ព័ត៌មានជាតិ

ខេត្តកំពង់ចាម​៖លោក​ អ៊ុន​ ចាន់ដា​ អភិបាលខេត្តកំពង់ចាម​ បាន​ថ្លែងថា​ ក្នុង​យុទ្ធសាស្ត្រ​ចតុកោណ​ដំណាក់កាល​ទី​៤​ របស់​រាជរដ្ឋាភិបាល​ នីតិកាល​ទី​៦​ នៃ​រដ្ឋសភា​​​ បានផ្ដល់​អទិភាព​លេីវិស័យ​ទាំង​៤​ គឺ​ មនុស្ស​ ផ្លូវ​ ទឹក​ និង​ភ្លេីង​ អញ្ចឹង​ការ​បណ្ដុះបណ្ដាល​ធនធាន​មនុស្ស​ យេីងត្រូវ​ជ្រេីសរេីស​​កម្រិត​ជំនាញ​ ​វិជ្ជាសាស្ត្រ​ បច្ចេកទេស​ជា​កត្តាសំខាន់​ ព្រោះការ​កសាង​ប្រទេស​​ឲ្យ​មាន​ការ​រីកចម្រើន​ គឺ​ត្រូវផ្តោត​សំខាន់​ ទៅ​លើ​ការកសាង​ធនធាន​មនុស្ស​​ ទេីប​ធ្វើ​ឲ្យ​​ប្រទេស​យើង​មាន​ការ​រីកចម្រើន​ ហើយ​ក៏នាំមក​នូវ​សុខសន្តិភាព​ ​ដេីម្បី​ឲ្យ​​សុខសន្តិភាព​ មាន​វឌ្ឍនភាព​ គឺ​ត្រូវ​ចំបាច់​មាន​ការ​អភិវឌ្ឍ​លេី​វិស័យ​ទាំង​៤​នេះ ដើម្បី​ផ្តល់​ផលប្រយោជន៍​ ជូនដល់​ប្រជាពលរដ្ឋ​ ដល់​សង្គមជាតិ​ ​និង​នាំមក​នូវ​ការ​រីកចម្រើន​ ក៏ដូចជា​ការ​ចូលរួម​លេីក​កម្ពស់​កម្រិត​ជីវភាព​របស់​បងប្អូន​ប្រជាពលរដ្ឋ​ផងដែរ​។

ថ្លែង​បែប​នេះ​ក្នុងពិធីបើកបវសនកាលថ្មីឆ្នាំសិក្សា២០២១-២០២២ និងចែកប័ណ្ណសរសើរជូននិស្សិត បុគ្គលិក សាស្តចារ្យ នៅសាខាសាកលវិទ្យាល័យគ្រប់គ្រង និងសេដ្ឋកិច្ច ខេត្តកំពង់ចាម​ នៅព្រឹក​មិញនេះ។

ក្នុង​ពិធី​លោក​ អ៊ុន​ ចាន់ដា​ បាន​ក្រេីនរំលឹកចំពោះប្អូនៗសិស្សនិស្សិតទាំងអស់​ ត្រូវចងចាំថា ប្អូនៗ គឺជាអ្នកកាន់កូនសោសម្រាប់បើកជោគវាសនារបស់ខ្លួន នាពេលអនាគត ហើយមានតែការអប់រំ និងចំណេះដឹងប៉ុណ្ណោះ ដែលអាចបើកផ្លូវ​ឲ្យ​ប្អូនៗទាំងអស់ទទួលបានអនាគតដ៏រុងរឿង​។

លោកអភិបាលខេត្ត​ បាន​បន្ត​ថា​ ចំណេះវិជ្ជា និងសីលធម៌ជាក្រុមគ្រួសារ ដូចនេះសូមឲ្យប្អូនៗ​ ខិតខំប្រឹងប្រែងព្យាយាមរៀនសូត្រលើជំនាញសិក្សារបស់ខ្លួន ដើម្បីអាចក្លាយជា “កូនល្អ សិស្សល្អ មិត្តល្អ និងពលរដ្ឋល្អ”​ ​ត្រូវយកចិត្តទុកដាក់ស្រាវជ្រាវបន្ថែមទៅលើកិច្ចការដែលលោកគ្រូ អ្នកគ្រូ សាស្ដ្រាចារ្យ បានដាក់ឲ្យធ្វេី ទាំងនៅក្នុងថ្នាក់រៀន និងក្រៅថ្នាក់រៀន​ ពោលគឺត្រូវចៀសវាងការប្រព្រឹត្តអំពើមិនគប្បី ទាំងឡាយ ដែលជាកង្វល់ចំពោះមុខរបស់សង្គមគ្រួសារ និងសង្គមជាតិទាំងមូលផងដែរ​។​

បេីតាមលោក មួនវាសនា សាកលវិទ្យាធិការរង សាកលវិទ្យាល័យគ្រប់គ្រង និងសេដ្ឋកិច្ច ខេត្តកំពង់ចាម​ បាន​ឲ្យដឹងថា​ ក្នុងឆ្នាំក្សា ២០២០-២០២១  កន្លងមក​នេះUMEខេត្តកំពង់ចាម មាននិស្សិតកំពុងសិក្សាសរុបចំនួន ជាង២៥០០នាក់ និស្សិតស្រីច្រើនជាង៥០% ដែលកំពុងសិក្សាកម្រិតឆ្នាំសិក្សាមូលដ្ឋាន កម្រិត បរិញ្ញាបត្ររង បរិញ្ញាបត្រ និងបរិញ្ញាបត្រជាន់ខ្ពស់ ដែលមានជំនាញដូចជា ជំនាញគ្រប់គ្រង គណនេយ្យ ធនាគារ ហិរញ្ញវត្ថុ​ គ្រប់គ្រងទេសចរណ៍ ទីផ្សារ សេដ្ឋកិច្ច ច្បាប់ ភាសា អង់គ្លេស អភិវឌ្ឃសហគមន៍​ និងវិទ្យាស្ត្រកុំព្យូទ័រ​៕SRP

ខេត្តកំពង់ចាម​៖លោកអ៊ុន​ ចាន់ដា​ សមាជិកគណៈកម្មធិការកណ្ដាល និងជាប្រធានគណៈបក្សប្រជាជនកម្ពុជា​ខេត្តកំពង់ចាម​​ បាន​ជំរុញ​ដល់​យុវជន​ឲ្យ​រួមគ្នាធ្វើការងារ​ ដើម្បីឲ្យគណបក្សប្រជាជនកម្ពុជាឈ្នះ ក្នុងគោលបំណង ឲ្យ​ប្រជាពលរដ្ឋ​ បានរស់នៅក្នុងម្លប់សន្តិភាព​។

ថ្លែង​បែប​នេះក្នុងពិធីបិទកិច្ចប្រជុំបូកសរុបសកម្មភាពការងារឆ្នាំ២០២១ និងលើកទិសដៅការអនុវត្តបន្ត របស់ក្រុមការងារយុវជនគណបក្សប្រជាជនកម្ពុជាខេត្តកំពង់ចាម នៅថ្ងៃ២២ ខែមករា ឆ្នាំ២០២២ នៅទីស្នាក់ការគណបក្សខេត្ត ក្រោម​វត្តមាន​លោក ខ្លូត ផន អនុប្រធានប្រចាំការ គណកម្មាធិការគណៈបក្សខេត្ត និងសមាជិក សមាជិកា គណបក្សប្រជាជនកម្ពុជាខេត្តកំពង់ចាម ព្រមទាំងសមាជិក សមាជិកាតាមបណ្ដា ក្រុង-ស្រុក​ផងដែរ។​

ក្នុង​កិច្ចប្រជុំ​នលោក​ អ៊ុន​ ចាន់ដា​ បាន​លេីកឡេីងពីគោលជំហររបស់ក្រុមការងារយុវជនគណបក្សប្រជាជនកម្ពុជាខេត្តកំពង់ចាម÷
-ត្រូវខិតខំប្រឹងប្រែងធ្វើអំពើល្អ ធ្វើកិច្ចសហការ ពង្រឹងអង្គការចាត់តាំងរបស់គណបក្ស ដោយពង្រឹង និងពង្រីកទ័ពយុវជនបក្ស​ ដើម្បីបម្រើប្រយោជន៍អោយប្រជាជន និងរក្សានិរន្តរភាពនៃសន្តិភាពក្នុងប្រទេសកម្ពុជាយើង។
-បន្តការខិតខំរក្សាសមិទ្ធផលដែលមានស្រាប់ និងខិតខំកសាងសមិទ្ធផលថ្មី
-ខិតខំពង្រឹងសមត្ថភាព និងត្រូវខិតខំប្រឹងប្រែងធ្វើការងារ
-ខិតខំប្រឹងប្រែងរក្សាសាមគ្គីភាពផ្ទៃក្នុង
-ត្រូវមានសមូហភាពដឹកនាំ និងរក្សារបបប្រជុំតាមផែននីមួយៗ
-យុវជនត្រូវធ្វើការប្រមូលផ្ដុំដើម្បីរួមគ្នាធ្វើការងារដើម្បី​ឲ្យ​គណបក្សប្រជាជនកម្ពុជាយើងឈ្នះ ក្នុងគោលបំណងឲ្យប្រជាជនយើងបានរស់ក្នងម្លប់សន្តិភាព
-ត្រូវប្រែក្លាយយុវជនយើងឲ្យទៅជាយុវជនគណបក្ស ដើម្បីរួមចំណែកធ្វើការងារសង្គមបម្រើប្រយោជន៍របស់ប្រជាជន និងរក្សាសុខសន្តិភាពឲ្យបានគង់វង្ស​ផងដែរ​៕SRP

ខេត្តសៀមរាប៖អាជ្ញាធរស្រុកបន្ទាយស្រី បានប្រកាសទទួលពាក្យបណ្ដឹងរបស់ប្រជាពលរដ្ឋ ដែលកំពុងមានបញ្ហាទំនាស់ដីធ្លី។

លោកឃឹម ហ្វីណង់ អភិបាលស្រុកបន្ទាយស្រី បានឲ្យដឹងថា ក្នុងគោលបំណងធ្វើបច្ចុប្បន្នភាព ផ្តល់ភាពច្បាស់លាស់ និងគ្រប់គ្រងឱ្យបានទិន្នន័យជារួមនៅក្នុងតំបន់ដែលមានភូមិសាស្ត្រស្មុគស្មាញ ឯកសារជាន់គ្នា ព្រំប្រទល់មិនច្បាស់លាស់ និងសម្បូរទៅដោយវិវាទ រដ្ឋបាលស្រុកបន្ទាយស្រីសូមអញ្ជើញបងប្អូនប្រជាពលរដ្ឋដែលមានដីធ្លីនៅក្នុងតំបន់ដូចដែលមានបង្ហាញនៅក្នុងផែនទីខាងក្រោមនេះ ទោះបីគិតថាមាន ឬគ្មានវិវាទក៏ដោយ មេត្តារួសរាន់ផ្តល់ឯកសារពាក់ព័ន្ធនឹងការកាន់កាប់អាស្រ័យផលលើដីរបស់ខ្លួន ដើម្បីផ្តល់ជាមូលដ្ឋានឱ្យរដ្ឋបាលស្រុកមានទិន្នន័យពេញលេញជាលក្ខណៈប្រព័ន្ធ និងគ្រប់ជ្រុងជ្រោយ ក្នុងការដោះស្រាយបញ្ចប់វិវាទទាំងឡាយដែលបានអូសបន្លាយអស់ជាង១៥ឆ្នាំមកហើយនេះ។

លោកឃឹម ហ្វីណង់ បន្តថា ដីនៅក្នុងតំបន់ជាប់ព្រំប្រទល់រវាងឃុំខ្នារសណ្តាយ ឃុំរំចេក និងឃុំព្រះដាក់ ជាពិសេសតំបន់ចន្លោះផ្លូវជាតិលេខ៦៦ និងផ្លូវជាតិលេខ៦៧ សុទ្ធសឹងតែជាដីជាប់នៅក្នុងផែនទីគម្របព្រៃឈើឆ្នាំ២០០២នៅឡើយ ដែលត្រូវបានប្រជាពលរដ្ឋរស់នៅកាន់កាប់អាស្រ័យផលជិតម្ភៃឆ្នាំរួចមកហើយ ប៉ុន្តែក៏ជាតំបន់ដែលមានការទាមទារត្រួតសុីគ្នា រវាងប្រជាពលរដ្ឋ និងប្រជាពលរដ្ឋ ឬរវាងប្រជាពលរដ្ឋ និងក្រុមហ៊ុនដែលបានទិញដីបន្តពីប្រជាពលរដ្ឋ ដែលទាមទារឱ្យមានការត្រួតពិនិត្យជាប្រព័ន្ធ និងធ្វើការវិនិច្ឆ័យជារួមដំណាលគ្នាទើបសង្ឃឹមអាចរកច្រកចេញបាន។

បើតាមអភិបាលស្រុកបន្ទាយស្រី ម្ចាស់ដីទាំងអស់នៅក្នុងតំបន់ទាំងនេះនឹងត្រូវបានទុកពេលឱ្យរយៈពេល១ខែដើម្បីបង្ហាញឯកសារកាន់កាប់ដែលមានសុពលភាពនៅលើដីរបស់ខ្លួនមកកាន់ក្រុមការងាររបស់រដ្ឋបាលស្រុកដើម្បីធ្វើការផ្ទៀងផ្ទាត់ និងវាយតម្លៃ មុននឹងកំណត់ឱ្យច្បាស់ថាតំបន់ណាត្រួតជាន់គ្នាពិតប្រាកដ ហើយត្រូវដោះស្រាយបញ្ចប់ ដោយតម្រូវឱ្យម្ចាស់ដីពិតប្រាកដចេញមុខតវ៉ាដោះស្រាយដោយផ្ទាល់ និងមិនអនុញ្ញាតឱ្យតំណាងឬម្ចាស់ដីដើមចេញមុខតវ៉ាជំនួសឡើយ៕SRP

ខេត្តសៀមរាប៖នគរបាលព្រហ្មទណ្ឌកម្រិតស្រាលខេត្តសៀមរាប ប៉ុស្ដិ៍គោកចក សហការជាមួយនគរបាលព្រហ្មទណ្ឌកម្រិតស្រាលខេត្តបាត់ដំបង បានឃាត់ខ្លួនបុរសម្នាក់ ករណីរំលោភលើទំនុកចិត្ត យកម៉ូតូ។

ជនសង្ស័យឈ្មោះ ជា ពិសិដ្ឋអាយុ៣៦ឆ្នាំ មុខរបរ មិនពិតប្រាកដ ទីលំនៅសង្កាត់ទឹកថ្លា ខណ្ឌសែនសុខ រាជធានីភ្នំពេញ។

ការឃាត់ខ្លួនធ្វើឡើងនៅថ្ងៃទី១៩ ខែមករា ឆ្នាំ២០២២ ក្រោយពីបានឆែកឆេរផ្ទះជួលមួយកន្លែង ស្ថិតនៅភូមិទក្សិណត្បូង សង្កាត់គោកចក ក្រុងសៀមរាប របស់ឈ្មោះ ប៉ោះ សុឃឿន ភេទស្រី អាយុ២៦ឆ្នាំ មុខរបរនារីបម្រើការតាមហាង ដែលត្រូវជាប្រពន្ធរបស់ជនសង្ស័យ។

សមត្ថកិច្ចបញ្ជាក់ថា ក្នុងប្រតិបត្តិការចុះស្រាវជ្រាវនេះ បានរកឃេីញ និងដកហូតវត្ថុតាងរួមមាន៖ ១.ម៉ូតូ២គ្រឿង ម៉ាកហុងដាឌ្រីមពណ៌ខ្មៅ សេរីឆ្នាំ២០២២ គ្មានស្លាកលេខ លេខតួ+លេខម៉ាស៉ីន៦១៥៩៨៩០ (ជាម៉ូតូដែលជនសង្ស័យធ្វើសកម្មភាពបានយកមករក្សាទុកក្នុងផ្ទះខាងលើ) ម៉ាកហុងដាស្កុបពី ពណ៌ស សេរីឆ្នាំ២០២២ ពាក់ស្លាកលេខសៀមរាប១AK-២៤១៩ លេខតួ+លេខម៉ាស៉ីន៨៣០៤៩៤១(គ្មានឯកសារបញ្ជាក់)។
២.ស្លាកលេខម៉ូតូចំនួន០៨សន្លឹក។ ៣.ម៉ូទ័រស្វានសម្រាប់ដោះដាក់ស្លាកលេខ១។ ចំពោះសម្ភារវត្ថុតាងដែលដកហូតបានយកទៅបន្តនីតិវិធីនៅស្នងការដ្ឋាននគរបាលបាត់ដំបង ដេីម្បីអនុវត្តនីតិវិធីបន្ត៕SRP

ខេត្តសៀមរាប៖បុរសម្នាក់ដែលបានធ្វើសកម្មភាព លួចម៉ូតូ ដែលម្ចាស់មិនបានដកសោរ ត្រូវបានឃាត់ខ្លួន។

ការឃាត់ខ្លួនធ្វើឡើងនៅថ្ងៃទី២០ ខែមករា ឆ្នាំ២០២២ ម្សិលមិញ នៅក្នុងក្រុងសៀមរាប ដោយប៉ូលិសក្រុងសៀមរាប។ ជនសង្ស័យឈ្មោះរ៉ា ធុង អាយុ១៨ឆ្នាំមុខរបរមិនពិតប្រាកដ មានស្រុកកំណើត និងទីលំនៅបច្ចុប្បន្ននៅភូមិអារញ្ញ សង្កាត់សៀមរាប ក្រុងសៀមរាប ពាក់ព័ន្ធនិងករណីអំពើលួច(លួចម៉ូតូ) និងប្រើប្រាស់នូវសារធាតុញៀន។

ស្នងការរងទទួលផែនព្រហ្មទណ្ឌ លោកភឹង ចិន្តារ៉េត បានឲ្យដឹងថា៖ នៅថ្ងៃទី៧ ខែមករា ឆ្នាំ២០២២ វេលាម៉ោង២៣ និង៣០នាទី ស្ថិតនៅចំណុចក្រុមទី៤ ក្នុងភូមិស្ពានជ្រាវ សង្កាត់សៀមរាប ក្រុងសៀមរាប មានករណីអំពើលួច(លួចម៉ូតូ)បង្កឡើងដោយជនសង្ស័យមិនស្គាល់អត្តសញ្ញាណ បានលួចម៉ូតូម៉ាកហុងដាឌ្រីមពណ៌ខ្មៅ សេរីឆ្នាំ២០១៤ ពាក់ស្លាកលេខបាត់ដំបង១R-៣១១៧ លេខតួ.លេខម៉ាស៊ីន៩០៤៧៦៧៤ របស់ជនរងគ្រោះឈ្មោះសាំង ធី ភេទប្រុស អាយុ ៥៦ឆ្នាំ ដែលទុកម៉ូតូចោលនៅមុខផ្ទះហើយមិនបានដកសោរទុក។ ក្រោយពីសាកសួរបុរសរូបនេះឆ្លើយសារភាពថា ខ្លួនពិតជាបានលួចម៉ូតូរបស់ជនរងគ្រោះពិតមែន ។

បច្ចុប្បន្ន ជនសង្ស័យរួមទាំងវត្ថុតាងត្រូវបានសមត្ថកិច្ចកសាងសំណុំរឿង បញ្ជូនទៅសាលាដំបូងខេត្តអនុវត្តតាមផ្លូវច្បាប់បន្ត៕SRP

ខេត្តក្រចេះ៖ក្រុមហ៊ុនស៊ីបាយអូថេច កំពុងរងការរិះគន់ថា បានធ្វើសកម្មភាពដឹកជញ្ជូនឈើ ចេញពីព្រៃឡង់។

ប្រភពបានរាយការណ៍ថាចាប់តាំង ពីចុងឆ្នាំ ២០២១ រហូតដល់ពេលនេះ ក្រុមហ៊ុនសម្ប ទានសេដ្ឋកិច្ចឈ្មោះ ស៊ីបាយអូថេច (Ci-Biotech) បានបង្កើនការកាប់ឈើ ក្នុងតំបន់ព្រៃឡង់ ដោយដឹកតាមគោយន្តកន្ត្រៃ ចូលមកក្នុងក្រុមហ៊ុន ហើយបម្លែងជាឈើស្របច្បាប់ ដើម្បីដឹកចែកចាយបន្ត។

ប្រភពបានបន្តថាកាលពីថ្ងៃទី១៣ ខែមករា ឆ្នាំ២០២២ កម្លាំងសមត្ថកិច្ចជំនាញបានចុះទៅឃាត់រថយន្តវ៉េអងដឹកឈើមួយគ្រឿងក្នុងឃុំកំពង់ចាម ស្រុកសំបូរ ខេត្តក្រចេះ ដើម្បីត្រួតពិនិត្យឈើនៅលើរថយន្តនោះ មានច្បាប់អនុញ្ញាតឲ្យដឹកជញ្ជូនស្របច្បាប់ពីស្ថាប័នជំនាញ។ ប៉ុន្តែនៅជាប់នឹងរថយន្តបែរជាគ្មានលិខិតអនុញ្ញាតហៅថា(PC)ឡើយ ដោយអ្នកបើកបររថយន្តដឹកឈើនោះថាលិខិតអនុញ្ញាត នៅមេការក្រុមហ៊ុនជាអ្នកកាន់ ហើយហាមមិនឲ្យសមត្ថកិច្ចបើកតង់ពិនិត្យឈើនៅលើរថយន្តនោះទេ។ រហូតដល់ម៉ោងជាង៦ល្ងាច ទើបសមត្ថកិច្ចបានឃើញលិខិតអនុញ្ញាត ដែលចេញដោយរដ្ឋបាលព្រៃឈើខេត្តក្រចេះ ក៏សម្រេចដោះលែងរថយន្តតែម្ដង។

មានការលើកឡើងថា ក្រុមហ៊ុនសុីបាយអូថេច កដឹកជញ្ជូនឈើស្របច្បាប់ ចេញពីក្រុមហ៊ុនបានលុះត្រាតែមន្ត្រីជំនាញរដ្ឋបាលព្រៃឈើចុះទៅត្រួតពិនិត្យ វាស់វែង ចេញបញ្ជីរាយទំហំឈើត្រឹមត្រូវ ទើបអនុញ្ញាតចេញលិខិតដឹកជញ្ជូនឈើបាន ហើយលិខិតអនុញ្ញាតនេះត្រូវបានចែកជូនដល់មន្រ្តីសមត្ថកិច្ចជំនាញពាក់ព័ន្ធគ្រប់ស្ថាប័នភ្លាមៗឲ្យបានដឹង នឹងត្រូវដាក់ជាប់នឹងរថយន្តដឹកឈើនោះផងដែរ។ ផ្ទុយទៅវិញក្រុមហ៊ុនសុីបាយអូថេច បែរជាមិនអនុញ្ញាតឲ្យសមត្ថកិច្ចបើកតង់ត្រួតពិនិត្យឈើ លើរថយន្ត ឯលិខិតអនុញ្ញាតដឹកជញ្ជូនឈើpc ក៏គ្មាន។ ករណីនេះគេសង្ស័យក្រុមហ៊ុន ដែលទំនងជាការគប់គិតជាប្រព័ន្ធរវាងក្រុមហ៊ុននិងមន្ត្រីជំនាញក្នុងការរៀបចំបម្លែងឈើខុសច្បាប់ឲ្យទៅជាឈើស្របច្បាប់។

សេចក្ដីរាយការណ៍ថាការកាប់បំផ្លាញព្រៃឈើ ក្នុងតំបន់អភិរក្សដែលគ្រប់គ្រងដោយក្រសួងបរិស្ថាននេះ បានធ្វើឡើងនៅចំណុច អូរកំបោរ អូគ្រួត អូចា ចែម៉ែ ច្របស្វាយ ស្ថិតក្នុងឃុំកំពង់ចាម ស្រុកសំបូរ ខេត្តក្រចេះ ហើយដឹកជញ្ជូនតាមក្រោយភូមិកំភ្លុកចូលក្រុមហ៊ុនស៊ីបាយអូថេច តែម្ដង។

ជុំវិញការលើកឡើងនេះ សៀមរាបប៉ុស្តិ៍ នៅពុំទាន់ទទួលបានការឆ្លើយបំភ្លឺ ពីក្រុមហ៊ុន ស៊ី បាយអូថេច (Ci-Biotech) ក្រសួងបរិស្ថាននៅឡើយទេ។

សូមជម្រាបថា ក្រុមហ៊ុន ស៊ី បាយអូថេច(Ci-Biotech) គឺ​ជា​ក្រុមហ៊ុន​តំណាង​ឲ្យ​រដ្ឋាភិបាល​កូរ៉េ​អភិវឌ្ឍន៍ រួម​គ្គ្នាជាមួយរដ្ឋាភិបាល​កម្ពុជា វិនិយោគ​ដំណាំ​ឧស្សាហកម្ម​អាកាស្យា ឬ​ស្ថានីយ​ស្ដារ​ព្រៃ​ឈើ​ឡើង​វិញ ដែល​វិនិយោ គ​លើ​ផ្ផ្ទៃដីជាង ៣​ម៉ឺន​ហិកតារ (៣៤.០០៧ ហិកតា) កាល​ពី​ខែ​មិថុនា ឆ្នាំ​២០១២ ស្ថិតនៅ​ក្នុង​ស្រុក​សំបូរ ខេត្ត​ក្រចេះ និង​មួយ​ផ្នែក​ចូល​ដី​ស្រុក​សៀមបូក ខេត្ត​ស្ទឹងត្រែ៕SRP

ខេត្តពង់ចាម​៖ក្នុងកម្មវិធីបេីកការបោះជំរំយុវជន​ខេត្តកំពង់ចាម​ ក្រោមប្រធានបទ​ «ការអភិវឌ្ឍសមត្ថភាពយុវជនផ្នែកបច្ចេកទេសវិទ្យា​ ក្រោមម្លប់សន្តិភាព» នៅវិទ្យាល័យ​ ហ៊ុន សែន ស្គន់ ស្រុកជើងព្រៃ​ នៅល្ងាច​ថ្ងៃទី​២០​ ខែមករា​ ម្សិលមិញ លោក​​ អ៊ុន​ ចាន់ដា​ អភិបាលខេត្តកំពង់ចាម​ បានប្រាប់ដល់ក្មួយៗជាយុវជនទំពាងស្នងឬស្សី​ ត្រូវចៀសវាងឲ្យឆ្ងាយពីគ្រឿងញៀន និងល្បែងពាលា ដែលសង្គមជាតិស្អប់ខ្ពើម ហេីយត្រូវចេះជួយអប់រំមិត្តភ័ក្រ និងធ្វើជាគំរូក្នុងការគោរពច្បាប់ចរាចរណ៍ ដើម្បីសុវត្ថិភាពខ្លួនឯងផង ក្រុមគ្រួសារមិត្តភ័ក្រនិងសង្គមជាតិ ទាំងមូលផងដែរ​។

ថ្លែងក្នុងពិធី លោក​អភិបាលខេត្ត​ បាន​ដាស់តឿន​​ដល់​យុវជន​ទាំងអស់​ ឲ្យបន្តការខិតខំកសាងស្នាដៃឆ្នើមក្នុងចលនា៣ល្អ គឺ«កូនល្អ​ សិស្សល្អ​ មិត្តល្អ»ហើយត្រូវយល់ថា ការប្រពឹត្តអំពើល្អរបស់ក្មួយៗ គឺជាការចូលរួមជាមួយរាជរដ្ឋាភិបាលកម្ពុជា ដើម្បីទប់ស្កាត់រាល់ភាពអសកម្មទាំងឡាយណា ដែលបង្កការរាំងស្ទះដល់ដំណើរការអភិវឌ្ឍ ប្រទេសជាតិ ដោយការធ្វើជាគំរូទាំងលើការសិក្សា ទាំងការរស់នៅដោយប្រកាន់ខ្ជាប់ និងចងចាំថា​ ក្នុងជីវិតយុវវ័យដូចក្មួយៗ ត្រូវកសាងជីវិតឲ្យល្អ ស្រស់ត្រកាលក្នុងថ្នាលសិក្សា ដើម្បីយកវិជ្ជា មក បម្រើក្នុងមាគ៌ាអភិវឌ្ឍប្រទេសជាតិ។

លោក​​ អ៊ុន​ ចាន់ដា​ ក៏បាន​រំពឹងទុកថា​​ ការបោះជំរំយុវជនខេត្តកំពង់ចាម ​ឆ្នាំ២០២២ នាពេលនេះ គឺជាឱកាសសម្រាប់ក្មួយៗ យកអស់សមត្ថភាព បទពិសោធន៍ របស់ខ្លួនមកធ្វើការផ្លាស់ប្តូរ ចែក រំលែកគ្នា ទៅវិញទៅមក រួមចំណែកអភិវឌ្ឍបំណិនជីវិត និងអភិវឌ្ឍសមត្ថភាពរបស់ខ្លួន កាន់តែ រីកចម្រើនឡើង ពិសេសគឺការអប់រំខ្លួនតាមគន្លងសីលធម៌ កូនល្អ សិស្សល្អ មិត្តល្អ និងពលរដ្ឋល្អ ព្រមទាំងខិតខំធ្វើឲ្យខ្លួនមាន សេចក្តីព្យាយាម និងសេចក្តីសង្ឃឹមជឿជាក់ចំពោះខ្លួនឯង។ លេីសពីនោះត្រូវខិតខំ​សង្កេត​សិក្សា​ស្រាវជ្រាវ​ កត់ត្រានូវសកម្មភាពល្អៗ ទុកសម្រាប់ជា មេរៀនបទពិសោធន៍ សម្រាប់ជីវិត របស់ខ្លួន និងធ្វើការផ្សព្វផ្សាយ ពីលទ្ធផលទាំងអស់នេះ ដល់មិត្តភក្តិ បងប្អូនឲ្យបានជ្រាបបានដឹង ពីខ្លឹមសារដ៏មានសារៈសំខាន់ នៃកិច្ចការ ទាំងឡាយ ដែលក្មួយៗបានប្រតិបត្តិដោយផ្ទាល់ ក្នុងដំណើរការបោះជំរំ៧ថ្ងៃ លើទឹកដីស្រុក ជើងព្រៃ ខេត្តកំពង់ចាម ដ៏ស្រស់ត្រកាលនេះ​។

បើតាមលោកស្រី​ ស្រូយ សុជាតិ អគ្គនាយកដ្ឋានយុវជន នៃក្រសួងអប់រំយុវជន និងកីឡា​ បានថ្លែងថា​ ការបោះជំរំយុវជន ជាកម្មវិធីអភិវឌ្ឍន៍ និងបង្កើនសកម្មភាពយុវជន ដែលមិនអាចខ្វះបាននៅក្នុងការងារអប់រំ ពីព្រោះការបោះជំរំនេះ ធ្វើឲ្យយុវជនចេះសង្កេត ចេះពិចារណា ដោយបង្កើនស្មារតី ធ្វើការងារជាក្រុម ធ្វើសេចក្តីសម្រេចចិត្តជាសមូហភាព ចេះស្រលាញ់ ថែរក្សានិងការពារបរិស្ថាន និងបុគ្គលប្រកបដោយការទទួលខុសត្រូវ ក្នុងស្មារតីពង្រឹងមិត្តភាព និងសាមគ្គីភាព ជាពិសេសការចូលរួមថែរក្សាសន្តិភាព និងអភិវឌ្ឍសហគមន៍ របស់យុវជនផងដែរ​៕SRP

ខេត្តត្បូងឃ្មុំ​៖លោកជា សុផារ៉ា រដ្ឋមន្ត្រីក្រសួងដែនដីនគររូបនីយកម្មនិងសំណង់ បានឧបត្ថម្ភ ថវិកាលើកទឹកចិត្តដល់សិស្សានុសិស្សប្រឡងជាប់បាក់ឌុប មកពីស្រុកក្រុងចំនួន៤​ គឺស្រុកត្បូងឃ្មុំ ស្រុកមេមត់ ស្រុកក្រូចឆ្មារ និងក្រុងសួង សរុបចំនួន ១៥៦០នាក់។ ពិធីធ្វើ​ឡើង​នៅស្នាក់ការគណបក្សប្រជាជនស្រុកត្បូងឃ្មុំ នាព្រឹកមិញនេះ។

លោក ជាម ច័ន្ទសោភ័ណ អភិបាលខេត្ត​ត្បូងឃ្មុំ​ បានសាទរចំពោះជោគជ័យក្នុងការខិតខំសិក្សា នេះគឺជាកិត្តិយស ដ៏ធំធេង សម្រាប់ខ្លួនឯងផ្ទាល់ ក៏ដូចជា ក្រុមគ្រួសារ និងជាកិត្តិយស របស់អាជ្ញាធរ នៅក្នុងមូលដ្ឋាន ផងដែរ ដែលប្អូនៗក្មួយៗ បានខិតខំរៀនសូត្ររហូតប្រឡងជាប់ ពិសេសរហូតទទួលបាននិទ្ទេសA។

លោក​ ជា សុផារ៉ា បានមានប្រសាសន៍ទៅកាន់ក្មួយៗទាំងអស់គ្នា ដោយកោតសរសើរក្នុងការខិតខំរៀនសូត្ររហូតទទួលបានលទ្ធផលផ្លែផ្កានាពេលនេះ ដែលជាការឆ្លងកាត់ការលំបាកជាច្រើន ជាពិសេសឧបសគ្គនៃការឆ្លងរាលដាល នៃជម្ងឺកូវីដ ១៩។

ជាការឆ្លើយតបទៅនឹងកិច្ចខិតខំរបស់ក្មួយៗ ក្នុងនាមលោក ជាអ្នកទទួលខុសត្រូវ ក្នុងស្រុកក្រុងទាំង​ ៤នេះ ក៏សូមចូលរួមអបអរសាទរ និងចូលរួមផ្ដល់ការលើកទឹកចិត្ត នូវថវិកា មួយចំនួន ដើម្បីក្មួយៗប្រើប្រាស់ឲ្យចំគោលដៅ ក្នុងអំឡុងពេលបន្តការសិក្សា នៅកម្រិតឧត្ដមសិក្សា។

លោករដ្ឋមន្ត្រី បានផ្តាំផ្ញើ ដល់ក្មួយៗទាំងអស់ ត្រូវខិតខំរៀនសូត្របន្តទៅមុខទៀត ជាពិសេស ក្រេបជញ្ជក់យកចំណេះដឹង ក្នុងអំឡុងពេលបន្តការសិក្សា នៅថ្នាក់កម្រិតឧត្ដម ដើម្បីក្លាយខ្លួនជាកូនល្អ យុវជនល្អ និងជាពលរដ្ឋល្អ ហើយយកចំណេះដឹង និងសមត្ថភាព​ ចូលរួមចំណែកអភិវឌ្ឍសេដ្ឋកិច្ចគ្រួសារ និងសង្គមជាតិ ឲ្យកាន់តែរីកចំរើនទ្វេ។

សូមជម្រាបថា លោកជា សុផារ៉ា បានផ្តល់ថវិកាលើកទឹកចិត្តដល់សិស្សានុសិស្សប្រឡងជាប់:
-និទ្ទេសAចំនួន៣៨នាក់ក្នុងម្នាក់ ៥០០ដុល្លា
-និទ្ទេស B C D E ១៥២២នាក់ក្នុងម្នាក់ ១០ម៉ឺនរៀល​
-ប្រធានការិយាល័យអប់រំស្រុក នាយក-នាយិកាវិទ្យាល័យ ចំនួន១៩នាក់ ក្នុងម្នាក់១០០ដុល្លា
-និងអនុប្រធានការិយាល័យអប់រំស្រុក នាយក-នាយករងវិទ្យាល័យ ៣៤នាក់ ក្នុងម្នាក់៥០ដុល្លា។ ដោយឡែកសិស្សនិទ្ទេសA ចំនួន៣៨នាក់ ដែលទទួលថវិកាលើកទឹកចិត្តនាពេលនេះ គឺមកពីចំនួន​ ៤ស្រុកប៉ុណ្ណោះ ខណៈទូទាំងខេត្តត្បូងឃ្មុំ ជាប់និទ្ទេសAមានចំនួន ៥៤នាក់ និងជាប់ជាស្ថាពរសរុប២៩៤៤នាក់​៕SRP

ខេត្ត​កំពង់ធំ៖ករណីចាប់រំលោភ ដោះស្រាយក្រៅប្រព័ន្ធតុលាការ សមត្ថកិច្ច​សម្រេចអ្នកកាត់ក្តី ឲ្យជនរងគ្រោះ៧០០ដុល្លា​រ ចំណែកប៉ូលិសទាមទារទឹកតែ ១៣០០ដុល្លារ​ សម្រាប់ជួយដោះស្រាយ។ ករណីបានធ្វើឲ្យគ្រួសារជនរងគ្រោះឈឺចិត្តរ្យុត្តិធម៌ទាមទារឱ្យតុលាការខេត្តកំពង់ធំ បើកការស៊ើបអង្កេតជាបន្ទាន់។

យោងតាមការសំណូមពរ របស់ជនរងគ្រោះ បាន​រៀបរាប់​ប្រាប់​ថា៖ ករណី​ចាចាប់រំលោភបាន​កើតឡើងកាលពីថ្ងៃទី៤ខែធ្នូ ឆ្នាំ​២០២១​ ហើយគ្រួសារជនរងគ្រោះ​ បានមកដាក់ពាក្យបណ្តឹងនៅថ្ងៃទី៣ខែមករា ឆ្នាំ​២០២២ តែទើបតែហៅមកដោះស្រាយនៅថ្ងៃទី១៩ខែមករា ឆ្នាំ២០២២នេះ តែជនសង្ស័យគេច​ខ្លួនបាត់ ឲ្យតែសាច់ញាតិមកដោះស្រាយ។

ប្រភពបានឲ្យដឹងថាជនសង្ស័យ​ត្រូវ​បាន​ស្គាល់​ឈ្មោះផល ភាព ភេទប្រុស​អាយុ៤០ឆ្នាំ​ រស់​នៅ​ឃុំ​ចំណា​ក្រោម ស្រុកស្ទោង ខេត្ត​កំពង់ធំ ត្រូវ​ជា​ឪពុក​មា របស់​ក្មេងស្រីរងគ្រោះ
ដែល​មាន​ផ្ទះជិតគ្នា។

ប្រភពបន្តថាជនរងគ្រោះ​ឈ្មោះ.ទ.អ.ង អាយុ​១៨ឆ្នាំ ត្រូវបានជនសង្ស័យចាប់រំលោភ ក្នុង​បន្ទប់​ក្មេងស្រី​តែម្តង​ រហូត​មក​ដល់​ពេល​នេះ​ក្មេងស្រី​រងគ្រោះ​មាន​ផ្ទៃ​ពោះ​១ខែហើយ។

លោក​សាយ​ គឹមឡម អភិបាល ស្រុកស្ទោង បានឲ្យដឹងថា​ក្នុង​ករណី​ ពុំមាន​សមត្ថកិច្ច​នៃ​អធិការ​ស្រុក​ស្ទោង​រាយការណ៍​ជូន​គណ:បញ្ជាការឯកភាពស្រុក​ អំពីករណីចាប់រំលោភក្មេងស្រីឲ្យបានដឹងនោះឡើយ។

បើតាមបងស្រី​ត្រូវ​ជា​សាច់ញាតិ​ក្មេងស្រី​រងគ្រោះឈ្មោះ​ តុលា បានឲ្យដឹងថា​ សាច់ញាតិ​ជនសង្ស័យ​ និង​សាច់​ញាតិ​ជន​រង​គ្រោះ​ព្រមព្រៀង​គ្នាចំនួន២០០០ដុល្លារ ដើម្បី​បញ្ចប់​រឿង​ តែលុយមិនទាន់បានប្រគល់ទេ ដោយសម្រេចគ្នា មកប្រគល់នៅអធិការ ដើម្បី​សមត្ថកិច្ច​ជួយដឹងឮ ក្នុង​ពេលនោះ​ លោក​វ៉នសុភ័ណ្ឌ អធិការ​រង​ ហៅបងស្រីមកក្នុងបន្ទប់ស្ងាត់ៗ ប្រាប់​ថា​សេវាកម្មប៉ូលិសជួយសម្របសម្រួល ១៣០០ដុល្លារ បងស្រី​មិនយល់ព្រមទើប សំណូមពរ​ឲ្យអ្នកសារព័ត៌មានជួយ ដែលជាជម្រើសចុងក្រោយ។

ជុំវិញការលើកឡើងលើព័ត៌មានខាងលើនេះលោកវ៉ន សុភ័ណ្ឌ អធិការ រងទទួលផែនព្រហ្មទណ្ទ នៃ​អធិការ​ដ្ឋាន​នគរបាល​ស្រុក​ស្ទោង បានអះអាងថា លោកមិនបានទារលុយពីជនរងគ្រោះថ្លៃកាត់ក្តីក្រៅប្រពន្ឋតុលាការ ចំនួន​១៣០០​ដុល្លារនោះទេ គឺថ្នាក់លើអោយយកទេ តែលោកមិនបានបញ្ជាក់ថា ថ្នាក់លើមួយណាឲ្យយកនោះទេ។

ទោះជាយ៉ាងណា បងស្រី​តុលា​ បានសម្រេច​ឡើង​មកតុលារ ខេត្ត​កំពង់ធំ ដើម្បីដាក់ពាក្យបណ្តឹង ទាមទារជម្ងឺចិត្ត៥០០០ ដុល្លារនិងបាន​សំណូមពរ​ ឲ្យលោក ព្រះ​រាជអាជ្ញា​អយ្យការ​អម​សាលាដំបូង​ខេ​ត្តកំពង់ធំ មេត្តាជួយរកយុត្តិធម៌ជួនពួកគាត់ផង៕SRP

ខេត្តសៀមរាប៖ក្រុមមន្ត្រីប៉ុស្តិ៍នគរបាលសង្កាត់ជ្រាវក្រុងសៀមរាប រកមិនឃើញទីតាំងបនល្បែងជល់មាន់ ក្រោយពីមានបណ្ដាញសង្គម facebook បានចុះផ្សាយថាទឹកដីសង្កាត់ជ្រាវ មានល្បែងជល់មាន់និងអាប៉ោង។

អ្នកនាំពាក្យ ស្នងការដ្ឋាននគរបាលខេត្តសៀមរាប បានឲ្យដឹងថា៖កន្លងទៅថ្មីៗនេះមានសារព័ត៌មាន សុរ៉ា សារព័ត៌មាន បានសរសេរបង្ហោះនៅតាមបណ្ដាទំនាក់ទំនងសង្គមដែលមានខ្លឺមសារថា៖ មានការបើកល្បែងស៊ីសងខុសច្បាប់ដូចជា ជល់មាន់ និងអាប៉ោង នៅភូមិក្រសាំង សង្កាត់ជ្រាវ ក្រុងសៀមរាប ខេត្តសៀមរាប។

អ្នកនាំពាក្យបានបន្ថែមថា ក្រោយពីបានទទួលព័ត៌មាន លោកតេង ច័ន្ទណាត ស្នងការខេត្តសៀមរាប បានដាក់បទបញ្ជាឲ្យចុះស្រាវជ្រាវជាបន្ទាន់។

បើតាមអ្នកនាំពាក្យបានបញ្ជាក់ថា ជាក់ស្ដែង នៅថ្ងៃទី១៧ ខែមករា ឆ្នាំ២០២២ កម្លាំងប៉ុស្ដិ៍នគរបាលរដ្ឋបាលជ្រាវ ដឹកនាំនិងបញ្ជារផ្ទាល់ដោយអធិការនគរបាលក្រុងសៀមរាប លោកដា ចំរើន បានចុះស្រាវជ្រាវទៅដល់ទីតាំងដែល សុរ៉ា សារព័ត៌មាន បានសរសេរបង្ហោះនៅក្នុង Facebook ពិនិត្យឃើញថា ៖ នៅក្នុងភូមិសាស្រ្ដនេះគឺពុំមានការលេងល្បែងស៊ីសងខុសច្បាប់ ដូចជា ជល់មាន់ លេងបៀ អាប៉ោង ដូចសារព័ត៌មានខាងលើ បានចុះផ្សាយនោះទេ។

ទន្ទឹមនឹងនេះដែរ ស្នងការដ្ឋាននគរបាលខេត្តសៀមរាប សូមថ្លែងអំណរគុណយ៉ាងអនេកចំពោះបងប្អូនប្រជាពលរដ្ឋ អ្នកសារព័ត៌មាន អ្នកនិយមតាមដានព័ត៌មានតាមបណ្ដាញទំនាក់ទំនងសង្គម ដែលតែងតែចូលរួមផ្ដល់ព័ត៌មាន ពាក់ព័ន្ធសកម្មភាពល្មើសច្បាប់ បទល្មើសគ្រប់ប្រភេទ ដែលកើតមានឡើងនៅតាមមូលដ្ឋានក្នុងន័យដើម្បីចូលរួមចំណែក ក្នុងការអនុវត្តគោលនយោបាយ ភូមិ-ឃុំ-សង្កាត់ មានសុវត្ថិភាពរបស់រាជរដ្ឋាភិបាលកម្ពុជា។

អាស្រ័យហេតុនេះ សូមអ្នកសារព័ត៌មាន បណ្ដាអ្នកនិយមតាមដានព័ត៌មាន នៅតាមបណ្ដាញFacebook និងសាធារណជន មេត្តាជ្រាបជាព័ត៌មាន៕SRP

ខេត្តព្រះសីហនុ៖សម្ដេចតេជោហ៊ុន សែន នាយករដ្ឋមន្ត្រី បានអះអាងថារហូតមកដល់ពេលនេះ ការប្រើប្រាស់វ៉ាក់សាំងពិតជាមានឥទ្ធិពល និងមានប្រសិទ្ធភាព ដែលកន្លងមកនេះបញ្ហានៃជំងឺកូវីដ-១៩ បានជះឥទ្ធិពលយ៉ាងខ្លាំងទៅលើវិស័យទេសចរណ៍ របស់ប្រទេសកម្ពុជាក៏ដូចជាទេសចរណ៍ ក្នុងតំបន់អាស៊ានផងដែរ។ ជាក់ស្ដែងមុនពេលមានជំងឺកូវីដ-១៩ កម្ពុជាទទួលភ្ញៀវទេសចរប្រមាណជា ៦ លាននាក់ ហើយក្រោយពេលមានជំងឺកូវីដ-១៩ភ្ញៀវទេសចរអន្តរជាតិបានធ្លាក់មកត្រឹម២ម៉ឺននាក់ប៉ុណ្ណោះ។ សម្ដេចថា រាជរដ្ឋាភិបាលកម្ពុជា បានខិតខំជួយ ដល់ប្រជាពលរដ្ឋ ជាពិសេសប្រជាពលរដ្ឋ ដែលមានផលប៉ះពាល់ដោយជំងឺកូវីដ-១៩ នេះ។

សម្ដេចតេជោក៏បានជម្រាបជូនដល់បណ្ដារដ្ឋមន្ត្រីទេសចរណ៍អាស៊ានថា កម្ពុជាខិតខំជំរុញការចាក់វ៉ាក់សាំងដូសជំរុញ គឺដូសទី៣និងដូសទី៤សម្រាប់អ្នកដែលស្ថិតនៅជួរមុខ។ ដែលកត្តាទាំងអស់នេះធ្វើឲ្យកម្ពុជាអាចមានឱកាសបើកប្រទេសជាតិឡើងវិញ។ 

នៅក្នុងជំនួបដែលធ្វើឡើងនៅឯសណ្ឋាគារសុខាខេត្តព្រះសីហនុ នាយករដ្ឋមន្ត្រីក៏បានមានប្រសាសន៍បញ្ជាក់អំពីស្ថានភាពជំងឺកូវីដ-១៩ នៅក្នុងប្រទេសកម្ពុជា ជាពិសេសយុទ្ធនាការនៃការចាក់វ៉ាក់សាំង។ អ្វីដែលកម្ពុជាក៏ដូចជាសមាជិកអាស៊ានដទៃទៀតបាន និងកំពុងធ្វើកន្លងទៅនេះបានឆ្លុះបញ្ចាំងអំពីការខិតខំប្រឹងប្រែង ក្នុងយុទ្ធនាការចាក់វ៉ាក់សាំងដើម្បីធ្វើយ៉ាងណាស្ដារវិស័យទេសចរណ៍នៅក្នុងតំបន់អាស៊ាន។ 

សម្តេចហ៊ុន សែន អះអាងយ៉ាងដូច្នេះ ក្នុងឱកាសអញ្ជើញទទួលជួបពិភាក្សាការងារជាមួយបណ្ដារដ្ឋមន្ត្រីទេសចរណ៍អាស៊ាននៅថ្ងៃទី ១៩ ខែមករា ឆ្នាំ ២០២២នេះ  ដឹកនាំដោយលោក លឹម ចុកហ៊ុយ អគ្គលេខាធិការអាស៊ាន។

សម្ដេចបានគូសបញ្ជាក់ថា ពេលយើងមានវ៉ាក់សាំងកូវីដ-១៩ យើងបានឃើញថាសមាជិកអាស៊ាននីមួយៗ បានចាត់វិធានការខុសៗគ្នាក្នុងការឆ្លើយតបនឹងជំងឺរាតត្បាតកូវីដ-១៩។ 

សម្ដេចតេជោក៏បានគូសបញ្ជាក់អំពីកំណើនសេដ្ឋកិច្ចកម្ពុជាដែលឆ្នាំ ២០២០ ដោយសារឥទ្ធិពលនៃកូវីដ-១៩ កំណើនសេដ្ឋកិច្ចបានធ្លាក់ចុះ ប៉ុន្តែឆ្នាំ២០២១កន្លងទៅ បានឡើងជាង៣% ឯណោះខណ:ធនាគារពិភពលោកបានទស្សន៍ទាយថាអាចកើនឡើងបានប្រមាណ២% ប៉ុន្តែជាក់ស្ដែងបានកើនឡើងរហូតដល់ជាង៣%ឯណោះ។

សម្ដេចតេជោបានបញ្ជាក់ថា ស្ថានភាពបច្ចុប្បន្នបានប្រសើរហើយៗ សម្ដេចបានស្នើឲ្យមានការជំរុញការធ្វើដំណើរ ក្នុងអាស៊ានជាពិសេសគួរពិនិត្យឡើងវិញ នូវការធ្វើដំណើររបស់ប្រជាពលរដ្ឋក្នុងវិស័យទេសចរណ៍នេះ ដោយសម្តេចស្នើឱ្យកិច្ចប្រជុំរដ្ឋមន្ត្រីទេសចរណ៍អាស៊ាននេះពិនិត្យមើលឡើងវិញ ដោយសារទេសចរណ៍ ជាផ្នែកមួយដ៏សំខាន់នៃសេដ្ឋកិច្ចម្យ៉ាងទៀតដោយសារទំនាក់ទំនង រវាងប្រជាជន និងប្រជាជនជាការសំខាន់ផងដែរ។

សម្ដេចតេជោបានជម្រាបជូនបណ្ដារដ្ឋមន្ត្រីទេសចរណ៍អាស៊ានថា កន្លងមកកម្ពុជាមានប៉ូលសេដ្ឋកិច្ចរហូតដល់ ៣ គឺមានរាជធានីភ្នំពេញ ខេត្តព្រះសីហនុ និងខេត្តសៀមរាប ហើយឥឡូវនេះរាជរដ្ឋាភិបាល ក៏បានបង្កើតប៉ូលទី៤ ផងដែរ នៅប៉ែកឦសានប្រទេសដែលមាន ឧស្សាហកម្ម កសិកម្ម មានដូចជាកាហ្វេ និងគ្រាប់ស្វាយចន្ទីជាដើម។

សម្ដេចតេជោបានគូសបញ្ជាក់អំពីការខិតខំរបស់រាជរដ្ឋាភិបាលកម្ពុជាក្នុងការវិនិយោគបន្ថែមលើការកសាងហេដ្ឋារចនាសម្ព័ន្ធ នៅខេត្តព្រះសីហនុ និងខេត្តសៀមរាបដោយ កម្ពុជាបានចាយថវិកាមួយចំនួន ក្នុងការកសាងបន្ថែមនូវហេដ្ឋារចនាសម្ព័ន្ធដូចជាផ្លូវថ្នល់ជាដើម។

សម្ដេចតេជោបានគូសបញ្ជាក់ថាយើងនឹងបញ្ចប់ការកសាងផ្លូវល្បឿនលឿននៅពេលខាងមុខពីភ្នំពេញទៅខេត្តព្រះសីហនុ ហើយកំពុងពិចារណាលើការកសាងផ្លូវរថភ្លើងល្បឿនលឿនផងដែរ រវាងភ្នំពេញ និងប្រទេសថៃ និងភ្នំពេញប្រទេសវៀតណាម នៅពេលអនាគត។

លោកអគ្គលេខាធិការអាស៊ានបានមានប្រសាសន៍ថា លោមពិតជាថ្លែងអំណរគុណដល់សម្ដេចតេជោនាយករដ្ឋមន្ត្រីចំពោះវត្តមានដ៏ខ្ពង់ខ្ពស់របស់សម្ដេចនៅក្នុងកម្មវិធីបើកវេទិកាទេសចរណ៍អាស៊ាន ក៏ដូចជាក្នុងកម្មវិធីបើកកិច្ចប្រជុំរដ្ឋមន្ត្រីទេសចរណ៍អាស៊ានផងដែរ។​ លោកបន្តថាអ្វីដែលសម្ដេចបានលើកឡើងក្នុងការជំរុញសមាហរណកម្មអាស៊ាន ជាពិសេសឧស្សាហកម្មទេសចរណ៍ជាតែម្ដង ដែលកន្លងមកមានការប៉ះពាល់យ៉ាងខ្លាំង ដោយសារការជះឥទ្ធិពលនៃការឆ្លងរាតត្បាតជំងឺកូវីដ-១៩។

លោកថាអ្វីដែលសម្ដេចតេជោនាយករដ្ឋមន្ត្រីផ្ដល់វត្តមាន និងសន្ទរកថារបស់សម្ដេចបានលើកទឹកចិត្តនិងណែនាំឲ្យបណ្ដាប្រទេសអាស៊ានបន្តខិតខំក្នុងការជំរុញធ្វើយ៉ាងណា ឱ្យបានជាលទ្ធផលផ្លែផ្កា ជាក់ស្ដែងនៅពេលខាងមុខហើយ លោកក៏បានសាទរកម្ពុជាដែលបានបើកវេទិកាទេសចរណ៍អាស៊ាន លើកដំបូងក្នុងរយៈពេល២ឆ្នាំដោយសារយើងមិនបានរៀបចំពីមុនមកដោយសារបញ្ហាកូវីដ-១៩។ 

ដូច្នេះអ្វីដែលកម្ពុជាបានធ្វើនេះជាជោគជ័យហើយកន្លែងដែលល្អ ក្នុងការជំរុញឲ្យមានវេទិកាទេសចរណ៍អាស៊ានកម្ពុជានេះ.គឺល្អណាស់។ មិនត្រឹមតែប៉ុណ្ណោះ លោកមានប្រសាសន៍ផងដែរថា ការដែលយើងរៀបចំបើកឡើងវិញវេទិកាទេសចរណ៍អាស៊ាននេះ ក៏បញ្ជាក់អំពីការបើកឡើងវិញនៃទេសចរណ៍អាស៊ានផងដែរ។ លោកបញ្ជាក់ថាកន្លងទៅមុនកូវីដ-១៩ ផ្នែកវិស័យទេសចរណ៍ បើគិតជា GDPស្មើនឹង១៤,៣%នៃ GDPអាស៊ានសរុបទាំងមូល ហើយបើគិតនៅក្នុងមុខរបរការងារក្នុងអាស៊ានគឺស្មើប្រមាណជាង១៣%ឯណោះ។

ដូច្នេះវិស័យទេសចរណ៍នេះសំខាន់ណាស់សម្រាប់ទ្រទ្រង់សហគ្រាសនៃមីក្រូតូច និងមធ្យមក្នុងអាស៊ាន ហើយក៏ជាផ្នែកមួយដ៏សំខាន់នៃកំណើនសេដ្ឋកិច្ចក្នុងអាស៊ាន។

លោក បានបញ្ជាក់សារជាថ្មីថាការប្រជុំនៅខេត្តព្រះសីហនុសម្រាប់រដ្ឋមន្ត្រីទេសចរណ៍អាស៊ាននេះគឺបានបញ្ជូនសារសំខាន់ណាស់អំពីការធ្វើដំណើរសម្រាប់ទេសចរណ៍ ក្នុងអាស៊ានឡើងវិញក៏ដូចជាសម្រាប់ជូនសារទៅក្រៅតំបន់អាស៊ានថាវិស័យទេសចរណ៍អាស៊ានបានបើកឡើងវិញហើយ។ 

ក្នុងកិច្ចប្រជុំនេះដែរលោកគូសបញ្ជាក់ថានៅប្រទេសកម្ពុជាកិច្ចប្រជុំរដ្ឋមន្ត្រីទេសចរណ៍នឹងអនុម័តលើឯកសារមួយចំនួនជាពិសេសក្នុងការស្ដារឡើងវិញលើវិស័យទេសចរណ៍ក្រៅពីកូវីដ-១៩ ហើយជាពិសេសទៀតសេចក្តីប្រកាសទីក្រុងភ្នំពេញនេះធ្វើយ៉ាងណាជំរុញទេសចរណ៍ដែលមានលក្ខណៈធន់និងបត់បែន។លោកបញ្ជាក់ដែរថាការងារអាទិភាពរបស់កម្ពុជាឆ្នាំនេះក្នុងក្របខណ្ឌវិស័យទេសចរណ៍គឺជំរុញធ្វើយ៉ាងណាឱ្យសេដ្ឋកិច្ចអាស៊ានងើបឡើងវិញហើយវិស័យទេសចរណ៍នេះគឺអាចចូលរួមក្នុងការអនុវត្តនូវគំនិតផ្ដួចផ្ដើមមួយចំនួនក្នុងការជួយជម្រុញសេដ្ឋកិច្ចអាស៊ានក្នុងការពង្រឹងវិស័យទេសចរណ៍អាស៊ាន ជាពិសេសដល់អ្នកដែលប្រកបអាជីពលើវិស័យទេសចរណ៍នេះ។អគ្គលេខាធិការអាស៊ានបានមានប្រសាសន៍ទៀតថាយើងនឹងបន្តធ្វើការយ៉ាងជិតស្និតជាមួយបណ្ដាសមាជិកអាស៊ានទាំងអស់ធ្វើយ៉ាងម៉េចបើកឡើងវិញវិស័យទេសចរណ៍ហើយសំខាន់ណាស់អ្វីដែលសម្ដេចតេជោបានស្នើឲ្យអាស៊ានធ្វើយ៉ាងណារៀបចំបើកនិងអនុវត្តរបៀងអាស៊ានសម្រាប់ការធ្វើដំណើររបស់អាស៊ានយើងមានផែនការក្នុងការបើកនិងជំរុញជាពិសេសការធ្វើដំណើរទេសចរណ៍នៅពេលខាងមុខនេះជាពិសេសពាក់ព័ន្ធផ្នែកផ្សេងៗទៀតដូចជាសុខាភិបាល ដឹកជញ្ជូននិងការបរទេស។ ដូច្នេះអគ្គលេខាធិការបានសន្យាជាមួយសម្ដេចតេជោថាអគ្គលេខាធិការអាស៊ាននឹងខិតខំធ្វើការងារជាមួយសមាជិកអាស៊ានដៃគូពាក់ព័ន្ធនឹងវិស័យមួយចំនួនធ្វើយ៉ាងណាជំរុញឲ្យអនុវត្តបានក្នុងការធ្វើដំណើរនៅក្នុងក្របខ័ណ្ឌអាស៊ានប៉ុន្តែអ្វីដែលចាំបាច់គឺត្រូវរៀបចំឱ្យមានផែនការសកម្មភាពហើយការងារនិងលើកយកមកពិភាក្សានៅក្នុងខែមិនាខាងមុខនៅពេលរដ្ឋមន្ត្រីសុខាភិបាលជួបគ្នានៅពេលខាងមុខ។
អគ្គលេខាធិការអាស៊ានបានសន្យាថានឹងធ្វើការងារនេះជាមួយនិងវិស័យពាក់ព័ន្ធទាំងអស់ខិតខំជំរុញយ៉ាងណាឲ្យវិស័យទេសចរណ៍កំរើកឡើងវិញ។ អគ្គលេខាធិការអាស៊ានក៏បានថ្លែងអំណរគុណក្នុងភាពជាអ្នកដឹកនាំរបស់សម្ដេចតេជោនាយករដ្ឋមន្ត្រីដែលបានផ្ដល់ភាពកក់ក្តៅនិងលើកទឹកចិត្ត ជាពិសេសសារក្នុងសន្ទរកថារបស់សម្ដេចគឺបានខិតខំជំរុញធ្វើយ៉ាងណាឱ្យវិស័យទេសចរណ៍បានប្រសើរជាងមុននិងចូលរួមចំណែកធ្វើឲ្យសេដ្ឋកិច្ចអាស៊ានបានប្រសើរជាងមុន៕SRP

ខេត្តបាត់ដំបង៖អ្នកនាំពាក្យរដ្ឋបាលខេត្តបាត់ដំបង បានចេញលិខិតបំភ្លឺ ករណីលោក លី ឌីនូរី លាឈប់ការងារនិងចោទប្រកាន់ថា នៅសាលាខេត្តបាត់ដំបងមានបក្ខពួកនិយម។ ការបំភ្លឺនេះក្រោយពីលោកលី ឌីនូរី បានបង្ហោះលិខិតលាឈប់ពីមន្ត្រីរាជការស៊ីវិលក្របខណ្ឌក្រសួងមហាផ្ទៃ ដែលបម្រើការងារនៅសាលាខេត្តបាត់ដំបង គោរពជូនសម្ដេចស ខេង រដ្ឋមន្រ្តីក្រសួងមហាផ្ទៃ។ ខាងក្រោមជាលិខិតបំភ្លឺ៖