ភ្នំពេញ៖សម្ដេចវិបុលសេនាភក្តី សាយ ឈុំ ប្រមុខរដ្ឋស្តីទី នៅថ្ងៃទី១៨ ខែមីនាឆ្នាំ២០២១ នេះ បានបញ្ចប់គោរមងារ”ឧកញ៉ា”របស់លោក ឌួង ឆាយ។
សូមជម្រាបថានៅថ្ងៃទី១៦ ខែមីនាឆ្នាំ២០២១ សម្ដេច ហ៊ុន សែន នាយករដ្ឋមន្ត្រី បានធ្វើលិខិតជម្រាបជូនទៅសម្ដេចវិបុលសេនាភក្តីសាយឈុំប្រមុខរដ្ឋស្តីទី ដោយស្នើសុំបញ្ចប់គោរមងារ”ឧកញ៉ា”ពីឧកញ៉ា ឌួង ឆាយ។ជាមួយគ្នានេះ សម្ដេចវិបុលសេនាភក្តី សាយ ឈុំ ទូលថ្វាយព្រះករុណាព្រះបាទសម្ដេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជានៅថ្ងៃទី ១៧ ខែមីនា ម្សិលមិញ សូមព្រះករុណាជាទីគោរពសក្ការៈដ៏ខ្ពង់ខ្ពស់ ទ្រង់ព្រះរាជមេត្តាប្រោសប្រទានព្រះរាជតម្រិះដ៏ខ្ពង់ខ្ពស់ ដោយព្រះរាជហឫទ័យអនុគ្រោះ”។
សូមរំលឹកថា រឿងរ៉ាវឈានទៅដល់ការដកងារជាឧកញ៉ា ពីលោក ដួង ឆាយ គឺបន្ទាប់ពីការលេចធ្លាយឃ្លីបវីដេអូ ពេញបណ្តាញសង្គមហ្វេសប៊ុក ដែលបង្ហាញថា លោកដួងឆាយ បានប្រើអំពើហិង្សាទៅលើអតីតភរិយារបស់លោក។
ពាក់ព័ន្ធទៅនឹងអំពើហិង្សានេះ នៅថ្ងៃទី១៧ ខែមីនា ឆ្នាំ២០២១ ក្រសួងកិច្ចការនារី ក៏បានចេញសេចក្តីថ្លែងការណ៍ថ្កោលទោសចំពោះសកម្មភាព របស់ឧកញ៉ាឌួង ឆាយ ផងដែរ៕SRP