ព័ត៌មានជាតិ

ខេត្តព្រៃវែង៖សមត្ថកិច្ចបានបំបែកសំណុំរឿងករណីឃាតកម្មសម្លាប់ក្មេងស្រីដោយទម្លាក់ចូលក្នុងទឹកអូរ​មួយ​ នៅចំណុចភូមិទួលជៃ ឃុំព្រះស្ដេច ស្រុកព្រះស្ដេច ខេត្តព្រៃវែង​។

គួរបញ្ជាក់ថាកាលពីថ្ងៃទី ០៧ ខែវិច្ចិកា ឆ្នាំ២០២១ វេលាម៉ោង ១៥និង៣០នាទី មានករណីប្រទះឃើញសាកសពក្មេងស្រីម្នាក់ស្លាប់នៅក្នុងប្រលាយអូរ ស្ថិតក្នុងភូមិទួលជ្រៃ ឃុំព្រះស្តេច ស្រុកព្រះស្តេច ខេត្តព្រៃវែង។ សាកសពមានឈ្មោះ ផល ផានិត អាយុ ១២ឆ្នាំ ស្នាក់នៅភូមិកើតហេតុខាងលើ។

ប្រត្តិបត្តិការនេះធ្វេីឡេីង នៅថ្ងៃទី ០៨ ខែវិច្ឆិកា ឆ្នាំ២០២១ម្សិលមិញ។

សូមជម្រាបថា ដោយបានបទបញ្ជារពីលោកនេត សាវឿន អគ្គស្នងការនគរបាលជាតិ លោកជាវ វិបុល អនុប្រធាននាយកដ្ឋាននគរបាលព្រហ្មទ័ណ្ឌ បានដឹកនាំសហការជាមួយ នគរបាលខេត្តព្រៃវែង​ ការិយាល័យព្រហ្មទណ្ឌកម្រិតធ្ងន់ បានសហការជាមួយនាយកដ្ឋាបច្ចេកទេស​និងនវិទ្យាសាស្រ្ត និង​ អង្គការ CPU ចុះពិនិត្យកន្លែងកើតហេតុ និងធ្វើកោសល្យវិច័យទ្បើងវិញ ដោយបានវះកាត់សាកសពពិនិត្យឃើញថា៖ មានភក់នៅក្នុងបំពង់កនិងក្នុងសួត , បាក់ឆ្អឹងជំនីខាងស្តាំ, ទ្វារមាសពុំមានស្លាកស្នាមពីការចាប់រំលោភទេ គឺជាករណីឃាតកម្ម។

នៅថ្ងៃម្សិលមិញកម្លាំងជំនាញបានធ្វើការស្រាវជ្រាវរហូតដល់កំណត់បានមុខសញ្ញាម្នាក់ឈ្មោះ យ៉ែម សុផែន ភេទប្រុសអាយុ២១ឆ្នាំ ស្នាក់នៅភូមិទួលជៃ ឃុំព្រះស្តេច ស្រុកព្រះស្តេច ខេត្តព្រៃវែង មកធ្វើការសាកសួរ និងបានសារភាពថា កាពីយប់ថ្ងៃទី ០៦ ខែវិច្ឆិកា ឆ្នាំ២០២១ ខ្លួនបានទៅចូលរួមកម្មវិធីខួបកំណើតកូនរបស់អ្នកជិតខាង រហូតដល់វេលាម៉ោងប្រហែល ២២និង០០នាទី ម្ចាស់កម្មវិធីបានប្រើខ្លួនឲ្យទៅទិញ ទឹកកក ពេលធ្វើដំណើរតាមផ្លូវក៏ប្រទះឃើញក្មេងស្រីរងគ្រោះឈ្មោះ ផល ផានិត ឈរនៅមុខផ្ទះហើយខ្លួនបានឈប់ម៉ូតូនិងបបួលក្មេងស្រីរងគ្រោះទៅផឹកស៊ីដែរ ហើយក្មេងស្រីនោះក៏យល់ព្រមទ្បើងជិះម៉ូតូ ពេលធ្វើដំណើរតាមម៉ូតូក្មេងស្រីរងគ្រោះបានជិះអោបចង្កេះខ្លួន ធ្វើឲ្យមានអារម្មណ៍ផ្លូវភេទ ទើបខ្លួនដឹកក្មេងស្រីរងគ្រោះទៅចំណុចកើតហេតុខាងលើ រួចក៏ធ្វើសកម្មភាពចាប់ស្ទាបអង្អែលសុដន តែត្រូវក្មេងស្រីនោះរើបំរ៉ាស់ ដោយខ្លាចបែកការខ្លួនក៏ច្រាន ក្មេងស្រីរងគ្រោះទម្លាក់ក្នុងអូរ ហើយចាប់សង្កត់ច្រមុជក្នុងទឹកអូរនោះរហូតដល់ដាច់ខ្យល់។ ក្រោយពីធ្វើសកម្មភាព សម្លាប់ក្មេងស្រីរួចហើយខ្លួនក៏ជិះម៉ូតូទៅផ្ទះធ្វើដូចគ្មានរឿងអ្វីកើតទ្បើង រហូតដល់សមត្ថកិច្ចទៅនាំខ្លួនមកសាកសួរ តែម្តង។

បច្ចុប្បន្នជនសង្ស័យ ត្រូវបានប្រគល់ឲ្យនគរបាលខេត្តព្រៃវែង ដើម្បីកសាងសំណុំរឿងបញ្ជូនទៅអយ្យការអមសាលាដំបូងផ្តន្ទាទោសតាមផ្លូវច្បាប់៕SRP

ខេត្តសៀមរាប៖រដ្ឋបាលខេត្តសៀមរាបបានរំលឹកខួបអនុស្សាវរីយ៍លើកទី៦៨ នៃទិវាបុណ្យឯករាជ្យជាតិ ៩ វិច្ឆិកា (៩ វិច្ឆិកា ១៩៥៣- ៩ វិច្ឆិកា ២០២១)។

ពិធីធ្វើនាព្រឹក ថ្ងៃទី០៩ ខែវិច្ឆិកា ឆ្នាំ២០២១នេះ នៅទីលានវិមានរំលឹកគុណអតីតវីរយុទ្ធជនខេត្ត ក្រោមវត្តមានលោកអ៊ាន ឃុនប្រធានក្រុមប្រឹក្សាខេត្ត ដោយ
មានការចូលរួមពីសំណាក់មន្ត្រីរាជការកងកម្លាំងប្រដាប់អាវុធជុំវិញខេត្តនិងសិស្សានុសិស្សផងដែរ។

សូមជម្រាបថាថ្ងៃនេះ គឺជាថ្ងៃដែលប្រទេសកម្ពុជាត្រូវប្រារព្ធខួបអនុស្សាវរីយ៍លើកទី៦៨ នៃទិវាបុណ្យឯករាជ្យជាតិ ៩ វិច្ឆិកា(៩ វិច្ឆិកា ១៩៥៣-៩ វិច្ឆិកា ២០២០) ដែលកម្ពុជាទទួលបានឯករាជ្យ ពីអាណានិគមនិយមបារាំង។ ទិវាបុណ្យឯករាជ្យជាតិ ៩ វិច្ឆិកា បានរំលឹកឲ្យឃើញពីព្រះរាជបេសកកម្មដើម្បីជាតិមាតុភូមិ និងប្រជារាស្ត្រខ្មែររបស់ព្រះករុណាព្រះបាទ សម្តេចព្រះនរោត្តម សីហនុ ព្រះបិតាឯករាជ្យជាតិ ព្រះបរមរតនកោដ្ឋ ដែលព្រះអង្គបានលះបង់ព្រះកាយពល និងព្រះបញ្ញាញាណ យ៉ាងក្លៀវក្លាបំផុតធ្វើការតស៊ូក្នុងក្របខ័ណ្ឌនៃព្រះរាជបូជនីកិច្ច ដើម្បីទាមទារឯករាជ្យដ៏ពិតប្រាកដនៅកម្ពុជា។ផ្តើមចេញពីគំរូព្រះវីរៈភាពនេះ រាជរដ្ឋាភិបាលកម្ពុជា ក្រោមកិច្ចដឹកនាំដ៏ឈ្លាសវៃប្រកបដោយ គតិបណ្ឌិតដ៏ខ្ពង់ខ្ពស់របស់សមេ្តចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានធ្វើឲ្យប្រទេសជាតិ ទាំងមូល មានកិច្ចអភិវឌ្ឍន៍រីកចម្រើន លើគ្រប់ហេដ្ឋារចនាសម្ព័ន្ធ និង បានលើកកម្ពស់ជីវភាពរស់នៅរបស់ប្រជាពលរដ្ឋ កាន់តែមានភាពល្អប្រសើរឡើង ពីមួយថ្ងៃទៅមួយថ្ងៃ ព្រមទាំងទទួលយកនូវក្រុមនិន្នាការនយោបាយ មកចូលរួមក្នុងការ អភិវឌ្ឍន៍សង្គមជាតិហើយនៅក្នុងវិបត្តិកូវិដ១៩នេះសមេ្តចតេជោ ហ៊ុន សែន ប្រមុខរាជរដ្ឋាភិបាលកម្ពុជា បានយកចិត្តទុកដាក់ខ្ពស់ ពីសុខភាព សាធារណៈជូនប្រជាពលរដ្ឋ ដោយខិតខំស្វែងរកនូវវ៉ាក់សាំងការពារប្រឆាំងជម្ងឺកូវិដ១៩ ចាក់ជូនដល់ប្រជាពលរដ្ឋបាន គ្រប់ៗគ្នា ចាប់ពីកុមារអាយុ៥ ឡើងទៅ ផងដែរ។

សូមបញ្ជាក់ថា ថ្ងៃ ៩ វិច្ឆិកា ទិវាបុណ្យឯករាជ្យជាតិ ត្រូវបានប្រារព្ធឡើងជារៀងរាល់ឆ្នាំ ដើម្បីបង្ហាញពីឯករាជ្យជាតិខ្មែរ និងជាការឧទ្ទិសដល់ព្រះរាជបូជនីយកិច្ច របស់អតីត ព្រះមហាក្សត្រ ព្រះបាទសម្ដេចព្រះនរោត្តម សីហនុ ព្រះបរមរតនកោដ្ឋ ដែលព្រះអង្គ បានលះបង់ព្រះកាយពល និងព្រះបញ្ញាញាណ នៅក្នុងព្រះរាជបូជនីយកិច្ច ទាមទារឯករាជ្យ ពីអាណានិគមបារាំង នៅថ្ងៃទី៩ ខែវិច្ឆិកា ឆ្នាំ១៩៥៣៕SRP

ភ្នំពេញ៖សម្តេចតេជោនាយករដ្ឋមន្ត្រី ហ៊ុន សែន បានផ្ដល់នូវការណែនាំទៅកាន់មន្ត្រីថ្នាក់ដឹកនាំក្រសួងរៀបចំដែនដី នគរូបនីយកម្មនិងសំណង់ដែលទីនូវ៣ចំនុចសំខាន់៖
១- ត្រូវបន្តខិតខំចេញប័ណ្ណកម្មសិទ្ធិអោយប្រជាពលរដ្ឋអោយបានឆាប់។
២- ត្រូវបន្តខិតខំដោះស្រាយជំលោះដីធ្លី ជាពិសេសការដោះក្រៅប្រព័ន្ធតុលាការ ។
៣-ត្រូវខិតខំបន្តដោះស្រាយដីសម្បទានសង្គមកិច្ចជាបន្តបន្ទាប់ទៀត។

សម្តេចហ៊ុន សែន មានប្រសាសន៍បែបនេះ ក្នុងឱកាសអញ្ជើញសម្ពោធអគារទីស្តីការក្រសួងរៀបចំដែនដី នគររូបនីយកម្ម និងសំណង់ នៅព្រឹកមិញនេះ នាយករដ្ឋមន្ត្រីក៏បានមានប្រសាសន៍ដាសតឿនរំលឹក ដល់មន្ត្រីថ្នាក់ដឹកនាំក្រសួងរៀបចំដែនដី នគររូបនីយកម្ម និងសំណង់អោយខិតខំបំពេញការងារអោយបានល្អប្រសើរ។

សម្តេចតេជោបានសង្កត់ធ្ងន់ថា ត្រូវរួមថែរក្សាសមិទ្ធផលដែលកើតមាននេះអោយបានគង់វង្សប្រើប្រាស់អោយបានយូរអង្វែង មានកន្លែងធ្វើការល្អហើយ ត្រូវធ្វើការអោយមានប្រសិទ្ធភាព និងចំនុចមួយទៀតត្រូវចេះសន្សំ ទឹក ភ្លើង ផងដែរ៕SRP

ភ្នំពេញ៖សម្តេចតេជោ ហ៊ុន សែន នាយករដ្ឋមន្ត្រី នៅព្រឹកថ្ងៃចន្ទ ទី៨ ខែវិច្ឆិកា ឆ្នាំ២០២១ នេះ អញ្ជើញជាអធិបតីក្នុងពិធីសម្ពោធទីស្តីការនៃអគារក្រសួងរៀបចំដែនដី នគររូបនីយកម្ម និងសំណង់។

អគារក្រសួងរៀបចំដែនដី នគរូបនីយកម្ម និងសំណង់ ជាសមិទ្ធផលមួយ ដែលបង្ហាញពីគុណតម្លៃនៃការដឹកនាំរបស់រាជរដ្ឋាភិបាលកម្ពុជាក្នុងការលើកម្ពស់តម្លៃស្ថាបត្យកម្ម ដែលជាស្នាដៃផ្ទាល់របស់កូនខ្មែរ ហើយក៏បានបង្ហាញនូវសមត្ថភាពរបស់រាជរដ្ឋាភិបាលលើការគ្រប់គ្រង និងប្រើប្រាស់ថវិកាជាតិ ដើម្បីបង្កើតនូវសមិទ្ធផលជាទីមោទនភាពសម្រាប់ជាតិផងដែរ។

អគារទីស្តីការក្រសួងរៀបចំដែនដី នគរូបនីយកម្ម និងសំណង់ មានទីតាំងស្ថិតនៅ ភូមិអន្លង់ក្ងាន សង្កាត់ឃ្មួញ ខណ្ឌសែនសុខ រាជធានីភ្នំពេញ នាប៉ែកខាងជើងឆៀងខាងលិចរាជធានីភ្នំពេញ ត្រូវបានប្រារព្ធពិធីបើការដ្ឋានសាងសង់នៅថ្ងៃទី២៨ ខែមករា ឆ្នាំ២០២០ ។ អគារនៃក្រសួងនេះសាងសង់នៅលើផ្ទៃដីទំហំ ៤.៥ហិកតា មានទំហំតួអគារបណ្ដោយប្រវែង ១៣២.៧ ម៉ែត្រ និងទទឹងប្រវែង ៩៤.៧ម៉ែត្រ មានចំនួន ៨ជាន់ កម្ពស់សរុបពីទ្រនាប់ខ្សាច់ ដល់ចុងកំពូលបុស្បុក ៨៨.៥ម៉ែត្រ ក្នុងនោះមានកម្ពស់បុស្បុក ៣៣.២៨ម៉ែត្រ មានចំណតរថយន្តប្រមាណ ៤៥០គ្រឿង និងចំណតទោចក្រយានយន្តជាច្រើនគ្រឿងទៀត៕SRP

ខេត្តសៀមរាប៖សមត្ថកិច្ចបានឃាត់ខ្លួនមនុស្សចំនួន០៥នាក់ ពីបទសមគំនិត ចែកចាយជួញដូរ និងប្រើប្រាស់ដោយខុសច្បាប់ នូវសារធាតុញៀន។

ការឃាត់ខ្លួនធ្វើឡើងថ្ងៃទី០៦ ខែវិច្ឆិកា ឆ្នាំ២០២១ ស្ថិតក្នុងលំនៅឋានមួយកន្លែងភូមិត្រពាំងសេះ សង្កាត់ គោកចក ក្រុង ខេត្តសៀមរាប។
ជនសង្ស័យចំនួន០៥នាក់៖
១-ឈ្មោះ ឃី ទី ភេទប្រុស កើតនៅឆ្នាំ២០០០ ជនជាតិខ្មែរ មុខរបរកម្មករ មានទីលំនៅភូមិជ័យ សង្កាត់ទឹកវិល ក្រុងសៀមរាប (រក្សាទុក ជួញដូរនិងប្រើប្រាស់) (មានសារធាតុញៀននៅក្នុងខ្លួន)។
២-ឈ្មោះ គឹម សុគុណ ហៅចយ ភេទប្រុស ឆ្នាំកំណើត ២០០៤ ជនជាតិខ្មែរ មុខរបរកម្មករ មានទីលំនៅភូមិត្រពាំងសេះ សង្កាត់គោកចក ក្រុងសៀមរាប(ជួញដូរ និងប្រើប្រាស់) (មានសារធាតុ ញៀននៅក្នុងខ្លួន)។
៣-ឈ្មោះ ហៃ សុផៃ ភេទប្រុស ឆ្នាំកំណើត ២០០១ ជនជាតិខ្មែរមុខរបរគ្មានមានទីលំនៅភូមិតាភុល សង្កាត់ស្វាយដង្គំ ក្រុង ខេត្តសៀមរាប(ចាត់ចែង និងប្រើប្រាស់) (មានសារធាតុ ញៀននៅក្នុងខ្លួន)។
៤-ឈ្មោះ ស៊ីវ ទីទី ភេទប្រុស ឆ្នាំកំណើត ២០០០ ជនជាតិខ្មែរ មុខរបរកម្មករសំណង់ មានទីលំនៅភូមិទ្រាំង សង្កាត់ស្លក្រាម ក្រុងសៀមរាប (សមគំនិតជួញដូរ) (គ្មានសារធាតុ ញៀននៅក្នុងខ្លួន)
៥-ឈ្មោះ ណាង ចាន់ណា ភេទប្រុស ឆ្នាំកំណើត ២០០៥ ជនជាតិខ្មែរ មុខរបរ កម្មករសំណង់ មានទីលំនៅភូមិទ្រាំង សង្កាត់ស្លក្រាម ក្រុងសៀមរាប ។(ជួញដូរ)។ វត្ថុតាងដកហូតម្សៅមេតំហ្វេតាមីន ៣កញ្ចប់តូច, ជញ្ជីងថ្លឹងគ្រឿងញៀន១គ្រឿង, ទូរស័ព្ទ៤គ្រឿងផងដែរ៕SRP

ខេត្តកំពង់ចាម​៖លោក​ អ៊ុនចាន់ដា អភិបាលខេត្តកំពង់ចាម និងលោកស្រី ញូង ចរិយា អ៊ុន ចាន់ដា នៅថ្ងៃទី៧ ខែវិច្ឆិកា ឆ្នាំ២០២១នេះ​ បានអញ្ជើញចូលរួមពិធីវេរអង្គកឋិនទានមហាសាមគ្គី និងឆ្លងបុណ្យអង្គកឋិន ដែលប្រារព្ធធ្វើឡើងនៅវត្ត ខេមវន័ បឹងស្នាយ និងបានប្រគេនបច្ច័យ ដល់វត្តចំនួនបីទៀត នៅក្រុងកំពង់ចាម។

គួរ​បញ្ជាក់​ថា​ អ្នកផ្តេីមបុណ្យអង្គកឋិនទានមហាសាមគ្គីរបស់រដ្ឋបាលខេត្តកំពង់ចាម នេះ រួមមាន​ លោក​ យឹម ឆៃលី ប្រធានក្រុមប្រឹក្សា អភិវឌ្ឍន៏វិស័យកសិកម្ម និងជនបទ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ចាម​ លោក​ ហ៊ុន ណេង អ្នកតំណាងរាស្ត្រមណ្ឌលកំពង់ចាម លោក​ ខ្លូត ផន ប្រធានក្រុមប្រឹក្សាខេត្ត និងលោក​ អ៊ុន ចាន់ដា អភិបាលខេត្តកំពង់ចាម រួមជាមួយមន្ត្រីរាជការក្នុងខេត្ត និងប្រជាពលរដ្ឋជាសប្បុរសជនច្រើននាក់ទៀតបាននាំបច្ច័យសរុប​ចំនួន ៧២.៩៤១ ដុល្លារ រួមនិងត្រៃយ៍ធំ​ ២ -លៀង ១០ -សាដក់ ៨៨ និងទេយ្យវត្ថុមួយចំនួនទៀត។​ ក្នុងនោះរដ្ឋបាលខេត្តបានប្រគេនព្រះសង្ឃចំនួន៣ វត្តក្នុងក្រុងកំពង់ចាម រួមមាន​៖ វត្តបុទមរតនៈដីដុះចំនួន ១០លានរៀល,វត្តសុទស្សនារាម ជ្រោយថ្ម ចំនួន ១០លានរៀល, វត្តជោតនារាម បឹងកុកចំនួន ១០លានរៀល។ បច្ច័យដែលបានប្រគេនព្រះសង្ឃ វត្តខេមវ័ន ហៅវត្តបឹងស្នាយ សរុបចំនួន ៦៥.៦២៣ដុល្លារ ផងដែរ​៕SRP

ខេត្តសៀមរាប៖ក្រុមចោរចំនួន៤នាក់ បានប្លន់យកម៉ូតូអស់ចំនួន២គ្រឿង រួចជិះរត់គេចខ្លួនបាត់ដោយសុវត្ថិភាព។

ហេតុការណ៍បានកើតឡើងរំលងអាធ្រាត ថ្ងៃទី០៧ ខែវិច្ឆិកា ឆ្នាំ២០២១ នៅត្រង់ចំណុចខាងជើងរង្វង់មូលផ្លូវ៦០ម៉ែត្រ ស្ថិតនៅភូមិបឹងដូនប៉ា សង្កាត់ស្លក្រាម ក្រុងសៀមរាប។

ប្រភពបានឱ្យដឹងថាករណីនេះក្រុមជនសង្ស័យ១ក្រុមមិនស្គាល់អត្តសញ្ញាណ មានគ្នាចំនួន០៤នាក់បានធ្វើសកម្មភាពប្លន់ប្រដាប់ដោយដាវកាប់ទៅលើជនរងគ្រោះ យកម៉ូតូ២គ្រឿងបានសម្រេចគេចខ្លួនបាត់។ ចំណែកជនរងគ្រោះត្រូវបានកម្លាំងនគរបាលប៉ុស្តិ៍ស្លក្រាម នាំមកសាកសួរបំភ្លឺ ដើម្បីកំណត់មុខសញ្ញាជនសង្ស័យ៖
ជនរងគ្រោះទី១ៈ ឈ្មោះ ផាន សុភា ភេទប្រុស អាយុ២២ឆ្នាំ រស់នៅភូមិគោកត្នោត សង្កាត់គោកចក ក្រុងសៀមរាប ជាម្ចាស់ម៉ូតូម៉ាកSCOPY ពណ៌ស សេរីឆ្នាំ២០២០ ស្លាកលេខសៀមរាប 1AH-2278។ជនរងគ្រោះទី២ៈ ឈ្មោះ ម៉ៅ សុវណ្ណារ៉ា ភេទប្រុស អាយុ១៩ ឆ្នាំ រស់នៅភូមិរហាល សង្កាត់នគរធំ ក្រុងសៀមរាប ជាម្ចាស់ម៉ូតូម៉ាក សង់ឌ្រីម ពណ៌ខ្មៅ សេរីឆ្នាំ២០១៧ ស្លាកលេខ សៀមរាប1Y-5890៕SRP

ខេត្តសៀមរាប៖ក្រុមប៉ូលិសខេត្តសៀមរាបដែលចុះត្រួតពិនិត្យច្បាប់ចរាចរណ៍នៅផ្លូវ៦០ ម៉ែត្របានឃាត់ខ្លួនបុរសម្នាក់ រកឃើញគ្រឿងញៀនជាច្រើនកញ្ចប់។

ស្នងការរងខេត្តសៀមរាប ទទួលការិយាល័យប្រឆាំងបទល្មើសគ្រឿងញៀន លោកអ៊ុំ អមរា បានថ្លែងថាជនសង្ស័យមានឈ្មោះ ចាន់ បូរ៉ាឌី ភេទប្រុស៣៣ឆ្នាំ ជនជាតិខ្មែរ មុខរបរជាងថតរូប មានទីលំនៅភូមិចុងកៅស៊ូ សង្កាត់ស្លក្រាម ក្រុងសៀមរាប។ មានសារធាតុញៀននៅក្នុងខ្លួន និងធ្លាប់ជាប់ពន្ធនាគារចំនួន២លើក នេះជាលើកទី៣ហើយ។

លោកអ៊ុំ អមរា បន្តថាក្រោយចាប់ខ្លួនដកហូតវត្ថុតាង៖ ម្សៅមេតំហ្វេតាមីន(ម៉ាទឹកកក)ចំនួន ០៨កញ្ចប់ ស្មើនឹងទម្ងន់ ៨៦,៩៩ ក្រាម(ទម្ងន់សុទ្ធ).ជញ្ជីងថ្លឹងគ្រឿងញៀន១គ្រឿង.ទូរស័ព្ទ៣គ្រឿងនិងសម្ភារវេចខ្ចប់មួយចំនួនទៀត។

ករណីនេះសមត្ថកិច្ចបានបញ្ជូនជនសង្ស័យនិងវត្ថុតាង ទៅតុលាការទៅតាមផ្លូវច្បាប់។ សូមបញ្ជាក់ថាការចាប់ខ្លួនធ្វើឡើងនៅយប់ថ្ងៃទី ៥ ខែវិច្ឆិកា ឆ្នាំ២០២១ ត្រង់ចំណុចរង្វង់មូលផ្លូវ៦០ម៉ែត្រ ក្នុងភូមិបឹងដូនប៉ា សង្កាត់ស្លក្រាម ក្រុងសៀមរាប៕SRP

ខេត្តកំពង់ចាម៖លោក យឹម ឆៃលី ប្រធានក្រុមប្រឹក្សា អភិវឌ្ឍន៏វិស័យកសិកម្ម និងជនបទ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្ត កំពង់ចាម បានប្រាប់ដល់មន្ត្រីគណបក្សប្រជាជន​ ​ឲ្យបន្តអនុវត្តគោលការណ៍គ្រឹះរបស់គណបក្ស​ ត្រូវពង្រឹងសាមគ្គីភាពផ្ទៃក្នុងបក្សដោយឈរលើទស្សនៈ ពង្រឹងចាស់បង្កើតថ្មី​ និងត្រូវធ្វើអំពើល្អទៅលើប្រជាជន​​។

មានប្រសាសន៍​បែបនេះក្នុងកិច្ចប្រជុំត្រួតពិនិត្យលទ្ធផល នៃការអនុវត្តសេចក្តីសម្រេច ស្ដីពីផែនការរួមឆ្ពោះទៅកាន់ការបោះឆ្នោតជ្រើសរើសក្រុមប្រឹក្សាឃុំសង្កាត់​ អាណត្តិទី៥ ឆ្នាំ២០២២ របស់គណៈកម្មាធិការគណបក្សប្រជាជន​កម្ពុជា​ខេត្តកំពង់ចាម នាព្រឹកថ្ងៃទី៦ ខែវិច្ឆិកា ឆ្នាំ២០២១ ក្នុងបរិវេណសួនក្រញូង នៅភូមិតាណេង សង្កាត់សំបួរមាស ក្រុងកំពង់ចាម​។

លោក​ យឹម​ ឆៃលី​ បានមានប្រសាសន៍ថា ការបោះឆ្នោតជ្រើសរើសក្រុមប្រឹក្សាឃុំសង្កាត់អាណត្តិទី៥ ដែលនឹងត្រូវធ្វើនៅថ្ងៃអាទិត្យទី៥ ខែមិថុនា ឆ្នាំ២០២២ គឺជាសមរភូមិដែលមន្ត្រីគណបក្សត្រូវបន្តការគ្រប់គ្រងឃុំ-សង្កាត់ នៅក្នុងខេត្តកំពង់ចាម ពីព្រោះការបោះឆ្នោតឃុំសង្កាត់លើកទី៥នេះ គឺជាមូលដ្ឋានគ្រឹះដែលនឹងមានឥទ្ធិពលដល់ការរៀបចំបោះឆ្នោតជាតិ​ ឆ្នាំ២០២៣។

លោក​ យឹម​ ឆៃលី​ បានរំលឹកថា ប្រជាពលរដ្ឋកម្ពុជាទាំងអស់បានឃើញការពិតយ៉ាងច្បាស់ថារយៈពេលជាង៣០ឆ្នាំមកនេះគណបក្សប្រជាជនកម្ពុជាបានដឹកនាំប្រទេសពុះពារជម្នះនូវឧបសគ្គ​ និងការលំបាកផ្សេងៗរាប់ម៉ឺនជំពូកសម្រេចបានសមិទ្ធផលធំៗជាប្រវត្តិសាស្ត្រយ៉ាងច្រើនដែលនាំប្រទេសជាតិឲ្យចេញផុតពីស្រមោលនៃអតីតកាលដ៏ខ្មៅងងឹត​ និងឈឺចាប់បំផុតមកកាន់សម័យដ៏ភ្លឺថ្លាដែលពោរពេញដោយក្តីសង្ឃឹម។ ទន្ទឹមនិងនេះសម្តេចតេជោ​ ហ៊ុន​ សែន​ ជានាយករដ្ឋមន្ត្រីគឺជាមហារដ្ឋបុរសមួយរូបដែលមានឆន្ទៈមោះមុត​ និងទឹកចិត្តស្នេហាជាតិពិតប្រាកដក្នុងការដឹកនាំនិងកសាងប្រទេសជាតិយើងដែលនេះគឺជា ប្រវត្តិសាស្ត្រមួយដែលគ្មាននរណាម្នាក់ដែលអាចមើលរំលងបានឡេីយ៕SRP

ខេត្តព្រះវិហារ៖លោកឡុង សុវណ្ណ ប្រធានក្រុមប្រឹក្សាខេត្ត លោក ប្រាក់ សុវណ្ណ អភិបាលខេត្តព្រះវិហារ បានដឹកនាំមន្ត្រីរាជការ មន្ទីរ-អង្គភាពជុំវិញខេត្ត កងកម្លាំងប្រដាប់អាវុធទាំងបីប្រភេទ យុវជន លោកគ្រូ អ្នកគ្រូ នៅថ្ងៃទី០៦ ខែវិច្ឆិកា ឆ្នាំ២០២១នេះ ប្រារព្ធមីទ្ទីងអបអរសាទរខួបអនុស្សាវរីយ៍លើកទី៦៨ នៃទិវាបុណ្យឯករាជ្យជាតិ៩វិច្ឆិកា (៩វិច្ឆិកា១៩៥៣ -៩វិច្ឆិកា២០២១) ដែលកម្ពុជាទទួលបានឯករាជ្យ ពីអាណានិគមនិយមបារាំង ស្របជាមួយនិងខួប១៧ព្រះវស្សា នៃការយាងគ្រងព្រះបរមសិរីរាជសម្បត្តិរបស់ ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា។ ដែលពិធីដ៏មហានក្ខឬក្សឧត្តុងឧត្តមនេះប្រារព្ធធ្វើឡើងនៅបរិវេណស្ដូបវិមានឯករាជ្យ ក្នុងទីប្រជុំជនក្រុងព្រះវិហារ ខេត្តព្រះវិហារ។

ក្នុងឱកាសនេះដែរអភិបាលខេត្ត ប្រធានក្រុមប្រឹក្សាខេត្ត លោកជំទាវសមាជិកក្រុមប្រឹក្សាខេត្ត អភិបាលរងខេត្ត មេបញ្ជាការកងកម្លាំងទាំងបី អញ្ជើញសួរសុខទុក្ខនិងនាំយកអំណោយមនុស្សធម៌ផ្ដល់ជូនគ្រួសារអតីតយុទ្ធជនពលី គ្រួសារក្រីក្រ សរុប ៤១គ្រួសារ ដោយមួយគ្រួសារៗរួមមាន៖ អង្ករ ២៥គីឡូក្រាម, មី ១កេស, ត្រីខ ១យួរ, ទឹកស៊ីអីវ ១យួរ, សារុង១ ក្រមា១, ភួយ១, មុង១, ម៉ាស់ ១០បន្ទះ និងថវិកាមួយចំនួនផងដែរ៕SRP

ខេត្តបាត់ដំបង៖សមត្ថកិច្ចបានថ្លែងថា លោក ដាក សុខា អធិការរងស្រុកគាស់ក្រឡ ខេត្តបាត់ដំបង ទទួលបន្ទុកគ្រឿងញៀន ត្រូវបានកម្លាំងព្រហ្មទណ្ឌចាប់ខ្លួន នៅថ្ងៃទី៤ ខែវិច្ឆិកា ឆ្នាំ២០២១នេះ កសាងសំណុំរឿង ត្រៀមបញ្ជូនទៅតុលាការចាត់ការតាមច្បាប់។

សមត្ថកិច្ចបានបន្តថាអធិការរងនគរបាលស្រុករូបនេះ ត្រូវបានរកឃើញថាមានជាប់ពាក់ព័ន្ធទៅនឹងអំពើឃាតកម្ ម(សម្លាប់បងថ្លៃខ្លួន)កាលពីចុងខែសីហា កន្លងទៅនេះ នៅភូមិបាស្រែ ឃុំដូនបា ស្រុកគាស់ក្រឡ ខេត្តបាត់ដំបង។ ព្រោះមុនពេលបាត់ខ្លួនមានសាក្សីឃើញជនរងគ្រោះជាប់ខ្នោះដៃជិះក្នុងឡានព្រុសលោកដាក់ សុខាដែលត្រូវជាប្អូនថ្លៃជាមួយមន្ត្រីនគរបាលម្នាក់ទៀត។

ស្នងការប៉ូលិសខេត្តបាត់ដំបង លោកសាត គឹមសាន បានថ្លែងប្រាប់អ្នកសារព័ត៌មាន ដោយទទួលស្គាល់ថា “ ពិតជាឃាត់ខ្លួនលោកអធិការរងម្នាក់នេះមែន តែកំពុងស្ថិតក្នុងការស្រាវជ្រាវនៅឡើយ “៕SRP

ខេត្តសៀមរាប៖ប្រជាពលរដ្ឋបានលើកឡើងថានៅដើមខែវិច្ឆិកាឆ្នាំ ២០២១ នេះ នៅក្រុងសៀមរាប មានករណីបាញ់បោះសេរីចំនួន៣ករណីផ្សេងគ្នា។

ប្រភពច្បាស់ការណ៍បានលើកឡើងថាជនដៃដល់ដែលបាញ់បោះសេរីបង្កឲ្យភ្ញាក់ផ្អើលនោះ ជាមន្ត្រីអាវុធហត្ថម្នាក់ មន្ត្រីទាហានម្នាក់និងជានគរបាលម្នាក់។ ពាក់ព័ន្ធករណីបាញ់បោះសេរីបែបនេះជនដៃដល់ទាំង៣នាក់ត្រូវបានសមត្ថកិច្ចខេត្តសៀមរាបចាប់ខ្លួនជាបន្តបន្ទាប់ផងដែរ។ តែជនដៃដល់ខ្លះមិនត្រូវបានគេបង្ហាញរូបភាពក្នុងការចាប់ខ្លួននោះទេ។

ករណីទី១ នៅវេលាម៉ោង២២ និង១៥នាទី ថ្ងៃទី០១ ខែវិច្ឆិកា ឆ្នាំ២០២១ នៅចំណុចការ៉ាសសាំងសូរិយា ភូមិតាវៀន សង្កាត់សាលាកំរើក ក្រុងសៀមរាប ខេត្តសៀមរាប។ បង្កឡើងដោយ
លោកវរសេនីយ៍ត្រី អាង សែន នាយការិយាល័យប្រឆាំងការជួញដូរមនុស្ស កងរាជអាវុធហត្ថខេត្តសៀមរាប បានយកកាំភ្លើងខ្លី ម៉ាកCF98 ប័ណ្ណសម្គាល់អាវុធខ្លីសមូហភាព ចុះបញ្ជី បខ.២៩៤៧៤ កពជ លេខអាវុធ 015892 បាញ់ផ្ចុកដី១គ្រាប់ បានខ្ទាតបំណែកថ្មត្រូវឈ្មោះ ហាត សុភា រលាត់ក្រោមត្របកភ្នែកខាងស្តាំ បណ្តាលអោយរបួសស្រាល ដោយសារទំនាស់ពាក្យសម្តីត្រូវបាននាំខ្លួនលោក អាង សែន បញ្ជូនមកទីបញ្ជាការកងរាជអាវុធហត្ថខេត្តសៀមរាប អនុវត្តតាមនីតិវិធី។

ករណីទី២ ផ្ទុះអាវុធ ត្រង់ចំណុចមុខភោជនីយដ្ឋាន ស្នាដៃម៉ែក្មែក៥ ស្ថិតក្នុងភូមិសាលាកន្សែង សង្កាត់ស្វាយដង្គំ ក្រុងសៀមរាប នៅយប់ថ្ងៃទី៣ ខែវិច្ឆិកាឆ្នាំ២០២១ បង្កដោយឈ្មោះ កែវ វី ភេទប្រុសអាយុ៣៧ឆ្នាំមុខរបរ ជាទាហ៊ានកងវិស្វកម្ម ក្រសួងការពារជាតិ បច្ចុប្បន្ន រស់នៅភូមិទួលគោក ខណ្ឌទួលគោក រាជធានីភ្នំពេញ ជាភ្ញៀវចូលមកផឹកសុីក្នុងហាងស្នាដៃម៉ែក្មែក៥ពេលនោះ ឈ្មោះ កែវ វី មានទំនាស់ពាក្យសម្តី ជាមួយនារីជាសង្សារ ពេលចេញមកមុខហាង កន្លែងចតម៉ូតូក៏បានដកកាំភ្លើងខ្លីម៉ាក G Lock ១៩ ពីចង្កេះបាញ់ផ្ទុកដី១គ្រាប់។

ករណីទី៣ នៅវេលាម៉ោងជាងទៀបភ្លឺថ្ងៃទី០៥ ខែ វិច្ឆិកា ឆ្នាំ២០២១  នៅចំណុភោជនីយដ្ឋាន ថិមភល (Temple) ស្ថិតក្នុងភូមិស្ទឹងថ្មី សង្កាត់ស្វាយដង្គំ ក្រុងសៀមរាប។ ជនដៃដល់ជាប៉ូលិសអន្តរាគមន៍ ឈ្មោះ សៅ សុភណ្ឌ បានបាញ់ចំជនរងគ្រោះ ឈ្មោះ ភាព ប៊ុណ្ណារឹទ្ធ ភេទប្រុសអាយុ៣០ឆ្នាំ មុខរបរជាងភ្លើង នៅភូមិសំរោងត្បូង ឃុំសំរោង ស្រុកសូទ្រនិគម ខេត្តសៀមរាប ត្រូវរបួសចំក្រោមក្លៀកខាងឆ្វេង ១ គ្រាប់ រងរបួសធ្ងន់កំពុងសង្រ្គោះបន្ទាន់នៅមន្ទីរពេទ្យបង្អែកខេត្តសៀមរាប។ ជនដៃដល់ជាប៉ូលិសរូបនេះត្រូវបានកម្លាំងព្រហ្មទណ្ឌកម្រិតស្រាល នៃស្នងការនគរបាលខេត្តសៀមរាបចាប់ខ្លួនបានភ្លាមៗក្រោយពីរត់គេចខ្លួន។

យោងតាមប្រភពព័ត៌មានបានមួយដង្ហើបថាជនដៃដល់ជានគរបាលដែលបានបាញ់មនុស្សឲ្យរបួសធ្ងន់កាលពីយប់ ថ្ងៃទី ៥ ខែវិច្ឆិកាឆ្នាំ ២០២១ ត្រូវបានឃាត់ខ្លួនពិតប្រាកដមែន ប៉ុន្តែសមត្ថកិច្ចមិនទាន់ផ្ដល់ព័ត៌មានជាក់លាក់នៅឡើយទេ។

មន្ត្រីនគរបាលព្រហ្មទណ្ឌខេត្តសៀមរាបបានថ្លែងប្រាប់សៀមរាប ប៉ុស្តិ៍ នៅថ្ងៃសៅរ៍នេះថា ជនដៃដល់ជានគរបាលដែលត្រូវបានចាប់ខ្លួនកាលពីថ្ងៃម្សិលមិញ ពាក់ព័ន្ធការបាញ់បោះបណ្ដាលឱ្យមានមនុស្សរបួស អាចនឹងត្រូវបញ្ជូនទៅតុលាការនៅថ្ងៃសៅរ៍ ទី០៦ខែវិច្ឆិកានេះ។

ជុំវិញករណីនេះ អង្គភាពសៀមរាបប៉ុស្តិ៍ មិនអាចទាក់ទងលោកតេង ច័ន្ទណាត ស្នងការប៉ូលិសខេត្តសៀមរាប បាននៅឡើយទេ ដោយទូរស័ព្ទមិនអាចទាក់ទងបាន។ ប៉ុន្តែលោកភឹង ចិន្តារ៉េត ស្នងការរងទទួលផែននគរបាលព្រហ្មទណ្ឌខេត្តសៀមរាប បានថ្លែងប្រាប់កាលពីម្សិលមិញថា៖ ជនសង្ស័យត្រូវបានប៉ូលិសព្រហ្មទណ្ឌខេត្តសៀមរាបចាប់ខ្លួនបានហើយ។ លោកភឹង ចិន្តារ៉េត ថា ករណីនេះអំពើហិង្សា វាយទៅវាយមកឈានដល់បាញ់។ វាយប៉ូលិស១ដបមុន ប៉ូលិសក៏បាញ់វិញទៅ។

បើតាមប្រភពបានលើកឡើងថា ភាគីទាំងពីរមានទំនាស់ករណីហិង្សាក្នុងកន្លែងផឹកសុី ដោយមូលហេតុ ភាគីម្ខាងទៀតនោះគ្នាច្រើន ហើយប៉ូលីសគ្នាតិចគេវាយមកប៉ូលិស ដោយគ្នាគេច្រើនក៏បាញ់ការពារខ្លួនតែម្ដង។ តែទោះជាយ៉ាងណាក៏ដោយនេះគ្រាន់តែជាប្រភពលើកឡើងតែប៉ុណ្ណោះ។

ប្រជាពលរដ្ឋរស់នៅក្រុងសៀមរាបហាក់មានការព្រួយបារម្ភយ៉ាងខ្លាំងអំពីសន្តិសុខសុវត្ថិភាពខណៈដែលអំពើអសន្តិសុខបាញ់បោះសេរីបានកើតមានជាបន្តបន្ទាប់ ដែលបង្កឡើងដោយមន្ត្រីៗ។ ជាមួយគ្នានេះប្រជាពលរដ្ឋក៏អបអរសាទរផងដែរចំពោះសមត្ថកិច្ចដែលបានចាប់ខ្លួនជនដៃដល់ទាំងបីរូបជាបន្តបន្ទាប់ក្រោយពីបង្កហេតុ ហើយពួកគាត់សង្ឃឹមថាជនដៃដល់ទាំង៣ រូបនឹងទទួលទោសតាមផ្លូវច្បាប់៕SRP