ព័ត៌មានជាតិ

ខេត្តសៀមរាប៖កម្មករម្នាក់បានទៅដកទូរស័ព្ទដែលកំពុងសាកថ្ម ត្រូវបានឆក់ស្លា..ប់ ក្នុងការ៉ាស់សាំងមួយកន្លែង។

ហេតុការណ៍បានកើតឡើងនៅវេលាម៉ោង១៧:១៥ នាទីថ្ងៃទី០៧ខែ សីហាឆ្នាំ២០២២ស្ថិតនៅភូមិ ទក្សិណត្បូង សង្កាត់គោកចក​​ ក្រុងសៀមរាប ក្នុងការដ្ឋានស្ថានីយសក់សាំងមួយកន្លែង។

សមត្ថកិច្ចបានឲ្យដឹងថា ជនរងគ្រោះ ឈ្មោះណេប់ ភាណិត ភេទប្រុស អាយុ២៣ឆ្នាំ មានទីលំនៅបច្ចុប្បន្ន ស្ថិតនៅភូមិ គោកឫស្សី ឃុំកែវពណ៌ ស្រុកពួក។

សមត្ថកិច្ចបន្តថា តាមការបំភ្លឺរបស់ឈ្មោះ ព្រះ ស្រី ភេទប្រុស អាយុ២៦ឆ្នាំ មុខរបរកម្មករ និងឈ្មោះ ហ៊ុន ហ៊ាប ភេទប្រុស អាយុ៣៩ឆ្នាំ មុខរបរ មេការសំណង់ បានរៀបរាប់ប្រហាក់ប្រហែលគ្នាថា វេលាម៉ោង១៦ និង០០នាទីថ្ងៃទី០៧ ខែសីហា ឆ្នាំ២០២២ ខ្លួននិងកម្មករផ្សេងទៀតបានកំពុងធ្វើការងារ ភា្លមនោះមេឃចាប់ផ្តើមធ្លាក់ភ្លៀង ក៏នាំគ្នាសម្រាក នៅក្នុងការរដ្ឋាន ក៏ស្រាប់តែមានកម្មករម្នាក់ឈ្មោះ ណេប់ ភាណិត (សព) បានយកទូរស័ព្ទរបស់គាត់ ទៅសាកថ្ម នៅចំណុចជាប់និងជញ្ជាំងរបងផ្ទះ ក្នុងការដ្ឋាន ដោយដោតសាកថ្មទុកចោលនៅទីនោះរួចគាត់ទៅធ្វើការងារ របស់គាត់វិញ។ មួយសន្ទុះគាត់បានដើរទៅយកទូរស័ព្ទគាត់ នៅកន្លែងសាកថ្មខាងលើ ដោយខ្លួនរបស់គាត់សើម និងពុំមានពាក់ស្បែកជើង ពេលដែលគាត់បានចាប់យកទូរស័ព្ទរបស់គាត់ ក៏ស្រាប់តែ ឆក់ជាប់តែម្ដង។ ភ្លាមៗ នោះមេជាង ឈ្មោះ ហ៊ុន ហ៊ាប បានរត់ទៅទាញបិទកុងតាក់អគ្គិសនី ហើយនាំគ្នាជួយសង្គ្រោះបឋម និងទាក់ទងទៅរថយន្តសង្គ្រោះបន្ទាន់ យកទៅសង្គោះនៅមន្ទីរពេទ្យមួយកន្លែងតាមបណ្តោយផ្លូវ៣០ម៉ែត្រ តែត្រូវបានស្លាប់ពេលបញ្ជូនដល់មន្ទីរពេទ្យ។

ករណីនេះក្រុមគ្រួសារ ក៏បានទទួលស្គាល់ថាសពពិតជាស្លាប់ដោយសារឆក់ខ្សែភ្លើងដោយខ្លួនឯងពិតប្រាកដមែន។

សមត្ថកិច្ចបញ្ជាក់ថា យោងតាមការបំភ្លឺពីសាក្សី ការពិនិត្យសាកសព គឺស្លាប់ដោយសារឆក់ខ្សែភ្លើង ពិតប្រាកដមែន។ បច្ចុប្បន្នសពជនរងគ្រោះត្រូវបានសមត្ថកិច្ចប្រគល់ជូនក្រុមគ្រួសារ ដើម្បីធ្វើបុណ្យតាមប្រពៃណី៕SRP

                             «លោកឧកញ៉ា ចេន ហ្ស៊ី»

ភ្នំពេញ៖អ្នកជំនួញជនជាតិចិនចូលសញ្ជាតិខ្មែរម្នាក់ ដែលមាន គោរមងារជា អ្នកឧកញ៉ា អាចធ្វើជាទីប្រឹក្សាថ្នាក់ដឹកនាំស្ថាប័នជាតិ នៃព្រះរាជាណាចក្រកម្ពុជារហូតដល់ទៅ៣នាក់ តែម្តង គឺ លោក ចេ ន ហ្ស៊ី (Chen Zhi) ដែលគេស្គាល់ថាជា ប្រធានក្រុមប្រឹក្សាភិបាល ក្រុមហ៊ុន Prince Holding Group ទទួលបានការតែងតាំង ជាទីប្រឹក្សា សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រី ក្រសួងមហាផ្ទៃ ផង , ទីប្រឹក្សា សម្តេចអគ្គមហាពញាចក្រី ហេង សំរិន ប្រធានរដ្ឋសភា នៃ ព្រះរាជាណាចក្រ កម្ពុជា នីតិកាលទី ៦ ផង និង ជាទីប្រឹក្សាផ្ទាល់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ផង ។

លោក ចេន ហ្ស៊ី (Chen Zhi) ជនជាតិចិនសញ្ជាតិចិនកើត ថ្ងៃទី១៦ ខែធ្នូ ឆ្នាំ ១៩៨៧ ( អាយុ៣៥ ឆ្នាំ ) នៅ ខេត្តហ្វូចៀន សាធារណរដ្ឋប្រជាមានិតចិនទទួលបានការផ្តល់ សញ្ជាតិខ្មែរ តាមសញ្ជាតូបនីយកម្ម ដោយ ព្រះរាជក្រឹត្យ លេខ នស / រកត /០២១៤/២០៩ ចុះ ថ្ងៃទី ១៧ ខែកុម្ភៈ ឆ្នាំ ២០១៤។

ប្រមាណជិត២ឆ្នាំក្រោយមកបន្ទាប់ពីទទួលបាន សញ្ជាតិខ្មែរនិងក្នុងនាមជាអ្នកជំនួញដ៏សកម្មនៅកម្ពុជា លោកចេន ហ្ស៊ី ក៏ទទួលបាន ការតែងតាំងគោរមងារជា ឧកញ៉ា ដោយ ព្រះរាជក្រឹត្យ លេខ នស / រកត /០២១៦/១៧៨ ចុះ ថ្ងៃទី ១១ ខែកុម្ភៈ ឆ្នាំ ២០១៦។

រយៈពេលប្រមាណមួយឆ្នាំ ក្រោយមកទៀត ឧកញ៉ា ចេន ហ្ស៊ី ក៏ទទួលបានការតែងតាំង ជាទីប្រឹក្សា ក្រសួងមហាផ្ទៃ មានឋានៈ ស្មើ អនុរដ្ឋលេខាធិការ ដោយពុំទទួលយកប្រាក់បៀវត្សរ៍ ដោយព្រះរាជក្រឹត្យ លេខ នស / រកត /០២១៧/១៨៧ ចុះ ថ្ងៃទី ២៣ ខែកុម្ភៈ ឆ្នាំ ២០១៧ ពោលគឺមានឋានៈ ជា« ឯកឧត្តម ឧកញ៉ា ចេ ន ហ្ស៊ី »។

ជាង២ ឆ្នាំក្រោយមក គឺក្រោយការបង្កើត រាជរដ្ឋាភិបាលកម្ពុជា នីតិកាល ទី៦ នៃ រដ្ឋសភា ឯកឧត្តម ឧកញ៉ា ចេន ហ្ស៊ី ក៏ ទទួលបានការតែងតាំង ជាទីប្រឹក្សា សម្តេច ក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រី ក្រសួងមហាផ្ទៃ ដោយ ព្រះរាជក្រឹត្យ លេខ នស / រកត /១២១៩/១៨០២ ចុះ ថ្ងៃទី ០៥ ខែធ្នូ ឆ្នាំ ២០១៩ តាមសេចក្តីក្រាបបង្គំទូលថ្វាយ របស់ សម្តេច អគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រ កម្ពុជា ។

ប្រមាណ០៥ ខែក្រោយ មក ឯកឧត្តម ឧកញ៉ា ចេន ហ្ស៊ី ក៏ទទួលបានការតែងតាំង ជាទីប្រឹក្សា សម្តេចអគ្គមហាពញាចក្រី ហេង សំរិន ប្រធានរដ្ឋសភា នីតិកាល ទី ៦ មានឋានៈស្មើ រដ្ឋមន្ត្រីដោយ ព្រះរាជក្រឹត្យ លេខ នស / រកត /០៥២០/៥២១ ចុះ ថ្ងៃទី ១៥ ខែឧសភា ឆ្នាំ ២០២០ តាមសេចក្តីក្រាបបង្គំទូលថ្វាយរបស់ សម្តេចអគ្គមហាពញាចក្រី ហេង សំរិន ប្រធានរដ្ឋសភា នៃ ព្រះរាជាណាចក្រកម្ពុជា។

បន្ទាប់ពីទទួលបានការតែងតាំង ជាទីប្រឹក្សា សម្តេចអគ្គមហាពញាចក្រី ហេង សំរិន ប្រធានរដ្ឋសភានីតិកាល ទី ៦ ប្រមាណជិត០១ ខែក្រោយ មក ឯកឧត្តម ឧកញ៉ា ចេន ហ្ស៊ី ក៏ទទួលបាន ការតែងតាំង ជាទីប្រឹក្សាផ្ទាល់ សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា មាន ឋានៈ ស្មើ រដ្ឋមន្ត្រី ដោយពុំទទួលប្រាក់បំណាច់ មុខងារដោយ ព្រះរាជក្រឹត្យ លេខ នស / រកត /០៦២០/៥៩៥ ចុះ ថ្ងៃទី ០៣ ខែមិថុនា ឆ្នាំ ២០២០ តាមសេចក្តីក្រាបបង្គំទូលថ្វាយ របស់ សម្តេចអគ្គមហាសេនាបតីតេជោ នាយករដ្ឋមន្ត្រី។

លុះរយៈពេលប្រមាណ០១ ខែ ០៧ ថ្ងៃ ក្រោយមក បន្ទាប់ពីទទួលបានការតែងតាំង ជាទី ប្រឹក្សា ផ្ទាល់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃ ព្រះរាជាណាចក្រកម្ពុជា គឺ ឯកឧត្តម ឧកញ៉ា ចេន ហ្ស៊ី ក៏ទទួលបានការផ្តល់ គោរមងារថ្មី ជា អ្នកឧកញ៉ា ដោយ ព្រះរាជក្រឹត្យ លេខ នស / រកត /០៧២០/៧២៣ ចុះ ថ្ងៃទី ១០ ខែកក្កដា ឆ្នាំ ២០២០។

ក្នុងចំណោម មុខតំណែង ជាទីប្រឹក្សាថ្នាក់ដឹកនាំស្ថាប័នជាតិ ទាំង៣រូប មុខតំណែង ជាទី ប្រឹក្សាសម្តេចអគ្គមហាពញា ចក្រី ហេង សំរិន ប្រធានរដ្ឋសភា នីតិកាល ទី ៦ មិនបាន បញ្ជាក់ថាមិនយកប្រាក់បៀវត្សរ៍ ឬ ពុំទទួលប្រាក់បំណាច់ មុខងារ អ្វី ឡើយ ពោលមានន័យថា ឯកឧត្តម អ្នកឧកញ៉ា ចេន ហ្ស៊ី អាចទទួលបានប្រាក់បំណាច់មុខងារ សម្រាប់មុខតំណែងនេះ។

កាលពីដើម ខែកក្កដា ឆ្នាំ ២០២២ កន្លងទៅថ្មីៗ នេះ ឯកឧត្តម អ្នកឧកញ៉ា ចេន ហ្ស៊ី បានបរិច្ចាគថវិកា ចំនួន ១ ០០០ ០០០ ( មួយ លាន ) ដុល្លារអាមេរិក ជូនរាជរដ្ឋាភិបាលកម្ពុជា ក្នុងដំណើរការ នៃសកម្មភាពបោសសម្អាតមីន និងគ្រាប់ យុទ្ធភណ្ឌមិនទាន់ផ្ទុះផ្សេងទៀតនៅក្នុង ព្រះរាជាណាចក្រកម្ពុជា តាមការអំពាវនាវរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា៕SRP

ភ្នំពេញ៖លោកដួង តារា រដ្ឋលេខាធិការទីស្ដីការគណៈរដ្ឋមន្ត្រីនិងជាជំនួយការផ្ទាល់ សម្ដេចហ៊ុន សែន ​បានប្រកាសគាំទ្រចំពោះការសម្រេចចិត្តរបស់​ សម្តេចតេជោ​ ហ៊ុន​ សែន​ ក្នុងការរក្សាការពារធនធាន ព្រៃធម្មជាតិនៅជុំវិញសួនឧទ្យានភ្នំតាម៉ៅនិងរៀបចំអោយដាំដើមឈើឡើងវិញ។

ការប្រកាសគាំទ្រ របស់លោកដូង តារា ក្រោយពី សម្ដេចតេជោ ហ៊ុន ​សែន ចេញបញ្ជាឲ្យរក្សាការពារនិងអភិរក្សព្រៃឈើនៅភ្នំតាម់ៅ បន្ទាប់ពីមានការឈូសឆាយបំផ្លាញ។លោកដួង តារា បានសរសេរនៅគណីហ្វេសប៊ុករបស់លោកថា៖​ ខ្ញុំបាទសូមគោរពអរគុណ​ និងគាំទ្រទាំងស្រុងប្រកបដោយមោទនភាពក្រៃលែងចំពោះការសម្រេចចិត្តប្រកបដោយគតិបណ្ឌិតរបស់​ សម្តេចតេជោ​ ហ៊ុន​ សែន​ នាយករដ្ឋមន្រ្តីនៃកម្ពុជាក្នុងការរក្សាការពារធនធានព្រៃធម្មជាតិនៅជុំវិញសួនឧទ្យានភ្នំតាម៉ៅ់និងរៀបចំអោយដាំដើមឈើឡើងវិញដើម្បីជាប្រយោជន៍ដ៏ថ្លៃថ្លារបស់ប្រទេសជាតិទាំងមូល។

ជាមួយគ្នានេះដែរ លោក ដួង តារា ក៏បានអរគុណបងប្អូនជនរួមមតិចំពោះការចូលរួមថែរក្សាការពារធនធានធម្មជាតិជាមួយសម្តេចប្រមុខដឹកនាំយើងទាំងអស់គ្នា។ អំពើអាក្រក់ជាអពមង្គលនៃជីវិត អំពើល្អជាសិរីសួស្តី។ យើងចូលរួមកសាងអំពើល្អ ចែករំលែកក្តីស្រឡាញ់និងស្នាមញញឹម និងសូមមានចិត្តអាណិតស្រឡាញ់ពលរដ្ឋយើងគ្រប់ទីកន្លែងដោយគ្មានការរើសអើងនៅក្រោមដំបូលសន្តិភាព។

ចំណែក លោក ឡេង ណាវ៉ាត្រា តាមរយៈទំព័រហ្វេសប៊ុករបស់ខ្លួនក៏បានបង្ហោះសារដែរថា៖ សូមអោយរាជរដ្ឋាភិបាលលុប ស.ជ.ណ តំបន់ភ្នំតាម៉ៅ ទាំងអស់ ហើយសុំអោយបងប្អូនដែលស្រលាញ់កូនឈើមកដាំកូនឈើជាមួយខ្ញុំ។

សូមរំលឹកថានៅរយៈពេលប៉ុន្មានថ្ងៃមកនេះ ប្រជាពលរដ្ឋខ្មែរបានរិះគន់ លោក ឡេង ណាវ៉ាត្រា បន្ទាប់ពីឃើញព័ត៌មានការឈូសឆាយដីព្រៃឈើនៅតំបន់ភ្នំតាម៉ៅ​ ពាក់ព័ន្ធជាមួយលោក ឡេង ណាវ៉ាត្រា។

ជុំវិញករណីនេះ សម្ដេច ហ៊ុន សែន បានបង្ហោះសារថា៖បងប្អូនជនរួមជាតិជាទីគោរពស្រឡាញ់!

ប៉ុន្មានថ្ងៃមកនេះមានសំណូមពរជាច្រើនមករាជរដ្ឋាភិបាលដើម្បីរក្សាទុកព្រៃនៅក្បែរសួនសត្វភ្នំតាម៉ៅទោះបីក្រសួងកសិកម្មបានពន្យល់ថាសួនសត្វភ្នំតាម៉ៅមិនមានប៉ះពាល់ក៏ដោយ។

ក្នុងនាមជាអ្នកទទួលខុសត្រូវខ្ពស់បំផុតនៃរាជរដ្ឋាភិបាលខ្ញុំសូមចេញបញ្ជា៖

១.លុបចោលទាំងអស់នូវរាល់ការអនុញ្ញាតឱយធ្វើការដោះដូរនិងអភិវឌ្ឍ។

២.រក្សាទុកដីនិងព្រៃនៅជុំវិញសួនសត្វភ្នំតាម៉ៅជាដីដែលត្រូវការពារនិងអភិរក្សដោយក្រសួងកសិកម្ម។

៣.ក្រុមហ៊ុនដែលបានឈូសឆាយត្រូវបញ្ឈប់សកម្មភាពនិងត្រូវដាំដើមឈើឡើងវិញលើដីដែលបានឈូសឆាយ។

សូមអរគុណចំពោះបងប្អូនជនរួមជាតិដែលបានចូលរួមផ្តល់យោបល់ប្រកបដោយការស្ថាបនា៕SRP

ខេត្តកំពង់ចាម​៖លោក យឹម ឆៃលី​ បានណែនាំ​ឲ្យ មន្ត្រីបន្តជំរុញ និង​ពង្រឹង​ការអនុវត្តគោលនយោបាយ ភូមិ ឃុំមានសុវត្ថិភាពទាំង៧ចំណុច​ និងខិតខំលើកកម្ពស់អភិបាលកិច្ច ធានាការផ្តល់សេវាសាធារណៈប្រកប​ដោយតម្លាភាព។

លោកក៏បានប្រាប់មន្ត្រីឲ្យអនុវត្ត​ឲ្យបានម៉ឹងម៉ាត់នូវអភិក្រម “ឆ្លុះកញ្ចក់ ងូតទឹក ដុសក្អែល ព្យាបាល និងវះកាត់”​ ព្រមទាំង​ខិតខំដោះស្រាយជម្លោះដីធ្លីក្រៅប្រព័ន្ធតុលាការ​ឲ្យ​បានល្អ​ប្រសើរ​ និងខិតខំជំរុញការអនុវត្តគោលនយោ​បាយអភិវឌ្ឍន៍ឃុំ ឲ្យទទួលបានសមិទ្ធផលថ្មីៗទៀត​។

លោកយឹម ឆៃលី​ ក៏បានណែនាំ​ឲ្យពង្រឹងការអនុវត្តឲ្យបានល្អ​​នូវ​តួនាទី ភារកិច្ច របៀបរបបធ្វើការ របស់ក្រុមប្រឹក្សាឃុំ និង​បន្តពង្រឹងការរៀបចំកម្លាំង​ដោយឈរ លើ​ទស្សនៈរក្សាចាស់ កសាងថ្មី​ ព្រមទាំងពង្រឹងការងារចលនាមហាជន ជាពិសេសចលនាស្រ្តី និងកម្មករ​ ​តាម​រយៈ​ការទំនាក់ទំនងល្អ​ជាមួយ​​​ប្រជាពលរដ្ឋ​។ លេីសពី​នោះ​ត្រូវមាន​ឆន្ទៈស្មោះត្រង់ និង​ទទួល​ខុស​ត្រូវខ្ពស់លើ​ការងាររបស់ខ្លួន ក្នុងគោលដៅ​លើកកម្ពស់​ជីវភាព​រស់នៅ​របស់​ប្រជា​ពលរដ្ឋ​ផងដែរ​។

ក្នុង​ពិធី​សម្ពោធ​ដាក់​ឲ្យ​ប្រេីប្រាស់​ជា​ផ្លូវការ​នូវ​អគារ​ទីស្នាក់ការ​ គណបក្សប្រជាជន​កម្ពុជា​ ស្រុកព្រៃឈរ​ នៅថ្ងៃអាទិត្យ នេះ​ លោក​ឧបនាយករដ្ឋមន្ត្រី យឹម ឆៃលី​ ប្រធានក្រុមការងារថ្នាក់កណ្តាល ចុះជួយ ខេត្តកំពង់ចាម ក៏បានផ្តល់នូវអនុសាសន៏ណែនាំ​ ដល់សមាជិក សមាជិកា​ គណបក្សប្រជាជន​កម្ពុជា​ស្រុកព្រៃឈរ​ ត្រូវការពារដាច់ខាតសន្តិភាព ស្ថិរភាពនយោបាយ សន្តិសុខ សណ្តាប់ធ្នាប់សង្គម ទប់ស្កាត់រាល់ការប៉ុនប៉ងបង្កចលាចល របស់ពួកប្រឆាំងជ្រុលនិយម និងមជ្ឈដ្ឋានអគតិ សំដៅធានាដំណើរការអភិវឌ្ឍន៍ និងការរស់នៅដ៏សុខសាន្តរបស់ប្រជា​ពលរដ្ឋ​៕SRP

ខេត្តបាត់ដំបង៖សម្ដេច ស ខេង ស្នើឱ្យថ្នាក់ដឹកនាំ និងសមាជិក សមាជិកាគណបក្សគ្រប់ថ្នាក់ក្នុងខេត្តបាត់ដំបង បន្តការបំពេញភារកិច្ចបម្រើជាតិ បម្រើប្រជាជនឱ្យបានល្អ ដើម្បីបន្តទទួលបានការគាំទ្រ ពីប្រជាពលរដ្ឋ និងត្រូវបន្តចិញ្ចឹម ចលនាគណបក្ស ឱ្យបានរឹងនាំ ដើម្បីពង្រឹងកម្លាំងគាំទ្រប្រកបដោយគុណភាព។ សម្ដេចក៏បានណែនាំឱ្យបន្តជំរុញប្រជាពលរដ្ឋ ពិសេស សមាជិកបក្សដែលមិនទាន់បានចុះឈ្មោះ ឬដល់អាយុត្រូវចុះឈ្មោះ ត្រៀមអញ្ជើញទៅចុះឈ្មោះបោះឆ្នោតឱ្យបានគ្រប់ៗគ្នា។

សម្ដេចបានមានប្រសាសន៍ថា កម្ពុជា បាននិងកំពុងមានសុខសន្តិភាព មានស្ថេរភាពយ៉ាងរឹងមាំ ហើយ សន្តិសុខសណ្ដាប់ធ្នាប់ សាធារណៈ ក៏មានភាពល្អប្រសើរ ជាបន្តបន្ទាប់ដែលបង្កលក្ខណៈសម្បត្តិ ដល់ការចាត់តាំងរៀបចំការបោះឆ្នោតឃុំ សង្កាត់ កាលពីពេលថ្មីៗ ប្រកបដោយសុវត្ថិភាព និងបង្កលក្ខណៈសម្បត្តិដល់វិស័យផ្សេងៗទៀត រួមទាំងជីវភាពរស់នៅរបស់ប្រជាពលរដ្ឋផងដែរ។

សម្ដេចក្រឡាហោម ស ខេង អនុប្រធានគណបក្សប្រជាជនកម្ពុជា និងជាប្រធានក្រុមការងារគណបក្សចុះមូលដ្ឋានខេត្តបាត់ដំបង និងព្រៃវែង ប្រសាសន៍យ៉ាងដូច្នេះ នៅថ្ងៃសៅរ៍ នេះ ក្នុងកិច្ចប្រជុំផ្សព្វផ្សាយសេចក្ដីសម្រេច សន្និបាតគណៈកម្មាធិការកណ្ដាលវិសាមញ្ញរបស់គណបក្សប្រជាជនកម្ពុជា នៅសាលមហោស្រពស្ទឹងសង្កែ ខេត្តបាត់ដំបង។

សម្ដេចស ខេង បានគូសបញ្ជាក់ថា សេចក្ដីសម្រេច សន្និបាតគណៈកម្មាធិការកណ្ដាលវិសាមញ្ញរបស់គណបក្សប្រជាជនកម្ពុជា ដែលបានផ្សាយនាឱកាសនេះ គឺជាមូលដ្ឋានបង្អែកដើម្បីចាត់ចែងការងាររហូតដល់មានការដាក់ចេញផែនការបន្ថែមទៀត សម្រាប់ដំណើរឈានឆ្ពោះទៅកាន់ការបោះឆ្នោតជ្រើសតាំងតំណាងរាស្រ្តនីតិកាលទី៧ នៃរដ្ឋសភា នៅឆ្នាំ២០២៣ខាងមុខនេះ។

សម្ដេចបានរម្លឹកថា កាលពីថ្ងៃទី៩ ខែកក្កដា ឆ្នាំ២០២២ សម្ដេចរួមនឹងអង្គប្រជុំ ធ្លាប់បានជួបជុំគ្នាម្ដងរួចហើយ ដោយយការជួបជុំនាពេលនោះ ដើម្បីបូកសរុបបទពិសោធន៍ និងលទ្ធផលនៃការបោះឆ្នោតជ្រើសរើសក្រុមប្រឹក្សាឃុំ សង្កាត់ សម្រាប់ខេត្តបាត់ដំបង និងដើម្បីជាការចូលរួមជាមួយគណៈកម្មាធិការកណ្ដាល ក្នុងការត្រៀមរៀបចំខ្លឹមសារបម្រើឱ្យសន្និបាតគណៈកម្មាធិការកណ្ដាលគណបក្សកាលពីពេលថ្មីៗនេះ៕SRP

ខេត្តកំពង់ចាម៖លោកយឹម ឆៃលី​ បានថ្លែងសង្កត់ធ្ងន់ថា “មាស ដែលចម្រាញ់ចេញពីរ៉ែធម្មជាតិ វាគង់នឹងរីងស្ងួតអស់នៅពេលណាមួយ ប៉ុន្តែ មាស ដែលចម្រាញ់ពីខួរក្បាលមនុស្ស ពិតជាមិនអាចរីងស្ងួតអស់នោះទេ”។ ដោយរាជរដ្ឋាភិបាល បានពង្រឹងនូវសន្តិភាព ស្ថិរភាពនយោបាយ សន្តិសុខ និងសណ្តាប់ធ្នាប់សង្គម ដើម្បីធានា និងសម្រេចឱ្យបាននូវស្ថិរភាព ម៉ាក្រូសេដ្ឋកិច្ច ការអភិវឌ្ឍ និងការកាត់បន្ថយភាពក្រីក្រ ជាពិសេសជាងពីឆ្នាំមកនេះ បានការពារ និងទប់ស្កាត់ប្រកបដោយប្រសិទ្ឋិភាពនូវជម្ងឺកូវីដ១៩ ផ្តល់ឱកាសមាសមួយសម្រាប់ក្មួយៗទទួលបានការសិក្សារៀនសូត្រ ដើម្បីអប់រំខ្លួនយើងឱ្យក្លាយទៅជាពលរដ្ឋល្អនៅក្នុងសង្គម​។

លោកឧបនាយករដ្ឋមន្ត្រី យឹម ឆៃលី ប្រធានក្រុមប្រឹក្សាស្តារអភិវឌ្ឍន៏វិស័យកសិកម្ម ​និងជនបទ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ចាម​ មានប្រសាសន៍យ៉ាងដូច្នេះ ក្នុងឱកាសអញ្ជើញប្រគល់​សញ្ញាបត្រ ថ្នាក់បរិញ្ញាបត្ររង ថ្នាក់បរិញ្ញាបត្រ និងថ្នាក់បរិញ្ញាបត្រជាន់ខ្ពស់ ដល់​និស្សិតជ័យលាភីចំនួន ១.២៦២នាក់​ នៃសាខាសាកលវិទ្យាល័យវេស្ទើន សាខាខេត្តកំពង់ចាម​ នៅមណ្ឌលអភិរក្សសួនគ្រញូង នគរបាជ័យ។

ពិធីនេះនៅព្រឹកមិញដោយមានការអញ្ជើញចូលរួមពីលោក ​អ៊ុន ចាន់ដា អភិបាលខេត្តកំពង់ចាម និងថ្នាក់ដឹកនាំក្រសួងអប់រំ យុវជន និងកីឡា​ ព្រមទាំង​ថ្នាក់ដឹកនាំសាកលវិទ្យាល័យវេស្ទើនជាច្រើនរូបទៀតផងដែរ។

ថ្លែងក្នុង​ពិធី​ លោក យឹម ឆៃលី​ មានប្រសាសន៍ទៀតថា​ វិស័យអប់រំបានដើរតួនាទីជាក្បាលម៉ាស៊ីនជំរុញការអភិវឌ្ឍ លើគ្រប់វិស័យ និងធានានិរន្តរភាព នៃការអភិវឌ្ឍ​ ទាំងនោះ ប្រៀបបាននឹងរោងចក្រ កែច្នៃមនុស្ស ដែលជាកោសិកាមួយដ៏សំខាន់ នៅក្នុងសង្គម ហើយពួកគេត្រូវមានចំណេះដឹង មានសមត្ថភាពវិជ្ជាជីវៈ មានសមត្ថភាពស្រាវជ្រាវក្នុងការបង្កើតគោលការណ៍ ទ្រឹស្តី និងមូលដ្ឋានសម្ភារៈថ្មីនានា ដើម្បីបម្រើសេចក្តីត្រូវការរបស់សង្គមមនុស្ស នៅក្នុងបរិបទនៃសម័យឌីជីថល អច្ឆរិយៈបច្ចេកវិទ្យា និងវិទ្យាសាស្ត្រទំនើប។

លោកឧកញ៉ា តែ ឡូរិន ប្រធានក្រុមប្រឹក្សាភិបាលនៃសាកលវិទ្យាល័យ វេស្ទើន បានមានប្រសាសន៍ថា អស់រយៈពេលជិត២០ឆ្នាំមកនេះ សកលវិទ្យាលវេស្ទើន បានចូលរួមបណ្តុះបណ្តាលធនធានមនុស្សដោយឈរលើគោលការណ៏គុណភាពជាចម្បង ដោយទទួលបាននូវការវាយតម្លៃខ្ពស់ពីស្ថាប័នជាតិ និងអន្តរជាតិអំពីគុណភាពនៃការសិក្សា និងបានធ្វើកិច្ចសហការជាមួយសកលវិទ្យានានាលើសកលលោក ពិសេសថ្មីៗនេះ សាកលវិទ្យាល័យវេស្ទើន បានចុះកិច្ចព្រមព្រៀងជាមួយសាកលវិទ្យាល័យ យ៉ុងណាម ដែលជាសាកលវិទ្យាល័យដ៏ធំ និងល្បីល្បាយនៃសាធារណៈរដ្ឋកូរ៉េ លើជំនាញ ចលនាភូមិថ្មី (សាម៉ោលអុនឌុង) ដែលមានចរិតជួយដល់កសិករ ពាណិជ្ជករ ផលិតករ នៅតាមទីជនបទ ក្នុងការផលិត និងរកទីផ្សារសម្រាប់ផលិតផលក្នុងស្រុក​៕SRP

ខេត្តបាត់ដំបង៖លោក សុខ លូ អភិបាលខេត្តបាត់ដំបង នៅថ្ងៃសុក្រ ម្សិលមិញ បានបញ្ជាដោយផ្ទាល់ ដល់អាជ្ញាធរមានសមត្ថកិច្ច និងក្រុមការងារ ក្នុងការត្រួតពិនិត្យរថយន្តដឹកទំនិញធុនធ្ងន់ ដែលបានដឹកទំនិញចូលក្នុងក្រុងបាត់ដំបង ដែលធ្វើដំណើរពីភូមិសាស្រ្ដរាជធានីភ្នំពេញ ចូលដល់ក្នុងក្រុងបាត់ដំបង ដែលបង្កឱ្យមានការខូចខាត ផ្លូវសាធារណៈផង និងការប្រព្រឹត្តខុសពីសេចក្ដីជូនដំណឹងរបស់រដ្ឋបាលខេត្តបាត់ដំបង ស្ដីពីការបញ្ឈប់រថយន្តដឹកជញ្ជូនធុនធ្ងន់ចូលមកក្នុងក្រុងបាត់ដំបង និងត្រូវផ្លាស់ប្ដូរទីតាំងឃ្លាំងស្ដុកទំនិញទៅនៅក្រៅក្រុងបាត់ដំបង។

នៅក្នុងប្រតិបត្តិការនេះដែរ ក៏បានធ្វើការហាមឃាត់រថយន្តធុនធ្ងន់មួយចំនួន ដែលចូលក្នុងក្រុងបាត់ដំបង និងបានស្វែងរកឃើញទំនិញហាមឃាត់មួយចំនួន ដោយបច្ចុប្បន្ននេះចំពោះរថយន្តដែលដឹកទំនិញហាមឃាត់ទាំងនោះ ត្រូវបានសមត្ថកិច្ចគយចល័ត នាំយកទៅទីស្នាក់ការគយចល័តនៅឃុំអូរតាគី ស្រុកថ្មគោលខេត្តបាត់ដំបង ដើម្បីចាត់ការតាមនីតិវិធី។

លោក សុខ លូ បានធ្វើការបញ្ជាក់សារជាថ្មី ដល់អាជ្ញាធរមានសមត្ថកិច្ចទាំងអស់ ត្រូវធ្វើយ៉ាងណាធ្វើការបង្រ្កាប ឱ្យបានចំពោះរថយន្តដឹកទំនិញធុនធ្ងន់ ដែលចូលក្នុងក្រុងបាត់ដំបង ដែលធ្វើឱ្យមានការខូចខាត ដល់ផ្លូវក្នុងក្រុង បង្កគ្រោះថ្នាក់ដល់អ្នកធ្វើដំណើរនៅក្នុងក្រុងផង និងជាពិសេសធ្វើឱ្យខូចសណ្ដាប់ធ្នាប់ក្នុងក្រុងផងដែរ។

លោកក៏បានបញ្ជាក់បន្ថែមដល់សមត្ថកិច្ចគយចល័ត ក៏មិនត្រូវភ្លេចត្រួតពិនិត្យទំនិញខុសច្បាប់ ឬទំនិញមិនបង់ពន្ធជូនរដ្ឋដែរ ដែលនេះគឺជាតួនាទីរបស់សាខាគយ និងរដ្ឋាករខេត្តបាត់ដំបង ត្រូវពិនិត្យឱ្យមែនទែន បើទោះបីជារថយន្តនោះជារថយន្តដឹកទំនិញធុនតូច រថយន្តដែលអាចអនុញ្ញាតិ ឱ្យចូលក្រុងបាន ក៏មិនមែនមានន័យថា មិនពិនិត្យទំនិញមុនសិនដែរ ហើយក្នុងករណីបើរកឃើញដឹកទំនិញដែលខុសច្បាប់ ឬមិនមានការបង់ពន្ធជូនរដ្ឋត្រឹមត្រូវទេ ត្រូវធ្វើការហាមឃាត់ជាបន្ទាន់ដោយមិនត្រូវឱ្យរួចខ្លួនឡើយ។

លោកសុខ លូ បានធ្វើការអំពាវនាវដល់អាជីវករក្នុងក្រុងបាត់ដំបង ត្រូវមានការយល់ដឹងអំពីការហាមឃាត់រថយន្តដឹកទំនិញធុនធ្ងន់ចូលក្នុងក្រុងបាត់ដំបង ព្រោះកន្លងមកមានបងប្អូនអាជីវករ ពាណិជ្ជករ និងអ្នកប្រកបអាជីវកម្មផ្សេងៗ បានធ្វើការដឹកជញ្ជូនទំនិញលើសទម្ងន់ និងប្រើប្រាស់រថយន្តធុនធ្ងន់ទៀត បណ្ដាលឱ្យខូចខាតផ្លូវថ្នល់ក្នុងក្រុងអស់ជាច្រើន ដែលធ្វើឱ្យបាត់បង់ថវិកាជាតិក្នុងការជួសជុលផ្លូវក្នុងក្រុងកាន់តែច្រើន។

គួរបញ្ជាក់ផងដែរថា កន្លងមករដ្ឋបាលខេត្តបាត់ដំបង បានធ្វើការជូនដំណឹងដល់ប្រជាពលរដ្ឋ អាជីវករ ពាណិជ្ជករ ស្ដីពីការបញ្ឈប់រថយន្តដឹកជញ្ជូនធុនធ្ងន់ ចូលមកក្រុងបាត់ដមបង និងផ្លាស់ប្ដូរទីតាំងឃ្លាំងស្ដុកទំនិញទៅនៅខាងក្រៅក្រុងបាត់ដំបង ដោយក្នុងនោះរដ្ឋបាលខេត្តបានធ្វើការសម្រួលរយៈពេលយ៉ាងយូរ០១ឆ្នាំគិតចាប់ពីថ្ងៃទី០២ ខែឧសភា ឆ្នាំ២០២២ រហូតដល់បំណាច់ខែមេសា ឆ្នាំ២០២៣ ដើម្បីធ្វើការផ្លាស់ប្ដូរទីតាំងឃ្លាំងស្ដុកទំនិញទៅក្រៅក្រុង បើពុំនោះទេ រដ្ឋបាលខេត្តនឹងចាត់វិធានការតាមផ្លូវច្បាប់យ៉ាងម៉ឺងម៉ាត់នូវរាល់ការដឹកជញ្ជូនទំនិញដោយប្រើប្រាស់រថយន្តធុនធ្ងន់ ឬដឹកជញ្ជូនលើសទម្ងន់ដែលបានកំណត់៕SRP

ខេត្តសៀមរាប៖បុរសម្នាក់ត្រូវបានគេប្រទះឃើញស្លាប់ជាប់នឹងរបងដីឡូត៍។ ហេតុការណ៍បានកើតឡើងនៅវេលាម៉ោង៧និង៣០នាទី​ ថ្ងៃសៅរ៍នេះនៅចំណុចក្រុមទី១៥ ភូមិមណ្ឌល៣ សង្កាត់ស្លក្រាម​ ក្រុងសៀមរាប​។

ប្រភពបានឲ្យដឹងថាជនរងគ្រោះមាន ឈ្មោះ វ៉ាន់ ភេទប្រុសអាយុ៤២ ឆ្នាំមុខរបរធ្វើសំណង់។

តាមការសាកសួរបំភ្លឺរបស់ប្រពន្ធ ជនរងគ្រោះឈ្មោះ តាំង គា​ អាយុ៤២ឆ្នាំ​ និងអ្នកជិតខាងបានបំភ្លឺថា ប្ដីរបស់គាត់ជាមនុស្សញៀនស្រាឧស្សាហ៍ប្រកាច់​ផងដែរ។ នៅពេលយប់កើតហេតុ បានសុំគាត់ទៅបត់ជើងខាងក្រៅផ្ទះ​ ក៏ពុំឃើញចូលផ្ទះវិញទេ​ លុះព្រឹកឡើងម៉ោង៧និង៣០នាទីថ្ងៃទី ០៦ ខែសីហា​ ឆ្នាំ២០២២ ទើបទទួលដំណឹងថា ប្ដីរបស់គាត់បានស្លាប់ជាប់នឹងរបងដីឡូត៍ទំនេរ។

យោងតាមការបំភ្លឺពីប្រពន្ធជនរងគ្រោះនិងអ្នកជិតខាង​ មូលហេតុ ដែលជនរងគ្រោះស្លាប់ដោយសារញៀនស្រាខ្លាំងពុំមានពាក់ព័ន្ធបទល្មើសនោះឡើយ៕SRP

ខេត្តព្រះវិហារ៖សម្ដេច ស ខេង បានប្រាប់អាជ្ញាធរខេត្តព្រះវិហារ ឱ្យយកចិត្តទុកដាក់ដោះស្រាយសំណើរ សំណូមពរ បញ្ហាប្រឈម និងមតិយោបល់ប្រជាពលរដ្ឋ ឱ្យបានល្អ និងមានប្រសិទ្ធភាព ព្រមទាំងយកចិត្តទុកដាក់ទប់ស្កាប់ការកាប់បំផ្លាញព្រៃឈើ និងថែរក្សាធនធានធម្មជាតិផងដែរ។

ការណែនាំឲ្យទប់ស្កាប់ការកាប់បំផ្លាញព្រៃឈើ និងថែរក្សាធនធានធម្មជាតិ របស់សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ នៅថ្ងៃសុក្រម្សិលមិញ ក្នុងពិធីប្រកាសចូលកាន់មុខតំណែងអភិបាល អភិបាលរង នៃគណៈអភិបាលខេត្តព្រះវិហារ។

ក្នុងពិធីសម្ដេចស ខេង ក៏បានប្រាប់អភិបាលខេត្តព្រះវិហារថ្មី ឲ្យយកចិត្តទុកដាក់ប្រយុទ្ធប្រឆាំងគ្រឿងញៀន ខុសច្បាប់ ដែលភាគច្រើនក៏បាននាំចូលតាមច្រកព្រំដែនខេត្តព្រះវិហារជាប់ប្រទេសឡាវ និងប្រទេសថៃ។

សម្ដេចបានស្នើថា«កងយុទ្ធពលខេមរភូមិន្ទ កងកម្លាំងនគរបាលជាតិដែលឈរជើងតាមព្រំដែន និងអាជ្ញាធរសមត្ថកិច្ចទាំងអស់ ដែលនៅតាមព្រំដែនត្រូវសហការគ្នា ហើយកុំឃុបឃិតជាមួយពួកជួញដូរគ្រឿងញៀនឱ្យសោះ»។

សម្ដេចបន្ថែមថាក្រៅតែពីបង្កផលប៉ះពាល់ដល់សុខភាពមនុស្ស និងសន្តិសុខសង្គម បញ្ហាគ្រឿងញៀននេះក៏អាចជាប់ពាក់ព័ន្ធនឹងការសម្អាតប្រាក់ ឬលាងលុយកខ្វល់ ដែលអាចធ្វើឱ្យប្រព័ន្ធធនាគារកម្ពុជាត្រូវចាត់បញ្ចូលក្នុងបញ្ជីប្រផេះ ធ្វើឱ្យប៉ះពាល់ដល់ដំណើរការសេដ្ឋកិច្ចជាតិទាំងមូល។ ក្រៅពីនេះ បញ្ហាគ្រឿងញៀនក៏អាចជាប់ពាក់ព័ន្ធនឹងការរីកសាយភាយអាវុធមហាប្រល័យ និងអំពើភេរវកម្ម ដែលអង្គការសហប្រជាជាតិ និងសហគមន៍អន្តរជាតិកំពុងយកចិត្តទុកដាក់ប្រឆាំងផងដែរ។

សម្ដេចក៏បានផ្ដល់ការណែនាំឱ្យរដ្ឋបាលខេត្ត ក្រុង ស្រុក និងឃុំ សង្កាត់ ទាំងអស់នៃខេត្តព្រះវិហារ យកចិត្តទុកដាក់ក្នុងការអនុវត្តគោលនយោបាយភូមិឃុំ សង្កាត់ មានសុវត្ថិភាព ក្នុងនោះរាប់ទាំងការប្រយុទ្ធប្រឆាំងអំពើជួញដូរមនុស្ស ការប្រយុទ្ធប្រឆាំងជំងឺកូវីដ-១៩ផងដែរ។

សូមជម្រាបថាលោក គីម រិទ្ធី ត្រូវបានប្រកាសតែងតាំងជាអភិបាល នៃគណៈអភិបាលខេត្តព្រះវិហារ ជំនួសលោកប្រាក់ សុវណ្ណ ដែលបានចូលនិវត្តន៍៕SRP

ខេត្តសៀមរាប៖បុរសម្នាក់បានដេកស្លាប់ នៅក្នុងបន្ទប់ជាន់ទី២ ក្នុងផ្ទះរបស់ខ្លួន រយៈពេលពីរយប់ពីរថ្ងៃ ទើបក្រុមគ្រួសារសាច់ញាតិ បានដឹង រាយការណ៍ជូនសមត្ថកិច្ច។

ហេតុការណ៍ភ្ញាក់ផ្អើលនេះ កើតឡើងនៅវេលាម៉ោង ១៣ និង ៣០នាទី ថ្ងៃទី ០៥ ខែកក្កដាឆ្នាំ ២០២២ នៅក្នុងបន្ទប់ដេក ជាន់ទី ២ ក្នុងផ្ទះរបស់ជនរងគ្រោះ ដែលស្ថិតនៅក្នុង ភូមិជ្រៃ ឃុំកណ្ដែក ស្រុកប្រាសាទបាគង ខេត្តសៀមរាប។
របាយការណ៍សមត្ថកិច្ចបានឲ្យដឹងថា៖ ជនរងគ្រោះ មានឈ្មោះ យ៉ាត វណ្ណា ភេទប្រុស អាយុ ៥៦ ឆ្នាំ មានស្រុកកំណើត ភូមិគោកថ្មី ឃុំពួក ស្រុកពួក ខេត្តសៀមរាប បច្ចុប្បន្នស្នាក់នៅផ្ទះកើតហេតុ។
សមត្ថកិច្ចបន្តថា បន្ទាប់ពីក្រុមគ្រួសារសាច់ញាតិ ប្រទះឃើញ ជនរងគ្រោះ ខាងលើ បានដេកស្លាប់ និងមានហូរឈាម ចេញតាមមាត់ផងនោះ ក៏បានរាយការណ៍ជូនសមត្ថកិច្ចចុះធ្វើកុសលវិច័យភ្លាមៗ។
បន្ទាប់ពីពិនិត្យ ជុំវិញកន្លែងកើតហេតុ និងទៅលើ សាកសពជនរងគ្រោះ ឃើញថាមិនមានអ្វីខុសប្រក្រតី ដែលពាក់ព័ន្ធនឹងករណីអ្វីផ្សេង នោះឡើយ។
ចំពោះឈាមហូរចេញពីមាត់សមត្ថកិច្ចបញ្ជាក់ថា ដោយសារ ជនរងគ្រោះ បានស្លាប់ ក្នុងរយៈពេលយូរ (ប្រហែលម៉ោង ១-២ យប់ថ្ងៃទី៤ ខែសីហា ឆ្នាំ២០២២) ទើបបណ្ដាលឱ្យមានហូរឈាមចេញតាមមាត់។
សមត្ថកិច្ចបានបញ្ជាក់មូលហេតុថា ករណីស្លាប់នេះគឺ ដោយសារ ខ្យល់គរ ដោយជនរងគ្រោះ មានជំងឺប្រចាំកាយ លើសឈាម និង រោគបេះដូង។
ក្រោយពីធ្វើការពិនិត្យ សាកសពរួច សមត្ថកិច្ច បានប្រគល់ជូន ក្រុមគ្រួសារ ដើម្បីយកទៅ ធ្វើបុណ្យ តាមប្រពៃណី៕SRP

ខេត្តកំពង់ចាម៖ក្នុងអង្គសិក្ខាសាលាសមាហរណកម្មកម្មវិធីវិនិយោគបីឆ្នាំរំកិល (២០២៣-២០២៥) នៅស្រុកចំការលើនៅព្រឹកមិញ លោក អ៊ុន ចាន់ដា អភិបាលខេត្តកំពង់ចាម បានផ្ដល់អនុសាសន៍សំខាន់ៗមួយចំនួនសម្រាប់ឲ្យកិច្ចដំណើរការសិក្ខាសាលាទទួលបានលទ្ធផលល្អប្រសើរដូចខាងក្រោម៖

១- មន្ទីរជំនាញអង្គការនានា ដែលបានចុះហត្ថលេខាលើកិច្ចព្រមព្រៀងបណ្ដោះអាសន្នក្នុងសិក្ខាសាលាសមាហរណកម្ម ឆ្នាំ២០២១កន្លងទៅ សូមធ្វើការពិនិត្យ លើគម្រោង ណា មិន ទាន់បាន អនុវត្ដ គម្រោងណាបានអនុវត្ដរួច ដើម្បីបង្កើនការសហការផ្ដល់ព័ត៌មានពីការអនុវត្ដដល់ឃុំ។

២- មន្ទីរអង្គភាពដែលជាស្ថាប័នរបស់រដ្ឋឈានមុខក្នុងការផ្ដល់សេវារបស់ខ្លួន ស្របតាមគោលនយោបាយ វិមជ្ឈការ និងវិសហមជ្ឈការរបស់រាជរដ្ឋាភិបាល ផ្ដល់ការគាំទ្រដល់គម្រោងអាទិភាពឃុំ។ សូមប្រើប្រាស់ឲ្យអស់លទ្ធភាពធនធានផ្សេងៗដែលបាន ពីថ្នាក់ជាតិតាមរយៈក្រសួងសាមី ឬធនធានមកពីអង្គការជាតិ អន្ដរជាតិ សប្បុរសជន និងប្រភពផ្សេងៗ ដើមី្បគាំទ្រគម្រោងអាទិភាពរបស់ឃុំ នៅក្នុងសិក្ខាសាលានេះ។ មន្ទីរជំនាញក៏ត្រូវ បង្ហាញពីគោលនយោបាយ ជំនាញរបស់ខ្លួន សម្រាប់ការអភិវឌ្ឍន៍ មូលដ្ឋាន ដើម្បីឲ្យស្រុក និងឃុំ រៀបចំផែនការអភិវឌ្ឍន៍ និងកម្មវិធីវិនិយោគមានសង្គតិភាព ជាមួយគោលនយោបាយ របស់ រាជរដ្ឋាភិបាលផែនការ យុទ្ធសាស្ដ្រអភិវឌ្ឍន៍ជាតិ និងផែនការអភិវឌ្ឍន៍របស់វិស័យជំនាញ។ ដោយកន្លងមកយើងបានសង្កេតឃើញថាមន្ទីរជំនាញគាំទ្រគម្រោងសកម្មភាពរបស់ឃុំ នៅក្នុងសិក្ខាសាលាសមាហរណកម្ម មានកម្រិតនៅឡើយ ដូចនេះសំណូមពរ ឲ្យមន្ទីរ អង្គភាពជំនាញ ខិតខំគាំទ្រគម្រោងឃុំ ដើម្បីបង្ហាញពីការយក ចិត្តទុកដាក់ផ្តល់សេវាសាធារណៈ ជូនប្រជាជននៅមូលដ្ឋាន។

៣- សំណូមពរដល់អង្គការជាតិអន្ដរជាតិ ដែលជាដៃគូអភិវឌ្ឍន៍ សូមពិនិត្យលើសកម្មភាពជាអាទិភាពរបស់ប្រជាជននៅមូលដ្ឋាន ដើម្បីបង្កើនការគាំទ្រគម្រោងវិនិយោគរបស់ឃុំ នៅតាម ទីតាំង គោលដៅអភិវឌ្ឍន៍របស់ខ្លួន។

៤- សូមយកវេទិកានេះធ្វើការពិភាក្សាគ្នាទៅវិញទៅមករវាងឃុំ និងមន្ទីរ-អង្គភាពអង្គការជាតិអន្ដរជាតិ ឲ្យបានច្បាស់លាស់ ដើម្បីធ្វើការចរចាររកអ្នកគាំទ្រ ហើយឈានដល់ការចុះកិច្ចព្រមព្រៀងបណ្ដោះអាសន្នសម្រាប់អនុវត្ដគម្រោងនៅឆ្នាំ២០២៣៕SRP

ខេត្តកំពង់ចាម៖អភិបាលខេត្តកំពង់ចាមលោក អ៊ុន ចាន់ដា បានក្រើនរំលឹកដល់ ប្រជាពលរដ្ឋទាំងអស់ ត្រូវយកចិត្តទុកដាក់ថែរក្សាអនាម័យ សំអាតលំនៅដ្ឋាន ដុតកំទេចចោលវត្ថុដក់ទឹកនានា ដើម្បីបំផ្លាញជម្រកមូសខ្លា។ ក្នុងនោះត្រូវសម្រាន្តក្នុងមុង ដើម្បីការពារជម្ងឺគ្រុនឈាមនិងឈ្វេងយល់ អំពីរោគសញ្ញានិងការពារការឆ្លងជម្ងឺអុតស្វា ដែលពិភពលោកកំពុងចាប់អារម្មណ៍។ លោក អ៊ុន ចាន់ដា បន្តថា បុគ្គលម្នាក់ៗ ក៏ដូចជាក្រុមគ្រួសារនីមួយៗ ត្រូវបន្តរៀនរស់ជាមួយជម្ងឺកូវីដ-១៩ ដែលចាំបាច់ ត្រូវអនុវត្ត អោយបានខ្ជាប់ខ្ជួននូវវិធានសុខាភិបាល ” ៣ការពារ ៣កុំ ” និង ជំរុញការចាក់វ៉ាក់សាំង ទាំងដូសមូលដ្ឋាននិងដូសជំរុញ អោយបានគ្រប់គ្នា។

លោកអ៊ុន ចាន់ដា មានប្រសាសន៍រំលឹកបែបនេះក្នុងឳកាសអញ្ជើញប្រគល់ផ្ទះមនុស្សធម៌ទី១១ ជូនជនចាស់ជរាទ័លលំបាក១គ្រួសារ  ឈ្មោះ ខៀវ ខេត អាយុ ៧២ឆ្នាំ រស់នៅភូមិទួលប្រាក់ ឃុំតាអុង ស្រុកចំការលើ ព្រឹកមិញនេះ។

គួរបញ្ជាក់ថាលោកតាខៀវ ខេត និងប្រពន្ធឈ្មោះ រិទ្ធ ហុន អាយុ៧០ឆ្នាំ  ជាជនចាស់ជរាទ័លលំបាក រស់នៅពឹងអាស្រ័យតែលើការជួយរបស់រាជរដ្ឋាភិបាលកម្ពុជាតាមរយ: ប័ណ្ណសមធម៌ ក្រ២។ ពួកគាត់ មានកូនប្រុសស្រី៣នាក់ បានរៀបការបែកគ្រួសារ ខណ:ពួកគេ ក៏មានជីវភាពលំបាកដូចគ្នាមិនអាចពឹងពាក់បាន។  ដោយស្ថានភាពលំបាកបែបនេះ លោក អ៊ុន ចាន់ដា ប្រធានគណៈកម្មាធិការសាខា បានសម្រេចផ្តល់ជូនផ្ទះឈើខ្ពស់ផុតពីដី ប្រក់ស័ង្កសី (ទំហំ៤ម×៦ម) ១ខ្នង តម្លៃប្រមាណ១០លានរៀល ព្រមទាំងផ្តល់សម្ភារសម្រាប់សង្កត់ផ្ទះថ្មី រួមមាន អង្ករ ៥០គក្រ, ត្រីខ ២០កំប៉ុង, ទឹកត្រី ១២ដប ទឹកស៊ីអ៊ីវ ១២ដប, មី ២កេស, ឃីត ២សម្រាប់,  អាវយឺត ១២, ម៉ាស់ ២ប្រអប់ , សម្ភារផ្ទះបាយមួយចំនួន និងថវិកា ២០ម៉ឺនរៀល។ ដោយឡែក លោកតា លោកយាយ ដែលចូលរួមជាសាក្សី ក្នុងពិធីនេះចំនួន ១២នាក់ ក្នុងម្នាក់ៗ ទទួលបាន  អង្ករ ត្រីខ ឃីត មី ទឹកត្រី ទឹកស៊ីអ៊ីវ និង អាវយឺត ម៉ាសព្រមទាំង ថវិកាចំនួន២ម៉ឺនរៀលផងដែរ៕SRP