ព័ត៌មានជាតិ

ខេត្តកំពង់ចាម៖ក្នុង​ពិធីសំណេះសំណាល ជាមួយនិវត្តជនរបស់សមាគមសង្គហៈមិត្ត បុគ្គលិក មន្ត្រីរាជការនៃក្រសួងសេដ្ឋកិច្ច​ និងហិរញ្ញវត្ថុ នៅ​សាលា​ខេត្តកំពង់ចាម​ នៅព្រហស្បតិ៍ នេះ លោក អ៊ុន​ ចាន់ដា​ អភិបាលខេត្តកំពង់ចាម​ បានអះអាងថា អតីតកាលនៃនិវត្តន៍ជនគឺជាការត្រួសត្រាយផ្លូវដោយតម្លៃនៃការធ្វើពលីកម្ម ឆ្លងកាត់ការលំបាកគ្រប់បែបយ៉ាង​ ដើម្បីសុខសន្តិភាព និងការអភិវឌ្ឍប្រទេសជាតិ។​

លោក អ៊ុន​ ចាន់ដា​ បាន​លេីកឡេីងថា​ ភាពកតញ្ញូចំពោះ វីរភាព របស់រៀមច្បងក្នុងបុព្វហេតុ ដើម្បីសន្តិភាព និងការអភិវឌ្ឍប្រទេស គឺជាមោទនភាពរបស់និវត្តន៍ជន ដែលត្រូវទទួលបាននូវភាពកក់ក្តៅ និងកិត្តិយសពីអ្នកបន្តវេន ដែលកំពុងធ្វើដំណើរលើកំណាត់ផ្លូវ ដែលត្រូវបានត្រួសត្រាយដោយតម្លៃពលិកម្ម​ មិនអាចកាត់ថ្លៃបាន ក្នុងរសជាតិនៃភាពអំណត់តស៊ូនៃអ្នកជំនាន់មុនជាច្រើនទស្សវត្សរ៍កន្លងមក។

អភិបាលខេត្ត​ បាន​បន្ត​ថា​ ផ្លែផ្កានៃវឌ្ឍនភាពដែលសង្គមជាតិបានទទួលយ៉ាងធំធេងនាពេលបច្ចប្បន្ននេះ គឺពិតជាលទ្ធផលដែលមិនអាចកាត់ផ្តាច់បានពីគុណតម្លៃនៃអ្នកត្រួសត្រាយផ្លូវបាននោះឡើយ។​ និវត្តន៍ជនគឺជានិម្មិតរូបនៃការអភិវឌ្ឍជាតិ រៀមច្បងពិតជាបានចំណាយពេលវេលាដ៏មានតម្លៃ រស់នៅជាមួយការនឿយហត់ ឆ្លងកាត់ការលំបាកគ្រប់បែបយ៉ាងកាលពីអតីតកាលដើម្បីមានថ្ងៃនេះ។

ឆ្លៀតក្នុងឱកាសនោះដែរ​ លោកជំទាវ កែវ ចរិយា​ បានពាំនាំនូវការផ្តាំផ្ញើសួរសុខទុក្ខដោយក្តីនឹករលឹកពី​សំណាក់​ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រី ក្រសួងសេដ្ឋកិច្ចនិងហិរញ្ញវត្ថុ និងជាប្រធានកិត្តិយសសមាគមសង្គហៈមិត្ត បុគ្គលិក មន្ត្រីរាជការ នៃក្រសួងសេដ្ឋកិច្ចនិងហិរញ្ញវត្ថុ ដែលតែងតែផ្ដល់ការឧបត្ថម្ភគាំទ្រ ទាំងផ្នែកហិរញ្ញវត្ថុ សំភារៈ ស្មារតី ជូនដល់និវត្តន៍ជនដែលជាអតីតមន្ត្រីរាជការរបស់ក្រសួងសេដ្ឋកិច្ចនិងហិរញ្ញវត្ថុ។

លោកជំទាវ​ រដ្ឋលេខាធិការ​ ក៏បានផ្ដាំផ្ញើដល់ថ្នាក់ដឹកនាំមន្ត្រីរាជការ ទាំងអស់ក្រោមឱវាទក្រសួងសេដ្ឋកិច្ច​ និងហិរញ្ញវត្ថុនៅក្នុងខេត្តកំពង់ចាម​ សូមប្រតិបត្តិតាម ឲ្យបានខ្ជាប់ខ្លួននូវគុណតម្លៃស្ថាប័ននៃ​ក្រសួង​សេដ្ឋកិច្ច​ និង​ហិរញ្ញវត្ថុ​ ដែលជាស្ថាប័នមានសមត្ថភាព និងឧត្តមភាព ប្រកបដោយគុណ​តម្លៃគ្រប់គ្រាន់ ដើម្បីបំពេញបេសកកម្មស្នូល បេសកកម្មចូលរួមអនុវត្តលើ ការងារដទៃទៀត ដែលពាក់ព័ន្ធនឹងសមត្ថកិច្ចរបស់ក្រសួងសេដ្ឋកិច្ច​ និងហិរញ្ញវត្ថុដែលឈានទៅសម្រេចបានចក្ខុវិស័យរួមរបស់រាជរដ្ឋាភិបាល និងវិសហមជ្ឈការ​ ដើម្បីការកសាង​ និងអភិវឌ្ឍន៍សង្គមកម្ពុជាឲ្យកាន់តែមានការរីកចម្រើនជាលំដាប់​៕SRP

ខេត្តព្រះសីហនុ៖អាជ្ញាធរខេត្តព្រះសីហនុ បានប្រកាសថា ជនល្មើសប្រើប្រាស់សម្រាប់ការទិញ-លក់កម្លាំងពលកម្ម ការជួញដូរ និងការបង្ខាំងមនុស្សដោយខុសច្បាប់ គឺត្រូវបិទអាជីវកម្មជាដាច់ខាត និងនាំយកជនល្មើស និងម្ចាស់ទីតាំងដែលចូលរួមសមគំនិត មកផ្តន្ទាទោសតាមច្បាប់ឱ្យបានធ្ងន់ធ្ងរ និងដោយគ្មានការលើកលែងឡើយ។

សូមជម្រាបជូនថា ចំពោះប្រតិបត្តិការស្រាវជ្រាវ និងបង្រ្កាបករណីការទិញ-លក់ពលកម្ម ការជួញដូរ និងការបង្ខាំងមនុស្សដោយខុសច្បាប់ នៅក្នុងភូមិសាស្ត្រខេត្តព្រះសីហនុ អាជ្ញាធរពាក់ព័ន្ធ នឹងអនុវត្តឱ្យបានហ្មត់ចត់ជាទីបំផុត ដោយស្រាវជ្រាវឱ្យដល់ឫសគល់ និងមេក្លោង ដើម្បីនាំខ្លួនជនល្មើសមកផ្តន្ទាទោសតាមច្បាប់ឱ្យខាងតែបាន៕SRP

ខេត្តសៀមរាប៖ក្រុមចោរមួយក្រុមបានលួចគាស់កុដិ ព្រះសង្ឃក្នុងវត្តអំពិល យកលុយទ្រព្យសម្បត្តិមួយចំនួនធំ រួចគេចខ្លួនមួយសុវត្ថិភាព។

ប្រភពបានឲ្យដឹងថា ការបាត់បង់នេះកើតលើជនរងគ្រោះ ទី១ ឈ្មោះ គឹម លាង អាយុ៣១ឆ្នាំ ជាព្រះសង្ឃ រស់នៅក្នុងវត្ត។ មុនពេកើតហេតុ នៅចន្លោះម៉ោង២.០០នាទី២១ ខែសីហាឆ្នាំ២០២២ ជនរងគ្រោះ គាត់បានចេញទៅ ពិនិត្យសុខភាព នៅមន្ទីរពេទ្យខេត្តសៀមរាប នឹងបានចាក់សោទ្វារបានត្រឹមត្រូវ។ លុះដល់ម៉ោងប្រហែល ៧ .០០នាទីថ្ងៃដដែល គាត់បានត្រលប់មកដល់កុដិវិញ បានឃើញទ្វារកុដិបិទតែ មានស្នាមគាស់មេសោ ខណៈគាត់បើកទ្វារចូលក្នុងបន្ទប់ ស្រាប់តែឃើញមានការរើ កកាយ របស់របរ។

ប្រភពបានបន្តទៀតថា ជនរងគ្រោះ បានពិនិត្យកន្លែងទុកកំព្យូទ័រ ក៏បាត់ បង្កឡើងដោយជនសង្ស័យមិនស្គាល់ អត្តសញ្ញាណ បានគាស់បំផ្លាញសោទ្វារ ចូលលួចយក កំព្យូទ័រចំនួនពីរគ្រឿង ទី១ម៉ាក DELL ពណ៌ខ្មៅ តម្លៃ ៦០០$ (ប្រាំមួយរយដុល្លារអាមេរិក) ទី២ ម៉ាក Asus ពណ៌ ស តម្លៃ ៣០០$ (បីរយដុល្លារ) និងទូរស័ព្ទ ១គ្រឿង ម៉ាក GALAXY TAP តម្លៃ ៣០០$ (បីរយដុល្លារ) ការបាត់បង់សរុប ១២០០$ (មួយពាន់ពីររយដុល្លារ)។

ចំណែក ជនរងគ្រោះទី២ ឈ្មោះ ប៉ុច កុសលអាយុ៣៣ ឆ្នាំជាព្រះសង្ឃរស់នៅក្នុងវត្ត។ មុនពេលកើតហេតុនៅ២០ ខែសីហាឆ្នាំ២០២២ ជនរងគ្រោះគាត់បានចេញ ទៅធ្វើបុណ្យ នៅភ្នំពេញ បានចាក់សោបន្ទប់ ចាក់ទ្វារ (កុដិ) ខាងក្រៅ។ លុះដល់ ថ្ងៃទី២១ ខែឆ្នាំដដែល បានត្រលប់មកពីរភ្នំពេញ មកដល់កុដិវិញ ស្រាប់តែឃើញទ្វារកុដិចំហរ ទ្វារក្នុងបន្ទប់ (កុដិ) ចូលទៅឃើញមានស្នាម រើ កកាយ ឥវ៉ាន់ បង្កឡើងដោយជនសង្ស័យ មិនស្គាល់អត្តសញ្ញាណធ្វើសកម្មភាព បុកខូចគ្រាប់មេសោទ្វារ ការបាត់បង់ ទ្រព្យសម្បត្តិ (គ្មាន)។

សូមបញ្ជាក់ថាក្រោយពីក្រោយករណីបែបនេះ កម្លាំងសមត្ថកិច្ចចម្រុះបាន ចុះស្រាវជ្រាវ ឃើញវត្ថុតាង មានបន្សល់ទុក មេសោដែលបុកបំផ្លាញ១ ខូច នៅកន្លែងកើតហេតុគ្មានបំពាក់កាំមេរ៉ាសុវត្ថិភាព គ្មានសាក្សីបានឃើញ ភិនភាគ តម្រុយជនសង្ស័យទេ ហើយករណីនេះសមត្ថកិច្ចកំពុងបន្តការស្រាវជ្រាវ កសាងនីតិវិធី។

គួរបញ្ជាក់ថា ករណីលួចកើតហេតុ នៅថ្ងៃទី២១ ខែសីហា ឆ្នាំ២០២២ ចន្លោះវេលាម៉ោង៧.០០នាទី ត្រង់ចំណុច កុដិលោក ក្នុងវត្តអំពិល ស្ថិតភូមិអំពិល ឃុំសំរោងយា ស្រុកពួក ខេត្តសៀមរាប៕SRP

ខេត្តកំពង់ចាម៖លោកអ៊ុន ចាន់ដា បានផ្តាំផ្ញើ ចំពោះ លោកអភិបាល​ស្រុកព្រៃឈរ​ ដែលទើបបានប្រកាសតែងតាំងថ្មីនេះ ត្រូវមានការសាមគ្គីភាពផ្ទៃក្នុង នៅក្នុងអង្គភាព រវាងថ្នាក់លើ និងថ្នាក់ក្រោម ព្រមទាំងមានគំនិតផ្តួចផ្តើម មនសិការការងារខ្ពស់ ប្រកបដោយតម្លាភាព និងគណនេយ្យភាព ក្នុងការ បម្រើប្រជាពលរដ្ឋ។

លោកក៏បានណែនាំអោយអភិបាល ថ្មី យកចិត្តទុកដាក់ខ្ពស់ លើការសម្របសម្រួល ការដោះស្រាយបញ្ហាការងារ ប្រកបដោយភាពឈ្លាសវៃ និងមានគំនិតច្នៃប្រឌិត មានចក្ខុវិស័យ លើកជាទិសដៅ ដាក់ចេញនូវផែនការអនុវត្តឲ្យបានច្បាស់លាស់ ព្រមទាំងខិតខំបញ្ចេញឲ្យអស់ពីសមត្ថភាព និងទេពកោសល្យ ក្នុងស្មារតីយកចិត្តទុកដាក់ និងការទទួលខុសត្រូវខ្ពស់ ចំពោះ មុខថ្នាក់ដឹកនាំ ក្រសួងមហាផ្ទៃ និងចំពោះមុខគណៈអភិបាលខេត្ត រដ្ឋបាលខេត្ត លើវិស័យការងារ ដែលខ្លួនកំពុងបំពេញតួនាទី ជាពិសេសនោះ គឺត្រូវ​ប្រែក្លាយការប្ដេជ្ញាចិត្ត នាពេលនេះ ទៅជា​ឆន្ទៈក្នុងការអនុវត្តជាក់ស្ដែង ឲ្យទទួលបានប្រសិទ្ធភាពខ្ពស់ ទៅពេលអនាគត ផងដែរ​។

ក្នុង​ពិធីប្រកាស​ចូល​កាន់​មុខ​តំណែងអភិបាល​ស្រុកព្រៃឈរ​​ ខណៈ​លោក​ឡោ​ ចាន់លី​​ ត្រូវទទួល​តំណែងជា​អភិបាលរង​ខេត្តកំពង់ចាម​ នៅថ្ងៃព្រហស្បតិ៍នេះ
លោក អ៊ុន​ ចាន់ដា​ អភិបាលខេត្តកំពង់ចាម ក៏បាន​ផ្តាំផ្ញេីដល់​លោក​ ខេង​ ម៉េងឈុន​ ត្រូវប្រែក្លាយការប្ដេជ្ញាចិត្ត ពេលចូល​កាន់​តំណែងជា​អភិបាល​ស្រុកព្រៃឈរ​ ទៅជា​ឆន្ទៈក្នុងការអនុវត្តជាក់ស្ដែង ឲ្យទទួលបានប្រសិទ្ធភាពខ្ពស់ ទៅពេលអនាគត​។

លោកអ៊ុន​ ចាន់ដា​​ ក៏បានថ្លែងនូវការកោតសរសើរ ចំពោះ វឌ្ឍនភាពនៃការអភិវឌ្ឍរីកចំរើន លើគ្រប់វិស័យ ក្រោមការដឹកនាំ របស់ក្រុមប្រឹក្សា គណៈអភិបាល និងមន្ត្រីសាលាស្រុកព្រៃឈរ ទាំងអស់ ដែលបានចូលរួមចំណែក ដោះស្រាយកិច្ចការ នៅក្នុងអង្គភាព និងការផ្តល់សេវាសាធារណៈ សេវារដ្ឋបាល ជូនប្រជាពលរដ្ឋ ដោយទទួលបានលទ្ធផល យ៉ាងល្អប្រសើរ នាពេលកន្លងមក៕SRP

ខេត្តសៀមរាប៖ប្រជាពលរដ្ឋ ដែលរស់នៅក្នុងតំបន់រមណីយដ្ឋានអង្គរប្រមាណជាង៦០០ គ្រួសារ បានស្ម័គ្រចិត្តទៅរស់នៅតំបន់ធម្មជាតិរុនតែឯង ស្រុកបន្ទាយស្រី ខេត្តសៀមរាប។

នេះបើយោងតាមសេចក្ដីប្រកាសព័ត៌មានរបស់ក្រសួងរៀបចំដែនដី នគរូបនីយកម្ម និងសំណង់ នៅថ្ងៃទី ២៤ ខែសីហាឆ្នាំ ២០២២ នេះ។ សេចក្ដីប្រកាសនៅខាងក្រោម៖

ភ្នំពេញ៖រដ្ឋមន្ត្រីក្រសួងព័ត៌មាន លោក ខៀវ កាញារីទ្ធិ បានបង្ហោះសារថា រឿងភ្នំតាម៉ៅមានមុខ២។ រដ្ឋមន្ត្រីក្រសួងព័ត៌មាន បានសរសេរសារនៅលើទំព័រហ្វេសប៊ុកផ្ទាល់ខ្លួនថា ដូចខ្ញុំតែងនិយាយជារឿយៗមកហើយ ថាអ្វីៗសុទ្ធតែមានមុខ ២ របស់វាជានិច្ច ! រឿងព្រៃភ្នំតាម៉ៅ ( តាមពិតមិនមែនជាប់ភ្នំតាម៉ៅទេ។ ក្នុងរូប ភ្នំតាម៉ៅគឺនៅឯនាយ ) មានមុខ ២ របស់វាដែរ។

លោក ខៀវ កាញារីទ្ធិ បានបន្តថា៖ ទី១ អ្នកមូលដ្ឋានទីនោះខកចិត្ត ព្រោះដីនៅទីនោះបាត់ហាងឆេង អ្នកសង្ឃឹមពង្រីកមុខរបរនៅទីនោះក៏ខូចបំណង ហើយ ហេដ្ឋារចនាសម្ព័ន្ធទំនើបមិនបានមកដល់ទីកន្លែងគាត់។

តែមុខទី២ គឺព្រៃរបោះកន្លែងនោះដែលមានតែឈើគ្មានតម្លៃសេដ្ឋកិច្ចនឹងប្រែក្លាយទៅជាព្រៃដែលមានសុទ្ធតែរុក្ខជាតិកម្រ និងមានតម្លៃក្នុងមួយទៅពីរទស្សវត្សរ៍ទៀត។

សូមរំលឹកថាភ្នំតាម៉ៅត្រូវបានក្រុមហ៊ុនបានធ្វើការឈូសឆាយក្លាយជាវាលហោស្ថានជិត៦០០ហិកតា ដើម្បីវិនិយោគ ប៉ុន្តែបន្ទាប់ពីបានធ្វើការឈូសឆាយរយៈពេលប៉ុន្មានថ្ងៃមក ក៏មានការប្រតិកម្មយ៉ាងខ្លាំងពីប្រជាពលរដ្ឋខ្មែរ។ ភ្លាមៗបន្ទាប់ពីមានការប្រតិកម្មបែបនេះ លោក ឡេង ណាវ៉ាត្រា បានប្រកាសបញ្ឍប់នូវការវិនិយោគរបស់ខ្លួន។ ចំណែកប្រមុខរាជរដ្ឋាបាលកម្ពុជា បានចេញប្រកាសលុបចោលនូវគម្រោងអភិវឌ្ឍន៍ របស់ក្រុមហ៊ុនឡេង ណាវ៉ាត្រា ផងដែរ។ ជាមួយគ្នានេះដែរ សម្ដេច ហ៊ុន សែន ក៏បានដាក់បញ្ជាឲ្យមានការដាំកូនឈើនៅតំបន់ភ្នំតាម៉ៅ ឡើងវិញ និងដាក់ការពារអភិរក្សតំបន់ធនធានធម្មជាតិ៕SRP

ខេត្តកំពង់ចាម៖មន្ត្រីជាន់ខ្ពស់ក្រសួងមហាផ្ទៃនៅថ្ងៃអង្គារនេះ បានថ្លែងប្រាប់អាជ្ញាធរខេត្តកំពង់ចាមថា ត្រូវដឹងពីសុខទុក្ខរបស់​ប្រជា​ពលរដ្ឋ​ និងដោះស្រាយរាល់បញ្ហដែលកើតមាននៅក្នុងមូលដ្ឋានឲ្យបានទាន់ពេលវេលា​។

ក្នុងពិធីប្រកាសចូលកាន់មុខតំណែង​ អភិបាលរង​ ខេត្តកំពង់ចាម​ លោក លេង វី រដ្ឋលេខាធិការក្រសួងមហាផ្ទៃ បានសំដែងនូវការកោតសរសើរ ចំពោះកិច្ចខិតខំប្រឹងប្រែង របស់ដល់អាជ្ញាធរគ្រប់លំដាប់ថ្នាក់ ដែលបានលះបង់កម្លាំងកាយចិត្ត ក្នុងការបំពេញការងារនាពេលកន្លងមក ឲ្យមានការអភិវឌ្ឍ​រីកចម្រើន លើគ្រប់វិស័យគួរឲ្យកត់សម្គាល់​ រហូតទទួលបានការគាំទ្រពីសាធារណជន​​។

លោកក៏បានជំរុញ ឲ្យបន្តការខិតខំអភិវឌ្ឍន៍ខេត្ត ឲ្យ​កាន់តែ​មានភាពរីកចម្រើន​បន្ថែម​ទៀត​ លេីសពី​នោះ​ត្រូវដឹងពីសុខទុក្ខ​ របស់​បងប្អូនប្រជា​ពលរដ្ឋ​ ហេីយត្រូវដោះស្រាយរាល់បញ្ហដែលកើតមាននៅក្នុងមូលដ្ឋានឲ្យបានទាន់ពេលវេលា​ផងដែរ​។

រដ្ឋលេខាធិការក្រសួងមហាផ្ទៃរូបនេះ ក៏បានជំរុញ
ដល់​ថ្នាក់ដឹកនាំ​ ក៏ដូចជាមន្ត្រី​ពាក់ព័ន្ធ​ទាំងអស់​ ឲ្យរួមសហការគ្នា ក្នុងការកែប្រែមុខមាត់ខេត្ត ឲ្យកាន់តែមានការអភិវឌ្ឍន៍​ រីកចម្រើន​ជាបន្តទៀត​ ស្របតាម​កម្មវិធី​នយោបាយ របស់ រាជរដ្ឋាភិបាល ក្នុងការចូលរួមលើកកម្ពស់ សេដ្ឋកិច្ចជីវភាព​ររស់នៅ របស់ប្រជាពលរដ្ឋ ឲ្យកាន់តែប្រសើរឡើងថែមទៀត។

ក្នុងពិធី លោក អ៊ុន​ ចាន់ដា​ អភិបាលខេត្តកំពង់ចាម​ បាន​ឲ្យដឹងថា​ ក្រោមការខិតខំប្រឹងប្រែងអនុវត្ត គោលនយោបាយ «ភូមិ ឃុំ សង្កាត់មានសុវត្ថិភាព» ខេត្តកំពង់ចាម បាននឹងកំពុងមានការរីកចម្រើន និងប្រែប្រួលមុខមាត់ ជា បន្តបន្ទាប់ទាំងផ្នែកសន្តិសុខ សណ្តាប់ធ្នាប់សាធារណៈ សេដ្ឋកិច្ច សង្គមកិច្ច បរិស្ថាន និងសមិទ្ធផល រូបវ័ន្តជាច្រើន ជាពិសេសជីវភាពរស់នៅ របស់ប្រជាពលរដ្ឋ កាន់តែបានលើក កម្ពស់ពីមួយថ្ងៃទៅមួយថ្ងៃ តាមរយៈការទទួលបាននូវសមិទ្ធផលនានា ពីរាជរដ្ឋភិបាលកម្ពុជា ដែគូអភិវឌ្ឍន៍ សប្បុរជននានា។

គួរ​បញ្ជាក់​ថា​ ពិធីប្រកាសចូលកាន់មុខតំណែង​ អភិបាលរង​ នៃ​គណៈអភិបាលខេត្តកំពង់ចាម​ សរុប​ចំនួន​ ៦រូប​ ក្នុង​នោះ​ផ្ទេរ​ភារកិច្ច​ ២រូប​ គឺ​ ឯកឧត្ដម​ គន់​ សភា​ មក​ពី​អភិបាល​រង​ខេត្ត​ត្បូងឃ្មុំ​ និង​ឯកឧត្ដម​ លី​ សារ៉ារិទ្ធ​ មក​ពី​អភិបាល​រង​ខេត្ត​ព្រះវិហារ​ ជំនួស​ឯកឧត្តម​ កៅ​ សុខអាន​ និង​ឯកឧត្ដម​ អ៊ុំ​ភឿន​ គុណវឌ្ឍ​ ដែល​ត្រូវ​ផ្ទេរ​ភារកិច្ច​ទៅ​ក្រសួង​មហាផ្ទៃ​។ ដោយឡែក​អភិបាល​រង​ថ្មី​ ៤រូប​ទៀត​ គឺ​ ឯកឧត្ដម​ ចាន់​ ផល្លី​ អតីត​អភិបាល​ក្រុង​កំពង់ចាម​ ឯកឧត្តម​ ឡោ​ ចាន់​លី​ អភិបាល​ស្រុកព្រៃឈរ​ ឯកឧត្តម​ ស្រី​ សុភ័ក្ដ្រ​ ប្រធាន​មន្ទីរ​ធម្មកា​ និង​សាសនា​ខេត្តកំពង់ចាម​ និង​ឯកឧត្តម​ សា​ ស៊ី​ថា​ អនុ​ប្រធាន​ការិយាល័យ​នគរបាល​​ចរាចរ​ផ្លូវ​គោក​ខេត្តកំពង់ចាម​៕SRP

ខេត្តសៀមរាប៖បុរសម្នាក់បើកបរម៉ូតូម្នាក់បានស្លាប់នៅពេលបញ្ជូនទៅដល់មន្ទីរពេទ្យ ក្រោយពីបានបើកម៉ូតូហើយត្រូវបានរថយន្តបុកចំពីមុខ។

ហេតុការណ៍កើតឡើង វេលាម៉ោង១៦និង៣០នាទីថ្ងៃទី២៣ ខែស៏ហា ឆ្នាំ២០២២ ចំណុចភូមិលលៃ ឃុំ បាគង ស្រុកប្រាសាទបាគង ខេត្តសៀមរាប លើផ្លូវជាតិ៦ រវាងរថយន្តនិងម៉ូតូច្រាសទិសគ្នា។

ប្រភពពីសមត្ថកិច្ចស្រុកប្រាសាទបាគងបានអោយដឹងថា គ្រោះថ្នាក់ចរាចរណ៍នេះ រថយន្តម៉ាក TOYOTA TACOMA ពណ ទឹកប្រាក់ ផ្លាកលេខ ភ្នំពេញ 2BF 1453 បើកបរដោយជនជាតិបរទេសឈ្មោះ LEGNANI FRANCO GIUSEPPE ភេទប្រុស អាយុ៦៤ឆ្នាំ នៅភូមិកពង់រទេះ ឃុំគំពង់រទេះ ស្រុកស្ទឹងសែន ខេត្តកំពង់ធំ បើកបរមានទិសដៅពីលិច ទៅកើត បានបុកជាមួយម៉ូតូមួយគ្រឿងម៉ាក HONDA DREAM សេរីឆ្នាំ២០១៨ ពណ៌ ខ្មៅ ស្លាកលេខសៀមរាប ភ្នំពេញ 1HB 5770 ដែលបើកបរមានទិសដៅពីកើត ទៅលិច បើកបរដោយឈ្មោះ ខាត់ វាសនា ភេទប្រុស អាយុ 36 ឆ្នាំ នៅភូមិបន្ទាយចាស់ សង្កាត់ស្លក្រាម ក្រុងសៀមរាប ខេត្តសៀមរាប បាន(ស្លាប់)នៅមន្ទីពេទ្យ។

សមត្ថកិច្ចបានបន្តថាអ្នកបើកបររថយន្ត មិនបានរត់ទៅណាទេក្រោយកើតហេតុ។ ករណីនេះមូលហេតុអ្នកបើកបរម៉ូតូ បើកបរមិនប្រយ័ត្នដួលចូលទៅកន្លងផ្លូវខាងឆ្វេង បណ្ដាលអោយគ្រោះថ្នាក់ស្លាប់តែម្ដង។ ចំណែកវត្ថុតាងទាំងពីរ ត្រូវបាននគរបាលជំនាញយកទៅរក្សាទុកនៅអធិការស្រុកបាគងដើម្បីដោះតាមនីតិវិធីច្បាប់៕SRP

ខេត្តសៀមរាប៖ក្មេងប្រុសម្នាក់បានលង់ទឹកស្លាប់នៅក្នុងស្ទឹងសៀមរាប ខណៈជនរងគ្រោះនឹងគ្នីគ្នាបានទៅលេងទឹកក្នុងស្ទឹង។

ហេតុការណ៏បានកើតឡើង នៅវេលាម៉ោង១៧:០០នាទី​ ថ្ងៃអង្គារ​ ថ្ងៃទី២៣​ ខែ​ សីហា​ ឆ្នាំ​២០២២​ នៅត្រង់ចំណុចសួនមួយកន្លែងខាងកេីតស្ទឹង​ស្ថិតនៅភូមិទ្រាំង​ សង្កាត់​ស្លក្រាម​ ក្រុងសៀមរាប​ ខេត្តសៀមរាប​។

យោងតាមប្រភពពីសមត្ថកិច្ចខេត្តសៀមរាបបានប្រាប់សារព័ត៌មានសៀមរាបប៉ុស្តិ៍នៅព្រលប់ថ្ងៃនេះថាជនរងគ្រោះ​ឈ្មោះ​ នី​ រតនះ​ឧត្តម​ ភេទ​ប្រុស​ អាយុ​០៩ឆ្នាំ​ មុខរបរ​សិស្ស​ រស់​នៅ​ភូមិមណ្ឌលបី​ សង្កាត់​ស្លក្រាម​ ក្រុងសៀមរាប​ ខេត្តសៀមរាប​។

ប្រភពបានបន្តថា ករណីលក់ទឹកស្លាប់នេះ សមត្ថកិច្ច​ជជំនាញនិងគ្រូពេទ្យធ្វេីកោសល្យវិច័យ លេីសាកសព ពុំមានការពាក់ព័ន្ធនិងបទល្មេីសនោះឡើយ។

បើតាមសមត្ថកិច្ចបានបញ្ជាក់ថា មូលហេតុ​នៃការស្លាប់របស់ជនរងគ្រោះ ដោយសារលង់ទឹក៕SRP

ខេត្តបាត់ដំបង៖លោក សុខ លូ បានធ្វើការផ្សព្វផ្សាយ ពីដល់ប្រជាពលរដ្ឋ អំពីបញ្ហាអាងភាស ដោយកន្លងមក មានការផ្សព្វផ្សាយថា មានប្រជាពលរដ្ឋ ជាង៨០០គ្រួសារអះអាងថា ខ្លួនកំពុងអាស្រ័យផលនៅក្នុងអាងនេះ និងនាំគ្នាមកតវ៉ា ក្រោយពេលដែលក្រសួងធនធានទឹក និងឧតុនិយម បានសម្រេចស្ដារអាងនេះឱ្យជ្រៅជាងមុន ដើម្បីអាចផ្គត់ផ្គង់ទឹកសម្រាប់ប្រជាពលរដ្ឋ ប្រើប្រាស់រាប់ពាន់គ្រួសារ តែបែរមានជនមួយចំនួនបានធ្វើការផ្សព្វផ្សាយថា ធ្វើឱ្យប៉ះពាល់ដីធ្វើស្រែចំនួនជាង៨០០គ្រួសារ ដែលជាក់ស្ដែង មានតែ២៣គ្រួសារតែប៉ុណ្ណោះ ដែលកំពុងធ្វើការអាស្រ័យផលនៅទីនោះ នឹងរៀបចំដោះស្រាយ ជូន២៣គ្រួសារនោះ ជាបន្តបន្ទាប់ទៀត។ ចំណែកចំពោះបុគ្គល ដែលធ្វើការផ្សព្វផ្សាយញុះញង់ក៏នឹងត្រូវចាត់វិធានការតាមផ្លូវច្បាប់ដែរ។

លោកបានបញ្ជាក់ថា ចំពោះប្រយោជន៍ស្របច្បាប់ របស់ប្រជាពលរដ្ឋ នឹងត្រូវថែរក្សា តែចំពោះប្រយោជន៍រដ្ឋ ដែលជាប្រយោជន៍ ក៏មិនត្រូវបាត់បង់ឡើយ ពោលគឺត្រូវការពារផលប្រយោជន៍រួម ដែលជាទ្រព្យសម្បត្តិ របស់រដ្ឋ បើពុំដូច្នោះទេ យើងនឹងត្រូវបាត់បង់ផលប្រយោជន៍ធំ ធ្វើឱ្យប្រជាពលរដ្ឋរាប់ពាន់គ្រួសារខ្វះទឹកប្រើប្រាស់សម្រាប់ធ្វើស្រែចំការរបស់ពួកគាត់។

អញ្ជើញសំណេះសំណាល សួរសុខទុក្ខ និងនាំយកអំណោយមនុស្សធម៌ ជូនដល់ប្រជាពលរដ្ឋងាយរងគ្រោះបំផុត ដែលរស់នៅលើខ្នងទំនប់អាងភាស ស្រុកឯកភ្នំ ខេត្តបាត់ដំបង ចំនួន២៥៦គ្រួសារ មកពីភូមិចំនួន២ដែលរស់នៅលើទំនប់អាងភាសមកពី ភូមិចំនួន២ ឃុំពាមឯក ស្រុកឯកភ្នំ ខេត្តបាត់ដំបង នៅថ្ងៃអង្គារ នេះ លោក សុខ លូ អភិបាលខេត្ត និងជាប្រធានគណៈកម្មាធិការសាខាកាកបាទក្រហមកម្ពុជា ខេត្តបាត់ដំបង ក៏បាននាំយកនូវការផ្តាំផ្ញើ ពីសំណាក់សម្តេចកិត្តិព្រឹទ្ធបណ្ឌិតប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលសម្ដេចតែងតែផ្តាំផ្ញើសួរសុខទុក្ខ គិតគូរពីអំពីជីវភាពរស់នៅប្រចាំថ្ងៃ របស់លោកយាយ លោកតា ប្រជាពលរដ្ឋ ងាយរងគ្រោះ ទាំងអស់ដោយក្តីនឹករលឹកជាទីបំផុត ពិសេសសម្ដេចតែងតែបានណែនាំដល់សាខាកាកបាទក្រហមខេត្ត ទាំងអស់ ខិតខំយកចិត្តទុកដាក់ ស្វែងរកប្រជាពលរដ្ឋដែលងាយរងគ្រោះនៅតាមភូមិសាស្រ្ដនានានៅទូទាំងខេត្ត ដើម្បីធ្វើការដោះស្រាយបញ្ហាជូនគាត់ឱ្យបានទាន់ពេលវេលា។

លោកបានថ្លែងបន្តថា កាកបាទក្រហមកម្ពុជា ក្រោមការដឹកនាំប្រកបដោយគតិបណ្ឌិត របស់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន គឺវត្តមានកាកបាទក្រហមកម្ពុជា បានដើរតួនាទីយ៉ាងសំខាន់បំផុត មិនអាចខ្វះបានឡើយ ជាជំនួយការឱ្យអាជ្ញាធរសាធារណៈ ក្នុងគោលដៅជួយសម្រាលទុក្ខលំបាក របស់ប្រជាពលរដ្ឋ ដែលងាយរងគ្រោះ និងរងគ្រោះបំផុត ដោយមិនប្រកាន់និន្នាការនយោបាយ សាសនា ពូជសាសន៍អ្វីឡើយ។ លើសពីនោះ សាខាកាកបាទក្រហមកម្ពុជា ខេត្តបាត់ដំបង បានអនុវត្ដយ៉ាងខ្ជាប់ខ្ជួន ក្នុងបុព្វហេតុមនុស្សធម៌ សង្គ្រោះប្រជាពលរដ្ឋ ងាយរងគ្រោះ និងងាយរងគ្រោះបំផុតនៅទូទាំងប្រទេស ប្រកបដោយតម្លាភាព និងប្រសិទ្ធភាពខ្ពស់ជាប្រចាំ។

លោក សុខ លូ បានផ្ដាំផ្ញើជូនដល់បងប្អូនប្រជាពលរដ្ឋទាំងអស់ សូមថែទាំសុខភាពឱ្យបានល្អ ពិសាទឹកដាំឆ្អិនល្អ មានអនាម័យក្នុងការរស់នៅ និងប្រុងប្រយ័ត្នចំពោះការប្រែប្រួលអាកាសធាតុ ដូចជាគ្រោះមហន្តរាយដោយធម្មជាតិ ខ្យល់ព្យុះ ខ្យល់កន្ត្រាក់ ជាពិសេសការពារកុំឱ្យមូសខ្លាខាំ ត្រូវគេងក្នុងមុងជានិច្ច និងសូមបន្តចូលរួមទប់ស្កាត់ជំងឺកូវីដ-១៩ ដោយត្រូវបន្តចូលរួមចាក់វ៉ាក់សាំងដូសទី៣ ឬដូសទី៤ ឬដូសជំរុញបន្តបន្ទាប់ទៀតតាមគោលការណ៍ណែនាំ របស់អាជ្ញាធរ ឱ្យបានគ្រប់ៗគ្នា ព្រោះថាប្រសិទ្ធភាពនៃវ៉ាក់សាំង អាចការពារអាយុជីវិត ឬកាត់បន្ថយការគ្រោះថ្នាក់ធ្ងន់ធ្ងរពីជំងឺកូវីដ-១៩ និងជាពិសេស ពង្រឹងភាពស៊ាំនៅក្នុងខ្លួនយើងឱ្យកាន់តែខ្លាំង។

សូមបញ្ជាក់ថា អំណោយដែលសាខាកាកបាទក្រហមកម្ពុជាខេត្ត ត្រូវបានផ្តល់ជូនដល់គ្រួសារនីមួយៗនូវ៖ អង្ករ ២៥គីឡូក្រាម, មី ១កេស, ត្រីខ ១០កំប៉ុង, ទឹកបរិសុទ្ធវីឃែរ១ កេស,ទឹកត្រី១យួរ ទឹកស៊ីអ៉ីវ១យួរ៕SRP

ខេត្តកំពង់ចាម​៖ស្ថានភាពទឹកទន្លេមគង្គក្នុងខេត្តកំពង់ចាម នៅថ្ងៃទី២៣ ខែសីហាឆ្នាំ២០២២ បានហក់ឡើងសារជាថ្មីកម្ពស់​ជាង​កន្លះ​ម៉ែត្រ​ ត្រឹមរយៈពេល​ ២៤ម៉ោង​ ធ្វើឲ្យទឹក​កេីនឡេីង​កម្ពស់​​១២.២២ម៉ែត្រ​​ ពោលគឺ​ទឹកខ្ពស់ជាងឆ្នាំមុន​ដែល​មាន​កម្ពស់​ត្រឹមតែ​ ៨.១៦ម៉ែត្រ​ប៉ុណ្ណោះ​។

លោក​ ​អ៊ុម វិបុល ប្រធាន​មន្ទីរ​ធនធានទឹក​ និង​ឧតុនិយម​ខេត្តកំពង់ចាម​ ​បាន​បញ្ជាក់​​ថា​ កម្ពស់​ទឹកទន្លេមេគង្គ​ ត្រឹម​រយៈពេល​ ២៤ម៉ោង​ បាន​ហក់ឡើង​កម្ពស់​ ០.៦៦ម៉ែត្រ​ ធ្វើ​ឲ្យ​ទឹក​កេីនឡេីង​​កម្ពស់​ ១២.២២ម៉ែត្រ​ ខណៈ​កម្ពស់​ទឹក​ដែល​ត្រូវ​ប្រកាស​ការ​ប្រុងប្រយ័ត្ន​ ១៥.២០ម៉ែត្រ​ បណ្តាល​ឲ្យ​​ទឹកហូរ​ចូលកន្លែងទំនាប និងព្រែកចំនួន​ ​២២​ លើ​ ៤១​ព្រែក​ ក្នុង​ខេត្តកំពង់ចាម​ ដែល​ក្នុង​នោះ​ទឹក​បានលូនចូល ស្ថិតនៅ​ក្នុងស្រុកស្ទឹងត្រង់ចំនួន៥ ស្រុកកំពង់សៀម៣ ស្រីសន្ធរ២ កោះសូទិន៥ និងក្នុងស្រុកកងមាស​ចំនួន​ ៧​ព្រែក​។

បេីយោងតាម​សេចក្តីជូនដំណឹង​របស់​ក្រសួង​ធនធានទឹក​ និង​ឧតុនិយម​ (ចាប់ពីថ្ងៃទី២៤​ ដល់ថ្ងៃទី​៣០ ខែសីហា ឆ្នាំ២០២២ )​ ព្រះរាជាណាចក្រកម្ពុជាទទួលរងឥទ្ធិពលពីជ្រលងសម្ពាធទាបឥណ្ឌា និងខ្យល់មូសុងនិរតីខ្សោយ ស្ថានភាពបែបនេះនឹងធ្វើឲ្យ តំបន់ទំនាបកណ្តាល​នឹងអាចមានភ្លៀងធ្លាក់នៅក្នុងកម្រិតពីតិចទៅមធ្យម លាយឡំដោយផ្គរ រន្ទះ​ និងខ្យល់កន្ត្រាក់ ទន្ទឹមនោះផ្នែកខ្លះក៍អាចមានភ្លៀងជាបង្គួរ​ទៀត​ផង។​ ចំពោះ​តំបន់ខ្ពង់រាបនឹងអាចមានភ្លៀងធ្លាក់នៅក្នុងកម្រិតពីតិចទៅមធ្យម លាយឡំដោយផ្គរ រន្ទះ ទន្ទឹមនោះផ្នែកខ្លះក៍ អាចមានភ្លៀងជាបង្គួរ។​ ដោយឡែក​តំបន់មាត់សមុទ្រ នឹងអាចមានភ្លៀងធ្លាក់នៅក្នុងកម្រិតពីខ្សោយទៅមធ្យម លាយឡំទៅដោយផ្គរ រន្ទះ​ ផងដែរ​៕SRP

ខេត្តត្បូងឃ្មុំ​៖លោកជាម​ ច័ន្ទ​សោភ័ណ​ អភិបាលខេត្ត
បានលើកទឹកចិត្តដល់ សិស្សានុសិស្ស ត្រូវខិតខំប្រឹងប្រែងរៀនសូត្រ គោរពច្បាប់ចរាចរណ៍ ចេះស្រលាញ់បរិស្ថាន និងចៀសសឲ្យឆ្ងាយពីគ្រឿងញៀន ត្រូវធ្វើជាយុវជនគំរូ ជាសិស្សល្អ កូនល្អ ពលរដ្ឋល្អ ត្រូវថែរក្សាសុខភាព ឲ្យបានល្អ ពិសេសការពារខ្លួនពីជំងឺកូវីដ១៩ តាមរយៈការអនុវត្តវិធានការការពារ និងការចាក់វ៉ាក់សាំងដុសបន្តបន្ទាប់ តាមការណែនាំរបស់ក្រសួងសុខាភិបាល​ផងដែរ​។

ក្នុង​ឱកាស​ប្រារព្ធទិវាអន្តរជាតិសម្រាប់យុវជន ខួបលើកទី២៣ ក្រោមប្រធានបទ ” សាមគ្គីភាពអន្តរជំនាន់ ” នៅវិទ្យាល័យសម្តេច ហេង សំរិន អន្លង់ជ្រៃ ស្ថិតនៅឃុំកក់ ស្រុកពញាក្រែក ខេត្តត្បូងឃ្មុំ​ នៅថ្ងៃចន្ទម្សិលមិញ លោក ជាម ច័ន្ទសោភ័ណ ក៏បានអះអាងថា ការអភិវឌ្ឍយុវជន គឺជាការងារអាទិភាពក្នុងការអភិវឌ្ឍប្រទេសជាតិ និងកសាងសន្តិភាព ពីព្រោះយុវជនគឺជាទំពាំងស្នងឬស្សី ដែលចាំបាច់ត្រូវមានការអភិវឌ្ឍទាំងកាយសម្បទា ចំណេះដឹង បញ្ញាស្មារតីដើម្បីក្លាយខ្លួនជាធនធានមនុស្ស ប្រកបដោយគុណវុឌ្ឍ ក្នុងការចូលរួមចំណែកអភិវឌ្ឍជាតិ ឲ្យបានរុងរឿង ថ្កើងថ្កាន។

លោកអភិបាលខេត្ត​ បាន​បន្ត​ថា​ ក្នុង​នាម​ជា​យុវជនត្រូវមានមោទនភាពជាតិ និងខិតខំប្រឹងប្រែងអភិវឌ្ឍសមត្ថភាពខ្លួន និងចូលរួមការងារសង្គមដោយចាប់ផ្តើមចេញពីខ្លួនឯងជាមុន។ ម៉្យាងទៀត យុវជនកម្ពុជា គឺជាធនធានគន្លឹះ និងមានតម្លៃបំផុតសម្រាប់ការចូលរួមអភិវឌ្ឍសេដ្ឋកិច្ច សង្គម វប្បធម៌ បរិស្ថាន និងជាកម្លាំងចលករដ៏សំខាន់ ដើម្បីរក្សាបាននូវកំណើនសេដ្ឋកិច្ចជាតិនៅពេលបច្ចុប្បន្ន និងអនាគត។

បើតាមកាឲ្យដឹងពីលោក អ៉ិន ពៅសម្បត្តិ ប្រធានមន្ទីរអប់រំយុវជន និងកីឡា ខេត្តត្បូងឃ្មុំ បាន​ឲ្យដឹងថា ដើម្បីចូលរួមក្នុងអភិវឌ្ឍធនធានមនុស្សដែលជាស្នូល នៃយុទ្ធសាស្ត្រអភិវឌ្ឍន៍ជាតិ ក្រសួងអប់រំ យុវជន និងកីឡា បាននិងកំពុងអនុវត្តកម្មវិធីកំណែទម្រង់វិស័យអប់រំ ដោយឈរលើមូលដ្ឋាន សរសរស្ដម្ភចំនួន៥៖ (១)ការអនុវត្តផែនការសកម្មភាពគោលនយោបាយគ្រូបង្រៀន (២)ការពិនិត្យឡើងវិញនូវកម្មវិធី សិក្សា សៀវភៅសិក្សាគោល និងការកែលម្អបរិស្ថានសិក្សា (៣)ការដាក់ឲ្យអនុវត្តធិការកិច្ច (៤)ការពង្រឹងរង្វាយតម្លៃការ សិក្សា និង(៥)ការកែទម្រង់ឧត្តមសិក្សា​៕SRP