ខេត្តកំពង់ចាម៖លោក អ៊ុន​ ចាន់ដា​ អភិបាលខេត្តកំពង់ចាម​ និង​ជា​ប្រធាន​គណកម្មការ​ខេត្ត​ប្រយុទ្ធ​ប្រឆាំង​នឹង​ជំងឺ​កូវីដ​-១៩​ និង​លោក ខ្លូត​ ផន​ ប្រធាន​ក្រុមប្រឹក្សា​ខេត្ត​ រួមនឹង​អភិបាល​រង​ នៅរសៀលថ្ងៃទី១៩ ខែមីនា នេះ បានទទួលអំណោយពីសប្បុរសជន។

លោក អ៊ុន ចាន់ដា បាន​ថ្លែងអំណរគុណ​ចំពោះ​ ក្រុមហ៊ុន​ ក៏ដូចជា​សប្បុរសជន​នានា​​ ដែល​បាន​ជួយ​ឧបត្ថម្ភ​ ទាំង​ថវិកា​ និងផ្នែកសម្ភារជូន​ដល់គណៈកម្មការ​ប្រយុទ្ធ​ ប្រឆាំងនឹងជំងឺកូវីដ-១៩ នាពេលនេះ ជាការរួមចំណែក យ៉ាងសំខាន់ ជួយរំលែកទុក្ខលំបាកការខ្វះខាត របស់ពលរដ្ឋ ជាពិសេស​ ពលករចំណូលស្រុកត្រឡប់មកពីប្រទេសថៃកំពុងធ្វើចត្តាឡីស័ក៕

​គួរ​បញ្ជាក់​ថា​ ក្នុង​ពិធី​ប្រគល់​ និងទទួល​អំណោយ​នេះ​ ដោយ​សាខា​ពន្ធដារ​ខេត្តកំពង់ចាម​ បានជួយ​ឧបត្ថម្ភ​ ចំនួន​២លានរៀល​. ​ក្រុមហ៊ុន​ អាន​ម៉ាឌី​គ្រុប​ ជួយ​ឧបត្ថម្ភ​ ១០លានរៀល​. ក្រុមហ៊ុន​ ខេស៊ី​ ៤ស្ការ​ ជួយ​ឧបត្ថម្ភ​ ៤លានរៀល​និង​ម៉ាស​​ចំនួន​១ម៉ឺន​ម៉ាស.​ ក្រុម​ហ៊ុន​ដីឡូត៍​មិត្ត​អិត​ ជួយ​ឧបត្ថម្ភ​១លានរៀល​. និង​ក្រុមហ៊ុន​ដីឡូត៍​ ហេង​ ហេង​ ជួយ​ឧបត្ថម្ភ​ទឹក​បរិសុទ្ធ​ចំនួន​១៥០​យួរ​និងមីជាតិ៥០កេស៕SRP

ខេត្តសៀមរាប៖មន្ត្រីមួយរូបបានថ្លែងថាស្ត្រីដែលនគរបាល ឃាត់ខ្លួន ករណីចែកចាយផលិតផលក្លែងម៉ាកNNP នៅផ្សារលើធំថ្មីត្រូវបានដោះលែងវិញហើយ។

លោកជ្រិញ គឹមនី នាយការិយាល័យនគរបាលប្រឆាំងបទល្មើសសេដ្ឋកិច្ចខេត្ត បានប្រាប់អ្នកកាសែត តាមទូរស័ព្ទ នៅថ្ងៃទី១៩ ខែមីនា ព្រឹកមិញថា ស្ត្រីឈ្មោះ បូ រ៉ាណា ម្ចាស់ទីតាំងចែកចាយផលិតផលក្លែងម៉ាកNNP ក្នុងផ្សារលើធំថ្មី នៃក្រុងសៀមរាប ដែលបានឃាត់ខ្លួន ក្នុងប្រតិបត្តការបង្ក្រាបផលិតផលក្លែកម៉ាក កាលពីថ្ងៃទី១៨ខែមីនា ម្សិលមិញនេះ បានដោះលែងវិញហើយក្រោយធ្វើកិច្ចសន្យា។
លោកបន្តថា បន្ទាប់ពីសាកសួរនិងស្តាប់ចម្លើយឃើញថា ស្រ្តីរូបនេះមិនចេះអក្សរ ហើយផលិត ផលទាំងនោះពុំបានទិញពីអ្នកណា គឺរូបគាត់ទិញឡេផ្សេងៗ មកផ្សំដោយខ្លួនឯង។ មួយវិញទៀត រូបគាត់សារភាពថា ដោយឃើញផលិតផលម៉ាកNNP លក់ដាច់ខ្លាំងរូបគាត់ក៏គុបពីម៉ាកNNPមកបិទលើប្រអប់ឬកំប៉ុងរបស់ខ្លួនដើម្បីលក់ តែពុំបានដឹងថា ប៉ះពាល់ដល់ក្រុមហ៊ុនដាណា ទ្រី។

លោកបន្ថែមថា ដោយឃើញស្ថានភាពជាក់ស្តែង ទើបលោកស្រីទ្រី ដាណា ម្ចាស់ក្រុមហ៊ុនដាណា ទ្រី សម្រេចបញ្ឍប់ការប្តឹងផ្តល់ ហើយអោយធ្វើកិច្ចសន្យា ឈប់ចែកចាយផលិត ផល NNPក្លែងម៉ាកតទៅទៀត។

សូមបញ្ជាក់ថា នៅព្រឹកថ្ងៃទី១៨ខែមីនាឆ្នាំ ២០២១ នៅចំណុចក្នុងផ្សារលើធំថ្មី ស្ថិតក្នុងភូមិដកពោធិ៍ សង្កាត់ស្លក្រាម ក្រុងសៀមរាប សមត្ថកិច្ចនគរបាលប្រឆាំងបទល្មើសសេដ្ឋកិច្ចខេត្ត ដែល ដឹកនាំសម្រួលនិតិវិធីដោយលោក ថេង សំ ណាង តំណាងអយ្យកាអមសាលាដំបូងខេត្តសៀមរាប លោកឧត្តមសេនីយ៍ត្រីម៉ក់ ធារ៉ា ស្នងការងទទួលបន្ទុកបង្ក្រាបបទល្មើស និងមានការចូល រួមពីមន្ត្រីនគរបាលប៉ុស្តិ៍មូលដ្ឋាន បង្ក្រាបការចែកចាយ ផលិតលផក្លែងម៉ាក ដោយឃាត់ខ្លួនម្ចាស់ទីតាំងឈ្មោះបូ រ៉ាណា ភេទស្រី យកទៅធ្វើការសាកសួរ។

សមត្ថកិច្ចក្នុងហេតុការណ៍ បញ្ជាក់ថា មុនពេលឈានដល់ការបង្ក្រាបនេះ ក្រុមហ៊ុន ដាណា ទ្រី បានណែនាំដល់ម្ចាស់ទីតាំងខាងលើ អោយបញ្ឍប់សកម្ម ភាពក្លែងម៉ាកផលិតផលNNPយកទៅចែកចាយ។ ប៉ុន្តែម្ចាស់ទីតាំងមិនអនុវត្តតាម ហើយនៅតែបន្តចែកចាយ ទើបក្រុមហ៊ុនដាណាទ្រី ប្តឹងទាមទារសំ ណង១០ម៉ឺនដុល្លារ និងឈានដល់បង្ក្រាបបែបនេះ។ទោះបីយ៉ាងណា ស្ត្រីដែលរងបណ្តឹងពីឈ្មោះទ្រី ដាណាដោយទាមទារសំណង១០ម៉ឺនដុល្លារ រហូតប៉ូលិសឃាត់ខ្លួននោះ ពេលនេះត្រូវបានបញ្ចប់ និងមានសេរីភាពដូចធម្មតាវិញហើយ៕SRP

ភ្នំពេញ៖សម្តេចហ៊ុន សែន នាយករដ្ឋមន្រ្តីនៅព្រឹកថ្ងៃទី ១៩ ខែ មីនា ឆ្នាំ ២០២១នេះ បានដំណើរអញ្ជើញចុះទៅពិនិត្យមន្ទីរពេទ្យនគរទេព ដែលមានទីតាំងស្ថិតនៅសង្កាត់ព្រៃស ខណ្ឌដង្កោ រាជធានីភ្នំពេញ ដែលគ្រោងនឹងយកមន្ទីរពេទ្យនេះសម្រាប់ព្យាបាលអ្នកជំងឺកូវីដ-១៩។

ការរៀបចំមន្ទីរពេទ្យ «នគរទេព» មានផ្ទៃដីទំហំ១ហិកតា ៥០អា ដែលមានអគារទំហំ ២៥,០០០ម៉ែត្រការេ កំពស់៥ជាន់ មានប្រព័ន្ធ ទឹក ភ្លើងល្អដែលបំពាក់ដោយប្រព័ន្ធសទ្បា (solar) និងមានម៉ាស៊ីនភ្លើងបំរុងកម្លាំង ៣៥០ KWA បំពាក់ដោយម៉ាស៊ីនផ្លាស់ប្ដូរភ្លើងដោយស្វ័យប្រវត្តិទៀតផង។

មន្ទីរពេទ្យនគរទេព អាចដាក់គ្រែសម្រាប់អ្នកជំងឺបានប្រមាណ ៥០០គ្រែ ដែលអាចរៀបចំទៅតាមតម្រូវការនៃផ្នែកផ្សេងៗដូចជា ផ្នែកសង្គ្រោះបន្ទាន់បាន៨០គ្រែ និងផ្នែកជំងឺធម្មតាបាន៤២០គ្រែ។
មន្ទីរពេទ្យនេះក៏មានបំពាក់គ្រឿងឧបករណ៍វេជ្ជសាស្ត្រ និងឧបករណ៍ផ្សេងៗតាមស្តង់ដារជាមន្ទីរពេទ្យសម្ពព និងព្យាបាលរោគស្ត្រីផងដែរ៕

ទន្ទឹមនឹងការយកចិត្តទុកដាក់របស់ប្រមុខរាជរដ្ឋាភិបាល សូមបងប្អូនប្រជាពលរដ្ឋ ចូលរួមទប់ស្កាត់ការរីករាលដាលជំងឺឆ្លងកូវីដ១៩ គឺត្រូវពាក់ម៉ាសគ្រប់ៗគ្នានៅតាមទីសាធារណៈ ឧស្សាហ៍ដុសលាងសម្អាតដៃ មុខមាត់ត្រចៀក ជាមួយសាប៊ូ ចិល ឬទឹកអាល់កុល ហើយត្រួវរក្សាគម្លាតអោយឆ្ងាយពីគ្នាយ៉ាងហោចណាស់ចម្ងាយជាង១ម៉ែត្រកន្លះពីគ្នា៕SRP

ភ្នំពេញ៖សម្តេច ហ៊ុន សែន នាយករដ្ឋមន្ត្រីនៅព្រឹកថ្ងៃសុក្រ ទី១៩ ខែមីនា ឆ្នាំ២០២១នេះ បានអញ្ជើញពិនិត្យ មើលដំណើរការជួសជុល កែលម្អរស្តូបព្រះបរមរូបព្រះបរមរតនកោដ្ឋ អតីតព្រះមហាក្សត្រនៃកម្ពុជា ដែលស្ថិតនៅលើសួនច្បារខាងកើតវិមានឯករាជ្យ ដែលកំពុងតែដំណើរការជួសជុលកែលម្អ មកដល់ពេលនេះគឺសម្រេចបានប្រមាណ៩៥%។ ដំណើរការជួសជុលកែលម្អ នេះគ្រោងនឹងធ្វើអោយបានចប់រួចរាល់នៅចុងខែមីនាឆ្នាំ ២០២១ នេះ។

សូមបងប្អូនប្រជាពលរដ្ឋ ចូលរួមថែរក្សាសម្បត្តិសាធារណៈ អោយបានល្អរួមទាំងសួនច្បារ ជាពិសេសសូមចូលរួមថែរក្សា ស្តូបព្រះបរមរូបព្រះបរមរតនកោដ្ឋ អតីតព្រះមហាក្សត្រនៃព្រះរាជាណាចកក្រកម្ពុជាយើង អោយបានស្ថិតនៅល្អគង់វង្សយូរអង្វែង៕SRP

ខេត្តកំពង់ចាម៖សម្ព័ន្ធ​​យុវជន​ស្រលាញ់​សន្តិភាព​សាខា​​ខេត្តកំពង់ចាម​ សហការ​ជាមួយ​អាជ្ញាធរ​មូលដ្ឋាន​ នៅព្រឹកថ្ងៃទី១៩ ខែមីនា ឆ្នាំ​២០២១​នេះ​ បេីក​យុទ្ធនាការ​​ចែក​ម៉ាស​ជូន​ប្រជាពលរដ្ឋ​ នៅ​​ផ្សារ​ព្រែក​ដេីម​ចាន់​ ផ្សារ​៧មករា​​ និង​ទីសាធារណៈ​​នានា​ ក្នុង​ក្រុង​កំពង់ចាម​ ដេីម្បី​ពញ្ញាក់​ស្មារតី​ ឲ្យបន្តការប្រុងប្រយ័ត្ន រាលដាលនៃជំងឺកូវីដ-១៩ ក្នុង​សហគមន៍​។

ដោយមានការ​​សម្របសម្រួល​ពី​លោក​ ​ឃន​ ប្រុស​ នាយក​រដ្ឋបាល​សាលា​ខេត្ត​កំពង់ចាម​ និង​ជា​ប្រធាន​ប្រតិបត្តិ​សាខា​សម្ព័ន្ធ​យុវជន​ស្រលាញ់​សន្តិភាព​ តាម​រយៈ​​យុទ្ធនាការ​នេះ​ ក្រុម​ការងារ​​យុវជន​ស្រលាញ់​សន្តិភាព​ ក៏បាន​ធ្វេី​ការ​ផ្សព្វផ្សាយ​អំពី​សារ​អប់រំ​នានា​ របស់ក្រសួងសុខាភិបាល ជាពិសេស​ ការចូលរួមអនុវត្តតាមកន្លងថ្មី របស់ សម្តេចហ៊ុន​ សែន​ នាយករដ្ឋមន្ត្រី​កម្ពុជា​ តាម​រយៈ​ ​៣​ការពារ​ ៣កុំ​ ដោយ​មាន​ការ​ពាក់ម៉ាស់នៅគ្រប់ទីសាធារណៈ​ លាងដៃជាមួយសាប៊ូ អាល់កុល ឬជែល​ និង​រក្សាគម្លាតសុវត្ថិភាពសង្គម​ ចាប់ពីមួយម៉ែត្រកន្លះឡើងទៅ​។ ដោយ​កុំចូលទៅកន្លែងបិទជិតគ្មានខ្យល់ចេញចូល​ កុំចូលទៅកន្លែងមានមនុស្សច្រើនកុះករ​ និង​កុំប៉ះពាល់គ្នា​ ផងដែរ​៕SRP

ភ្នំពេញ៖នាយករដ្ឋមន្ត្រី សម្តេចហ៊ុន សែន ចេញសេចក្តីសម្រេច បង្កើតគណៈកម្មការចំពោះកិច្ចចាក់វ៉ាក់សាំងកូវីដ-១៩ នៅទូទាំងប្រទេស។នេះបើយោងតាមសេចក្ដីសម្រេច ដែលបណ្ដាញ«សៀមរាបប៉ុស្តិ៍» ទើបទទួលបាន៕ សូមអានលិខិតខាងក្រោម៖

ខេត្តសៀមរាប៖លោក ទៀ សីហា អភិបាលខេត្តនៅថ្ងៃទី១៨ ខែមីនា ម្សិលមិញបានដឹកនាំប្រតិភូចុះពិនិត្យមណ្ឌលចត្តាឡីស័ក នៅស្រុកក្រឡាញ់ដើម្បីត្រៀម សម្រាប់ប្រជាពលរដ្ឋ ដែលមកពីក្រៅប្រទេស។

ដំណើរចុះពិនិត្យនេះ លោកទៀ សីហា បានជំរុញដល់ក្រុមការងារ ប្រចាំការទាំងអស់ ត្រូវអនុវត្តការងារនេះ ឱ្យបានហ្មត់ចត់ ចៀសវាងការគេចចេញ ពីមណ្ឌលចត្តាឡីស័ក ដោយត្រូវណែនាំដល់បងប្អូន ដែលមកធ្វើចត្តាឡីស័ក អនុវត្តឱ្យខ្ជាប់ខ្ជួន តាមការណែនាំ របស់ក្រសួងសុខាភិបាល។

អភិបាលខេត្តក៏បានអំពាវនាវ សូមបងប្អូនចូលរួមទប់ស្កាត់ ការរីករាលដាលជំងឺកូវីដ-១៩ ដោយអនុវត្ត ៣ការពារ (ត្រូវពាក់ម៉ាស់ ត្រូវលាងដៃនឹងអាកុល ឬជែល និងត្រូវរក្សាគន្លាតបុគ្គល) ៣កុំ (កុំទៅកន្លែងបិទជិតគ្មានខ្យល់ចេញចូល កុំទៅកន្លែងដែលមានមនុស្សច្រើនកុះករ និងកុំប៉ះពាល់គ្នា) ព្រមទាំងចូលរួមយុទ្ធនាការប្រយុទ្ធនឹងកូវីដ-១៩ ប្រើ QR Code “Stop covid-19 ទប់ស្កាត់កូវីដ-១៩”ផងដែរ៕SRP

ភ្នំពេញ៖លោក​ ផែង​ វណ្ណៈ​ បានសរសេរលិខិតសុំទោសជាសាធារណៈចំពោះព្រះសង្ឃគ្រប់​ព្រះអង្គ​ទូទាំង​ប្រទេស​។នេះបើយោងតាមលិខិតរបស់លោក ផែង វណ្ណៈ នៅយប់ថ្ងៃទី១៨ ខែមីនា ឆ្នាំ២០២១នេះ។

សូមជម្រាបផងដែរថានៅថ្ងៃទី១៨ ខែមីនា ឆ្នាំ២០២១ នេះរដ្ឋមន្រ្តីក្រសួងព័ត៌មាន លោក ខៀវ កាញារីទ្ធ បានសម្រេចលុបអាជ្ញាប័ណ្ណសារព័ត៌មានរបស់ លោក ផែង វណ្ណៈ ក្រោយប្រើពាក្យសម្តី និងសំណេរប៉ះពាល់ ធ្ងន់ធ្ងរដល់វិស័យពុទ្ធសាសនា។

ការសម្រេចលុបនេះ បន្ទាប់ពីមានលិខិតរបស់ព្រះមេគណខេត្តសៀមរាបសូមក្រាបបង្គំទូលថ្វាយ សម្តេចព្រះមហាសុមេធាធិបតី កិត្តិឧទ្ទេសបណ្ឌិត នន្ទ ង៉ែត សម្តេចព្រះសង្ឃនាយក នៃព្រះរាជាណាចក្រកម្ពុជា ដោយសំណើសុំឱ្យរាជរដ្ឋាភិបាលកម្ពុជា ថ្កោលទោសចំពោះបុគ្គល ផែង វណ្ណៈ ដែលបានប្រមាថ សមាជិកថេរសភាសង្ឃខេត្ត និងមន្ត្រីរដ្ឋបាលខេត្តសៀមរាប៕SRP

ខេត្តកំពង់ស្ពឺ៖ករណីចាប់រំលោភនិងសម្លាប់ជនរងគ្រោះ នៅថ្ងៃពុធ ទី១៧ ខែមីនា ឆ្នាំ២០២១ វេលាម៉ោង ២០ និង ៣០នាទី ម្សិលមិញនៅចំណុចខ្នងប្រឡាយភូមិវល្លិប្រេង ឃុំកាហែង ស្រុកសំរោងទង ខេត្តកំព​ង់ស្ពឺ ជនដៃដល់ជាឃាតករ ត្រូវបានសមត្ថកិច្ចចាប់ខ្លួនបានក្រោយធ្វើសកម្មភាពបាន៨ម៉ោង។

ករណីលោក ស​ម​ សាមួន​ ស្នងការខេត្ដកំពង់ស្ពឺ បា​នបញ្ជា​កម្លាំងជំនាញពាក់ព័ន្ធ​ ចុះប្រតិបត្ដិការ​ស្រាវជ្រាវ​ ដោយសហការជាមួយសាក្សី និង​ក្រុម​គ្រួសារ​ជនរងគ្រោះ​ គ្រូពេទ្យ​ ក្រុមបច្ចេកវិទ្យា​ រហូតកំណត់ ចាប់ជនដៃដល់បាននៅចំណុចតាមផ្លូវប្រឡាយច្បារមន ស្ថិតនៅភូមិបុរីកម្មករ សង្កាត់ច្បារមន ក្រុងច្បារមន ខេត្តកំពង់ស្ពឺ។

បុរសរូបនេះឈ្មោះ ប៉ិច ថន អាយុ ៥៥ឆ្នាំ រស់នៅភូមិក្រាំងពោធិ៍ ឃុំអូរ ស្រុកភ្នំស្រួច ខេត្តកំពង់ស្ពឺ។ជនរងគ្រោះឈ្មោះ ច​ ធ​ អាយុ៦១​ឆ្នាំ​ រស់នៅភូមិត្រពាំ​ងជ្រៅ ឃុំកាហែង ស្រុកសំរោងទង ខេត្តកំពង់ស្ពឺ។ជនដៃដល់បានឆ្លើយសារភាពថា ខ្លួនពិតជាបានសម្លាប់ទៅលើជនរងគ្រោះពិតប្រាកដមែន។

មូលហេតុមុនដំបូង បានធ្វេីសកម្មភាពចាប់រំលោភសេពសន្ថវៈ ទៅលើជនរងគ្រោះដោយខ្លាចជនរងគ្រោះប្ដឹងគេឱ្យចាប់ខ្លួន​ គឺ​ជនសង្ស័យ​បានសម្លាប់ជនរងគ្រោះតែម្ដង។

បច្ចុប្បន្នជនត្រូវបាននគរបាលស្រុក កសាងសំណុំរឿង​បញ្ជូន​ ទៅការិយាល័យជំនាញស្នងការដ្ឋាននគរបាលខេត្ដកំពង់ស្ពឺ ដេី​ម្បី​អនុវត្តតាមផ្លូវច្បាប់៕SRP

ខេត្តកំពត៖លោក ជាវ តាយ អភិបាលខេត្តកំពត នៅរសៀល ថ្ងៃព្រហស្បត្តិ៍ ទី១៨ ខែមីនា ឆ្នាំ២០២១ នេះ បានអញ្ជើញចុះពិនិត្យស្ថានភាពស្ពានដែកបាឡេ ដែលមានសភាពទ្រុឌទ្រោម ត្រូវជួសជុលបន្ទាន់ ស្ថិតនៅក្នុងភូមិអណ្តូងជីម៉ឺន ឃុំកំពង់គ្រែង ស្រុកទឹកឈូ។

គូរបញ្ជាក់ថា ស្ពានដែកបាឡេនេះ(ស្ពានចិន) មានបណ្តោយ៤២ម៉ែត្រ ទទឹង៧ម៉ែត្រ ត្រូវបានសាងសង់ឡើងកាលពីឆ្នាំ២០០៧ ដោយក្រុមហ៊ុនម៉ៅការសាង់សាងវារីអគ្គិសនី តភ្ជាប់ឃុំម៉ាក់ប្រាង្គ និងឃុំកំពង់គ្រែង សម្រាប់បម្រើការងារដឹកជញ្ជូនសាងសង់ទំនប់វារីអគ្គិសនីកំចាយ និងសម្រាប់ការចរាចរណ៍របស់ ប្រជាពលរដ្ឋ។ក្រោយការងារសាងសង់វារីអគ្គិសនីចប់ បានប្រគល់ឲ្យអាជ្ញាធរ ជាអ្នកគ្រប់គ្រង ជួសជុល ថែទាំ ប្រើប្រាស់ជាសាធារណៈ។

ស្របជាមួយនឹងការចុះពិនិត្យស្ពាននេះ ឃើញថាមានសភាពទ្រុឌទ្រោមខ្លាំង លោក ជាវ តាយ បានឲ្យមន្ទីរជំនាញ និងរដ្ឋបាលស្រុកទឹកឈូ សិក្សាជាបន្ទាន់ ឲ្យសមស្របតាមបទដ្ឋានបច្ចេកទេស ដោយផ្តោតសំខាន់ទៅលើគ្រឿងបង្គុំស្ពានផ្នែកខាងលើ ដែលចំណុចសំខាន់ ដើម្បីជួយសម្រួល ដល់ប្រជាពលរដ្ឋ ធ្វើចរាចរណ៍ឆ្លងកាត់ទៅស្រែចំការ ក៏ដូចជាការដឹកជញ្ជូនកសិផល និង រថយន្តដឹកជញ្ជូន ប្រភេទធំនិងតូចផ្សេងៗយ៉ាងច្រើនទៀត ជារៀងរាល់ថ្ងៃផងដែរ៕SRP

ខេត្តសៀមរាប៖លោក សឹង្ហ សំរឹទ្ធិ អនុប្រធាន ចលនាយុវជនកម្ពុជាក្រុម១៥៧ សាខាខេត្តសៀមរាប និងលោក ចែម ចន្ថា ប្រធានចលនាយុវជនក្រុម១៥៧ សាខាស្រុកជីក្រែង បាននៅថ្ងៃព្រហស្បតិ៍ ទី ១៨ ខែមីនា ឆ្នាំ២០២១នេះដឹកនាំក្រុមការងា​រ ចលនាយុវជន ក្រុម១៥៧ នាំយកនូវ ម៉ាសចំនួន៣៥០ម៉ាស. ជែលលាងដៃ៧ដប. ទឹកសុទ្ធ២៧យួរ. មី១០កេស. ត្រីខ១០យួរ.ទឹកសុីអុីវ ១០យួរ. ទឹកត្រី១០យួរ .អង្ក៦០គីឡូ និង ថវិកាចំនួន ៤០មុឺនរៀល ប្រគល់ជូនតំណាងគណៈបញ្ជាការឯកភាពខេត្តសៀមរាបនិង ដើម្បី
ជួយក្រុមការងារពិនិត្យសុខភាពបឋម និងស្កែន QR Code នៅគោលដៅព្រំប្រទល់ខេត្តសៀមរាប-កំពង់ធំ (ស្រុកជីក្រែង-ស្រុកស្ទោង) ដែលកំពុងរឹតបន្តឹងពិនិត្យបន្ថែមចំពោះអ្នកដំណើរចេញពីតំបន់ ដែលមានការកើនឡើងជំងឺកូវីដ១៩។

ក្នុងឱកាសនោះ លោក សឹង្ហ សំរឹទ្ធិ មានមតិសំណេះសំណាល​ ផ្តាំផ្ញេី ដល់កងកម្លាំង និង ប្រជាពលរដ្ឋ ដែលធ្វេីដំណេីរឆ្លងកាត់ទាំងអស់សូមអោយថែរក្សាសុខភាព ត្រូវមានការប្រុងប្រយ័ត្ន និងកាពារ ដោយរក្សាអនាម័យអោយបានល្អដេីម្បីរួចផុតពីជំងឺកូវីត១៩៕SRP

ខេត្តកំពង់ចាម៖ដេីម្បី​ចូលរួម​​ទប់ស្កាត់​ការ​រីករាលដាល​នៃ​ជំងឺ​កូវីដ​-១៩​ ក្នុង​សហគមន៍​ នារសៀលថ្ងៃ​ទី​១៨​ ខែមីនា ឆ្នាំ​២០២១​នេះ​ លោក វង្ស​ ប៊ុន​វិសុទ្ធ​ ព្រះរាជអាជ្ញា​អមសាលាដំបូង​ខេត្តកំពង់ចាម​ និង​លោកជំទាវ​ បានជួយ​ឧបត្ថម្ភ​ថវិកា​ចំនួន​​៤លានរៀល​ និង​គ្រឹះស្ថាន​ប្រសើរ​ហ្វាយនែន​ បានជួយ​ឧបត្ថម្ភ​ មីជាតិ​ ចំនួន​១០០កេស​ ទឹក​បរិសុទ្ធ​ ១០០កេស​ អាល់កុល​ ​១៥០លីត្រ​ និង​ម៉ាស​ ​ចំនួន​៥០០០​ ជូនដល់​គណៈកម្មការ​ប្រយុទ្ធ​ប្រឆាំង​នឹង​ជំងឺ​កូវីដ​-១៩​ ខេត្តកំពង់ចាម​។

លោក អ៊ុន ចាន់ដា ប្រធានគណៈកម្មការខេត្តប្រយុទ្ធប្រឆាំងនឹងជំងឺកូវីដ-១៩ បាន​ថ្លែងអំណរគុណ​ចំពោះ​ លោក វង្ស​ ប៊ុន​វិសុទ្ធ​ ពនិង​គ្រឹះស្ថាន​ប្រសើរ​ហ្វាយនែន​ ដែល​បាន​ជួយ​ឧបត្ថម្ភ​ ទាំង​ថវិកា​ និងផ្នែកសម្ភារនាពេលនេះ គឺជាការរួមចំណែក យ៉ាងសំខាន់ ក្នុងសកម្មភាពនានាដើម្បីប្រយុទ្ធប្រឆាំងនឹងជំងឺកូវីដ-១៩៕SRP