ខេត្តសៀមរាប៖លោក សឿន តុលា ស្ថាបនិកក្រុមហ៊ុនផាផាយ៉ា បានសរសេរអត្ថបទមួយក្រោមចំណងជើងថា៖ «មូលដ្ឋានគ្រឹះ នៃភាពរីកចម្រើន»។

លោក សឿន តុលា បានសរសេរថា៖” ប្រសិនបើអ្នកធ្វើជំនួញ អ្នករៀន អ្នកនឹងមានចំណេះដឹងអំពីជំនួញ ចំណេះដឹង គឺជាដើមទុន ធ្វើឱ្យរីកចម្រើន”

គោលការណ៍គ្រឹះ ដែលធ្វើអោយជំនួញរីកចម្រើន នៅពេលដែលអ្នកបង្កើត ឬស្ថាបនិក រៀនគ្រប់ជំហ៊ាននៃអាជីវកម្ម
ការធ្វើដំណើររាប់ពាន់គីឡូ គឺចាប់ផ្ដើមពីបោះជំហានទីមួយ ” មួយជំហានម្ដង មួយជំហានម្ដង ” ប្រសិនបើនរណាម្នាក់ ប្រើផ្លូវកាត់ ចង់បានលទ្ធផលលឿនពេក ពួកគេគ្មានបានរៀនអ្វី ហើយក៏គ្មានចំណេះដឹងអំពីការធ្វើជំនួញនោះដែរ ហើយទីបំផុត កាបប្រើផ្លូវកាត់ បានបំផ្លាញប្រវត្តិសាស្ត្រជំនួញរបស់ពួកគេ”
ការធ្វើអាជីវកម្ម គឺជាក្រឹត្យក្រម ដាក់ការងារដែលត្រូវធ្វើ ជាមួយ វិន័យ ប៉ុន្តែមិនអាចបំភ្លេច ការស្រលាញ់និងភាពរីករាយ បានទេ។
ម្ចាស់អាជីវកម្មមិនអាចដាក់ពិន័យដល់អ្នកដទៃបានទេ ប្រសិនបើ ពួកគេមិនមានន័យខ្លួនឯងនោះ។
ពួកគេត្រូវប្រកាន់នូវវិន័យ 3 ដែលជាគន្លឹះចំបង
1: ការមានវិន័យចាយលុយនៅបានត្រឹមត្រូវ : តើពួកគេ ចាយលុយទៅលើការបង្កើនទ្រព្យ ឬ ពួកគេចាយលុយបង្កើនបំណុល?
2: ការដាក់វិន័យចំណាយទៅលើពេលវេលា:
មនុស្សក្នុងលោកនេះ មានពេលវេលាស្មើគ្នា មនុស្សគឺជាភាពយុត្តិធម៌ដែលយើងបានទទួល ប៉ុន្តែ មានមនុស្សជាច្រើនក្នុងលោកយើងនេះ ចំណាយពេល មិនបានផ្ដល់ភាពយុត្តិធម៌ដល់ជីវិតរបស់ខ្លួនឡើយ ពីព្រោះជីវិត តែងតែ ទាមទារឲ្យមានភាពប្រសើរឡើងជាបន្តបន្ទាប់ ហើយភាពប្រសើរឡើង តែងតែទាមទារ ឲ្យចំណាយពេលជាច្រើន ទៅលើការរៀនអភិវឌ្ឍខ្លួនឯង និង រៀនអំពីទង្វើដែលយើងបានធ្វើ ។
មនុស្សជោគជ័យ តែងតែបង្កើនគុណភាព
ពេលវេលារបស់ពួកគេ ដែលផ្ដោតទៅលើតែដំណោះស្រាយ និងភាពវិជ្ជមាន នៅក្នុងពេលបច្ចុប្បន្ន ដឹងសម្រាប់អនាគត ” មនុស្សជាច្រើនគ្មានអនាគត ដោយសារតែ ពួកគេចំណាយពេលគ្មានន័យ សម្រាប់ជីវិត បច្ចុប្បន្ន និងសម្រាប់ មនុស្សជំនាន់ក្រោយ”។
3: កម្លាំង:
មានមនុស្សជាច្រើន បានខ្ជះខ្ជាយកម្លាំងដោយមិនដឹងខ្លួន ដោយធ្វើការងារមិនឈប់ឈរ ទៅលើកិច្ចការផ្សេងៗជាច្រើន ទីបំផុត ពួកគេមិនដឹងខ្លួនថាតើ ” ពួកគេកំពុងធ្វើការងារនេះ ដល់ណាហើយ ហើយពួកគេមិនដឹងថា តើពួកគេទៅណានោះទេ? ”
ចំណែកមនុស្សដែលសន្សំពេលវេលា ពួកគេដឹង អំពីដំណើរការនៃជំហាននីមួយៗ ដោយការធ្វើរឿងតែមួយគត់ក្នុងមួយគ្រា លុះត្រាតែចប់សព្វគ្រប់ ទើបពួកគេ សម្រេចចិត្ត បន្ថែម ឬពង្រីក អាជីវកម្មរបស់ខ្លួន ពីព្រោះពួកគេយល់ថាការធ្វើអាជីវកម្ម គឺត្រូវការជំនឿពីអតិថិជន ដើម្បីអោយមានជំនឿពីអតិថិជនបាន គឺត្រូវការបង្កើនគុណភាពការងារ ហើយគុណភាពការងារ ទាមទារឲ្យមានការចំណាយពេលគ្រប់គ្រាន់ ការលើកកម្លាំងចិត្ត ការរៀន រៀន និងការកែលម្អជាប្រចាំ។
ភាពជោគជ័យ និងភាពរីកចម្រើនទៅមុខ កើតឡើងចំពោះមនុស្ស ដែលបន្តការរៀនជាប្រចាំ៕
និពន្ធដោយលោក សឿន តុលា
ស្ថាបនិកក្រុមហ៊ុន : ផា ផា យ៉ា

PAPAYA NEXT STEP CO,.LTD

* PAPAYA REAL ESTATE
( គម្រោងអភិវឌ្ឍន៍អចលនទ្រព្យ)
* PAPAYA HOMESTAY
( គម្រោងលើវិស័យទេសចរណ៍)
* PAPAYA GARDEN
( គម្រោងលើវិស័យកសិកម្មនិងចែកចាយអាហារ)

ខេត្តសៀមរាប៖បុរសម្នាក់ដែលបានសម្លាប់ប្រពន្ធរួចដឹកសពទៅដុតចោល ត្រូវបានសមត្ថកិច្ចចាប់ខ្លួន។

ការចាប់ខ្លួនធ្វើឡើងនៅវេលាម៉ោង១និង០០នាទីថ្ងៃទី០១ខែឧសភា ឆ្នាំ២០២១ នៅភូមិខ្នារក្រៅ(ត្រពាំងត្បាល់ ) ឃុំកន្ទួត ស្រុកស្វាយលើ ខេត្តសៀមរាប។

ប៉ូលិសបានឲ្យដឹងថាបុរសរូបនេះឈ្មោះ អេង អឿន អាយុ៥២ឆ្នាំ មានទីលំនៅភូមិខ្នារក្រៅ(ត្រពាំងត្បាល់ ) ឃុំកន្ទួត ស្រុកស្វាយលើ ខេត្តសៀមរាប (ត្រូវជាប្ដី) ដែលពាក់ពន្ធ័ករណី ឃាតកម្មប្រព្រឹត្ត កាលពីថ្ងៃទី២៧ខែមេសាឆ្នាំ២០២១វេលាម៉ោង១១និង១០នាទី នៅចំណុចផ្ទះរបស់ខ្លួន ទៅលើជនរងគ្រោះឈ្មោះ លី កុលាប(ត្រូវជាប្រពន្ធ)អាយុ៣៦ឆ្នាំ។

ប្រភពបានឱ្យដឹងថានៅវេលាម៉ោង០៨និង០០នាទី ថ្ងៃទី៣០មេសាឆ្នាំ២០២១ បុរសជាប្ដីបានមករាយការណ៍ប្រាប់សមត្ថកិច្ចថាខ្លួនបាត់ប្រពន្ធកាលពីថ្ងៃទី២៧ មិនដឹងទៅណាមូលហេតុពួកគាត់ឈ្លោះពាក្យសំដីគ្នា។  លុះនៅវេលាម៉ោង១០និង៣០នាទីថ្ងៃដដែល ប្រជាការពារភូមិបានរុករកនៅដីចំការ របស់ជនសង្ស័យស្ថិតនៅខាងក្រោយវិហារព្រះយេស៊ូ ភូមិត្រពាំងពពេលឃុំតាសៀម ស្រុកស្វាយលើ ខេត្តសៀមរាប ក៏បានឃើញ សាកសពមនុស្សត្រូវបានភ្លើងឆេះសល់តែឆ្អឹង  ក្នុងព្រៃល្បាស់។

ជនសង្ស័យបានសារភាពថាពិតជាបានសម្លាប់ប្រពន្ធ របស់គាត់ពិតប្រាកដមែន ដោយមូលហេតុមានជម្លោះអំពើហិង្សាក្នុងគ្រូសារយូរមកហើយ ដោយគាត់អង្វរប្រពន្ធមិនឲ្យលេងល្បែង បែរជាប្រពន្ធនិយាយថាស៊ូលែងលះប្តី ឲ្យតែបានលេងល្បែង ហើយនៅថ្ងៃទី២៧ខែមេសា ពួកគាត់បានឈ្លោះគ្នាអំពីរឿងប្រពន្ធ រកលក់ដី តែគាត់មិនអោយលក់ព្រោះខ្លាចយកប្រាក់ទៅលេងល្បែង ក៏ឈ្លោះប្រកែកគ្នា ប្រពន្ធបានយកដំបងឈើមកវាយគាត់ ហើយគាត់ចាប់ច្រានផ្ដូលហើយយកដៃសង្កត់ក មុនដំបូងសង្កត់តែដៃម្ខាងទេដោយប្រពន្ធរើបំរាស់រកវាយគាត់ទៀត គាត់ក៏សង្កត់ច្របាច់ក ដោយដៃទាំងពីរផ្ងាពោះរហូតដល់ដាច់ខ្យល់ស្លាប់។ ពេលស្លាប់ហើយគាត់អូសសពទៅដាក់ក្បែរទ្រុងជ្រូកហើយគ្របកៅស៊ូតង់ ពណ៌ខៀវ ពីលើមិនអោយអ្នកណាដឹង គាត់ទុកសាកសពចំនួនពីរយប់គឺយប់ថ្ងៃទី២៧និង២៨មេសា២០២១ លុះដល់វេលាម៉ោង០៤,០០នាទីទៀបភ្លឺថ្ងៃទី២៩ខែមេសា គាត់ដឹកសាកសពនិងគោយន្តកន្រ្តៃយកទៅដុតចោលដោយមានគំនរអុសនិងប្រេងម៉ាស៊ូតពេលដុតរួចគាត់ត្រឡប់មកផ្ទះវិញមិនប្រាប់អ្នកណាឡើយ។

សមត្ថកិច្ចបានបញ្ជាក់ថាក្រោយសាកសួរចំលើយនឹងមានសារភាព បានសម្រេចបញ្ជូនបុរសរូបនេះទៅតុលាការដើម្បីអនុវត្ត
តាមផ្លូវច្បាប់៕SRP

ខេត្តកំពង់ចាម៖លោកអ៊ុន ចាន់ដា អភិបាលខេត្តកំពង់ចាម​ បាន​ថ្លែងអំណរគុណ​ និង​ជូនពរ​ចំពោះ​សប្បុរសជននានា ដែល​បាន​​គាំទ្រ​​ឧបត្ថម្ភ​ ជា​សម្ភារ​ និង​ស្បៀង​អាហារ​​​ ប្រគល់ជូន​គណៈកម្មការ​ប្រយុទ្ធ​ប្រឆាំង​នឹង​ជំងឺ​កូវីដ​-១៩​ ដែលជាការរួមចំណែក យ៉ាងសំខាន់ ក្នុងការ​ប្រយុទ្ធ​ប្រឆាំង​នឹង​ជំងឺ​ឆ្លង​រាតត្បាត​ដ៏​កាច​សាហាវ​នេះ​ ហើយ​ក៏ជាការជួយ​ចែករំលែក​ ចំពោះ​ទុក្ខលំបាក​ និង​ការខ្វះខាត របស់ពលករចំណូលស្រុក ក៏ដូចជា​​អ្នក​ពាក់ព័ន្ធ​ព្រឹត្តិការណ៍​២០កុម្ភៈ​ ដែល​កំពុង​​ធ្វើចត្តាឡីស័ក​ ផង​ដែរ​។

លោកមានប្រសាសន៍ថ្លែងអំណរគុណយ៉ាងដូច្នេះ នៅព្រឹកមិញនេះ ក្នុងឱកាស បាន​បន្ត​ទទួល​អំណោយ​ជា​សម្ភារ​ និង​ស្បៀងអារហារ​ ​ពី​សប្បុរសជននានា​ ដែល​បាន​ចូលរួម​ជាមួយ​រាជរដ្ឋាភិបាល​ ដេីម្បី​បង្ការ​​ទប់ស្កាត់​ការ​ឆ្លង​រីករាល​ដាល​នៃ​ជំងឺ​កូវីដ​-១៩​​។

គួរ​បញ្ជាក់​ផង​ដែរថា​ ពិធី​ប្រគល់​ និង​ទទួល​អំណោយ​នេះ​ អ្នកឧកញ៉ា ឃុន សៀ និងលោកជំទាវ ឧបត្ថម្ភ​ អង្ករ ចំនួន២០តោន និងមី ចំនួន១៥០កេសធំ ។ លោក​ឧកញ៉ា​ ស៊ុង​ សារ៉​ន និង​លោកជំទាវ​ ឧបត្ថម្ភ​ ទឹក​អាល់កុល​ ចំនួន​៥កាន​ ម៉ាស​២៥កេស​ មី១០០កេស​ និង​ត្រីខ​ ចំនួន​១២កេស​ធំ​។ សហព័ន្ធ​ស្រូវ​អង្ករ​កម្ពុជា​ ឧបត្ថម្ភ​ អង្ករ​ចំនួន​ ៥តោន​។ ព្រះធម្មានុលក្ខណ៍​ សេង​ ម៉េងលក្ខ័ណ​ ព្រះប្រធានលេខាធិការដ្ឋានសាលាគណ​ខេត្តកំពង់ចាម​ បាន​ដឹកនាំ​គៀងគរ​ និង​ឧបត្ថម្ភ​ ទឹក​បរិសុទ្ធ​ ចំនួន​១៩០០យួរ​។ សមាគមន៍​សាសនា​ចក្រ​នៃ​ព្រះ​យេស៊ូគ្រិស្ត​ នៃ​ពួក​បរិសុទ្ធ​ថ្ងៃ​ចុង​ក្រោយ​ ឧបត្ថម្ភ​ អាវពេទ្យ​ ចំនួន​១០០សម្រាប់​​ ម៉ាស​ ៥ម៉ឺន​ម៉ាស​ និង​ស្រោម​ដៃ​ ចំនួន​១០០០ប្រអប់​ផងដែរ៕SRP

ភ្នំពេញ៖«ខ្ញុំជាអ្នកសារព័ត៌មាន»! ដើម្បីអបអរសាទរទិវាសេរីភាពសារព័ត៌មានពិភពលោក ៣ ឧសភា ក្លិបអ្នកកាសែតកម្ពុជាសូមប្រកាសបើកវេទិកាដែលមានឈ្មោះថា« ខ្ញុំជាអ្នកសារព័ត៌មាន»។

តាមរយៈវេទិកានេះ ក្លិបអ្នកកាសែតកម្ពុជានិងផលិតឃ្លីបវីដេអូខ្លីៗនិយាយពីការងាររបស់អ្នកសារព័ត៌មាន។ វេទិកានេះមានការចូលរួមចែករម្លែកបទពិសោធពីសំណាក់អ្នកសារព័ត៌មានជើងចាស់ និងអ្នកសារព័ត៌មានអាជីពវ័យក្មេងជាច្រើនដើម្បីជាការស្វែងយល់ពីអាជីព វិជ្ជាជីវៈ សេរីភាព និងក្រមសីលធម៌របស់អ្នកសារព័ត៌មាន។

វេទិកានេះនឹងបង្កើតឲ្យមានការជជែក ពិភាក្សា ស្វែងយល់ និងការរិះគន់កែលម្អរក្នុងន័យរួមគ្នាលើកស្ទួយក្រមសីលធម៌វិជ្ជាជីវៈសារព័ត៌មាននៅកម្ពុជា។

ខាងក្រោមនេះគឺជាឃ្លីបវីដេអូ​របស់លោក ប៉ែន បូណា ប្រធានក្លិបអ្នកកាសែតកម្ពុជា​ដែលពន្យល់ថា ហេតុអ្វីអ្នកសារព័ត៌មាន​ត្រូវ​រៀនជំនាញវិជ្ជាជីវៈ?

ខេត្តឧត្ដរមានជ័យ៖ស្រូវពូជ ចំនួន៣២តោន ដែលជាអំណោយសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ត្រូវបានលោកហួត សុធី ស្នងការនគរបាល និងជាប្រធានគណៈកម្មាធិការស.អ.កខេត្ត ចែកជូនដល់គ្រួសារ អតីតយុទ្ធជន ចំនួន២០៨ គ្រួសារ នៅភូមិ ស្រះទឹកតេជោសែនជ័យ ឃុំ-ស្រុកចុងកាល់ ដោយក្នុង ០១គ្រួសារទទួលបានស្រូវពូជ ១០០គក្រ ដើម្បីយកទៅបង្ករបង្កើនផល។

ក្នុងឱកាសសំណេះសំណាល សួរសុខទុក្ខ នឹងការផ្ដល់អំណោយស្រូវពូជ ដល់គ្រួសារខាងលើនៅរសៀលថ្ងៃទី៣០ ខែមេសា នេះ លោក ហួត សុធី បានមានប្រសាសន៍ផ្ដាំផ្ញើសួរសុខទុក្ខ និងសេចក្តីនឹករលឹកពី សម្ដេចតេជោ ហ៊ុន សែន នាយរដ្ឋមន្រ្តី និងជា ប្រធានសមាគមអតីតយុទ្ធជនកម្ពុជា និងលោកគន់ គីម អនុប្រធាន និងជាអគ្គលេខាធិការ ស.អ.ក ចំពោះបងប្អូនអតីតយុទ្ធជនទាំងអស់ និងណែនាំដោយត្រូវអនុវត្តតាមការណែនាំរបស់ក្រសួងសុខាភិបាល ដើម្បីការពារខ្លួនពីជំងឺកូវីដ-១៩ និងត្រូវថែទាំសុខភាពឱ្យបានល្អ៕SRP

ខេត្តសៀមរាប៖រថយន្តសាំយ៉ុងមួយគ្រឿងលួចដឹកឈើ ត្រូវបានកម្លាំងនគរបាលស្រុកជីក្រែងបានបង្ក្រាប។

ការបង្ក្រាបធ្វើនារសៀលថ្ងៃទី៣០ខែមេសានេះ នៅចំណុចភូមិល្វែងឬស្សី ឃុំល្វែងឬស្សីស្រុកជីក្រែង ខេត្តសៀមរាប។ រថយន្តដឹកឈើខាងលើនេះ ត្រូវបានគេរាយការណ៍ថា កំពុងចរាចរណ៍ លើផ្លូវជាតិលេខ ៦ ឆ្ពោះទៅខេត្តកំពង់ធំ៕SRP

ភ្នំពេញ៖រដ្ឋមន្ត្រីក្រសួងកសិកម្មរុក្ខាប្រមាញ់និងនេសាទ លោក វេង សាខុន បានបញ្ជាក់ថាលទ្ធផលនៃការនាំចេញផលិតផលកសិកម្មក្នុងរយៈពេល៤ខែដើមឆ្នាំ២០២១ សម្រេចបាន ជាង ២,០៩ ពាន់លានដុល្លារអាមេរិក ក្នុងដំណាក់កាលដ៏លំបាកនៃការរីករាលដាលជម្ងឺកូវិដ ១៩ នៅកម្ពុជា៕SRP

ភ្នំពេញ៖លោកវេង សខុន រដ្ឋមន្រ្តីក្រសួងកសិកម្ម និង តំណាងឲ្យលេខាធិការដ្ឋានស្បៀងបម្រុងសង្គ្រោះបន្ទាន់អាស៊ានបូក៣ នៅថ្ងៃនេះបានយកអង្ករចំនួន ៧៨ តោន ដែលទទួលបានពីកម្មវិធីស្បៀងបម្រុងអាស៊ានបូកបី ទៅប្រគល់ជូន សាលាក្រុងភ្នំពេញ ដើម្បីចែកជូនដល់ប្រជាពលរដ្ឋ នៅរាជធានីភ្នំពេញ ដែលកំពុងប្រឈមនឹងការខ្វះស្បៀងដោយសារការរីករាលដាលជំងឺកូវិដ-១៩ ស្ថិតនៅក្នុងតំបន់បិទខ្ទប់ ជាពិសេសតំបន់ក្រហម នៅក្នុងរាជធានីភ្នំពេញ (ចំនួន ២ ៥៨៣ គ្រួសារ)។

សូមបញ្ជាក់ថា៖ កាលពីថ្ងៃទី២១ ខែតុលា ឆ្នាំ២០២០ កន្លងទៅ កម្ពុជាជាភាគីម្ចាស់ផ្ទះ បានរៀបចំដឹកនាំកិច្ចប្រជុំប្តូរវេន ថ្នាក់រដ្ឋមន្រ្តីកសិកម្ម និងព្រៃឈើអាស៊ាន ព្រមទាំងមានកិច្ចប្រជុំអមពីរទៀតគឺ កិច្ចប្រជុំរដ្ឋមន្រ្តីកសិកម្ម និងព្រៃឈើអាស៊ានបូកបី (ចិន ជប៉ុន និងកូរ៉េ) និងកិច្ចប្រជុំរដ្ឋមន្រ្តីកសិកម្ម និងព្រៃឈើ អាស៊ាន បូកឥណ្ឌា ។ ដោយឡែក ក្នុងកិច្ចប្រជុំរដ្ឋមន្រ្តីកសិកម្ម និងព្រៃឈើ អាស៊ានបូកបី រដ្ឋមន្រ្តីកសិកម្ម រុក្ខាប្រមាញ់ និងនេសាទ នៃរដ្ឋាភិបាលជប៉ុន បានសម្រេចផ្តល់ស្បៀងជាអង្ករចំនួន ៣០០ តោន របស់កម្មវិធីស្បៀងបំរុងអាស៊ានបូកបី ជូនមកប្រជាពលរដ្ឋកម្ពុជា ដែលទទួលរងគ្រោះដោយទឹកជំនន់ ចំនួន ៧ ៤០០គ្រួសារ ដែលរស់នៅក្នុងខេត្តចំនួន៦ គឺខេត្តបន្ទាយមានជ័យចំនួន ១ ៥០០គ្រួសារ បាត់ដំបងចំនួន ១ ៥០០គ្រួសារ ពោធិ៍សាត់ចំនួន ១ ២០០គ្រួសារ កំពង់ធំចំនួន ១ ០០០គ្រួសារ ព្រៃវែងចំនួន ១ ០០០គ្រួសារ និងខេត្តត្បូងឃ្មុំចំនួន ១ ២០០គ្រួសារ ដោយជនរងគ្រោះមួយគ្រួសារទទួលបានអង្ករចំនួន ៣០គីឡូក្រាម។
ជំនួយនេះបានបញ្ជូនមកដល់ព្រះរាជាណាចក្រកម្ពុជា នៅថ្ងៃទី៣០ ខែធ្នូ ឆ្នាំ២០២០ ស្របពេលដែលប្រជាពលកម្ពុជាកំពុងប្រឈមនឹងការរីករាលដាលនៃជំងឺកូវិដ-១៩យ៉ាងធ្ងន់ធ្ងូរ។ នាពេលនេះ ក្រសួងកសិកម្ម រុក្ខាប្រមាញ់ និងនេសាទ បានលើកសំណើទៅកាន់លេខាធិការដ្ឋានស្បៀងបម្រុងសង្គ្រោះបន្ទាន់អាស៊ានបូក៣ (ASEAN Plus Three Emergency Rice Reserve-APTERR) ដើម្បីធ្វើការចែករំលែកស្បៀងចំនួន ៧៨ តោន ជូនដល់ប្រជាពលរដ្ឋកម្ពុជាដែលកំពុងជួបប្រទះការខ្វះខាតស្បៀង ជាពិសេសប្រជាពលរដ្ឋរស់នៅក្នុងរាជធានីភ្នំពេញ ក្នុងតំបន់ក្រហម (តាមការណែនាំដ៏ខ្ពង់ខ្ពស់របស់ សម្តេចហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា នាថ្ងៃទី២៩ ខែមេសា ឆ្នាំ២០២១)៕SRP

ខេត្តកំពង់ចាម៖លោកអ៊ុន​ ចាន់ដា​ អភិបាលខេត្តកំពង់ចាម នៅព្រឹកមិញនេះបានចុះពិនិត្យណែនាំឲ្យក្រុមការងារជួសជុលសម្អាត អគារមន្ទីរពេទ្យមេគង្គកំពង់ចាម និងរៀបចំបរិក្ខាពេទ្យឲ្យរួចរាល់ក្នុងសប្តាហ៍នេះ ដើម្បីដាក់ឲ្យប្រើប្រាស់នាសប្ដាហ៍ខាងមុខ។

លោកអ៊ុន​ ចាន់ដា​ បាន​ណែនាំ​ដល់​មន្ត្រីជំនាញពាក់ព័ន្ធ​​ ដែល​កំពុង​ធ្វើ​ការ​​​កែលម្អ ​មន្ទីរពេទ្យ​មេគង្គ​កំពង់ចាម​ ធ្វេីយ៉ាងណា​ត្រូវ​ពន្លឿន​ការងារ​នេះ​ ​ឲ្យ​បាន​ឆាប់​រួចរាល់​ត្រឹម​រយៈពេល​២ថ្ងៃ​ទៀត​​ ទាំង​មាន​គុណភាព​ និង​សោភណភាព​​ ​ក្នុងនោះ​ត្រូវរៀបចំ​បន្ទប់​សម្រាប់​បុគ្គលិក​ពេទ្យ​ និង​គ្រែ​សម្រាប់​​អ្នក​ជំងឺ​ ដោយមានការ​រៀបចំ​បំពាក់​​សម្ភារ​​បរិក្ខារ​ និង​បណ្តាញ​ទឹក​ ភ្លើង​ថ្មី ព្រមទាំង​​សំអាត​បរិស្ថាន​ក្នុង​អគារ​ និង​ទីធ្លានៅ​ខាង​ក្រៅ​​​ ឲ្យ​បាន​ស្អាត​​ល្អ​ ដេីម្បី​ប្រែ​ក្លាយ​អតីត​សណ្ឋាគារ​មេគង្គ​នេះ​ ឲ្យ​ក្លាយ​​ទៅ​ជា​មន្ទីរពេទ្យ​ ប្រកប​ដោយ​ជំនឿ​និង​ការជឿ​​ទុកចិត្ត​ សម្រាប់​ព្យាបាល​អ្នក​វិជ្ជមាន​កូវីដ​-១៩​ ជូនបងប្អូន​ប្រជាពលរដ្ឋ​ ក្នុង​ខេត្តកំពង់ចាម​ និង​ខេត្តត្បូងឃ្មុំ​ នៅ​ដើម​ខែ​ ឧសភា​ ឆ្នាំ​២០២១​នេះ​ ។

បេីយោងតាម​​​​សេចក្តី​ជូន​ដំណឹង​របស់​ក្រសួង​សុខាភិបាល​ កាលពី​ថ្ងៃទី​២៩​ ម្សិលមិញ​នេះ​ បាន​រក​ឃើញ​អ្នក​វិជ្ជមាន​វីរុសកូវីដ​-១៩​ ​ថ្មី​ ចំនួន៣៩នាក់​ ដែល​រស់នៅ​ក្នុង​ស្រុក​មួយ​ចំនួន​ នៃ​ខេត្តកំពង់ចាម​ ។ បច្ចុប្បន្ន​អ្នក​វិជ្ជមាន​កូវីដ​-១៩​ កំពុង​សម្រាក​ព្យាបាល​នៅ​មន្ទីរពេទ្យ​បង្អែក​ខេត្តកំពង់ចាម​ មាន​ចំនួន​៥៨នាក់​ ក្នុងនោះ​អ្នក​ប៉ះពាល់​ដោយ​ផ្ទាល់​ និង​ប្រយោល​ជា​ច្រើន​នាក់​ទៀត​ ដែល​កំពុង​ធ្វើ​ធ្វើចត្តាឡីស័ក​។

គួរ​រំលឹក​ផង​ដែរ​ថា​ បន្ទាប់​ពី​ព្រឹត្តិការណ៍​២០កុម្ភៈ​ បានរីក​រាលដាលដល់​​ខេត្តត្បូងឃ្មុំ​ និង​ខេត្តកំពង់ចាម​ សម្តេច​ហ៊ុន​ សែន​ នាយករដ្ឋមន្ត្រី​កម្ពុជា​ បាន​ណែនាំ​ដល់​រដ្ឋបាល​ខេត្តកំពង់ចាម​ ឲ្យ​យក​ទីតាំង​ធ្វើ​ចត្តាឡីស័ក​នៃសណ្ឋាគារ​មេគង្គ​ ដែល​មានចំនួន​៧១បន្ទប់​ សម្រាប់​ត្រៀមធ្វើ​​ជា​មន្ទីរពេទ្យ​ព្យាបាល​ អ្នក​វិជ្ជមានវីរុស​​កូវីដ​-១៩​៕SRP

ខេត្តឧត្ដរមានជ័យ៖លោកឧត្តមសេនីយ៍ទោ ហួត សុធី ស្នងការនគរបាលខេត្តឧត្តរមានជ័យ នៅព្រឹកថ្ងៃទី៣០ ខែមេសា ឆ្នាំ២០២១ នេះ បានដឹកនាំកិច្ចប្រជុំ Online តាមរយ: Zoom Meeting បូកសរុបរបាយការណ៍ប្រចាំខែមេសា និងលើកទិសដៅអនុវត្តបន្ត ផ្សព្វផ្សាយណែនាំ អនុវត្តសេចក្ដីណែនាំលេខ ០១០សណន របស់អគ្គស្នងការនគរបាលជាតិ ស្ដីពីការអនុវត្តវិធានការ ទប់ស្កាត់ និងបង្ក្រាបសកម្មភាពឆ្លងដែនដោយខុសច្បាប់ និងការលួចលាក់ជនបរទេសចេញពីភូមិសាស្រ្តបិទខ្ទប់ និងសេចក្ដីណែនាំរបស់ រដ្ឋបាលខេត្តឧត្តរមានជ័យ ដើម្បីចូលរួមបង្ការ ទប់ស្កាត់ការឆ្លងរីករាលដាលជំងឺកូវីដ-១៩។

ក្នុងកិច្ចប្រជុំនេះដែរ មានការចូលរួមពីលោក លោកស្រីស្នងការរង លោកនាយការិយាល័យ លោកអធិការនគរបាលក្រុង-ស្រុកទាំង៥ លោកមេបញ្ជាការវរសេនាតូចនគរបាលការពារព្រំដែនគោកទាំង២ លោកនាយប៉ុស្តិ៍រដ្ឋបាលទាំង២៤ ជំនួយការ និងមន្ត្រីពាក់ព័ន្ធមួយចំនួនទៀតសរុប 84នាក់។

លោកស្នងការ ក៏បានណែនាំដល់លោក លោកស្រីស្នងការរងទាំងអស់ លោកនាយការិយាល័យ និងលោកអធិការក្រុង-ស្រុកទាំង៥ និងលោកមេបញ្ជាការវរសេនាតូចនគរបាលការពារព្រំដែនគោកទាំង២ លោកនាយប៉ុស្តិ៍រដ្ឋបាលទាំង២៤ ត្រូវតែយកចិត្តទុកដាក់ ចំពោះភារកិច្ចដែលត្រូវប្រចាំការ ២៤ម៉/២៤ម៉ ដេីម្បីរង់ចាំបទបញ្ជាបន្ទាន់ ក្នុងការចេញប្រតិបត្តិការនៅពេលមានបញ្ហាផ្សេងៗ។

ក្នុងឱកាសនោះដែរ ក៏មានការចូលរួមមតិរបស់លោក លោកស្រីស្នងការរង និងនិងលោកអធិការក្រុង-ស្រុក និងលោកមេបញ្ជាការវរសេនាតូចនគរបាលការពារព្រំដែនគោកទាំង២ ផងដែ រ។

លោកស្នងការ បានអរគុណដល់កងកម្លាំងទាំងអស់ចំណុះស្នងការដ្ឋាននគរបាលខេត្តឧត្ដរមានជ័យ ដែលបានលះបង់ក្នុងការបំពេញភារកិច្ចមិនរាថយឡេីយ ដេីម្បីចូលរួមបង្ការ និងទប់ស្កាត់ការឆ្លងរាលដាលវីរុសកូវីដ១៩ ជាពិសេសលោកស្នងការ បានណែនាំដល់កម្លាំងឲ្យយកចិត្តទុកដាក់ថែរក្សាសុខភាព ជាពិសេសអនុវត្តតាមវិធានការ ៣ការពារ ៣កុំ និងវិធានការណែនាំផ្សេងៗទៀតរបស់ក្រសួងសុខាភិបាល៕SRP

ខេត្តសៀមរាប៖លោក សឿន តុលា ស្ថាបនិកក្រុមហ៊ុនផា ផា យ៉ា បានសរសេរអត្ថបទមួយក្រោមចំណងជើងថា«ថាមពលនៃជំនឿ»។

លោក សឿន តុលា បានសរសេរថា៖  មនុស្សនៅក្នុងលោកយើងនេះ មានកម្រិតជំនឿ ប្រភេទនៃជំនឿ មិនដូចគ្នាទេ ។  ជំនឿខ្លះធ្វើឲ្យពួកគេរីកចម្រើន រីឯជំនឿខ្លះទៀត ធ្វើឲ្យពួកគេសុញគំនិត បិទ ផ្លូវស្វែងយល់ ” ហេតុនិងផល” ព្រមទាំងផមិនចាប់យកឱកាសស្វែងយល់ ពីមនុស្សជុំវិញខ្លួន ។  ទោះបីយ៉ាងណាក៏ដោយ យើងទទួលស្គាល់ការពិត ទទួលស្គាល់អំពីជំនឿផ្សេងៗ ដែលកើតឡើង និងអ្នកដែលប្រកាន់ យកអនុវត្តនូវជំនឿនោះ ប៉ុន្តែ ឬសគល់នៃជំនឿដែលល្អបំផុតសម្រាប់ជួយខ្លួនឯងនិងជួយដល់អ្នកដទៃបាន គឺ ” ជំនឿលើខ្លួនឯង” ការជឿជាក់លើខ្លួនឯង គឺជាការទទួលខុសទៅលើខ្លួន ប្រសិនបើយើងមានការទទួលខុសត្រូវ លើខ្លួនឯងបាន យើងអាចមានភាពទទួលខុសត្រូវ លើទង្វើរបស់យើង ជាមួយអ្នកដទៃ។  ការជឿលើខ្លួនឯង បង្កឲ្យមាននូវលទ្ធភាពជាច្រើន ដើម្បីពង្រឹងសមត្ថភាព និងអោយខ្លួនឯងរឹងមាំ។ ប្រសិនបើអ្នកជឿលើខ្លួនឯង ភាពជោគជ័យនិងជឿលើអ្នក ប៉ុន្តែអកុសល មានមនុស្សជាច្រើន ខកខានមិន ចាប់យកគោលការណ៍នេះ ដើម្បី អនុវត្តសម្រាប់ខ្លួនឯងឡើយ ។ មានប្រវត្តិសាស្ត្រ អំពីមនុស្សដែលមានជំនឿក្នុងខ្លួន ដែលដើរផ្ទុយពី មនុស្សទទួលស្គាល់ ទម្លាប់ធម្មជាតិ: កាលពីដើមឡើយ មនុស្សជឿថា ” ពួកគេមិនអាចធ្វើដំណើរតាមជើងអាកាសបានទេ ពីព្រោះផ្ទៃមេឃទាំងមូល គឺជាកម្មសិទ្ធិ នៃសត្វស្លាប ដែលធម្មជាតិតាក់តែងឱ្យ ប៉ុន្តែ មនុស្សទាំងនោះ បានទាត់ចោលធម្មជាតិរបស់មនុស្ស ដែលមានខួរក្បាលខ្លាំងជើងសត្វដទៃរាប់លានដង ដឹងចេះ អភិវឌ្ឍមិនឈប់ឈរ ដែលអាចធ្វើអ្វីក៏បាន នៅពេលដែលពួកគេមានជំនឿ ។

លោក ORVILLE និង លោក WILBUR ជាបងប្អូនបង្កើត ជនជាតិអាមេរិកាំង បានប្រើជំនឿខ្លួនឯងរួមគ្នាថា ” ពួកគេអាចបង្កើតយន្តហោះ ធ្វើដំណើរតាមផ្លូវអាកាសបាន” មនុស្សស្ទើរតែទូទាំងប្រទេស និងពិភពលោកដែលបានឮពាក្យនេះ តែងតែប្រតិកម្មថា ” បងប្អូនពីរនាក់នោះ កំពុងតែឆ្កួត កំពុងធ្វើការ និងគំនិត មិនចូលគន្លងរបស់មនុស្សទូទៅ” ពួកគេទាំងពីរ ធ្វើហើយសាកល្បង ហើយបរាជ័យ មិនអាចហោះហើរបាន ជាច្រើនដង ប៉ុន្តែ ជំនឿរបស់ពួកគេ មិនឲ្យពួកគេបោះបង់ឡើយ ដូច្នេះ ធ្វើឲ្យពួកគេ ឃើញផ្លូវជាច្រើនដែលត្រូវធ្វើបន្ត រហូតបានជោគជ័យ។

ចំនួននៃការបរាជ័យប៉ុន្មានដងមិនសំខាន់ទេ ប៉ុន្តែសំខាន់បំផុត ពួកគេមានជំនឿជាក់ក្នុងខ្លួន ។
នៅថ្ងៃទី 17 ខែ ធ្នូ ឆ្នាំ 1903 ត្រូវបានពិភពលោក ផ្ដល់រង្វាន់ និងការកត់ត្រាទុក ថា លោកទាំងពីរ គឺជាអ្នកបង្កើតយន្តហោះ សម្រាប់មនុស្សលោក ។

ជាការពិតណាស់ ប្រសិនបើអ្នកជឿលើខ្លួនឯង អ្នកនឹងទទួលបានអ្វីមួយ អ្នកនឹងបានសម្រេច ពីព្រោះជំនឿ ធ្វើឲ្យអ្នកមានគំនិតថ្មីៗជាច្រើន ផុសចេញមក បើកផ្លូវឲ្យអ្នក ដើរទៅរកជំងឺនោះ។  ជារឿងសាមញ្ញបំផុត ជឿថាអ្នកអាច អ្នកនឹងបើកចិត្ត នឹងបើកផ្លូវរៀន ” តើធ្វើយ៉ាងណា ? ដើម្បី..” ហើយអ្នក មិនយកគំនិតចាស់ៗ ឬដើរតាមគន្លងចាស់ឡើយ ។

សូមចងចាំថា : គន្លងចាស់ គំនិតចាស់ គឺថែរក្សាតែទម្លាប់ចាស់តែប៉ុណ្ណោះ ប៉ុន្តែទម្លាប់ ដែលមិនព្រមកែប្រែ គឺគឺមានន័យថា មាន មរណៈភាព ជាប់ខ្លួន ព្រមទាំងសម្លាប់ គំនិតច្នៃប្រឌិត និង សម្លាប់ភាពមោះមុត ក្នុងកិច្ចការ។

” មនុស្សអកុសល អាក់ខាន ស្វែងរករបៀប បង្កើតជំនឿក្នុងខ្លួន ហើយតែងតែភ័យខ្លាច លើខ្លួនឯង”
មាន 3ចំណុច ដែលយើងហាត់ពត់:

1. រៀនស្វាគមន៍ និងទទួលស្គាល់នូវគំនិតថ្មីៗ
2. សាក់ល្បងកែប្រែ ហើយបន្តកែប្រែ តាមរយៈ ការជួបមនុស្សថ្មីៗ ទីកន្លែងថ្មីៗ អានសៀវភៅថ្មីៗ ទាំងអស់នោះ ដើម្បីបង្កើន ការពិសោធន៍ ចំណេះ បន្ថែម
3.  ប្រកាន់គោលការណ៍ ដើរទៅមុខ

អ្វីក៏ដោយដែលត្រូវធ្វើ សូមធ្វើឲ្យអស់ពីលទ្ធភាព កុំពន្យារពេល ប៉ុន្តែមិនប្រញាប់ប្រញាល់ទេ៕
និពន្ធដោយលោក សឿន តុលា ស្ថាបនិកក្រុមហ៊ុន : ផា ផា យ៉ា

PAPAYA NEXT STEP CO,.LTD
* PAPAYA REAL ESTATE
( គម្រោងអភិវឌ្ឍន៍អចលនទ្រព្យ)
* PAPAYA HOMESTAY
( គម្រោងលើវិស័យទេសចរណ៍)
* PAPAYA GARDEN
( គម្រោងលើវិស័យកសិកម្មនិងចែកចាយអាហារ)

ភ្នំពេញ៖សម្ដេចចក្រី ហេង សំរិន ប្រធានរដ្ឋសភាជាតិ បានបង្ហោះសារតាមទំព័រ page facebook ថា៖ថ្ងៃនេះ ជាព្រះរាជពិធីបុណ្យ «ច្រត់ព្រះនង្គ័ល» ដែលយើងតែងតែប្រារព្ធធ្វើឡើងនៅថ្ងៃ៤ រោច ខែពិសាខ ជារៀងរាល់ឆ្នាំ ក្នុងគោលបំណងផ្សងមើលពីប្រផ្នូលរបស់ស្រុកទេសទៅតាមការបរិភោគរបស់ «គោឧសភរាជ»និងជាការប្រកាសប្រាប់ប្រជាកសិករធ្វើស្រែចម្ការថារដូវវស្សាបានចូលមកដល់ហើយ។

ព្រះរាជពិធីបុណ្យច្រត់ព្រះនង្គ័លនេះ ជាព្រះរាជប្បវេណីដ៏សំខាន់ និងចាត់ទុកជាវប្បមង្គលមួយដ៏ប្រសើររបស់ប្រជាពលរដ្ឋកម្ពុជា ដែលមហាក្សត្រគ្រប់ព្រះអង្គតែងតែដឹកនាំប្រារព្ធរៀបចំឡើងពុំដែលខាន តាំងពីបុរាណកាលរៀងមក។

ព្រះករុណាជាអម្ចាស់ជីវិតលើត្បូង ព្រះករុណា ព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត ព្រះអង្គតែងតែស្តេចយាងជាព្រះរាជាធិបតីភាពដ៏ខ្ពង់ខ្ពស់បំផុតនៅក្នុងព្រះរាជពិធីធំដ៏សំខាន់នេះ ប៉ុន្តែរយៈពេលពីរឆ្នាំមកហើយ ដែលយើងមិនបានរៀបចំព្រះរាជធិធីបុណ្យដ៏មានអត្ថន័យនិងសារៈសំខាន់នេះ ដោយសារជំងឺកូវដ-១៩។

កូវីដ-១៩បានបំផ្លាញទាំងសេដ្ឋកិច្ច សេចក្តីសុខរបស់សង្គមជាតិ និងបានធ្វើឱ្យយើងអាក់ខាននៅក្នុងការរៀបចំព្រះរាជពិធីបុណ្យ និងបុណ្យជាតិ សាសនា ប្រពៃណីជាតិដ៏ផូផង់ជាច្រើនទៀត។ សូមបងប្អូនជនរួមជាតិទាំងអស់ចូលរួមទប់ស្កាត់ជំងឺដ៏កាចសាហាវនេះកុំឱ្យឆ្លងរាលដាលនៅក្នុងសង្គមជាតិយើងបន្តទៀត។

ការចូលរួមរបស់បងប្អូនកូនក្មួយ ជាកត្តាសំខាន់បំផុតដើម្បីឱ្យយើងឈានទៅគ្រប់គ្រងមេរោគនេះបាន ក្នុងពេលឆាប់ៗនេះ។ សូមការពារនិងទប់ស្កាត់ជំងឺកូវីដ-១៩ ដោយផ្តើមចេញពីយើងម្នាក់ៗ គោរពឱ្យបានរាល់វិធានការរបស់រាជរដ្ឋាភិបាលនិងក្រសួងសុខាភិបាលដែលបានដាក់ចេញ ដូចជាត្រូវអនុវត្តឲ្យបានម៉ឹងម៉ាត់បំផុតនូវវិធានការ «៣ការពារ ៣កុំ»និងវិធានការបិទខ្ទប់ ដោយមិនត្រូវធ្វើដំណើរចេញពីតំបន់ក្រហម តំបន់លឿងទុំ ដែលបានកំណត់ដោយអាជ្ញាធរឡើយ ដើម្បីបង្ការកុំឱ្យមានការចម្លងជំងឺនេះជាចៃដន្យទៅមនុស្សជាទីស្រឡាញ់របស់យើងដោយមិនដឹងខ្លួន។

សូមជូនពរបងប្អូនជនរួមជាតិ ជួបតែសេចក្តីសុខ សេចក្តីចម្រើន គ្រប់ក្រុមគ្រួសារ ពិសេសសូមឱ្យការបង្កបង្កើនផលរបស់កសិករយើងនៅឆ្នាំនេះ ទទួលបានទិន្នផលខ្ពស់គ្រប់មុខដំណាំ៕SRP