្រតិភូ ដែលបានឆ្លៀតឱកាសអញ្ជើញជួបសំណេះសំណាល ពិភាក្សាការងារនាពេលនេះ។

អភិបាលខេត្តសៀមរាប ក៏សូមថ្លែងអំណរគុណដល់រដ្ឋាភិបាល ប្រជាជនឥណ្ឌូនេស៊ី ដែលបានរួមចំណែកក្នុងការជំរុញការអភិវឌ្ឍសង្គម-សេដ្ឋកិច្ចកម្ពុជា ឱ្យមានការរីកចម្រើន ព្រមទាំងបន្តការពង្រឹងនិងពង្រីកកិច្ចសហប្រតិបត្តិការរវាងប្រទេសទាំងពីរ ឱ្យកាន់តែរឹងមាំ បន្តជួយគាំទ្រ ផ្សព្វផ្សាយ វិស័យទេសចរណ៍ក្នុងខេត្តសៀមរាប ឱ្យកាន់តែមានសក្តានុពលបន្ថែមទៀតផងដែរ៕SRP