កឧត្តម អ៊ុន ចាន់ដា អភិបាលខេត្តកំពង់ចាម និងជាប្រធានគណៈកម្មាធិការសាខាកាកបាទក្រហមខេត្ត នៅល្ងាចថ្ងៃទី៥ ខែធ្នូ ឆ្នាំ២០២៥ នេះ បានអញ្ជើញចូលរួមអបអរសាទរ ពិធីបេីកមហោស្រព​ “​ កំពង់ចាម​ជាទីស្រឡាញ់​ “​ ដេីម្បីអបអរសាទរពិធីបុណ្យ​ ណូអែល​ និងបុណ្យឆ្លងឆ្នាំ​. Merry Christmas and Happy New Year. ស្ថិតនៅទីលានបាល់ទាត់ ក្រុងកំពង់ចាម ខេត្តកំពង់ចាម។

នាឱកាសដ៏ឱឡារិកនេះ ឯកឧត្តម អ៊ុន ចាន់ដា បានលើកឡើងថា ការប្រារព្ធពិធីមហោស្រព ជួបជុំគ្នា ដើម្បីចែករំលែកនូវក្តីស្រឡាញ់ នាថ្ងៃនេះ គឺដោយសារប្រទេសមានសុខសន្តិភាព។

ឯកឧត្តម អភិបាលខេត្តបន្តថា សុខដុមនីយកម្មសាសនា នៅប្រទេសកម្ពុជា ត្រូវបានចាត់ទុកជាផ្នែកមួយដ៏សំខាន់ក្នុងការរក្សាបាននូវសុខសន្តិភាព និងស្ថិរភាពសង្គម ដោយព្រះពុទ្ធសាសនាជាសាសនារបស់រដ្ឋ ខណៈដែលសាសនាផ្សេងៗទៀតក៏ត្រូវបានអនុញ្ញាតឱ្យគោរពប្រតិបត្តិដោយសេរីផងដែរ។ ទន្ទឹមនេះ ការធ្វើការរួមគ្នាលើគោលដៅសង្គមរួម ដូចជាការលើកកម្ពស់សន្តិភាព សីលធម៌ និងការអភិវឌ្ឍ សំដៅធ្វើយ៉ាងឲ្យប្រជាពលរដ្ឋគ្រប់និន្នាការសាសនា ចេះស្រលាញ់ សាមគ្គីគ្នាជាធ្លុងមួយ ស្ថិតក្រោមដំបូលសុខសន្តិភាព។

ឯកឧត្តម អភិបាលខេត្ត បានសង្កត់ធ្ងន់ថា សន្តិភាពដែលយើងទទួលបាន មកដល់ពេលបច្ចុប្បន្ននេះ គឺដោយសារការចូលរួមពីគ្រប់ថ្នាក់ដឹកនាំរបស់យើងគ្រប់ថ្នាក់ ជាពិសេស គឺសម្ដេចអគ្គមហាសេនាបតីតេជោ ហ៊ុន សែន ដែលជាស្ថាបនិក មគ្គទេសឯក ដែលបាននាំមកនូវសុខសន្តិភាព និងការអភិវឌ្ឍជូនដល់ប្រជាពលរដ្ឋ និងបន្តមកដល់បច្ចុប្បន្ននេះ គឺមានសម្ដេចមហាបបរអធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ដែលបានបន្តដឹកនាំនាវាកម្ពុជា រក្សាបាននូវនិរន្តរភាព សន្តិភាព និងការអភិវឌ្ឍលើវិស័យ៕SRP

អភិបាលខេត្តកំពង់ចាម​ លើកយកគោលការណ៍ ៩ចំណុច ដើម្បីត្រៀមខ្លួនសម្រាប់ការចាកចេញរបស់ប្រទេសកម្ពុជា ពីចំណាត់ថ្នាក់ក្រុមប្រទេសអភិវឌ្ឍន៍តិចតួចនៅ ឆ្នាំ២០២៩

ខេត្តកំពង់ចាម៖នៅក្នុងកិច្ចប្រជុំ ផ្តល់យោបល់លើសេចក្តីព្រាងកម្មវិធីវិនិយោគបីឆ្នាំរំកិល២០២៦-២០២៨ របស់រដ្ឋបាលខេត្ត​ នាព្រឹកថ្ងៃទី៥ ខែធ្នូ ឆ្នាំ២០២៥ នេះ ឯកឧត្តម អ៊ុន ចាន់ដា អភិបាលខេត្តកំពង់ចាម បានធ្វើការណែនាំដល់អាជ្ញាធរ និងអ្នកពាក់ព័ន្ធទាំងអស់​ ត្រូវយកចិត្តទុកដាក់ជាចម្បង លើផែនការយុទ្ធសាស្ត្រ អភិវឌ្ឍន៍ជាតិ យុទ្ធសាស្ត្របញ្ចកោណដំណាក់កាលទី១ ដែលបានកំណត់យកអាទិភាព គន្លឹះចំនួន៥គឺ មនុស្ស ផ្លូវ ទឹក ភ្លើង និងបច្ចេកវិទ្យា។

ក្នុងឱកាសនោះ ឯកឧត្តម អភិបាលខេត្ត បានលើកយកគោលការណ៍ ៩ចំណុច ណែនាំដល់ អាជ្ញាធរ និងមន្ត្រីពាក់ព័ន្ធ ត្រៀមខ្លួនសម្រាប់ការចាកចេញរបស់ប្រទេសកម្ពុជា ពីចំណាត់ថ្នាក់ក្រុមប្រទេសអភិវឌ្ឍន៍តិចតួចនៅ ឆ្នាំ២០២៩ ការត្រៀមខ្លួនសម្រាប់ការចាកចេញ របស់ប្រទេសកម្ពុជា ពីចំណាត់ថ្នាក់ក្រុមប្រទេស អភិវឌ្ឍតិចតួចនៅឆ្នាំ២០២៩​ ដូចខាងក្រោម៖

ទី១- ត្រូវរួមគ្នារក្សានូវសន្តិភាព ស្ថិរភាពនយោបាយ និងការអភិវឌ្ឍ។

ទី២- ត្រូវពង្រឹង និងពង្រីកផលិតភាពកសិកម្មទាំងបរិមាណ និងគុណភាព ដោយយកចិត្តទុកដាក់លើការងារ ការកសាង ការជួសជុល ការថែទាំ និងការ គ្រប់គ្រង ប្រព័ន្ធធារាសាស្ត្រត់គ្រប់ប្រភេទ។

ទី៣- លើកកម្ពស់អភិវឌ្ឍន៍តំបន់អេកូទេសចរណ៍ សោភណភាពទីក្រុង និងជនបទ

ទី៤- គម្រោងទាំងអស់ នៅក្នុងកម្មវិធីវិនិយោគបីឆ្នាំរំកិល (២០២៦-២០២៨) ជាផែនការសម្រាប់អនុវត្តនៅឆ្នាំ២០២៦ សូមលោក-លោកស្រី ប្រធានមន្ទីរ អង្គភាពជំរុញការអនុវត្តគម្រោងនីមួយៗឱ្យចប់តាមការកំណត់ សហការជាមួយអាជ្ញាធរមូលដ្ឋានឱ្យបានជិតស្និទ្ធ។

ទី៥- យើងត្រូវប្រើប្រាស់ឱ្យអស់លទ្ធភាពធនធាន ដែលបានពីថ្នាក់ជាតិតាមរយៈ ក្រសួង ឬ ធនធានពីដៃគូនានា ដើម្បីបន្តការអភិវឌ្ឍន៍ជារៀងរាល់ឆ្នាំ ធ្វើ
យ៉ាងណាឱ្យជីវភាពរស់នៅរបស់ប្រជាពលរដ្ឋទាំងអស់មានភាពប្រសើរឡើង និងចូលរួមដោះស្រាយបញ្ហាប្រឈមនៅមូលដ្ឋានឱ្យបានទាន់ពេលវេលា។

ទី៦- លោកអភិបាលក្រុង ស្រុក លោក លោកស្រីប្រធានមន្ទីរ អង្គភាពជុំវិញខេត្ត និងស្ថាប័នពាក់ព័ន្ធផ្សេងទៀតត្រូវរួមគ្នា ក្នុងការពិនិត្យ និងជួសជុលបន្ទាន់ នូវហេដ្ឋារចនាសម្ព័ន្ធ ដែលរដ្ឋបាលក្រុង ស្រុក មន្ទីរ អង្គភាព បានលើកគម្រោង បន្ទាប់ពីរដូវវស្សាត្រូវបញ្ចប់ ដើម្បីបង្កបរិយាកាសងាយស្រួល ជូនដល់បងប្អូនប្រជាពលរដ្ឋរបស់យើងដែលកំពុងប្រមូលផលកសិកម្ម។

ទី៧- លោកអភិបាលក្រុង ស្រុក លោក លោកស្រីប្រធានមន្ទីរ អង្គភាពពាក់ព័ន្ធ ត្រូវខិតខំ និងយកចិត្តទុកដាក់ក្នុងការដឹកនាំអនុវត្តគោលនយោបាយ ភូមិ ឃុំ សង្កាត់ មានសុវត្ថិភាពឱ្យបានកាន់តែល្អប្រសើរនៅតាមមូលដ្ឋាន។

ទី៨- ក្រុមការងារកសាងផែនការ ត្រូវយកឯកសារនេះទៅកែតម្រូវពាក្យពេចន៍ បន្ថែមទៅតាមគោលបំណងរបស់កិច្ចប្រជុំថ្ងៃនេះ ហើយដាក់ជូនក្រុមប្រឹក្សា
ខេត្ត ពិនិត្យ និងអនុម័ត ទៅតាមប្រតិទិនការងារដែលបានកំណត់។ ជាកិច្ច ការបន្តក្រុមការងារត្រូវបោះពុម្ភ ជាឯកសារផ្លូវការសម្រាប់រដ្ឋបាលខេត្ត និង ចែកជូនគ្រប់អ្នកពាក់ព័ន្ធ ដើម្បីយកទៅអនុវត្តឱ្យបានជោគជ័យ ក្នុងឆ្នាំ២០២៦ខាងមុខ។

ទី៩- បន្ទាប់ពីកម្មវិធីវិនិយោគបីឆ្នាំរំកិលរបស់ខេត្តត្រូវបានអនុម័ត គ្រប់ស្ថាប័នឃើញថា មន្ទីរ-អង្គភាពជំនាញពាក់ព័ន្ធត្រូវ៖ តាមដានការអនុវត្តរាល់គម្រោង/សកម្មភាព ទាំងអស់ដែល មន្ទីរ-អង្គភាពជំនាញ អង្គការនានាជារៀងរាល់ថ្ងៃ/ខែ ដើម្បី ធានាថាគម្រោងទាំងអស់ ត្រូវបានអនុវត្ត ឬការផ្តល់សេវា ប្រព្រឹត្តទៅតាម ស្ដង់ដារ និងពេលវេលាកំណត់ និងធ្វើការវាយតម្លៃ រាល់គម្រោងទាំងនោះឱ្យ តើការវិនិយោគកន្លងមកបានផ្តល់តម្លៃសមស្របតាមតម្រូវការ របស់ប្រជាពលរដ្ឋដែរឬទេ? ហើយត្រូវធ្វើការកែសម្រួល ឬដាក់បញ្ចូល គម្រោងអាទិភាពថ្មីអ្វីខ្លះ ទៅក្នុងកម្មវិធីវិនិយោគបីឆ្នាំរំកិលរបស់ខេត្តសម្រាប់ ឆ្នាំបន្ទាប់។ ការប្រើប្រាស់សូចនាករត្រឹមត្រូវ គឺជាគន្លឹះដើម្បី ធ្វើឱ្យការតាមដាន និងវាយតម្លៃកម្មវិធីវិនិយោគបីឆ្នាំរំកិលមានប្រសិទ្ធភាព៕SRP

លោក អ៉ឹង គឹមលាង អភិបាលរងខេត្តសៀមរាប បានណែនាំដល់មន្ត្រីពាក់ព័ន្ធទាំងអស់ ត្រូវតែទប់ស្កាត់ជាដាច់ខាតនូវបទល្មើសនេសាទគ្រប់ប្រភេទ ជាពិសេសការប្រើប្រាស់ឧបករណ៍នេសាទខុសច្បាប់ដូចជា ឈ្នាងអូសលៀសដោយកម្លាំងម៉ាស៊ីន និងការដឹកជញ្ជូនលៀសខុសច្បាប់ ក្នុងរដូវបើកនេសាទឆ្នាំ២០២៥ នេះ ដើម្បីធានាបាននូវការអភិរក្សធនធានជលផលនៅបឹងទន្លេសាប។

លោកក៏បានជំរុញយ៉ាងមុតមាំដល់មន្ទីរជំនាញអាជ្ញាធរមូលដ្ឋាន និងកងកម្លាំងសមត្ថកិច្ចពាក់ព័ន្ធ ត្រូវអនុវត្តវិធានការនេះឱ្យបានតឹងរ៉ឹងបំផុត ដើម្បីធានាបាននូវភាពសម្បូរបែបនៃធនធានជលផល ដូចជាប្រភេទត្រីកម្រ និងដែលជិតផុតពូជ និងរក្សាបាននូវធនធានជលផល ធនធានជីវចម្រុះ និងប្រព័ន្ធអេកូឡូស៊ី សម្រាប់ប្រើប្រាស់យូរអង្វែង។ ជាពិសេសចូលរួមលើកកម្ពស់កម្រិតជីវភាពរស់នៅរបស់ប្រជានេសាទ និងធានាបាននូវសន្តិសុខស្បៀងសម្រាប់ជាកេរមរតកបន្តដល់កូនចៅជំនាន់ក្រោយៗ។

លោកមានប្រសាសន៍ណែនាំយ៉ាងដូច្នេះក្នុងឱកាស
តំណាងឯកឧត្តម ប្រាក់ សោភ័ណ អភិបាលខេត្តសៀមរាប ដឹកនាំកិច្ចប្រជុំពិភាក្សា និងពង្រឹងការចាត់វិធានការការពារ និងទប់ស្កាត់បទល្មើសនេសាទ ក្នុងភូមិសាស្ត្រក្រុងស្រុកទាំង៦ ជុំវិញតំបន់បឹងទន្លេសាប ខេត្តសៀមរាបនារសៀលថ្ងៃទី៤ ខែធ្នូ ឆ្នាំ២០២៥។

លោក ធិននី សុទ្ធី នាយខណ្ឌរដ្ឋបាលជលផលសៀមរាប បានបញ្ជាក់ថា ក្នុងរយៈពេល ១២ខែ ឆ្នាំ២០២៥ កម្លាំងចម្រុះដែលដឹកនាំដោយខណ្ឌរដ្ឋបាលជលផលសៀមរាប រួមជាមួយកងកម្លាំងយោធា ក្រុមអន្តរាគមន៍ថ្នាក់ជាតិ និងអាជ្ញាធរមូលដ្ឋាន បានចុះទប់ស្កាត់ និងលុបបំបាត់បទល្មើសជលផលសរុបចំនួន ៤១៨ ករណី។ ក្នុងចំណោមករណីទាំងនោះ ក្រុមការងារបានបំផ្លាញចោលនៅនឹងកន្លែង ៣៨០ ករណី, ពិន័យអន្តរការណ៍ ១៦ ករណី, បញ្ជូនសំណុំរឿងទៅតុលាការ ២២ ករណី និងឧបករណ៍ឈ្នាងអូសលៀសខុសច្បាប់ ៣១ ករណី៕SRP

បែកធ្លាយរឿង ឧត្ដមសេនីយ៍​ទោ​ គង់​ វុទ្ធី​ ពាក់ព័ន្ធ​ឆបោក​លុយ​៥៣ម៉ឺន​ដុល្លារ​ មួយករណីទៀត​

នៅថ្ងៃទី 5 ខែក្នុងឆ្នាំ 2025 នេះមានការបែកធ្លាយរឿងអាស្រូវ ឧត្ដមសេនីយ៍​ទោ​ គង់​ វុទ្ធី​ អគ្គនាយក​រងនៃ​ អគ្គនាយកដ្ឋាន​អត្តសញ្ញាណ​កម្ម​ ពាក់ព័ន្ធ​ឆបោក​លុយ​៥៣ម៉ឺន​ដុល្លារ​ មួយករណីទៀត​ថែមទៀត។

បើតាមលោកផែង វណ្ណៈ បានទម្លាយថាឧត្ដមសេនីយ៍​ទោ​ គង់​ វុទ្ធី​ អគ្គនាយក​រងនៃ​ អគ្គនាយកដ្ឋាន​អត្តសញ្ញាណ​កម្ម​ ដែល​មានរឿងអាស្រូវ​ឆបោក​លុយជនរងគ្រោះ​ ២លានដុល្លារ​ មិនទាន់​ដោះស្រាយ​ចប់​ផង​ ឥលូវ​មាន​ជនរងគ្រោះ​ម្នាក់​ទៀត​ចេញ​មុខមក​ផ្ដល់​ព័ត៌មាន​មកអោយខ្ញុំ​បាទ​ ពាក់ព័ន្ធ​នឹង​ករណី​ឆបោក​លុយ​ជនរងគ្រោះ​ ៥៣ម៉ឺន​ដុល្លារ​ មួយករណីទៀត​។

លោកផែង វណ្ណៈ បានបន្តថា លោកឧត្ដមសេនីយ៍​ទោ​ គង់​ វុទ្ធី​ បាន​គំរាម​ជនរងគ្រោះ​ថា​ សម្បត្តិ​ត្រឹម​ អា​ ផែង​ វណ្ណៈ​ ធ្វើ​ អញមិនបែកផង​ ហែងនិងស្អី​ ចង់​លេងជាមួយ​អញ​ ? ខ្សែ​អញនៅ​មហាផ្ទៃ​ ហែងចង់​ប្ដឹង​ទៅណា​ ប្ដឹង​ទៅ​ អាផែង​ វណ្ណៈ​ ជិតជាប់គុកហេីយ​ ។ លោកផ្កាយ២គង់​ វុទ្ធី​ និយាយ​ត្រូវ​ សម្បត្តិ​ត្រឹម​ខ្ញុំ​ជា​អ្នកកាសែត​និង​ធ្វើ​ស្អី​គាត់​ តាមពិត​ខ្ញុំ​អត់មាន​សិទ្ធិ​អី​មែន​ តែខ្ញុំ​មានសិទ្ធិ​ផ្សាយ​អំពី​ទង្វើ​ថោកទាប​របស់​ ឧត្ដមសេនីយ៍​ទោ​ គង់​ វុទ្ធី​ បាន​គ្រប់​ពេល​។

តាមពិត​ទៅ​ខ្ញុំ​ស្គាល់​ថ្នាក់ដឹកនាំ​ក្រសួង​មហាផ្ទៃ​ គាត់​ជា​ថ្នាក់ដឹកនាំ​ល្អ​ មិនការពារ​ មន្ត្រី​ខិលខូច​ទេ​ ទង្វើ​បុគ្គល​ គង់​ វុទ្ធី​ កាន់តែ​ធ្វើ​អោយ​គេស្គាល់​ក្រយ៉ៅច្បាស់ថា​ លោក​ជាជនឆបោក​ជ្រកក្រោម​ស្លាក​ស្ថាប័ន​តែ​ប៉ុណ្ណោះ​។

គង់​ វុទ្ធី​ ត្រូវ​ចាំ​អោយច្បាស់​ កុកអាចភ្លេចជុង​ តែជុង​មិនភ្លេច​គុកទេ​។

ជុំវិញការបង្ហោះសាររបស់លោកផែងវណ្ណៈយ៉ាងដូច្នេះទីភ្នាក់ងារសារព័ត៌មានសៀមរាប ប៉ុស្តិមិនទាន់ទទួលបានការបំភ្លឺពីឧត្ដមសេនីយ៍​ទោ​ គង់​ វុទ្ធី​ អគ្គនាយក​រងនៃ​ អគ្គនាយកដ្ឋាន​អត្តសញ្ញាណ​កម្ម​ នៅឡើយទេរហូតដល់ម៉ោងផ្សាយនេះដោយមិនមានលេខទំនាក់ទំនង៕SRP

សម្ដេចតេជោហ៊ុន សែន រម្លឹកបទចម្រៀង «ឱភ្នំពេញអើយ» នឹងចាត់ទុកជាបទចម្រៀងប្រវត្តិសាស្ត្រ

ខាងក្រោមនេះជាសំណេរទាំងស្រុងរបស់សម្ដេចតេជោហ៊ុន សែន៖ ម្សិលមិញខួបលើកទី៤៧នៃថ្ងៃបង្កើតរណសិរ្សសាមគ្គីសង្រ្គោះជាតិកម្ពុជា(២ធ្នូ១៩៧៨-២ធ្នូ២០២៥)។
នៅសល់ជាង១ខែទៀតនឹងឈានដល់
ខួបលើក៤៧នៃថ្ងៃជ័យជំនះលើរបប
ប៉ុល ពត(៧មករា១៩៧៩-៧មករា២០២៦)។
ចម្រៀងបទ(ឱភ្នំពេញអើយ)នៅតែជា
ការចងចាំរបស់ប្រជាជនកម្ពុជា។ សម្រាប់ខ្ញុំចម្រៀងមួយបទនេះស្តាប់ហើយហូរទឹកភ្នែកដោយការរំភើប។
ទឹកដៃនិពន្ធទំនុកច្រៀងដោយបង
កែវ ចិន្តា និងការរៀបចំភ្លេង និងដឹកនាំ
ផលិតដោយបង ជ័យ សោភា និងច្រៀងដោយក្មួយ សូ ចន្នី ពិតជាគួរឲ្យ
គោរព និងកោតសរសើរ។
ខ្ញុំសូមយកឱកាសនេះ សូមអភ័យទោស
ពីវិញ្ញាណក្ខន្ធបង កែវ ចិន្តា បង ជ័យ សោភា
ក៏ដូចកូនៗ និងចៅរបស់បងទាំងពីរ ដែលមុននេះខ្ញុំយល់ច្រឡំថាគ្រួសារបង កែវ ចិន្តា និងគ្រួសារបង
ជ័យ សោភា ដណ្តើមសិទ្ធិធ្វើជាម្ចាស់
បទ(ឱភ្នំពេញអើយ)ប៉ុន្តែនៅពេលខ្ញុំ
ឃើញការបង្ហោះតាម Facebook របស់ឈ្មោះ chun sothy ដែលនៅ
ក្នុងនោះបានបញ្ជាក់ថាម្ចាស់ស្នាដៃបទ
«ឱភ្នំពេញអើយ» គឺលោកអ៊ុំ <ម៉ម ធឿន>…..បានទទួលមរណភាពហើយ។ ដំបូងឡើយខ្ញុំគិតថាអាចមាន
បទ ដែលមានចំណងជើងដូចគ្នា ប៉ុន្តែពិនិត្យខ្លឹមសារខាងក្រោមថា បទនេះនិពន្ធតាំងពីនៅឡុងយ៉ាវ ដែលជាទីតាំង
ខ្ញុំបង្កើតកងទ័ព និងជាមេបញ្ជាការខ្ពស់
ជាងគេ ដែលនៅទីនោះមានអង្គភាព
សិល្បះទាំងបុរាណ ទាំងសម័យ និងបង
ជ័យ សោភា ជាជំនួយការខ្ញុំ គឺជារឿង
ដែលមិនអាចទៅរួចឡើយ។ (សិល្បះ
កងទ័ពសព្វថ្ងៃកកើតពីខែកក្កដា ឆ្នាំ១៩៧៨
ដែលមានខ្ញុំជាបង្កើត)
ចំណុចកាន់តែច្បាស់បទនេះមិនអាច
និពន្ធមុនរំដោះភ្នំពេញបានឡើយ
ព្រោះក្នុងខ្លឹមសារនៃបទចម្រៀងមានពាក្យ (ឱភ្នំពេញអើយបីឆ្នាំនឹកអ្នកក្នុង
ឱរា) (ភ្នំពេញដួងព្រលឹងជាទីស្នេហា
បីឆ្នាំខ្លោចផ្សា តែអ្នករក្សាបានប្រវត្តិថ្លៃថ្លា
អង់អាចក្លាហាន) (អើយឱភ្នំពេញអើយ
ទុក្ខសោកអ្នកបានស្បើយ ខ្ញុំជួបអ្នកវិញ
ហើយ ឱដួងព្រលឹងអើយ ភ្នំពេញអើយ
អើយភ្នំពេញអើយ)
ខ្លឹមសារក្នុងបទចម្រៀងមានន័យគ្រប់
គ្រាន់ថាបទចម្រៀងនេះនិពន្ធក្រោយ
ភ្នំពេញត្រូវបានរំដោះមិនមែននៅ
ឡុងយ៉ាវ ឆ្នាំ១៩៧៨ នោះទេ។
ម្យ៉ាងទៀតចម្រៀងនេះមិនបានឮចាក់
ផ្សាយមុនថ្ងៃ៧ មករា ១៩៧៩ ផងដែរ។
មកនិយាយពីប្រវត្តិបទនៃចម្រៀង
(ឱភ្នំពេញអើយ)វេលាថ្ងៃត្រង់ថ្ងៃ៧ មករា ១៩៧៩ ភ្នំពេញ
ត្រូវបានរំដោះខ្ញុំមិនប្រាកដថាបង
កែវ ចិន្តា សរសេរនៅពេលល្ងាច ឬ
ពេលយប់៧មករា នោះទេ ព្រោះពេលនោះកំពុងប្រជុំមហាសន្និបាតបក្សលើកទី៣។
ល្ងាចថ្ងៃ៨ មករា មានការប្រជុំដើម្បី
ចាត់តាំងរដ្ឋាភិបាល ដែលហៅថាក្រុមប្រឹក្សាប្រជាជនបដិវត្តកម្ពុជា តែបង កែវ ចិន្តា មិនបានចូលរួមប្រជុំទេ តែបងកែវ ចិន្តា ក៏ត្រូវបានតែងតាំងជារដ្ឋមន្ត្រីឃោសនាការព័ត៌មាន និងវប្បធម៌។
យប់ថ្ងៃ៨ មករា ខ្ញុំត្រឡប់ទៅចូលរួមបិទ
មហាសន្និបាតបក្សវិញ ខ្ញុំអង្គុយទទួល
ទានបាយជាប់ជាមួយបង កែវ ចិន្តា គាត់
ក៏បានដឹងរឿងគាត់ធ្វើរដ្ឋមន្ត្រីដែរ ព្រោះគាត់ជាអ្នកគ្រប់គ្រងវិទ្យុផ្សាយ
សម្លេងរណសិរ្សតាំងថ្ងៃ២ ធ្នូ១៩៧៨ មកម្ល៉េះ។
ព្រឹកថ្ងៃ៩ មករា ១៩៧៩ មានការប្រជុំ
រដ្ឋាបាលលើកដំបូង ដើម្បីបែងចែក
ភារកិច្ច។
ក្រោយប្រជុំចប់ឃើញឃើញបង
ជ័យ សោភា យូរម៉ាញ៉េតូហ្វូនយ៉ាងធំ
ទៅដល់ដើម្បីឆ្លងយោបល់បង កែវ ចិន្តា ។ បង កែវ ចិន្តា ឃាត់ខ្ញុំឲ្យនៅជាមួយគាត់។ ឯបង ជ័យ សោភា និយាយ
មកកាន់ខ្ញុំថាបង ហ៊ុន សែន នៅជួយ
យោបល់ផង។ ទម្លាប់បង ជ័យ សោភា
ហៅខ្ញុំថាបងទោះគាត់មានអាយុច្រើន
ជាងខ្ញុំក៏ដោយ។
បង ជ័យ សោភា ចាក់បទឱភ្នំពេញអើយ
៣ដង។ ក្រោយស្តាប់រួចបង កែវ ចិន្តា
ឲ្យបន្ថែមភ្លេង ខ្ញុំមិនច្បាស់ទេ តែដូចជា
បន្ថែមសម្លេងទ្រ។
ខ្ញុំមិនច្បាស់ថាបង ជ័យ សោភា ធ្វើតាមការណែនាំរបស់បង កែវ ចិន្តា ឬអត់នោះទេ។ មានមនុស្សតែម្នាក់គត់ដែល
អាចបំភ្លឺបាននោះ គឺក្មួយ សូ ចន្នី។ ប្រសិន
បើគាត់ច្រៀងថតឡើងវិញមានន័យថា
បង ជ័យ សោភា ធ្វើតាមបង កែវ ចិន្តា
ប្រសិនបើបើមិនថតឡើងវិញ អាចថត
តាមក្រោយទៀត ព្រោះចម្រៀងនេះ
ត្រូវប្រញាប់ចាក់ផ្សាយក្រោយថ្ងៃរំដោះ។
ដូចនេះតាមការស្មានរបស់ខ្ញុំបង
កែវ ចិន្តា សរសេរបទចម្រៀងនៅល្ងាច
ថ្ងៃ៧ ឬយប់ថ្ងៃ៧ មករា។ ប្រគល់ឲ្យបង
ជ័យ សោភា រៀបភ្លេង និងផលិតនៅថ្ងៃ៨ ឬយប់ថ្ងៃ ៨មករា និងព្រឹកថ្ងៃ៩ មករា
១៩៧៩ ម៉ោងជាង១០ព្រឹក ឆ្លងយោបល់
បង កែវ ចិន្តា។
តើចម្រៀងនេះចាប់ផ្សព្វផ្សាយអ្នក
និពន្ធនៅពេលណា?
ពេលចាក់ផ្សាយដំបូងមិនមាននិយាយ
ពីអ្នកនិពន្ធទេ។ ចូលដល់ខែកញ្ញា ឆ្នាំ១៩៧៩
គណប្រតិភូជាន់ខ្ពស់ដឹកនាំ
ដោយសម្តេច ហេង សំរិន ដែលរូបខ្ញុំ
និងបង កែវ ចិន្តា អមដំណើរផងដែរទៅ
ទស្សនកិច្ចនៅឡាវ។
ក្នុងពិធីជប់លៀងអ្នកចម្រៀងឡាវច្រៀងបទឱភ្នំពេញអើយដោយអ្នក
ឧទ្ទេសនាមបកជាភាសារខ្មែរថាបទ
(ឱភ្នំពេញអើយនិពន្ធដោយសមមិត្ត
កែវ ចិន្តា)
តាំងពីពេលនោះមកមិនមានអ្នកណា
ទាមទារសិទ្ធិជាអ្នកនិពន្ធទេ រាប់ទាំង
ជ័យ សោភា ផងដែរ។
ខ្ញុំសូមនិយាយទៅកាន់កូន ឬចៅលោក
ម៉ម ធឿន វិញម្តង។ ប្រហែលអ្នកផ្សាយ
ព័ត៌មានខុសដោយអចេតនា ដែលថា
លោក ម៉ម ធឿន ជាម្ចាស់បទចម្រៀង
(ឱ ភ្នំពេញអើយ) ខ្ញុំជាអ្នកគ្រប់គ្រងលើឪពុករបស់ក្មួយៗ និងចៅៗ យើងជាយោធា
មិនអាចយកចម្រៀងទៅថតនៅអង្គភាពស៊ីវិលបានទេ បើគ្មានការអនុញ្ញាតិពីខ្ញុំនាពេលនោះ។
ខ្ញុំសូមលោក chun sothy ធ្វើការ
កែតម្រូវព័ត៌មាន ដែលបានផ្សាយខុស។
ការខិតខំស្រាវជ្រាវ និងពន្យល់របស់
ខ្ញុំ គឺដើម្បីជៀសវាងការយល់ច្រឡំទៅ
ថ្ងៃក្រោយព្រោះបទចម្រៀង
(ឱភ្នំពេញអើយ) ជាបទចម្រៀងប្រវត្តិសាស្ត្រ៕SRP