ខេត្តកំពង់ចាម៖នៅទីបំផុតផ្លូវជាតិលេខ៧នឹងសាងសង់ពង្រីក ទៅជាផ្លូវ៤គន្លង ចាប់ពីចំណុចទីប្រជុំជនស្គន់ ស្រុកជើងព្រៃ រហូតដល់គល់ស្ពានគីហ្សូណា ក្រុងកំពង់ចាម ដែលមានប្រវែង់ ៤៥,៤៩គីឡូម៉ែត្រ។

លោកយូ ស៊ុន ឡុង រដ្ឋមន្ត្រីប្រតិភូអមនាយករដ្ឋមន្ត្រី អមដំណើរដោយ លោកលឹម ស៊ីដេនិន រដ្ឋលេខាធិកាក្រសួងសាធារណការ និងដឹកជញ្ជូន និងលោក អ៊ុន ចាន់ដា អភិបាលខត្តកំពង់ចាម នៅថ្ងៃពុធនេះ បានអញ្ជើញចុះពិនិត្យទីតាំង និងប្រជុំពិភាក្សា ផែនការបែងចែកភារកិច្ច ដើម្បីត្រៀមរៀបចំពិធីបើកការដ្ឋានសាងសង់ពង្រីកផ្លូវជាតិលេខ៧ ទៅជា ផ្លូវ៤គន្លង ប្រវែង៤៥,៤៩គីឡូម៉ែត្រ ក្រោមឥណទានសម្បទានពីរដ្ឋាភិបាល នៃសាធារណៈរដ្ឋប្រជា មានិតចិន។

នាយឧត្ដមសេនីយ៍​ យូ​ ស៊ុនឡុង​ បានឲ្យដឹងថា ពិធីបើកការដ្ឋាន សាងសង់ពង្រីក និងលើកកម្ពស់ផ្លូវជាតិលេខ៧ ទៅជាផ្លូវ៤គន្លង ចាប់ពីចំណុចទីប្រជុំជនស្គន់ ស្រុកជើងព្រៃ រហូតដល់គល់ស្ពានគីហ្សូណា ក្រុងកំពង់ចាម ដែលមានប្រវែង់ ៤៥,៤៩គីឡូម៉ែត្រ នឹងប្រព្រឹត្តទៅ​ក្រោមអធិបតីដ៏ខ្ពង់ខ្ពស់ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅថ្ងៃទី៩ ខែមករា ឆ្នាំ២០២៣ ខាងមុខនេះ នៅភូមិតាំងគោក ឃុំល្វា ស្រុកព្រៃឈរ ខេត្តកំពង់ចាម។

នាយឧត្ដមសេនីយ៍ បានបញ្ជាក់ថា ពាក់ព័ន្ធនឹងការងាររៀបចំពិធីការ និងសន្តិសុខសុវត្តិភាពសណ្ដាប់ធ្នាប់ក្នុងអង្គពិធីទាំងមូល ត្រូវត្រៀមលក្ខណៈឲ្យបានម៉ត់ចត់ ដើម្បីទទួលភ្ញៀវកិត្តិយសជាតិ អន្តរជាតិ និងបងប្អូនប្រជាពលរដ្ឋ ចូលរួមប្រមាណជា ៤ពាន់នាក់។

ក្នុងដំណើរចុះត្រួតពិនិត្យទីតាំងនោះដែរ នាយឧត្ដមសេនីយ៍​ យូ​ ស៊ុនឡុង ក៏បានបើកកិច្ចប្រជុំពិភាក្សាពីផែនកា របែងចែកភារកិច្ចលម្អិតនៃការទទួលខុសត្រូវ ក្នុងដំណើរការពិធីបើកការដ្ឋាន ពីសំណាក់គណៈកម្ម ការរៀបចំបុណ្យជាតិ អាជ្ញាធរខេត្ត ស្រុក ព្រមទាំងមន្ត្រីពាក់ព័ន្ធ ដើម្បីធ្វើយ៉ាងណាឲ្យការប្រព្រឹត្ត ទៅធានាបានសន្តិសុខសណ្តាប់ធ្នាប់ ជូនថ្នាក់ដឹកនាំ ក៏ដូចជាអង្គពិធីទាំងមូលប្រកបដោយភាពរលូន និងជោគជ័យ។

គួរបញ្ជាក់ថា គម្រោងសាងសង់ពង្រីក និងលើកកម្ពស់ផ្លូវជាតិលេខ៧ ដែលត្រៀមបើកដំណើរការ ក្នុងពេលឆាប់ៗនេះ ជាចំណងដៃថ្មីស្រឡាងមួយទៀត របស់រាជរដ្ឋាភិបាលកម្ពុជា សម្រាប់ខេត្តកំពង់ចាម​៕SRP

ភ្នំពេញ៖ថ្លែងក្នុងពិធីបិទសន្និបាតក្រសួងរៀបចំដែនដី នគររូបនីយកម្ម និងសំណង់ នៅរសៀលថ្ងៃ អង្ការម្សិលមិញ សម្តេច​ហ៊ុន សែន នាយក​រដ្ឋមន្ត្រី​បានចង្អុលបង្ហាញចំៗ ទៅកាន់សមត្ថកិច្ចគ្រប់ជាន់ខ្ពស់ «​….កុំ​អី​ឡើង​ចាប់​មនុស្ស​ឃុំឃាំង, កុំ​អី​អាង​ចាប់ចង» ក្នុងសំណុំវិវាទ​ដីធ្លី ព្រោះ​​ករណី​រដ្ឋប្បវេណី។

សម្ដេចហ៊ុន សែន ក៏បានអំពាវនាវដល់មន្ត្រីនគរបាលយុត្តិធម៌ កុំ​ងងឹត​ងងុលរឿងចាប់ចងមនុស្ស ក្នុងបញ្ហាវិវាទដីធ្លី​​។

សម្តេចហ៊ុន សែន ​ក៏បាន​ព្រមានថា កុំអាង​បុណ្យមាន​ស័ក្តិ ,កុំ​អាង​ពាក់​ផ្គា​យ ពាក់​លោក​ខែ ​ក៏សម្តេចអាចដក​ចេញបានដែរ។

សម្ដេចហ៊ុន សែន មានប្រសាសន៍ថា «ការងារកែទម្រង់ដីធ្លី បានធ្វើឱ្យជម្លោះដីធ្លីធ្លាក់ចុះគួរឱ្យកត់សម្គាល់»។

សម្ដេចហ៊ុន សែន បានផ្តល់អនុសាសន៍ដល់ក្រសួងរៀបចដែនដី នគរូបនីយកម្ម និងសំណង់ ត្រូវពង្រឹងប្រសិទ្ធភាពលើការងារជំនាញរបស់ខ្លួន និងមន្ត្រីជំនាញ ត្រូវបន្តអនុវត្តចុះបញ្ជីដីធ្លីទាំងអស់ ដើម្បីធានានូវសុវត្ថិភាពនៃការកាន់កាប់ដីធ្លី។

សម្ដេចហ៊ុន​ សែន ក៏ជំរុញឱ្យបន្តដោះស្រាយបញ្ហាទំនាស់ដីធ្លី នៅក្រៅប្រព័ន្ធ តុលាការ នៅតាមមូលដ្ឋាន ឱ្យបានកាន់តែមានប្រសិទ្ធភាពខ្ពស់៕SRP

ភ្នំពេញ៖សារព័ត៌មានខ្មែរខូវឺធីវី​ បានចេញលិខិត
ធ្វេីការបំភ្លឺពាក់ព័ន្ធការបង្ហោះរូបភាព​ និងខ្លឹមសារ​ នៃការធ្វេីអត្ថាធិប្បាយលេីទំព័រហ្វេសប៊ុក​ Leng Navatra ឡេង ណាវ៉ាត្រា។

នេះបើយោងតាមលិខិតបំភ្លឺជាសាធារណៈ ដែលសៀមរាប ប៉ុស្តិ៍ ធីវី អនឡាញទទួលបាននៅរសៀលថ្ងៃអង្គារនេះ។ សូមអានលិខិតបំភ្លឺខាងក្រោម៖

ខេត្តសៀមរាប៖ប្រជាពលរដ្ឋជិត ៤០០ គ្រួសារ បានទទួលអំណោយពីអាជ្ញាធរខេត្តសៀមរាប។ ការដែលពលរដ្ឋ ទទួលបានអំណោយនេះ នៅថ្ងៃចន្ទ ម្សិលមិញ ក្នុងឱកាស «បុណ្យចម្រើនព្រះជន្ម ព្រះមហាវិមលធម្ម ពិន សែម ព្រះគ្រូចៅអធិការវត្តរាជបូណ៌»។

ឯកឧត្តម ទៀ សីហា អភិបាលខេត្តសៀមរាប បានឲ្យដឹងថា ពិធីជួបសួរសុខទុក្ខ និងចែកអំណោយជូនប្រជាពលរដ្ឋ ចំនួន ៣៨៤គ្រួសារ ក្នុងឱកាសបុណ្យខួបកំណើត និងចម្រើនព្រះជន្ម ព្រះមហាវិមលធម្ម ពិន សែម សិរីសុវណ្ណោ ព្រះរាជាគណៈថ្នាក់ទោ គណៈមហានិកាយ ឧត្តមទីប្រឹក្សាគណៈសង្ឃនាយក សមាជិកថេរសភា ក្នុងព្រះពុទ្ធសាសនា នៃព្រះរាជាណាចក្រកម្ពុជា ព្រះនាយកពុទ្ធិកវិទ្យាល័យរាជបូណ៌ និងជាព្រះគ្រូចៅអធិការវត្តរាជបូណ៌ គម្រប់ ៨៣ ឈានចូល ​៨៤ព្រះវស្សា។

ឯកឧត្តម ទៀ សីហា បន្តថា៖ ខ្ញុំព្រះករុណា និងភរិយា រួមជាមួយ ឯកឧត្តមអ្នកឧកញ៉ាបណ្ឌិត សៀង ណាំ អ្នកតំណាងរាស្រ្ត សៀមរាប ព្រមទាំងក្រុមប្រឹក្សាខេត្ត គណៈអភិបាលខេត្ត កងកម្លាំង មន្ត្រីរាជការ និងប្រជាពលរដ្ឋ ទូទាំងខេត្តសៀមរាប សូមឧទ្ទិសបួង សួងកុសល្យផលបុណ្យ ដែលយើងខ្ញុំបានធ្វើទាំងអម្បាមាណ ប្រគេន ព្រះមហាវិមលធម្ម ពិន សែម សិរីសុវណ្ណោ ព្រះរាជាគណៈថ្នាក់ទោ គណៈមហានិកាយ ឧត្តមទីប្រឹក្សា សម្តេចព្រះសង្ឃនាយក សមាជិកថេរសភា ក្នុងព្រះពុទ្ធសាសនា នៃព្រះរាជាណាចក្រកម្ពុជា ព្រះនាយ​ក​ពុទ្ធិកវិទ្យាល័យរាជបូណ៌ និងជាព្រះគ្រូចៅអធិការវត្តរាជបូណ៌ សូមព្រះអង្គគ្រូមានសុខភាពល្អបរិបូរណ៍ ព្រះជន្មាយុយឺនយូរជាងរយព្រះវស្សា ដើម្បីគង់ជាម្លប់ព្រះធម៌ ដល់សិស្សគណគ្រប់ៗអង្គ/នាក់ បានសិក្សា ក្រេបជញ្ជក់នូវចំណេះដឹងក្នុងវិស័យព្រះពុទ្ធសាសនានៃយើង៕SRP

ភ្មំពេញ៖លោកបណ្ដិតហ៊ុន ម៉ាណែត បានលើកឡើងថា៖ កម្លាំងមហាសាមគ្គីភាព ដ៏រឹងមាំ នឹងនៅតែបន្តទៅមុខទៀត ក្រោមបរិយាកាស សុខសន្តិភាពពេញលេញ ដែលសម្តេចតេជោ នាយករដ្ឋមន្ត្រី បានបេ្តជ្ញា ការពារថែរក្សា ឱ្យគង់វង្ស។

ក្នុងពិធីសំណេះសំណាល និងជួបជុំជាមួយមហាគ្រួសារខ្មែរ រស់នៅប្រទេសអូស្រ្តាលី និងនូវែលសេឡង់ កាលពីថ្ងៃអាទិត្យ មុននេះ លោក បណ្ឌិត ហ៊ុន ម៉ាណែត បានបញ្ជាក់ថា កម្លាំងមហាសាមគ្គី ប្រជាជាតិខ្មែរ តាមរយៈ ការភ្ជាប់ទំនាក់ទំនង រវាងខ្មែរ និងខ្មែរ ពោលគឺរវាងខ្មែររស់នៅក្រៅប្រទេស និងខ្មែររស់នៅក្នុងប្រទេស ក្រោមស្មារតី បេះដូង និងព្រលឹងខ្មែរតែមួយ ដែលតែងតែយកចិត្តទុកដាក់ និងចេះជួយយកអាសារគ្នាទៅវិញទៅមក។

លោកហ៊ុន ម៉ា ណែត បញ្ជាក់ទៀតថា កម្លាំងមហាសាមគ្គីភាពដ៏រឹងមាំ នេះ នឹងនៅតែបន្តទៅមុខទៀត ក្រោមបរិយាកាស សុខសន្តិភាព ពេញលេញ ដែល សម្តេចតេជោ នាយករដ្ឋមន្រ្តី ហ៊ុន សែន បានបេ្តជ្ញា ការពារថែរក្សាឱ្យគង់វង្ស ឋិតថេរ​យូរអង្វែងសម្រាប់ខ្មែរយើងទាំងអស់ គ្នាជាច្រើនជំនាន់តរៀងទៅ៕SRP

ខេត្តកំពង់ចាម៖លោកអ៊ុន ចាន់ដា អភិបាលខេត្តកំពង់ចាម បានក្រើនរំលឹក ដល់មន្ត្រីអាជ្ញាធរមូល ដ្ឋាន ឲ្យខិតខំបម្រើសេវា សាធារណៈ ជូនប្រជាពលរដ្ឋឲ្យបានល្អប្រសើរ ពោលគឺមិនត្រូវតាំងខ្លួនជា ចៅហ្វាយនាយលើប្រជាពលរដ្ឋឡើយ ដោយត្រូវបញ្ចេញឲ្យអស់ពីសមត្ថភាព និង​ទេពកោសល្យ​ ក្នុងការបម្រើ ប្រជាពលរដ្ឋ ដោយឥរិយាបថទន់ភ្លន់ តែមិនទន់ជ្រាយពោលគឺ ត្រូវមានសាមគ្គី ឯកភាពផ្ទៃក្នុង បើជួបបញ្ហាប្រឈម ត្រូវរួមគ្នាធ្វើការដោះស្រាយ ផងដែរ។

ថ្លែងក្នុង ពិធីសម្ពោធដាក់ឲ្យប្រើប្រាស់ជាផ្លូវការអគារសិក្សា ១ខ្នង ស្មើនឹង ៣បន្ទប់ នៅសាលាបឋមសិក្សា កោះចំប៉ា ស្ថិតក្នុងឃុំព្រីងជ្រុំ ស្រុកំជើងព្រៃ នៅចន្ទនេះ អភិបាលខេត្តកំពង់ចាម ក៏លើកឡើងថា អ្វីដែលយើងព្រួយបារម្ភបំផុត នោះគឺភាពល្ងង់ខ្លៅ ដែលអាចនាំមកនូវភាពក្រីក្រ ដូច្នេះយើងត្រូវខិតខំសិក្សារៀនសូត្រ ដើម្បី យកចំណេះដឹង និងជំនាញតម្រូវទៅនឹងទីផ្សាការងារនាសម័យសកលភាវូនីយ៍កម្ម ដែលកំពុង មានការរីកចម្រើនយ៉ាងលឿន ដើម្បីនាំមកនូវការអភិវឌ្ឍរីកចម្រើន។

អភិបាលខេត្តកំពង់ចាម បានសង្កត់ធ្ងន់ថា បើយើងខ្លាំងយើង រឹងមាំហើយនោះគ្មានបរទេសណា គេអាចដណ្តើមការងារពីយើងបានទេ ដូច្នេះប្អូនៗសិស្សានុ សិស្សត្រូវខិតខំប្រឹងប្រែងសិក្សារៀនសូត្រទាំងខ្មែរ និងបរទេសផង ដើម្បីតម្រូវតាមទីផ្សារកា រងារបច្ចុប្បន្ន និងទៅថ្ងៃអនាគត នៅពេលបញ្ចប់ការសិក្សាហើយនោះត្រូវសម្លឹងមើលទៅមុខឲ្យ បានវែងឆ្ងាយផងដែរ។

អភិបាលខេត្ត បានជំរុញដល់ លោកគ្រូ អ្នកគ្រូឲ្យពង្រឹងគុណភាពសិក្សាក៏ដូចជាការខិត ខំបង្រៀនសិស្ស ដោយមានការយកចិត្តទុកដាក់ខ្ពស់ ដើម្បីចូលរួមចំណែកក្នុងការអភិវឌ្ឍធនធាន មនុស្សឈានទៅដល់ការអភិវឌ្ឍន៍ប្រទេសជាតិយើង ឲ្យកាន់តែរីកចម្រើនបន្ថែមទៀត ចំពោះក្មួយ ៗ សិស្សានុសិស្ស ក៏ត្រូវខិតខំប្រឹងប្រែងសិក្សារៀនសូត្រផងដែរ បន្ទាប់ពីមានសាលាថ្មីហើយនោះ ព្រោះធនធានមនុស្ស ពិតជាមានសារៈសំខាន់ណាស់ក្នុងការចូលរួមចំណែកកសាង និងអភិវឌ្ឍន៍ ប្រទេសជាតិ ឲ្យមានការរីកចម្រើន ខណៈរាជរដ្ឋាភិបាលបានជំរុញឲ្យមានការបណ្ដុះបណ្តាល ធនធានមនុស្សតាំងពីកម្រិតថ្នាក់មូលដ្ឋាន រហូតដល់មហាវិទ្យាល័យ បន្ទាប់ពីប្រទេសយើងមាន សុខសន្តិភាព៕SRP

ខេត្តកំពង់ចាម​៖តាមរយៈ គម្រោងកាត់បន្ថយភាពក្រីក្រ និងអភិវឌ្ឍកសិកម្មខ្នាតតូចតំបន់ទន្លេសាប ជំហាន២ ហៅកាត់ថា (TSSD-AF) នៅក្នុងខេត្តកំពង់ចាម នឹងទទួលបានគម្រោងផ្លូវកៅស៊ូ ផ្លូវបេតុង និងប្រឡាយបេតុងថ្មី ៩គម្រោង ទុកជូនប្រជាពលរដ្ឋប្រើប្រាស់។

នេះជាការបញ្ជាក់ពី មន្ត្រីជំនាញ គម្រោងកាត់បន្ថយភាពក្រីក្រ និងអភិវឌ្ឍកសិកម្មខ្នាតតូចតំបន់ទន្លេសាប ខេត្តកំពង់ចាម ឲ្យដឹងថា៖ គម្រោងទាំង៩ ខាងលើនេះ មាន៖ ១.ផ្លូវកៅស៊ូ ២.២១៤ម នៅភូមិអន្លង់អកលិច-ភូមិព្រែកគ្រួស នៃឃុំសូរគង ស្រុកកងមាស។ ២.ផ្លូវកៅស៊ូ ១.០១២ម នៅភូមិអង្គរបានទី៩ ឃុំអង្គរបាន ស្រុកកងមាស។ ៣.ផ្លូវបេតុង ៥៩០ម នៅភូមិព្រែកកុយ ឃុំព្រែកកុយ ស្រុកកងមាស។ ៤.ផ្លូវបេតុង ៥០០ម នៅភូមិកប៉ាល់ ឃុំសណ្តែក ស្រុកបាធាយ។ ៥.ផ្លូវបេតុង ៨៨២ម នៅភូមិកោះចិនក្រោម-ភូមិកំពង់រាបលើ ឃុំកំពង់រាប ស្រុកកោះសូទិន។ ៦.ផ្លូវបេតុង ១.០៦៩ម នៅភូមិខ្ទួយ១,២,៣ ឃុំអូរម្លូរ ស្រុកស្ទឹងត្រង់។ ៧.ផ្លូវបេតុង ៧២៨ម នៅភូមិទួលសំបូរ ឃុំទួលសំបូរ ស្រុកស្ទឹងត្រង់។ ៨.ប្រឡាយបេតុង ៨៧៥ម ភូមិសំបូរ និងភូមិប៉ប្រក់ ឃុំសូភាស ស្រុកស្ទឹងត្រង់។ និង៩.ផ្លូវសកៅស៊ូ ១.៨៣០ម ភូមិស្រឹង និងភូមិប្រសាំ ឃុំទំនប់ ស្រុកបាធាយ ខេត្តកំពង់ចាម។

បើតាមលិខិតលេខ ៤១២លស/គ.ជ.អ.ប ចុះថ្ងៃទី០៦ ធ្នូ ឆ្នាំ២០២២ របស់លេខាធិការដ្ឋាន គ.ជ.អ.ប នៃក្រសួងមហាផ្ទៃ បានបញ្ជាក់ឲ្យដឹងថា មកដល់ពេលនេះ លេខាធិការដ្ឋាន គ.ជ.អ.ប បានបើសំណើដេញថ្លៃ លើគម្រោង ហេដ្ឋារចនាសម្ព័ន្ធ សរុបចំនួន ៥០គម្រោង នៅក្នុងខេត្តគោលដៅទាំង ៧ ក្នុងនោះ គឺបានបើកសំណើដេញថ្លៃ សម្រាប់ខេត្តកំពង់ចាម មាន ០៧គម្រោង រួចរាល់ហើយ។ ជាមួយនោះ គណៈកម្មការលទ្ធកម្មថ្នាក់ជាតិ និងធ្វើការវាយតម្លៃ លើឯកសារលម្អិតមលើក្រុមហ៊ុនដែលឈ្នះ ដើម្បី បន្តនីតិវិធីចុះកិច្ចសន្យាសាងសង់ ក្នុងរយៈពេល ៩០ថ្ងៃ។

សូមជម្រាបថា គម្រោងកាត់បន្ថយភាពក្រីក្រ និងអភិវឌ្ឍន៍ កសិ​ក​ម្ម​ខ្នា​ត​តូ​ច​តំ​ប​ន់​ទ​ន្លេ​សាប ជំហាន២ (TSSD-AF) បានអនុវត្តក្នុង ២៧០ឃុំ/សង្កាត់ ស្មើនឹង ៣៨ក្រុង/ស្រុក នៅក្នុង​ខេ​ត្តគោលដៅ​ សរុបចំនួន ០៧ ក្នុងនោះរួមមាន ៖ ខេត្តកំពង់ចាម ត្បូងឃ្មុំ បាត់ដំបង ព្រៃវែង កំពង់ធំ សៀមរាប និ​ង​ខេត្តបន្ទាយមានជ័យ៕SRP

ខេត្តសៀមរាប៖ទីភ្នាក់ងារសារព័ត៌មាន សៀមរាប ប៉ុស្តិ៍
ធីវី អនឡាញ ត្រូវបាន សាខាពន្ធដារខេត្តសៀមរាប ធ្វើកំណត់ហេតុ លើកទី១ ដោយប្រឈមនឹងការបង់ពិន័យ ចំពោះការយឺតយ៉ាវលើការបង់ពន្ធប្រចាំខែ។

ការធ្វើកំណត់ហេតុនេះធ្វើឡើងនៅសាខាពន្ធដារខេត្តសៀមរាប នាថ្ងៃទី២៦ ខែធ្នូ ឆ្នាំ២០២២។

លោកប៊ុត វិចិត្រ ចាងហ្វាងទីភ្នាក់ងារសារព័ត៌មាន សៀមរាប ប៉ុស្តិ៍ ធីវី អនឡាញ បានថ្លែងប្រាប់ការិយាល័យនិពន្ធសៀមរាប ប៉ុស្តិ៍ នៅព្រឹកថ្ងៃចន្ទនេះថា ទីភ្នាក់ងារសារព័ត៌មាន សៀមរាប ប៉ុស្តិ៍ ធីវី អនឡាញ បានត្រូវបានសាខាពន្ធដារខេត្តសៀមរាប ធ្វើកំណត់ហេតុលើកទី១ ចំពោះការបង់ពន្ធយឺតយ៉ាវកន្លងមក។

លោកប៊ុត វិចិត្រ បន្តថាចំពោះការយឺតយ៉ាវក្នុងការបង់ពន្ធប្រចាំខែលើសហគ្រាសសារព័ត៌មាន សៀមរាប ប៉ុស្តិ៍ របស់លោក គឺបានខកខានកាតបង់ចំនួន៥ខែកន្លងទៅ។ ពោលគឺចាប់តាំងពីខែសីហា ឆ្មាំ២០២២ រហូតដល់ថ្ងៃទី ២៦ខែធ្នូ ឆ្នាំ២០២២នេះ។

បើតាមលោក ប៊ុត វិចិត្រ ចំពោះការធ្វើកំណត់ហេតុរបស់ សាខាពន្ធដារខេត្តសៀមរាប លោកបានទទួលស្គាល់នូវការយឺតយ៉ាវក្នុងការបង់ពន្ធ។

បើតាមលិខិតកំណត់ហេតុ បញ្ជាក់ថាតាមបង់ប្រាក់ពន្ធ និងដាក់លិខិតប្រកាសពន្ធយឺតយ៉ាវ ខុសកាលបរិច្ឆេទកំណត់ និងមន្ត្រីបានពន្យល់ណែនាំ ដល់ម្ចាស់សហគ្រាស អំពីកាលបរិច្ឆេទ នៃការពារបង់ប្រាក់ពន្ធ និងដាក់លិខិតប្រកាស យ៉ាងយូរផុត ថ្ងៃថ្មី ២០..។

មន្ត្រីបានធ្វើកំណត់ហេតុលើកទី ១ និងបានណែនាំដល់ម្ចាស់សហគ្រាស អំពីការបំពេញកាតព្វកិច្ចសារពើពន្ធ ព្រមទាំងនិងសទណ្ឌតាមច្បាប់កំណត់ ដោយព្រមទួលពិន័យ និងបង់ពន្ធបន្ថែម 10%, រប្រាក់1.5%; បន្ថែមពីលើប្រាក់ពន្ធ បានបង..។

ករណីសហគ្រាស ដាក់លិខិតប្រកាសពន្ធ យឺតយ៉ាវលើកទី ២ នោះសហគ្រាសនឹងទទួលរងនូវទោសទណ្ឌ តាមច្បាប់ ដូច បានរៀបរាប់ខាងលើ និងចាត់ទុកថាប្រព្រឹត្តអំពើរាំងស្ទុះក្នុងការដាក់ប្រកាស ដោយពិន័យចំនួន 2,000,000រៀល ក្នុងមួយករណីទៀត៕SRP

លោក ខៀវ សារឿន ប្រធានស្នាក់ការតំបន់២ បង្ការនិងបង្ក្រាបបទល្មើសរត់ពន្ធ កំពុងតែល្បីល្បាញយ៉ាងខ្លាំងតាមរយៈ តម្រូវឲ្យក្រុមឈ្មួញដឹកទំនិញ បង់លុយដោយមិនចាំបាច់ចេញវិក្កយបត្រ អ្វីទាំងអស់។ នេះបើតាមសារព័ត៌មានក្នុងស្រុកបានចេញផ្សាយ។ 

យោងតាមប្រភពពីក្រុមអាជីវករ អ្នករកស៊ីដឹកទំនិញរត់ពន្ធទំនិញ ឆ្លងដែន ចេញចូលពី ប្រទេសវៀតណាម មកកម្ពុជា នឹងពីកម្ពុជា ទៅប្រទេសវៀតណាម បានបង្ហើបថា៖ ចាប់តាំងពីលោក ខៀវ សារឿន ចូលកាន់តំណែង ជាប្រធានស្នាក់ការតំបន់២ បង្ការនិងបង្ក្រាបបទល្មើសរត់ពន្ធ នោះមក គឺលោក ខៀវ សារឿន បានប្ដូរប្រព័ន្ធបង់លុយខុសពីមុន ក្នុងបំណងរក្សាការសម្ងាត់ កុំឱ្យបែកធ្លាយដល់អ្នកសារព័ត៌មាន ដោយលោក ខៀវ សារឿន បានកំណត់ឱ្យអាជីវករ ទៅបង់លុយដាក់ខែ នៅផ្ទះរបស់លោក ផ្ទាល់ ស្ថិតនៅភូមិពានី ឃុំល្វា ស្រុកព្រះស្ដេច ខេត្តព្រៃវែង។ ប៉ុន្តែករណីនេះ ត្រូវបានលោក ខៀវ សារឿន បដិសេធចោលថាជារឿងមិនពិត។

យោងតាមប្រភពបានឲ្យអ្នកសារព័ត៌មានដឹងថា កាលពីជំនាន់ លោក ផែន ភឿន ជាប្រធានស្នាក់ការតំបន់២ គឺមានការកំណត់យកលុយពីអាជីវករ ដាក់ហោប៉ាវដែរ ប៉ុន្តែមិនច្រើន ហើយក៏មិនតឹងតែង ដូចលោក ខៀវ សារឿន នៅពេលនេះនោះដែរ។ លុះដល់កំឡុង ពាក់កណ្ដាលឆ្នាំ២០២២ លោក ផែន ភឿន បានចូលនិវត្តន៍បាត់ទៅ ទើប​លោក ខៀវ សារឿន ក៏ចូលកាន់តំណែងជាប្រធានស្នាក់ការតំបន់២ បង្ការនិងបង្ក្រាប បទល្មើសរត់ពន្ធ ជំនួសវិញ។

ប្រភពបានបន្តថាក្រោយបានកាន់តំណែងនេះភ្លាម លោក ខៀវ សារឿន បានរៀបចំប្រព័ន្ធគ្រប់គ្រងថ្មី ដោយគាបយកលុយពីអាជីវករ អ្នកដឹកទំនិញពីវៀតណាម ចូលខ្មែរ ច្រើនជាងមុន ជាហេតុនាំឱ្យអាជីវករ អ្នករកស៊ីរកប្រាក់ចំណេញលែងបាន។

បើតាមក្រុមឈ្មួញប្រាប់ថា លោក ខៀវ សារឿន ប្រធានស្នាក់ការតំបន់២ បានកំណត់យកលុយពីពួកគាត់ សម្រាប់រថយន្តធុនតូច ក្នុង១ជើងៗចំនួន២០ម៉ឺនរៀលជាកំហិត ឯរថយន្តធុនមធ្យម យកចាប់ពី៣០ម៉ឺនរៀល ទៅ៥០ម៉ឺនរៀល ក្នុង១ជើង រថយន្តធុនធំ យកចាប់ពី៥០ម៉ឺនរៀល ទៅ៨០ម៉ឺនរៀលក្នុង១ជើង។ ក្នុងនោះ បើសម្រាប់ រថយន្តដឹកទំនិញសំខាន់ៗ ដូចជាគ្រឿងដែក គ្រឿងម៉ាស៊ីន ចេញពីវៀតណាម ចូលមកខ្មែរ ដោយឆ្លងកាត់ផ្លូវជាតិលេខ១ គឺលោក ខៀវ សារឿន កំណត់យកច្រើន រហូតដល់រាប់រយ រាប់ពាន់ដុល្លារឯណោះ ក្នុង១ជើងៗ។

ជាក់ស្ដែង អាជីវករអ្នកដឹកទំនិញ ពីវៀតណាម ចូលមកខ្មែរ តាមច្រកទ្វារព្រំដែនអន្តរជាតិចក្រី ដោយប្រើរថយន្តចំណុះ៥តោន គឺត្រូវបាន លោក ខៀវ សារឿន កំណត់យកក្នុង១ជើងចំនួន២០ម៉ឺនរៀល ជាកំហិត ពោលគឺ ការបង់លុយទាំងនោះ មិនដែលមានក្រដាសស្នាម ឬចុងសន្លឹក បង្កាន់ដៃបង់ពន្ធចូលរដ្ឋអ្វីទាំងអស់ ហើយក៏មិនមែនដឹក១ជើង បង់១ជើង នៅស្នាក់ការគយចល័ត ផ្លូវជាតិលេខ១ នៅត្រង់ចំណុចឃុំរំចេក ស្រុកព្រះស្ដេច ខេត្តព្រៃវែង ដូចមុនៗនោះឡើយ ដោយលោក ខៀវ សារឿន គិតជាខែ និងរាប់ជើងឡាន ដោយស្នាក់ការគយចល័ត ផ្លូវជាតិលេខ១ នៅត្រង់ចំណុចឃុំរំចេក ស្រុកព្រះស្ដេច ខេត្តព្រៃវែង គ្រាន់តែជាកន្លែងពិនិត្យឯកសារ និងរាប់ក្បាលឡានប៉ុណ្ណោះ ដើម្បីគាបឱ្យក្រុមឈ្មួញ ទៅបង់លុយនៅផ្ទះរបស់លោក ខៀវ សារឿន ស្ថិតនៅភូមិពានី ឃុំល្វា ស្រុកព្រះស្ដេច ខេត្តព្រៃវែង ផ្តាល់យ៉ាងទៀងទាត់វិញ។

ជុំវិញវិញការចោទប្រកាន់បែបនេះ សៀមរាប ប៉ុស្ដិ៍ នៅមិនទាន់ទទួលបានការបកស្រាយបំភ្លឺពី លោក ខៀវ សារឿន ប្រធានស្នាក់ការតំបន់២ បង្ការនិងបង្ក្រាបបទល្មើសរត់ពន្ធ បាននៅឡើយទេ។ ប៉ុន្តែលោកធ្លាប់ប្រាប់អ្នកសារព័ត៌មានថា «លោកមិនបានយកលុយពីអាជីវករទេ ហើយក៏ពុំមាន ករណីបង់លុយដល់ផ្ទះអ្វីដែរ»។

សូមបញ្ជាក់ថា គេសង្កេតឃើញ ក្រុមឈ្មួញជាច្រើននាក់ មានទាំងខ្នាតតូច និងខ្នាតធំ បាននាំគ្នាសម្រុកដឹកជញ្ជូនទំនិញ ផ្សេងៗដូចជា៖ .គ្រឿងដែក.គ្រឿងជ័រ. ឥវ៉ាន់ចាប់ហួយ.បន្លែផ្លែឈើ.ត្រីសាច់. ចេញពីវៀតណាម ចូលមកកម្ពុជា ដោយគេចពន្ធនិងបង់ពន្ធមិនគ្រប់ តាមច្រកទ្វារព្រំដែននានា ទាំងថ្ងៃ ទាំងយប់ គ្មានឈប់ឈរ ជាហេតុនាំឱ្យសមត្ថកិច្ចជំនាញគយ ដេកចាំទទួលផលស្រាប់ៗ យ៉ាងច្រើនសន្ធឹកសន្ធាប់ជាថ្នូរ និងមិនបង្ក្រាប ទំនិញគេចពន្ធ ឬផាកពិន័យចូលរដ្ឋ ហើយករណីនេះ នាំឲ្យមានការបាត់បង់ចំណួលជាតិ យ៉ាងច្រើនក្នុង១ខែៗ៕SRP

ក្នុងសំណាលសំណាល ជាមួយគណៈកម្មាធិការ ឃុំ សង្កាត់ ក្រុង ស្រុក ខេត្តក្នុងរចនាសម័ន្ធស.ស.យ.ក. ខេត្តមណ្ឌលគិរី​ លោក ហ៊ុន ម៉ានី បានលើកឡើងថា «ចំណេះជាមូលដ្ឋានដែលមិនអាចខ្វះបាន ហើយត្រូវរៀនសូត្រ ដុសខាត់ជាប្រចាំ ទោះបីជាយ៉ាងនេះក្តី ចំណេះដឹងតែមួយមុខមិនមែន ជាកត្តាកំណត់ភាពជោគជ័យ ឬភាពជាអ្នកដឹកនាំល្អនោះទេ»

ថ្លែងក្នុងពិធីសំណេះសំណាលនេះ លោក ហ៊ុន ម៉ានី បានរំលេចបន្ថែមថា អ្វីដែលសំខាន់នោះ គឺ ការដែលចេះប្រើប្រាស់ ចំណេះ ជំនាញ និងបទពិសោធន៏ការងារមិនថា ស្ម័គ្រចិត្ត ឬការងារប្រចាំថ្ងៃ ឲ្យសមស្របតាម កាលៈទេសៈ និងស្របតាមផែនការ គោលដៅដែលសំដៅឆ្ពោះទៅ។

ផ្សាភ្ជាប់ជាមួយគ្នានេះ លោក បានរំលេចថា ស.ស.យ.ក. បានក្លាយជាវេទិកា មួយ ដែលមិនត្រឹមតែសម្រាប់ការ ដុសខាត់ និងអភិវឌ្ឍសមត្ថភាពសមាជិក សមាជិកាម្នាក់ៗ នោះទេ តែក៏ជាវេទិកា សម្រាប់ការបង្ហាញ សមត្ថភាព នៃភាពជាអ្នកដឹកនាំ និងភាពជោគជ័យទៅថ្ងៃអនាគតរៀងៗខ្លួនផងដែរ៕SRP

ខេត្តមណ្ឌលគិរី៖ក្នុងកម្មវិធីសំណេះសំណាល ជាមួយរចនាសម្ព័ន្ធគណៈចលនាមហាជនខេត្តមណ្ឌលគិរី នៅខេត្តមណ្ឌលគិរី នៅថ្ងៃសៅរ៍ ទី២៤ ខែធ្នូ ឆ្នាំ២០២២ ប្រធានសហភាពសហព័ន្ធយុវជនកម្ពុជា លោក ហ៊ុន ម៉ានី បានលើកឡើងថា «ទឹកស្ងប់ មិនមែនបានន័យថាមិនមានត្រី»។

លោក ហ៊ុន ម៉ានី បន្តថា៖ ត្រូវចង់ចាំថា កម្ពុជាត្រូវបានគេសាកល្បងជាច្រើនលើក ច្រើនសារ ក្នុងរូបភាពពណ៌ មួលបង្កាច់ ដែលនាំឲ្យមានការបែកខ្ញែកគ្នាផង និងនាំដល់ការបង្កចលាចលជាច្រើនលើកច្រើនសារផង។

កម្ពុជាយើងបានស្វែងរកសន្តិភាព និងមានឱកាសបន្តអភិវឌ្ឍជាតិ ដែលមានមកនូវសេចក្តីសុខ និងភាពរីកចម្រើនជូនប្រជាជន។ ក្នុងន័យនេះ កម្ពុជា មិនអនុញាតិអាចឲ្យមានភាគីណាមួយ មានចេតនាអាក្រក់ បង្កភាពចលាចល និងអស្ថិរភាពសង្គម ដែលរំខានដល់សេចក្តីសុខ នៃ ប្រជាជាតិកម្ពុជា បានទៀតនោះទេ។

ខ្ញុំសូមលើកមកសារជាថ្មី នៃពាក្យមួយឃ្លាគឺ៖ «ការពារអនាគត» (កម្ពុជា)។ ការពារអនាគតប្រជាជាតិ ដែលមានភាពសម្បូរសប្បាយ ការពារអនាគត ដែលមានខឿនការពារជាតិ និងសន្តិសុខជាតិរឹងមាំ ការពារអនាគតដែលមានខឿនសេដ្ឋកិច្ចជាតិ មានភាពធន់ និងពោរពេញទៅដោយឱកាស៕SRP

ខេត្តកំពង់ចាម៖សមាជិក គណបក្ស ខ្មែរស្រឡាញ់ជាតិ ជាង១៥០នាក់ បានសុំលាឈប់ពី គណបក្ស ខ្មែរស្រឡាញ់ជាតិ សុំចុះចូលជាមួយគណបក្សដែលកំពុងកាន់អំណាច គណបក្សប្រជាជនកម្ពុជា។

ការសុំចុះចូលធ្វើឡើង នៅទីស្នាក់ការគណបក្សប្រជាជនកម្ពុជា ខេត្តកំពង់ចាម នៅរសៀលថ្ងៃសៅរ៍ ម្សិលមិញ។

សមាជិកគណបក្ស ថ្មី ចំនួន ១៥១ នាក់ ស្រី៦១ នាក់ ដែលបានសុំលាឈប់ ពី សមាជិក គណបក្សខ្មែរស្រឡាញ់ជាតិ មកពីស្រុកចំនួន៥ គឺ ស្រុកកងមាស,បាធាយ,ជើងព្រៃ,ព្រៃឈរ និងស្រុកចំការលើ។

ក្នុងពិធី លោក អ៊ុន ចាន់ដា ប្រធានគណបក្សខេត្ត បានសម្ដែងការស្វាគមន៍ ប្រកបដោយក្ដីរីករាយ និងស្និទ្ធស្នាលបំផុត ចំពោះបងប្អូន ដែលមានស្មារតីភ្ញាក់រលឹក វិលមកសុំរួមរស់ជីវភាព នយោបាយ ជាមួយគណបក្សប្រជាជនកម្ពុជា អាស្រ័យ ដោយបានមើលឃើញពីភាពដឹកនាំត្រឹមត្រូវ និងការរីកចម្រើនលើគ្រប់វិស័យ ក្រោមការដឹកនាំ របស់ គណបក្សប្រជាជនកម្ពុជា ដែលមានសម្ដេចតេជោ ហ៊ុន សែន ជាប្រធានគណបក្ស និងជានាយករដ្ឋមន្ត្រី នៃព្រះរាជាណាចក្រកម្ពុជា។

លោកប្រធានគណបក្សខេត្ត បានមានមតិផ្ដាំផ្ញើចំពោះសមាជិគណបក្សថ្មីដូចតទៅ៖

១. សូមបងប្អូនបន្តធ្វើចលនាអូសទាញ មិត្តភ័ក្ដ សាច់ញាតិនៅក្នុងគណបក្សដ៏ទៃ ឲ្យចូលរួមគាំទ្រ និងបោះឆ្នោតជូនគណបក្សប្រជាជនកម្ពុជា ដើម្បីកសាងអភិវឌ្ឍប្រទេសជាតិ។

២. សូមបងប្អូនរក្សាភាពស្មោះត្រង់ចំពោះគណបក្ស ដូចការប្ដេជ្ញាចិត្ត កុំក្បត់គណបក្ស បងប្អូនក្នុងគណបក្សទទួលបងប្អូនដោយស្មារតីសាមគ្គី ដោយមិនមានការរើសអើង ។

៣.សូមជ្រាបថា គណបក្សប្រជាជនកម្ពុជា ជាគណបក្សដែលមានប្រវត្តិយូរជាង គណបក្ស ណាទាំងអស់ និងមានស្នាដៃជាសមិទ្ធផល យ៉ាងច្រើន ឥតគណនា ចំពោះប្រទេសជាតិ ប្រឆាំងអាណានិគម និងការឈ្លាពានរបស់បរទេស គ្រប់ជំនាន់ រំដោះប្រទេសពីរបបប្រល័យពូជសាសន៍ ការបញ្ចប់សង្គ្រាម និងបង្រួបបង្រួមជាតិ នាំមកនូវលទ្ធិប្រជាធិបតេយ្យ សេរីពហុបក្ស និងធ្វើឲ្យប្រទេសជាតិ មានសុខ សន្តិភាព និងការអភិវឌ្ឍរហូតបច្ចុប្បន្ន។

ដូច្នេះសូមបងប្អូនមានការជឿជាក់ លើការដឹកនាំរបស់គណបក្សប្រជាជនកម្ពុជា ដែលមានសម្តេចតេជោ ហ៊ុន សែន ជាប្រមុខ និងបោះឆ្នោត ជូនគណបក្សប្រជាជនកម្ពុជា ដើម្បីបន្តថែរក្សាសុខសន្តិភាព និងការអភិវឌ្ឍប្រទេសជាតិ ជានិរន្តរ៍តរៀងទៅ៕SRP