ភ្នំពេញ៖រដ្ឋបាលរាជធានីភ្នំពេញ នៅព្រឹកនេះ បានដាក់អោយដំណើរការសាឡាងខ្នាតធំចំនួន ២គ្រឿងដឹកយានយន្តឆ្លងកាត់ទន្លេបាសាក់ភ្ជាប់ពីកោះពេជ្រ ទៅកោះនរា ចាប់ពីម៉ោង ៥និង៣០នាទីព្រឹក ដល់ម៉ោង ០៨យប់ ដើម្បីកាត់បន្ថយការកកស្ទះចរាចរណ៍លើស្ពានព្រះមុនីវង្ស ក្នុងខណ្ឌចំការមន និងខណ្ឌច្បារអំពៅ។
សូមអញ្ជើញបងប្អូនប្រជាពលរដ្ឋ ធ្វើដំណើរដោយសុវត្ថិភាព !។ នេះបើយោងតាមប្រភពរបស់ មន្ទីរសាធារណការ និងដឹកជញ្ជូនរាជធានីភ្នំពេញ៕SRP

ខេត្តកំពង់ចាម៖លោក អ៊ុន ចាន់ដា អភិបាលខេត្តកំពង់ចាម​ បានដឹកនាំមន្ត្រី​ពាក់ព័ន្ធ​ និងអាជ្ញាធរមូលដ្ឋាន ចុះត្រួតពិនិត្យគោលដៅការហាមឃាត់ អ្នកធ្វើដំណើរ ឆ្លងកាត់ខេត្ត។

ការចុះត្រួតពិនិត្យ នៅថ្ងៃទី០៨ ខែមេសា ព្រឹកមិញនេះ​ នៅក្រុងកំពង់ចាម និងស្រុកបាធាយ ដោយអនុវត្តសេចក្តីសម្រេច លេខ ៤៤សសរ របស់រាជរដ្ឋាភិបាល ស្តីពីការហាមឃាត់ការធ្វើដំណើរ និងការបិទរមណីយដ្ឋានទេសចរណ៍។

លោកអ៊ុន ចាន់ដា បាន​ថ្លែង​ថា ការ​អនុវត្ត​សេចក្តី​សម្រេច​​នេះ​ គណៈបញ្ជាការឯកភាពរដ្ឋបាលខេត្ត និងគណៈបញ្ជាការឯកភាពរដ្ឋបាលក្រុង-ស្រុក បានរៀបចំផែនការ ចាប់ពីម៉ោងសូន្យ នាថ្ងៃទី៧ ខែមេសា ឆ្នាំ២០២១ នៅតាមគោលដៅព្រំប្រទល់ខេត្ត​ និង​ខេត្ត ក្នុងគោលបំណងចូលរួម ជាមួយរាជរដ្ឋាភិបាល ដេីម្បី​ទប់ស្កាត់ការឆ្លងរីករាលនៃជម្ងឺកូវីដ-១៩។ ពិសេស ការកាត់ផ្តាច់ខ្សែចម្លងក្នុងព្រឹត្តិការណ៍សហគមន៍ ២០-កុម្ភៈ តាមរយៈការចរាចរណ៍ពីតំបន់មួយ ទៅកាន់តំបន់មួយ ដែលមានហានិភ័យខ្ពស់។

លោកក៏បាន​ណែនាំ​ ឲ្យគ្រប់គោលដៅទាំងអស់ ត្រូវហាមឃាត់ ការធ្វើដំណើរឆ្លងកាត់ ចេញ-ចូល ពីខេត្តមួយទៅខេត្តមួយជាបណ្តោះអាសន្ន​ រយៈពេល១៤ថ្ងៃ ប៉ុន្តែ​ត្រូវ​អនុញ្ញាត​ឲ្យ​ធ្វើ​ដំណើរ​ ចំពោះ​អ្នក​ដែលមាន​លិខិត​បញ្ជាក់​ពី​មូលហេតុ​ចាំបាច់​មួយ​ចំនួន​ តែ​ត្រូវ​វាស់​ស្ទង់​កម្តៅឲ្យ​បាន​ត្រឹមត្រូវ។

ក្ក្នុងឱកាសនេះដែរលោក ក៏បាន​ផ្តល់​អំណោយជូនគណៈបញ្ជាការឯកភាពរដ្ឋបាលក្រុង-ស្រុក​ ដែលកំពុងឈរជើងនៅក្នុងគោលដៅទាំង ២៣កន្លែង ដោយក្នុង​ ១គោលដៅ ទទួលបាន ម៉ាសចំនួន ១.០០០ម៉ាស ជែលលាងដៃ ១០ដប មី៥កេស ទឹកសុទ្ធ ៥កេស អង្ករ ១០០គ.ក្រ ប្រដាប់វាស់កំដៅ ១គ្រឿង និងថវិកា ចំនួន ១លានរៀល។

គួរបញ្ជាក់ថា ផ្អែកតាមផែនការរួម របស់គណៈបញ្ជាការឯកភាពរដ្ឋបាលខេត្តកំពង់ចាម គឺបានកំណត់គោលដៅត្រួតពិនិត្យ ចំនួន២៣គោលដៅ នៅក្នុងក្រុង-ស្រុកចំនួន៨ ពោលគឺ ជាគោលដៅ ដែលមានព្រំប្រទល់ ជាប់ខេត្តផ្សេងៗ ក្នុងនោះមាន៖ ក្រុងកំពង់ចាម មានចំនួន ១គោលដៅ​ ស្រុកបាធាយ មានចំនួន ២គោលដៅ ស្រុកជើងព្រៃ មានចំនួន ១គោលដៅ ស្រុកស្រីសន្ធរ មានចំនួន ៥គោលដៅ ស្រុកកងមាស មានចំនួន ២គោលដៅ ស្រុកកោះសូទិន មានចំនួន ២គោលដៅ ស្រុកចំការលើ មានចំនួន ៤គោលដៅ និងស្រុកស្ទឹងត្រង់ មានចំនួន​ ៥គោលដៅ។​ លោកក៏បានចាត់ឲ្យឯកឧត្ដម លោកជំទាវ ជាអភិបាលរងខេត្ត ដឹកនាំមន្ត្រី​ពាក់ព័ន្ធ​ និងអាជ្ញាធរមូលដ្ឋាន ដើម្បីចុះត្រួតពិនិត្យនៅតាមគោលដៅផ្សេងៗ និងផ្ដល់ជាអំណោយផងដែរ៕SRP

ខេត្តសៀមរាប៖ប្រជាពលរដ្ឋក្រ១ ក្រ ២នៅឃុំជីក្រែង ចំនួន១៤ ភូមិ ស្មើនឹង៦៣៨ គ្រួសារ ក្នុងស្រុកជីក្រែង បានទទួលអំណោយពីអាជ្ញាធរខេត្តសៀមរាប នៅថ្ងៃទី៧ ខែមេសា ម្សិលមិញ។

ប្រធានមន្ទីរកសិកម្មខេត្តសៀមរាប លោកលោក ទា គឹមសុទ្ធ បានឲ្យដឹងថាអំណោយដែលត្រូវបានផ្ដល់នាពេលនេះរួមមាន ម៉ាសចំនួន ៧០០ប្រអប់(១ប្រអប់មាន៥០ម៉ាស) អាល់កុល ១៤០លីត្រ សាច់មាន់ចំនួន ៦៤០ក្បាល ស្មើនឹង៦០០គ ក្រ ពងមាន់ចំនួន៦៣៨០គ្រាប់ មីខ្លាឃ្មុំ ចំនួន ៦ ៣៨០កញ្ចប់ ទឹកសុទ្ធ ៦៥០យួរ។ ក្នុងនោះគណ:កម្មាធិការឃុំជីក្រែង ទទួលបាន ម៉ាស៥០ប្រអប់ មីម៉ាម៉ា ១៥កេស ត្រីខកំប៉ុង១០យួរ អាល់កុល២០លីត្រ សម្រាប់ទុកប្រើប្រាស់ផងដែរ។

ជាមួយគ្នានេះដែរ លោក នាក់ ណេរ៉ុន អភិបាលរងខេត្តសៀមរាប ក៏បាននាំយកចង្ហាន់ទៅប្រគេនព្រះសង្ឃដែលគង់នៅវត្តជីក្រែង ចំនួន ៣៣អង្គ និងបច្ច័យ ចំនួន១០ពាន់រៀល ក្នុងមួយអង្គ សម្ភារទ័យទាន ចំនួន៤០ស៊ង និងថវិកាចំនួន៦លានរៀល សម្រាប់ទិញដីពង្រីកស្រះក្នុងវត្ត៕SRP

ភ្នំពេញ៖លោកមាស សោភ័ណ្ឌអ្នកនាំពាក្យក្រសួងព័ត៌មាន បានបញ្ជាក់ប្រាប់អគ្គនាយកដ្ឋានទូរទស្សន៍ជាតិកម្ពុជានៅព្រឹកថ្ងៃទី ០៨ ខែមេសា ឆ្នាំ ២០២១នេះថា ក្រសួងព័ត៌មានសូមប្រកាសច្រានចោលចំពោះព័ត៌មាន ដែលបានបង្ហោះ និងផ្សព្វផ្សាយថា ឯកឧត្តម ម៉ៅ អាយុទ្ធ រដ្ឋលេខាធិការក្រសួងព័ត៌មានបានទទួលមរណភាព គឺជាព័ត៌មានមិនពិត។

លោកមាស សោភ័ណ្ឌ សូមបញ្ជាក់ថា ដោយមានការយកចិត្តទុកដាក់ថែទាំ និងព្យាបាលពីសំណាក់ក្រុមគ្រូពេទ្យ ស្ថានភាពជំងឺឯកឧត្តម ម៉ៅ អាយុទ្ធ រដ្ឋលេខាធិការក្រសួងព័ត៌មាន នាពេលបច្ចុប្បន្ននេះគឺធម្មតា លោកនៅកម្រើកដៃជើង នឹងដឹងខ្លួនជាធម្មតា លោកអាចពិសារអាហារ និងភេសជ្ជៈប៉ូវកម្លាំងជាធម្មតា។
ទន្ទឹមនេះគ្រូពេទ្យដែលប្រចាំការព្យាបាលជំងឺឯកឧត្តមផ្ទាល់ ក៏បានប្រាប់ដល់ក្រុមគ្រួសារ សូមឲ្យជួយទិញ ទឹកដោះគោ (អេនសួរ)ដែលមានប្រូតេអ៊ីនខ្ពស់ យកមកបញ្ចុកឯកឧត្តម នៅពេលរសៀល និងពេលថ្ងៃត្រង់។ ជាងនេះទៀត ក្រុមគ្រួសារឯកឧត្តម ម៉ៅ អាយុទ្ធ ដែលមិនជាប់ធ្វើចត្តាឡីស័ក បានទៅទិញយកទៅជូនគ្រូពេទ្យ ទុកសម្រាប់ ឯកឧត្តម ពិសាររួចរាល់អស់ហើយ៕SRP

ខេត្តសៀមរាប៖ក្នុងកិច្ចប្រជុំនៅមិញព្រឹកនេះក្រុមការងាររដ្ឋបាលខេត្ត និងមន្ទីរសាធារណការ និងដឹកជញ្ជូនខេត្ត បានប្រជុំពិភាក្សា នឹងរៀបចំឲ្យមានការដាក់ពាក្យស្នើសុំតភ្ជាប់បណ្តាញលូទឹកភ្លៀង និងទឹកកខ្វក់ ចូលក្នុងលូទឹកភ្លៀង និងទឹកកខ្វក់ក្នុងគម្រោងស្ថាបនាហេដ្ឋារចនាសម្ព័ន្ធផ្លូវ៣៨ខ្សែ ក្នុងក្រុងសៀមរាប។

ក្នុងកិច្ចប្រជុំនេះ លោកទៀ សីហា អភិបាលខេត្តសៀមរាប បានឲ្យដឹងថា នាពេលឆាប់ៗខាងមុខនេះ បងប្អូនប្រជាពលរដ្ឋ សណ្ឋាគារ ផ្ទះសំណាក់ ភោជនីយដ្ឋាន អាជីវកម្មដ្ឋាននានា អាចមកដាក់ពាក្យស្នើសុំការតបណ្តាញលូ នៅរដ្ឋបាលក្រុងសៀមរាប រៀងរាល់ម៉ោងធ្វើការ ដើម្បីក្រុមការងារ និងមន្ទីរជំនាញ ចុះពិនិត្យ សហការ និងវាយតម្លៃលក្ខណៈបច្ចេកទេសជូនបងប្អូនប្រជាពលរដ្ឋ សណ្ឋាគារ ផ្ទះសំណាក់ ភោជនីយដ្ឋាន អាជីវកម្មដ្ឋាននានា។

ការលើកឡើងរបស់អភិបាលខេត្តសៀមរាប នេះបន្ទាប់ពីលោកបានឃើញបញ្ហានៃការលួចតភ្ជាប់លូទឹកកខ្វក់ដោយគ្មានលក្ខណៈបច្ចេកទេសត្រឹមត្រូវ ពីតាមផ្ទះ ចូលក្នុងបំពង់លូមេនៃគម្រោង៣៨ខ្សែ៕SRP

ខេត្តកំពង់ចាម៖អាជ្ញាធរខេត្តកំពង់ចាម​ រួមជាមួយ ក្រុមការងារអន្តរក្រសួង​ គ្រប់គ្រងគ្រាប់យុទ្ធភណ្ឌមិនទាន់ផ្ទុះ នៅថ្ងៃ​ទី​៧​ ខែមេសា​ ព្រឹកមិញនេះ បានបើកប្រតិបត្តិការស្រង់យក​ខ្មោច​នាវា​ចម្បាំង​១គ្រឿង​ បន្ទាប់ពីបានស្រង់ គ្រាប់​យុទ្ធភ័ណ​មិន​ទាន់​ផ្ទុះ​ ប្រមាណ​ជាង​១៦តោន​​ ដែលបានលិច​ក្នុង​ទន្លេ​មេគង្គ​ កាលពី​សម័យ​សង្គ្រាម​នាទសវត្សរ៍​ឆ្នាំ​១៩៧០ ស្ថិត​នៅក្នុង​ភូមិ​វាល​ ឃុំ​មានជ័យ​ ស្រុក​ស្រីសន្ធរ​ ខេត្តកំពង់ចាម​ ដែល​មាន​ទាំង​បំណែក​ឆ្អឹង​សព​ទាហាន​ និង​របស់របរ​មួយ​ចចំនួនផងដែរ​។

លោក នាង ផាត រដ្ឋលេខាធិការ ប្រចាំការក្រសួងការពារជាតិ បាន​ថ្លែង​ថា ប្រតិបត្តិការបោស​សម្អាត​គ្រាប់យុទ្ធភណ្ឌមិនទាន់ផ្ទុះ​ ដែលបានកប់នៅក្រោមផ្ទៃទឹក នៅចំណុចនេះ គឺជាស្នាដៃប្រវត្តិសាស្ត្រមិនធ្លាប់មានកន្លងមកសម្រាប់កម្ពុជា ហើយចំពោះប្រតិបត្តិការនេះ ក៏បានបង្ហាញថាកម្ពុជា មានសមត្ថភាពគ្រប់គ្រាន់មិនត្រឹមតែបោសសម្អាតគ្រាប់យុទ្ធភណ្ឌមិនទាន់ផ្ទុះនៅលើដីគោកនោះទេ ដូច្នេះវាជាមោទនភាពមួយទៀតសម្រាប់កម្ពុជា។

បើតាមលោក ម៉ី សុភា មេបញ្ជាការបោសសម្អាតគ្រាប់មិនទាន់ផ្ទុះ នៃមជ្ឈមណ្ឌលជាតិគ្រប់គ្រង កងកម្លាំងរក្សាសន្តិភាព បោសសម្អាតមីន និងកាកសំណល់សង្គ្រាម (NPMEC) បានឲ្យដឹងថា​ ប្រតិបត្តិ​ការណ៍​ស្រង់នាវាចម្បាំងនេះ​ មានគ្រាប់ប្រមាណ៩០ភាគរយ ដែលមានសភាពល្អ មិនទាន់ផ្ទុះ​ នឹងត្រូវដោះបន្សាប សម្រាប់ទុកដាក់តាំងក្នុងសារមន្ទីរ ដោយឡែក​ សល់បំណែកគ្រាប់១០%ទៀត​ ដែលជាគ្រាប់ខូច ពុកផុយ មិនអាចធ្វើការដោះបន្សាបបាន ដែល​ត្រូវ​ធ្វើការកំទេចចោល។​ ក្នុង​ប្រតិបត្តិការណ៍​នេះដែរ​ កងកម្លាំង​ជំនាញបានខិតខំប្រឹងប្រែង​ ក្នុងស្ថានភាពស្មុគ្រស្មាញ និងប្រឈមគ្រោះថ្នាក់បំផុត ក្នុងការស្រង់គ្រាប់យុទ្ធភណ្ឌមិនទាន់ផ្ទុះ​ បានសរុបប្រមាណជាង១៦តោន​ ហេីយតាមការសន្និដ្ឋានចំនួន មនុស្សដែលស្លាប់មានប្រ​មាណចាប់ពី៥ទៅ៨នាក់ក្នុងនាវាមួយនេះផងដែរ​។

លោកអ៊ុន ចាន់ដា អភិបាលខេត្តកំពង់ចាម បាន​សំដែង​នូវ​ការ​កោតសរសើរ​ និង​ថ្លែង​អំណរគុណ​ ដល់ក្រុមការងារបច្ចេកទេសទាំងអស់ រួមនឹងអាជ្ញាធរពាក់ព័ន្ធ​ ដែល​បានចូលរួមក្នុងសកម្មភាព​ ដោយប្រុងប្រយ័ត្ន និងធានាបាននូវសុខសុវត្ថិភាព​ រហូត​សម្រេច​បាន​ជោគជ័យ​ ដ៏​ធំធេង​នេះ​៕SRP

ខេត្តសៀមរាប៖លោក សឿន តុលា ស្ថាបនិកក្រុមហ៊ុន ផា ផាយ៉ា បានសរសេរនូវអត្ថបទរបស់លោកមួយថា៖ តើអ្នកណា លាក់សំណាងរបស់ខ្ញុំ?

លោក សឿន តុលា បានសរសេរថា៖
មនុស្សក្នុងលោកយើងនេះ តែងតែចង់បាន ” សំណាង ឬសំណាងល្អ ” ដោយសារតែចង់បាននូវផលល្អ ឬឲ្យទៅជាសំណាងល្អ ពួកគេតែងតែមានជំនឿរៀងខ្លួន មានដូចជាជំនឿអរូបិយ ជំនឿជឿជាក់លើខ្លួនឯង ឬជំនឿផ្សេងៗ ដែលមិនអាចបរិយាយរៀបរាប់អស់។

រីឯទំហំ លទ្ធផល ដែល ធ្វើឲ្យគាប់ចិត្ត ឬឈឺចាប់ ក៏មិនអាចកើតឡើងស្មើៗគ្នា ដល់មនុស្សគ្រប់ៗគ្នាបានឡើយ។
តាមភាពជាក់ស្ដែង សំណាង កើតឡើង នៅពេលដែលយើងរុករក អត់ធ្មត់ តស៊ូនឹងការលំបាក ជាមួយនឹងគោលដៅ សូមលើកឧទាហរណ៍ថា ” ប្រសិនបើយើង ដាំដើមស្វាយ យើងមានពេលគ្រប់គ្រាន់ ថែទាំ យើងដឹងទទួលផលផ្លែស្វាយ ” តើផ្លែស្វាយដែលយើងទទួលបាន កើតចេញពីការបន់ស្រន់ឬ? តើធ្លាក់ពីលើមេឃ មកមែនទេ?
ការរកប្រភពដីដាំ ត្រូវការពេលវេលា
ការរុករកភពទឹកដាំ ត្រូវការពេលវេលា
ការរុករកជំនាញដាំ ត្រូវការពារវេលា
ការប្រមូលផលវេចខ្ចប់ ត្រូវការពេលវេលា។

អ្នកមានសំណាង ពួកគាត់មានសំណាង ពីព្រោះពួកគាត់បង្កើតសំណាង ដោយខ្លួនឯង ដោយការហាត់លត់ដំខ្លួន ដើម្បីទទួលសំណាង ដែលពួកគាត់ចង់បាន។

អ្នកមានសំណាង តែងតែរុករក និងកត់សម្គាល់ ចំណុចវិជ្ជមាន ឬ រឿងល្អៗកើតឡើងប្រចាំថ្ងៃ ពីព្រោះ ពួកគេទទួលស្គាល់ថា ” ធ្វើរឿងល្អតូចៗ ជាប្រចាំ គឺជាការបង្កើតឲ្យមានភាពទទួលខុសត្រូវ លើផលវិជ្ជមាន ដ៏ធំមួយ ក្នុងពេលអនាគត ” រឿងភាគចាស់ខ្មែរបូរាណរបស់យើង ពោលថា ” ដំណក់ទឹកត្នោតផ្អែម ស្រក់ មួយដំណក់ម្ដង មួយដំណក់ម្ដង តក់ៗធ្វើអោយពេញបំពង់”
រីឯអ្នកគ្មានសំណាងវិញ ពួកគេតែងតែចំណាយពេល ទម្លាក់កំហុសទៅលើអ្នកដទៃ ឬស្ដីបន្ទោស នៅពេលដែលកិច្ចការបរាជ័យ ជាទូទៅ ពួកគេងាយបោះបង់ ងាយប្ដូរចិត្ត មិនស៊ូទ្រាំ តស៊ូ និងអត់ធ្មត់ ចំពោះការលំបាកឡើយ។ អ្វីដែលពួកគេចង់បាន គឺភាពងាយស្រួល គឺពួកគាត់ មិនចង់គិត មិនចង់ឮ ហើយក៏មិនចង់ដោះស្រាយអ្វីដែរ ជាទីអវសាន ពួកគាត់ គឺជាអ្នករងគ្រោះ ដោយខ្លួនឯង។

ជាការពិតណាស់ មនុស្សមានសំណាង និងមនុស្សគ្មានសំណាង ធ្វើដំណើរលើដងវិថីជីវិត ផ្ទុយស្រឡះពីគ្នា ពីព្រោះពួកគេ មានជំនឿផ្ទុយគ្នា ទង្វើផ្ទុយគ្នា និងលទ្ធផលផ្ទុយគ្នា ។ ប្រសិនបើ អ្នកគ្មានសំណាង ផ្លាស់ប្ដូរវិធីគិត និងពង្រីកបន្ថែមនូវកម្រិតជំនឿ ដើម្បីរៀនឲ្យបានទូលំទូលាយ ពួកគេនឹងមានឱកាសទទួលបានសំណាង។

និពន្ធដោយលោក សឿន តុលា ស្ថាបនិកក្រុមហ៊ុន ផា ផាយ៉ា PAPAYA NEXT STEP CO,.LTD.

* PAPAYA REAL ESTATE
( គម្រោងអភិវឌ្ឍន៍អចលនទ្រព្យ)
*PAPAYA HOMESTAY
(គម្រោងលើវិស័យទេសចរណ៍)
*PAPAYA GARDEN
( គម្រោងលើវិស័យកសិកម្ម

ខេត្តព្រះវិហារ៖លោក កង សៅគុណ មេបញ្ជាការកងរាជអាវុធហត្ថខេត្តព្រះវិហារ នៅថ្ងៃទី០៦ ខែមេសា ម្សិលមិញ បានដឹកនាំកម្លាំងក្រោមឱវាទចុះជួយរុះរើ ជួសជុល និងលើកផ្ទះប្រជាពលរដ្ឋ ដែលរងការខូចខាតដោយសារគ្រោះធម្មជាតិ(ភ្លៀងមានខ្យល់កន្រ្ទាក់)ដែលជាភ្លៀងដើមឆ្នាំ បណ្តាលអោយរលំផ្ទះមួយចំនួន នៅភូមិផ្លោច ឃុំច្រាច់ ស្រុកជ័យសែន ខេត្តព្រះវិហារ។

ក្នុងឱកាសនេះដែរ លោក កង សៅគុណ ក៏បានឧបត្ថម្ភនូវថវិការ ដល់គ្រួសារម្ជាស់ផ្ទះរងគ្រោះចំនួន ៤០ម៉ឺនរៀល។ ជាមួយគ្នានេះដែរលោកក៏បានចុះសួរសុខទុក្ខ លោក ឡាញ់ វណ្ណី ដែលទើបជាសះស្បើយពីជំងឺប្រចាំកាយ ព្រមទាំងជូនអំណោយ ទឹកត្រចៀកកាំ ១យួរផងដែរ៕SRP

ខេត្តព្រះវិហារ៖លោក គោស៊ុ ប៊ុនសឿត អភិបាលរងខេត្តព្រះវិហារ បានប្រគល់ថវិកាចំនួន០៣លានរៀល របស់គណៈកម្មាធិការមូលដ្ឋានសមាគមមន្រ្តីរាជការស៊ីវិល នៃក្រសួងមហាផ្ទៃ ជូនតំណាងសពចំនួន០២គ្រួសារ។

ការផ្ដល់ថវិកាដល់គ្រួសារសពនេះធ្វើនាថ្ងៃអង្គារទី០៦ខែមេសា ម្សិលមិញនៅសាលាខេត្តព្រះវិហារ។ គ្រួសារទាំង២ទី១ លោកស្រី អ៊ឹង សុទ្ធា ភរិយាសពឈ្មោះ អ៊ុក ឃាន ទី២សៅ ហ៊ាន ស្វាមីសពឈ្មោះ លោក ឈឹម អ៊ាង។

ក្នុងឱកាសនេះដែរលោក គោស៊ុ ប៊ុនសឿត បានមានប្រសាសន៍ ពាំនាំនូវការផ្តាំផ្ញើរសួរសុខទុក្ខ និងចូលរួមការរំលែកទុក្ខយ៉ាងក្រៀមក្រំ ពីសំណាក់លោកប្រាក់ សុវណ្ណ អភិបាលខេត្តព្រះវិហារ និងលោក ឡុង សុវណ្ណ ប្រធានក្រុមប្រឹក្សាខេត្តព្រះវិហារ និងសូមអោយប្រកាន់ខ្ជាប់នូវ (៣.ការពារ និង ៣.កុំ)ចៀសឆ្ងាយពីជំងឺកូវីដ-១៩ផងដែរ៕SRP

ខេត្តសៀមរាប៖សមត្ថកិច្ចបានអះអាងថាស្ត្រីម្នាក់ដែលត្រូវជាអតីតប្តី បានលែងលះគ្នាជាង១ឆ្នាំហើយ ទំនងនៅនឹកឃើញសាច់សខ្ចី ភ្លើងប្រចណ្ឌ ក្រឡេកឃើញប្រពន្ធ នៅកន្លែងលក់ផ្លែឈើរបស់ប្អូនថ្លៃ មុខផ្សារលើធំថ្មី បើក(PassAPP)ដេញបុកចាក់សម្លាប់ប្រពន្ធ ពេញបរិវេណផ្សារលើធំថ្មី ដូចរឿងហុងកុង បណ្តាលឱ្យរងរបួសធ្ងន់ធ្ងរ។

ហេតុការណ៍នេះបានកើតឡើងនៅវេលាម៉ោង៩និង៣០នាទីយប់ថ្ងៃទី០៦ខែមេសាឆ្នាំ២០២១ ស្ថិតនៅមុខកន្លែងលក់ផ្លែឈើ ផ្សារលើធំថ្មី ក្នុងភូមិដកពោធិ៍ សង្កាត់ស្លក្រាម ក្រុងសៀមរាប។

បើតាមសាក្សី នៅកន្លែងកើតហេតុបានប្រាប់អ្នកសារព័ត៌មានថា មុនកើតហេតុ ពួកគាត់ឃើញបុរសម្នាក់បានអង្គុយ ក្នុង(PassAPP) ដែលចតនៅមុខកន្លែងលក់ផ្លែឈើ ផ្សារលើធំថ្មី ខណៈពេលនោះឃើញមានស្ត្រីម្នាក់និងក្មេងស្រីម្នាក់ ជិះម៉ូតូ មកកន្លែងលក់ផ្លែឈើ មួយសន្ទុះស្រាប់ឃើញបុរសអ្នកបើក(PassAPP) ដែលចតនៅមុខកន្លែងលក់ផ្លែឈើនោះ បើកចេញមកសំដៅស្ត្រីនោះ ដេញបុកពេញផ្សារលើធំថ្មី បណ្តាលឱ្យ(PassAPP)ក្រឡាប់ រួចទាញកាំបិតចិតបន្លែ ចាក់មកលើស្ត្រីនោះចំនួន២ កាំបិត ត្រូវត្រង់ ករ មួយកាំបិត និង ចាក់បុកចំពោះ ខាងក្រោមដោះ ផ្នែកខាងស្តាំ បណ្តាឱ្យរបួសធ្ងន់ ត្រូវបានប្អូនស្រី ដឹកតាមម៉ូតូទាំងឈាមហូរដូចទឹក យកទៅសង្គ្រោះនៅមន្ទីរពេទ្យ។

មន្ត្រីនគរបាលបានប្រាប់ថា ជនបង្កក្រោយធ្វើសកម្មភាពរួចបានទុក(PassAPP) ពាក់ស្លាកលេខសៀមរាប ១.AF.៨៨០៣ នៅកន្លែងកើតហេតុ  រួចយកម៉ូតូរបស់ប្រជាការពារភូមិ ជិះចេញទៅបាត់ ដោយបានយកទៅទុកនៅផ្ទះរបស់ខ្លួនក្នុងភូមិខា្នរ សង្កាត់ជ្រាវ ហើយយករថយន្ត ឡុច ស៊ីស RX300 ពណ៌ស ពាក់ស្លាកលេខសៀមរាប ២.C៧១៧៣ ចេញទៅបាត់ដោយសុវត្ថិភាព។

សមត្ថកិច្ចបានបញ្ជាក់ថា ជនបង្កឈ្មោះ តាំង លាប ភេទប្រុសអាយុ៣៧ឆ្នាំមានស្រុកកំណើតនៅខេត្តកំពង់ចាម។បច្ចុប្បន្នរស់នៅភូមិខ្នារ សង្កាត់ជ្រាវ ក្រុងសៀមរាប។ ចំណែកស្ត្រី ជនរងគ្រោះ មានឈ្មោះ លាន ប៊ុន ណាត អាយុ៣៥ឆ្នាំរស់នៅភូមិខ្នារ  សង្កាត់ជ្រាវ ក្រុងសៀមរាប មានកូនចំនួន២នាក់(ស្រីម្នាក់និងប្រុសម្នាក់ រីឯកូនទាំង២នាក់រស់នៅជាស្ត្រីរងគ្រោះ ដែលបានលែងលះគ្នាជាង១ឆ្នាំមកហើយ។

 ជុំវិញហេតុការណ៍នេះសមត្ថកិច្ចបានអះអាងបន្ថែមថាកំពុងតែសហការគ្នា ស្វែងរកតាមចាប់ខ្លួនយកមកផ្តន្ទាទោស ទៅតាមផ្លូវច្បាប់៕SRP

ខេត្តសៀមរាប៖ក្រុមប្រជាពលរដ្ឋជាង៦០គ្រួសារក្នុងភូមិមណ្ឌល៣ សង្កាត់ស្លក្រាម ក្រុងសៀមរាប កាលពីថ្ងៃទី៥ ខែមេសា ម្សិលមិញនេះ បានតវ៉ាប្រឆាំងកាតម្លើងអង់តែងសេវាទូរស័ព្ទក្រុមហ៊ុនមិត្តហ្វូន ដោយលើកហេតុផងថា នឹងមានវិទ្យុសកម្ម ប៉ះពាល់ដល់សុខភាពអ្នករស់នៅជុំវិញនោះ។ ប៉ុន្តែករណីខាងលើនេះ អាជ្ញាធរខេត្តអះអាងថា មិនមានវិទ្យុសកម្មអ្វីនោះទេ។

ស្ត្រីឈ្មោះ វល័ក្ខ ប្រជាពលរដ្ឋក្នុងចំណោមអ្នកតវ៉ា បានអោយដឹងថា ក្រុមហ៊ុនមិត្តហ្វូននេះ មានគម្រោងតម្លើងអង់តែនតាំងពី៣ឆ្នាំមុនមកម្លេះ។ ប៉ុន្តែពួកយើងធ្វើការតវ៉ា ម្តងហើយម្តងទៀតក៏ផ្អាកសកម្មភាពមួយរយ:។ លុះនៅថ្ងៃទី៥ខែមេសានេះ ពួកគេដឹកជញ្ជូនសម្ភារសំណង់មួយចំនួន មកទុកនៅទីតាំងបំណងសាងសង់អង់តែនទូរស័ព្ទជាថ្មីទើបពួកគាត់តវ៉ាបែបនេះ។

ស្ត្រីរូបនេះបានលើកឡើងថា ការដំឡើងបង្គោលអង់តែនទូរស័ព្ទរបស់ក្រុមហ៊ុនមិត្តហ្វូននៅក្នុងទីប្រជុំជននេះ វាបានធ្វើឲ្យមានផលបះពាល់យ៉ាងខ្លាំង សម្រាប់ការរស់នៅ របស់ប្រជាពលរដ្ឋរស់នៅជុំវិញនោះ ពីព្រោះថាអង់តែនទូរស័ព្ទ គឺជាទីប្រជុំរលកសំឡេងដ៏ធំ វាបានផ្ទុកទៅដោយធាតុវិទ្យុសកម្ម ដែលបណ្តោលគ្រោះថ្នាក់យ៉ាងធ្ងន់ធ្ងរ ដល់សុខភាពរបស់ប្រជារាស្ត្រដែលរស់នៅក្បែរនោះ។ ជាពិសេស ស្ត្រីដែលមានផ្ទៃ ពោះ។ ក្រៅពីនោះ វាក៏ជាហានិភ័យ ដូចជាកាដួលរលំជាដើម។

ក្នុងករណីខាងលើនេះ លោក វុធ ថា អ្នកសម្របសម្រួល ការងារតម្លើងអង់តែនក្រុមហ៊ុនមិត្តហ្វូន បានអោយដឹងតាមទូរស័ព្ទថា គម្រោងរបស់លោកមាន ច្បាប់អាជីវកម្មត្រឹមត្រូវ ពីខេត្តរហូតដល់ក្រសួង។ វាមិនមានវិទ្យុសកម្មអីទេ ប៉ុន្តែក្រុមពលរដ្ឋខាងលើ គាត់គ្រាន់តែឮតៗគ្នាប៉ុណ្ណោះ។

លោកបញ្ជាក់ថា ពេលនេះខាងលោកកំពុងរត់ច្បាប់សាងសង់ទៅក្រសួង ចឹងទេពេលបានច្បាប់សាងសង់ហើយ គឺត្រូវតែធ្វើ មិនអាចពលរដ្ឋទាំងនោះមករារាំងឡើយ។
អភបាលរង និងជាអ្នកនាំពាក្យសាលាខេត្តសៀមរាប លោក លី សំរិទ្ធ បានមានប្រសាន៍តាមទូរស័ព្ទថា តាមពិតមិនមានវិទ្យុសកម្មអ្វីទេ។ មុនពេលចេញច្បាប់អនុញាត មន្ទីរជំនាញបានពិនិត្យរួចរាល់អស់ហើយ។

លោកបន្តថា ប្រទេសកម្ពុជា មានអង់តែនច្រើន ណាស់ អីចឹងបើមានវិទ្យុសកម្មមែន វាប៉ះពាល់ស្ទើគ្រប់កន្លែងទៅហើយ។ ម្យ៉ាងវិញទៀត បើជំនាញអះអាងថា មិនប៉ះពាល់ហើយ តើពួកគាត់នៅតវ៉ាយ៉ាងមេច។ ការតវ៉ាបែបបំពាន វាអាចធ្វើអោយប៉ះពាល់ដល់ការអភិវឌ្ឍន៍ នេះអាចនិយាយបានថា លើសពីការតវ៉ាហើយ។ ប៉ុន្តែ អាជ្ញាធរនឹងរកវេលា អោយជំនាញពន្យល់ពួកគាត់ម្តងទៀត៕SRP