ភ្នំពេញ៖នៅទីបំផុតកម្លាំងនគរបាល បានឃាត់ខ្លួនលោក ជួន គន្ធា ពាក់ព័ន្ធប្រកាសយកដីរដ្ឋទៅចែកជូនប្រជាពលរដ្ឋនៅឃុំតាសាល ស្រុកឱរ៉ាល់ ខេត្តកំពង់ស្ពឺ។

ការឃាត់ធ្វើឡើងនៅរសៀលថ្ងៃទី២៣ នៅភោជនីយដ្ឋានម្លប់ជម្ពូត្រជាក់ចិត្ត សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ តាមដីការបស់តំណាងអយ្យការខេត្តកំពង់ស្ពឺ។

ការឃាត់ខ្លួនតាមដីកាបញ្ជាឲ្យចូលខ្លួនរបស់លោក ទិន សុចិត្រា ព្រះរាជអាជ្ញារងអមសាលាដំបូងខេត្តកំពង់ស្ពឺ នៅថ្ងៃទី២៣ ខែមេសា ឆ្នាំ២០២៤ បានចោទប្រកាន់លោក ជួន គន្ធា ពីបទ «ប៉ុនប៉ងឆបោក និងញុះញង់ឱ្យមានការប្រព្រឹត្តបទឧក្រិដ្ឋជាអាទិ៍» កើតឡើងកាលពីថ្ងៃទី២១ ខែមេសា ឆ្នាំ២០២៤ នៅចំណុចភូមិរោងម៉ាស៊ីន និងភូមិធ្នៀរ ឃុំតាសាល ស្រុកឱរ៉ាល់ ខេត្តកំពង់ស្ពឺ។

សូមជម្រាបថា នៅថ្ងៃទី២១ ខែមេសាឬ ឆ្នាំ២០២៤ រដ្ឋ​បាលស្រុកឱរ៉ាល់ បានចេញលិខិតបដិសេធទាំងស្រុង ចំពោះព័ត៌មានថា មានបុគ្គលឈ្មោះ «ជួន គន្ធា» ធ្វើការចែកដីជូនប្រជាពលរដ្ឋក្រីក្រ នៅភូមិរោងម៉ាស៊ីន និងភូមិត្រពាំងធ្មៀរ ឃុំតាសាល ស្រុកឱរ៉ាល់ ខេត្ដកំពង់ស្ពឺ។

ការបដិសេធ បែបនេះ បន្ទាប់ពី បុគ្គលឈ្មោះ ជួន គន្ធា បានអះអាងថា នឹងកាត់ដីឡូត៍ជូនប្រជាពលរដ្ឋក្រីក្រ ក្នុងខេត្ដកំពង់ស្ពឺ ដើម្បីសាងសង់លំនៅដ្ឋាន ឬអាស្រ័យផល ស្ថិតនៅភូមិរោងម៉ាស៊ីន ឃុំតាសាល ស្រុកឱរ៉ាល់។

បើតាមការប្រកាសនៅលើបណ្តាញសង្គម, លោក ជួន គន្ធា បានប្រកាសចែកជូនដីជូនប្រជាពលរដ្ឋក្រីក្រ ក្នុងទំហំ ១០ គុណ ៣០ តែត្រូវចេញលុយម្នាក់ៗ៤៥០ដុល្លារ ជាថ្លៃរដ្ឋបាល និងការឈូសឆាយដី៕SRP

ខេត្តកំពង់ស្ពឺ៖ប្រធានក្រុមការងាររាជរដ្ឋាភិបាលចុះជួយ ខេត្តកំពង់ស្ពឺ លោកហ៊ុន ម៉ានី បានលើកឡើងថា

ខ្ញុំជឿជាក់យ៉ាងមុតមាំថា ក្រុមការងារទាំងអស់ក្នុងនាមជា

សេនាធិការរបស់រាជរដ្ឋាភិបាល នឹងបន្តអនុវត្តតួនាទីភារកិច្ចកាន់តែខ្ជាប់ខ្ជួន ស្របតាមការណែនាំ តម្រង់ទិសរបស់រាជរដ្ឋាភិបាល និងប្រកបដោយភាពច្នៃប្រឌិតតាមស្ថានភាពជាក់ស្តែងនៃមូលដ្ឋាននីមួយៗ។

ក្នុងឱកាសអញ្ជើញដឹកនាំកិច្ចប្រជុំ បូកសរុបលទ្ធផលការងារ ប្រចាំត្រីមាសទី១ ឆ្នាំ ២០២៤ របស់ ក្រុមការងារ រាជរដ្ឋាភិបាលចុះជួយខេត្តកំពង់ស្ពឺ នៅថ្ងៃអង្គារនេះ លោកហ៊ុន ម៉ានី បានលើកឡើងថា

ប្រមាណ៤ខែ ចុងក្រោយនេះ ក្រុមការងាររាជរដ្ឋាភិបាល ចុះមូលដ្ឋាន ខេត្តកំពង់ស្ពឺ បានបំពេញតួនាទីយ៉ាងសស្រាក់សស្រាំ ក្នុងការផ្សព្វផ្សាយព័ត៌មាន និងខ្លឹមសារ ដល់អាជ្ញាធរមូលដ្ឋានពាក់ព័ន្ធ ដើម្បីពង្រឹងការទទួលខុសត្រូវ និងភាពជាម្ចាស់នៅមូលដ្ឋានលើការអនុវត្តយុទ្ធសាស្ត្របញ្ចកោណ ដំណាក់កាលទី១ ក៏ដូចជាកម្មវិធីកែទម្រង់នានា របស់រាជរដ្ឋាភិបាល សំដៅដល់ការលើកកម្ពស់ ការផ្តល់សេវាសាធារណៈ នៅមូលដ្ឋាន ឱ្យបានកាន់តែល្អប្រសើរផង ក៏ដូចជាសិក្សាពីស្ថានភាព ឬបញ្ហាប្រឈមនានាក្នុងមូលដ្ឋានរាយការណ៍ ជូនរាជរដ្ឋាភិបាលក្នុងគោលដៅស្វែងរកដំណោះស្រាយ និងដើម្បីបំពេញបន្ថែមតម្រូវការនានា ដែលប្រជាពលរដ្ឋត្រូវការចាំបាច់ប្រកបដោយប្រសិទ្ធភាព តម្លាភាព និងគណនេយ្យភាពផង។

លោកហ៊ុន ម៉ានី បានបន្តថា ៖ក្នុងន័យនេះ ខ្ញុំសូមវាយតម្លៃខ្ពស់ និងសូមថ្លែងអំណរគុណដល់ក្រុមការងាររាជរដ្ឋាភិបាលចុះមូលដ្ឋានខេត្តកំពង់ស្ពឺ ព្រមទាំងថ្នាក់ដឹកនាំ មន្ត្រីរាជការ និងអាជ្ញាធរមូលដ្ឋានខេត្តកំពង់ស្ពឺ ដែលបានសហការការងារ និងសម្រេចបានសមិទ្ធផលជាច្រើនក្នុងរយៈពេលដ៏ខ្លី ស្របតាមការណែនាំ និងការចង្អុលបង្ហាញរបស់រាជរដ្ឋាភិបាល ក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។

លោកហ៊ុន ម៉ានី បានបញ្ជាក់៖ ទោះបីជាយ៉ាងនេះក្តី ខ្ញុំសូមលើកទឹកចិត្ត និងណែនាំបន្ថែមដល់ក្រុមការងារទាំងអស់ សូមបន្តការងារស្នូល ដែលក្រុមការងារ បាន និងកំពុងធ្វើ និងធ្វើរបាយការណ៍ ជាប្រចាំដាក់ជូនថ្នាក់ដឹកនាំជាបន្តបន្ទាប់។ ស្ថិតក្នុងដំណាក់ដែលអាកាសធាតុមានការប្រែប្រួល សូមក្រុមការបន្តតាមដានស្ថានភាពនៃការប្រើប្រាស់ទឹក តាមតំបន់នីមួយៗ និងការជួយសម្របសម្រួលការងារនានាជាមួយអាជ្ញាធរមូលដ្ឋាន រួមទាំងការបន្តរៀបចំវេទិកាសាធារណៈនានា ដើម្បីបង្កើនប្រសិទ្ធភាពនៃការផ្តល់សេវាសាធារណៈ ជូនប្រជាពលរដ្ឋ ឱ្យបានកាន់តែប្រសើរ ក៏ដូចជាបង្កើនឱកាសនានា ដល់យុវជនតាមបណ្តាមូលដ្ឋានបានដឹង និងបានចូលរួម ដូចជាការចុះឈ្មោះចូលរៀនជំនាញវិជ្ជាជីវៈ ឬការចូលរួមប្រឡងប្រជែងដើម្បីក្លាយខ្លួនជាមន្ត្រីរាជការស៊ីវិលប្រកបដោយគុណាធិបតេយ្យ តម្លាភាព យុត្តិធម៌ និងបរិយាបន្នជាដើម៕SRP

ភ្នំពេញ៖សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា នៅរសៀលថ្ងៃទី២២ ខែមេសា ឆ្នាំ២០២៤ បានអនុញ្ញាតឱ្យ ឯកឧត្តម វ៉ាង យី (WANG Yi) រដ្ឋមន្រ្តីការបរទេសនៃសាធារណរដ្ឋប្រជាមានិតចិន និងគណ:ប្រតិភូ ចូលជួបសម្តែងការគួរសម និងពិភាក្សាការងារ នៅវិមានសន្តិភាព។

ក្នុងឱកាសនៃជំនួប ឯកឧត្តម វ៉ាង យី បានថ្លែងអំណរគុណចំពោះ សម្តេចធិបតី ដែលបានឆ្លៀតពេលវេលាដ៏មមាញឹកអនុញ្ញាតឱ្យរូបឯកឧត្តម និងគណៈប្រតិភូ ចូលជួបសម្តែងការគួរសម និងពិភាក្សាការងារ ព្រមទាំងបានពាំនាំនូវការសួរសុខទុក្ខពីឯកឧត្តមប្រធានាធិបតី ស៊ី ជីនពីង និងឯកឧត្តមនាយករដ្ឋមន្រ្តី លី ឈាង ជូនចំពោះសម្តេចធិបតី និងបានអបអរសាទរចំពោះកម្ពុជាក្នុងឱកាសពិធីបុណ្យចូលឆ្នាំថ្មីប្រពៃណីជាតិ ដែលបានប្រារព្ធទៅនាពេលថ្មីៗកន្លងទៅនេះ។

ឯកឧត្តមរដ្ឋមន្រ្តី ក៏បានគោរពជម្រាបជូនសម្តេចធិបតីថា ប្រទេសចិន និងកម្ពុជា គឺជាមិត្តដ៏ជិតស្និទ្ធ និងស្មោះត្រង់ និងបានសម្តែងនូវក្ដីសោមនស្សរីករាយ ដែលរដ្ឋាភិបាលទាំងពីរបានអនុវត្តនូវកិច្ចសហប្រត្តិការបានយ៉ាងល្អក្នុងភាពជាដៃគូយុទ្ធសាស្រ្តគ្រប់ជ្រុងជ្រោយ ហើយកិច្ចសហប្រតិបត្តិការនេះបានជំរុញចំណងមិត្តភាពចិន-កម្ពុជាកាន់តែរឹងមាំដូចដែកថែប ព្រមជាមួយគ្នានេះ ឯកឧត្តមបានលើកឡើងថា តួនាទីរបស់កម្ពុជានៅលើឆាកអន្តរជាតិ ក៏កាន់តែមានសារៈសំខាន់។

ឯកឧត្តមរដ្ឋមន្រ្តី បានបន្ថែមថា ទស្សនកិច្ចផ្លូវការលើកដំបូងរបស់សម្តេចធិបតី នៅសាធារណរដ្ឋប្រជាមានិតចិននាពេលកន្លងទៅ បានឆ្លុះបញ្ចាំង និងបានរួមចំណែករឹតចំណងទំនាក់ទំនង មិត្តភាព និងសាមគ្គីភាព ចិន-កម្ពុជាឱ្យកាន់តែស្អិតរមួតបន្ថែមទៀត ហើយឯកឧត្តមរដ្ឋមន្រ្តី ក៏បានគូសបញ្ជាក់ថា ទស្សនកិច្ចនាឱកាសនេះ នឹងបន្តគាំទ្រ និងជំរុញកិច្ចសហប្រតិបត្តិការនៃការកសាងសហគមន៍វាសនារួម ចិន-កម្ពុជា ក្នុងយុគសម័យថ្មី ឱ្យលេចចេញជារូបរាង និង មានដំណើរការកាន់តែរឹងមាំ។

ជាការឆ្លើយតប សម្តេចធិបតី បានសម្តែងនូវការស្វាគមន៍ចំពោះឯកឧត្តមរដ្ឋមន្រ្តី វ៉ាង យី និងគណៈប្រតិភូ ដែលបានអញ្ជើញមកបំពេញទស្សនកិច្ចនៅព្រះរាជាណាចក្រកម្ពុជា ព្រមទាំងបានថ្លែងអំណរគុណ និងវាយតម្លៃខ្ពស់ចំពោះកិច្ចសហប្រតិបត្តិការកម្ពុជា-ចិន ដែលបានរួមចំណែកក្នុងការជំរុញ ការអភិវឌ្ឍសង្គម-សេដ្ឋកិច្ចកម្ពុជា ឱ្យមានការរីកចម្រើន។ បន្ថែមលើនេះ សម្តេចធិបតី ក៏បានសម្តែងនូវការវាយតម្លៃខ្ពស់ចំពោះគំនិតផ្តួចផ្តើមខ្សែក្រវ៉ាត់ និងផ្លូវ (BRI) ដែលបានរួមចំណែកផ្តល់លទ្ធភាពដល់កម្ពុជាក្នុងការកសាងហេដ្ឋារចនាសម្ព័ន្ធ ដូចជាផ្លូវលឿនភ្នំពេញ-ក្រុងព្រះសីហនុ និង អាកាសយានដ្ឋានអន្តរជាតិសៀមរាប-អង្គរ ជាដើម ដែលបានរួមចំណែកដល់កំណើនសេដ្ឋកិច្ចកម្ពុជា។ ទន្ទឹមនេះ សម្តេចធិបតី បានសម្តែងនូវក្តីរីករាយ និងវាយតម្លៃខ្ពស់អំពីវឌ្ឍនភាពនៃក្របខ័ណ្ឌកិច្ចសហប្រតិបត្តិការត្បូងពេជ្រ ដែលប្រទេសទាំងពីរបានឯកភាព កាលពីឆ្នាំ២០២៣។ តាមរយៈការកំណត់យកឆ្នាំ២០២៤ ជាឆ្នាំនៃការផ្លាស់ប្តូររវាងប្រជាជន និងប្រជាជន សម្តេចធិបតី មានជំនឿជាក់ថា រំហូរវិនិយោគ និងអ្នកទេសចរ មកពីប្រទេសចិននឹងកើនឡើងថែមទៀត ក្នុងព្រះរាជាណាចក្រកម្ពុជា។

សម្ដេចធិបតី និងឯកឧត្តមរដ្ឋមន្រ្តីវ៉ាង យី បានបញ្ជាក់អំពីការបន្តពង្រឹងកិច្ចសហប្រតិបត្តិការដែលមានស្រាប់លើវិស័យការពារជាតិ និងសន្តិសុខ អប់រំ វប្បធម៌ និងវិស័យផ្សេងៗទៀត និងពង្រីកកិច្ចសហប្រតិបត្តិការថ្មីៗ ដោយក្នុងនោះឯកឧត្តម វ៉ាង យី បានបញ្ជាក់ថា ភាគីចិននឹងជំរុញបញ្ចប់ការរៀបចំផែនការមេ ឱ្យបានឆាប់ ដើម្បីឱ្យកិច្ចសហប្រតិបត្តិការលើច្រករបៀងមច្ឆា និងអង្ករ និងកិច្ចសហប្រតិបត្តិការច្រករបៀងឧស្សាហកម្ម និងបច្ចេកវិទ្យា លេចចេញជារូបរាងក្នុងពេលដ៏ខ្លីខាងមុខ ព្រមទាំងជួយអភិវឌ្ឍនិងធ្វើទំនើបកម្មវិស័យកសិ-ឧស្សាហកម្ម នៅកម្ពុជា ផងដែរ។ ព្រមជាមួយគ្នានេះដែរ សម្តេចធិបតីបានស្នើឱ្យភាគីចិនពិនិត្យលទ្ធភាពក្នុងការជំរុញកិច្ចសហប្រតិបត្តិការក្នុងការបង្កើតតំបន់ពាណិជ្ជកម្មសេរីកម្ពុជា-ចិន និងតំបន់សេដ្ឋកិច្ចពិសេសបន្ថែមទៀត។

ជាទីបញ្ចប់ សម្ដេចធិបតីបានជូនពរឯកឧត្តម វ៉ាង យី និងគណៈប្រតិភូ ឱ្យទទួលបាននូវជោគជ័យក្នុងដំណើរបំពេញបេសកកម្មនៅកម្ពុជា និងធ្វើមាតុភូមិនិវត្តន៍វិញប្រកបដោយសុខសុវត្ថិភាព៕SRP

ភ្នំពេញ៖រហូតមកទល់ពេលនេះ នៅតែមានអ្នកបកស្រាយ អំពីសេរីភាពបញ្ចេញមតិ ដោយលាក់បាំង មិនព្រមនិយាយអំពីការទទួលខុសត្រូវ និងព្រំដែននៃសេរីភាព ដែល

កំណត់ដោយច្បាប់ជាតិ ក៏ដូចជាកតិកាសញ្ញាអន្តរជាតិដែលបង្កើតឱ្យមានការភាន់ច្រឡំដ៏ធំមួយក្នុងសង្គម។ ដើម្បីកុំឱ្យមានអ្នកបន្តកេងចំណេញលើបញ្ហានេះ ក៏ដូចជាដើម្បីកុំឱ្យប្រជាពលរដ្ឋយល់ច្រឡំបន្តទៀត ខ្ញុំសូមបង្ហាញជូននូវខ្លឹមសារសំខាន់ៗមួយចំនួនដូចខាងក្រោម៖

មាត្រា៤១ នៃរដ្ឋធម្មនុញ្ញកម្ពុជាចែងថា ប្រជាពលរដ្ឋខ្មែរមានសេរីភាពខាងការបញ្ចេញមតិ សេរីភាពខាងសារព័ត៌មាន សេរីភាពខាងការបោះពុម្ពផ្សាយ សេរីភាពខាងការជួបជុំ។ ជនណាក៏ដោយមិនអាចឆ្លៀតប្រើសិទ្ធិនេះដោយរំលោភនាំឱ្យប៉ះពាល់កិត្តិយសអ្នកដទៃ ដល់ទំនៀមទម្លាប់ល្អរបស់សង្គម ដល់សណ្តាប់ធ្នាប់សាធារណៈ និងដល់សន្តិសុខជាតិឡើយ។ របបសារព័ត៌មានត្រូវរៀបចំឡើងដោយច្បាប់។

មាត្រា១៩(៣) នៃកតិកាសញ្ញាអន្តរជាតិស្តីពីសិទ្ធិពលរដ្ឋនិងសិទ្ធិនយោបាយចែងថា ការប្រើប្រាស់សិទ្ធិដែលមានចែងក្នុងកថាខណ្ឌ២នៃមាត្រានេះ តម្រូវឱ្យមានករណីយកិច្ចនិងការទទួលខុសត្រូវពិសេស។ ដូច្នេះ ការប្រើប្រាស់សិទ្ធិនេះអាចមានការរឹតត្បិតមួយចំនួនដែលត្រូវកំណត់ដាច់ខាតដោយច្បាប់ និងដែលចាំបាច់ដើម្បី៖ (ក) គោរពសិទ្ធិនិងកិត្តិសព្ទអ្នកដទៃ, (ខ) ការពារសន្តិសុខជាតិ សណ្តាប់ធ្នាប់សាធារណៈ សុខភាព ឬសីលធម៌សាធារណៈ។

មាត្រា២២ (២) នៃកតិកាសញ្ញាអន្តរជាតិដដែលចែងថា ការប្រើប្រាស់សិទ្ធិនេះអាចមានការរិតត្បិតដែលកំណត់ដោយច្បាប់តែប៉ុណ្ណោះនិងដែលចាំបាច់ក្នុងសង្គមប្រជាធិបតេយ្យ ក្នុងផលប្រយោជន៍នៃសន្តិសុខជាតិ ឬសុវត្ថិភាពសាធារណៈ សណ្តាប់ធ្នាប់សាធារណៈ ការការពារសុខភាពសាធារណៈ ឬសីលធម៌ ឬការការពារសិទ្ធិនិងសេរីភាពរបស់អ្នកដទៃ។ មាត្រានេះមិនរារាំងដល់ការរឹតត្បិតខាងផ្លូវច្បាប់លើសមាជិកយោធាឬនគរបាលក្នុងការប្រើប្រាស់សិទ្ធិនេះទេ។

នៅកម្ពុជា អ្នកតាំងខ្លួនជាអ្នកការពារសិទ្ធិមនុស្សមួយចំនួនមិនដែលលើកយកដែនកំណត់និងការទទួលខុសត្រូវដូចមានចែងក្នុងរដ្ឋធម្មនុញ្ញ និងកតិកាសញ្ញាអន្តរជាតិស្តីពីសិទ្ធិពលរដ្ឋនិងសិទ្ធិនយោបាយមកនិយាយម្តងណាឡើយ ពោលគឺពួកគេនិយាយតែពីសិទ្ធិសេរីភាពគ្មានព្រំដែន។ ការមិនព្រមលើកយកការទទួលខុសត្រូវ និងដែលកំណត់ដោយច្បាប់ និងដោយកតិកាសញ្ញាអន្តរជាតិមកនិយាយ គឺជាចេតនាមិនល្អដើម្បីទុកចន្លោះកេងចំណេញបម្រើឱ្យរបៀបវារៈនយោបាយដែលលាក់នៅពីក្រោយខ្នងដែលធ្វើឱ្យមានការភាន់ច្រឡំមកលើរាជរដ្ឋាភិបាលនៅពេលមានចំណាត់ការផ្លូវច្បាប់ទៅលើបុគ្គលដែលបំពានច្បាប់។

ដើម្បីលើកតម្លៃប្រជាធិបតេយ្យនិងនីតិរដ្ឋ ក៏ដូចជាលើកកម្ពស់សេរីភាពបញ្ចេញមតិប្រកបដោយសីលធម៌ និងការគោរពសិទ្ធិគ្នាទៅវិញទៅមកដោយសេចក្តីថ្លៃថ្នូរ សូមអ្នកធ្វើការខាងសិទ្ធិមនុស្សទាំងឡាយមានសេចក្តីក្លាហានក្នុងការនិយាយពីការទទួលខុសត្រូវក្នុងការបញ្ចេញមតិ ដែលកំណត់ដោយច្បាប់ជាតិនិងកតិកាសញ្ញាអន្តរជាតិឱ្យបានទូលំទូលាយ។ ការលាក់បាំងការពិតនិងព្យាយាមការពារអ្នកប្រព្រឹត្តខុសច្បាប់មិនត្រឹមតែមិនបានផ្តល់ប្រយោជន៍ដល់ប្រជាធិបតេយ្យ នីតិរដ្ឋ និងការគោរពសិទ្ធិមនុស្សប៉ុណ្ណោះទេ ប៉ុន្តែ វាគឺជាការលើកទឹកចិត្តឱ្យមានការបំពានច្បាប់និងបំពានសិទ្ធិអ្នកដទៃដែលជាប្រភពនៃភាពអនាធិបតេយ្យក្នុងសង្គមទៅវិញទេ៕SRP
អត្ថបទដោយ លោក ប៉ែន បូណា អ្នកនាំពាក្យរាជរដ្ឋាភិបាល

សៀមរាប: លោកសាយ សំអាល ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគររូបនីយកម្ម សំណង់ និងសុរិយោដី បានថ្លែងជំរុញដល់ក្រុមការងារចុះបញ្ជីដីធ្លីជូន

ប្រជាពលរដ្ឋ ត្រូវខិតខំបំពេញភារកិច្ចនេះ ឱ្យបានល្អត្រឹមត្រូវ និងឆាប់រហ័សស្របទៅតាមគោលការណ៍របស់រាជរដ្ឋាភិបាលដែលបានកំណត់ ជាពិសេសនោះ គឺការបន្តសកម្មភាពរៀបចំចុះបញ្ជីដីធ្លីនៅជុំវិញបឹងទន្លេសាបឱ្យបានរួចរាល់ ប្រកបដោយប្រសិទ្ធភាព និងសុក្រិតភាព។

រដ្ឋមន្ត្រីក្រសួងរៀបចំដែនដី ថ្លែងយ៉ាងដូច្នេះ

នៅថ្ងៃទី២០ ខែមេសា ឆ្នាំ២០២៤ ក្នុងសាលប្រជុំធំសាលាខេត្តសៀមរាប ក្នុងឱកាសដឹកនាំ

កិច្ចប្រជុំពិភាក្សាជម្រុញការងារចុះបញ្ជីដីធ្លីក្នុងភូមិសាស្ត្រខេត្តសៀមរាប។

លោកសាយ សំអាល បានថ្លែងថា ស្របតាមគោលនយោបាយរបស់រាជរដ្ឋាភិបាលកម្ពុជា ដឹកនាំរបស់សម្តេចធិបតី ហ៊ុន ម៉ាណែត ការងារចុះបញ្ជីដីធី្លជាបញ្ហាសំខាន់ ដែលប្រមុខរាជរដ្ឋាភិបាលកម្ពុជាបានយកចិត្តទុកដាក់ខ្ពស់។ 

ឧបនាយករដ្ឋមន្រ្តី បានបន្តថា កន្លងទៅថ្មីៗនេះ សម្តេចធិបតី ហ៊ុន ម៉ាណែត បានលើកឡើងថា ការងារដែលត្រូវធ្វើបន្តត្រូវបែងចែកជាពីរ គឺការងារចំពោះមុខ និង ការងាររយៈពេលវែង។ ការងារចំពោះមុខ ត្រូវបញ្ចប់ការងារនេះ ដោយប្រសិទ្ធភាព និងសុក្រិតភាព តាមរយៈការចុះបញ្ជីដីឲ្យបានត្រឹមត្រូវ ហើយត្រូវចុះបញ្ជីជាប្រព័ន្ធតែម្តង។ សម្រាប់ជំហានទីពីរ គឺធ្វើឡើងក្រោយពេលដែលចុះបញ្ជីរួចរាល់ គឺអាជ្ញាធរបឹងទន្លេសាប ត្រូវរៀបចំផែនទី និងបោះបង្គោលឡើងវិញ ហើយដាក់បញ្ចូលក្នុងប្រព័ន្ធ។

លោកជំរុញដល់ថ្នាក់ដឹកនាំ និងមន្រ្តីរាជការទាំងអស់ត្រូវបន្តបំពេញភារកិច្ចរៀងៗ ខ្លួនជាប្រក្រតី ដោយជ្រោងទង់សាមគ្គី ឯកភាពគ្នាផ្ទៃក្នុងឱ្យកាន់តែរឹងមាំ និងរក្សាពូនជ្រុំ មរតកដ៏មានតម្លៃនានា ដែលថ្នាក់ដឹកនាំជំនាន់មុនបន្សល់ទុកឱ្យ ដើម្បីចូលរួមគាំទ្រសម្រេចឱ្យបាននូវបេសកកម្ម ដ៏ឧត្តុង្គឧត្តម របស់រាជរដ្ឋាភិបាល ស្របតាមកម្មវិធីនយោបាយ និងយុទ្ធសាស្ត្របញ្ចកោណ ដែលបានដាក់ចេញ និងស្នើអាជ្ញាធរគ្រប់ជាន់ថ្នាក់ត្រូវធ្វើការផ្សព្វផ្សាយ ព្រមទាំងណែនាំដល់ប្រជាពលរដ្ឋ ត្រៀមលក្ខណៈ ចំពោះឯកសារពាក់ព័ន្ធក្នុងការចុះបញ្ជីដីធ្លី ជៀសវាងក្នុងកិច្ចដំណើរការទៅមានភាពយឺតយ៉ាវជាដើម។ 

រដ្ឋមន្ត្រី ក៏បានសង្កត់ធ្ងន់ថា ដើម្បីជំរុញការចុះបញ្ជីដីតាមគោលនយោបាយ «ចុះបញ្ជីដីធ្លីបញ្ចប់ សេវាគាប់ចិត្តនិងបរិយាកាសគ្មានវិវាទ» រដ្ឋបាលខេត្ត ដោយមានមន្ទីររៀបចំដែនដី នគរូបនីយកម្ម សំណង់ និងសុរិយោដី ជាសេនាធិការដោយខិតខំដោះស្រាយទំនាស់ក្រៅប្រព័ន្ធតុលាការ និងសាមគ្គី និងឯកភាពផ្ទៃក្នុងទើបធ្វើឲ្យស្ថាប័នមានការរីកចម្រើន ព្រមទាំងផ្តល់ទំនុកចិត្តដល់ប្រជាពលរដ្ឋ៕SRP

ភ្នំពេញ៖ ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ លោកបណ្ឌិត ស សុខា  នឹងដឹកនាំគណៈប្រតិភូជាន់ខ្ពស់ អញ្ជើញបំពេញទស្សនកិច្ចនៅសហព័ន្ធស្វីស និងសាធារណរដ្ឋសហព័ន្ធអាល្លឺម៉ង់ ចាប់ពីថ្ងៃទី២០ ដល់ថ្ងៃទី២៧ ខែមេសា ឆ្នាំ២០២៤។

នេះបើតាមសេចក្ដីប្រកាសរបស់ក្រសួងមហាផ្ទៃ៕SRP

ខេត្តសៀមរាប៖ផ្ទះចំនួន 2 ខ្នង នៅក្នុងក្រុងសៀមរាបបានក្លាយជាចំណីអគ្គីភ័យ។

ហេតុការណ៍បានកើតឡើង នៅថ្ងៃទី១៦ ខែមេសា ឆ្នាំ២០២៤ វេលាម៉ោង១២:១០នាទី   រលត់ទៅវិញនៅវេលាម៉ោង០១:២០នាទី ស្ថិតនៅចំនុចក្រុមទី៦ភូមិសាលាកន្ដែង សង្កាត់ស្វាយដង្គំ ក្រុង/ខេត្តសៀមរាប។

របាយការណ៍របស់សមត្ថកិច្ចបានបង្ហាញថា ករណីអគ្គីភ័យនេះ
+ បណ្តាលឲ្យរងការខូចខាត:
– ទី១ម្ចាស់ឈ្មោះសួន សុទីន ភេទប្រុសអាយុ២៩ឆ្នាំ មុខរបរភោជនីយដ្ឋាន
– ផ្ទះចុះនួន០១ខ្នងធ្វើពីថ្មក្រោមឈើលើប្រកស័ង្កសី ទំហំ ១២ម×៨ម(បន្ទប់ចំនួន០៤)
– ម៉ូតូចំនួន០៥គ្រឿង
– សំភារៈផ្សេងៗ ខូចខាតទាំងស្រុង(០៩៨៤៧៤៤៤១)
– ទី២ឈ្មោះងួន ចិន្តា ភេទប្រុសអាយុ៥៥ឆ្នាំ មុខរបរនៅផ្ទះ
– ផ្ទះចំនួន០១ខ្នងថ្មក្រោមឈើលើប្រកស័ង្កសី ទំហំ១១ម×៨ម
– សំភារៈមួយចំនួន(ខូចខាតទាំងស្រុង)
👉ប្រើប្រាស់រថយន្តពន្លតអគ្គិភ័យអស់ចំនួន០៨គ្រឿង
– រថយន្តពន្លត់អគ្គិភ័យ នៃស្នងការនគរបាលខេត្តចំនួន០៣គ្រឿង
– រថយន្តពន្លត់អគ្គិភ័យ នៃអង្គភាពបិតិកភណ្ឌចំនួន០១គ្រឿង
– រថយន្តពន្លត់អគ្គិភ័យអាជ្ញាធរជាតិអប្សរាចំនួន០២គ្រឿង
– រថយន្តពន្លត់អគ្គិភ័យ អាវុធហត្ថខេត្តចំនួន០២គ្រឿង។
មូលហេតុ: កំពុងស្រាវជ្រាវ៕SRP

ខេត្តសៀមរាប៖ក្មេងប្រុសអាយុជាងមួយឆ្នាំម្នាក់ត្រូវបានស្លាប់ ដោយសារធុងបាស់ដួលសង្កត់ពីលើ។

ហេតុការណ៍បានកើតឡើង នៅថ្ងៃចន្ទ ទី ១៥ ខែមេសា ឆ្នាំ២០២៤ វេលាម៉ោង ១០និង៤០នាទី ព្រឹក ចំណុចផ្ទះឈ្មោះ យី ម៉ៅ ស្ថិតក្នុងភូមិបង្កោង ឃុំក្ដីរុន ស្រុកពួក ខេត្តសៀមរាប។

សមត្ថកិច្ចខេត្តសៀមរាបបានប្រាប់ទីភ្នាក់ងារសារព័ត៌មាន សៀមរាប ប៉ុស្តិ៍ នៅថ្ងៃចន្ទនេះថា ជនរងគ្រោះ មានឈ្មោះ ជុល ឧត្តម ភេទប្រុសអាយុ ១ឆ្នាំ ៦ខែ (រស់នៅក្នុងបន្ទុក) រស់នៅភូមិបង្កោង ឃុំក្ដីរុន ស្រុកពួក ខេត្តសៀមរាប។

សមត្ថកិច្ចបានបន្តថា តាមការឆ្លើយបំភ្លឺ របស់ឈ្មោះ ឈឹង ម៉ន ភេទស្រី អាយុ ៤៣ ឆ្នាំ ត្រូវជាអុំរបស់ជនរងគ្រោះ ដែលបានឃើញផ្ទាល់នៅកន្លែងកើតហេតុ បានឲ្យដឹងថា នៅថ្ងៃទី១៥ ខែ មេសា ឆ្នាំ ២០២៤ នៅវេលាម៉ោង១០ និង ០០ នាទីព្រឹក មានកម្មវិធីសូត្រមន្តបង្សុកូល នៅផ្ទះ ឈ្មោះ យី ម៉ៅ ភេទប្រុស អាយុ ៦១ឆ្នាំ (រស់នៅភូមិឃុំរួមគ្នា) ក្រោយចប់កម្មពិធី ក៏មានការផឹកស៊ីជួបជុំបងប្អូនជុំគ្នា ក៏បានយក ធុងបាសមកចាក់ស្ដាប់លេងជុំគ្នា ( ម្ចាស់ធុងបាស់ឈ្មោះ សឿប ពិសិដ្ឋ អាយុ ២២ឆ្នាំ រស់នៅក្នុងភូមិកើតហេតុខាងលើ ) រហូតដល់ម៉ោង ១០ និង១០នាទី ក៏មានក្មេង ២នាក់ មករាំលេងមុខធុងបាស លើរ៉ឺម៉ក់ដែលដាក់ធុងបាសពីលើ
-ក្មេងទី១ ឈ្មោះ ជ្រឿន ថវិន(ហៅ លី) អាយុ ៧ឆ្នាំ រស់នៅភូមិជុំគ្នា
-ក្មេងទី២ ឈ្មោះ ជុល ឧត្តម ជនរងគ្រោះ (សព)។

សមត្ថកិច្ចបាទបញ្ជាក់ថា លុះម៉ោង ១០និង២០នាទី ក្មេងទាំងពីរនាក់នោះបានឡើងរាំ លើកន្ទុយរ៉ឺម៉ក់ ដែលដឹកធុងបាសនោះ ស្រាប់តែរ៉ឺម៉ក់ បានបះមកក្រោយ ហើយធុងបាស់ ដែលនៅពីលើរ៉ឺម៉ក បានដួលសង្កាត់លើក្មេងឈ្មោះ ជុល ឧត្តម ដួលសង្កាត់ចំក្បាលផ្ទៃខាងមុខ ក្រោយមកឈ្មោះ ឈឹង ម៉ន់ ក៏រត់ទៅលើកធុងបាស់ ហើយយកជនរងគ្រោះទៅ មន្ទីរពេទ្យ មណ្ឌលចាឈូក ពេលជិះទៅដល់ពេទ្យ ពេទ្យបានប្រាប់ថាក្មេងនេះដាច់ខ្យល់ស្លាប់បាត់ហើយ។

បើតាមសមត្ថកិច្ច ករណីនេះ មូលហេតុ បណ្តាលមកពីឪពុកម្តាយ ជនរងគ្រោះ ធ្វេសប្រហែសក្នុងការមើលកូន៕SRP

រថយន្តពាក់ផ្លាកលេខកម្ពុជា 1779 បុកម៉ូតូ នៅក្រុងសៀមរាម បណ្ដាលឱ្យស្លាប់បុរសម្នាក់យ៉ាងអាណោចអាធម្ម

ខេត្តសៀមរាប៖បុរសម្នាក់កំពុងជិះម៉ូតូត្រូវបានរថយន្តមួយគ្រឿងបុកចំពេញទំហឹងបណ្ដាលឱ្យស្លាប់យ៉ាងណាធម្ម។

ហេតុការណ៍បានកើតឡើង នៅវេ លាម៉ោង២១នុង៣០នាទី ថ្ងៃទី​១៤​ ខែមេសា​ ឆ្នាំ​២០២៤​ នៅចំណុច ខាងត្បូងឱសថស្ថាន សុភមង្គល៥០ម៉ែត្រភូមិវិហាចិន សង្កាត់ស្វាយដង្គុំ ក្រុងសៀមរាប ខេត្តសៀមរាប​ លើផ្លូវពីផ្សារក្រោមទៅផ្លូវបំបែកត្រៀក​ រវាងរថយន្តនិងម៉ូតូ។

សមត្ថកិច្ចបានប្រាប់ «ទីភ្នាក់ងារសារព័ត៌មានសៀមរាប ប៉ុស្តិ៍» នៅថ្ងៃចន្ទនេះថា៖ គ្រោះថ្នាក់ចរាចរណ៍នេះ រថយន្តមួយគ្រឿងម៉ាក Toyota landcruiser ពណ៌ខ្មៅពាក់ផ្លាកលេខកម្ពុជា R.J.1779 បើកបរដោយឈ្មោះ ខាណាហ្គារ៉ាច ណាវ៉ារ៉ាច ភេទ ប្រុសអាយុ ៤៥ឆ្នាំសញ្ជាតិខ្មែរ រស់នៅភូមិសាលាកន្សែងសង្កាត់ស្វាយដង្គំ ក្រុងសៀមរាប ខេត្តសៀមរាប ទិសដៅពីជើង ទៅត្បូង បានបុកម៉ូតូមួយគ្រឿងម៉ាកHONDAពណ៌ ខ្មៅផ្លាកលេខ 1AD -6237 សៀមរាប បើកបរដោយឈ្មោះ ពែក ភារម្យ ភេទប្រុស អាយុ ១៩ឆ្នាំ រស់នៅភូមិគោកក្រសាំង សង្កាត់ស្វាយដង្គំ ក្រុងសៀមរាប ទិសដៅពីត្បូងទៅជើង។

សមត្ថកិច្ចបានបន្តថា បន្ទាប់ពីមានហេតុការណ៍
រថយន្តម៉ាក Toyota landcriser ទៅបុកម៉ូតូមួយគ្រឿងម៉ាក HONDA ពណ៌ខ្មៅពាក់ស្លាក១ AH 9603 សៀមរាប ចតនៅលើផ្លូវខាងលិច​ ម្ចាស់ឈ្មោះឈឹម ចាន់រឹទ្ធី​ ភេទប្រុស​ អាយុ៣០​ រស់នៅភូមិស្ទឹងថ្មី​ សង្កាត់ស្វាយដង្គំក្រុងសៀមរាប។

សមត្ថកិច្ចបានបញ្ជាក់ថា គ្រោះថ្នាក់ចរាចរណ៍នេះ
បណ្ដាលឲ្យស្លាប់មនុស្សឈ្មោះពែក ភារម្យ
-រថយន្តខូចខាតធ្ងន់
-ម៉ូតូម៉ាកHONDA ពាក់ស្លាកលេខ ១ M ៦៧៣១ សៀមរាបខូចខាតធ្ងន់
-ម៉ូតូម៉ាកHONDAពាក់ស្លាកលេខ១ AH៩៦០៣សៀមរាបខូចខាតស្រាល។

បើតាមសន្និដ្ឋាន របស់សមត្ថកិច្ច អ្នកបេីកបររថយន្តម៉ាក LAND CRUISERពាក់ស្លាកលេខកម្ពុជា R.J.1779បើកបរឡើងជែងខ្វះការប្រុងប្រយ័ត្ន៕SRP

ខេត្តសៀមរាប៖យ៉ាងហោចណាស់មនុស្សចំនួនន់6នាក់ បានរបួសធ្ងន់ស្រោល និងក្មេងអ្នកបានស្លាប់ក្នុងហេតុការណ៍ គ្រោះថ្នាក់ ចរាចរណ៍ចំនួន 3 ករណីនៅថ្ងៃអាទិត្យម្សិលមិញ។

ករណីទី 1 នៅថ្ងៃទី១៤ ខែមេសា ឆ្នាំ២០២៤ វេលាម៉ោង១៧និង៥៥នាទី លើផ្លូវជាតិលេខ៦ ចំណុចផ្លូវបំបែកសាលា JPA ភូមិខ្នាត ឃុំខ្នាត ស្រុកពួក ខេត្តសៀមរាប បង្កខ្លួនឯងបុករនាំងដែកអមផ្លូវ)។

ម៉ូតូ ម៉ាកហុងដាឌ្រីម ពណ៌ខ្មៅ ផលិតឆ្នាំ២០២២ ព៌ណខ្មៅ ពាក់ផ្លាកលេខ សៀមរាប1AP-4806 បើកបរដោយ ឈ្មោះ បុង យី ភេទប្រុស អាយុ២៣ឆ្នាំ (មានពាក់មួកសុវត្ថិភាព) នៅភូមិខ្វៀន សង្កាត់គោកចក ក្រុងសៀមរាប  ខេត្តសៀមរាប ដឹកមនុស្ស ០២នាក់ ១/ឈ្មោះ សា សួន ភេទស្រី អាយុ២៤ឆ្នាំជាប្រពន្ធ (គ្មានមួកសុវត្ថភាព) ២/ឈ្មោះ យី សាយ័ន្ត ភេទស្រី អាយុ០៣ខែ ជាកូន បើកបរទិសដៅពីលិចទៅកើត ដល់ចំណុចកើតហេតុបានរ៉េចង្កូតទៅបុករនាំងដែកអមផ្លូវខាងត្បូង។
* ករណីនេះបណ្តាលអោយ៖
-ស្លាប់ មនុស្ស១នាក់ឈ្មោះ យី សាយ័ន្ត ពេលបញ្ជូនទៅមន្ទីពេទ្យបង្អែកស្រុកពួក។
-របួសស្រាល ០២នាក់
១.ឈ្មោះ បុង យី
២.ឈ្មោះ សាន សួន
ខូចខាត៖ម៉ូតូ០១គ្រឿង(ស្រាល) ។មូលហេតុ៖ អ្នកបើកបរម៉ូតូបើកបរក្នុងស្ថានភាពងងុយដេក។

ទី2 វេលាម៉ោង១៥និង៥០នាទីរសៀល
ថ្ងៃទី១៤ ខែមេសា ឆ្នាំ២០២៤ រវាងម៉ូតូ និងម៉ូតូ ត្រង់ចំណុចលូខាងត្បូងភូមិតាពេជ ចម្ងាយ២០មែត្រ ស្ថិតនៅភូមិតាពេជ ឃុំស្នួល បើកបរក្នុងទិសដៅបញ្ចា្រស់ទិសគ្នា។ ម៉ូតូមួយគ្រឿង ម៉ាកហុងដាទ្រីម C125 ពណ៌ខ្មៅ ស៊េរីឆ្នាំ2022 គ្មានស្លាកលេខ បើកបរដោយឈ្មោះ ដឿប សីហាភេទប្រុស អាយុ19ឆ្នាំ និងអ្នកជិះពីក្រោយឈ្មោះប៊ៀន ខុង ភេទប្រុស អាយុ10ឆ្នាំ អ្នកទាំងពីរនាក់ខាងលើរស់នៅភូមិសង្កែ ឃុំស្នួល (ពុំបានពាក់មួកសុវត្ថិភាពទាំងពីរនាក់) បើកបរក្នុងទិសដៅពីជើង ទៅត្បូង បានបុកម៉ូតូ ម៉ាកហុងដាទ្រីម C110 ពណ៌ខ្មៅ ស៊េរី1999 គ្មានស្លាកលេខ បើកបរដោយឈ្មោះ ផៃ ភឿយ ភេទប្រុស អាយុ42ឆ្នាំ  រស់នៅភូមិសង្កែ ឃុំស្នួល (ពុំបានពាក់មួកសុវត្ថិភាព ) ក្នុងទិសដៅពីត្បូងទៅជើង។
 បណ្តាលអោយ រងរបួសធ្ងន់០១នាក់ និងស្រាល០១នាក់៖
១.ឈ្មោះដឿប សីហា រងរបួសធ្ងន់ បាក់កជើងស្តាំ និងបែកចិញ្ចើមខាងឆ្វេង
២.ឈ្មោះផៃ ភឿយ  រងរបួសបែកក្បាលផ្នែកខាងក្រោយ និងហើមថ្ពាល់ស្តាំ
– ខូចខាតស្រាល ម៉ូតូ ០២គ្រឿង។មូលហេតុគ្រោះថ្នាក់បណ្តាលមកពីអ្នកបើកបរម៉ូតូ ម៉ាកហុងដាគ្មានស្លាកលេខ មានល្បើនលឿន និងមិនប្រកាន់ស្តាំ។

ទី3 នៅវេលាម៉ោង១៣និង២០នាទីថ្ងៃទី១៤ ខែ មេសា ឆ្នាំ២០២៤ នៅភូមិថ្នល់ ឃុំតាសោម ស្រុកអង្គរជុំ ខេត្តសៀមរាប លើផ្លូវកៅស៊ូលេខ ២០២ ពីស្រុកអង្គរជុំ ទៅស្រុកពួក រវាងម៉ូតូនិងរថយន្ត។

ម៉ូតូម៉ាក ហុងដាឌ្រីមឆ្នាំ២០១៩ ពណ៌ខ្មៅ ផ្លាកលេខ សៀមរាប 1AD-7172 បើកបរដោយឈ្មោះ ឈំ ខ្វាង ភេទ ប្រុស អាយុ២៤ឆ្នាំ (បាក់ដៃឆ្វេង) ទីលំនៅភូមិ ល្អក់ ឃុំ កណ្តែក ប្រាសាទបាគង ខេត្តសៀមរាប (មានពាក់មួកការពារ មានផឹកគ្រឿងស្រវឹង)  ទិសដៅពីជើងទៅត្បូង រួមដំណើរដោយមនុស្ស០២នាក់ ឈ្មោះ ឈួន ស្រីពៅ ភេទស្រី អាយុ ២៤ឆ្នាំ (បាក់ជើងឆ្វេង) (មានពាក់មួកការពារ ត្រូវជាប្រពន្ធ) និងឈ្មោះ ខ្វាង កញ្ចនា ភេទ ស្រី អាយុ០២ឆ្នាំ(កូន) បានបុក
រថយន្ត០១គ្រឿងម៉ាក TOYOTA PRIUS ឆ្នាំ ២០០៤ ពណ៌ទឹកប្រាក់ ផ្លាកលេខ ភ្នំពេញ 2AC-6236 បើកបរដោយឈ្មោះ ស៊ឹង ហ៊ន់ ភេទប្រុស អាយុ៤៤ឆ្នាំ ទីលំនៅភូមិតាម៉ៅ ឃុំបឹងព្រះ ស្រុកបាភ្នំ ខេត្តព្រៃវែង ទិសដៅពីត្បូង ទៅជើង រួមដំណើរដោយមនុស្ស០៣នាក់៖

ឈ្មោះ រ៉ា ឡាត់ ភេទស្រី អាយុ ៤៣ ឆ្នាំ(ត្រូវជាប្រពន្ធ) ឈ្មោះ ហ៊ន់ សីហាក់ ភេទប្រុស អាយុ១៥(ត្រូវជាកូន) ឈ្មោះ ហ៊ន់ សីឡាក់ ភេទស្រី អាយុ១១ឆ្នាំ(ត្រូវជាកូន។

មូលហេតុ៖ អ្នកបើកបរម៉ូតូ  បើកបរក្នុងស្ថានភាពស្រវឹង(ជាតិអាកុល 0.54mg/L)និង ល្បឿនលឿនខ្វះការប្រុងប្រយ័ត្ន៕SRP

សម្ដេចហ៊ុន ម៉ាណែត៖ ស្ថាប័នពាក់ព័ន្ធ ថ្នាក់ក្រោមជាតិ និងពលរដ្ឋ អាចរាយការណ៍អំពីការបូមខ្សាច់ អនាធិបតេយ្យ មកក្រសួងរ៉ែ គ្រប់ពេលវេលា

ភ្នំពេញ៖សម្ដេចហ៊ុន ម៉ាណែត៖ក្រសួង ស្ថាប័នពាក់ព័ន្ធ ថ្នាក់ក្រោមជាតិ និងពលរដ្ឋ អាចរាយការណ៍អំពីការបូមខ្សាច់ អនាធិបតេយ្យ មកក្រសួងរ៉ែ និងថាមពលគ្រប់ពេលវេលា។

នេះបើតាមសេចក្ដីសម្រេច ស្ដីពី ការកំណត់គោលការណ៍ គ្រប់គ្រងនិងការធ្វើអាជីវកម្មធនធានខ្សាច់ ដែលចុះហត្ថលេខាដោយ សម្ដេចធិបតីនាយយករដ្ឋមន្ត្រីហ៊ុន ម៉ាណែត៕SRP

ភ្នំពេញ៖ថ្លែងក្នុងពិធីបិទសន្និបាតបូកសរុបការងារឆ្នាំ២០២៣ និងលើកទិសដៅការងារឆ្នាំ២០២៤ នៅរសៀល ថ្ងៃពុធម្សិលមិញ សម្ដេចធិបតី ហ៊ុន ម៉ាណែត នាយករដ្ឋមន្ត្រី  បានមានប្រសាសន៍ថា រាជរដ្ឋាភិបាលបានចំណាយ «ថវិកាជាតិ ប្រមាណជាង៣០០លានដុល្លារអាមេរិក» សម្រាប់ធ្វើគម្រោងរំដោះទឹកជំនន់នៅតាមទីប្រជុំជននានា ក្នុងរាជធានីភ្នំពេញ ដើម្បីបញ្ជៀសទឹកកុំឲ្យបុកចូលក្នុងភ្នំពេញ និងដោះស្រាយប្រព័ន្ធទឹកនៅក្នុងរាជធានីដែលមានស្រាប់ ពោលគឺ ស្តារប្រព័ន្ធលូរ ដោយលូណាចាស់ និងតូចត្រូវផ្លាស់ប្តូរ។

សម្តេចហ៊ុន ម៉ាណែត សម្រេចឱ្យអនុវត្តគម្រោងតម្លៃប្រមាណ ជាង៣០០លានដុល្លារ ដើម្បីដោះស្រាយបញ្ហាទឹកលិចភ្នំពេញ បន្ទាប់ពីគម្រោងនេះបានកំពុងដំណើរការជាបណ្តើរៗ ដោយធ្វើការផ្លាស់ប្តូរប្រព័ន្ធលូពីតូចទៅធំ និងជីក ប្រព័ន្ធលូរថ្មីបន្ថែមទៀត។

សម្តេចហ៊ុន ម៉ាណែត បន្ថែមថា បញ្ហាទឹកជំនន់នៅក្នុងរាជធានីភ្នំពេញត្រូវ តែដោះស្រាយឲ្យបានទាន់ពេលវេលា ដោយត្រូវបង្កើនឧបករណ៍បន្ថែមជាពិសេសគឺស្ថានីយ៍បូមទឹក។

សម្តេចហ៊ុន ម៉ាណែត បានបញ្ជាក់ថា គម្រោងដែលបានចំណាយនេះគឺភាគច្រើនពាក់ ព័ន្ធទៅនឹងការស្តាប្រឡាយដែលមានស្រាប់ ដោយក្នុងនោះគឺមានចំនួន០៣កន្លែងធំៗ៖ ទី១-ពីទំនប់រលាំងជ្រៃ មកព្រែកហូរតាខ្មៅដោយមានចម្ងាយជាង២៦០គីឡូម៉ែត្រ និងស្ទឹងតូចៗជាង១០ទៀត រួមទាំងការធ្វើស្ថានីយ៍បូមទឹកថ្មីចំនួនបួនកន្លែងទៀត ខណៈគម្រោងទាំងនេះគឺធ្វើយ៉ាងណាកុំឲ្យទឹកជំនន់បុកចូលរាជធានីភ្នំពេញបន្តទៀត។ ទី២-គម្រោងជុសជុលកែលម្អរ ស្តារប្រព័ន្ធស្រោចស្របរំដោះទឹកពីភាគនារតីភ្នំពេញដែល ក្នុងនោះគឺស្តាអនុគម្រោងនៅច្បារមន ខេត្តកំពង់ស្ពឺ និងអនុគម្រោងនៅខេត្តកណ្តាល។

ទី៣-គ្រោងប្រព័ន្ធស្រោចស្របការពារទឹកជំនន់ស្ទឹងព្រែកត្នោត ដោយធ្វើការស្តារប្រឡាយជាច្រើននៅតំបន់នោះដល់ ស្ទឹងព្រែកហូរ តាខ្មៅជាដើម ។

ជាមួយគ្នានេះ សម្តេចធិបតី ហ៊ុន ម៉ាណែត បានណែនាំឲ្យក្រសួងធនធានទឹក និង ឧតុនិយម ត្រូវបន្តពង្រីកសក្តានុពលប្រភពផ្គត់ផ្គង់ទឹក តាមរយៈការកសាងទំនប់អាងស្តុកទឹក និង ប្រព័ន្ធចែកចាយទឹកប្រកបដោយគុណភាព និងជឿទុកចិត្តបាន ដោយផ្អែកលើការសិក្សាប្រកបដោយលក្ខណៈវិទ្យាសាស្រ្ត ដើម្បីធានាបាននូវការផ្គត់ផ្គង់ទឹកគ្រប់គ្រាន់ ដល់ការប្រើប្រាស់ទឹកស្អាតប្រចាំថ្ងៃ និង សម្រាប់បម្រើឱ្យផលិតកម្មលើគ្រប់វិស័យ ក៏ដូចជាជួយដល់ការកាត់បន្ថយគ្រោះទឹកជំនន់ និង គ្រោះរាំងស្ងួតផងដែរ៕SRP