ព័ត៌មានជាតិ

ខេត្តកោះកុង៖បុរសម្នាក់ត្រូវបានសមត្ថកិច្ចក្រុងខេមរភូមិន្ទ ចាប់បានភ្លាមៗដល់ស្រុកមណ្ឌលសីមា ករណីលួចម៉ូតូ។

ជនសង្ស័យឈ្មោះចិន ធារ៉ា អាយុ៣៦ឆ្នាំ មុខរបរកម្មករនេសាទ មានលំនៅភូមិ៣ ឃុំប៉ាក់ខ្លង ស្រុកមណ្ឌលសីមា។

ការចាប់ខ្លួនធ្វើឡើងនៅរសៀលកាលពីថ្ងៃទី៥ ខែកុម្ភ: ឆ្នាំ២០២២ នៅចំណុចដីចំការ ស្ថិតក្នុងភូមិចាំយាម ឃុំប៉ាក់ខ្លង ស្រុកមណ្ឌលសីមា។ 

តាមណ្តឹងពី ឈ្មោះ ស៊ុន គីមសួង ភេទប្រុស អាយុ២៧ឆ្នាំ សញ្ជាតិខ្មែរ មុខរបរជាងម៉ាសុីនត្រជាក់ ទីលំបច្ចុប្បន្នភូមិ៣ សង្កាត់ស្មាច់មានជ័យ ថាជនសង្ស័យបានលួចម៉ូតូរបស់ខ្លួនកាលពីថ្ងៃទី៥ ខែកុម្ភ: ឆ្នាំ២០២២ វេលាម៉ោង៨និង៣០នាទី ព្រឹកថ្ងៃទី៥ ខែកុម្ភ: ឆ្នាំ២០២២។ 

នៅចំពោះមុខសមត្ថកិច្ចជនសង្ស័យបានសារភាពថា៖នៅថ្ងៃទី៤ ខែកុម្ភ: ឆ្នាំ២០២២ វេលាម៉ោងប្រហែល ១៦ បានចេញពីប៉ាក់ខ្លង មកដងទង់ និងបានធ្វើសកម្មភាពលួចម៉ូតូម៉ាកWaveមួយគ្រឿងពណ៌ខ្មៅ នៅក្បែរហាងបុប្ផាលាក់ខ្លួន ស្ថិតក្នុងភូមិ១ សង្កាត់ស្មាច់មានជ័យ។ លុះនៅថ្ងៃទី៥ ខែកុម្ភ: ឆ្នាំ២០២២ វេលាម៉ោងប្រហែល៤រសៀលបានធ្វើសកម្មភាពលួចម៉ូតូម៉ាក Dream ពណ៌ខ្មៅ

នៅចំណុចក្បែរលឹម មហាលាភ ស្ថិតក្នុងភូមិ៣ សង្កាត់ស្មាច់មានជ័យ។

សមត្ថកិច្ចបញ្ជាក់ថាករណីនេះដកហូតវត្ថុតាង៖ម៉ូតូម៉ាកCupពណ៌ទឹកប៊ិច ១គ្រឿង. ម៉ូតូម៉ាកDream ពណ៌ខ្មៅ ១គ្រឿង ម៉ូតូម៉ាកWave ពណ៌ខ្មៅ ១គ្រឿង។ បច្ចុប្បន្នកសាងសុំណុំរឿងបញ្ជូនទៅការិយល័យជំនាញចាត់ការបន្តតាមនីតិវិធី៕SRP

ខេត្តកំពង់ស្ពឺ៖លោកហ៊ុន ម៉ានី បានអបអរសាទរចំពោះសមិទ្ធផលនានាដែលបានកើតឡើងនៅក្នុងវត្តត្រពាំងវែងដោយបានឆ្លុះបញ្ចាំងពីការរីកចម្រើន ក្នុងវិស័យព្រះពុទ្ធសាសនា ដែលក៏ដូចជាវិស័យដទៃៗទៀតដែរ ដែលកំពុងមានការអភិវឌ្ឍ ដោយសារគុណូបក្ការៈនៃសុខសន្តិភាព។

លោកហ៊ុន ម៉ានី បន្តថាសន្តិភាពដែលយើងកំពុងមានសព្វថ្ងៃនេះ គឺកើតចេញពីការលះបង់ និងតស៊ូរបស់ថ្នាក់ដឹកនាំរបស់កម្ពុជា ដែលបានស្វែងរកការបញ្ចប់ជម្លោះផ្ទៃក្នុង និងបានបន្តដឹកនាំប្រទេសឆ្ពោះទៅកាន់ការអភិវឌ្ឍជាបន្តបន្ទាប់។ ជាពិសេស ក្នុងដំណាក់កាលនៃការឆ្លងរាលដាលនៃជំងឺកូវីដ ១៩ គឺបានឆ្លុះបញ្ចាំងយ៉ាងច្បាស់ អំពីសមត្ថភាពដឹកនាំ ដែលបានសម្រេចជោគជ័យ ក្នុងការការពារសុខុមាលភាព និងអាយុជីវិតប្រជាពលរដ្ឋ ដោយមិនឱ្យរងផលប៉ះពាល់ធ្ងនធ្ងរ និងកម្រិតអត្រាស្លាប់នៅទាបបំផុត ដែលឆ្លងតាមការវាយតម្លៃថ្មីៗ ដោយស្ថាប័ន Nikkei កម្ពុជាឈរនៅលំដាប់ថ្នាក់លេខ២ លើពិភពលោកដែលបានសម្រេចជោគជ័យ ក្នុងការប្រយុទ្ធនឹងការរាលដាលនៃជំងឺកូវីដ ១៩។

លោកហ៊ុន ម៉ានី ក៏បានពាំនាំនូវបណ្តាំផ្ញើសាកសួរសុខទុក្ខពីសំណាក់ សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រគេន ព្រះថេរានុថេរ គ្រប់ព្រះអង្គ និងជូនចំពោះលោកតា លោកយាយ ពុកម៉ែ មាមីង បងប្អូន និងប្អូនៗ ក្មួយៗយុវជន ដែលទោះបីសម្តេចទាំងពីរ មិនបានមកជួបសំណេះសំណាល ជាមួយបងប្អូនផ្ទាល់ តែលោកសូមផ្ញើសេចក្តីនឹករឭក និងការផ្តាំផ្ញើសាកសួរទុក្ខ ដល់បងប្អូនផងដែរ។

លោកហ៊ុន ម៉ានី ប្រធានគណៈកម្មការទី៧នៃរដ្ឋសភា និងជាអ្នកតំណាងរាស្រ្តមណ្ឌលខេត្តកំពង់ស្ពឺ មានប្រសាសន៍យ៉ាងដូច្នេះ នៅថ្ងៃអាទិត្យ ទី៦ ខែកុម្ភៈ ឆ្នាំ២០២២នេះ ក្នុងឱកាសអញ្ជើញជាគណៈអធិបតីក្នុងពីធីសម្ពោធឆ្លង អគារធម្មសភា និងសមិទ្ធផលនានាក្នុងវត្តត្រពាំងវែង ស្ថិតក្នុងភូមិត្រពាំងថ្លា ឃុំព្រះនិព្វាន ស្រុកគងពិសី ខេត្តកំពង់ស្ពឺ៕SRP

ខេត្តសៀមរាប៖មន្ត្រីយោធាម្នាក់បានសម្រេចចិត្តធ្វើអត្តឃាត ចងកសម្លាប់ខ្លួន។

ហេតុការណ៍ភ្ញាក់ផ្អើលបានកើតឡើង ថ្ងៃទី៦ ខែ កុម្ភ: ឆ្នាំ២០២២ វេលាម៉ោង​ 0៥ន៨ង៣០នាទី​ព្រឹក នៅចំណុចភូមិតាចក សង្កាត់​ស្រង៉ែ ក្រុង សៀមរាប​ ខេត្តសៀមរាប​។

សមត្ថកិច្ចមូលដ្ឋានបានបព្ជាក់ថាជនរងគ្រោះ
ឈ្មោះ​ ឆន បញ្ញាសក្តិហៅ(ឈឿម សំអូន) ភេទប្រុស អាយុ៣៥ ឆ្នាំ​ មុខរបរយោធាមិនបានចាក់វ៉ាក់សាំងកូវីដ១៩នោះទេ។

សមត្ថកិច្ចបានប្រាប់ថា មូលហេតុជនរងគ្រោះកើតជំងឺសើរស្បែកធ្ងន់ធ្ងរ។ ក្រុមគ្រួសារសព បានស្នើសុំមិនអោយធ្វើកោសល្យវិច្ច័យនិងយកទៅរៀបចំ​ធ្វើ​បុណ្យ​តាម​ប្រពៃណី​៕

ភ្នំពេញ៖ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ សម្តេចក្រឡ្រាហោម ស ខេង បានចំណារឯកភាព លើសំណើ របស់អគ្គាធិការដ្ឋាន នៃក្រសួងមហាផ្ទៃ ឲ្យធ្វើការអង្កេតស្រាវជ្រាវ បណ្ដឹងរបស់ឈ្មោះ ខេង ពិទូពុធធីតា និងឈ្មោះ សឿម ណារិន ដែលបានប្ដឹងលោកឧត្តមសេនីយ៍ទោ តេង ប៊ុនថុន អនុប្រធានលេខាធិការដ្ឋាន នៃគណៈកម្មាធិការប្រយុទ្ធប្រឆាំងផលិតផលក្លែងក្លាយ ពាក់ព័ន្ធអំពើចាប់ប.ង្ខាំង និងជំ.រិតទារប្រាក់។

អគ្គាធិការដ្ឋាន នៃក្រសួងមហាផ្ទៃ បានធ្វើរបាយការណ៍ជូនសម្តេចស ខេង សំណើស្នើសុំគោលការណ៍ អង្កេតស្រាវជ្រាវបណ្ដឹងរបស់ឈ្មោះ ខេង ពិទូពុធធីតា និងឈ្មោះ សឿម ណារិន ប្ដឹងឈ្មោះ តេង ប៊ុនថុន អត្តលេខ ៦២៧៨៤ ឋានន្តរស័ក្តិ ឧត្តមសេនីយ៍ទោ តួនាទី អនុប្រធានលេខាធិការដ្ឋាន នៃគណៈកម្មាធិការប្រយុទ្ធប្រឆាំង ផលិតផលក្លែងក្លាយ ដែលបង្កគ្រោះថ្នាក់មានហានិភ័យខ្ពស់ដល់សុខភាព និងសុវត្ថិភាពសង្គម(គ.ប.ផ.ក) និង បក្ខពួក ករណីចាប់ប.ង្ខាំងរូបនាងខ្ញុំ ខេង ពិទូពុធធីតា ដោយខុសច្បាប់ ជំរិ.តទារប្រាក់ និងផ្ដល់ព័ត៌មានបំភ្លៃដល់បក្ខពួករបស់ខ្លួន ដែលជាអ្នកសារព័ត៌មាន ដើម្បីផ្សព្វផ្សាយបង្ខូចកេរ្ដិ៍ឈ្មោះ និងសុចរិតភាពរបស់ហាងម៉ូដ៏ស្ទ័រ និងម្ចាស់ហាង។

អគ្គាធិការដ្ឋាន នៃក្រសួងមហាផ្ទៃ បានជម្រាបជូនសម្តេចស ខេង ថា ក្រសួងមហាផ្ទៃ បានទទួលពាក្យបណ្ដឹងរបស់ឈ្មោះ ខេង ពិទូពុធធីតា និងឈ្មោះ សឿម ណារិន ចុះថ្ងៃ ទី១០ ខែវិច្ឆិកា ឆ្នាំ២០២១ ដែលបានប្តឹងឈ្មោះ តេង ប៊ុនថុន អត្តលេខ ៦២៧៨៤ ឋានន្តរស័ក្តិ ឧត្តមសេនីយ៍ទោ តួនាទីអនុប្រធានលេខាធិការដ្ឋាន នៃគណៈកម្មាធិការប្រយុទ្ធប្រឆាំងផលិតផលក្លែងក្លាយ ដែលបង្កគ្រោះថ្នាក់មានហានិភ័យខ្ពស់ដល់សុខភាព និងសុវត្ថិភាពសង្គម (គ.ប.ផ.ក) និងបក្ខពួក ថាបាន ចាប់ប.ង្ខាំងរូបនាង (ខេង ពិទូពុធធីតា) ដោយខុសច្បាប់ ជំរិ.តទារប្រាក់ និងផ្តល់ព័ត៌មានបំភ្លៃដល់បក្ខពួក របស់ខ្លួន ដែលជាអ្នកសារព័ត៌មាន ដើម្បីផ្សព្វផ្សាយបង្ហូចកេរ្តិ៍ឈ្មោះ និងសុចរិតភាពរបស់ហាងម៉ូដស្ទ័រ និងម្ចាស់ហាង។

នៅក្នុងពាក្យបណ្តឹងបានបញ្ជាក់ថា ហាងម៉ូដស្ទ័រ បានចុះបញ្ជីកានៅក្រសួងពាណិជ្ជកម្ម និង មានអាជ្ញាប័ណ្ណស្របច្បាប់ ពីស្ថាប័នពាក់ព័ន្ធទាំងអស់ ហើយថែមទាំងបានលក់តែផលិតផលសុទ្ធ ១០០% អស់រយៈពេលជិតប្រាំឆ្នាំមកហើយ ដោយមានឈ្មោះ ខេង ពិទូពុធធីតា និងឈ្មោះ សឿម ណារិន ជាម្ចាស់ហាងម៉ូដស្វ័រ។ ហើយកាលពីថ្ងៃទី០៣ ខែវិច្ឆិកា ឆ្នាំ២០២១ វេលាម៉ោងប្រហែល ០៩និង០០នាទីព្រឹក មានសមត្ថកិច្ចចម្រុះមួយក្រុម ដឹកនាំដោយព្រះរាជអាជ្ញារង លោក ចែ សុង និងលោក តេង ប៊ុនថុន បានចុះមកហាងម៉ូដស្ទ័រ ធ្វើការឆែកឆេរទំនិញនៅក្នុងហាង ដោយអះអាងផ្ទាល់មាត់ថា មានបណ្ដឹងពាក់ព័ន្ធនឹងការលក់ទំនិញជាន់កម្មសិទ្ធិរបស់ក្រុមហ៊ុនអ្នកដទៃ ហើយបានចាប់ប.ង្ខាំងទុកឈ្មោះ ខេង ពិទូពុធធីតា ក្នុងបន្ទប់មួយនៅស្នងការដ្ឋាននគរបាលរាជធានីភ្នំពេញ និងតម្រូវឱ្យឈ្មោះ សឿម ណារិន ជួបចរចាជាមួយលោក តេង ប៊ុនថុន នៅក្នុងភោជនីយដ្ឋាន ឌឺដ្រាម និងផាប់ ដែលមានទីតាំងនៅមុខ ស្នងការដ្ឋាននគរបាលរាជធានីភ្នំពេញ ដោយលោក តេង ប៊ុនថុន បានតម្រូវឱ្យផ្ដល់កញ្ចប់ថវិកាមួយចំនួន។ លោក តេង ប៊ុនថុន យកទៅចែកចាយឱ្យក្រុមការងារចុះឆែកឆេរ និងអាជ្ញាធរមូលដ្ឋាន ហើយគាត់បាន ទាមទារយកបន្ថែមទៀតនូវកាបូបប្រែនសុទ្ធ នាឡិកាដៃមួយគ្រឿង កាបូបដាក់ឯកសារមួយម៉ាកម៉ុងម្ល៉ង់ ជាថ្នូរនឹងការសន្យាកែប្រែកំណត់ហេតុរបស់សមត្ថកិច្ចនគរបោលឡើងវិញ និងព្រមដោះលែង ឈ្មោះ ខេង ពិទូពុធធីតា ឱ្យចេញពីបន្ទប់ឃុំខ្លួនទាំងយប់។

អគ្គាធិការដ្ឋានបានបន្តថា ក្រោយពីបានពិនិត្យខ្លឹមសារនៃពាក្យបណ្តឹងខាងលើឃើញថា ករណីនេះមានការចោទប្រកាន់ មកលើមន្ត្រីនគរបាល បម្រើការងារនៅគណៈកម្មាធិការប្រយុទ្ធប្រឆាំងផលិតផល ក្លែងក្លាយ ដែលបង្កគ្រោះថ្នាក់មានហានិភ័យខ្ពស់ដល់សុខភាព និងសុវត្ថិភាពសង្គម (គ.ប.ផ.ក) ក្រសួងមហាផ្ទៃ ដូច្នេះដើម្បីមានមូលដ្ឋានច្បាស់លាស់ ក្នុងការវាយតម្លៃ រាយការណ៍ជូនថ្នាក់ដឹកនាំក្រសួងមហាផ្ទៃ អគ្គាធិការដ្ឋាន សូមគោរព ស្នើសុំគោលការណ៍អនុញ្ញាតពី សម្តេចស ខេង ចាត់មន្ត្រីនគរបាលជំនាញធ្វើការអង្កេតស្រាវជ្រាវ។

នាយឧត្តមសេនីយ៍ មៀច សុផាន់ណា រដ្ឋលេខាធិការ ក្រសួងមហាផ្ទៃ និងជាប្រធានអង្គភាព គណៈកម្មាធិការប្រយុទ្ធប្រឆាំងផលិតផលក្លែងក្លាយ ដែលបង្កគ្រោះថ្នាក់មានហានិភ័យខ្ពស់ដល់សុខភាព និងសុវត្ថិភាពសង្គម(គ.ប.ផ.ក) មិនអាចសុំការអត្ថាធិប្បាយបានទេ ដោយទូរស័ព្ទចូលមិនមានអ្នកទទួល។ ចំណែកលោកអ៊ីវ លាង អគ្គាធិការ នៃអគ្គាធិការដ្ឋាន ក្រសួងមហាផ្ទៃ កាលពីព្រឹកថ្ងៃទី៥ ខែកុម្ភៈ ឆ្នាំ២០២២ នេះ មិនអាចសុំការអត្ថាធិប្បាយបាននៅឡើតទេ៕SRP

ភ្នំពេញ៖ព្រះករុណា ព្រះបាទ សម្ដេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា បានយាងត្រឡប់ទីក្រុងប៉េកាំងប្រទេសចិន បន្ទាប់ពីព្រះអង្គបានយាងចូលរួមបើកព្រឹត្តិការណ៍កីឡាអូឡាំពិករដូវរងារួចរាល់ កាលពីយប់ថ្ងៃទី០៤ ខែកុម្ភៈ ឆ្នាំ២០២២។

សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នឹងថ្នាក់ដឹកនាំជាច្រើនរូបទៀត នៅល្ងាច ថ្ងៃសៅរ៍ ទី៥ ខែកុម្ភៈ ឆ្នាំ២០២២ នេះ បានអញ្ជើញទទួលព្រះរាជដំណើរព្រះករុណា ព្រះបាទ សម្ដេចព្រះបរមនាថ នរោត្តម សីហមុនី ព្រះមហាក្សត្រ នៅព្រលានយន្តហោះពោចិនតុង។

សូមជម្រាបថា ចិន បានទទួលធ្វើជាម្ចាស់ផ្ទះក្នុងការរៀបចំកីឡាអូឡាំពិករដូវរងាឆ្នាំ២០២២ ចាប់ពីថ្ងៃទី០៤ ដល់ថ្ងៃទី២០ ខែកុម្ភៈ ឆ្នាំ២០២២ ដោយមានអត្តពលិកចូលរួមប្រកួតជិត ៣,០០០នាក់ មកពី ៩១ប្រទេស ដោយប្រកួតប្រជែងលើ វិញ្ញាសា ចំនួន១៥ និងមានកម្មវិធីប្រកួតចំនួន១០៩កម្មវិធី លើប្រភេទកីឡាចំនួន ៧ប្រភេទ។ ពិធីបើកព្រឹត្តិការណ៍នេះ ធ្វើឡើង ក្រោមអធិបតីភាពប្រធានាធិបតីចិន Xi Jinping និងមានការចូលរួមពីសំណាក់មេដឹកនាំលើពិភពលោកជាង ២០រូបទៀត។

សូមព្រះអង្គទ្រង់ប្រកបដោយព្រះពលានុភាពខ្លាំងក្លា ព្រះបញ្ញាញាណវាងវៃ ព្រះរាជសុខភាពល្អបរិបូណ៌ ព្រះជន្មាយុយឺនយូរជាងរយព្រះវស្សា ដើម្បីគង់ប្រថាប់ជាម្លប់ដ៏ត្រជាក់ត្រជុំ ដល់ប្រជានុរាស្ត្រគ្រប់រូប រស់នៅក្នុងសុខសន្តិភាព តរៀងទៅ៕SRP

ខេត្តសៀមរាប៖ស្ត្រីចំនួនពីរ នាក់បានស្លាប់ភ្លាមៗនិង៣នាក់ទៀតបានរងរបួសក្នុងហេតុការណ៍គ្រោះថ្នាក់ចរាចរណ៍។

អធិការដ្ឋាននគរបាលស្រុកជីក្រែង លោក តាំង លីហេង បានឲ្យដឹងថា នៅថ្ងៃទី០៥ ខែកុម្ភៈ ឆ្នាំ២០២២ វេលាម៉ោង ១៥និង ៤០ នាទី ត្រង់ចំណុចមុខតូបលក់ដូរឈ្មោះ ចិន រុំា ស្ថិតនៅក្នុងភូមិដំរីឆ្លង ឃុំសង្វើយ ស្រុកជីក្រែង ខេត្តសៀមរាប ចន្លោះបង្គោលគីឡូម៉ែត្រ ២៦៥ និង ២៦៦លើផ្លូវជាតិលេខ៦ រវាងរថយន្ត និង ម៉ូតូឈប់ក្បែរជាយផ្លូវខាងត្បូងក្បាលទៅកើត ។

លោកបន្តថា រថយន្តម៉ាក NISSAN NAVARA ផលិតឆ្នាំ2014 ពាក់ស្លាកលេខ ភ្នំពេញ 2X -9931 ប្រភេទដឹកទំនិញធុនតូច ពណ៌ ប្រផេះ អ្នកបើកបរ ភេទប្រុស មិនស្គាល់អត្តសញ្ញាណ ដឹកមនុស្សម្នាក់ភេទប្រុស មិនស្គាល់អត្តសញ្ញាណ របួសធ្ងន់ សន្លប់ទាំងពីរ សង្រ្គោះបន្ទាន់ មានទិសដៅពីកើត ទៅទិសខាងលិច ដោយបានបុកម៉ូតូម៉ាក HONDA C125 ផលិតឆ្នាំ2016 ពាក់ស្លាកលេខ សៀមរាប1U – 2548 ពណ៌ខ្មៅ អ្នកបើកបរឈ្មោះ ឃិន មុំ
ភេទស្រី អាយុ៣០ឆ្នាំ រស់នៅភូមិពាក់ស្ពា ឃុំសង្វើយ ស្រុកជីក្រែង ខេត្តសៀមរាប ដឹកមនុស្សម្នាក់ឈ្មោះ លី ណាត ភេទស្រី អាយុ ៦០ឆ្នាំ ត្រូវជាម្តាយ ឈប់ក្បែរជាយផ្លូវខាងត្បូងក្បាលទៅកើត មនុស្សអង្គុយលើម៉ូតូ បណ្ដាលឲ្យស្លាប់ទាំងពីរនាក់ (មិនពាក់មួកសុវត្តិភាពទាំង២) ហើយហួសទៅបុក ត្រូវដៃឈ្មោះ វឿន សុផាន់ណា ភេទប្រុស អាយុ ១១ឆ្នាំ រស់នៅភូមិដំរីឆ្លង ឃុំសង្វើយ ស្រុកជីក្រែង ខេត្តសៀមរាប អង្គុយលើម៉តូម៉ាក SMASH ពាក់ស្លាកលេខភ្នំពេញ 1CG-1191ឈប់ក្បែរជាយផ្លូវខាងត្បូងក្បាលទៅកើត។

លោកបានបន្តថា ចំណែកអ្នករបួសរបួសធ្ងន់ ០៣នាក់៖១,ឈ្មោះវឿន សុផាន់ណា ភេទ ប្រុស អ្នកបើកបរម៉ូតូ smash(មិនពាក់មួកសុវត្ថិភាព) ២, អ្នកបើកបររថយន្តមិនស្គាល់អត្តសញ្ញាណ៣, អ្នករួមដំណើររថយន្តមិនស្គាល់អត្តសញ្ញាណ។ខូចខាតរថយន្តធ្ងន់១គ្រឿងម៉ូតូធ្ងន់១គ្រឿង។

អធិការបានបញ្ជាក់ថា មូលហេតុអ្នកបើកបររថយន្តមិនប្រកាន់ស្តាំ និងម៉ូតូ២គ្រឿងឈប់ក្បែរជាយផ្លូវ។ សាកសពបានប្រគល់ឲ្យក្រុមគ្រួសារធ្វើបុណ្យតាមប្រពៃណី។ វត្ថុតាងរក្សាទុកបណ្តោះអាសន្ននៅអធិការដ្ឋាននគរបាលស្រុកជីក្រែង ដើម្បីអនុវត្តតាមនិតិវិធី៕SRP

ខេត្តសៀមរាប៖ឪពុកបានស្លាប់ឯកូនរងរបួសធ្ងន់ខណ:បើកម៉ូតូឆ្លងផ្លូវត្រូវបានរថយន្តបុកចំពេញទំហឹង។

ហេតុការណ៍បានកើតឡើងថ្ងៃសៅរ៍ ទី៥ ខែកុម្ភ: ឆ្នាំ២០២២ នៅម៉ោង៩និង២០នាទី លើផ្លូវជាតិលេខ៦ ស្ថិតក្នុងភូមិប៉ាក់ប៉ាន់ ឃុំសសរស្តម្ភ ស្រុកពួក ខេត្តសៀមរាប។

របាយការណ៍បានឲ្យដឹងថាគ្រោះថ្នាក់ចរាចរណ៍នេះរវាងម៉ូតូនិងរថយន្ត។ រថយន្តម៉ាកហ៊ីយាន់ដាយពណ៌ស ពាក់ផ្លាកលេខភ្នំពេញ 3F7750 បើកបរដោយជនមិនស្គាល់អត្តសញ្ញាណ រត់គេចខ្លួនមានទិស ដៅពីកើតទៅលិច បានបុកម៉ូតូម៉ាកហុងដា ផលិតឆ្នាំ2020 ពាក់ស្លាកលេខសៀមរាប1AI7069 បើកបរ ដោយឈ្មោះ ឈឿយ ឈិត ភេទប្រុសអាយុ២៥ ឆ្នាំ(ពាក់មួកសុវត្ថិភាព)នៅភូមិខ្ជាយ ឃុំ-សសរស្តម្ភ ស្រុកពួក ខេត្តសៀមរាប រងរបួស ដឹកឈ្មោះប៉ាន់ ឈឿយ ភេទប្រុស អាយុ៥៨ឆ្នាំ(អត់មួយសុវត្ថិភាព) ត្រូវជាឪពុក(ស្លាប់)បើកបរទិសដៅពីជើងទៅត្បូងឆ្លងផ្លូវ។ ក្នុងនោះខូចខាតរថយន្ត១គ្រឿង(ស្រាល)និងមូតូគ្រឿង(ធ្ងន់)។

របាយការណ៍បន្តថាមូលហេតុ អ្នកបើកបរម៉ូតូឆ្លងផ្លូវ ខ្វះការប្រុងប្រយ័ត្ន។ ក្រោយពេលកើតហេតុកំលាំងផ្នែកជំនាញសហការណ៍ជាមួយកំលាំងប៉ស្ត៍នគរបាលរដ្ឋបាល បានចុះវាស់វែងនិងបានប្រគល់សាកសព ជូនក្រុមគ្រួសារយកទៅធ្វើបុណ្យតាមប្រពៃណី៕SRP

ខេត្តកំពង់ចាម​៖លោក​ ហ៊ុន​ ណេង​ បានថ្លែងថា​ ដេីម្បី​ឲ្យ​ប្រជាពលរដ្ឋ​​ រស់នៅ​បាន​ប្រកប​ដោយភាព​សុខសាន្ត​ យេីងត្រូវធ្វើ​ឲ្យ​មាន​ស្ថេរភាព​នយោបាយ​ និងសន្តិសុខ​សណ្តាប់​ធ្នាប់​សាធារណៈ​ តាម​រយៈ​ការ​ខិតខំ​អនុវត្តនូវគោលនយោបាយ​​ភូមិ​-ឃុំ​ មាន​សុវត្ថិភាព​​ គឺ​ត្រូវ​ធ្វើ​ឲ្យ​មូលដ្ឋាន​យេីង​ គ្មាន​អំពើ​លូច​ឆក់​ប្លន់​ គ្មាន​អំពើ​ហិង្សា​ក្នុង​គ្រួសារ​​ គ្មាន​ការ​ប្រេីប្រាស់​អាវុធ​ខុសច្បាប់​ គ្មាន​ការ​ជួញដូរ​ឬការ​ប្រេីប្រាស់​គ្រឿងញៀន​ ​និង​គ្មាន​ការ​វាយ​តបកាប់​ចាក់​គ្នា​ក្នុង​ពិធី​រាំរែក​ផ្សេងៗ​ លេីសពី​នោះ​ត្រូវ​ខិតខំ​ការពារ​ កុំ​ឲ្យ​មាន​ល្បែង​ស៊ីសង​ខុសច្បាប់​ កុំ​ឲ្យ​មាន​បញ្ហា​គ្រោះថ្នាក់​ចរាចរណ៍​ កេីនឡេីង​​​ កុំ​ឲ្យ​មាន​ការគាស់កកាយ​យកគ្រឿង​យុទ្ធភ័ណ​មិន​ទាន់​ផ្ទុះ​ មក​កែច្នៃ​ធ្វើជា​វុត្ថុ​ប្រេីប្រាស់​ផ្សេងៗ​ ​កុំ​ឲ្យ​មាន​ការ​ដាក់​ប៉ុស្តិ៍​ជជុះ​ ស្ទាក់​ឡាន​យក​លុយ​កាក់​ពី​ ប្រជាពលរដ្ឋ​​ និង​កុំ​ឲ្យ​មាន​គ្រោះ​មហន្តរាយ​ ជាពិសេស​គ្រោះ​អគ្គីភ័យ​កេីតឡេីង​ផងដែរ​។

លោក ហ៊ុន ណេង អ្នកតំណាងរាស្ត្រមណ្ឌលកំពង់ចាម និងជាប្រធានក្រុមការងាររាជរដ្ឋាភិបាល ចុះមូលដ្ឋានស្រុកស្ទឹងត្រង់​ ក៏ បាន​ជម្រុញ​ដល់​អាជ្ញាធរ​​ទាំងអស់​ ត្រូវ​ខិតខំ​ធ្វេីយ៉ាងណា ឲ្យប្រជាពលរដ្ឋ​ មាន​ជីវភាព​រស់នៅ​កាន់​តែ​ប្រសើរ​ឡើង​ តាម​រយៈ​ការទាក់ទាញ​អ្នក​វិនិយោគទុន​ ព្រមទាំង​ការ​ផ្តល់​សេវា​សាធារណៈ​ ជូន​​ប្រជាពលរដ្ឋ​ ឲ្យ​​ទាន់ពេលវេលា។

ការ​លេីក​ឡើង​បែប​នេះ​ខណៈ​ដែល​លោក បាន​អញ្ជើញ​ជា​អធិបតី​ក្នុង​ពិធី​សម្ពោធ​ដាក់​ឲ្យ​ប្រេីប្រាស់​ជា​ផ្លូវការ​នូវ​ផ្លូវ​បេតុង​អាមេ​មួយ​ខ្សែ​ប្រវែង ២.១៥៨ម៉ែត្រ ស្ថិតនៅ​ក្នុង​ភូមិដីលើ ឃុំពាមកោះស្នា ស្រុកស្ទឹងត្រង់​ នៅថ្ងៃទី​៥​ ខែកុម្ភៈ​ ឆ្នាំ​២០២២​ ដោយមានការ​អញ្ជើញ​ចូលរួម​ពី​​លោក អ៊ុន​ ចាន់ដា​ អភិបាលខេត្តកំពង់ចាម​ និង​ថ្នាក់ដឹកនាំ​ មន្ត្រី​រាជការ​ កងកម្លាំង​ប្រដាប់​អាវុធ​​ ព្រមទាំង​លោកយាយ​ លោកតា​ ​បងប្អូន​ប្រជាពលរដ្ឋ​ ផងដែរ​។

បេីតាមលោក ទុន ស៊ាង មេឃុំពាមកោះស្នា បានឲ្យដឹងថា ដោយតម្រូវការ​ចាំបាច់​របស់ពលរដ្ឋ ជាពិសេស​ស្ថានភាព​បាក់​ស្រុត​ដី​ច្រាំងទន្លេ​ផងនោះ លោក ហ៊ុន ណេង និងលោកស្រី ព្រមទាំង អ្នកឧកញ៉ា ហ៊ុន តូ បានផ្ដល់ជាផ្លូវបេតុងអាមេ ១ខ្សែ ប្រវែង ២.១៥៨ម៉ែត្រ ទទឹង ៤,១២ម៉ែត្រ ស្ថិតនៅ​ក្នុង​ភូមិដីលើ ឃុំពាមកោះ ស្រុកស្ទឹងត្រង់​ ដេីម្បី​សម្រួល​ដល់​ការ​ធ្វើ​ដំណើរ​ ក៏ដូចជា​ការ​ដឹក​ជញ្ជូន​នូវ​កសិផល​ផ្សេងៗ​ ជាពិសេស​ការ​សាងសង់​លំនៅឋាន​ថ្មី​ ចំពោះ​អ្នក​ដែល​មិន​ទាន់​មាន​ផ្ទះ​សំបែង​​ និង​ប្រជាពលរដ្ឋ​​ដែលជំលៀស​មក​ពី​តំបន់​ប្រឈម​ បាក់​ច្រាំង​ទន្លេ​ផងដែរ​៕SRP

ខេត្តសៀមរាប៖អគ្គនាយកនៃអគ្គនាយកដ្ឋានយោធសេវា ក្រសួងការពារជាតិ លោកមាស សាវ៉ន បានលើកឡើងថា ពលិកម្មរបស់បងប្អូនកងទ័ពក្នុងការទប់ស្កាត់ការវិលត្រលប់នៃរបបប្រល័យពូជសាសន៍ និងការឈ្លានពាននានា នាពេលកន្លងមក កសាងបាននូវសមិទ្ធផលដ៏ធំធេង គឺសុខសន្តិភាព។

លោកមាស សាវ៉ន មានប្រសាសន៍បែបនេះនៅក្នុងពិធីប្រកាស ចូលកាន់មុខតំណែងរបស់លោកនូ ប៊ុនរិទ្ធ និងលោក ភាជ សម្បត្តិ ជានាយករងនៃមណ្ឌលអភិវឌ្ឍន៍យោធិនពិការ៣១៧ គូលេន ខេត្តសៀមរាប កាលពីរសៀលថ្ងៃទី០៤ ខែកុម្ភៈ ឆ្នាំ២០២២។

លោកបានបន្តថា ការកសាងសន្តិភាពក្រោមនយោបាយឈ្នះៗ របស់សម្តេចតេជោ ហ៊ុន សែន វាពិតណាស់ថា មានការចូលរួមចំណែកយ៉ាងធំធេង ពីសំណាក់បងប្អូនកងទ័ព រហូតមានបងប្អូនមួយចំនួន បានបាត់បង់ជីវិត និងមួយចំនួនបានធ្លាក់ខ្លួនពិការ ក៏ព្រោះតែការចង់បាននូវសុខសន្តិភាព ជូនជាតិមាតុភូមិ។ លោកបន្តថា ជាមួយនឹងពលិកម្មដ៏ធំធេងនេះ រាជរដ្ឋាភិបាលកម្ពុជា ក៏ដូចជាក្រសួងការពារជាតិ ក៏តែងតែចងចាំជានិច្ចនូវគុណបំណាច់ របស់បងប្អូនកងទ័ព ជាពិសេសបងប្អូនដែលជាយោធិនពិការ និងក្រុមគ្រួសារ។ ក្នុងការដឹងគុណនេះរាជរដ្ឋាភិបាលកម្ពុជា បានបង្កើតជាមណ្ឌលអភិវឌ្ឍន៍យោធិនពិការនេះឡើង និងបានផ្តល់នូវដី និងផ្ទះជាកម្មសិទ្ធិស្របច្បាប់ សម្រាប់បងប្អូនអាចស្នាក់នៅអាស្រ័យផលលើកកម្ពស់ជីវភាពប្រចាំថ្ងៃ។

លោក នូ ប៊ុនរិទ្ធ បានធ្វើការប្តេជ្ញាចិត្តដូចខាងក្រោម ៖
១-ប្តេជ្ញាស្មោះត្រង់ និងការពារដាច់ខាតចំពោះរដ្ឋធម្មនុញ្ញ ជាតិ សាសនា ព្រះមហាក្សត្រ
២-ប្តេជ្ញា ខិតខំបំពេញតួនាទី ភារកិច្ច ដោយគោរពច្បាប់ បទបញ្ជា វិន័យ ក្រមសិលធម៌ ព្រមទាំងឋានានុក្រម និងរបៀបរបបការងារ។
៣-ប្តេជ្ញា ខិតខំយកចិត្តទុកដាក់ ចូលរួមគ្រប់គ្រង ដឹកនាំ និងខិតខំកសាងអង្គភាព ឲ្យមានការរីកចំរើន ស្របតាមអនុសាសន៍ និងគោលការណ៍ដឹកនាំរបស់ ឯកឧត្តម នាយឧត្តមសេនីយ៏ អគ្គនាយកដ្ឋានយោធសេវា ក្រសួង ការពារជាតិ ។
៤-ប្តេជ្ញា ពង្រឹង និងរិតចំណងសាមគ្គីភាព ឯកភាពរឹងមាំថែមទៀត ទាំងផ្ទៃក្នុងអង្គភាព ក៏ដូចជាក្រៅអង្គភាព ។
៥-ប្តេជ្ញា បន្តកិច្ចសហការ និងមានទំនាក់ទំនងល្អជាមួយអាជ្ញាធរដែនដីគ្រប់លំដាប់ថ្នាក់ កងកម្លាំងមានសមត្ថកិច្ច អង្គភាពពាក់ព័ន្ធនានា ជាពិសេស ប្រជាពលរដ្ឋ និង មហាជនទូទៅ ។
៦- ប្តេជ្ញា ខិតខំរៀនសូត លើកកំពស់សមត្ថភាពយល់ដឹង ឲ្យបានទូលំទូលាយ ដើម្បីចូលរួមគ្រប់គ្រង ដឹកនាំបញ្ហា កសាងអង្គភាព ឲ្យទៅជាផែនឯកភាពសាមគ្គីភាពទាំងស្មារតី ឆន្ទៈ និងសកម្មភាពការងារ ប្រកបដោយគុណភាព និង ប្រសិទ្ធភាព ។

សូមជម្រាបថា មណ្ឌលអភិវឌ្ឍន៍យោធិនពិការ សម្តេចតេជោ ៣១៧ គូលេន ខេត្តសៀមរាប បានបង្កើតឡើងកាលពីឆ្នាំ២០០៩ ក្នុងទឹកដីស្រុកប្រាសាទបាគង ខេត្តសៀមរាប ដែលបងប្អូនយោធិនពិការ និងគ្រួសារ មករស់នៅជាង៣០០គ្រួសារ៕SRP

ខេត្តសៀមរាប៖យុវតីជាសិស្សសាលាម្នាក់បានស្លាប់ភ្លាមៗខណៈជិះម៉ូតូធ្លាក់ចូលរថយន្តស៊ីទែន ដឹកកៅស៊ូធ្វើផ្លូវចំក្បាលខ្ទេច។

ហេតុការណ៍បានកើតឡើងវេលាម៉ោង០៦និង៥០នាទី ថ្ងៃទី០៥ ខែកុម្ភ: ឆ្នាំ២០២២ នៅចំណុចភូមិដូនហុង ឃុំដំដែក ស្រុកសូទ្រនិគម ខេត្តសៀមរាប លើកំណាត់ផ្លូវជាតិលេខ៦។

ករណីគ្រោះថ្នាក់ចរាចរណ៍នេះ បង្កដោយម៉ូតូម៉ាកC125 ហុងដាឌ្រីម ពណ៌ខ្មៅ ពាក់ស្លាកលេខសៀមរាប 1V.7876 បើកបរដោយឈ្មោះហឿម តុង ភេទប្រុសអាយុ១៦ឆ្នាំ ទីលំនៅភូមិខ្ចាស់ ឃុំខ្ចាស់ ស្រុកសូទ្រនិគម ខេត្តសៀមរាប (ជាសិស្សសាលា) បើកឌុបឈ្មោះហ៊ុន រត្នសុលីន ភេទស្រីអាយុ១៦ឆ្នាំ ទីលំនៅភូមិខ្ចាស់ ឃុំខ្ចាស់ ស្រុកសូទ្រនិគម ខេត្តសៀមរាប (ជាសិស្សសាលា ស្លាប់) មានទិសដៅពីលិច ទៅកើតហើយធ្លាក់ ចូលរថយន្តសុីទែនដឹកកៅស៊ូធ្វើផ្លូវ ពាក់ស្លាកលេខភ្នំពេញ3F3231មបើកពីកើតទៅលិច។ ចំណែកអ្នកបើកបររថយន្តឈ្មោះសាក់ សម្អាត ភេទប្រុស អាយុ៣៣ឆ្នាំ ទីលំនៅភូមិត្រពាំងសំរោង ឃុំលង្វែក ស្រុកកំពង់ត្រឡាច ខេត្តកំពង់ឆ្នាំង (បច្ចុប្បន្ន ត្រូវនគរបាលឃាត់ខ្លួន)។ ក្រោយកើតហេតុសមត្ថកិច្ចចុះធ្វើការវាស់វែងនិងប្រគល់សាកសពអោយឪពុកម្ដាយយកទៅធ្វីបុណ្យតាមប្រពៃណី។ ចំណែករថយន្ត និងម៉ូតូរក្សាទុកនៅអធិការនគរបាលស្រុក ដើម្បីចាត់ការតាមនីតិវិធី៕SRP

ខេត្តសៀមរាប៖ប្រធានសហគមន៍នេសាទចុង ឃ្នៀស បានសម្រេចប្តឹងថៅកែ រណ្តៅដីពីបទហឹង្សាដោយចេតនានិងបទបទ ប៉ុនប៉ងមនុស្សឃាត ដោយទារសំណងជំងឺចិត្ត២ម៉ឺនដុល្លារ។

ការប្តឹងនេះគឺបន្ទាប់ ពីថៅកែរណ្តៅដីរូបនោះប្រើអំពើហិង្សាដោយវាយដំលើរូបគាត់បណ្តាលអោយរងរបួស កាលពីល្ងាចថ្ងៃទី២ខែកុម្ភ:ឆ្នាំ២០២២ នៅចំណុចកុង ត្រូលផ្លូវចូលបឹងពារាំង ក្នុងខណ:ឡានដឹកដីមិនបាញ់ទឹកបង្កការហុយខ្លាំង ហើយរូបគាត់សុំអាជ្ញាធរបិទផ្លូវបណ្តោះអាសន្ន(បិទកុងត្រូល)។

ប្រធានសហគមន៍នេសាទចុងឃ្នៀស ដែលជាដើមបណ្តឹង មានឈ្មោះហាប់ ដា ភេទប្រុស អាយុជាង៥០ ឆ្នាំ។ ចំណែកជនដៃដល់មានឈ្មោះ សាន្ត រដ្ឋស៊ីង ភេទប្រុស ជាថៅកែគ្រឿងចក្រជីករណ្តៅដីក្នុងបឹងពារាំង។

ជួបសម្ភាសន៍ផ្ទាល់នាព្រឹកថ្ងៃទី៤ខែកុម្ភ:ឆ្នាំ២០២២ នេះ លោកហាប់ ដា ប្រធានសហគមន៍នេសាទចុងឃ្នៀស បាននិយាយថា រូបលោកជាប្រធានសហគមន៍ ដែលទទួលស្គាល់ដោយអាជ្ញាធរក្រុង.ខេត្ត និងក្រសួងក្នុងការការពារព្រៃលិចទឹកក្នុងតំបន់។ ចំពោះការជីកដឹកជញ្ជូនដី ពីការជីកស្តារក្នុងបឹងពារាំងទៅកាន់បំបន់ផ្សេងមិនពាក់ពន្ធ័រូបលោកឡើយ។ ប៉ុន្តែក្នុងនាមសហគមន៍ អាជ្ញាធរបានផ្តល់សិទ្ធិអោយមើលខុសត្រូវផ្លូវ ក៏ដូចជាការប៉ះពាល់ដល់សុខមាលភាពការរស់នៅរបស់ប្រជាពលរដ្ឋ។ មុនកើតហេតុ៣ថ្ងៃក្រុមហ៊ុន សាន្ត រដ្ឋស៊ីង បានដឹកជញ្ជូនដីដោយមិនមានការបាញ់ទឹក លើផ្លូវបង្កការហុយខ្លាំង បើទោះបីខាងលោក តម្រូវអោយមានការបាញ់ទឹកជាមុនក៏មិនព្រម។ នៅថ្ងៃកើតហេតុ ការដឹកជញ្ជូនដីកាន់ តែបង្កការហុយខ្លាំងទើបខាងលោកសុំអោយមានការបាញ់ទឹក បើមិនដូច្នេះនឹងបញ្ឍប់សកម្មភាពដឹក។

លោកបន្តថា ដោយក្រុមហ៊ុនខាងលើនៅតែបំពានមិនព្រមបាញ់ទឹក តាមស្មារតីអង្គប្រជុំនៅសង្កាត់ជ្រាវ ស្តីពីការបាញ់ស្រោចទឹកជាប្រចាំលើដងផ្លូវ រូបលោកក៏សុំការអនុញាត្តពីអាជ្ញាធរ បិទកុងត្រូលដើម្បីដោះស្រាយ។ ប៉ុន្តែក្នុងពេលកំពុងរកដំណោះស្រាយ ឈ្មោះសាន្ត រដ្ឋស៊ីង​ ជាថៅកែគ្រឿងចក្រនិងរណ្តៅដី បើករថយន្តមកដល់ ក៏វាយមកលើរូបលោកចំនួន២ដៃ បណ្តាលអោយរងរបួស ហើយគំរាមចាក់សម្លាប់ដោយកាំបិតស្រួច និងគម្រាមបើកគ្រឿងចក្រកិនសម្លាប់ថែមទៀត។ ករណីនេះហើយទើបរូបលោកប្តឹងទៅសមត្ថកិច្ចនគរបាល ពីបទហិង្សាដោយចេតនា និងបទប៉ុនប៉ងមនុស្សឃាត ដោយទារសំណង២ម៉ឺនដុល្លារ។

ប្រធានសហគមន៍នេសាទរូបនេះ បានបញ្ជាក់ថា ករណីហិង្សានិងប៉ុនប៉ងមនុស្សឃាត នេះ រូបលោកសុំអោយស្ថាប័នច្បាប់អនុវត្តតាមនិតិវិធី ដោយមិនមានការសម្របសម្រួលឡើយ។

ចំណែកលោកលោក សិន ណារិទ្ធ ក៏បានបញ្ជាក់ផងដែថា ក្រុមគ្រឿងចក្រជីករណ្តៅដី របស់លោក មិនមានរឿងជម្លោះជាមួយក្រុមហ៊ុន សាន្ត រដ្ឋស៊ីង ក៏ដូច ជាសហគមន៍នេសាទចុងឃ្នៀសនោះទេ ហើយរណ្តៅដីរបស់លោកនៅចម្ងាយជាង២គីឡូម៉ែត្រ ពីទីតាំងកើតហេតុ។ ដូច្នេះ នេះជារឿងសហគមន៍ និងក្រុម ហ៊ុន សាន្ត រដ្ឋស៊ីង ប៉ុណ្ណោះ។

ជុំវិញបណ្តឹងចោទប្រកាន់ពីបទហិង្សាដោយចេតនានិងបទប៉ុនប៉ងមនុស្សឃាត ពីប្រធានសហគមន៍ចុងឃ្នៀសនេះ យើងមិនអាចស្វែងរកជួបលោកសាន្ត រដ្ឋស៊ីង ថៅកែក្រុមហ៊ុនជីកដី សាន្ត រដ្ឋស៊ីង ដោយផ្ទាល់ដើម្បីសុំការបំភ្លឺបានទេ។ ចំណែកលេខទូរសព្ទ័សម្រាប់ទំនាក់ទំនង ក៏មេការគ្រប់រណ្តៅដីមិនហ៊ានផ្តល់អោយដែរ៕SRP

ខេត្តកំពង់ចាម​៖លោក អ៊ុន​ ចាន់ដា​ បានសម្ដែងនូវការសោកស្ដាយ និងអំពាវនាវដល់​ប្រជាពលរដ្ឋទាំងអស់ សូមឲ្យមានការប្រុងប្រយ័ត្នខ្ពស់​ ពីគ្រោះអគ្គីភ័យ ដែលអាចកើតមានគ្រប់ពេល ប្រសិនបើ មានការធ្វេសប្រហែស។ ដូចនេះពេលយើងចាកចេញពីផ្ទះត្រូវបិទកុងតាក់ភ្លើងអគ្គិសនី ពន្លត់ភ្លើងចង្ក្រានហ្គាស ពន្លត់ទៀន ធូបជាមុនសិន ដើម្បីបង្ការក្រែងកើតមានមហន្តរាយផ្សេងៗ។ ម៉្យាងទៀតការសង់តូបលក់ដូរឡើងវិញត្រូវតភ្ជាប់ចរន្តអគ្គិសនី ដោយរៀបចំឲ្យបានត្រឹមត្រូវទៅតាមបទដ្ឋានបច្ចេកទេស ដេីម្បី​ធានាសុវត្ថិភាព។

លោក អ៊ុន ចាន់ដា អភិបាលខេត្តកំពង់ចាម និងជាប្រធានគណៈកម្មាធិការសាខាកាកបាទក្រហមខេត្ត មានប្រសាសន៍បែបនេះនៅព្រឹក​មិញនេះក្នុងឱកាសអញ្ជើញនាំយក​អំណោយរបស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ផ្តល់ជូន​បងប្អូន​ប្រជាពលរដ្ឋ ដែលរងគ្រោះដោយ​​អគ្គីភ័យ ១៣គ្រួសារ​ នៅភូមិស្ពឺកើត ឃុំស្ពឺ ស្រុកចំការលើ​។

អំណោយរបស់សម្តេច កិត្តិព្រឹទ្ធបណ្ឌិត ដែលបានផ្តល់ជូនទាំង ១២គ្រួសារ ដោយមាន អង្ករ មី​ ត្រីខ ទឹកត្រី ទឹកស៊ីអ៊ីវ​ ឃីត១កញ្ចប់​ (មុង ភួយ សារុង ក្រម៉ា )​ តង់ និងអាវយឺត។ ដោយឡែក ចំពោះថវិកាផ្តល់ជូនម្ចាស់ផ្ទះដែលខូចខាតទាំងស្រុង និងជាម្ចាស់តូបរងគ្រោះ ១គ្រួសារ ទឹកប្រាក់ចំនួន ២លានរៀល។ ផ្តល់ជូនម្ចាស់តូបរងគ្រោះ ១០គ្រួសារ ក្នុង១គ្រួសារ ៥០​ម៉ឺនរៀល និង២គ្រួសារទៀត ដែលខូចខាត ៤០% ផ្តល់ជូន ១គ្រួសារ ៤០​ម៉ឺនរៀលផងដែរ​។

គួរ​រំលឹក​ថា​ ហេតុការណ៍​នេះបានកើតឡើងកាលពី​វេលាម៉ោង ៩ និង២០នាទីយប់ ថ្ងៃទី៣ ខែកុម្ភ: ឆ្នាំ២០២២ ដោយ​ឆ្លងចរន្តអគ្គិសនី ផ្តើមចេញពីបង្គោលភ្លើងតាមថ្នល់ បណ្តាលឲ្យឆេះរាលដាលដល់តូបលក់ដូរទូរស័ព្ទ គ្រឿងអគ្គិសនី តូបអ៊ុតសក់ជាបន្តបន្ទាប់ ហើយបន្តរាលឆេះផ្ទះក្បឿង ទំហំ ១០ម×១៩ម នៅជាប់នឹងផ្សារស្ពឺផងដែរ​៕SRP