ខេត្តសៀមរាប៖បុរសម្នាក់ពីបទ ករណីអំពើលួចមានស្ថានទម្ងន់ទោស ( ឆក់ទូរស័ព្ទ ) ត្រូវបានចាប់ខ្លួនក្រោយធ្វើសកម្មភាពពីម៉ោងក្រោយមក។
ជនសង្ស័យឈ្មោះ ភិនសុជៀត ភេទប្រុស អាយុ២៦ឆ្នាំ ស្រុកកំណើត ភូមិ ផាត់សណ្តាយ ឃុំកំពង់ស្វាយ ស្រុកកំពង់ស្វាយ ខេត្តកំពង់ធំ។ បច្ចុប្បន្នស្នាក់នៅ ភូមិសាលាកន្សែងសង្កាត់ស្វាយដង្គុំ ស្នាក់នៅបន្ទប់ជួល។ មុខរបរ ជាងគំនូរគូរូប។
វរសេនីយ៍ឯក ហង្សសូផាតភីរម្យ នាយការិយាល័យនគរបាលព្រហ្មទណ្ឌកម្រិតស្រាល នៃស្នងការនគរបាលខេត្តសៀមរាប បានឲ្យដឹងនៅរសៀលថ្ងៃនេះថាករណីនេះនៅថ្ងៃទី១២ ខែឧសភាឆ្នាំ២០២០នៅវេលាប្រហែលម៉ោង១៨និង៣០នាទីល្ងាច នៅចំណុចជិតកន្លែងឆែកសំបុត្រក្នុងសង្កាត់គោកចក ភូមិទក្សិណត្បូង ក្រុងសៀមរាប មានករណីឆក់ ទូរស័ព្ទ របស់ជនរងគ្រោះម្នាក់ ឈ្មោះ ផេង ប៊ុនឡុង អាយុ២០ឆ្នាំ រស់នៅភូមិប្រយុទ្ធ ឃុំពូក ស្រុកពួកខេត្តសៀមរាប ដែលគាត់កំពុងជិះកង់ហាត់ប្រាណ។
វរសេនីយ៍ឯក ហង្សសូផាតភីរម្យ បន្តថាសម្ភារបាត់បង់ ទូរស័ព្ទមួយគ្រឿងម៉ាក អាយហ្វូន អិច អេស ម៉ាក ( iPhone X’s mak )។
វរសេនីយ៍ឯក ហង្សសូផាតភីរម្យ បញ្ជាក់ថាក្រោយពីទទួលបានព័ត៌មានភ្លាមកម្លាំងនគរបាលព្រហ្មទណ្ឌកម្រិតស្រាលខេត្តសៀមរាបបានសហការជាមួយជនរងគ្រោះធ្វើការស្រាវជ្រាវកំណត់មុខសញ្ញា លុះ២ម៉ោងក្រោយមកបានធ្វើការឃាត់ខ្លួនបានជនសង្ស័យម្នាក់នៅចំណុចភូមិ តាភុល សង្កាត់ស្វាយដង្គំ ខេត្តសៀមរាប ជាក់ស្ដែងរួមជាមួយវត្ថុតាង ទូរស័ព្ទមួយគ្រឿងដែលបានធ្វើការសកម្មភាពឆក់ពីជនរងគ្រោះ។ ចំណែកបក្ខពួកវាម្នាក់ទៀតបានបើកម៉ូតូរត់រួច។
វរសេនីយ៍ឯក ហង្សសូផាតភីរម្យ ថានគរបាលបានដកហូតវត្ថុតាងជាក់ស្តែង ពីខ្លួនជនសង្ស័យ មានទូរស័ព្ទមួយគ្រឿងម៉ាក iphone xs makដែលឆក់បាន។ តាមចម្លើយជនសង្ស័យបានឆ្លើយសារភាពថាខ្លួនពិតជាបានធ្វើសកម្មភាពឆក់ទូរស័ព្ទមែន ព្រោះអស់ការងារធ្វើដាច់លុយដោយសារ មេរោគCovid 19។
ជនសង្ស័យត្រូវបាននគរបាលកសាងសំណុំរឿងបញ្ជូនទៅតុលាការ៕SRP

ខេត្តសៀមរាប៖កម្លាំងនគរបាលការិយាល័យប្រឆាំងការជួញដូរមនុស្សនិងការពារអនីតិជន កាលពីរសៀលថ្ងៃទី១២ខែឧសភាម្សិលមិញ បានចុះបង្ក្រាបករណីបំរើសេវាផ្លូវភេទ ជ្រកក្រោមស្លាកម៉ាស្សា ដោយឃាត់ខ្លួនថៅកែហាងម្នាក់ និងរំដោះនារីបំរើសេវាផ្លូវភេទ៤នាក់។
លោកវរសនីយ៍ឯក ជា ហេង នាយការិយល័យនគរបាលប្រឆាំងការជួញដូរមនុស្សនិងការពារអនីតិជនខេត្ត បានអោយដឹងថា ទីតាំងហាងម៉ាស្សាយីហោរស្មីរត្ន័១៦៨ ដែលបានចុះបង្ក្រាប ស្ថិតនៅភូមិវត្តបូព៌ សង្កាត់សាលាកំរើក ក្រុងសៀមរាប។ ហាងម៉ាស្សានេះបានរកសុីបង្កប់សេវាផ្លូវភេទជ្រកក្រោមស្លាកម៉ាស្សា។ លោកបន្តថា ក្នុងពេលបង្ក្រាប យើងបានប្រមូលស្រ្តីរកសុីផ្លូវភេទបានចំនួន៤នាក់ ក្នុងនោះមានអនីតិជន អាយុ ១៧ ឆ្នាំម្នាក់ និង ចាប់បានថៅកែម្នាក់ឈ្មោះ ទន់ សារត្ន័ ភេទស្រី អាយុ ៣២ ឆ្នាំ ។ ជាមួយគ្នានោះ ក៏ឆែកឆេររកឃើញវត្ថុតាងស្រោម អនាម័យប្រើរួច និងមិនទាន់ប្រើមួយចំនួនធំ។ ជនសង្ស័យគឺបានឃាត់ខ្លួនតាមបញ្ជាលោក កើត វណ្ណារ៉េត ព្រះរាជអាជ្ញាអមសាលាដំបូងខេត្តសៀមរាប។
លោកនាយការិយាល័យ បន្ថែមថា តាមចម្លើយសារភាពរបស់ជនសង្ស័យ បានសារភាពថាខ្លួនពិជាបានអនុញ្ញាតឲ្យស្រីៗរកសុីផ្លូវភេទនៅក្នុងហាងម៉ាស្សារបស់ខ្លួន ដោយបំរើផ្លូវភេទជាមួយភ្ញៀវម្តងតំលៃ ចាប់ពី២៥ $ ទៅ៣០$ ហើយខ្លួនដកយក ១០០០០ រៀល។ ក្រោយពេលសាកសួរ ស្ត្រីរកសុីផ្លូវភេទទាំង៤ នាក់គឺបានបញ្ជូនទៅមន្ទីសង្គមកិច្ចខេត្ត ។ចំណែកស្ត្រីថៅកែហាង បានបញ្ជូនទៅតុលាការ នារសៀលថ្ងៃទី១៣ខែឧសភានេះ ដោយចោទប្រកាន់ ពីបទ សញ្ចារកម្ម៕SRP

ខេត្តកំពង់ចាម៖នៅទីស្នាក់ការសាខាកាកបាទក្រហមកម្ពុជាខេត្តកំពង់ចាម នាព្រឹក​ថ្ងៃ​ទី​១៣​ ខែឧសភា​ ឆ្នាំ​២០២០នេះ​ លោក​ អ៊ុន ចាន់ដា អភិបាលខេត្ត និងជាប្រធានគណៈកម្មាធិការសាខាកាកបាទក្រហមកម្ពុជា ខេត្តកំពង់ចាម បានដឹកនាំកិច្ចជុំគណៈកម្មាធិការសាខាកាកបាទក្រហមខេត្ត ដើម្បីត្រួតពិនិត្យការងារទទួលវិភាគទានពីសប្បុរសជន ជួយទ្រទ្រង់ដល់សាខាកាកបាទក្រហមកម្ពុជាខេត្តកំពង់ចាម ដោយមានការអញ្ជើញចូលរួមពីសំណាក់​ លោកស្រី​ អនុប្រធានអចិន្ត្រៃយ៍ លោក លោកស្រី សមាជិក សមាជិកា គណៈកម្មាធិការសាខា។

បន្ទាប់ពីកិច្ចប្រជុំ​នេះ​ លោកប្រធានគណៈកម្មាធិការសាខា បានទទួលអំណោយមនុស្សធម៌ពីសប្បុរសជន ដែលចូលរួមវិភាគទានជួយទ្រទ្រង់ដល់សាខាកាកបាទក្រហមកម្ពុជាខេត្តកំពង់ចាម ក្នុងឱកាសខួបលើកទី១៥៧ ទិវាពិភពលោក កាកបាទក្រហម អឌ្ឍចន្ទក្រហម ក្រោមប្រធានបទ “ខ្ញុំស្រលាញ់សន្តិភាព និងកាកបាទក្រហមកម្ពុជា” ។

តាងនាមលោក ហ៊ុន ណេង សមាជិកអចិន្ត្រៃយ៏នៃរដ្ឋសភា អ្នកតំណាងរាស្រ្តមណ្ឌលខេត្តកំពង់ចាម និងជាប្រធានកិត្តិយសសាខាកាកបាទក្រហមកម្ពុជា ខេត្តកំពង់ចាម និងក្នុងនាមប្រធានគណៈកម្មាធិការសាខា លោក​​ អ៊ុន​ ចាន់ដា​ បានថ្លែងអំណរគុណ ដល់ លោក​ លោកស្រី​ លោកឧកញ៉ា លោក លោកស្រី ក្រុមការងារចុះជួយខេត្ត សមាជិកព្រឹទ្ធសភា រដ្ឋសភា មន្ត្រីរាជការ និងវិស័យឯកជនក្នុងខេត្ត ដែលបាន ចូលរួមបរិច្ចាគវិភាគទានជួយទ្រទ្រង់ដល់សាខាកាកបាទក្រហមកម្ពុជាខេត្ត​ ផងដែរ​៕SRP

ខេត្តកំពង់ចាម៖​ខ្យល់​កន្ត្រាក់​​បណ្តាល​ឲ្យផ្ទះប្រជាពលរដ្ឋចំនួន០៦ខ្នងរោងការខូចខាត។
ហេតុការណ៍នេះបានកើតមានឡើងកាលពីវេលាម៉ោង​៣និង​៣០នាទី​ទៀបភ្លឺ​ ឈាន​ចូល​ថ្ងៃ​ទី​១៣​ ខែឧសភា​ ឆ្នាំ​២០២០ នៅភូមិក្បាលដំរី ឃុំបឹងណាយ ស្រុកព្រៃឈរ​ ខេត្តកំពង់ចាម​។

លោក​ ង៉ាន​ ជឿន​ អាជ្ញាធរ​ឃុំ​បឹងណាយ​ បាន​ឲ្យដឹងថា​ ចំពោះ​ករណី​គ្រោះធម្មជាតិ​នេះ​ បណ្តាល​ឲ្យ​រលំផ្ទះខូចខាតទាំងស្រុង១ខ្នង​ ព្រមទាំង​របើក​ដំបូល និង​ជញ្ជាំង​អស់​ ចំនួន៥​ខ្នង​ ក្នុង​នោះ​​ផ្ទះ​របស់​បងប្អូន​ប្រជាពលរដ្ឋ​ រួមមាន​​ ១-ឈ្មោះ​ ឃីម នៅ ដែលមានទំហំ៥x៦ម៉ែត្រ​ ប្រក់ស័ង្គសី​ ជញ្ជាំងសង្គ័សី​ រលំទាំងស្រុង បណ្តាល​ឲ្យ​រងរបួសកូន​ និងប្រពន្ធបន្តិចបន្តួច។
២-ឈ្មោះ អួន អ៊ីម ផ្ទះទំហំ៨x៩ម៉ែត្រ​ របើកក្បឿង​ប្រមាណ​ជា៥០សន្លឹក ។
៣-ឈ្មោះ​អួន​ វន ផ្ទះ​ទំហំ​៨x៩ម៉ែត្រ​ របើកក្បឿង​ប្រមាណ​ជា​១០០សន្លឹក។
៤-ឈ្មោះប៉ោក ធឿន ផ្ទះ​ទំហំ​៨x៩ម៉ែត្រ​ របើកក្បឿង​ប្រមាណ​ជា​១២០សន្លឹក។
៥-ឈ្មោះ​ប៉ោក សុខ​ ផ្ទះ​ទំហំ​៨x៩ម៉ែត្រ​ របើកក្បឿង​ប្រមាណ​ជា​៥០សន្លឹក។
៦-ឈ្មោះ ហ៊ឹម​ សៀង​ ផ្ទះ​ទំហំ​៨x៨ម៉ែត្រ​ ដំបូលក្បឿង​ ជញ្ជាំងស្លឹក​ របើកជញ្ជាំងស្លឹក១ផ្ទាំង​។ ករណីនេះមានភ្លៀងផងដែរ៕SRP

ភ្នំពេញ៖សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃនៅព្រឹកនេះបានអញ្ជើញដឹកនាំកិច្ចប្រជុំពិភាក្សាពីផែនការសកម្មភាពឆ្នាំ២០២០ របស់អគ្គនាយកដ្ឋានអត្តសញ្ញាណកម្ម នៅទីស្ដីការក្រសួងមហាផ្ទៃ។

សម្ដេចក្រឡាហោម ស ខេង បានមានប្រសាសន៍ថា កិច្ចប្រជុំនៅថ្ងៃនេះគឺជាការបន្តកិច្ចពិភាក្សាដើម្បីឆ្លងផែនការសកម្មភាពប្រចាំឆ្នាំរបស់អគ្គនាយកដ្ឋានអត្តសញ្ញាណកម្ម បន្ទាប់ពីក្រសួងក៏ទើបតែបានឆ្លង និងអនុម័តផែនការសកម្មភាពប្រចាំឆ្នាំរបស់អគ្គស្នងការដ្ឋាននគរបាលជាតិ និងអគ្គនាយកដ្ឋានមួយចំនួនរួចមកហើយ ដើម្បីជំរុញ និងបង្កើនប្រសិទ្ធភាពក្នុងការចាត់ចែងការងារ និងតួនាទីរបស់អគ្គនីមួយៗ។

សម្ដេច បានមានប្រសាសន៍ថានៅឆ្នាំ២០២០នេះ ថ្វីដ្បិតថាយើងគ្រប់គ្នាបានដឹងរួចមកហើយនូវការប្រឈមមុខនឹងវិបត្តិជំងឺកូវីដ១៩ ដែលអាចធ្វើឱ្យផែនការសកម្មភាពមួយចំនួនមិនអាចសម្រេចទៅបានតាមការគ្រោងទុក ប៉ុន្តែការដាក់ចេញនូវផែនការជាក់លាក់ គឺជាកិច្ចការដ៏មានសារៈសំខាន់ និងក៏ជាមូលដ្ឋានគ្រឹះសម្រាប់ការរៀបចំផែនការសកម្មភាពឆ្នាំ២០២១ និងឆ្នាំបន្តបន្ទាប់ទៀតដែរ។

ពាក់ព័ន្ធនឹងការងារអត្តសញ្ញាណកម្ម សម្ដេច បានមានប្រសាសន៍ជំរុញអគ្គនាយកដ្ឋានអត្តសញ្ញាណកម្មបន្តពន្លឿនការឈានទៅបញ្ចប់សេចក្ដីព្រាងច្បាប់ ការខិតខំជំរុញការងារអត្តសញ្ញាណកម្មទៅក្នុងសេវាច្រកចេញចូលតែមួយដែលពេលនេះកំពុងអនុវត្តន៍សាកល្បង និងការកសាងប្រព័ន្ធផ្ទុកគ្រប់គ្រងទិន្ន័យ និងធនធានមនុស្ស៕SRP

ខេត្តកំពង់ចាម៖លោក ឡោ ចាន់លី អភិបាលស្រុក​ព្រៃឈរ​ រួម​នឹង​អភិបាលរង​ស្រុក​ មេបញ្ជាការកងកំលាំងទាំង៣ ការិយាល័យពាក់ព័ន្ធ មេឃុំ ក្រុមប្រឹក្សាឃុំ សូរសែន្យ​ នាព្រឹក​ថ្ងៃ​ទី​១២​ ខែឧសភា​ ឆ្នាំ​២០២០​នេះ​ បានបើកវេទិកាសាធារណៈជាមួយ​បងប្អូន​ប្រជាពលរដ្ឋ​ ភូមិតាសរ​ ឃុំស្រង៉ែ និងប្រជាពលរដ្ឋឃុំសូរសែន្យ​ ដែលមានដីស្រែ​ និងដីលំនៅដ្ឋាន​ តាមដងផ្លូវ​ ដែលត្រូវស្ថាបនាជាផ្លូវកៅស៊ូ។​

ក្នុង​វេទិកា​នោះដែរ​ លោក​ឡោ​ ចាន់​លី​ អភិបាល​ស្រុក​ព្រៃឈរ​ និងមន្ត្រីបច្ចេកទេស​ បានជម្រាបជូនប្រជាពលរដ្ឋថា​ ផ្លូវនេះស្ថាបនាដោយចាក់កៅស៊ូ៦ម៉ែត្រ​ បូកនិងស្មាផ្លូវសងខាង ក្នុងម្ខាង១ម៉ែត្រ តែដោយសារដំណើរការគ្រឿងចក្រ​ ត្រូវកៀរកិនបង្ហាប់ ដូច្នេះតម្រូវបើកផ្លូវ១០ម៉ែត្រ ហើយក្រុមការងារក៏បោះបង្គោលក្រហមកំណត់១០ម៉ែត្រ តែត្រង់កន្លែងខ្លះដែលមានដីខ្ពស់ស្រាប់ជាក្រួសក្រហម គឺក្រុមឈូសឆាយឈូសតែ៩ម៉ែត្រទេ ព្រោះមិនតំរូវចាក់បាតដីស។​ ដូច្នេះសូមប្រជាពលរដ្ឋ​ កុំយល់ច្រលំថា​ ហេតុអ្វីឃើញបង្គោលក្រហមដល់​ តែមិនឈូសត្រង់ចំណុចខ្លះ។ ជាមួយ​គ្នា​នោះ​ក្រុមការងារបន្តពិនិត្យទីតាំងលូទទឹងថ្នល់​ផងដែរ​៕SRP

ខេត្តសៀមរាប៖សំណង់អត់ច្បាប់មួយកន្លែងត្រូវបានសមត្ថកិច្ចក្រុងសៀមរាបចុះហាមឃាត់។
ហេតុការណ៍ធ្វើឡើងនៅវេលាម៉ោង ១៥និង៣០នាទី ថ្ងៃទី ១២ ខែឧសភា ឆ្នាំ ២០២០ ស្ថិតក្នុងភូមិអញ្ចាញ សង្កាត់នគរធំ ក្រុងសៀមរាប ខេត្តសៀមរាប។

សមត្ថកិច្ចបានឲ្យដឹងថាប្រតិបត្តិការនេះដឹកនាំបញ្ជាផ្ទាល់ដោយលោក ពៅ សារ៉ាវុធ អភិបាលរងក្រុងសៀមរាប និងកម្លាំងមូលដ្ឋានកងរាជអាវុធហត្ថក្រុងសៀមរាប ដឹកនាំដោយ លោក អនុសេនីយ៍ ឯក សំ សារ៉ូ មេបញ្ជាការ រង ក្រុងរួមនិងចៅសង្កាត់ អធិការរង ក្រុងសៀមរាប ។
បើតាមសមត្ថកិច្ចថាការចុះហាមឃាត់ សំណង់អត់ច្បាប់ ខាងលើសមត្ថកិច្ចបានដកហូតសម្ភារសាងសង់ មួយចំនួនផងដែរ។
ទីតាំងខាងលើមានម្ចាស់សំណង់ឈ្មោះ លឹង សង់ប៊ុន ភេទប្រុស អាយុ ៣៤ ឆ្នាំ ទីកន្លែងកំណេីត សង្កាត់ទួលទំពូង ក្រុងភ្នំពេញ រាជធានី ភ្នំពេញ ៕SRP

ខេត្តសៀមរាប៖ជារឿងអកុសលបំផុតនិងគួរឲ្យសង្វែកណាស់ក្មេងម្នាក់ បានគាំងបេះដូងស្លាប់ នៅខាងមុខព្រះអង្គចេក ព្រះអង្គចម ពេលឪពុកម្ដាយ ជូនមកមន្ទីរពេទ្យគន្ធបុប្ផា តែចូលមកអុជធូប ហើយចេញមកវិញ។
ហេតុការណ៍បានកើតឡើងនៅថ្ងៃទី១២ ខែឧសភា ឆ្នាំ ២០២០វេលាម៉ោង
វេលាម៉ោង ១៥:០០នាទី នៅខាងមុខព្រះអង្គចេក ព្រះអង្គចម ស្ថិតនៅចំនុចភូមិ មណ្ឌល២ សង្កាត់ស្វាយដង្គំ ក្រុងសៀមរាប ខេត្តសៀមរាប។
សមត្ថកិច្ចបានឲ្យដឹងថាកុមារីម្នាក់ឈ្មោះ ទៀង ចរិយា អាយុ ១០ឆ្នាំ មានទីលំនៅភូមិ ផ្សារស្នួល ឃុំស្នួល ស្រុកស្នួល ខេត្តក្រចេះបានគាំងបេះដូងស្លាប់(មានជំងឺបេះដូងជំហរ)នៅខាងមុខព្រះអង្គចេក ព្រះអង្គចម ដោយឪពុកម្តាយជូនមកមន្ទីរពេទ្យគន្ធបុប្ផា តែពេលមកដល់ព្រះអង្គចេក ព្រះអង្គចម ឪពុកម្តាយក៏ចូលមកអុជធូប ពេលចេញមកវិញកុមារីខាងលើក៏ដង្ហក់ដាច់ខ្យល់ស្លាប់តែម្តង ។មូលហេតុ ជនរង្រោះមានជំងឺបេះដូងចំហ៕SRP

ភ្នំពេញ៖ប្រមុខដឹកនាំកម្ពុជា សម្ដេចតេជោ នាយករដ្ឋមន្ត្រី ហ៊ុន សែន និងភរិយានៅថ្ងៃនេះបានទទួល ចៅស្រីម្នាក់ទៀតហើយ។

សម្ដេចតេជោ ហ៊ុន សែន បានបង្ហោះសារនៅលើទំព័រផេកហ្វេសប៊ុកអមនឹងរូបភាពជាច្រើនសន្លឹកដោយបង្ហាញនូវការស្វាគមន៍រីករាយដែលទទួលបាននូវចៅស្រីដ៏ស្រស់ស្អាតបន្ថែមមួយទៀត។
សារនៅលើទំព័រហ្វេសប៊ុករបស់សម្ដេចតេជោ ហ៊ុន សែន បានលើកឡើងថា៖
បន្ទាប់ពីការបាត់បង់មាតាក្មេក
នាសប្តាហ៍កន្លងទៅ ថ្ងៃនេះខ្ញុំទទួលបាន
ចៅស្រីមួយរូបទៀតដែលជាចៅទី២១
របស់ខ្ញុំនិងភរិយា។
ស្វាគមន៍និងជូនពរចៅទទួលបានសេចក្តី
សុខ។សម្ដេចតេជោនាយករដ្ឋមន្ត្រីបន្តថា៖
តាមិនបានទៅបីចៅចេញពីមន្ទីរពេទ្យដូចចៅមុនៗឡើយដោយសារតែជំងឺ
ឆ្លងកូវីត១៩៕SRP

ខេត្តកំពង់ចាម​៖លោកស្រី​ ប៉ាង ដានី អភិបាលរងខេត្ត និងជាអនុប្រធានអចិន្រ្តៃយ៍សាខាកាកបាទក្រកម្ពុជាខេត្តកំពង់ចាម តំណាងលោក​ អ៊ុន ចាន់ដា អភិបាលខេត្តកំពង់ចាម និងជាប្រធានគណៈកម្មាធិកាសាខាកាកបាទក្រហមកម្ពុជាខេត្ត រួមជាមួយអាជ្ញាធរមូលដ្ឋាន នាព្រឹក​ថ្ងៃ​ទី​១២​ ខែឧសភា​ ឆ្នាំ​២០២០នេះ​ បាន​នាំយកអំណោយមនុស្សធម៌សាខាកាកបាទក្រហមកម្ពុជាខេត្ត ជូនក្រុមគ្រួសារ​ជនរងគ្រោះ​ ចំនួន៣គ្រួសារ នៅភូមិទី២ ឃ៉ំកោះសំរោង ស្រុកកំពង់សៀម ដែល​បាន​ស្លាប់​បាត់បង់​ជីវិត​ គ្រោះថ្នាក់ចរាចរណ៍ផ្លូវទឹក។ គួររំលឹកផងដែរថា មនុស្ស​ចំនួន​៣នាក់​ ក្នុង​ចំណោម​១០នាក់​ ត្រូវ​បានបាត់ខ្លួន​ និងម្នាក់​ទៀត​ត្រូវ​រងរបួស ខណៈ​ទូក​អូស​យ៉ាងកាវ​ បេីកបុក​ជាមួយ​ទូក​ប្រជាពលរដ្ឋ​ ដែល​ជិះ​​ឆ្លង​ទន្លេ​ គ្រា​ដែល​​ជនរងគ្រោះ​​ត្រឡប់​មក​ពី​ពិធី​មង្គលការ​មួយ​ ហើយ​ឆហើយឆ្ពោះទៅកាន់លំនៅឋានរបស់ខ្លួន កាលពីយប់ថ្ងៃទី១០ ខែឧសភា ​ ខណៈ​ដែលជន​រងគ្រោះ​ធ្វើដំណើរត្រឡប់មកពីពិធីមង្គលការនៅឃុំរំចេកវិញ។គួរ​បញ្ជាក់​ផង​ដែរ​ថា ជនរងគ្រោះ​ទាំង០៣នាក់នោះ ទី១-ឈ្មោះ រិន ជា ភេទប្រុស អាយុ៥៣ឆ្នាំ។ ទី២-ឈ្មោះ ធីម ថាន ភេទប្រុស អាយុ៥២ឆ្នាំ​ ។ ទី៣-ឈ្មោះ ឡាង ប៉េងហ៊ត់​ ភេទប្រុស អាយុ៣៣ឆ្នាំ​ ។ រហូត​មក​ដល់​ថ្ងៃ​ទី​១២​ ខែឧសភា​ ឆ្នាំ​២០២០នេះ​ សព​ជនរងគ្រោះ​ទាំង​៣នាក់​ ត្រូវ​បានរក​ឃើញ​ ហើយ​យក​ទៅ​ធ្វើ​បុណ្យ​តាម​ប្រពៃណី​ផងដែរ​ ខណៈ​ដែល​ក្រុម​គ្រួសារ​សព​ បាន​ទទួល​អំណោយ​មនុស្សធម៌​ ពី​សាខា​កាកបាទក្រហម​កម្ពុជា​ខេត្ត​កំពង់ចាម​៕SRP

ខេត្តកំពង់ធំ៖ រថយន្តយីឌុបមួយគ្រឿង ដឹកឈើចាស់ បន្លំដឹកឈើថ្មី ចេញ ពី ស្រុកសណ្តាន់ ខេត្ត កំពង់ធំ ត្រូវបាន កម្លាំង រាជអាវុធហត្ថខេត្តកំពង់ធំ បង្ក្រាបបាន។

ហេតុការណ៍បានធ្វើឡើងនៅយប់ថ្ងៃទី១១ខែឧសភា ឆ្នាំ ២០២០ នៅភូមិសាស្ត្រស្រុកបន្ទុកខេត្តកំពង់ធំ។
រថយន្តនេះ ទ្រុងពណ៌ ខៀវ ពាក់ ស្លាក លេខ ព្រះសីហនុ ៤A_៣០៤៣ ដឹកប្រភេទលេខ០២ ប្រមាណជាង៤០ម៉ែត្រគូប។

យោង តាម កំណត់ហេតុ ជាឈើលក់ឡៃឡុង របស់ ក្រុមហ៊ុន ទី្រភាព តែត្រូវបានប្រគល់ផ្ទេរសិទ្ធ នៅ ថ្ងៃទី១៨ខែកញ្ញាឆ្នាំ២០១៩ ពី ក្រុមហ៊ុន អង្គ រផ្លាយវូត ឱ្យឈ្មោះ អ៊ុន ម៉ៅ ភេទ ប្រុស ក្នុងការទំនាក់ទំនង សមត្ថកិច្ច ដឹកជញ្ជូន ដែល មាន សុពលភាព ត្រឹម ថ្ងៃ ទី ៣១ខែមីនា ឆ្នាំ ២០២០ តែឈ្មួញបាន ប្រើប្រាស់ លិខិត នេះ ដឹកជញ្ជូន រហូតដល់ ថ្ថ្ងៃទី១២ ខែឧសភា ឆ្នាំ ២០២០ ទើបសមត្ថកិច្ចកងរាជអាវុធហត្ថខេត្តកំពង់ធំ ចាប់បាន៕SRP

ខេត្តសៀមរាប៖បុរស០២នាក់ត្រូវបានកម្លាំងអាវុធហត្ថខេត្តសៀមរាបចាប់ខ្លួន ករណីគ្រឿងញៀន។
ហេតុការណ៍បានកើតឡើងម៉ោង០៧និង០០នាទីថ្ងៃទី១១ខែឧសភាឆ្នាំ២០២០ នៅចំណុចភូមិកក្រាញ់ សង្កាត់សៀមរាប ក្រុងសៀមរាប។
សមត្ថកិច្ចថាករណីនេះដកហូតម្សៅក្រាមពណ៌ស(មេតាំហ្វេតាមីន)ចំនួន១៥កញ្ចប់ ស្មេីនិង០៦,២៤ក្រាម,ទូរស័ព្ទ០៣គ្រឿង។
បច្ចុប្បន្នជនសង្ស័យនិងវត្ថុតាងត្រូវបានអាវុធហត្ថខេត្តកសាងសំណុំរឿងបញ្ជូនទៅសាលាដំបូងខេត្ត៕SRP