ភ្នំពេញ៖ជនជាតិខ្មែរចំនួន៤នាក់ត្រូវបាន កម្លាំងនាយកដ្ឋាននគរបាលព្រហ្មទណ្ឌបង្ក្រាបពាក់ព័ន្ធករណីចាប់បង្ខាំង និងជួញដូរមនុស្សខុសច្បាប់។

នាយកដ្ឋាននគរបាលព្រហ្មទណ្ឌបានឱ្យដឹងនៅថ្ងៃព្រហស្បតិ៍នេះថា នៅថ្ងៃទី១០ ខែសីហា ឆ្នាំ២០២៥ វេលាម៉ោង១១៖៤០នាទី មានរថយន្ត១គ្រឿងម៉ាក TOYOTA ALPHARD ពណ៌ខ្មៅ ផ្លាកលេខ ភ្នំពេញ 2CE-1587 បើកបរដោយជនជាតិខ្មែរចំនួន១ក្រុម បានដឹកជនជាតិចិនម្នាក់ ភេទប្រុស ចូលតាមផ្លូវល្បឿនលឿន ភ្នំពេញ-ព្រះសីហនុ ដោយមានភាពមិនប្រក្រតី។

នាយកដ្ឋាននគរបាលព្រហ្មទណ្ឌបានបន្តថា ភ្លាមៗនោះដោយមានការរាយការណ៍ពីប្រជាពលរដ្ឋ និងអនុវត្តតាមបទបញ្ជារបស់លោកឧត្តមសេនីយ៍ឯក ង៉េង ជួ ប្រធាននាយកដ្ឋាននគរបាលព្រហ្មទណ្ឌ, លោកឧត្តមសេនីយ៍ត្រី ហ៊ុន មុន្នីរ័ត្ន, វរសេនីយ៍ឯក ហែម បូណា និងវរសេនីយ៍ឯក ឆាន់ គីមលី អនុប្រធាននាយកដ្ឋាន បានដឹកនាំកម្លាំងជំនាញរបស់នាយកដ្ឋានគរបាលព្រហ្មទណ្ឌបានធ្វើការឃាត់រថយន្តខាងលើ នៅចំណុចច្រកចូលផ្លូវល្បឿនលឿន ភ្នំពេញ-ព្រះសីហនុ ស្ថិតក្នុងខណ្ឌកំបូល រាជធានីភ្នំពេញ។

ក្នុងប្រតិបត្តិការនេះ សមត្ថកិច្ចបានចាប់ខ្លួន
ជនសង្ស័យចំនួន៤នាក់រួមមាន៖

១៖ ឈ្មោះ ផាត ផល់ ភេទប្រុស អាយុ៤៣ឆ្នាំ ជនជាតិខ្មែរ (តៃកុងរថយន្ត)
២៖ ឈ្មោះ សៀប គីមសាង ភេទប្រុស អាយុ២៦ឆ្នាំ ជនជាតិខ្មែរ
៣៖ ឈ្មោះ គង់ ដេវីត ភេទប្រុស អាយុ២៣ឆ្នាំ ជនជាតិខ្មែរ
៤៖ ឈ្មោះ ចាន់ សុភ័ក្រ ភេទប្រុស អាយុ៣១ឆ្នាំ ជនជាតិខ្មែរ។ ចំណែកជនរងគ្រោះដែលក្រុមជនសង្ស័យបានចាប់ខ្លួនមានឈ្មោះ LU HONG GUO ភេទប្រុស អាយុ២៨ឆ្នាំ ជនជាតិចិន។

បើតាមនាយកដ្ឋាននគរបាលព្រហ្មទណ្ឌ ក្រោយពីបានធ្វើការសាកសួរ ជនសង្ស័យបានឆ្លើយប្រហាក់ប្រហែលគ្នាថា កាលពីថ្ងៃទី១០ ខែសីហា ឆ្នាំ២០២៥ ពួកពិតជាបានដឹកជនរងគ្រោះ តាមរថយន្ត១គ្រឿងម៉ាក TOYOTA ALPHARD ពណ៌ខ្មៅ ផ្លាកលេខ ភ្នំពេញ 2CE-1587 ពីចំណុចរាជធានីភ្នំពេញ ដើម្បីយកទៅលក់នៅតារាសាគរ ក្នុងខេត្តកោះកុង ដែលមានការបញ្ជាពីមេក្លោងដែលកំពុងរត់គេងខ្លួន។

បច្ចុប្បន្ន ជនសង្ស័យ និងវត្ថុតាងត្រូវបាននាយកដ្ឋាននគរបាលព្រហ្មទណ្ឌ កសាងសំណុំរឿងបញ្ជូនទៅអយ្យការអមសាលាដំបូងរាជធានីភ្នំពេញ៕SRP

ខេត្តសៀមរាប៖សមត្ថកិច្ចកងរាជអាវុធហត្ថខេត្តសៀមរាបបានឲ្យដឹងថា នៅវេលាម៉ោង១៥:០០នាទី ថ្ងៃទី១២ ខែសីហា ឆ្នាំ២០២៥ មានជនរងគ្រោះម្នាក់មានទីលំនៅក្នុង ក្រុងសៀមរាប ខេត្តសៀមរាប បានមកដាក់ពាក្យបណ្ដឹង នៅកងរាជអាវុធហត្ថខេត្តសៀមរាប ឲ្យជួយស្វែងរកមនុស្សស្រីម្នាក់ដែលបានចូលលួចយក (Tablet) ពណ៌ប្រផេះចំនួន ០១គ្រឿងដែលទុកនៅលើតុគិតលុយកន្លែងលក់នំខេក មានទីតាំងនៅចំណុចភូមិស្ទឹងថ្មី សង្កាត់ស្វាយដង្គំ ក្រុងសៀមរាប ខេត្តសៀមរាប កាលពីវេលាម៉ោង ១៧:១៦នាទី ថ្ងៃទី២២ ខែកក្កដា ឆ្នាំ២០២៥។

ក្រោយពីទទួលពាក្យបណ្ដឹងពីជនរងគ្រោះ កម្លាំងការិយាល័យជំនាញបានធ្វើការស្រាវជ្រាវ ដោយមើលសកម្មភាព តាមកាមេរ៉ាសុវត្ថិភាព ឃើញស្រីម្នាក់ចូលទៅយក (Tablet) រួចជិះម៉ូតូគេចខ្លួនបាត់តែម្តង។

លុះដល់ម៉ោង ១៧:១០នាទី បានរកឃើញស្ត្រីដែលជាជនបង្ក នៅផ្ទះស្ថិតនៅភូមិឃុនមោឃ ឃុំកណ្ដែក ស្រុកប្រាសាទបាគង ខេត្តសៀមរាប ដោយបានដកហូតម៉ូតូចំនួន ០១គ្រឿង ដែលបានជិះធ្វើសកម្មភាពផងដែរ។

ដោយបានការអនុញ្ញាតិពី ​ឯកឧត្តម មាស ច័ន្ទពិសិដ្ឋ ព្រះរាជអាជ្ញា នៃអយ្យការអមសាលាដំបូងខេត្តសៀមរាប បានអនុញ្ញាតិឱ្យជនសង្ស័យដែលមានជំងឺផ្លូវចិត្តធ្ងន់ធ្ងរ (សរសៃប្រសាទ) ឲ្យវិលត្រឡប់ទៅលំនៅដ្ឋានវិញ៕SRP

មន្ត្រីអធិការកិច្ចលួចដឹកពលកររបំរ៉ុងនាំឆ្លងដែនទៅប្រទេសថៃ ត្រូវកម្លាំងរាជអាវុធហត្ថស្រុកម៉ាឡៃឃាត់ខ្លួន

ខេត្តបន្ទាយមានជ័យ៖មន្ត្រីអធិការកិច្ចម្នាក់ ឈ្មោះអ៊ុន ពៅ ត្រូវកម្លាំងបានកងរាជអាវុធហត្ថស្រុកម៉ាឡៃធ្វើការឃាត់ខ្លួន នៅថ្ងៃទី១១ ខែសីហា ឆ្នាំ ២០២៥ វេលាម៉ោង៧,៥៥នាទីយប់ ពាក់ព័ន្ធនឹងបទល្មើសដឹកពលករ ខ្មែរបំរ៉ុងនាំឆ្លងដែនចេញទៅប្រទេសថៃ។

ប្រតិបត្តិការនេះកម្លាំងរាជអាវុធហត្ថ ឃាត់រួមមានរថយន្តមួយគ្រឿងម៉ាកហាយឡែនឌឺ (Highlander) ពណ៌ស្ករ ស្លាក់លេខ កំពង់ឆ្នាំង 2C-8747 នឹងប័ណ្ណសម្គាល់ខ្លួនមួយសន្លឹក ជាមន្ត្រីអធិការកិច្ច។

នៅក្នុងរថយន្តកម្លាំងរាជអាវុធហត្ថ ស្រុកម៉ាឡៃ បានធ្វើការឃាត់ខ្លួនពលករចំនួន ៩ នាក់ មានឈ្មោះ÷
១/ អឹម អៀ ភេទប្រុស អាយុ៣៦ ខេត្តកំពង់ចាម
២/ ជ័យ នៀត ភេទស្រី អាយុ២៨ កំពង់ចាម
៣/ ចាន់ ស្រស់ ភេទស្រី អាយុ៣៤ ខេត្តកំពង់ធំ
៤/ អេង ប៊ុនសាន ភេទប្រុស អាយុ៤៤ កំពង់ធំ
៥/ ស្រី ចាន់ ភេទប្រុស អាយុ៤៥ បន្ទាយមានជ័យ
៦/ ដន សុភក្រ្ត ភេទប្រុស អាយុ២១ កំពង់ចាម
៧/ លី អៀង ភេទប្រុស អាយុ៣៩ បាត់ដំបង
៨/ ថន ធូ ភេទប្រុស អាយុ៣២ បន្ទាយមានជ័យ
៩/ ចន ចាន់ ភេទស្រី អាយុ៣៤ បន្ទាយមានជ័យ។
ក្រោយពីបានធ្វើការសាកសួរពលករទាំង ៩ នាក់ត្រូវបានកម្លាំងរាជអាវុធហត្ថអប់រំណែនាំ ឱ្យត្រឡប់ទៅលំនៅដ្ឋានវិញ។

ចំណែកឯម្ចាស់រថយន្តដែលជាមន្ត្រីអធិការកិច្ចត្រូវបានកម្លាំងកងរាជអាវុធហត្ថ កសាងឯកសារបញ្ជូនទៅ រាជអាវុធហត្ថខេត្តបន្ទាយមានជ័យបន្តនីតិវិធីច្បាប់៕SRP

លោកមាស ធីបញ្ញា ទិញដីចេញសែក តែសុទ្ធជាសែកស្អុយ

ផ្តើមចេញពីសន្យាទិញ-លក់ដី ចុះថ្ងៃទី៦ ខែកុម្ភៈ ឆ្នាំ២០២៤ រវាង លោក ម៉ម គឹមលី ជាអគ្គនាយកក្រុមហ៊ុន សុក្រិត លែន រៀល អ៊ីស្ទេត ឯ.ក បានលក់ដីទៅឱ្យ លោក មាស ធីបញ្ញា និង ប្រពន្ធឈ្មោះ ផាន់ ស៊ីមាន នូវដីចំនួន៣៤ឡូតិ៍ស្មើនឹងទំហំ ៣៤០០ ម៉ែត្រការ៉េ មានទីតាំងស្ថិតនៅភូមិអូរជ្រៅ ឃុំអូរជ្រៅ ស្រុកព្រៃនប់ ខេត្តព្រះសីហនុ ក្នុងតម្លៃព្រមព្រៀងគ្នាចំនួន១៧ម៉ឺនដុល្លារអាម៉េរិក។

ដើម្បីធានាលើការទូទាត់ប្រាក់ជូនភាគីអ្នកលក់ ពោលគឺ ភាគីអ្នកទិញ សំដៅលើ លោក មាស ធីបញ្ញា និង ប្រពន្ធឈ្មោះ ផាន់ ស៊ីមាន បានចេញសែកចំនួន១០សន្លឹកក្នុងមួយសន្លឹកមានចំនួន ១៧.០០០ដុល្លារអាម៉េរិក ។ ប៉ុន្តែ ក្រោយមក លោក ម៉ម គឹមលី ក៏បានយកសែកមួយសន្លឹកទៅបញ្ជាក់នៅធនាគារ ABA គឺ សែកនេះគ្មានសាច់ប្រាក់នោះទេ ដែលជាបទល្មើសព្រហ្មទណ្ឌមានចែងក្នុងមាត្រា២៣១នៃច្បាប់ស្តីពីឧបករណ៍អាចជួញដូរបាននិងប្រតិបត្តិការទូទាត់សងប្រាក់។

លោក ម៉ម គឹមលី បញ្ជាក់ថា ដីទាំងអស់ដែល លោក មាស ធីបញ្ញា និង ប្រពន្ធឈ្មោះ ផាន់ ស៊ីមាន បានទិញពីលោក គឺ បានលក់អស់ទៅហើយឱ្យអ្នកដទៃ តែមិនព្រមប្រគល់ប្រាក់មកឱ្យ លោក ម៉ម គឹមលី នោះទេ។

ដោយសារភាគីអ្នកទិញ លោក មាស ធីបញ្ញា និង ប្រពន្ធឈ្មោះ ផាន់ ស៊ីមាន គ្មានឆន្ទះក្នុងការដោះស្រាយដោយសន្តិវិធីនិងគេចវេសនោះ ពេលនេះ លោក ម៉ម គឹមលី បានដាក់ពាក្យបណ្តឹងរួចហើយ។

យោងតាមពាក្យបណ្តឹងរបស់លោក ម៉ម គឹមលី នៅថ្ងៃទី១៣ ខែសីហា បានគោរពជូនប្រធាននាយកដ្ឋាននគរបាលព្រហ្មទណ្ឌ បានឱ្យដឹងថា កាលពីថ្ងៃទី២៤ ខែកុម្ភៈ ឆ្នាំ២០២៤ លោក មាស ធីបញ្ញា និង ប្រពន្ធឈ្មោះ ផាន់ ស៊ីមាន បានទិញដីឡូតិ៍ពីលោក ម៉ម គឹមលី ចំនួន៣៤ឡូតិ៍ មានតម្លៃសរុប១៧ម៉ឺនដុល្លារអាម៉េរិក ។ ចំនួនទឹកប្រាក់ទាំងនោះត្រូវបានទូទាត់ជាដំណាក់កាលនីមួយៗ យោងតាមកិច្ចសន្យាទិញ-លក់ដី ចុះថ្ងៃទី២៤ ខែកុម្ភៈ ឆ្នាំ២០២៤ និង កិច្ចសន្យាទិញ-លក់ដី ចុះថ្ងៃទី១៤ ខែកក្កដា ឆ្នាំ២០២៥។

លោក ម៉ម គឹមលី ជាដើមបណ្តឹង បានបញ្ជាក់ទៀតថា រហូតមកទល់ពេលនេះ លោក មាស ធីបញ្ញា និង ប្រពន្ធឈ្មោះ ផាន់ ស៊ីមាន មិនបានទូទាត់ប្រាក់មកឱ្យ លោក ម៉ម គឹមលី ចំនួន១៧ម៉ឺនដុល្លារអាម៉េរិក តាមកាលបរិច្ឆេទដូចបានកំណត់ក្នុងសែក ABA ចុះថ្ងៃទី២០ ខែកក្កដា ឆ្នាំ២០២៥ នោះទេ ដោយសែកនេះគ្មានសាច់ប្រាក់ឡើយ។

ដើមបណ្តឹង លោក ម៉ម គឹមលី បានសំណូមពរឱ្យលោកប្រធាននាយកដ្ឋាននគរបាលព្រហ្មទណ្ឌ មេត្តាចាត់វិធានការតាមផ្លូវច្បាប់ចំពោះ លោក មាស ធីបញ្ញា និង ប្រពន្ធឈ្មោះ ផាន់ ស៊ីមាន ផង។

ទីភ្នាក់ងារសារព័ត៌មាន សៀមរាប ប៉ុស្តិ៍ នៅមិនទាន់ទទួលបានការបំភ្លឺពីលោក មាស ធីបញ្ញា បាននៅឡើយទេរហូតដល់ម៉ោងផ្សាយនេះ៕SRP

កម្ពុជាបន្តអំពាវនាវឱ្យភាគីថៃដោះលែងកងកម្លាំងកម្ពុជា«១៨រូប»ដែលបានចាប់ខ្លួនមានរយៈពេល«១៥ថ្ងៃ»ហើយ

លោកជំទាវឧត្តមសេនីយ៍ឯក ម៉ាលី សុជាតា អ្នកនាំពាក្យក្រសួងការពារជាតិថ្លែងក្នុងសេចក្តីសង្ខេបព័ត៌មានប្រចាំថ្ងៃស្តីពី «លទ្ធផលនៃការអនុវត្តបទឈប់បាញ់រវាងកម្ពុជា-ថៃ» នាព្រឹកថ្ងៃទី១៣ ខែសីហា ឆ្នាំ២០២៥ បានមានប្រសាសន៍ថា គិតចាប់តាំងពីថ្ងៃទី២៩ ខែកក្កដា ឆ្នាំ២០២៥ វេលាម៉ោង ៧:៥០ នាទីក្រោយបទឈប់បាញ់ចូលជាធរមានភ្លាមៗដែលកងកម្លាំងរបស់យើងត្រូវបានទាហានថៃចាប់ខ្លួនដោយខុសច្បាប់មកទល់ពេលនេះមានរយៈពេល ១៥ថ្ងៃហើយគិតត្រឹមថ្ងៃទី១៣ ខែសីហា ឆ្នាំ២០២៥ នេះកម្ពុជាស្នើអោយភាគីថៃឆាប់បញ្ជូនកងកម្លាំងរបស់យើងទាំង១៨រូបអោយត្រឡប់មកវិញជាបន្ទាន់ស្របតាមច្បាប់មនុស្សធម៌អន្តរជាតិ និងស្របតាមការអំពាវនាវដ៏ទទូចរបស់បណ្តាប្រទេសដៃគូ និងស្ថាប័នអន្តរជាតិជាច្រើន។

លោកជំទាវឧត្តមសេនីយ៍ឯក ម៉ាលី សុជាតា បានគូសបញ្ជាក់បន្ថែមថា ក្រសួងការពារជាតិ និងកងយោធពលខេមេភូមិន្ទព្រមទាំងសហគមន៍អន្តរជាតិនឹងនៅតែបន្តទាមទាររហូតដល់ភាគីថៃបំពេញកាតព្វកិច្ចរបស់ខ្លួននៅក្រោមច្បាប់អន្តរជាតិ ហើយយើងនឹងមិនទុកឱ្យសមាជិកក្រុមគ្រួសារយើងណាម្នាក់ចោល និងឯកោជាដាច់ខាត។ ការអនុវត្តន៍បទឈប់បាញ់បានពេញលេញរបស់ភាគីទាំងសងខាងនឹងធ្វើអោយបរិយាកាសមានភាពអំណោយផលឆ្ពោះទៅការនាំមកវិញនូវសុខសន្តិភាព ស្ថិរភាព និងប្រក្រតីភាពនៃទំនាក់ទំនងរវាងប្រទេសទាំងពីរដែលជាអ្វីមិនត្រឹមតែប្រជាជនយើងទាំងពីរចង់បានប៉ុណ្ណោះទេ ប៉ុន្តែពិភពលោកទាំងមូលចង់ឃើញផងដែរតាមរយៈការចេញសារជាច្រើននូវការសម្តែងការអបអរសាទរ និងគាំទ្រចំពោះកិច្ចព្រមព្រៀងបទឈប់បាញ់ និងលទ្ធផលជាវិជ្ជមាននៃកិច្ចប្រជុំវិសាមញ្ញគណៈកម្មាធិការព្រំដែនទូទៅកម្ពុជា-ថៃ។

អ្នកនាំពាក្យក្រសួងការពារជាតិ ក៏បានសង្កត់ធ្ងន់ថា ការប្តេជ្ញាចិត្តរបស់កម្ពុជាក្នុងការធ្វើការប្រកបដោយស្មារតីស្ថាបនា ដោយស្មោះត្រង់ និងសហការយ៉ាងជិតស្និទ្ធិជាមួយប្រទេសថៃ ប្រទេសម៉ាឡេស៊ី បណ្តាប្រទេសសមាជិកអាស៊ានដទៃទៀត និងដៃគូពាក់ព័ន្ធទាំងអស់ដូចជាសហរដ្ឋអាមេរិក និងសាធារណរដ្ឋប្រជាមានិតចិនជាដើមដើម្បីធានាការអនុវត្តបទឈប់បាញ់ប្រកបដោយប្រសិទ្ធភាព និងពេញលេញនិងដោះស្រាយរាល់វិវាទដោយសន្តិវិធីស្របតាមច្បាប់អន្តរជាតិ ធម្មនុញ្ញអង្គការសហប្រជាជាតិ និងធម្មនុញ្ញអាស៊ាន៕SRP

តំបន់ហាមឃាត់វារីអគ្គិសនីសេសាន២ បើកប៉ារាស់ឲ្យមានរថយន្តដឹកឈើចេញយ៉ាងរលូន

ខេត្តស្ទឹងត្រែង៖មានការលើកឡើងថាប្រជាពលរដ្ឋ រស់នៅតាមដងផ្លូវ និងអ្នកភូមិរស់នៅភូមិតាឡាត់ ឃុំតាឡាត់ និងឃុំស្រែគរថ្មី ក្នុងស្រុកសេសាន ខេត្តស្ទឹងត្រែង បង្ហើបឲ្យដឹងថា សកម្មភាពដឹកជញ្ជូនឈើចេញពីតំបន់ហាមឃាត់វារីអគ្គិសនីសេសាន២ យ៉ាងក៏គគ្រឹតគ្រេងគ្មានសមត្ថកិច្ច ឬមន្ត្រីជំនាញណា ហ៊ានធ្វើការទប់ស្កាត់ បង្ក្រាបឬរាំងស្ទះអ្វីឡើយ។ សព្វថ្ងៃជាតំបន់ហាមឃាត់បានតែពលរដ្ឋប៉ុណ្ណោះ ចំណែក រថយន្តចូលដឹកឈើ សមត្ថកិច្ចកងរាជអាវុធហត្ថ ដែលយាមនៅបារ៉ាស់ច្រកចូលផ្លូវវ៉ារីនោះ អត់ដែលឃើញឃាត់ឡានឈើនោះឡើយ។

ប្រភពបានបន្តថា ខណៈបច្ចុប្បន្ននេះ នៅមានកងកម្លាំងអាវុធហត្ថខេត្ត ដាក់ប៉ារាស់ ត្រួតពិនិត្យហាមឃាត់ និងឆែកឆេរ ធ្វើឲ្យពួកគាត់លំបាកក្នុងការចេញចូលម្តងៗ ទៅពីរួមខេត្តក៏ដូចការដឹកទំនិញផលកសិផលផ្សេងៗ ទៅលក់នៅទីផ្សារផងដែរ នៅចំណុចផ្លូវចូលទៅវារីអគ្គិសនី សេសានក្រោមពីរ ចេញពីរឃុំតាឡាត់ និងឃុំស្រែគថ្មី។ ប៉ុន្តែ ចម្លែករថយន្តដឹកបទល្មើសផលិតផលព្រៃឈើ ដឹកជញ្ជូនចេញចូលបានយ៉ាងសេរី បែជាគ្មានការរំខាន និងហាមឃាត់ ឬទប់ស្កាត់បង្ក្រាបឡើយ។

ចំពោះអ្នកសារព័ត៌មានវិញ មិនអាចឲ្យចូលបានឡើយ សមត្ថកិច្ចកងរាជអាវុធហត្ថ យាមបារ៉ាស់ខាងលើ ហាមដាច់ខាតមិនឲ្យចូល ទោះបីប្រាប់គាត់ថា ទៅលេងបងប្អូន ឬមានធុរៈនៅទីនោះក៏ដោយចុះ។ ឬមួយខ្លាចអ្នកសារព័ត៌មានដឹងរឿងសមត្ថកិច្ច និងមន្ត្រីជំនាញ ទាំងនោះឃុបឃិតគ្នា ជាមួយមេឈ្មួញ រកស៉ីដឹកជញ្ចូន បទល្មើសផលអនុផលព្រៃឈើ ទាំងនេះហើយមើលទៅ? មិនទប់ស្កាត់បង្ក្រាប បែជាបង្កើតឲ្យមានបទល្មើសទាំងនេះទៅវិញ ក្នុងដែនសមត្ថកិច្ចរបស់ខ្លួន។

ជុំវិញរឿងនេះលោកសុវណ្ណ ពិសេដ្ឋ អភិបាលស្រុកសេសានបានប្រាប់អ្នកសារព័ត៌មានថា ការដាក់ប៉ារ៉ាស់ត្រួតពិនិត្យនេះ ជាកន្លែងតំបន់ហាមឃាត់ ជាពិសេសអ្នកសារព័ត៌មាន។ លោកបន្តថា បើមានបទល្មើស លោកឲ្យរាយការណ៍ទៅ មន្ត្រីជំនាញ ដូចជាបរិស្ថាន និងជំនាញរដ្ឋបាលព្រៃឈើទៅ។

សូមបញ្ជាក់ថា: សកម្មភាពដឹកជញ្ជូនឈើខាងលើ
គេសង្ស័យមានឈ្មោះ លោក ធី កាប៉ូ និងឈ្មួញជាច្រើនអ្នកទៀតដែលធ្វើសកម្មភាព ដោយការកាប់អារជ្រៀកឈើ ដឹកចេញពីដែនជម្រកសត្វព្រៃ ភ្នំក្រឡាពាស ដឹកយកមកផ្ញើ ចល័ត តាមផ្ទះប្រជាពលរដ្ឋ ដើម្បីលក់សាងដាក់រថយន្ត ក្រុមពួកឈ្មួញខាងលើនេះ យ៉ាងសកម្មគ្មានអ្នកបង្ក្រាបនោះទេ៕SRP

អង្គភាពប្រឆាំងអំពើពុករលួយ ផ្អាកមុខងារ លោក ស៊ាន បូរ៉ាត ពីអនុប្រធាន

ប្រធានអង្គភាពប្រឆាំងអំពើពុករលួយ នៅថ្ងៃទី១១ ខែសីហា បានចេញសេចក្តីសម្រេចមួយ ផ្អាកមុខងារ លោក ស៊ាន បូរ៉ាត អនុប្រធានអង្គភាពប្រឆាំងអំពើពុករលួយ ក្រោយពី ACU បានចាប់ផ្តើមការស៊ើបអង្កេត លោក ស៊ាន បូរ៉ាត និង លោកឧត្តមសេនីយ៍ឯក ស ថាវី ពាក់ព័ន្ធសំណុំរឿងអតីតឧកញ៉ា ឡេង ចាន់ណា។

សូមបញ្ជាក់ថា កាលពីថ្ងៃទី៣ ខែកក្កដា ឆ្នាំ២០២៥ កន្លងទៅ អង្គភាពប្រឆាំងអំពើពុករលួយ បានសម្រេចបើកការស៊ើបអង្កេតលើ លោក ស៊ាន បូរ៉ាត អនុប្រធានអង្គភាពប្រឆាំងអំពើពុករលួយ និង លោកឧត្តមសេនីយ៍ឯក ស ថាវី រដ្ឋលេខាធិការក្រសួងការពារជាតិ ដែលពាក់ព័ន្ធករណីឆបោកដ៏ធំក្នុងសំណុំរឿងអតីតឧកញ៉ា ឡេង ចាន់ណា នៅខេត្តសៀមរាប និងខេត្តកំពង់ធំ។

ក្នុងសំណុំរឿងនៅតុលាការខេត្តសៀមរាប លោក ស៊ាន បូរ៉ាត និង លោក ស ថាវី គឺ ជាសាក្សី តែក្នុងសមត្ថកិច្ចអង្គភាពប្រឆាំងអំពើពុករលួយ អ្នកទាំង២ គឺ ជាជនសង្ស័យ៕SRP

ឯកឧត្តមហ៊ុន ម៉ានី៖ សំដីរបស់លោក ធ្វើឱ្យខ្ញុំ មាន ” ការខ្មាសអៀន តូចចិត្ត និងខឹងសម្បា”

តើលោកសមជាខ្មែរ ទេ

– ខ្មាសអៀន ៖ ដោយខ្ញុំមិននឹកស្មានថា លោកជាជនជាតិខ្មែរមួយរូប ប៉ុន្តែនិយាយមិនឱ្យតម្លៃសញ្ជាតិខ្លួនឯងទាល់តែសោះ។ លោកធ្វើឱ្យអាប់អន់ដល់ ខ្មែររាប់លាននាក់ ដែលខិតខំប្រឹងប្រែងទប់ស្កាត់ពីការឈ្លានពានរបស់ពួកខ្មាំងសត្រូវ។ លោកមានបានយល់ពីជម្រៅនៃ ទឹកចិត្ត ឆន្ទៈ និងស្មារតីអង្គអាចក្លាហានរបស់វីរៈយុទ្ធជន យើង បើទោះមិនមានភាពទំនើបដូចទាហានឈ្លានពានក៏នៅតែការពារទឹកដីយើងមកដល់ពេលនេះ

– តូចចិត្ត ៖ ដោយសារ មានខ្មែរដូចរូបលោក ដែលមិនត្រឹមតែមិនគាំទ្រប៉ុណ្ណោះទេ តែបែរជាម៉ោងនេះ ពេលនេះ មកនិយាយមួលបង្កាច់ ចំអកពីខឿនការពារជាតិខ្លួន និងធ្វើឱ្យអាប់អន់កិត្តិយសជាតិទៅវិញ។

– ខឹងសម្បា ក្តៅក្រហាយ៖ រាជរដ្ឋាភិបាល និងយុទ្ធជនខ្មែរបានលះបង់គ្រប់បែបយ៉ាងដើម្បីគ្រប់គ្រងសមរភូមិក្ដៅ។ លោកនិយាយបែបនេះ តើលោកបានយល់និងនឹកឃើញដល់យុទ្ធជនជួរមុខគ្រប់រូបដែលបានឃ្លាតឆ្ងាយពីប្រពន្ធកូន ហើយខ្លះបានរងរបួស ខ្លះពលីដើម្បីការពារទឹកដីខ្មែរ។
ខ្ញុំបានជួបនិងស្តាប់ដោយផ្ទាល់ជាមួយបងៗរបួសដែលបានឆ្លងកាត់ ការវាយប្រហាររបស់ពួកឈ្លានពាន លោកពិតជាមិនអាចយល់នូវស្មារតីលះបង់និងភាពអង្គអាចក្លាហានរបស់ពួកគាត់ដែលនៅសមរភូមិផ្ទាល់នោះទេ លោកនៅក្រៅប្រទេសនិយាយដោយ រីករាយដោយមិនខ្វល់ពី ការពលីឬសុខទុក្ខរបស់ពូៗបងៗកងកម្លាំងរបស់យើងនៅជួរមុខ។

និយាយអោយខ្លី ហើយម្តងទៀត លោកសមជាខ្មែរ ទេ

ធ្វើជាគ្រូបង្រៀន បង្គាប់ឲ្យសិស្សស្រីថតរូបអាក្រាតកាយជាថ្នូរបានពិន្ទុល្អ

ខេកណ្ដាល៖ចៅក្រមសើបសួរសាលាដំបូងខេត្តកណ្តាលលោក ស្វាយ តុញ បានចេញដីកាឃុំខ្លួនគ្រូបង្រៀនម្នាក់នៅស្រុកកៀនស្វាយ ខេត្តកណ្តាល ដែលបង្គាប់ឲ្យសិស្សស្រីថតរូបអាក្រាតកាយជាថ្នូរបានពិន្ទុល្អ ដាក់ពន្ធនាគារជាបណ្តោះអាសន្ន។

គ្រូបង្រៀនរូបនេះ ត្រូវបានលោកស្រី ផាន់ សុគន្ធថង តំណាងអយ្យការអមសាលាដំបូងខេត្តកណ្តាល បានចោទប្រកាន់ពីបទ «គំរាមកំហែងដោយមានបញ្ជាឱ្យបំពេញលក្ខខណ្ឌអ្វីមួយ» និង «រុកកួនខាងផ្លូវភេទ»។ នេះបើតាមលោក ខា ដែនណា អ្នកនាំពាក្យអយ្យការអមសាលាដំបូងខេត្តកណ្ដាល និងលោក សូ សារិន អ្នកនាំពាក្យសាលាដំបូងខេត្តកណ្ដាលបានឲ្យភ្នាក់ងារ Fresh News ប្រចាំខេត្ត ដឹងនៅថ្ងៃទី១១ ខែសីហា ឆ្នាំ២០២៥។

អ្នកនាំពាក្យបានបញ្ជាក់ថា បទល្មើសនេះយោងតាមក្រមព្រហ្មទណ្ឌ មាត្រា២៣២ចែងដែលបានថា «បទគំរាមកំហែងដោយមានបញ្ជាឱ្យបំពេញលក្ខខណ្ឌអ្វីមួយ ត្រូវផ្ដន្ទាទោសដាក់ពន្ធនាគារពី ៦ខែ ទៅ ២ឆ្នាំ និងពិន័យជាប្រាក់ពី ១លានរៀល ទៅ ៤លានរៀល»។

សេចក្តីរាយការណ៍ពីសមត្ថកិច្ច បានឲ្យដឹងថា ជនត្រូវចោទឈ្មោះ ហឿន រ៉ាវី អាយុ៣៨ឆ្នាំ មុខរបរគ្រូបង្រៀនថ្នាក់ទី៩ និងទី១០ ផ្នែកគណិតវិទ្យា មានទីលំនៅភូមិកំពង់ស្វាយ២ ឃុំកំពង់ស្វាយ ស្រុកកៀនស្វាយ ខេត្តកណ្តាល៕SRP

សម្ដេចតេជោហ៊ុន សែន៖ តើគេជាមនុស្សឬជាសត្វ?តើគេស្នេហាជាតិឬក្បត់ជាតិ?សូមបងប្អូនស្តាប់និងគិតខ្លួនឯងផងចុះ

ភ្នំពេញ៖សម្ដេចតេជោហ៊ុន សែន នៅថ្ងៃចន្ទនេះបានបង្ហោះវីដេអូមួយដែលមានលោកសម រង្ស៊ី លើកឡើង ដោយសម្ដេចតេជោហ៊ុន សែន បានសរសេរថា៖
បងប្អូនជនរួមជាតិជាទីស្រឡាញ់!
នៅពេលប្រជាជននិងកងទ័ពយើងបាន
និងកំពុងរងទុក្ខវេទនាដោយការឈ្លាន
ពានរបស់ថៃដែលក្នុងនោះសាលារៀន វត្តអារាម ផ្ទះប្រជាជនរហូតដល់ប្រាសាទបុរាណរាប់ទាំង
ប្រាសាទព្រះវិហារត្រូវកងទ័ពថៃ
បាញ់ប្រហារ បង្ខំឲ្យប្រជាជនរាប់មុឺន
គ្រួសារត្រូវរត់ចោលផ្ទះសំបែងក្លាយ
ជាជនភៀសសឹកដែលជាការឈឺចាប់
របស់ជាតិទាំងមូលនោះហេតុអ្វីបានជា
មានជនជាតិខ្មែរម្នាក់មកនិយាយសរសើរកងទ័ពថៃឈ្លានពាននិងបង្អាប់កងទ័ពខ្មែរទៅវិញ។

សម្ដេចតេជោបានសរសេរបន្តថា តើគេជាមនុស្សឬជាសត្វ?តើគេស្នេហាជាតិឬក្បត់ជាតិ?សូមបងប្អូន
ស្តាប់និងគិតខ្លួនឯងផងចុះ។ សម្ដេចតេជោ៖
ខ្ញុំសុខចិត្តប្រើផេកផ្លូវការរបស់ខ្ញុំដែល
មានមនុស្សតាម១៥លាននាក់ជួយ
ផ្សព្វផ្សាយសំដីពិតរបស់គាត់ដូចមាន
ភ្ជាប់ជាមួយ៕SRP

អាជ្ញាធរភ្នំពេញ ព្រមានម្ចាស់សំណង់កម្ពស់៧ជាន់ នៅតែផ្គើនលួចសាងសង់ដោយគ្មានច្បាប់អនុញ្ញាត

ភ្នំពេញ៖អភិបាលរងរាជធានីភ្នំពេញលោក ឃ្លាំង ហួត បានព្រមានថា បើម្ចាស់សំណង់នៅតែផ្គើនលួចសាងសង់ដោយគ្មានច្បាប់អនុញ្ញាតទៀត អាជ្ញាធរនឹងចាត់វិធានការតាមផ្លូវច្បាប់ចំពោះសំណង់កម្ពស់៧ជាន់នេះ។

លោក ឃ្លាំង ហួត ព្រមានបែបនេះខណៈលោកដឹកនាំមន្ត្រីជំនាញផ្នែកសុរិយោដីខណ្ឌ-រាជធានី ចុះទៅឃាត់សំណង់រឹងមាំចំនួន៧ជាន់ និងត្រៀមសាងសង់១ជាន់ថែមទៀត ដែលជាកម្មសិទ្ធិរបស់ឈ្មោះ អ៊ុយ អ៊ាងហេង បានសាងសង់ដោយគ្មានច្បាប់អនុញ្ញាត គ្មានលក្ខណៈបច្ចេកទេសត្រឹមត្រូវ ស្ថិតតាមបណ្តោយ ផ្លូវលេខ១៨៤ សង្កាត់ផ្សារថ្មីទី៣ ខណ្ឌដូនពេញ។

លោក ឃ្លាំង ហួត បានបញ្ជាក់ថា លោកទទួលបានបញ្ជាពីលោក ឃួង ស្រេង អភិបាលរាជធានីភ្នំពេញ ឲ្យដឹកនាំមន្ត្រីជំនាញ ចុះមកត្រួតពិនិត្យសំណង់មួយនេះ ដែលបាននិងកំពង់សាងសង់ រំលោភច្បាប់។

ជាមួយគ្នានេះលោក ឃ្លាំង ហួត បានបញ្ជាឲ្យអាជ្ញាធរខណ្ឌ ត្រូវផ្អាកការដ្ឋានសាងសង់ជាបន្ទាន់ ហើយកម្មករត្រូវចាកចេញពីការដ្ឋានជាបន្ទាន់។ មន្ទីរ ដ.ន.ស.ស ត្រូវពិនិត្យលិខិតអនុញ្ញាតសាងសង់ និងលក្ខណៈបច្ចេកទេស សាងសង់ឲ្យបានត្រឹមត្រូវ (គ្រឹះគ្រឿងបង្គំសំណង់)។

យោងទៅតាមសេចក្តីជូនដំណឹងរបស់សាលាខណ្ឌដូនពេញ និងដោយសំអាងថា សំណង់ដែលកំពុងសាងសង់នេះ មិនមានច្បាប់សាងសង់នោះទេ ឲ្យសាងសង់សំណង់ ដែលចេញដោយស្ថាប័នជំនាញ ហើយម៉្យាងទៀត សំណង់នេះ បានសាងសង់ដោយលិខិតអនុញ្ញាតនៅឡើយទេ ខណៈអាជ្ញាធរខណ្ឌ-រាជធានី បានចុះហាមឃាត់ជាច្រើនលើកច្រើនសារមកហើយ ហើយអាជ្ញាធរខណ្ឌ បានណែនាំឲ្យទៅធ្វើច្បាប់សាងសង់ផងដែរ។

លោក ឃ្លាំង ហួត ក៏បានអំពាវនាវប្រជាពលរដ្ឋទាំងអស់ក្នុងរាជធានីភ្នំពេញ ពិសេសក្នុងខណ្ឌដូនពេញ មុននឹងមានការសាង់សង់សំណង់អ្វីមួយ ត្រូវទៅសុំច្បាប់អនុញ្ញាតពីអាជ្ញាធរ និងពីផ្នែកជំនាញឲ្យបានត្រឹមត្រូវជាមុនសិន ជៀសវាងការខាតបង់ និងការលំបាកដល់ខ្លួនយើង នៅថ្ងៃក្រោយ ដែលកើតឡើងដោយសារតែគ្មានច្បាប់ទំលាប់នេះ៕SRP

មិនធ្លាប់មាននៅសៀមរាប! ជើងខ្លាំង​ពាក់ព័ន្ធ”សញ្ចារកម្ម” ទៅលើក្មេងស្រីជាច្រើននាក់ ត្រូវបានឃាត់

ខេខេត្តសៀមរាប៖កងរាជអាវុធហត្ថខេត្តសៀមរាបបានឱ្យដឹងនៅរសៀលថ្ងៃសៅរ៍ថាដោយអនុវត្តតាមបទបញ្ជាលោកឧត្តមសេនីយ៍ត្រី​ សៀ ទីន មេបញ្ជាការ កងរាជអាវុធហត្ថខេត្តសៀមរាប កម្លាំងមូលដ្ឋានកងរាជអាវុធហត្ថក្រុងសៀមរាប សហការ​ជាមួយ​ការិយាល័យប្រឆាំងការជួញដូរមនុស្ស បានឃាត់ខ្លួនជនសង្ស័យ ឈ្មោះ យឿប ឌីណា ហៅ ម៉េង ភេទប្រុស អាយុ ៣១ឆ្នាំ មុខរបរ លក់កាហ្វេ ជនជាតិខ្មែរ ទីលំនៅបច្ចុប្បន្ន ភូមិធ្លកអណ្តូង សង្កាត់ស្លក្រាម ក្រុងសៀមរាប ខេត្តសៀមរាប ពាក់ព័ន្ធករណី “សញ្ចារកម្ម” (ទាញយកអត្ថប្រយោជន៍ហិរញ្ញវត្ថុពីអំពើពេស្យាចាររបស់អ្នកដទៃ)..។

ការឃាត់ខ្លួនធ្វើ នៅវេលាម៉ោង ១៩:០០នាទី ថ្ងៃទី០៧ ខែសីហាឆ្នាំ២០២៥ នៅចំណុចភូមិធ្លកអណ្តូង សង្កាត់ស្លក្រាម ក្រុងសៀមរាប ខេត្តសៀមរាប។

ដោយ​យោងតាមពាក្យបណ្ដឹងរបស់ជនរងគ្រោះ៖​
១-របស់ម្ដាយក្មេងស្រីរងគ្រោះ ភេទស្រី អាយុ ៣៧ឆ្នាំ កូនស្រីរងគ្រោះ អាយុ ១៤ឆ្នាំ ។
២-ក្មេងស្រី អាយុ ១៦ឆ្នាំ (គ្មានអាណាព្យាបាល)។
៣-ក្មេងស្រី អាយុ ១៦ឆ្នាំ។
ប្តឹងអំពីករណី “សញ្ចារកម្ម” ប្រព្រឹត្តកាលពីអំឡុងខែកុម្ភៈ ឆ្នាំ២០២៥ រហូតមកដល់បច្ចុប្បន្ន នៅចំណុច ផ្ទះជួល ភូមិធ្លកអណ្តូង សង្កាត់ស្លក្រាម ក្រុងសៀមរាប ខេត្តសៀមរាប (កន្លែងលក់កាហ្វេមេត្រីរបស់ជនសង្ស័យ)។
ជនរងគ្រោះជាអនីតិជនទាំង០៣នាក់បានបំភ្លឺជូនសមត្ថកិច្ចដូចៗគ្នាថា៖
ពួកខ្លួនត្រូវបាន ត្រូវបានឈ្មោះ យៀប ឌីណា ហៅម៉េង លួងលោមឲ្យជួលបន្ទប់របស់គាត់ ស្នាក់នៅ ដោយមិនចាំបាច់បង់ប្រាក់ជាមុនទេ នៅពេណារកប្រាក់បានចាំបង់ជាក្រោយ រួមទាំងម្ហូបអាហារ និងកាហ្វេទៀតផង។

នៅពេលពួកខ្លួនទាំង០៣នាក់គ្មានប្រាក់បង់ឲ្យគាត់ ដោយគាត់បានបង្ខំឲ្យពួកខ្លួនទៅបំរើផ្លូវភេទជាមួយភ្ញៀវ ដើម្បីយកប្រាក់សងថ្លៃដែលពួកខ្លួនជំពាក់គាត់ បើមិនព្រមធ្វើតាមគាត់ទេ គាត់គំរាមថា ចំណាយតែ៣០០បាត កាត់ដៃ-ជើង មិនឲ្យបានសុខទេ មិនតែប៉ុណ្ណោះ ឈ្មោះ យឿប ឌីណា ហៅម៉េង បានដក១០% នៃប្រាក់ ដែលខ្លួនទៅបំរើផ្លូវភេទជាមួយភ្ញៀវទៀតផង បើភ្ញៀវឲ្យបានក្នុង១០០$ គាត់ដកអស់ ២៥$ ពេលខ្លះបានតែ ៥០$ រូបគាត់ដកអស់១០$ ហើយចំណែកប្រាក់ដែលនៅសល់ពីការបំរើផ្លូវភេទ ពួកខ្លួនមិនដែលបានយកមកចាយវាយនោះទេ គឺឈ្មោះ យឿប ឌីណា ហៅម៉េង ត្រូវបង់ថ្លៃបន្ទប់ជួល ថ្លៃម្ហូបអាហារ ថ្លៃកាហ្វេ ថ្លៃជួលម៉ូតូ ថ្លៃជួលទូរស័ព្ទប្រើ។

ឈ្មោះ អ.ធ.ត. ដែលជាជនរងគ្រោះ អាយុ១៤ឆ្នាំ បានរៀបរាប់ជូនសមត្ថកិច្ចដោយក្តុកក្តួលទៀតថា៖ នៅកំឡុងខែឧសភាឆ្នាំ២០២៥ ខ្លួនបានខ្ចីម៉ូតូម៉ាកហុងដាវ៉ារីអូឃ្លីក របស់ឈ្មោះ តេង ចាន់រតន: ភេទប្រុស ត្រូវជាប្អូនធម៌ឈ្មោះ យឿប ឌីណា ហៅ ម៉េង ដើម្បីដើរលេងតែត្រូវបានជួបគ្រោះថ្នាក់ចរាចរណ៍នៅផ្លូវ៦០ម៉ែត្រ បណ្តាលឲ្យខូចខាតម៉ូតូបាក់បូម វៀចតួ ពេលនោះពួកគាត់ ( តេង ចាន់រតន:និងឈ្មោះ យឿប ឌីណា) បានឲ្យខ្លួនសងថ្លៃជួសជុលម៉ូតូចំនួន ៨០០$ ដោយសារគ្មានប្រាក់ ទើបខ្លួនមកផ្ទះជួលរបស់ឈ្មោះ យឿប ឌីណា ហៅម៉េង ទើបមាន បញ្ហានេះកើតឡើងតែម្តង។

ដោយមានការសម្របសម្រួលពីឯកឧត្តម មាស ច័ន្ទពិសិដ្ឋ ព្រះរាជអាជ្ញា នៃអយ្យការអមសាលាដំបូងខេត្តសៀមរាប ការិយាល័យជំនាញកសាងសំណុំរឿងដើម្បីអនុវត្តតាមនីតិវិធី ចំណែក​ជនរងគ្រោះ​ប្រគល់ជូន​មន្ទីរ​សង្គម​កិច្ច អតីត​យុវជន និងយុវនីតិសម្បទាខេត្តសៀមរាប៕SRP