អាជ្ញាធរខេត្តសៀមរាប ប្រកាសហាមពលរដ្ឋដោយមិនអនុញ្ញាតជីកកាយ ឬធ្វើសំណង់ផ្សេងៗ ឬធ្វើការបង្ហូរទឹកចូលស្ទឹងសៀមរាប

ខេត្តសៀមរាប៖លោក លី សារី អភិបាលរងខេត្តសៀមរាប បានណែនាំបន្ថែមដល់អាជ្ញាធរពាក់ព័ន្ធទាំងអស់ត្រូវផ្សព្វផ្សាយ និងទប់ស្កាត់ដល់បងប្អូនប្រជាពលរដ្ឋរបស់យើងដោយមិនអនុញ្ញាតជីកកាយ ឬធ្វើសំណង់ផ្សេងៗ ឬធ្វើការបង្ហូរទឹកចូលស្ទឹង ការរៀបចំដាំដើមឈើក៏យើងត្រូវស្នើសុំមករដ្ឋបាលខេត្តដែរ ព្រោះគម្រោងនេះស្ថិតនៅក្រោមការគ្រប់គ្រងរបស់ម្ចាស់ជំនួយនៅឡើយ។ ម្យ៉ាងទៀត អាជ្ញាធរមានសមត្ថកិច្ចត្រូវណែនាំដល់បងប្អូនជួយសម្អាតអនាម័យបរិស្ថាន សន្តិសុខ សណ្តាប់ធ្នាប់ និងសុវត្ថិភាពជូនបងប្អូនប្រជាពលរដ្ឋ ពិសេសក្នុងពេលបងប្អូនហាត់ប្រាណ។

លោកអភិបាលរងខេត្តក៏បានថ្លែងអំណរគុណយ៉ាងជ្រាលជ្រៅចំពោះដៃគូអភិវឌ្ឍន៍របស់កូរ៉េ ដែលបានជួយក្នុងការស្តារស្ទឹងសៀមរាបជំហានទី២នេះបានជោគជ័យតាមផែនការដែលបានគ្រោងទុក។

លោក លី សារី បញ្ជាក់ថា ការៀបចំស្ទឹងនេះ គឺជាការលើកកម្ពស់សោភ័ណភាពស្ទឹង និងជាការបញ្ចៀសការជន់លិចទឹកក្នុងក្រុងសៀមរាបបន្តទៀត ម្យ៉ាងទៀតអាចធ្វើឱ្យកាណូតចូលមកដល់ក្នុងខេត្ត ហើយអាចជាផ្លូវក្នុងការដឹកជញ្ជូនបានទៀតផង។ គម្រោងនេះមិនត្រឹមតែលើកកម្ពស់សោភ័ណភាពក្រុងប៉ុណ្ណោះទេ គឺជាការទាក់ទាញភ្ញៀវទេសចរ ក៏ដូចជាសម្រាប់បងប្អូនប្រជាពលរដ្ឋ ធ្វើការហាត់ការប្រាណបានទៀតផង។ លោក អភិបាលរងខេត្តបានបញ្ជាក់ថា គម្រោងនេះបន្ទាប់ពីការប្រគល់មករដ្ឋបាលខេត្តគ្រប់គ្រងមែន តែក្រុមហ៊ុននៅតែពិនិត្យ និងជួយមើលថែមួយឆ្នាំទៀតផងដែរ។

លោក លី សារី មានប្រសាសន៍យ៉ាងដូច្នេះក្នុងឱកាស តំណាងឯកឧត្តម ប្រាក់ សោភ័ណ អភិបាលសៀមរាប ក្នុងពិធីក្រសួងសាធារណការនិងដឹកជញ្ជូនប្រគល់ទីតាំងស្តារស្ទឹងសៀមរាបជំហានទី២(KHM-18) នៃគម្រោងឥណទានសម្បទានរបស់ធនាគារអាហ័ណ នីហ័ណសាធារណរដ្ឋកូរ៉េ(EDCF) និងបដិភាគរបស់រាជរដ្ឋាភិបាលដល់រដ្ឋបាលខេត្តសៀមរាប នៅថ្ងៃម្សិលមិញ។

នៅបន្ទប់ប្រជុំសាលាខេត្តសៀមរាប លោក វង្ស ពិសិដ្ឋ អនុរដ្ឋលេខាធិការក្រសួងសាធារណការ និងដឹកជញ្ជូនបានថ្លែងថា គម្រោងស្តារស្ទឹងជំហាន២េនះគឺចាប់ពីស្ពានក្រវាត់ក្រុងរហូតដល់ចុងស្រុកដែលមានប្រវែង ៤ ៦០០ម៉ែត្រ ក្រោមនៃគម្រោងឥណទានសម្បទានរបស់ធនាគារអាហ័ណ នីហ័ណសាធារណរដ្ឋកូរ៉េ (EDCF) និងបដិភាគ របស់រាជរដ្ឋាភិបាលក្នុងការដោះស្រាយផលប៉ះពាល់របស់បងប្អូនប្រជាពលរដ្ឋ ហើយការស្តារស្ទឹងនេះ គឺយើងរៀបចំឱ្យមានសោភ័ណភាព និងបញ្ចៀសការលិចជន់ទឹកក្នុងក្រុងសៀមរាប។

ឯកឧត្តម អនុរដ្ឋលេខាធិការ បានបន្តថា កន្លងមកសៀមរាបយើងមានការជន់លិចក្នុងក្រុង ហើយការលិច ទឹកគឺស្ទឹងសៀមរាបដែលហូរកាត់ក្រុងសៀមរាបទៅទន្លេសាបមានការចាល់ ទឹកទន្លេសាបឡើងខ្ពស់ និងទឹកភ្លៀងដែលពុំទាន់មានលូមេ ដោយមានតែលូតូចៗហូរមិនទាន់។ ក្រោយពីសាងសង់ និងជួសជុលរួចរាល់ ថ្ងៃនេះ ក្រសួងនឹងធ្វើការផ្ទេរទៅរដ្ឋបាលខេត្ត និងស្នើដល់រដ្ឋបាលខេត្តទប់ស្កាត់ការតាំងទីលំនៅ និងសំណង់ផ្សេងៗ ដើម្បីធ្វើឱ្យបាត់សោភ័ណភាពដងស្ទឹងសៀមរាបរបស់យើងដែលទើបនឹងស្តាររួច ទន្ទឹមនឹងនេះ យើងក៏ត្រៀមនឹងស្តារស្ទឹងជំហាន៣ ដោយបន្តពីជំហាន២ រហូតដល់កន្ធាយគមថែមទៀត៕SRP

ខេត្តកោះកុង៖មន្ត្រីបាននិយាយនៅថ្ងៃពុធនេះថា មនុស្សចំនួនពីរនាក់ខ្មែរម្នាក់ជនជាតិថៃម្នាក់ត្រូវបានសមត្ថកិច្ចចម្រុះឃាត់ខ្លួនក្នុងប្រតិបត្តិការ បង្រ្កាបទូកមួយគ្រឿងដឹកទំនិញគេចពន្ធពីប្រទេសថៃ ប្រភេទគ្រឿងសមុទ្រ សង្សយ័ថាជាប់ពាក់ពន្ធ័ បន្តតាមនីតិវិធីច្បាប់។

ប្រតិបត្តិការនេះ ធ្វើឡើងដោយនគរបាលការពារព្រំដែនទឹកលេខ២៦៩ ក្នុងខេត្តកោះកុង នៅព្រឹកមិញនេះ។

មន្ត្រីបានបន្តថា ក្នុងទូកដឹកជញ្ជូនទំនិញគេចពន្ធ ពីប្រទេសថៃ ចូលមកខេត្តកោះកុងនេះ មានដូចជាត្រី បង្គាមឹក ក្តាមថ្មសក ខ្យង និងចាក់ច្រែង ដែលមិនបានបង់ពន្ធគយ ហើយត្រូវបាននគរបាលការពារព្រំដែនទឹក បង្រ្កាបបានភ្លាមៗអំឡុងពេលប្រុងឡើងទំនិញពីទូក កាលពីម៉ោង១០ព្រឹកថ្ងៃទី២០ ខែសីហា ២០២៥។

អភិបាលរងខេត្តកោះកុង លោក ឈិត រតនៈ ក៏បានឲ្យដឹងនៅ៦ល្ងាចថ្ងៃទី២០ ខែសីហា ឆ្នាំ២០២៥ នេះដែរថា ក្រៅពីឃាត់ទំនិញគេចពន្ធ សមត្ថកិច្ចក៏ឃាត់បានជនសង្សយ័២នាក់ ទី១៖ ឈ្មោះ ឈិត ទុំ ជនជាតិខ្មែរ និងទី២៖ ឡន់ ប៉ែង ជនជាតិថៃ រួមនិងវត្ថុតាង មានទូកកន្ទុយវែង ០១គ្រឿង និងទំនិញគេចពន្ធនៅចំណុចព្រែកកោះយ៉។

ជុំវិញករណីនេះ បើតាមលោកអភិបាលរងខេត្តបញ្ជាក់បន្ថែមថា ក្រោយពីត្រួតពិនិត្យឃាត់បានរួចរាល់ ប្រធានគណៈកម្មការត្រួតពិនិត្យការដឹកជញ្ជូនទំនិញក្នុងភូមិសាស្ត្រខេត្តកោះកុង និងសមត្ថកិច្ចជំនាញប្រគល់ជូនមន្រ្តីសាខាគយ និងរដ្ឋាករខេត្ត បន្តស៊ើបអង្កេតអនុវត្តនីតិវិធីច្បាប់ទំនិញគេចពន្ធមកពីថៃ។

សុំរំលឹកថា ទឹកដីខេត្តកោះកុង ជារឿយៗ គេសង្កេតឃើញសារព័ត៌មានក្នុងស្រុក បានចេញផ្សាយលាតត្រដាង ថាខេត្តដែលមានជាប់ព្រំដែនជាមួយប្រទេសថៃ ត្រូវបានគេបង្ហើបថាមានបទល្មើសទំនិញគេចពន្ធគ្រប់ប្រភេទចេញពីប្រទេសថៃចូលមកកម្ពុជា មិនត្រូវបានសាខាគយខេត្តកោះកុងបង្ក្រាបនោះឡើយ។ ប្រការដែលសាខាគយខេត្តកោះកុងមិនបង្ក្រាបបទល្មើសទំនិញគេចពន្ធគ្រប់ប្រភេទបែបនេះត្រូវបានគេសង្ស័យថាអាចមានការឃុបឃិតគ្នាជាមួយក្រុមឈ្មួញផងដែរ៕SRP

រដ្ឋាករទឹកស្វយ័តសៀមរាប សូមអភ័យទោសភាពអាក់រអួល ដែលបណ្តាលមកពីលក្ខណៈបច្ចេកទេស

ខេត្តសៀមរាប៖យោងតាមសេចក្តីជូនដំណឹងរបស់រដ្ឋាករទឹកស្វយ័តសៀមរាប សូមគោរពជូនដំណឹង ទ្រង់ សម្តេច ឯកឧត្ដម លោកជំទាវ អ្នកឧកញ៉ា លោក-លោកស្រី មេត្តាជ្រាបថា ៖ រដ្ឋាករទឹកស្វយ័តសៀមរាប បាននឹងកំពុងកាត់ភ្ជាប់បណ្តាញថ្មី និងបិទវ៉ានបង្ហូរទឹកជាច្រើនកន្លែង ដែលធ្វើឱ្យសម្ពាធទឹកមានការប្រែប្រួល និងបង្កើតបានជាបញ្ហា ដូចជា ៖ គុណភាពទឹកមិនប្រក្រតី ទឹកឡើងពណ៌ក្រហម ទឹកល្អក់ ជាដើម។

ស្ថិតក្នុងស្ថានភាពនេះក្រុមការងារ រ.ស.ស ខិតខំព្យាយាមលាងចុងបំពង់មេនាំទឹក និងដោះនាឡិកាទឹកលាងសម្អាត និងបង្ហូរទឹកចេញ តាមទីតាំងប្រើប្រាស់ផ្ទាល់របស់អតិថិជន ហើយគុណភាពទឹកអាចនឹងវិលមករកស្ថានភាពដូចដើម ឬធម្មតាវិញ ក្នុងពេលល្ងាចនេះ ឬថ្ងៃស្អែក។

រដ្ឋាករទឹកស្វយ័តសៀមរាប សូមអភ័យទោសភាពអាក់រអួល ដែលបណ្តាលមកពីលក្ខណៈបច្ចេកទេស។

សូមទ្រង់ សម្តេច ឯកឧត្ដម លោកជំទាវ អ្នកឧកញ៉ា លោក-លោកស្រី មេត្តាជ្រាបជាព័ត៌មាន និងយោគយល់អធ្យាស្រ័យចំពោះបញ្ហាដែលបានកើតឡើងខាងលើនេះ។
សម្រាប់ព័ត៌មានបន្ថែមទាក់ទងបញ្ហាទឹក រដ្ឋាករទឹកស្វយ័តសៀមរាប នឹងធ្វើបច្ចុប្បន្នភាព ជូននៅថ្ងៃស្អែក។ សូមគោរព អរគុណ!

ជុំវិញករណីនេះ លោកចាន់ សេងឡា ប្រធានរដ្ឋាករទឹកស្វយ័តសៀមរាប បានបញ្ជាក់ប្រាប់ទីភ្នាក់ងារសារព័ត៌មានសៀមរាប ប៉ុស្តិ៍ នៅព្រលប់ថ្ងៃពុធនេះថា បញ្ហាទឹកស្អាតមួយចំនួននៅសៀមរាបដែលប្រែពណ៌ក្រហម ដោយមានបញ្ហាបន្តិចបន្តួចនៅរោងចក្រ ដោយសារទឹកទន្លេសាបមានការប្រែប្រួល ករណីនេះមន្ត្រីជំនាញកំពុងដោះស្រាយហើយ៕SRP

ខេត្តសៀមរាប៖នៅបន្ទប់ប្រជុំសាលាខេត្តសៀមរាប នាថ្ងៃម្សិលមិញ លោក អ៉ឹង គឹមលាង អភិបាលរងខេត្តតំណាងឯកឧត្តម ប្រាក់ សោភ័ណ អភិបាលខេត្តបានដឹកនាំពិភាក្សាស្តីពីការទប់ស្កាត់ និងបង្ក្រាបបទល្មើសធនធានធម្មជាតិក្នុងភូមិសាស្ត្រខេត្តសៀមរាប ដោយមានការចូលរួមពីក្រុង ស្រុក មន្ទីរ អង្គភាពពាក់ព័ន្ធផងដែរ។

បន្ទាប់ពីស្តាប់បទបង្ហាញរបស់មន្ទីរបរិស្ថាន ស្តីពីការចុះទប់ស្កាត់ និងបង្រ្កាបបទល្មើសធនធានធម្មជាតិ ក្នុងដែនជម្រកសត្វព្រៃបឹងពែរ ដែនជម្រកសត្វព្រៃភ្នំត្នោត-ភ្នំពក ដែនជម្រកសត្វព្រៃគូលែន-ព្រហ្មទេព និងឧទ្យានជាតិព្រះជ័យវរ្ម័ន-នរោត្តមភ្នំគូលែនភូមិសាស្រ្តខេត្តសៀមរាប និងការចូលរួមមតិយោបល់ពីអង្គប្រជុំរួចមក លោក អភិបាលរងខេត្តបានណែនាំដល់ក្រុង ស្រុក មន្ទីរ អង្គភាពពាក់ព័ន្ធត្រូវទប់ស្កាត់ និងបង្ក្រាបបទល្មើសធនធានធម្មជាតិក្នុងដែនជម្រកសត្វព្រៃបឹងពែ និងដែនជម្រកសត្វព្រៃភ្នំត្នោត -ភ្នំពក និងត្រូវពិនិត្យឡើងវិញនូវអត្តសញ្ញាណរបស់ប្រជាពលរដ្ឋដែលប្រើប្រាស់កាន់កាប់ដីក្នុងតំបន់ទាំងបួន គឺតំបន់ស្នូល តំបន់ចីរភាព តំបន់អភិរក្ស និងតំបន់សហគមន៍។

លោកអភិបាលរងខេត្ត ក៏បានណែនាំបន្ថែមដល់អ្នកពាក់ព័ន្ធត្រូវសហការគ្នាក្នុងការទប់ស្កាត់ និងបង្ក្រាបឱ្យបានការដឹកជញ្ជូនឈើខុសច្បាប់ទោះរូបភាពណាក៏ដោយ ម្យ៉ាងទៀតការដឹកជញ្ជូនពីខេត្តផ្សេងឆ្លងកាត់ខេត្តសៀមរាបក៏បញ្ហាដែលកើតមានឡើងផងដែរ ដូចនេះសូមសមត្ថកិច្ចពាក់ព័ន្ធត្រូវបង្ក្រាបឱ្យបាន។ ជាមួយគ្នានេះ លោក ក៏បានជំរុញឱ្យមន្ទីរកសិកម្ម រុក្ខាប្រមាញ់ និងនេសាទខេត្ត និងមន្ទីរបរិស្ថានត្រូវរៀបចំស្រង់ទិន្នន័យ ឡ ផលិតធ្យូងទាំងអស់ក្នុងខេត្ត៕SRP

សម្ដេច ម៉ែន សំអន ជាប់ឆ្នោតជាប្រធានក្រុមប្រឹក្សាប្រឆាំងអំពើពុករលួយ

សន្តិសុខសណ្តាប់ធ្នាប់នៅខេត្តកំពង់ចាមល្អប្រសើរ បទល្មើសថយចុះ ក្នុងឆមាសទី១ឆ្នាំ២០២៥

ក្នុងរយៈពេល៦ខែ ដើមឆ្នាំ២០២៥នេះ ស្ថានភាពសន្តិសុខសណ្តាប់ធ្នាប់សាធារណៈ នៅក្នុងខេត្តកំពង់ចាម មានលក្ខណៈល្អប្រសើរជាងឆ្នាំមុន ក្នុងនោះបទល្មើសផ្សេងៗបានថយចុះគួរឱ្យកត់សម្គាល់។ នេះបើយោងតាមលោក ស្រី សុភ័ក្រ្ត អភិបាលរង នៃគណៈអភិបាលខេត្តកំពង់ចាម ថ្លែងក្នុងបទសម្ភាសជាមួយទូរទស្សន៍មហាផ្ទៃ ស្តីពី វឌ្ឍនភាពការងារ ប្រចាំឆមាសទី១ ឆ្នាំ២០២៥ របស់រដ្ឋបាលខេត្តកំពង់ចាម នាព្រឹកថ្ងៃទី១៩ ខែសីហាឆ្នាំ២០២៥។

បើតាមលោកអភិបាលរងខេត្ត ក្នុងឆមាសទី១នេះ សមត្ថកិច្ចខេត្តកំពង់ចាម បានបង្ក្រាបករណីគ្រឿងញៀនចំនួន ១១៣ករណី បើធៀបនឹងឆមាសទីឆ្នាំ២០២៤ ថយចុះ២៤ករណី ឃាត់ខ្លួនមនុស្ស២៩៩នាក់ ថយចុះ៩៤នាក់ បង្ក្រាបករណីល្បែងស៊ីសងខុសច្បាប់ ១៤ករណី ឃាត់ខ្លួនមនុស្ស៦១នាក់បញ្ជូនទៅតុលាការ ។

លោកបន្ថែមថា សម្រាប់ករណីក្មេងទំនើង សមត្ថកិច្ចបង្ក្រាបបានចំនួន ១៤ករណី ឃាត់ខ្លួនមនុស្ស ៤៨នាក់ បញ្ជូនទៅតុលាការ១៨នាក់ អនុវត្តវិធានការរដ្ឋបាល៣០នាក់ និងដកហូតម៉ូតូចំនួន១៨គ្រឿងរក្សាទុករយៈពេល៣ខែដើម្បីជាការព្រមាន ខណៈករណីគ្រោះថ្នាក់ចរាចរណ៍បានកើតឡើង ៥៤ករណី ស្លាប់៤៨នាក់ និងរបួស៥៧នាក់។

ដោយឡែកចំពោះបទល្មើសឆបោកតាមប្រព័ន្ធបច្ចេកវិទ្យា (Online Scam) លោក ស្រី សុភ័ក្រ្ត បានលើកឡើងថា ក្នុងមូលដ្ឋាននៃខេត្តកំពង់ចាម គឺមិនមានករណីនេះកើតឡើងនោះទេ ប៉ុន្តែក្នុងនោះមានករណីក្លែងបន្លំអត្តសញ្ញាណឆបោកតាមប្រព័ន្ធវីង ១ករណី ត្រូវសមត្ថកិច្ចបង្ក្រាបបាន និងករណីឆបោកក្រោមរូបភាពកម្ចីតាមប្រព័ន្ធអនឡាញមាន១ករណី ដែលករណីនេះសមត្ថកិច្ចកំពុងធ្វើការស្រាវជ្រាវ។

ឆ្លើយតបទៅនឹងការរក្សាបាននូវសន្តិសុខសណ្តាប់ធ្នាប់សាធារណៈ នៅក្នុងខេត្តកំពង់ចាមមានភាពល្អប្រសើរ និងបទល្មើសផ្សេងៗមានការថយចុះ លោកអភិបាលរងខេត្ត បានគូសបញ្ជាក់ថា ទាំងអស់នេះ គឺដោយសារអនុវត្តតាមគោលការណ៍ណែនាំរបស់ឯកឧត្តម អ៊ុន ចាន់ដា អភិបាល នៃគណៈអភិបាលខេត្តកំពង់ចាម និងជាប្រធានគណៈបញ្ជាការឯកភាព ដែលលោកតែងតែដឹកនាំប្រជុំជាប្រចាំ និងជំរុញឱ្យគ្រប់ភាគីពាក់ព័ន្ធ និងអង្គភាពចំណុះគណៈបញ្ជាការឯកភាពខេត្ត បង្កើនការផ្សព្វផ្សាយគោលនយោបាយភូមិ-ឃុំ-សង្កាត់មានសុវត្ថិភាពឱ្យកាន់តែមានប្រសិទ្ធភាពខ្ពស់។

ជាក់ស្តែងនៅក្នុងខេត្តកំពង់ចាម ក្នុងចំណោមឃុំ-សង្កាត់ទាំង១០៩ ត្រូវបានវាយតម្លៃជាប់ចំណាត់ថ្នាក់លេខ១ នៃការផ្សព្វផ្សាយគោលនយោបាយភូមិ-ឃុំ-សង្កាត់មានសុវត្ថិភាពឆ្នាំ២០២៤។ នេះបើតាមការបញ្ជាក់បន្ថែមពីលោក ស្រី សុភ័ក្រ្ត អភិបាលរង នៃគណៈអភិបាលខេត្តកំពង់ចាម៕SRPដោយលោក សេង បូលីន

ឯកឧត្តម សុខ លូ អភិបាលខេត្តបាត់ដំបងនៅថ្ងៃនេះបានអញ្ជើញចុះជួបសំណេះសំណាលជាមួយមន្រ្តីនិងកងកម្លាំងប្រចាំការនៅច្រកទ្វារព្រំដែនអន្តរជាតិដូង ស្រុកកំរៀង និងបន្តដឹកនាំកិច្ចប្រជុំពិភាក្សាកិច្ចការផ្សេងៗនៅតាមបណ្តាច្រកទ្វារព្រំដែនកម្ពុជា-ថៃ នៅសាលាស្រុកសំពៅលូន ដោយមានការចូលរួមពី អភិបាលរងនៃគណៈអភិបាលខេត្ត លោកនាយករដ្ឋបាលសាលាខេត្ត លោកប្រធានមន្ទីរ អង្គភាពនានាជុំវិញខេត្ត កងកម្លាំងទាំង៣ប្រភេទជុំវិញខេត្ត លោកអភិបាលស្រុក និងអ្នកពាក់ព័ន្ធផ្សេងទៀត។

ក្នុងឱកាសនោះ ឯកឧត្តម សុខ លូ បានណែនាំដល់អាជ្ញាធរនិងកងកម្លាំងត្រូវបន្តយកចិត្តទុកដាក់ខ្ពស់ក្នុងការសម្របសម្រួលការវិលត្រឡប់របស់ពលករខ្មែរមកពីប្រទេស និងត្រូវបង្កលក្ខណៈងាយស្រួលធ្វើយ៉ាងណាឱ្យពលករបានជិះរថយន្តក្រុងដោយឥតគិតថ្លៃទៅស្រុកដល់កំណើតប្រកបដោយសុខសុវត្ថិភាព។

ឯកឧត្តម បន្ថែមថា កន្លងមក អាជ្ញាធរ កងកម្លាំង និងក្រុមការងារបានខិតខំធ្វើបានយ៉ាងល្អប្រសើក្នុងការសម្រួលជួយជញ្ជូនអីវ៉ាន់ពលករដាក់រថយន្តដោយរលូន ហើយការទទួលបងប្អូនពលករកន្លងមក គឺមិនមានជាបញ្ហាណាមួយធ្ងន់ធ្ងរឡើយ ដែលនេះគឺជាជោគជ័យមួយរបស់រដ្ឋបាលខេត្តបាត់ដំបង។

ឯកឧត្តម បានណែនាំអភិបាលក្រុង ស្រុក មន្ទីរជំនាញពាក់ព័ន្ធ ខិតខំជំរុញឱ្យបងប្អូនប្រជាពលរដ្ឋនៅតាមមូលដ្ឋានបង្កើនការដាំដុះបង្កបង្កើនផល និងស្វែងរកការងារធ្វើក្នុងស្រុក ដើម្បីជួយសេដ្ឋកិច្ច ប្រទេសជាតិ និងជីវភាពកាន់តែប្រសើរ។

ឆ្លៀតក្នុងឱកាសនេះ ឯកឧត្តមអភិបាលខេត្តបានណែនាំដល់អាជ្ញាធរក្រុង ស្រុក ត្រូវបន្តយកចិត្តដាក់លើក្រុមគ្រួសារកងទ័ពជួរមុខ ដែលជួបការលំបាកខ្លាំងនៅក្នុងមូលដ្ឋាន៕SRP

ឯកឧត្តមហ៊ុន ម៉ានី៖ «កម្ពុជាប្រកាន់ជំហរដោះស្រាយបញ្ហាដោយសន្តិវិធី ផ្តល់តម្លៃលើការអនុវត្តច្បាប់អន្តរជាតិ និងយន្តការចរចាតាមផ្លូវការទូត»

ជាមួយនឹងការតាមដានដោយយកចិត្តទុកដាក់ពីការវិវត្តជាបន្តបន្ទាប់នៃស្ថានភាពព្រំដែនកម្ពុជា-ថៃ ផ្តើមតាំងពីព្រឹត្តិការណ៍កងទ័ពថៃវាយប្រហារមកលើកម្ពុជាដែលបណ្តាលឱ្យបាត់បង់ជីវិតទាហានខ្មែរម្នាក់កាលពីថ្ងៃទី២៨ខែឧសភា, ការបិទច្រកព្រំដែនជាឯកតោភាគី(ថ្ងៃទី៧ខែមិថុនា) និងឈានដល់ការផ្ទុះអាវុធ (នាថ្ងៃទី២៤ ខែកក្កដា) យើងទាំងអស់គ្នាពិតជាបានកត់សម្គាល់យ៉ាងច្បាស់ពីកិច្ចខិតខំប្រឹងប្រែងឥតឈប់ឈររបស់រាជរដ្ឋាភិបាលក្នុងការគ្រប់គ្រង់ការដ្ឋានស្នូលសំខាន់ៗ ក្នុងនោះក៏មានការអនុវត្តជាយុទ្ធសាស្ត្រនូវនយោបាយការទូត ដោយប្រកាន់ជំហរដោះស្រាយបញ្ហាដោយសន្តិវិធី, ផ្តល់តម្លៃលើការអនុវត្តច្បាប់អន្តរជាតិ (ការស្វែងរកដំណោះស្រាយផ្លូវច្បាប់នៅតុលាការយុត្តិធម៌អន្តរជាតិ ICJ) និងយន្តការចរចាតាមផ្លូវការទូត។

ជាក់ស្តែង កិច្ចប្រជុំពិសេសរវាងសម្តេចធិបតីនាយករដ្ឋមន្ត្រី និងនាយករដ្ឋមន្ត្រីស្តីទីថៃ ដោយមានការសម្របសម្រួលពីនាយករដ្ឋមន្ត្រីម៉ាឡេស៊ីក្នុងនាមជាប្រធានអាស៊ាន រួមជាមួយតំណាងសហរដ្ឋអាមេរិក និងសាធារណរដ្ឋប្រជាមានិតចិនជាសាក្សី នាថ្ងៃទី២៨ ខែកក្កដា បានសម្រេចបានការនូវបទឈប់បាញ់បន្ទាន់ឥតលក្ខខណ្ឌ ដែលបានចូលជាធរមាននៅយប់ម៉ោង០០:០០ ឈានចូលថ្ងៃទី២៩ ខែកក្កដា ឆ្នាំ២០២៥។ តាមរយៈលទ្ធផលនៃកិច្ចប្រជុំបានបើកច្រកបន្តដល់ការរៀបចំឱ្យមានកិច្ចប្រជុំវិសាមញ្ញនៃគណៈកម្មាធិការព្រំដែនទូទៅកម្ពុជា-ថៃ (GBC) ដែលបានឯកភាពលើលក្ខខណ្ឌនៃបទឈប់បាញ់ និងការរៀបចំយន្តការអនុវត្ត (ថ្ងៃទី០៧ ខែសីហា) ព្រមទាំងកិច្ចប្រជុំគណៈកម្មាធិការព្រំដែនថ្នាក់យោធភូមិភាគ (RBC) ក្នុងគោលដៅរក្សាឱ្យបាននូវភាពស្ងប់ស្ងាត់ និងអនុវត្តបទឈប់បាញ់ឱ្យមានប្រសិទ្ធភាព។

កម្ពុជា បើកចំហច្រកការទូតគ្រប់កម្រិត ប្រកបដោយដោយភាពបុរេសកម្មក្នុងនោះរួមមាន ការសម្របសម្រួលផ្តល់ព័ត៌មានអំពីការវិវត្តថ្មីៗនៃសភាពការណ៍ព្រំដែនកម្ពុជា-ថៃ តាមរយៈការធ្វើបទបង្ហាញដល់សមាជិកអង្គទូតបរទេស និងទីភ្នាក់ងារអន្តរជាតិជាប្រចាំ និងការដឹកនាំគណៈប្រតិភូ អង្គទូត និងអនុព័ន្ធយោធាទៅពិនិត្យ សង្កេតការណ៍ ដោយផ្ទាល់នៅទីតាំងរងផលប៉ះពាល់ពីជម្លោះប្រដាប់អាវុធ និងស្ថានភាពជនភៀសសឹក។ ថ្មីៗនេះ ឯកឧត្តមប្រាក់ សុខុន ឧបនាយករដ្ឋមន្ត្រី រដ្ឋមន្រ្តីការបរទេសកម្ពុជា ក៏បានជួបប្រជុំក្រៅផ្លូវការជាមួយឯកឧត្តម វ៉ាង យី រដ្ឋមន្រ្តីការបរទេស នៃសាធារណរដ្ឋប្រជាមានិតចិន និង ឯកឧត្តមរដ្ឋមន្ត្រីការបរទេសថៃ ក្នុងឱកាសកិច្ចប្រជុំរដ្ឋមន្ត្រីការបរទេសនៃកិច្ចសហប្រតិបត្តិការមេគង្គ-ឡានឆាង លើកទី១០ កាលពីថ្ងៃទី១៤ ខែសីហា នេះផង ដែលបានបង្ហាញនូវសុឆន្ទៈរបស់កម្ពុជាក្នុងការស្វែងរកសន្តិភាព និងស្ថិរភាព នៃតំបន់ព្រំដែនត្រលប់មកវិញ តាមគ្រប់មធ្យោបាយ។

សកម្មភាពខាងលើនេះ បានសរបញ្ជាក់ពីកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ក្នុងការគ្រប់គ្រងសមរភូមិការទូតយ៉ាងណែន ដើម្បីការពារផលប្រយោជន៍ជាតិ និងបង្ហាញនូវភាពត្រឹមត្រូវរបស់កម្ពុជាលើឆាកអន្តរជាតិ។ អ្វីៗដែលរាជរដ្ឋាភិបាលកំពុងធ្វើ បានបង្ហាញភាពខ្លាំងរបស់ព្រះរាជាណាចក្រកម្ពុជា តាមរយៈការរួបរួមគ្នាជាធ្លុងមួយរបស់រាជរដ្ឋាភិបាល កងទ័ព និងប្រជាជន។ ក្នុងន័យនេះ សូមបងប្អូនប្រជាពលរដ្ឋខ្មែរបន្តជឿជាក់ និងគាំទ្រចំណាត់ការដ៏ម៉ឹងម៉ាត់ ប្រាកដនិយម និងច្បាស់លាស់ប្រកបដោយការគិតគូរល្អិតល្អន់ឈ្លាសវៃបំផុតរបស់រាជរដ្ឋាភិបាលដើម្បីនាំមកនូវស្ថានភាព ប្រក្រតីភាព និងសុខសន្តិភាពពេញលេញឡើងវិញឱ្យបានឆាប់រហ័ស៕SRP

នយោបាយផ្ទៃក្នុងថៃ ច្របូកច្របល់ តែមេដឹកនាំថៃ គួរមានចរិតចាស់ទុំ ថ្លៃថ្នូរ និងចេះរៀនសូត្រពីភាពលេចធ្លោរបស់មេដឹកនាំខ្មែរ!

ប្រមុខក្រសួងមហាផ្ទៃឯកឧត្តមស សុខា បានសរសេរសារនៅថ្ងៃនេះថា វាជារឿងហួសចិត្ត និងមិននឹកស្មានថា មេដឹកនាំថៃ ហាមាត់ទៅរួច«ករណីចាប់ខ្លួនសម្ដេចតេជោ និងសម្ដេចធិបតី ប្រសិនរកឃើញនៅក្នុងប្រទេសថៃ»។ បើមិនយល់ទិដ្ឋភាពច្បាប់អន្តរជាតិ ក៏ត្រូវឈ្វែងយល់អំពីការទូតក្នុងទំនាក់ទំនងអន្តរជាតិដែរ។ ឬមួយមិនយល់ទាំងពីរនេះ? បើមែននោះ មេដឹកនាំបែបនេះ នឹងនាំថៃ ដើរថយក្រោយ លក់មុខយុវជន ប្រជាជន និងបញ្ញវន្តថៃទាំងមូល ឱ្យរងភាពអាម៉ាសហើយ។ បើមេដឹកនាំបែបនេះ វាមិនស្មើនឹងយុវជន ប្រជាជនភាគច្រើន ដែលគេយល់ច្បាប់ និងការទូតរវាងរដ្ឋនិងរដ្ឋដែរ ជាពិសេសអ្នកនយោបាយបន្តវេនថៃបច្ចុប្បន្ន ដែលគេមានចំណេះដឹងគ្រប់គ្រាន់អាចធ្វើមូលវិចារណ៍សម្ដីនេះបាន។ តែយ៉ាងណា ខ្ញុំមិនចូលជ្រៅកិច្ចការផ្ទៃក្នុងថៃទេ ទុកជូនយុវជន ប្រជាជន និងបញ្ញវន្តថៃចុះ!

ទោះជាសម្ដីនេះ ដើម្បីតែយកចិត្តយោធា យកចិត្តមនុស្សថៃ មួយចំនួនណានោះ ឬគ្រាន់តែជាសារនយោបាយបង្វែរទំនាស់ផ្ទៃក្នុងរបស់ខ្លួនក៏ដោយ ក៏គួររកវិធីផ្សេងក្រៅពីកំហុសជាន់លើកំហុសបែបនេះក្នុងនាមជាថ្នាក់ដឹកនាំប្រទេសមួយ។ ប៉ុន្តែបើសិនជាចិញ្ចឹមចិត្តចង់បានដីខ្មែរតជំនាន់ គឺមេដឹកនាំថៃ ប្រជាជនថៃ មួយអន្លើណានោះ បច្ចុប្បន្នគួរតែហ៊ានទទួលស្គាល់ពីភាពចាស់ទុំ របៀបធ្វើនយោបាយដ៏ឈ្លាសវៃរបស់មេដឹកនាំខ្មែរ និងសិក្សាឱ្យច្បាស់ពីមេដឹកនាំកម្ពុជា ជាមុន ដែលលោកពោរពេញដោយនយោបាយសីលធម៌ វិន័យការទូត និងច្បាប់អន្តរជាតិ មានក្លិនក្រអូបក្នុងតំបន់ និងឆាកអន្តរជាតិ។ ទោះមិនបង្ហាញដោយចំហ អ្នកនយោបាយថៃ បច្ចុប្បន្នមួយចំនួននោះ ក៏គួរឆ្លាត ចេះលួចសង្កេត លួចស្វ័យពិចារណា រៀនសូត្រពីបទពិសោធជាក់ស្ដែង និងឥរិយាបថនយោបាយដ៏លេចធ្លោ ជាពិសេសពីសម្ដេចតេជោ ហ៊ុន សែន និងភាពជាអ្នកបន្តវេនប្រកបដោយទំនុកចិត្តសម្រាប់ជាតិ និងប្រជាជនខ្មែរ របស់សម្ដេចធិបតី ហ៊ុន ម៉ាណែត។

មែនទែនទៅ យុវជន ប្រជាជន អ្នកវិភាគ និងអ្នកនយោបាយថៃ បានចេញសារតាមបណ្ដាញសង្គមរួចទៅហើយ ទទួលស្គាល់សមត្ថភាពសម្ដេចតេជោ ថ្នាក់ដឹកនាំកម្ពុជា និងកម្ពុជាទាំងមូលថាខ្លាំង ដើរមុនថៃ និងមានពិសោធន៍ឆ្លាតជាងអ្នកនយោបាយថៃ ដែលសុំរំលេចតែ លោក ស៊ិនធិលឹមថងគុល ជាអ្នកនយោបាយស្និទ្ធនឹងលោក ថាក់ស៊ីន ចាកចេញពីគណបក្សភើថៃ ទៅរួមជីវភាពនយោបាយជាមួយក្រុមអាវលឿងម្នាក់ទៅចុះ ដែលថ្មីៗនេះ បានផ្ដល់បទសម្ភាសតាមទូរទស្សន៍ថៃ វាយតម្លៃខ្ពស់លើសម្ដេចតេជោ និងដាក់ពិន្ទុទាបលើលោក ថាក់ស៊ីន។

សួរត្រឡប់ទៅវិញ ក្រៅពីប្រជាជនខ្មែរ គឺមានតែអ្នកនយោបាយមួយក្ដាប់តូច ដែលកំពុងដឹកនាំប្រទេសថៃ តាមវិធីក្បត់សំឡេងម្ចាស់ឆ្នោត និងប្រជាជនថៃជ្រុលនិយមដ៏រញ៉េរញ៉ៃដូចសព្វថ្ងៃនេះឬ ដែលស្គាល់សម្ដេចតេជោ និង សម្ដេចធិបតី? ចុះមេដឹកនាំប្រទេស និងប្រជាជនក្នុងតំបន់ ក៏ដូចជាលើពិភពលោក ដ៏ធំទូលាយនេះ គេមិនស្គាល់សម្ដេចតេជោ គេមិនស្គាល់សម្ដេចធិបតី ទេឬយ៉ាងម៉េច? ច្បាស់ណាស់! មជ្ឈដ្ឋានអន្តរជាតិជាទូទៅ គេគ្មានវាសនាអាក្រក់ដូចអ្នកនយោបាយ និងប្រជាជនជ្រុលនិយមថៃ ដែលបណ្ដោយខ្លួនឱ្យក្លាយជាកង្កែបក្នុងអណ្ដូងនោះឡើយ។

តើជាការសុខចិត្តទទូរស្បែកសត្វសុនខ ដើរកាត់ភូមិក្រោមក្រសែភ្នែកសហគមន៍អន្តរជាតិ ដើម្បីបំប៉ោងខ្លួន បំភាន់ប្រជាជនឯងឬយ៉ាងណា? ទើបបានជាម្ដងហើយម្ដងទៀត មេដឹកនាំនយោបាយថៃ មិនថាផ្លូវការ ឬស្ដីទី រួមទាំងមេយោធាងប់សង្គ្រាមផងនោះ បានដើរនិយាយប្រើភាសាយកជាការពុំបាន និងថែមទាំងជ្រុលហួសលើសកម្រិតភាសាការទូត ហួសព្រំដែននៃបញ្ហា ហួសពីច្បាប់និងនិយាមអន្តរជាតិ រាល់ពេលពួកគេ អត្ថាធិប្បាយប្រធានបទពាក់ព័ន្ធនឹងប្រទេសកម្ពុជា។

ជាក់ស្ដែងណាស់ សម្ដេចតេជោ ហ៊ុន សែន ក៏មិនខុសពីជនរួមជាតិខ្មែរទូទាំងប្រទេសដែរ។ សម្ដេច បានបង្ហាញការហួសចិត្តចំពោះនាយករដ្ឋមន្ត្រីស្ដីទីថៃ ដែលបាននិយាយប្រាប់ក្រុមអ្នកកាសែត អំពីកិច្ចខិតខំប្រឹងប្រែងដ៏វង្វេងវង្វាន់របស់ខ្លួន ដើម្បីប្រើវិធានការច្បាប់ មកលើ សម្ដេចតេជោ និងសម្ដេចធិបតី។ តាមរយៈទំព័រហ្វេសប៊ុកសម្ដេចតេជោ បានសរសេរបញ្ជាក់ថា ប្រសិនបើការចុះផ្សាយរបស់កាសែត ជាសំដីពិតរបស់នាយករដ្ឋមន្ត្រីស្តីទី ជិតផុតអាណត្តិនោះ វាជាការបង្ហាញឱ្យឃើញថា នាយករដ្ឋមន្ត្រីបណ្ដោះអាសន្នរូបនេះ ជា”មនុស្សព្រៃ ជាអ្នកនយោបាយមិនស្គាល់អ្វីទៅជាច្បាប់ទម្លាប់ ហើយថែមទាំងមិនចេះការទូតទៀតផង”។

តើនាយករដ្ឋមន្ត្រីស្ដីទីថៃរូបនោះ យកមុខទៅទុកឯណា? តើប្រជាជនថៃជ្រុលនិយម ដែលគាំទ្រសម្ដីមេដឹកនាំឡើងបុណ្យតាមខ្យល់គ្មានទិសរូបនេះ យកមុខទៅទុកឯណា? បើយុវជន ប្រជាជន បញ្ញវន្តថៃ ផ្សេងទៀត ដែលមានការយល់ដឹង និងថ្លៃថ្នូរ យកខ្លឹមសារបង្ហោះរបស់ សម្ដេចតេជោ ទៅចោទសួរ? គឺខ្លឹមសារដែល សម្ដេច លោកបានសរសេរឆ្លើយតបងាយៗថា”ប្រសិនបើថៃអាចចាប់មេដឹកនាំកម្ពុជាបាន កម្ពុជា ក៏អាចចាប់មេដឹកនាំថៃមួយចំនួន ដែលបានឈ្លានពាន និងសម្លាប់ប្រជាជនកម្ពុជាបានដូចគ្នាដែរ។ ច្បាប់ទម្លាប់ត្រូវបានបំផ្លាញដោយពួកឈ្លានពាន។ តើនេះជាគោលបំណងដើម្បីបង្កើតជំនឿទុកចិត្ត និងឈានទៅរកទំនាក់ទំនងល្អ ឬបំផ្លាញដើម្បីបង្កើតជម្លោះឡើងវិញ ក្រោយកិច្ចព្រមព្រៀងឈប់បាញ់?”។ នេះមិនទាន់គិតពីការកើតអារម្មណ៍ជ្រេញ និងការសើចចំអកពីសំណាក់មេដឹកនាំក្នុងតំបន់ និងពិភពលោក ចំពោះសម្ដី និងឥរិយាបថចម្លែកៗបែបមិនថ្លៃថ្នូររបស់មេដឹកនាំថៃនោះផង។
ជាថ្មីម្ដងទៀត! ខ្ញុំនៅតែផ្ដល់តម្លៃខ្ពស់ចំពោះពាក្យមួយឃ្លាថា”ខ្មែរក្រជាងថៃ តែខ្មែរថ្លៃថ្នូរជាងថៃ!” ខ្ញុំក៏សូមយកឱកាស បញ្ជាក់ក្នុងនាមជាកូនខ្មែរ គឺរូបខ្ញុំ ក៏មិនខុសពីប្រជាជនកម្ពុជា ក្មេងចាស់ ប្រុសស្រី ទាំងក្នុង និងក្រៅប្រទេសផ្សេងទៀតដែរ ពួកយើង មានស្មារតីរួបរួមសាមគ្គីក្នុងនាមជាខ្មែរយ៉ាងរឹងមាំល្អណាស់! ពួកយើង បាននឹងកំពុងគោរព និងអនុវត្តគោលការណ៍ដឹកនាំរបស់រាជរដ្ឋាភិបាល គោលនយោបាយរបស់គណបក្ស យ៉ាងម៉ឺងម៉ាត់ និងប្រកបដោយវិន័យខ្ពស់! ពោលគឺពួកយើង គ្មានថ្ងៃឱ្យស្មារតីជាតិ និងក៏គ្មានថ្ងៃបណ្ដែតបណ្ដោយឱ្យការដឹកនាំរបស់រាជរដ្ឋាភិបាល និងគណបក្សរបស់យើង មានភាពរញ៉េរញ៉ៃ នាំឱ្យអាប់ឱនដល់កិត្តិយសជាតិ យុវជន ប្រជាជន និងបញ្ញវន្តកម្ពុជាដូចថៃ នោះឡើយ។

ពួកយើងជាកូនចៅជំនាន់ក្រោយ របស់ដូនតាអ្នកសាងអង្គរ!

ពួកយើងជាអ្នកជំនាន់ក្រោយនៃដូនតាដែលកកើតលើដែនដីសុវណ្ណភូមិ!

ពួកយើងជាអ្នកជំនាន់ក្រោយរបស់មេដឹកនាំដែលរំដោះ និងកសាងជាតិពីបាតដៃទទេ រហូតឈរប្រកបដោយកិត្តិយសលើឆាកអន្តរជាតិ!
ពួកយើងគោរពគាំទ្រសម្ដេចតេជោ អគ្គមគ្គុទេសក៏នយោបាយឈ្នះ-ឈ្នះកម្ពុជា! សម្ដេចធិបតី អគ្គប្រតិបត្តិករនយោបាយកម្ពុជា!

លោកគង់ សុភី ប្រធានក្រុមហ៊ុនម៉ៅការសំរាមក្រុងស្វាយរៀង ដាក់ដីលុបព្រែកយកធ្វើជាកម្មសិទ្ធិ

ខេត្តស្វាយរៀង៖លោកគង់ សុភី ប្រធានក្រុមហ៊ុនម៉ៅការសំរាមក្រុងស្វាយរៀង បានដឹកយកអាចម៌ដីមកចាក់លុបចំណីព្រែកទទឹង៣៦ម៉ែត្រ បណ្តោយ១០០ម៉ែត្រ ធ្វើជាកម្មសិទ្ធិ បើទោះបី លោកអភិបាលក្រុងស្វាយរៀង ឲ្យកាយយកអាចម៌ដីចេញវិញដើម្បីរក្សាដីចំណីព្រែកធម្មជាតិជាដីរបស់រដ្ឋ ក៏ដោយ
ក៏ប៉ុន្តែក្រុមហ៊ុនមួយនេះនៅចាក់ដីរំលោភផ្គើននិងចំណាត់ការរបស់រដ្ឋបាលក្រុង។

ពាក់ព័ន្ធក្នុងករណីនេះ លោកគង់ សុភី ប្រធានក្រុមហ៊ុនម៉ៅការសំរាម ដែលបានចាក់អាចម៌ដីលប់ចំណីព្រែកអូរស្មាច់ធ្វើជាកម្មសិទ្ធិ បានប្រាប់អ្នកសារព័ត៌មានថា លោករង់ចាំ លោកអភិបាលរងខេត្តចុះមកពិនិត្យនិងអនុញ្ញាតិឲ្យកាយត្រឹមណា ទើបលោកកាយ។

លោកហែម ពិសិដ្ឋ អភិបាលរងខេត្តស្វាយរៀង បានមានប្រសាសន៍ថា លោកមិនទាន់ជ្រាបក្នុងករណីនេះទេ សូមឲ្យទាក់ទងទៅលោកអភិបាលក្រុងស្វាយរៀងពិនិត្យដោះស្រាយ។

លោកណុប ចំរើន អភិបាលក្រុងស្វាយរៀង បានមានប្រសាសន៍តាមទូរសព្ទ័ នារសៀលនេះថា លោកបានដឹកនាំក្រុមការងារចុះទៅពិនិត្យម្តងរួចហើយឃើញថា ក្រុមហ៊ុនគង់សុភី បានចាក់អាចម៌ដីលប់ចំណីព្រែកធម្មជាតិអូស្មាច់ ទទឹង៣៦ម៉ែត្របណ្តោយ១០០ម៉ែត្រ និងខាងក្រោយដីមានបណ្ណ័ទទឹង១៩ម៉ែត្របណ្តោយ២៥ម៉ែត្រ។រដ្ឋបាលក្រុងបានបោះបង្គោលកំណត់ព្រំដីរួចធ្វើកិច្ចសន្យាឲ្យឈ្មោះគង់សុភី យកគ្រឿងចក្រកាយយកអាចម៌ដី ចេញវិញ រក្សាស្ថានភាពដីចំណីព្រែកដូចដើមវិញ ដោយកំណត់ឲ្យកាយចាប់ពីថ្ងៃទី០៥សីហា២០២៥តទៅ ក៏ប៉ុន្តែឈ្មោះគង់សុភី មិនអនុវត្តតាមកិច្ចសន្យា ដូច្នេះលោកនិងចាត់ក្រុមការងារចុះទៅពិនិត្យវាស់វែងនិងបោះបង្គោលថ្ម ដកយកដី«ទទឹង៣៦ម៉ែត្របណ្តោយ១០០ម៉ែត្រ»ទុកជាសម្បត្តិរបស់រដ្ឋ។

ប្រជាពលរដ្ឋនៅភូមិចុងព្រែកសំណូមអោយឲ្យរដ្ឋបាលក្រុងស្វាយរៀងអនុវត្តច្បាប់ទៅលើម្ចាស់ក្រុមហ៊ុនគង់សុភី ដែលបានចាក់អាចម៌ដីលប់ព្រែកធម្មជាតិ ដែលជាដីទ្រព្យសម្បត្តិរបស់រដ្ឋយកធ្វើជាកម្មសិទ្ធិដោយខុសច្បាប់មិនគួរលើកលែងទេ ត្រូវតែអនុវត្តច្បាប់ កុំឲ្យជនឈ្លៀតឱកាស់ចាក់ដីរំលោភយកដីព្រែកធម្មជាតិធ្វើជាកម្មសិទ្ធិបន្តទៀត។ពិសេសសូមអោយជំនាញធនធានទឹកថ្នាក់ជាតិចុះមកពិនិត្យមើលផងទាន ព្រែកនិងចំណីព្រែកអំស្មាច់ គេជីកយកអាចម៌ដីលក់និងលប់យកធ្វើជាកម្មសិទ្ធិ រួមនៅទំហំតូចស្ទើរតែបាត់បង់ព្រែកទៅហើយ។

សូមបញ្ជាក់ប្រជាពលរដ្ឋរស់នៅភូមិចុងព្រែកនិងភូមិធ្មល់សង្កាត់ចេក បានលើកឡើងថា មានប្រធានក្រុមហ៊ុនម៉ៅការចាក់សម្រាមក្រុងស្វាយរៀងបានដឹកអាចម៌ដីយកមកចាក់លប់ដីចំណីព្រែកធម្មជាតិ អូស្មាច់ ដោយមានទទឺងប្រមាណ៧០ម៉ែត្របណ្តោយប្រមាណ១០០ម៉ែត្រ ចូលទៅក្នុងព្រែកបង្កឲ្យមានការរិះគន់ចំៗ ទៅអាជ្ញាធរក្រុងស្វាយរៀង ថា បណ្តែតបណ្តោយឲ្យគេចាក់ដីលប់ដីចំណីព្រែកធម្មជាតិធ្វើជាកម្មសិទ្ធិ គ្មានឃើញអាជ្ញាធរមានសមត្ថកិច្ចណាម្នាក់មកហាមឃាត់ឡើយ ចាក់លប់ដោយរលូន។

ករណីមហាជនលើកឡើងការចាក់ដីលប់ចំណីព្រែកធម្មជាតិនេះកើតឡើងនាព្រឹកថ្ងៃទី០២សីហា២០២៥ នៅចំណុចខាងជើងស្ពានអូស្មាច់ចម្ងាយប្រមាណ២០០ម៉ែត្រ ស្ថិតក្នុងភូមិធ្មល់ សង្កាត់ចេកក្រុងស្វាយរៀង។

ទាក់ទិនករណីនេះដែរ លោកគង់ សុភី ក្រុមហ៊ុនគង់សុភី ឯ.ក បានប្រាប់អ្នកព័ត៌មាន តាមទូរសព្ទ័នារសៀលនេះថា នៅចំណុចលោកចាក់ដី នោះគឺជាដីកម្មសិទ្ធិរបស់លោក គឺមានចំនួន២០ក្បាលដីឯណោះ ហើយលោកបានស្នើសុំចុះបញ្ជី រួចហើយ ដូច្នេះការចាក់ដីនេះគឺមិនបានចាក់លប់ដីចំណីព្រែកដូចមហាជនលើកឡើងនោះទេ។

លោក ឌី យ៉ាម៉ង់ ប្រធានភូមិបាលក្រុងស្វាយរៀង បានប្រាប់អ្នកព័ត៌មានថា លោកបានទទួលដំណឹងនេះហើយ និងបានចាត់មន្ត្រីក្រុមការងារការិយាល័យភូមិបាលក្រុងឲ្យចុះទៅពិនិត្យមើលនៅរសៀលថ្ងៃទី២សីហា នេះ គឺពិនិត្យឃើញថា នៅចំណុចកើតហេតុនោះ គឺចាក់ចូលចំណីព្រែកមួយចំនួន លោកបានឲ្យលោកគង់ សុភី យកគ្រឿងចក្រកាយលើកអាចម៍ដីឡើងវិញ។

លោកឌីយ៉ាម៉ង់ បានបញ្ជាក់ថា បញ្ហា សុរិយោដីចុះបញ្ជី ចេញបណ្ណ័ឲ្យលោកគង់ សុភី គឺដោយលោកគង់ សុភី បានយកឯកសារទិញលក់ ពីប្រជាពលរដ្ឋដោយមានចុះហត្ថលេខាទទួលស្គាល់ពីអាជ្ញាធរភូមិសង្កាត់ត្រឹមត្រូវមកបង្ហាញ ក៏ប៉ុន្តែការចុះបញ្ជី នោះក្រុមការងារចុះវាស់វែង បើពិនិត្យឃើញថា ដីនោះជាចំណីព្រែកគឺមិនបានវាស់វែងចុះបញ្ជីទេ បើក្បាលដីណាដែលជាដីស្រែ មិនមែនជាដីចំណីព្រែកក្រុមការងារបានចុះបញ្ជីឲ្យ។ ដូច្នេះក្បាលដីខ្លះបានចុះបញ្ជី ក្បាលដីខ្លះគឺមិនបានចុះបញ្ជីទេ បើក្រុមការងារចុះទៅពិនិត្យឃើញថា ការចាក់ដីនោះចាក់ចូលដីចំណីព្រែក គឺលោកបានឲ្យលោកគង់ សុភី កាយយកអាចម៌ដីឡើងមកវិញ៕SRP

គិតត្រឹមពាក់កណ្តាលខែសីហា ២០២៥នេះស្ពានឆ្លងទន្លេបាសាក់ សាងសង់បាន ៤១% នឹងត្រៀមបញ្ចប់នៅដើមឆ្នាំ២០២៨ខាងមុខ។

ឯកឧត្តម ផន រឹម អ្នកនាំពាក្យក្រសួងសាធារណការ និងដឹកជញ្ជូន បានបញ្ជាក់នៅថ្ងៃទី១៩ ខែសីហានេះថា៖គិតត្រឹមពាក់កណ្តាលខែសីហា ឆ្នាំ២០២៥នេះ គម្រោងស្ថាបនាស្ពានឆ្លងកាត់ទន្លេបាសាក់(ចាក់អង្រែក្រោម-ព្រែកប្រា)សាងសង់បាន៤១% ហើយ។

ស្ពាននេះបើកការដ្ឋានសាងសង់ជាផ្លូវការនៅថ្ងៃទី១៩ ខែកុម្ភៈ ឆ្នាំ២០២៤ ក្រោមអធិបតីភាពដ៏ខ្ពង់ខ្ពស់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី និងឯកឧត្តម វ៉ាង វិនធៀន អតីតឯកអគ្គរដ្ឋទូតចិនប្រចាំកម្ពុជា។ ពេលនេះការដ្ឋានកំពុងសម្រុកខ្លាំង ដោយគោរពតាមបទដ្ឋានបច្ចេកទេស និងកិច្ចសន្យាបច្ចេកទេស ប្រកបដោយគុណភាព និងសោភណ័្ឌភាព។
អង្គភាពគ្រប់គ្រងគម្រោងបានពន្លឿនការងារសាងសង់ផ្លូវតភ្ជាប់ទៅផ្លូវជាតិលេខ១ និងបន្តពង្រឹងសុវត្ថិភាពការងារ ដោយហេតុថារដូវវស្សាទឹកទន្លេចាប់ផ្តើមឡើង និងបន្តថែទាំ ដោយបំពាក់បន្ថែមពោងសុវត្ថិភាព លើទឹកធានាបីសុវត្ថិភាពអ្នកប្រើប្រាស់មធ្យោបាយដឹកជញ្ជូនតាមផ្លូវទឹក ឆ្លងទីតាំងការដ្ឋាននោះ។

បច្ចុប្បន្នការងារស្ពានផ្នែកខាងកើតស្ពានសម្រេចបាន៖ ១/ផ្នែកគ្រឹះស្ពាន សម្រេចបានប្រមាណ ៦១,៥០% ក្នុងនោះសសរគ្រឹះចំនួន ១៥៦ដើម សម្រេចបាន ១៣៧ដើម ២០ជើងតាង សម្រេចបានចំនួន៩ និងធ្នឹមភ្ជាប់ក្រោមចំនួន១២ សម្រេចបាន ៨ធ្នឹម។ ២/រចនាសម្ព័ន្ធក្រោមស្ពានសម្រេចបាន២៦,១២% រួមមាន៖តួសរសរស្ពាន១២ សម្រេចបាន៦សរសរ, សរសរស្ពាន ៥២ សម្រេចបាន២៤ និងធ្នឹមភ្ជាប់ក្បាលសរសរទទឹងស្ពានចំនួន៣៤ សម្រេចបាន១០ធ្នឹម ព្រមទាំងការងារសំខាន់ៗមួយចំនួនទៀត។

គិតត្រឹមដើមខែសីហា ឆ្នាំ២០២៥នេះ ការងារសម្រេចបាន ១៧ខែហើយ ស្មើនឹង ៤០% នៃផែនការសាងសង់ ៤២ខែ ដោយមិនយឺតយ៉ាវជាងកម្មវិធីការងារដែលគ្រោងទុកទេ។ គម្រោងនេះ ត្រៀមបញ្ចប់នៅដើមឆ្នាំ២០២៨ខាងមុខ។
ពេលលសាងសង់រួចស្ពាននេះនឹងជួយ៖
-កាត់បន្ថយការកកស្ទះចរាចរណ៍លើស្ពានព្រះមុនីវង្សឆ្លងកាត់ទន្លេបាសាក់ ភ្ជាប់ផ្លូវជាតិលេខ១ ខណ្ឌច្បារអំពៅ។
– ជួយពង្រឹងដល់ទំនាក់ទំនងសេដ្ឋកិច្ចសង្គម រវាងរាជធានីភ្នំពេញប៉ែកខាងត្បូង ព្រលានយន្តហោះអន្តរជាតិតេជោក្រុងតាខ្មៅ ជាពិសេសធ្វើឱ្យប្រសើរឡើងដល់ប្រសិទ្ធភាពនៃការដឹកជញ្ជូន និងភស្តុភារកម្មនៅក្នុងតំបន់រាជធានីភ្នំពេញ ។
-កាត់បន្ថយការកកស្ទះចរាចរណ៍នៅតាមដងទន្លេបាសាក់ និងជួយពន្លឿនការអភិវឌ្ឍតំបន់នោះផងដែរ៕SRP

សម្ដេចតេជោហ៊ុន សែន៖ ប្រសិនបើថៃអាចចាប់មេដឹកនាំកម្ពុជាបាន កម្ពុជាក៏អាចចាប់មេដឹកនាំថៃមួយចំនួនដែលបានឈ្លានពាន និងសម្លាប់ប្រជាជនកម្ពុជាបានដូចគ្នាដែរ

សម្តេចតេជោហ៊ុន សែន បានផ្សព្វផ្សាយសំណេរថា
៖​តាមកាសែតថៃចុះផ្សាយមុននេះបន្តិចថា លោកនាយករដ្ឋមន្ត្រីស្តីទីថៃបាននិយាយថា លោក ហ៊ុន សែន និង ហ៊ុន ម៉ាណែត និងត្រូវចាប់ខ្លួនភ្លាមប្រសិនបើរកឃើញក្នុងប្រទេសថៃ។

ប្រសិនបើការចុះផ្សាយរបស់កាសែតជាសំដីពិតរបស់នាយករដ្ឋមន្ត្រីស្តីទីជិតផុតអាណត្តិបង្ហាញឲ្យឃើញថា គាត់គឺជាមនុស្សព្រៃមិនស្គាល់អ្វីទៅជាច្បាប់ទម្លាប់ហើយមិនទាំងចេះការទូតទៀតផង។

ប្រសិនបើថៃអាចចាប់មេដឹកនាំកម្ពុជាបាន កម្ពុជាក៏អាចចាប់មេដឹកនាំថៃមួយចំនួនដែលបានឈ្លានពាន និងសម្លាប់ប្រជាជនកម្ពុជាបានដូចគ្នាដែរ។

ច្បាប់ទម្លាប់ត្រូវបានបំផ្លាញដោយពួកឈ្លានពាន។ តើនេះជាគោលបំណងដើម្បីបង្កើតជំនឿទុកចិត្ត និងឈានទៅរកទំនាក់ទំនងល្អឬបំផ្លាញដើម្បីបង្កើតជម្លោះឡើងវិញក្រោយកិច្ចព្រមព្រៀងឈប់បាញ់?