រឿងក្តីវិវាទដីផ្លូវជាង១០ឆ្នាំ ឈ្នះក្តីនៅតុលាការកំពូល​ អាជ្ញាសាលាចុះអនុវត្តន៍៤ដងអត់បានបានសម្រេច​ ចុងក្រោយត្រូវរកលុយ $4,000 បង់អោយអ្នកចាញ់ក្តីទៀត។

នេះបើយោងតាម សំណេររបស់លោកដួង តារា ជំនួយការផ្ទាល់សម្ដេចតេជោហ៊ុនសែននិងជារដ្ឋលេខាធិការទីស្តីការគណៈរដ្ឋមន្ត្រី។

លោកដួង តារា បានបន្តថា អ្នកមីង អ៊ិត សៀក អាយុ ៦២ឆ្នាំ មានកូន៥នាក់ក្នុងបន្ទុក។ កាលពីឆ្នាំ ១៩៩៨ អ្នកមីងបានទិញដី១កន្លែងទំហំ ក្បាល៩ កន្ទុយចុះស្ទឹង (ព្រែកត្នោត) មានតម្លៃ $500 ពីម្ចាស់ផ្ទះដែលរស់នៅពីមុខដីគាត់សព្វថ្ងៃ។ នៅពេលនោះម្ចាស់ផ្ទះដីខាងមុខមានផ្ទះតូចមិនទាន់ធ្វើធំដូចសព្វថ្ងៃទេ គាត់បានទុកផ្លូវចូលទៅដីខាងក្រោយទំហំប្រហែល៣ម៉ែត្រ ដើម្បីម្ចាស់ដីដែលបានទិញដីគាត់នៅខាងក្រោយអាចចេញចូលមកថ្នល់ខាងមុខបាន។

ក្រោយមកម្ចាស់ផ្ទះខាងមុខក៏បានធ្វើផ្ទះធំហើយបានពង្រីកទំហំដីដោយបានយល់ព្រមទុកអោយតែ១ម៉ែត្រ ជាផ្លូវចេញចូលអោយម្ចាស់ដីខាងក្រោយ ដោយមានផ្តិតមេដៃទទួលស្គាល់ដឹងឮនៅចៅសង្កាត់ព្រែកឬស្សីផងដែរ។ ក្រោយមកទៀតម្ចាស់ផ្ទះខាងមុខក៏ធ្វើចង្រ្កានបិទលើផ្លូវចេញចូល១ម៉ែត្រនេះថែមទៀត ហើយបន្ទាប់មកក៏បានធ្វើជញ្ជាំងបិទយកចំណីផ្លូវ១ម៉ែត្រយកទាំងស្រុងតែម្តង ដែលធ្វើអោយម្ចាស់ផ្ទះនៅខាងក្រោយគ្មានផ្លូវចេញចូល ហើយក៏កើតទៅជារឿងក្តីក្តាំប្តឹងផ្តល់គ្នាតាមផ្លូវតុលាការពីក្រោមដល់កំពូលហេីយលទ្ធផលចុងក្រោយអ្នកមីង​ អ៊ិត​ សៀក​ ជាអ្នកឈ្នះក្តី។

អាជ្ញាសាលាបានចុះមកអនុវត្តបើកផ្លូវឡើងវិញ ៤ដងរួចមកហើយ គឺលើកទី៤នៅថ្ងៃទី ៥ កុម្ភះ ២០២១ ម្សិលមិញនេះ តែអនុវត្តន៍មិនបានជោគជ័យឡេីយ។ បន្ទាប់មកទៀត ក៏មានការសម្របសម្រួលរវាងលោកអាជ្ញាសាលា និងម្ចាស់ដីខាងមុខ និងម្ចាស់ដីខាងក្រោយ ដោយតម្រូវអោយអ្នកមីង​ អ៊ិត​ សៀក​ ភាគីឈ្នះក្តីនិងជាម្ចាស់ដីខាងក្រោយបង់ប្រាក់ $4,000 ទៅអោយភាគីអ្នកចាញ់ក្តីម្ចាស់ដីខាងមុខជាថ្លៃរុះរើនិងការខូចខាតក្នុងពេលបើកផ្លូវឡើងវិញ។ បើព្រមអោយលុយ $4,000 ទៅម្ចាស់ដីខាងមុខទើបគាត់យល់ព្រមអោយអនុវត្ត។

ដោយគ្មានជម្រើស អ៊ិត​ សៀកដែលជាភាគីឈ្នះក្តី បានសម្រេចចិត្តយល់ព្រមទាំងទឹកភ្នែក ទោះបីមិនមានលុយគ្រប់ចំនួនក៏ដោយ។ អ្នកមីង​ អ៊ិត​ សៀក​ សព្វថ្ងៃមានមុខរបរលក់នំប៉័ងសាច់ និងតៅហ៊ូ។ ជីវភាពពួកគាត់មានការលំបាក ហើយពេលនេះគាត់មានតែ $1,000 ហើយត្រូវការ $3,000 ទៀតដើម្បីយកទៅអោយភាគីម្ខាងទៀត​ ដេីម្បីមានផ្លូវចេញចូលផ្ទះគាត់។ ( អរគុណលោកប្រធានមន្ទីរដែនដីបន្ទាយមានជ័យ​ $200, ប្រជាពលរដ្ឋ$100…

បើបងប្អូនអាណិតអាសូរគាត់ ដើម្បីអោយគាត់មានផ្លូវចូលផ្ទះឡើងវិញមានតែចូលរួមជាថវិការម្នាក់បន្តិចៗដើម្បីគាត់យកទៅបង់ជូនភាគីចាញ់ក្តីតែប៉ុណ្ណោះទើបអាចបើកផ្លូវបាន។ សូមជួយពិចារណាផងចុះ!

យើងចូលរួមកសាងអំពើល្អ ចែករំលែកក្តីស្រឡាញ់និងស្នាមញញឹម នឹងសូមមានចិត្តអាណិតស្រឡាញ់ពលរដ្ឋយើងគ្រប់ទីកន្លែងដោយគ្មានការរើសអើង។

សូមបញ្ជាក់ថា ករណីនេះ ស្ថិតនៅភូមិក្រពើហា ឃុំព្រែកឬស្សី ស្រុកតាខ្មៅ ខេត្តកណ្តាល៕SRP

ខេត្តបាត់ដំបង៖សិស្សានុសិស្ស មកពីគ្រួសារមានបញ្ហា ក្នុងជីវភាពចំនួន២៥០នាក់ ក្នុងស្រុកបាណន់ ខេត្តបាត់ដំបង ទទួលបានអំណោយរបស់ កង់ អង្ករ ត្រីខ សម្ភារសិក្សា និងថវិកា មួយចំនួន របស់ សម្ដេច ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ និងជាប្រធានក្រុមការងារថ្នាក់ជាតិ ចុះជួយខេត្តបាត់ដំបង។

ការទទួលបានអំណោយនេះ នៅមុខប្រាសាទបាណន់ នាថ្ងៃសុក្រ ទី៥ ខែកម្ភៈ ម្សិលមិញ តាមរយ:លោក ស សុខា រដ្ឋលេខាធិការក្រសួងអប់រំ យុវជន និងកីឡា និងលោកជំទាវ កែ សួនសុភី ស សុខា ដោយមានការចូលរួមពីលោកជំទាវ ញ៉ែម សាខន ស ខេង ផងដែរ។

នាឱកាសនោះ លោក ស សុខា បានថ្លែងនូវសេចក្ដីផ្ដាំផ្ញើសួរសុខទុក្ខ និងទឹកចិត្តប្រកបដោយការណិតស្រលាញ់ដ៏ជ្រាលជ្រៅ របស់ សម្ដេចក្រឡាហោម ស ខេង ចំពោះប្អូនៗ ជាសិស្សានុសិស្ស មានបញ្ហាក្នុងជីវភាព និងមានសេចក្ដីសង្ឃឹមជឿជាក់ថា បន្ទាប់ពីទទួលបាន ជំនួយនាថ្ងៃនេះ ពិសេសគឺកង់ល្អៗ ម្នាក់មួយគ្រឿងនោះ ប្អូនៗនឹងមានភាពងាយស្រួល ក្នុងការធ្វើដំណើរទៅសាលារៀន ហើយខិតខំសិក្សារៀនសូត្រ ស្ដាប់តាមការអប់រំណែនាំ លោកឪពុក អ្នកម្ដាយ លោកគ្រូ អ្នកគ្រូ ដើម្បីក្លាយជាធនធានមនុស្សដ៏ល្អសម្រាប់ប្រទេសជាតិ៕SRP

ភ្នំពេញ៖លោក ហ៊ុយ វណ្ណៈ រដ្ឋលេខាធិការក្រសួងមហាផ្ទៃ និងជាប្រធានក្រុមការងារនៅទីស្តីការក្រសួងមហាផ្ទៃ នារសៀលថ្ងៃសុក្រទី០៥ ខែកុម្ភៈ ឆ្នាំ២០២១ នេះ បានអញ្ជើញជាអធិបតីដឹកនាំកិច្ចប្រជុំរៀបចំផែនការការងារសកម្មភាពអនុវត្តបន្ត សម្រាប់ក្រុមការងារតាមដានបណ្តាញទំនាក់ទំនងសង្គមហ្វេសប៊ុក របស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងប្រព័ន្ធទំនាក់ទំនងបណ្តាញសង្គម និងសារព័ត៌មាន (Media and Social Network) ផ្សេងៗដែលពាក់ព័ន្ធនឹងដែនសមត្ថកិច្ចរបស់ក្រសួងមហាផ្ទៃ ក្នុងការឆ្លើយតប និងដោះស្រាយចំពោះ មតិមហាជនដែលបានលើកឡើង ឬចូលបញ្ចេញមតិនៅក្នុងទំព័របណ្តាញទំនាក់ទំនងហ្វេសប៊ុកផេកផ្លូវការរបស់សម្តេចតេជោនាយករដ្ឋមន្ត្រី ដោយមានការអញ្ជើញចូលរួមពី អនុប្រធានក្រុមការងារ សមាជិក សមាជិកា និងមន្ត្រីពាក់ព័ន្ធ
ជាច្រើនរូបផងដែរ។

ថ្លែងក្នុងកិច្ចប្រជុំនាពេលនោះ លោក ហ៊ុយ វណ្ណៈ រដ្ឋលេខាធិការក្រសួងមហាផ្ទៃ និងជាប្រធានក្រុមការងារ បានមានមតិស្វាគមន៍ចំពោះសមាជិកក្រុមការងារទាំងអស់ ដែលបានចូលរួមនៅក្នុងអង្គប្រជុំនាពេលនេះ។

លោក ក៏បានកោតសរសើរ និងវាយតម្លៃខ្ពស់ចំពោះការខិតខំប្រឹងប្រែង បំពេញការងារតាមជំនាញរបស់ក្រុមការងារ ដែលពាក់ព័ន្ធទៅនឹងការឆ្លើយតបរាល់មតិយោបល់ សំណើ និងក្តីកង្វល់របស់ប្រជាពលរដ្ឋ បានយ៉ាងល្អប្រសើរនាពេលកន្លងមក។

ជាចុងបញ្ចប់ លោក ហ៊ុយ វណ្ណៈ ក៏បានស្នើដល់សមាជិកក្រុមការងារទាំងអស់ ធ្វើរបាយការណ៍សកម្មភាពការងារ ទាំងការពិនិត្យមើលមតិយោបល់ និងការរិះគន់ នានាជាសាធារណៈក្នុងទំព័រទំនាក់ទំនងហ្វេសប៊ុក (Facebook) របស់សម្ដេចតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា ព្រមទាំងរាយការណ៍នូវរាល់ដំណោះស្រាយរួច ដើម្បីធ្វើសេចក្តីរាយការណ៍គោរពជូនសម្តេចក្រឡាហោម ស ខេង ជ្រាបដ៏ខ្ពង់ខ្ពស់ សម្រាប់ ប្រចាំត្រីមាសផងដែរ។

សូមបញ្ជាក់ថា ក្រុមការងារនេះ មានភារកិច្ចតាមដាន និងជួយស្រាវជ្រាវទំព័របណ្តាញសង្គមហ្វេសប៊ុក Facebook របស់សម្តេច តេជោ ហ៊ុន សែន និងមានតួនាទីដើម្បីឆ្លើយតបតាមជំនាញនីមួយៗ ស្របតាមគោលការណ៍របស់ក្រសួងមហាផ្ទៃ ចំពោះមតិមហាជនដែលបង្ហោះចូលក្នុងទំព័រ Facebook សម្តេចតេជោ នាយករដ្ឋមន្ត្រី ពាក់ព័ន្ធនឹងវិស័យសន្តិសុខ សុវត្ថិភាព និងសណ្តាប់ធ្នាប់សាធារណៈ ហើយក្រុមការងារនេះដែរ ក៏មានភារកិច្ចតាមដានការផ្សព្វផ្សាយ និងឆ្លើយតបឱ្យបានទាន់ពេលវេលាលើប្រព័ន្ធទំនាក់ទំនងបណ្តាញសង្គម និងប្រព័ន្ធផ្សព្វផ្សាយឌីជីថលផ្សេងៗពាក់ព័ន្ធនឹងសមត្ថកិច្ចក្រសួងមហាផ្ទៃផងដែរ៕SRP

ខេត្តត្បូងឃ្មុំ ៖ក្នុងកិច្ចប្រជុំគណៈបញ្ជាការឯកភាពរដ្ឋបាលខេត្តត្បូងឃ្មុំ នាថ្ងៃទី៥ ខែកុម្ភៈ ឆ្នាំ២០២១នេះ លោកជាម ច័ន្ទសោភ័ណ អភិបាលខេត្តត្បូងឃ្មុំ បានដាក់ចេញនូវវិធានការ ដើម្បីបង្កើនការប្រុងប្រយ័ត្ន កម្រិតខ្ពស់ ក្នុងគោលដៅបង្ការ ទប់ស្កាត់ ការឆ្លងរាលដាល នៃជំងឺកូវីដ១៩ ចូលក្នុងសហគមន៍ ក្នុងភូមិសាស្ត្រខេត្តត្បូងឃ្មុំ ខណៈប្រទេសវៀតណាម កំពុងបន្តឆ្លងរាលដាល។

លោក ជាម ច័ន្ទសោភ័ណ បានបញ្ជាក់ថាគោលបំណងនៃកិច្ចប្រជុំនេះ ដើម្បីផ្សព្វផ្សាយសេចក្ដីណែនាំ ស្ដីពីវិធានការបង្ការ និងទប់ស្កាតការឆ្លងរាលដាល នៃជម្ងឺកូវីត ១៩ នៅក្នុងសហគមន៍ នៃភូមិសាស្ត្រខេត្តត្បូងឃ្មុំ ដល់មន្ទីរ/អង្គភាពជុំវិញខេត្ត អភិបាលក្រុង/ស្រុក រដ្ឋបាលឃុំ សង្កាត់ ដើម្បីក្តាប់សភាពការណ៍ពង្រឹងបង្ការទប់ស្កាត់ការរីករាលដាលជម្ងឺកូវីដ ១៩ នៅតាមបន្ទាត់ព្រំដែន ក៏ដូចជានៅតាមមូលដ្ឋាន និងពង្រឹងបង្ការរាល់បាតុភាព បង្កអសន្តិសុខផ្សេងៗក្នុងមូលដ្ឋាន និងធានាឲ្យបាននូវសុខសុវត្ថិភាព សណ្ដាប់ធ្នាប់សាធារណៈ ជូនប្រជាពលរដ្ឋក្នុងខេត្តត្បូងឃ្មុំ ទាំងមូល។

អភិបាលខេត្ត ក៏បានថ្លែងនូវការកោតសរសើរនិងវាយតម្លៃខ្ពស់ ចំពោះគណៈបញ្ជាការឯកភាពរដ្ឋបាលក្រុងស្រុក កងកម្លាំង និងអ្នកពាក់ព័ន្ធគ្រប់លំដាប់ថ្នាក់ ដែលបានខិតខំប្រឹងប្រែង រួមសហការគ្នា ថែរក្សាសុខសុវត្ថិភាព ជូនដល់ប្រជាពលរដ្ឋ ពិសេសរួមគ្នាបង្ការទប់ស្កាត់ ការឆ្លងរាលដាលជំងឺកូវីដ១៩ ចូលក្នុងសហគមន៍ ក្នុងភូមិសាស្ត្រខេត្តត្បូងឃ្មុំ។ ជាមួយគ្នា នោះ កងកំលាំងមានសមត្ថកិច្ច ទាំងអស់ ដែលស្ថិតក្រោមគណៈបញ្ជាការឯកភាព រដ្ឋបាលខេត្ត ក្រុង ស្រុក ត្រូវត្រៀមខ្លួនឲ្យបានរួចរាល់គ្រប់ពេលវេលា ធានាឲ្យបាននូវស្ថេរភាព សុខសុវត្ថិភាព សណ្ដាប់ធ្នាប់សាធារណៈ បង្ការទប់ស្កាត់ ដោះស្រាយបញ្ហា ដែលបង្កអសន្តិសុខទូទាំងខេត្តទាំងអស់ ឲ្យមានប្រសិទ្ធភាព៕SRP

ខេត្តសៀមរាប៖មានការបាញ់១គ្រាប់នៅក្នុងហាងមួយកន្លែង សង្ស័យផ្តើមចេញពីភាពស្រវឹង ហើយបង្កជាជម្លោះ ក្នុងតុផឹកស៊ី ផ្អើលក្រុងសៀមរាប។ ទោះយ៉ាងណាអ្នករងរបួសដេរ៧ថ្នេរ គឺជាអ្នកដែលបំផ្ទុះអាវុធទៅវិញ។

យោងតាមរបាយការណ៍ របស់កងរាជអាវុធហត្ថខេត្តសៀមរាប បានបង្ហាញថា បទល្មើសព្រហ្មទណ្ឌនេះ គឺជាហិង្សាដោយចេតនា។

របាយការណ៍បន្តថា ករណីខាងលើបង្កឡើងដោយឈ្មោះ តាំង ហូ ភេទប្រុស អាយុ ៤២ឆ្នាំ មុខរបរ អ្នកសារព័ត៌មាន ANN មានទីលំនៅបច្ចុប្បន្ន ភូមិស្វាយព្រៃ សង្កាត់ស្វាយដង្គំ ក្រុងសៀមរាប ខេត្តសៀមរាប។ ក្នុងខណៈកំពុងស៊ីផឹក បានធ្វើសកម្មភាព ដោយយកកែវស្រាគប់ ត្រូវក្បាល របស់ឈ្មោះ អ៊ុក សុផល ភេទប្រុស អាយុ ៤៣ឆ្នាំ មុខរបរ កងរាជអាវុធហត្ថខេត្ត មានទីលំនៅបច្ចុប្បន្ន ភូមិបន្ទាយចាស់ សង្កាត់ស្លក្រាម ក្រុងសៀមរាប ខេត្តសៀមរាប បណ្តាលឲ្យត្រូវថ្ងាសលើចិញ្ចើមផ្នែកខាងឆ្វេងរយះហូរឈាមពេញមុខ ដេរចំនួន ០៧ថ្នេរ និងមានស្នាមនៅលើក្បាល (របួសមុតអំបែងកែវ)។ ក្រោយពីធ្វើសកម្មភាព គប់ទៅលើ ឈ្មោះ អ៊ុក សុផល ឲ្យរបួសហើយ ជនបង្កឈ្មោះ តាំង ហូ បានរត់គេចខ្លួន ចេញទៅខាងក្រៅហាងបាត់។

ដោយឈ្មោះ អ៊ុក សុផល ដឹងថាខ្លួនមានរបួសហូរឈាមពេញមុខ និងដងខ្លួនក៏បានដើរចេញពីកញ្ចុះដែលខ្លួននិងជនបង្កអង្គុយផឹកស៊ី សំដៅមករថយន្តរបស់ខ្លួន ហើយ បានទាញយកកាំភ្លើងខ្លី ពីក្នុងរថយន្តដើរចេញ ហើយបានបាញ់ឡើងលើចំនួន ០១គ្រាប់ (អាវុធខ្លីដែលឈ្មោះ អ៊ុក សុផល បានប្រើបាញ់គឺម៉ាកK54)។ បន្ទាប់មក បុគ្គលិក និងសន្តិសុខក្នុងហាងខាងលើបាននាំឈ្មោះ អ៊ុក សុផល ទៅព្យាបាលមុខរបួសនៅគ្លីនិកសុខភាព នៅបណ្តោយផ្លូវជាតិលេខ៦ ស្ថិតនៅភូមិតាភុល សង្កាត់ស្វាយដង្គំ ក្រុងសៀមរាប។

របាយការណ៍បង្ហាញទៀតថា នៅពេល បន្ទាប់ឈ្មោះ តាំង ហូរ បានចូលមកក្នុងហាងខាងលើម្តងទៀត ហើយបានស្រែកជេរឡូឡា ពេលនោះសមត្ថកិច្ចនគរបាល ក៏បាននាំឈ្មោះ តាំង ហូរ ទៅកាន់ប៉ុស្តិ៍រដ្ឋបាល សង្កាត់ស្លក្រាម ដើម្បីសាកសួរ។

មូលហេតុ ដែលបណ្តាលឲ្យមានករណី ហិង្សាបែបនេះ កើតឡើង គឺបណ្តាលមកពីផឹកស៊ីជាមួយគ្នា ក៏មានទំនាស់ពាក្យសំដីគ្នា។

នៅព្រឹកថ្ងៃទី៥ខែកុម្ភ: ឆ្នាំ២០២១នេះ លោកតាំង ហូ ភ្នាក់ងារបណ្តាញព័ត៌មានANN បានថ្លែងប្រាប់តាមទូរស័ព្ទថា ពិតជាមានហេតុការណ៍ផ្ទុះអាវុធមែន។ ដំបូងរូបគេ
និងមិត្តភក្ត័ ៣ទៅ៤នាក់ ផឹកស៊ីក្នុងហាងខាងលើ រួមទាំងមន្ត្រីប៉េអឹមដែលផ្ទុះអាវុធផង។លុះពេលស្រវឹង មន្ត្រីប៉េអឹមឈ្មោះ ផល បាននិយាយផ្លែផ្កាថា ពួកអ្នកកាសែតដើរតែសុំលុយគេ។ ខណ:នោះរូបគេ តាំង ហូ ក៏បានតបទៅវិញថា៖ កុំដៀលអ្នកកាសែតទាំងអស់ ហើយក៏ផ្ទុះជម្លោះតែម្តង។ លោកតាំង ហូ បន្តថា ក្នុងពេលផ្ទុះជម្លោះ ក៏ផ្ទុះហិង្សា ប្រតាយប្រតប់គ្នា ដោយឈ្មោះផល ដកកាំភ្លើងបាញ់ ទើបរូបគេ តាំង ហូ រត់ចេញក្រៅហាង គេចខ្លួនតែម្តង។ ចំពោះថា រូបគេ យកកែវស្រា គប់ក្បាលឈ្មោះផលនោះ គឺមិនបានដឹងឡើយ។ ប៉ុន្តែរូបគេ ក៏បានទៅដាក់ពាក្យ បណ្តឹង នៅខាងប៉ូលិសទាំងយប់ផងដែរ។

ជុំវិញករណីផឹកស៊ី បង្កជម្លោះ រហូតមានការផ្ទុះ អាវុធ ហើយមានអ្នករងរបួសនេះ លោកឧត្តសេនីយ៍ត្រី ប៉ោ វណ្ណនិត មេបញ្ជាការកងរាជអាវុធហត្ថខេត្ត សៀមរាប ពុំអាចសុំការពន្យល់បានទេ ដោយទូរសព្ទ័ហៅចូល តែមិនមានការឆ្លើយតប។
របាយការណ៍ដដែល បញ្ជាក់ចុងក្រោយថា ករណីហិង្សាដោយចេតនានេះ កម្លាំងការិយាជំនាញកំពុងសាកសួរ សាក្សី និងជនរងគ្រោះ ដើម្បីអនុវត្តតាមនីតិវិធី។
ទោះបីយ៉ាងណា មហាជន រងចាំមើលថា រឿងរាវមួយនេះ តើភាគីមួយណា ទទួលបានភាពយុត្តិធម៌។

សូមជម្រាបថា ហេតុការណ៍ បានកើតឡើនៅម៉ោង៩និង១០នាទីយប់ ថ្ងៃទី៤ខែកុម្ភ: ឆ្នាំ២០២១ នៅចំណុចហាងផឹកស៊ី យីហោ មហាលាភ៩៩៩៩ ស្ថិតក្នុងភូមិទ្រាំង សង្កាត់ស្វាយដង្គុំ ក្រុងសៀមរាប៕SRP