ព័ត៌មានជាតិ

ខេត្តកំពង់ស្ពឺ៖លោក ហ៊ុន ម៉ានី បានផ្ដែផ្ដាំឲ្យប្អូនៗខិតខំប្រឹងប្រែងសិក្សា រៀនសូត្រជាបន្តទៀត ដើម្បីឆ្ពោះទៅដល់គោលដៅនៅពេលអនាគតដែលបានកំណត់របស់ខ្លួនម្នាក់ៗ ក៏ដូចជាសសរទ្រូងសម្រាប់ការអភិវឌ្ឍន៍របស់ប្រទេសជាតិ។

លោក ហ៊ុន ម៉ានី ក៏បានចូលរួមអបអរសាទរដល់ប្អូនៗ សិស្សានុសិស្សទាំងអស់ ដែលបានខិតខំប្រឹងប្រែងរៀនសូត្រ និងទទួលបានលទ្ធផលល្អនៅក្នុងថ្ងៃនេះ។ លោកមានប្រសាសន៍ថា “ភាពជោគជ័យរបស់ប្អូនៗទាំងអស់គ្នាគឺបានមកពីការខិតខំប្រឹងប្រែង ហ៊ានលះបង់ ដោយមិនខ្លាចនឿយហត់ ចូលចងចាំថាភាពជោគជ័យ របស់ប្អូនៗទាំងអស់គ្នានៅក្នុងថ្ងៃនេះគឺជាសក្តានុពលរបស់ប្រទេសក្នុងការអភិវឌ្ឍប្រទេសជាតិ”។

ឆ្លៀតក្នុងឱកាសនេះដែរ លោកក៏បានធ្វើការកោតសរសើរ និងវាយតម្លៃខ្ពស់ចំពោះការខិតខំប្រឹងប្រែងរបស់ក្រសួងអប់រំ យុវជន និងកីឡា ក៏ដូចជាលោកគ្រូ អ្នកគ្រូ ទាំងអស់ដែលបានចូលរួមបង្ហាត់បង្រៀន និងបង្កើតនូវមធ្យោបាយសិក្សាតាមប្រព័ន្ធអនឡាញដែលជាជំនួយដល់ការសិក្សារបស់ប្អូនៗពីចម្ងាយ ក្នុងកាលៈទេសៈដែលប្រទេសជាតិកំពុងជួបការលំបាកនៃការឆ្លងរីករាលដាលនៃជំងឺកូវីដ-១៩ ក្នុងសហគមន៍។

លោកហ៊ុន ម៉ានី ប្រធានគណៈកម្មការអប់រំ យុវជន កីឡា ធម្មការ កិច្ចការ សាសនា និងទេសចរណ៍ និងជាតំណាងរាស្រ្តមណ្ឌលកំពង់ស្ពឺ មានប្រសាសន៍យ៉ាងដូច្នេះ នៅថ្ងៃទី២៩ ខែមករា ឆ្នាំ២០២២នេះ ក្នុងឱកាសអញ្ជើញចូលរួម ក្នុងពិធីសំណេះសំណាល និងអបអរសាទរចំពោះ សិស្សានុសិស្ស ដែលទទួលបាននិទ្ទេស A ចំនួន ៣៣រូប ក្នុងខេត្តកំពង់ស្ពឺ នៅទីតាំងអាគារបណ្ណាល័យខេត្តកំពង់ស្ពឺ។ ក្នុងឱកាសនៃការជួបសំណេះសំណាលនេះដែរ លោកបាននាំយកអំណោយលើកទឹកចិត្តជូនប្អូនៗសិស្សនិទ្ទេស A មានដូចជាកំព្យូទ័រយួរដៃ សៀវភៅ និងដបអាកុល ផងដែរ៕SRP

ខេត្តព្រះវិហារ៖សកម្មភាពបទល្មើសព្រៃឈើនៅក្នុងទឹកដីខេត្តព្រះវិហារ មានការចុកពាក់ព័ន្ធនឹងមន្ត្រីរាជការមួយចំនួនក្នុងខេត្តមួយនេះ។

សូមជម្រាបថា នៅល្ងាចថ្ងៃទី២៨ ខែមករាឆ្នាំ ២០២២ សមត្ថកិច្ច បានចុះបង្ក្រាប ទីតាំងស្តុកឈើអត់ច្បាប់មួយកន្លែង ស្ថិតនៅចំណុចភូមិពោធិ៍ទាប ឃុំម្លូព្រៃមួយ ស្រុកឆែបខេត្តព្រះវិហារ។

ការបង្រាបនេះធ្វើគើងក្រោមការដឹកនាំផ្ទាល់ពី លោកវុធ សាវី ព្រះរាជអាជ្ញារងនិងជាអ្នកនាំពាក្យសាលាដំបូងខេត្តព្រះវិហារ បន្ទាប់ពីបានសើបអង្កេតអស់រយ:ពេលពីរថ្ងៃ។

ប្រភពពីសមត្ថកិច្ចខេត្តព្រះវិហារបានឲ្យដឹងថាទីតាំងស្តុកឈើ ជាច្រើនម៉ែត្រគូប ជាឈើប្រភេទលេខ២ រៀបបំរុងលើកឡើងឡានខ្នាតធំដើម្បីដឹកយកទៅចែកចាយតាមខេត្ត។

លោក វុធ សារី ព្រះរាជអាជ្ញារងបានថ្លែងថាឈើទាំងនេះ មានការជាប់ពាក់ព័ន្ធនឹងមន្រ្តីរាជការ នៅក្នុងខេត្តព្រះវិហារ មួយចំនួន ព្រោះមេឈ្មួញទាំងនោះ បានព្យាយាម ខលមកជាច្រើនដង ប៉ុន្តែរូបលោកមិនទទួលលើកលេខនោះទេ។ លោកថា ជនពាក់ព័ន្ធទាំងនោះ លោកសុំមិនបញ្ចេញឈ្មោះ ដោយរូបលោកនឹងបន្តការសើបអង្កេតបន្តទៀត ដើម្បីរកភស្តុតាង នឹងធ្វើរបាយការណ៍ បញ្ជូនទៅថ្នាក់លើ ដើម្បីចាត់ការតាមនីតិវិធីច្បាប់។

បញ្ជាក់វត្ថុតាងឈើដែលសមត្ថកិច្ច ធ្វើការរឹបអូស បានយកទៅរក្សាទុកនៅស្នាក់ការបរិស្ថានដំរីបូត ធ្វើការវាស់វែងនឹងចាត់ការតាមនិតិវិធីច្បាប់ស្ដីពីព្រៃឈើ។ ទោះជាយ៉ាងណាតំណាងព្រះរាជអាជ្ញាអមសាលាដំបូងខេត្តព្រះវិហារ មិនបានបង្ហាញឈ្មោះជនដែលពាក់ព័ន្ធនឹងបទល្មើសព្រៃឈើឡើយ៕SRP

ខេត្តសៀមរាប៖ពលរដ្ឋស្រុកបន្ទាយស្រីភាគច្រើន ឈប់ចោលសំរាមពាសវាលពាស កាលទៀតហើយ ហើយសំរាមក៏លែងសូវមានទៀតដែរ។

លោក ឃឹម ហ្វីណង់ អភិបាលស្រុកបន្ទាយស្រី បានលើកឡើងថា៖ និយាយតាមត្រង់ អ្នកបន្ទាយស្រី ភាគច្រើនឈប់ចោលសំរាមពាសវាលពាស កាលទៀតហើយ ហើយសំរាមក៏លែងសូវមានទៀតដែរ តែអ្នកភូមិតែងលួចត្អួញត្អែរថា « ពិបាកតែអ្នកចម្ងាយ អ្នកធ្វើដំណើរឆ្លងកាត់ និងអ្នកទេសចរទេ ហើយភាគច្រើនគឺសង្កេតឃើញមាននៅតាមដងផ្លូវសាធារណៈ ទីវាលដីទំនេរ ដែលអាចឈប់ចតឡាន រុឺម៉ក គោយន្ត ហូបចុករួចហើយពង្រាយស្បោងប្លាស្ទិក ដបទឹកសុទ្ធ និងកញ្ចប់ប្រអប់ស្នោទុកចោលនៅទីនោះដោយឥតសណ្តាប់ធ្នាប់»។

លោកឃឹម ហ្វីណង់ បន្តថា៖ ទម្លាប់ល្អមួយរបស់អ្នកស្រុកបន្ទាយស្រី នៅរៀងរាល់មុនពេលបុណ្យទានម្តងៗ ដើម្បីត្រៀមខ្លួនទទួលស្វាគមន៍អ្នកទេសចរ មកទស្សនា ដើរលេងកម្សាន្តនៅក្នុងស្រុក!

លោកថា៖ ខ្ញុំពិតជាចង់សុំការយោគយល់លើរឿងនេះមួយពីសំណាក់ ភ្ញៀវទេសចរ ក្នុងស្រុកទាំងអស់ដែលមកលេង ឬឆ្លងកាត់ស្រុកបន្ទាយស្រី ព្រោះកន្លែងទាំងនេះមិនមែនជាកន្លែងចោលសំរាមនោះទេ បើទោះជាគ្មានម្ចាស់នៅនឹងកន្លែងក៏ដោយ។ គួរអាណិតដល់គ្នាអ្នករើស និងផ្តល់ការគោរព ទៅដល់ទម្លាប់ស្អាតរបស់អ្នកបន្ទាយស្រីផង ជាពិសេសពេលមកលេងបន្ទាយស្រី ក្នុងឱកាសបុណ្យចូលឆ្នាំចិន ខាងមុខនេះ៕SRP

ខេត្តត្បូងឃ្មុំ៖សម្តេចហេង សំរិន បានថ្លែងប្រាប់ដល់ក្រុមការងារ ឲ្យបន្តចុះតាមខ្នងផ្ទះប្រជាពលរដ្ឋ ដើម្បីស្វែងយល់ពីជីវភាពរស់នៅ និងសុខទុក្ខរបស់ប្រជាជន សំដៅដាក់ចេញគោលការណ៍ វិធានការដោះស្រាយ បានជាក់ស្តែង និងសមស្រប។

សម្តេចហេង សំរិន បានស្នើដល់ក្រុមការងារគណបក្សនៅខេត្តត្បូងឃ្មុំទាំងអស់ ត្រូវខិតខំបំផុសចលនាពង្រឹងសមាជិកបក្ស និងអ្នកគាំទ្រគណបក្ស រៀបចំពិធីបញ្ចូលសមាជិកថ្មីៗរបស់គណបក្ស ឱ្យបានសកម្មផុលផុសគ្រប់មូលដ្ឋាន និងត្រួតពិនិត្យ និងពង្រឹងការគ្រប់គ្រងសមាជិកបក្ស តាមក្រុមបក្សនីមួយៗឱ្យបានច្បាស់លាស់ និងត្រូវធ្វើការជួបជុំជាមួយសមាជិកបក្ស និងអ្នកគាំទ្រគណបក្សជាទ្រង់ទ្រាយតូចៗតាមមូលដ្ឋាន ដើម្បីផ្សព្វផ្សាយអំពីស្នាដៃសមិទ្ធផលរបស់គណបក្ស និងរាជរដ្ឋាភិបាល សំដៅលើកកម្ពស់ជំនឿរបស់សមាជិកបក្ស និងអ្នកគាំទ្រគណបក្សមកលើគណបក្សយើង។

សម្តេចពញាចក្រី ហេង សំរិន ប្រធានរដ្ឋសភា និងជាប្រធានកិត្តិយសគណបក្សប្រជាជនកម្ពុជា ប្រធានក្រុមការងារចុះមូលដ្ឋានខេត្តត្បូងឃ្មុំ លើកឡើងដូច្នេះ នៅក្នុងពិធីជួបសំណេះសំណាលជាមួយក្រុមការងារ និងបេក្ខជនក្រុមប្រឹក្សាឃុំ-សង្កាត់ ខេត្តត្បូងឃ្មុំ នៅព្រឹកថ្ងៃទី២៩ ខែមករា ឆ្នាំ២០២២នេះ នាទីស្នាក់ការគណបក្សខេត្តត្បូងឃ្មុំ។

សម្តេចហេង សំរិន ក៏ថ្លែងអំពាវនាវដល់បេក្ខភាពឈរ ឈ្មោះបោះឆ្នោត ក្រុមប្រឹក្សាឃុំសង្កាត់ អាណត្តិទី៥ ទាំងអស់រក្សាឱ្យបាន នូវស្មារតី សាមគ្គីឯកភាពគ្នាខ្ពស់ ក្នុងដំណើរឆ្ពោះ ទៅយុទ្ធនាការឃោសនាបោះឆ្នោត និងការបោះឆ្នោត ដើម្បីធានាថា គណបក្ស ត្រូវតែឈ្នះសម្រាប់ការដឹកនាំឃុំ-សង្កាត់ អាណត្តិទី៥ បន្តទៀត។

នៅក្នុងឱកាសនោះ សម្តេចក៏បានលើកឡើងបន្តថា ដើម្បីរក្សាឱ្យបាននូវប្រៀបឈ្នះ គឺក្រុមការងារទំាងអស់ ត្រូវបន្តខិតខំចិញ្ចឹមចលនានយោបាយនៅមូលដ្ឋាន តាមរយៈការកសាងសមិទ្ធផលនានា ត្រូវចូលរួមដោះស្រាយបញ្ហាប្រឈម តាមសំណើ និងសំណូមពរនានារបស់ប្រជាជន។ ការបោះឆ្នោត ជ្រើសរើសស មាជិកក្រុមប្រឹក្សាឃុំ-សង្កាត់អាណត្តិទី៥ នឹងប្រព្រឹត្តិទៅនៅថ្ងៃទី០៥ ខែមិថុនា ឆ្នាំ២០២២។

សម្តេចបានគូសបញ្ជាក់ថា ដើម្បីទទួលបានជ័យជម្នះជូនគណបក្សនោះ ការងារទាំងអស់ មិនមែនជាកិច្ចការ ដោយឡែករបស់បេក្ខជននោះទេ តែជាការងារដែលត្រូវមានកិច្ចសហការដឹកនាំពីក្រុមការងារគណបក្ស និងគណបក្សគ្រប់ថ្នាក់ ដើម្បីធ្វើការងារទាំងនោះប្រកបដោយប្រសិទ្ធភាព ដោយត្រូវខិតខំអនុវត្តគ្រប់ការងារ ដែលត្រូវធ្វើបន្តតាមការណែនាំរបស់ គណៈអចិន្ត្រៃយ៍ នៃគណៈកម្មាធិការកណ្តាល និងផែនការរបស់គណៈកម្មាធិការគណបក្សខេត្ត ក្រុង ស្រុកបានដាក់ចេញ៕SRP

ខេត្តសៀមរាប៖សិស្សសាលាម្នាក់បានស្លាប់បាត់បង់ជីវិតនិងម្នាក់ទៀតបានរងរបួសធ្ងន់ក្នុងហេតុការណ៍គ្រោះថ្នាក់ចរាចរណ៍។

ហេតុការណ៍បានកើតនៅថ្ងៃ សុក្រ ទី ២៨ ខែ មករា ឆ្នាំ២០២២ វេលាម៉ោង ១២ និង០០នាទី នៅលើផ្លូវក្រាលកៅស៊ូ 2SR2 ស្ថិតនៅក្នុងភូមិសណ្ដាន់ ឃុំពាក់ស្នែង ស្រុកអង្គរធំ ខេត្តសៀមរាប។

អធិការនគរបាលស្រុកអង្គរធំ លោកឆាយ ហាក់ឡុង បានឲ្យដឹងថាគ្រោះថ្នាក់ចរាចរណ៍នេះរវាង គោយន្តកែច្នៃដឹកដី បើកបរក្នុងល្បឿនលឿនដោយខ្វះការប្រុងប្រយ័ត្ន ដែលមានទិសដៅពីជើង ទៅទិសខាងត្បូង បានបុកជាមួយម៉ូតូ ១គ្រឿង ម៉ាកហុងដាទ្រីម ពណ៌ខ្មៅ ផលិតឆ្នាំ២០១៥ ពាក់ស្លាកលេខសៀមរាប 1R 9002 អ្នកបើកបរឈ្មោះ ឡុង ស្រីលិញ ភេទស្រី អាយុ១៦ឆ្នាំ មុខរបរសិស្សរស់នៅភូមិពាក់ស្នែងចាស់ ឃុំពាក់ស្នែង ស្រុកអង្គរធំ ខេត្តសៀមរាប (ស្លាប់)និងអ្នករួមដំណើរម្នាក់ទៀត ឈ្មោះ នន់ ស្រីណែត ភេទ ស្រី អាយុ១៦ឆ្នាំ មុខរបរសិស្ស រស់នៅភូមិពាក់ស្នែងថ្មី ឃុំពាក់ស្នែង ស្រុកអង្គរធំ ខេត្តសៀមរាប របួសធ្ងន់ ក្នុងទិសដៅពីត្បូងទៅជើង។ ក្នុងនោះខូតខាតម៉ូតូ១ គ្រឿងធ្ងន់។

អធិការបន្តថាក្រោយពេលបុករួចអ្នកបើកបរបានបើកគោយន្តរត់គេចខ្លួនបាត់។ បញ្ជាក់ជនរងគ្រោះបានស្លាប់ក្រោយពេលបញ្ជូនទៅសង្គ្រោះនៅមន្ទីរពេទ្យបង្អែកខេត្តសៀមរាប និងម្នាក់ទៀតកំពុងសង្គ្រោះបន្ទាន់នៅគ្លីនិកសុខភាព។ ចំណែកវត្ថុតាងត្រូវបានយកមក រក្សាទុកបណ្តោះអាសន្ននៅប៉ុស្ដិ៍នគរបាលរដ្ឋបាលពាក់ស្នែង ។

កម្លាំងជំនាញអធិការដ្ឋានសហការជាមួយនិង កម្លាំងប៉ុស្តិ៍នគរបាលរដ្ឋបាលកំពុងស្រាវជ្រាវរកអ្នកបើកបររថយន្តអោយចូលខ្លួនមកដោះស្រាយតាមនីតិវិធីច្បាប់៕SRP

ខេត្តកំពង់ចាមថ្លែងក្នុង​ពិធី​សំណេះសំណាល​ជាមួយ​មន្ត្រី​រាជការ​មន្ទីរ​សុខាភិបាល​នៃ​រដ្ឋបាល​ខេត្តកំពង់ចាម​ នៅព្រឹក​មិញនេះ​ លោក​​ អ៊ុន​ ចាន់ដា​ អភិបាលខេត្តកំពង់ចាម​ បាន​ប្រាប់មន្ត្រី​សុខាភិបាល​ទាំងអស់​ សូម​កុំ​កសាង​កំហុស​ ដោយ​បុគ្គល​ខ្លួនឯង​ ហេីយ​បែរជា​ចោទប្រកាន់​ទៅលេី​រាជរដ្ឋាភិបាល​ ដោយ​កន្លង​មក​ មានអ្នក​ខ្លះ​​យក​ឈ្មោះ​ជា​មន្ត្រី​សុខាភិបាល​ និង​យក​មន្ទីរពេទ្យ​របស់​​រដ្ឋ​ ទៅប្រព្រឹត្ត​អំពើ​ពុករលួយ​ ព្រោះចង់បាន​​លាភសក្ការៈ​ផ្ទាល់ខ្លួន​ នៅ​ពេល​ដែល​មាន​បញ្ហា​តែងតែ​ឆ្លើយ​យករួចខ្លួន​ ហើយ​បែរជា​បន្ទោស​លើ​ រាជរដ្ឋាភិបាល​ និង​ថ្នាក់ដឹកនាំ​ផ្សេងៗ​។

ថ្លែងក្នុង​ឱកាស​នោះដែរ​ អភិបាលខេត្ត​ ក៏បាន​សំណូមពរ​ដល់​មន្ត្រី​សុខាភិបាល ទាំងអស់​ ឲ្យ​ខិតខំ​​កែប្រែ​កំហុស​ ត្រង់ចំណុច​ខ្វះខាត​ ដែល​នៅ​សេសសល់​​ ហើយ​ងាក​មក​បម្រើ​សេវា​ព្យាបាល​ជូនពលរដ្ឋ​ ធ្វើ​យ៉ាងណា​ កុំ​ឲ្យ​មាន​ការ​ថ្នាំងថ្នាក់​ ដេីម្បី​ទទួល​បាន​ការ​គាំទ្រ​ និង​ប្រជាប្រិយភាព​​ ពី​សំណាក់​បងប្អូន​ប្រជាពលរដ្ឋ​​ ដែលទាំង​នេះគឺ​ចាត់ទុក​ថាជា​ការ​ជួយ​ដល់​ខ្លួនឯង​ ហេីយ​ក៏​ប្រៀប​បាន​ទៅ​នឹង​ការ​ជួយ​ដល់​រាជរដ្ឋាភិបាល​ផងដែរ​។

លោក​​ អ៊ុន​ ចាន់ដា​ ក៏បាន​ធ្វើការ​ផ្តាំផ្ញេី​ដល់​​​មន្ត្រី​ជាប់​ក្របខ័ណ្ឌ​ថ្មី​ទាំង២៥៥​នាក់ ​ដែលជា​មន្ត្រី​របស់​រាជរដ្ឋាភិបាល​ ​សូម​ឲ្យ​ធ្វើ​ការងារ​បម្រើ​ប្រជាពលរដ្ឋ​ ឲ្យ​បាន​ល្អ​ តាម​ក្រមសីលធម៌​វិជ្ជាជីវៈ​ជា​គ្រូពេទ្យ​​​ ស្រប​តាម​កម្មវិធី​​គោលនយោបាយ​ របស់​រាជរដ្ឋាភិបាល​ ស្រប​តាម​ផែនការ​ សុខមាលភាព​ និង​ផែនការ​វិជ្ជាសាស្ត្រ​ ដែល​ក្រសួង​សុខាភិបាល​បាន​ដាក់​ចេញ​ ជាពិសេស​មន្ទីរ​សុខាភិបាល​ តែម្ដង​ សំដៅធ្វើ​យ៉ាងណា​ ឲ្យ​ក្លាយ​ទៅ​ជា​ពេទ្យ​គំរូ​ និង​ក្លាយ​ទៅ​ជា​អ្នក​បន្ត​វេន​ក្នុង​វិស័យ​សុខាភិបាល​។

លោក​វេជ្ជបណ្ឌិត​ គីម​ សួរភីរុណ​ ប្រធាន​មន្ទីរ​សុខាភិបាល​នៃ​រដ្ឋបាល​ខេត្តកំពង់ចាម​ បាន​ថ្លែង​ការ​កោតសរសើរ​ ចំពោះ​មន្ត្រី​សុខាភិបាល​ទាំងអស់​ ដែល​កន្លងមក​បាន​​សហការ​គ្នា​យ៉ាង​សស្រាក់សស្រាំ​ ក្នុង​ការ​រួមគ្នា​ប្រយុទ្ធ​ប្រឆាំង​នឹង​ជំងឺ​កូវីដ​-១៩​ ស្របតាម​ប្រសាសន៍​ណែនាំ​របស់​ប្រមុខ​រាជរដ្ឋាភិបាល​ ក៏ដូចក្រសួង​សុខាភិបាល​ ក្នុងនោះ​ក៏មាន​វត្តមាន​របស់​មន្ត្រី​ជាប់​កិច្ច​សន្យា​ ដែល​ទទួល​បាន​ក្របខ័ណ្ឌថ្មី​ទាំង​២៥៥នាក់​ នេះផងដែរ​៕SRP

ខេត្តសៀមរាប៖បុរសម្នាក់ត្រូវបានសមត្ថកិច្ចស្រុកជីក្រែងធ្វើការឃាត់ខ្លួន ករណីឃាតកម្មគិតទុកមុន។

ជនសង្ស័យឈ្មោះ ញ៉ូវ ទីន ភេទប្រុស អាយុ ៣៣ឆ្នាំ មុខរបរ កសិករ ស្រុកកំណើតភូមិខ្វាវ  ឃុំខ្វាវ ស្រុកជីក្រែង ខេត្តសៀមរាប។ ទីលំនៅបច្ចុប្បន្ន ភូមិក្រាំង ឃុំខ្វាវ ស្រុកជីក្រែង ខេត្តសៀមរាប។

ករណីឃាតកម្មនេះបានកើតឡើងនៅថ្ងៃទី២៧ ខែមករា ឆ្នាំ២០២២ វេលាម៉ោង ២១ និង២០នាទី នៅក្នុងកម្មវិធី បង្កក់កូន  របស់ឈ្មោះស៊ាន ខន ភេទប្រុស នៅភូមិក្រាំង ឃុំខ្វាវ ស្រុកជីក្រែង ខេត្តសៀមរាប។

សមត្ថកិច្ចស្រុកជីក្រែងបានឲ្យដឹងថានៅថ្ងៃទី២៧ ខែមករា ឆ្នាំ២០២២ វេលាម៉ោង ១៧:០០ ល្ងាច នៅផ្ទះឈ្មោះ ស៊ាន ខន

ភេទប្រុស  នៅភូមិខាងលើ មានកម្មវិធី ជប់លៀង បង្កក់កូន មានភ្ញៀវចូលរួមច្រើនផឹកស៊ី  រហូតដល់ម៉ោង ៩ និង២០នាទីយប់ ជនសង្ស័យ ស្រវឹងស្រា បានយកកាំបិតខ្វែវ ទៅកាប់ជនរងគ្រោះឈ្មោះ សយ បូរំ ភេទប្រុស អាយុ៤៧ឆ្នាំស្រុកកំណើត និងទីលំនៅសព្វថ្ងៃ ភូមិខ្វាវ ឃុំខ្វាវ ស្រុកជីក្រែង ដែលកំពុងផឹកស៊ីក្នុងកម្មវិធីបង្កក់កូន ដែរនោះ ត្រូវត្រង់ដើមទ្រូងឆ្វេង១ខ្វែវ និងត្រង់ស្មាខាងស្តាំ១ខ្វែវ បណ្តាលឲ្យរងបួសធ្ងន់  ពេលនោះត្រូវបានបងប្អូនដឹកតាមរថយន្តមកពេទ្យ ដល់ពាក់កណ្តាលផ្លូវ ជនរងគ្រោះក៏ដាច់ខ្យល់ស្លាប់តែម្តង។

ជនសង្ស័យ បានសារភាពថា ខ្លួនពិតជាបានកាប់ជនរងគ្រោះ និងខ្វែវពិតមែន  មូលហេតុ  មានកំហឹងនិងជនរងគ្រោះ ដែលបានវាយប្អូន

ខ្លួនកាលពីឆ្នាំទៅ។ ក្រោយកើតហេតុ សមត្ថកិច្ចបានឃាត់ខ្លួនរួមជាមួយវត្ថុតាង កាំបិតខ្វែវ បញ្ជូនទៅសាលាដំបូងខេត្ត ដេីម្បីអនុវត្តតាមផ្លូវច្បាប់៕SRP

ភ្នំពេញ៖នាយករដ្ឋមន្ត្រី ហ៊ុន សែន បានស្នើសុំឲ្យប្រទេសទីម័រខាងកើត ពិនិត្យចាប់ផ្ដើមលើកិច្ចសហប្រតិបត្តិការរវាងប្រទេសទាំងពីរ គឺការចាប់ផ្តើមលើវិស័យសេដ្ឋកិច្ច ក្នុងការចាប់បញ្ជាទិញអង្ករពីកម្ពុជា។ ករណីការបញ្ជាទិញអង្ករពីកម្ពុជានេះ នាយករដ្ឋមន្ត្រីថា អ្នកវិនិយោគរបស់ទីម័រខាងកើត អាចមកវិនិយោគទាំងខាងម៉ាស៊ីនស្រូវ ទាំងខាងឃ្លាំងស្តុកស្រូវ និងទាំងហេដ្ឋារចនាសម្ព័ន្ធ សម្រាប់នាំចេញដើម្បីជាស្ថិរភាព សម្រាប់ការផ្គត់ផ្គង់អង្ករ ទៅកាន់ប្រទេសទីម័រខាងកើត។

នាយករដ្ឋមន្ត្រី ក៏បានស្នើសុំឲ្យប្រទេសទីម័រខាងកើត ពិចារណាលើការផ្ដួចផ្ដើម ឲ្យមានកិច្ចសហប្រតិបត្តិជាពិសេស ពិនិត្យឲ្យមានកិច្ចសន្យានិងកិច្ចព្រមព្រៀង គាំពារវិនិយោគ រវាងប្រទេសទាំងពីរ កិច្ចព្រមព្រៀងពាណិជ្ជកម្មសេរី របស់ប្រទេសទាំងពីរ និងកិច្ចព្រមព្រៀង មិនយកពន្ធត្រួតគ្នារវាងប្រទេសទាំងពីរផងដែរ។

នាយកររដ្ឋមន្ត្រីមានប្រសាសន៍យ៉ាងដូច្នេះក្នុងឱកាស ទទួលជួបពិភាក្សាការងារ ជាមួយលោកជំទាវ Adaljiza Albertina Xavier Reis Magno រដ្ឋមន្ត្រីការបរទេស និងសហប្រតិបត្តិការ នៃសាធារណរដ្ឋប្រជាធិបតេយ្យទីម័រខាងកើត នៅវិមានសន្តិភាព នៅថ្ងៃទី២៨ ខែមករា ឆ្នាំ២០២២នេះ។

ក្នុងជំនួបនោះ លោកជំទាវ បានគោរពស្នើសុំនាយករដ្ឋមន្ត្រី ហ៊ុន សែន បញ្ជូនអ្នកបច្ចេកទេស មកសិក្សាអំពីកម្ពុជាពាក់ព័ន្ធនឹងការចូលខ្លួន ទៅក្នុងអង្គការ WTO, ការចូលខ្លួនទៅក្នុងសមាជិកសហគមន៍អាស៊ាន និងបានគោរពស្នើសុំនាយករដ្ឋមន្ត្រី ក្នុងនាមជាប្រធានអាស៊ានជួយប្រទេសទីម័រឡេស្ត ដើម្បីបានចូលជាសមាជិកអាស៊ាន ហើយក៏បានគោរពស្នើសុំអនុសាសន៍ណែនាំដ៏ខ្ពង់ខ្ពស់ពីនាយករដ្ឋមន្ត្រី ដើម្បីធ្វើការជំរុញកិច្ចសហប្រតិបត្តិការ នៃវិស័យពាណិជ្ជកម្ម សេដ្ឋកិច្ច រវាងប្រទេសទាំងពីរ ឲ្យបានកាន់តែទូលំទូលាយបន្ថែមទៀត។

ចំពោះសំណើរបស់ទីម័រខាងកើត សុំចូលជាសមាជិកអាស៊ាន នាយករដ្ឋមន្ត្រីមានប្រសាសន៍ថា សម្រាប់កម្ពុជាតែងតែគាំទ្រ ការចូលជាសមាជិក របស់ប្រទេសទីម័រខាងកើត។ នាយករដ្ឋមន្ត្រីបន្តទៀថា កម្ពុជានឹងបន្តជំរុញសសរស្ដម្ភសេដ្ឋកិច្ច និងសង្គមវប្បធម៌អាស៊ាន ខិតខំរៀបចំបេសកកម្ម ស្វែងរកការពិតនៅទីម័រខាងកើតអោយបានឆាប់ ដើម្បីជាមូលដ្ឋានក្នុងការវាយតម្លៃ និងរៀបចំផែនទីចង្អុលផ្លូវ ព្រមទាំងពេលវេលាច្បាស់លាស់ សម្រាប់ប្រទេសទីម័រខាងកើ ចូលជាសមាជិកអាស៊ាន។

នាយករដ្ឋមន្ត្រីហ៊ុន ​សែន ក៏បានស្វាគមន៍ក្នុងការបញ្ជូន អ្នកបច្ចេកទេសមកកម្ពុជា ដើម្បីសិក្សាស្វែងយល់អំពីការចូលជាសមាជិកអង្គការ WTO ចូលជាសមាជិកអាស៊ាន ហើយក៏ស្នើសុំឲ្យស្ថាប័នពាក់ព័ន្ធ នៃប្រទេសទាំងពីរជួបពិភាក្សាគ្នា ដើម្បីរិះរកវិធីជំរុញ ឲ្យមានការផ្លាស់ប្តូរផ្នែកសេដ្ឋកិច្ច និងពាណិជ្ជកម្មឡើងវិញ ជាពិសេសជំរុញការអនុវត្ត ឲ្យមានប្រសិទ្ធភាពនូវកិច្ចព្រមព្រៀង និងអនុស្សរណៈ ដែលបានចុះហត្ថលេខារួចហើយ៕SRP

ខេត្តសៀមរាប៖អ្នកដឹកទឹកលក់ម្នាក់ ត្រូវស៊ីទែនទឹកបាក់សង្កត់ពីលើបណ្តាលឱ្យស្លាប់។

ហេតុការណ៍នេះ កើតឡើងនៅម៉ោង០១និង៣០នាទី រសៀលថ្ងៃទី២៧ មករា ២០២២ ស្ថិតនៅចំណុចរោងចែកចាយបណ្តាញប្រព័ន្ធទឹកជូនអាជីវករលក់ដូរពេលរសៀលតាមដងផ្លូវ អង្គរឃ្យុងយូ (ផ្លូវ៦០ម៉ែត្រ) ក្នុងក្រុមទី៩ ភូមិបឹងដូនប៉ា សង្កាត់ស្លក្រាម ក្រុងសៀមរាប។

បើយោងតាមសមត្ថកិច្ចបានឲ្យដឹងថា ជនរងគ្រោះមានឈ្មោះ ណម សុនឿន អាយុ៤២ ឆ្នាំជនជាតិខ្មែរ ជាកម្មករដឹកទឹកលក់ តាមផ្សាររាត្រីអង្គរឃ្យុងយូ មានទីលំនៅភូមិត្នាតពង ឃុំរុនតាឯក ស្រុកបន្ទាយស្រី ខេត្តសៀមរាប។

ប្រភពបានបញ្ជាក់ថា បើតាមការបំភ្លឺពីឈ្មោះ ប្លង់ មុំ ភេទស្រីអាយុ៤៣ឆ្នាំ ជាអ្នកលក់ស៊ុបនៅជិតនិងកន្លែងកើតហេតុបានឱ្យដឹងថា គាត់បានស្គាល់ឈ្មោះ ណម សុនឿន គាត់ជាកម្មករលក់ទឹកឱ្យអាជីវករលក់ដូរតាមដង ផ្លូវ៦០ម៉ែត្រចាប់ តាំងពីនាងលក់ស៊ុបដំបូងម៉្លេះ ហើយគាត់បានដំឡើងស៊ីទែនទឹកធំៗចំនួន២ ស៊ីទែន ដាក់នៅជាប់និងកន្លែងនាងខ្ញំលក់ស៊ុប។ ក្រោយពីកើតហេតុសមត្ថកិច្ចបានចុះត្រួតពិនិត្យនិងប្រគល់សាកសពឲ្យគ្រួសារយកធ្វើបុណ្យតាមប្រពៃណី៕SRP

ខេត្តបាត់ដំបង៖លោកសុខ លូ អភិបាលខេត្តបាត់ដំបង និងជាប្រធានគណៈកម្មាធិការសាខាកាកបាទក្រហមកម្ពុជាខេត្តបាត់ដំបង និងភរិយាបានអញ្ជើញចែកអំណោយមនុស្សធម៌ របស់សាខាកាកបាទក្រហមកម្ពុជា ខេត្តបាត់ដំបង ដល់ប្រជាពលរដ្ឋ ដែលមានជីវភាពខ្វះខាត ចំនួន២៥៤ គ្រួសារ នៅក្នុងស្រុកថ្មគោល ខេត្តបាត់ដំបង។

ពីធីចែកអំណោយមនុស្សធម៌នេះ ធ្វើឡើងនៅព្រឹកថ្ងៃសុក្រ ទី២៨ ខែមករា ឆ្នាំ២០២២ នេះដោយមានការចូលរួម ពីសមាជិកគណៈកម្មាធិការសាខាខេត្ត ប្រធានមន្ទីរ អង្គភាព និងសប្បុរសជន ព្រមទាំង អាជ្ញាធរ សមត្ថកិច្ច ស្រុក ឃុំ ផងដែរ។

អំណោយដែលបានចែកជូនរួមមាន ក្នុងមួយគ្រួសារទទួលបាន៖១.អង្ករ ១ការ៉ុង ២.មី ១ កេស ៣.ត្រីខ ១ យួរ ៤.ទឹកបរិសុទ្ធវីឃែរ១ កេស ៥.ទឹកត្រី ១ យួរ ៦.ទឹកស៊ីអុីវ ១ យួរ
៧.ជេលលាងដៃ ១ដប៕SRP

ភ្នំពេញ៖អាជ្ញាធរនឹងសាងសង់ស្ពានអាកាសថ្មីមួយទៀតនៅតាម បណ្ដោយផ្លូវជាតិលេខ៥ ត្រង់ចំណុចផ្លូវសាលាដែក ជាប់ខាងជើងឃ្លាំងផ្ទុកប្រេង ឥន្ធនៈសូគីមិច នៅសង្កាត់ឫស្សីកែវ ខណ្ឌឫស្សីកែវ។

ប្រធានមន្ទីរសាធារណការ និងដឹកជញ្ជូនរាជធានីភ្នំពេញ លោក សាំ ពិសិដ្ឋ បានឲ្យដឹងថា ស្ពានអាកាសថ្មី ដែលគ្រោង នឹងបើកការដ្ឋានស្ថាបនានៅថ្ងៃទី៣១ ខែមករា ឆ្នាំ២០២២ នេះស្ពានអាកាសនេះមាន បណ្ដោយ៤៨៣ម៉ែត្រ ទទឹង១៥,៨ម៉ែត្រ កម្ពស់ ៥ម៉ែត្រ នៅលើបណ្ដោយផ្លូវជាតិលេខ៥ នៅ ចន្លោះស្ពានបេតុងឆ្លងកាត់ទន្លេសាបថ្មី ដែលបាន និងកំពុងសាងសង់បានជាង ៦៣ភាគរយ ហើយនោះ។

លោក សាំ ពិសិដ្ឋ បន្តថា គម្រោងនៃការសាងសង់ស្ពានអាកាសថ្មី ហោះនៅលើ បណ្ដោយផ្លូវជាតិលេខ៥នេះ គ្រោងនឹងសាងសង់ដោយប្រើរយៈពេល ១៥ខែ ពោលគឺឱ្យ ហើយនៅចុងខែមេសា ឆ្នាំ២០២៣ មុនកម្ពុជាធ្វើជាម្ចាស់ផ្ទះនៃព្រឹត្តិការណ៍ប្រកួតកីឡា SEA GAME ២០២៣ នាពេលខាងមុខ។

សូមជម្រាបថា រដ្ឋបាលរាជធានីភ្នំពេញ មានគម្រោងសាងសង់ស្ពានអាកាសចំនួនពីរ កន្លែង នោះគឺគម្រោងសាងសង់ស្ពានអាកាសផ្លូវ២០០៤ ហោះលើមហាវិថីសហព័ន្ធរុស្សី នឹងគម្រោងសាងសង់ស្ពានអាកាសហោះលើ បណ្តោយផ្លូវជាតិលេខ៥ ត្រង់ចំណុច សាលាដែក ជាប់នឹងឃ្លាំងស្តុកប្រេងឥន្ធនៈសូគីម៉ិច ខណ្ឌឫស្សីកែវ ហើយគម្រោងនៃការ ស្ថាបនាស្ពានអាកាសទាំងពីរនេះ គ្រោងឱ្យរួចរាល់នៅមុនកម្ពុជាធ្វើជាម្ចាស់ ផ្ទះនៃព្រឹត្តិការណ៍ ប្រកួតកីឡា SEA GAME ២០២៣៕SRP