រដ្ឋបាលខេត្តសៀមរាប នៅថ្ងៃទី០៤ ខែ កញ្ញា ឆ្នាំ២០២៥ បានរៀបចំកិច្ចប្រជុំសាមញ្ញលើកទី១៦ របស់ក្រុមប្រឹក្សាខេត្តសៀមរាប អាណត្តិទី៤ ក្រោមកិច្ចដឹកនាំរបស់ ឯកឧត្តម លី សំរិទ្ធ ប្រធានក្រុមប្រឹក្សាខេត្ត និង ឯកឧត្តម ប្រាក់ សោភ័ណ អភិបាលនៃគណៈអភិបាលខេត្ត ដោយមានការចូលរួមពី ឯកឧត្តម លោកជំទាវសមាជិកសមាជិកាក្រុមប្រឹក្សាខេត្ត អស់លោក លោកស្រី គណៈអភិបាលខេត្ត នាយករដ្ឋបាល ថ្នាក់ដឹកនាំមន្ទីរ អង្គភាព អាជ្ញាធរក្រុង ស្រុក និង មន្ត្រីក្រសួងមហាផ្ទៃ។

បន្ទាប់ពីការត្រួតពិនិត្យទៅលើរបៀបវារៈនៃកិច្ចប្រជុំសាមញ្ញលើកទី១៦ របស់ក្រុមប្រឹក្សាខេត្តសៀមរាប ទាំង៤ ចំណុច និង ការលើកឡើងរបស់សមាជិកសមាជិកាក្រុមប្រឹក្សា នូវចំណុចមួយចំនួន ពាក់ព័ន្ធបរិស្ថាន ផ្លូវថ្នល់ ដែលត្រូវធ្វើការកែតម្រូវនូវខ្លឹមសារ អត្ថន័យនៅក្នុងរបាយការណ៍របស់រដ្ឋបាលខេត្ត ប្រចាំខែសីហាឆ្នាំ២០២៥និងបានត្រួតពិនិត្យលទ្ធផលបូកសរុបការ ងារចុះមូលដ្ឋានរបស់ក្រុមការងារក្រុមប្រឹក្សាខេត្តសៀមរាប អាណត្តិទី៤ ប្រចាំឆមាសទី១ ឆ្នាំ២០២៥ ត្រូវបានកិច្ចប្រជុំ ធ្វើការអនុម័តផងដែរ។

ឯកឧត្តម ប្រាក់ សោភ័ណ ក៏បានលើកឡើងពីស្ថានភាពសន្តិសុខ សណ្តាប់ធ្នាប់របស់ខេត្ត និង ការយកចិត្តទុកដាក់ខ្ពស់ចំពោះប្រជាពលរដ្ឋភៀសសឹក និង គ្រួសារកងទ័ព ដែលបានមកស្នាក់នៅជំរុំសុវត្ថិភាពក្នុងភូមិសាស្ត្រខេត្ត តាមបណ្តាក្រុង ស្រុក ព្រមទាំងជម្រុញដល់រដ្ឋបាលក្រុង ស្រុក បង្កើនយកចិត្តទុកដាក់អំពី សុខភាព អនាម័យ និងការរស់នៅ។

ឯកឧត្តមបានបញ្ជាក់ថា យើងត្រូវពង្រឹងបន្ថែមទីកន្លែងសង្គ្រោះ ដល់ជនរងគ្រោះដោយសង្រ្គាម ដែលខេត្តបានរៀបចំនៅស្រុកក្រឡាញ់ និង ស្រុកស្វាយលើ រួមនឹងមន្ទីរពេទ្យបង្អែកខេត្ត និង មន្ទីរពេទ្យ យោធភូមិផងដែរ។

ឯកឧត្តមបានឲ្យដឹងផងដែរថា គិតមកដល់ពេលនេះពលករវិលមកពីប្រទេសថៃមានជាង២ម៉ឺននាក់ ដែលត្រូវមន្ទីរពាក់ព័ន្ធ និង រដ្ឋបាលក្រុង ស្រុង ធ្វើការផ្សព្វផ្សាយពីកន្លែងការងារ ដែលបងប្អូនត្រូវការធ្វើ។ ឯកឧត្តម អភិបាល ខេត្ត ក៏បានបញ្ជាក់ផងដែរថា ប្រជាពលរដ្ឋមានលំនៅដ្ឋាននៅក្នុងតំបន់បេតិកភណ្ឌអង្គរ មួយចំនួនបានចាក់ចេញទៅកាន់ទីតាំងថ្មី នៅក្រុងរុនតាឯកតេជោសែន ហើយចំពោះតំបន់អភិវឌ្ឍន៍ពាក់ស្នែង ដោយមិនទាន់បានរៀបចំរួចរាល់។ តំបន់បេតិកភណ្ឌអង្គរ មាន១១៤ភូមិ ដែលនៅពេលខាងមុខនិងរៀបចំប្លង់គោល ដោយមានតំបន់ហាមឃាត់ និង តំបន់ ទ្រនាប់។ ក្នុងនោះដែរឯកឧត្តមអភិបាលខេត្ត ក៏បានថ្លែងអំណរគុណដល់អាជ្ញាធរស្រុកពួក និង ប្រជាពលរដ្ឋស្រុក ដែល មានទឹកចិត្តសប្បុរសធម៌ បានផ្តល់ទីកន្លែងស្នាក់នៅ និងផ្គត់ផ្គង់ម្ហូបអាហារដល់សិស្ស ខេត្តឧត្តរមានជ័យ បានមកប្រឡង សញ្ញាបត្រមធ្យមសិក្សាទុតិយភូមិឆ្នាំសិក្សា២០២៤.២០២៥ ។ ក្នុងនោះដែរឯកឧត្តមជម្រុញដល់រដ្ឋបាលក្រុង ស្រុក ត្រូវ យកចិត្តទុកដាក់ខ្ពស់ពីគ្រោះមហន្តរាយ ដោយជំនន់ទឹកភ្លៀង ព្រមទាំងត្រៀមលក្ខណៈឲ្យបានគ្រប់គ្រាន់  ក្នុងការជួយ សង្គ្រោះបងប្អូនរងគ្រោះ និង ងាយរងគ្រោះ សំខាន់កងកម្លាំងទាំងបីត្រូវមានមុខជាប្រចាំ។

ឯកឧត្តម  ប្រាក់ សោភ័ណ ក៏បានបញ្ជាក់ផងដែរថា ក្នុងឆ្នាំ២០២៥នេះ ខេត្តមិនបានរៀបចំព្រះរាជពិធីបុណ្យអុំទូកទេ  តែអាជ្ញាធរខេត្តនឹងរៀបចំផ្សារទឹក ព្រមទាំងរៀបចំធ្វើផ្សារចុងសប្តាហ៍ ចាប់ពីថ្ងៃសុក្រ ដល់ថ្ងៃអាទិត្យ។ ក្នុងគោលដៅទាក់ទាញដល់ភ្ញៀវទេសចរណ៍ ជាតិ អន្តរជាតិ ចូលមកកម្សាន្ត ព្រមទាំងបន្តធ្វើការដាំ និង ថែទាំដើមឈើ ដែលបានដាំនៅតាមដងវិថីក្នុងក្រុង។

ឯកឧត្តម លី សំរិទ្ធ ក៏បានជម្រុញដល់ក្រុមការងារក្រុមប្រឹក្សាខេត្ត បន្តចុះធ្វើកិច្ចការរបស់ខ្លួនឱ្យកាន់តែទទួលបានលទ្ធផលល្អថែមទៀត។  ក្នុងនោះឯកឧត្តមក៏បានផ្តោតសំខាន់ចំពោះសុខភាពអនាម័យ និង ការសង្រ្គោះដែលជាកត្តាសំខាន់ ចំពោះបងប្អូនប្រជាពលរដ្ឋភៀសសឹក និង គ្រួសារកងទ័ព ព្រមទាំងចំពោះក្មួយៗ សិស្សានុសិស្សមកពីខេត្តឧត្តរមានជ័យ និង តាមបណ្តាក្រុង ស្រុក មកប្រឡងសញ្ញាបត្រមធ្យមសិក្សាទុតិយភូមិឆ្នាំសិក្សា២០២៤.២០២៥។

ឯកឧត្តមប្រធានក្រុមប្រឹក្សាខេត្ត បានសង្កត់ធ្ងន់ផងដែរថា រដ្ឋបាលក្រុង ស្រុក ត្រូវយកចិត្តទុកដាក់ ខ្ពស់ លើការងារបណ្តុះបណ្តាលធនធានមនុស្ស គឺត្រូវចាត់តាំងមន្ត្រីរបស់ខ្លួនឲ្យច្បាស់ នៅពេលបញ្ជូនមកចូលវគ្គបណ្តុះ បណ្តាល ព្រមទាំងឲ្យមន្ត្រីធ្វើរបាយការណ៍ ធ្វើការកែតម្រូវ នូវខ្លឹមសារ អក្ខរាវិរុទ្ធ ព្រមទាំងធ្វ់ការរំលេចនូវលទ្ធផលការងារ ដែលតាមបណ្តាមន្ទីរ អង្គភាពអនុវត្តបានផងដែរ។

ឯកឧត្តមក៏បានជម្រុញផងដែរ ដល់អាជ្ញាធរក្រុង ស្រុក ត្រូវតាមដាន ឲ្យបានគ្រប់ពេលវេលា នៅពេលដែលភូមិសាស្ត្ររបស់ខ្លួនទទួលរងគ្រោះធម្មជាតិ និង រកទីទួលសុវត្ថិភាពសម្រាប់ប្រជា ពលរដ្ឋស្នាក់នៅ៕SRP

ប្រមុខក្រសួងមហាផ្ទៃ បន្តសង្កត់ធ្ងន់ពីសារសំខាន់នៃកិច្ចការពារសុខសន្តិភាព និងបម្រើសេវាជូនពលរដ្ឋប្រកបដោយភាពកក់ក្តៅ

ឯកឧត្ដមអភិសន្តិបណ្ឌិត ស សុខា ឧបនាយករដ្ឋមន្រ្តី រដ្ឋមន្ត្រីក្រសួងមហាផ្ទៃ បានបន្តសង្កត់ធ្ងន់ពីសារសំខាន់នៃកិច្ចការពារសុខសន្តិភាព ទន្ទឹមគ្នានិងការផ្តល់​សេវាសាធារណៈជូនប្រជាពលរដ្ឋឱ្យបានល្អប្រសើរ ស្របតាមទស្សនៈ ធ្វើអ្វីគ្រប់បែបយ៉ាង ដើម្បីផ្តល់ភាពកក់ក្តៅជូនប្រជាពលរដ្ឋ។ ឯកឧត្តមអភិសន្តិបណ្ឌិត បានគូសបញ្ជាក់បែបនេះ ពិធីប្រកាសចូលកាន់មុខតំណែងលោកជំទាវ ឈី វ៉ា ជាអភិបាល នៃគណៈអភិបាលខេត្តកោះកុង ជំនួសលោកជំទាវ មិថុនា ភូថង នាព្រឹកថ្ងៃទី៣ ខែកញ្ញា ឆ្នាំ២០២៥នេះ។

ឯកឧត្ដមអភិសន្តិបណ្ឌិត ឧបនាយករដ្ឋមន្រ្តី បានបន្តថា រដ្ឋបាលថ្នាក់ក្រោមជាតិ ក៏មិនខុសគ្នាពីថ្នាក់ជាតិដែរ គឺមានបន្ទាត់គោលនយោបាយមួយដ៏ជាក់លាក់របស់រាជរដ្ឋាភិបាល ក្រោមការដឹកនាំរបស់ សម្ដេចមហាបវរធិបតី ហ៊ុន ម៉ាណែត គឺអនុវត្តយុទ្ធសាស្ត្របញ្ចកោណដំណាក់កាលទី១ និងគោលនយោបាយផ្តល់សារសំខាន់ចំពោះធនធានមនុស្ស ទឹក ផ្លូវ ភ្លើង និងបច្ចេកវិទ្យាឌីជីថល។

ស្របតាមគោលនយោបាយនេះ ឯកឧត្ដមអភិសន្តិបណ្ឌិត បានរំលឹកពីភាពចាំបាច់នៃការផ្តល់សេវាសាធារណៈជូនប្រជាពលរដ្ឋ ជាពិសេសនៅថ្នាក់ក្រោមជាតិ ដែលរាជរដ្ឋាភិបាលបានផ្ទេរសិទ្ធិអំណាច តួនាទី ភារកិច្ច និងមុខងារជាច្រើន ដើម្បីមានលទ្ធភាពកាន់តែច្រើនក្នុងការផ្តល់សេវាតាមតម្រូវការរបស់ពលរដ្ឋនៅមូលដ្ឋាន។

ឯកឧត្ដមអភិសន្តិបណ្ឌិត បានគូសបញ្ជាក់បន្ថែមថា កិច្ចការដ៏មានសារៈសំខាន់នេះ ត្រូវការជាចាំបាច់នូវកាដឹកនាំប្រកបដោយគុណភាព និងការខិតខំអនុវត្តឱ្យបានសកម្ម ជាពិសេសការតាមដានត្រួតពិនិត្យ និងវាយតម្លៃនូវរាល់កិច្ចការ ដែលថ្នាក់ខេត្តទទួលខុសត្រូវទាំងចំពោះប្រជាពលរដ្ឋ និងរាជរដ្ឋាភិបាល។ ក្នុងន័យនេះឯកឧត្ដមអភិសន្តិបណ្ឌិត សង្ឃឹមជឿជាក់ថា លោកជំទាវ ឈី វ៉ា នឹងខិតខំបន្ត ទទួលខុសត្រូវលើការងារដឹកនាំ ក្នុងកិច្ចការបម្រើប្រជាពលរដ្ឋឱ្យបានកាន់តែល្អប្រសើរ បន្តពីលោកជំទាវមិថុនា ភូថង និងអភិបាលខេត្តជំនាន់មុន ដែលបានខិតខំពូនជ្រំកសាងសមិទ្ធផលជាច្រើន។

ក្នុងឱកាសនោះ លោកជំទាវ មិថុនា ភូថង អតីតអភិបាល នៃគណៈអភិបាលខេត្តកោះកុង បានគូសបញ្ជាក់ នូវសមិទ្ធផលដែលរដ្ឋបាលខេត្តក្រោមការដឹកនាំរបស់លោកជំទាវ ក្នុងរយៈពេលកន្លងមកសម្រេចបានជាច្រើន ជាពិសេសការចូលរួមចំណែកការពារសុខសន្តិភាព ការផ្តល់សេវារដ្ឋបាល ការធានាសន្តិសុខសណ្ដាប់ធ្នាប់សាធារណៈ ជូនប្រជាពលរដ្ឋ និងការកសាងសមិទ្ធផលរូបវន្តជាច្រើន។ លោកជំទាវ ក៏បានលើកឡើងពីសារសំខាន់នៃការចូលរួមគាំទ្រ​របស់មន្ត្រីគ្រប់ថ្នាក់ គ្រប់ផ្នែក ចំណុះរដ្ឋបាលខេត្ត និងជាពិសេសការចូលរួមគាំទ្រពីប្រជាពលរដ្ឋ ដែល​ជាលក្ខខណ្ឌសំខាន់សម្រាប់ការឈានទៅសម្រេចបានជោគជ័យថ្មីៗបន្ថែមទៀតរបស់រដ្ឋបាលខេត្ត​។ លោកជំទាវ ក៏បានទទូចឱ្យបន្តផ្តល់ការគាំទ្រលោកជំទាវអភិបាលខេត្តថ្មី ដើម្បីឱ្យលោកជំទាវកាន់តែមានលទ្ធភាពក្នុងការបន្តអភិវឌ្ឍខេត្តកោះកុងឱ្យកាន់តែរីកចម្រើន ក្រោមម្លប់នៃសុខសន្តិភាព។

លោកជំទាវ ឈី វ៉ា អភិបាល នៃគណៈ អភិបាលខេត្តកោះកុង បានថ្លែងអំណរព្រះរាជគុណ ព្រះករុណា ព្រះអង្គម្ចាស់ជីវិតលើត្បូង ដែលបានចេញព្រះរាជក្រឹត្យ តែងតាំងលោកជំទាវជាអភិបាល នៃគណៈអភិបាលខេត្តកោះកុង និងគោរពថ្លែងអំណរគុណ ចំពោះការផ្តល់សេចក្តីទុកចិត្តពីសម្តេចមហាបវរធិបតី ហ៊ុន ម៉ាណែត នាយរដ្ឋមន្ត្រីនៃកម្ពុជា ឯកឧត្ដមអភិសន្តិបណ្ឌិត ឧបនាយករដ្ឋមន្រ្តី រដ្ឋមន្ត្រីក្រសួងមហាផ្ទៃ។ លោកជំទាវក៏បាន ស្នើសុំឱ្យថ្នាក់ដឹកនាំ ចំណុះរដ្ឋបាលខេត្ត និងប្រជាពលរដ្ឋបន្តផ្តល់ការគាំទ្រ ចូលរួមជាមួយលោកជំទាវដើម្បីរួមគ្នាសម្រេចបាននូវវឌ្ឍនភាព បន្ថែមទៀតជូនខេត្តកោះកុង។

គួរកត់សម្គាល់ថា នៅក្នុងឱកាសថ្លែងសន្ទរកថា នាពិធីនោះដែរ ឯកឧត្ដមអភិសន្តិបណ្ឌិត បានណែនាំរដ្ឋបាលខេត្តកោះកុង រដ្ឋបាលក្រុង ស្រុក និងឃុំ សង្កាត់ចំណុះរដ្ឋបាលខេត្តកោះកុង និយាយដោយឡែក និងជារួមនៅទូទាំងប្រទេស ត្រូវបន្តយកចិត្តទុកដាក់លើការដោះស្រាយបញ្ហាសំខាន់ៗជាអាទិ៍ បញ្ហាគ្រឿងញៀន បញ្ហាក្មេងទំនើង ដែលជាបញ្ហាកំពុងកើតមានជារៀងរាល់ថ្ងៃ និងជាក្ដីព្រួយបារម្ភរបស់ប្រជាពលរដ្ឋ ដែលទាមទារឱ្យមានការយកចិត្តទុកដាក់ អនុវត្តឱ្យបានសកម្ម និងខ្លាំងក្លា ដើម្បីប្រែក្លាយគោលនយោបាយភូមិ-ឃុំ-សង្កាត់មានសុវត្ថិភាព ដែលបាននិយាយទាំងពីបញ្ហាគ្រឿងញៀន ក្មេងទំនើង និងលក្ខណសម្បត្តិផ្សេងៗទៀត សរុប៧ចំណុច ឱ្យក្លាយទៅជាសមិទ្ធផលជាក់ស្ដែង៕SRP

នៅក្នុងកិច្ចប្រជុំពិភាក្សាស្តីពីការទប់ស្កាត់និងបង្រ្កាបបទល្មើសធនធានធម្មជាតិនិងព្រៃឈើក្នុងខេត្តសៀមរាប នាព្រឹកមិញនេះ លោក អ៊ឹង គឹមលាង អភិបាលរងខេត្តសៀមរាប បានមានប្រសាសន៍ណែនាំនិងជម្រុញឲ្យមន្រ្តីជំនាញនៃមន្ទីរកសិកម្មរុក្ខាប្រមាញ់និងនេសាទខេត្ត និងមន្ទីរបរិស្ថាន ត្រូវបង្កើនការគ្រប់គ្រងរោងសិប្បកម្ម រោងសន្និធិនិងឡដែលមានច្បាប់អនុញ្ញាតប្រើប្រាស់ផលអនុផលព្រៃឈើមានប្រភពច្បាស់លាស់និងមានច្បាប់អនុញ្ញាត ហើយត្រូវបន្តកិច្ចសហការជាមួយគណៈបញ្ជាការឯកភាពក្រុងស្រុក និងស្ថាប័នអយ្យការសាលាដំបូងខេត្តសៀមរាប ដើម្បីទប់ស្កាត់ តាមដានស្រាវជ្រាវនិងបង្រ្កាបបទល្មើសព្រៃឈើ សត្វព្រៃ និងដីព្រៃឈើ ឲ្យបានទាន់ពេលវេលា .ត្រូវជម្រុញការផ្សព្វផ្សាយពីអាជ្ញាធរមូលដ្ឋាន ស្ថាប័នពាក់ព័ន្ធលើការបង្កើតឡធ្យូងនិងកាប់បំផ្លាញព្រៃឈើ ហើយត្រូវមានវិធានការចំពោះពលរដ្ឋរស់នៅក្នុង និងក្រៅតំបន់ដែលបន្តចូលអាស្រ័យផលក្នុងតំបន់ការពារធម្មជាតិ និងត្រូវចូលរួមសហការទប់ស្កាត់បទល្មើសក្នុងតំបន់ការពារធម្មជាតិផងដែរ។

លោកអភិបាលរងខេត្តបានបន្ថែមទៀតថា ការកាប់ទន្ទ្រានព្រៃយកដី និងការកាប់ឈើដឹកជញ្ជូនខុសច្បាប់នៅក្នុងភូមិសាស្ត្រខេត្តសៀមរាប នៅតែកើតមានជាពិសេសការទន្ទ្រានដីក្នុងតំបន់ការពារ តំបន់ដែនជម្រកសត្វព្រៃ និងឧទ្យានជាតិ។
ក្នុងបរិបទនេះ យើងត្រូវរួមគ្នាស្វែងរកមធ្យោបាយដើម្បីបញ្ចប់ការទន្ទ្រានព្រៃយកដី។ ជាមួយគ្នានេះ អាជ្ញាធរមូលដ្ឋានត្រូវសហការគ្នាក្នុងការទប់ស្កាត់ និងបង្ក្រាបឱ្យបានការដឹកជញ្ជូនឈើខុសច្បាប់ទោះរូបភាពណាក៏ដោយម្យ៉ាងទៀតការដឹកជញ្ជូនពីខេត្តផ្សេងឆ្លងកាត់ខេត្តសៀមរាបក៏បញ្ហាដែលកើតមានឡើងផងដែរ ដូចនេះសូមសមត្ថកិច្ចពាក់ព័ន្ធត្រូវបង្ក្រាបឱ្យបាន។

នៅក្នុងបទបង្ហាញរបស់ លោក ម៉ុង ប៊ុនលីម នាយខណ្ឌរដ្ឋបាលព្រៃឈើនៃមន្ទីរកសិកម្មរុក្ខាប្រមាញ់និងនេសាទខេត្តសៀមរាប ដែលបានបង្ហាញអំពីទិន្នន័យឡធ្យូង រោងសន្និធិឈើ និងមុខសញ្ញាជនល្មើសកាប់និងដឹកជញ្ជូនឈើ នៅក្នុងឆ្នាំ២០២៥នេះ បានបញ្ជាក់ថាបច្ចុប្បន្ននេះ សហគមន៍ព្រៃឈើមានចំនួន៥៩កន្លែង នៅលើផ្ទៃដី១៨,៧៤៣ហិកតា៤០៥ .ការគ្រប់គ្រងរោងសិប្បកម្ម រោងសន្និធិនិងទីតាំងលក់គ្រឿងសង្ហារឹម(ដែលមានច្បាប់អនុញ្ញាត)គឺសរុបមានរោងសិប្បកម្ម ១៤កន្លែង.រោងសន្និធិ១៤កន្លែង និងគ្រឿងសង្ហារឹមមានចំនួន៣១កន្លែង ហើយរោងសិប្បកម្មខ្លះបានប្រើប្រាស់ឈើដែលបានទិញពី រោងសន្និធិនៅរាជធានីភ្នំពេញ និងរោងសន្និធិខ្លះដាក់តាំងលក់គ្រឿងសំណង់ ជាមួយផលអនុផលព្រៃឈើ ប្រមទាំងមាទីតាំងលក់គ្រឿងសង្ហារឹមខ្លះបានទិញគ្រឿងសង្ហារឹមពីខេត្តផ្សេងៗយកមកដុសខាត់លាបនិងលក់បន្តឲ្យអ្នកប្រើប្រាស់។

លោក ម៉ុង ប៊ុនលីម បានបន្តទៀតថាចំពោះ ឡធ្យូងប្រើប្រាស់ផលអនុផលព្រៃឈើដែលគ្មានច្បាប់អនុញ្ញាតមានចំនួន១,០១០ឡធ្យូង ដែលប្រើប្រាស់ប្រភពថាមពល ដើមស្វាយចន្ទី ដើមស្វាយ ដើមអាកាស្យា និងប្រពភព្រៃឈើខ្លះៗដែរ.ហើយចំពោះការងារបង្រ្កាបបទល្មើសព្រៃឈើក្នុងឆ្នាំ២០២៥នេះរដ្ឋបាលព្រៃឈើបានបង្រ្កាបបទល្មើសព្រៃឈើចំនួន២៤ករណីក្នុងនោះបទល្មើសព្រៃឈើ១៤ករណី និងបទល្មើសដីព្រៃឈើ១០ករណីដោយមានចំណាត់ការបញ្ជូនទៅរដ្ឋបាលព្រៃឈើ៧ករណី បញ្ជូនទៅតុលាការ៧ករណីនិងកំពុងចាត់ចែង១០ករណី ដោយក្នុងនោះបានរឹបអូសវត្ថុតាងរួមមាន៖ ឈើអារចម្រុះចំនួន ៤១.២០៨ ម៉ែត្រគូប ,ឈើមូល០.២៥១ម៉ែត្រគូប ,ធ្យូង៨០០គីឡូក្រាម ,ម៉ាស៊ីនបញ្ឈរ១គ្រឿង ,ផ្លែរណា១ខ្សែ,រថយន្តចំនួន៦គ្រឿង,អេស្ការវ៉ាទ័រ១គ្រឿង,គោយន្តកន្ត្រៃ១គ្រឿងដីព្រៃឈើចំនួន៥៣,២៨៣ហិកតា និងជនល្មើស១នាក់ ។

ជាមួយគ្នានោះផងដែរមន្ត្រីជំនាញនៃមន្ទីរបរិស្ថាន ក៍បានបង្ហាញផែនទីព្រៃឈើនៅសល់ក្នុងតំបន់ការពារធម្មជាតិដោយបានបញ្ជាក់ថាតំបន់ការពារធម្មជាតិក្នុងភូមិសាស្រ្តខេត្តសៀមរាបសរុបប្រមាណជា០៨កន្លែង មានផ្ទៃដីសរុប ២៨៣,៩៩៩.២៧ហិកតា .មានសហគមន៍តំបន់ការពារធម្មជាតិភូមិសាស្រ្តចំនួន១១ទីតាំងគ្របដណ្តប់លើផ្ទៃដី១៥,៧៤១ហិកតាស្មើនឹង២០ភូមិ៥ឃុំមាន៤,៧៤៤គ្រួសារ និងសមាជិកចំនួន២២,១៣៩នាក់/ស្រ្តី១១,៤៣៣នាក់ផងដែរ ៕SRP

នៅក្នុងកិច្ចប្រជុំពិភាក្សាស្តីពីការទប់ស្កាត់និងបង្រ្កាបបទល្មើសធនធានធម្មជាតិនិងព្រៃឈើក្នុងខេត្តសៀមរាបដែលដឹកនាំកិច្ចប្រជុំដោយ លោក អ៊ឹង គឹមលាង អភិបាលរងខេត្តសៀមរាបនាព្រឹកមិញនេះ នៅរដ្ឋបាលខេត្តសៀមរាប លោក ម៉ុង ប៊ុនលីម នាយខណ្ឌរដ្ឋបាលព្រៃឈើនៃមន្ទីរកសិកម្មរុក្ខាប្រមាញ់និងនេសាទខេត្តសៀមរាប បានបង្ហាញអំពីទិន្នន័យឡធ្យូង រោងសន្និធិឈើ និងមុខសញ្ញាជនល្មើសកាប់និងដឹកជញ្ជូនឈើនៅក្នុងឆ្នាំ២០២៥ នេះ ដោយលោកបានបង្ហាញថា ការងារបង្រ្កាបបទល្មើសព្រៃឈើក្នុងឆ្នាំ២០២៥ នេះ រដ្ឋបាលព្រៃឈើបានបង្រ្កាបបទល្មើសព្រៃឈើ ចំនួន២៤ករណីក្នុងនោះបទល្មើសព្រៃឈើ១៤ករណី និងបទល្មើសដីព្រៃឈើ១០ករណី ដោយមានចំណាត់ការបញ្ជូនទៅរដ្ឋបាលព្រៃឈើ ៧ករណី បញ្ជូនទៅតុលាការ ៧ករណីនិងកំពុងចាត់ចែង១០ករណី ដោយក្នុងនោះបានរឹបអូសវត្ថុតាងរួមមាន៖ ឈើអារចម្រុះចំនួន៤១.២០៨ម៉ែត្រគូប ,ឈើមូល០.២៥១ម៉ែត្រគូប ,ធ្យូង៨០០គីឡូក្រាម ,ម៉ាស៊ីនបញ្ឈរ១គ្រឿង ,ផ្លែរណា១ខ្សែ,រថយន្តចំនួន៦គ្រឿង,អេស្ការវ៉ាទ័រ១គ្រឿង,គោយន្តកន្ត្រៃ១គ្រឿងដីព្រៃឈើចំនួន៥៣,២៨៣ហិកតា និងជនល្មើស១នាក់ផងដែរ។

លោកម៉ុង ប៊ុនលីម បានបញ្ជាក់ថា បច្ចុប្បន្ននេះ សហគមន៍ព្រៃឈើមានចំនួន៥៩កន្លែង នៅលើផ្ទៃដី១៨,៧៤៣ហិកតា៤០៥ .ការគ្រប់គ្រងរោងសិប្បកម្ម រោងសន្និធិនិងទីតាំងលក់គ្រឿងសង្ហារឹម (ដែលមានច្បាប់អនុញ្ញាត) គឺសរុបមានរោងសិប្បកម្ម១៤កន្លែង.រោងសន្និធិ១៤កន្លែង និងគ្រឿងសង្ហារឹមមានចំនួន៣១កន្លែង ហើយរោងសិប្បកម្មខ្លះបានប្រើប្រាស់ឈើដែលបានទិញពី រោងសន្និធិនៅរាជធានីភ្នំពេញ និងរោងសន្និធិខ្លះដាក់តាំងលក់គ្រឿងសំណង់ ជាមួយផលអនុផលព្រៃឈើ ប្រមទាំងមាទីតាំងលក់គ្រឿងសង្ហារឹមខ្លះបានទិញគ្រឿងសង្ហារឹមពីខេត្តផ្សេងៗយកមកដុសខាត់លាបនិងលក់បន្តឲ្យអ្នកប្រើប្រាស់។

លោក ម៉ុង ប៊ុនលីម បានបន្តទៀតថាចំពោះ ឡធ្យូងប្រើប្រាស់ផលអនុផលព្រៃឈើដែលគ្មានច្បាប់អនុញ្ញាតមានចំនួន១,០១០ឡធ្យូង ដែលប្រើប្រាស់ប្រភពថាមពល ដើមស្វាយចន្ទី ដើមស្វាយ ដើមអាកាស្យា និងប្រពភព្រៃឈើខ្លះៗដែរ៕SRP

ខេត្តសៀមរាប៖លោកឧត្តមសេនីយ៍ទោ ហួត សុធី ស្នងការនគរបាលខេត្តសៀមរាប បានប្រាប់ទីភ្នាក់ងារសារព័ត៌មាន សៀមរាប ប៉ុស្តិ៍ ថានៅយប់ថ្ងៃទី២ ខែកញ្ញា ឆ្នាំ២០២៥ វេលាម៉ោងប្រហែល២០:៤០នាទី មានជនសង្ស័យម្នាក់ ភេទប្រុស ជនជាតិចិន ក្នុងស្ថានភាពស្រវឹងស្រា បានធ្វើសកម្មភាពដើរចូលទៅក្នុងបរិវេណលំនៅឋានរបស់ប្រជាពលរដ្ឋ មួយកន្លែង ដែលស្ថិតនៅក្នុងភូមិសាលាកំរើក សង្កាត់សាលាកំរើក ក្រុងសៀមរាប ខេត្តសៀមរាប ដោយក្នុងដៃមានកាន់កាំភ្លើងខ្លី ០១ដើម មិនស្គាល់ម៉ាក ដោះបង់កាំភ្លើងចេញមកបង្ហាញ ហើយក៏ដើរចេញទៅវិញ បន្ទាប់មកពេលដែលប្រជាពលរដ្ឋហៅសួរនាំ ជនសង្ស័យបានបោះកាំភ្លើងនោះចោលទៅលើផ្លូវបេតុង ភ្លាមនោះប្រជាពលរដ្ឋក៏បាននាំគ្នាចូលទៅឃាត់ជនសង្ស័យ និងរាយការណ៍ជូនសមត្ថកិច្ចចុះអន្តរាគមន៍។

លោកឧត្តមសេនីយ៍ទោ ហួត សុធី បានបន្តថា
ក្រោយទទួលបានព័ត៌មាននេះភ្លាម លោកបានចាត់កម្លាំងអន្តរាគមន៍ និងតម្រួតបទបញ្ជា  សហការណ៍ជាមួយ កម្លាំងនៃអធិការដ្ឋាននគរបាលក្រុងសៀមរាប ចុះដល់ត្រួតពិនិត្យភ្លាម និងធ្វើការឃាត់ខ្លួនជនសង្ស័យ ឈ្មោះ LIU YUNYOU ភេទប្រុស កើតថ្ងៃទី០៣.០៤.២០០៣ ជនជាតិចិន កាន់លិខិតឆ្លងដែនលេខ EK៥៣៩០៤០៧ រួមទាំងអាវុធខ្លីចំនួន ០១ដើម ម៉ាកSIG SAUER P365  គ្រាប់ចំនួន ០៥គ្រាប់ ក្នុងនោះដែលកម្លាំងសមត្ថកិច្ចយើងបានបន្តការស្រាវជ្រាវ រហូតឈានដល់ការឃាត់ខ្លួនបក្ខពួកជនសង្ស័យម្នាក់ទៀតឈ្មោះ LI JIAN AN ភេទប្រុស កើតថ្ងៃទី០២.០៩.២០០៣ ជនជាតិចិន ក្នុងពេលដែលជនសង្ស័យរូបនេះកំពុងស្នាក់នៅក្នុងផ្ទះជួលលេខ១០១១ បុរីលុចនីដា ដែលស្ថិតនៅភូមិសាលាកំរើក សង្កាត់សាលាកំរើក ក្រុងសៀមរាប ខេត្តសៀមរាប។

បច្ចុប្បន្នជនសង្ស័យរួមទាំងវត្ថុតាងត្រូវបាននាំខ្លួនមកកាន់ការិយាល័យជំនាញ នៃស្នងការដ្ឋាននគរបាលខេត្តសៀមរាប ដើម្បីកសាងសំណុំរឿងចាត់ការតាមនីតិវិធីច្បាប់៕SRP

លោកឧត្តមសេនីយ៍ត្រី សៀ ទីន មេបញ្ជាការ កងរាជអាវុធហត្ថខេត្តសៀមរាប នៅរសៀលថ្ងៃម្សិលមិញបានអញ្ជើញជាអធិបតីភាព ក្នុងពិធីប្រជុំត្រួតពិនិត្យការអនុវត្តតួនាទីភារកិច្ចរបស់កងរាជអាវុធហត្ថខេត្តសៀមរាប។

កិច្ចប្រជុំនេះដោយមានការចូលរួមពីលោកមេបញ្ជាការរង ជានាយសេនាធិការ លោកមេបញ្ជាការរង នាយសេនាធិការរង ប្រធានមន្ទីរទាំង៧ ប្រធានអង្គភាពទាំង២ នាយការិយាល័យ នាយអាវុធហត្ថ ដែលមានការពាក់ព័ន្ធ មេបញ្ជាការ មូលដ្ឋានកងរាជអាវុធហត្ថក្រុង/ស្រុកទាំង១៣ និងមេបញ្ជាការ កងអនុសេនាធំចល័ត នៅសាលប្រជុំអគារសេនាធិការ។

ខ្លឹមសារប្រជុំ៖
១.ផ្សព្វផ្សាលទ្ធផលការងារប្រចាំខែសីហា និងទិសដៅខែកញ្ញា​។
២.បទបង្ហាញចែករំលែកអំពីបទពិសោធន៍ការងាររបស់មូលដ្ឋានកងរាជអាវុធហត្ថស្រុកប្រាសាទបាគង។
៣.ការលើកឡើងនូវបញ្ហាប្រឈម និងដំណោះស្រាយ របស់មន្ទីរជំនាញ និងមូលដ្ឋានកងរាជអាវុធហត្ថក្រុង/ស្រុកទាំង១៣។
៤.មតិបូកសរុប​ និងផ្តាំផ្ញើរបស់លោកឧត្តមសេនីយ៍ត្រី សៀ ទីន មេបញ្ជាការកងរាជអាវុធហត្ថខេត្តសៀមរាប៕SRP

លោកឧត្តមសេនីយ៍ត្រី សៀ ទីន មេបញ្ជាការ​ កងរាជអាវុធហត្ថខេត្តសៀមរាប នាព្រឹក ថ្ងៃទី០២ ខែកញ្ញា ឆ្នាំ២០២៥ បានដឹកនាំក្រុមការងារ នៃកងរាជអាវុធហត្ថខេត្តសៀមរាប អញ្ជើញចូលរួមគោរពវិញ្ញាណក្ខន្ធសព លោកអនុសេនីយ៍ទោ ឈិត អ៊ុយចំរើន នាយរងការិយាល័យគីមីសាស្ត្រ មន្ទីរសម្ភារ:បច្ចេកទេស នៃកងរាជអាវុធហត្ថខេត្តសៀមរាប បានទទួលមរណ:ភាព នៅវេលាម៉ោង ២៣:៣២នាទីយប់ ថ្ងៃទី៣១ ខែសីហា ឆ្នាំ២០២៥ ក្នុងជន្មាយុ ៣៥ឆ្នាំ ដោយគ្រោះថ្នាក់ចរាចរណ៍ក្នុងពេលបំពេញភារកិច្ចលើកំណាត់ផ្លូវអាកាសយានដ្ឋានអន្តរជាតិ សៀមរាប-អង្គរ សពតំកល់ធ្វេីបុណ្យតាមប្រពៃណីសាសនា នៅគេហដ្ឋាននៃសព ស្ថិតនៅក្នុងភូមិកំពង់ថ្កូវ១ ឃុំកំពង់ថ្កូវ ស្រុកក្រឡាញ់ ខេត្តសៀមរាប។

ក្នុងឱកាសអញ្ជើញចូលរួមគោរពវិញ្ញាណក្ខន្ធនេះ លោក ឧត្តមសេនីយ៍ត្រី​ សៀ​ ទីន បានពាំនាំនូវការផ្តាំផ្ញើសាកសួរសុខទុក្ខពីសំណាក់ លោកនាយឧត្តមសេនីយ៍ សៅ សុខា អគ្គមេបញ្ជាការរង កងយោធពលខេមរភូមិន្ទ មេបញ្ជាការកងរាជអាវុធហត្ថលើផ្ទៃប្រទេស ជូនចំពោះក្រុមគ្រួសារសព និងបាននាំយកនូវបច្ច័យរបស់ លោកនាយឧត្តមសេនីយ៍ មេបញ្ជាការ កងរាជអាវុធហត្ថលើផ្ទៃប្រទេស រួមនិងថវិកាដែលបានមកពីការចូលរួមរបស់លោកឧត្តមសេនីយ៍ត្រី មេបញ្ជាការ ព្រមទាំង នាយ-នាយរង នៃកងរាជអាវុធហត្ថខេត្តសៀមរាប ក្នុងស្មារតីសាមគ្គីភាព សរុបទាំងអស់ចំនួន ១២,៥៧០,០០០រៀល (ដបពីរលានហាសិបប្រាំពីរមុឺនរៀល) និងគ្រឿងឧបភោគបរិភោគមួយចំនួនទៀត ចូលរួមរំលែកទុក្ខដ៏ក្រៀមក្រំបំផុតជាមួយក្រុមគ្រួសារញាតិមិត្តទាំងអស់នៃសព និងសូមឧទ្ទិសបួងសួងដល់ដួងវិញ្ញាណក្ខន្ធរបស់ លោកអនុសេនីយ៍ទោ ឈិត អ៊ុយចំរើន បានសោយសុខក្នុងសុគតិភពកុំបីឃ្លៀងឃ្លៀតឡើយ។ តំណាងគ្រួសារសព ក៏បានថ្លែងអំណរអរគុណយ៉ាងជ្រាលជ្រៅ ចំពោះទឹកចិត្ត និងការលះបង់របស់ លោកនាយឧត្តមសេនីយ៍ ព្រមទាំងក្រុមការងារ នៃកងរាជអាវុធហត្ថខេត្តសៀមរាប និងបានជូនពរឱ្យជួបតែសុខភាពល្អបរិបូណ៍ ជោគជ័យគ្រប់ភារកិច្ច និងជួបប្រទះតែពុទ្ធពរទាំង៥ប្រការគឺ អាយុ វណ្ណៈ សុខៈ ពលៈ បដិភាណៈ កុំបីឃ្លៀងឃ្លាតឡើយ»៕SRP

គណៈប្រតិភូសភាសហរដ្ឋអាមេរិកដឹកនាំដោយលោកជំទាវ បេត វ៉ាន់ ដាញ (Beth Van Duyne) សមាជិកសភាប្រចាំរដ្ឋ Texas រួមនឹងឯកឧត្តមវេជ្ជបណ្ឌិត Richard McCormick សមាជិកសភាប្រចាំរដ្ឋGeorgia និង ឯកឧត្តម Suhas Subraanyam សមាជិកសភាប្រចាំរដ្ឋ Virginia នាថ្ងៃទី៣០-៣១ ខែសីហា ឆ្នាំ២០២៥ បានមកបំពេញទស្សនកិច្ចនៅខេត្តសៀមរាប ដោយមានការទទួលការស្វាគន៍យ៉ាងកក់ក្តៅពី លោក យុន លីនណេ អភិបាលរងខេត្ត និងជាតំណាងដ៏ខ្ពស់ខ្ពស់របស់ ឯកឧត្តម ប្រាក់ សោភ័ណ អភិបាល នៃគណៈអភិបាលខេត្តសៀមរាប។

ការបំពេញទស្សនកិច្ចរបស់ លោកជំទាវ និងសមាជិកគណៈប្រតិភូនាពេលនេះ គឺដើម្បីសិក្សាស្វែងយល់ពីការអភិវឌ្ឍលើគ្រប់វិស័យរបស់ខេត្តសៀមរាបដែលជាខេត្តទេសចរណ៍លំដាប់ពិភពលោករបស់ព្រះរាជាណាចក្រកម្ពុជា ហើយលោកជំទាវបានថ្លែងអំណរគុណចំពោះថ្នាក់ដឹកនាំខេត្ត និងកោតសរសើរចំពោះកិច្ចខិតខំប្រឹងប្រែងរបស់ថ្នាក់ដឹកនាំខេត្តក្នុងការអភិវឌ្ឍដើម្បីទាក់ទាញភ្ញៀវទេសចរ និងវិនិយោគិនគ្រប់ទិសទីឱ្យចូលមកធ្វើដំណើរកំសាន្ត និងធ្វើការវិនិយោគក្នុងខេត្តដ៏មានសក្តានុពលមួយនេះ។​ បើទោះបីជាការបំពេញទស្សនកិច្ចនេះមានភាពមមាញឹកខ្លាំងយ៉ាងណាក៏ដោយ ក៏លោកជំទាវ និងគណៈប្រតិភូបានចំណាយពេលវេលាចូលទស្សនាប្រាសាទអង្គរវត្ត ប្រាសាទតាព្រហ្ម និងប្រាសាទបុរាណនានាជាច្រើនទៀតក្នុងតំបន់រមណីដ្ឋានអង្គរផងដែរ និងពិសេសបានកោតសរសើរស្ងប់ស្ងែងពីស្ថាបត្យកម្ម ចម្លាក់ដ៏ស្មុគស្មាញ ល្អឥតខ្ចោះ ពពេញដោយភាពអស្ចារ្យ និងអាថ៌កំបាំងនៅពីក្រោយ និងជាទីមើលថ្ងៃរះដ៏ល្អបំផុតរបស់សម្បត្តិបេតិកភណ្ឌពិភពលោកនៃមហាប្រាសាទអង្គរវត្ត។

ក្រោយបញ្ចប់ការបំពេញទស្សនកិច្ចរយៈពេល២ថ្ងៃ គណៈប្រតិភូបានធ្វើមាតុភូមិវិវត្តន៍ចេញពីខេត្តសៀមរាប នៅព្រឹកថ្ងៃទី៣១ ខែសីហា ឆ្នាំ២០២៥ ប្រកបដោយសុវត្ថិភាព៕SRP

ខេត្តសៀមរាប៖លោក សុខ ថុល អភិបាលរងខេត្ត បានជំរុញនិងណែនាំដល់មន្ទីរ អង្គភាព និងអ្នកពាក់ព័ន្ធទាំងអស់ បន្តយកចិត្តទុកដាក់ខ្ពស់ ក្នុងការអនុវត្តផែនការសកម្មភាព ផែនការអភិវឌ្ឍន៍ និងផែនការវិនិយោគ ស្របជាមួយនឹងយុទ្ធសាស្ត្រ និងកម្មវិធីផែនការថ្នាក់ជាតិ ឱ្យមានភាពស៊ីចង្វាក់គ្នាគ្រប់ជ្រុងជ្រោយ ដើម្បីឆ្លើយតបនឹងតម្រូវការពិតប្រាកដរបស់បងប្អូនប្រជាពលរដ្ឋនៅក្នុងមូលដ្ឋាន។

លោក សុខ ថុល អភិបាលរងខេត្ត តំណាងដ៏ខ្ពង៎ខ្ពស់ឯកឧត្តម ប្រាក់ សោភ័ណ អភិបាលខេត្តសៀមរាប នៅថ្ងៃម្សិលមិញ និងលោកជំទាវ យូ សុភា សមាជិកាក្រុមប្រឹក្សាខេត្ត បានដឹកនាំ កិច្ចប្រជុំពិនិត្យសេចក្តីព្រាងកម្មវិធីវិនិយោគបីឆ្នាំរំកិល (២០២៦-២០២៨) របស់រដ្ឋបាលខេត្តសៀមរាប ដោយមានការចូលរួមពីមន្ទីរ-អង្គភាព ជុំវិញខេត្ត និងមន្ត្រីជំនាញពាក់ព័ន្ធ។

តាមរយៈកិច្ចប្រជុំនាពេលនេះ គឺដើម្បីពិនិត្យលើការងារសកម្មភាពរបស់មន្ទីរ-អង្គភាពនីមួយៗ ដែលបានអនុវត្តកន្លងមក ស្វែងរកបញ្ហាប្រឈម និងដំណោះស្រាយរួមគ្នា កែលម្អនូវចំណុចខ្វះខាតមួយចំនួន និងបង្កើនភាពសម្របសម្រួល និងការគាំទ្រដល់ការអភិវឌ្ឍន៍នៅក្នុងមូលដ្ឋាន។

លោកអភិបាលរងខេត្តបានបន្តថា ការសម្របសម្រួលក្នុងកម្មវិធីវិនិយោគបីឆ្នាំរំកិល គឺជាការរៀបចំដំណើរការឱ្យឆ្លើយតបទៅនឹងគោលការណ៍ណែនាំរបស់គោលនយោបាយជាតិ សំដៅជំរុញសេវាសាធារណៈឱ្យខិតជិតប្រជាពលរដ្ឋ លើកកម្ពស់ជីវភាពរស់នៅ ព្រមទាំងកាត់បន្ថយភាពក្រីក្រនៅក្នុងមូលដ្ឋាន។

លោកក៏បានសំណូមពរដល់មន្ទីរ-អង្គភាព និងអ្នកដែលពាក់ព័ន្ធទាំងអស់ ត្រូវធ្វើការពិនិត្យ តាមដាន និងវាយតម្លៃនូវការអនុវត្តកន្លងមក និងពង្រឹងការអនុវត្តការងារតាមវិស័យនីមួយៗជាបន្តទៀត។

លោកជំទាវ យូ សុភា សមាជិកាក្រុមប្រឹក្សាខេត្ត ក៏បានថ្លែងការកោតសរសើរ និងវាយតម្លៃខ្ពស់ ចំពោះមន្ទីរ-អង្គភាពទាំងអស់ ដែលបានអនុវត្តផែនការសកម្មភាពបានល្អប្រសើរ និងបានផ្តល់សេវាសាធារណៈកាន់តែខិតជិតបងប្អូនប្រជាពលរដ្ឋ។

លោកជំទាវក៏បានសំណូមពរដល់ក្រុមការងារទាំងអស់ ធ្វើយ៉ាងណាត្រូវបន្តអនុវត្តការងារបន្ថែមទៀត ដើម្បីឱ្យមូលដ្ឋានកាន់តែមានការអភិវឌ្ឍរីកចម្រើន៕SRP

ខេត្តសៀមរាប៖មន្ទីរពេទ្យអន្តរជាតិមិត្តភាព អង្គរជប៉ុន ខេត្តសៀមរាប បានបើកយុទ្ធនាការពិនិត្យវាស់កម្រិតនៃការមើលឃើញ ជំងឺទឹកដក់ក្នុងភ្នែក ជំងឺបាយភ្នែក និងជំងឺកន្ទុយថ្លែន ដោយឥតគិតថ្លៃ រយៈពេល ៣ថ្ងៃ ចាប់ពីថ្ងៃទី២៩-៣១ ខែសីហា ឆ្នាំ២០២៥ ជូនដល់មន្ត្រីរាជការ និងប្រជាពលរដ្ឋទូទៅ នៅទីតាំងមន្ទីរពេទ្យផ្ទាល់ ស្ថិតក្នុងភូមិចន្លោង សង្កាត់ស្រង៉ែ ក្រុងសៀមរាប។

លោកវេជ្ជបណ្ឌិត ទៀន ម៉េងហ៊ាន ជំនាញឯកទេសភ្នែកនៃមន្ទីរពេទ្យអន្តរជាតិមិត្តភាពអង្គរជប៉ុន បានបង្ហាញថា ជំងឺភ្នែកបើមិនបានពិនិត្យ និងព្យាបាលទាន់ពេលវេលា អាចនាំឱ្យពិការ។ ចំពោះការបើកទទួលពិនិត្យវាស់កម្រិតនៃការមើលឃើញ និងជំងឺភ្នែកជូនប្រជាពលរដ្ឋដោយឥតគិតថ្លៃនេះ រៀបចំឡើងក្នុងគោលបំណងជំរុញឱ្យបងប្អូនប្រជាពលរដ្ឋបង្កើនការយកចិត្តទុកដាក់ចំពោះបញ្ហាភ្នែក ការថែរក្សាភ្នែក និងតាមដានជំងឺទឹកដក់ក្នុងភ្នែក ដើម្បីជំរុញការពិនិត្យ និងព្យាបាលទាន់ពេលវេលា។

លោកវេជ្ជបណ្ឌិតបានបញ្ជាក់ទៀតថា បច្ចុប្បន្ន ប្រជាពលរដ្ឋដែលមកពិនិត្យភ្នែកភាគច្រើន គឺដោយសារពួកគាត់កើតមានជំងឺភ្នែកឡើងបាយ ជំងឺកន្ទុយថ្លែន និងជំងឺភ្នែកមីញ៉ូប។ ដោយសារកត្តានេះ មន្ទីរពេទ្យនឹងមានគម្រោងធ្វើការពិនិត្យវាស់កម្រិតនៃការមើលឃើញ និងជំងឺទឹកដក់ក្នុងភ្នែក នៅក្នុងខែបន្តបន្ទាប់ទៅតាមសហគមន៍ និងសាលារៀនបន្ថែមផងដែរ៕SRP
ប្រភពពីមន្ទីរព័ត៌មានខេត្តសៀមរាប
អត្ថបទ និងរូបភាព៖ លោក ធន់ ពូថេ
កែសម្រួល៖ លោក អ៊ុន ណារាជ្យ

នាយកដ្ឋាននគរបាលព្រហ្មទណ្ឌបានអះអាងថាឃាតកម្មសម្លាប់ស្ដ្រីម្នាក់ ក្នុងបន្ទប់ទឹកនៃសណ្ឋាគារណាហ្គា១ កាលពីឆ្នាំ២០២៣ ជនដៃដល់ត្រូវកម្លាំងនាយកដ្ឋាននគរបាលព្រហ្មទណ្ឌ ស្រាវជ្រាវបង្ក្រាបបានហើយ។

នាយកដ្ឋាននគរបាលព្រហ្មទណ្ឌបន្តថាដោយអនុវត្តតាមបទរបស់ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ និងលោកឧត្តមសេនីយ៍ឯក ង៉េង ជួ ប្រធាននាយកដ្ឋាននគរបាលព្រហ្មទណ្ឌ, នៅថ្ងៃទី២៨ ខែសីហា ឆ្នាំ២០២៥នេះ លោកឧត្តមសេនីយ៍ត្រី ខេង ម៉េងឈាង អនុប្រធាននាយកដ្ឋាន បានដឹកនាំកម្លាំងជំនាញ សហការជាមួយស្ន​ងការដ្ឋាននគរបាលខេត្តកណ្ដាល ចាប់ខ្លួនជនដៃដល់ម្នាក់ពាក់ព័ន្ធករណីឃាតកម្មសម្លាប់ស្ដ្រីម្នាក់ នៅបន្ទប់ទឹកនៃសណ្ឋាគារណាហ្គា១ កាលពីឆ្នាំ២០២៣។

ការចាប់ខ្លួននេះ ក៏ធ្វើឡើងដោយអនុវត្តតាមដីកាបង្គាប់ឲ្យចាប់ខ្លួន-ឃុំខ្លួន​ លេខ១២០២ (ឆ.១)ដ.ច.ន/២៤​ ចុះថ្ងៃទី១ ខែសីហា ឆ្នាំ២០២៤ របស់លោក​ ហម​ ម៉េងសែ ​ប្រធាន​ក្រុមប្រឹក្សា​ជំនុំ​ជម្រះ នៃសាលាដំបូងរាជធានីភ្នំពេញ លើឈ្មោះ សេង​ ពៅ ភេទប្រុស អាយុ២៥ឆ្នាំ ជនជាតិខ្មែរ អាសយដ្ឋានបន្ទប់​ជួល​ ផ្លូវលេខ១៩៧៤​ សង្កាត់​ភ្នំពេញថ្មី​ ខណ្ឌ​សែនសុខ​ រាជធានីភ្នំពេញ​ ពីបទ «ឃាតកម្ម​ និងលួចមាន​ស្ថានទម្ងន់ទោសដោយសារ​ការ​ប្រព្រឹត្តិ​អំពេី​ហិង្សា»។

ជនដៃដល់ត្រូវបានចាប់ខ្លួននៅចំណុចភូមិព្រែកស៉ឹង សង្កាត់សំពៅពួន ក្រុងសំពៅពូន ខេត្តកណ្ដាល។ បច្ចុប្បន្នបានបញ្ជូនមកកាន់នាយកដ្ឋាននគរបាលព្រហ្មទណ្ឌ ដើម្បីចាត់ការបន្ដតាមនីតិវិធី៕SRP