ខេត្តសៀមរាប៖អាជ្ញាធរខេត្តបានចែកវិញ្ញាបនបត្រសម្គាល់ម្ចាស់អចលនវត្ថុ ដល់ពលរដ្ឋ នៅភូមិធ្លកអណ្តូង សង្កាត់ស្លក្រាម ក្រុងសៀមរាប ចំនួន៦៥ក្បាលដី។

ការចែកនេះធ្វើឡើង ក្រោមវត្តមានលោក លី សំរិទ្ធ អភិបាលរងខេត្ត ប្រធានគណៈកម្មការរដ្ឋបាល ខេត្តសៀមរាប  នៅថ្ងៃទី២៨ ខែតុលា ឆ្នាំ២០២០។

លោកលី សំរិទ្ធ បានសម្តែងនូវការអបអរសាទរ ចំពោះ បងប្អូនប្រជាពលរដ្ឋ ជាម្ចាស់ដី និងអ្នកកាន់កាប់ដីទាំងអស់ ដែលទទួលបាននូវប័ណ្ណកម្មសិទ្ធិ ដើម្បីបានប្រើប្រាស់តាមផ្លូវច្បាប់ ក្នុងដំណោះស្រាយបញ្ហាកង្វះខាត ឬដើម្បីមុខរបរ ធ្វើអាជីវកម្មផ្សេងៗ លើកស្ទួយជីវភាពប្រចាំថ្ងៃក្នុងគ្រួសារ និងបានរក្សាទុកជាឯកសារសំអាង ក្នុងទំនាស់ដីធ្លី។ ប័ណ្ណកម្មសិទ្ធិទាំងនេះ មានតម្លៃនៃការប្រើប្រាស់កាន់តែខ្ពស់ ស្របពេលដែលប្រទេសជាតិមានសន្តិភាពរឹងមាំ ដែលជាឱកាសនៃការអភិវឌ្ឍ។ ការចុះបញ្ជីដីធ្លីមានលក្ខណៈជាប្រព័ន្ធ ពិតជាត្រូវបានអនុវត្តតាមនីតិវិធី និងបច្ចេកវិទ្យាទំនើប មានតម្លាភាពនិងការទទួលខុសត្រូវ ដែលប្រទេសជឿនលឿនលើពិភពលោកកំពុងអនុវត្ត និងមានប្រសិទ្ធភាពលើការគ្រប់គ្រងដីធ្លី។ នេះគឺជាប្រការសមស្របបំផុត ដែលបានកំណត់នៅក្នុងគោលនយោបាយដីធ្លីរបស់រាជរដ្ឋាភិបាល ដើម្បីកាត់បន្ថយភាពក្រីក្រ និងទំនាស់ដីធ្លីក្នុងសង្គមជាតិ។

បើតាមរបាយការណ៍របស់មន្ទីររៀបចំដែនដី នគរូបនីយកម្មនិងសំណង់ បានបញ្ចាក់ថា ប័ណ្ណកម្មសិទ្ធដែលត្រូវប្រកាសចែកជូនម្ចាស់ដីនៅភូមិធ្លកអណ្តូងមានចំនួន៦៥ក្បាលដី ដែលត្រូវបានគណៈកម្មការរដ្ឋបាលខេត្តប្រជុំពិនិត្យដោះស្រាយ និងបានស្នើសុំគោលការណ៍ចេញប័ណ្ណកម្មសិទ្ធិជូនកម្មសិទ្ធិកររួចរាល់ ជាមួយនឹងការបដិសេធទៅម្ចាស់បណ្តឹងផងដែរ និងនៅមាន១០៣ក្បាលដីទៀត ដែលបានពិនិត្យឃើញថា ពុំទាន់អាចចេញប័ណ្ណកម្មសិទ្ធិបាននៅឡើយ ដោយសារនៅជាប់ទំនាស់ ។ យ៉ាងណាក៏ដោយ ការសំរេចចេញប័ណ្ណកម្មសិទ្ធិនេះ វាប្រៀបបីដូចជាការលាងដៃឲ្យស្អាតដើម្បីសុខភាពមុនពិសាអាហារ ដូចគ្នាដែរគឺដើម្បីចៀសវាងកុំឲ្យមានបញ្ហា ការមន្ទិលសៅហ្មង កើតទំនាស់ទៅថ្ងៃក្រោយទៀតផងដែរ៕SRP

ភ្នំពេញ៖ប្រធានរដ្ឋសភាជាតិកម្ពុជា សម្ដេច ហេង សំរិន បានលើកឡើងថា«ក្រោមម្លប់សុខសន្តិភាព និងការអភិវឌ្ឍ នៅក្នុងឱកាសឈប់សម្រាកពីការងារដូច្នេះ បងប្អូនជនរួមជាតិ បានជួបជុំក្រុមគ្រួសារ ធ្វើដំណើរកម្សាន្ត បានយ៉ាងសប្បាយរីករាយនៅតាមរមណីដ្ឋាននានា ទូទាំងប្រទេស»។

សម្ដេច ហេង សំរិន បន្តថា៖សូមបងប្អូនជនរួមជាតិ សប្បាយរីករាយនៅក្នុងឱកាសឈប់សំរាក នៃព្រះរាជពិធីបុណ្យអុំទូក អកអំបុក បណ្តែតប្រទីប និងសំពះព្រះខែ។ ទោះបីព្រះរាជពិធីអុំទូក ត្រូវរាជរដ្ឋាភិបាលសម្រេចមិនរៀបចំធ្វើនៅរាជធានីភ្នំពេញ ដើម្បីទប់ស្កាត់ការរីករាលដាលជំងឺកូវីដ១៩ យ៉ាងណាក្តី តែនៅតាមបណ្តាខេត្ត ក្រុងនានា បានប្រារព្ធពិធីការប្រណាំងទូកង បណ្តែតប្រទីប និងសំពះព្រះខែ នៅក្នុងមូលដ្ឋានរបស់ខ្លួន។ ចំណែក នៅតាមវត្តអារាម និងគេហដ្ឋានរបស់ប្រជាពលរដ្ឋ បានរៀបចំពិធី អកអំបុក យ៉ាងសប្បាយរីករាយ តាមទំនៀមទម្លាប់ប្រពៃណីជាតិ របស់យើង។ ទន្ទឹមនឹងនោះសហគមន៍ទេសចរណ៍ រមណីដ្ឋាននានា បានកំពុងរៀបចំកែលម្អឱ្យកាន់តែប្រសើរឡើង ក្នុងការត្រៀមទទួលស្វាគមន៍ ភ្ញៀវទេសចរណ៍ជាតិ និងអន្តរជាតិ នៅពេលក្រោយវិបត្តិកូវីដ១៩ បញ្ចប់ផងដែរ។

សម្ដេច បានបន្តថា៖សូមបងប្អូនជនរួមជាតិបន្តអនុវត្តវិធានការ ការពារជំងឺកូវីដ១៩ តាមការណែនាំរបស់ក្រសួង សុខាភិបាលឱ្យបានខ្ជាប់ខ្ជួន ខណៈដែលប្រទេសជិតខាង និងពិភពលោក កំពុងបន្តរាតត្បាតដោយជំងឺ ពុំទាន់មានថ្មាំព្យាបាលនេះនៅឡើយទេ។

សូមបងប្អូនជនរួមជាតិជួបតែសុខសុវត្ថិភាព នៅក្នុងការធ្វើដំណើរកម្សាន្ត ទាំងពេលទៅនិងពេលអញ្ជើញត្រឡប់មកវិញ ដោយគោរពច្បាប់ចរាចរណ៍ទាំងអស់គ្នា និងចេះអធ្យាស្រ័យឱ្យគ្នាទៅវិញទៅមក ក្នុងការធ្វើដំណើរ៕SRP

ខេត្តសៀមរាប៖សមត្ថកិច្ចបានដឹងថាបុរសម្នាក់ត្រូវបានគេប្រទះឃើញចងកសម្លាប់ខ្លួន។
ហេតការណ៍ប្រទះឃើញសាកសព នៅថ្ងៃសុក្រទី៣០ខែតុលាឆ្នាំ២០២០នេះ នៅវេលាម៉ោង ០៥ទៀបភ្លឺ ផ្លូវទៅអង្គរវត្ត ជិតដល់សំបកកំំំំណប់ ស្ថិតក្នុងភូមិមណ្ឌល០៣ សង្កាត់ស្លក្រាម ក្រុងសៀមរាប។

លោកស៊ ស៊ិនណារ៉ា នាយប៉ុស្ដិ៍សង្កាត់ស្លក្រាម បានបញ្ជាក់ថា៖

ពាក់ព័ន្ធករណីនេះសមត្ថកិច្ចបានបញ្ជាក់ថា នៅមិនទាន់ស្គាល់អត្តសញ្ញាណ និងអាសយដ្ឋាន ជនរងគ្រោះនៅឡើយទេ៕SRP

ភ្នំពេញ៖សម្ដេចតេជោហ៊ុន សែន នាយករដ្ឋមន្ត្រី បានអំពាវនាវដល់មន្ត្រីអាជ្ញាធរសមត្ថកិច្ច គ្រប់ជាន់ថ្នាក់ យកចិត្តទុកដាក់ ថែរក្សា សណ្ដាប់ធ្នាប់ឲ្យបានល្អ។

សារអំពាវនាវ របស់នាយករដ្ឋមន្ត្រី បានធ្វើឡើងនៅព្រឹកថ្ងៃសុក្រទី ៣០ ខែតុលានេះ។
តាមរយៈទំព័រ page ហ្វេសប៊ុក របស់នាយករដ្ឋមន្ត្រីបានសរសេរថា៖អបអរសាទរ និងសប្បាយរីករាយក្នុងថ្ងៃនៃព្រះរាជពិធីបុណ្យអុំទូកថ្ងៃទី១

នាយករដ្ឋមន្ត្រីបានបន្តថា៖ថ្ងៃនេះជាថ្ងៃដំបូង នៃព្រះរាជពិធីបុណ្យអុំទូក បណ្តែតប្រទីប សំពះព្រះខែ និងអកអំបុក ឆ្នាំ២០២០។ ថ្វីត្បិតតែយើងមិនមានពិធីប្រណាំងទូកនៅទីក្រុងភ្នំពេញក៏ដោយ
ក៏បងប្អូនប្រជាពលរដ្ឋអាចកម្សាន្តសប្បាយរីករាយនៅតាមបណ្ដាខេត្តនានា ទៅតាមទំនៀមទម្លាប់របស់ខ្មែរយើង។ ក៏ប៉ុន្តែទោះជាយ៉ាងណាក៏ដោយបងប្អូនប្រជាពលរដ្ឋត្រូវតែមានការប្រុងប្រយ័ត្នជាប់ជានិច្ច ក៏ដូចជាបង្ការការពារការចម្លងជំងឺកូវីដ១៩ ដោយត្រូវអនុវត្តឲ្យបានខ្ជាប់ខ្ជួននូវការណែនាំរបស់ក្រសួងសុខាភិបាល។

នាយករដ្ឋមន្ត្រីបានបញ្ជាក់បន្ថែមថា៖
សូមអាជ្ញាធរ និងសមត្ថកិច្ចគ្រប់ជាន់ថ្នាក់យកចិត្តទុកដាក់ខ្ពស់ ក្នុងការថែរក្សាសន្តិសុខ សណ្តាប់ធ្នាប់ឱ្យបានល្អ ដើម្បីអោយប្រជាពលរដ្ឋ និងទេសចរបរទេសមានឱកាសបានសប្បាយរីករាយក្នុងក្នុងថ្ងៃឈប់សម្រាកក្នុងពិធីបុណ្យនេះ នៅទូទាំងប្រទេស។

សូមបញ្ជាក់ផងដែរថា នៅល្ងាចថ្ងៃទី ២៩ខែតុលាឆ្នាំ ២០២០ ម្សិលមិញនៅក្រុងសៀមរាប ឯណាវិញ គេសង្កេតឃើញមាន រថយន្តរាប់សិបគ្រឿងបានចូលមកក្រុងសៀមរាប ដែលក្រុងសៀមរាប គេចាត់ទុកថាជាទីក្រុងមួយដ៏អស្ចារ្យល្បីល្បាញ មានកន្លែងកំសាន្តច្រើន ជាពិសេសជាងហ្នឹងទៀតគឺក្រុងសៀមរាបមានសន្តិសុខសណ្ដាប់ធ្នាប់ល្អប្រសើរផងដែរ៕SRP

ខេត្តព្រៃវែង៖កម្លាំងរាជអាវុធហត្ថស្រុកពាមរក៍ បានចាប់ចោរវ័យក្មេង៤នាក់ពាក់ព័ន្ធករណីលួច។

ការឃាត់ខ្លួននេះធ្វើឡើង នៅចំណុចភូមិ០៦ ឃុំព្រែកខ្សាយ (ខ) ស្រុកពាមរក៏ ខេត្តព្រៃវែង នៅថ្ងៃទី២៨ខែតុលាឆ្នាំ២០២០។

ជនសង្ស័យទី១ឈ្មោះ អ៊ុក ណារើន ភេទប្រុស អាយុ១៨ឆ្ន្នាំ រស់នៅភូមិ អ្នកលឿង ឃុំអ្នកលឿង ស្រុកពាមរក៏ ខេត្តព្រៃវែង។

២ឈ្មោះអ៊ុក ណារ៉ុង ភេទប្រុសអាយុ ១៧ឆ្នាំ រស់នៅភូមិ អ្នកលឿង ឃុំ អ្នកលឿង ស្រុកពាមរក៏ ខេត្តព្រៃវែង។

៣ឈ្មោះ អយ មុី ប្រុស អាយុ ១៣ឆ្នាំ រស់នៅភូមិ០៦ ឃុំព្រែកខ្សាយ(ខ) ស្រុកពាមរក៏ ខេត្តព្រៃវែង ។

៤ឈ្មោះ អយ ហេវ ភេទប្រុស អាយុ១១ឆ្នាំ រស់នៅភូមិ០៦ ឃុំ ព្រែកខ្សាយ(ខ) ស្រុកពាមរក៏ ខេត្តព្រៃវែង។

សមត្ថកិច្ចបានបញ្ជាក់ថាក្រោយឃាត់ខ្លួនបានដកហូតវត្ថុតាងរួមមាន៖ នាឡិកាដៃចំនួន០៥គ្រឿងស្ពីកឃ័រ ចំនួន០៤.កាបូបដៃដាក់លុយ ចំនួន០២ និងជាសម្ភារ ដែលជនសង្ស័យលួចបាន។

សូមរំលឹកថាហេតុការណ៍ លួច គាស់តូបបានកើតនៅយប់ថ្ងៃទី០៤ខែតុលា ឆ្នាំ២០២០ នៅចំណុចផ្សារអ្នកលឿងស្ថិតក្នុងភូមិ០៤ ឃុំព្រែកខ្សាយ(ខ) ស្រុកពាមរក៏ ខេត្តព្រៃវែង។

ជនរងគ្រោះជាម្ចាស់ តូប ឈ្មោះកែវ សុីណាតភេទស្រី អាយុ៤៨ឆ្នាំ រស់នៅភូមិ០៤ឃុំព្រែកខ្សាយ(ខ)ស្រុកពាមរក៏ ខេត្តព្រៃវែង។

បើតាមសមត្ថកិច្ចបញ្ជាក់ថា ករណីនេះឈ្មោះ អយ មុី ប្រុស អាយុ១៣ឆ្នាំ និងឈ្មោះ អយ ហេវ ភេទប្រុសអាយុ១១ឆ្នាំ ដោយមានការអនុញ្ញាតពីលោក ប៊ូ ប៊ុនហាង ព្រះរាជអាជ្ញា អមសាលាដំបូង ខេត្តព្រៃវែង សមត្ថកិច្ចបានធ្វើការអប់រំនិងប្រគល់ទៅ អោយអាណាព្យាបាល របស់ពួកគេវិញ ដោយសារពួកគេគឺជាអនិតិជន ដែលមានអាយុក្រោម១៤ឆ្នាំ។ចំណែក០២នាក់ទៀត ត្រូវបានកសាងសំណុំរឿងតាមនីតិវិធី៕SRP

ខេត្តកំពង់ធំ៖កម្លាំងសមត្ថកិច្ចចម្រុះខេត្តកំពង់ធំនៅថ្ងៃទី ២៩ ខែតុលាឆ្នាំ ២០២០ នេះ បានបង្ក្រាបរថយន្តដឹកឈើមួយគ្រឿង នៅតាមបណ្ដោយផ្លូវជាតិលេខ៦២។

ភ្នាក់ងារបណ្ដាញសៀមរាបប៉ុស្តិ៍ ប្រចាំខេត្តកំពង់ធំបានរាយការណ៍ថា បើកប្រតិបត្តិការនេះធ្វើឡើងដោយកម្លាំងកងរាជអាវុធហត្ថស្រុកប្រាសាទបាល្ល័ង្គ សហការ ជាមួយអធិការរដ្ឋបាលព្រៃឈើខាងជើងបឹងទន្លេសាប ផ្នែស្ទោង សង្កាត់រដ្ឋបាលព្រៃឈើកំពង់ស្វាយ។
ភ្នាក់ងារបានរាយការណ៍បន្តថារថយន្តយីឌុបនេះគឺដឹកឈើផ្ទះចាស់ បន្លំដឹកឈើថ្មីនេះ ពាក់ស្លាកលេខភ្នំពេញ៤D៤៥៤១ ពណ៌ត្រួយចេក។ពាក់ព័ន្ធទៅនឹងការបង្ក្រាបនេះ សមត្ថកិច្ចនៅមិនទាន់បញ្ហាញលទ្ធផលលម្អិតនៅឡើយទេ៕SRP

ខេត្តកំពង់ធំ៖កម្លាំងសមត្ថកិច្ចចម្រុះខេត្តកំពង់ធំនៅថ្ងៃទី ២៩ ខែតុលាឆ្នាំ ២០២០ នេះ បានបង្ក្រាបរថយន្តដឹកឈើមួយគ្រឿង នៅតាមបណ្ដោយផ្លូវជាតិលេខ៦២។

ភ្នាក់ងារបណ្ដាញសៀមរាបប៉ុស្តិ៍ ប្រចាំខេត្តកំពង់ធំបានរាយការណ៍ថា បើកប្រតិបត្តិការនេះធ្វើឡើងដោយកម្លាំងកងរាជអាវុធហត្ថស្រុកប្រាសាទបាល្ល័ង្គ សហការ ជាមួយអធិការរដ្ឋបាលព្រៃឈើខាងជើងបឹងទន្លេសាប ផ្នែស្ទោង សង្កាត់រដ្ឋបាលព្រៃឈើកំពង់ស្វាយ។
ភ្នាក់ងារបានរាយការណ៍បន្តថារថយន្តយីឌុបនេះ ពណ៌ត្រួយចេក ពាក់ស្លាកលេខ ភ្នំពេញ ៣D៤៥៤១គឺដឹកឈើផ្ទះចាស់បន្លំដឹកឈើថ្មី។

ពាក់ព័ន្ធទៅនឹងការបង្ក្រាបនេះ សមត្ថកិច្ចនៅមិនទាន់បញ្ហាញលទ្ធផលលម្អិតនៅឡើយទេ៕SRP

ខេត្តសៀមរាប៖បើមិនមានអ្វីប្រែប្រួលនោះទេ ផ្លូវទាំង៣៨ខ្សែ នៅក្នុងក្រុងសៀមរាប នឹងសម្ពោធបើកការដ្ឋានសាងសង់នៅ ថ្ងៃទី១៦ ខែវិច្ឆិកា ឆ្នាំ២០២០ខាងមុខនេះ ក្រោមអធិបតីភាពដ៏ខ្ពង់ខ្ពស់របស់សម្ដេចតេជោ ហ៊ុន សែន នាយករដ្ឋមន្ត្រី។

ជុំវិញការសង់សង់ផ្លូវនៅក្រុងសៀមរាបនេះ នៅថ្ងៃពុធទី២៨ ខែតុលា ម្សិលមិញ លោកស៊ុនចាន់ថុល រដ្ឋមន្ត្រីក្រសួងសាធារណការ បានដឹកនាំកិច្ចប្រជុំ ពិភាក្សា ឱ្យបានយល់កាន់តែច្បាស់អំពីតម្រូវការ គោលជំហរ និងគោលការណ៍ នៃការស្ថាបនា ផ្លូវថ្នល់ ឱ្យមានគុណភាពរឹងមាំ ក៏ដូចជានីតិវិធីនៃការផ្គត់ផ្គង់ ការទូទាត់ថ្លៃ សម្ភារ និងការជ្រើសរើសសម្ភារសាងសង់ប្រកបដោយស្តង់ដារ តាមអនុសាសន៍ណែនាំរបស់ សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងលោកជា សុផារ៉ា រដ្ឋមន្ត្រីក្រសួងរៀបចំដែនដី។

លោកស៊ុន ចាន់ថុល បានគូសបញ្ជាក់ថា៖ ហេដ្ឋារចនាសម្ព័ន្ធផ្លូវថ្នល់ទាំង៣៨ខ្សែនេះ នឹងត្រូវសាងសង់ ឡើងដោយអង្គភាពចំនួន០៦ បែងចែកជាកំណាត់ៗ ប្រកបដោយភាពបត់បែន និងច្នៃប្រឌិតខ្ពស់ ចាក់បេតុងកៅស៊ូសមស្របតាមទំហំចរាចរណ៍ និងការដឹកទំនិញធ្ងន់ ឬស្រាល ដោយផ្ដោតជាសំខាន់លើគុណភាព ប្រសិទ្ធភាព និងបញ្ចប់គម្រោងបានទាន់ពេលវេលាតាមការគ្រោងទុក។

រដ្ឋមន្ត្រីបានបន្តថា ដើម្បីទទួលបានផ្លូវមានគុណភាពស្របតាមស្តង់ដារបច្ចេកទេស និង បញ្ចប់គម្រោងតាមការគ្រោងទុក ភាគីពាក់ព័ន្ធទាំងអស់ទាំងរដ្ឋក៏ដូចជាឯកជនក្តី ត្រូវសហការគ្នាឱ្យបាន ជិតស្និទ្ធក្នុងទិសដៅតែមួយ ពោលគឺ៖ សាងសង់ផ្លូវឱ្យមានប្រសិទ្ធភាពនិងគុណភាពរឹងមាំ និងបញ្ចប់ គម្រោងតាមផែនការ ដោយប្រើប្រាស់សម្ភារមានស្តង់ដារ និងការផ្គត់ផ្គង់សម្ភារបានទាន់តម្រូវការផងដែរ។

រដ្ឋមន្ត្រី បានសង្កត់ធ្ងន់ផងដែរថា៖ ប្រសិនបើអង្គភាពសាងសង់ណាមួយត្រូវបានរកឃើញថា៖ ហេដ្ឋារចនាសម្ព័ន្ធសំណង់របស់ខ្លួន មិនបានអនុវត្តត្រឹមត្រូវតាមបទដ្ឋានបច្ចេកទេស ឬសៀវភៅបន្ទុក អង្គភាពនោះនឹងមិនទទួលបានការទូទាត់ប្រាក់ជាដាច់ខាត៕SRP

ខេត្តកំពង់ចាម​៖អ៊ុន​ ចាន់ដា​ អភិបាលខេត្ត​កំពង់ចាម​ រសៀលថ្ងៃទី២៨ ខែតុលា​ នេះ បាន​នាំយក​អំណោយ​របស់​ លោកឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការកងទ័ពជើងគោក ចែក​ជូន​កម្លាំង​ប្រជាការពារ​ និង​កម្មករអនាម័យក្រុង ចំនួន​២៨គ្រួសារ​ ដែល​បាន​ចូលរួម​ជាមួយ​អាជ្ញាធរ​ ក្នុង​ការ​ដោះស្រាយ​បញ្ហា​ជំនន់​ទឹក​ភ្លៀង​។

លោក​​ អ៊ុន​ ចាន់ដា​ បានថ្លែងអរគុណចំពោះកម្លាំងប្រជាការពារ
និង​កម្មករអនាម័យក្រុង ដែល​បាន​ចូលរួម​យ៉ាង​សកម្ម​ជាមួយ​អាជ្ញាធរ​ ​ចុះ​ធ្វើ​​ការ​កាយ​ស្តារ​លូ​ និង​សម្រួល​មុខ​ទឹក​ ក៏ដូចជា​ការ​ធ្វេី​អនាម័យ​ ដេីម្បី​ដោះស្រាយ​បញ្ហា​ជំនន់​ទឹក​ភ្លៀង​ ដែល​បាន​ជន់លិច​ផ្លូវ​ និង​​លំនៅឋាន​ពលរដ្ឋ នាពេលកន្លងមកមក​។

អភិបាលខេត្ត ក៏​បាន​អំពាវនាវ​
ដល់ពលរដ្ឋ ឲ្យ​បន្ត​ការ​ចូលរួម​ជាមួយ​អាជ្ញាធរ​ ដេីម្បី​ទប់ស្កាត់​ហានិភ័យ​ផ្សេងៗ​ ដែល​បង្ក​ឡើង​ដោយ​កត្តា​គ្រោះ​ធម្មជាតិ​។

អភិបាលខេត្ត ក៏បាន​​កោតសរសើរ​ចំពោះ​ការ​​ខិតខំ​ប្រឹងប្រែង​ និងកិច្ច​សហការ​គ្នា​ រវាង​​​​អជ្ញាធរ​ពាក់ព័ន្ធ​ ជាមួយ​មន្ត្រី​ជំនាញ​នានា​ ក្នុង​ការ​ប្រេីប្រាស់​​កម្លាំង​សរុប​ មធ្យោបាយ​សរុប​ ដើម្បី​រិះរក​វិធានការដោះស្រាយបានទាន់ពេល
វេលាផងដែរ។

គួរបញ្ចាក់ថា អំណោយរបស់ លោកហ៊ុន ម៉ាណែត និងលោកជំទាវ ចែកជូនពលរដ្ឋ ២៨គ្រួសារ ដោយក្នុងមួយគ្រួសារៗ ទទួលបានអង្ករ ២៥គីឡូ មី ១កេស ទឹកស៊ីអ៊ីវ ១យួរ ទឹកត្រី ១យួរ ទឹកសុទ្ធ ១កេស សាប៊ូ ១កញ្ចប់ និងថវិកាចំនួន ៤០.០០០រៀល៕SRP

ខេត្តស្ទឹងត្រែង៖ស្នងការនគរបសលខេត្តស្ទឹងត្រែង នៅថ្ងៃទី២៧ខែតុលាម្សិលមិញ បានចេញសេចក្ដីបំភ្លឺ បន្ទាប់ពីមានបណ្ដាញសារព័ត៌មាន ចុះផ្សាយទាក់ទងទៅនឹងករណី ក្រុមអ្នកលេងល្បែងស៊ីសង វាយដំមកលើអ្នកសារព័ត៌មានចំនួន ពីរ រូប ព្រមទាំងបានដកហូតយកទូរសព្ទចំនួនបួនគ្រឿងផងដែរ។

យោងតាមសេចក្ដីប្រកាសបានឲ្យដឹងថា៖ ស្នងការដ្ឋាននគរបាលខេត្តស្ទឹងត្រែង សូមធ្វើការបំភ្លឺជូនសាធារណជន និងអ្នកប្រើប្រាស់បណ្តាញ សង្គមហ្វេសប៊ុកទាំងអស់មេត្តាជ្រាបថា៖ ក្រោយពីទទួលបានព័ត៌មានអំពីការចុះផ្សាយរបស់សារព័ត៌មាន (ដើមរាំង) ដែលបានចុះផ្សាយកាលពីថ្ងៃទី២៦ ខែតុលា ឆ្នាំ២០២០ ដែលមានខ្លឹមសារ «ក្រុមអ្នកញៀនល្បែងវាយប្លន់យក ទូរស័ព្ទអស់ ៤គ្រឿង ពេលមកប្តឹងសមត្ថកិច្ចខេត្តស្ទឹងត្រែង គ្មានអ្នកទទួលបណ្ដឹងទេ! *។

ស្នងការដ្ឋាននគរបាលខេត្តស្ទឹងត្រែង សូមធ្វើការបំភ្លឺរឿងកាលពីថ្ងៃសៅរ៍ ទី២៥ ខែតុលា ឆ្នាំ២០២០ នៅវេលាម៉ោងប្រហែល ១៥:០០នាទី មានប្រជាពលរដ្ឋចំនួនពីរនាក់ អះអាងថាខ្លួនជាអ្នកសារព័ត៌មាន បានមកដាក់ ពាក្យបណ្តឹងនៅស្នងការដ្ឋាននគរបាលខេត្តស្ទឹងត្រែង ដោយបានជួបមន្ត្រីប្រចាំការ ត្រូវវេនប្រចាំបញ្ហាទី៤ របស់ ស្នងការដ្ឋាននគរបាលខេត្ត ហើយក៏បានសួរនាំកត់ត្រាអំពីហេតុការណ៍កើតឡើងរួម និងធ្វើការថតរូប ក៏បានណែនាំ ឲ្យពួកគាត់ត្រឡប់ទៅព្យាបាលរបួសសិន សូមឲ្យព្រឹកស្អែកថ្ងៃចន្ទ ទី២៦ ខែតុលា ឆ្នាំ២០២០ មកដាក់ពាក្យបណ្ដឹង នៅការិយាល័យជំនាញនគរបាលព្រហ្មទណ្ឌកំរិតស្រាល នៃស្នងការដ្ឋាននគរបាលខេត្តស្ទឹងត្រែង ដើម្បីជំនាញធ្វើ ការស៊ើបអង្កេត និងចាត់ការតាមនីតិវិធី ហើយពួកគេ ក៏ត្រឡប់ទៅវិញ។ លុះព្រឹកឡើងថ្ងៃទី២៦ ខែតុលា ឆ្នាំ២០២០ ការិយាល័យជំនាញនគរបាលព្រហ្មទណ្ឌកំរិតស្រាលនៃស្នងការដ្ឋាននគរបាលខេត្តស្ទឹងត្រែង មិនឃើញបុគ្គល ទាំង ០២នាក់ ត្រឡប់មកដាក់ពាក្យបណ្តឹងវិញទេ រហូតដល់មានការចុះផ្សាយរបស់សារព័ត៌មាន (ដើមរាំង) ទើបដឹង ថាពួកគាត់ទៅដាក់ពាក្យបណ្តឹងនៅសាលាដំបូងខេត្តស្ទឹងត្រែង។ ការចុះផ្សាយរបស់សារព័ត៌មាន (ដើមរាំង) គឺជាអំពើមួយ មានចេតនាធ្វើឲ្យខូចកិត្តិយសរបស់កងកម្លាំងនគរបាលជាតិ ពិសេសកងកម្លាំង នៃស្នងការដ្ឋាននគរបាលខេត្តស្ទឹងត្រែង ។

សេចក្តីដូចបានជម្រាបជូនខាងលើនេះ សូមសាធារណជន និងអ្នកលេងបណ្តាញសង្គមហ្វេសប៊ុកពិសេសសារព័ត៌មាន (ដើមរាំង) មេត្តាទទួលជ្រាបជាព័ត៌មាន ។ យើងខ្ញុំរង់ចាំទទួលស្វាគមន៍ជានិច្ច នូវការចូលរួមកែលម្អក្នុងន័យស្ថាបនាដោយស្មារតីទទួលខុសត្រូវខ្ពស់។

ក្រោយពីមានការប្រកាសរបស់ស្នងការ ខេត្តស្ទឹងត្រែង«ជនរងគ្រោះឈ្មោះ ជា ទូច អាយុ៣៥ឆ្នាំ ចាងហ្វាងគេហទំព័រ{ភ្នែកម្នាស់PNM} ដែលមានទីលំនៅឃុំទឹកថ្លា ស្រុកស្វាយអន្ទរ ខេត្តព្រៃវែង» បានចូលទៅ(ខមិន) នៅក្នុងផេកស្នងការថា៖ ការផ្សាយរបស់គេហទំព័រ«ដើមរាំង»ជារឿងពិត។
ព្រោះនៅមុនពេលក្រុមអ្នកញៀនល្បែង វាយប្លន់យកទូរស័ព្ទខ្លួន គឺខ្លួនបានរាយការណ៍ទៅលោកស្នងការខេត្ត ដើម្បីមានវិធានការបង្ក្រាបល្បែង។ ប៉ុន្តែជាក់ស្ដែងមិនមានសមត្ថកិច្ចណា?ចុះបង្ក្រាបទេ រហូតកើតជាអំពើហិង្សា ពីសំណាក់ម្ចាស់ បនល្បែងនិងបក្ខពួក មកលើពួកខ្លួន។

ជនរងគ្រោះបន្តថាក្រោយកើតហេតុភ្លាមៗ កាលពីរសៀលថ្ងៃទី២៥ខែតុលាឆ្នាំ២០២០ ពួកគេទាំង២នាក់បានមកដាក់ពាក្យបណ្ដឹងនៅស្នងការខេត្តស្ទឹងត្រែង ប៉ុន្តែមិនមានអ្នកទទួលបណ្ដឹង ឬរកយុត្តិធម៌ឱ្យទេ..!។ បន្ទាប់មកបានទៅប្ដឹងនៅអធិការក្រុងស្ទឹងត្រែង ដោយគ្មានមនុស្សនៅប្រចាំការឡើយ ទើបខ្លួនបានឡាយហ្វេសប៊ុក នៅកន្លែងទៀតផង។

ជាងនេះទៅទៀតខ្លួន បានទៅប្ដឹងនៅទីបញ្ជាការកងរាជអាវុធហត្ថខេត្តស្ទឹងត្រែងទៀត ដោយមន្ត្រីនៅទីនោះគេមិនរកខុសត្រូវឱ្យទៀត។
ដោយគេតម្រូវឱ្យទៅប្ដឹងទៅPMក្រុងស្ទឹងត្រែងវិញ ស្រាប់តែមកដល់PMក្រុងស្ទឹងត្រែង បែរជាគ្មានអ្នកប្រចាំការ ឬទទួលបណ្ដឹងទៀត ទើបនាំគ្នាទៅពេទ្យដាក់សេរ៉ូមសង្គ្រោះបឋមសិន។

ព្រោះតែដើរប្ដឹងទៅ៤កន្លែងហើយ មិនមានអ្នកទទួលបណ្ដឹង និងមិនមានចំណាត់ការ រកយុត្តិធម៌ឱ្យពួកខ្លួនមសម្រេចមកដាក់ពាក្យប្ដឹង នៅអយ្យការអមសាលាដំបូងខេត្តស្ទឹងត្រែងតែម្ដង ដោយទាមទារសំណងជំងឺចិត្តចំនួន៤ម៉ឺនដុល្លារ។

សុំបញ្ជាក់ថាករណីហិង្សានោះបានកើតឡើង កាលពីរសៀលថ្ងៃទី២៥ខែតុលា២០២០ នៅទីតាំងបនល្បែងដ៏ធំមួយកន្លែង ស្ថិតនៅជិតផ្លូវបំបែកគីឡូ៤ ភូមិរាជានុកូល សង្កាត់ស្ទឹងត្រែង ក្រុងស្ទឹងត្រែង ខណៈពួកគេចុះយកព័ត៌មាន ធ្វើឲ្យម្ចាស់ទីតាំងនិងក្រុមអ្នកញៀនល្បែង ខឹងក៏នាំគ្នាកាន់ដំបងមែកស្វាយចន្ទី មកព្រួតគ្នាវាយដំទៅលើពួកគេទាំង២នាក់ បណ្ដាលឱ្យរបួសធ្ងន់ម្នាក់ ស្រាលម្នាក់ ដោយហេតុការណ៍នោះក្រុមជនដៃដល់ បានឆក់យកទូរស័ព្ទ ពីពួកគេអស់៤គ្រឿងទៀតផង។

សូមជម្រាបថា៖ម្ចាស់ទីតាំងបនល្បែងឈ្មោះ តៃ ប៊ុងគួង (ហៅកង) ភេទប្រុសអាយុ៤៩ឆ្នាំ មានទីលំនៅភូមិព្រែក សង្កាត់ស្ទឹងត្រែង ក្រុងស្ទឹងត្រែង បានបើកល្បែងស៊ីសងជាច្រើន ខែមកហើយមិនមានសមត្ថកិច្ចណាចុះបង្ក្រាបនោះទេ។

លោក ចាន់ ថន នាយកប្រតិបត្តិនៃគេហទំព័រ«ដើមរាំង» បានថ្លែងថា៖ការផ្សាយរបស់«ដើមរាំង» កាលពីថ្ងៃទី២៦ខែតុលាឆ្នាំ២០២០ ដែលមានចំណងជើងថា៖(ក្រុមអ្នកញៀនល្បែងវាយប្លន់យកទូរស័ព្ទអស់៤គ្រឿង ពេលមកប្ដឹងសមត្ថកិច្ចខេត្តស្ទឹងត្រែង គ្មានអ្នកទទួលបណ្ដឹងទេ។

លោក ចាន់ ថន បានបន្តថាការចុះផ្សាយរបស់មានប្រភពច្បាស់លាស់ ពីជនរងគ្រោះ បានអ្នកអះអាង នឹងមានថតសំឡេងទុកជា ភស្តុតាំង ផងដែរ។ ក្នុងនោះក៏បានសម្ភាសន៍ មន្ត្រីពាក់ព័ន្ធ មុនចេញផ្សាយតាមវិជ្ជាជីវៈ មិនបានសន្និដ្ឋាន ដោយខ្លួនឯងនោះទេ។ លោកចាន់ ថន បានចាត់ទុកការចេញសេចក្ដីប្រកាស របស់ស្នងការខេត្តស្ទឹងត្រែង ជាការទម្លាក់កំហុសមកលើអ្នកសារព័ត៌មាន ដើម្បីលាងខ្លួនឯងប៉ុណ្ណោះ៕SRP

ខេត្តបាត់ដំបង៖ក្នុងប្រជុំបូកសរុបសភាពការណ៍ប្រចាំខែ​តុលា​ និងលើក​ទិសដៅភារកិច្ចខែ​វិច្ឆិកា​ឆ្នាំ​២០២០ របស់ស្នងការនគរបាលខេត្តបាត់ដំបង នៅព្រឹកថ្ងៃ​ ទី​២៨ខែ​ តុលា នេះ លោក​ឧត្តមសេនីយ៍ត្រី​ សាត​ គឹមសាន​ មេប៉ូលិសខេត្ត បានថ្លែងថា

មន្រ្តីនគរបាលរូបណា ដែលមិនបានដោះ​ស្រាយបញ្ហា ជូនប្រជាពលរដ្ឋ នៅមូលដ្ឋានបានទាន់ពេលវេលាទេ ត្រូវទទួលខុសត្រូវ។

ក្នុងកិច្ចប្រជុំលោកស្នងការ ក៏បានក្រើនរំលឹក​ដល់ថ្នាក់ដឹកនាំគ្រប់ផែនជំនាញ​ ការិយាល័យជំនាញ​ រួមទាំងអធិការន​គរបាលក្រុង​ ស្រុកត្រូវពិនិត្យពិចារណាឡើងវិញ​ ចំពោះករណីអ​សន្តិសុ​ខ​សង្គមដែលកើត​មាន​ក្នុងមូលដ្ឋាននា​ខែ​កន្លងទៅ​ ដូចជាករណី ចោរ​កម្ម​ ករណីគ្រឿងញៀន​និងក្រុមក្មេងបង្កអា​ណា​ធិបតេយ្យជាដើម​។

បើតាមស្នងការបាន​បញ្ជាក់ជូនថា ​កន្លងទៅលោក​បាន​ឱ្យធ្វើការផ្សព្វផ្សាយលេខ​ទូរ​ស័ព្ទ របស់លោកផ្ទាល់​ របស់លោក​ លោកស្រីស្នងការរង​ លោកអធិការនគរ​បាលក្រុងស្រុក​ រួមទាំងលេខទូរស័ព្ទរបស់នាយប៉ុស្តិ៍នគរបាលរដ្ឋបាលផង​ ដូច្នេះក្នុងពេលប្រជា​ពល​រដ្ឋ ទាក់ទងមកមន្រ្តីនៅមូលដ្ឋាន រូបណា ​មិនបាន​ដោះស្រាយបញ្ហានិងអន្តរាគមន៍ជូនគាត់​ទាន់​ពេល​វេលា​ទេ​ មន្រ្តីរូបនោះត្រូវតែទទួល​ខុស​ត្រូវចំពោះមុខថ្នាក់ដឹកនាំស្នងការ៕SRP

ខេត្តកំពត៖អ្នកភូមិជិត២០០គ្រួសារ រស់នៅក្នុងភូមិ ត្រពាំងគុយ ភូមិត្រពាំងថ្ម និង ភូមិត្រពាំងគគីរ ស្ថិតនៅឃុំល្បើក ស្រុកឈូក ខេត្តកំពត បានតវ៉ានឹងសុំអំពាវនាវដល់អាជ្ញាធរពាក់ព័ន្ធ ជួយដំណោះស្រាយជូន ពួកគាត់ ខណ: ដី ក្នុងសហគមន៍ របស់ពួកគាត់ត្រូវបានគេ ឆ្វៀលលក់ឲ្យទៅឈ្មួញតាមតែអំពើចិត្ត។ ដីសហគមន៍ ខាងលើ​ មានទីតាំងស្ថិតនៅ ចំណុចភ្នំត្នោត ក្នុងស្រុកឈូក ខេត្តកំពត។

ប្រភពបានឲ្យដឹងថាពលរដ្ឋ ចំនួន៦២គ្រួសារ និងមានការព្រមព្រៀងគ្នា ជាមួយនឹងអាជ្ញាធរដែនដី ដើម្បីបង្កើតជាសហគមន៍ នៅឆ្នាំ២០០៨ ប៉ុន្តែ២០២០ នេះទើបប្រជាពលរដ្ឋ មានការងឿងឆ្ងល់ សង្ស័យទៅលើអ្នកគ្រប់គ្រង និងអ្នក ការពារ ដីសហគមន៍ ដូចជាប្រធានសហគមន៍ និងលោកមេភូមិ លោកមេឃុំ បានគប់គិតគ្នាលក់ឲ្យទៅឈ្មួញមួយចំនួន។

តាមសេចក្ដីរាយការណ៍បានឲ្យដឹងថានៅថ្ងៃទី ២៧ខែ តុលាឆ្នាំ២០២០ម្សិលមិញ ក្រុមតំណាងសហគមន៍មួយចំនួនបាន ប្រមូលផ្ដុំគ្នាជាមួយ ប្រជាពលរដ្ឋ ជិត២០០គ្រួសារ ដើម្បីចុះបញ្ជីវត្តមាន ការជួយថែរក្សាដីសហគមន៍ ភ្នំត្នោត យកមក ថែរក្សាការពារ កុំឱ្យមាន បុគ្គលណា ម្នាក់ឈ្លានពាន រំលោភ បំពាន យកធ្វើជាកម្មសិទ្ធិផ្ទាល់ខ្លួន។ ដោយហេតុថា

ទំហំដីសហគមន៍ ភ្នំត្នោត ដែលមានផ្ទៃក្រឡាទំហំ៤៥៨ ហិកតា នេះ ឥឡូវត្រូវបានឈ្មួញបាន គប់គិតគ្នា ហ៊ុំព័ទ្ធយកដីមួយចំនួន ធ្វើឲ្យមានការបាត់បង់ ដោយគ្មានពលរដ្ឋ ណាម្នាក់ដឹងនោះឡើយ។

ជុំវិញពលរដ្ឋ បានចោទប្រកាន់លោក ប្រធានសហគមន៍ ជាអ្នកគ្រប់គ្រង និងថែរក្សាដីសហគមន៍ បែជាបណ្ដែតបណ្ដោយ ឲ្យពលរដ្ឋមួយចំនួននិង អាជ្ញាធរដែនដីមួយក្តាប់តូច យកទៅលក់ឱ្យក្រុមឈ្មួញ។

ដូច្នេះហើយទើបពលរដ្ឋទាំង៣ភូមិ ស្នើសុំដល់អភិបាល ខេត្តកំពតលោកជាវ តាយ ជួយរកយុត្តិធម៌ ក៏ដូចជាដំណោះស្រាយ ជូនពួកគាត់ ក្នុងការទាមទារយកដី សហគមន៍ ភ្នំត្នោត មកវិញ ដើម្បីទុកជាប្រយោជន៍រួម នឹងទុកជាសម្បត្តិរបស់រដ្ឋ។

ពាក់ព័ន្ធទៅនឹងការលើកឡើងរបស់ពលរដ្ឋនេះ«បណ្ដាញសៀមរាបប៉ុស្ដិ៍»នៅមិនទាន់ទទួលបានការបកស្រាយបំភ្លឺពីអាជ្ញាធរមូលដ្ឋាន និងប្រធានសហគមន៍ បាននៅឡើយទេដោយមិនមានលេខទូរស័ព្ទទំនាក់ទំនង៕SRP