ព័ត៌មានជាតិ

ខេត្តសៀមរាប៖បុរសជាអ្នកបើកម៉ូតូត្រូវបានរថយន្តដឹកទំនិញបុកចំពេញទំហឹងបណ្ដាលឲ្យស្លាប់នៅកន្លែងកើតហេតុ។

ហេតុការណ៍បានកើតឡើងវេលាម៉ោង២២និង៣០ ថ្ងៃទី២៧ ខែមករា ឆ្នាំ២០២២ នៅចំណុចភូមិលលៃ ឃុំបាគង ស្រុកប្រាសាទបាគង ខេត្តសៀមរាប តាមបណ្ដោយផ្លូវជាតិលេខ៦។

សមត្ថកិច្ចស្រុកប្រាសាទបាគងបានឲ្យដឹងថាករណីគ្រោះថ្នាក់ចរាចរណ៍នេះ រវាងរថយន្តដឹកទំនិញធុនធំ ម៉ាកអុីណូ ពណ៌ស ផ្លាកលេខកំពង់ចាម3A-1053 បានបុកជាមួយម៉ូតូហុងដាC125ឆ្នាំ2019 ពណ៌ខ្មៅ គ្មានស្លាកលេខ។ អ្នកបើកម៉ូតូឈ្មោះ សុងភេទ ប្រុសអាយុ ២១ឆ្នាំ នៅភូមិជ្រៃ ឃុំកណ្ដែក ស្រុកប្រាសាទបាគង ខេត្តសៀមរាប ឲ្យស្លាប់ភ្លាមៗ
ចំណែកអ្នកបើកបរថយន្តមិនស្គាល់អត្ដសញ្ញាណ បានរត់គេចខ្លួនបាត់ក្រោយបង្កហេតុ។

សមត្ថកិច្ចបន្តថាគ្រោះថ្នាក់ចរាចរណ៍នេះបណ្ដាលឲ្យស្លាប់មនុស្សម្នាក់ ខូចខាតរថយន្ត១ គ្រឿង និងម៉ូតូ១គ្រឿង។ មូលហេតុភាគីខាងរថយន្តបើកមិនប្រកាន់ស្ដាំ៕SRP

ខេត្តសៀមរាប៖ក្នុងពិធីខួបកំណើតមួយនៅទីជនបទ ភ្ញៀវម្នាក់ត្រូវបានជនដៃដល់លួចកាប់សម្លាប់បណ្ដាលឲ្យស្លាប់នៅថ្លុកឈាម។

ហេតុការណ៍បានកើតឡើងភូមិក្រាំង ឃុំខ្វាវ ស្រុកជីក្រែង ខេត្តសៀមរាប នៅវេលាម៉ោង០៩និង២០នាទីយប់ ថ្ងៃ២៧ ខែមករា ឆ្នាំ២០២២។

សេចក្ដីរាយការណ៍ព័ត៌មានបឋមបានឲ្យដឹងថាជនរងគ្រោះ មានឈ្មោះ សយ បូរំ អាយុ៤៧ ឆ្នាំមុខបរធ្វើតុកៅអី មានទីលំនៅភូមិខ្វាវ ឃុំខ្វាវ ស្រុកជីក្រែង ខេត្តសៀមរាប។ ចំណែកជនដៃដល់មានឈ្មោះ ញូវ ទីន អាយុ៣៣ឆ្នាំ រស់នៅភូមិក្រាំង ឃុំខ្វាវ ស្រុកជីក្រែង ខេត្តសៀមរាប។

ប្រភពបានបន្តថាខណៈជនរងគ្រោះកំពុងតែចូលរួមក្នុងកម្មវិធីខួបកំណើត ត្រូវបានជនដៃដល់លួចកាប់នឹងកាំបិតខ្វែវបណ្ដាលឲ្យស្លាប់នៅក្នុងថ្លុកឈាមតែម្តង។

ទោះជាយ៉ាងណាជនដៃដល់ត្រូវបានកម្លាំងប្រជាការពារនិងប្រជាពលរដ្ឋ នៅទីតាំងកើតហេតុបានឃាត់ខ្លួនបានភ្លាមៗផងដែរ។

ជុំវិញករណីនេះ សៀមរាប ប៉ុស្ដិ៍ នៅពុំទាន់ទទួលបានការបំភ្លឺព័ត៌មានលម្អិតពីអធិការនគរបាលស្រុកជីក្រែង ករណីខាងលើផ្ដើមចេញពីមូលហេតុអ្វីនៅឡើយទេ៕SRP

ខេត្តត្ត្បូងឃ្មុំ៖លោកជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងជាប្រធាន​ក្រុម​ការងារ​រាជរដ្ឋាភិបាល​ចុះមូលដ្ឋាន​ខេត្តត្បូងឃ្មុំ​ បានថ្លែងថា ក្នុងនាមក្រុមការងារចុះមូលដ្ឋានតាមបណ្តាខេត្ត ក្រុង ស្រុក ត្រូវមានវត្តមាននៅមូលដ្ឋានពិតប្រាកដ ដែលជាការផ្តល់ភាពកក់ក្តៅ និងដើម្បីពិគ្រោះសុំយោបល់ ពីសំណាក់អ្នកនៅមូលដ្ឋាន។ ជាពិសេស ក្នុងនាមក្រុមការងារចុះមូលដ្ឋាន គឺត្រូវចុះជួយដោះស្រាយរាល់បញ្ហានានា បន្តអភិវឌ្ឍន៍ និងគាំទ្រយន្តការដ៍ល្អរបស់សម្តេចតេជោ ហ៊ុន សែន តែដាច់ខាតមែនមិនចុះដើម្បីបន្ថែមបន្ទុកបញ្ហាដល់មូលដ្ឋាន ដើម្បីបានលាភសក្ការៈណាមួយសម្រាប់ខ្លួននោះឡើយ​។​

ថ្លែងបែប​នេះក្នុងកិច្ចប្រជុំត្រួតពិនិត្យលទ្ធផលបូកសរុបការងារប្រចាំឆ្នាំ២០២១ និងលើកទិសដៅការងារឆ្នាំ២០២២ នៅសាលាខេត្តត្បូងឃ្មុំ​ នៅថ្ងៃទី២៧ ខែមករា ឆ្នាំ២០២២​។

លោកជា សុផារ៉ា បានលើកឡើងថា ក្នុងឆ្នាំកន្លងមកនេះ ក្រុមការងារ របស់រាជរដ្ឋាភិបាលចុះមូលដ្ឋានខេត្តត្បូងឃ្មុំ បានខិតខំយកចិត្តទុកដាក់អនុវត្តនូវតួនាទី និងភារកិច្ចរបស់ខ្លួនក្នុងការជម្រុញនិងលើកកម្ពស់ ការទទួលខុសត្រូវលើការងារផ្តល់សេវាសាធារណៈ ការថែរក្សាសន្តិសុខសណ្តាប់ធ្នាប់ និងសុវត្ថិភាពសង្គម ព្រមទាំងការអភិវឌ្ឍនៅមូលដ្ឋាន។

ក្នុងនាមប្រធានក្រុមការងារ លោកជា សុផារ៉ា ក៏បានក្រើនរំលឹកដល់លោកមេភូមិ មេឃុំ អភិបាលក្រុងស្រុក ត្រូវសហការជាមួយកងកម្លាំងទាំង៣ ឲ្យទៅជាកម្លាំងប្រមូលផ្តុំតែមួយ ពោលគឺរៀបកម្លាំងខាងក្នុងបានល្អ ចេញទៅខាងក្រៅ នឹងជោគជ័យ ដោយយកចិត្តទុកដាក់បំរើសេវា បំពេញតាមបំណងប្រាថ្នា ជូនប្រជាពលរដ្ឋ តាមគោលដៅឲ្យខានតែបាន និងមានប្រសិទ្ធភាពខ្ពស់។

លោកក៏បានជំរុញ ឱ្យថ្នាក់ដឹកនាំគ្រប់លំដាប់ថ្នាក់ បានផ្សារភ្ជាប់ជាមួយ ប្រជាពលរដ្ឋនៅមូលដ្ឋាន សំដៅចូលរួមដោះស្រាយបញ្ហា ប្រឈម សំណូមពរ និងគាំទ្រជំរុញការអនុវត្តកម្មវិធីនយោបាយ និងយុទ្ធសាស្ត្រចតុកោណដំណាក់កាលទី៤ របស់រាជរដ្ឋាភិបាលនីតិ កាលទី៦ នៃរដ្ឋសភា ឱ្យកាន់តែមានប្រសិទ្ធភាព​ផងដែរ​៕SRP

ខេត្តបាត់ដំបង៖លោកសុខ លូ អភិបាលខេត្តបាត់ដំបង បានថ្លែងរំលឹកដល់សិស្សានុសិស្ស អាណាព្យាបាល ចូលរួមពង្រឹងសំអាតនូវបរិស្ថាន អនាម័យជុំវិញគេហដ្ឋាន ក៏ដូចជាបរិស្ថានសាធារណៈក្នុងក្រុង ដោយចេះទុកដាក់កាកសំណល់សំរាម ឲ្យមានរបៀបរៀបរយ បោះសំអាតជាប្រចាំ ដើម្បីឲ្យសោភ័ណភាព ក្នុងក្រុងបាត់ដំបង កាន់តែស្រស់បំព្រង ទាក់ទាញភ្ញៀវទេសចរឲ្យមកទស្សនាខេត្តបាត់ដំបងកាន់តែច្រើនឡើងៗ ពីមួយថ្ងៃទៅមួយថ្ងៃ។ 

លោកក៏បានផ្ដាំផ្ញើ ដល់សិស្សានុសិស្ស អាណាព្យាបាល លោកគ្រូ អ្នកគ្រូទាំងអស់ ដែលមិនទាន់បានទទួលចាក់វ៉ាក់សាំង សូមរួសរាន់ទៅទទួលការចាក់វ៉ាក់សាំងកូវីដ-១៩ ទាំងដូសមូលដ្ឋាន និងដូសជំរុញ នៅតាមមណ្ឌលចាក់វ៉ាក់សាំងដែលរដ្ឋបាលខេត្ត ក្រុង ស្រុក បានរៀបចំ ដើម្បីចូលរួម និងកាត់ផ្ដាច់ការឆ្លងជាសហគមន៍ និងទប់ស្កាត់ការឆ្លងរីករាលដាលជំងឺកូវីដ-១៩បម្លែងថ្មីអូមីក្រុង ដែលកំពុងរីករាលយ៉ាងឆាប់រហ័ស ក្នុងសហគមន៍ និងពិភពលោក។

លោកសុខ លូ មានប្រសាសន៍យ៉ាងដូច្នេះ ក្នុងឱកាស

អញ្ជើញជាអធិបតីភាព ក្នុងពិធីចែកប័ណ្ណសរសើរ និងប្រគល់រង្វាន់លើកទឹកចិត្តជូនដល់សិស្សានុសិស្ស ដែលបានប្រឡងជាប់ សញ្ញាបត្រមធ្យមសិក្សាទុតិយភូមិ ក្នុងឆ្នាំសិក្សា ២០២១-២០២២ នៃសាលាបញ្ញាសាស្រ្ដអន្តរជាតិ ខេត្តបាត់ដំបង នៅថ្ងៃពុធទី២៦ ខែមករា ឆ្នាំ២០២២នេះ។

លោកសុខ លូ អភិបាល បានមានប្រសាសន៍ អបអរសាទរដល់សិស្សានុសិស្សទាំងអស់ ដែលបានប្រឡងជាប់ជាស្ថាពរសញ្ញាបត្រមធ្យមសិក្សាទុតិយភូមិ ដែលជាគឺជាជំហានដំបូងនៃការជោគជ័យក្នុងជីវិតសិក្សា។ 

លោក បានបន្តទៀតថា ភាពជោគជ័យរបស់សិស្សានុសិស្សនាពេលនេះ មិនមែនកើតឡើងដោយឯកឯងឡើយ គឺកើតឡើងដោយការខិតខំរៀនសូត្រកន្លងមក ហើយមួយចំណែកទៀតដែលធ្វើឲ្យសិស្សានុសិស្សទាំងអស់បានទទួលជោគជ័យគឺ មាតាបិតា និងលោកគ្រូ អ្នកគ្រូ ដែលលោកទាំងអស់គ្នាខិតខំខ្លាំងណាស់ ប្រកបមុខរបរផ្សេងៗ ដើម្បីផ្គត់ផ្គង់គ្រួសារ អាចឲ្យកូនៗបានសិក្សារៀនសូត្របាន ហើយលោកគ្រូអ្នកគ្រូ បានខិតខំបង្រៀន និងស្វែងរកវិធីសាស្រ្ដគ្រប់បែបយ៉ាង ដើម្បីឲ្យសិស្សបានយល់ បានដឹងផងដែរ។ 

លោកក៏បានណែនាំដល់សិស្សានុសិស្ស ឲ្យបន្តខិតខំរៀនសូត្របន្ថែមទៀត ទាំងផ្នែកភាសា និងជាពិសេសពេលចូលដល់ឧត្តមសិក្សា ត្រូវជ្រើសរើសជំនាញដែលខ្លួនស្រឡាញ់ពេញចិត្ត ហើយត្រូវយកជំនាញដែលខ្លួនបានរៀននោះ ទៅអនុវត្តក្នុងសង្គមដើម្បីចូលរួមអភិវឌ្ឍន៍ប្រទេសជាតិ ឲ្យកាន់តែរីកចម្រើនជាបន្តបន្ទាប់។

សូមជម្រាបថា ក្នុងចំណោមសិស្សានុសិស្សដែលបានប្រឡងជាប់សញ្ញាបត្រមធ្យមសិក្សាទុតិយភូមិ ឆ្នាំសិក្សា២០២០-២០២១ ទូទាំងខេត្តបាត់ដំបងទាំងអស់ ក្នុងនោះ សិស្សានុសិស្សមកពីសាលាបញ្ញាសាស្រ្ដអន្តរជាតិ បានប្រឡងជាប់ចំនួន៥៩នាក់ ក្នុងនោះ -សិស្សនិទ្ទេសAចំនួន១១នាក់

-សិស្សនិទ្ទេសB ចំនួន១០នាក់ 

-សិស្សនិទ្ទេសCចំនួន៧នាក់

-សិស្សនិទ្ទេសDចំនួន១៥នាក់ 

-សិស្សនិទ្ទេសEចំនួន១៦នាក់៕SRP

ភ្នំពេញ៖នាយករដ្ឋមន្ត្រីហ៊ុន សែន នៅមុននេះបន្តិចតាមរយៈទំព័រហ្វេសប៊ុក បានបង្ហាញទិដ្ឋភាពមួយចំនួន នៃរាជធានីភ្នំពេញ។

នាយករដ្ឋមន្ត្រីបានសរសេរថា៖នេះគឺទិដ្ឋភាពមួយចំនួននៃរាជធានីភ្នំពេញ ដែលជាបេះដូងរបស់កម្ពុជាយើង ថតពីលើអាកាស នៅក្នុងខែមករា ឆ្នាំ២០២២នេះ ។ បច្ចុប្បន្ននេះ វាពិតជាខុសគ្នាដាច់ស្រឡះពីអតីតកាល ហើយទៅអនាគត ក៏នឹងកាន់តែរីកដុះដាលច្រើន និងល្អៗជាងនេះថែមទៀត។

តាមរយៈទិដ្ឋភាពនេះ បានបង្ហាញអោយឃើញថា ប៉ុន្មានឆ្នាំចុងក្រោយនេះទីក្រុងភ្នំពេញបាន និងកំពុងផ្លាស់ប្តូរមុខមាត់យ៉ាងលឿនតាមរយៈវត្តមានអគារខ្ពស់ៗកប់ពពក ហេដ្ឋារចនាសម្ព័ន្ធ ស្ពាន ស្ពានអាកាស ផ្លូវថ្នល់ កាន់តែច្រើននៅក្នុងទីក្រុង នៃប្រទេសកំពុងមានការអភិវឌ្ឍមួយនេះ។

ការបង្ហាញវត្តមានអគារខ្ពស់ៗ ហេដ្ឋារចនាសម្ព័ន្ធ ស្ពាន ស្ពានអាកាស ផ្លូវថ្នល់ បានកើតឡើងជាបន្តបន្ទាប់ កាន់តែច្រើនទាំងអស់នេះ គឺបានឆ្លុះបញ្ចាំងពីសមិទ្ធផលធំៗរបស់កម្ពុជាដែលសម្រេចបាន និងមិនធ្លាប់មានពីមុនមក ក្នុងខណៈពេលដែលកម្ពុជាកំពុងទទួលបានសុខសន្តិភាពពេញលេញទូទាំងប្រទេស ក្រោមការដឹកនាំដ៏ឈ្លាសវៃ របស់ សម្ដេចតេជោ នាយករដ្ឋមន្ត្រី។

ការរីកចម្រើនទាំងអស់នេះ មិនអាចកើតឡើងបានឡើយ បើប្រទេសយើងមិនមានសន្តិភាព។ ដូច្នេះ សន្តិភាព គឺជាតម្លៃដែលមិនអាចកាត់ថ្លៃបានឡើយ ហើយប្រជាពលរដ្ឋគ្រប់រូបត្រូវតែរួមគ្នាថែរក្សាការពារសន្តិភាព ដើម្បីទទួលបានការអភិវឌ្ឍប្រទេសជាតិរបស់យើង៕SRP

ខេត្តកំពង់ចាម៖លោកហ៊ុន​ ម៉ាណែត​ អគ្គមេបញ្ជាការរងនៃកងយោធពលខេមរភូមិន្ទ​ និងជាមេបញ្ជាការកងទ័ពជើងគោក​ តំណាងដ៍ខ្ពង់ខ្ពស់​ សម្តេចតេជោ​ ហ៊ុន​ សែន​ នាយករដ្ឋមន្ត្រី​​​ បានអញ្ជេីញសម្ពោដាក់ឲ្យប្រេីប្រាស់ជាផ្លូវការ​អគាសិក្សា១ខ្នង​ ២ជាន់១២បន្ទប់​ អគារទីចាត់ការ១ខ្នង​ និងសមិទ្ធិផលនានានៅវិទ្យាល័យ​ ហ៊ុន​ សែន​ ព្រៃទទឹង​ ស្រុកព្រៃឈរ​ ខេត្តកំពង់ចាម​។

ពិធីនេះធ្វើឡើងនៅព្រឹក​ ថ្ងៃទី​២៧​ ខែមករា​ ឆ្នាំ​២០២២​នេះ ដោយមានការចូលរួមពីលោកខ្លូត​ ផន​ប្រធានក្រុម​ប្រឹក្សា​ខេត្ត​ និង​ លោក អ៊ុន​ ចាន់ដា​ អភិបាលខេត្តកំពង់ចាម​ ព្រមទាំងមន្ត្រីរាជការកងកម្លាំងប្រដាប់អាវុធសិស្សានុសិស្សយ៉ាងច្រើនកុះករផងដែរ៕SRP

ខេត្តសៀមរាប៖បុរសម្នាក់ត្រូវបាន នគរបាលខេត្តសៀមរាប ធ្វើការឃាត់ខ្លួនពាក់ព័ន្ធករណីលួចម៉ូតូនៅខេត្តកំពត។

ការឃាត់ខ្លួនធ្វើឡើងនៅថ្ងៃទី២៥ ខែមករាឆ្នាំ២០២២ ដោយការិយាល័យព្រហ្មទណ្ឌកម្រិតស្រាល ខេត្តសហការជាមួយកម្លាំងព្រហ្មទណ្ឌនគរបាលស្រុកស្វាយលើ។

ប្រភពបានបន្តថាជនសង្ស័យឈ្មោះ វុន រឿន អាយុ២១ឆ្នាំមានទីលំនៅភូមិទទឹងថ្ងៃ ឃុំឬស្សីលក ស្រុកជីក្រែង ខេត្តសៀមរាប។ ចំណែកជនរងគ្រោះឈ្មោះ យន ធារី ភេទប្រុស អាយុ២២ឆ្នាំ មានទីលំនៅភូមិរលួស សង្កាត់បឹងទូក ក្រុងបូកគោ ខេត្តកំពត។  ជនសង្ស័យបានកាច់សោករម៉ូតូ របស់ជនរងគ្រោះ នៅអគារក្បែរមន្ទីពេទ្យ ស្ថិតនៅភូមិរលួស សង្កាត់បឹងទូក ក្រុងបូកគោ ខេត្តកំពត ហើយបើកគេចមកខេត្តសៀមរាប។ ករណីនេះសមត្ថកិច្ចបាន ដកហូតវត្ថុតាងម៉ូតូ១គ្រឿង ម៉ាក HONDA-DREAM សេរីឆ្នាំ ២០១៦ ពណ៌ខ្មៅ កាំបន្ទះ ស្លាកលេខ កែប 1B-0581 លេខតួលេខម៉ាស៊ីន 9561243។ បុរសរូបនេះបានសារភាពថា ខ្លួនពិតជាបានលួចម៉ូតូរបស់ជនរងគ្រោះពិតប្រាកដមែន។ ក្រោយពីបានសាកសួររួច នគរបាលខេត្តសៀមរាប បានប្រគល់ជនសង្ស័យ និងវត្ថុតាង ឥ្យទៅសមត្ថកិច្ចខេត្តកំពតដេីម្បីអនុវត្តនីតិវិធីបន្ត៕SRP

ខេត្តសៀមរាប៖មនុស្សម្នាក់បានស្លាប់និងម្នាក់ទៀតបានរងរបួស ក្នុងករណីគ្រោះថ្នាក់ចរាចរណ៍។

ហេតុការណ៍បានកើតឡើងនៅថ្ងៃព្រហស្បតិ៍ ថ្ងៃទី ២៧ ខែមករាឆ្នាំ ២០២២ វេលាម៉ោង២៤និង៣០នាទី លើផ្លូវជាតិលេខ៦ ត្រង់ចំណុច ខាងកើត មណ្ឌលសុខភាពព្រៃជ្រូក ចម្ងាយ ២៥០ ម៉ែត្រ ស្ថិតក្នុងភូមិព្រៃជ្រូក ឃុំព្រៃជ្រូក ស្រុកពួក ខេត្តសៀមរាប។

សមត្ថកិច្ចស្រុកពួកបានឲ្យដឹងថា ករណី គ្រោះថ្នាក់ចរាចរណ៍នេះ ទិសដៅស្របគ្នាពីលិចមកកើត រវាងគោយន្តកន្ត្រៃ និងរថយន្តម៉ាក ហ៊ីយាន់ដាយពណ៌ ក្រហមស ពាក់ផ្លាកលេខ ភ្នំពេញ 3B3293 សណ្តោងស៉ីរ៉ឺម៉កម៉កពាក់ផ្លាកលេខព្រះសីហនុ 4A 1105 បើកបរ ដោយជនមិនស្គាល់អត្តសញ្ញាណក្រោយពេលកើតហេតុរត់គេចខ្លួនបាត់ បានបុកគោយន្តកន្ត្រៃ ម៉ាគូបូតា ពណ៌ក្រហមុគ្មានផ្លាកលេខ បើកបរដោយ ឈ្មោះ វ៉ុន វៀង ភេទប្រុសអាយុ២៣ឆ្នាំនៅភូមិធ្វាស ឃុំត្រីញ័រ ស្រុកពួក ខេត្តសៀមរាប មុខរបរកសិករ របួសស្រាល ដឹកមនុស្សម្នាក់ឈ្មោះ មុំ អ៊ុន ភេទប្រុសអាយុ៦១ ឆ្នាំ រស់នៅភូមិធ្វាសឃុំត្រីញ័រ ស្រុកពួក ខេត្តសៀមរា មុខបរបរកសិករ ស្លាប់នៅកន្លែងកើតហេតុ។

ចំណែករថយន្តខូចខាតស្រាលនិងគោយន្តកន្ត្រៃខូចខាតធ្ងន់។ មូលហេតុ អ្នកបើកបររថយន្ត បើកបរ ក្នុងល្បឿនលឿនខ្វះការប្រុងប្រយ័ត្ន៕SRP

ខេត្តប៉ៃលិន៖លោកជំទាវ បាន ស្រីមុំ អភិបាលខេត្តប៉ៃលិន លោក សៅ សារ៉ាត់ អ្នកតំណាងរាស្ត្រមណ្ឌលប៉ៃលិន នៅថ្ងៃទី២៦ ខែមករា ម្សិលមិញបានដឹកនាំមន្រ្តីរាជការមកពីមន្ទីរជុំវិញខេត្ត បានរៀបចំពិធីបួងសួងសុំសេចក្តីសុខ និងឡើងអ្នកតាភ្នំខៀវ។

ទីតាំងអ្នកតាភ្នំខៀវ ស្ថិតនៅមុខផ្លូវចូលខ្លោងទ្វាររមណីយដ្ឋានទឹកធ្លាក់អូរតាវ៉ៅ ហៅភ្នំខៀវ ក្នុងភូមិខ្លុង សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន ដោយមានការប្តូរទីតាំងអ្នកតាភ្នំខៀវ ចុះពីកូនខ្ទមចាស់តូច មកដាក់តាំងឱ្យគង់នៅកន្លែងអាស្រមធំទូលាយសង់ថ្មីចំនួន៣ខ្នង។

លោកជំទាវ បាន ស្រីមុំ បានមានប្រសាសន៍លើកឡើងថា ក្រោយពីស្ថាបនាផ្លូវ ឡើងកាន់ទៅរមណីយដ្ឋានធម្មជាតិ ទឹកធ្លាក់អូរតាវ៉ៅ ហៅភ្នំខៀវ រួចរាល់ទាំងស្រុង ដែលនឹងបើកដំណើរការ ឱ្យភ្ញៀវទេសចរ ឡើងទៅលេងកម្សាន្ត នាឱកាសបុណ្យចូលឆ្នាំប្រពៃណីចិន វៀតណាមឆាប់ៗខាងមុខនេះ។ លោកជំទាវថាក្រុមការងារបានរៀបចំតុបតែង ដាំដើមផ្កាចម្រុះពណ៌ នៅសងខាងផ្លូវ សូនរូបសត្វគ្រប់ប្រភេទ ដើម្បីទាក់ទាក់ទាញភ្ញៀវឱ្យចូលមកលេងក្នុងខេត្តប៉ៃលិន កាន់តែច្រើនកុះករ។

លោកជំទាវ បន្តទៀតថា ដោយសង្កេតឃើញរូបសំណាកអ្នកតាភ្នំខៀវ ស្នាក់នៅក្នុងកូនខ្ទមតូចចាស់ទ្រុតទ្រោម ទើបខាងរដ្ឋបាលខេត្ត បានធ្វើការសាងសង់អាស្រមថ្មីចំនួន៣ខ្នង តូច២ ធំ១ និងរៀបចំពិធីឡើងអ្នកតាភ្នំខៀវនេះតែម្តង។

លោកជំទាវ បញ្ជាក់ទៀតថា ការធ្វើពិធីនេះឡើង ដើម្បីបួងសួងសុំសេចក្តីសុខ ជូនដល់ថ្នាក់ដឹកនាំខេត្ត មន្រ្តីរាជការមកពីមន្ទីរជុំវិញខេត្ត ទទួលបានសុខភាពល្អ កម្លាំងមាំមួន ប្រាជ្ញាឈ្លាសវៃ និងទទួលជោគជ័យ គ្រប់ភារកិច្ចរបស់ខ្លួន។ លើសពីនេះ ក៏សូមបួងសួងឱ្យវិញ្ញាណរបស់អ្នកតាភ្នំខៀវ បានជួយថែរក្សាភ្ញៀវទេសចរជាតិ និងអន្តរជាតិ ដែលធ្វើដំណើរមកលេងរមណីយដ្ឋានធម្មជាតិ ទឹកធ្លាក់អូរតាវ៉ៅ ឱ្យទទួលបានសេចក្តីសុខ ក្សេមក្សាន្តទាំងទៅទាំងមក កុំឱ្យមានគ្រោះថ្នាក់អ្វីកើតឡើងឡើយ។

ចំណែកលោកតាជី ដែលជាអ្នកដឹកនាំធ្វើពិធីឡើងអ្នកតា និងសូត្រធម៌បើកព្រះនេត្រអ្នកតាភ្នំខៀវនេះ ក៏បានសូត្រធម៌ដង្ហោយកោះហៅអស់ទាំងវិញ្ញាណ អារុកអារក្សអ្នកតាព្រៃភ្នំទាំងឡាយ ឱ្យមូលគ្នាចូលមកស្នាក់នៅក្នុងអាស្រមខាងលើ ដើម្បីធ្វើការឃុំគ្រោង ការពារ ថែរក្សា ប្រជាពលរដ្ឋ រស់នៅក្នុងខេត្តប៉ៃលិន ក៏ដូចជាភ្ញៀវទេសចរជាតិ និងអន្តរជាតិ ដែលធ្វើដំណើរ មកពីតាមបណ្តាខេត្ត នានា ចូលមកលេងកម្សាន្ត តាមរមណីយដ្ឋានក្នុងខេត្តប៉ៃលិន ជួបតែសុខសុវត្ថិភាព ទាំងផ្លូវកាយ និងផ្លូវចិត្ត ជៀសផុតពីគ្រោះថ្នាក់ចរាចរណ៍ និងគ្រោះថ្នាក់ទាំងឡាយទាំងពួង ជាពិសេសជំងឺកូវីដ១៩ផងដែរ៕SRPដោយ ស សារឿន

ភ្នំពេញ៖សម្តេចតេជោ ហ៊ុន សែននាយករដ្ឋមន្ត្រីនៃព្រះរាជាណាចក្រកម្ពុជា នៅរសៀល ថ្ងៃទី២៦ ខែមករា ឆ្នាំ ២០២២នេះ បានអញ្ជើញទទួលជួបពិភាក្សាការងារតាមប្រព័ន្ធវីដេអូជាមួយ លោក នាយឧត្តមសេនីយ៍ មីន អោង ឡាង (Min Aung Hlaing) មេដឹកនាំជាន់ខ្ពស់របស់ប្រទេសមីយ៉ាន់ម៉ា ដើម្បីបន្តពិភាក្សារកដំណោះស្រាយលើវិបត្តិនៅមីយ៉ាន់ម៉ា។

តាមរយៈជំនួបនេះ ថ្នាក់ដឹកនាំទាំងពីរបានផ្លាស់ប្ដូរព័ត៌មានគ្នាទៅវិញទៅមក។ សម្ដេចតេជោ ហ៊ុន សែន ក្នុងនាមជាប្រធានអាស៊ានឆ្នាំ២០២២នេះ បានគូសបញ្ជាក់ និងអំពាវនាវ ឯកឧត្តម Min Aung Hlaing នូវ ០៤ចំណុចសំខាន់ៗដូចខាងក្រោម ៖

១)សម្ដេចតេជោនាយករដ្ឋមន្ត្រី បានអំពាវនាវឱ្យ លោក Min Aung Hlaing ខិតខំអនុវត្ត នូវកិច្ចព្រមព្រៀងជាឯកច្ឆន្ទចំនួន០៥ចំណុចនោះ ដែលប្រមុខរដ្ឋាភិបាលអាស៊ាន បានឯកភាពគ្នា កាលពីខែមេសា ឆ្នាំ២០២១ កន្លងទៅ។

២)សម្តេចតេជោស្នើសុំឲ្យ លោក Min Aung Hlaing បង្កលក្ខណៈធ្វើយ៉ាងណា អាចអោយប្រេសិតពិសេសរបស់ប្រធានអាស៊ាន អាចទៅទស្សនកិច្ចនៅមីយ៉ាន់ម៉ា ជាលើកដំបូងនាពេលខាងមុខនេះ ។

៣)អំពាវនាវ សុំអោយភាគីទាំងអស់ រួមទាំងភាគីរដ្ឋាភិបាលមីយ៉ាន់ម៉ា ត្រូវតែបញ្ឈប់អំពើហិង្សា និងឈានឆ្ពោះធ្វើយ៉ាងណាដើម្បីឲ្យមានបទឈប់បាញ់នាពេលខាងមុខនេះ។

សម្ដេចតេជោនាយករដ្ឋមន្ត្រី ក្នុងនាមជាប្រធានអាស៊ានបានសម្ដែងនូវការព្រួយបារម្ភចំពោះអំពើហិង្សា ក្រោយពីដំណើរទស្សនកិច្ចរបស់សម្ដេចទៅប្រទេសមីយ៉ាន់ម៉ាកាលពីថ្ងៃទី៧- ៨ មករា ឆ្នាំ២០២២ កន្លងទៅនេះ។ ដោយសម្ដេចតេជោ ស្នើសុំធ្វើយ៉ាងណាអោយភាគីទាំងអស់ បង្ហាញនូវភាពអត់ធ្មត់ ដើម្បីធ្វើយ៉ាងណាឈានទៅដល់បទឈប់បាញ់នេះ។

៤)សម្តេចតេជោបានអំពាវនាវ និងអញ្ជើញ លោក Min Aung Hlaing ចូលរួមជាមួយបណ្ដាប្រទេសអាស៊ាន ក្នុងការផ្ដល់ជំនួយមនុស្សធម៌ ទៅដល់ប្រជាជនប្រទេសមីយ៉ាម៉ាដែលត្រូវការជំនួយជាចាំបាច់ ដូចអ្វីដែលសម្ដេចតេជោធ្លាប់បានលើកឡើងជាមួយ លោម Min Aung Hlaing កាលពីពេលទៅនេះ៕SRP

ភ្នំពេញ៖សៀវភៅដែលមានចំណងជើងថា «គូព្រេងមិនព្រាត់» ហើយបានបោះពុម្ពជា៣ភាសា ត្រូវបានដាក់លក់ក្នុងមួយច្បាប់តម្លៃ៥ដុល្លារ។

សម្ដេចនាយករដ្ឋមន្ត្រីហ៊ុន សែន នៅថ្ងៃទី ២៦ ខែមករា ឆ្នាំ ២០២២ នេះ បានសរសេរសារនិងបង្ហោះនូវសៀវភៅ ដែលសម្ដេចបានអះអាងថានិពន្ធដោយសម្ដេចផ្ទាល់។

សម្ដេចតេជោ ហ៊ុន សែន បានសរសេរថា៖ កន្លងមកខ្ញុំបានសរសេរសៀវភៅមួយ មានចំណងជើងថា «គូព្រេងមិនព្រាត់» ដែលបានបោះពុម្ពជា៣ភាសាមានខ្មែរអង់គ្លេសនិងចិន។ សម្រាប់ការបោះពុម្ព ជាភាសាចិនគឺរ៉ាប់រងដោយសមាគមសម្ព័ន្ធខ្មែរចិន នៅកម្ពុជាទាំងការបកប្រែទាំងការបោះពុម្ព។

សម្ដេចបានបន្តថា ជាការគួរឱ្យភ្ញាក់ផ្អើលនិងសូមកោតសរសើរដែលសៀវភៅ ភាសាចិន ត្រូវបានដាក់លក់បាន១៥០០ច្បាប់ ក្នុងរយៈពេលដ៏ខ្លីដែលបានចំណូល7,500ដុល្លារដែលក្នុងមួយច្បាប់តម្លៃ5ដុល្លារ។

ក្នុងសំណេររបស់សម្ដេចហ៊ុនសែន ក៏បានសូមអរគុណលោកពុង ខៀវសែនិងសមាគម ដែលបានជួយចាត់ចែងលើការងារនេះ ហើយខ្ញុំនឹងប្រើថវិកានេះសម្រាប់សាងសង់ផ្ទះជូនអតីតយុទ្ធជន៕SRP

ខេត្តសៀមរាប៖ករណីបុរសម្នាក់បានដេកស្លាប់បង្កឲ្យមានការភ្ញាក់ផ្អើល សមត្ថកិច្ច បានអះអាងថា មូលហេតុ ជនរងគ្រោះស្លាប់ជាមនុស្សញៀនគ្រឿងញៀន បានដេកស្លាប់ដោយសារ(គាំងបេះដូង)។

របាយការណ៍របស់សមត្ថកិច្ចដែល សៀមរាប
ប៉ុស្ដិ៍ ទទួលបានបង្ហាញថានៅវេលាម៉ោង១៧ និង ៣០នាទី ទី២៥ ខែមករា ឆ្នាំ ២០២២ នៅចំណុច លើដីទំនេគេទុកចោលស្ថិតនៅភូមិមណ្ឌល៣ សង្កាត់ស្លក្រាម ក្រុងសៀមរាប មានករណីដេកស្លាប់ម្នាក់។

ជនរាងគ្រោះឈ្មោះ ឆេង រស្មីភេទប្រុអាយុ៣០ឆ្នាំមុខរបរ សាក់រូប នៅភូមិត្រពាំសេះសង្កាត់គោកចក ក្រុងសៀមរាប។

របាយការណ៍បន្តថា ការពិនិត្យសាកសព
– ផ្នែកក្បាល ពុំមានស្លាកស្នាមអ្វីទេ។
-ផ្នែកដងខ្លួន ពុំមានស្លាកស្នាមអ្វីគួរអោយគត់សំគាល់នោះទេ។
-ផ្នែក អវយវ: ពុំមានស្លាកស្នាមអ្វីទេ និងមិនពាក់ពន្ធ័ និង បទល្មើសព្រហ្មទណ្ឌនោះដែរ។
.សន្និដ្ឋានតាមការបំភ្លឺគ្រួសារសព តាមការពិនិត្យកន្លែងកើតហេតុ និង ផ្អែកតាមការសន្និដ្ឋានពីលោកគ្រូពេទ្យកោសល្យវិច្ឆ័យខេត្តសៀមរាប បានបញ្ជាក់ថា បានដេកស្លាប់ដោយសារ(គាំងបេះដូង)។ក្រោយពិនិត្យចប់បានប្រគល់សពឲ្យក្រុមគ្រួសារយកទៅធ្វើបុណ្យតាមប្រពៃណី៕SRP