ព័ត៌មានជាតិ

ភ្នំពេញ៖ក្រសួងកសិកកម្មប្រកាសថា «ផ្លែមៀនប៉ៃលិន» មិនទាន់អាចនាំចេញទៅកាន់ទីផ្សារក្រៅប្រទេសបាន ដោយសារបញ្ហារីករាលជំងឺកូវីដ១៩។ នេះបើយោងតាមសេចក្ដីប្រកាសរបស់ក្រសួងកសិកកម្ម រុក្ខាប្រមាញ់ និងនេសាទ ចុះនៅថ្ងៃទី១២ ខែសីហា ឆ្នាំ២០២១។ សូមអានសេចក្ដីប្រកាសខាងក្រោម៖

ខេត្តត្បូងឃ្មុំ៖លោកជាមច័ន្ទ សោភ័ណ  អភិបាលខេត្តត្បូងឃ្មុំ បានប្រាប់ដល់អាជ្ញាធរ  និងមន្ត្រីជំនាញត្រូវសហការគ្នា ធ្វើយ៉ាងណា ធានាទឹកឲ្យមានគ្រប់គ្រាន់ ចេញពីទីតាំងប្រភពទឹកទាំង២ សម្រាប់ស្តុកទុកប្រើប្រាស់ និងបង្កបង្កើនផល របស់ប្រជាពលរដ្ឋ ពិសេសនារដូវប្រាំង។

លោកជាម ច័ន្ទសោភ័ណ ប្រាប់មន្ត្រីពាក់ព័ន្ធយ៉ាងដូច្នេះនៅថ្ងៃទី១២ ខែសីហា ព្រឹកមិញនេះ ក្នុងឱកាស  បានអញ្ជើញចុះពិនិត្យប្រព័ន្ធធារាសាស្ត្រ២កន្លែង ហេដ្ឋារចនាសម្ព័ន្ធសុខាភិបាល និងការចាក់វ៉ាក់សាំងបង្ការជំងឺកូវីដ១៩ ជូនពលរដ្ឋក្នុងស្រុកក្រូចឆ្មារ។

សូមជម្រាបថាប្រព័ន្ធធារាសាស្ត្រ២ទីតាំង ក្នុងស្រុកក្រូចឆ្មារ រួមមានបឹងកន្តេរ និងទំនប់ស្ទាក់ទឹកព្រែកតាកុច ជាទីតាំងប្រភពទឹកយ៉ាងសំខាន់នារដូវប្រាំង សម្រាប់ស្តុកទឹក និងបង្ហូរទឹកប្រើប្រាស់ និងបង្កបង្កើនផលរបស់ប្រជាកសិករ ស្ថិតក្នុងស្រុកក្រូចឆ្មារ ។ ដោយរាល់ការចំណាយទាំងអស់ ក្នុងការសាងសង់ និងជួសជុលទីតាំងទាំង២នេះ លោកជា សុផារ៉ា ប្រធានក្រុមការងាររាជរដ្ឋាភិបាល ចុះមូលដ្ឋានខេត្តត្បូងឃ្មុំ ធានាចំណាយទាំងអស់។

លោកជាម ច័ន្ទសោភ័ណ ក៏បានដឹកនាំមន្ត្រីពាក់ព័ន្ធ និងអាជ្ញាធរមូលដ្ឋាន បន្តចុះពិនិត្យហេដ្ឋារចនាសម្ព័ន្ធ ប្រព័ន្ធសុខាភិបាល ក្នុងស្រុកក្រូចឆ្មារ ចំនួន០៣ទីតាំង រួមមាន៖១.ពិនិត្យទីតាំងចាក់វ៉ាក់សាំងជូនប្រជាពលរដ្ឋ ក្នុងឃុំក្រូចឆ្មារ។  ២.ពិនិត្យការដ្ឋានសាងសង់មន្ទីរពេទ្យបង្អែកស្រុកក្រូចឆ្មារ ក្នុងឃុំក្រូចឆ្មារ។ ៣.ពិនិត្យមណ្ឌលចត្តាឡីស័ក ក្នុងវិទ្យាល័យកំពង់ទ្រាស ឃុំកំពង់ទ្រាស៕SRP

ខេត្តព្រះវិហារ៖លោកកង សៅគុណ មេបញ្ជាការ កងរាជអាវុធហត្ថខេត្តព្រះវិហារ ណែនាំអោយកម្លាំងកងរាជអាវុធហត្ថ ខេត្តទាំងអស់ ធ្វើតេស្តយកសំណាក រកមេរោគកូវីដ១៩ ក្នុងអំឡុងពេល បំពេញបេសកកម្ម បិទខ្ទប់ក្នុងភូមិសាស្រ្ត និងតាមតំបន់ព្រំប្រទល់ខេត្តនាពេលកន្លងមក។

លោកមានប្រសាសន៍ថា ការអនុវត្តន៏ ៣ការពារ ៣កុំ តាមការណែនាំ របស់រាជរដ្ឋាភិបាល និង វិធានផេ្សងៗទៀត របស់ក្រសួងសុខាភិបាល គឺមានសារៈសំខាន់ណាស់ នាពេលបច្ចុប្បននេះ។
លោកក៏បានផ្តាំផ្ញើ ដល់នាយ នាយរងកងរាជអាវុធហត្ថខេត្តទាំងអស់ អោយធ្វើការណែនាំ ដល់ក្រុមគ្រួសា អោយចេះការពារខ្លួន អោយបានគ្រប់ៗគ្នា ព្រោះគ្មាន នណាមកការពារ យើងបាន ក្រៅពីខ្លួនយើង នឹងគ្រួសាយើងនោះឡើយ។

លោកបានណែនាំបែបនាព្រឹកមិញនេះនៅទីបញ្ជាការដ្ឋានកងរាជអាវុធហត្ថខេត្តព្រះវិហារ ក្នុងឱកាសបើកយុទ្ធការ ចាក់វ៉ាក់សាំងការពារជំងឺកូវីដ១៩ ដូសជំរុញ (ដូសទី៣ ដល់នាយ នាយរងកងរាជអាវុធហត្ថខេត្តព្រះវិហារ និងប្រពន្ធ របស់កងម្លាំងទាំងអស់៕SRP

ខេត្តសៀមរាប៖ក្រុមប៉ូលិសខេត្តសៀមរាបបានចាប់ខ្លួនបុរសម្នាក់ពាក់ព័ន្ធករណីលួច។

ការចាប់ខ្លួនធ្វើឡើង នៅថ្ងៃទី ១២ខែសីហា ឆ្នាំ២០២១នេះ ត្រង់ចំណុច ហាងជួសជុលទូរស័ព្ទ មួយកន្លែងក្នុងភូមិវិហារចិន ខណ:ដោយជនសង្ស័យ បានយក iPad របស់ជនរងគ្រោះទៅបិតស្គ្រីន។

មន្ត្រីនគរបាលខេត្តសៀមរាបបានថ្លែងប្រាប់បណ្ដាញសៀមរាបប៉ុស្តិ៍នៅមុននេះបន្តិចថាជនសង្ស័យមានឈ្មោះ កែរ ណាលុច ហៅបារាំង អាយុ១៧ឆ្នាំ មុខរបរ បើកឡានដឹកគ្រឿងសំណង់ បច្ចុប្បន្ន រស់នៅភូមិវិហារចិន សង្កាត់ ស្វាយដង្គំ ក្រុងសៀមរាប ពាក់ព័ន្ធករណី អំពើលួចមានស្ថានទម្ងន់ទោស គាស់ទំលុះទំលាយ។

មន្ត្រីនគរបាលបានថ្លែងបន្តថា ការលួចកើតឡើងកាលពីវេលាម៉ោង ០២និង៣០នាទី យប់ឈានចូលថ្ងៃទី ១១ ខែសីហា ឆ្នាំ២០២១ ត្រង់ចំណុចហាងលក់កុំព្យូទ័រ ស្ថិតភូមិវត្តបូព៌ សង្កាត់សាលាកំរើក ក្រុងសៀមរាប។ ដោយជនសង្ស័យ បានធ្វើសកម្មភាព ឡើងលើដំបូលផ្ទះ គាស់ស័ង្កសី ចូលក្នុងហាងលក់កំព្យូទ័រ របស់ជនរងគ្រោះ លួចយក computer MacBook Pro ១គ្រឿង MacBook Air ១គ្រឿង iPad 11 ១គ្រឿង iPad Air 4 ១គ្រឿង iPad 8th ១គ្រឿង iPad Pro 2020 មួយគ្រឿង កាបូបស្ពាយ១ និងឯកសារមួយចំនួន។

បើតាមមន្ត្រីនគរបាលបព្ជាក់ថាក្រោយសាកសួរ ជនសង្ស័យ បានឆ្លើយសារភាពថា ពិតជាបានធ្វើសកម្មភាព ករណីខាងលើនេះ ពិតប្រាកដមែន។ ក្នុងនោះនគរបាលដកហូតវត្ថុតាង computer និង iPad ដែលជារបស់ជនរងគ្រោះ ហើយបញ្ជូនទៅតុលាការ ចាត់ការតាមច្បាប់។

សូមជម្រាបថា ប្រតិបត្តិការបង្ក្រាបដឹកនាំផ្ទាល់ដោយលោកសុខ ម៉េងអ៊ាង នាយការិយាល័យនគរបាលព្រហ្មទណ្ឌកម្រិតធ្ងន់ខេត្ត តាមការចង្អុលបង្ហាញ ពីលោកទិត្យ ណារ៉ុង ស្នងការនគរបាលខេត្ត លោកភឹង ចិន្តារ៉េត ស្នងការរងទទួលផែនព្រហ្មទណ្ឌ និងលោក ណុប សារ៉ាក់ ស្នងការរង ជាជំនួយការដឹកនាំការិយាល័យព្រហ្មទណ្ឌកម្រិតធ្ងន់ និងដោយមានការសម្របសម្រួលពីលោក មាស ច័ន្ទពិសិដ្ឋ ព្រះរាជអាជ្ញាអមសាលាដំបូងខេត្តសៀមរាប៕SRP

ខេត្តកំពង់ចាម​៖លោកយឹម ឆៃលី ប្រធានក្រុមប្រឹក្សា អភិវឌ្ឍន៏វិស័យកសិកម្ម និងជនបទ បាន​ប្រាប់ទៅមន្ត្រីសូមឲ្យ​ផ្អាកទទួលយកអ្នកពាក់ព័ន្ឋនឹងអ្នកវិជ្ជមានកូវីដ១៩  ដែលមិនមែនជាប្រភេទឌែលតា មកធ្វើចត្តាឡីស័កនៅតាមក្រុង ស្រុក ដោយបង្វែរការធ្វើចត្តាឡីស័ក អ្នកពាក់ព័ន្ឋនឹងអ្នកជំងឺកូវីដ១៩ ដែលមិនមែនជាប្រភេទឌែលតា ទៅធ្វើចត្តាឡីស័ក នៅតាមផ្ទះរៀងៗខ្លួនវិញ។

លោកយឹម ឆៃលី បន្តថាក្នុងករណីនេះ យើងត្រូវត្រៀមមណ្ឌលចត្តាឡីស័ក ទទួលយកពលករ ត្រឡប់មកពីប្រទេសថៃ ដែលភាគច្រើនពាក់ព័ន្ឋនឹងមេរោគកូវីដ១៩ បម្លែងថ្មីប្រភេទឌែលតា។ ជាពិសេស​​ត្រូវ​បន្តយុទ្ឋធាការចាក់វ៉ាក់សាំងទាំងជំហានទី១ ជំហានទី២ ក៏ដូចជាដូសទី៣ (ដូសជំរុញ) ទៅតាមការណែនាំរបស់គណៈកម្មការចំពោះកិច្ចចាក់វ៉ាក់សាំងកូវីដ១៩ ក្នុងក្របខណ្ឌទូទាំងប្រទេស និងបន្តចុះផ្សព្វផ្សាយ ឲ្យប្រជាជន អនុវត្តឲ្យបានខ្ជាប់ខ្ជួននូវការណែនាំរបស់ក្រសួងសុខាភិបាល និងវិធានការរបស់រាជរដ្ឋាភិបាល ៣ការពារ និង៣កុំ ឲ្យបានគ្រប់ៗគ្នាផងដែរ​។

លោកថ្លែងប្រាប់ទៅមន្ត្រីយ៉ាង​ដូច្នេះ​ក្នុង​កិច្ចប្រជុំស្តីពីការរៀបចំមណ្ឌលចត្តាឡីស័ក និងមណ្ឌលព្យាបាលកូវីដ១៩ បន្ថែម​ សម្រាប់ទទួលពលករត្រឡប់មកពីប្រទេសថៃ​ នៅក្នុងបរិវេណសួនគ្រញូងនគរបាជ័យ ខេត្តកំពង់ចាម​ នៅព្រឹក​មិញនេះ។

ថ្លែងក្នុងឱកាសនោះ​ផងដែរ​ លោក យឹម ឆៃលី​ បាន​ណែនាំ​ដល់​ប្រធានក្រុមការងារថ្នាក់កណ្តាលចុះជួយក្រុង ស្រុក , តំណាងរាស្ត្រ ក៏ដូចជាសមាជិកព្រឹទ្ឋសភា ត្រូវចូលរួមសហការ ជាមួយគណៈកម្មការខេត្តប្រយុទ្ឋនឹងកូវីដ១៩ ដោយគាំទ្រ និងឧបត្ថម្ភ តាមគ្រប់មធ្យោបាយ ជាពិសេសផ្នែកសម្ភារ និងថវិកា ដល់រដ្ឋបាលក្រុង ស្រុក ដើម្បីបន្តត្រៀមរៀបចំមណ្ឌលចត្តាឡីស័ក និងមណ្ឌលព្យាបាលអ្នកជម្ងឺកូវីដ១៩ ដែលជាពលករ ពលការិនី មានទីលំនៅក្នុងខេត្តកំពង់ចាម។

បើតាមលោកអ៊ុន ចាន់ដា អភិបាលខេត្តកំពង់ចាម បានឲ្យដឹងថា រដ្ឋបាលខេត្តកំពង់ចាម បានរៀបចំមណ្ឌលចត្តាឡីស័ក និងមណ្ឌលព្យាបាលជម្ងឺកូវីដ១៩ បន្ថែមទៀតដើម្បីត្រៀមទទួលពលករ វិលត្រឡប់មកពីប្រទេសថៃ ក្នុងនោះ បានជួសជុលឃ្លាំងចំនួន៣ទីតាំង ដោយទីតាំងទី១នៅក្នុងក្រុងកំពង់ចាម មាន៧អគារ អាចទទួលពលករ ៦១៧នាក់, ទីតាំងទី២. នៅស្រុកកងមាស មាន១អគារ អាចទទួលពលករ ១៣២៦នាក់ និងទីតាំងទី៣ នៅស្រុកកំពង់សៀម សម្រាប់រៀបចំជាមន្ទីរពេទ្យកំរិតស្រាលខេត្ត និងព្យាបាលអ្នកជម្ងឺឌែលតា ដែលអាចដាក់អ្នកជម្ងឺបានប្រមាណ៨០០នាក់ ព្រមទាំងពង្រីកបន្ថែមចំនួន៤អគារទៀត ស្មើនឹង៣៩បន្ទប់ នៅមណ្ឌលគរុកោសល្យភូមិភាគកំពង់ចាម ដែលអាចទទួលពលករមកធ្វើចត្តាឡីស័កចំនួន៣៨៣នាក់, សរុបទាំងអស់ក្នុងមជ្ឈមណ្ឌល អាចដាក់បាន១២០០នាក់។

អភិបាលខេត្តបន្តថា រហូតមកដល់បច្ចុប្បន្ននេះ ខេត្តកំពង់ចាម រកឃើញវិជ្ជមានកូវីដ១៩ ចំនួន៤.៣៤៣នាក់ ក្នុងនោះប្រភេទឌែលតា មានចំនួន១២ករណី, កំពង់សម្រាកព្យាបាល ៨៨៧នាក់, ជាសះស្បើយចំនួន ៣.៣៥៣នាក់ និងស្លាប់ ១០៣នាក់​៕SRP

ខេត្តកំពង់ចាម​៖គម្រោង​មូលនិធិ​ឃុំ​-សង្កាត់​ ​ឆ្នាំ​២០២១​ របស់​គណៈកម្មការ​ជាតិ​សម្រាប់​ការអភិវឌ្ឍន៍​តាម​បែប​ប្រជាធិបតេយ្យ​នៅ​ថ្នាក់​ក្រោម​ជាតិ​​​ ​ត្រូវ​បាន​បេីក​សំណេី​ដេញ​ថ្លៃ​ ចំនួន​៤គម្រោង​​​​​​​​​ នាថ្ងៃ​ទី​១២​ ខែសីហា​​​ ឆ្នាំ​២០២១​ នៅ​សាលា​ស្រុក​កំពង់សៀម​ ក្រោម​វត្តមាន​​លោក​ ឡី​ មិច​ នាយក​រង​រដ្ឋបាល​សាលា​ខេត្ត​កំពង់ចាម​​ និង​លោក​ ឈួន​ វិបុល​ អភិបាល​រង​ស្រុក​កំពង់សៀម​​ ដោយ​មាន​ការ​ចូលរួម​ពី​​​គណៈកម្មការ​លទ្ធកម្ម​ ក្រុម​ការងារ​សម្របសម្រួល​​ខេត្ត​ និង​ស្រុក​ ព្រមទាំង​តំណាង​ក្រុម​ហ៊ុន​ ទទួល​ការ​ ជា​ច្រើន​រូប​ផង​ដែរ​។

ឆ្លៀត​ក្នុង​ឱកាសនោះដែរ​ លោក​ ឈួន​ វិបុល​ អភិបាលរង​ស្រុក​កំពង់សៀម​​​ បាន​ធ្វើ​ការ​ណែនាំ​ជំរុញ​​​ដល់​គណៈកម្មការ​លទ្ធកម្ម​ និង​ក្រុម​ហ៊ុន​ទទួល​ការ​ទាំងអស់​ ធ្វេីយ៉ាងណាត្រូវ​អនុវត្ត​គម្រោង​ឲ្យ​មាន​តម្លាភាព​ និង​ធ្វើ​ការ​សាងសង់​ ​គ្រប់សំណង់​ឲ្យ​ត្រូវ​តាម​បទដ្ឋាន​លក្ខណៈ​បច្ចេកទេស​ ប្រយោជន៍​ដល់​ការ​ប្រើប្រាស់​បាន​យូរ​អង្វែង​។

ក្នុង​នាម​អាជ្ញាធរ​ខេត្ត​ លោក​ ​ឡី​ មិច​​ ​បាន​ក្រេីនរំលឹកដល់​តំណាង​ក្រុមហ៊ុន​​ទទូលការទាំងអស់​ ​ឲ្យ​មាន​ការ​យកចិត្តទុកដាក់​ស្តាប់​ និង​អនុវត្ត​តាម​ការ​ណែនាំ​របស់​អជ្ញាធរ​ ដែលបាន​រៀបចំ​ឡើង​ ជាពិសេស​ត្រូវ​​គោរព​តាម​ក្រមសីលធម៌​របស់​អ្នក​ទទួល​ការ​​ លេីសពី​នោះ​សូម​ឲ្យ​​​ចូលរួម​​សហការ​ជាមួយ​អាជ្ញាធរ​ ដេីម្បី​បង្ការ​ទប់ស្កាត់​ការ​ឆ្លង​រីករាល​ដាល​នៃ​ជំងឺ​កូវីដ​-១៩​ ផងដែរ​។

គួរ​បញ្ជាក់​ផង​ដែរ​ថា​ គម្រោង​ដែល​បាន​ដាក់​ឲ្យ​ដេញ​ថ្លៃ​ខាង​លើ​នេះ​ គឺមាន​ផ្លូវ​ចំនួន​៤ខ្សែ​ ដែល​ត្រូវ​ស្ថាបនា​​ ជូន​ប្រជាពលរដ្ឋ​​ប្រើប្រាស់​ ក្នុង​នោះ​មាន​ ១-ឃុំ​រំចេក​ សាងសង់ផ្លូវបេតុងអាមេប្រវែង៣៤៨ម៉ែត្រ​ ទទឹង៣ម៉ែត្រ​ នៅភូមិរំលេច​។
២-ឃុំ​វិហារធំ​ សាងសង់ផ្លូវបេតុងអាមេប្រវែង៤៧៧ម៉ែត្រ​ ទទឹង៤ម៉ែត្រ​ នៅភូមិពង្រ​។
៣-ឃុំ​អំពិល​ សាងសង់ផ្លូវបេតុងអាមេប្រវែង៦៩៣ម៉ែត្រ​ ទទឹង៤ម៉ែត្រ​ នៅភូមិជើងគោក​។
៤-ឃុំ​អូរស្វាយ​ សាងសង់ផ្លូវបេតុងអាមប្រវែង៥២៣ម៉ែត្រ​ ទទឹង៤ម៉ែត្រ​ នៅភូមិត្រពាំងកក់​៕SRP

ភ្នំពេញ៖សម្ដេចហ៊ុន សែន នាយករដ្ឋមន្ត្រីបានលើកឡើងថាតាមរយៈវ៉ាក់សាំងទាំងនេះ បានជួយឱ្យកម្ពុជាចាក់វ៉ាក់សាំងជូនប្រជាពលរដ្ឋអាយុចាប់ពី ១៨ឆ្នាំឡើង បានចំនួនជាង ៨លាននាក់ហើយ។ ដោយឡែកកុមារ និងយុវវ័យអាយុចាប់ពី ១២ឆ្នាំ ទៅក្រោម ១៨ឆ្នាំ បានចំនួនជាង ៣៥ម៉ឺននាក់ផងដែរ។

សម្ដេច ហ៊ុន សែន បានបន្តថា កម្ពុជា មិនត្រឹមតែជាប្រទេស ដែលឈានមុខនៅក្នុងតំបន់លើការចាក់វ៉ាក់សាំងជូនប្រជាពលរដ្ឋពេញវ័យ និងមនុស្សវ័យក្មេងប៉ុណ្ណោះទេ។ ពេលនេះកម្ពុជា បានបោះជំហានទៅចាក់វ៉ាក់សាំងដូសទី៣ ជូនអ្នកប្រតិបត្តិការងារប្រយុទ្ធប្រឆាំងជំងឺកូវីដ១៩ នៅជួរមុខ ក៏ដូចជាជនអាទិភាពតាមក្រសួងស្ថាប័ននានាផងដែរ។

សូមជម្រាបថាវ៉ាក់សាំងកូវីដ១៩ ស៊ីណូវ៉ាក់ (Sinovac)ចំនួន៣លានដូសទៀតបានដឹកមកដល់កម្ពុជាទៀតហើយ នៅព្រឹក ថ្ងៃព្រហស្បតិ៍ ទី១២ ខែសីហា ឆ្នាំ២០២១នេះ។ វ៉ាក់សាំងបង្ការជំងឺកូវីដ១៩ របស់ក្រុមហ៊ុនស៊ីណូវ៉ាក់(Sinovac)ចំនួន ៣លានដូសបន្ថែមទៀតនេះ ដែលជាការបញ្ជាទិញរបស់រាជរដ្ឋាភិបាលកម្ពុជា បានដឹកពីប្រទេសចិន។

សូមបញ្ជាក់ថា វ៉ាក់សាំងនេះ នឹងរួមចំណែកជួយឱ្យរាជរដ្ឋាភិបាល សម្រេចនូវផែនការចាក់វ៉ាក់សាំងជូនប្រជាពលរដ្ឋវ័យចាប់ពី ១៨ឆ្នាំឡើង ក៏ដូចជាកុមារ និងយុវវ័យអាយុចាប់ពី ១២ឆ្នាំ ទៅក្រោម ១៨ឆ្នាំដែលកំពុងដំណើរការចាក់ជូនជារៀងរាល់ថ្ងៃនេះ។

វ៉ាក់សាំង គឺជាឧបករណ៍ដ៏សំខាន់មួយ ក្នុងការប្រយុទ្ធប្រឆាំងនឹងជំងឺកូវីដ១៩ ដែលកំពុងរីករាលដាលលើពិភពលោក បន្ថែមពីលើវិធានការការពារផ្សេងៗ។ រាជរដ្ឋាភិបាលកម្ពុជា ដែលមានសម្តេចហ៊ុន សែន ជាប្រមុខនោះ បានដាក់ចេញផែនការផ្តល់វ៉ាក់សាំងជូនប្រជាពលរដ្ឋ ជាផែនការយុទ្ធសាស្ត្រមួយ ក្នុងការប្រយុទ្ធប្រឆាំងនឹងជំងឺកូវីដ១៩នេះ។ រាជរដ្ឋាភិបាលកម្ពុជា បានស្វះស្វែងគ្រប់លទ្ធភាព ក្នុងការរកវ៉ាក់សាំងមកចាក់ជូនប្រជាពលរដ្ឋ។ មកដល់ពេលបច្ចុប្បន្ននេះ កម្ពុជារកបានវ៉ាក់សាំងប្រមាណជា ២០លានដូសរួចហើយ។ ក្នុងនោះមានទាំងការផ្តល់ជំនួយ និងការបញ្ជាទិញ៕SRP

ខេត្តស្វាយរៀង៖លោកស្រី ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច បានថ្លែងអំណរគុណដល់ លោកស្រី ចាន់ កន្និកា ដែលបានបរិច្ចាក នូវធនធានដ៏ច្រើននាពេលនេះ ដើម្បីចូលរួមចំណែកក្នុងសម្រាលបន្ទុករាជរដ្ឋាភិបាលក្នុងបរិការណ៍កូវីដ ១៩។

លោកស្រី ម៉ែន សំអន ថ្លែងអំណរគុណ លោកស្រី ចាន់ កន្និកា អគ្គនាយិកា ក្រុមហ៊ុន ស៊ី ខេ ខេ អ៊ិនវេសម៉ិន ឯ.ក នៅរសៀល ថ្ងៃពុធ ទី១១ ខែសីហា ឆ្នាំ២០២១នេះ នៅទីស្តីការក្រសួង។

លោកស្រី ម៉ែន សំអន បានបន្តទៀតថា៖ សកម្មភាពមនុស្សធម៌ទាំងនេះ គឺជាកាយវិការដ៏ល្អប្រពៃរបស់វិស័យឯកជន ដែលបានជួយដល់រាជរដ្ឋាភិបាល ក៏ដូចជាការជួយដល់ការងារមនុស្សធម៌ (ឧបត្ថម្ភណ្ឌលថែទាំកុមារកំព្រាខេត្តស្វាយរៀង និងឧបត្ថម្ភអង្គការអាហ្វេស៊ីបកម្ពុជា ) ជួយដល់ប្រជាពលរដ្ឋ កំពុងជួបប្រទះនូវជីវភាពខ្វះខាត និងជួបការលំបាកនៅក្នុងអំឡុងពេលនៃការឆ្លងរីករាលដាលជម្ងឺកូវីដ១៩ ជាពិសេស បានជួយសម្រាលបន្ទុកដល់ពលករចំណាកស្រុក ដែលបានត្រលប់មកបន្តធ្វើចត្តាឡីស័កនៅតាមខ្នងផ្ទះនៃខេត្តស្វាយរៀង ស្របតាមអានុសាសន៍របស់ សម្តេចតេជោ ហ៊ុន សែន នាយកដ្ឋមន្ត្រី កាលពីថ្ងៃទី ០៦ ខែសីហា ឆ្នាំ២០២១ ដែលផ្តោតជាសំខាន់លើការយកចិត្តទុកដាក់ដល់ពលករ ដែលបានឆ្លងចូលមកស្រុកកំណើត តាមតំបន់ព្រំដែនកម្ពុជា ថៃ។

អំណោយសប្បុរសធម៌ រួមមាន៖ អង្ករ ១០តោន ម៉ាស់ ១០កេសធំ និងទឹកថ្នាំសម្លាប់មេរោគ ចំនួន ២០០លីត្រ៕SRP

ខេត្តសៀមរាប៖បុរសម្នាក់បានស្លាប់ភ្លាមៗខណៈបើកម៉ូតូទៅបុកគ្រឿងចក្រ។

ហេតុការណ៍បានកើតឡើងនៅវេលាម៉ោង ១៤និង៣០ នាទីថ្ងៃទី១១ ខែសីហា ឆ្នាំ ២០២១ នៅចំណុចភូមិតាយ៉ែក ឃុំតាយ៉ែក ស្រុកសូនិគម លើផ្លូវកៅស៊ូ(ពីឃុំតាយ៉ែក ទៅឃុំសំរោង ស្រុកសូទ្រនិគម។

យោងតាមរបាយការណ៍របស់សមត្ថកិច្ចបានឲ្យដឹងថាករណីគ្រោះថ្នាក់ចរាចរណ៍នេះ កើតឡើងរវាងម៉ូតូម៉ាកវ៉េវ ពណ៌ក្រហម ពាក់ស្លាកលេខ 1N8142 បើកបរដោយឈ្មោះសូ ខុម ភេទប្រុស អាយុ៦៦ឆ្នាំ មានទីលំនៅភូមិសំរោងខាងជើង ឃុំសំរោង ស្រុកសូទ្រនិគម ស្លាប់ពេលបញ្ជូនដល់មន្ទីរពេទ្យ ដោយបានបើកបុក គ្រឿងចក្រ សាស័រ ពេលបើកចេញពីផ្ទះ។ ឯអ្នកបើកបរសាស័រ មានឈ្មោះអុល រស្មី ភេទប្រុស អាយុ៣៣ឆ្នាំ មុខរបរកម្មករ រស់នៅភូមិតាយ៉ែក ឃុំតាយ៉ែក ស្រុកសូទ្រនិគម ខេត្តសៀមរាប រត់គេចខ្លួនបាត់។
បច្ចុប្បន្ន អ្នកស្លាប់ប្រគល់អោយក្រុមគ្រួសារ។ចំណែក ឯសាស័រ និងម៉ូតូ រក្សាទុកនៅកន្លែងអធិការនគរបាលស្រុកដើម្បីរង់ចាំការដោះស្រាយពេលក្រោយ៕SRP

ភ្នំពេញ៖នាយករដ្ឋមន្ត្រីហ៊ុន សែន បានចេញសេចក្តីណែនាំ របស់រាជរដ្ឋាភិបាលកម្ពុជា ស្តីពីការបន្តអនុវត្តយុទ្ធនាការពង្រឹងវិធានការប្រយុទ្ធ និងទប់ស្កាត់ ការឆ្លងរាលដាលនៃជំងឺកូវីដ១៩៕SRP

ខេត្តសៀមរាប៖លោកគុជ លីណា ប្រធានគណៈចាត់តាំងគណបក្សប្រជាជនកម្ពុជាខេត្តសៀមរាប នៅរសៀលថ្ងៃទី ១០ ខែ សីហា ឆ្នាំ២០២១ ម្សិលមិញ បាននាំយកអំណោយជាអង្ករ ត្រីខ យកទៅប្រគល់ជូនគណៈ កម្មាធិការគណបក្សសង្កាត់ចំនួន៤ ក្នុងក្រុង សៀមរាប ដើមី្បធ្វើការចែកជូនគ្រួសារគណបក្ស ដែលបានជួបការខ្វះខាត ក្នុងបរិបទកូវិដ១៩ និង ការបិទខ្ទប់ជាបណ្តោះអាសន្ន និងធ្វើចត្តាឡីស័កតាមលំនៅដ្ឋាន។

មានប្រសាសន៍សំណេះសំណាលជាមួយប្រធាន សមាជិក សមាជិកា នៃគណបក្សទាំង៤សង្កាត់នាឱកាសនោះ ក្នុង នាមលោក ទៀ សីហា ប្រធានគណបក្សប្រជាជនកម្ពុជាខេត្ត លោក គុជ លីណា ក៏បានពាំនាំនូវការផ្តាំផ្ញើ សួរសុខទុក្ខ របស់សម្តេចប្រធានគណបក្ស និង សម្តេចប្រធានកិត្តិយស ក្នុងពេលដែលប្រទេសកម្ពុជាយើង បានជួបនូវវិបត្តិកូវិដ១៩ ធ្វើ ប្រជាពលរដ្ឋជួបនូវវិបត្តិសេដ្ឋកិច្ចក្នុងក្រុមគ្រួសារ ជាសំខាន់ចំពោះក្រុមគ្រួសារគណបក្សប្រជាជនកម្ពុជា នៅគ្រប់បណ្តាមូល ដ្ឋានខេត្ត ក្រុង ស្រុក។ ដោយកត្តានេះហើយសម្តេចប្រធាន ក៏បានគិតដល់បងប្អូនប្រជាពលរដ្ឋ ស្ថិតនៅក្នុងតំបន់បិទខ្ទប់ជា បណ្តោះអាសន្ន ក្នុងគោលដៅកាត់ផ្តាច់នូវខ្សែចម្លងមេរោគដ៏កាចសាហាវនេះ កុំឲ្យឆ្លងចូលទៅក្នុងសហគមន៍។

លោក គុជ លីណា ក៏បានធ្វើការណែនាំមួយចំនួន ដល់ក្រុមការងារសង្កាត់ទាំង៤ ឲ្យមានស្មារតីប្រុងប្រយ័ត្នខ្ពស់ ក្នុងពេល ចុះយកអំណោយទាំងនេះ ទៅប្រគល់ឲ្យក្រុមគ្រួសារបក្សដែលជួបការខ្វះខាតឲ្យចំគោលដៅ តាមការណែនាំរបស់លោក ប្រធានគណបក្ស ដោយគោរពឲ្យបានវិធានការ ៣កុំ ៣ការពារ ហើយអ្វីដែលសំខាន់សម្រាប់បងប្អូនចុះផ្ទាល់ជាមួយ សមាជិកបក្សនៅតាមលំនៅដ្ឋាន គឺ ត្រូវរក្សាឲ្យបាននូវគន្លាតសុវត្ថិភាព និង ត្រូវមានអាល់កុល ឬ ជែលនៅជាប់នឹងខ្លួនផង ដែរ។

លោកបានបន្តថា អំណោយដែលត្រូវក្រុមការងារតាមសង្កាត់នីមួយៗ យកទៅប្រគល់ដល់បងប្អូននេះ នឹងបានជួយ សម្រាលនូវភាពលំបាករបស់បងប្អូនបានមួយរយៈផងដែរ។ ម៉្យាងទៀតគណបក្សប្រជាជនកម្ពុជា ក៏មិនប្រងើយកន្តើយនៅ ពេលបងប្អូនជួបទុក្ខលំបាកនេះ ហើយក៏មិនបោះបង់ចោលបងប្អូននោះឡើយ ទីណាមានប្រជាពលរដ្ឋ ជួបទុក្ខលំបាក ទីនោះមានសកម្មជនគណបក្សប្រជាជនកម្ពុជាជានិច្ច។

លោកក៏បានផ្តាំផ្ញើដល់ប្រធានគណបក្សទាំង៤ ត្រូវ បង្កើនការជម្រុញដល់ប្រជាពលរដ្ឋ ឲ្យទៅទទួលការចាក់វ៉ាក់សាំងនូវដូសទី២នេះ កុំឲ្យសេសសល់ប្រជាពលរដ្ឋណាម្នាក់ឡើយ។

សូមជម្រាបថាសង្កាត់សាលាកំរើក ទទួលបានអង្ករ ២.៥០០គីឡូក្រាម ត្រីខ ២៥០យួរ , សង្កាត់ស្លក្រាម ទទួលបានអង្ករ ២.៣០០គីឡូក្រាម ត្រីខ ២៣០យួរ , សង្កាត់គោកចក ទទួលបានអង្ករ ២តោន ត្រីខ ២០០យួរ និង សង្កាត់ស្វាយដង្គំ ទទួលបាន អង្ករ ២តោន ត្រីខ ២០០យួរផងដែរ៕SRP