ខេត្តកំពង់ចាម៖ព្រះសីលសំវរ ប៊ត តាំងឆេង ព្រះនាគមុនីមេគណខេត្តកំពង់ចាម បានដឹកនាំព្រះមន្ត្រីសង្ឃជាសហការីគណ ព្រះអនុគណ និងសហការីអនុគណ នាំយកជំនួយ ប្រគល់ជូន សាខាកាកបាទក្រហមកម្ពុជា ខេត្តកំពង់ចាម ដើម្បីប្រើប្រាស់ក្នុងបុព្វហេតុនៃកិច្ចការមនុស្សធម៌ ដែលបានធ្វើឡើងនាល្ងាចថ្ងៃទី១៦ ខែកក្កដា ឆ្នាំ២០២០ នៅសាលាខេត្តកំពង់ចាម ក្រោមវត្តមានលោក អ៊ុន ចាន់ដា អភិបាលខេត្ត និងជាប្រធានគណៈកម្មាធិការសាខាកាកបាទក្រហមកម្ពុជាខេត្តកំពង់ចាម ព្រមទាំងថ្នាក់ដឹកនាំសាខាកាកបាទក្រហមខេត្តជាច្រើនរូបផងដែរ ។
គួរបញ្ជាក់ផងដែរថា អំណោយដែលព្រះនាគមុនីមេគណខេត្តកំពង់ចាម និងព្រះមន្ត្រីសង្ឃ បានប្រគល់ជូននាឱកាសនោះ រួមមាន ៖- អង្ករ១១០បេ – បន្លុង១០០ – និងថវិកាចំនួន ៦,០០០,០០០ រៀល ផងដែរ។
ជាមួយគ្នានោះ លោក អ៊ុន ចាន់ដា ប្រធានគណៈកម្មាធិការសាខាកាកបាទក្រហមកម្ពុជាខេត្តកំពង់ចាម ក៏បានថ្លែងអំណរព្រះគុណដល់ព្រះមេគណ និង ព្រះមន្ត្រីសង្ឃគ្រប់អង្គ និងបានចាត់ទុកថា នេះជាព្រះកាយវិការដ៏គំរូ សម្រាប់ព្រះសង្ឃ និង ពុទ្ធបរិស័ទ ។ ដោយបច្ចុប្បន្ននេះ ទឹកទន្លេមេគង្គនៅក្នុងខេត្តកំពង់ចាម ចាប់ផ្ដើមហក់ឡើងជាបណ្ដើរៗហើយ ដែលប្រការនេះថ្នាក់ដឹកនាំខេត្តក៏បានត្រៀមលក្ខណៈជាស្រេច ដើម្បីជួយសង្គ្រោះដល់ពលរដ្ឋដែលរងផលប៉ះពាល់ ដោយគ្រោះធម្មជាតិ ។
គួររំលឹកផងដែរថា ស្ថានភាពកម្ពស់ទឹកទន្លេមេគង្គក្នុងឆ្នាំ២០១៩ ខេត្តកំពង់ចាមទទួលរងផលប៉ះពាល់ចំនួន០៩ក្រុង-ស្រុក ស្មើនឹង៤៧ឃុំ-សង្កាត់ បណ្តាលឲ្យប៉ះពាល់ ២៧,៨៣៣គ្រួសារ ស្លាប់មនុស្សចំនួន១០នាក់ លិចផ្ទះចំនួន២២,១៣៤ខ្នង សាលារៀន៦៨កន្លែង វត្តចំនួន៥៨កន្លែង វិហារឥស្លាម០៧ន្លែង និងមណ្ឌលសុខភាព០៥កន្លែង ជម្លៀសប្រជាពលរដ្ឋចំនួន៤,១៧៨គ្រួសារ និងសត្វគោចំនួន៩,៥២០ក្បាល ទៅកាន់ទួលសុវត្ថិភាព ផងដែរ៕SRP