ព័ត៌មានជាតិ – Page 327

ខេត្តសៀមរាប៖ការស្ថាបនាផ្លូវនៅក្រុងសៀមរាប ដោយលោកខេង សុមេធ នៅតែសម្រេចតាមផែនការ បើទោះបីមាននៅខេត្តសៀមរាបបានជួបប្រទះនឹងបញ្ហាជំងឺកូវីដក៏ដោយ។

លោក វង់ សំអាត មន្ត្រីកងវិស្វកម្ម របស់លោកខេង សុមេធ បានឲ្យដឹងនៅព្រឹកថ្ងៃទី២៨ខែកញ្ញានេះថា ផ្លូវចំនួន៨ខ្សែ ដែលទទួលស្ថាបនា ដោយកងវិស្វ័កម្មតេជោហ៊ុន សែនសៀមរាប របស់នាយឧត្តមសេនីយ៍ខេង សុមេធហៅតាភ្នំ១០០លើសសម្រេចបានលទ្ធផលដូចខាងក្រោម ទោះស្ថិតក្នុងបញ្ហាប្រឈមនិងការបិទខ្ទប់ទូទាំងខេត្តដើម្បីការពារការឆ្លងរាតត្បាតនៃ កូវីដ១៩ក៏ដោយ ក៏កងកម្លាំងនៅតែជំនះធ្វើដើម្បីសម្រេចតាមផែនការ (ចូលសមរភូមិតែងតែមានរបួសខ្លះហើយ )។

ជាមួយនឹងការស្ថាបនាផ្លូវនៅក្រុងសៀមរាប ដោយកងស្វ័កម្មតេជោហ៊ុន សែនសៀមរាបនេះ លោកវង់ សំអាត បានបង្ហាញលទ្ធផលថា
-ផ្លូវ អ៊ីអ៊ិន ០១ សម្រេចបាន ៦៤,៩៤ភាគរយ។
-ផ្លូវ អ៊ីអ៊ិន ០២ សម្រេចបាន ៨១,៨៥ភាគរយ។
– ផ្លូវ អ៊ីអ៊ិន ០៣ សម្រេចបាន ២៥,៩៤ភាគរយ។
– ផ្លូវ អ៊ីអ៊ិន ០៤ សម្រេចបាន ៩០,០៧ភាគរយ។
– ផ្លូវ អ៊ីអ៊ិន ០៥ សម្រេចបាន៩៩,៦៥ ភាគរយ។
– ផ្លូវ អ៊ីអែស ០៤ សម្រេចបាន៧៧,៨១ភាគរយ។
– ផ្លូវ អ៊ីអែស ១៤ សម្រេចបាន៩១,២៩ ភាគរយ និង
– ផ្លូវ ដាប់ប៊ែលយូ ០៣ សម្រេចបាន ៥៦,២១ ភាគរយ។ លទ្ធផលសម្រេចទាំងនេះគិតត្រឹមពាក់កណ្តាលខែកញ្ញាប៉ុណ្ណោះ។

សូមរំឭកថាកាលពីថ្ងៃចន្ទ ទី៣០ ខែវិច្ឆិកា ឆ្នាំ២០២០ សម្ដេចតេជោ ហ៊ុន សែន នាយករដ្ឋមន្ត្រី បានអញ្ជើញបើកការដ្ឋានសាងសង់ និងកែលម្អផ្លូវទាំង ៣៨ខ្សែ ក្នុងក្រុងសៀមរាប ខេត្តសៀមរាប។

សូមជម្រាបថាផ្លូវទាំង៣៨ខ្សែនេះ មានប្រវែងសរុប ១០៨.៧៤គីឡូ ម៉ែត្រ ដោយ គ្រោង ប្រើប្រាស់ ថវិកាជាតិសរុបប្រមាណ ១៤០លានដុល្លារ អាមេរិក និងថវិកា ជាង ៩លានដុល្លារអាមេរិកទៀត សម្រាប់ ការងារ ចាំបាច់ ក្នុងការរៀបចំ ស្ថាបនាប្រព័ន្ធបង្ហូរទឹកភ្លៀង និងទឹកកខ្វក់ ដែលនៅក្រៅ គម្រោង សាងសង់ ខ្សែផ្លូវ ទាំង ៣៨នេះ។

តាមរយៈគម្រោងសាងសង់ផ្លូវទាំង៣៨ខ្សែនេះ នឹងធ្វើឲ្យទីក្រុងសៀមរាប ប្រែក្លាយរូបរាងជាទីក្រុងទំនើប និងទេសចរណ៍ ដ៏មាន សក្តា នុពល ដែលត្រូវបានរាជរដ្ឋាភិបាលកម្ពុជាកំណត់ជាតំបន់ស្នូលនៃប៉ូល អភិ វឌ្ឍ ជាតិ ជា គោលដៅ ទេសចរណ៍ វប្បធម៌ ប្រវត្តិសាស្រ្ត និងធម្មជាតិ ស្របតាមរូបសាស្ត្រទីក្រុង រួមជាមួយការគិតគូរ ដល់ការពារ និងកែលម្អបរិស្ថាន ផាសុខភាពរបស់ប្រជាពលរដ្ឋ និងការរៀបចំ អភិវឌ្ឍ ទីក្រុងឆ្លាតវៃ (Smart City) ផងដែរ៕SRP

ខេត្តសៀមរាប៖មនុស្សជិត១០នាក់ត្រូវបានសមត្ថកិច្ចធ្វើការឃាត់ខ្លួនករណីល្មេីសវិធានការនឹងប្រេីប្រាស់សារធាតុញៀន ម្នាក់ប៉ូលិស និងអាជីវករលក់ដីឡូតិ៍ផងដែរ។

ការឃាត់ខ្លួនធ្វើឡើងនៅវេលាម៉ោង២២និង៣០នាទី ថ្ងៃអាទិត្យ ទី២៦ ខែកញ្ញា ឆ្នាំ២០២១ ស្ថិតនៅចំណុចភូមិស្វាយដង្គំ សង្កាត់ស្វាយដង្គំ ក្រុងសៀមរាប ខេត្តសៀមរាប ដោយកម្លាំងមូលដ្ឋានកងរាជអាវុធហត្ថ ក្រុងសៀមរាប ដឹកនាំផ្ទាល់ដោយលោកថា ដាលុច មេបញ្ជាការរងអាវុធហត្ថខេត្ត ទទួលការងារស្រាវជ្រាវ នឹងបង្រ្កាបបទល្មើស និងលោកប្រាក់ វណ្ណៈ មេបញ្ជាការមូលដ្ឋាន អាវុធហត្ថក្រុងសៀមរាប សហការជាមួយអធិការដ្ឋាននគរបាលក្រុងសៀមរាប តាមការណែនាំពីលោកប៉ោ វណ្ណនិត មេបញ្ជាការកងរាជអាវុធហត្ថខេត្តសៀមរាប តាមបញ្ជា ព្រះរាជអជ្ញាសាលាដំបូងខេត្តសៀមរាប។

ប្រភពពីសមត្ថកិច្ចក្នុងហេតុការណ៍បានឲ្យដឹងថា ការចុះបង្រ្កាបករណីល្មេីសវិធានការរដ្ឋបាល(ជួបជុំផឹកស៊ី)នឹងប្រេីប្រាសនូវសារធាតុញៀននេះលទ្ធផលឃាត់ខ្លួនជនសង្ស័យមួយចំនួន៖ ១.ឈ្មោះ សេង រតនា ភេទប្រុស អាយុ៣៨ឆ្នាំ មុខរបរនគរបាល។

២.ឈ្មោះ សន ធា ភេទប្រុស អាយុ៣៤ឆ្នាំ មុខរបរលក់ដីឡូត៍។ ៣.ឈ្មោះ គង់ រតនា ភេទស្រី អាយុ២០ឆ្នាំ មុខរបរនៅផ្ទះ។ ៤.ឈ្មោះ ចាយ សុធា ភេទប្រុស អាយុ៣៨ឆ្នាំ មុខរបរលក់ដីឡូតិ៍ ៥. ឈ្មោះ ទី សីហា ភេទប្រុស អាយុ៣២ឆ្នាំមុខរបរនៅផ្ទះ។ ទី៦និងទី៧ មិនត្រូវបានបង្ហាញឈ្មោះនោះទេ។

ប្រភពបានបន្តថា ប្រតិបត្តិការនេះសមត្ថកិច្ចបានដកហូតវត្ថុតាងរួមមាន៖១.ម្សៅពណ៌សថ្លាសារធាតុញៀនK ចំនួន១កញ្ចប់តូច/២.ថ្នាំប្រភេទគ្រាប់សញ្ញាលេខ៥ចំនួន០១គ្រាប់ពណ៌ផ្កាឈូក/
៣.ថ្នាំគ្រាប់ក្រវីពណ៌ប្រផេះរូបខ្លាឃ្មុំចំនួនកន្លះគ្រាប់។ទូរស័ព្ទចំនួន១០គ្រឿង។

បច្ចុប្បន្ន:ជនសង្ស័យ នឹង វត្ថុតាងបានបញ្ជូនទៅការិយាលយ័ជំនាញកងរាជអាវុធហត្ថខេត្តសៀមរាប ដើម្បីបន្តនិតិវិធី៕SRP

ខេត្តបាត់ដំបង៖ប្រធានមន្ទីរទេសចរណ៍ខេត្តបានឲ្យដឹងថាមន្ទីរបានបិទភោជនីយដ្ឋាន ដឹឡាយអិនសោន ជាបណ្តោះអាសន្នក្រោយរកឃើញភាពមិនប្រក្រតី ដើម្បីពង្រឹងការអនុវត្តវិធានការរដ្ឋបាល និងទប់ស្កាត់ការរីករាលដាលជំងឺកូវីដ១៩។

ការសម្រេចបិទនេះលោកអ៊ុច អ៊ុភីនីស្សារ៉ា ប្រធានមន្ទីរទេសចរណ៍ខេត្ត បានឲ្យដឹងថាក្រុមការងារបានរកឃើញភាពមិនប្រក្រតីរបស់ភោជនីយដ្ឋាន ដឹ ឡាយអិន សោន ស្ថិតក្នុងភូមិអូរតាគាំ៣ សង្កាត់ទួលតាឯក ក្រុងបាត់ដំបង មានភាពមិនប្រក្រតីក្នុងដំណើរការអាជីវកម្ម។

លោកប្រធានបន្តថាការរកឃើញមានដូចជា៖១/ការបើកដំណើរការភោជនីយដ្ឋាន ដែលមិនអនុញ្ញាតឱ្យលក់គ្រឿងស្រវឹងខុសទៅនឹងសេចក្តីសម្រេចខេត្ត បើកទទួលភ្ញៀវរហូតដល់ម៉ោងពីរភ្លឺ។

២/ការអនុញ្ញាតឱ្យភ្ញៀវចូលទទួលសេវាកម្ម លើសពីសមត្ថភាពផ្ទុក ខុសពីគោលការណ៍របស់វិធានសុវត្ថិភាពទេសចរណ៍។

៣/ការដំណើរការអាជីវកម្មមានភាពមិនប្រក្រតីដូចជាមានយានយន្តច្រើន តែមនុស្សតិច និងគ្រប់បន្ទប់ខារ៉ាអូខេមានសភាពស្អាតល្អ (មិនមានធូលី ដូចបន្ទប់មិនបានប្រើប្រាស់)។

លោកបញ្ជាក់បែបនេះក្រោយពីបានដឹកនាំមន្ត្រីចុះត្រួតពិនិត្យនៅតាមភោជនីយដ្ឋាននានាដែលលួចបើកលក់គ្រឿងស្រវឹងនឹងជួបជុំ នៅយប់ថ្ងៃទី២៦ ខែកញ្ញា ឆ្នាំ២០២១។

បើតាមប្រធានមន្ទីរទេសចរណ៍ខេត្តថា អាជីវកម្មមួយចំនួនធំ បានផ្អាកដំណើរការបណ្តោះអាសន្ន និងមួយចំនួនទៀតបានចូលរួមសហការ និងអនុវត្តតាមការណែនាំរបស់មន្រ្តីជំនាញ។ ក្រុមការងារក៏បានណែនាំដល់ម្ចាស់ និងអ្នកគ្រប់គ្រងអាជីវកម្មទាំងនោះ ឱ្យបន្តពង្រឹងការអនុវត្តការរស់នៅបែបគន្លងថ្មី (New Normal) ជាប្រចាំ អនុវត្តតាមអនុវត្ត ៣ការពារ ៣កុំ ហាមឃាត់ដាច់ខាតការលក់គ្រឿងស្រវឹងដល់ភ្ញៀវ៕SRP

ខេត្តត្បូងឃ្មុំ៖លោកហ៊ុន ម៉ាណែត អគ្គមេបញ្ជាការរង និងជាមេបញ្ជាការកងទ័ពជើងគោក និងលោកស្រី ពេជ ចន្ទមុនី បានផ្ដល់អំណោយជូនកងកម្លាំងនៃបញ្ជាការដ្ឋានកងរាជអាវុធហត្ថខេត្តត្បូងឃ្មុំ សម្រាប់សាងសង់អគារជាបន្ត ពិសេសប្រើប្រាស់ក្នុងយុទ្ធនាការប្រយុទ្ធប្រឆាំងនឹងជំងឺកូវីដ១៩ ក្នុងនោះសកម្មភាពបំពេញការងារយ៉ាងសស្រាក់សស្រាំ ក្នុងការថែរក្សាសណ្តាប់ធ្នាប់សាធារណៈ បង្ក្រាបបទល្មើសនានា ធានាសុខសុវត្ថិភាពជូនប្រជាពលរដ្ឋ។ ការផ្ដល់អំណោយនៅព្រឹកមិញនេះតាមលោក ជាម ច័ន្ទសោភ័ណ អភិបាលខេត្តត្បូងឃ្មុំ។

លោកជាម ច័ន្ទសោភ័ណ បានថ្លែងកោតសរសើរ ដល់ទឹកចិត្តរបស់កម្លាំងកងរាជអាវុធហត្ថទូទាំងខេត្ត ដែលមានឆន្ទៈក្នុងការចូលរួមទប់ស្កាត់ ការពារតាមបទបញ្ជារបស់រាជរដ្ឋាភិបាល តាមតួនាទី ភារកិច្ច ទាំងយប់ ទាំងថ្ងៃយ៉ាងខ្ជាប់ខ្ជួន ពិសេសបន្តលើភារកិច្ចការងារនេះ ឲ្យកាន់ខ្លាំងក្លាបន្ថែមទៀត ។

អភិបាលខេត្ត ក៏បានថ្លែងអំពាវនាវឲ្យកងកម្លាង ត្រូវតែបង្កើនការចូលរួមបង្ការទប់ស្កាត់ជំងឺ Covid-19 ឲ្យបានខ្លាំងក្លាបន្ថែមទៀត ជាពិសេសសូមចូលរួមអនុវត្តតាមការណែនាំរបស់រាជរដ្ឋាភិបាល ដើម្បីជៀសផុតពីការឆ្លងនៃជំងឺ ដ៏ កាចសាហាវ នេះ។

ចំពោះអំណោយនាំយកទៅផ្តល់ជូននាឱកាសនោះរួមមាន ស៊ីម៉ង់ត៍ ៥០តោន អង្ករ១តោន ទឹកសុទ្ធ១០០កេស មី៥០កេស ម៉ាស២៥០០ម៉ាស អាកុល៩០លីត្រ បន្លែធម្មជាតិ និងថវិកាមួយចំនួនផងដែរ៕SRP

ខេត្តកំពង់ចាម៖លោក អ៊ុន ចាន់ដា អភិបាលខេត្តកំពង់ចាម បានថ្លែងថាដោយផ្អែកទៅនឹងស្ថានភាពជាក់ស្ដែង នៃការឆ្លងរីករាលដាលនៃជំងឺកូវីដ-១៩ នៅក្នុងខេត្តកំពង់ចាម នាប៉ុន្មានថ្ងៃនេះ យើងអាចវាយតម្លៃផ្ដោតទៅលើកត្តា ៥ចំណុចគឺ៖ ១.ដោយសារប្រជាពលរដ្ឋ បានចាក់វ៉ាក់សាំងរួចហើយ មានការធ្វេសប្រហែស មិនបានអនុវត្តវិធានសុខាភិបាល«៣ការពារ ៣កុំ»។ ២.ការបណ្ដែតបណ្ដោយ និងការគ្រប់គ្រងអ្នកជំងឺដែលអនុញ្ញាតឲ្យនៅសម្រាកព្យាបាលនៅតាមផ្ទះ ច្បាស់លាស់ ជាពិសេស នៅពេលគាត់ឆ្លងរួចហើយ តែសុខភាពធម្មតា ហើយអាចចម្លងទៅអ្នកដទៃបាន។ ៣.ការអនុញ្ញាត ឲ្យធ្វើចត្តាឡីស័កនៅតាមផ្ទះ តែសាមីខ្លួន មិនគោរពតាមវិធានសុខាភិបាល។ ៤.ទាក់ទងជាមួយអារម្មណ៍របស់មនុស្ស នៅពេលបុណ្យទានម្ដងៗ ភ្លេចគិតគូរអំពីសុខភាព តាមរយៈ ធ្វើដំណើរពីតំបន់មួយ ទៅតំបន់មួយ ដើម្បីជួបជុំមិត្តភ័ក្រ ហើយហូបចុក ជាដើម។ និង៥.ភាពធ្វេសប្រហែស របស់មន្ត្រី ឬអាជ្ញាធរមូលដ្ឋាន មិនបានត្រួតពិនិត្យ ឬចុះអន្តរាគមន៍ជាប្រចាំ។

លោកថ្លែងបែបនេះនៅព្រឹកមិញ ក្នុងឱកាសដឹកនាំកិច្ចប្រជុំត្រួតពិនិត្យ ការឆ្លងរីករាលដាលនៃជំងឺកូវីដ-១៩ ក្នុងខេត្តកំពង់ចាម ដើម្បីរកដំណោះស្រាយ គ្រប់គ្រងស្ថានការណ៍ឲ្យប្រសើរឡើងវិញ។

អភិបាលខេត្ត បានស្នើដល់អាជ្ញាធរក្រុង ស្រុកទាំងអស់ ពង្រឹងគោលគោលជំហរ នៃការអនុវត្តភារកិច្ចឡើងវិញ ដោយ៖ ទី១.ត្រូវបង្កើនការផ្សព្វផ្សាយ អប់រំណែនាំទៅដល់ប្រជាពលរដ្ឋ ជាពិសេស នៅតាមទីប្រជុំជន ឬតាមទីផ្សារនានា ជាពិសេស ការអនុវត្តលើវិធានការសុខាភិបាល «៣កុំ ៣ការពារ» ឲ្យកាន់តែទូលំទូលាយថែមទៀត ដើម្បី ប្រជាពលរដ្ឋមានការភ្ញាក់រលឹកឡើងវិញ។ ទី២.ពង្រឹងទៅលើការងារធ្វើចត្តាឡីស័កនៅតាមផ្ទះ ជាពិសេស ការដាក់ខ្សែ បូករួមនឹងការសរសេរបម្រាមការពារឲ្យបានត្រឹមត្រូវ។ ជាមួយនោះ ត្រូវចុះស្រាវជ្រាវរកអ្នកពាក់ព័ន្ធ ដើម្បីធ្វើចត្តាឡីស័ក។ ទី៣.មន្ទីរសុខាភិបាលត្រូវខិតខំ ធ្វើយ៉ាងណា ឲ្យយន្តការ នៃការព្យាបាលជំងឺនៅតាមផ្ទះ ជាពិសេស ត្រូវមានក្រុមគ្រូពេទ្យពិនិត្យមើលអ្នកជំងឺឲ្យបានជាប្រចាំ និងហ្មត់ចត់បំផុត ដោយអនុវត្តទៅតាមការណែនាំរបស់ក្រសួងសុខាភិបាល។ ក្រៅពីនោះ ជម្រុញដល់ការព្យាបាលជងឺ ឲ្យបានលឿនជាងមុន។ ទី.៤.ត្រូវអនុវត្តវិធានការផ្លូវច្បាប់ ចំពោះជនខិលខូចទាំងឡាយ ដែលគេចវែស ការធ្វើចត្តាឡីស័ក និងការព្យាបាល បូករួមទាំងជនមិនគោរពតាមវិធានសុខាភិបាលផងដែរ។ ទី៥.ត្រូវបន្តការគ្រប់គ្រងអ្នកចំណូលស្រុក ឲ្យកាន់តែល្អប្រសើរ និងមានប្រសិទ្ធភាពថែមទៀត។ ទី៦.ជម្រុញការបាញ់ថ្នាំសម្លាប់មេរោគ នៅតាមទីប្រជុំជន និងតំបន់ ដែលមានហានិភ័យ។ និងទី៧.ចំពោះ សាលារៀនវិញ មិនអនុញ្ញាតឲ្យបិទសាលាទាំងមូលនោះទេ ពោលគឺ បើមានករណីឆ្លងនៅថ្នាក់ណា ត្រូវបិទថ្នាក់នោះ ហើយអ្នកវិជ្ចមាន ត្រូវយកទៅព្យាបាល។ រីឯអ្នកពាក់ព័ន្ធ ត្រូវយកធ្វើចត្តាឡីស័ក។ យើងធ្វើបែបនេះ ដើម្បី បញ្ចៀសផលប៉ះពាល់ ទៅដល់ការសិក្សា របស់សិស្សានុសិស្ស។

លោកក៏បានណែនាំអាជ្ញាធរក្រុង ស្រុក វិស័យពាក់ព័ន្ធទាំងអស់ ត្រូវសហការគ្នា កុំឲ្យស្ថានការណ៍នេះវិវឌ្ឍធ្ងន់ធ្ងរ និងរួមគ្នាគ្រប់គ្រងស្ថានការណ៍នេះ ឲ្យល្អប្រសើរ និងឈានទៅស្ងប់ស្ងាត់ទៅវិញ៕SRP

Sponsored

ខេត្តកំពង់ចាមអាជ្ញាធរសាលាស្រុកស្រីសន្ធរ នៅព្រឹកមិញនេះបានប្រកាសដាក់ឲ្យដេញថ្លៃ ចំនួន៤គម្រោង ដើម្បីស្ថាបនាផ្លូវបេតុងអាមេ ជាង១០០០ម៉ែត្រ។

គម្រោងការដេញថ្លៃក្រោមវត្តមានលោក ឡី មិច នាយករងរដ្ឋបាលសាលាខេត្តកំពង់ចាម និងលោក បែត វ៉េងឃីម អភិបាលរងស្រុកស្រីសន្ធរ ដោយមានការចូលរួមពីក្រុមការងារសម្របសម្រួលខេត្ត និងស្រុក ព្រមទាំងគណៈកម្មការលទ្ធកម្ម និងតំណាងក្រុមហ៊ុន អ្នកទទួលការ ជាច្រើនរូបផងដែរ។ ដោយគម្រោងនេះគឺមូលនិធិឃុំ-សង្កាត់ ឆ្នាំ២០២១ របស់គណៈកម្មការជាតិសម្រាប់ការអភិវឌ្ឍន៍តាមបែបប្រជាធិបតេយ្យនៅថ្នាក់ក្រោមជាតិ។

ឆ្លៀតក្នុងឱកាសនោះដែរ លោក ឡី មិច បានធ្វើការសំណូមពរដល់ក្រុមហ៊ុន អ្នកទទួលការទាំងអស់ ឲ្យចូលរួមជាមួយអាជ្ញាធរក្នុងការអនុវត្តវិធានការសុខាភិបាល ដេីម្បីទប់ស្កាត់ការឆ្លងរីករាលដាលនៃជំងឺកូវីដ-១៩ ជាពិសេសត្រូវអនុវត្តវិធានការ៣ការពារ ៣កុំ ក្នុងនោះត្រូវរក្សាគម្លាតសុវត្ថិភាពផ្ទាល់ខ្លួន និងពាក់ម៉ាសការពារឲ្យបានគ្រប់ៗគ្នា។ ដោយឡែកចំពោះការដេញដេញថ្លៃគម្រោងមូនិធិឃុំនេះដែរ ត្រូវឲ្យមានការប្រកួតប្រជែង ដោយភាពថ្លៃថ្នូរ និងកុំឲ្យមានការឃុបឃិតគ្នាប្រព្រឹត្តអំពើពុករលួយ ហេីយការសាងសង់សំណង់ ឲ្យត្រូវតាមបទដ្ឋានលក្ខណៈបច្ចេកទេស ប្រយោជន៍ដល់ការប្រើប្រាស់បានយូរអង្វែងផងដែរ។

លោកបែត វ៉េងឃីម អភិបាលរងស្រុកស្រីសន្ធរ បានឲ្យដឹងថា គម្រោងមូលនិធិឃុំដែលបានដាក់ឲ្យដេញថ្លៃខាងលើនេះ គឺមានផ្លូវចំនួន៤ខ្សែ ដែលត្រូវស្ថាបនា ជូនប្រជាពលរដ្ឋប្រើប្រាស់ ក្នុងនោះមាន ១-ឃុំផ្ទះកណ្តាល សាងសង់ផ្លូវបេតុងអាមេ ប្រវែង ៣៦៥ ម៉ែត្រ ទទឹង ៣ម៉ែត្រ នៅភូមិផ្ទះកណ្តាលក្រោម ភូមិចុងបឹង និងភូមិអូរលាវ។
២-ឃុំព្រែកពោធិ សាងសង់ផ្លូវបេតុងអាមេ ប្រវែង ៤០០ម៉ែត្រ ទទឹង ៤ម៉ែត្រ នៅភូមិប្រថ្នល់។
៣-ឃុំព្រែករំដេង សាងសង់ផ្លូវបេតុងអាមេ ប្រវែង ២៣១ម៉ែត្រ ទទឹង៣.៥ម៉ែត្រ នៅភូមិអូរឡេង។
៤-ឃុំឫស្សីស្រុក សាងសង់ផ្លូវបេតុងអាមេ ប្រវែង ២០០ម៉ែត្រ ទទឹង៤.៥ម៉ែត្រ នៅភូមិត្នោតលើ៕SRP

ខេត្តសៀមរាប៖លោកសយសិរីវុឌ្ឍ ប្រធានសមាគមចលនាយុវជនកម្ពុជា(ក្រុម១៥៧)ស្រុកពួក សាខាខេត្តសៀមរាប និងសមាជិក បាននាំយកអំផ្ដល់ជូនប្រជាពលរដ្ឋ ចំនួន២គ្រួសារ នៅតំបន់បិទខ្ទប់ក្នុងសង្កាត់ស្វាយដង្គំ ក្រុងសៀមរាប គឺភូមិស្ទឹងថ្មី និងភូមិសាលាកន្សែង។

ការផ្ដល់អំណោយចែកដល់ពលរដ្ឋ ដែលមានការខ្វះខាតទាំងពីរគ្រួសារ លោកសយ សិរីវុឌ្ឍ បាននាំយកគ្រឿងឧបភោគ បរិភោគ ដោយក្នុង១គ្រួសារទទួលបាន៖អង្ករ២០គីឡូ/ មី១កេស/ត្រីខ១យួរ/ទឹកស៊ីអ៊ីវ១ដប/ទឹកត្រី១ដប/និងទឹកសុទ្ធ៥យួរ។

ក្នុងឱកាសផ្ដល់អំណោយខាងលើ លោកសយ សិរីវុឌ្ឍ បានពាំនាំនូវការសាកសួរសុខទុក្ខមតិផ្តាំផ្ញើពីលោកហ៊ុន ប៉ូគា ប្រធានសមាគមចលនាយុវជនកម្ពុជា(ក្រុម១៥៧)សាខាខេត្តសៀមរាប ដល់បងប្អូនប្រជាពលរដ្ឋ ដោយត្រូវយកចិត្តទុកដាក់អោយបានខ្ពស់នូវអនាម័យ។ ជាពិសេសសូមចូលរួមអនុវត្តតាមប្រសាសន៍ណែនាំរបស់ សម្តេចតេជោ (៣កុំ ៣ការពារ) ឲ្យបានខ្ជាប់ខ្ជួន ដើម្បីចៀសផុតពីជំងឺកូវីដ-១៩ដ៏កាចសាហាវនេះ៕SRP

ខេត្តសៀមរាប៖ស្នងការរងខេត្តសៀមរាប លោកជា គឹមសាន ទទួលផែនអន្តោប្រវេសន៍បានថ្លែងប្រាប់សៀមរាបប៉ុស្ដិ៍ នៅព្រឹកនេះថាជនជាតិថៃចំនួន២នាក់ត្រូវបានឃាត់ខ្លួនករណីលួចឆ្លងដែន ស្នាក់នៅខុសច្បាប់។

ការឃាត់ខ្លួនធ្វើឡើងនៅវេលាទៀបភ្លឺ ថ្ងៃទី២៥ ខែកញ្ញា ឆ្នាំ២០២១ ដោយកម្លាំងប្រចាំការគោលដៅបិទខ្ទប់ ត្រង់ចំណុចភ្លើងស្តុបចុងកៅស៊ូ ក្នុងសង្កាត់ស្លកក្រាម ក្រុងសៀមរាប។

លោកជា គឹមសាន បានថ្លែងថាសមត្ថកិច្ចបានត្រួតពិនិត្យរថយន្តឈ្នួលមួយគ្រឿង ធ្វើដំណើរពីទិសខាងលិច ទៅខាងកើត ដោយនៅក្នុងរថយន្តមានដឹកជនជាតិថៃ២នាក់ មានលិខិតឆ្លងដែន គ្មានប្រថាប់ត្រាច្រកទ្វារ។

លោកថា មនុស្សទាំងទាំងពីរនាក់ ដែលត្រូវបានឃាត់ខ្លួនមានឈ្មោះ ១-ឈ្មោះ CHAIKHAMWANG EKARIN ភេទប្រុស កើតថ្ងៃទី១៤-០១-១៩៨៧ កាន់លិខិតឆ្លងដែនលេខ AC២៤២១៧០០។ ២-ឈ្មោះ PANYA SIRIRANYA ភេទស្រី កើតថ្ងៃទី១២-០៧-១៩៩៧ ជនជាតិថៃ កាន់លិខិតឆ្លងដែនលេខ AC២៤២១៧០១។

លោកថ្លែងបន្ថែមថាតាមការសាកសួរជនបរទេសទាំងពីរ បានចូលមកព្រះរាជាណាចក្រកម្ពុជា កាលពីអំឡុងខែឧសភា ឆ្នាំ២០២១ តាមច្រកទ្វារព្រំដែនអន្តរជាតិប៉ោយប៉ែត ដោយមិនបានប្រថាប់ត្រាទ្វារ ក្នុងគោលបំណងធ្វើដំណើរទេសចរណ៍ក្នុងក្រុងប៉ោយប៉ែត បន្ទាប់មកដោយសារបញ្ហាកូវីដ១៩ ច្រកទ្វារព្រំដែនត្រូវបានបិទ ពួកគេក៏បន្តស្នាក់នៅសណ្ឋាគារ ហាក់ ហួត ក្នុងក្រុងប៉ោយប៉ែត និងដើរលេងជាច្រើនកន្លែង រហូតជ្រុះបាត់លិខិតឆ្លងដែនដោយមិនដឹងថាបាត់នៅកន្លែងណា បន្ទាប់មកទៀតនាអំឡុងដើមខែកញ្ញា ឆ្នាំ២០២១ ពួកគេបានទំនាក់ទំនងទៅក្រុមគ្រួសារ ឲ្យជួយធ្វើលិខិតឆ្លងដែនថ្មី ដើម្បីបានវិលត្រឡប់ទៅប្រទេសវិញ។ លុះនៅវេលាម៉ោង០១រំលងអាធ្រាតឈានចូលថ្ងៃទី២៥ ខែកញ្ញា ឆ្នាំ២០២១ ពួកគេបានម៉ៅរថយន្តឈ្នួលមួយគ្រឿងក្នុងគោលបំណង ធ្វើដំណើរទៅរាជធានីភ្នំពេញ ជួបស្ថានទូតថៃ ស្នើសុំជួយសម្របសម្រួលវិលត្រឡប់ទៅប្រទេសថៃវិញ តែពេលធ្វើដំណើរមកដល់ខេត្តសៀមរាប ត្រូវបានសមត្ថកិច្ចធ្វើការត្រួតពិនិត្យ សាកសួរឃើញថាមិនមានប្រថាប់ត្រាច្រកទ្វារ ក៏បានឃាត់ខ្លួននិងបញ្ជូនទៅយកសំណាក ធ្វើតេស្តរកមេរោគកូវីដ១៩តែម្តង(លទ្ធផលអវិជ្ជមាន)។

បើតាម លោកជា គឹមសាន បានស្នើសុំអនុញ្ញាតគោលការណ៍ពីលោកឧត្តមសេនីយ៍អគ្គអន្តោប្រវេសន៍ចាត់បញ្ជូនជនបរទេសទាំងពីរនាក់នេះ ទៅស្នាក់ការត្រៀមបណ្តេញចេញប្រចាំខេត្តសៀមរាប តាមនីតិវិធី៕SRP

ខេត្តបន្ទាយមានជ័យ៖ស្ត្រីមានឈ្មោះ ហម គឹមវង់ រស់នៅខេត្តបន្ទាយមានជ័យ បានដាក់ពាក្យបណ្ដឹងប្តឹងលោកសាន្ដ វិជ្ជាសារ៉ាវុធ ប្រធានសាខាកិច្ចការពារអ្នកប្រើប្រាស់ កិច្ចការប្រគួតប្រជែង និងបង្រ្កាបការក្លែងបន្លំ «ក.ប.ប» ខេត្តបន្ទាយមានជ័យ និងមន្ត្រីក្រោមឱវាទ ទៅអង្គភាពប្រឆាំងអំពើពុករលួយ ដើម្បីឲ្យបើកកការស៊ើបអង្គេត លើ ពាក់ព័ន្ធនឹងការប្រព្រឹត្តអំពើពុករលួយជាប្រព័ន្ធ។

នៅក្នុងពាក្យបណ្តឹង ដែលបានដាក់ជូនទៅ លោកឱម យិនទៀង ប្រធានអង្គភាពប្រឆាំងអំពើពុករលួយ បានបង្ហាញថា អំឡុងដើមឆ្នាំ២០២០ ពេលដែលស្ថានភាពជំងឺកូវីដ១៩ បានឆ្លងចូលមកដល់ អ្នកស្រី ហម គឹមវង់ បានប្តូរមុខរបរពីការលក់ដូរចាប់ហួយនៅក្នុងផ្ទះ មកស៊ីឈ្នួលដឹកឥវ៉ាន់ឲ្យអាជីវករ នៅក្នុងខេត្តបន្ទាយមានជ័យ នៅពេលនោះមន្ត្រីសាខាកិច្ចការពារអ្នកប្រើប្រាស់ កិច្ចការប្រគួតប្រជែង និងបង្រ្កាបការក្លែងបន្លំ (ក.ប.ប) ខេត្តបន្ទាយមានជ័យ បានមកគំរាមទារឲ្យអ្នកស្រីបង់លុយគិតជាក្បាលឡាន ក្នុងមួយខែ ១៥.០០០០(ដប់ប្រាំម៉ឺនរៀល) ដោយគ្មានវិក្កយបត្រនោះទេ។ ប្រសិនបើអ្នកស្រីមិនបង់ប្រាក់ប្រចាំខែទេ មន្ត្រី ក.ប.ប នឹងចាប់ឡានដឹកទំនិញបញ្ជូនទៅតុលាការសាលាដំបូងខេត្តបន្ទាយមានជ័យ។ ក្រោយមកនៅអំឡុងខែមេសា ឆ្នាំ២០២១ ឈ្មោះ សាន វិជ្ជាសារ៉ាវុធ ប្រធានសាខាកិច្ចការពារអ្នកប្រើប្រាស់ កិច្ចការប្រគួតប្រជែង និងបង្រ្កាបការក្លែងបន្លំ (ក.ប.ប) ខេត្តបន្ទាយមានជ័យ និងឈ្មោះ ឈួន ពិសី និងឈ្មោះ កែវ ជាមន្ត្រីសាខាកិច្ចការពារអ្នកប្រើប្រាស់ កិច្ចការប្រគួតប្រជែង និងបង្រ្កាបការក្លែងបន្លំ (ក.ប.ប) បានតម្លើងតម្លៃបង់ក្បាលឡាន ដោយទាមទារបង់លុយគិតជាក្បាលឡាន មួយជើងតម្លៃ ៨០០០០(ប្រាំបីម៉ឺនរៀល) ពីរជើងតម្លៃ ១៥០០០០រៀល (ដប់ប្រាំម៉ឺនរៀល) ដោយគ្មានចេញវិក្កយបត្រអ្វីទាំងអស់។ លុះអំឡុងខែ កក្កដា ឆ្នាំ២០២១ បានប្តូរមកបង់ប្រាក់ ៦ក្បាលឡាន ចំនួន ៣៥០,០០០(សាមសិបប្រាំម៉ឺនរៀល) ដោយគ្មានវិក្កយបត្រដដែល។ «ដោយរបៀបបង់ប្រាក់ឲ្យមន្ត្រី ក.ប.ប ផ្តើមពីការតម្រូវឲ្យចុះដើរយកលុយទៅដាក់លើក្បាលឡានដែលបញ្ឈចោលនៅលើដងផ្លូវ ពេលខ្លះបោះលុយឲ្យមន្ត្រី ក.ប.ប ពីលើឡានដោយមិនបាច់ឈប់ឡាន ហើយពេលខ្លះគឺត្រូវដើរយកលុយទៅទុកលើតុរបស់មន្ត្រី ក.ប.ប ដែលដាក់ប៉ុស្តិ៍ល្បាត (កុងត្រូលជជុះ) នៅតាមដងផ្លូវជាតិក្រវ៉ាត់ព្រំដែនកម្ពុជា – ថៃ»។

ពាក្យបណ្តឹងបានបង្ហាញទៀតថា នៅថ្ងៃទី ១៧ ខែកក្កដា ឆ្នាំ២០២១ វេលាម៉ោង ៨៖ ៣០នាទីយប់ មន្ត្រី ក.ប.ប បានឃាត់រថយន្តរបស់គាត់ ហើយទារការផាកពិន័យ ពីសូន្យរៀល រហូតដល់២០០០០០០រៀល (ម្ភៃលានរៀល) បើទោះជាអ្នកស្រីហម គឹមវង់ បានបង់លុយហើយក៏ដោយ ។ ក្រោយមកអ្នកស្រី ហម គឹមវង់ សម្រេចចិត្តឈប់បង់ប្រាក់ឲ្យមន្ត្រី ក.ប.ប ខេត្តបន្ទាយមានជ័យ បន្ទាប់ពីបានមើលព័ត៌មានផ្សាយពីសកម្មភាពមិនប្រក្រតីរបស់មន្ត្រីក.ប.ប ដើរជំរិតទារប្រាក់ពីអ្នកដ៏ទៃ ដោយព័ត៌មានបានបញ្ជាក់ថាការបង់ប្រាក់ ដោយគ្មានវិក្កយបត្រ ជាអំពើខុសច្បាប់ និងជាសកម្មភាពប្រព្រឹត្តអំពើពុករលួយ។ ក្រោយមកអ្នកស្រីបានបញ្ជាក់ប្រាប់មន្ត្រីក.ប.ប ថាឈប់បង់ប្រាក់ជូន ចាប់ពីថ្ងៃទី២៥ ខែកក្កដា ឆ្នាំ២០២១ នៅពេលនោះ មន្ត្រី ក.ប.ប ឈ្មោះ កែវ បានលុបសារសំឡេងឆ្លងឆ្លើយបង់លុយកាក់ទាំងស្រុងតាមសារបណ្តាញសង្គមហ្វេសប៊ុក Messenger។ ដូច្នោះហើយទើបអ្នកស្រីកើតទុក្ខមិនសុខចិត្ត អំពីសកម្មភាពជំរិតទាប្រាក់របស់មន្ត្រី ក.ប.ប ខេត្តបន្ទាយមានជ័យ សម្រេចចិត្តដាក់ពាក្យប្តឹងទៅអង្គភាពប្រឆាំងអំពើពុករលួយដើម្បីស៊ើបអង្គេត និងចាត់ការតាមនីតិវិធីច្បាប់។

សូមរំឭកថាកាលពីថ្ងៃទី០៦ ខែកញ្ញា ឆ្នាំ២០២១នេះ ក៏មានប្រជាពលរដ្ឋ ខេត្តបន្ទាយមានជ័យម្នាក់ បានដាក់ពាក្យប្តឹងទៅអង្គភាពប្រឆាំងអំពើពុករលួយ ឲ្យបើកកការស៊ើបអង្គេតលើមន្ត្រី(ក.ប.ប) ខេត្តបន្ទាយមានជ័យ និងមន្ត្រីក្រោមឱវាទ ពាក់ព័ន្ធនឹងការប្រព្រឹត្តអំពើពុករលួយជាប្រព័ន្ធនេះដែរ។ ដោយប្រជាពលរដ្ឋបានចោទថា ប្រធាន ក.ប.ប ខេត្តបន្ទាយមានជ័យ និងមន្ត្រីក្រោមឱវាទ បានជំរិតយកលុយចំនួន ១,៤០០,០០០រៀល (មួយលានបួនសែនរៀល) ដោយមិនមានឯកសារច្បាស់លាស់។

អង្គភាពសៀមរាបប៉ុស្ដិ៍ នៅមិនទាន់ទទួលបានការឆ្លើយតបបំភ្លឺពីលោកសាន្ដ វិជ្ជាសារ៉ាវុធ ជុំវិញការចោទប្រកាន់បែបនេះ។ ប៉ុន្តែលោកសាន្ដ វិជ្ជា សារ៉ាវុធ បានប្រាប់អ្នកសារព័ត៌មានក្នុងស្រុកមួយនៅរសៀលថ្ងៃទី ២៦ ខែកញ្ញានេះថា៖ ការចោទប្រកាន់របស់លោកស្រី ហម គឹមវង់ មិនមែនជាការពិតនោះទេ។ លោកថា បើសិនជាលោកស្រីចោទប្រកាន់ពិតមែនបើមានឯកសារ លោកនឹងទទួលខុសត្រូវចំពោះមុខច្បាប់ បើសិនលោកបានប្រព្រឹត្តដូចការចោទប្រកាន់របស់លោកស្រី។ ចំណែករឿងលុយ ១.៤០.០០០០ (មួយលានបួនសែនរៀល) លោក សាន្ដ វិជ្ជា សារ៉ាវុធ បានបន្តថាគឺលោកបានផាកពិន័យអន្តរកាល មានវិក្កយបត្របង់ចូលរដ្ឋត្រឹមត្រូវ តម្លៃ២លានរៀលឯនោះ តែមិនបានបង់គ្រប់ចំនួននោះទេ បែជាទៅប្ដឹងអង្គភាពប្រឆាំងអំពើពុករលួយដើម្បីមួលបង្កាច់អង្គភាពលោកទៅវិញ៕SRP