ខេត្តសៀមរាប៖«សម្រាប់ខ្ញុំផ្ទាល់ ឯកឧត្តម ហ៊ុន ម៉ានី គឺជាថ្នាក់ដឹកនាំវ័យក្មេង គម្រូ ដែលមានចក្ខុវិស័យ ឆន្ទៈក្នុងការដឹកនាំ និងមានសមត្ថភាពខ្ពស់ ហើយលើសពីនោះថែមទៀត ឯកឧត្តមពិតជាបានគិតគូរពីអនាគតយុវជនជំនាន់ក្រោយ និងប្រទេសជាតិទាំងមូល» ។ នេះជាការលើកឡើងរបស់ កញ្ញា យង់ វារី ជាសិស្សដែលទើបបញ្ចប់ការសិក្សាពីវិទ្យាល័យប្រាសាទបាគង ខេត្តសៀមរាប។

ទន្ទឹមនឹងការលើកឡើងខាងលើ កញ្ញា យង់ វារី ក៏បានបង្ហាញពីក្តីរំភើប និងមោទនភាព ដែលបានចូលរួមដោយផ្ទាល់ និងជួបឯកឧត្តម ហ៊ុន ម៉ានី ក្នុងកម្មវិធីកិច្ចពិភាក្សាសៀវភៅ៖ ក្តីសង្ឃឹម ហ៊ុន ម៉ានី។ កញ្ញាបានរៀបរាប់បន្ថែមថា៖ «ខ្ញុំបានតាមដានសកម្មភាពរបស់ ឯកឧត្តមចាប់តាំងពីការរៀបចំព្រឹត្តិការណ៍អង្គរសង្រ្កាន្តក្នុងរយៈពេល៦ឆ្នាំ ហើយឯកឧត្តមបាននាំយកនូវផលប្រយោជន៍ជូនប្រជាជន តាមរយៈការផ្ដល់ភាពជឿជាក់ ឱកាស និងការជ្រោមជ្រែងលើការងារស្ម័គ្រចិត្ត ព្រមទាំងការផ្តួចផ្តើមផ្តល់ជាវេទិកាសម្រាប់យុវជន ដើម្បីឱ្យពួកយើងមានក្ដីស្រម៉ៃខ្ពស់ និងការតាំងចិត្តខ្ពស់សម្រេចនូវក្ដីស្រម៉ៃរបស់ខ្លួន»៕SRP

ខេត្តកំពង់ចាម​៖លោកខ្លូត​ ចិន្ដា​ អភិបាល​រងខេត្តកំពង់ចាម​ បាន​ស្នើដល់​មន្រ្តី​អប់រំ​ទាំងអស់​ ឲ្យារួមគ្នាពិភាក្សា រិះរក និងកំណត់អំពីតួនាទីរបស់អ្នកពាក់ព័ន្ធ ចាប់ពីថ្នាក់ខេត្ត រហូតដល់ថ្នាក់ស្រុក ឃុំ កម្រង សាលារៀន និងគណៈគ្រប់គ្រងសាលារៀន និងបង្កើតយន្តការនានា ឬពង្រឹងយន្តការ ដែលមានស្រាប់នៅថ្នាក់ ឃុំ និងសាលារៀន ដើម្បីអនុវត្តឲ្យមានភាព ស៊ីចង្វាក់ និងប្រទាក់ក្រឡាគ្នា ក្នុងការទប់ស្កាត់ លុបបំបាត់ ករណីហិង្សាលើកុមារឲ្យបានទាន់ពេលវេលា។​

ក្នុង​កិច្ច​ប្រជុំ​ចាប់ផ្ដើម​អនុវត្ត​គម្រោង​លុបបំបាត់​អំពើ​ហិង្សា​លើ​កុមារ​ នៅ​ក្នុង​សាលារៀន​ នៅ​មន្ទីរ​អប់រំ​ យុវជន​ និង​កីឡា​ខេត្តកំពង់ចាម​ ក្នុងថ្ងៃពុធនេះ អភិបាល​រងខេត្ត​ បានលេីកឡេីងថា​​៖ បញ្ហាអំពើហិង្សាក្នុង គ្រួសារ ក្នុងសង្គម ការរំលោភបំពាន និងកេងប្រវ័ញ្ចនានា គ្រប់ទម្រង់ និងគ្រប់រូបភាព នៅតែជាបញ្ហាចោទ ជាពិសេសនៅតាមសហគមន៍។​ ចំពោះអំពើហិង្សាលើកុមារក្នុងសហគមន៍ ក៏ដូចកុមារនៅតាមសាលារៀន នៅតែកើត មានជាហូរហែ ទោះមានករណីច្រើនក្តី តិចក្តី នៅតាមតំបន់ខុសៗគ្នា។ ករណីនេះ ធ្វើឲ្យប៉ះពាល់ដោយ ផ្ទាល់ដល់ សុខភាព ការអភិវឌ្ឍរាងកាយ បញ្ញា ស្មារតី និងការអប់រំរបស់កុមារក្នុងបច្ចុប្បន្ន និងប៉ះពាល់ ដល់ការអភិវឌ្ឍប្រកបដោយសក្តានុពល របស់កុមារនៅពេលពេញវ័យនាថ្ងៃអនាគត។

បើតម លោកជំទាវ​ អន​ ហេង​លក្ខិណា​​ ក៏បាន​សម្តែង​នូវ​ការអបអរសាទរ ចំពោះវត្តមានគម្រោង “លុបបំបាត់អំពើហិង្សា លើកុមារនៅក្នុងសាលារៀន” ក្នុងខេត្តកំពង់ចាម ដែលឧបត្ថមថវិកា ដោយក្រសួងការបរទេសជប៉ុន និងអនុវត្តដោយអង្គការសង្គ្រោះកុមារ សហការជាមួយក្រសួងអប់រំ យុវជន និងកីឡា ជាពិសេស មន្ទីរអប់រំ យុវជន និងកីឡាខេត្ត ដែលបានអនុវត្តនៅសាលាបឋមសិក្សាគោលដៅទាំង៤៣ ស្ថិតក្នុងកម្រងទាំង៨ នៃស្រុកកងមាស ខេត្តកំពង់ចាម​ គឺពិតជាបានរួមចំណែកដល់កិច្ច ខិតខំប្រឹងប្រែងរបស់រាជរដ្ឋាភិបាលកម្ពុជា ក៏ដូចជាមន្ទីរអប់រំ ការិយាល័យអប់រំ និងភាគីពាក់ព័ន្ធនានា នៅថ្នាក់ក្រោមជាតិ ដើម្បីសម្រេចឲ្យបាននូវការលើកកម្ពស់ ការគោរពសិទ្ធិកុមារ និងឈានសម្រេចឲ្យកុមារ ទទួលបានការអភិវឌ្ឍប្រកបដោយសក្តានុពល នៅពេលពេញវ័យ៕SRP

ខេត្តសៀមរាប៖សណ្ឋាគារខេអឹមរីស្តារ បានរៀបចំពិធីបើកសម្ពោធដំណើរការ របស់ខ្លួននៅក្រុងសៀមរាប។

ពិធីសម្ពោធបានធ្វើឡើងនៅល្ងាចថ្ងៃចន្ទទី ០៨ ខែសីហា ឆ្នាំ ២០២២ ដែលស្ថិតនៅ ភូមិជន្លង់សង្កាត់សាលាកំរើក ក្រុងសៀមរាបខេត្តសៀមរាប ផ្លូវចូលតាមមុខទីតាំងតារាងបាល់ជន្លង់ ១០០ ម៉ែត្រ។

ពិធីសម្ពោធសណ្ឋាគារខេអឹមរីស្តារ ដោយមានការចូលរួម ពីសំណាក់ឯកឧត្តមលោកជំទាវលោកឧកញ៉ាលោកលោកស្រីជាភ្ញៀវកិត្តិយសយយ៉ាងច្រើនកុះករ។

សណ្ឋាគារខេអឹមរីស្តារ សូមថ្លែងអំណរគុណឯកឧត្ដមលោកជំទាវលោកលោកស្រីអ្នកនាងកញ្ញាជាភ្ញៀវកិត្តិយសទាំងអស់ដែលអញ្ជើញចូលរួមពិធីសម្ពោធពិសាអាហារយ៉ាងសប្បាយរីករាយ៕SRP

ខេត្តកំពង់ចាម៖សម្ដេចស ខេង បានថ្លែងថា ក្រសួងមហាផ្ទៃ បានធ្វើកំណែទម្រង់លើកងកម្លាំងនគរបាល ជាប់ជាប្រចាំ តាមរយៈ ការបណ្តុះបណ្តាល ស្របតាមគោលនយោបាយកំណែទម្រង់ កងកម្លាំងប្រដាប់អាវុធ របស់រាជរដ្ឋាភិបាល ក្រោមការដឹកនាំប្រកបដោយគតិបណ្ឌិតរបស់ សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា ដោយបានផ្ដោតសំខាន់ទៅលើការរធ្វើទំនើបកម្ម និងការពង្រឹងសមត្ថភាពវិជ្ជាជីវៈ នៃកងកម្លាំងនគរបាលជាតិ ឲ្យស្របទៅនឹងការវិវត្ត នៃស្ថានការណ៍សន្តិសុខជាតិ និងអន្តរជាតិ ព្រមទាំងឆ្លើយតបទៅនឹងតម្រូវការ នៃអង្គភាពនគរបាល។

ក្នុងឱកាសបើកការដ្ឋានស្ថាបនាផ្លូវបេតុង ប្រព័ន្ធលូបង្ហូរទឹក អគារស្នាក់នៅ និងសួរសុខទុក្ខសិស្សនគរបាល វគ្គបណ្តុះបណ្តាលកម្រិតបឋមជំនាន់ទី១៥ លើកទី២ នៅសាលានគរបាលជាតិភូមិភាគ២ ស្ថិត​ក្នុង​ភូមិផ្កាយព្រឹក ឃុំមៀន ស្រុកព្រៃឈរ ខេត្តកំពង់ចាម នៅថ្ងអង្គារនេះ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ មានប្រសាសន៍បន្ថែមថា ការបណ្តុះបណ្តាល មន្ត្រីនគរបាលជាតិ គឺជាការងារចាំបាច់​ ដែលត្រូវតែបន្តធ្វើជាប់ជាប្រចាំ ដើម្បីធ្វើឲ្យកងកម្លាំងនគរបាលជាតិ មានចំណេះដឹង គ្រប់គ្រាន់លើផ្នែកទ្រឹស្ដី ជំនាញបច្ចេកទេស និងអាកប្បកិរិយាល្អ ក្នុងការរក្សាឲ្យបានរឹងមាំនូវខឿនសន្តិសុខជាតិ សណ្តាប់ធ្នាប់សាធារណៈ និងសុវត្ថិភាពសង្គម ដែលជាមូលដ្ឋានគ្រឹះ នៃការអភិវឌ្ឍ ជាតិលើគ្រប់វិស័យ។​

សម្តេច ក៏បានថ្លែងអំណរគុណ ចំពោះ ឯកឧត្ដមកអភិបាល ខេត្តកំពង់ចាម ឯកឧត្ដម អភិបាលខេត្តត្បូងឃ្មុំ និងឯកឧត្ដម អភិបាលខេត្តស្វាយរៀង ដែលបានចូលរួមចំណែកជាមួយក្រសួងមហាផ្ទៃ កក្នុងការអភិវឌ្ឍសាលានគរបាលជាតិភូមិភាគ២នេះ។

សម្ដេចក៏បានថ្លែងកោតសរសើរ ចំពោះ កិច្ចខិតខំប្រឹងប្រែង របស់ នាយដ្ឋានបណ្តុះបណ្តាល និង សាលានគរបាលជាតិភូមិភាគ២ ក្នុងការបំពេញភារកិច្ចប្រកបដោយការទទួលខុសត្រូវ ព្រមទាំងគាំទ្រនូវកម្មវិធីកំណែទម្រង់ របស់បណ្ឌិត្យសភា ដើម្បីកសាងវប្បធម៌គុណភាព​។

គួរ​បញ្ជាក់​ថា​ មុនការចាប់ផ្តើម នៃកម្មវិធីសំណេះសំណាល ជាមួយសិស្សនគរបាល សម្តេចក្រឡាហោម និងប្រតិភូអមដំណើរ ក៏បានអញ្ជើញទស្សនាទិដ្ឋភាពទូទៅ នៃសាលានគរបាលជាតិភូមិភាគ២ ព្រមទាំង អញ្ជើញបើកការដ្ឋានសាងសង់ផ្លូវបេតុងប្រវែង ២.០៣០ម៉ែត្រ ប្រព័ន្ធលូ បង្ហូរទឹក ៥៥០ម៉ែត្រ ដែលជាអំណោយរបស់ ឯកឧត្ដម អ៊ុន ចាន់ដា អភិបាល ខេត្តកំពង់ចាម និងអគារស្នាក់នៅ ចំនួន ២ខ្នង ប្រវែង១៣,៥០x៤៥ម៉ែត្រ ជាអំណោយ របស់ឯកឧត្ដម ជាម ច័ន្ទសោភ័ណ អភិបាលខេត្តត្បូងឃ្មុំ និងឯកឧត្ដមអភិបាល ខេត្តស្វាយរៀង ផងដែរ​៕SRP

ខេត្តសៀមរាប៖ជនសង្ស័យម្នាក់ត្រូវបានសមត្ថកិច្ចឃាត់ខ្លួន ករណី រួមភេទជាមួយអនីតិជន អាយុក្រោម១៥ឆ្នាំ។

យោងតាមរបាយការណ៍របស់សមត្ថកិច្ចខេត្តសៀមរាបបានឲ្យដឹងថា ជនសង្ស័យឈ្មោះ សា ភេត្រា ភេទប្រុសអាយុ១៥ឆ្នាំ ទីលំនៅភូមិគោកកណ្តាល ឃុំល្វាក្រាំង ស្រុក​វ៉ា​រិន ខេត្តសៀមរាប​។ ចំណែកជនរងគ្រោះ ឈ្មោះ ព.ស.ព ភេទ​ស្រី អាយុ ១៣ឆ្នាំ ទីលំនៅភូមិគោកកណ្តាល ឃុំល្វាក្រាំង ស្រុក​វ៉ា​រិន ខេត្តសៀមរាប​។​

របាយការណ៍បានបន្តថា ករណីរំលោភបានកើតឡើង ចំនួនបីលើក។ លើកទី១នៅអំឡុងឆ្នាំ២០២០ វេលាម៉ោង១៩ នៅចំណុចសំយ៉ាបផ្ទះកុមាររងគ្រោះ។​

លើកទី២នៅអំឡុងឆ្នាំ២០២១ វេលាម៉ោង២០ នៅចំណុចក្បែរបន្ទប់ទឹកផ្ទះកុមាររងគ្រោះ។​

លើកទី០៣ នៅថ្ងៃទី​០៥ ខែសីហា ឆ្នាំ២០២២ វេលាម៉ោង ២០ នៅចំណុចក្បែរទ្រុងមាន់ខាងក្រោយផ្ទះជនរងគ្រោះ (មិនបានសម្រេច)។​

បើតាមរបាយការណ៍បានបញ្ជាក់ថា ជនសង្ស័យ ត្រូវបាននគរបាលស្រុកវ៉ារិន បញ្ជូនទៅនគរបាលខេត្តសៀមរាប ដើម្បីបន្តនីតិវិធី៕SRP

ខេត្តសៀមរាប៖កម្មករម្នាក់បានទៅដកទូរស័ព្ទដែលកំពុងសាកថ្ម ត្រូវបានឆក់ស្លា..ប់ ក្នុងការ៉ាស់សាំងមួយកន្លែង។

ហេតុការណ៍បានកើតឡើងនៅវេលាម៉ោង១៧:១៥ នាទីថ្ងៃទី០៧ខែ សីហាឆ្នាំ២០២២ស្ថិតនៅភូមិ ទក្សិណត្បូង សង្កាត់គោកចក​​ ក្រុងសៀមរាប ក្នុងការដ្ឋានស្ថានីយសក់សាំងមួយកន្លែង។

សមត្ថកិច្ចបានឲ្យដឹងថា ជនរងគ្រោះ ឈ្មោះណេប់ ភាណិត ភេទប្រុស អាយុ២៣ឆ្នាំ មានទីលំនៅបច្ចុប្បន្ន ស្ថិតនៅភូមិ គោកឫស្សី ឃុំកែវពណ៌ ស្រុកពួក។

សមត្ថកិច្ចបន្តថា តាមការបំភ្លឺរបស់ឈ្មោះ ព្រះ ស្រី ភេទប្រុស អាយុ២៦ឆ្នាំ មុខរបរកម្មករ និងឈ្មោះ ហ៊ុន ហ៊ាប ភេទប្រុស អាយុ៣៩ឆ្នាំ មុខរបរ មេការសំណង់ បានរៀបរាប់ប្រហាក់ប្រហែលគ្នាថា វេលាម៉ោង១៦ និង០០នាទីថ្ងៃទី០៧ ខែសីហា ឆ្នាំ២០២២ ខ្លួននិងកម្មករផ្សេងទៀតបានកំពុងធ្វើការងារ ភា្លមនោះមេឃចាប់ផ្តើមធ្លាក់ភ្លៀង ក៏នាំគ្នាសម្រាក នៅក្នុងការរដ្ឋាន ក៏ស្រាប់តែមានកម្មករម្នាក់ឈ្មោះ ណេប់ ភាណិត (សព) បានយកទូរស័ព្ទរបស់គាត់ ទៅសាកថ្ម នៅចំណុចជាប់និងជញ្ជាំងរបងផ្ទះ ក្នុងការដ្ឋាន ដោយដោតសាកថ្មទុកចោលនៅទីនោះរួចគាត់ទៅធ្វើការងារ របស់គាត់វិញ។ មួយសន្ទុះគាត់បានដើរទៅយកទូរស័ព្ទគាត់ នៅកន្លែងសាកថ្មខាងលើ ដោយខ្លួនរបស់គាត់សើម និងពុំមានពាក់ស្បែកជើង ពេលដែលគាត់បានចាប់យកទូរស័ព្ទរបស់គាត់ ក៏ស្រាប់តែ ឆក់ជាប់តែម្ដង។ ភ្លាមៗ នោះមេជាង ឈ្មោះ ហ៊ុន ហ៊ាប បានរត់ទៅទាញបិទកុងតាក់អគ្គិសនី ហើយនាំគ្នាជួយសង្គ្រោះបឋម និងទាក់ទងទៅរថយន្តសង្គ្រោះបន្ទាន់ យកទៅសង្គោះនៅមន្ទីរពេទ្យមួយកន្លែងតាមបណ្តោយផ្លូវ៣០ម៉ែត្រ តែត្រូវបានស្លាប់ពេលបញ្ជូនដល់មន្ទីរពេទ្យ។

ករណីនេះក្រុមគ្រួសារ ក៏បានទទួលស្គាល់ថាសពពិតជាស្លាប់ដោយសារឆក់ខ្សែភ្លើងដោយខ្លួនឯងពិតប្រាកដមែន។

សមត្ថកិច្ចបញ្ជាក់ថា យោងតាមការបំភ្លឺពីសាក្សី ការពិនិត្យសាកសព គឺស្លាប់ដោយសារឆក់ខ្សែភ្លើង ពិតប្រាកដមែន។ បច្ចុប្បន្នសពជនរងគ្រោះត្រូវបានសមត្ថកិច្ចប្រគល់ជូនក្រុមគ្រួសារ ដើម្បីធ្វើបុណ្យតាមប្រពៃណី៕SRP

                             «លោកឧកញ៉ា ចេន ហ្ស៊ី»

ភ្នំពេញ៖អ្នកជំនួញជនជាតិចិនចូលសញ្ជាតិខ្មែរម្នាក់ ដែលមាន គោរមងារជា អ្នកឧកញ៉ា អាចធ្វើជាទីប្រឹក្សាថ្នាក់ដឹកនាំស្ថាប័នជាតិ នៃព្រះរាជាណាចក្រកម្ពុជារហូតដល់ទៅ៣នាក់ តែម្តង គឺ លោក ចេ ន ហ្ស៊ី (Chen Zhi) ដែលគេស្គាល់ថាជា ប្រធានក្រុមប្រឹក្សាភិបាល ក្រុមហ៊ុន Prince Holding Group ទទួលបានការតែងតាំង ជាទីប្រឹក្សា សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រី ក្រសួងមហាផ្ទៃ ផង , ទីប្រឹក្សា សម្តេចអគ្គមហាពញាចក្រី ហេង សំរិន ប្រធានរដ្ឋសភា នៃ ព្រះរាជាណាចក្រ កម្ពុជា នីតិកាលទី ៦ ផង និង ជាទីប្រឹក្សាផ្ទាល់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ផង ។

លោក ចេន ហ្ស៊ី (Chen Zhi) ជនជាតិចិនសញ្ជាតិចិនកើត ថ្ងៃទី១៦ ខែធ្នូ ឆ្នាំ ១៩៨៧ ( អាយុ៣៥ ឆ្នាំ ) នៅ ខេត្តហ្វូចៀន សាធារណរដ្ឋប្រជាមានិតចិនទទួលបានការផ្តល់ សញ្ជាតិខ្មែរ តាមសញ្ជាតូបនីយកម្ម ដោយ ព្រះរាជក្រឹត្យ លេខ នស / រកត /០២១៤/២០៩ ចុះ ថ្ងៃទី ១៧ ខែកុម្ភៈ ឆ្នាំ ២០១៤។

ប្រមាណជិត២ឆ្នាំក្រោយមកបន្ទាប់ពីទទួលបាន សញ្ជាតិខ្មែរនិងក្នុងនាមជាអ្នកជំនួញដ៏សកម្មនៅកម្ពុជា លោកចេន ហ្ស៊ី ក៏ទទួលបាន ការតែងតាំងគោរមងារជា ឧកញ៉ា ដោយ ព្រះរាជក្រឹត្យ លេខ នស / រកត /០២១៦/១៧៨ ចុះ ថ្ងៃទី ១១ ខែកុម្ភៈ ឆ្នាំ ២០១៦។

រយៈពេលប្រមាណមួយឆ្នាំ ក្រោយមកទៀត ឧកញ៉ា ចេន ហ្ស៊ី ក៏ទទួលបានការតែងតាំង ជាទីប្រឹក្សា ក្រសួងមហាផ្ទៃ មានឋានៈ ស្មើ អនុរដ្ឋលេខាធិការ ដោយពុំទទួលយកប្រាក់បៀវត្សរ៍ ដោយព្រះរាជក្រឹត្យ លេខ នស / រកត /០២១៧/១៨៧ ចុះ ថ្ងៃទី ២៣ ខែកុម្ភៈ ឆ្នាំ ២០១៧ ពោលគឺមានឋានៈ ជា« ឯកឧត្តម ឧកញ៉ា ចេ ន ហ្ស៊ី »។

ជាង២ ឆ្នាំក្រោយមក គឺក្រោយការបង្កើត រាជរដ្ឋាភិបាលកម្ពុជា នីតិកាល ទី៦ នៃ រដ្ឋសភា ឯកឧត្តម ឧកញ៉ា ចេន ហ្ស៊ី ក៏ ទទួលបានការតែងតាំង ជាទីប្រឹក្សា សម្តេច ក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រី ក្រសួងមហាផ្ទៃ ដោយ ព្រះរាជក្រឹត្យ លេខ នស / រកត /១២១៩/១៨០២ ចុះ ថ្ងៃទី ០៥ ខែធ្នូ ឆ្នាំ ២០១៩ តាមសេចក្តីក្រាបបង្គំទូលថ្វាយ របស់ សម្តេច អគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រ កម្ពុជា ។

ប្រមាណ០៥ ខែក្រោយ មក ឯកឧត្តម ឧកញ៉ា ចេន ហ្ស៊ី ក៏ទទួលបានការតែងតាំង ជាទីប្រឹក្សា សម្តេចអគ្គមហាពញាចក្រី ហេង សំរិន ប្រធានរដ្ឋសភា នីតិកាល ទី ៦ មានឋានៈស្មើ រដ្ឋមន្ត្រីដោយ ព្រះរាជក្រឹត្យ លេខ នស / រកត /០៥២០/៥២១ ចុះ ថ្ងៃទី ១៥ ខែឧសភា ឆ្នាំ ២០២០ តាមសេចក្តីក្រាបបង្គំទូលថ្វាយរបស់ សម្តេចអគ្គមហាពញាចក្រី ហេង សំរិន ប្រធានរដ្ឋសភា នៃ ព្រះរាជាណាចក្រកម្ពុជា។

បន្ទាប់ពីទទួលបានការតែងតាំង ជាទីប្រឹក្សា សម្តេចអគ្គមហាពញាចក្រី ហេង សំរិន ប្រធានរដ្ឋសភានីតិកាល ទី ៦ ប្រមាណជិត០១ ខែក្រោយ មក ឯកឧត្តម ឧកញ៉ា ចេន ហ្ស៊ី ក៏ទទួលបាន ការតែងតាំង ជាទីប្រឹក្សាផ្ទាល់ សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា មាន ឋានៈ ស្មើ រដ្ឋមន្ត្រី ដោយពុំទទួលប្រាក់បំណាច់ មុខងារដោយ ព្រះរាជក្រឹត្យ លេខ នស / រកត /០៦២០/៥៩៥ ចុះ ថ្ងៃទី ០៣ ខែមិថុនា ឆ្នាំ ២០២០ តាមសេចក្តីក្រាបបង្គំទូលថ្វាយ របស់ សម្តេចអគ្គមហាសេនាបតីតេជោ នាយករដ្ឋមន្ត្រី។

លុះរយៈពេលប្រមាណ០១ ខែ ០៧ ថ្ងៃ ក្រោយមក បន្ទាប់ពីទទួលបានការតែងតាំង ជាទី ប្រឹក្សា ផ្ទាល់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃ ព្រះរាជាណាចក្រកម្ពុជា គឺ ឯកឧត្តម ឧកញ៉ា ចេន ហ្ស៊ី ក៏ទទួលបានការផ្តល់ គោរមងារថ្មី ជា អ្នកឧកញ៉ា ដោយ ព្រះរាជក្រឹត្យ លេខ នស / រកត /០៧២០/៧២៣ ចុះ ថ្ងៃទី ១០ ខែកក្កដា ឆ្នាំ ២០២០។

ក្នុងចំណោម មុខតំណែង ជាទីប្រឹក្សាថ្នាក់ដឹកនាំស្ថាប័នជាតិ ទាំង៣រូប មុខតំណែង ជាទី ប្រឹក្សាសម្តេចអគ្គមហាពញា ចក្រី ហេង សំរិន ប្រធានរដ្ឋសភា នីតិកាល ទី ៦ មិនបាន បញ្ជាក់ថាមិនយកប្រាក់បៀវត្សរ៍ ឬ ពុំទទួលប្រាក់បំណាច់ មុខងារ អ្វី ឡើយ ពោលមានន័យថា ឯកឧត្តម អ្នកឧកញ៉ា ចេន ហ្ស៊ី អាចទទួលបានប្រាក់បំណាច់មុខងារ សម្រាប់មុខតំណែងនេះ។

កាលពីដើម ខែកក្កដា ឆ្នាំ ២០២២ កន្លងទៅថ្មីៗ នេះ ឯកឧត្តម អ្នកឧកញ៉ា ចេន ហ្ស៊ី បានបរិច្ចាគថវិកា ចំនួន ១ ០០០ ០០០ ( មួយ លាន ) ដុល្លារអាមេរិក ជូនរាជរដ្ឋាភិបាលកម្ពុជា ក្នុងដំណើរការ នៃសកម្មភាពបោសសម្អាតមីន និងគ្រាប់ យុទ្ធភណ្ឌមិនទាន់ផ្ទុះផ្សេងទៀតនៅក្នុង ព្រះរាជាណាចក្រកម្ពុជា តាមការអំពាវនាវរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា៕SRP

ភ្នំពេញ៖លោកដួង តារា រដ្ឋលេខាធិការទីស្ដីការគណៈរដ្ឋមន្ត្រីនិងជាជំនួយការផ្ទាល់ សម្ដេចហ៊ុន សែន ​បានប្រកាសគាំទ្រចំពោះការសម្រេចចិត្តរបស់​ សម្តេចតេជោ​ ហ៊ុន​ សែន​ ក្នុងការរក្សាការពារធនធាន ព្រៃធម្មជាតិនៅជុំវិញសួនឧទ្យានភ្នំតាម៉ៅនិងរៀបចំអោយដាំដើមឈើឡើងវិញ។

ការប្រកាសគាំទ្រ របស់លោកដូង តារា ក្រោយពី សម្ដេចតេជោ ហ៊ុន ​សែន ចេញបញ្ជាឲ្យរក្សាការពារនិងអភិរក្សព្រៃឈើនៅភ្នំតាម់ៅ បន្ទាប់ពីមានការឈូសឆាយបំផ្លាញ។លោកដួង តារា បានសរសេរនៅគណីហ្វេសប៊ុករបស់លោកថា៖​ ខ្ញុំបាទសូមគោរពអរគុណ​ និងគាំទ្រទាំងស្រុងប្រកបដោយមោទនភាពក្រៃលែងចំពោះការសម្រេចចិត្តប្រកបដោយគតិបណ្ឌិតរបស់​ សម្តេចតេជោ​ ហ៊ុន​ សែន​ នាយករដ្ឋមន្រ្តីនៃកម្ពុជាក្នុងការរក្សាការពារធនធានព្រៃធម្មជាតិនៅជុំវិញសួនឧទ្យានភ្នំតាម៉ៅ់និងរៀបចំអោយដាំដើមឈើឡើងវិញដើម្បីជាប្រយោជន៍ដ៏ថ្លៃថ្លារបស់ប្រទេសជាតិទាំងមូល។

ជាមួយគ្នានេះដែរ លោក ដួង តារា ក៏បានអរគុណបងប្អូនជនរួមមតិចំពោះការចូលរួមថែរក្សាការពារធនធានធម្មជាតិជាមួយសម្តេចប្រមុខដឹកនាំយើងទាំងអស់គ្នា។ អំពើអាក្រក់ជាអពមង្គលនៃជីវិត អំពើល្អជាសិរីសួស្តី។ យើងចូលរួមកសាងអំពើល្អ ចែករំលែកក្តីស្រឡាញ់និងស្នាមញញឹម និងសូមមានចិត្តអាណិតស្រឡាញ់ពលរដ្ឋយើងគ្រប់ទីកន្លែងដោយគ្មានការរើសអើងនៅក្រោមដំបូលសន្តិភាព។

ចំណែក លោក ឡេង ណាវ៉ាត្រា តាមរយៈទំព័រហ្វេសប៊ុករបស់ខ្លួនក៏បានបង្ហោះសារដែរថា៖ សូមអោយរាជរដ្ឋាភិបាលលុប ស.ជ.ណ តំបន់ភ្នំតាម៉ៅ ទាំងអស់ ហើយសុំអោយបងប្អូនដែលស្រលាញ់កូនឈើមកដាំកូនឈើជាមួយខ្ញុំ។

សូមរំលឹកថានៅរយៈពេលប៉ុន្មានថ្ងៃមកនេះ ប្រជាពលរដ្ឋខ្មែរបានរិះគន់ លោក ឡេង ណាវ៉ាត្រា បន្ទាប់ពីឃើញព័ត៌មានការឈូសឆាយដីព្រៃឈើនៅតំបន់ភ្នំតាម៉ៅ​ ពាក់ព័ន្ធជាមួយលោក ឡេង ណាវ៉ាត្រា។

ជុំវិញករណីនេះ សម្ដេច ហ៊ុន សែន បានបង្ហោះសារថា៖បងប្អូនជនរួមជាតិជាទីគោរពស្រឡាញ់!

ប៉ុន្មានថ្ងៃមកនេះមានសំណូមពរជាច្រើនមករាជរដ្ឋាភិបាលដើម្បីរក្សាទុកព្រៃនៅក្បែរសួនសត្វភ្នំតាម៉ៅទោះបីក្រសួងកសិកម្មបានពន្យល់ថាសួនសត្វភ្នំតាម៉ៅមិនមានប៉ះពាល់ក៏ដោយ។

ក្នុងនាមជាអ្នកទទួលខុសត្រូវខ្ពស់បំផុតនៃរាជរដ្ឋាភិបាលខ្ញុំសូមចេញបញ្ជា៖

១.លុបចោលទាំងអស់នូវរាល់ការអនុញ្ញាតឱយធ្វើការដោះដូរនិងអភិវឌ្ឍ។

២.រក្សាទុកដីនិងព្រៃនៅជុំវិញសួនសត្វភ្នំតាម៉ៅជាដីដែលត្រូវការពារនិងអភិរក្សដោយក្រសួងកសិកម្ម។

៣.ក្រុមហ៊ុនដែលបានឈូសឆាយត្រូវបញ្ឈប់សកម្មភាពនិងត្រូវដាំដើមឈើឡើងវិញលើដីដែលបានឈូសឆាយ។

សូមអរគុណចំពោះបងប្អូនជនរួមជាតិដែលបានចូលរួមផ្តល់យោបល់ប្រកបដោយការស្ថាបនា៕SRP

ខេត្តកំពង់ចាម​៖លោក យឹម ឆៃលី​ បានណែនាំ​ឲ្យ មន្ត្រីបន្តជំរុញ និង​ពង្រឹង​ការអនុវត្តគោលនយោបាយ ភូមិ ឃុំមានសុវត្ថិភាពទាំង៧ចំណុច​ និងខិតខំលើកកម្ពស់អភិបាលកិច្ច ធានាការផ្តល់សេវាសាធារណៈប្រកប​ដោយតម្លាភាព។

លោកក៏បានប្រាប់មន្ត្រីឲ្យអនុវត្ត​ឲ្យបានម៉ឹងម៉ាត់នូវអភិក្រម “ឆ្លុះកញ្ចក់ ងូតទឹក ដុសក្អែល ព្យាបាល និងវះកាត់”​ ព្រមទាំង​ខិតខំដោះស្រាយជម្លោះដីធ្លីក្រៅប្រព័ន្ធតុលាការ​ឲ្យ​បានល្អ​ប្រសើរ​ និងខិតខំជំរុញការអនុវត្តគោលនយោ​បាយអភិវឌ្ឍន៍ឃុំ ឲ្យទទួលបានសមិទ្ធផលថ្មីៗទៀត​។

លោកយឹម ឆៃលី​ ក៏បានណែនាំ​ឲ្យពង្រឹងការអនុវត្តឲ្យបានល្អ​​នូវ​តួនាទី ភារកិច្ច របៀបរបបធ្វើការ របស់ក្រុមប្រឹក្សាឃុំ និង​បន្តពង្រឹងការរៀបចំកម្លាំង​ដោយឈរ លើ​ទស្សនៈរក្សាចាស់ កសាងថ្មី​ ព្រមទាំងពង្រឹងការងារចលនាមហាជន ជាពិសេសចលនាស្រ្តី និងកម្មករ​ ​តាម​រយៈ​ការទំនាក់ទំនងល្អ​ជាមួយ​​​ប្រជាពលរដ្ឋ​។ លេីសពី​នោះ​ត្រូវមាន​ឆន្ទៈស្មោះត្រង់ និង​ទទួល​ខុស​ត្រូវខ្ពស់លើ​ការងាររបស់ខ្លួន ក្នុងគោលដៅ​លើកកម្ពស់​ជីវភាព​រស់នៅ​របស់​ប្រជា​ពលរដ្ឋ​ផងដែរ​។

ក្នុង​ពិធី​សម្ពោធ​ដាក់​ឲ្យ​ប្រេីប្រាស់​ជា​ផ្លូវការ​នូវ​អគារ​ទីស្នាក់ការ​ គណបក្សប្រជាជន​កម្ពុជា​ ស្រុកព្រៃឈរ​ នៅថ្ងៃអាទិត្យ នេះ​ លោក​ឧបនាយករដ្ឋមន្ត្រី យឹម ឆៃលី​ ប្រធានក្រុមការងារថ្នាក់កណ្តាល ចុះជួយ ខេត្តកំពង់ចាម ក៏បានផ្តល់នូវអនុសាសន៏ណែនាំ​ ដល់សមាជិក សមាជិកា​ គណបក្សប្រជាជន​កម្ពុជា​ស្រុកព្រៃឈរ​ ត្រូវការពារដាច់ខាតសន្តិភាព ស្ថិរភាពនយោបាយ សន្តិសុខ សណ្តាប់ធ្នាប់សង្គម ទប់ស្កាត់រាល់ការប៉ុនប៉ងបង្កចលាចល របស់ពួកប្រឆាំងជ្រុលនិយម និងមជ្ឈដ្ឋានអគតិ សំដៅធានាដំណើរការអភិវឌ្ឍន៍ និងការរស់នៅដ៏សុខសាន្តរបស់ប្រជា​ពលរដ្ឋ​៕SRP

ខេត្តបាត់ដំបង៖សម្ដេច ស ខេង ស្នើឱ្យថ្នាក់ដឹកនាំ និងសមាជិក សមាជិកាគណបក្សគ្រប់ថ្នាក់ក្នុងខេត្តបាត់ដំបង បន្តការបំពេញភារកិច្ចបម្រើជាតិ បម្រើប្រជាជនឱ្យបានល្អ ដើម្បីបន្តទទួលបានការគាំទ្រ ពីប្រជាពលរដ្ឋ និងត្រូវបន្តចិញ្ចឹម ចលនាគណបក្ស ឱ្យបានរឹងនាំ ដើម្បីពង្រឹងកម្លាំងគាំទ្រប្រកបដោយគុណភាព។ សម្ដេចក៏បានណែនាំឱ្យបន្តជំរុញប្រជាពលរដ្ឋ ពិសេស សមាជិកបក្សដែលមិនទាន់បានចុះឈ្មោះ ឬដល់អាយុត្រូវចុះឈ្មោះ ត្រៀមអញ្ជើញទៅចុះឈ្មោះបោះឆ្នោតឱ្យបានគ្រប់ៗគ្នា។

សម្ដេចបានមានប្រសាសន៍ថា កម្ពុជា បាននិងកំពុងមានសុខសន្តិភាព មានស្ថេរភាពយ៉ាងរឹងមាំ ហើយ សន្តិសុខសណ្ដាប់ធ្នាប់ សាធារណៈ ក៏មានភាពល្អប្រសើរ ជាបន្តបន្ទាប់ដែលបង្កលក្ខណៈសម្បត្តិ ដល់ការចាត់តាំងរៀបចំការបោះឆ្នោតឃុំ សង្កាត់ កាលពីពេលថ្មីៗ ប្រកបដោយសុវត្ថិភាព និងបង្កលក្ខណៈសម្បត្តិដល់វិស័យផ្សេងៗទៀត រួមទាំងជីវភាពរស់នៅរបស់ប្រជាពលរដ្ឋផងដែរ។

សម្ដេចក្រឡាហោម ស ខេង អនុប្រធានគណបក្សប្រជាជនកម្ពុជា និងជាប្រធានក្រុមការងារគណបក្សចុះមូលដ្ឋានខេត្តបាត់ដំបង និងព្រៃវែង ប្រសាសន៍យ៉ាងដូច្នេះ នៅថ្ងៃសៅរ៍ នេះ ក្នុងកិច្ចប្រជុំផ្សព្វផ្សាយសេចក្ដីសម្រេច សន្និបាតគណៈកម្មាធិការកណ្ដាលវិសាមញ្ញរបស់គណបក្សប្រជាជនកម្ពុជា នៅសាលមហោស្រពស្ទឹងសង្កែ ខេត្តបាត់ដំបង។

សម្ដេចស ខេង បានគូសបញ្ជាក់ថា សេចក្ដីសម្រេច សន្និបាតគណៈកម្មាធិការកណ្ដាលវិសាមញ្ញរបស់គណបក្សប្រជាជនកម្ពុជា ដែលបានផ្សាយនាឱកាសនេះ គឺជាមូលដ្ឋានបង្អែកដើម្បីចាត់ចែងការងាររហូតដល់មានការដាក់ចេញផែនការបន្ថែមទៀត សម្រាប់ដំណើរឈានឆ្ពោះទៅកាន់ការបោះឆ្នោតជ្រើសតាំងតំណាងរាស្រ្តនីតិកាលទី៧ នៃរដ្ឋសភា នៅឆ្នាំ២០២៣ខាងមុខនេះ។

សម្ដេចបានរម្លឹកថា កាលពីថ្ងៃទី៩ ខែកក្កដា ឆ្នាំ២០២២ សម្ដេចរួមនឹងអង្គប្រជុំ ធ្លាប់បានជួបជុំគ្នាម្ដងរួចហើយ ដោយយការជួបជុំនាពេលនោះ ដើម្បីបូកសរុបបទពិសោធន៍ និងលទ្ធផលនៃការបោះឆ្នោតជ្រើសរើសក្រុមប្រឹក្សាឃុំ សង្កាត់ សម្រាប់ខេត្តបាត់ដំបង និងដើម្បីជាការចូលរួមជាមួយគណៈកម្មាធិការកណ្ដាល ក្នុងការត្រៀមរៀបចំខ្លឹមសារបម្រើឱ្យសន្និបាតគណៈកម្មាធិការកណ្ដាលគណបក្សកាលពីពេលថ្មីៗនេះ៕SRP

ខេត្តកំពង់ចាម៖លោកយឹម ឆៃលី​ បានថ្លែងសង្កត់ធ្ងន់ថា “មាស ដែលចម្រាញ់ចេញពីរ៉ែធម្មជាតិ វាគង់នឹងរីងស្ងួតអស់នៅពេលណាមួយ ប៉ុន្តែ មាស ដែលចម្រាញ់ពីខួរក្បាលមនុស្ស ពិតជាមិនអាចរីងស្ងួតអស់នោះទេ”។ ដោយរាជរដ្ឋាភិបាល បានពង្រឹងនូវសន្តិភាព ស្ថិរភាពនយោបាយ សន្តិសុខ និងសណ្តាប់ធ្នាប់សង្គម ដើម្បីធានា និងសម្រេចឱ្យបាននូវស្ថិរភាព ម៉ាក្រូសេដ្ឋកិច្ច ការអភិវឌ្ឍ និងការកាត់បន្ថយភាពក្រីក្រ ជាពិសេសជាងពីឆ្នាំមកនេះ បានការពារ និងទប់ស្កាត់ប្រកបដោយប្រសិទ្ឋិភាពនូវជម្ងឺកូវីដ១៩ ផ្តល់ឱកាសមាសមួយសម្រាប់ក្មួយៗទទួលបានការសិក្សារៀនសូត្រ ដើម្បីអប់រំខ្លួនយើងឱ្យក្លាយទៅជាពលរដ្ឋល្អនៅក្នុងសង្គម​។

លោកឧបនាយករដ្ឋមន្ត្រី យឹម ឆៃលី ប្រធានក្រុមប្រឹក្សាស្តារអភិវឌ្ឍន៏វិស័យកសិកម្ម ​និងជនបទ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ចាម​ មានប្រសាសន៍យ៉ាងដូច្នេះ ក្នុងឱកាសអញ្ជើញប្រគល់​សញ្ញាបត្រ ថ្នាក់បរិញ្ញាបត្ររង ថ្នាក់បរិញ្ញាបត្រ និងថ្នាក់បរិញ្ញាបត្រជាន់ខ្ពស់ ដល់​និស្សិតជ័យលាភីចំនួន ១.២៦២នាក់​ នៃសាខាសាកលវិទ្យាល័យវេស្ទើន សាខាខេត្តកំពង់ចាម​ នៅមណ្ឌលអភិរក្សសួនគ្រញូង នគរបាជ័យ។

ពិធីនេះនៅព្រឹកមិញដោយមានការអញ្ជើញចូលរួមពីលោក ​អ៊ុន ចាន់ដា អភិបាលខេត្តកំពង់ចាម និងថ្នាក់ដឹកនាំក្រសួងអប់រំ យុវជន និងកីឡា​ ព្រមទាំង​ថ្នាក់ដឹកនាំសាកលវិទ្យាល័យវេស្ទើនជាច្រើនរូបទៀតផងដែរ។

ថ្លែងក្នុង​ពិធី​ លោក យឹម ឆៃលី​ មានប្រសាសន៍ទៀតថា​ វិស័យអប់រំបានដើរតួនាទីជាក្បាលម៉ាស៊ីនជំរុញការអភិវឌ្ឍ លើគ្រប់វិស័យ និងធានានិរន្តរភាព នៃការអភិវឌ្ឍ​ ទាំងនោះ ប្រៀបបាននឹងរោងចក្រ កែច្នៃមនុស្ស ដែលជាកោសិកាមួយដ៏សំខាន់ នៅក្នុងសង្គម ហើយពួកគេត្រូវមានចំណេះដឹង មានសមត្ថភាពវិជ្ជាជីវៈ មានសមត្ថភាពស្រាវជ្រាវក្នុងការបង្កើតគោលការណ៍ ទ្រឹស្តី និងមូលដ្ឋានសម្ភារៈថ្មីនានា ដើម្បីបម្រើសេចក្តីត្រូវការរបស់សង្គមមនុស្ស នៅក្នុងបរិបទនៃសម័យឌីជីថល អច្ឆរិយៈបច្ចេកវិទ្យា និងវិទ្យាសាស្ត្រទំនើប។

លោកឧកញ៉ា តែ ឡូរិន ប្រធានក្រុមប្រឹក្សាភិបាលនៃសាកលវិទ្យាល័យ វេស្ទើន បានមានប្រសាសន៍ថា អស់រយៈពេលជិត២០ឆ្នាំមកនេះ សកលវិទ្យាលវេស្ទើន បានចូលរួមបណ្តុះបណ្តាលធនធានមនុស្សដោយឈរលើគោលការណ៏គុណភាពជាចម្បង ដោយទទួលបាននូវការវាយតម្លៃខ្ពស់ពីស្ថាប័នជាតិ និងអន្តរជាតិអំពីគុណភាពនៃការសិក្សា និងបានធ្វើកិច្ចសហការជាមួយសកលវិទ្យានានាលើសកលលោក ពិសេសថ្មីៗនេះ សាកលវិទ្យាល័យវេស្ទើន បានចុះកិច្ចព្រមព្រៀងជាមួយសាកលវិទ្យាល័យ យ៉ុងណាម ដែលជាសាកលវិទ្យាល័យដ៏ធំ និងល្បីល្បាយនៃសាធារណៈរដ្ឋកូរ៉េ លើជំនាញ ចលនាភូមិថ្មី (សាម៉ោលអុនឌុង) ដែលមានចរិតជួយដល់កសិករ ពាណិជ្ជករ ផលិតករ នៅតាមទីជនបទ ក្នុងការផលិត និងរកទីផ្សារសម្រាប់ផលិតផលក្នុងស្រុក​៕SRP

ខេត្តបាត់ដំបង៖លោក សុខ លូ អភិបាលខេត្តបាត់ដំបង នៅថ្ងៃសុក្រ ម្សិលមិញ បានបញ្ជាដោយផ្ទាល់ ដល់អាជ្ញាធរមានសមត្ថកិច្ច និងក្រុមការងារ ក្នុងការត្រួតពិនិត្យរថយន្តដឹកទំនិញធុនធ្ងន់ ដែលបានដឹកទំនិញចូលក្នុងក្រុងបាត់ដំបង ដែលធ្វើដំណើរពីភូមិសាស្រ្ដរាជធានីភ្នំពេញ ចូលដល់ក្នុងក្រុងបាត់ដំបង ដែលបង្កឱ្យមានការខូចខាត ផ្លូវសាធារណៈផង និងការប្រព្រឹត្តខុសពីសេចក្ដីជូនដំណឹងរបស់រដ្ឋបាលខេត្តបាត់ដំបង ស្ដីពីការបញ្ឈប់រថយន្តដឹកជញ្ជូនធុនធ្ងន់ចូលមកក្នុងក្រុងបាត់ដំបង និងត្រូវផ្លាស់ប្ដូរទីតាំងឃ្លាំងស្ដុកទំនិញទៅនៅក្រៅក្រុងបាត់ដំបង។

នៅក្នុងប្រតិបត្តិការនេះដែរ ក៏បានធ្វើការហាមឃាត់រថយន្តធុនធ្ងន់មួយចំនួន ដែលចូលក្នុងក្រុងបាត់ដំបង និងបានស្វែងរកឃើញទំនិញហាមឃាត់មួយចំនួន ដោយបច្ចុប្បន្ននេះចំពោះរថយន្តដែលដឹកទំនិញហាមឃាត់ទាំងនោះ ត្រូវបានសមត្ថកិច្ចគយចល័ត នាំយកទៅទីស្នាក់ការគយចល័តនៅឃុំអូរតាគី ស្រុកថ្មគោលខេត្តបាត់ដំបង ដើម្បីចាត់ការតាមនីតិវិធី។

លោក សុខ លូ បានធ្វើការបញ្ជាក់សារជាថ្មី ដល់អាជ្ញាធរមានសមត្ថកិច្ចទាំងអស់ ត្រូវធ្វើយ៉ាងណាធ្វើការបង្រ្កាប ឱ្យបានចំពោះរថយន្តដឹកទំនិញធុនធ្ងន់ ដែលចូលក្នុងក្រុងបាត់ដំបង ដែលធ្វើឱ្យមានការខូចខាត ដល់ផ្លូវក្នុងក្រុង បង្កគ្រោះថ្នាក់ដល់អ្នកធ្វើដំណើរនៅក្នុងក្រុងផង និងជាពិសេសធ្វើឱ្យខូចសណ្ដាប់ធ្នាប់ក្នុងក្រុងផងដែរ។

លោកក៏បានបញ្ជាក់បន្ថែមដល់សមត្ថកិច្ចគយចល័ត ក៏មិនត្រូវភ្លេចត្រួតពិនិត្យទំនិញខុសច្បាប់ ឬទំនិញមិនបង់ពន្ធជូនរដ្ឋដែរ ដែលនេះគឺជាតួនាទីរបស់សាខាគយ និងរដ្ឋាករខេត្តបាត់ដំបង ត្រូវពិនិត្យឱ្យមែនទែន បើទោះបីជារថយន្តនោះជារថយន្តដឹកទំនិញធុនតូច រថយន្តដែលអាចអនុញ្ញាតិ ឱ្យចូលក្រុងបាន ក៏មិនមែនមានន័យថា មិនពិនិត្យទំនិញមុនសិនដែរ ហើយក្នុងករណីបើរកឃើញដឹកទំនិញដែលខុសច្បាប់ ឬមិនមានការបង់ពន្ធជូនរដ្ឋត្រឹមត្រូវទេ ត្រូវធ្វើការហាមឃាត់ជាបន្ទាន់ដោយមិនត្រូវឱ្យរួចខ្លួនឡើយ។

លោកសុខ លូ បានធ្វើការអំពាវនាវដល់អាជីវករក្នុងក្រុងបាត់ដំបង ត្រូវមានការយល់ដឹងអំពីការហាមឃាត់រថយន្តដឹកទំនិញធុនធ្ងន់ចូលក្នុងក្រុងបាត់ដំបង ព្រោះកន្លងមកមានបងប្អូនអាជីវករ ពាណិជ្ជករ និងអ្នកប្រកបអាជីវកម្មផ្សេងៗ បានធ្វើការដឹកជញ្ជូនទំនិញលើសទម្ងន់ និងប្រើប្រាស់រថយន្តធុនធ្ងន់ទៀត បណ្ដាលឱ្យខូចខាតផ្លូវថ្នល់ក្នុងក្រុងអស់ជាច្រើន ដែលធ្វើឱ្យបាត់បង់ថវិកាជាតិក្នុងការជួសជុលផ្លូវក្នុងក្រុងកាន់តែច្រើន។

គួរបញ្ជាក់ផងដែរថា កន្លងមករដ្ឋបាលខេត្តបាត់ដំបង បានធ្វើការជូនដំណឹងដល់ប្រជាពលរដ្ឋ អាជីវករ ពាណិជ្ជករ ស្ដីពីការបញ្ឈប់រថយន្តដឹកជញ្ជូនធុនធ្ងន់ ចូលមកក្រុងបាត់ដមបង និងផ្លាស់ប្ដូរទីតាំងឃ្លាំងស្ដុកទំនិញទៅនៅខាងក្រៅក្រុងបាត់ដំបង ដោយក្នុងនោះរដ្ឋបាលខេត្តបានធ្វើការសម្រួលរយៈពេលយ៉ាងយូរ០១ឆ្នាំគិតចាប់ពីថ្ងៃទី០២ ខែឧសភា ឆ្នាំ២០២២ រហូតដល់បំណាច់ខែមេសា ឆ្នាំ២០២៣ ដើម្បីធ្វើការផ្លាស់ប្ដូរទីតាំងឃ្លាំងស្ដុកទំនិញទៅក្រៅក្រុង បើពុំនោះទេ រដ្ឋបាលខេត្តនឹងចាត់វិធានការតាមផ្លូវច្បាប់យ៉ាងម៉ឺងម៉ាត់នូវរាល់ការដឹកជញ្ជូនទំនិញដោយប្រើប្រាស់រថយន្តធុនធ្ងន់ ឬដឹកជញ្ជូនលើសទម្ងន់ដែលបានកំណត់៕SRP