ព័ត៌មានជាតិ

ភ្នំពេញ៖សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានបញ្ជាអោយបញ្ឈន់ការកុងត្រាផ្ដាច់មុខរវាងក្រុមហ៊ុនសេវាទូរស័ព្ទ និងសេវាអ៉ិនធើណែត ជាមួយ ក្រុមហ៊ុនបុរី ដែលបានបង្កផលលំបាកយ៉ាងខ្លាំងក្នុងការរស់នៅប្រចាំថ្ងៃរបស់ប្រជាពលរដ្ឋ រស់នៅក្នុងបុរី ដោយសារបញ្ហា មិនមានសេវាទូរស័ព្ទ និង អ៉ិនធើណែត ក្នុងបុរី។

សម្ដេចតេជោ បញ្ជាបែបនេះនៅក្នុង ពិធីប្រគល់សញ្ញាបត្រជូននិស្សិតសាកលវិទ្យាល័យពុទ្ធិសាស្ត្រ នៅថ្ងៃពុធ១៧ ខែសីហា នេះ។

សម្ដេចនាយករដ្ឋមន្ត្រីបានបញ្ជាក់ថា ការងារនេះ ត្រូវធ្វើឡើងតាមរយៈការប្រកួតប្រជែងរវាងក្រុមហ៊ុនផ្ដល់សេវាទូរស័ព្ទ និងអ៉ិនធើណែត ដើម្បីសម្រួលដល់ការប្រើប្រាស់ របស់ប្រជាពលរដ្ឋរស់នៅក្នុងបុរី៕SRP

ខេត្តសៀមរាប៖សាច់សត្វសុនខ(ឆ្កែ)ក្លាសេចំនួន ១៣០០ គីឡូក្រាម ដែលឈ្មួញដឹកចេញពីតាមបណ្តាខេត្តផ្សេងៗឆ្លងកាត់សៀមរាប បម្រុងយកទៅលក់នៅភ្នំពេញ ត្រូវបានសមត្ថកិច្ចជំនាញខេត្តសៀមរាបចាប់បាន។

ការបង្ក្រាបបានធ្វើឡើងនៅវេលាម៉ង ០១និង៣០នាទី ព្រឹកថ្ងៃទី១៦ ខែសីហា ឆ្នាំ២០២២ នៅស្រុកប្រាសាទបាគង តាមបណ្ដោយផ្លូវជាតិលេខ ៦។ ចំណែកការដុតបំផ្លាញចោល នៅរសៀលថ្ងៃទី១៦ខែសីហា ឆ្នាំ២០២២នេះ។

ប្រភពព័ត៌មានបានឲ្យដឹងថារថយន្ត ដែលដឹកសាច់ឆ្កែពណ៌ស ពាក់ស្លាកលេខ កំពត 2A.1924 មានដឹកចំនួន៣ធុងធំ និង១ធុងតូច ចំនួន ១៣៤ក្បាល ទម្ងន់ប្រមាណ ១៣០០គីឡូក្រាម ប្រព្រឹត្តដោយឈ្មោះ ណាន ឆាត ភេទប្រុស អាយុ២៥ឆ្នាំ រស់នៅភូមិប្រយុទ្ធ ឃុំទំនប់ ស្រុកបាធាយ ខេត្តកំពង់ចាម។ តាមការឆ្លើយបំភ្លឺពីម្ចាស់ សត្វសុនខទាំងនេះបានដឹកចេញពីខេត្តបន្ទាយមានជ័យ ឆ្ពោះទៅរាជធានីភ្នំពេញ។

ករណីនេះរថយន្តដឹកសត្វសុនខ មន្ត្រីជំនាញយកមករក្សាទុកនៅមន្ទីរកសិកម្ម រងចាំម្ចាស់ចូលខ្លួនមកដោះស្រាយតាមនីតិវិធីច្បាប់។

មន្ត្រីជំនាញបានសំណូមពរចំនួន២ចំណុចថា ទី១ សូមអាជីវករទាំងអស់រកមុខរបរថ្មី ថ្លៃថ្នូរស្របច្បាប់ និងលើកតម្លៃខេត្តសៀមរាប ជាខេត្តវប្បធម៌ផងដែរ។
ទី២ចំពោះអ្នកនិយមពិសារសាច់សុនខ ក្នុងរយៈកាលកន្លងមក មេត្តាអធ្យាស្រ័យយល់យោគ ពីព្រោះវាអាចប៉ះពាល់សេចក្តីថ្លៃស្នូររបស់អ្នកហូបនិងអាចប៉ះពាល់ដល់សុខភាពផងដែរ ព្រោះសត្វសុនខ(ឆ្កែ)ទាំងនោះវាមិនមែនមានសុខភាពល្អទាំងអស់នោះទេ។

នៅខេត្តសៀមរាប បើទោះបីជាមន្ទីរកសិកម្មរុក្ខាប្រមាញ់និងនេសាទបានចេញលិខិតហាមឃាត់យ៉ាងណាក៏ដោយ ក៏ទីតាំងមួយចំនួនគេសង្កេតឃើញមានលក់សាច់សុនខ(ឆ្កែ) ដដែល។ កក្តាបែបនេះត្រូវបានគេលើកឡើងថាមកពីជំនាញពេទ្យ មានភាពកម្សោយឬអាចមានការឃុបឃិតគ្នាជាប្រព័ន្ធផងដែរ៕SRP

ខេត្តសៀមរាប៖នៅទីបំផុតប៉ូលិសខេត្តសៀមរាប បានធ្វើកិច្ចសន្យាចំពោះអ្នកគ្រប់គ្រងហាងនេះ ដែលមាន ឈ្មោះ គង់ ផេង ភេទប្រុស អាយុ៤៤ ឆ្នាំ ឲ្យបញ្ឈប់សកម្មភាពផ្សាយបន្តផ្ទាល់អំពីការជល់មាន់តាមអនឡាញ បង្ការកុំឲ្យមានការលេងភ្នាល់ដាក់លុយ និង ការលេងល្បែងស៊ីសងខុសច្បាប់គ្រប់ប្រភេទនៅក្នុងហាងនេះ។

ការធ្វើកិច្ចសន្សានេះតាមបញ្ជារបស់លោក តេង ច័ន្ទណាត ស្នងការនគរបាលខេត្តសៀមរាប បន្ទាប់ពីបានចុះទៅស្រាវជ្រាវទៅដល់ទីតាំង ហាងកាហ្វេឈ្មោះ ណូគា ១ ដែលស្ថិតនៅភូមិវត្តបូព៌ សង្កាត់សាលាកំរើក ក្រុងសៀមរាប ខេត្តសៀមរាប ក្រោយព័ត៌មានផ្សាយថា”តើពិតដូចការសង្ស័យរបស់ប្រជាពលរដ្ឋថា ទីតាំងបើកល្បែងជល់មាន់អនឡាញ ក្នុងក្រុងសៀមរាប គឺជាឆ្នាំងបាយរបស់មន្ត្រីស្នងការខេត្ត ទើបគ្មានវិធានការណាចុះបង្ក្រាប”។

ករណីនេះប៉ូលិសបានបញ្ជាក់ថាតាមការពិនិត្យឃើញថា៖ នៅក្នុងហាងកាហ្វេនេះ មានប្រជាពលរដ្ឋអង្គុយមើលវីដេអូ និងផឹកកាហ្វេធម្មតា ដែលនៅក្នុងហាងនេះមាន បំពាក់កញ្ចក់ LCD សរុបចំនួន ០៦គ្រឿង នៅលើជញ្ជាំងហាង (ចំនួន ០៤គ្រឿង សម្រាប់មើលវីដេអូរឿងផ្សេងៗនិង ០២គ្រឿងទៀត សម្រាប់មើលការជាន់មាន់តាមអនឡាញ) ប៉ុន្តែ មិនមានការភ្នាល់ដាក់លុយអ្វីនោះទេ៕SRP

ខេត្តសៀមរាប៖សម្ដេចស ខេង បានទាញចំណាប់អារម្មណ៍សិស្សនគរបាលកត់សម្គាល់អំពីបទល្មើសប្រឈមៗក្នុងសង្គម និងងាយបង្កគ្រោះថ្នាក់ដល់ប្រទេសជាតិ ពិសេសបទល្មើសគ្រឿងញៀន។ ករណីនេះសម្ដេចក៏បានបញ្ជាក់អំពីទិសស្លោក៣កុំ ១រាយការណ៍ រួមមាន កុំពាក់ព័ន្ធ កុំអន្តរាគមន៍ កុំលើកលែង និង១រាយការណ៍ ត្រូវរាយការណ៍ ផ្តល់ព័ត៌មាន ដល់សមត្ថកិច្ចអំពីមុខសញ្ញាជួញដូរ ចែកចាយ ប្រើប្រាស់ ទីតាំងកែច្នៃផលិតនិងទីតាំងស្តុកទុកគ្រឿងញៀនខុសច្បាប់ដល់សមត្ថកិច្ច។

សម្ដេច ស ខេង បានបន្តមានប្រសាសន៍អំពីសារៈសំខាន់នៃការការអនុវត្តគោលនយោបាយភូមិ ឃុំ សង្កាត់មានសុវត្ថិភាព ការអនុវត្តសាកល្បងការអនុវត្តទោសក្រៅពន្ធនាគារ និងការធ្វើកំណែទម្រង់ប៉ុស្តិ៍នគរបាលរដ្ឋបាល ពិសេសការរំលែកក្របខ័ណ្ឌមន្រ្តីមកឱ្យអធិការដ្ឋាន និងប៉ុស្តិ៍រដ្ឋបាលឃុំ សង្កាត់។ សម្ដេចក៏បានស្នើរដ្ឋបាលខេត្ត ក្រុង ស្រុក និងឃុំ សង្កាត់ បន្តផ្ដល់ការគាំទ្រដល់កម្លាំងប្រជាការពារ ដែលជាកម្លាំងរួមចំណែកពង្រឹងការងារសន្តិសុខនៅតាមមូលដ្ឋាន ជាមួយនឹងប៉ុស្តិ៍រដ្ឋបាលផងដែរ។

ក្នុងពិធីសំណេះសំណាល និងសួរសុខទុក្ខសិស្សនាយនគរបាល និងសិស្សនាយនគរបាលរង វគ្គបណ្ដុះបណ្ដាលកម្រិតបឋមវិជ្ជាជីវៈនគរបាល ជំនាន់ទី១៥ លើកទី២ នៅសាលានគរបាលជាតិភូមិភាគ៤ ខេត្តសៀមរាប នៅថ្ងៃអង្គារ នេះ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានសង្កត់ធ្ងន់ភ្លាមៗអំពីការយកចិត្តទុកដាក់ចំពោះតម្រូវការអាទិភាពរបស់សាលានគរបាលជាតិភូមិភាគ៤ ដែលរាយការណ៍ដោយនាយកសាលា។ សម្ដេចបានប្រកាសសម្រេចផ្ដល់អគារសិក្សាចំណុះសិស្ស៣០០នាក់ ដោយបានណែនាំឱ្យមន្រ្តីពាក់ព័ន្ធរៀបចំសិក្សាប្លង់អគារសិក្សានេះ ដើម្បីឈានទៅចាប់ផ្ដើមការសាងសង់ឱ្យបានឆាប់រហ័ស។

ចំពោះការខ្វះខាតកន្លែងបាញ់ស៊ីបគ្រាប់ពិតវិញ សម្ដេច ស ខេង បានណែនាំឱ្យមន្រ្តីជំនាញបន្តរៀបចំប្លង់គម្រោងដើម្បីសម្ដេចពិនិត្យសម្រេចឈានទៅសាងសង់ជូន ខណៈតម្រូវការរថយន្តប្រើប្រាស់ សម្ដេចក៏បានសម្រេចផ្ដល់ជូនមួយគ្រឿងសិន។ ចំពោះអគារស្នាក់នៅគ្រូនិងមន្រ្តី សម្ដេចក្រឡាហោម ក៏បានទទួលយកសំណើពីសាលា និងណែនាំឱ្យសិក្សាប្លង់រួមដើម្បីសាងសង់ជាមួយគ្នានឹងអគារសិក្សាតែម្ដង។

ភ្ជាប់នឹងការបញ្ជាក់ជូនតាមសំណើរបស់សាលានគរបាលជាតិភូមិភាគ៤ខាងលើនេះ សម្ដេចស ខេង បានសម្ដែងក្ដីសង្ឃឹមថាសិស្សនគរបាលជាតិទាំងអស់ដែលកំពុងសិក្សានៅទីនេះ នឹងសម្រេចបានបេសកម្មដ៏ឧត្តុង្គឧត្តមនេះ ដោយចាត់ទុកការសិក្សារៀនសូត្រនេះថាជាបេសកកម្មបម្រើជាតិ បម្រើប្រជាពលរដ្ឋ។ សម្ដេច ក៏បានថ្លែងលើកទឹកចិត្តថ្នាក់ដឹកនាំ គ្រូ និងបុគ្គលិកសាលានគរបាលជាតិភូមិភាគ៤ បន្តការខិតខំបណ្ដុះបណ្ដាលធនធានកងកម្លាំងនគរបាលជាតិប្រកបដោយគុណភាពបន្ថែមទៀត។

សម្ដេចក្រឡាហោមក៏បានគូសបញ្ជាក់ជាថ្មីទៀតអំពីទិសដៅក្រសួងមហាផ្ទៃ ក្នុងការកាត់បន្ថយការបញ្ជូនមន្រ្តីនគរបាលជាតិទៅរៀននៅក្រៅប្រទេស និងការបណ្ដុះបណ្ដាលគ្រូនគរបាលបន្តវេនបន្ថែមទៀត ដើម្បីពង្រឹងការបណ្ដុះបណ្ដាលកងកម្លាំងក្របខ័ណ្ឌថ្មី និងមន្រ្តីនគរបាលជាតិឱ្យមានលក្ខណៈសម្បត្តិគ្រប់គ្រាន់ក្នុងការបម្រើជាតិ និងបម្រើប្រជាពលរដ្ឋ ស្របតាមគោលនយោបាយរាជរដ្ឋាភិបាល និងផែនការកំណែទម្រង់របស់ក្រសួងមហាផ្ទៃ៕SRP

ខេត្តឧត្តរមានជ័យ៖បនល្បែងបាញ់កាំជ្រួច នៅខេត្តឧត្តរមានជ័យ ស្របច្បាប់នេះបើតាមការបញ្ជាក់របស់ប៉ូលិសខេត្តឧត្តរមានជ័យអះអាង។

ក្រុមការងារប្រតិកម្មរហ័ស នៃស្នងការដ្ឋាននគរបាលខេត្តឧត្តរមានជ័យ នៅថ្ងៃទី១៦ ខែសីហា នេះបានឲ្យដឹងថា៖ មានសារព័ត៌មានមួយចំនួនបានធ្វើការផ្សព្វផ្សាយព័ត៌មាន ដែលមានខ្លឹមសារថា «ល្បែងស៊ីសងបាញ់កាំជ្រួច ចាក់ភ្នាល់ដាក់លុយ កំពុងបើកយុទ្ធនាការសារជាថ្មីលើទឹកដីស្រុកអន្លង់វែង សាយភាយក្លិនដល់ក្រុមអ្នកញៀនល្បែង ពលរដ្ឋខ្មែរ-ថៃ ចូលផ្ដុំគ្នាលេងយ៉ាងគគ្រឹកគគ្រេង ចាក់ភ្នាល់តាមចិត្តហើយល្បីថា ស្របច្បាប់ និង មានលិខិត អនុញ្ញាតចេញពីក្រសួងមហាផ្ទៃ សមត្ថកិច្ចស្រុកនិងខេត្តមិនហ៊ានប៉ះ។

ប៉ូលិសខេត្តឧត្តរមានជ័យបន្តថា៖ ក្រុមហ៊ុន សាមនខេមរៈអភិវឌ្ឍន៍ ដែលមានទីតាំងស្ថិតនៅភូមិអូរថ្ម ឃុំត្រពាំងប្រិយ៍ ស្រុកអន្លង់វែង ខេត្តឧត្ដរមានជ័យ គឺមានលិខិតអនុញ្ញាតត្រឹមត្រូវពីក្រសួងពាក់ព័ន្ធ និងបានដាក់សម្ពោធឲ្យដំណើរការ កាលពីខែកក្កដា ឆ្នាំ២០២២ កន្លងមក ក្រោមអធិបតីភាពលោក ឃិន ញាន អភិបាលរងខេត្ត តំណាងដ៏ខ្ពង់ខ្ពស់ឯកឧត្តម ប៉ែន កុសល្យ អភិបាល នៃគណៈអភិបាលខេត្ត និងមានការចូលរួមពីអង្គភាព-មន្ទីរពាក់ព័ន្ធនានាផងដែរ។

ប៉ូលិសបន្តថា ដោយឡែកក្រុមហ៊ុន សាមនខេមរៈអភិវឌ្ឍន៍ បើកដំណើរការល្បែងបាញ់កាំជ្រួច នេះ អនុញ្ញាតឲ្យតែពលរដ្ឋថៃចូលលេងកម្សាន្តតែប៉ុណ្ណោះ និងមិនអនុញ្ញាតឲ្យពលរដ្ឋខ្មែរចូលលេង និងទស្សនាឡើយ៕SRP

ខេត្តកំពង់ធំ៖លោកអភិបាលខេត្តកំពង់ធំលោក ងួន រតនៈ បានស្នើដល់មន្ត្រីជំនាញ បន្តសហការជាមួយអាជ្ញាធរដែនដី នគរបាលយុត្តិធម៌ និងគណៈបញ្ជាការឯកភាពស្រុក/ឃុំ ត្រូវបន្តពង្រឹងនូវការអនុវត្តច្បាប់នេះ ឱ្យបានម៉ឹងម៉ាត់ តឹងរឹងបំផុត លើជនល្មើសដែលបានកាប់ទន្ទ្រានយកដីព្រៃសហគមន៍ដែលជាដីរបស់រដ្ឋ កាន់កាប់អាស្រ័យផល ព្រមទាំងធ្វើការដកហូតដោយស្របច្បាប់ ចំពោះព្រៃដែលទើបនឹងកាប់ គឺត្រូវតែដកហូតភ្លាម រីឯព្រៃដែលបានកាប់រុករានកន្លងមក យើងត្រូវធ្វើការផ្ទៀងផ្ទាត់ទិន្នន័យ និងផលប៉ះពាល់ផ្សេងៗ។ លោកបន្តថា មន្ត្រីជំនាញពាក់ព័ន្ធទាំងអស់ ត្រូវបន្តធ្វើកិច្ចការងារនេះប្រកបដោយប្រសិទ្ធភាព និងស្មារតីទទួលខុសត្រូវខ្ពស់ ក្នុងនាមគណៈកម្មការគ្រប់គ្រងដីរដ្ឋថ្នាក់ខេត្ត ថ្នាក់ស្រុក។

លោក ងួន រតនៈ បន្ថែមទៀតថា សហគមន៍វាលអូរក្តី មានការទទួលស្គាល់ពីប្រមុខរាជរដ្ឋាភិបាល និងប្រគល់សិទ្ធក្នុងការគ្រប់គ្រងជូនរដ្ឋបាលព្រៃឈើ និងសហគមន៍ ជាអ្នកមើលការខុសត្រូវ កុំឲ្យមានការបាត់បង់ ឬ ការកាប់ទន្ទ្រានពីជនល្មើសបន្តទៀត ដោយត្រូវកំណត់ព្រំប្រទល់រវាងដីរដ្ឋ និងដីប្រជាពលរដ្ឋឲ្យបានច្បាស់លាស់ ដើម្បីឈានទៅដល់ការធ្វើប័ណ្ណកម្មសិទ្ធលើដីរដ្ឋ ងាយស្រួលក្នុងការគ្រប់គ្រង និងងាយស្រួលនៅក្នុងការចាត់វិធានការ ទៅជនល្មើសទាំងឡាយ ដែលមានបំណង់កាប់ទន្ទ្រានយកដីព្រៃសហគមន៍។

ក្នុងពិធីរុក្ខទិវា នៅតំបន់ព្រៃសហគមន៍វាលអូរក្តី ស្ថិតនៅក្នុងឃុំក្រយា ស្រុកសន្ទុក ខេត្តកំពង់ធំ នៅថ្ងៃម្សិលមិញ អភិបាលខេត្តកំពង់ធំ ក៏បានអំពាវនាវដល់ប្រជាពលរដ្ឋ ទាំងអស់ សូមចូលរួមដាំដើមឈើឲ្យបានគ្រប់គ្នា គ្រប់ទីកន្លែង និងគ្រប់ពេលវេលា ហើយការដាំកូនឈើនេះ ត្រូវមានការថែទាំ និងការពារឱ្យបានល្អ ចៀសវាងមានការបំភ្លេចបំផ្លាញ ដោយមនុស្ស ដោយសត្វ ឬក៏តាមធម្មជាតិផ្សេងទៀត។ សូមបញ្ជាក់ផងដែរថា កូនឈើដែលយកមកដាំនៅពេលនេះ មានកូនឈើ ៥ប្រភេទ រួមមាន ធ្នង់  គ្រញូង បេង គគីរ និងឈើទាល សរុបចំនួន ២៥០០ដើម លើផ្ទៃដីទំហំ ២ហិកតា៕SRP

ភ្នំពេញ៖កងរាជអាវុធហត្ថបានឃាត់ខ្លួនយោធិននៃកងរាជអាវុធហត្ថខេត្តកំពង់ធំ ដែលពាក់ព័ន្ធនឹងការប្រព្រឹត្តអំពើល្មើសចំនួន០២រូបមានជាអាទិ៍៖ ១-ឈ្មោះ សុខ ម៉េងហុង និង២-ឈ្មោះ លុយ តាំងឈួយ។ នេះបើតាមលោកឧត្តមសេនីយ៍ត្រី អេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទស បានចេញសេចក្តីប្រកាសព័ត៌មាន នៅព្រឹកថ្ងៃទី១៦ ខែសីហា ឆ្នាំ២០២២នេះ។

កងរាជអាវុធហត្ថ នឹងធ្វើសន្និសីទសារព័ត៌មាន អំពីរឿងនេះ នៅថ្ងៃស្អែក វេលាម៉ោង៩និង០០នាទី ថ្ងៃទី១៧ ខែសីហា នៅបញ្ជាការកងរាជអាវុធហត្ថខេត្តកំពង់ធំ ស្ថិតនៅភូមិក្តី សង្កាត់ព្រៃតាហ៊ូ ក្រុងស្ទឹងសែន ខេត្តកំពង់ធំ។

សូមគោរពនិងអានខ្លឹមសារអត្ថបទខាងក្រោម៖

ខេត្តសៀមរាប៖ម៉ូតូចំនួន២ គ្រឿងបានប៉ះគ្នាហើយ មនុស្សម្នាក់ ខ្ទាតចូលក្រោមរថយន្តម៉ាកលុចស៊ីស បណ្ដាលឲ្យកិនស្លាប់ភ្លាមៗ។

ហេតុការណ៍បានកើតឡើងនៅល្ងាច ថ្ងៃទី១៥ ខែសីហា ឆ្នាំ២០២២ នៅលេីផ្លូវជាតិលេខ៦​ ស្ថិតក្នុងភូមិគោកជួន ឃុំពួក ស្រុកពួក។

ប្រភពព័ត៌មានពីសមត្ថកិច្ចបានឲ្យដឹងថាករណីគ្រោះថ្នាក់ចរាច​ណ៍នេះ បង្កឡេីងដោយម៉ូតូម៉ាកហុងដាពណ៌ខ្មៅ ពាក់ស្លាកលេខ កំពង់ធំ 1D-0094 បុកនឹងម៉ូតូ មិនស្គាល់ម៉ាកនិងអត្តសញ្ញាណអ្នកបើកបរ (រត់គេចខ្លួនបាតហើយ ខ្ទាតមនុស្សចូលក្រោមរថយន្តម៉ាកលុចស៊ីសRX300 ពណ៌​ស ពាក់ស្លាកលេខ​ ភ្នំពេញ 2AX-6233 បណ្តាលឲ្យស្លាប់តែម្ដង។

ប្រភពបានបន្តថា ជនរងគ្រោះ ឈ្មោះ សឹង ណាង ភេទប្រុស អាយុ ៣២ឆ្នាំ រស់នៅភូមិល្វា ឃុំល្វា ស្រុកពួក។ ករណីនេះ ក៏ខូចខាតរថយន្ត ១គ្រឿង ម៉ូតូ ១គ្រឿង។

ប្រភពបានបញ្ជាក់ថា មូលហេតុ អ្នកបើកបរម៉ូតូ ម៉ាកហុងដាឌ្រីម ពាក់ស្លាកលេខ កំពង់ធំ 1D-0094 បើកបរក្នុងល្បឿនលឿនខ្វះការប្រុងប្រយ័ត្ន។ ចំណែកវត្ថុតាងសមត្ថកិច្ច រក្សាទុកនៅប៉ុស្តិ៍នគរបាលរដ្ឋបាល ឃុំពួក ដើម្បីអនុវត្តន៍បន្តតាមនីតិវិធី៕SRP

ខេត្តកំពង់ចាម៖អភិបាលខេត្តកំពង់ចាម បានថ្លែងណែនាំឱ្យថ្នាក់ដឹកនាំ មន្ត្រីរាជការទាំងអស់ ត្រូវអភិវឌ្ឍសមត្ថភាពរបស់ខ្លួន លើផ្នែកបច្ចេកវិទ្យា ដើម្បីងាយស្រួលក្នុងការទទួលព័ត៌មាន នឹងបម្រើសេវាបានឆាប់រហ័ស ជូនប្រជាពលរដ្ឋ។

ក្នុងកិច្ចប្រជុំសាមញ្ញលើកទី ៣៩ អាណត្តិទី៣ របស់ក្រុមប្រឹក្សាខេត្តកំពង់ចាម នភថ្ងៃទី១៥ ខែសីហា ឆ្នាំ ២០២២នេះ លោក អ៊ុន ចាន់ដា អភិបាលខេត្ត មានប្រសាសន៍បន្តថា មកដល់ពេលបច្ចុប្បន្ននេះ បច្ចេកទេសឧស្សាហកម្ម កំពុងតែវិវឌ្ឍន៍ទៅមុខ ប៉ុន្តែនៅមានមន្ត្រីយើងខ្លះ សូម្បីតែហ្វេសប៊ុកមិនទាន់ចេះលេងផង ឬមិនចេះប្រើទូរស័ព្ទស្មាតហ្វូនតែម្តង ដែលប្រការនោះ ធ្វើឱ្យការងារដើរមិនទាន់បច្ចេកវិទ្យា។

អភិបាលខេត្តបន្តថា បច្ចុប្បន្ននេះ គឺគេប្រើប្រព័ន្ធបច្ចេកវិទ្យា តាមអនឡាញ ដើម្បីជូនដំណឹង ឬទំនាក់ទំនងការងារផ្សេងៗ តាមកម្មវិធី Telegram ឬ WhatsApp គឺធ្វើឲ្យទទួលព័ត៌មានបានលឿន និងធ្វើការងារបានឆាប់រហ័ស។ ដូច្នេះតម្រូវឱ្យថ្នាក់ដឹកនាំ មន្ត្រីរាជការទាំងអស់ក្នុងខេត្តកំពង់ចាម ចាំបាច់ត្រូវចេះ និងត្រូវមានការវិវឌ្ឍន៍ខ្លួនដល់កម្រិតមួយ ដែលយើងអាចទទួលព័ត៌មាន ឬផ្ដល់សេវាជូនប្រជាពលរដ្ឋ បានឆាប់រហ័ស ដើម្បីឈានឆ្ពោះទៅរកការរីកចម្រើន នៃការបំពេញមុខងាររបស់យើង ជាមន្ត្រីរាជការឲ្យសាកសមជាមន្ត្រី បម្រើប្រជាពលរដ្ឋ។

ក្នុងកិច្ចប្រជុំ ដោយសារមានសមាជិកក្រុមប្រឹក្សាខេត្តលើកឡើងអំពីបញ្ហាការកើតឡើងនូវជំងឺកូវីដ១៩ បំលែងថ្មីពីអូមីក្រុង មកប្រភេទ (ប៊ីអេ4,ប៊ីអេ5) លោកអភិបាលខេត្ត ក៏បានសំណូមពរដល់មន្ទីរសុខាភិបាល រដ្ឋបាលខេត្ត សូមឱ្យធ្វើការផ្សព្វផ្សាយ ជូនប្រជាពលរដ្ឋ គ្រប់ទីកន្លែង ដើម្បីឲ្យពួកគាត់មានការប្រុងប្រយ័ត្ន ចៀសវាងការឆ្លងជំងឺកូវីត១៩ ប្រភេទថ្មីនេះ។

អភិបាលខេត្តបានបញ្ជាក់ថា ជំងឺកូវីដ១៩ ប្រភេទថ្មី (ប៊ីអេ4,ប៊ីអេ5) គឺមានការឆ្លងឆាប់រហ័ស និងឆ្លងឡើងវិញ បើទោះបីជា អ្នកធ្លាប់កើតជំងឺកូរវិតព្យាបាលជាហើយក៏ដោយ។ ហើយការវិវិត្តន៍នៃជំងឺនេះគឺមានការលំបាកក្នុងការ ការពារមិនឱ្យកើត ប្រសិនបើបុគ្គលម្នាក់ៗ ខ្វះការប្រុងប្រយ័ត្នដោយខ្លួនឯង ជាពិសេសការឆ្លង ងាយនិងកើតឡើងក្នុងពេលទទួលទានអាហារជុំគ្នា ក្នុងពិធីបុណ្យ ឬពិធីជប់លៀងផ្សេងៗជាដើម៕SRP

ខេត្តកំពង់ចាម​៖ស្ថានភាពទឹកទន្លេមេគង្គខេត្តកំពង់ចាម​ ស្ស្រកចុវិញ ខណៈ​ព្រែក​ចំនួន​២២​ លេី៣៩ព្រែក​ ត្រូវ​បានទឹកលូនចូល​ជាបន្តបន្ទាប់។

ភ្នាក់ងារសារព័ត៌មានសៀមរាបប៉ុស្តិ៍ បានរាយការណ៍ថា ស្ថានភាពទឹកទន្លេមគង្គក្នុងខេត្តកំពង់ចាម នៅថ្ងៃទី១៥​ ខែសីហាឆ្នាំ២០២២ បានស្រកចុះមកនៅកម្ពស់​ ១១.៥៤ម៉ែត្រ​ បេីធៀបនឹងថ្ងៃម្សិលមិញ គឺទឹកស្រកចុះ​ ០.៤២ម៉ែត្រ ពោលគឺ​ទឹកនៅតែខ្ពស់ជាងឆ្នាំមុន​ដែល​មាន​កម្ពស់​ត្រឹមតែ​ ៧.៣៦ម៉ែត្រ​ប៉ុណ្ណោះ​។ ចំណែកផ្ទៃមេឃមានសភាពរលឹមជាបន្តបន្ទាប់នេះបើយោងតាមរបាយកាណ៍​របស់​លោក អ៊ុម វិបុល ប្រធានមន្ទីរធនធានទឹក និងឧតុនិយម ខេត្តកំពង់ចាម។

លោក​ ​ប្រធាន​មន្ទីរ​ធនធានទឹក​បាន​បញ្ជាក់​​ថា​ កម្ពស់​ទឹកទន្លេមេគង្គ​ ត្រឹម​រយៈពេល​ ២៤ម៉ោង​ ស្រកចុះ​ ០.៤២ម៉ែត្រ​ ធ្វើ​ឲ្យ​កម្ពស់​ទឹក​នៅ​ត្រឹម​ ១១.៥៤​ម៉ែត្រ​ ខណៈ​កម្ពស់​ទឹក​ដែល​ត្រូវ​ប្រកាស​ការ​ប្រុងប្រយ័ត្ន​ ១៥.២០ម៉ែត្រ​ ប៉ុន្តែ​ទឹក​នៅតែហូរ​ចូលកន្លែងទំនាប និងព្រែកចំនួន២២ លើ​ ៣៩​ព្រែក​ ដែល​ក្នុង​នោះ​ទឹក​បានលូនចូល ស្ថិតនៅ​ក្នុងស្រុកស្ទឹងត្រង់ចំនួន៥​ ស្រុកកំពង់សៀម៣ ស្រីសន្ធរ២ កោះសូទិន៥ និងក្នុងស្រុកកងមាស​ ចំនួន​៧ព្រែក​។

ទន្ទឹមនេះដែររដ្ឋបាលខេត្តកំពង់ចាម ក៏បានអំពាវនាវដល់អជ្ញាធរពាក់ព័ន្ធ ចូលរួមសហការក្នុងការត្រៀមបង្ការ និងឆ្លើយតបនៅពេល មានគ្រោះមហន្តរាយកើតឡើងជាយថាហេតុក្នុងភូមិសាស្ត្រខេត្តកំពង់ចាម​ផងដែរ​៕SRP

ភ្នំពេញ៖សម្ដេច​នាយករដ្ឋមន្ត្រី​ ហ៊ុន​ សែន​ និង​ សម្ដេចកិត្តិព្រឹទ្ធបណ្ឌិត​ ប៊ុន​ រ៉ានី​ ហ៊ុន​សែន​ បានសម្រេចឧបត្ថម្ភ​ថវិកា​ ចំនួន២​ម៉ឺន​ដុល្លារ​ ជូន​ដល់​ កីឡាករ​ ក្រាក់​ សម្ផស្ប​។

លោក ផែង វណ្ណះ សកម្មជនហ្វេសប៊ុក បានឲ្យដឹងថា៖ នៅ​ព្រឹក​ថ្ងៃ​ទី​ ១៣​ ខែ​ សីហា​ ឆ្នាំ​ ២០២២​ នេះ​ សម្ដេចតេជោ​ ហ៊ុន​ សែន​ និង​ សម្ដេចកិត្តិព្រឹទ្ធបណ្ឌិត​ ប៊ុន​ រ៉ានី​ ហ៊ុន​ សែន​ បាន​ឧបត្ថម្ភ​ថវិកា​ចំនួន​ ២ម៉ឺន​ដុល្លារ​ អាមេរិក​ ជូន​ដល់​កីឡាករ​ប្រដាល់​ក្បាច់​គុន​ខ្មែរ​ ក្រាក់​ សម្ផស្ប​ ដែល​កំពុង​ជួបការលំបាក​ក្នុង​ជីវភាព​ប្រចាំ​ថ្ងៃ​។ ថវិកា​នេះ​ ខ្ញុំ​បាទ​នឹង​យកទៅ​ប្រគល់​ជូ​ន​ លោក​ ក្រាក់​ សម្ផស្ប​ នៅ​ថ្ងៃនេះ​តែ​ម្ដង​។

លោក ផែង វណ្ណះ បានបន្តថា៖ ខ្ញុំ​បាទ​ជួសមុខអោយ​ កីឡាករ​ប្រដាល់​ក្បាច់​គុន​ខ្មែរ​ ក្រាក់​ សម្ផស្ប​ សូមគោរព​អរគុណ​សម្ដេចតេជោ​ ហ៊ុន​ សែន​ និង​ សម្ដេចកិត្តិព្រឹទ្ធបណ្ឌិត​ ប៊ុន​ រ៉ានី​ ដែល​តែង​តែ​យកចិត្ត​ទុកដាក់​ ជួយ​ប្រជាពលរដ្ឋ​គ្រប់​កាលៈទេសៈ​។ សូមគោរព​ជូនពរ​សម្ដេច​តេជោ​ ហ៊ុន​ សែន​ និង​ សម្ដេចកិត្តិព្រឹទ្ធបណ្ឌិត​ ប៊ុន​ រ៉ានី​ ហ៊ុន​សែន​ មានសុខភាពល្អ​ បរិបូណ៌​ អាយុ​យឺនយូរ​ ដេីម្បី​បន្តដឹកនាំនាវាកម្ពុជា​រក្សា​បាន​សុខ​សន្តិភាព​ និង​ ការអភិវឌ្ឍន៍​។

សូមជម្រាបថាកីឡាករ​ប្រដាល់​ក្បាច់​គុន​ខ្មែរ​ ក្រាក់​ សម្ផស្ប បច្ចុប្បន្ន រស់នៅស្រុកសំឡូត ខេត្តបាត់ដំបង គឺមានជីវភាពក្រក្សត់ កន្លងមកថ្មីៗនេះ ក៏បានទទួលអំណោយពីសប្បុរសជនខ្លះផងដែរ៕SRP

ភ្នំពេញ៖លោកដួង តារា រដ្ឋលេខាធិការទីស្តីការគណៈរដ្ឋមន្ត្រីនិងជាជំនួយការផ្ទាល់សម្តេចតេជោហ៊ុន សែន នាយករដ្ឋមន្ត្រី បានបញ្ជាក់ថា៖តេលេក្រាម ដែលយកឈ្មោះនិងរូបសម្ដេចហ៊ុន សែន ទៅបង្កើត អាចកំណត់ថា​ ជាជនបរទេស​ ( ព្រោះសរសេរ​ English បានល្អ)។

តាមរយៈប្រព័ន្ធតេលេក្រាមផ្លូវការរបស់សម្ដេច ហ៊ុន សែន ដែលអង្គភាពសារព័ត៌មានសៀមរាបប៉ុស្តិ៍ ទទួលបាននៅព្រឹកថ្ងៃសៅរ៍នេះ បានបញ្ជាក់ថា៖ បាទសម្តេច profile telegram​ @hunsen24 គឺខ្ញុំបាទបានសាកល្បង​ chat ជាមួយគឺអាចកំណត់ថា​ ជាជនបរទេស​ ( ព្រោះសរសេរ​ English បានល្អ) គឺបានលួច hacked យក profile​ @hunsen24 ពីអ្នកក្នុងស្រុកយេីង​ (សព្វថ្ងៃពួក​ hackers លួច​ hack ច្រេីន) ។ ជននេះអាចគិតថាម្ចាស់​ profile នោះ​ (HUN SEN ) ជាអ្នកមានទ្រព្យធូរធារ​ ទេីបយក​ profile នោះមក​ Scam ដេីម្បីបោកមនុស្សទូទៅអោយលេង​ buy stock ប៉ុន្តែមិនទាក់ទាញផ្នែកនយោបាយឡេីយ។ Account នេះលាក់ (​hiden) មិនអោយដឹងលេខទូរសព្វ​។ មនុស្សអាក្រក់ៗអាចនឹងបង្កេីត​ fake account ដូចនេះច្រេីនដែលបង្ករការរំខាន 🙏🙏។

លោកដួង តារា បន្តថា៖ បាទសម្តេច​ account telegram. HUN SEN / @hunsen24 បានលុបចេញ​ ដូរឈ្មោះថ្មីហេីយ​ ដោយសារខ្ញុំបាទប្រាប់វាថា​ ខ្ញុំបាទមិនជឿទេ​ ។ វាខំល្បួងខ្ញុំបាទអោយទិញ​ វិនិយោគ​ Stock តាមរយះវាថាបានចំណេញច្រេីន។ ខ្ញុំបាទប្រាប់ថា​ ខ្ញុំស្គាល់នាយករដ្ឋមន្រ្តីខ្មែរច្បាស់ណាស់​ គាត់មិនធ្វេីដូច្នេះទេ។ ខ្ញុំបាទប្រាប់វាអោយបង្ហាញរូបពិតខ្ញុំបាទនឹងទិញ​ $200…ហេីយបន្ទាប់មកខ្ញុំបាទក៏ឈប់ឆ្លេីយសារវា… ប៉ុន្មានម៉ោងមកវាក៏ផ្ញេីសារមកខ្ញុំបាទឈ្មោះថ្មី​ Kluth Phearith មានទាំងអាជ្ញាប័ណ្ណវិនិយោគថាពិតប្រាកដទៀតផង។ បាទសម្តេចពួកនេះជា​ hacker ដេីរ​ scam ពលរដ្ឋយកលុយ.. ជាពិសេសអ្នកដែលលោភចង់បានលុយច្រេីនភ្លាមៗតាមរយះវិនិយោគតិច​ បានចំណេញច្រេីនតាម​ online. ទោះបីមិនដឹងថាមុខមាត់អ្នកណែនាំដូចម៉្តេចក៏ចេះតែជឿតាមគេ។ ខ្ញុំបាទសូមអរគុណសម្តេច🙏។

សូមជម្រាបថានៅថ្ងៃសុក្រម្សិលមិញ សម្តេចតេជោហ៊ុន សែន បានប្រកាសតាមរយៈប្រព័ន្ធហ្វេសប៊ុកផ្ទាល់សម្ដេច ថា មានជនខិលខូចបានយករូបសម្ដេច និងឈ្មោះសម្ដេចទៅបង្កើតប្រព័ន្ធតេលេក្រាម។

សម្តេចតេជោហ៊ុន សែន បានសរសេរថា៖ មានជនខិលខូចបាននិងកំពុងក្លែងតេឡេក្រាម(telegram)របស់ខ្ញុំដោយយករូបថតខ្ញុំនិងភរិយានិងដាក់ឈ្មោះ@HUN SEN 24ដូចមានភ្ជាប់ជាមួយ។ សូមបងប្អូនប្រុងប្រយ័ត្នកុំចាញ់បោកជនអាក្រក់នេះនិងសូមលោកអ្នកដែលក្លែងឈ្មោះខ្ញុំលុបចោលជាបន្ទាន់បើពុំនោះទេនឹងទទួលខុសត្រូវចំពោះមុខច្បាប់៕SRP