ខេត្តកោះកុង៖មានការលើកឡើងថាគេចពន្ធ ទំនិញបង់ពន្ធស្ទើរមិនគ្រប់ និងទំនិញខុសច្បាប់ សម្រុកចូលតាមច្រកផ្លូវទឹក និងច្រកផ្លូវគោកទាំងយប់ទាំងថ្ងៃក្នុងខេត្តកោះកុង។
ប្រភពបានឱ្យដឹងថា ក្រុមឈ្មួញធំៗបានសម្រុកនាំទំនិញគេចពន្ធ និងទំនិញបង់ពន្ធស្ទើរមិនគ្រប់ និងទំនិញខុសច្បាប់ចេញពីប្រទេសថៃ តាមច្រកកំពង់ផែ និងច្រកគោកមក្នុងខេត្តកោះកុង ក្រោមការបើកដៃសហការជាប្រព័ន្ធ ប្រធានសាខាគយខេត្តកោះកុង និងបក្ខពួក។
ក្រុមឈ្មួញ និងអាជីវកររកស៊ីដឹកជញ្ជូនទំនិញចូលពីប្រទេសសៀម ឆ្លងកាត់ខេត្តកោះកុង បានលួចបង្ហើបឲ្យដឹងថា មេគយខេត្តកោះកុង បានឃុបឃុត ជាមួយក្រុមឈ្មួញធំៗ ដែលរកស៊ីនាំទំនិញមានសាំងគេចពន្ធ និងទំនិញបង់ពន្ធស្ទើរមិនគ្រប់ និងទំនិញខុសច្បាប់ពីប្រទេសថៃ តាមច្រកកំពង់ផែ និងច្រកគោក ដោយមិនមានការទប់ស្កាត់ហើយករណីនេះធ្វើឲ្យបាត់បង់ចំណូលរដ្ឋយ៉ាងច្រើនផងដែរ។
ប្រភពបានបន្តថា ទំនិញគេចពន្ធ និងទំនិញបង់ពន្ធស្ទើរមិនគ្រប់ ចំណីអាហារខូចគុណភាពយ៉ាងពេញបន្ទុក ត្រូវបានឈ្មួញនាំចូលពីប្រទេសសៀម យ៉ាងរលូនដោយគ្មានការឆែកឆេរ និងរឹតបន្ទឹងពីមន្ត្រីគយនឡើយ។
តាមការអះអាងពីមន្ត្រីពាក់ព័ន្ធមួយចំនួនដែលបម្រើកាងារតាមច្រកប្រមូលពន្ធគយបានលួចបង្ហើបឲ្យដឹងថា ទំនិញគេចពន្ធ និងទំនិញបង់ពន្ធស្ទើរមិនគ្រប់ ឬមិនគ្រប់ដែលនាំចូលពីប្រទេសសៀម មានដូចជា ស្រាបៀរជាច្រើនប្រភេទ ភេសជ្ជៈកំប៉ុង ឬដប គ្រឿងសំណង់ ទំនិញចាប់ហួយ និងគ្រឿងសំអាងការជាដើម។ ក្រៅពីមុខទំនិញខាងលើ ក៏ឈ្មួញមួយចំនួនអាចនាំម៉ូតូទំនើបៗ គេចពន្ធ គេចពន្ធចូលពីប្រទេសសៀម តាមខេត្តកោះកុង នេះផងដែរ។
សាខាគយខេត្តកោះកុង និងបក្ខពួកបានបើកដៃឲ្យឈ្មួញធំៗនាំចូលនូវទំនិញគេចពន្ធយ៉ាងរលូន ហើយមកគាបសង្កត់អាជីវករ និងឈ្មួញតូចៗ តាមតែទំនើងចិត្ត តាមការបង្កាប់បញ្ជា ដែលដឹកទំនិញឆ្លងកាត់តាមផ្លូវជាតិលេខ៤៨ បង់លុយចាប់ពី១០ម៉ឺនរៀល ឡើងទៅ, រថយន្តធំដឹកទំនិញត្រូវបង់លុយពី២០ម៉ឺនរៀល ឡើងទៅ បើមានទំនិញសំពីងសំពោងច្រើនត្រូវបង់លុយពី២៥ម៉ឺនរៀលឡើងទៅ ដោយ
ក្រុមអាជីវករដែលរកស៊ីដឹកជញ្ជូនទំនិញឆ្លងកាត់ខេត្តកោះកុង និងឆ្លងកាត់កុងត្រូលជជុះគយ ត្រង់ចំណុចឃុំអណ្តូងទឹក ស្រុកស្រែអំបិល គ្មាននរណាមួយហ៊ានតវ៉ានោះទេ គឹត្រូវតែបង់តាមការកំណត់របស់ពួកគេ។
ក្រុមឈ្មួញ និងអាជីវករតូចតាចដែលទ្រាំនឹងទង្វើគាបសង្កត់ ជម្រិតទារលុយលើតុ ក្រោមតុ ពីមន្ត្រី និងភ្នាក់ងារគយក្រោមការគ្រប់គ្រងនៅខេត្តកោះកុង បានធ្វើការអំពាវនាវឲ្យថ្នាក់ដឹកនាំក្រសួងសេដ្ឋកិច្ច និងហិរញ្ញវត្ថុ និងអគ្គនាយកគយកម្ពុជា មិនត្រូវមើលរំលងទៅលើមេសាខាគយខេត្តកោះកុងនេះឡើយ។
ជុំវិញការលើកឡើងបែបនេះ ពីភ្នាក់ងារសារព័ត៌មានសៀមរាប ប៉ុស្ដិ៍ tv online នៅពុំទាន់ទទួលបានការបំភ្លឺពីសាខាគយខេត្តកោះកុងនៅឡើយទេ៕SRP
