ខេត្តកំពង់ចាម៖លោក អ៉ឹម សុទ្ធីរ៉ា ប្រតិភូរាជរដ្ឋាភិបាល ទទួលបន្ទុកអគ្គនាយក នៃអគ្គនាយកដ្ឋានដោះស្រាយ ផលប៉ះពាល់នៃក្រសួងសេដ្ឋកិច្ច និងហិរញ្ញវត្ថុ បានថ្លែងថា ជាគោលការណ៍ យើងមិនចង់ប៉ះពាល់ដីប្រជាពលរដ្ឋទេ បេីសិនជាអាចបញ្ចៀសបាន គឺយើងចៀស ហេីយធ្វើលេីដី របស់រដ្ឋដែលមាន ប៉ុន្តែដោយសារទីតាំងខ្លះ ការសិក្សាគម្រោង គឺចំបាច់ត្រូវតែឆ្លងកាត់សំណង់ ដែលជាទ្រព្យសម្បត្តិ បងប្អូនប្រជាពលរដ្ឋ ដែលយើងត្រូវដោះស្រាយតាមអនុលោមគតិយុត្ត។
លោកថ្លែងបែបនេះ ក្នុងកិច្ចប្រជុំដោះស្រាយផលប៉ះពាល់ដោយសារគម្រោងលើកម្រិតផ្លូវជាតលេខ៧ (ស្គន់-កំពង់ចាម) នៅសាលាខេត្តកំពង់ចាម នៅថ្ងៃចន្ទនេះ ក្រោមវត្តមានលោក ស្ដើង សុខុម រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានគណៈកម្មការអន្តរក្រសួងដោះស្រាយផលប៉ះពាល់ ដោយសារគម្រោងអភិវឌ្ឍន៍ -លោក ភី សុភាត់ អនុលេខាធិការក្រសួងសាធារណការ និងដឹកជញ្ជូន និងលោក អ៊ុន ចាន់ដា អភិបាលខេត្តកំពង់ចាម ព្រមទាំងអ្នកពាក់ព័ន្ធជាច្រើនរូបទៀត។
លោក អ៉ឹម សុទ្ធីរ៉ា បានថ្លែងថា ខេត្តកំពង់ចាម បាននិងកំពុងអភិវឌ្ឍរីកចម្រើន គួរឱ្យកត់សម្គាល់ ដោយកន្លងមកយើងមានគម្រោងហិរញ្ញប្បទាន ពីដៃគូអភិវឌ្ឍជាច្រើន ហើយជាចំណងដៃប្រវត្តិសាស្ត្រ មួយទៀត ដែលខេត្តកំពង់ចាម នឹងទទួលបានឆាប់ៗខាងមុខនេះ គឺការលេីកកម្រិតគុណភាព កំណាត់ផ្លូវជាតិលេខ៧ ទៅជាផ្លូវ៤គន្លង ចាប់ពីរង្វង់មូលស្គន់ ស្រុកជើងព្រៃ រហូតដល់គល់ស្ពានគីហ្សូណា ក្រុងកំពង់ចាម ដែលគ្រោងនឹងធ្វើការស្ថាបនានៅចុងឆ្នាំ២០២៣នេះ។
លោក អ៉ឹម សុទ្ធីរ៉ា បានបន្តថា ក្នុងប្រទេសកម្ពុជារបស់យើង គឺមានតម្រូវការភាពចំបាច់បន្ទាន់ ដេីម្បីអភិវឌ្ឍប្រទេសជាតិ ឱ្យឈានទៅទាន់សភាពការណ៍ នឹងប្រទេសជិតខាងរបស់យើង ដែលគេមានផ្លូវតភ្ជាប់ខ្វាត់ខ្វែង ដើម្បីសម្រួលដល់បណ្ដាញដឹកជញ្ជូន ជំរុញដល់ការងារពានិជ្ជកម្ម ក្នុងនិងក្រៅតំបន់។ ដូច្នេះទេកម្ពុជារបស់យើង នឹងមានតម្រូវការចំបាច់បន្ទាន់ ទៅលេីកិច្ចការនេះ ខណៈដែលកម្ពុជាយើង មានផ្លូវល្បឿនលឿនរួចមកហើយ ដេីម្បីបម្រើនូវគោលដៅលេីកស្ទួយសេដ្ឋកិច្ច ប្រទេសជាតិរបស់យើង ក៏ដូចជាការលេីកកម្ពស់ស្តង់ដារប្រព័ន្ធដឹកជញ្ជូនផងដែរ។
លោក អ៊ុន ចាន់ដា អភិបាលខេត្តកំពង់ចាម បានលើកឡើងថា អាជ្ញាធរខេត្តបានបង្កើតក្រុមការងារ សម្រាប់ដោះស្រាយផលប៉ះពាល់ ដោយសារគម្រោងលើកម្រិតផ្លូវជាតិលេខ៧ (ស្គន់-កំពង់ចាម) ចំនួន២ក្រុម ដឹកនាំដោយអភិបាលរងខេត្តចំនួន២រូប ដែលបច្ចុប្បន្នក្រុមការងារកំពុងធ្វើការសិក្សា ជាបឋមទៅលើទិន្នន័យជាក់ស្ដែង ដើម្បីរកវិធីសាស្ត្រដោះស្រាយ ព្រោះផលប៉ះពាល់វាមានទំហំធំ ក្នុងនោះរួមមាន ទីមួយ នៅទីប្រជុំជនស្គន់ ស្រុកជេីងព្រៃ និងទីពីរ នៅទីប្រជុំជនផ្សារព្រៃទទឹង ស្រុកព្រៃឈរ ដែលទីប្រជុំជនទាំងពីរនេះ គឺសំបូរទៅដោយសំណង់រឹងមាំ ដូច្នេះយើងត្រូវគិតគូរឱ្យបានហ្មត់ចត់បំផុត៕ដោយនាគខៀវ
