គម្រោងសាងសង់ផ្លូវវាងក្រុងសៀមរាប នឹងបើកការដ្ឋានឆាប់ៗនេះ នៅតំបន់ភាគខាងត្បូងមានប្រវែង ៤៦,៥៧ គីឡូម៉ែត្រ ពីស្រុកប្រាសាទបាគងទៅស្រុកពួក

អភិបាលរងខេត្តសៀមរាបលោក លី សារី នៅថ្ងៃម្សិលមិញ បានដឹកនាំកិច្ចប្រជុំផ្សព្វផ្សាយជាសាធារណៈអំពីគម្រោងធ្វើទីតាំងជញ្ជីងថ្លឹងរថយន្តថ្មី ក្នុងស្រុកពួក ស្ថិតគម្រោងផ្លូវវាងក្រុងសៀមរាប ជូនប្រជាពលរដ្ឋ រងផលប៉ះពាល់ទាំង ៤ក្បាលដី នៅភូមិស្ទឹងព្រះស្រុក ឃុំល្វា ស្រុកពួក ខេត្តសៀមរាប។

លោក លី សារី អភិបាលរងខេត្តមានប្រសាសន៍ថា កិច្ចប្រជុំនេះ គឺដើម្បីជូនដំណឹងដល់ម្ចាស់ក្បាលដីទាំង៤ប្លង់ និងពិភាក្សាលើការអនុវត្តការងារដោះស្រាយផលប៉ះពាល់ អំពីទីតាំងជញ្ជីងថ្លឹងរថយន្តថ្មី ក្នុងស្រុកពួក ដែលស្ថិតក្នុងគម្រោងផ្លូវវាងក្រុងសៀមរាប (Green Siem Reap Urban Bypass Project) ដែលមានប្រវែង ៤៦,៥៧ គីឡូម៉ែត្រ (PK0+000-PK46+570) ចំណុចចាប់ពីស្រុកប្រាសាទបាគង (ផ្លូវចូលព្រលានថ្មី) រហូតដល់ស្រុកពួក នៃខេត្តសៀមរាប (ខាងលិចសាលាស្រុកពួក) ដែលបានសិក្សារួច មុនឈានដល់ដំណាក់កាលបើកការដ្ឋានសាងសង់ តាមរយៈមូលនិធិសហប្រតិបត្តិការអភិវឌ្ឍន៍សេដ្ឋកិច្ច (EDCF) នៃសាធារណរដ្ឋកូរ៉េ។

លោកអភិបាលរងខេត្តបន្ថែមថា គម្រោងសាងសង់ផ្លូវវាងក្រុងសៀមរាប រៀបចំឡើងដើម្បីកាត់បន្ថយការកកស្ទះចរាចរណ៍ ការបំពុលបរិយាកាស ក្នុងក្រុង ជំរុញការអភិវឌ្ឍន៍សេដ្ឋកិច្ច ក្នុងតំបន់តាមរយៈការបង្កើនលទ្ធភាពប្រើប្រាស់អន្តរតំបន់ ពង្រឹងសមត្ថភាពប្រកួតប្រជែងក្នុងខេត្ត ដែលជាទីក្រុងទេសចរណ៍ ពង្រីកតំបន់លំនៅដ្ឋាន និងជំរុញសកម្មភាពពាណិជ្ជកម្មនៅតំបន់ភាគខាងត្បូងនៃខេត្តសៀមរាបក្នុងរយៈពេលវែង និងចូលរួមចំណែកការពារទីក្រុងសៀមរាបពីការជន់លិចបឹងទន្លេសាប។

អត្ថបទ និងរូបភាព៖ លោក ធន់ ពូថេ
កែសម្រួល៖ លោក អ៊ុន ណារាជ្យ

អភិបាលខេត្តកំពង់ចាម ប្រាប់សមត្ថកិច្ច ឲ្យបន្តបង្ក្រាបបទល្មើសគ្រឿងញៀន ល្បែងស៊ីសងគ្រប់ប្រភេទ និងកំណត់ឲ្យបិទសំឡេង ឬឧបករណ៍រំខានត្រឹមម៉ោង១០យប់

ខេត្តកំពង់ចាម៖ក្នុងទិសដៅភារកិច្ចឆ្នាំ ២០២៦ ខាងមុខនេះ អភិបាលខេត្តកំពង់ចាម និងជាប្រធានគណៈបញ្ជាការឯកភាពខេត្ត ឯកឧត្តម អ៊ុន ចាន់ដា បានដាក់ចេញនូវអនុសាសន៍ណែនាំឲ្យសមត្ថកិច្ចនគរបាល នៃស្នងការដ្ឋាននគរបាលខេត្តកំពង់ចាម ត្រូវបន្តប្រតិបត្តិការក្នុងការបង្ក្រាបទល្មើសគ្រឿងញៀន និងល្បីស៊ីសងអនឡាញ និងល្បែងស៊ីសងគ្រប់ប្រភេទ រូមនឹងការកំណត់ឲ្យបិទសំឡេងតន្ត្រី ឬឧបករណ៍រំខានគ្រប់ប្រភេទ ត្រឹមម៉ោង១០យប់។

អនុសាសន៍ណែនាំបែបនេះ របស់ឯកឧត្តមអភិបាលខេត្ត បានធ្វើឡើងនៅព្រឹកមិញក្នុងឱកាសអញ្ជើញចូលរួមជាគណៈអធិបតី ជាមួយឯកឧត្តមឧត្តមសេនីយ៍ឯក ហែម សុវត្ថិ អគ្គស្នងការរងនគរបាលជាតិ តំណាងដ៏ខ្ពង់ខ្ពស់ ឯកឧត្តម នាយឧត្តមសេនីយ៍ សៅ ថេត អគ្គស្នងការនគរបាលជាតិ ក្នុងសន្និបាតមកសរុបលទ្ធផលការងារឆ្នាំ ២០២៥ និងទិសដៅបន្តឆ្នាំ២០២៦ ស្ថិតនៅស្នងការដ្ឋាននគរបាលខេត្តកំពង់ចាម។

នាឱកាសនោះ ឯកឧត្តម អ៊ុន ចាន់ដា បានថ្លែងកាតកោតសរសើរ ដល់សមត្ថកិច្ចនគរបាល នៃស្នងការដ្ឋាននគរបាលខេត្តកំពង់ចាម ដែលបានបំពេញភារកិច្ចបានលទ្ធផលល្អប្រសើរក្នុងឆ្នាំ ២០២៥ កន្លងមក ដោយសមិទ្ធផលទាំងអស់នោះគឺបានមកដោយសារការរួមសាមគ្គីគ្នា ជាមួយអាជ្ញាធរគ្រប់លំដាប់ថ្នាក់ អនុវត្តនូវបទបញ្ជា និងគោលការណ៍របស់អគ្គស្នងការនគរបាលជាតិ ហើយចំពោះ យើងនិងបន្តចំពោះកិច្ចការងារផ្សេងៗបន្ថែមទៀត ដែលមាននៅក្នុងផែនការប្រចាំឆ្នាំ២០២៦។

ទន្ទឹមនេះ ឯកឧត្តម អភិបាលខេត្ត បានណែនាំដល់កងកម្លាំងមានសមត្ថកិច្ច រួមនឹងមន្ទីរបរិស្ថាន ចុះត្រួតពិនិត្យ ណែនាំ ធ្វើកិច្ចសន្យា ព្រមទាំង ជូនដំណឹងឲ្យ អាជីវករ លក់ដូរ កន្លែងកំសាន្ត និងភោជនីយដ្ឋាន ត្រូវបិទសំឡេងបាស ត្រឹមម៉ោង ១០ យប់ជាកុំហិត ព្រោះតែម៉ោងនេះ ជាពេលវេលា បងប្អូនប្រជាពលរដ្ឋសម្រាក។

ឯកឧត្តម អភិបាលខេត្ត បន្តថា កាលពីពេលកន្លងមកនេះ ឃើញថាការចាក់សំឡេងរំខានធុងបាស ចាក់លឺសំឡេងខ្លាំងៗ ធ្វើឲ្យប៉ះពាល់ដល់ការសម្រាករបស់ប្រជាពលរដ្ឋនៅពេលយប់ ដូច្នេះ ក្នុងនាមប្រធានគណៈបញ្ជាការឯកភាពរបស់រដ្ឋបាលខេត្តកំពង់ចាម បានដាក់ចេញគោលការណ៍ដល់ អភិបាល ក្រុង ស្រុក កម្លាំងសមត្ថកិច្ច ក្នុងនោះ មន្ទីរបរិស្ថាន ចុះណែនាំ ធ្វើកិច្ចសន្យាតាមច្បាប់កំណត់ នៅតាម បណ្តាលក្រុង- ស្រុក ទាំងអស់ យកចិត្តទុកដាក់ខ្ពស់បំផុត ដើរមើលតាម ភោជនីយ ដ្ឋាន ហាងផឹកស៊ីនាពេលរាត្រី និងកន្លែងកំសាន្ត សុំឲ្យបិទសំឡេង ជាបន្ទាន់ ត្រឹមម៉ោង១០ យប់ ដើម្បីរក្សាសណ្ដាប់ធ្នាប់សាធារណៈ និងកុំឲ្យរំខានដល់ដំណេករបស់ប្រជាពលរដ្ឋ។

ឯកឧត្តម អភិបាលខេត្ត បានណែនាំបន្ថែមដល់អាជ្ញាធរមានសមត្ថកិច្ច ត្រូវបន្តតាមដាន រឹតបន្តឹង ឲ្យបានតឹងរឹង ចំពោះអ្នកជួញដូរ ប្រើប្រាស់គ្រឿងញៀន ផ្សព្វផ្សាយដល់ម្ចាស់ផ្ទះសំណាក់ ផ្ទះជួល បិទផ្ទាំងផ្សព្វ ផ្សាយ ដាក់បំរាម ហាមប្រើប្រាស់គ្រឿង ញៀន ជួញដូរមនុស្ស ជួញដូរផ្លូវភេទ។ ឯកឧត្តម ក៏បានឲ្យសមត្ថកិច្ច យកចិត្តទុកដាក់ គ្រប់គ្រង លើក្មេងទំនើង កុំឲ្យមានសកម្មភាព វាយតបគ្នា កាប់ចាក់គ្នា ដែលបង្កឲ្យមានការភ័យខ្លាចដល់ប្រជាពលរដ្ឋ។

ក្នុងឱកាសនោះ ឯកឧត្តមឧត្តមសេនីយ៍ឯក ហែម សុវត្ថិ អគ្គស្នងការរងនគរបាលជាតិ បានផ្ដល់អនុសាសន៍ណែនាំមួយចំនួនផងដែរថា ត្រូវធានាការពារដាច់ខាតនូវឍឿនសន្តិសុខជាតិ និងស្ថេរភាពសង្គម កសាងផែនការជាក់ស្ដែង ស្របតាមភូមិសាស្ត្រ ព្រមទាំងប្រមូលព័ត៌មាន ដើម្បីធ្វើការវាយតម្លៃ រាយការណ៍ ទាន់ពេលវេលាជូនថ្នាក់ដឹកនាំ ចាត់ការទប់ស្កាត់ បង្ក្រាប រាល់បទល្មើសនានា ដើម្បីរក្សាសន្តិសុខ សណ្ដាប់ធ្នាប់ជូនប្រជាពលរដ្ឋឲ្យកាន់តែល្អប្រសើរថែមទៀត៕SRP

ខេត្តសៀមរាប៖សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធានកាកបាទក្រហមកម្ពុជា នៅថ្ងៃម្សិលមិញ បានចាត់ឯកឧត្តម គុជ លីណា អនុប្រធានអចិន្រ្តៃយ៍គណៈកម្មាធិការសាខា កាកបាទក្រហមកម្ពុជា ខេត្តសៀមរាប ចូលរួមរំលែកទុក្ខ និងយកថវិកាមួយចំនួន ជូនក្រុមគ្រួសារទាំងអស់នៃសព លោកអនុសេនីយ៍ឯក កេត សុភត្រា នាយក្រុម៣ ដែលបានពលីជីវិតនៅលើសមរភូមិកាលពីថ្ងៃពុធ ៥រោច ខែមិគសិរ ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី១០ ខែធ្នូ ឆ្នាំ២០២៥ ក្នុងពេលបំពេញបេសកកម្មការពារបូរណភាពទឹកដីតាមបណ្ដោយព្រំដែនកម្ពុជា-ថៃ និងលោកអនុសេនីយ៍ឯក កុក មីរិនដា នាយរងក្រុម២ ដែលបានពលីជីវិតថ្ងៃព្រហស្បតិ៍ ៦រោច ខែមិគសិរ ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី១១ ខែធ្នូ ឆ្នាំ២០២៥ ក្នុងពេលបំពេញបេសកកម្មការពារបូរណភាពទឹកដីតាមបណ្ដោយព្រំដែនកម្ពុជា-ថៃ។

ក្នុងវេលាដ៏សែនក្តុកក្តួលនេះ ឯកឧត្តម គុជ លីណា បាននាំយកសាររំលែកទុក្ខរបស់សម្តេចកិត្តិព្រឹទ្ធបណ្ឌិត ប៉ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលមានខ្លឹមសារថា “ក្នុងវេលាដ៏សែនក្តុកក្តួលនេះ ខ្ញុំ និងសហការីនៃកាកបាទក្រហមកម្ពុជា សូមសម្តែងនូវក្តីសោកស្តាយ អាឡោះអាល័យជាពន់ពេកជាមួយលោកស្រី និងក្រុមគ្រួសារទាំងអស់ ចំពោះការបាត់បង់កូន និងសាច់ញាតិជាទីស្រឡាញ់ ដែលតែងតែប្រណិប័តន៍តាមគន្លងធម៌របស់ ឪពុក ម្តាយ និងក្រុមគ្រួសារ។ ការពលីជីវិត របស់ លោកអនុសេនីយ៍ឯក កេត សុភត្រា និងលោកអនុសេនីយ៍ឯក កុក មីរិនដា គឺជាការបាត់បង់វីរកងទ័ពកម្ពុជា ដែលមានសមត្ថភាព និងគុណតម្លៃខ្ពស់មួយរូប នៃកងយោធពលខេមរភូមិន្ទ ដែលមានទឹកចិត្តអង់អាចក្លាហាន មោះមុតលើសមរភូមិប្រយុទ្ធ តស៊ូប្តូរជីវិត ដើម្បីបុព្វហេតុការពារបូរណភាពទឹកដី អធិបតេយ្យជាតិ ជាពិសេស ការពារសុខសន្តិភាពជូនប្រជាជន។

ក្នុងសមានទុក្ខដ៏សែនក្តុកក្តួលបំផុតនេះ ខ្ញុំ និងសហការីទាំងអស់ សូមឧទ្ទិសបួងសួងដល់ដួងវិញ្ញាណក្ខន្ធ លោកអនុសេនីយ៍ឯក កេត សុភត្រា និងលោកអនុសេនីយ៍ឯក កុក មីរិនដា សូមបានទៅកាន់សុគតិភព កុំបីឃ្លៀងឃ្លាតឡើយ៕SRP

ឯកឧត្តមខៀវ កាញ្ញារីទ្ធ៖ សៀមប្រើយុទ្ធសាស្ត្រចំនួន៣ ការដែលវាយកាន់តែជ្រៅចូលក្នុងទឹកដីកម្ពុជា

សៀមវាយកាន់តែជ្រៅចូលក្នុងទឹកដីកម្ពុជា មិនមែនរឿងពង្វាតទឹកដីនោះទេ បើពង្វាតទឹកដី សៀមច្បាស់ជាប្រមូលផ្តុំកម្លាំងវាយផ្តាច់ចំណុចទាមទារមួយចំនួនហើយ ព្រោះពេលសៀមវាយគ្រប់កន្លែងគឺចង់អោយខ្សែការពារកម្ពុជាស្តើង ( ពិតមែនតែសៀមមិនច្បាស់ថាក្បាលពួកគេទ្រគ្រាប់ផ្លោងរបស់កម្ពុជាបានប៉ុន្មានពេលក៏ដោយ ) តែពេលនេះជិតបោះឆ្នោត​ មានន័យថាទឹកដល់ច្រមុះទោះស្រវាអោបគម្រង់ខ្មោចឆ្កែក៏អោបដែរ ហេតុនេះយុទ្ធសាស្ត្រចំពោះមុខរបស់គេអាចមាន ៣ ហើយបើជោគជ័យអាចក្លាយជាយុទ្ធសាស្ត្រយូរអង្វែងបាន ។ យុទ្ធសាស្ត្រទាំងនោះ គឺ :

១. លើកទំនុកចិត្តប្រជាជនសៀមឡើងវិញអោយជឿថា សៀមនៅតែជាបងធំក្នុងតំបន់ ហេតុនេះមិនត្រូវអ្នកណាមកច្បូតពុកមាត់ខ្លាបានទេ ពិសេសកម្ពុជាដែលជាប្រទេសតូចតាច ធ្លាប់រហេមរហាមពីមុន ( នៅក្រោយសម័យអ៊ុនតាក់ ពួកកាសែតបរទេសតែងហៅទីក្រុងភ្នំពេញថាជាបាងកកកាលពី ៣០ ឆ្នាំមុន ) ។ ប្រជាជនសៀមកើនទំនុកចិត្តបានន័យថាសន្លឹកឆ្នោតគាំទ្រនសឹងកើនឡើង ។

២. សង្កត់សេដ្ឋកិច្ចកម្ពុជាអោយធ្លាក់ចុះ អាស្រ័យការបង្ខំអោយមានប្រជាជនភៀសសឹករាប់សែននាក់ ( មកដល់ពេលនេះជិតកន្លះលាននាក់ហើយ ) ដែលនឹងក្លាយជាដុំថ្មមួយដែលរាជរដ្ឋាភិបាលត្រូវទទួល​ ( បើគិតថា ក្នុងមួយថ្ងៃរដ្ឋាភិបាលចំណាយ ៥ ដុល្លាររ៉ាប់រងម្ហូបអាហារ ទឹក ជំរក ថ្នាំពេទ្យ….តើត្រូវចំណាយប៉ុន្មាន ?) ហើយនេះគឺជាសង្គ្រាមមួយដែលសៀមមិនចាំបាច់ចំណាយធំ ។ តែអ្វីដែលសៀមគិតមិនដល់ គឺចលនាប្រជាជនកម្ពុជាទូទាំងប្រទេសដែលបាននាំគ្នាជួយបងប្អូនអ្នកភៀសខ្លួនដែលជួយបន្ថយបន្ទុករាជរដ្ឋាភិបាលមួយចំណែកធំ ។ អ្វីដែលកាន់តែពិសេស គឺចលនាប្រើផលិតផលខ្មែរជួយខ្មែរ ធ្វើអោយខ្សែផលិតកម្មក្នុងស្រុក និង ការចំណាយក្នុងស្រុក ( Domestic spending ) កើនឡើងទៅវិញ ។

៣. អ្វីដែលជាយុទ្ធសាស្ត្រកំណត់របស់សៀម គឺការវាយលុកកាន់តែជ្រៅចូលក្នុងដីកម្ពុជានឹងធ្វើអោយពាក្យស្លោក «យើងជឿជាក់រាជរដ្ឋាភិបាល និង វីរកងទ័ពយើង» នឹងរបេះបន្តិចម្តងៗរហូតរាជរដ្ឋាភិបាលបច្ចុប្បន្នជួបវិបត្តិ ។​

សៀមលើកនេះចាក់ធំ តែបើចាញ់ក៏ច្បាស់ជាចាញ់ធំដែរ ! តែយើងក៏ប្រយ័ត្នស្នៀតជន្លស្តាំវ៉ៃឆ្វេង បើយើងប្រហែសគាត់បែរទៅសង្គ្រប់ទីតាំងមួយចំនួនហើយនៅក្រាញក្នុងឧម្មង្គទប់យើងដែលជាអ្នកឡើងវាយម្តង៕អត្ថបទឯកឧត្តមខៀវ កាញ្ញារីទ្ធ

ឯកឧត្តម អ្នកឧកញ៉ា សៀង ណាំ តំណាងរាស្រ្តមណ្ឌលសៀមរាប និង លោកជំទាវ រួមជាមួយរដ្ឋបាលស្រុក ក្រុមការងារ នៅព្រឹកមិញនេះ បានអញ្ជើញចុះសួរសុខទុក្ខ និងនាំយកគ្រឿងឧបភោគបរិភោគ ដែលបានការជយយឧបត្ថម្ភពី អ្នកឧកញ៉ា ហេង ឡុង ផ្ដល់ជូនដល់បងប្អូនជាជនភៀសសឹកចំនួន ១ ៥០០គ្រួសារ ដែលបានមកស្នាក់នៅក្នុងគោលដៅសុវត្ថិភាពក្នុងស្រុកក្រឡាញ់ ខេត្តសៀមរាប។

ឯកឧត្តមអ្នកឧកញ៉ា សៀង ណាំ មានប្រសាសន៍ថា ការប្រយុទ្ធគ្នានៅតាមបណ្ដោយព្រំដែនច្រើនថ្ងៃកន្លងមកនេះ កងកម្លាំងយើងបានតស៊ូប្រកៀកស្មាគ្នាក្លាហាន ម៉ឺងម៉ាត់ ប្តូរផ្តាច់ រក្សាការពារឱ្យខានតែបាននូវបូរណភាពនិងអធិបតេយ្យភាព ទឹកដីមិនរបេះរបូតឡើយ។ ផលវិបាកនៃសង្គ្រាមគឺបានបង្កមហន្តរាយ បំផ្លិចបំផ្លាញទ្រព្យសម្បត្តិ និង ផ្តាច់ជីវិតមិនរើសមុខ ទាំងទាហាន និងជនស៊ីវិលស្លូតត្រង់ ហើយសង្គ្រាមនេះ បានបង្ខំចិត្តប្រជាពលរដ្ឋនៅតំបន់កៀកសមរភូមិឱ្យភៀសខ្លួន ចាកចោលផ្ទះសម្បែង ទ្រព្យសម្បត្តិ គោក្របីស្រែចម្ការជាដើម មករកទីសុវត្ថិភាព។

ឯកឧត្តម បញ្ជាក់ថា ទុក្ខលំបាកនេះធ្វើឱ្យយើងទាំងអស់គ្នាយល់យ៉ាងច្បាស់តម្លៃនៃសន្តិភាព។ ក្នុងគ្រានេះ យើងត្រូវចែករំលែក ក្រោមស្មារតីខ្មែរតែមួយរួមគ្នា ខ្មែរស្រឡាញ់ខ្មែរជួយគ្នាទៅវិញទៅមក ទាំងសម្ភារ និងស្មារតី។ ជាមួយគ្នានេះ ប្រមុខរាជរដ្ឋាភិបាល និងអាជ្ញាធរគ្រប់លំដាប់ថ្នាក់ តែងតែគិតគូរដោះស្រាយពីទុក្ខលំបាកនោះ ដោយមិនទៅណាចោល និងនៅជាមួយបងប្អូនជានិច្ច។

ឯកឧត្តម សៀង ណាំ ក៏បានលើកទឹកចិត្ត និងអរគុណដល់គ្រួសារដែលមានកូនមានប្តីជាកងទ័ពកំពុងបំពេញភារកិច្ច នៅសមរភូមិមុខដើម្បីការពារអធិបតេយ្យភាព និងបូរណភាពទឹកដីជាកេរដូនតាយើងបានការពារទុកឱ្យដល់សព្វថ្ងៃទទួលបានជោគជ័យគ្រប់ពេលវេលា ហើយសូមឱ្យកម្លាំងមហាសាមគ្គីនៅតែបន្តជាថាមពលរឹងមាំសម្រាប់គាំទ្រ និងផ្តល់កម្លាំងចិត្តដល់វីរៈកងទ័ពបបន្តបេសកកម្មក្នុងការការពារទឹកដីរបស់យើង។

ឯកឧត្តមក៏បានណែនាំដល់ប្រជាពលរដ្ឋភៀសសឹកទាំងអស់ឱ្យយកចិត្តទុកដាក់ថែទំាសុខភាព ថែទាំអនាម័យ ត្រូវហូបស្អាត ផឹកស្អាត ដើម្បីបង្ការ និងចៀសវាងពីជំងឺតម្កាត់នានា ហើយបើមានតម្រូវការបន្ទាន់ត្រូវទាក់ទងជាមួយអាជ្ញាធរមូលដ្ឋានដែលនៅក្បែរបំផុត៕SRP
អត្ថបទ និងរូបភាព៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ