ព័ត៌មានជាតិ

ខេត្តសៀមរាប៖ប្រជាពលរដ្ឋបានលើកឡើងថា អំពើចោរកម្មបានកើតឡើងជាបន្តបន្ទាប់ នៅតាមមូលដ្ឋាននៃស្រុកសូត្រនិគម ជាហេតុធ្វើឲ្យពួកគាត់មានការព្រួយបារម្ភយ៉ាងខ្លាំង។ការដែលអំពើចោរកម្មកើតមាននេះ ចាប់តាំងពីអធិការឡើងថ្មីមក។

ប្រជាពលរដ្ឋបានបន្តថា ជាក់ស្ដែង នៅថ្ងៃទី២៣ ខែមីនា ឆ្នាំ២០២២ មានចោរលួចម៉ូតូហុងដាឌ្រីម ស៊េរីឆ្នាំ២០២០ ពណ៌ខ្មៅពាក់ស្លាកលេខ សៀមរាប 1AH-5556 លេខតួ ND125M-5672875 ខណ:សិស្សទៅរៀនគួរអង់គ្លេសនៅផ្ទះគ្រូនៅផ្សារសំរោង ឃុំសំរោង ស្រុកសូទ្រនិគម ខេត្តសៀមរាប។ ជនរងគ្រោះ ឈ្មោះ ហោន រក្សា ភេទប្រុសអាយុ១៣ ឆ្នាំ មុខរបរ សិស្ស រស់នៅភូមិប្រវ៉ាល ឃុំតាយ៉ែក ស្រុកសូទ្រនិគម ខេត្តសៀមរាប។

តាមការបំភ្លឺរបស់ជនរងគ្រោះ ពេលទៅដល់ ខ្លួនបានទុកម៉ូតូចោលនៅមុខផ្ទះគ្រូដោយពុំបានចាក់សោរសុវត្ថិភាពបន្ថែមឡើយ។ លុះរៀនចប់នៅម៉ោង១៩:០០ ខ្លួនត្រឡប់ទៅវិញក៏រកម៉ូតូមិនឃើញ ភ្លាមៗនោះ ខ្លួនបានប្រាប់គ្រូ រាយការណ៍ជូនសមត្ថកិច្ច និងឪពុកបានជូនទៅដាក់ពាក្យបណ្ដឹងតែម្ដង។ ករណីនេះសមត្ថកិច្ច បានកំពុងស្រាវជ្រាវ កំណត់មុខសញ្ញាតាមចាប់ជនសង្ស័យ។

ថ្លែងនៅរសៀលថ្ងៃពុធ ម្សិលមិញ ក្នុងពិធីសម្ពោធ សមិទ្ធិផលនានា នៅស្រុកបាណន់ សម្ដេចស ខេង បានរម្លឹកដល់ប្រជាពលរដ្ឋ ឲ្យបន្តចូលរួម និងគាំទ្រការអនុវត្តគោលនយោបាយ ភូមិ ឃុំ សង្កាត់ មានសុវត្ថិភាព ដែលជាគោលនយោបាយផ្សារភ្ជាប់ទៅនឹងជីវភាព រស់នៅរបស់ប្រជាពលរដ្ឋ។

សម្ដេច ស ខេង បន្តថាទន្ទឹមគ្នានេះថ្នាក់ដឹកនាំភូមិ ឃុំ សង្កាត់ និងសមត្ថកិច្ចពាក់ព័ន្ធ ក៏ត្រូវយកចិត្តទុកដាក់ អនុវត្តគោលនយោបាយ ទាំង៧ចំណុចនេះ ឱ្យបានលទ្ធផលល្អដែរ ដើម្បីពង្រឹងការផ្ដល់សេវាសាធារណៈ រក្សាសន្តិសុខ សណ្ដាប់ធ្នាប់សាធារណៈ និងបង្កើតសុខដុមនីយកម្មក្នុងសង្គមផងដែរ។

ទោះជាយ៉ាងណា ប្រជាពលរដ្ឋមានការលើកឡើងបន្តថា ចាប់តាំងពីលោក ឃីម ផល្លា ឡើងតំណែងជាអធិការស្រុកសូត្រនិគម មក ភូមិសាស្ត្រនៃស្រុកសូទ្រនិគម តែងតែមានល្បែងស៊ីសង មានអំពើចោរកម្ម គ្រឿងញៀន ឃាតកម្មជាបន្តបន្ទាប់ដែលជាករណីនេះធ្វើឲ្យពួកគាត់រស់នៅមូលដ្ឋានមានការព្រួយបារម្ភពីសន្តិសុខសុវត្ថិភាព៕SRP

ខេត្តបាត់ដំបង៖ថ្លែងនៅរសៀលថ្ងៃពុធ ម្សិលមិញ ក្នុងពិធីសម្ពោធសមិទ្ធិផលនានា នៅស្រុកបាណន់ សម្ដេចស ខេង បានអំពាវនាវឱ្យរួមគ្នាថែរក្សាការពារសុខសន្តិភាព និងស្ថិរភាពជាតិ ដើម្បីគាំទ្រដល់ការអភិវឌ្ឍ គ្រប់វិស័យ និងបានរម្លឹកដល់ប្រជាពលរដ្ឋ ឲ្យបន្តចូលរួម និងគាំទ្រការអនុវត្តគោលនយោបាយ ភូមិ ឃុំ សង្កាត់ មានសុវត្ថិភាព ដែលជាគោលនយោបាយផ្សារភ្ជាប់ទៅនឹងជីវភាព រស់នៅរបស់ប្រជាពលរដ្ឋ។

សម្ដេច ស ខេង បន្តថាទន្ទឹមគ្នានេះថ្នាក់ដឹកនាំភូមិ ឃុំ សង្កាត់ និងសមត្ថកិច្ចពាក់ព័ន្ធ ក៏ត្រូវយកចិត្តទុកដាក់ អនុវត្តគោលនយោបាយ ទាំង៧ចំណុចនេះ ឱ្យបានលទ្ធផលល្អដែរ ដើម្បីពង្រឹងការផ្ដល់សេវាសាធារណៈ រក្សាសន្តិសុខ សណ្ដាប់ធ្នាប់សាធារណៈ និងបង្កើតសុខដុមនីយកម្មក្នុងសង្គមផងដែរ។

សម្ដេច ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ក៏បានរម្លឹកអំពីស្ថានភាពស្រុកបាណន់ពីអតីតកាល ក៏មិនខុសពីបណ្ដាមូលដ្ឋានផ្សេងទៀតទូទាំងប្រទេសដែរ គឺការរស់នៅរបស់ប្រជាពលរដ្ឋ និងការបំពេញការងាររបស់មន្រ្តីរាជការ និងអាជ្ញាធរជួបការលំបាកដោយសារតែការខ្វះខាតដូចជា សាលារៀន វត្តអារាម អគាររដ្ឋបាល ហេដ្ឋារចនាសម្ព័ន្ធធារាសាស្រ្ត ផ្លូវថ្នល់ និងស្ពានជាដើម ប៉ុន្តែដោយសារកិច្ចខិតខំប្រឹងប្រែង របស់រាជរដ្ឋាភិបាល និងមានគាំទ្រពីសប្បុរសជន ស្រុកបាណន់ បានទទួលសមិទ្ធផលជាច្រើន និងថាសមិទ្ធផលទាំងនេះ មិនទាមទារការតបស្នងអ្វី ក្រៅតែពីស្នើសុំ ឱ្យខិតខំថែរក្សាដើម្បីបម្រើឧត្តមប្រយោជន៍ សាធារណៈនោះឡើយ។

សម្ដេច ក៏បានបង្ហាញអារម្មណ៍រីករាយ នៅពេលបានឃើញសិស្សានុសិស្ស មានឱកាសបានសិក្សារៀនសូត្រតាំងពីតូចៗទៅ ពិសេសចាប់ពីថ្នាក់មត្តេយ្យ សិក្សាដែលខុស ពីសម្ដេចផ្ទាល់ទម្រាំមានឱកាសបានចូលរៀនសូត្រ សម្ដេចមានអាយុ ១១ឆ្នាំទៅហើយ។ នៅពេលមានប្រសាសន៍អំពីស្ថានភាពប្រទេសជាតិ រីកចំរើនដូចបច្ចុប្បន្ន ធៀបនឹងអតីតកាល ដែលក្រីក្រ និងមានសង្គ្រាមផងនោះ សម្ដេចក៏បានទាញចំណាប់អារម្មណ៍អង្គពិធីថា សន្តិភាពពិតមានគុណតម្លៃណាស់ ហើយថាការបំផុសរបស់សម្ដេចតេជោ នូវពាក្យអរគុណសន្តិភាព នេះពិតជាមានអត្ថន័យជ្រាលជ្រៅ៕SRP

ខេត្តសៀមរាប៖នៅទីបំផុតសមត្ថកិច្ច បានឃាត់ខ្លួន” ឪពុកចុង ដែលប្រើអំពើហិង្សាលើកូនស្រី កាលពីថ្ងៃទី១៨ ខែមីនា ឆ្នាំ២០២២។

ការឃាត់ខ្លួនធ្វើឡើងនៅថ្ងៃទី២៣ ខែមីនា ឆ្នាំ២០២២នេះ នៅសាលានគរបាលជាតិ មិត្តភាពកម្ពុជា-វៀតណាម ខេត្តកំពង់ស្ពឺ ហើយដេីម្បីបញ្ជូនខ្លួនមកស្នងការនគរបាលខេត្តសៀមរាប។

សូមបញ្ជាក់ ករណី“ហិង្សាក្នុងគ្រួសារ “ (ឪពុកចុងវាយកូនដើម) ឈ្មោះ តាន់ សុខហ្គេច ត្រូវ ជាម្តាយក្មេងស្រីរងគ្រោះ ឈ្មោះ អ៊ឹង សុខកណ្ណិការ ត្រូវឪពុកចុងឈ្មោះ លក្ខិណា វីរ:រិទ្ធ ជានគរបាលស្នងការដ្ឋានខេត្តសៀមរាប បានប្រើហិង្សាដោយខាំ កូនចុងឲ្យរងរបួសជាច្រើនកន្លែង កាលពីថ្ងៃទី១៨ ខែមីនា ឆ្នាំ២០២២ ស្ថិតនៅភូមិគ្រួស សង្កាត់ស្វាយដង្គុំ ក្រុងសៀមរាប ខេត្តសៀមរាប។

សូមបញ្ជាក់ថាព្រិន្ទបាលឯក ឈ្មោះលក្ខិណា វីរៈរិទ្ធ ប្រុស 71848 ឋានៈនាយរងផ្នែក គ្រប់គ្រងសហគ្រាស គ្រឹះស្ថាន និងកម្លាំងភ្នាក់ងាររសន្តិសុខឯកជន ការិយាល័យគ្រប់គ្រងសន្តិសុខឯកជន។មានទីលំនៅភូមិចុងកៅស៊ូ សង្កាត់ស្លក្រាម ក្រុងសៀមរាប ខេត្តសៀមរាប៕SRP

ខេត្តកណ្ដាល៖អញ្ជើញសម្ពោធដាក់ឱ្យប្រើប្រាស់ជាផ្លូវការនូវផ្លូវជាតិលេខ២១ ប្រវែងជិត ៦៤គីឡូម៉ែត្រ តភ្ជាប់ពីរង្វង់មូលក្រុងតាខ្មៅ រហូតដល់ច្រកទ្វារអន្តរជាតិកម្ពុជា-វៀតណាម (ជ្រៃធំ-ឡុងប៊ិញ) ក្នុងខេត្តកណ្តាល នៅថ្ងៃពុធ នេះ សម្តេច ហ៊ុន សែន បានមានប្រសាសន៍ថា សម្តេចនៅចងចាំពីស្ថានភាពដ៏លំបាកនៃផ្លូវជាតិលេខ២១ កាលពីអតីតកាល ហើយក្រៅតែកង្វល់ពីស្ថានភាពលំបាកនៃផ្លូវជាតិលេខ២១ហើយនោះ សម្តេចតេជោក៏កង្វល់ពីការបាក់ច្រាំងនៅតាមបណ្តោយនេះផងដែរ។ តែឥឡូវនេះ បានដោះស្រាយក្តីកង្វល់នេះអស់ហើយ តាមរយៈការសាងសង់ថ្មី និងធ្វើអោយប្រសើរឡើងនូវផ្លូវជាតិលេខ២១នេះ។

សម្តេចតេជោនាយករដ្ឋមន្ត្រីបានមានប្រសាសន៍ទៀតថា ផ្លូវជាតិលេខ២១នេះ គ្រោងសម្ពោធតាំងពីអំឡុងខែមីនាឆ្នាំ២០២១មកម្លេះ ក៏ប៉ុន្តែដោយសារការរាតត្បាតជំងឺកូវីដ-១៩ ទើបត្រូវពន្យាររហូតមកដល់ពេលនេះទើបសម្ពោធ។

សម្តេចតេជោ ហ៊ុន សែន បានមានប្រសាសន៍ថា ផ្លូវជាតិលេខ២១ នេះជាផ្លូវដែលបានបម្រើយ៉ាងសំខាន់សម្រាប់ការទំនាក់ទំនង និងការដោះដូរទំនិញរវាងកម្ពុជា និងវៀតណាម។ សម្តេចតេជោនាយករដ្ឋមន្ត្រីបាន ថ្លែងអំណរគុណយ៉ាងជ្រាលជ្រៅដល់រដ្ឋាភិបាល និងប្រជាពលរដ្ឋកូរ៉េ សម្រាប់ការផ្តល់ប្រាក់កម្ចី ក្នុងការសាងសង់ផ្លូវជាតិលេខ២១នេះ។ សមិទ្ធផលដែលកម្ពុជាទទួលបាននាពេលនេះ ជាលទ្ធផលនៃកិច្ចសហប្រតិបត្តិការយ៉ាងជិតស្និទ្ធរវាងកម្ពុជា និងកូរ៉េខាងត្បូង។

សម្តេចតេជោនាយករដ្ឋមន្ត្រី បានមានប្រសាសន៍ថា កូរ៉េខាងត្បូង បានសម្រេចផ្តល់ថវិកាសម្រាប់សាងសង់ស្ពានតភ្ជាប់ពីភ្នំពេញ ទៅតំបន់អរិយក្សត្ររួចហើយ។ សម្តេចតេជោបានបង្ហាញក្តីរំពឹងថា ប្រធានាធិបតីកូរ៉េខាងត្បូងនាពេលបច្ចុប្បន្ន ដែលទើបជាប់ឆ្នោតថ្មី នឹងបន្តគាំទ្រគម្រោងសាងសង់ស្ពានមិត្តភាពកម្ពុជា-កូរ៉េ តភ្ជាប់ពីភ្នំពេញទៅអរិយក្សត្រ។ សម្តេចតេជោបានមានប្រសាសន៍បញ្ជាក់ទៀតថា ស្ពានតភ្ជាប់ពីភ្នំពេញ ទៅកាន់តំបន់អរិយក្សត្រ នេះបានសម្រេចសាងស្ពាន២កន្លែង ដោយទី១យកទីតាំងសាងសង់ចេញពីម្តុំផ្សាររាត្រី ទៅកាន់ជ្រោយចង្វា និងស្ពាន១ទៀតចេញជ្រោយចង្វា ទៅតំបន់អរិយក្សត្រតែម្តង៕SRP

ខេត្តកោះកុង៖លោកខៀវ កាញារីទ្ធ រដ្ឋមន្ត្រីក្រសួងព័ត៌មាន បានថ្លែងថា«មន្ត្រីរាជការកុំយកអ្នកកាសែតធ្វើជាសត្រូវ ពេលមានការសួរនាំពីអ្នកសារព័ត៌មាន ពោលត្រូវរួមសហការគ្នា ក្នុងការផ្តល់ព័ត៌មានជូនគ្នាទៅវិញទៅមក ទើបព័ត៌មានមានភាពជោគជ័យ និងសុក្រឹត្យ»។

ក្នុងសិក្ខាសាលាស្តីពី «ការិយាល័យព័ត៌មានឈ្លាសវៃ និងអភិបាលកិច្ចល្អក្នុងវិស័យព័ត៌មាន» នៅខេត្តកោះកុង លោកខៀវ កាញារីទ្ធ បានថ្លែងបន្តថា ក្រសួងព័ត៌មានបានឯកភាព និងបន្តចូលរួមខំដំណោះស្រាយបញ្ហាប្រឈម និងកង្វះខាតនានា។ មួយវិញទៀតសូមប្រធានមន្ទីរអង្គភាព បង្កើតអ្នកនាំពាក្យសម្រាប់ឆ្លើយតបជាមួយអ្នកសារព័ត៌មាន និងអ្នកនាំពាក្យរដ្ឋបាលខេត្ត ងាយស្រួលក្នុងការទំនាក់ទំនងសាធារណៈ ហើយត្រូវផ្សព្វផ្សាយព័ត៌មានជាប្រចាំ ដើម្បីលុបបំបាត់ព័ត៌មានក្លែងក្លាយ ត្រូវព្យាយាមដាក់ព័ត៌មានពិតជូនដល់សាធារណជន។

លោករដ្ឋមន្ត្រីបន្តថា «អ្នកនាំពាក្យត្រូវឆ្លើយតបឲ្យទាន់ពេលវេលា ក្នុងន័យបន្តផ្សព្វផ្សាយព័ត៌មានឱ្យបានទូលំទូលាយដល់មូលដ្ឋាន និងសាធារណជន»។ លោកបានជូនយោបល់ និងការណែនាំថា «អ្នកសារព័ត៌មាន មុនសរសេរព័ត៌មានឲ្យមានសុក្រឹត្យ យើងត្រូវចុះយកព័ត៌មានឱ្យដល់ទីកន្លែងហ្នឹង រកប្រភពឱ្យបានច្បាស់លាស់ និងធ្វើការទំនាក់ទំនង ជាមួយអាជ្ញាធរដែនដី ដែលជាអ្នកនាំពាក្យក្នុងការផ្ដល់ព័ត៌មានច្បាស់ការ ជូនដល់អ្នកសារព័ត៌មានយើង ដើម្បីសរសេរព័ត៌មានឲ្យមានតម្លាភាពល្អ ច្បាស់ការជាក់លាក់ ចៀសវៀងការសរសេរព័ត៌មាន បំប៉ោងជាលក្ខណៈ ក្លែងក្លាយនាំឲ្យមានបញ្ហាដល់ខ្លួន»។

សូមបញ្ជាក់ថា រដ្ឋបាលខេត្តកោះកុង បានរៀបចំបើកសិក្ខាសាលាស្តីពី «ការិយាល័យព័តមានឈ្លាសវៃ និងអភិបាលកិច្ចល្អក្នុងវិស័យព័ត៌មាន» ក្រោមវត្តមានលោក ផៃ ស៊ីផាន រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានអង្គភាពអ្នកនាំពាក្យរាជរដ្ឋាភិបាល និងមានការចូលរួមពីថ្នាក់ដឹកនាំខេត្ត រួមទាំងមន្ត្រីរាជការចំនួន៤ខេត្តផងដែរ៕SRP

ខេត្តសៀមរាប៖ក្មេងស្រីដែលរងរបួសយ៉ាងធ្ងន់ធ្ងរដោយសារប៉ូលិសខេត្តសៀមរាបម្នាក់នោះ ខណៈពេលនេះ ក្មេងរងគ្រោះកំពុងស្ថិតនៅក្នុងការតាមដានសុខភាពពីក្រុមគ្រួពេទ្យនៅឡើយ។

តាមរយៈហ្វេសប៊ុកផ្ទាល់ខ្លួន លោកស្រី យូ សុភា អភិបាលរងខេត្តសៀមរាប បានលើកឡើងថា «ចៅស្រីគួរឲ្យអាណិត អាយុទើបតែ១៣ ខែ ត្រូវរងគ្រោះដោយអំពើហិង្សា ពេលនេះកំពង់ស្ថិតក្នុងការ បន្តតាមដាន របស់ក្រុមគ្រូពេទ្យជ័យវរន្ម័ទី៧(គន្ធបុប្ផា)ខេត្តសៀមរាប»។ ការលើកឡើងរបស់លោកស្រី យូ សុភា ធ្វើឡើងបន្ទាប់ពីបានទទួលការណែនាំពីលោក ទៀ សីហា អភិបាលខេត្តសៀមរាប ឲ្យធ្វើកិច្ចការនេះជាបន្ទាន់។ ជាមួយគ្នានេះដែរ លោកប្រាក់ សោ ភ័ណ ប្រធានសហភាពសហព័ន្ធយុវជនកម្ពុជាខេត្តសៀមរាប និងជាអភិបាលរងខេត្តសៀមរាប ក៏បានបង្ហោះសារតាមប្រព័ន្ធហ្វេសប៊ុក ដោយមានរូបក្មេងរងគ្រោះ ដោយអមនិងសំណេរថា « លើកដៃទៅរួច »។ ជនសង្ស័យជានគរបាលរូបនេះ មានឋានៈនិងតួនាទី ព្រិន្ទបាលឯក ឈ្មោះលក្ខិណា វីរៈរិទ្ធ ប្រុស 71848 ឋានៈនាយរងផ្នែក គ្រប់គ្រងសហគ្រាស គ្រឹះស្ថាន និងកម្លាំងភ្នាក់ងាររសន្តិសុខឯកជន ការិយាល័យគ្រប់គ្រងសន្តិសុខឯកជន ។ មានទីលំនៅភូមិចុងកៅស៊ូ សង្កាត់ស្លក្រាម ក្រុងសៀមរាប ខេត្តសៀមរាប។

បើទោះបីជាមានការជជែកគ្នា និងមានបទបញ្ជាពីអភិបាលខេត្តសៀមរាប ទៀ សីហា ឲ្យមន្ត្រីសមត្ថកិច្ចជំនាញចុះស៊ើបអង្កេត លើ ឈ្មោះលក្ខិណា វីរៈរិទ្ធ រូបនេះ យ៉ាងណាក៏ដោយ រហូតមកដល់ពេលនេះ ជនសង្ស័យ រូបនេះ នៅមិនទាន់ត្រូវបានសមត្ថកិច្ច ហៅមកបំភ្លឺនៅឡើយ ខណៈជនសង្ស័យរូបនេះកំពុងតែជាប់រៀនវគ្គបំប៉នជំនាញ នៅខេត្តកំពង់ស្ពឺ ឯណោះ។

មន្ត្រីនគរបាលជាន់ខ្ពស់ខេត្តសៀមរាប បានថ្លែងប្រាប់ សៀមរាបប៉ុស្ដិ៍ ថា ចំពោះករណីខាងលើនេះស្នងការនគរបាលខេត្តសៀមរាប បានមានចំណាត់ការទៅលើជនសង្ស័យរួចហើយ ដោយសមត្ថកិច្ចកំពុងតែស៊ើបអង្កេតនិងបន្តនីតិវិធី។ ជាមួយនេះគ្នានេះ មន្ត្រីនគរបាលប្រឆាំងការជួញដូរមនុស្ស និងការពារអនីតិជនខេត្តសៀមរាប ក៏បានបញ្ជាក់ផងដែរថា ចំពោះករណីនេះ ម្ដាយជនរងគ្រោះ បានដាក់ពាក្យបណ្ដឹងចូលមកការិយាល័យជំនាញរួចហើយ និងកំពុងដំណើរការនីតិវិធី។

សូមជម្រាបថា រយៈពេលប៉ុន្មានថ្ងៃនេះ នៅតាមបណ្ដាញសង្គម facebook មានការបង្ហោះនិងចែករំលែកតៗគ្នា ដោយលើកឡើងថាបុរសដែលពាក់ឯកសណ្ឋានជានគរបាលនេះអាចជាប់ពាក់ព័ន្ធ បានប្រើអំពើហិង្សាទៅលើក្មេងបណ្ដាលឱ្យរងរបួស ដោយករណីនេះទទួលនូវការរិះគន់យ៉ាងខ្លាំងពីមហាជន។

អង្គភាពសារព័ត៌មានសៀមរាបប៉ុស្ដិ៍ នៅពុំទាន់ទទួលបានការបំភ្លឺ ពីលោក លក្ខិណា វីរៈរិទ្ធ នៅឡើយទេ ជុំវិញការលើកឡើងចោទប្រកាន់បែបនេះ ហើយគេនៅពុំទាន់ឃើញ លោកលក្ខិណា វីរៈរិទ្ធ ចេញមុខបំភ្លឺនោះដែរ៕SRP

ភ្នំពេញ៖លោក Benoit Bosquet ប្រធានប្រចាំតំបន់នៃគម្រោងការអនុវត្តជាសកលនូវការអភិវឌ្ឍប្រកបដោយចីរភាពសម្រាប់អាស៊ីខាងកើត និងប៉ាស៊ីហ្វិក នៃធានាគារពិភពលោក
នៅរសៀលថ្ងៃអង្គារ ម្សិលមិញ បានជួបពិភាក្សាការងារ ជាមួយសម្ដេចស ខេង ឧបនាករដ្ឋមន្រ្តី រដ្ឋមន្រ្តីក្រសួងមហាផ្ទៃ តាមប្រព័ន្ធបញ្ជូនរូបភាព និងសំឡេង។ នៅក្នុងជំនួប លោក Benoit Bosquet ក៏បានជម្រាបសម្ដេច ស ខេង អំពីអត្ថប្រយោជន៍ដែលគម្រោងទាំងនេះ បានផ្ដល់ជូនប្រជាពលរដ្ឋ ក្នុងមូលដ្ឋានដែលជាគោលដៅនៃការអនុវត្តគម្រោង ដោយលោកបានមានប្រសាសន៍ថា ធានាគារពិភពលោកនៅតែបង្ហាញការប្ដេជ្ញាចិត្តក្នុងការរួមចំណែក តាមរយៈការអនុវត្តគម្រោងបែបនេះ សំដៅធ្វើយ៉ាងណាចូលរួមចំណែកលើកម្ពស់ជីវភាពរស់នៅរបស់ប្រជាពលរដ្ឋ។

សម្ដេចស ខេង បានសម្ដែងការស្វាគមន៍លោក Benoit Bosquet និងសហការី និងបានយកឱកាសនេះថ្លែងអំណរគុណធនាគារពិភពលោក ដែលបានជួយគាំទ្រដល់គម្រោងសំខាន់ៗមួយចំនួនដែលស្ថិតក្រោមសមត្ថកិច្ចទទួលខុសត្រូវរបស់ក្រសួងមហាផ្ទៃ ដូចជា គម្រោងគណនេយ្យភាពសង្គម គម្រោងលើកកម្ពស់ជីវភាពប្រជាជនក្រីក្រ និងគម្រោងគ្រប់គ្រងសំណល់រឹង។

សម្ដេចបានមានប្រសាសន៍ថា ការគាំទ្រតាមរយៈគម្រោងសំខាន់ៗទាំង៣ ពីសំណាក់ធនាគារពិភពលោក ពិតជាបានរួមចំណែកដល់ការអភិវឌ្ឍជីវភាព រស់នៅរបស់ ប្រជាពលរដ្ឋ នៅមូលដ្ឋាន និងចូលរួមចំណែកកាត់បន្ថយភាពក្រីក្រចំពោះប្រជាពលរដ្ឋដែលស្ថិតក្នុងតំបន់គោលដៅនៃការអនុវត្តគម្រោងទាំងនោះ។

លោក Benoit Bosquet ក៏បានជម្រាបជូនសម្ដេច ស ខេង និងមន្រ្តីពាក់ព័ន្ធកម្ពុជា ដែរថា ទន្ទឹមនឹងការអនុវត្តគម្រោងទាំងនេះ ក៏នៅមានកិច្ចការមួយចំនួនទៀត ដែលភាគីទាំងពីរត្រូវបន្តជជែកពិភាក្សាគ្នាបន្ថែមទៀត លើកិច្ចការដែលពាក់ព័ន្ធនឹងគម្រោងទាំង៣ សំដៅធ្វើយ៉ាងណារក្សានិរន្តរភាពនៃការអនុវត្តគម្រោង ទាំងនេះ ដើម្បីបំរើដល់ផលប្រយោជន៍ ប្រជាពលរដ្ឋបន្តទៅមុខទៀត។

លោកក៏បានថ្លែងអំណរគុណ និងវាយតម្លៃខ្ពស់ចំពោះតួនាទីក្រសួងមហាផ្ទៃ ដែលបានសហការអនុវត្ត និងដំណើរការគម្រោងសំខាន់ៗដូចបានលើកឡើងខាងលើ។

សម្ដេច ស ខេង ក៏បានថ្លែងអំណរគុណលោក Benoit Bosquet និងគណៈប្រតិភូធនាគារពិភពលោក ហើយថា.សម្ដេច ព្រមទាំងសហការី ត្រៀមជានិច្ចក្នុងការជជែកពិភាក្សាជាមួយភាគីធនាគារពិភពលោក ដើម្បីធនាបាននិរន្តរភាពនៃគម្រោងសំខាន់ៗទាំងនេះ សំដៅបម្រើដល់ផលប្រយោជន៍ប្រជាពលរដ្ឋ។

តាមរយៈបទពិសោធន៍ផ្ទាល់ សម្ដេចក៏បានគូសបញ្ជាក់អំពីការជួបប្រាស្រ័យ ជាមួយប្រជាពលរដ្ឋ នៅតាមមូលដ្ឋាន ដែលជាគោលដៅនៃការអនុវត្តគម្រោងទាំងនេះ ដោយសម្ដេចសង្កេតឃើញការគាំទ្រ របស់ប្រជាពលរដ្ឋ ដែលបានទទួលអត្ថប្រយោជន៍ពីគម្រោងទាំងនេះ។ ដូច្នេះសម្ដេចលើកទឹកចិត្តឱ្យភាគីពាក់ព័ន្ធបន្តការពិភាក្សា សំដៅធ្វើយ៉ាងណាទទួលបាននូវការគាំទ្របន្ថែមទៀត ពីសំណាក់ធនាគារពិភពលោក ដើម្បីឱ្យគម្រោងសំខាន់ៗទាំងនេះបន្តនិរន្តរភាពសម្រាប់បំរើផលប្រយោជន៍ប្រជាជន៕SRP

ខេត្តកំពង់ចាម​៖លោក​ ខ្លូត​ ចិន្តា​ អភិបាល​រង​ខេត្ត​កំពង់ចាម​ បាន​ជំរុញលេីក​ទឹកចិត្ត​ដល់​ប្អូនៗ​ យុវវ័យ​ទាំងអស់​​ ឲ្យ​ខិតខំ​តស៊ូ​​សិក្សា​រៀនសូត្រ​ ដេីម្បី​ក្រេបជញ្ជក់​យកនូវ​ចំណេះវិជ្ជា​ផ្សេងៗ​ ដែលជាការ​កសាង​ធនធាន​មនុស្ស​ ឲ្យ​ក្លាយ​ទៅ​ជា​អ្នក​ដឹកនាំ​ពោរពេញ​ ទៅ​ដោយ​សមត្ថភាព​ ចំណេះ​ដឹង​ និង​មាន​ជុំនាញយ៉ាង​ពិតប្រាកដ​ សម្រាប់ចូលរួម​ជាមួយ​រាជរដ្ឋាភិបាល​ ដេីម្បី​អភិវឌ្ឍន៍​សង្គម​ជាតិ​ ឲ្យ​កាន់តែ​មាន​ការ​រីកចម្រើន​បន្ត​ទៀត​។

ថ្លែង​បែប​នេះ​ក្នុង​វេទិកា​ពិគ្រោះយោបល់​យុវជន​ ប្រធានបទ​ស្តីពី​ការ​ចូលរួម​របស់​យុវជន​ និង​សហគ្រិន​ស្ត្រី​វ័យ​ក្មេង​ ក្នុង​ភាព​ជា​អ្នក​ដឹកនាំ​ និង​ការងារ​សង្គម​ ដែល​បាន​ធ្វេីឡេីង​នៅ​សណ្ឋាគារ​ភ្នំប្រុស​ ក្ក្រុងកំពង់ចាម នៅថ្ងៃអង្គារនេះ។

លោក​ ខ្លូត​ ចិន្តា ក៏បានជំរុញដល់​យុវជន​ទាំង​អស់​ ​ត្រូវ​មាន​ទំនុកចិត្ត​ និង​ផ្តល់​ឱកាស​ឲ្យ​ខ្លួន​ឯង​​ ក្នុង​ការ​ស្វែងរក​ភាព​ជោគជ័យ​ ដេីម្បី​​កសាង​អនាគត​ ឲ្យ​ក្លាយ​ទៅ​ជា​អ្នក​ដឹកនាំ​ដែល​មាន​ការ​រីកចម្រើន​ផងដែរ។

បេីតាមលោក សោម សុភ័ក្រ នាយកប្រតិបត្តិអង្គការសកម្មភាព​ ដើម្បីអភិវឌ្ឍន៍​ បាន​ឲ្យដឹងថា​ ក្រោមជំនួយគាំទ្រ USAID តាមរយៈអង្គការផេកកម្ពុជា នៃគម្រោងសហគ្រិនស្ត្រីវ័យក្មេង និងម្ចាស់ជំនួយផ្សេងទៀតរបស់អង្គការដៃគូ យើងបានរួមគ្នាក្នុងការបង្កើនសមត្ថភាព ដល់យុវជន និងសហគ្រិនស្ត្រីវ័យក្មេង សរុបចំនួន ១០៤៧នាក់ យុវជនជាស្ត្រីចំនួន ៦៣៤នាក់ ដែលក្រុយុវជនមកពី អង្គការ AFD ១០០នាក់, NAS ៩១នាក់, BSDA ៨០១នាក់, SHE ៣០នាក់, និង PDP ២៥។ ក្នុងឆ្នាំ២០២១ កន្លងទៅ យុវជនទាំង១០៤៧នាក់ ទទួលបានការពង្រឹង សមត្ថភាពបន្ថែមពី ភាពជាអ្នកដឹកនាំ ជំនាញសម្របសម្រួល ការនិយាយជាសាធារណៈ ការសសេររបាយការណ៍ ការគៀងគរការគាំទ្រលើមតិ ការទំនាក់ទំនងតាមប្រព័ន្ធអ៊ីនធើណែត និងការធ្វើ អាជីវកម្ម ជាដើម។​

លោក សោម សុភ័ក្រ​ បាន​បន្តថា​ គម្រោង​យេីងបានគាំទ្រដល់ក្រុមយុវជន​ និងសហគ្រិនស្ត្រីវ័យក្មេង ក្នុងការចូលរួមសិក្ខាសាលានានា ដើម្បីរៀនសូត្រនិងចែករំលែកពីបទពិសោធន៍ ការងារ​ ចំណេះដឹងពីគ្នាទៅវិញទៅមក តាមរយៈបណ្តាញយុវជនក្នុងខេត្ត​ និងក្រៅខេត្ត​ ព្រមទាំងបានចូលរួមកិច្ចប្រជុំក្នុងកិច្ចសន្ទាតុមូល វេទិកាពិគ្រោះយោបល់ ការដាក់ពិន្ទុលើសេវាពីសហគមន៍ ផ្ត ល់ជំនាញលើបំនិនជីវិតដូចជាបដិសណ្ឋារកិច្ច,ជួសជុលម៉ូតូ,ជួសជុលរថយន្ ត,ជួសជុលម៉ាស៊ីន ត្រជាក់,តំឡើងកាមេរ៉ាសុវត្តិភាព,កែសម្ផស្ស ជាងកាត់សក់, បង្កើតជាសហគមន៍កសិកម្មស្ត្រីវ័យក្មេង, ផ្តល់ដើមទុនវិនិយោគតាមរយៈ គម្រោងខ្នាតតូច, និងផ្ដល់ជាអាហារូបករណ៍ដល់សិស្សក្រីក្រ នៅតាមសហគមន៍ផងដែរ​៕SRP

ភ្មំពេញ៖លោកអេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេស នៅថ្ងៃទី២២ ខែមីនា ឆ្នាំ២០២២ នេះបានបញ្ជាក់ថា រថយន្តម៉ាក TOYOTA TUNDRA ពណ៌ ស ឆ្នាំ២០១៤ ដែលមានលេខតួ 10EX301904 ស្លាកលេខ ភ្នំពេញ 2BO 8073 អតីតម្ចាស់កម្មសិទ្ធិ ឈ្មោះ សរ ប៊ុនគីម ភេទប្រុស សញ្ជាតិខ្មែរ ជនជាតិខ្មែរ កាន់អត្តសញ្ញាណប័ណ្ណលេខ ០១៤៥២២៧២(០១) ចុះថ្ងៃទី០៦ ខែតុលា ឆ្នាំ២០០២ ហើយបុគ្គលនេះ ជានាយទាហាននៃកងរាជអាវុធហត្ថ មានឋានន្តរស័ក្តិវរសេនីយ៍ត្រី អត្តលេខ១៩៩១៧៦ មុខងារនាយផ្នែកនីតិវិធី ការិយាល័យផែនការស្រាវជ្រាវ ស្នងការដ្ឋានព័ត៌មាន សន្តិសុខ នៃកងរាជអាវុធហត្ថលើផ្ទៃប្រទេស។ រថយន្តខាងលើនេះ ត្រូវបានលក់ទៅឱ្យឈ្មោះ ឆេង នុភ័ក ភេទប្រុស សញ្ជាតិខ្មែរ ជនជាតិខ្មែរ កាន់អត្តសញ្ញាណប័ណ្ណលេខ០២១៣៣២៦៨៧ ចុះថ្ងៃទី៣០ ខែ០៧ ឆ្នាំ២០២០ មុខរបរពាណិជ្ជករ អាស័យដ្ឋានបច្ចុប្បន្ន ភូមិកោះរកា ឃុំព្រែកអញ្ចាញ ស្រុកមុខកំបូល ខេត្តកណ្តាល ក្នុងតម្លៃ៣៥.០០០ដុល្លារ កាលពីថ្ងៃទី២៦ ខែកុម្ភៈ ឆ្នាំ២០២២។  នេះបើយោងតាមកិច្ចសន្យាទិញ-លក់រថយន្ត ដែលមានស្នាមម្រាមដៃរបស់អ្នកទិញ អ្នកលក់ និងសាក្សីអ្នកលក់ ធ្វើនៅរាជធានីភ្នំពេញ ថ្ងៃសៅរ៍ ទី២៦ ខែកុម្ភៈ ឆ្នាំ២០២២។

ទោះជាយ៉ាងណា ក្នុងករណីសមត្ថកិច្ចធ្វើការស្រាវជ្រាវរកឃើញថា ឈ្មោះ សរ ប៊ុនគីម បានប្រព្រឹត្តបទល្មើសដូចមានចែងក្នុងច្បាប់នៃព្រះរាជាណាចក្រកម្ពុជា កងរាជអាវុធហត្ថ នឹងឃាត់ខ្លួនបុគ្គលនេះ បញ្ជូនទៅតាមនីតិវិធី។

សូមរំលឹកថា បុរសជាអ្នកបេីកបររថយន្ត​ Tundra ពណ៌​ ស​ពាក់​ស្លាក​លេខ​ 2BO-8073 ភ្នំពេញ​ បានបេីកបររថយន្ត​ បញ្ច្រាស់ទិសដៅចរាចរណ៍នៅផ្លូវ​មហាវិថី​នរោត្តម​ មុខ​ក្រសួង​មហាផ្ទៃ​ កាលពី​យប់​ថ្ងៃ​ទី​ ១៩​ ខែ​ មីនា​ ឆ្នាំ​ ២០២២​ រួចទុករថយន្តចោលដេីរទៅបាត់​ បបង្កអោយមានការកកស្ទះចរាចរណ៍៕SRP

ភ្នំពេញ៖ក្នុងជំនួបចូលពិភាក្សាជាមួយសម្ដេចតេជោហ៊ុន សែន នាយករដ្ឋមន្ត្រី នៅវិមានសន្តិភាព នាថ្ងៃអង្គារ នេះលោក ហ្សាហ៉ីរូឌីន បាបា សាហ៉ីម (Zaheeruddin Babar Thaheem) ឯកអគ្គរដ្ឋទូតវិសាមញ្ញ និងពេញសមត្ថភាពនៃប្រទេសអ៊ីស្លាមប៉ាគីស្ថាន ប្រចាំនៅព្រះរាជាណាចក្រកម្ពុជា បានគោរពថ្លែងអំណរគុណចំពោះសម្ដេចតេជោ ដែលបានចំណាយពេលដ៏មមាញឹក អនុញ្ញាតឲ្យ លោកបានជួបសំដែងការគួរសម និងពិភាក្សានាពេលនេះ។

លោកបានគោរពជម្រាបជូនសម្ដេចតេជោ នាយករដ្ឋមន្ត្រីថា លោមពិតជាមានកិត្តិយសណាស់ដែលបានមកធ្វើជា ឯកអគ្គរដ្ឋទូតប៉ាគីស្ថានប្រចាំនៅព្រះរាជាណាចក្រកម្ពុជា។ លោកបានជម្រាបជូនសម្តេចតេជោថា រយៈពេលជាងមួយខែកន្លងមកនេះ លោកសង្កេតឃើញថា ប្រទេសកម្ពុជាមានការអភិវឌ្ឍ ស្រស់ស្អាតជាមួយនឹងប្រជាជនដែលមានភាពរួសរាយរាក់ទាក់ និងមន្ត្រីរាជការផ្ដល់នូវកិច្ចសហប្រតិបត្តិការដ៏ល្អ។ លោក បានជម្រាបជូនសម្ដេចតេជោផងដែរថា ប្រទេសប៉ាគីស្ថាន ចាត់ទុកប្រទេសកម្ពុជាជាដៃគូសំខាន់ ក្នុងន័យនេះ លោកបានជម្រាបជូនសម្តេចតេជោថា បេសកកម្មការទូតរបស់លោកមកកាន់កម្ពុជានេះ នឹងបន្តសកម្មភាពដែលមានស្រាប់ផង នឹងធ្វើអ្វីៗគ្រប់បែបយ៉ាងដើម្បីជំរុញទំនាក់ទំនងលើគ្រប់វិស័យ ក្នុងទិសដៅពង្រឹង និងពង្រីកទំនាក់ទំនង និងកិច្ចសហប្រតិបត្តិការរវាងប្រទេសទាំងពីរឲ្យឈានដល់កម្រិតថ្មីមួយទៀត។

សម្ដេចតេជោ ហ៊ុន សែន បានស្វាគមន៍ និងសម្ដែងនូវការអបអរសាទរចំពោះ លោក ហ្សាហ៉ីរូឌីន បាបា សាហ៉ីម ដែលត្រូវបានតែងតាំងជាឯកអគ្គរដ្ឋទូតវិសាមញ្ញ និងពេញសមត្ថភាព ប្រចាំនៅព្រះរាជាណាចក្រកម្ពុជានាពេលនេះ។ សម្ដេចតេជោនាយករដ្ឋមន្ត្រី ក៏បានស្វាគមន៍ផងដែរ ចំពោះការលើកឡើងរបស់លោក និងបានលើកទឹកចិត្តឲ្យ លោកពិនិត្យមើលសក្តានុពលផ្សេងៗទាំងឡាយដែលប្រទេសទាំងពីរអាចធ្វើបាន ដូចជាកិច្ចសហប្រតិបត្តិការលើវិស័យសេដ្ឋកិច្ច ពាណិជ្ជកម្ម និងការវិនិយោគ ដែលមានសារសំខាន់សម្រាប់បំពេញឲ្យគ្នាទៅវិញទៅមក និងចូលរួមចំណែកពង្រីក ពង្រឹងកិច្ចសហប្រតិបត្តិការ រវាងប្រទេសយើងទាំងពីរ ដែលមានទំនាក់ទំនងដែលអាចចាត់ទុកថា ជាវ័យចំណាស់មួយ រហូតដល់៧០ឆ្នាំហើយក្នុងឆ្នាំនេះ។

នាយករដ្ឋមន្ត្រី ក៏បានជម្រាបទៅ លោក ហ្សាហ៉ីរូឌីន បាបា សាហ៉ីម ផងដែរថា ក្នុងក្របខណ្ឌអាស៊ាន អ្វីដែលកម្ពុជាចង់បានក្នុងនាមជាប្រធានអាស៊ាន គឺការបើកដំណើរការសេដ្ឋកិច្ចអាស៊ានឡើងវិញ ក្នុងគ្រាដែលកំពុងរៀនរស់នៅជាមួយនឹងវិបត្តិកូវីដ១៩។

សម្ដេចតេជោនាយករដ្ឋមន្ត្រី ក៏បានថ្លែងអំណរគុណចំពោះរដ្ឋាភិបាលប៉ាគីស្ថាន ដែលបានផ្ដល់អាហារូបករណ៍ដល់និស្សិតកម្ពុជា ហើយបានស្នើដល់រដ្ឋាភិបាលប៉ាគីស្ថានបន្តផ្ដល់អាហារូបករណ៍ជាបន្តទៀត ដល់ប្រទេសកម្ពុជា៕SRP

ខេត្តសៀមរាប៖បុរសម្នាក់ដែលមានឯកសណ្ឋានជានគរបាល បានរងការរិះគន់ថា សង្ស័យបានប្រើអំពើហិង្សាទៅលើ កូនក្មេងហើយត្រូវបានបណ្ដាញសង្គមហ្វេសប៊ុកបង្ហោះចែកចាយតៗនោះ ជាប៉ូលិសនៅការិយាក័យសន្តិសុខឯកជន នៃស្នងការនគរបាលខេត្តសៀមរាប។

ប្រភពពីមន្ត្រីនគរបាលខេត្តសៀមរាប បានប្រាប់សៀមរាបប៉ុស្ដិ៍ ថាបុរសរូបនេះ មានឋានៈនិងតួនាទី ព្រិន្ទបាលឯក ឈ្មោះលក្ខិណា វីរៈរិទ្ធ ប្រុស 71848 ឋានៈនាយរងផ្នែក គ្រប់គ្រងសហគ្រាស គ្រឹះស្ថាន និងកម្លាំងភ្នាក់ងាររសន្តិសុខឯកជន ការិយាល័យគ្រប់គ្រងសន្តិសុខឯកជន ។ មានទីលំនៅភូមិចុងកៅស៊ូ សង្កាត់ស្លក្រាម ក្រុងសៀមរាប ខេត្តសៀមរាប។

ករណីនេះ អភិបាលខេត្តសៀមរាប លោកទៀ សីហា បានបញ្ជាទៅស្នងការនគរបាលខេត្តសៀមរាប ឲ្យធ្វើការស្រាវជ្រាវស៊ើបអង្កេតជាបន្ទាន់ផងដែរ។ ការបញ្ជារបស់អភិបាលខេត្តសៀមរាបធ្វើឡើង ក្រោយពីមានបណ្ដាញសង្គមហ្វេសប៊ុកបានផុសនិងចែករំលែកតៗគ្នា ហើយធ្វើការរិះគន់យ៉ាងខ្លាំងចំពោះនគរបាលខាងលើនេះដែលអាចប្រើហិង្សាទៅលើក្មេង។

មន្ត្រីនគរបាលជាន់ខ្ពស់ខេត្តសៀមរាប បានថ្លែងប្រាប់ សៀមរាបប៉ុស្ដិ៍ នៅល្ងាចថ្ងៃទី ២១ ខែមីនា ម្សិលមិញថា ចំពោះករណីខាងលើនេះស្នងការនគរបាលខេត្តសៀមរាប បានមានចំណាត់ការទៅលើជនសង្ស័យរួចហើយ ដោយសមត្ថកិច្ចកំពុងតែស៊ើបអង្កេតនិងបន្តនីតិវិធី។ ជាមួយនេះគ្នានេះ មន្ត្រីនគរបាលប្រឆាំងការជួញដូរមនុស្ស និងការពារអនីតិជនខេត្តសៀមរាប ក៏បានបញ្ជាក់ផងដែរថា ចំពោះករណីនេះ ម្ដាយជនរងគ្រោះ បានដាក់ពាក្យបណ្ដឹងចូលមកការិយាល័យជំនាញរួចហើយ និងកំពុងដំណើរការនីតិវិធី។

សូមជម្រាបថា រយៈពេលប៉ុន្មានថ្ងៃនេះ នៅតាមបណ្ដាញសង្គម facebook មានការបង្ហោះនិងចែករំលែកតៗគ្នា ដោយលើកឡើងថាបុរសដែលពាក់ឯកសណ្ឋានជានគរបាលនេះ បានប្រើអំពើហិង្សាទៅលើក្មេងបណ្ដាលឱ្យរងរបួស ដោយករណីនេះទទួលនូវការរិះគន់យ៉ាងខ្លាំងពីមហាជន។

អង្គភាពសារព័ត៌មានសៀមរាបប៉ុស្ដិ៍ នៅពុំទាន់ទទួលបានការបំភ្លឺ ពីលោក លក្ខិណា វីរៈរិទ្ធ នៅឡើយទេ ជុំវិញការលើកឡើងចោទប្រកាន់បែបនេះ ហើយគេនៅពុំទាន់ឃើញ លោកលក្ខិណា វីរៈរិទ្ធ ចេញមុខបំភ្លឺនោះដែរ៕SRP