ខេត្តបន្ទាយមានជ័យ៖ក្រុមប្រជាពលរដ្ឋ បានធ្វេីការចោទប្រកាន់ថា ក្រុមហ៊ុន កូ ណៃ ឃុបឃិតជាមួយមន្ត្រីមួយចំនួន បិទផ្លូវដោយដាក់ដុំថ្ម ដាំបង្គោល និងរាយបន្លាព័ទ្ធយកដីភ្នំកងវ៉ារបស់រដ្ឋ និងដីប្រជាពលរដ្ឋ ដែលមានទីតាំងស្ថិតនៅចំណុចជួរភ្នំកងវ៉ា ក្នុងភូមិកងវ៉ាសង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ។ នេះបើយោងតាមបណ្ដាញសង្គមហ្វេសប៊ុក (ប្រយុទ្ធ) បានបង្ហោះចែកចាយនៅថ្ងៃសុក្រនេះ។
បណ្ដាញសង្គមហ្វេសប៊ុក (ប្រយុទ្ធ) បានបន្តថាប្រជាពលរដ្ឋរស់នៅភូមិកងវ៉ា និងភូមិពង្រ សង្កាត់កំពង់ស្វាយបានឲ្យដឹងថា មន្ត្រីមួយចំនួនត្រូវរ៉ូវគ្នាជាមួយថៅកែក្រុមហ៊ុន កូ ណៃ ដោយបានបិទផ្លូវសហគមន៍ទៅចម្ការ និងស្រែមួយកន្លែង ដោយបានយកដុំថ្មធំៗ បិទផ្លូវ្រជាពលរដ្ឋ ធ្វើដំណើរដឹកកសិផល និងដីអាស្រ័យផល ចិញ្ចឹមសត្វ។
ប្រភពដដែលបានបញ្ជាក់ ក្រុមហ៊ុន កូ ណៃ បានធ្វើរបងដាក់បន្លាលួស និងយកដុំថ្មធំៗ មកបិទផ្លូវនិងព័ទ្ធភ្នំកងវ៉ារបស់រដ្ឋ យកដីភ្នំរដ្ឋ ដែលក្រុមហ៊ុនបានសុំអាជ្ញាប័ណ្ណ កាយដីយករួចហើយ មិនព្រមប្រគល់ជូនរដ្ឋ តែបែរជាព័ទ្ធធ្វើកម្មសិទ្ធិផ្ទាល់ខ្លួនទៅវិញ។
បេីតាមមន្ទីររ៉ែ និងថាមពលខេត្តបន្ទាយមានជ័យ បានបញ្ជាក់ថា ក្រោយកាយអាចម៍ដី ថ្មពីភ្នំឬដីរដ្ឋ ចេញរួចក្រុមហ៊ុន ត្រូវប្រគល់ថ្នាលដីអោយរដ្ឋវិញ។ ករណីដែលថា ក្រមហ៊ុន កូ ណៃ យកថ្មធំ ដាំបង្កោលនិងរាយលួសបន្លាព័ទ្ធបិទផ្លូវ គឺវាជាសមត្ថកិច្ចដោះស្រាយ របស់អាជ្ញាធរភូមិ សង្កាត់ ក្រុង ខេត្ត។ ហេីយលោកនឹងចាត់មន្ត្រីអោយចុះទៅពិនិត្យ វាយតម្លៃ និងរាយការណ៍ នៅចំណុចទីតាំងដីភ្នំដែលថា មានការហ៊ុំព័ទ្ធយក ហើយបិទផ្លូវរបស់ប្រជាពលរដ្ឋ។
ករណីនេះ លោក អ៊ុំ រាត្រី អភិបាលខេត្តបន្ទាយមានជ័យ បានអោយដឹងថា អភិបាលក្រុងសិរីសោភ័ណ្ឌ កំពុងតែធ្វេីការងារនេះហេីយ លោកតែងតែផ្តល់សិទ្ធិអំណាច ទៅអោយមូលដ្ឋានធ្វេីការ៕SRP