ខេត្តកំពង់ចាម៖លោក អ៊ុន ចាន់ដា អភិបាលខេត្តកំពង់ចាម នៅថ្ងៃទី១០ ខខែសីហាព្រឹកមិញ បានអញ្ជើញចុះពិនិត្យ ដីមានទំនាស់នៅតំបន់មេទឹកសារាយ ស្ថិតក្នុងភូមិពពិត ឃុំតាំងក្រាំង ស្រុកបាធាយ ដេីម្បីដោះស្រាយបញ្ហាវិវាទជូនប្រជាពលរដ្ឋ។
មន្ត្រីសាលាខេត្តបានឲ្យដឹងថា បញ្ហាវិវាទដីធ្លីតំបន់មេទឹកសារាយនេះ គឺបានកើតមានឡើងជាយូរយារណាស់មកហើយ រវាងប្រជាសហគមន៍ និងប្រជាពលរដ្ឋខាងក្រៅតំបន់ បានទាមទារផលប្រយោជន៍រៀងៗខ្លួន លេីផ្ទៃដីដីដែលមានទំហំជាង១៦ហិកតា ។ អាជ្ញាធរខេត្ត ក៏ដូចជាមន្ត្រីពាក់ព័ន្ធ បានធ្វេីការដោះស្រាយជាច្រើនលើកច្រើនសារទៀតផង ។
មន្ត្រីបានឲ្យដឹងទៀតថា ដីតំបន់មេទឹកសារាយនេះ ជាដីរបស់រដ្ឋ ដែលមានប្រយោជន៍សម្រាប់បងប្អូនប្រជាពលរដ្ឋ ធ្វេីការអាស្រ័យផល ក្នុងការបង្កបង្កើនផលដំណាំស្រូវវស្សានិងស្រូវប្រាំងផងដែរ ។ក្នុងដំណើរអញ្ជើញចុះពិនិត្យនេះ លោក អ៊ុន ចាន់ដា បានដោះស្រាយតាមគោលនយោបាយឈ្នះឈ្នះរបស់ប្រមុខរាជរដ្ឋាភិបាលកម្ពុជា ដើម្បីជាប្រយោជន៍ទាំងសងខាង ពោលគឺប្រយោជន៍របស់ប្រជាពលរដ្ឋ និងការរក្សាផ្ទៃដី របស់រដ្ឋសម្រាប់ជាទីកន្លែង រក្សាប្រភពទឹក ផ្ដល់ជូនប្រជាពលរដ្ឋស្រោចស្រពផលដំណាំ នៅក្នុងតំបន់នេះ៕SRP