ខេត្តកំពង់ចាម៖:ក្មួយៗសិស្សានុសិស្សពិការភ្នែក និងគថ្លង់ នៃវិទ្យាល័យអប់រំពិសេសកំពង់ចាម និងកុមារនៃមណ្ឌលកុមារកំព្រាខេត្តកំពង់ចាម ប្រមាណជា២៤៤នាក់ ទទួលបានការលេីកទឹកចិត្ត និនិងអាហារពីលោក អ៊ុន ចាន់ដា អភិបាលខេត្តកំពង់ចាម នាថ្ងៃទី២៣ ខែកញ្ញា ឆ្នាំ២០២០ ។
ថ្លែងសំណេះសំណាលក្នុងពិធីនោះ លោក អ៊ុន ចាន់ដា អភិបាលខេត្តកំពង់ចាម បានលើកឡើងថា ការរៀបចំពិធីនេះឡើង ដើម្បីបានស្វែងយល់អំពីសុខទុក្ខរបស់ក្មួយៗ ក៏ដូចជាការលើកកម្ពស់ដល់ជនពិការភាព ដោយការមិនទុកឲ្យនៅឯកកោ និងការរើសអើងនោះឡើយ ពោលគឺយើងត្រូវតែរួមគ្នា ដើម្បីដោះស្រាយ ធ្វើយ៉ាងណា ដើម្បីឲ្យក្មួយៗមានសុខភាពល្អ ដូចយុវជនយើង ដែលមានកាយសម្បទាគ្រប់គ្រាន់ផងដែរ ។
ជាមួយគ្នានោះ លោកអភិបាលខេត្ត ក៏បានលើកទឹកចិត្តដល់សិស្សានុសិស្សទាំងអស់ឲ្យខិតខំយកចិត្តទុកដាក់ក្នុងការសិក្សារៀនសូត្រ និងចាប់យកចំណេះវិជ្ជាផ្សេងៗ ដើម្បីឈានទៅដល់សម្រេចគោលបំណងក្នុងថ្ងៃអនាគត។ ជាពិសេសកុំឲ្យជឿតាមការអូសទាញរបស់មិត្តភ័ក្ដិអាក្រក់ គឺត្រូវជៀសឲ្យឆ្ងាយពីគ្រឿងញៀន ដែលនាំឲ្យអន្តរាយដល់សុភមង្គលនោះឡើយ។
គួរបញ្ជាក់ផងដែរថា សិស្សក្នុងវិទ្យាល័យសរុបទាំងអស់មានចំនួន១៧១នាក់ ក្នុងនោះសិស្សពិការភ្នែកមាន៥៩នាក់ និងគផ្លង់ចំនួន១១២នាក់ ហើយបុគ្គលិកសរុបគឺមានចំនួន៣៥នាក់។ ដោយក្នុងវិទ្យាល័យអប់រំពិសេសកំពង់ចាម មានសិស្សចាប់ពីថ្នាក់បឋម ដល់វិទ្យាល័យ ក្នុងនោះមានសិស្សពិការភ្នែកចំនួន១២ថ្នាក់ ចាប់ពីថ្នាក់ទី១ ដល់ថ្នាក់ទី១២ សិស្សគថ្លង់មានចំនួន១៣ថ្នាក់ ចាប់ពីថ្នាក់ទី១ទាប ទី១ខ្ពស់ ដល់ថ្នាក់ទី១២ ។ ដែលសាលាបង្រៀនទៅតាមកម្មវិធីសិក្សារបស់ក្រសួងអប់រំ យុវជន និងកីឡា ហើយក៏មានបង្រៀនកំព្យូទ័រ ភ្លេង របាំ និងបង្ហាត់ស្តាប់ និយាយដល់សិស្សគថ្លង់។ ដោយឡែកមណ្ឌលកុមារកំព្រាខេត្តកំពង់ចាម មានកុមារចំនួន៧៣នាក់ ផងដែរ៕SRP
