សៀមរាប ប៉ុស្តិ៍

ខេត្តកំពង់ចាម​៖ក្នុងនាមអាជ្ញាធរខេត្ត លោក អ៊ុន ចាន់ដា បាន​ថ្លែងសំណូមពរ​ដល់​ព្រះចៅ​អធិការវត្ត​គ្រប់​វត្ត​ សូម​ជួយ​ផ្សព្វផ្សាយ​រំឭកដល់​លោកយាយ​ លោកតា​ ពុទ្ធបរិស័ទ​ទាំងអស់​ ត្រូវ​​ខិតខំ​​យកចិត្តទុកដាក់​ ក្នុងការថែទាំសុខភាព​ ឲឲ្យចៀសផុតពីការ​ឆ្លង​​ជំងឺ​កូវីដ​។

លោកថ្លែងសំណូមពរនៅព្រឹកមិញនេះក្នុង​ឱកាស​នាំយកទៀន​ចំណាំ​ព្រះវស្សា និងទេយ្យទាន វេរប្រគេនដល់ព្រះសង្ឃ ចំនួន​៤វត្ត​ ក្នុងក្រុងកំពង់ចាម ដែលបានរៀបចំឡេីងនៅវត្តខេមវន្តបឹងស្នាយ ស្ថិតក្នុង​សង្កាត់សំបួរមាស ក្រុងកំពង់ចាម។

លោក អ៊ុនចាន់ដា អភិបាលខេត្តបាន​បញ្ជាក់​ថា​ ដោយ​បច្ចុប្បន្ន​ជំងឺ​ឆ្លង​រាតត្បាត​នេះ នៅតែបន្តឆ្លងពីមនុស្សម្នាក់ ទៅមនុស្សម្នាក់ទៀត ត្រូវបានរកឃើញជារៀងរាល់ថ្ងៃ​ សម្រាប់​ក្នុង​ខេត្តកំពង់ចាម​ តួរលេខ​អ្នក​ស្លាប់​បានកេីនឡេីង​ដល់​៥៦នាក់​ហេីយ​​។​ ដដើម្បីចៀសផុតពីជំងឺនេះ យើងទាំងអស់គ្នា ត្រូវចូលរួម ក្នុងកិច្ចខិតខំប្រឹងប្រែង របស់រាជរដ្ឋាភិបាលកម្ពុជា ក្នុងការប្រយុទ្ធប្រឆាំងនឹងជំងឺឆ្លងសាកលនេះ ដោយការថែរក្សាសុខភាព ជាពិសេស ការអនុវត្ត​វិធានការ​ ៣ការពារ​ ៣កុំ​។

គួរបញ្ជាក់ថា ទៀនចំណាំព្រះវស្សា និងទេយ្យទាន​វេរប្រគេនដល់ព្រះសង្ឃទាំង ៤វត្ត ដោយក្នុង ១វត្តៗ មាន៖ ទៀនព្រះវស្សា ១គូ ទេយ្យវត្ថុ ១កញ្ចប់​ អង្ករ​ ២០០គីឡូក្រាម​ មី​ ១០កេស​ ទឹក​បរិសុទ្ធ​ ​៥កេស​ ទឹកក្រូច​ ៥កេស ត្រីខ​ ១កេស​ ទឹកត្រី​ ៥យួរ​ ទឹកស៊ីអ៉ីវ​ ៥យួរ​ ទឹកដោះគោខាប់​ ១កេសធំ​ ​​ ស្ករស​ ៥គីឡូក្រាម​ តែ​ ៥កញ្ចប់​ ចង្ហាន់​ ១ស្រាក់​ ផ្លែឈើ​ ១កន្ត្រក​ និងបច្ច័យ ១.៧០០.០០០រៀល​៕SRP

ខេត្តសៀមរាប៖ដោយលោក សឿន តុលា ស្ថាបនិកក្រុមហ៊ុនផាផាយ៉ា បាននិពន្ធនូវអត្ថបទមួយក្រោមចំណងជើងថា«សម្លឹងទៅរកគោលដៅ»។ លោក សឿន តុលា បានសរសេរថា៖ មនុស្សឈ្នះមិនដែលរាថយ ជាមួយគោលដៅ   រីឯ មនុស្សរាថយជាមួយគោលដៅ ព្រោះគេមិនដែលមានថ្ងៃឈ្នះ។

” ប្រសិនបើយើងគិតថាលំបាក  ប្រាកដហើយ យើងនឹងលំបាក ប៉ុន្តែ ប្រសិនបើយើងគិតថា  តើយើងត្រូវដោះស្រាយ

បញ្ហា ឬការលំបាក របៀបណានោះ ប្រាកដណាស់ហើយ យើង នឹងមានដំណោះស្រាយ  ហើយរឿងរ៉ាវទាំងនោះ ក្លាយជាភាពធម្មតា”  នោះមានន័យថា  រឿងរ៉ាវទាំងអស់ដែលកើតឡើង ប្រែក្លាយជាលំបាក  ប្រែក្លាយជាបញ្ហាធំ  គឺអាស្រ័យទៅលើ ផ្នត់គំនិតនៃការគិតរបស់យើងតែប៉ុណ្ណោះ  មនុស្សដែលជោគជ័យ គឺមានផ្នត់គំនិត រកដំណោះស្រាយ ព្យាយាម ហើយជំរុញឲ្យ ដំណើរការទៅមុខជានិច្ច  រីឯអ្នកបរាជ័យវិញ  គឺ រុញរា មិនមានការតាំងចិត្តគ្រប់គ្រាន់ ដើម្បីរកដំណោះស្រាយ ចំពោះរឿងរ៉ាវ ដែលកើតឡើងនោះទេ  ពីព្រោះ ផ្នត់គំនិតរបស់ពួកគាត់ គឺគិតអំពីបញ្ហា ច្រើនជាងរកដំណោះស្រាយ ។

តាមពិតទៅ នៅក្នុងពិភពលោកនេះមិនមែនជារឿងលំបាកនោះទេ  គ្រាន់តែយើង គិតតែពីរឿងលំបាក  ប្រសិនបើយើង មានការតាំងចិត្តគ្រប់គ្រាន់  ដំណោះស្រាយតែងតែផុសចេញពីក្បាលរបស់យើង។

នៅក្នុងការស្រាវជ្រាវ អំពីមនុស្សដែលបានជោគជ័យកំពូល ហើយក្លាយជាមហាសេដ្ឋី  ពួកគេទាំងអស់នោះ កើតមកក្នុងត្រកូលគ្រួសារក្រីក្រ ដែលគ្រួសារគ្មានលទ្ធភាពផ្គត់ផ្គង់ពួកគេ  ប៉ុន្តែ ពួកគេរឹងមាំហើយក្លាយជាមហាសេដ្ឋីនៅក្នុងលំដាប់ពិភពលោក  មានដូចជា; Li His Cheng ( មហាសេដ្ឋីជនជាតិចិន) Thomas Alva Edison ( មហាសេដ្ឋីច្នៃប្រឌិត អំពូលភ្លើង ជនជាតិអាមេរិកាំង) Henry Ford , Andrew Carnegie..ជាដើម ។ ពួកគាត់ទាំងអស់នោះ គឺចេញមកពីការកសាងខ្លួនឯង លត់ដំក្នុងការរកស៊ីចេញពីបាតដៃទទេ នឹងទទួលបានជោគជ័យ ។

ប្រសិនបើយើងសួរសំណួរពិចារណាអំពីអំពីថា តើពួកគេទទួលបានជោគជ័យយ៉ាងដូចម្ដេច? គឺមានចម្លើយយ៉ាងខ្លី ” ឧស្សាហ៍ ព្យាយាម មិនបោះបង់” ពីព្រោះ អថ៍កំបាំង របស់ពួកគេគឺ ដាក់គោលដៅ ពួកគេជឿលើគោលដៅពួកគេជឿលើខ្លួនឯង ថា : ពួកគេធ្វើឱ្យបានសម្រេចគោលដៅ ដែលពួកគេបានកំណត់។

និពន្ធដោយលោក សឿន តុលា ស្ថាបនិកក្រុមហ៊ុន : ផា ផា យ៉ា PAPAYA NEXT STEP CO,.LTD*PAPAYA REAL ESTATE (គម្រោងអភិវឌ្ឍន៍អចលនទ្រព្យ)*PAPAYA HOMESTAY (គម្រោងលើវិស័យទេសចរណ៍)*PAPAYA GARDEN (គម្រោងលើវិស័យកសិកម្មនិងចែកចាយអាហារ)

ភ្នំពេញ៖មេដឹកនាំកម្ពុជា សម្តេចតេជោ ហ៊ុន សែន នៅថ្ងៃទី១៦ ខែកក្កដា ឆ្នាំ ២០២១នេះ បានផ្ញើសារពិសេស សម្រេចបើកដំណើរការ ចាក់វ៉ាក់សាំងបង្ការជំងឺកូវីដ-១៩ ជូនកុមារ និង យុវវ័យ ចាប់ពីអាយុ ១២ ដល់ ១៧ឆ្នាំ ដែលជំហានដំបូងដំណើរការចាក់ នៅរាជធានីភ្នំពេញ និងខេត្តកណ្ដាល។

មេដឹកនាំដ៏កម្ពុជាដ៏មានប្រជាប្រិយ៍ភាព សម្តេចតេជោ ហ៊ុន សែន ក៏បានអំពាវនាវដល់ មាតា បិតា និងអាណាព្យាបាល ឲ្យត្រៀមនាំកូនៗ ដែលមានអាយុចាប់ពី ១២ ដល់ ១៧ ឆ្នាំ មកចាក់វ៉ាក់សាំងការពារជំងឺកូវីដ-១៩ ឲ្យបានគ្រប់ៗគ្នា តាមការជូនដំណឹងរបស់ក្រសួងសុខាភិបាលនាពេលខាងមុខ។ ខាងក្រោមនេះជាសារសំឡេងសម្តេច តេជោ ហ៊ុន សែន

ខេត្ត​កំពង់ចាម​៖លោក ខៀវ កាញារីទ្ធ រដ្ឋមន្ត្រី ក្រសួងព័ត៌មាន និងជាប្រធានក្រុមការងាររាជរដ្ឋាភិបាល ចុះជួយមូលដ្ឋាន ស្រុកកោះសូទិន នៅថ្ងៃទី១៥ ខែកក្កដា ព្រឹកមិញនេះបាន​អញ្ជើញ​បើកយុទ្ធនាការ ចាក់វ៉ាក់សាំងប្រឆាំងជំងឺកូវីដ-១៩​ នៅសាលាបឋមសិក្សាជីហែ ស្រុកកោះសូទិន១។

លោក រដ្ឋមន្រ្តី ខៀវ កាញារីទ្ធ បានថ្លែងថា នេះជាទិសដៅនៃយុទ្ធនាការចាក់វ៉ាក់សាំងបង្ការជំងឺកូវីដ-១៩ គឺចាក់ ជូនប្រជាជន អោយបាន ប្រមាណ ពី ៧០ ទៅ ៨០ ភាគរយ ដេីម្បីអាចទប់ទល់ជាមួយជំងឺនេះបាន។ សូមបងប្អូន ទាំងអស់ដែលគ្រប់អាយុ ១៨ ឆ្នាំ សូមមកធ្វេីការចាក់វ៉ាក់សាំងទាំងអស់គ្នា ព្រោះជំងឺនេះ សាហាវ និងមានការឆ្លងលឿនណាស់ ហេីយមេរោគ វាចូលស៊ីដល់ក្នុងសួត ដែលអាចធ្វេីឲ្យមនុស្សស្លាប់។ ដូច្នេះយេីងទាំងអស់គ្នាត្រូវមានការប្រុងប្រយ័ត្នខ្ពស់បំផុត កុំអោយមាន ការឆ្លងនូវ ជំងឺកូវីដ។ ជាពិសេសចំពោះមនុស្សចាស់ ត្រូវមានការ ការពារអោយបានខ្លាំង បំផុត ក្នុងនោះអ្នកធ្លាប់កេីតជំងឺសួត ទឹកនោមផ្អែម អ្នកមានគីឡូហួសទម្ងន់របស់ខ្លួន នីមួយៗ គឺជាមុខសញ្ញាដែលត្រូវចៀសកុំអោយឆ្លងជំងឺនេះ បេីមិនដូច្នេះទេពិតជាលំបាកហេីយ។

រដ្ឋមន្រ្តី បានលេីកឡេីងទៀតថា នៅបណ្តាប្រទេសមួយចំនួនដែល មានការ ឆ្លងជំងឺកូវីដច្រេីន ហេីយអ្នកដែលមានអាយុលេីសពី ៦៥ ឆ្នាំ គឺគេទុកចោលដោយសារខ្វះ លទ្ធភាពក្នុងការ​សង្គ្រោះ​ ហើយម៉ាស៊ីនជំនួយដង្ហេីម និងព្យាបាលមានចំនួនតិច ដោយគេទុកសម្រាប់តែការព្យាបាលក្មេងៗប៉ុណ្ណោះ។ ដូច្នេះហេីយ អ្វីដែលសំខាន់នោះ​ គឺការថែរក្សាសុខភាព អនុវត្តតាមការណែនាំរបស់ ក្រសួងសុខាភិបាល ពិសេស ប្រជាពលរដ្ឋ ត្រូវទៅចាក់វ៉ាក់សាំងបង្ការជំងឺកូវីដទាំងអស់គ្នា ហើយកុំ គិតថា ការចាក់វ៉ាក់សាំងទាំង ២ ដូសរួច មិនឆ្លងជំងឺកូវីដអោយសោះ គឺនៅតែឆ្លង ដដែល បេីសិនជាយេីងគ្មានវិធានការ ការពារខ្លួនទេនោះ​ តែការឆ្លងនោះអាចព្យាបាលជាសះស្បើយ ប៉ុន្តែយេីងអាចឆ្លងទៅដល់ក្រុមគ្រួសារ និងអ្នកមិនទាន់បានចាក់វ៉ាក់សាំង យ៉ាងឆាប់រហ័ស ហើយបង្ករគ្រោះថ្នាក់ដល់អាយុជីវិតថែមទៀតផង។

តាម​រយៈ​នេះ​លោក ខៀវ កាញារីទ្ធ បានបញ្ជាក់ជូនពីកិច្ចខិតខំប្រឹងប្រែងរបស់ប្រមុខរាជរដ្ឋាភិបាល សម្តេចហ៊ុន សែន ក្នុងការប្រយុទ្ធប្រឆាំងជំងឺកូវីដនេះ ដោយក្នុងរយៈពេល កន្លងមកនេះបានចំណាយថវិកា អស់រាប់រយលានដុល្លា ដេីម្បីជួយដល់ជីវភាព រស់នៅ របស់ប្រជាពលរដ្ឋ ដែលទទួលរងផលប៉ះពាល់ដោយសារជំងឺកូវីដ ក៏ដូចជាជួយដល់ កម្មករ កម្មការនី រោងចក្រ កាត់ដែរ ថែមទៀតផងដែរ។

លោក រដ្ឋមន្រ្តី ខៀវ កាញារីទ្ធ ក៏បាននាំយកនូវអំណោយជូនដល់ ក្រុមគ្រូពេទ្យចាក់វ៉ាក់សាំង ដែលរួមមាន អាកុល ៧ កាន ម៉ាស៥ ពាន់ម៉ាស អាវពេទ្យ ៥ កេស ស្រោមដៃ ៧០ ទឹកសុទ្ធ ៣៥ កេស និងថវិកា ១ លានរៀល។

ឆ្លៀត​ក្នុងឱកាសនោះដែរ​ លោក រដ្ឋមន្រ្តី ខៀវ កាញារីទ្ធ ក៏បានអញ្ជេីញទៅជួបសាកសួរសុខទុក្ខ ជាមួយមន្រ្តីសាលាស្រុក កោះសូទិន មួយចំនួន ដែលកំពុងជាប់ធ្វេីចត្តឡីស័ក ក្នុងសាលាស្រុក និងប្រជាពលរដ្ឋផ្ទះចំនួន ៥១ គ្រួសារ ដោយនាំយកនូវអំណោយចែកជូន ដូចជាទឹកត្រី ទឹកស៊ីអ៉ីវ មី និងត្រីខ ដេីម្បី ទុកផ្គត់ផ្គង់ជីវភាពក្នុងពេលកំពុងចត្តាឡីស័ក១៤ថ្ងៃ​ផងដែរ​៕SRP

ខេត្តសៀមរាប៖លោកស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូននិងជាអនុប្រធានប្រចាំការនៃគម្រោងស្ថាបនាហេដ្ឋារចនាសម្ព័ន្ធផ្លូវ ៣៨ខ្សែនៅក្នុងក្រុងសៀមរាប ខេត្តសៀមរាប បានអះអាងថា ៖ វឌ្ឍនភាពការងារជារួមនៃគម្រោងស្ថាបនាហេដ្ឋារចនាសម្ព័ន្ធផ្លូវចំនួន៣៨ខ្សែនៅក្នុងក្រុងសៀមរាប ខេត្តសៀមរាបគិតត្រឹមថ្ងៃទី១២ ខែកក្កដា ឆ្នាំ២០២១ សម្រេចបាន៦៦,៣៤%ហើយ ដោយប្រើប្រាស់រយៈពេលសាងសង់ចំនួន៧ខែ គិតចាប់ពី ថ្ងៃទី៣០ ខែវិច្ឆកា ឆ្នាំ២០២០។

លោក ស៊ុន ចាន់ថុល ថ្លែងយ៉ាងដូច្នេះ នៅ ថ្ងៃព្រហស្បតិ៍ ទី១៥ ខែកក្កដា ឆ្នាំ២០២១នេះ នៅទីស្តីការក្រសួង ក្នុងឱកាសអញ្ជើញចូលរួមកិច្ចប្រជុំគណៈកម្មការអន្តរក្រសួង តាមប្រព័ន្ធវីដេអូពីចម្ងាយ ក្រោមអធិបតីភាពដ៏ខ្ពង់ខ្ពស់សម្តេចពិជ័យសេនា ទៀ បាញ់ ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិ និងជាប្រធានគណៈកម្មការអន្តរក្រសួង។

កិច្ចប្រជុំនេះធ្វើឡើងក្នុងគោលបំណងដើម្បីពិភាក្សាអំពីវឌ្ឍនភាពការងារអនុវត្តគម្រោងស្ថាបនាហេដ្ឋា រចនាសម្ព័ន្ធផ្លូវចំនួន៣៨ខ្សែក្នុងក្រុងសៀមរាប ក៏ដូចជាដើម្បីពិភាក្សាបញ្ហាប្រឈម ដំណោះស្រាយ និងសំណូមពររបស់អង្គភាពអនុវត្តគម្រោង និងភាគីពាក់ព័ន្ធទាំងអស់ដែលបានជួប ប្រទះក្នុងការបំពេញការងាររបស់ខ្លួនកន្លងមក និងស្នើសុំអនុសាសន៍ណែនាំបន្ថែម។

សម្តេចទៀ បាញ់ បានវាយតម្លៃខ្ពស់ចំពោះការខិតខំប្រឹងប្រែង របស់គណៈកម្មការអន្តរក្រសួង ក្រុមការងារបច្ចេកទេស និងអង្គភាពអនុវត្តគម្រោង ដែលបានខិតខំប្រឹង ប្រែងយកចិត្តទុកដាក់អនុវត្តគម្រោងសាងសង់ហេដ្ឋារចនាសម្ព័ន្ធផ្លូវ៣៨ខ្សែ ក្នុងក្រុងសៀមរាប ខេត្តសៀមរាប និងបានថ្លែងអំណរគុណចំពោះរដ្ឋបាលខេត្ត ប្រជាពលរដ្ឋ និងវិស័យឯកជននានា ដែលបាន ចូលរួមគាំទ្រគម្រោងនេះរហូតសម្រេចបានលទ្ធផលតាមផែនការ ស្របតាមអនុសាសន៍ណែនាំដ៏ខ្ពង់ខ្ពស់ របស់ហ៊ុន សែន នាយករដ្ឋមន្ត្រី។

នៅពេលបញ្ចប់គម្រោងសាងសង់ហេដ្ឋារចនាសម្ព័ន្ធផ្លូវ៣៨ខ្សែនេះ ប្រជាពលរដ្ឋនៅខេត្តសៀមរាបនឹងទទួលបាននូវអត្ថប្រយោជន៍ពីការអភិវឌ្ឍនេះយ៉ាងពិតប្រាកដ ដោយហេតុថាគម្រោងនេះនឹងតភ្ជាប់ពីទីប្រជុំជនទៅកាន់តំបន់ជាយក្រុង តំបន់ទេសចរណ៍វប្បធម៌សំខាន់ៗ និងបណ្តាញខ្សែផ្លូវជាតិនានាប្រកបដោយភាពប្រទាក់ក្រឡាគ្នា ទាក់ទាញភ្ញៀវទេសចរណ៍ជាតិនិងអន្តរជាតិ និងវិនិយោគិនបង្កើតការងារធ្វើជូនប្រជាពលរដ្ឋសំដៅលើកកម្ពស់សេដ្ឋកិច្ចឱ្យមានការរីកចម្រើន។

សូមរម្លឹកផងដែរថា៖ គម្រោងនេះអនុវត្តដោយអង្គភាពសាងសង់ចំនួន០៨ រួមមាន៖ ១) កងវិស្វកម្មលេខ ១៧៨ស្ពាន-ថ្នល់ នៃនាយកដ្ឋានវិស្វកម្ម ២) កងវិស្វកម្មសម្តេចតេជោ ខេត្តសៀមរាប ៣) កងវិស្វកម្មតេ ជោ ហ៊ុន សែន សៀមរាប ៤) អគ្គនាយកដ្ឋាន សាធារណការ ៥) អគ្គនាយកដ្ឋានប្រព័ន្ធចម្រោះទឹកកខ្វក់ ៦) នាយកដ្ឋាន គ្រឿងចក្រនិងស្ថាបនាផ្លូវ ៧) នាយកដ្ឋាន ជួសជុល និងថែទាំផ្លូវថ្នល់ និង ៨) មន្ទីរ សាធារណការ និងដឹក ជញ្ជូន ខេត្តសៀមរាប និងត្រួតពិនិត្យបច្ចេកទេសដោយក្រុមការងារអន្តរក្រសួង ចំនួន៩ក្រុម រួមមានដូចខាងក្រោម៖

១) ក្រុមការងារត្រួតពិនិត្យតាមដានគម្រោងសាងសង់ផ្លូវចំនួន១៣ខ្សែអនុវត្តដោយកងវិស្វកម្មលេខ ១៧៨ស្ពាន-ថ្នល់ ២)ក្រុមការងារត្រួតពិនិត្យតាមដានគម្រោងសាងសង់ផ្លូវចំនួន៨ខ្សែ អនុវត្តដោយកង វិស្វកម្មតេជោហ៊ុន សែន ខេត្តសៀមរាប ៣) ក្រុមការងារត្រួតពិនិត្យតាមដានគម្រោងសាងសង់ផ្លូវចំនួន ៦ខ្សែ អនុវត្តដោយកងវិស្វកម្មសម្ដេចតេជោ ខេត្តសៀមរាប ៤) ក្រុមការងារត្រួតពិនិត្យតាមដានគម្រោង សាងសង់ផ្លូវចំនួន៥ខ្សែ អនុវត្តដោយនាយកដ្ឋានជួសជុលនិងថែទាំផ្លូវថ្នល់ ៥) ក្រុមការងារត្រួតពិនិត្យ តាមដាន គម្រោងសាងសង់ផ្លូវចំនួន៥ខ្សែ អនុវត្តដោយនាយកដ្ឋានគ្រឿងចក្រ និងស្ថាបនាផ្លូវ ៦)ក្រុម ការងារត្រួតពិនិត្យ តាមដានគម្រោងសាងសង់ផ្លូវចំនួន២ខ្សែ អនុវត្តដោយមន្ទីរសាធារណការ និងដឹក ជញ្ជូនខេត្តសៀមរាប ៧) ក្រុមការងារត្រួតពិនិត្យតាមដានគម្រោងស្ថាបនាបណ្ដាញលូទឹកភ្លៀង និងលូទឹក កខ្វក់មិនស្ថិតនៅក្រោមខ្សែផ្លូវទាំង៣៨ខ្សែ អនុវត្តដោយអគ្គនាយកដ្ឋានប្រព័ន្ធចម្រោះទឹកកខ្វក់ ៨)ក្រុម ការងារត្រួតពិនិត្យតាមដានគម្រោងស្ថាបនាបំពាក់សម្ភារកាមេរ៉ាសុវត្ថិភាព អំពូលភ្លើងបំភ្លឺផ្លូវ បរិក្ខារភ្លើង សញ្ញាចរាចរណ៍ និងការដាំដើមឈើ អនុវត្តដោយអគ្គនាយកដ្ឋានសាធារណការ និង ៩)ក្រុមការងារ សិក្សានគរូបនីយកម្មផ្លូវ គូរប្លង់ ស្ថាបត្យកម្មផ្លូវ លម្ហសាធារណៈ និងរចនាកម្មវត្ថុស្ថាបត្យកម្មនានាដែលទាក់ទងនឹងគម្រោង៕SRP

ខេត្តកំពង់ចាម៖ក្នុង​ឱកាសបេីកយុទ្ធនាការចាក់វ៉ាក់សាំងបង្ការជំងឺកូវីដ-១៩​ ជូនប្រជាពលរដ្ឋ​ ចាប់ពីអាយុ១៨ឆ្នាំឡេីង នៅស្រុកចំការលេី​ នៅព្រឹកមិញ នេះ លោក អ៊ុន​ ចាន់ដា​ អភិបាលខេត្តកំពង់ចាម​ បានបានអំពាវនាវដល់ប្រជាពលរដ្ឋ ក្នុងស្រុកចំការលេី ស្ទឹងត្រង់​ កងមាស ស្រីសន្ធរ និងកោះសូទិន​​ ឲ្យ​ចូលរួម​ជាមួយ​អាជ្ញាធរ​ ក្នុងការទទួល​វ៉ាក់សាំង​បង្ការ​ជំងឺ​កូវីដ​-១៩​ សម្រាប់​​ការពារ​អាយុជីវិតខ្លួន​ ដេីម្បី​កុំឲ្យ​ជំងឺ​នេះ​ប៉ះពាល់​ដល់​គ្រួសារ​ ​សហគមន៍​ និង​សេដ្ឋកិច្ច​​ ខណៈ​ក្រុម​គ្រូពេទ្យ​មានការ​បណ្ដុះបណ្ដាល​វិជ្ជាជីវៈ​ និង​ក្រមសីលធម៌​ច្បាស់លាស់​ពីក្រសួងសុខាភិបាល។ ​​

លោកអ៊ុន​ ចាន់ដា​ បានថ្លែងថា​ បច្ចុប្បន្ន​ខេត្តកំពង់ចាម​ មាន​អ្នក​ឆ្លង​ជំងឺ​កូវីដ​-១៩​ ជាង៣០០០នាក់​ និង​មាន​អ្នក​ស្លាប់​បាត់បង់​ជីវិត​​ ៥៤នាក់​ ទន្ទឹម​នឹង​នោះ​ក៏​មាន​ការ​ព្យាបាល​ជាសះស្បើយ​ជាង២០០០នាក់​។ ចំពោះ​មូលហេតុ​ដែល​នាំឲ្យ​មាន​ការ​ឆ្លង​ច្រើន​នេះ​ ដោយសារ​រោងចក្រ​កាត់ដេរ​មាន​ការ​ប្រមូលផ្ដុំ​គ្នា​ ​ការ​ធ្វើ​ដំណើរ​តាម​រថយន្ត​រួមគ្នា​​ និង​ការ​រស់នៅ​ហូបចុក​ជាមួយគ្នា​។ ជំងឺ​កូវីដ​-១៩​ មិនត្រឹម​តែ​ឆ្លង​ទៅដល់​ប្រជាពលរដ្ឋ​ ក្នុងសហគមន៍នោះទេ គឺ​ឆ្លង​ទៅដល់​សមត្ថកិច្ច​ និង​ក្រុម​គ្រូពេទ្យ​ពេល​បំពេញ​ការងារ​​ផងដែរ​។

អភិបាលខេត្ត បាន​ថ្លែង​បន្ត​ថា​ ដោយ​មាន​ការ​គិតគូរ​ពីសុខទុក្ខ​ចំពោះ​សុខភាព​របស់​បងប្អូន​ប្រជាពលរដ្ឋ​ សម្តេច​តេជោ ហ៊ុន​ សែន​ នាយករដ្ឋមន្ត្រី​កម្ពុជា​ បាន​ផ្តល់​វ៉ាក់សាំង​បង្ការ​ជំងឺ​កូវីដ​-១៩​ ជា​លក្ខណៈ​ទ្រង់ទ្រាយ​ថ្នាក់ជាតិ​ សម្រាប់​ពលរដ្ឋ​ក្នុង​ ខេត្តកំពង់ចាម បន្ទាប់​ពី​ពលរដ្ឋ​នៅឯ​រាជធានី​ភ្នំពេញ​។ ក្នុងនោះ​ក្រុម​គ្រូពេទ្យ​ក៏បាន​ចាក់​ជូន​ប្រជាពលរដ្ឋ​​ នៅក្រុង-ស្រុក ចំនួន ៥ នៃខេត្តកំពង់ចាម ដែលមានក្រុងកំពង់ចាម ស្រុកកំពង់សៀម ព្រៃឈរ ជើងព្រៃ និងស្រុកបាធាយ​ សរុបជាង២០ម៉ឺននាក់រួចមកហេីយ​។ ​ទន្ទឹមនោះ​ពលរដ្ឋ​ក្នុង​ស្រុក​ចំការលេី​ ស្ទឹងត្រង់​ កងមាស ស្រីសន្ធរ និងកោះសូទិន​ ប្រមាណ​ជា​៣០ម៉ឺន​នាក់​ទៀត​ នឹង​បន្តទទួល​បាន​វ៉ាក់សាំង​បង្ការ​ជំងឺ​កូវីដ​១៩​ ចាប់ពីថ្ងៃទី​១៥​ ខែកក្កដា​ ឆ្នាំ​២០២១​ នេះតទៅ។

លោកអ៊ុន​ ចាន់ដា​ បាន​បញ្ជាក់​ថា​ វ៉ាក់សាំង​ដែល​បាន​ផ្ដល់​ជូន​ប្រជាពលរដ្ឋ​ ក្នុងស្រុកចំការលេី មាន​ចំនួន​ប្រមាណ​ជា​​ង៥ម៉ឺន​នាក់​ តែ​បេីមានអ្នក​ស្ម័គ្រចិត្ត​ លេីសពីចំនួន៥ម៉ឺននាក់ ក្នុង​ក្របខ័ណ្ឌ​ស្រុកចំការលើ​ យើងក៏​នៅតែ​ធ្វើ​ការ​ចាក់​ជូន​ដោយ​ឥតគិតថ្លៃ​ផងដែរ​៕SRP

ខេត្តព្រះវិហារ៖លោក យ៉ុង គឹមហ៊ាន សមាជិកក្រុមប្រឹក្សាខេត្តត្រូវបានតែងតាំងជាអភិបាលរងខេត្ត ជំនួសលោក គោ ស៊ុប៊ុនសឿត អតីតអភិបាលរងខេត្តព្រះវិហារ ដែលបានបញ្ចប់អាណត្តិ និងផ្ទេរភារកិច្ចទៅកាន់តំណែងជាអភិបាលរងខេត្តប៉ៃលិន។

ការប្រកាសនេះធ្វើឡើងនៅរដ្ឋបាលខេត្តព្រះវិហារ នាថ្ងៃទី១៥ ខែកក្កដា ព្រឹកមិញក្រោមវត្តមានលោកឡុង សុវណ្ណ ប្រធានក្រុមប្រឹក្សាខេត្ត និងលោក ប្រាក់ សុវណ្ណ អភិបាលខេត្ត ដោយមានការចូលរួមពី សមាជិកក្រុមប្រឹក្សាខេត្ត គណៈអភិបាលខេត្ត លោក លោកស្រីជាប្រធានមន្ទីរ អង្គភាពជុំវិញខេត្ត មេបញ្ជាការកងកម្លាំងប្រដាប់អាវុធទាំង៣ លោកអភិបាល ក្រុង ស្រុក និងមន្ត្រីពាក់ព័ន្ធជាច្រើនរូបទៀត៕SRP

ខេត្តសៀមរាប៖លោក ពឹង គិមឆេន នាយកសាលាបឋមសិក្សាវត្តបូព៌ ត្រូវបានសម្ដេចតេជោ ហ៊ុន សែន សម្រេចតែងតាំងជាជាទីប្រឹក្សាក្រសួងអប់រំ យុវជន និងកីឡា មានឋានៈស្មើប្រធាននាយកដ្ឋាន។ នេះបើយោងតាមអនុក្រឹត្យចុះហត្ថលេខាដោយសម្ដេច ហ៊ុន សែន នាយករដ្ឋមន្ត្រី៕SRP

ខេត្តបាត់ដំបង៖កម្លាំងអាវុធហត្ថខេត្តបាត់ដំបង បានឃាត់ខ្លួនបុរសម្នាក់ពីបទញុះញង់ឲ្យប្រព្រឹត្តបទឧក្រិដ្ឋជាអាទិ៍ ប្រព្រឹត្តនៅថ្ងៃទី១២ ខែកក្កដា ឆ្នាំ២០២១ បង្ហោះតាមប្រព័ន្ធបណ្តាញសង្គម (ហ្វេសបុក)។

ការឃាត់ខ្លួនធ្វើឡើងនៅវេលាម៉ោង ១២ថ្ងៃត្រង់ ទី១៤ ខែកក្កដា ម្សិលមិញ នៅចំណុចភូមិព្រែកព្រះស្តេច សង្កាត់ព្រែកព្រះស្តេច ក្រុងបាត់ដំបង។

សមត្ថកិច្ចអាវុធហត្ថបានឲ្យដឹងថាជនសង្ស័យមាន ឈ្មោះ កៅ ពិសិដ្ឋ អាយុ៣២ឆ្នាំ មុខរបរអ្នកសាព័ត៌មាន រស់នៅភូមិព្រែកព្រះស្តេច សង្កាត់ព្រែកព្រះស្តេច ក្រុងបាត់ដំបង។ ជាមួយនឹងការឃាត់ខ្លួននេះសមត្ថកិច្ចអាវុធហត្ថបានដកហូតវត្ថុតាងទូរស័ព្ទចំនួន ៣គ្រឿង, ឡាន១គ្រឿង, ប័ណ្ណព័ត៌មាន១ សន្លឹក។ បើតាមអាវុធហត្ថបានបញ្ជាក់ថាក្រោយសាកសួរជនសង្ស័យ និងវត្ថុតាង ត្រូវបានជំនាញកសាងសំណុំរឿងអនុវត្តតាមផ្លូវច្បាប់៕SRP

ភ្នំពេញ៖រដ្ឋមន្ត្រីក្រសួងមហាផ្ទៃ សម្ដេច ស ខេង បានផ្ញើសារថ្លែងអំណរគុណ ដល់ប្រជាពលរដ្ឋ ទាំងអស់ដែលមានមតិយោបល់ និងសំណូមពរ មកកាន់ សម្ដេចផ្ទាល់តាមរយៈទំព័រហ្វេសប៊ុក។

តាមរយ:គណនីហ្វេសប៊ុក សម្ដេច ស ខេង បានសរសេរថា ខ្ញុំក៏សូមថ្លែងអំណរគុណបងប្អូនជនរួមជាតិ ដែលបានលើកជាមតិយោបល់ និងសំណូមពរនានាមកកាន់រូបខ្ញុំតាមរយៈទំព័រហ្វេសប៊ុកដើម្បីយើងរួមគ្នាដោះស្រាយនូវបញ្ហានានា និងរួមគ្នាអភិវឌ្ឍន៍សង្គមជាតិយើងឱ្យកាន់តែរីកចំរើន។

ការផ្ញើសារថ្លែងអរគុណ នៅថ្ងៃទី១៥ ខែកក្កដានេះ ក្នុងពេលសម្ដេចបានជម្រាបជូននូវលទ្ធផលការងារប្រចាំឆមាសទី១ ឆ្នាំ២០២១ របស់ក្រុមការងារតាមដានអំពីការដោះស្រាយចំពោះមតិយោបល់ ឬសំណូមពររបស់បងប្អូនប្រជាពលរដ្ឋ នៅក្នុងទំព័រហ្វេសប៊ុករបស់សម្ដេច។

សម្ដេច ស ខេង បានលើកឡើងថាវឌ្ឍនភាពការងារនេះ អាចសម្រេចបានដោយសារកិច្ចខិតខំប្រឹងប្រែង និងកិច្ចសហការគ្នាល្អរវាងថ្នាក់ដឹកនាំ និងមន្ត្រីអង្គភាពចំណុះក្រសួងមហាផ្ទៃ ស្ថាប័នពាក់ព័ន្ធនៅថ្នាក់ជាតិ និងថ្នាក់ក្រោមជាតិ ជាមួយក្រុមការងារគេហទំព័រហ្វេសប៊ុករបស់ខ្ញុំ ទោះជាក្នុងស្ថានភាពប្រឈមមុខនឹងការរីករាលដាលនៃជំងឺកូវីដ-១៩ក៏ដោយ។

សម្ដេច បានបន្តថា ខ្ញុំក៏សូមយកឱកាសនេះ ស្នើសុំការយល់យោគអធ្យាស្រ័យពីបងប្អូនជនរួមជាតិ ចំពោះករណីមួយចំនួនទៀតដែលក្រុមការងារ និងភាគីពាក់ព័ន្ធនៅមិនទាន់បានដោះស្រាយចប់សព្វគ្រប់ អាស្រ័យលើករណីខ្លះទាមទារពេលវេលា និងអនុវត្តទៅតាមនីតិវិធី៕SRP  សម្ដេច ស ខេង ចុះសួរសុខទុក្ខពលរដ្ឋ នៅខេត្តបាត់ដំបង 

ខេត្តសៀមរាប៖សមត្ថកិច្ចបានឃាត់ខ្លួនបុរសម្នាក់ បញ្ជូនទៅតុលាការ ករណីរំលោភចៅស្រី។ លោក ជា ហេង នាយការិយាល័យនគរបាលប្រឆាំងការជួញដូរមនុស្សនិងការពារអនីតិ ជនខេត្តសៀមរាប បានអោយដឹងថា ជនដែលចាប់ ខ្លួនមាន ឈ្មោះ គុយ ថាន ភេទប្រុសអាយុ៣២ឆ្នាំ នៅឃុំរំចេក ស្រុកបន្ទាយស្រី។ ចំណែកជនរងគ្រោះឈ្មោះឡ ផ ភេទស្រី អាយុ៨ឆ្នាំ រស់ នៅភូមិឃុំជាមួយគ្នា។ លោកបន្តថា កាលពីថ្ងៃទី១១ ខែ កក្កដាឆ្នាំ២០២១ ស្ត្រីជាម្តាយក្មេងរងគ្រោះ  អាយុ២៦ឆ្នាំបានទៅប្តឹងអំពីករណី រំលោភសេពសន្ថវ: ។ ក្រោយទទួលបណ្តឹង សមត្ថកិច្ចបើកការ ស្រាវជ្រាវ រហូតនាំខ្លួនជនសង្ស័យ ត្រូវជាតា មកសាកសួរ។

លោក ជា ហេង  អោយដឹងទៀតថា ឆ្លង កាត់ការសាកសួរ ជនសង្ស័យបានឆ្លើយសារភាពថាខ្លួនពិតជាបានធ្វើសកម្មភាពរំលោភទៅលើជនរងគ្រោះជាចៅ បានចំនួន០៣ដង នៅថ្ងៃទីខែមិនចាំ។ ក្នុងឆ្នាំ២០១៨ បានធ្វើសកម្មភាពរំលោភ០២ដង និងក្នុងឆ្នាំ២០២១ បាន០១ដងបានសម្រេច ដោយទឹក កាមបង្ហូរចេញដាក់ខាងក្រៅ នៅលើផ្ទះរបស់ខ្លួន(ជន សង្ស័យ) ផ្ទាល់។

បើតាមលោក ជា ហេង ថាក្រោយ ស្តាប់ចម្លើយសារភាព សមត្ថកិច្ចបានកសាងសំណុំរឿង បញ្ជូនទៅតុលាការថ្ងៃទី១៤ ខែ កក្កដាដោយចោទពីបទរំលោភសេព សន្ធវ:លើអនីតិជន ដោយមានស្ថានទម្ងន់ទោស៕SRP

ភ្នំពេញ៖ក្រសួងបរិស្ថាន បានអំពាវនាវដល់ប្រជាពលរដ្ឋ ឲ្យទុកដាក់សំណល់ថ្មពិល បានត្រឹមត្រូវ និងអាចយក មកដាក់នៅក្នុងធុងតាមទីតាំងមួយចំនួនដែលបានរៀបចំនៅតាមទីសាធារណៈ ផ្សារទំនើប និងតាមស្ថានីយប្រេងឥន្ឌនៈនានាក្នុងរាជធានីភ្នំពេញ។

ការអំពាវនាវនេះធ្វើឡើងតាមរយៈរដ្ឋលេខាធិការ និងជាមន្ត្រីនាំពាក្យនៃក្រសួងបរិស្ថាន លោក នេត្រ ភក្ត្រា នៅថ្ងៃទី១៤ ខែកក្កដា ឆ្នាំ២០២១នេះ បន្ទាប់ពីមន្ត្រីនៃនាយកដ្ឋានគ្រប់គ្រងសារធាតុគ្រោះថ្នាក់នៃក្រសួងបរិស្ថានបានដាក់ធុងប្រមូលសំណល់ថ្មពិលចំនួន ១២ធុងនៅតាមទីសាធារណៈ ផ្សារទំនើប និងស្ថានីយប្រេងឥន្ធនៈ នៅក្នុងរាជធានីភ្នំពេញ ដើម្បីប្រមូលសំណល់ថ្មពិលយកទៅគ្រប់គ្រងតាមលក្ខណៈបច្ចេកទេសនិងផ្សព្វផ្សាយពីផលប៉ះពាល់នៃថ្មពិលចាស់ៗដែលលែងប្រើ។

រដ្ឋលេខាធិការក្រសួងបរិស្ថាន លោកនេត្រ ភក្ត្រា បានថ្លែងថា ការរៀបចំដាក់ធុងប្រមូលសំណល់ថ្មពិល គឺដើម្បីគ្រប់គ្រងសំណល់ដែលសម្បូរដោយសារធាតុគ្រោះថ្នាក់ និងកាត់បន្ថយការបោះចាលដោយពាសវាលពាសកាល ឬការចោលដោយលាយលំជាមួយសំណល់ធម្មតា ដែលបង្កគ្រោះថ្នាក់ដល់សុខភាព និងបរិស្ថានធ្ងន់ធ្ងរ។

លោកបានថ្លែងថា ក្រុមអ្នកជំនាញនៃក្រសួងបរិស្ថាននឹងយកសំណល់ថ្មពិលដែលប្រមូលបាន ទៅរក្សាទុកនៅទីលានទុកដាក់សំណល់ ដែលបានរៀបចំតាមលក្ខណះបច្ចេកទេសដើម្បីការគ្រប់គ្រងប្រកបដោយសុវត្តិភាពបរិស្ថានខ្ពស់ និងសិក្សាពីការទាញយកផលប្រយោជន៍ពីសំណល់ទាំងនោះមកប្រើប្រាស់វិញ»។

ដើម្បីទប់ស្កាត់ការសាយភាយសារធាតុគ្រោះថ្នាក់ចូលទៅក្នុងបរិស្ថាន និងការពារសុខភាពមនុស្សពីផលប៉ះពាល់អវិជ្ជមាន ក្រសួងបរិស្ថានបានកំពុងអនុវត្តគម្រោងប្រមូលសំណល់ថ្មពិល ដោយការដាក់ធុងសំណល់ថ្មពិលចំនួន ១២ នៅតាមទីតាំងបុរី ផ្សារទំនើប ស្ថានីយ៍ប្រេងឥន្ធនៈ រួមមាន ជីប ម៉ុង នរោម៉ល និងមណ្ឌល ជីប ម៉ុងបាក់ទូក បុរីប៉េង ហួត បឹងស្នោរ និងស្ថានីយប្រេងឥន្ធនៈភីធីធីវត្តនាគវ័ន បូកគោ ផ្សារតូច និងបឹងស្នោរ។ ក្រសួងបរិស្ថាននឹងបន្តដាក់ធុងសំណល់ថ្មពិលបន្ថែមនៅតាមទីតាំងផ្សេងទៀតដូចជានៅផ្សារម៉ាក្រូ អ៊ីអន និងនៅតាមស្ថានីយប្រេងឥន្ធនៈមួយចំនួនទៀតដើម្បីបង្កភាពងាយស្រួលដល់ប្រជាពលរដ្ឋក្នុងយកសំណល់ថ្មពិលមកទុកដាក់បានត្រឹមត្រូវ និងលុបបំបាត់ការបោះសំណល់ថ្មពិលលាយលំជាមួយសំណល់ធម្មតា ដោយប្រមូលសំណល់ថ្មពិលយកមកទុកដាក់អោយបានត្រឹមត្រូវ។ មន្ត្រីជំនាញនឹងចុះប្រមូលសំណល់ថ្មពិលដែលពលរដ្ឋយកមកដាក់នេះមួយសបា្តហ៍ម្តង។

លោក សុផល អាឡាស្កា ប្រធាននាយកដ្ឋានគ្រប់គ្រងសារធាតុគ្រោះថ្នាក់នៃក្រសួងបរិស្ថានបានថ្លែងថា សំណល់ថ្មពិលត្រូវបានចាត់ទុកជាសំណល់គ្រោះថ្នាក់ដោយសំណល់នេះមានផ្ទុកទៅដោយសារធាតុគ្រោះថ្នាក់ ដែលមានកម្រិតពុលខ្លាំង ដូចជា បារត កាត់ម៉្ញូម នីកែល និងសំណ។ ដូចនេះ ការទុកដាក់ ឬ បោះចោលសំណល់ថ្មពិលមិនបានត្រឹមត្រូវនឹងបង្កឱ្យមានការសាយភាយសារគ្រោះថ្នាក់ចូលទៅក្នុងបរិស្ថាន និងបង្កផលប៉ះពាល់ធ្ងន់ធ្ងរដល់សុខភាពមនុស្ស មានដូចជា៖ (១)បង្កឱ្យខូចតម្រងនោម ធ្វើឱ្យថយចុះសារធាតុចិញ្ចឹមក្នុងឆ្អឹង (២)បង្កឱ្យខូចប្រព័ន្ធប្រសាត ខូចចលនាសាច់ដុំ បាត់បង់ការចងចាំ (៣)បង្កឱ្យកើតជំងឺមហារីក ខូចប្រព័ន្ធភាពស៊ាំ បំផ្លាញកោសិកា (៤)បង្កការរលូតគភ៌ ធ្វើឱ្យទារកកើតមិនមានភាពប្រក្រតី (៥)បង្កវិរូបកាយទារកដែលទើបកកើតក្នុងផ្ទៃ ឬ ទារកក្នុងផ្ទៃ។

តាមការឱ្យដឹងរបស់លោក នេត្រ ភក្ត្រា រាជធានីភ្នំពេញជាចំណុចផ្ដើមនៃការផ្សព្វផ្សាយ និងប្រមូល និងគ្រប់គ្រងសំណល់ថ្មពិលរបស់ក្រសួងបរិស្ថាន។

លោករដ្ឋលេខាធិការបានថ្លែងថា បន្ទាប់ពីរាជធានីភ្នំពេញ ក្រសួងបរិស្ថាននឹងពង្រីកការប្រមូលសំណល់ថ្មពិលនេះទៅតាមខេត្តបីទៀតផ្សេងទៀតជាអាទិភាពដែលរួមមានខេត្តសៀមរាប ខេត្តបាត់ដំបង និងខេត្តព្រះសីហនុ និងពង្រីកទៅកាន់ខេត្តផ្សេងទៀត។ ជាមួយគ្នានេះ រដ្ឋលេខាធិការក្រសួងបរិស្ថានបានស្នើសុំឱ្យម្ចាស់ទីតាំងអាជីវកម្មនានាក្នុងនោះមានផ្សារទំនើប ស្ថានីយប្រឹងឥន្ធនៈ និងបុរីលំនៅដ្ឋាននៅតាមបណ្តាខេត្តនានាចូលរួមជាមួយក្រសួងបរិស្ថានដើម្បីគ្រប់គ្រងនិងប្រមូលសំណល់ថ្មពិលនេះ។ ជាមួយគ្នានេះ សូមបងប្អូនប្រជាពលរដ្ឋចូលរួមញែកសំណល់ទៅតាមប្រភេទ ហើយសំណល់ថ្មពិលដែលជាសំណល់គ្រោះថ្នាក់សូមទុកដាក់ឱ្យបានត្រឹមត្រូវ និងយកមកដាក់នៅតាមធុងដែលក្រសួងបរិស្ថានបានរៀបចំ។

ជាមួយគ្នានេះដែរ ក្រសួងបរិស្ថាន សូមថ្លែងអំណរដល់ម្ចាស់ទីតាំង និងប្រជាពលរដ្ឋ ដែលបានផ្តល់កិច្ចសហការ និងការចូលរួមក្នុងការអនុវត្តគម្រោងប្រមូលសំណល់ថ្មពិល ដើម្បីបរិស្ថានយើងគ្មានសំណល់ថ្មពិល។ ក្រសួងបរិស្ថានសូមអំពាវនាវដល់ប្រជាពលរដ្ឋទាំងអស់បន្តការចូលរួម និងជួយផ្សព្វផ្សាយអំពីគម្រោងប្រមូលសំណល់ថ្មពិលនេះឱ្យបានទូលំទូលាយ៕SRP