ខេត្តសៀមរាប៖បុរសម្នាក់ត្រូវបានអាវុធហត្ថខេត្តសៀមរាប ឃាត់ខ្លួនករណីអំពើផិត។

យោងតាមរបាយការណ៍របស់អាវុធហត្ថខេត្តសៀមរាប បានបង្ហាញថា ដោយបានការអនុញ្ញាត ពីលោកឧត្តសេនីយ៍ត្រី ប៉ោ វណ្ណនិត មេបញ្ជាការកងរាជអាវុធហត្ថ ខេត្តសៀមរាប នៅវេលាម៉ោង២៣និង៣០នាទី ថ្ងៃទី៣០ ខែមករា ឆ្នាំ២០២១ កំលាំងការិយាល័យ ប្រឆាំងការជួញដូរមនុស្ស ដឹកនាំដោយលោកវរសេនីយ៍ឯក ថា ដាលុច មេបញ្ជាការរងទទួលការងារស្រាវជ្រាវនិងបង្រ្កាបបទល្មើស បានចុះដល់បន្ទប់ខុនដូ មួយកន្លែង ស្ថិតនៅភូមិគ្រួស សង្កាត់ស្វាយដង្គំ ក្រុងសៀមរាប ខេត្តសៀមរាប ខណ:នោះ កំលាំងជំនាញឃើញឈ្មោះ ហេង បូឡែន ភេទស្រីអាយុ២៥ឆ្នាំ រស់នៅសង្កាត់បឹងទំពន់ ខណ្ឌមានជ័យ រាជធានីភ្នំពេញនិងឈ្មោះហៀក ចាន់លាង ភេទប្រុស អាយុ៤២ឆ្នាំ មុខរបរមន្រ្តីរាជការ កំពុងតែនៅក្នុងបន្ទប់ជាមួយគ្នា ដោយមានការសម្របសម្រួលនីតិវិធីពីលោកព្រះរាជអាជ្ញាអមសាលាដំបូងខេត្តសៀមរាប បានធ្វើការនាំខ្លួនបុរស-ស្ត្រី ទាំង២នាក់ មកការិយាល័យជំនាញ ដើម្បីសាកសួរពាក់ព័ន្ធនឹងអំពើផិត។
ក្រោយពីការស្តាប់ចម្លើយ របស់ការិយាល័យជំនាញ និងដោយមានបញ្ជាពីលោកព្រះរាជអាជ្ញាអមសាលាដំបូងខេត្ត កំលាំងជំនាញបានធ្វើការឃាត់ខ្លួនឈ្មោះហៀក ចាន់លាង ភេទប្រុស កសាងសំណុំរឿងបញ្ជួនមកសាលាដំបូងខេត្តសៀមរាប។ ចំណែកឈ្មោះហេង បូឡែន ភេទស្រី អាយុ២៥ឆ្នាំ(ស្រីស្នេហ៍) ត្រូវបានអនុញ្ញាត អោយត្រលប់ទៅលំនៅដ្ឋានវិញ។ សូមបញ្ជាក់ថាការឈានទៅដល់ការបង្រ្កាបនេះដោយសារតែមានបណ្តឹងពីស្រ្តី
ជនរងគ្រោះឈ្មោះ ជ ករណ ភេទស្រី អាយុ៤១ឆ្នាំ មុខរបរមន្រ្តីរាជការ ទីលំនៅបច្ចុប្បន្នភូមិបឹងឈូក សង្កាត់និរោធ៍ ខណ្ឌច្បារអំពៅ រាជធានីភ្នំពេញ (ត្រូវជាប្រពន្ធស្របច្បាប់របស់ជនសង្ស័យ)៕SRP

ខេត្តត្បូងឃ្មុំ​៖ដើម្បីឲ្យសិស្សានុសិស្សជាយុវជនជំនាន់ក្រោយ ជាសសរទ្រូង ប្រទេសជាតិ បានយល់កាន់តែច្បាស់ ពីប្រវត្តិសាស្ត្រ ពិតប្រាកដ និងដំណើ រតស៊ូ របស់សម្តេចតេជោ ហ៊ុន សែន និងឥស្សរជន ទាំងអស់ ដែលបានតស៊ូលះបង់បូជាសាច់ស្រស់ ឈាមស្រស់ ប្តូរយកសុខសន្តិភាពជូនជាតិមាតុភូមិ​ លោក ជាម ច័ន្ទសោភ័ណ អភិបាលខេត្តត្បូងឃ្មុំ បានផ្តួចផ្តើមរៀបចំឲ្យមានទស្សនកិច្ចសិក្សា ដែលមានឈ្មោះថា <<គុណធម៌ប្រវត្តិសាស្ត្រ>> ទៅកាន់តំបន់ប្រវត្តិសាស្ត្រ ក្នុងខេត្តត្បូងឃ្មុំ និងខេត្តក្រចេះ ជាទីតាំងដែលផ្តើម សន្តិភាព សម្រាប់ប្រជាជនកម្ពុជាទូទាំងប្រទេស។

បើតាមលោក ជាម ច័ន្ទសោភ័ណ ចំពោះកម្មវិធី ដែលលោកបានផ្តួចផ្តើម និងបានដាក់ឈ្មោះបែបនេះ ក្នុងន័យ អោយយុវជន ជំនាន់ក្រោយបានសិក្សា ស្វែងយល់ យ៉ាងច្បាស់ នូវប្រវត្តិតស៊ូលះបង់សាច់ស្រស់ឈាមស្រស់ នៃឥស្សរជនស្នេហាជាតិ ពិសេស សម្តេចតេជោ ហ៊ុន សែន ក្នុងដំណើរ ឆ្ពោះទៅកាន់ ការផ្តួលរំលំរបបប្រល័យពូជសាសន៍ ប៉ុល ពត ដែលជាការដឹងគុណ នូវតម្លៃនៃសន្តិភាព ជាប្រវត្តិសាស្ត្រ ដោយកម្មវិធីនេះ បានចាប់ផ្តេីមកាលពីឆ្នាំ២០២០ ចំនួន ៧វគ្គ ដែលមានយុវជនចូលរួមចំនួន ២៨៤ នាក់ ដោយឡែកឆ្នាំ២០២១ នេះគ្រោងនឹងរៀបចំចំនួន១៤វគ្គ នឹងមានយុវជនចូលរួម​ ចំនួន ៧០០ នាក់ ហើយ​ឯកឧត្តមអភិបាលខេត្ត​ នឹងបន្តធ្វើជារៀងរាល់ឆ្នាំ។

ចំពោះកម្មវិធី គុណធម៌ប្រវត្តិសាស្ត្រ ក្នុងឆ្នាំ២០២១នេះ បានបន្តធ្វើឡើង ដោយនៅថ្ងៃទី៣១ ខែមករា ឆ្នាំ២០២១នេះ លោក ម៉ៅ ឌុង ប្រធាន ស.ស.យ.ក ខេត្ត និងលោក អ៉ិន ពៅសម្បត្តិ ប្រធានមន្ទីរអប់រំ យុវជន និងកីឡាខេត្តត្បូងឃ្មុំ បានអញ្ជេីញដឹកនាំយុវជនកាយរឹទ្ធិ កាកបាទក្រហម និង ស.ស.យ.ក ចំនួន ៥០ នាក់ មកពីសាលាមធ្យមសិក្សាក្នុងស្រុកក្រូចឆ្មារ ទៅសិក្សាស្វែងយល់នៅមជ្ឈមណ្ឌល ឯកសារប្រវត្តិសាស្ត្រកោះថ្ម តំបន់X16 ឃុំទន្លូង ស្រុកមេមត់ ខេត្តត្បូងឃ្មុំ  និងស្តូបវិមាន២ធ្នូ ស្រុកស្នួល ខេត្តក្រចេះ។

កម្មវិធីនេះ សហការរៀបចំ ដោយមន្ទីរអប់រំ យុវជន និងកីឡា និងសហភាពសហព័ន្ធយុវជនកម្ពុជាខេត្ត ក្រោមការផ្តួចផ្តេីមរបស់ លោក
ជាម ច័ន្ទសោភ័ណ គឺរៀងរាល់ចុងសប្តាហ៍ និងចុងខែនីមួយៗ ដេីម្បីអោយយុវជនក្នុងខេត្តត្បូងឃ្មុំ បានសិក្សា និងស្វែងយល់បន្ថែមអំពីប្រវត្តិនៃការផ្តួចផ្តេីមតស៊ូរបស់ឥស្សរជនឆ្នេីម និងជាថ្នាក់ដឹកនាំកំពូលៗ របស់កម្ពុជា ការលះបង់សព្វបែបយ៉ាងក្នុងការផ្តួលរំលំរបបប្រល័យពូជសាសន៍ ប៉ុល ពត បង្រួបបង្រួមជាតិ ស្តារកសាងអភិវឌ្ឍន៍សេដ្ឋកិច្ច សង្គម និងនាំមកនូវសុខសន្តិភាព និងការអភិវឌ្ឍលេីគ្រប់ផ្នែក គ្រប់វិស័យដូចពេលបច្ចុប្បន្ននេះ​។

កម្មវិធីទស្សនកិច្ចសិក្សានេះ ក្រោមការធ្វើបទឧទ្ទេសនាមពីលោក ផេង ពង្សរ៉ាស៊ី នាយកកម្មវិធីស្រាវជ្រាវ និងអប់រំអំពើប្រល័យពូជសាសន៍នៅកម្ពុជា ដោយផ្តោតសំខាន់លើប្រវត្តិសាស្ត្រកម្ពុជា សម័យកម្ពុជាសាធារណៈរដ្ឋ (១៩៧០-១៩៧៥) សម័យកម្ពុជាប្រជាធិប្បតេយ្យ (១៩៧៥-១៩៧៩) រណសិរ្សសាមគ្គីសង្គ្រោះជាតិកម្ពុជា ២ ធ្នូ ១៩៧៨ ពិសេសដំណើរតស៊ូ របស់ សម្តេច ហ៊ុន សែន ក្នុងការផ្តួលរំលំរបប ប្រល័យពូជសាសន៍ ប៉ុល ពត ដែលនាំមកនូវសុខសន្តិភាព និងការអភិវឌ្ឍសង្គមជាតិកម្ពុជារីកចម្រើន មកដល់សព្វថ្ងៃ។

ដោយ​ក្នុងទស្សនកិច្ចសិក្សានោះ ក្រុមយុវជនក៏បានទស្សនានូវការចាក់បញ្ចាំងខ្សែវីដេអូឯកសារចំនួន២ផងដែរ ដោយវីដេអូទី១ និយាយពីដំណើរតស៊ូរបស់សម្តេចតេជោ ហ៊ុន សែន និងទី២ វីដេអូស្តីពី រណសិរ្សសាមគ្គីសង្គ្រោះជាតិកម្ពុជា ២ ធ្នូ ១៩៧៨​៕SRP

ខេត្តព្រះវិហារ៖លោក វុធសាវី ព្រះរាជអាជ្ញា រង អមសាលាដំដូងខេត្តព្រះវិហារ នៅថ្ងៃទី៣១ ខែមករា ឆ្នាំ២០២១ នេះ បានចុះបង្ក្រាប ទីតាំងសិប្បកម្ម ដុះស្លែរ ដ៏ធំមួយកន្លែង៊

ការបង្ក្រាបនេះធ្វើឡើង ស្ថិតនៅរសៀល ថ្ងៃនេះ
ស្ថិតនៅភូមិ ផ្សារថ្មី ឃុំ ស្រយង់ ស្រុកគូលែន ខេត្តព្រះវិហារ។

ប្រភពបានដឹងថា ប្រតិបត្តិការនេះ សមត្ថកិច្ចជំនាញ បានរឹបអូស ឈើប្រណិត ជាច្រើនមានដូចជា ឈើបេង ធ្មង់ នឹងឈើកំពុងកែច្នៃមិនទាន់សម្រេច ជាច្រើនដុំ រួមនឹងម៉ាសុីនជ្រៀក ម៉ាសុីនតាប់ ម៉ូទ័រជាច្រើនផងដែរ។

លោក វុធ សាវី បានថ្លែងប្រាប់សារព័ត៌មានថាឃ្លាំងស្តុបឈើមួយនេះ ស្តុបឈើជាច្រើន ហើយបំបែកឈើទាំងនោះលាក់ទុក ជា៥កន្លែង ដើម្បីបំភ័ន្តភ្នែកសមត្ថកិច្ច។ តែទោះជាយ៉ាងណា សមត្ថកិច្ច នៅតែបង្រ្កាបទាល់តែបាន រហូតឈានដល់ការឃាត់ និងចាប់យកឈើប្រណិតទាំងនោះ មករក្សាទុក នៅផ្នែករដ្ឋបាលព្រៃឈើ ដើម្បីធ្វើការវាស់វែងដើម្បីអនុវត្តតាមផ្លូវច្បាប់៕SRP

ខេត្តសៀមរាប៖សេចក្ដីរាយការណ៍បានឲ្យដឹងថារថយន្តដឹកថ្មមួយគ្រឿង ទំនងដឹកលើសទម្ងន់ ឡើងស្ពានមិនរួចបណ្ដាលឱ្យក្រឡាប់ផ្ងារជើង។

ហេតុការណ៍បានកើតឡើងថ្ងៃទី ៣១ ខែមករាឆ្នាំ ២០២០១ នេះ ចំណុចត្រង់ស្ពានឆេះ ស្ថិតនៅភូមិបំពេញរាជ្យ ឃុំលាងដៃ ស្រុកអង្គរធំ។

ប្រភពបានដឹងថា រថយន្តជួបគ្រោះថ្នាក់ចរាចរណ៍នេះ ម៉ាក isuzu ពាក់ស្លាកលេខ ភ្នំពេញ 3 A៥៥១៤ ទិសដៅពីជើង មកត្បូងមកដល់ ចំណុចខាងលើ ឡើងស្ពានមិនរួចបានក្រឡាប់ធ្លាក់ពីលើស្ពាន តែម្ដង។

អ្នកបើកបរ សុំមិនបញ្ចេញឈ្មោះ បានឲ្យដឹងថារូបគាត់ ព្យាយាម ដាក់កំណល់កល់កង់ដែរ តែវាធ្ងន់ពេក ទើបបណ្ដាលឱ្យក្រឡាប់បែបនេះ។ ទោះជាយ៉ាងណា អ្នកបើកបរមិនមានការគ្រោះថ្នាក់នោះទេ។

ប្រជាពលរដ្ឋ បានលើកឡើងថា ផ្លូវនេះខូចខាតមិនដែលមាន ជំនាញ ពាក់ព័ន្ធ ធ្វើការកែលម្អ នោះឡើយ។

ប្រជាពលរដ្ឋ បានស្នើសុំដល់ អាជ្ញាធរដែនដីពាក់ព័ន្ធ ជួយជួសជុល ផ្លូវមួយនេះផង ដោយផ្លូវនេះ សំខាន់ខ្លាំងណាស់ សម្រាប់ ប្រជាពលរដ្ឋក្នុងស្រុកអង្គរធំ តភ្ជាប់ ទៅកាន់ស្រុកអង្គរជុំ៕SRP

ខេត្តកំពង់ចាម៖លោកខៀវ កាញារីទ្ធ ប្រធានក្រុមការងារ ថ្នាក់កណ្តាល ចុះជួយស្រុកកោះសូទិន បានក្រើនរំលឹកដល់ អាណាព្យាបាល ត្រូវនាំកូន​ចៅ​ឲ្យ​ចូលសាលារៀនបានគ្រប់ៗគ្នា។

លោកបន្តថាស្របពេល ជាមួយនឹងរាជរដ្ឋាភិបាល ដែលមានសម្ដេចតេជោ ហ៊ុន សែន ជានាយករដ្ឋមន្ត្រី បានខិតខំសាងសង់សាលារៀន មានច្រើនកម្រិត នៅតាមមូលដ្ឋាន​ ដើម្បីឆ្លើយតប ទៅនឹងតម្រូវការ របស់សិស្សានុសិស្ស កុំ​ឲ្យ​ពិបាក ក្នុងការទៅសិក្សា នៅឆ្ងាយពីផ្ទះ។ ហើយប្រការដែល​ ឲ្យកូនចៅបានសិក្សារៀនសូត្រ គឺធ្វើឲ្យពួកគាត់មានចំណេះដឹង ព្រោះថាមានតែចំណេះដឹងនេះហើយ ដែលរុញច្រាន ឲ្យពួកគាត់ឆ្លងផុត ពីភាពល្ងង់ខ្លៅ និងចាកផុតពីភាពក្រីក្រ បានផងដែរ។

លោកអំពាវនាវយ៉ាងដូច្នេះ នៅថ្ងៃទី៣១ ខែមករា​ ព្រឹកមិញ នេះ ក្នុងឱកាសអញ្ជើញជាអធិបតី ពិធីសម្ពោធ ដាក់ឲ្យប្រេីប្រាស់ អគារស្នាក់ការគណបក្សប្រជាជនកម្ពុជាឃុំល្វេ ស្រុកកោះសូទិន ខេត្តកំពង់ចាម៕SRP

ខេត្តកំពង់ចាម៖លោក អ៊ុន ចាន់ដា​ ប្រធាន​គណៈកម្មាធិការ​គណបក្សប្រជាជន​កម្ពុជា​ ខេត្តកំពង់ចាម បានថ្លែងបន្តថា ក្នុងនាមជាអាជ្ញាធរ និងជាអ្នកបម្រើ ប្រជាពលរដ្ឋ ត្រូវធ្វើអំពើល្អ ត្រូវចេះស្រឡាញ់ ប្រជាជន នឹងត្រូវខិតខំដោះស្រាយ នូវបញ្ហាប្រឈម ក៏ដូចជាសំណូមពរនានា របស់បងប្អូន ប្រជាពលរដ្ឋ ឲ្យបានល្អ។ ដោយឡែក ចំពោះបញ្ហាសន្តិសុខ ដូចជាករណី ចោរលួច ចោរប្លន់ជាដើម សមត្ថកិច្ច ទាំងអស់ ត្រូវខិតខំប្រឹងប្រែង ប្រើប្រាស់ នូវមធ្យោបាយសរុប វិធានការ ដើម្បីបំបែកសំណុំរឿង ឬក្រុមទាំងឡាយណា ដែលបង្កអសន្តិសុខ ក្នុងមូលដ្ឋាន សំដៅធ្វើយ៉ាងណា ផ្ដល់សេចក្តីសុខ ជូនប្រជាជន។

លោក អ៊ុន​ ចាន់ដា​ ក៏បានស្នើ អាជ្ញាធរឃុំ ស្រុកខិតខំ បម្រើ សេវាជូន ប្រជាពលរដ្ឋ ទាំងសេវាសន្តិសុខ សេវារដ្ឋបាល សេវាសាធារណៈ ពោលគឺធ្វើយ៉ាងណា ឲ្យពួកគាត់ ទទួលបាន សេវាយ៉ាងត្រឹមត្រូវ ស្របច្បាប់ ឆ្លើយតបទៅនឹងសំណូមពរ របស់ពួកគាត់ ឲ្យបានឆាប់រហ័ស ទាន់ពេលវេលា។

លោកថ្លែងយ៉ាងដូច្នេះ ក្នុងពិធីសម្ពោធ ដាក់ឲ្យប្រេីប្រាស់ អគារស្នាក់ការ គណបក្សប្រជាជនកម្ពុជាឃុំល្វេ ស្រុកកោះសូទិន ខេត្តកំពង់ចាម នៅព្រឹកមិញនេះ៕SRP

ភ្នំពេញ៖ព្រះមហាក្សត្រ បានចេញព្រះរាជក្រឹត្យ ត្រាស់បង្គាប់ បញ្ចប់មុខតំណែង លោកតែ គុយស៊ាង ពីរដ្ឋលេខាធិការក្រសួងសុខាភិបាល។
នេះបើយោងតាម ព្រះរាជក្រឹត្យ ដែលបណ្ដាញសៀមរាបប៉ុស្តិ៍ ទទួលបាន នៅរសៀលថ្ងៃនេះ៕SRP

ភ្នំពេញ៖នៅទីបំផុត «ទេវតាពិតជាមានភ្នែក» លោក គង់ សារុន រស់នៅក្រុងសៀមរាប ទទួលយុត្តិធម៌ ក្រោយមានវិវាទដីធ្លី រយៈពេល២៦ឆ្នាំ។

ខាងក្រោមនេះ ជាសំណេរ របស់ លោកដួង តារា រដ្ឋលេខាធិការទីស្ដីការគណៈរដ្ឋមន្ត្រី និងជាជំនួយការផ្ទាល់ សម្ដេចតេជោ ហ៊ុន សែន នាយករដ្ឋមន្ត្រី៖ ខ្ញុំសូមចូលរួមត្រេកអរជាមួយ លោក គង់ សារុន ដែលបានទទួលយុត្តិធម៌ក្រោយពេលមានវិវាទ អស់រយៈពេល២៦ឆ្នាំមកនេះ។

តាមការបញ្ជាក់ពី លោក គង់ សារុន អំពីលទ្ធផលនៃការកាត់ក្តីករណីវិវាទដីធ្លីទំហំ (១០មx២០ម) ដែលរាំរ៉ៃអស់រយៈពេល២៦ឆ្នាំកន្លងមកនេះ គឺក្រុមប្រឹក្សាសាលាឧទ្ធរណ៍បានសម្រេចអោយគាត់ឈ្នះក្តី ដោយយោងទៅលើភស្តុតាងទីតាំងដីនៃភាគីវិវាទទាំង២នៅទីតាំងផ្សេងគ្នា។ ករណីនេះបើភាគីណាមួយប្តឹងសាទុក្ខពីការសម្រេចនេះ នោះតុលាការកំពូលជាអ្នកសម្រេចចុងក្រោយម្តងទៀត។

កាលពីថ្ងៃទី ២៨ ខែធ្នូ ឆ្នាំ ២០២០ មានប្រជាពលរដ្ឋម្នាក់ឈ្មោះ គង់ សារុន (ប្រុស) ជាអតីតកងទ័ពភូមិភាគ៤ បានដាក់ពាក្យគោរពស្នើសុំអន្តរាគមន៍មក សម្តេចតេជោនាយករដ្ឋមន្រ្តី ដោយសារមានភាគីម្ខាងទៀតឈ្មោះ (ស៊ិន យឿម) តំណាងដោយឈ្មោះ នង ចន្នី បានប្ដឹងទាមទារដីកម្មសិទ្ធិស្របច្បាប់របស់ គង់ សារុន ដែលគាត់មានប្លង់រឹងកាន់កាប់និងកំពុងរស់នៅមកទល់សព្វថ្ងៃ ទៅតុលាការគ្រាប់ជាន់ថ្នាក់ ធ្វើអោយគាត់ចាញ់ក្ដីទាំងអយុត្តិធម៌ ចាប់តាំងពីឆ្នាំ១៩៩៥ រហូតដល់ឆ្នាំ២០២១ ។ ទោះបីមានការប្តឹងផ្តល់បែបនេះក៏ដោយក៏ លោក គង់ សារុន នៅតែបន្តរស់នៅកាន់កាប់លើដីនេះរហូតមកទល់សព្វថ្ងៃ ព្រោះគាត់អះអាងថាជាដីរបស់គាត់ពិតប្រាកដដែលមានកម្មសិទ្ធិប្លង់រឹងកាន់កាប់ទៀតផង។ ដោយមានការភ័យខ្លាចបើរឿងក្តីនេះបែរជាចាញ់ភាគីម្ខាងទៀតទាំងស្រុងមែននោះ គឺគាត់មិនដឹងជាត្រូវនាំប្រពន្ធនិងកូនទាំង៧ ទៅណាទីណាឡើយ។ នៅថ្ងៃទី ២៩ ធ្នូ ២០២០ ខ្ញុំបានអញ្ជើញគាត់មកជួបពិភាក្សានៅទីស្តីការគណៈរដ្ឋមន្រ្តី។

តាមការបំភ្លឺរបស់ លោក គង់ សារុន បញ្ជាក់ថា កាលពីឆ្នាំ១៩៩២ គាត់បានរស់នៅកាន់កាប់ អាស្រ័យផលលើទីតាំងដីកម្មសិទ្ធិទំហំ (១០ ម៉ែត្រ X ២០ ម៉ែត្រ) ដែលមានប្រពន្ធ និងកូន ៧នាក់កើតនៅលើទីតាំងដីដែលស្ថិតនៅ ភូមិសាលាកន្សែង សង្កាត់ស្វាយដង្គំ ក្រុងសៀមរាប ខេត្តសៀមរាប (មានពាក្យស្នើសុំកាន់កាប់ប្រើប្រាស់ដីធ្លី ចុះថ្ងៃទី០១ ខែធ្នូ ឆ្នាំ១៩៩៤, មានបង្កាន់ដៃទទួលពាក្យលេខ ១០៤៣ ចុះថ្ងៃទី១៥ ខែធ្នូ ឆ្នាំ១៩៩៤) ។

ក្រោយមកមន្ទីរសុរិយដីខេត្តសៀមរាប បានចុះធ្វើប័ណ្ណកម្មសិទ្ធិជាប្រព័ន្ធ និងបានចេញវិញ្ញាបនបត្រសម្គាល់ម្ចាស់អចលនវត្ថុលេខ (17100208-0479) ចុះថ្ងៃទី២៧ ខែធ្នូ ឆ្នាំ២០១២ ផ្តល់ជូនលោក គង់ សារុន ត្រឹមត្រូវតាមច្បាប់។

កន្លងមក ឈ្មោះ គង់ សារុន បានចាញ់ក្តីនៅសាលាតំបូង និងសាលាឧទ្ធរណ៍ (១៦ មិនា ២០១៧) រួចហើ់យ។ ហើយនៅចុងក្រោយគឺតុលាការកំពូលត្រូវការអោយពិនិត្យលើភស្តុតាងបញ្ជាក់អំពីទីតាំងវិវាទ។

នៅថ្ងៃទី ១៤ កុម្ភ: ២០១៨ មន្ទីរសុរិយោដីខេត្តសៀមរាប បានចេញលិខិតលេខ (១៥៥ ដនសស.សរ) ដោយបញ្ជាក់ថា តាមផែនទីបង្ហាញទីតាំងដីស្នើសុំលេខ (AII 0066) មានទំហំ (២៦៥៥ ម៉ែត្រការ៉េ) របស់ នង ចន្នី និងទីតាំងនៃក្បាលដីលេខ (479) ទំហំ (២២៣ ម៉ែត្រការ៉េ) របស់ ឈ្មោះ គង់ សារុន គឺស្ថិតនៅទីតាំងផ្សេងគ្នា។

លោក គង់ សារុន បានដាក់ជូនលិខិតបញ្ជាក់ពីមន្ទីរដែនដី លេខ ១៥៥ ដនសសសរ ចុះថ្ងៃទី ១៤ កុម្ភះ ឆ្នាំ ២០១៨ ទៅតុលាការ។ តុលាការកំពូលក៏បានអោយសាលាឧទ្ធរណ៍ជំនុំជំរះករណីនេះឡើងវិញ។ នៅថ្ងៃទី ២៧ ខែ មករា ឆ្នាំ ២០២១ កន្លងមកនេះ សាលាឧទ្ធរក៏បានប្រកាសសាលដីការដោយសម្រេចអោយភាគី លោក គង់ សារុន ឈ្នះក្តីដោយច្រានចោលការទាមទាររបស់ដើមចោទ។

លោក គង់ សារុន និងភរិយា ព្រមទាំងកូនៗទាំង៧នាក់ បានគោរពអរគុណដល់ សម្តេចតេជោ ហ៊ុន សែន នាយករដ្ឋមន្រ្តី យ៉ាងជ្រាលជ្រៅបំផុត ដែលបានជួយផ្តល់ យុត្តិធម៌ដែលគាត់ បានទន្ទឹងរង់ចាំអស់រយៈពេល២៦ឆ្នាំកន្លងមកនេះ។

ខ្ញុំបាទផ្ទាល់ សូមគោរពថ្លែង អំណរគុណ សម្តេចតេជោ ដែលបានផ្តល់ឱកាស អោយខ្ញុំ បាទបានជួយសម្របសម្រួល ដោះស្រាយបញ្ចប់វិវាទជូនប្រជាពលរដ្ឋ ក្រៅប្រព័ន្ធ តុលាការ ឈរលើគោលការណ៍ ឈ្នះឈ្នះ សម្តេចទទួលបានជោគជ័យ។
ខ្ញុំក៏សូមអរគុណ ចំពោះកិច្ចសហការ ល្អជាមួយអាជ្ញាធរពាក់ព័ន្ធ ទាំងអស់ ដែលបានចូលរួមផ្តល់នូវភស្តុតាង និងការបញ្ជាក់ផ្សេងៗ ចំពោះករណី ប្រជាពលរដ្ឋ នេះ ដើម្បីរួមចំណែកដោះស្រាយ បញ្ចប់វិវាទ ដែលមារយៈពេល២៦ឆ្នាំ មកនេះ បានជោគជ័យជូនប្រជាពលរដ្ឋ៕SRP

ខេត្តរតនគិរី៖យោងតាមមានសេចក្តីរាយការណ៍ ពីប្រជាពលរដ្ឋ បានប្រាប់អោយដឹងថា ល្បែងស៊ីសងដុះស្លែ ដូចជាជល់មាន់ អាប៉ោង យូរគីហែកក្រដាស បានបើកលេងយ៉ាងគគ្រឹកគគ្រេង នៅចំណុចចំការស្វាយចន្ទី ភូមិអូរជុំ ឃុំអូរជុំ នឹងភូមិបរញ៉ុក ឃុំឯកភាព ស្រុកអូរជុំខេត្តរតនគិរី។

ប្រជាពលរដ្ឋបានបន្តទៀតថា ការបើកអោយមានល្បែងស៊ីសង ខុសច្បាប់នេះ គឺគ្មានឡើយការបង្ក្រាបទប់ស្កាត់ពីសំណាក់ អាជ្ញាធរ សមត្ថកិច្ចនោះឡើយ។

មេល្បែងនៅចំណុចភូមិអូរជុំ មានឈ្មោះលោក ពិសី នឹងមេល្បែងនៅបរញ៉ុកឈ្មោះ លោក ខេង។

ពាក់ព័ន្ធល្បែងស៊ីសង នេះ ប្រជាពលរដ្ឋសង្ឃឹមថា លោកយិន ចំណាន ស្នងការនគរបាលខេត្តរតនគិរី នឹងមានវិធានការបង្ក្រាបជាក់ជាពុំខានឡើយ៕SRP

ខេត្តសៀមរាប៖បុរសម្នាក់បើកម៉ូតូត្រូវបានរថយន្តបុកចំពេញទំហឹង បណ្ដាលឱ្យស្លាប់ភ្លាមៗ។

ហេតុការណ៍បានកើតឡើង នៅវេលាម៉ោង០៥និង២០ល្ងាច ថ្ងៃទី៣០មករា ២០២១ នៅចំណុចភូមិរការកំបុត ឃុំ ត្រពាំងធំ ស្រុប្រាសាទបាគង លើកំណាត់ផ្លូវជាតិលេខ៦រវៀង រវាងរថយន្តនិងម៉ូតូ បើកបញ្ច្រាស់ទិសគ្នា។

សមត្ថកិច្ចបានឲ្យដឹងថា ករណីនេះ ឈ្មោះម៉ែន សុខា អាយុ៤៧ឆ្នាំ ភេទប្រុសមុខរបរធ្វើស្រែរស់នៅភូមិស្វាយជ័យ ឃុំត្រពាំងធំស្រុកប្រាសាទបាគង បើកបរម៉ូតូ ស្លាប់។ ម៉ូតូសេរីស្មាក់សៀមc១១០ពណ៌ខ្មៅស្លាកលេខ សៀមរាប១Q៤៨៧៥ បើពីកើតទៅលិច ទៅបុកជាមួយរថយន្តកូរ៉េដឹកទឹកសុទ្ធពណ៌ស ស្លាកលេខសៀមរាប ៣A១៥៣៣ ដែលបើកបរពីលិចទៅកើត។ ករណីនេះ ម្ចាស់រថយន្ត រត់គេចខ្លួនបាត់។ មូលហេតុ បណ្តាលមកពីរថយន្តបើកល្បឿនលឿនខ្វះការប្រុងប្រុងយ័ត្ន។ សមត្ថកិច្ចបាននាំយកវត្ថុតាង ទៅរក្សាទុកនៅអធិការដ្ឋាននគរបាលស្រុកប្រាសាទបាគង ដើម្បីរង់ចាំការដោះស្រាយ៕SRP

ខេត្តត្បូងឃ្មុំ៖លោក ជាម ច័ន្ទសោភ័ណ  អភិបាលខេត្តត្បូងឃ្មុំ បានអះអាងថា កំណើនសេដ្ឋកិច្ច មានការកើនឡើង ដោយមានការចូលរួម ពីវិស័យចំនួន០៣សំខាន់ៗរួមមាន វិស័យកសិកម្ម៣០.៩% ឧស្សាហកម្ម ២៦.១%  និងសេវាកម្ម៤២.៩%។

អភិបាលខេត្តបញ្ជាក់ថា ដោយអនុវត្តតាម កម្មវិធីនយោបាយ និងយុទ្ធសាស្ត្រ ចតុកោណដំណាក់កាលទី៤ របស់រាជរដ្ឋាភិបាល កម្ពុជា ខេត្តត្បូងឃ្មុំ ទទួលបានកំណើន សេដ្ឋកិច្ច ប្រមាណជា១.២០៤លានដុល្លារអាមេរិក ទំនិញនាំចេញ នាំចូលមានប្រមាណ ៤៥៥លានដុល្លារ (ការនាំចេញប្រមាណ៣៥៣លានដុល្លារ និងការនាំចូល ១០២លានដុល្លារ)។

លោកបញ្ជាក់យ៉ាងដូច្នេះ នៅក្នុងកិច្ចប្រជុំ នាថ្ងៃទី៣០ ខែមករា​ ឆ្នាំ​២០២១​ ព្រឹកមិញនេះ ​នៅសាលាខេត្តត្បូងឃ្មុំ ក្នុងឱកាស លោក ជាម យៀប ប្រធានគណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្ម នៃរដ្ឋសភា ដឹកនាំគណៈប្រតិភូ ប្រជុំ និងពិភាក្សា ការងារជាមួយ
ដោយមានការ​ចូលរួមពី លោក អ៊ុក សារ៉ាវុធ អគ្គសវនកររងនៃអជ្ញាធរសវនកម្មជាតិ លោក ជាម ច័ន្ទសោភ័ណ  អភិបាលខេត្ត លោក ស៊ាក ឡេង ប្រធានក្រុមប្រឹក្សាខេត្ត និងមន្ទីរ​អង្គភាព​ពាក់ព័ន្ធ​ជុំវិញខេត្ត​ផងដែរ​។

លោក ជាម យៀប បានមានប្រសាសន៍ថា៖ គោលបំណង នៃការចុះបំពេញ បេសកកម្មនាថ្ងៃនេះ គឺដើម្បីក្តាប់សភាពការណ៍ ទូទៅ បញ្ហាប្រឈម និងទិសដៅរបស់ ខេត្តត្បូងឃ្មុំ ព្រមទាំងស្ថាប័នពាក់ព័ន្ធ ដែលទាក់ទងការ ទទួលខុសត្រូវ លើវិស័យ ទទួលបន្ទុករួមមាន ហិរញ្ញវត្ថុ ធនាគារ និងសវនកម្មរបស់គណៈកម្មការទី២ នៃរដ្ឋសភា ពិសេសស្វែងយល់ ពីបញ្ហាប្រឈម នៃការរីករាលដាលជម្ងឺកូវីដ-១៩។

លោក ជាម យៀប បានថ្លែងនូវការកោតសរសើរនិងវាយតម្លៃខ្ពស់ ចំពោះរដ្ឋបាលខេត្ត ដែលមានអភិបាលខេត្ត ប្រធានក្រុមប្រឹក្សាខេត្ត ជាក្បាលម៉ាសុីនដឹកនាំដ៍ខ្លាំង និងមន្ត្រីរាជការជុំវិញខេត្ត បានខិតខំ ប្រមូល ថវិកាជាតិ បានយ៉ាងល្អប្រសើរ ក្នុងការរួមចំណែក ជួយលើកស្ទួយសេដ្ឋកិច្ចជាតិ អោយមានការរីកចម្រើន ឡើង ក៏ដូចជាជីវភាព របស់ ប្រជាពលរដ្ឋ ក្នុងកំឡុងពេលជួបការលំបាក ពីការរីករាលដាលជំងឺកូវីដ-១៩ ដែលមិនត្រឹមតែ ប្រទេសកម្ពុជាប៉ុណ្ណោះទេ គឺបណ្តាប្រទេសអាស៊ាន និង ពិភពលោក កំពុងជួបបញ្ហា ប្រឈម ប៉ះពាល់ដល់សេដ្ឋជាតិនិងអាយុជីវិត។ ដោយឡែក​ ចំពោះសំណូមពរ របស់ខេត្ត លោកជាម យៀប និងគណៈកម្មការជំនាញ នៃរដ្ឋសភា នឹងធ្វើរបាយការណ៍ ជូនសម្តេច ប្រធានរដ្ឋសភា ដើម្បីដាក់ជូន រាជរដ្ឋាភិបាល ធ្វើការដោះស្រាយ៕SRP

ភ្នំពេញ៖លោក ហ៊ុយ វណ្ណៈ រដ្ឋលេខាធិការក្រសួងមហាផ្ទៃនិងជាប្រធានសហភាពសហព័ន្ធអ្នកសារព័ត៌មានកម្ពុជា បានបញ្ជាក់តាមរយៈទំព័រហ្វេសប៊ុក ផ្ទាល់ខ្លួននៅរសៀលថ្ងៃនេះថា
«សេរីភាពសារព័ត៌មាន+សីលធម៌ទទួលខុសត្រូវ»។

លោក ហ៊ុយ វណ្ណៈ បានលើកឡើងថា៖
មុននេះ បងប្អូនអ្នកកាសែតបានលើក៣ចំណុចសួរខ្ញុំ៖
១- ឯកឧត្តមរដ្ឋមន្ត្រីក្រសួងព័ត៌មាន៖ រំលឹកដល់អ្នកសារព័ត៌មាន កុំទៅថត ឡាយ យកព័ត៌មាន នៅក្នុងដែនសមត្ថកិច្ចរបស់អជ្ញាធរកំពុងបំពេញកិច្ចការ… បើមិនស្តាប់ការណែនាំទេ សមត្ថកិច្ចមានសិទ្ធិចាប់ឃាត់ខ្លួន។
២- ឯកឧត្តមស្នងការនគរបាលរាជធានីភ្នំពេញ ណែនាំដល់មន្ត្រីអនុវត្តច្បាប់ទាំងអស់ ធ្វើការងារឲ្យបានច្បាស់លាស់ ហាមអ្នកសារព័ត៌មានមួយចំនួនចូលថត ឬឡាយ សកម្មភាពទាំងឡាយណា ដែលសមត្ថកិច្ចកំពុងអនុវត្តការងារ ឬកំពុងតាមដានស្រាវជ្រាវកំណត់មុខសញ្ញាល្មើស ឬបង្ក្រាបបទល្មើស។ អ្នកបំពានការណែនាំនេះ សមត្ថកិច្ចនឹងចាត់ការតាមវិធានការច្បាប់ ក៏ដូចជាច្បាប់សារព័ត៌មាន។
៣- អង្គការសារព័ត៌មានខ្លះ បានសម្តែងមតិថា «វិធានការខាងលើ» ជាការរិតត្បិតសេរីភាពសារព័ត៌មាន។ ហើយកាសែតសួរខ្ញុំថា តើយល់យ៉ាងដូចម្តេច? ចម្លើយជាយោបល់ខ្ញុំគឺមានដូចតទៅ៖
• នេះគឺជាកិច្ចការ២ក្នុងគោលដៅតែមួយ គឺការពង្រឹងការអនុវត្តច្បាប់ ដើម្បីសុខសុវត្តិភាព និងសេចក្តីថ្លៃថ្នូរទាំងអស់គ្នា។ សូម្បីតែជនសង្ស័យ ក៏មានសិទ្ធិពេញលេញក្នុងការការពារ «ភាពគ្មានទោសរបស់ខ្លួន» ដែរ។ ដូច្នេះ ពួកគេ មិនគួរត្រូវបានកាត់ទោសដោយមហាជន តាមរយៈ សារព័ត៌មានដែល ឡាយ ចេញនោះទេ។ ដូច្នេះ ទាំងអស់គ្នាត្រូវគោរពសិទ្ធិនេះ។
• ត្រូវរៀននិយាយគ្នា រៀនស្តាប់គ្នា និងគោរពតួនាទីផ្សេងគ្នា។ ការស្នើសុំសហការ គឺជាវិធីល្អ និងថ្លៃថ្នូរបំផុត។ អ្នកសារព័ត៌មាន មានវិជ្ជាជីវៈ គេធ្វើបែបនេះ។ បើអ្នកចេះស្តាប់សមត្ថកិច្ច នោះសមត្ថកិច្ច ក៏អាចស្តាប់អ្នកបានដែរ។ ហើយនឹងគ្មានករណី ឡាយ ទាំងកំរោល ឬចាប់ដោយកំរោលនោះទេ។
• ខ្ញុំបានលើកបន្ថែមចំណុចមួយ សូម្បីតែនៅ សហរដ្ឋអាមេរិក ថ្មីៗនេះ គឺជាមេរៀនជាក់ស្តែងអំពី «ប្រជាធិបតេយ្យ + នីតិរដ្ឋ»។ អាមេរិកនិយាយថា៖ ប្រជាធិបតេយ្យ សេរី។ ប៉ុន្តែលើការជាក់ស្តែង អាមេរិក «អនុវត្តច្បាប់»។ សូម្បីតែ បណ្តាញព័ត៌មានផ្ទាល់ខ្លួនរបស់ ប្រធានាធិបតី ដែលមាន Facebook & Twitter ក៏ត្រូវបានបិទចោលដែរ ព្រោះគេបារម្ភថា ភាពអណាធិបតេយ្យ និង ហិង្សា អាចញុះញុងចេញពីបណ្តាញព័ត៌មាននេះ។

សូមជម្រាបថាកាលពីថ្មីៗនេះ លោកខៀវ កាញារីទ្ធ រដ្ឋមន្ត្រីក្រសួងព័ត៌មាន បានរំលឹកដល់អ្នកសារព័ត៌មានទាំងអស់ កុំទៅថត យកព័ត៌មាន នៅក្នុងដែនសមត្ថកិច្ចរបស់អាជ្ញាធរ ដែលហាមឃាត់ កំពុងបំពេញកិច្ចការងារ ព្រោះខុសវិជ្ជាជីវ:សារព័ត៌មាន បើនៅមិនស្តាប់ការហាមឃាត់នោះទេ សមត្ថកិច្ចមានសិទ្ធិ ចាប់ឃាត់ខ្លួន អ្នកសារព័ត៌មាន ពេលនោះតែម្តង។
ដូច្នេះអ្នកសារព័ត៌មាន ត្រូវយល់បានច្បាស់ពីកិច្ចការងារនេះ ដោយកុំគិតថាខ្លួនជាអ្នកសារព័ត៌មាន មានសិទ្ធិ ថតបានគ្រប់ទីកន្លែងនោះទេ ត្រូវយល់ពីការងាររបស់សមត្ថកិច្ច។
រដ្ឋមន្ត្រីក្រសួងព័ត៌មាន មានប្រសាសន៍ បែបនេះក្នុងកិច្ចប្រជុំប្រចាំសប្ដាហ៍ ជាមួយថ្នាក់ដឹកនាំអគ្គនាយកដ្ឋានទាំង៥ នៅព្រឹកថ្ងៃទី១៨ ខែមករា ឆ្នាំ ២០២១នេះ៕SRP