ព័ត៌មាន សង្គម ថ្មីៗ

ខេត្តសៀមរាប៖រថយន្តធុនធំមួយគ្រឿងបានឈប់លើចិញ្ចើមផ្លូវត្រូវបានបុរសម្នាក់ជិះម៉ូតូទៅបុកចំពេញទំហឹងបណ្ដាលឱ្យរងរបួសធ្ងន់។

ហេតុការណ៍បានកើតឡើង វេលាម៉ោង២០ ថ្ងៃទី២៧ ខែវិច្ឆិកា ឆ្នាំ២០២២ ស្ថិតផ្លូវកៅស៊ូលេខ៦៤ ភូមិដំរីកូន ឃុំពពេល ស្រុកសូទ្រនិគម ខេត្តសៀមរាប។

ប្រភពបានឲ្យដឹងថា ករណីគ្រោះថ្នាក់ចរាចរណ៍ នេះ រវាងម៉ូតូម៉ាក ហុងដាស្កូពី ពណ៌ក្រហម គ្មានស្លាកលេខ បើកបរដោយឈ្មោះព្រឿន រ័ត្ន ភេទប្រុសអាយុ២៨ឆ្នាំ ទីលំនៅភូមិដំរីកូន ឃុំពពេល ស្រុកសូទ្រនិគម ខេត្តសៀមរាប បើកបរទិសដៅពីជើងទៅត្បូង បានបុកគូទរថយន្តម៉ាកHundai ពណ៌លឿង ពាក់ស្លាកលេខភ្នំពេញ3F.6486 (ឈប់លើចិញ្ចើមផ្លូវ) បណ្ដាលអោយរបួសមនុស្សធ្ងន់។ ឯអ្នកបើកបររថយន្តរត់គេចខ្លួន ក្រោយកើតហេតុ។

បច្ចុប្បន្ន អ្នករបួស ត្រូវបានគេបញ្ជូនទៅមន្ទីរពេទ្យស្រុកដើម្បីជួយសង្គ្រោះ។ ចំណែកវត្ថុតាងម៉ូតូនិងរថយន្ត សមត្ថកិច្ច យកទៅរក្សារទុកនៅអធិការនគរបាលស្រុក៕SRP

ខេត្តសៀមរាប៖តៃឡានហាយលែនឌើរបានស្លាប់ខណ­​: បើករថយន្តទៅបុកត្រាក់ទ័រចំពីក្រោយពេញទំហឹង។

ហេតុការណ៍បានកើតឡើងនៅថ្ងៃទី២៧ ខែវិច្ឆិកា ឆ្នាំ២០២២ វេលាម៉ោង០២និង៤៥នាទី ព្រឹកនៅលើផ្លូវជាតិលេខ៦៨ ចន្លោះបង្គោលគីឡូម៉ែត្រលេខ(31-32) ស្ថិតនៅឃុំជ្រោយនាងងួន ស្រុកស្រីស្នំ ខេត្តសៀមរាប។

សមត្ថកិច្ចមូលដ្ឋានបានឲ្យដឹងថាគ្រោះថ្នាក់ចរាចណ៍នេះរវាងត្រាក់ទ័រដឹកម៉ាស៊ីនច្រូតស្រូវនិងរថយន្ត ក្នុងទិសដៅស្របទិសពីខាងត្បូងទៅទិសខាងជើង។ ត្រាក់ទ័រម៉ាកៈkubotaM-6040 ពណ៌ក្រហម ស៊េរី2012(គ្មានផ្លាកលេខ)។ បើកបរដោយឈ្មោះ សាញ់ ហុងចេង ភេទប្រុសអាយុ៣៦ឆ្នាំ មុខរបរធ្វើស្រែ។ ទីលំនៅបច្ចុប្បន្នៈផ្ទះលេខ០១៤ ក្រុមទី២ ភូមិសង្កែមានជ័យឃុំកំពង់ក្ដី ស្រុកជីក្រែង ខេត្តសៀមរាប (គ្មានរបួស)។ អ្នករួមដំណើរម្នាក់ឈ្មោះរឿន សុផល ភេទប្រុសអាយុ២៦ឆ្នាំ មុខរបរបើកបរម៉ាស៊ីនច្រូតស្រូវ ទីលំនៅបច្ចុប្បន្ន ភូមិស្វាយព្រៃ ឃុំល្វាស្រុកបរវេល ខេត្តបាត់ដំបង (គ្មានរបួស)។

ចំណែករថយន្តម៉ាក TOYOTA HiLANDER ពណ៌បៃតង ស៊េរី ២០០៣ពាក់ផ្លាកលេខ ព្រះវិហារ2A-4849 បើកបរដោយឈ្មោះ លី ពិសិដ្ឋភេទប្រុសអាយុ២៤ឆ្នាំ -ទីលំនៅបច្ចុប្បន្នភូមិ ប្រជាធម្មលិចសង្កាត់ផ្សារកណ្ដាល ក្រុងប៉ោយប៉ែត ខេត្តបន្ទាយមានជ័យ បើកបរមានទិសដៅពីត្បូង ទៅជើង បុកត្រាក់ទ័រពីក្រោយបណ្តាលឲ្យស្លាប់នៅកន្លែង។ ករណីនេះបណ្ដាលឲ្យមានការខូចខាត ត្រាក់ទ័រ១គ្រឿងស្រាល និងរថយន្ត១គ្រឿងធ្ងន់ផងដែរ៕SRP

ខេត្តសៀមរាប៖បុរសម្នាក់បានស្លាប់នៅនឹងកន្លែង ខណៈជិះម៉ូតូធ្លាក់ពីលើស្ពាន។ ហេតុការណ៍បានកើតឡើង ថ្ងៃទី 26 ខែវិច្ឆិកា ឆ្នាំ2022 នៅលេីផ្លូវជាតិលេខ6 ស្ថិតក្នុងភូមិសំរោងកញ្ចោច ឃុំឫស្សីលក ស្រុកជីក្រែង ខេត្តសៀមរាប។

ប្រភពបានឱ្យដឹងថា ករណីគ្រោះថ្នាក់ចរាចរណ៍បង្កដោយខ្លួនឯង ជិះម៉ូតូធ្លាក់ពីលេីស្ពាន ម៉ាកC125 ពណ៌ខ្មៅពាក់ស្លាកលេខកំពង់ចាម1U-2658 (ទិសដៅពីកេីតទៅលិច)។

ជនរងគ្រោះ ឈ្មោះ នួន ពិសិដ្ឋ ភេទប្រុសអាយុ 29ឆ្នាំ ទីលំនៅភូមិតារៀម ឃុំដងក្តារ ស្រុកស្ទឹងត្រង់ ខេត្តកំពង់ចាម៕SRP

ខេត្តព្រះវិហារ៖អ្នកសារព័ត៌មានចំនួន៣នាក់ ត្រូវបាន នគរបាលខេត្តព្រះវិហារ ឃាត់ខ្លួននៅក្នុងបន្ទប់ KTV ViP 2 យីហោ«ភោជនីយដ្ឋានផ្កាយព្រឹក2» ស្ថិតនៅភូមិអណ្តូងពោធិ៍ សង្កាត់កំពង់ប្រណាក ក្រុងព្រះវិហារ កាលពីវេលាម៉ោង១យប់ ឈានចូលថ្ងៃទី២២ វិច្ឆិកា ឆ្នាំ២០២២។

ការឃាត់ខ្លួនធ្វើឡើង តាមបណ្តឹងរបស់ឈ្មោះ សាត ណាក់ ភេទប្រុស អាយុ៣០ឆ្នាំ មុខរបរលក់ដូរ រស់នៅភូមិពោបាក់ក សង្កាត់ដំរីជាន់ខ្លា ក្រុងស្ទឹងសែន។

តាមប្រភពច្បាស់ការណ៍បានអ្នកសារព័ត៌មាន ថ្ងៃព្រហស្បតិ៍ នេះថា ដើមចោទក្នុងបណ្ដឹងមួយនេះ គឺតំណាងឱ្យ ក្រុមហ៊ុន ”ភីអិនធី PNT”។

ប្រភពបានបន្តថា នៅមុនពេលឃាត់ខ្លួន ក្រុមអ្នកសារព័ត៌មាន គ្នា៤នាក់ បានជិះរថយន្ត១គ្រឿង ចុះទៅយកព័ត៌មាន ជុំវិញភាពមិនប្រក្រតី របស់ក្រុមហ៊ុន ”ភីអិនធី PNT” ដែលមានការសង្ស័យប្រមូលទិញឈើ ពីពលរដ្ឋដោយខុសច្បាប់ នៅស្រុករវៀង ខេត្តព្រះវិហារ។

ករណីខាងនេះ តំណាងក្រុមហ៊ុន ក៏បានសម្រួលឱ្យប្រាក់ទៅក្រុមអ្នកព័ត៌មាន ចំនួន៥០០ដុល្លារ ជាថ្នូរនិងបិទព័ត៌មាន កុំឱ្យផ្សាយ រាល់សកម្មភាពទិញឈើខុសច្បាប់របស់ក្រុមហ៊ុន ប៉ុន្តែអ្នកព័ត៌មានមិនព្រម ដោយទារចំនួន៤ពាន់ដុល្លារ ព្រោះគ្នា៤នាក់ ហើយតំណាងឱ្យក្រុមហ៊ុន ”ភីអិនធី PNT” ក៏ប្រើឧបាយកល តថ្លៃគ្នា ដើម្បីបានសំឡេងរហូតត្រូវថ្លៃគ្នាចំនួន២១៥០ដុល្លារ ប្រគល់ឱ្យក្រុមអ្នកសារព័ត៌មាន
បន្ទាប់មកទៀត ដើមចោទនិងបក្ខពួក ក៏បានបញ្ឆោត ប៉ាវក្រុមអ្នកព័ត៌មាន ឲ្យទៅច្រៀងខារ៉ាអូខេត្រង់ចំណុចខាងលើ ក្រោមហេតុផលថា៖ យើងរាប់អានគ្នានិងដើម្បីឱ្យអ្នកសារព័ត៌មាន ភ្លេចខ្លួន ស្របពេលដើមចោទប្ដឹងរួចហើយ សមត្ថកិច្ចកំពុងធ្វើនីតិវិធី.!។

ប្រភពបានបន្តទៀតថា ខណៈកំពុងច្រៀងរាំសប្បាយមិនបានចាប់អារម្មណ៍ ក៏ស្រាប់តែសមត្ថកិច្ចប៉ូលិសខេត្តព្រះវិហារ ចុះចាប់ខ្លួនពួកគេ ក្នុងបន្ទប់ KTV តែម្ដង ទើបភ្ញាក់ខ្លួនខ្ញាកថា៖ ចុមអញចាញ់បញ្ឆោតឈ្មួញឈើហើយ ក៏នាំគ្នាស្រឡាំងកាំងសរភ្នែកព្រាត ស្របពេលអ្នកសារព័ត៌មានម្នាក់ទៀត រត់រួចខ្លួន។

ករណីនេះរហូតដល់ល្ងាចថ្ងៃទី២៣ ខែវិច្ឆិកា ម្សិលមិញ ចៅក្រមស៊ើបសួរ នៃសាលាដំបូងខេត្តព្រះវិហារ លោក យុត ពន្លឺ ចៅក្រមស៊ើបសួរបានសម្រេចចេញដីកាឃុំខ្លួនទាំង៣នាក់ជាបណ្ដោះអាសន្ន បទកំហែងយក។

អ្នកសារព័ត៌មាន ទាំង៣នាក់ទី១៖ ឈ្មោះ មុំ វិបុល ភេទប្រុសអាយុ៤៤ឆ្នាំ មុខរបរសារព័ត៌មាន”ប៉ុស្តិ៍លេខ៣”នៅភូមិជៀស ឃុំថ្មពូន ស្រុកត្បូងឃ្មុំ ខេត្តត្បូងឃ្មុំ។

២៖ ឈ្មោះ តិន ទ្រី ភេទប្រុស អាយុ២៩ឆ្នាំ មុខរបរសារព័ត៌មាន”រស្មីឆ្នាំងមាស”។

៣៖ ឈ្មោះ តិន ស៊ីថា ភេទប្រុស អាយុ២៧ឆ្នាំ មុខរបរសារព័ត៌មាន”ខេមមេឌៀ” អ្នកទាំ២នៅភូមិម៉ឺនរាជ ឃុំខ្យង ស្រុកជ័យសែន៕SRP