កឧត្តម អ៊ុន ចាន់ដា អភិបាលខេត្តកំពង់ចាម នៅព្រឹកមិញនេះ បានអញ្ជើញប្រគល់អំណោយបន្ត ដើម្បីបញ្ជូនទៅឧបត្ថម្ភជូនកងពលតូចអន្តរាគមន៍លេខ៦ ដែលជាកងពលសម័្ពន្ធមេត្រីភាព ប្រចាំការនៅដែនកម្ពុជា-ថៃ។

ពិធីនេះត្រូវបានធ្វើឡើងនៅ សាលាខេត្តកំពង់ចាម ពោរពេញដោយស្មារតី ជាតិនិយម និងការគាំទ្រដល់កងទ័ព ក្នុងគោលបំណងបង្ហាញនូវការ ដឹងគុណយ៉ាងជ្រាលជ្រៅ ចំពោះការលះបង់ដ៏ធំធេងរបស់វីរកងទ័ពកម្ពុជា។

ឯកឧត្តម អ៊ុន ចាន់ដា បានថ្លែងការកោតសរសើរ ចំពោះស្មារតីវីរភាព កងទ័ពដែលបានបង្ហាញនូវភាពក្លាហាន និងការលះបង់ខ្ពស់បំផុត ក្នុងការការពារទឹកដីដែលជាកេរដំណែលដូនតា។ ឯកឧត្តមបានគូសបញ្ជាក់ថា ការប្រយុទ្ធរបស់កងទ័ព គឺជាការបំពេញភារកិច្ចដ៏ថ្លៃថ្លាបំផុត ក្នុងនាមជាកូនខ្មែរ ហើយរដ្ឋបាលខេត្តកំពង់ចាមតែងតែនៅជាមួយ និងគាំទ្រកងទ័ពជានិច្ច។

ឯកឧត្តម អភិបាលខេត្ត បានជំរុញឱ្យកងទ័ពបន្តរក្សា សាមគ្គីភាព វិន័យ និងប្រុងប្រយ័ត្នខ្ពស់ ដើម្បីទប់ទល់នឹងសត្រូវ និងការពារបាននូវទឹកដីគ្រប់ចំណុច និងវាយតម្លៃខ្ពស់ចំពោះ ការលះបង់របស់វីរកងទ័ពគ្រប់រូប ដែលបានខិតខំប្រឹងប្រែងការពារ បូរណភាពទឹកដី។

អំណោយដែលបានប្រគល់ជូនតំណាងវីរកងទ័ពកងទ័ព រួមមាន៖
-ថវិកាសរុប ចំនួន ៥០.០០០.០០០រៀល ត្រីខកំប៉ុង ចំនួន ១៥០កេសធំ ខ្ទឹមសរ ចំនួន ២០០ គីឡូក្រាម អំបុកខ្មែរ និងសាច់ផាត់ ចំនួន ២.០០០កញ្ចប់ ស្មើនឹង ២.០០០គីឡូក្រាម ឆៃពៅ ចំនួន ២៥០ គីឡូក្រាម ត្រសក់ចាវ ចំនួន ២៥០គីឡូក្រាម ត្រីប្រឡាក់ ចំនួន២.០០០គីឡូក្រាម ប្រេងឆារ ចំនួន ១.៥០០ លីត្រ ស្ករសរ ចំនួន ២០០គីឡូក្រាម អំបិល ចំនួន ៥០០គីឡូក្រាម ប៊ីចេង ចំនួន១០០គីឡូក្រាម អង្ករចំនួន ១០តោន មី ចំនួន ៥០០កេស សូឡាចំនួន ៥០ឈុត ទឹកសុទ្ធចំនួន ៣០០កេស ភេសជ្ជៈ ចំនួន ២០០កេស ទឹកតី ចំនួន ១០០យូរ ទឹកស៊ីអីវ ចំនួន ១០០យួរ សៀងចំនួន ៧០យួរ បាយក្តាំង ចំនួន ២.០០០កញ្ចប់ ពងទាសាប ចំនួន ១.៤០០គ្រាប់ ពងទាប្រៃ ចំនួន ៣០០គ្រាប់ សាច់ក្រក ចំនួន ៣០គីឡូក្រាម ត្រីងៀត ចំនួន ១៩០គីឡូក្រាម នំចំរុះ មួយចំនួនធំ ព្រមទាំង ថ្នាំពេទ្យមួយចំនួន និងបន្លែ ផ្លែឈើ និងសាច់ស្រស់ មួយចំនួនធំ ផងដែរ៕SRP

សម្ដេចតេជោហ៊ុន សែន ជូនយោបល់ទៅកាន់នាយករដ្ឋមន្ត្រីនិងរាជរដ្ឋាភិបាលពិចារណាលើការផ្អាករាល់ការធ្វើដំណើររបស់ប្រជាជនកម្ពុជានិងប្រជាជនថៃឆ្លងកាត់ព្រំដែន

ភ្នំពេញ៖សម្ដេចតេជោហ៊ុន សែន នៅរសៀលថ្ងៃសៅរ៍នេះបានឱកាសថា បងប្អូនជនរួមជាតិជាទីគោរពស្រឡាញ់! ប៉ុន្មានថ្ងៃមកនេះកងទ័ពថៃបានឈ្លានពានវាយប្រហារនិងសម្លាប់ប្រជាជនកម្ពុជាដោយគ្មានការរើសមុខនិងរើសទីកន្លែង សូម្បីតែស្ពាន ថ្នល់សាលារៀន វត្តអារាមក៏ពួកគេប្រើ
កាំភ្លើងធំនិងយន្តហោះវាយបំផ្លាញ
ចោល។ផ្សែងពុលគ្រាប់បែកចង្កោម
ត្រូវបានប្រើប្រាស់ជាច្រើនកន្លែងរាប់
ទាំងកន្លែងដែលមានពលរដ្ឋថៃរស់នៅ
និងធ្វើការនៅក្នុងទឹកដីកម្ពុជាផងដែរ។

ក្នុងសភាពការណ៍បែបនេះក្នុងនាមប្រធានព្រឹទ្ធសភា ប្រធានក្រុមឧត្តមប្រឹក្សាផ្ទាល់ព្រះមហាក្សត្រនិងជាប្រធានគណបក្សកាន់អំណាច ខ្ញុំសូមជូនយោបល់ទៅកាន់នាយករដ្ឋមន្ត្រីនិងរាជរដ្ឋាភិបាលពិចារណាលើការផ្អាករាល់ការធ្វើដំណើររបស់ប្រជាជនកម្ពុជានិងប្រជាជនថៃឆ្លងកាត់ព្រំដែន។

ពលរដ្ឋកម្ពុជាដែលកំពុងស្ថិតក្នុងប្រទេសថៃត្រូវបន្តរស់នៅនិងធ្វើការនៅក្នុងប្រទេសថៃនិងពលរដ្ឋថៃដែលកំពុងរស់នៅនិងធ្វើការនៅកម្ពុជាត្រូវបន្តស្ថិតនៅកម្ពុជារហូតបទឈប់បាញ់ត្រូវបានអនុវត្តពេញលេញ។ វិធានការនេះគឺដើម្បីធានាសុវត្ថិភាពប្រជាជនកម្ពុជានិងប្រជាជនថៃកុំឲ្យមានគ្រោះថ្នាក់ពេលធ្វើដំណើរពិសេសពេលធ្វើដំណើរឆ្លងកាត់ព្រំដែន។

សូមប្រជាជនកម្ពុជាដែលកំពុងរស់នៅ
ប្រទេសថៃនិងប្រជាជនថៃមេត្តាយោគយល់។
សូមរាជរដ្ឋាភិបាលកម្ពុជាជួយការពារ
សុវត្ថិភាពប្រជាជនថៃដែលកំពុងរស់នៅកម្ពុជាកុំឲ្យពួកគេរងគ្រោះដោយសារគ្រាប់កាំភ្លើងឬគ្រាប់បែកឬ
ផ្សែងពុលរបស់ថៃ៕SRP

ក្រសួងសាធារណការ ប្រកាសថាត្រៀមស្ដារ(ស្ពានមេទឹក)ឡើងវិញ ដែលត្រូវកងទ័ពថៃ ប្រើយន្តហោះបាញ់ផ្តាច់

រដ្ឋមន្ត្រីក្រសួងសាធារណការ និងដឹកជញ្ជូនឯកឧត្ដម ប៉េង ពោធិ៍នា បានប្រជុំជាមួយក្រុមការបច្ចេកទេសផ្លូវ-ស្ពាន និងបានត្រៀមខ្លួនរួចរាល់ ដើម្បីស្តារឡើងវិញស្ពានជ័យជំនះ (ស្ពានមេទឹក) ដែលត្រូវកងទ័ពឈ្លានពានថៃ ប្រើយន្តហោះបាញ់ផ្តាច់កាលពីព្រឹកព្រលឹមថ្ងៃទី១៣ ខែធ្នូ ឆ្នាំ២០២៥នេះ។

នៅចំពោះស្ថានភាពបែបនេះ យើងរង់ចាំការអនុញ្ញតិពីសមរភូមិមុខ ដើម្បីចូលជួសជុល ធ្វើផ្លូវវាង ធានាការតភ្ជាប់ សម្រួលដល់ការចរាចរណ៍ឡើងវិញ។

លក្ខណៈស្ពាន៖ស្ពានជ័យជំនះ (ស្ពានមេទឹក) ត្រូវបានស្ថាបនាជាស្ពានបេតុង (ប្រេកុងត្រាំង) ដែលតភ្ជាប់ពីត្រើយម្ខាងទៅម្ខាងទៀតនៃស្ទឹងមេទឺក ស្ថិតលើផ្លូវជាតិលេខ៥៥ ត្រង់គីឡូម៉ែត្រលេខ ១៦៩+៤០០ មានប្រវែង ១៨០ម៉ែត្រ ទទឹង ១០ម៉ែត្រ ។

ស្ពាននេះ ចែកចេញជា៨ប្រឡោះ ដែលប្រឡោះនីមួយៗមានប្រវែង២០ម៉ែត្រ ស្ថាបនារួចក្នុងឆ្នាំ២០១៨ ដោយក្រុមហ៊ុនចិន CRBC។

ស្ពាននេះ មានចំងាយពីព្រំដែនប្រហែល ៨,៥គីឡូម៉ែត្រគិតតាមចំងាយផ្លួវបត់បែន និងប្រហែល៥គីឡូម៉ែត្រជាចំងាយត្រង់ពីព្រំដែន ដែលជាច្រកងាយស្រួលតែមួយគត់ ភ្ជាប់ទៅប្រជុំជនថ្មដា ស្រុកវាលវែង៕SRP

ក្រសួងមហាផ្ទៃ ផ្អាកការងារជាបណ្តោះអាសន្នចំពោះឧត្តមសេនីយ៍ទោ គង់ វុទ្ធី អគ្គនាយករង នៃអគ្គនាយកដ្ឋានអត្តសញ្ញាណកម្ម ដើម្បីបន្តដំណើរការស្រាវជ្រាវបន្ថែម!

ក្រោមពាក្យស្លោក «អំបុកស្រូវថ្មី វាយសត្រូវឈ្លានពាន» អភិបាលខេត្តកំពង់ចាម បន្ថែមអំបុកស្រូវថ្មី ចំនួន ៥ពាន់កញ្ចប់ ចែកជូនដល់វីរៈកងទ័ពជួរមុខ

ឯកឧត្តម អ៊ុន ចាន់ដា អភិបាលខេត្តកំពង់ចាម ថ្លែងថា ក្រោមពាក្យស្លោករបស់សម្ដេចតេជោ «អំបុកស្រូវថ្មី វាយសត្រូវឈ្លានពាន» រដ្ឋបាលខេត្តកំពង់ចាមត្រៀមរៀបចំបន្ថែម អំបុកស្រូវថ្មី ចំនួន ៥ពាន់កញ្ចប់ ស្មើនឹង ៥ពាន់គីឡូក្រាម រួមទាំងដាក់បញ្ចូលនូវសាច់ផាត់ ដើម្បីយកទៅចែកជូនដល់វីរៈកងទ័ពកម្ពុជា កំពុងប្រយុទ្ធតបទល់ជាមួយយោធាថៃ។

ថ្លែងបែបនេះក្នុងកិច្ចប្រជុំសាមញ្ញលើកទី១៩ អាណត្តិទី៤ របស់ក្រុមប្រឹក្សាខេត្តកំពង់ចាម នាព្រឹកថ្ងៃទី១១ ខែធ្នូ ឆ្នាំ២០២៥ នៅសាលប្រជុំសាលាខេត្តកំពង់ចាម។

ឯកឧត្តមអភិបាលខេត្ត ក៏សូមអំពាវនាវដល់ ប្រជាពលរដ្ឋទាំងអស់ ចូលរួមបរិច្ចាគជាវិភាគទានផ្តល់ជាអំណោយ តាមការស្ម័គ្រចិត្តទោះតិចក្តីច្រើនក្តី ដូចជា៖ ថវិកា សម្ភារ គ្រឿងឧបភោគបរិភោគ ថ្នាំពេទ្យ ជាដើម ដើម្បីរដ្ឋបាលខេត្ត នាំយកអំណោយទាំងនោះ ទៅឧបត្ថម្ភដល់វីរៈកងទ័ពកម្ពុជាដែលកំពុងឈរ ជើងតាមខ្សែបន្ទាត់ព្រំដែន ត្រៀមជួរមុខ និងចែនជូនដល់ប្រជាពលរដ្ឋដែលជម្លៀសខ្លួនចេញពីលំនៅឋាន ដើម្បីគេចចេញពីការវាយប្រហារ ពីសំណាក់យោធាថៃ។

ឯកឧត្តម អ៊ុន ចាន់ដា បន្តថា សម្រាប់ទីតាំងកន្លែងទទួលអំណោយមាន៖ ១.នៅផ្សារបឹងកុក, ២.នៅបេនឡានផ្សារធំកំពង់ចាម ,៣.នៅសួនមាត់ទន្លេ (ស្លាក កំពង់ចាម), ៤.ភូមិរការ( វិហារឥស្លាម), ៥.ទីតាំងធំ សាលាខេត្តកំពង់ចាម៕SRP

អភិបាលខេត្តសៀមរាប ថ្លែងអំណរគុណលោក ពាក់ មី នាំអំណោយពីក្រុមផ្ការីកគ្រប់រដូវចូលរួមឧបត្ថម្ភជូនដល់សមរភូមិមុខ គ្រួសារទ័ព និងបងប្អូនជនភៀសសឹក

ខេត្តសៀមរាប៖ឯកឧត្តម ប្រាក់ សោភ័ណ អភិបាលខេត្តសៀមរាប សូមថ្លែងអំណរគុណយ៉ាងជ្រាលជ្រៅបំផុតចំពោះទឹកចិត្ត ដល់លោក ពាក់ មី ដែលនាំអំណោយពីក្រុមផ្ការីកគ្រប់រដូវ ចូលរួមឧបត្ថម្ភជូនដល់សមរភូមិមុខ គ្រួសារទ័ព និងបងប្អូនជនភៀសសឹក នៅថ្ងៃទី១០ ខែធ្នូ ឆ្នាំ២០២៥។

ក្នុងស្មារតីខ្មែរជួយខ្មែរ ប្រកបដោយទឹកចិត្តស្មោះសររបស់សប្បុរសជន ឯកឧត្តម ប្រាក់ សោភ័ណ អភិបាលខេត្តសៀមរាប ក្នុងនាមរដ្ឋបាលខេត្តសៀមរាប សូមថ្លែងអំណរគុណយ៉ាងជ្រាលជ្រៅបំផុតចំពោះទឹកចិត្តដ៏ថ្លៃថ្លា ក៏ដូចជាបងប្អូនប្រជាពលរដ្ឋ ដែលជាសប្បុរជនក្នុងខេត្ត និងក្រៅខេត្ត ដែលបានចូលរួមឧបត្ថម្ភគាំទ្រដល់សមរភូមិជួរមុខ គ្រួសារទ័ព និងប្រជាជនដែលបានជម្លៀសពីតំបន់សមរភូមិចូលមកភូមិសាស្ត្រខេត្តសៀមរាប ដោយទឹកចិត្តស្មោះសរក្នុងការរួបរួមជាតិខ្មែរជាធ្លុងមួយដោយស្មារតីខ្មែរជួយខ្មែរក្នុងគ្រាលំបាក។

សូមជម្រាបថា រដ្ឋបាលខេត្តសៀមរាប បានទទួលអំណោយពីក្រុមផ្ការីកគ្រប់រដូវ ដឹកនាំដោយ លោក ពាក់ មី ដែលបានចូលរួមឧបត្ថម្ភជូនដល់សមរភូមិមុខ គ្រួសារទ័ព និងបងប្អូនជនភៀសសឹក រួមមាន៖ មុង១៩៩ អាវចំរុះឈុត៦៩៧ និង៦៩៨ដុំ សារ៉ុង៥០ ខ្នើយ២០ កន្ទេល ២៦១ដុំ មី ១៨៦៤កេស ត្រីខ ៦៧៦កេស ត្រីងៀត ១៧០គីឡូ អង្គរ ១៥០គីឡូ ទឹកត្រី ១៦ដប ទឹកស៊ីអ៉ីវ ២២យួរ ទឹកសុទ្ធ ១២០០កេស សាប៊ូដុសខ្លួន ៣០០ដុំ នំចំរុះ ស្ករគ្រាប់ ១៨ប្រអប់ និង ២កេស កាហ្វេ ៤កញ្ចប់ ទឹកដោះគោជូរ ៥០កេស តង់៤x៦ ១៨២ដុំ តង់បោះជំរុំ ២តង់ អង្រឹង៩០ ភួយ៨៩២ ក្រមា ៩២ដុំ មួក១៣០ កន្សែង ១០៤ដុំ សំឡីអនាម័យ ២៤ដុំ ខោទឹកនោម ៤១ដុំធំ ផ្លិត៦០ ថង់ក្រណាត់ ៣៩ថង់ ធូបមូស ១កេស និង១០ប្រអប់ នំប៉័ងសសរ៥០ អំបុក ៦២កញ្ចប់ ស្ករគ្រាប់ ៣ប្រអប់ កំប៉ុងទឹកដោះគោ ១២០កំប៉ុង សាច់ក្រក ៨,៥គីឡូ ឆៃប៉ូវប្រៃ ១គីឡូ សាតេសញ្ញាក្តាម ១៨០កញ្ចប់ ត្រីផាត់ ៤០កញ្ចប់ ពងទា ៤៥០គ្រាប់ សៀងឆា ៣០កំប៉ុងតូច ត្រសក់ចាវឆា ១៦កំប៉ុងតូច ប្រហិត និងប៉ាតេ ២កេសធំ៕SRP

ឯកឧត្តម អ៊ុន ចាន់ដា អភិបាលខេត្តកំពង់ចាម នឹងរៀបចំអំបុកស្រូវថ្មី ចំនួន ១.០០០កញ្ចប់ ក្នុងមួយកញ្ចប់ ១គីឡូក្រាម រួមទាំងដាក់បញ្ចូលនូវសាច់ផាត់ ដើម្បីគាំទ្រដល់វីរៈកងទ័ពកម្ពុជា ដែលកំពុងទប់ទលជាមួយចោរឈ្លានពានទឹកដី ក្រោមពាក្យស្លោករបស់សម្ដេចតេជោ «ទទួលទានអំបុកស្រូវថ្មី វាយសត្រូវឈ្លានពាន»។

ថ្លែងបែបនេះ នារសៀលថ្ងៃទី១០ ខែធ្នូ ឆ្នាំ២០២៥ នៅក្នុងកិច្ចប្រជុំជាមួយក្រុមការងាររៀបចំទទួលអំណោយ ដើម្បីយកទៅចែកជូនដល់វីរៈកងទ័ពជួរមុខ ដែលបាននឹងកំពុងតស៊ូ ការពារបន្ទាត់ព្រំដែនកម្ពុជា-ថៃ។

លើសពីនេះ ឯកឧត្តម អ៊ុន ចាន់ដា អភិបាលខេត្ត បានណែនាំឲ្យក្រុមការងារ រៀបចំបន្ថែមគ្រឿងឧបភោគបរិភោគ សម្ភារ ប្រើប្រាស់នានា ព្រមទាំងថ្នាំពេទ្យ និងគ្រឿងសម្រាប់បរិភោគដែលមានទម្ងន់ស្រាលងាយស្រួលដាក់តាមខ្លួន ជូនចំពោះ វីរៈកងទ័ពកម្ពុជាដែលកំពុងឈរ ជើងនៅជួរមុខ ការពារទឹកដី និងមាតុភូមិនៃយើង។

ឯកឧត្តម អភិបាលខេត្ត បានបន្តថា ក្រៅពីនេះ អំណោយទាំងអស់របស់បងប្អូន សប្បុរសជនទាំងអស់ រដ្ឋបាលខេត្តនឹងចាត់ចែងបែងចែក ជូនដល់បងប្អូនប្រជាពលរដ្ឋដែលត្រូវ បានជម្លៀសខ្លួនមកកាន់មណ្ឌលសុវត្ថិភាព នានាក្នុងខេត្តព្រះវិហារ, ខេត្តឧត្តរមានជ័យ និងកងពលតូចអន្តរាគមន៍លេខ៦ ចំណុះកងពលធំអន្តរាគមន៍ លេខ២ ដែលជាកងពលសម្ព័ន្ធមេត្រីភាពជាមួយខេត្តកំពង់ចាម ផងដែរ៕SRP

លោកឧត្ដមសេនីយ៍ទោ​ គង់​ វុទ្ធី​ អាចប្រឈមមុខអស់ស័ក្តិ និងបណ្ដេញចេញពីក្របខណ្ឌ

យោងតាមប្រភព​ពី​មន្ត្រី​ជាន់ខ្ពស់​ក្រសួងមហាផ្ទៃ​មួយ​រូបបង្ហេីបថា​ បេី​ក្រសួង​មហាផ្ទៃ​ស្រាវជ្រាវឃេីញ​ដូចការ​ចោទប្រកាន់មែន​ លោកឧត្ដមសេនីយ៍ទោ​ គង់​ វុទ្ធី​ អាចប្រឈមមុខនឹងការ​ដកតួនាទី​ ដកឋានន្តរស័ក្តិ​និង​បណ្ដេញចេញ​ពីក្របខណ្ឌតែម្ដង​។

នេះបើតាមការបង្ហោះតាមរយៈទំព័រ facebook របស់លោកផែង វណ្ណៈ នៅរសៀលថ្ងៃពុធនេះ។

លោកផែង វណ្ណៈ បានសរសេរថា ទីបំផុត​ ឯកឧត្តម​អភិសន្តិបណ្ឌិ​ ស​ សុខា​ ឧបនាយករដ្ឋមន្ត្រី​ រដ្ឋមន្ត្រី​ក្រសួង​មហាផ្ទៃ​ នៅថ្ងៃទី​ ៩​ ខែ​ ធ្នូ​ ឆ្នាំ​ ២០២៥​ បាន​សម្រេច​ផ្អាក​ការងារ​ជាបណ្តោះអាសន្ន​ លោកឧត្ដមសេនីយ៍​ទោ​ គង់​ វុទ្ធី​ អគ្គនាយក​រង​ នៃ​ អគ្គនាយកដ្ឋាន​អត្តសញ្ញាណ​កម្ម​ ដេីម្បី​បន្តដំណេីរការស្រាវជ្រាវបន្ថែម​។​

ការផ្អាកការងារ​លោកឧត្ដម​សេនីយ៍ទោ​ គង់​ វុទ្ធី​ បាន​ធ្វេីឡេីង​ បន្ទាប់ពីលោកមាន​រឿង​អាស្រូវជាច្រេីន​ពាក់ព័ន្ធ​ករណី​ឆបោក​ជនរងគ្រោះ​មានទឹក​ប្រាក់រាប់លានដុល្លារ​។

ជុំវិញករណីនេះទីភ្នាក់ងារសារព័ត៌មានសៀមរាប ប៉ុស្តិ៍ មិនទាន់ទទួលបានការបំភ្លឺពីលោកឧត្ដមសេនីយ៍ទោ​ គង់​ វុទ្ធី​ បាននៅឡើយទេរហូតដល់ម៉ោងផ្សាយនេះ៕SRP

សម្ដេចតេជោហ៊ុន សែន៖ ទទួលទានអំបុកស្រូវថ្មីវាយសត្រូវឈ្លានពាន

ភ្នំពេញ៖សម្ដេចតេជោហ៊ុន សែន ប្រធានព្រឹទ្ធសភាជាតិកម្ពុជានៅព្រឹកថ្ងៃពុធនេះបានផ្ញើសារសាកសួរសុខទុក្ខចំពោះកងកម្លាំងប្រដាប់អាវុធគ្រប់ប្រភេទកំពុងឈរជើងការពារទឹកដីដ៏អង់អាចក្លាហាន។

តាមរយៈសារសម្ដេចតេជោហ៊ុន សែន បានបង្ហោះថា
សូមផ្តាំផ្ញើការសាកសួរសុខទុក្ខចំពោះកងកម្លាំងប្រដាប់អាវុធគ្រប់ប្រភេទដែលបាននិងកំពុងឈរជើងការពារទឹកដីដ៏អង់អាចក្លាហានដើម្បីប្រយុទ្ធប្រឆាំងជាមួយពួកចោរឈ្លានពានទឹកដី។

សូមចូលរួមការលំបាកជាមួយបងប្អូន
ប្រជាជនភៀសសឹកទាំងអស់ដែល
ភៀសខ្លួនដោយសារពួកចោរឈ្លានពាន។

សូមអរគុណចំពោះសប្បុរសជនដែល
បានចូលរួមជាសម្ភារៈថវិកាតាមរយៈ
រាជរដ្ឋាភិបាលក៏ដូចជាសប្បុរសជន
ដែលបានយកទៅចែកជូនផ្ទាល់ដល់
កងកម្លាំងប្រដាប់អាវុធនិងបងប្អូនជន
ភៀសសឹក។

ខ្ញុំបានឃើញសំណូមពរយុទ្ធជនម្នាក់ពី
សមរភូមិថាសុំជួយជាអំបុកល្អជាងជួយ
ជាមី។ខ្ញុំយល់ថាសំណូមពរនេះសមហេតុសមផលតែខ្ញុំយល់ថាការផ្តល់ជាមីនៅតែបន្តជាមួយនិងការផ្តល់
អំបុកបន្ថែម។

ស្រូវថ្មីកំពុងច្រូតកាត់សូមបងប្អូនសប្បុរសជនជួយទិញស្រូវធ្វើអំបុកឬជួយទិញអំបុកពីប្រជាជនយកទៅចែក
ជូនកងទ័ពឬជនភៀសសឹក។

សម្រាប់ការវេចខ្ចប់គួរធ្វើត្រឹមមួយកញ្ចប់១គីឡូឬ២គីឡូសម្រាប់យុទ្ធជនម្នាក់ៗយកតាមខ្លួន។ប្រសិនដាក់ជាបាវឬការ៉ុងលំបាកដល់ការចែកចាយនៅ
ខ្សែត្រៀមជួរមុខ។

ទទួលទានអំបុកស្រូវថ្មីវាយសត្រូវ
ឈ្លានពាន៕SRP

ខេត្តបាត់ដំបង៖ឯកឧត្តមសុខ លូ អភិបាលខេត្តបាត់ដំបង បានបញ្ជាក់ថា គិតត្រឹមរសៀលថ្ងៃទី០៩ ខែធ្នូ ឆ្នាំ២០២៥នេះស្រុកទាំង៤នៃខេត្តបាត់ដំបងជាប់ព្រំដែនថៃ មានសភាពស្ងប់ស្ងាត់ធម្មតា។

ឯកឧត្តម សុខ លូ បញ្ជាក់យ៉ាងដូច្នេះ ក្នុងឱកាស
អញ្ជើញដឹកនាំកិច្ចប្រជុំពង្រឹងគណៈបញ្ជាការឯកភាពរដ្ឋបាលស្រុក នៅតាមបណ្តាស្រុកជាប់ព្រំដែនកម្ពុជា-ថៃ ក្នុងភូមិសាស្រ្តខេត្តបាត់ដំបង នៅថ្ងៃទី៩ ខែធ្នូ ឆ្នាំ២០២៥ នេះ។

កិច្ចប្រជុំនេះគោលបំណងដើម្បីពង្រឹងគណៈបញ្ជាការឯកភាពរដ្ឋបាលស្រុកដើម្បីគ្រប់គ្រងស្ថានភាព និងរក្សាសុខសុវត្ថិភាពជូនបងប្អូនប្រជាពលរដ្ឋ។

ក្នុងកិច្ចប្រជុំនេះ ឯកឧត្តម សុខ លូ បានណែនាំដល់រដ្ឋបាលស្រុកជាប់ព្រំដែនអំពីការត្រៀមលក្ខណៈជម្លៀសប្រជាពលរដ្ឋទៅកាន់ទីកន្លែងសុវត្ថិភាពដែលរដ្ឋបាលខេត្តបានរៀបចំរួចជាស្រេចក្នុងករណីមានបញ្ហាប្រឈមកើតឡើង។

ឯកឧត្តម សុខ លូ ណែនាំមន្ត្រីជំនាញ អាជ្ញាធរពាក់ព័ន្ធនៅមូលដ្ឋាន ត្រូវយកចិត្តទុកដាក់ត្រួតពិនិត្យ ព្យាយាមក្តាប់ព័ត៌មានពិតទប់ស្កាត់ការផ្សព្វផ្សាយព័ត៌មានក្លែងក្លាយលើបណ្តាញសង្គមក្នុងខេត្តបាត់ដំបងនាំឱ្យពលរដ្ឋភាន់ច្រឡំ និងមានការភ័យខ្លាចដើម្បីបញ្ចៀសភាពចលាចលផ្សេងៗ។

សូមជម្រាបថាកងកម្លាំងយោធាថៃបានបើកការបាញ់ប្រហារមកលើកងកម្លាំងរបស់កម្ពុជានៅយោធភូមិភាគទី៤ នាថ្ងៃទី៨ ខែធ្នូ ឆ្នាំ២០២៥ ខណៈកងកម្លាំងកម្ពុជាបាននិងកំពុងបន្តឈរជើងយ៉ាងរឹងមាំក្នុងការបំពេញតួនាទីរបស់ខ្លួន ដើម្បីការពារបូរណភាពទឹកដីរបស់កម្ពុជា។

កម្ពុជាបញ្ជាក់ជាថ្មីនូវការប្តេជ្ញាចិត្តយ៉ាងខ្ជាប់ខ្ជួនក្នុងការគោរព និងអនុវត្តតាមលក្ខខណ្ឌនៃបទឈប់បាញ់ សេចក្តីថ្លែងការណ៍រួមស្តីពីកិច្ចព្រមព្រៀងសន្តិភាពរវាងកម្ពុជានិងថៃ ប្រកបដោយសុច្ឆន្ទៈ និងការទទួលខុសត្រូវខ្ពស់បំផុត។កម្ពុជាប្រកាន់ខ្ជាប់នូវការដោះស្រាយជម្លោះដោយសន្តិវិធី ស្របតាមច្បាប់អន្តរជាតិ ក៏ដូចជាសន្ធិសញ្ញា អនុសញ្ញា និងកិច្ចព្រមព្រៀងដែលមានស្រាប់ ហើយប្រឆាំងនឹងការគំរាម ឬការប្រើប្រាស់កម្លាំង សំដៅស្វែងរកដំណោះស្រាយមួយដែលយុត្តធម៌ ត្រឹមត្រូវ យូរអង្វែង និងស្របតាមច្បាប់អន្តរជាតិ៕SRP

សម្ដេចតេជោហ៊ុន សែន៖ កម្ពុជាត្រូវការសន្តិភាពតែកម្ពុជាបង្ខំចិត្តវាយតបតដើម្បីការពារទឹកដីយើង

ភ្នំពេញ៖ខាងក្រោមនេះជាសំណេរទាំងស្រុងរបស់សម្ដេចតេជោហ៊ុន សែន ប្រធានព្រឹទ្ធសភាជាតិកម្ពុជា៖ ក្រោយការអត់ធ្មត់លើស២៤ម៉ោងដើម្បីគោរពនូវបទឈប់និងត្រូវការពេលវេលាដើម្បីជម្លៀសប្រជាជនចេញមកតំបន់សុវត្តិភាព។

ល្ងាចម្សឹលមុិញយើងបានតបតបន្ថែម
ដោយយប់មុិញនិងព្រឹកនេះ។
តាមនាយករដ្ឋមន្ត្រីថៃអនុធីនបានប្រកាសថានិងប្រើកម្លាំងវាយយក១១ចំណុចដែលយើងមិនច្បាស់ថា
១១ចំណុចនេះនៅកន្លែងណាខ្លះ?
ដើម្បីងាយស្រួលកុំឲ្យលំបាករកកន្លែង
កងកម្លាំងប្រដាប់អាវុធគ្រប់ប្រភេទ
របស់យើងត្រូវវាយគ្រប់ចំណុចដែល
ខ្មាំងវាយចូល។
យើងការពារទឹកដីយើងដោយមាន
លេណដ្ឋានរឹងមាំជាមួយអាវុធគ្រប់
ប្រភេទ។ឯសត្រូវឈ្លានពានត្រូវចល័តវាយចូលទីតាំងយើងពួកគេមិនអាចទួលលេណដ្ឋានមកបានទេហើយក្បាលពួកគេក៏មិនបានប៉ានដែកដែរ។
ស្ថានភាពនេះផ្តល់ប្រៀបឲ្យយើង
អនុវត្តន៍យុទ្ធវិធីកំទេចកម្លាំងរស់របស់
សត្រូវតាមរយះការចាត់តាំងទប់ទល់។

សម្រាប់មេទ័ពថៃបានប្រកាសថាដើម្បី
សន្តិសុខប្រជាជនថៃត្រូវបំផ្លាញសមត្ថភាពកម្លាំងការពារជាតិរបស់កម្ពុជាសម្រាប់រយះពេលវែង។

សំដីលោកមេទ័ពខ្លាំងជាងប្រទេស
មហាអំណាចខាងអាវុធនិងកងទ័ពនៅ
លើពិភពលោកនេះទៅទៀត។

យើងពិតជាមិនអង្គុយអោបដៃឲ្យអស់
លោកបំផ្លាញតាមចិត្តចង់របស់អស់លោកទេ។

ចុងក្រោយខ្ញុំកំពុងតាមមើលមនុស្សចំនួនដែលកាលពីកម្ពុជាតបតដើម្បីការពារខ្លួនកាលពីខែកក្កដាពួកគេចោទ
យើងថាល្មោភសង្រ្គាម។ពេលយើងអត់ធ្មត់គោពបទឈប់បាញ់និងចង់ដោះស្រាយដោយសន្តិវិធីគេចោទយើងថាខ្លាចថៃមិនហ៊ានវាយឬកាត់ដីឲ្យថៃដើម្បីដូរយកសន្តិភាព។ពេលនេះយើងវាយដើម្បីការពារខ្លួនទៀតហើយតើពួកគេនឹងនិយាយថាយ៉ាងម៉េចទៀត? កម្ពុជាត្រូវការសន្តិភាពតែកម្ពុជាបង្ខំចិត្ត
វាយតបតដើម្បីការពារទឹកដីយើង៕SRP

ពីធីបុណ្យសម្ពោធឆ្លងឈាបនដ្ឋាន និងសមិទ្ធផលនានា ក្នុងបរិវេណវត្តតាហង្សសរ៉ារាម

ខេត្តសៀមរាប៖ឈាបនដ្ឋានដែលជាសមិទ្ឋផលថ្មី ក្នុងបរិវេណវត្តតាហង្សសរ៉ារាម ស្ថិតនៅភូមិប្រាសាទ ឃុំព្រៃជ្រូក ស្រុកពួក ខេត្តសៀមរាប ត្រូវបានកាត់ខ្សែបូសម្ពោធដាក់ឱ្យប្រើប្រាស់ជាផ្លូវការ នារសៀលថ្ងៃទី០៧ ខែធ្នូ ឆ្នាំ២០២៥ ក្រោមព្រះវត្តមាន ព្រះព្រហ្មវិមុត្តិ បណ្ឌិត ម៉ក ប៉ឹង អគ្គធម្មោ ព្រះរាជាគណៈកិត្តិយស ជាព្រះគ្រូចៅអធិការ វត្តព្រះអង្គទ្រង់ ព្រះយសោធរញាណ ឡោម សុឈាត ព្រះរាជាគណៈកិត្តិយស និងជាព្រះចៅអធិការវត្តព្រះសិអារ្យ និងព្រះតេជគុណ ជិនវំសបាលោ សេង ហុង ព្រះចៅអធិការវត្តតាហង្សសរ៉ារាម និងឧត្តមសេនីយ៍ទោ បណ្ឌិត សាយ រិទ្ធីស័ក្តិ និងលោកជំទាវ គាត សុថាវី និងលោក ថាន់ ហឹក អភិបាលរងស្រុកពួក តំណាងលោក ស៊ីន ចាន់ថុល អភិបាលស្រុកពួក លោកស្រី គឹម សុគន្ធី មេឃុំព្រៃជ្រូក លោក ឡុក វួន មេឃុំស្រណាល ភូមិចំណុះជើងវត្តទាំង៦ និងលោកគ្រូ អ្នកគ្រូ សិស្សានុសិស្ស លោកតា លោកយាយ អាចារ្យ គណៈកម្មការ ពុទ្ធបរិស័ទជជើងវត្តផងដែរ។

ព្រះតេជគុណ ជិនវំសបាលោ សេង ហុង ព្រះចៅអធិការវត្តមានថេរដីកាថា៖ សមិទ្ឋផលទាំងអស់នេះសាងសង់រយៈពេលមួយឆ្នាំ ដោយចំណាយថវិកាសរុបជិត៤ម៉ឺនដុល្លារអាមេរិកក្នុងនោះនៅខ្វះថ្លៃសម្ភារៈ និងថ្លៃជាងចំនួនជាង៣ពាន់ដុល្លារ បច្ច័យទាំងនេះបានពីការចូលរួមបរិច្ចាគរបស់ញាតិញោមជិតឆ្ងាយ និងបានពីការសន្សំ ប្រមូលពីកម្មវិធីបុណ្យនានាក្នុងវត្តនាពេលកន្លងមក។

លោក ថាន់ ហឹក អភិបាលរងស្រុកពួក បានសម្ដែងនូវការកោតសរសើរចំពោះ ព្រះចៅអធិការវត្ត ព្រះសង្ឃ អាចារ្យ គណៈកម្មការ ពុទ្ធបរិស័ទ និងអាជ្ញាធរដែនដី ដែលបានដឹកនាំកសាងនូវឈាបនដ្ឋាន ព្រមទាំងសមិទ្ធផលនានា ដែលជាហេដ្ឋារចនាសម្ព័ន្ធបម្រើឱ្យសេចក្តីត្រូវការសម្រាប់មូលដ្ឋាននេះ។ ក្រៅពីសមិទ្ធផលខាងលើ នៅមានសមិទ្ធផលជាច្រើនផ្សេងទៀត ដែលបានកើតឡើង និងរីកចម្រើនជាលំដាប់ក្នុងអារាមនេះ។

អភិបាលរងស្រុកពួកបន្តថា៖ សមិទ្ឋផលទាំងនេះស្តែងឱ្យឃើញនូវកម្លាំងមហាសាមគ្គីដ៏ល្អប្រពៃ ដោយបានលះបង់កម្លាំងកាយ កម្លាំងចិត្ត ដែលផុសចេញពីសទ្ធាជ្រះថ្លារបស់សប្បុរសជនជិតឆ្ងាយបូជាចំពោះព្រះរតនត្រ័យ និងជួយអប់រំកូនចៅ ឱ្យប្រតិបត្តិតែអំពើល្អ ដែលជាការរួមចំណែកយ៉ាងធំធេងក្នុងការបណ្តុះធនធានមនុស្ស លើកកម្ពស់សីលធម៌ ចរិយាធម៌ សេចក្តីថ្លៃថ្នូរក្នុងសង្គម និងការបណ្តុះព្រលឹងជាតិ។

សមិទ្ឋផលថ្មីៗនេះដែរ ក៏ជាការបញ្ជាក់កាន់តែច្បាស់ថា តួនាទីវត្តអារាមព្រះពុទ្ធសាសនាក្នុងសង្គមខ្មែរពិតជាមានសារៈសំខាន់ណាស់ តាំងពីអតីតកាល រហូតមកដល់បច្ចុប្បន្ន និងបន្តទៅអនាគតផងដែរ។

ព្រះយសោធរញាណ ឡោម សុឈាត បានសម្តែងនូវបិតិសោមនស្សចំពោះហេដ្ឋារចនាសម្ព័ន្ឋថ្មីៗទាំងនេះ ថាពិតជាឆ្លើយតបទៅនឹងតម្រូវការចាំបាច់របស់ប្រជាពុទ្ឋបរិស័ទក្នុងមូលដ្ឋានទៅតាមទំនៀមទម្លាប់របស់ខ្មែរយើង ជាពិសេសឈាបនដ្ឋាន ជាទីកន្លែងចុងក្រោយសម្រាប់បុគ្គលគ្រប់រូបបន្ទាប់ពីមរណកាលទៅ ដើម្បីក្រុមគ្រួសារសាច់ញាតិធ្វើបុណ្យកុសលជូន ព្រោះសេចក្តីស្លាប់នេះពុំមាននរណាម្នាក់អាចគេចបានឡើយ នេះជាសច្ចភាពនៃជីវិតម្នាក់ៗ ហើយជាប្រការចាំបាច់ដែលវត្តអារាមត្រូវតែមានឈាបនដ្ឋានដើម្បីធ្វើឈាបនកិច្ច។

ឈ្លៀតឪកាសនោះ ឧត្តមសេនីយ៍ទោ បណ្ឌិត សាយ រិទ្ធីស័ក្តិថា ប្រទេសយើងមានការរីកចម្រើនសព្វបែបយ៉ាង និងមានភាពស៊ីវិល័យយ៉ាងសម្បូរបែប គ្រួសារខ្លះមានលទ្ឋភាពជួលរោងជួលមេរុដើម្បីបូជាសពសមាជិកគ្រួសារដែលទទួលមរណភាពក្តី តែក៏នៅមានគ្រួសារជាច្រើនត្រូវការវត្តអារាមសម្រាប់ធ្វើបុណ្យទាន និងទីកន្លែងដើម្បីធ្វើឈាបនកិច្ចដែរ។
ហេតុនេះសូមប្រជាពុទ្ឋបរិស័ទរក្សានូវសាមគ្គីធម៌ ជាពិសេស ការបណ្តុះគំនិតគិតរឿងគុណធម៌ សីលធម៌ ចរិយាធម៌ឱ្យមានទឹកចិត្តគោរពស្រឡាញ់ សណ្តោសប្រណី និងការដឹងគុណអ្នកមានគុណទាំងឡាយដែលជាគុណធម៌របស់ពលរដ្ឋខ្មែរ៕SRP