ខេត្តបាត់ដំបង៖លោកសុខ លូ បានអំពាវនាវដល់ប្រជាពលរដ្ឋ ទាំងអស់ចូលរួមសហការមជាមួយអាជ្ញាធរ និងសមត្ថកិច្ចពាក់ព័ន្ធ ក្នុងការរាយការណ៍ ពេលជួបនឹងសកម្មភាពនានា ពីការជួញដូរ ចែកចាយ និងប្រើប្រាស់គ្រឿងញៀន នៅតាមសហគមន៍ ដើម្បីមានការអន្តរាគមន៍ បង្រ្កាបបានទាន់ពេលវេលា និងជាពិសេសធ្វើការណែនាំដល់កូនចៅ ឲ្យយល់ឲ្យច្បាស់ អំពីបញ្ហាផលប៉ះពាល់ នានា ដែលបង្កឡើងដោយសារគ្រឿងញៀន ហើយបន្តអប់រំឲ្យយល់ដឹងអំពីបញ្ហាគ្រោះថ្នាក់ចរាចរណ៍ ឱ្យបានជាប់ជាប្រចាំ មិនត្រូវបើកបរពេលស្រវឹង ដើម្បីឱ្យពួកគេគោរពច្បាប់ចរាចរណ៍ ពិសេសក្នុងពេកបើកបរ សូមកុំសេពគ្រឿងស្រវឹង ត្រូវពាក់មួកសុវត្ថិភាព រាល់ពេលបើកបរម៉ូតូ ទោះទៅណាជិតឬឆ្ងាយ និងពាក់ខ្សែក្រវ៉ាត់ឱ្យបានត្រឹមត្រូវពេលបើកបររថយន្ត ដើម្បីកាត់បន្ថយអត្រាគ្រោះថ្នាក់ចរាចរណ៍សម្រាប់ខ្លួនឯងនិងអ្នកដទៃ។

លោកក៏បានផ្ដាំផ្ញើដល់ប្រជាពលរដ្ឋ ដែលមិនទាន់បានចាក់វ៉ាក់សាំងកូវីដ១៩ ទាំងអស់ សូមប្រញាប់ទៅចាក់វ៉ាក់សាំងកូវីដ១៩ ឱ្យបានគ្រប់ៗគ្នា ចាប់ពីដូសទី១ ដល់ដូសទី៣ឬដូសជំរុញ ដើម្បីកាត់បន្ថយការឆ្លង និងហានិភ័យនៃការស្លាប់ដោយមេរោគកូវីដ១៩ ខណៈមេរោគបំប្លែងខ្លួនថ្មីអូរមីក្រុង កំពុងផ្ទុះឆ្លង និងអាចបន្តមកតាមបណ្តាខេត្ត បើមិនមានការចូលរួមអនុវត្តតាមវិធានការសុវត្ថិភាពរបស់ក្រសួងសុខាភិបាល និងបន្តគោរពតាមគោលការណ៍ ៣កុំ ៣ការពារ ឱ្យបានត្រឹមត្រូវនោះទេ បើសិនជាបានទទួលកការចាក់វ៉ាក់សាំងដល់ដូសជំរុញក៏ដោយ។

មានប្រសាសន៍យ៉ាងដូច្នេះ ក្នុងឱកាសលោក
និងលោកជំទាវ អញ្ជើញជួបសំណេះសំណាលសួរសុខទុក្ខ និងនាំយកអំណោយជូនប្រជាពលរដ្ឋ ដែលមានជីវភាពខ្វះខាត.ក្នុងស្រុកសង្កែ ចំនួន២២០គ្រួសារ មកពីភូមិចំនួន១៩នៃឃុំចំនួន៣នៅថ្ងៃព្រហស្បតិ៍ ទី១៧ ខែកុម្ភៈ ឆ្នាំ២០២២នេះ។

លោកសុខ លូ អភិបាលខេត្តបាត់ដំបង និងជាប្រធានគណៈកម្មាធិការសាខាខេត្ត ក៏បាននាំមកនូវប្រសាសន៍ផ្តាំផ្ញើសាកសួរសុខទុក្ខ ពីសំណាក់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ជូនចំពោះប្រជាពលរដ្ឋ មកទទួលអំណោយទាំងអស់ដោយក្តីនឹករឭក ដែលជានិច្ចកាលសម្តេចតែងតែគិតគូរពីសុខទុក្ខ របស់បងប្អូនប្រជាពលរដ្ឋ ជួបការលំបាកអ្នកមានជំងឺ ចាស់ជរា ស្ត្រីមេម៉ាយកូនច្រើនក្នុងបន្ទុក ជនងាយរងគ្រោះ និង ជនរងគ្រោះដោយគ្រោះមហន្តរាយផ្សេងៗដោយមិនប្រកាន់រើស អើង វណ្ណៈ ជាតិសាសន៍ពណ៌សម្បុរ ឬនិន្នាការនយោបាយអ្វីឡើយ ពោលគឺ ទីណាមាន ទុក្ខលំបាក ទីនោះមានកាកបាទក្រហមកម្ពុជា និងផ្តាំផ្ញើ ដល់បងប្អូន ប្រជា ពលរដ្ឋ ទាំងអស់ ប្រកាន់យកនូវ អនាម័យល្អ រស់នៅ ស្អាតហូបស្អាត ផឹកស្អាត និងខិតខំប្រឹងប្រែងប្រកបមុខរបរ បង្ករបង្កើនផលដាំ ដំណាំរួមផ្សំ ចិញ្ចឹមសត្វ ដើម្បីទ្រទ្រង់ជីវភាពគ្រួសារ ឱ្យបាន ប្រសើរឡើង។

សូមបញ្ជាក់ថា គ្រួសារនីមួយៗទទួលបានអំណោយរួមមាន៖ អង្ករ២៥គីឡូក្រាម ត្រីខ១០កំប៉ុង ទឹកបរិសុទ្ធ ១កេស,មី១កេស ទឹកត្រី ទឹកស៊ីអ៉ីវ ១យួរ ជែល១ដបផងដែរ៕SRP

ក្រោយពីមានប្រតិកម្មជាបន្តបន្ទាប់មន្ត្រីជាន់ខ្ពស់ រាជរដ្ឋាភិបាល ចំពោះប្រើពាក្យសម្ដីរបស់លោក គឹម ហ៊ាង ដែលបានធ្វើឲ្យប៉ះពាល់ដល់តំបន់អភិរក្សតំបន់អង្គរ លោក គឹម ហ៊ាងបានចេញលិខិតសូមទោសជាសាធារណៈ។

លិខិតសូមទោសរបស់លោក គឹម ហ៊ាង នៅថ្ងៃទី១៧ ខែកុម្ភៈ ឆ្នាំ២០២២ បានរៀបរាប់ថា ខ្លួនកើតនៅថ្ងៃទី២៤ ខែសីហា ឆ្នាំ១៩៨០ ។

លោកបានធ្វើជាវាគ្មិនម្នាក់ ក្នុងសិក្ខាសាលាអចលនទ្រព្យ ឆ្នាំ២០២២ ស្តីពី អនាគតនៃវិស័យអចលនទ្រព្យខេត្តសៀមរាប ក្រោយជំងឺរាតត្បាតកូវីដ-១៩ ធូរស្រាលកាលពីថ្ងៃទី១២ ខែកុម្ភៈ ឆ្នាំ២០២២ នៅសណ្ឋាគារ អង្គរផារ៉ាឌី ក្រុងសៀមរាប ខេត្តសៀមរាប។

លោករៀបរាប់បន្តថា ក្នុងបទបង្ហាញ និងការវិភាគរបស់ខ្លួនមានរយៈពេលជាង២ម៉ោង ដោយលោកបានបកស្រាយពីចំណុចខ្សោយ ចំណុចខ្លាំង ឱកាស ព្រមទាំងការគំរាមកំហែង ដល់ការវិនិយោគ និងអភិឌ្ឍន៍វិស័យអចលនទ្រព្យ នៅខេត្តសៀមរាប។

លោកទទួលស្គាល់កំហុសខ្លួនថា ការបកស្រាយរបស់លោកពិតជាមានការប៉ះពាល់ ដល់វប្បធម៌ជាតិ ដែលជាកំហុសដ៏ធំមួយដែលបានបង្កើតឡើងដោយអចេតនា ។

លិខិតបញ្ជាក់ថា “ខ្ញុំបាទសូមលំឱនកាយ លើកដៃម្រាមដប់ ដើម្បីសូមទោសជាសាធារណៈ ដល់ប្រជាជនកម្ពុជា អាជ្ញាធរមានសមត្ថកិច្ចគ្រប់លំដាប់ថ្នាក់ ពិសេសដល់ថ្នាក់ដឹកនាំប្រទេស ចំពោះកំហុស ដែលខ្ញុំបាទបានបង្កើតឡើងកាលពីថ្ងៃសៅរ៍ ទី១២ ខែកុម្ភៈ ឆ្នាំ២០២២ នៅទីរួមខេត្តសៀមរាប”។

សូមជម្រាបថា ក្រសួងវប្បធម៌ និងវិចិត្រសិល្បៈ នៅព្រឹកថ្ងៃ១៧ កុម្ភៈនេះ បានចេញមកថ្កោលទោស និងណែនាំឲ្យលោក គឹម ហ៊ាង ជាអ្នកជំនាញខាងអចលនទ្រព្យ ត្រូវបញ្ឈប់ជាបន្ទាន់នូវពាក្យសំដីដែលគ្មានទំនួលខុសត្រូវ។

ប្រតិកម្មពីសំណាក់មន្ត្រីរាជរដ្ឋាភិបាលនិងក្រសួងវប្បធម៌នេះធ្វើឡើងបន្ទាប់ពី លោកគឹម ហ៊ាង និយាយថា ចំណុចខ្សោយរបស់ខេត្តសៀមរាប គឺបណ្ដាលមកពីការកំណត់កម្ពស់នៃការសាងសង់សំណង់ និងការអភិរក្សវប្បធម៌ច្រើន៕SRP

ភ្នំពេញ៖ក្រសួងបានចេញលិខិតថ្កោលទោស លោក គឹម ហ៊ាង ក្រោយប្រើសម្ដី ប៉ះពាល់ដល់ការអភិរក្ស តំបន់អង្គរ និងឱ្យលោក គឹម ហ៊ាង ត្រូវបញ្ឈប់ជាបន្ទាន់នូវពាក្យសម្ដីដែលគ្មានការទទួលខុសត្រូវ ដើម្បីតែផលប្រយោជន៍ផ្ទាល់ខ្លួនបែបនេះ ដើម្បីបញ្ចៀសនូវការយល់ច្រឡំ និងជំរុញការជួញដូរដីធ្លីក្នុងតំបន់សៀមរាប-អង្គរ ដែលនឹងអាចបង្កើតនូវចលាចលសង្គមជាយថាហេតុណាមួយ។

ក្រសួងវប្បធម៌ និងវិចិត្រសិល្បៈ បានឱ្យដឹងថា ថ្មីៗនេះ បណ្តាញសង្គមមួយចំនួនបានផ្សព្វផ្សាយនូវវីដេអូកាត់ខ្លីរយៈពេល៣នាទី ៤១វិនាទី របស់លោក គឹម ហ៊ាង អ្នកជំនួញដីធ្លីមួយរូប ថ្លែងនៅក្នុងសិក្ខាសាលាមួយស្តីពីអនាគតនៃវិស័យអចលនទ្រព្យខេត្តសៀមរាប ដែលលើកឡើងនូវទស្សនវិស័យរបស់ខ្លួន ទាក់ទងទៅនឹងការអភិរក្ស និងអភិវឌ្ឍ នៃតំបន់សៀមរាប-អង្គរ និងវិធាននៃការការពារបេតិកភណ្ឌពិភពលោក របស់អង្គការយូណេស្កូ ដោយប្រើប្រាស់សម្ដីវាយប្រហារមិនមានការទទួលខុសត្រូវ និងគ្មានការសិក្សាស្រាវជ្រាវ យល់ដឹង គ្រប់ជ្រុងជ្រោយ ខ្វះខាតចំណេះដឹងលើផ្នែកកិច្ចការពារបេតិកភណ្ឌពិភពលោក ដោយសម្លឹងឃើញតែមួយជ្រុង ទៅលើវិស័យអចលនទ្រព្យ ដើម្បីតែផលចំណេញនៃមុខជំនួញខ្លួន ដោយបំភ្លេចចោលនូវតម្លៃនៃមរតកវប្បធម៌ជាតិ ក៏ដូចជាការជំរុញឱ្យមានចលនាទិញ លក់ដូរអចលនទ្រព្យកាន់តែខ្លាំងក្លាឡើង ក្នុងតំបន់សៀមរាប អង្គរ ដែលអាចនាំដល់ការរីករាលដាលសំណង់អាណាធិបតេយ្យ ក្នុងតំបន់រមណីយដ្ឋានការពារ និងតំបន់ជុំវិញនានា។

ក្រសួងបានសង្កត់ធ្ងន់ៗថា៖ «ពាក្យសម្ដីនេះបានធ្វើឱ្យប៉ះពាល់ទៅលើកិច្ចខិតខំប្រឹងប្រែងការពារ ថែរក្សា និងអភិរក្ស របស់ឥស្សរជនជាន់ខ្ពស់ថ្នាក់ជាតិ អន្តរជាតិ គ្រប់ជំនាន់ ជាពិសេសការខិតខំរបស់រាជរដ្ឋាភិបាល ដែលបានសហការជាមួយអង្គការយូណេស្កូ តាមរយៈការជំរុញ និងគាំពារឱ្យបង្កើតយន្តការអន្តរជាតិ ដើម្បីសម្របសម្រួលកិច្ចគាំពារ និងអភិវឌ្ឍន៍តំបន់រមណីយដ្ឋានប្រវត្តិសាស្រ្តអង្គរ ហៅកាត់ថា អាយស៊ីស៊ី-អង្គរ (ICC-អង្គរ) ដឹកនាំដោយសហប្រធានបារាំង និងជប៉ុន ដែលប្រមូលផ្ដុំដោយអ្នកជំនាញការជាតិ អន្តរជាតិដែលមានអាយុកាលជាង ៣០ឆ្នាំ បានរួមគ្នាមកសង្គ្រោះ និងការពារអង្គរ ក្នុងនោះបានប្រើប្រាស់ថវិកាច្រើនជាង៥០០លានដុល្លារ ព្រមទាំងជួយបណ្តុះបណ្តាលនូវធនធានមនុស្សជូនកម្ពុជាជាច្រើន ដើម្បីកិច្ចការពារបេតិកភណ្ឌជាតិយើង»។

ក្រសួងវប្បធម៌ បានឱ្យដឹងថា រាជរដ្ឋាភិបាលកម្ពុជា ក្រោមការដឹកនាំប្រកបដោយចក្ខុវិស័យដ៏វែងឆ្ងាយរបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា រួមជាមួយឥស្សរជនជាន់ខ្ពស់ អ្នកជំនាញការ ទាំងជាតិ អន្តរជាតិ គ្រប់ជំនាន់ ក្រសួង/ស្ថាប័នពាក់ព័ន្ធ និងប្រជាពលរដ្ឋទូទៅក្នុងការខិតខំការពារបេតិកភណ្ឌវប្បធម៌ជាតិ និងការសង្គ្រោះរមណីយដ្ឋានអង្គរ តាមរយៈការដាក់បញ្ចូលរមណីយដ្ឋានអង្គរ ដែលមានប្រាសាទ និង បុរាណដ្ឋានជាច្រើន ទៅក្នុងបញ្ជីបេតិកភណ្ឌពិភពលោក នៃអង្គការយូណេស្កូ នាថ្ងៃទី១៤ ខែធ្នូ ឆ្នាំ១៩៩២។ ហើយដែលកិច្ចខិតខំប្រឹងប្រែងនេះ រាប់ចាប់ពីការអំពាវនាវឱ្យសហគមន៍អន្តរជាតិ និងអង្គការយូណេស្កូ ជួយសង្គ្រោះអង្គរ នៅឆ្នាំ១៩៨៩ ដោយព្រះបរមរតនកោដ្ឋ នរោត្តម សីហនុ រហូតដល់ការខិតខំបង្កើតលិខិតបទដ្ឋានគតិយុត្ត និងស្ថាប័នជាតិមួយចំនួនដោយរាជរដ្ឋាភិបាលកម្ពុជា ក្នុងនោះរួមមានលិខិតបទដ្ឋានជាតិ និងអន្តរជាតិសំខាន់ៗ មួយចំនួនដូចជា៖ ច្បាប់ស្តីពីកិច្ចការពារបេតិកភណ្ឌវប្បធម៌ឆ្នាំ១៩៩៦ ព្រះរាជក្រឹត្យ ឆ្នាំ១៩៩៤ ស្តីពីការកំណត់ និងការចាត់ចែងគ្រប់គ្រងតំបន់សៀមរាប-អង្គរ ក្នុងទំហំ៤០១គីឡូម៉ែត្រក្រឡា ដោយការបែងចែកតំបន់ជាប្រាំច្បាប់ស្តីពីសំណង់រហូតដល់ឯកសារប្លង់គោលស្តីពីការប្រើប្រាស់ដីធ្លីខេត្តសៀមរាប ព្រមទាំងលិខិតបទដ្ឋានគតិយុត្តពាក់ព័ន្ធផ្សេងទៀត ស្របតាមលក្ខខណ្ឌដែលអង្គការយូណេស្កូកំណត់ និងតម្រូវឱ្យរដ្ឋសមាជិករៀបចំអនុលោមតាមកិច្ចការពារបេតិកភណ្ឌវប្បធម៌របស់មនុស្សជាតិ។

ក្រសួងវប្បធម៌ បានបញ្ជាក់ថា ទាំងអស់នេះសុទ្ធតែបានបង្កើតឡើងដោយមានការគិតគូរគ្រប់ជ្រុងជ្រោយ ទៅលើទិដ្ឋភាពសង្គមសេដ្ឋកិច្ច នយោបាយ និងការទូត ដោយផ្តោតទៅលើកិច្ចការពារបេតិកភណ្ឌវប្បធម៌ មរតកដូនតា ជាពិសេសទៅលើរចនាបទ កម្ពស់ ការរីករាលដាលសំណង់អាណាធិបតេយ្យ ក្នុងតំបន់ការពារ និងតំបន់ជុំវិញ ក្នុងគោលដៅការពារ ថែរក្សា អភិរក្ស អភិវឌ្ឍនិងលើកតម្លៃរមណីយដ្ឋានប្រវត្តិសាស្រ្តអង្គរ និងខេត្តសៀមរាប ការគ្រប់គ្រងធនធានធម្មជាតិប្រកបដោយចីរភាព សម្រាប់ការអភិវឌ្ឍមួយដែលរក្សាតុល្យភាពបរិស្ថាន សំណង់ធារាសាស្ត្រព្រៃឈើ រួមចំណែកអនុវត្តគោលនយោបាយកាត់បន្ថយភាពក្រីក្រក្នុងតំបន់សៀមរាប-អង្គរ។

ក្នុងលិខិតដដែល បានបញ្ជាក់ថា សម្តេចតេជោ ហ៊ុន សែន ដែលជានិច្ចជាកាលតែងចាត់ទុកកិច្ចការពារបេតិកភណ្ឌជាតិជាអាទិភាពចម្បងនោះ នៅក្នុងពិធីខួប២៥ឆ្នាំ នៃការបង្កើត អាយស៊ីស៊ី-អង្គរ ខាងលើ នាថ្ងៃទី០៤ ខែធ្នូ ឆ្នាំ២០១៨ នៅទីក្រុងសៀមរាប ខេត្តសៀមរាប បានមានប្រសាសន៍ដ៏ខ្ពង់ខ្ពស់នៅចំពោះមុខរបស់អគ្គនាយិកាអង្គការយូណេស្កូ ព្រមទាំងសហប្រធានទាំងពីរ នៃអាយស៊ីស៊ី-អង្គរ និងតំណាងបណ្តាប្រទេសដែលជា សមាជិករបស់អាយស៊ីស៊ី-អង្គរ ពាក់ព័ន្ធនឹងការគ្រប់គ្រងដីធ្លីក្នុងតំបន់រមណីយដ្ឋានអង្គរ ថា «ការគ្រប់គ្រងបេតិកភណ្ឌ មិនមែនជាការងាយស្រួលទេ! សូមកុំឱ្យមានការញុះញង់ប្រជាពលរដ្ឋ ជាពិសេសក្នុងអំឡុងពេលយុទ្ធនាការឃោសនាបោះឆ្នោត ឱ្យទៅរំលោភកាន់កាប់ដីធ្លី ក្នុងតំបន់បេតិកភណ្ឌ ដែលនេះរួមបញ្ចូលទាំងបេតិកភណ្ឌ បានចុះទៅក្នុងបញ្ជីបេតិកភណ្ឌពិភពលោក និងបេតិកភណ្ឌផ្សេងៗទៀត។ ដើម្បីការពារតម្លៃបេតិកភណ្ឌវប្បធម៌ រាជរដ្ឋាភិបាលពុំមានជម្រើសអ្វីក្រៅពីការប្រើប្រាស់វិធានការតឹងរ៉ឹងនានា ទោះជាត្រូវតបស្នងជាមួយនឹងតម្លៃណាមួយក៏ដោយ រាជរដ្ឋាភិបាលនឹងប្រើប្រាស់គ្រប់វិធានការបង្ការ និងទប់ស្កាត់ដើម្បីបញ្ចៀសឱ្យបាននូវបណ្តាសកម្មភាពខុសច្បាប់ទាំងឡាយណា ធ្វើឱ្យប៉ះពាល់ដល់តម្លៃជាសកលនៃរមណីយដ្ឋានអង្គរ ហើយដែលបណ្តាលឱ្យអង្គរប្រឈមនឹងការបាត់បង់លក្ខណៈសម្បត្តិជាបេតិកភណ្ឌពិភពលោក»។

ក្រសួងវប្បធម៌ សូមជម្រាបជូនសាធារណមតិ មេត្តាជ្រាបថា ការអភិរក្ស និងអភិវឌ្ឍក្នុងតំបន់បេតិកភណ្ឌពិភពលោក គឺជាយន្តការនៃការរក្សាលំនឹងមួយយ៉ាងប្រុងប្រយ័ត្ន និងត្រូវគោរពជាដាច់ខាតនូវគោលការណ៍ច្បាប់ បទដ្ឋានគតិយុត្តជាតិ និងអន្តរជាតិ រួមទាំងក្រឹត្យក្រម និងការអនុវត្តនានាដែលមានជាធរមានដើម្បីធានាដល់ការអភិវឌ្ឍមួយប្រកបដោយចីរភាព និងរក្សាឱ្យបានជាដាច់ខាតនូវកិត្តិយស និងកេរ្តិ៍ឈ្មោះរបស់រមណីយដ្ឋានអង្គរដែលជាបេតិកភណ្ឌពិភពលោក និងក៏ជាកិត្យានុភាពរបស់ជាតិ និងប្រជាជនកម្ពុជាលើឆាកអន្តរជាតិផងដែរ៕SRP

ខេត្តកំពង់ចាម​៖លោក​ អ៊ុន​ ចាន់ដា​ អភិបាលខេត្តកំពង់ចាម​ បានថ្លែងថា​ នេះ​ជា​មហា​កិត្តិយស​បំផុត​ ដែលគណៈកម្មការផលិត​ខ្សែភាពយន្តបែបប្រវត្តិសាស្ត្ររបស់កម្ពុជា រឿង “កូនប្រុសក្រោមពន្លឺ​ព្រះច័ន្ទ​ពេញបូណ៌មី”​ បាន​ជ្រើសរើស​យក​ខេត្ត​កំពង់ចាម​ សម្រាប់​ធ្វេីការថត​ខ្សែ​ភាពយន្ត​នេះ​មុន​គេ​។ សង្ឃឹម​ថា​រឿងនិទានបែបប្រវត្តិសាស្ត្រនេះ​ នឹង​បាន​ទស្សនា​នៅ​ឆ្នាំ​ក្រោយ​បន្ទាប់​ពី​ក្រុម​ការងារ​ផលិត​រួច​ ហើយ​ខ្សែ​ភាពយន្ត​នេះ​នឹង​បន្សល់​ទុក​ដល់​កូនចៅ​ជំនាន់​ក្រោយៗ​ ឲ្យ​បាន​យល់ដឹង​អំពី​ប្រវត្តិ​តស៊ូ​របស់​ប្រមុខ​ ជាពិសេស​ សម្ដេចតេជោ​ ហ៊ុន​ សែន​ និង​សម្តេច​កិត្តិព្រឹទ្ធបណ្ឌិត​ ប៊ុន​ រ៉ានី​ ហ៊ុន​ សែន​ ដែល​លោកបាន​ចំណាយ​ពេលវេលា​សឹងតែ​អស់​មួយ​ជីវិត​ ដេីម្បី​ស្វែងរកសន្តិភាព​ជូន​ដល់​ ប្រជាពលរដ្ឋ​ និង​ប្រទេស​ជាតិ​របស់​យេីង​។

លោក​​ អ៊ុន​ ចាន់ដា​ មានប្រសាសន៍យ៉ាងដូច្នេះ
នៅរសៀល​ថ្ងៃទី​១៦​ ខែកុម្ភ: ម្សិលមិញ ក្នុងឱកាសសួរសុខទុក្ខ ក្រុមការងារផលិតខ្សែភាពយន្ត​ និង​បងប្អូន​សិល្ប: តារា​សម្តែងរឿង កូនប្រុសក្រោមពន្លឺព្រះច័ន្ទ​ពេញបូណ៌មី​ នៅវត្តកោះគល់ ស្ថិត​ក្នុង​ឃុំកោះរការ ស្រុកកំពង់សៀម​ ព្រមទាំងបាន​ឧបត្ថម្ភ​នូវ​ថវិកា​​ចំនួន​ ​៤០លានរៀល​ផងដែរ​។

បើតាមលោក​ ហ៊ុយ វាសនា សហដឹកនាំរឿង បានឲ្យដឹងថា​ ​ក្នុង​សាច់រឿង កូនប្រុសក្រោមពន្លឺ​ព្រះច័ន្ទពេញបូណ៌មី​ ​ទាំង៥២ភាគ​ គឺខេត្តកំពង់ចាម​ គ្របដណ្ដប់​៧០ទៅ៨០ភាគរយ​ ព្រោះ​​មាន​សំណង់​ផ្ទះ​បូរាណ​ច្រើន​ ដែល​ត្រូវ​តាម​សាច់រឿង​បរិយាកាស​​ នាសម័យកាល​នោះ​។ ដូច្នេះ​ក្រុម​ការងារ​បាន​ចាប់ផ្ដើម​​ផ្តោត​យក​ទីតាំង​ ក្នុង​ខេត្តកំពង់ចាម​ មុន​គេ​​ ក្នុង​នោះ​មាន​ស្រុកកំពង់សៀម​ កងមាស​ និង​ស្រុកកោះសូទិន​ ដោយមាន​តួ​សម្ដែង​​សំខាន់ៗ​​ ជាច្រើន​នាក់​ ក្នុងនោះ​ក៏មាន​តួយុទ្ធជន​ និង​តួ​ប្រជាជន​​ ដែលចាប់​ផ្ដើម​ថត​នៅ​ភូមិកោះគល់​ ឃុំ​កោះរការ​ ស្រុក​កំពង់សៀម​ ពោលគឺ​ត្រូវ​ថត​រយ:ពេល​១០ថ្ងៃ​ ចាប់​ពី​ថ្ងៃទី​១៥​ ដល់​ថ្ងៃទី​២៤​ ខែកុម្ភៈ​ ឆ្នាំ​២០២២​។

គួរ​បញ្ជាក់​ថា​ អនុគណៈកម្មការ ផលិតភាពយន្តភាគរឿង “កូនប្រុសក្រោមពន្លឺ​ព្រះច័ន្ទ​ពេញបូណ៌មី”នេះ គឺមាន លោក ហ៊ីម សុទិត្យ​ រដ្ឋលេខាធិការក្រសួងព័ត៌មាន ជាប្រធាន លោក ហ៊ុយ វាសនា អ្នកនិពន្ធ និងដឹកនាំរឿង ជាអនុប្រធាន និងមានទីប្រឹក្សាសមាជិក ចំនួន ១៣នាក់ផ្សេងទៀត​ ដោយអនុវត្តតាមអនុសាសន៍ដ៏ខ្ពង់ខ្ពស់របស់ សម្តេចតេជោ និងសម្តេចកិត្តិព្រឹទ្ធបណ្ឌិត ក្រុមការងារបានជ្រើសរើសតួសំដែងសំខាន់ៗ​ ចំនួន ១០៣នាក់ និងតួប្រជាជនយ៉ាងតិចមានចំនួន ៥០០ នាក់ ព្រមទាំងកម្លាំងអង្គរក្សចូលរួម ៥០០ នាក់ផ្សេងទៀត ដើម្បីចូលរួមសំដែងក្នុងឈុតឆាកធំៗ ដូចជាឈុតឆាកនៃការប្រយុទ្ធ ការធ្វើបាតុកម្ម ការរៀបចំពិធីកម្សាន្តបុណ្យចូលឆ្នាំជាដើម។ ក្នុងនោះ​ក្រុមការងារគ្រប់គ្រងការផលិត បានចុះសិក្សាពិនិត្យជ្រើសរើសទីតាំងសម្រាប់ថតចំនួន ១០២ទីតាំង ដែលស្ថិតនៅ ក្នុងខេត្តកំពង់ចាម ត្បូងឃ្មុំ កំពង់ធំ​ កំពង់ស្ពឺ និងរាជធានីភ្នំពេញ ដើម្បីរៀបចំតុបតែងបន្ថែមជាទីតាំងថត ឲ្យស្របនឹង បរិយាកាស ស្ថានភាពភូមិសាស្រ្ត និងជីវភាពរស់នៅនាសម័យកាលនោះ​៕SRP

ភ្នំពេញ៖កូនប្រុសទី២របស់នាយករដ្ឋមន្ត្រីហ៊ុន សែន លោកហ៊ុន ម៉ានី បានចេញសារប្រតិកម្មទៅនឹងសម្ដី របស់លោកគឹម ហ៊ាង ដែលបាននិយាយពាក់ព័ន្ធទៅនឹងការសាងសង់សំណង់មិនបានច្រើនជាន់នៅក្នុងខេត្តសៀមរាប។

តាមរយៈសារក្នុងផេកfacebookរបស់លោកហ៊ុន ម៉ានី ប្រធានសហភាពសហព័ន្ធយុវជនកម្ពុជា បានសរសេរថា៖ សិទ្ធិក្នុងការបញ្ចេញមតិ និងគំនិត វាមិនខុសអ្វីទេ ប៉ុន្តែ ទី១ មិនគួឲ្យសិទ្ធិនោះ មានការប៉ះពាល់ដល់កិត្តិយសបុគ្គល ឬប្រមាទដល់ស្ថាប័ន ឬមន្រ្តីរាជការសាធារណៈ (អាជ្ញាធរអប្សារា) រាប់រយនាក់ ដែលបាន និងកំពុងបំពេញភារកិច្ចក្នុងការថែរក្សាកេរ្ត៏៍មរតកដូនតាយើង ក្នុងក្របខណ្ឌដែលកំណត់ដោយច្បាប់។ ទី២ គំនិត ដែលចេញមកពីតែពីជ្រុងតែមួយ មិនបានឆ្លុះបញ្ចាំងពីតថភាពជាក់ស្តែងនៃស្ថានភាព ដែលតោងអ្នកបញ្ចេញមតិ (ដោយគ្មានការទទួលខុសត្រូវនេះ) ពិចារណា។ កុំគិតថា មានតែគំនិតលោក ដែលត្រូវ។

លោកហ៊ុន ម៉ានី បានសរសេរបន្តថា៖ការគិតគូរបស់រាជរដ្ឋាភិបាល មានលក្ខណៈគ្របដណ្តប់ និងគ្រប់ជ្រុងជ្រោយ ដែលផលនៃការសម្រេច បានជះជាវិជ្ជមានទៅដល់មនុស្សគ្រប់ស្រទាប់ក្នុងសង្គម មិនសំដៅតែលើក្រុមណាមួយឡើយ។ ទី៣ ពាក្យថាស្រឡាញ់ជាតិ មានន័យ និងស្មារតីខ្ពង់ខ្ពស់ណាស់ គួរណាយើងលើកតម្កើងអោយបានច្រើន និងរាល់ពេលវេលា។ វាមិនត្រឹមតែជាពាក្យសម្ដី ប៉ុន្តែជាការប្រតិបត្តិជាក់ស្តែង។

ការប្រតិកម្ម របស់លោកហ៊ុន ម៉ានី ធ្វើឡើងបន្ទាប់ពីលោក គឹម ហ៊ាង អគ្គនាយកក្រុមហ៊ុនខ្មែររៀល អ៊ីស្ទេត KW Cambodia បានលើកឡើងនៅក្នុងឃ្លឹបវីដេអូថា ការកសាងសំណង់នៅក្នុងក្រុងសៀមរាប មិនបានច្រើនជាន់នោះទេ។ ដោយលោកគឹម ហ៊ាង ថា នេះជាចំណុចខ្សោយរបស់ខេត្តសៀមរាប៕SRP

ភ្នំពេញ៖នាយករដ្ឋមន្ត្រីហ៊ុន សែន បានលើកទឹកចិត្ត ឲ្យមានការជំរុញ ការវិនិយោគសិង្ហបុរី មកកម្ពុជាកាន់តែច្រើន ជំរុញការធ្វើពាណិជ្ជកម្ម រវាងប្រទេសទាំងពីរ ឲ្យកាន់តែធំ និងពិនិត្យមើល លើកិច្ចសហប្រតិបត្តិការ លើវិស័យអប់រំ លើវិស័យសុខាភិបាល និងវិស័យដទៃទៀតដែលអាចធ្វើទៅបាន។​

នាយករដ្ឋមន្ត្រីខ្មែរ ក៏បានថ្លែងអំណរគុណជូនចំពោះ លោក វី វៀន និងការពាំនាំការផ្តាំផ្ញើសួរសុខទុក្ខអំពីលោកនាយករដ្ឋមន្ត្រី ហើយក៏បានថ្លែងអំណរគុណជូនសិង្ហបុរី ដែលបានគាំទ្រកម្ពុជា ជាប្រធានអាស៊ាន ហើយចាត់ទុកកម្ពុជា ជាតំបន់សុវត្ថិភាព ក្នុងការបើកការហោះហើរឡើងវិញ។

ក្នុងជំនួបនេះ នាយករដ្ឋមន្ត្រីហ៊ុន សែន ក៏បានជម្រាបជូន លោកវី វៀន ដែរអំពី គោលបំណងរបស់នាយករដ្ឋមន្ត្រី ក្នុងការធ្វើដំណើរទៅប្រទេស មីយ៉ាន់ម៉ា ដែលរួមមានទី១)​ គឺធ្វើយ៉ាងណា កាត់បន្ថយឬលុបបំបាត់អំពើហិង្សា តាមរយៈការឈប់បាញ់គ្នា ,ទី២) រកវិធី ផ្ដល់ជំនួយមនុស្សធម៌ ជូនដល់ប្រជាជនមីយ៉ាន់ម៉ា ដោយគ្មានការរើសអើង និងទី៣) គឺបង្កើតនូវការសន្ទនា។

នាយករដ្ឋមន្ត្រីហ៊ុន សែន ថ្លែងបញ្ជាក់យ៉ាងដូច្នេះ នៅវិមានសន្តិភាព នារសៀលថ្ងៃទី ១៦ ខែកុម្ភ: ម្សិលមិញ នាឱកាសជួបពិភាក្សាការងារជាមួយ លោក Vivian Balakrishnan រដ្ឋមន្ត្រីក្រសួងការបរទេសសិង្ហបុរី។

លោកវី វៀន បានថ្លែងអំណរសាទរជូនចំពោះនាយករដ្ឋមន្ត្រី ដែលបានទទួលមេដាយសន្តិភាព ស៊ុនហាក់ ហើយបានមានប្រសាសន៍ថា នេះជាការទទួលស្គាល់ មិនត្រឹមតែនៅក្នុងប្រទេសកម្ពុជា ឬនៅក្នុងតំបន់ទេ គឺទូទាំងពិភពលោក។

លោក វី វៀន ក៏បានសម្ដែងនូវអំណរសាទរជូន
កម្ពុជាដែលបានទទួលនូវ ជោគជ័យយ៉ាងត្រចះត្រចង់នៅក្នុងការទប់ស្កាត់ការរីករាលដាលជំងឺកូវីដ-១៩​ ដោយកម្ពុជាបានចាក់វ៉ាក់សាំងជូនប្រជាជន បានច្រើនជាងគេ នៅក្នុងតំបន់ ច្រើនជាងប្រទេសអភិវឌ្ឍន៍មួយចំនួន ហើយអត្រាស្លាប់ក៏មានទាបជាងគេដែរ , នេះគឺជាកត្តាដែលអនុញ្ញាតឲ្យកម្ពុជា អាចបើកប្រទេសឡើងវិញបានយ៉ាងឆាប់រហ័ស ហើយអ្នកវិនិយោគសិង្ហបុរីក៏មានចំណាប់អារម្មណ៍មកវិនិយោគ នៅក្នុងព្រះរាជាណាចក្រកម្ពុជាដែរ ជាពិសេសនៅលើវិស័យពាណិជ្ជកម្ម លើវិស័យឃ្លាំងស្តុកទំនិញត្រជាក់ ក៏ដូចជាវិស័យដឹកជញ្ជូនផងដែរ។ សិង្ហបុរី ក៏បន្ត គាំទ្រនិង ជំរុញពង្រឹងពង្រីកកិច្ចសហប្រតិបត្តិការ ជាពិសេសទ្វេភាគី រវាងប្រទេសទាំងពីរ និងគាំទ្រកម្ពុជាជាប្រធានអាស៊ាន៕SRP

ខេត្តសៀមរាប៖ស្ត្រីម្នាក់បានសម្រេចដាក់ពាក្យបណ្ដឹងប្ដឹងលោកឃឹម ហ្វីណង់ អាយុប្រហែល ៣៥ ឆ្នាំមានមុខរបរ ជាអភិបាលស្រុកបន្ទាយស្រី បច្ចុប្បន្ននៅភូមិបន្ទាយចាស់ សង្កាត់ស្លក្រាម ក្រុងសៀមរាប ខេត្តសៀមរាប ទៅតុលាការខេត្តសៀមរាប ពីបទ ញុះញង់ រំលោភលើកម្មសិទ្ធិឯកជន និងពីបទ មិនគោរពតាមសេចក្ដីសម្រេចរបស់តុលាការ។

នេះបើយោងតាមពាក្យបណ្ដឹងដែលអង្គភាពសារព័ត៌មានសៀមរាបប៉ុស្តិ៍ ទើបទទួលបាននៅល្ងាចថ្ងៃទី ១៦ ខែកុម្ភៈឆ្នាំ ២០២២ នេះ។
ម្ចាស់បណ្ដឹងមានឈ្មោះលី អ៊ុំអេង ភេទស្រីអាយុ៥១ ឆ្នាំ មុខរបររកស៊ី បច្ចុប្បន្ននៅភូមិខ្នារសង្កាត់ជ្រាវ ក្រុងសៀមរាប ខេត្តសៀមរាប។

សូមបញ្ចាក់ផងដែរថាក្រៅពីប្ដឹងលោក ឃឹម ហ្វីណង់ ទៅតុលាការខេត្តសៀមរាប លោកស្រី លី អ៊ុំអេង គាត់បានដាក់ពាក្យបណ្ដឹងលោក ឃឹម ហ្វីណង់ ទៅអភិបាលខេត្តសៀមរាប ពីបទញុះញង់ រំលោភលើកម្មសិទ្ធិឯកជន និងមិនគោរពតាមសេចក្ដីសម្រេចរបស់តុលាការផងដែរ៕SRP

ខេត្តកំពង់ចា៖លោកស្រី​ តោ ពិឡា ទីប្រឹក្សាក្រសួងពាណិជ្ជ និងជាប្រធាន​ក្រុមការងារ​ចុះជួយ​​ឃុំ​បឹងណាយ​ នៅថ្ងៃទី​១៥​ ​ខែកុម្ភៈ​ ឆ្នាំ​២០២២​នេះ​ បាន​អញ្ជើញ​​រៀបចំ​ពិធី​​ក្រុងពលីបញ្ចុះ​បឋម​​សិលា​​កសាងស្នាក់ការ​គណបក្ស​ប្រជាជន​​​កម្ពុជា ឃុំ​​​បឹងណាយ ស្រុកព្រៃឈរ ខេត្តកំពង់ចាម ដោយ​មាន​ការ​អញ្ជើញ​​​ចូលរួមពី​លោកអភិបាល​រង​​ស្រុក ​​ក្រុម​ប្រឹក្សា​ឃុំ សាខាបក្ស​ភូមិ ​​និង​សមាជិក​ សមា​ជិកា​​បក្ស​ប្រជាជន​​កម្ពុជា​​ជាច្រើន​​​​រូបទៀត​​​ផង។

លោកស្រី​ តោ ពិឡា មានប្រសាសន៍ពាំនាំ​​ការសួរ សុខទុ​ក្ខ​​ពី សម្តេចហ៊ុន សែន លោកប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម ​ដែលជា​និច្ច​កាលតែង​តែ​យក​ចិត្ត​ទុក​ដាក់​​ ដល់ប្រជាពលរដ្ឋ​​​ ជួបការ​លំបាក​ដើម្បី​​ធ្វើឱ្យ​​​ប្រជាពលរដ្ឋ​​ រស់នៅ​​ប្រកបដោយ​​​សុខ​សន្តិ​ភាព​​និងការ​​អភិវឌ្ឍរីកចម្រើន។ ​

លោកស្រី​ បាន​បន្ត​ទៀតថា ​ពិធីក្រុង​ពលី​បញ្ចុះ​​បឋម​​សិលា​សាង​សង់​​​​អគារ​ស្នាក់​ការ​គណៈ​ប្រជាជនកម្ពុជា​​ ឃុំ​បឹងណាយនេះ ជា​សមិទ្ធផល​ថ្មីមួយ​ទៀត​ បង្ហាញ​ពី​ស្មារតី​សាមគ្គី​​​ភាពរបស់​មូលដ្ឋាន​ជាមួយ​ក្រុម​ការងារ​ ដែល​សបញ្ជាក់យ៉ាងច្បាស់​អំពីភាពរីកចម្រើន​​ របស់​គណ​បក្ស​ ដូច្នេះ​ហើយ​សមាជិក សមា​ជិកា គណ​បក្ស​ប្រជាជន​​កម្ពុជា​​ ទាំងអស់ ត្រូវតែ​​ទៅ​បោះ​ឆ្នោត​​​ នាពេលខាងមុខនេះឱ្យ​បាន​គ្រប់ៗ​គ្នា។

ក្នុង​ឱកាស​នោះដែរ លោកស្រី​ បានអញ្ជើញចុះពិនិត្យផ្លូវដី១ខ្សែ ប្រវែង២០០ម៉ែត្រ និងបានយកអំណោយជូនលោកតា លោកយាយ ដែរមានជីវភាពខ្វះខាតផងដែរ។

គួរ​បញ្ជាក់​ថា​ ទីស្នាក់ការគណបក្សថ្មីដែរចាប់ផ្តើមសាងសង់នេះ មានទំហំ១២ម៉ែត្រ គុណ​១២ម៉ែត្រ ​ប្រក់​​​ក្បឿង​ ​​​​ក្នុងគម្រោង​​​​អស់​ទឹកប្រាក់​ចំនួន​៤ម៉ឺន​​ដុល្លារ ​​និង​មានរបងព័ទ្ធ​ជុំវិញ​​៕SRP

ភ្នំពេញ​៖សម្ដេច ស ខេង បានសម្រេចដកតំណែងប្រធាន អនុប្រធាន​ពន្ធនាគារ​ខេត្តស្ទឹងត្រែង​ និងមន្ត្រីចំនួន​ ៣នាក់ផ្សេងទៀត ឱ្យទៅ​បម្រើ​ការងារ​ថ្មី​នៅ​អគ្គនាយកដ្ឋាន​ពន្ធនាគា​រ​ នៃក្រសួងមហាផ្ទៃ។ ការដកតំណែងនេះ​ គឺបន្ទាប់ពីកេីតមានរឿងអាស្រូវជាច្រេីននៅក្នុងពន្ធនាគារខេត្តស្ទឹងត្រែង។ នៅថ្ងៃទី១៧​ ខែកុម្ភ:​ ឆ្នាំ២០២២​ នឹងធ្វេីការផ្ទេរតំណែងប្រធាន​ពន្ធនាគារ​ខេត្តស្ទឹងត្រែង​។

សម្តេចក្រឡាហោម​ ស​ ខេង​ ឧបនាយករដ្ឋមន្ត្រី​ រដ្ឋមន្ត្រីក្រសួងមហាផ្ទៃ​ បានចេញប្រកាសផ្ទេរភារកិច្ចមន្ត្រីពន្ធនាគារខេត្តស្ទឹងត្រែង​ ចំនួន​ ៥រូប​ មានដូចជា​ :

​១​.​ លោក​ឧ​ត្ត​ម​អគ្គា​អនុរក្ស​ថ្នាក់​លេខ​២ ឈុន ដា​រ៉ា ពី​ប្រធាន​ពន្ធនាគារ​ខេត្តស្ទឹងត្រែង​ឱ្យទៅ​បម្រើ​ការងារ​ថ្មី​នៅ​អគ្គនាយកដ្ឋាន​ពន្ធនាគា​រ​។​
២​.​ លោក​ឧ​ត្ត​ម​អគ្គា​អនុរក្ស​ថ្នាក់​លេខ​៣ រស់ សុធា ឱ្យទៅ​បម្រើ​ការងារ​នៅ​អគ្គនាយកដ្ឋាន​ពន្ធនាគា​រ​។​
៣.​ លោក​វីរៈ​អគ្គា​អនុរក្ស​ថ្នាក់​លេខ​១ ជា សុជាតិ ពី​អនុប្រធាន​ពន្ធនាគារ​ខេត្តស្ទឹងត្រែង​ឱ្យទៅ​បម្រើ​ការងារ​នៅ​អគ្គនាយកដ្ឋាន​ពន្ធនាគា​រ​។
៤​.​ លោក​វីរៈ​អគ្គា​អនុរក្ស​ថ្នាក់​លេខ​១ ប៉ិន សំ​អូន ពី​ប្រធានការិយាល័យ​បណ្ដុះបណ្ដាល​វិជ្ជាជីវៈ​និង​មុខរបរ​ពន្ធនាគារ​ខេត្តស្ទឹងត្រែង​ឲ្យ​ទៅ​បម្រើការ​នៅ​នៅ​អគ្គនាយកដ្ឋាន​ពន្ធនាគា​រ។
​៥.​ លោក​អគ្គានុរក្ស​ថ្នាក់​លេខ​១ លាង សំអឿន ពី​ប្រធាន​ផ្នែក​ទិន្នន័យ​និង​បណ្ណសារ​នៃ​ពន្ធនាគារ​ខេត្ត​ឱ្យទៅ​បម្រើ​ការងារ​នៅ​អគ្គនាយកដ្ឋាន​ពន្ធនាគា​រ​។​ រីឯ​ការតែងតាំង​មន្ត្រី​ពន្ធនាគារ​ថ្មី​ចំនួន​ពីរ​រូប​ ​គឺ​លោក​ឧ​ត្ត​ម​អគ្គានុរក្ស​ថ្នាក់​លេខ ៣ ប្រាជ្ញ សុ​ភី ឲ្យ​កាន់​មុខតំណែង​ជា​ប្រធាន​ពន្ធនាគារ​ខេត្តស្ទឹងត្រែង​។​ លោក​វរៈ​អគា​នុ​រក្ស​ថ្នាក់​លេខ​១ រិ​ទ្ធ ឌី​ណា ឲ្យ​កាន់តំណែង​ជា​អនុប្រធាន​ពន្ធនាគារ​ខេត្តស្ទឹងត្រែង​៕SRP

ខេត្តបាត់ដំបង៖លោកសុខ លូ អភិបាលខេត្តបាត់ដំបង បានឲ្យដឹងថាទោះបីខេត្តបាត់ដំបង ជាខេត្តកសិកម្មពិតមែន តែក៏នៅមានបញ្ហាផងដែរ គឺមានការខ្វះខាតរោងចក្រ ឬសិប្បកម្មកែឆ្នៃផលិតផលកសិកម្ម ហើយនេះជាកង្វល់របស់ខេត្ត។

លោកបានស្នើដល់ ឯកអគ្គរដ្ឋទូតនៃសាធារណរដ្ឋសហព័ន្ធ អាល្លឺម៉ង់ប្រចាំនៅប្រទេសកម្ពុជា ជួយជំរុញផ្សព្វផ្សាយដល់អ្នកវិនិយោគទុន ឱ្យមកធ្វើការវិនិយោគទុនមកខេត្តបាត់ដំបង និងបន្តជួយ លើគំរោងផ្សេងទៀតនៅខត្តបាត់ដំបង។

ការស្នើនេះធ្វើឡើងនៅរសៀលថ្ងៃអង្គារទី១៥ ខែកុម្ភៈម្សិលមិញ ក្នុងឱកាសអនុញ្ញាត ទទួលជួបសម្ដែងការគួរសមជាមួយ លោក Christian Berger ឯកអគ្គរដ្ឋទូតនៃសាធារណរដ្ឋ សហព័ន្ធអាល្លឺម៉ង់ប្រចាំនៅប្រទេសកម្ពុជា ដើម្បីពិភាក្សាការងារ ទាក់ទងនឹងកិច្ចសហប្រតិបត្តិការ និងកម្មវិធីគាំទ្រដែលត្រូវបានកំពុង និងបន្តអនុវត្តជាមួយនឹងរដ្ឋបាលខេត្តបាត់ដំបង។

លោកសុខ លូ បានមានប្រសាសន៍ស្វាគមន៍ដល់ លោក ឯកអគ្គរដ្ឋទូតនៃសាធារណរដ្ឋសហព័ន្ធអាល្លឺម៉ង់ និងគណៈប្រតិភូ ដែលបានអញ្ជើញមកទស្សនៈកិច្ច នៅខេត្តបាត់ដំបង ហើយគណៈប្រតិភូមានការចាប់អារម្មណ៍ ថាជាខេត្តដែលមានសក្តានុពលលើវិស័យកសិកកម្ម ទេសចរណ៍ និងវិស័យមួយចំនួនទៀត។

លោក Christian Berger បានលើកឡើងផងដែរថា អាល្លឺម៉ង់ តាមរយៈអង្គការ GIZ បានធ្វើការងារជាច្រើននៅក្នុងខេត្តបាត់ដំបង ក្នុងនោះក៏មានកម្មវិធី វិមជ្ឈរកា និងវិសហមជ្ឈការ និងការផ្តល់សេវា ជូនប្រជាពលរដ្ឋ។

លោកក៏បានលើកឡើង និងមានការចាប់អារម្មណ៍ ទៅការៀបចំសោភ័ណភាព ក្នុងក្រុង ព្រោះខេត្តបាត់ដំបង មានលក្ខណៈពិសេសជាងខត្តដ៏ទៃ តាមខេត្តដែល លោក ធ្លាប់ទៅដល់ ហើយខេត្តបាត់ដំបងនេះ ជាខេត្តមរតក ដែលសម្បូណ៍ទៅដោយសំណង់អគារបុរាណប្រវត្តិសាស្រ្ត ជាច្រើន។

លោកសុខ លូ ក៏បានលើកឡើងអំពីផែនការរបស់ខេត្ត ក្នុងការរៀបចំសោភ័ណភាព អនាម័យ បរិស្ថាន និងសណ្តាប់ធ្នាប់ នៅក្នុងខេត្តបាត់ដំបង ជាពិសេសទៅលើការគ្រប់គ្រងកាកសំណល់រឹង គឺសំរាម ជនអាណាថា និងសំណង់អាណាធិបតេយ្យ ជាដើម៕SRP

សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា រួមជាមួយ ឯកឧត្តម មិកាមិ ម៉ាសាហ៉ីរុ ឯកអគ្គរដ្ឋទូតជប៉ុនប្រចាំនៅកម្ពុជា នៅព្រឹកថ្ងៃពុធ ទី១៦ ខែកុម្ភៈ ឆ្នាំ២០២២ នឹងអញ្ជើញសម្ពោធដាក់ឱ្យប្រើប្រាស់ស្ពាន៧កន្លែង ស្ថិតនៅក្នុងខេត្តក្រចេះ និងព្រៃវែង ជាជំនួយរបស់រដ្ឋាភិបាលជប៉ុន តម្លៃប្រមាណ ៣៥លានដុល្លារអាមេរិក។

ស្ពានទាំង ៧កន្លែងនេះ គឺជាគម្រោងសាងសង់ស្ពានឡើងវិញបន្ទាន់នៅតំបន់ទាំងនោះដែលប្រឈមនឹងទឹកជំនន់ ស្ថិតនៅទីតាំងភូមិសាស្រ្តខេត្តក្រចេះ និងខេត្តព្រៃវែង ដែលស្ពានទាំងអស់មានប្រវែងសរុប ៦៧០ម៉ែត្រ និងផ្លូវតភ្ជាប់ស្ពានមានប្រវែងសរុប ៣,៤២៤ម៉ែត្រ។

ស្ពានដែលបានសាងសង់នេះ រួមមាន៖
– ស្ពានចំនួន៥កន្លែង ស្ថិតនៅក្នុងខេត្តក្រចេះ តាមបណ្តោយផ្លូវជាតិលេខ៧៣ រួមមាន៖ ស្ពានព្រែកសណ្តាន់ ប្រវែង ៣៥ម៉ែត្រ, ស្ពានព្រែកឬស្សី ប្រវែង ៦២ម៉ែត្រ, ស្ពានអន្លង់ឃ្លេ ប្រវែង ៤៨ម៉ែត្រ, ស្ពានព្រែកឆ្លូង ប្រវែង ១៤០ម៉ែត្រ, និងស្ពានពាមទេរប្រវែង ១៧៥ម៉ែត្រ។

– ស្ពានចំនួន២កន្លែង ស្ថិតនៅក្នុងខេត្តព្រៃវែង តាមបណ្តោយផ្លូវជាតិលេខ១១ រួមមាន៖ ស្ពានបាបោងលេខ១ ប្រវែង ១០៥ម៉ែត្រ និងស្ពានបាបោងលេខ២ ប្រវែង ១០៥ម៉ែត្រ។

គម្រោងខាងលើនេះ បានស្ថាបនាច្រាំងការពារការហូរច្រោះទឹកជំនន់ និងត្រូវបានស្ថាបនាជាប្រភេទស្ពានបេតុងក្រាលកៅស៊ូ AC កម្រាស់ ១០សង់ទីម៉ែត្រ។ គម្រោងសាងសង់ស្ពានទាំង ៧កន្លែងនេះ គឺជាហិរញ្ញប្បទានឥតសំណងពីរដ្ឋាភិបាលនៃប្រទេសជប៉ុន ជូនដល់រាជរដ្ឋាភិបាលកម្ពុជា។

សមិទ្ធផលថ្មីនេះ គឺជាចំណងដៃដ៏ថ្លៃថ្លាមិនអាចកាត់ថ្លៃបាន ដែលកើតចេញពីចំណងមិត្តភាព និងកិច្ចសហប្រតិបត្តិការរវាង រាជរដ្ឋាភិបាលកម្ពុជា និងរាជរដ្ឋាភិបាលនៃប្រទេសជប៉ុន ជូនដល់បងប្អូនប្រជាពលរដ្ឋ ខេត្តក្រចេះ ខេត្តព្រៃវែង ព្រមទាំងបងប្អូន ប្រជាពលរដ្ឋនៅទូទាំងប្រទេស ដើម្បីប្រើប្រាស់ជាប្រយោជន៍ទូទៅ និងយូរអង្វែង៕SRP

ខេត្តបាត់ដំបង៖លោកសុខ លូ អភិបាលខេត្តបាត់ដំបង បានព្រមានផ្ដាច់កុងត្រា ក្រុមហ៊ុនប្រមូលសំរាម បើសិនមិនគោរពគោលការណ៍។
អភិបាលខេត្តបានព្រមានថាបើសិនជាក្រុមហ៊ុនប្រមូលសំរាម មិនបានគោរពតាមគោលការណ៍ និងកាតព្វកិច្ចរបស់ខ្លួនទេ នឹងឈានទៅរកការផ្ដាច់កុងត្រា ទាំងស្រុងតែម្ដង។

លោកលើកឡើងថាក្រុមហ៊ុនសំរាមនៅក្នុងខេត្ត ក៏ត្រូវមានកាតព្វកិច្ចមួយ គឺយកសំរាមឲ្យបានទៀងទាត់ និងឲ្យអស់នៅតាមមន្ទីរអង្គភាព និងនៅតាមសាធារណៈនានា ឲ្យបានកាន់តែឆាប់រហ័ស និងស្អាតផងដែរ។ 

ការព្រមាននេះធ្វើឡើង នៅក្នុងឱកាស ដឹកនាំកិច្ចប្រជុំណែនាំអនុវត្តផែនការធ្វើឲ្យប្រសើរឡើងនូវសោភ័ណភាព បរិស្ថាន អនាម័យទូទាំងខេត្តបាត់ដំបង នៅថ្ងៃអង្គារ ទី១៥ ខែកុម្ភៈ ឆ្នាំ២០២២នេះ។

លោកសុខ លូ ក៏ប្រាប់អភិបាលក្រុង ស្រុក រៀបចំកិច្ចប្រជុំជាមួយជាមួយ គណៈអភិបាល ដើម្បីស្វែងរកក្រុមហ៊ុនវិនិយោគ ផ្នែកប្រមូលសំរាមក្នុងស្រុក និងស្វែងរកទីលាន ចាក់សំរាមដែលទំនេរ ហើយចំពោះស្ទឹង ប្រឡាយ អូរគឺដាច់ខាតមិន ត្រូវមានសំរាមឡើយ និងនាំគ្នាចូលរួមក្នុងការរើសសំរាម ជាប្រចាំ ដោយមិនចាំបាច់មានទិវាអនាម័យអ្វីឡើយ ដើម្បីជាគំរូដល់ប្រជាពលរដ្ឋ និងដើម្បីសហគមន៍ស្អាតទាំងអស់គ្នា។

លោកសុខ លូ បានលើកឡើងថា ចំពោះកិច្ចការងារសោភ័ណភាព បរិស្ថាន អនាម័យ មិនមែនសំដៅតែក្នុងក្រុងបាត់ដំបង តែមួយមុខប៉ុណ្ណោះទេ ពោលគឺត្រូវធ្វើទូទាំងខេត្តបាត់ដំបងតែម្ដង ក្នុងនោះមន្ទីរអង្គភាពជុំវិញខេត្ត ត្រូវតែមានកាតព្វកិច្ចមួយដ៏សំខាន់ គឺត្រូវតែមានការរៀបចំជាធុងសំរាម និងកន្លែងដាក់សំរាម បានត្រឹមត្រូវ ដើម្បីរៀបចំឲ្យក្រុមហ៊ុនប្រមូលសំរាមអាចប្រមូលសំរាមបានកាន់តែរហ័ស និងងាយស្រួល។ 

លោកសុខ លូ បានបន្តទៀតថា បច្ចុប្បន្ននេះ ចាប់ផ្ដើមមានផ្លែផ្កាជាបណ្ដើរៗហើយ ដោយមានការប្រែប្រួលច្រើន ជាពិសេសបរិស្ថានជុំវិញផ្សារធំបាត់ដំបង(ផ្សារណាត់) ចាប់ផ្ដើមមានការទុកដាក់សំរាម មានរបៀបរៀបរយ ជាងមុន។ ដោយលែងមានសំរាម សល់ទុកចោលរាប់ថ្ងៃដូចមុនទៀតឡើយ ដូចនេះប្រជាពលរដ្ឋ ត្រូវតែបន្តចូលរួមជាមួយអាជ្ញាធរ ដើម្បីសោភ័ណភាពទីក្រុងរបស់យើង ហើយឥលូវនេះ យើងកំពុងសិក្សាអំពីការដាក់កាម៉េរ៉ា តាមដងផ្លូវដោយក្នុងគោលបំណងទី១ គឺដើម្បីពិនិត្យមើលសុខសុវត្ថិភាពនៅតាមដងផ្លូវ ទី២ពិនិត្យមើលអ្នកចោលសំរាម នៅតាមទីសាធារណៈ ដើម្បីពិន័យអ្នកដែលចោលសំរាម ផ្ដេសផ្ដាសនៅតាមសាធារណៈ។

លោក ក៏បានក្រើនរំលឹកដល់អភិបាលក្រុងស្រុក ត្រូវតែមានការប្រជុំច្បាស់លាស់ជាមួយចៅសង្កាត់ មេឃុំ មេភូមិ ដើម្បីឲ្យមានការផ្សព្វផ្សាយដល់ប្រជាពលរដ្ឋ ស្ដីពីការចាក់វ៉ាក់សាំងកូវីដ-១៩ ដូសជំរុញ ហើយបើសិនជាអាច ត្រូវតែរៀបចំក្រុមគ្រូពេទ្យចុះទៅចាក់វ៉ាក់សាំងដល់លំនៅដ្ឋានរបស់គាត់ ព្រោះឥឡូវនេះ សញ្ញាណនៃជំងឺកូវីដ-១៩ ប្រភេទអូមីក្រុងកំពុងតែផ្ទុះជាសហគមន៍ធ្ងន់ធ្ងរ នៅឯរាជធានីភ្នំពេញ ដូចនេះយើងត្រូវត្រៀមលក្ខណៈជាបន្ទាន់ទប់ស្កាត់ឲ្យដោយនាំគ្នាចូលរួមចាក់វ៉ាក់សាំងដូសជំរុញទាំងអស់គ្នា៕SRP