ខេត្តសៀមរាប៖កាណាដា បានបើកសម្ពោធការិយាល័យកុងស៊ុល របស់ខ្លួន ប្រចាំខេត្តសៀមរាប នៅថ្ងៃទី១៣ ខែកុម្ភ: ឆ្នាំ២០២៤។
លោក ប្រាក់ សោភ័ណ អភិបាលខេត្តសៀមរាប នៅរសៀល ថ្ងៃទី១៣ ខែកុម្ភៈ ឆ្នាំ២០២៤ បានជួបសម្តែងការគួរសមជាមួយលោកជំទាវ Ping Kitnikone ឯកអគ្គរដ្ឋទូតកាណាដាប្រចាំព្រះរាជាណាចក្រកម្ពុជា ថៃ ឡាវ និងមីយ៉ាន់ម៉ា និងប្រតិភូអមដំណេីរ ព្រមទាំងមានការអញ្ជេីញចូលរួមពីលោក នាយករដ្ឋបាលសាលាខេត្ត លោក នាយកទីចាត់ការទំនាក់ទំនងសាធារណៈ និងសហប្រតិបត្តិការអន្តរជាតិសាលាខេត្ត និងមន្រ្តីពាក់ព័ន្ធផងដែរ។
លោក ប្រាក់ សោភ័ណ បានថ្លែងអំណរគុណយ៉ាងជ្រាលជ្រៅ ចំពោះលោកជំទាវ Ping Kitnikone ដែលបានចូលជួបសម្តែងការគួសម និងសូមអបអរសាទរ ព្រមទាំងសូមស្វាគមន៍ ចំពោះការសម្ពោធដាក់ឱ្យដំណេីរការនៃការិយាល័យកុងស៊ុលកាណាដា ប្រចាំខេត្តសៀមរាប នាពេលនេះ ដែលកត្តានេះបានបង្កេីននូវសេដ្ឋកិច្ចប្រជាពលរដ្ឋ ក្នុងខេត្តសៀមរាប មួយកម្រិតទៀត។
អភិបាលខេត្តក៏បានថ្លែងអំណរគុណ ចំពោះរដ្ឋាភិបាល កាណាដា ដែលបានចូលរួមចំណែក ក្នុងការអភិវឌ្ឍន៍លេីគម្រោងនានា នៅលើទឹកដីខេត្តសៀមរាប ដែលនេះជាកាយវិការមួយ នៃការយកចិត្តទុកដាក់ខ្ពស់ ក្នុងការរឹតចំណងមេត្រីភាព រវាងកម្ពុជា និងកាណាដា ក៏ដូចជាខេត្តសៀមរាប បន្ថែមទៀតផងដែរ៕