ខេត្តសៀមរាប៖នៅទីបំផុតជនដៃដល់ដែលបានកាប់សម្លាប់មនុស្សនៅត្រង់ចំណុចមុខសណ្ឋាគារ សុខាសៀមរាប ត្រូវបានកម្លាំងព្រហ្មទណ្ឌនៃបញ្ជាការកងរាជអាវុធហត្ថខេត្តសៀមរាប ចាប់ខ្លួនបានហើយ។
​មន្ត្រីកងរាជអាវុធហត្ថបានថ្លែងប្រាប់បណ្ដាញសៀមរាបប៉ុស្ដិ៍ថា ករណីឃាតកម្ម កាលពីយប់ ថ្ងៃទី​១៩ សីហា កន្លងទៅនេះ​ កម្លាំងកងរាជអាវុធហត្ថខេត្តសៀមរាប បាន​ស្រាវជ្រាវ រហូតឈានដល់ការចាប់ខ្លួន ជនដៃដល់ ចំនួនពីរ​នាក់ និងបក្ខពួក៤នាក់ទៀត នៅថ្ងៃទី​២១ ខែសីហា ឆ្នាំ​២០២០ម្សិលមិញ នៅ​ចំណុច​ទីតាំងផ្សេងៗ​គ្នា។
បើតាមមន្ត្រីអាវុធហត្ថថា ក្រុម​ជនដៃដល់ មានមានគ្នាប្រមាណជាង១០នាក់ ឯណោះ។ ខណ​:​នេះ សមត្ថកិច្ច​កំពុងធ្វើការ​ស្រាវជ្រាវ​បន្ត ដើម្បី​ស្វែងរក​ចាប់ខ្លួន មក​ផ្តន្ទាទោស តាមច្បាប់​។​
​សូម​រំលឹកថាកាលពីវេលាម៉ោង៩និង៣០នាទី យប់​ថ្ងៃទី​១៩ ខែសីហា ឆ្នាំ​២០២០ នៅត្រង់ចំណុច​មុខ​សណ្ឋាគារសុខាសៀមរាប ផ្លូវ​៦០​ម៉ែត្រ ស្ថិត​ក្នុងភូមិ​ទ្រាំង សង្កាត់​ស្លក្រាម ក្រុង​សៀមរាប ជនដៃដល់ មាន​គ្នាពីរ​នាក់ជិះ​ម៉ូតូ​មួយគ្រឿង មក​កាប់​ប្រហារ ទៅលើជនរងគ្រោះបណ្តាលអោយស្លាប់ម្នាក់ និងរបួសធ្ងន់​ស្រាល២នាក់ និងពីរនាក់ទៀតមិនមានរបួស។​ ទោះយ៉ាងណាពាក់ព័ន្ធករណីខាងលើ សមត្ថកិច្ច​កងរាជអាវុធហត្ថ​ខេត្ត នៅ​មិនទាន់​ផ្តល់ព័ត៌មាន លម្អិតនៅឡើយទេ។ ប៉ុន្តែថាចាប់បានមនុស្ស៦នាក់ជនដៃដល់ចំនួន២នាក់។ ជាមួយនឹង​ព័ត៌មានខាងលើនេះដែរ ពលរដ្ឋ សម្តែងការសាទរ យ៉ាងខ្លាំង ចំពោះកម្លាំងអាវុធហត្ថខេត្តសៀមរាប ដែលបានខិតខំវែកមុខបំបែកសំណុំរឿងនេះបានយ៉ាងឆាប់រហ័ស៕SRP

ភ្នំពេញ៖មុខដឹកនាំកម្ពុជាសម្ដេចតេជោ ហ៊ុន សែន នាយករដ្ឋមន្ត្រី ក៏បានគាំទ្រនូវការបើកឲ្យដំណើរការនូវទំនាក់ទំនងឡើងវិញ ក៏ដូចជាជំរុញនូវវិស័យធុរកិច្ច ពាណិជ្ជកម្ម និងវិស័យផ្សេងៗរវាងកម្ពុជា និងជប៉ុន ដែលទាំងអស់នោះ នឹងធ្វើអោយទំនាក់ទំនង និងការផ្ដល់ការធ្វើដំណើរទៅវិញទៅមករវាងប្រទេសទាំងពីរដែលអាចនាំមកទំនាក់ទំនងកាន់តែខ្លាំងបន្ថែមទៀត និងជំរុញដំណើរការសេដ្ឋកិច្ច វិនិយោគ ពាណិជ្ជកម្មរវាងប្រទេសទាំងពីរជាបន្តទៀតផងដែរ។

នាយករដ្ឋមន្ត្រីបានមានប្រសាសន៍ថាក្នុងឆ្នាំ២០១៩ កម្ពុជា- ជប៉ុនមានទំហំពាណិជ្ជកម្មប្រមាណ២ពាន់លានដុល្លារសហរដ្ឋអាមេរិក ក្នុងនោះកម្ពុជានាំចេញទៅជប៉ុន១,២ ពាន់លានដុល្លារហើយជប៉ុននាំចូលមកកម្ពុជាវិញ០,៨ ពាន់លានដុល្លារ ។ ដោយឡែកនៅក្នុងឆ្នាំ២០២០ នេះ រយៈពេល៩ខែ ទំហំពាណិជ្ជកម្មប្រទេសទាំងពីរមានប្រមាណ៨០០លានដុល្លារសហរដ្ឋអាមេរិក ក្នុងនោះកម្ពុជានាំចេញទៅជប៉ុនប្រមាណ៥០០លានដុល្លារ និងជប៉ុននាំចូលមកកម្ពុជាប្រមាណ៣០០លានដុល្លារ។

សម្ដេចតេជោបានមានប្រសាសន៍បន្ថែមថា ចំពោះការបើកដំណើរការឡើងវិញនៃប្រទេសទាំងពីរ សម្តេចបានស្នើឲ្យមានការហោះហើរឡើងវិញរបស់ក្រុមហ៊ុនអាណាណា ដែលការហោះហើរនេះ នឹងអាចនាំអោយការធ្វើដំណើររវាងប្រទេសទាំងពីរមានសភាពការណ៍ធម្មតាឡើងវិញ ជាពិសេសត្រូវអនុវត្តនូវវិធានការមួយចំនួនផងដែរ។ សម្តេចតេជោបន្តថា ការហោះហើរឡើងវិញនេះ នាំអោយមានការកើនឡើងក្នុងទំហំពាណិជ្ជកម្មការ និងវិនិយោគផងដែរ។

សម្តេចតេជោមានប្រសាសន៍យ៉ាងដូច្នេះនៅវិមានសន្តិភាព នាព្រឹកថ្ងៃសៅរ៍ ទី២២ ខែសីហា ឆ្នាំ២០២០នេះ ក្នុងពេលអនុញ្ញាតឱ្យ ឯកឧត្តម ម៉ូតេហ្គី តូស៊ីមីត្សឹ រដ្ឋមន្ត្រីការបរទេសជប៉ុន ចូលជួបសម្តែងការគួរសម និងពិភាក្សាការងារ។

សូមបញ្ជាក់ថាក្នុងជំនួបពិភាក្សានោះ ឯកឧត្តម ម៉ូតេហ្គី តូស៊ីមីត្សឹ បានគោរពសម្ដែងនូវការអបអរសាទរចំពោះ សម្ដេចតេជោ នាយករដ្ឋមន្ត្រី ដែលបានចាត់វិធានការល្អប្រសើរក្នុងការទប់ស្កាត់ជំងឺ covid 19 បានយ៉ាងល្អប្រសើរសម្រាប់ប្រទេសកម្ពុជា។ ឯកឧត្តមក៏បានកោតសរសើរចំពោះសម្ដេចតេជោ នាយករដ្ឋមន្ត្រី ដែលបានដឹកនាំប្រទេសក្នុងភាពឈ្លាសវៃ ដែលនាំដល់ការអភិវឌ្ឍយ៉ាងឆាប់រហ័សនៅក្នុងប្រទេសកម្ពុជា។ ឯកឧត្តមបានបញ្ជាក់ទៀតថាក្នុងដំណើរទស្សនកិច្ចរបស់ឯកឧត្តមមកកាន់ ព្រះរាជាណាចក្រកម្ពុជា កាលពីឆ្នាំ២០១៤ រហូតមកដល់ពេលនេះ គឺឯកឧត្តមបានសង្កេតឃើញថាកម្ពុជាមានការអភិវឌ្ឍន៍រីកចំរើនខ្លាំងនិងឆាប់រហ័ស លើសពីនោះ ឯកឧត្តមក៏បានគោរពជម្រាបជូនសម្ដេចតេជោថា ជប៉ុនបានត្រៀមថវិកាមួយចំនួនក្នុងការទប់ស្កាត់ជំងឺកូវីដ១៩ ផងដែរ។ ឯកឧត្តម ក៏បានស្នើសុំដើម្បីធ្វើយ៉ាងណាបើកដំណើរការឡើងវិញ រវាងប្រទេសទាំងពីរ ដូចជាការធ្វើដំណើរទៅវិញទៅមក ដើម្បីជំរុញវិស័យពាណិជ្ជកម្ម សេដ្ឋកិច្ច និងវិស័យធុរកិច្ចផងដែរ។ លើសពីនេះទៅទៀត ឯកឧត្តក៏បានជម្រាបជូនសម្ដេចតេជោផងដែរថា និស្សិតកម្ពុជាយើងចំនួន១៩នាក់ត្រូវទៅសិក្សានៅប្រទេសជប៉ុនក្នុងពេលឆាប់ឆាប់នេះ។ ជាមួយគ្នានោះផងដែរ ឯកឧត្តមក៏បានជម្រាបជូនសម្ដេចតេជោនាយករដ្ឋមន្ត្រីថា ភាគីជប៉ុនបានធ្វើការសិក្សាចប់សព្វគ្រប់ហើយទៅលើកំពង់ផែក្រុងព្រះសីហនុសម្រាប់ធ្វើយ៉ាងណាឲ្យកំពង់ផែនោះទទួលកប៉ាល់ធំៗចូលចត ក្នុងន័យនេះ ឯកឧត្តមបានស្នើសុំសម្ដេចតេជោឲ្យមានការគាំទ្រគម្រោងនេះផងដែរ៕SRP

ខេត្តសៀមរាប៖បុរសពីរនាក់ម្នាក់បានស្លាប់ម្នាក់ទៀតសន្លប់ករណីភ្លើងឆក់ខណ:ដើរឆ្លុះសត្វក្នុងវាលស្រែ។
ហេតុការណ៍បានកើតឡើងនៅម៉ោង០៩យប់ថ្ងៃទី២១ខែសីហាឆ្នាំ២០២០នៅចំណុចដីស្រែស្ថិតនៅក្នុងភូមិអំពិលពាម ឃុំខ្នាត ស្រុកពួក ខេត្តសៀមរាប។
សមត្ថកិច្ចបានឲ្យដឹងថា ជនសង្ស័យឈ្មោះ យ៉ៃ យឿត រស់នៅ ភូមិអំពិលពាម ឃុំខ្នាត ស្រុកពួក ខេត្តសៀមរាប បានតភ្ជាប់ខ្សែភ្លើងបណ្ដាញអគ្គិសនីពីផ្ទះរបស់ខ្លួនទៅដីស្រែកន្លែងកើតហេតុ នៅទិសខាងលិចចម្ងាយប្រហែល៧០ម៉ែត្រ និងដោយខ្សែលួសហ៊ុំព័ទ្ធដីធ្វើស្រែរបស់ខ្លួនដើម្បីដាក់ជាអន្ទាក់ឆក់សត្វកណ្ដុរ។
សមត្ថកិច្ចបន្តថាករណីនេះបណ្ដាលឲ្យឆ្លងឆក់មនុស្សពីរនាក់ស្លាប់ម្នាក់សន្លប់ម្នាក់។
ជនរងគ្រោះជាបងប្អូនបង្កើតនិងគ្នា ទី១,ឈ្មោះ ភួន ផង់ ភេទប្រុស អាយុ៣៥ឆ្នាំ ឆក់ស្លាប់។
ទី២,ឈ្មោះភួន ភិត ហៅចិន ភេទប្រុសអាយុ២១ ឆ្នាំ បណ្ដាលឱ្យរងរបួស(សន្លប់)។ អ្នកទាំងពីរនាក់រស់នៅក្នុងភូមិអំពិលពាម ឃុំខ្នាត ស្រុកពួក ខេត្តសៀមរាប។ បើតាមសមត្ថកិច្ចថាជនរងគ្រោះទាំងពីរនាក់ ខណៈពួកគាត់កំពុងដើរលើឆ្លុះបាញ់សត្វក្នុងបរិវេណដីស្រែខាងលើក៏ឆក់តែម្តង។
ទោះយ៉ាងណាជនសង្ស័យត្រូវបានសមត្ថកិច្ចឃាត់ខ្លួនផងដែរជុំវិញហេតុការណ៍នេះ៕SRP

ខេត្តសៀមរាប៖ប្រជាពលរដ្ឋរួមទាំងព្រះសង្ឃ គង់នៅវត្តព្រៃធុតង្គព្រះនិព្វាន បានអះអាងថា នឹងលើកគ្នាទៅដកបង្គោល ហើយលុបប្រឡាយដែលកាយផ្តាច់ផ្លូវ ដើម្បីបើកផ្លូវចូលទៅវត្តវិញ ប្រសិនបើក្នុងពេលដ៏ខ្លីខាងមុខនេះ នៅតែគ្មានដំណោះស្រាយ។
ការអះអាងនេះ គឺធ្វើឡើងថ្ងៃទី២០ ខែ សីហាឆ្នាំ២០២០ម្សិលមិញ នៅចំណុចផ្លូវចូលវត្ត ដែលត្រូវកាត់ផ្តាច់ដោយបុគ្គលតាំងពីឆ្នាំ២០១៨។ ប៉ុន្តែករណីនេះអាជ្ញាធរស្រុកបានអះអាងថា នឹងរកវិធីសម្របសម្រួល មិនអោយមានហេតុការណ៍នោះទេ ព្រោះខ្លាចមានអំពើហិង្សាកើតឡើង។
ក្រុមអ្នកភូមិចំណុះជើងវត្ត បានលើកឡើងថា ផ្លូវចូលទៅវត្តព្រៃធុតង្គព្រះនិព្វាននេះ កសាងឡើងដោយព្រះសង្ឃ រួចជាមួយក្រុមអ្នកភូមិ។ ប៉ុន្តែនៅសុខ ៗ ក៏មានបុគ្គល ឈ្មោះ ធាម ម៉ៅដាណេ យកគ្រឿងចក្រមកកាយផ្តាច់ ហើយបោះ បង្គោលបិទមិនអោយចេញចូលវត្ត ដោយអះអាងថា ផ្លូវនេះជាដីរបស់ខ្លួន។ តាមពិតផ្លូវនេះជាផ្លូវរទេះតាំងពីបុរាណកាលមកម្លេះ។
ប្រភពបន្តថា ការកាយផ្តាច់ផ្លូវអស់រយ:ពេលជាង១ឆ្នាំ មិនទាន់ដោះស្រាយគ្នាផង ក៏លេចមុខបុគ្គលមួយក្រុមចូលមកកាប់បំផ្លាញព្រៃតាមដងផ្លូវចូលទៅវត្តទៀត។ នេះបង្ហាញថា បុគ្គលខាង លើកំពុងប្រើអំណាចបំផ្លាញផ្លូវហើយ បំផ្លាញព្រៃឈើទៀត។
ក្រុមអ្នកភូមិបានបញ្ជាក់ថា ក្នុងរយ:ពេល៧ថ្ងៃ ខាងមុខ ប្រសិនបើអាជ្ញាធរនៅតែមិនអាចដោះស្រាយ ហើយអ្នកស្រី ដា ណេ មិនបើកផ្លូវវិញទេ ពួកយើង (អ្នកភូមិ)រួមទាំងព្រះសង្ឃក្នុងវត្ត សម្រេចដកបង្គោលចេញ ហើយកាយដីលុបប្រឡាយ ដើម្បីបើកផ្លូវនេះវិញ។
ព្រះអង្គព្រះនាមស៊ិន សេត ព្រះចៅអធិការវត្ត ព្រៃធុតង្គព្រះនិព្វាន នៅរសៀលថ្ងៃដដែលបានមានសង្ឃដីកា ថាវត្តព្រៃធុតង្គព្រះនិព្វាន ស្ថិតក្នុងភូមិ ត្រ ពាំងត្រុំ ឃុំពពេល ស្រុកសូទ្រនិគម ខេត្តសៀមរាប។កសាងនៅខែធ្នូឆ្នាំ២០១៨ ដោយមានច្បាប់អនុញាតពីក្រសួងធម្មការនិងសាសនា លេខ៤៥/១៨.ក.ធ.ស ប្រ.ក។ ចំពោះផ្លូវចូលវត្ត ដែលកសាងដោយអ្នកភូមិនិងព្រះសង្ឃ ពីដើមឡើយជាផ្លូវរទេះតាំងពីបុរាណ ហើយក៏ជាក្បាលដីឈ្មោះលី គឿន ដែលបានប្រគេនដល់វត្តសម្រាប់ធ្វើផ្លូវផងដែរ។ តែបែជាលោកស្រី ដាណេ យកគ្រឿងចក្រមកឈូសផ្តាច់ហើយមិនមានដំណោះស្រាយទៅវិញ។
ព្រះអង្គបន្តថា នៅឆ្នាំ២០១៨ អ្នកស្រីដាណេ ឈូសផ្តាច់ផ្លូវហើយបោះបង្គោលថ្មរាំងមិនអោយចេញចូល។លុះខែឧសភា ឆ្នាំ២០១៩ ជួបប្រជុំដោះស្រាយ ព្រមព្រៀងថាវាស់ក្បាលដីរៀងៗខ្លួន សល់ប៉ុន្មាន ជាដីផ្លូវ។ តែមកទល់ថ្ងៃទី១៩ខែសីហាឆ្នាំ២០២០នេះ គ្មានដំណោះស្រាយហើយ បែជាលេចមុខ មនុស្សមួយក្រុមមកកាប់ដើមឈើដែលអ្នកភូមិនិងលោកខំដាំ តាមផ្លូវចូលវត្តទៅវិញ។ ចឹងទេនៅថ្ងៃទី២៧ខែសីហា ខាងមុខនេះ បើគ្មានដំណោះស្រាយទេអ្នកភូមិមកដកបង្គោលដើម្បីបើកផ្លូវវិញ អាត្មា ក៏មិនហាមឃាត់ ហើយក៏ចូលរួមផងដែរ ព្រោះជាផ្លូវសាធារណ:។
ទាក់ទងករណីនេះ លោកស្រេង សែនឧត្តម ជាកូនប្រុសរបស់លោក ស្រី ដាណេ បានផ្ញើសារប្រាប់ថា ដីរបស់លោកមានលិខិតកាន់កាប់។ បើចង់ដឹងសួរអាជ្ញាធរឃុំ.ស្រុកដឹងហើយ។ ប៉ុន្តែលោកមិនបានឆ្លើយតបថា ហេតុអីទើបកាប់ព្រៃនោះទេ។
ជុំវិញហេតុការណ៍កើតឡើងនេះ លោក វ៉ាន់ ប៉ុណ្ណា ប្រធានមន្ទីរធម្មការនិងសាសនា ខេត្តសៀមរាប មិនអាចសុំការបកស្រាយបានទេ ចំពោះវិវាទនៅវត្តខាងលើ ថា តើមានវិធីណាដោះស្រាយ ដោយទូរស័ព្ទ ហៅចូលច្រើនដង តែគ្មានអ្នកទទួល។
ចំណែកលោកម៉ក់ ប្រុស អភិបាលស្រុកសូទ្រនិគម បានមានប្រសាសន៍តាមទូរស័ព្ទ នៅល្ងាចថ្ងៃទី២១ខែ សីហានេះថា លោកនិងរកវិធីសម្របសម្រួល មិនអោយមានហេតុការដកបង្គោលរបងថ្មនោះកើតឡើងទេ ព្រោះបើបណ្តោយអោយមានចឹង ហិង្សាអាចនឹងកើតឡើង។ លោកបន្តថា ក្បាលដីប៉ុន្មានប្លង់នៅចំណុចកើតហេតុនោះ មានការទិញលក់តៗគ្នាច្រើនមកហើយ ចឹងទេការចុះវាស់វែងជាថ្មី ពិបាករកម្ចាស់ណាស់។ ប៉ុន្តែដីលោកស្រីដាណេ គឺមានលិខិតកាន់កាប់។ រឿងនេះបានប្រជុំដោះស្រាយគ្នាម្តងហើយ តែពិបាកម្ខាងមានលិខិតកាន់កាប់ ម្ខាងថាជាដីផ្លូវពីបុរាណ។ ប៉ុន្តែ ក្នុងនាមអាជ្ញាធរ នឹងរកវិធី មិនអោយមានហេតុការណ៍មិនល្អកើតឡើងក្នុងមូលដ្ឋានឡើយ៕SRP

ខេត្តកំពង់ធំ៖បុរសចំនួន០៤នាក់ត្រូវបាននគរបាលស្រុកស្ទោងឃាត់ខ្លួននៅភូមិវាល ឃុំទ្រា ស្រុកស្ទោង នាព្រឹកមិញនេះករណីហិង្សា។

ជនសង្ស័យទី១ឈ្មោះ វន វួច ភេទប្រុស អាយុ២៦ឆ្នាំ
ទី២ឈ្មោះ រ៉ុង សុជា ហៅសុខ ភេទប្រុស អាយុ២១ឆ្នាំ
ទី៣ឈ្មោះ លឹម ចិន ភេទប្រុស អាយុ២៧ឆ្នាំ
ទី៤ឈ្មោះ វន តុលា ភេទប្រុស អាយុ ២៣ឆ្នាំ។
អ្នកទាំង៤នាក់នៅភូមិវាល ឃុំទ្រា ស្រុកស្ទោង ដែលបានប្រព្រឹត្តិ អំពើរហិង្សា កាលពីយប់ថ្ងៃទី២០ខែសីហាឆ្នាំ២០២០វេលាម៉ោង២០និង៥នាទី នៅភូមិទ្រា ឃុំទ្រា ស្រុកស្ទោង។ជនរងគ្រោះ ឈ្មោះ រតនា ម៉ៃសោភ័ណ្ឌ និងឈ្មោះ ឈី។
នគរបាលស្រុកស្ទោងបានបញ្ជាក់ថា ករណីនេះកម្លាំងកសាងសំណុំរឿងទៅតាមនិតិវិធី៕SRP

ខេត្តព្រៃវែង៖សាកសពស្ត្រីម្នាក់ត្រូវបាន គេប្រទះឃើញនៅប្រឡាយទឹកមានលក្ខណ:ហើម សង្ស័យថាជាអំពើឃាតកម្ម។
ហេតុការណ៍នេះបានកើតឡើងនៅថ្ងៃទី ២១ ខែ សីហា ឆ្នាំ ២០២០ វេលាម៉ោង ៧នឹង៣០ នៅចំណុចប្រឡាយទឹកស្ថិតភូមិស្វាយតានី ឃុំបឹងព្រះ ស្រុកបាភ្នំ ខេត្តព្រៃវែង។

ជនរងគ្រោះឈ្មោះ ឌឹម ផង់ ភេទស្រី អាយុ២៦ឆ្នាំ ជាមនុស្សមិនពេញលក្ខណៈ រស់នៅភូមិតាពេជ្រត្បូង ឃុំរក្សជ័យ ស្រុកបាភ្នំ ខេត្តព្រៃវែង។

សមត្ថកិច្ចបានឲ្យដឹងថាតាមបណ្ដឹង របស់ឈ្មោះ អ៉ឹម ប៉ាង ភេទស្រី អាយុ៦៥ឆ្នាំ ជាម្ដាយជនរងគ្រោះ បានប្ដឹងរាយការណ៍ថា នៅថ្ងៃទី១៩ ខែសីហា ឆ្នាំ ២០២០ វេលាម៉ោងប្រហែល១៩និង៣០នាទី ឈ្មោះ អ៉ឹម រត្ន័ ហៅឆ្អឹង ភេទប្រុស អាយុ២០ ឆ្នាំ រស់នៅភូមិប្រស្រែ ឃុំបឹងព្រះ ស្រុកបាភ្នំ និងបក្ខពួកពីរនាក់ទៀត បានឌុប ជនរងគ្រោះ ជាមួយនិងម៉ូតូមួយគ្រឿង ឆ្ពោះ ទៅទិសខាងកើតបាត់ទៅ។ គាត់ជាម្ដាយតាមរកជនរងគ្រោះ តែរកមិនឃើញ លុះដល់ថ្ងៃទី២១ ខែ សីហា ឆ្នាំ២០២០នេះ ប្រទះឃើញសាកសពតែម្ដង។

យោងតាមការពិនិត្យសាកសព ឃើញ មានស្នាមរបួស ចំនួន០៣កន្លែង ៖
១-ក្រោមភ្នែកខាងស្ដាំ
២-ចំកញ្ចប់មាត់
៣-ចំម្រមុះ
តាមការសន្និដ្ឋាន ជនរងគ្រោះស្លាប់ដោយអំពើឃាតកម្ម ។ បច្ចុប្បន្នករណីនេះសមត្ថកិច្ចបានកំណត់បានមុខសញ្ញាសង្ស័យម្នាក់ហើយ៕SRP

ខេត្តកំពង់ស្ពឺ៖ប៉ូលិសស្នងកាខេត្តកំពង់ស្ពឺ បានឃាត់ខ្លួន លោក កង ភារី អធិការរងនគរបាលស្រុកសំរោងទង បន្ទាប់ពីមានការបាញ់បោះសេរី។
ការឃាត់ខ្លួនធ្វើឡើងនៅវេលាម៉ោង២២និង៣០នាទីថ្ងៃទី១៩ខែសីហាឆ្នាំ២០២០ ក្នុងទឹកដីស្រុកសំរោងទង ខេត្តកំពង់ស្ពឺ។
យោងតាមរបាយការណ៍របស់អធិការនគរបាលស្រុកសំរោងទង ផ្ញើជូនស្នងការនគរបាលខេត្តកំពង់ស្ពឺ
ចុះថ្ងៃទី២០ខែសីហាឆ្នាំ២០២០បានរៀបរាប់ថា កាលពីថ្ងៃទី១៨ ខែសីហាឆ្នាំ២០២០ វេលាម៉ោង៩ និង០០ នាទីលោកវរសេនីយ៍ទោ កង ភារី អធិការរងទទួលការងារសន្តិសុខនៃអធិការដ្ឋាននគរបាលស្រុកសំរោងទង បានយកអាវុធខ្លី របស់ខ្លួនមួយដើមម៉ាកឡុកធ្វើសកម្មភាពឈរបាញ់នៅចំណុចបរិវេណសាលាស្រុកមាត់ស្រះទឹកខាងត្បូង។

ក្នុងរបាយការណ៍បន្តថាលុះមកដល់ថ្ងៃទី១៩ ខែសីហាឆ្នាំ២០២០ វេលាម៉ោង១៨ និង៣០ នាទីលោកវរសេនីយ៍ទោ កង ភារី បាននាំកូនចៅក្រោមឱវាទផឹកស៊ីរហូតស្រវឹងនិយាយអួតក្អេងក្អាង ហើយឈរបាញ់នៅក្នុងបរវេណសាលាស្រុកចំណុចមាត់ស្រះទឹកដដែល ក្នុងនោះកូនចៅរបស់ខ្លួនជាច្រើនដែលផឹកស៊ីក៏បានចូលរួមក្នុងការបាញ់ដែរ។
រួមមានលោកអនុសេនីយ៍ឯក ដន សុខុម ឋានៈនាយរងផ្នែកសន្តិសុខបាញ់ចំនួន២គ្រាប់លោកអនុសេនីយ៍ត្រី ព្រីង ឡងឌី ឋានៈនាយរងប៉ុស្តិ៍វល្លិ៍សបាញ់ចំនួន២ គ្រាប់លោកអនុសេនីយ៍ត្រី តាន់ សៅលី ឋានៈនាយរងផ្នែកគ្រឿងញៀនបាញ់ចំនួន ២គ្រាប់ លោកអនុសេនីយ៍ត្រីម៉ាន់ ប៊ុណ្ណារ៉ា ឋានៈនាយរងផ្នែកគ្រឿងញៀនបាញ់ចំនួន០២គ្រាប់ លោកព្រិន្ទបាលទោ ឌី សូភក្តិ ឋានៈមន្ត្រីប៉ុស្តិ៍ទំព័រមាសបាញ់ចំនួន០២ គ្រាប់។
ជុំវិញហេតុការណ៍នេះ លោកឧត្តមសេនីយ៍ទោ សម សាមួន ស្នងការប៉ូលិសខេត្តកំពង់ស្ពឺ បានប្រាប់អ្នកយកព័ត៌មានថា ករណីខាងលើ
លោកបានរាយការណ៍ទៅថ្នាក់លើដើម្បីអោយដាក់តាមវិន័យរបស់កងកម្លាំងអគ្គស្នងការនគរបាលជាតិលេខ០០៦ អោយសមទោសកំហុសដែលមន្ត្រីនគរបាលយុត្តិធម៌បានប្រព្រឹត្ត។
បើតាមសេចកក្ដីរាយការណ៍ថាពេលនេះកម្លាំងនគរបាលជំនាញប៉ូលិសស្នងការខេត្តកំពង់ស្ពឺ កំពុងតែធ្វើការសាកសួរលោកអធិការរងរូបនេះ ដើម្បីរកមូលហេតុដែលបានបាញ់បោះនេះ។
សូមបញ្ជាក់ថារបាយការណ៍ គោរពផ្ញើជូនលោកស្នងការខេត្ត ចុះហត្ថលេខា ដោយលោកវរសេនីយ៍ឯក ឃុត សុផល អធិការស្រុកសំរោងទង និងអភិបាលស្រុកសំរោងទង ករណីបាញ់បោះនេះ៕SRP

ខេត្តសៀមរាប៖មនុស្សចំនួន០៦នាក់ត្រូវបាននគរបាលខេត្តសៀមរាបឃាត់ខ្លួនពីបទរក្សាទុកចាត់ចែងជួញដូរ និងប្រើប្រាស់ដោយខុសច្បាប់នូវសារធាតុញៀនខុសច្បាប់។

ហេតុការណ៍ឃាត់ខ្លួននៅថ្ងៃព្រហស្បតិ៍ ទី២០ខែ សីហា ឆ្នាំ២០២០ វេលាម៉ោង២យប់ នៅចំណុចបន្ទប់ជួលស្ថិតនៅភូមិតាភុលសង្កាត់ ស្វាយដង្គំ ក្រុងសៀមរាបដោយឃាត់ខ្លួនបាន០៤នាក់ ស្រី០២នាក់ និងនៅចំណុចលំនៅដ្ឋានស្ថិតនៅភូមិសាលាកំរើក សង្កាត់សាលាកំរើក ក្រុងសៀមរាប០២នាក់ទៀត។

មន្ត្រីនគរបាលខេត្តសៀមរាបបានប្រាប់បណ្ដាញសៀមរាបប៉ុស្ដិ៍នៅរសៀលថ្ងៃនេះថាជនសង្ស័យទាំង០៦នាក់ ស្រី០២នាក់

១–ឈ្មោះ ឡឹក សុភ័ក្ត្រ ភេទ ប្រុស ឆ្នាំកំណើត ២០០២  មុខរបរបុគ្គលិកខារ៉ាឣូខេ មានទីលំនៅភូមិសាលាកំរើក សង្កាត់សាលាកំរើក ក្រុងសៀមរាប។

២–ឈ្មោះ រឿន ធានុត ភេទ ប្រុស ឆ្នាំកំណើត ២០០៥  មុខរបរគ្មាន  មានទីលំនៅភូមិតាភុល សង្កាត់ស្វាយដង្គំ ក្រុងសៀមរាប។

៣–ឈ្មោះ ម៉យ ម៉ាប់ ភេទ ប្រុស ឆ្នាំកំណើត ២០០១ មុខរបរបុគ្គលិកក្រុមហ៊ុនស្រាបៀរ មានទីលំនៅភូមិខ្នារ សង្កាត់ជ្រាវ ក្រុងសៀមរាប។

៤–ឈ្មោះ រឿន សុជាតិទី ភេទ ស្រីឆ្នាំកំណើត ២០០១មុខរបរជាងឣ៊ុតសក់  មានទីលំនៅភូមិតាភុល សង្កាត់ស្វាយដង្គំក្រុងសៀមរាប។

៥–ឈ្មោះ ប៉ក់ លីហ្សា ភេទ ស្រី ឆ្នាំកំណើត២០០៤មុខរបរ បុគ្គលិកហាង មានទីលំនៅភូមិតាវៀន សង្កាត់សាលាកំរើក ក្រុងសៀមរាប។
៦–ឈ្មោះ ប៉ាន់ វិសា ហៅ ទូច ភេទ ប្រុស ឆ្នាំកំណើត ២០០០ មុខរបរចុងភៅ មានទីលំនៅភូមិវត្តបូព៌ សង្កាត់សាលាកំរើក ក្រុងសៀមរាប។

ក្នុងហេតុការណ៍នេះដកហូតវត្ថុតាងម្សៅមេតំហ្វេតាមីនចំនួន១១កញ្ចប់ ស្មើនិងទំងន់១,៧ក្រាមទាំងសំបកទូរស័ព្ទដៃចំនួន០៣គ្រឿង និងម៉ូតូចំនួន០២គ្រឿង។ ក្រោយសាកសួរបញ្ជូនទៅសាលាដំបូងខេត្តសៀមរាបថ្ងៃទី២១ខែ សីហានេះដើម្បីអនុវត្តតាមផ្លូវច្បាប់៕SRP

ខេត្តសៀមរាប៖ក្នុងឱកាសនៃថ្ងៃឈប់សម្រាកសងថ្ងៃបុណ្យចូលឆ្នាំប្រពៃណីជាតិ មានភ្ញៀវប្រមាណជាង១៨ម៉ឺននាក់ បានមកកម្សាន្តនៅក្នុងទឹកដីអង្គរសៀមរាប ក្នុងរយ:ពេល៥ថ្ងៃចាប់តាំងពីថ្ងៃទី១៦រហូតដល់ថ្ងៃទី២០ខែសីហាឆ្នាំ២០២០ម្សិលមិញ។

យោងតាមរបាយការណ៍ចេញដោយមន្ទីរទេសចណ៍ខេត្តសៀមរាបបានឲ្យដឹងថា រយៈពេល 05ថ្ងៃ ចាប់ពីថ្ងៃទី 16ខែសីហាឆ្នាំ2020រហូតដល់ថ្ងៃទី20ខែសីហា 2020 មានភ្ញៀវសរុបចំនួនសរុប 181.868 នាក់ ក្នុងនោះ ភ្ញៀវទេសចរបរទេស1.868 នាក់ ថយចុះ92,85% (បើធៀបនឹងឆ្នាំ2019 មានភ្ញៀវ 26.144 នាក់)។ ចំណែកភ្ញៀវជាតិ មានចំនួនប្រមាណ18ម៉ឺននាក់៕SRP