ខេត្តសៀមរាប៖ក្រុមហ៊ុនកូកាកូឡាប្ដេជ្ញាថា ខ្លួននឹងចូលរួម ជាមួយអាជ្ញាធរជាតិអប្សរា ដើម្បីអភិវឌ្ឍ ការងារបរិស្ថាន ក្នុងរមណីយដ្ឋានអង្គរឱ្យកាន់តែល្អប្រសើរ ដែលជាផ្នែកមួយ ជួយអភិវឌ្ឍសង្គមជាតិ។

ការប្ដេជ្ញា របស់ក្រុមហ៊ុនកូកាកូឡា នេះ ក្នុងពេល ប្រគល់អណ្ដូងទឹក ដើរដោយថាមពល ពន្លឺព្រះអាទិត្យ មួយគ្រឿង ដល់ អាជ្ញាធរជាតិអប្សរា ដើម្បីស្រោចស្រព ថ្នាលបណ្ដុះកូនឈើ នៅឃុំលាងដៃ ស្រុកអង្គរធំ នៅថ្ងៃទី ១៩ ខែកុម្ភៈ នាព្រឹកមិញនេះ។

នាយកផ្នែកច្បាប់និងកិច្ចការសាធារណៈ ប្រចាំប្រទេសនៃក្រុមហ៊ុនកូកាកូឡា លោក រស់ សោភា បានថ្លែងប្រាប់បណ្ដាញព័ត៌មានថាក្រុមហ៊ុនពិតជាមានសេចក្ដី រីករាយណាស់
ដែលបានធ្វើការជាមួយ អាជ្ញាធរជាតិអប្សរា ក្នុងបំណងអភិវឌ្ឍ ការងារបរិស្ថាន ក្នុងតំបន់នេះ ឱ្យកាន់តែមានភាពបៃតង និងទាក់ទាញភ្ញៀវទេសចរបន្ថែមទៀត។
លោក រស់ សោភា បានថ្លែងបន្តថា អណ្ដូងទឹកដើរដោយ ថាមពល ពន្លឺព្រះអាទិត្យ នេះ គឺជាបច្ចេកវិទ្យាចុងក្រោយ ដែលអាចបូមទឹក ដោយស្វ័យប្រវត្តិ ងាយស្រួល សម្រាប់ស្រោចស្រពកូនឈើ។

លោកជឿជាក់ថា អណ្ដូងទឹកនេះ នឹងរួមចំណែកធ្វើឱ្យតំបន់អង្គរ មានភាពបៃតង ហើយស្របតាមគោលនយោបាយ របស់ រាជរដ្ឋាភិបាល ក្នុងការទាក់ទាញភ្ញៀវទេសចរ ចូលមកកម្សាន្ត ក្នុងតំបន់បេតិកភណ្ឌ បូកនិងភាពបៃតង។

បើតាម លោក រស់ សោភា ក៏បង្ហើបពីគម្រោងកិច្ចសហប្រតិបត្តិការ ជាបន្តបន្ទាប់ ទៅថ្ងៃខាងមុខ ជាមួយ អាជ្ញាធរជាតិអប្សរា ដូចជាគម្រោងបែងចែកសំរាម ការគ្រប់គ្រងសំរាម ឱ្យបានត្រឹមត្រូវ ដើម្បីយកទៅកែច្នៃឡើងវិញ និងគម្រោងពង្រឹងគុណភាព ម្ហូបអាហារ ឱ្យបានស្ដង់ដា ផ្គត់ផ្គង់ដល់ភ្ញៀវទេសចរ ក្នុងន័យឱ្យភ្ញៀវទេសចរ មានទំនុកចិត្ត លើម្ហូបអាហារទាំងនោះ។

ក្នុងពិធីប្រគល់ អណ្ដូងទឹក ដើរដោយថាមពល ពន្លឺព្រះអាទិត្យ នេះ អ្នកនាំពាក្យអាជ្ញាធរជាតិអប្សរា លោក ឡុង កុសល បានមានប្រសាសន៍ថា ក្រៅពីកិច្ចការអភិរក្សប្រាសាទ ក្នុងនោះ ការងារបរិស្ថាន គឺជាកិច្ចការស្នូលមួយ ដ៏សំខាន់របស់ អាជ្ញាធរជាតិអប្សរា។ ដូច្នេះការស្ដារឡើងវិញ នូវគម្របព្រៃឈើគឺជាកិច្ចការមួយដ៏ចាំបាច់បំផុត។

លោកឡុង កុសល ថា អណ្ដូងទឹក ដែលផ្តល់ជូនដោយ ក្រុមហ៊ុនកូកាកូឡា នៅពេលនេះ គឺជានិមិត្តរូបមួយនៃកិច្ចសហប្រតិបត្តិការ រួមគ្នា ធ្វើយ៉ាងណាចូលរួមកាត់បន្ថយ ការបំពុលបរិស្ថាន មួយផ្នែកផងដែរ។ ព្រោះកន្លងមកតំបន់នេះ មិនមានអគ្គិសនីចូលដល់ ហើយត្រូវប្រើម៉ាស៊ីនភ្លើងបូមទឹកសម្រាប់ស្រោចកូនឈើ។

សូមជម្រាបថាតំណាងក្រុមហ៊ុនកូកាកូឡា និងថ្នាក់ដឹកនាំ អាជ្ញាធរជាតិអប្សរា ក៏បានដាំកូនឈើទុកជាអនុស្សាវរីយ៍ នៅបរិវេណថ្នាលបណ្ដុះកូនឈើផងដែរ៕SRP

ខេត្តកំពង់ចាម៖លោកអ៊ុន ចាន់ដា អភិបាលខេត្តកំពង់ចាម នៅថ្ងៃទី១៩ ខែកុម្ភៈ ព្រឹកមិញនេះ បានចុះពិនិត្យស្ថានភាព ទឹកស្រោចស្រព និងការបង្កបង្កើន ផលស្រែប្រាំង របស់ប្រជាកសិករ​ នៅតំបន់​បឹងជ្រោយ ស្ថិត​ក្នុង​ឃុំសូទិព្វនស្រុកជើងព្រៃ។

សូមជម្រាបថាដោយអនុវត្ត តាមសេចក្តីណែនាំរបស់ អភិបាលខេត្តកំពង់ចាម​ នៅថ្ងៃទី១៨ ខែកុម្ភ:​ ម្សិលមិញ លោក​ ផេន​ សុផល​ អភិបាលស្រុកបាធាយ​ បានដឹកនាំ​មន្ត្រី​ពាក់ព័ន្ធ​ និង​អាជ្ញាធរឃុំ​ ចុះពិនិត្យ ការកាយ ដាក់លូរំដោះទឹក នៅតំបន់ភូមិស្ទឹងឆ្វេង ឃុំច្បារអំពៅ​ ដេីម្បីសម្រួល ការរំដោះទឹក រវាងប្រជាពលរដ្ឋ ស្រុកបាធាយ និងស្រុកជេីងព្រៃ​ សម្រាប់ធ្វើស្រែប្រាំងរបស់ ប្រជាពលរដ្ឋ ទាំងបីឃុំខាងលើ ប្រមាណជាង ១០០០ហិកតា។

ជាមួយគ្នា​នេះដែរ លោក អ៊ុម វិបុល ប្រធានមន្ទីរធនធានទឹកនិងឧតុនិយម ក៏បាន សហការជាមួយអាជ្ញាធរ ស្រុកជើងព្រៃ ស្រុកបាធាយ និងស្រុកកងមាស ដោយមានការចូលរួមពីអាជ្ញាធរឃុំពាក់ព័ន្ធ ចំនួន៧ ធ្វើការបើកផ្លូវទឹក ព្រែកស្ទឹងឆ្វេងទៅតាមសំណើ និងសំណូមពរ របស់ប្រជាពលរដ្ឋផងដែរ។

បើតាមមន្ទីរធនធានទឹកខេត្តបានបញ្ជាក់ថា ការចុះដោះស្រាយនេះ ជាលទ្ធផល ក្រុមការងារសម្រេចបាន ទប់ព្រែក ដើម្បីឆ្លងកាត់ប្រវែង ៣៥.៤៩m បើកមុខ២ m នៅចំណុចខ្លាក្រទាម ឃុំផ្តៅជុំ ស្រុកជើងព្រៃ នឹងទប់ព្រែកដើម្បីឆ្លងកាត់ប្រវែង ៣៥.៤០m បើកមុខ២ m នៅ​ចំណុច​ក្រពើប្រជុល ព្រំប្រទល់ ស្រុកជើងព្រៃ និងស្រុកបាធាយ។​ ព្រមទាំង​ទប់ព្រែកដើម្បីឆ្លងកាត់ប្រវែង ៣៥.៤០m ពីមុនបើកមុខលូ១ m មួយជួរ ឥឡូវក្រុមការងារ តម្រូវអោយបើកមុខលូ១ m មួយជួរ​បន្ថែម​ទៀត នៅ​ចំណុច​អន្លុងជ្រៃ ឃុំច្បារអំពៅ ស្រុកបាធាយ។​ នឹងទប់ព្រែកដើម្បីឆ្លងកាត់ប្រវែង២០.២៥ m ពីមុនដាក់លូមុខកាត់០.៨ m មួយជួរ ឥឡូវក្រុមការងារតម្រូវអោយដាក់លូមុខកាត់០.៨ m ចំនួនពីរជួរន្ថែមទៀត ត្រង់ចំណុចស្ទឹងឆ្វេង ឃុំច្បារអំពៅ ស្រុកបាធាយ​ផងដែរ៕SRP

ខេត្តសៀមរាប៖លោក ឈាវ មុន្និន ប្រធានសមាគមចលនាយុវជនកម្ពុជា «ក្រុម១៥៧» សាខាក្រុងសៀមរាប និងក្រុមគ្រួសារ នៅថ្ងៃសុក្រ ០៨កើត ខែផល្គុន ឆ្នាំជូត ទោសក័ ព.ស ២៥៦៤ ត្រូវនិងថ្ងៃទី ១៩ ខែកុម្ភ: ឆ្នាំ ២០២១ នេះ បានធ្វើបុណ្យគម្រប់ខួប១១ឆ្នាំ ជូនអ្នកម្តាយ ដែលបានចែកឋានទៅ ព្រមទាំងធ្វេីពិធីបួងសួងសុំសេចក្តីសុខ សេចក្ដីសប្បាយ ជូនដល់ក្រុមចលនាយុវជន១៥៧ ទូទាំងប្រទេស ជាពិសេសជូនចំពោះ លោកប្រធាន មុឹង ពន្លក អោយរួចផុតពីជំងឺកូវីដ-១៩នេះ។

ពិធីនេះ លោក ឈាវ មុន្និន បានចំណាយថវិកាផ្ទាល់ខ្លួននិងគ្រឿងទេយ្យទាន មួយចំនួន ប្រគេនដល់ព្រះសង្ឃ ចំនួន៦១ អង្គ និង លោកយាយជី ចំនួន១១នាក់ សរុបជាទឹកប្រាក់ប្រមាណ ៥២៥០ដុល្លារ។

ឆ្លៀតក្នុងឱកាសនេះ លោក ឈាវ មុន្និន បានបួងសួង ជូនផលបុណ្យកុសល ដល់បងប្អូនទាំងអស់គ្នា ជួបប្រទះតែពុទ្ធពរទាំង៤ ប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡេីយ៕SRP

ខេត្តសៀមរាប៖លោកជំទាវ ទាង អេង ទៀ សីហា អនុប្រធានគណៈកម្មាធិការសាខាកាកបាទក្រហមកម្ពុជា ខេត្តសៀមរាប និង សហការី បានអញ្ជើញចុះជួបសំណេះសំណាលសួរសុខទុក្ខ និង នាំយកអំណោយមនុស្សធម៌ផ្ដល់ជូន មាតា ទារក ដែលទើបនឹងសម្រាលកូនតូចចំនួន៨០នាក់ ដើមី្បអបអរសាទរទិវាជាតិសុខភាពមាតា ទារក និងកុមារ។

ពិធីធ្វើនៅថ្ងៃទី ១៩ កុម្ភៈ ព្រឹកមិញនេះនៅមណ្ឌលសុខភាពបាគង ស្រុកប្រាសាទបាគង ខេត្តសៀមរាប។

សូមជម្រាបថាពលរដ្ឋដែលមកទទួល
អំណោយមនុស្សធម៌ នេះ មកពីបណ្ដាឃុំក្នុងស្រុកប្រាសាទបាគង ដោយម្នាក់ៗទទួលបាន៖អង្ករ ៣០គីឡូក្រាម ត្រីខ១យូរ , ឃីត១កញ្ចប់ , ទឹកដោះគោខាប់ ២កំប៉ុង ស្ករស ១គីឡូក្រាម , មី១កេស ,សាប៊ូក្រអូប ២ដុំ ,អាវបំបៅដោះកូន ១ , សម្ភារទារក ១កញ្ចប់ និងថវិកាចំនួន៥ម៉ឺនរៀល ផងដែរ៕SRP

ខេត្តត្បូងឃ្មុំ៖សម្ដេចហេង សំរិន រំលឹកថាតំបន់នេះ កន្លែងនេះ គ្មានផ្លូវគមនាគមន៍ មកដល់ទេ សុទ្ធតែព្រៃ គ្មានសាលា គ្មានផ្លូវ ហើយប្រជាជននៅតំបន់កន្លែងនេះ គ្មានចំណេះដឹង កាលនោះចេះតែប្រុសៗទេ ស្រ្តីគ្មានចំណេះដឹងទេ ហ្នឹងសម័យមុន។ បើបានរៀនសូត្រ គឺរៀនតាមវត្ត ក្នុងកុដិ សាលាឆាន កាលនោះមិនងាយចេះទេ។

ភាគច្រើនអ្នកបន្តបានរៀនសូត្រ មានតែអ្នកបួសរៀន ទើបបានបន្តសិក្សាជាមួយវិស័យព្រះពុទ្ធសាសានាជាបន្តបន្ទាប់រហូតបច្ចុប្បន្ន។

ដោយសារកំណើនសិស្ស ពីមួយថ្ងៃទៅមួយថ្ងៃ ទើបថ្ងៃនេះសម្ដេចហេង សំរិន ប្រធានរដ្ឋសភានិងសម្តេចធម្មវិសុទ្ធវង្សា សៅទី ហេងសំរិនសម្រេចផ្តល់ជូនអាគារ ទទួលបានអគារ ២ជាន់ ១២បន្ទប់ មុនគេនៅតំបន់នេះ ស្ថិតនៅក្នុងភូមិអន្លង់ជ្រៃ ឃុំកក់ ស្រុកពញាក្រែក ខេត្តត្បូងឃ្មុំ។

នេះជាចំណងដៃបន្ថែមរបស់សម្តេចជូនពលរដ្ឋក្នុងមូលដ្ឋាននេះ លើសមិទ្ធផលនិងហេដ្ឋារចនាសម្ព័ន្ធជាច្រើន ដើម្បីបម្រើផលប្រយោជន៍សាធារណៈ និងក្មេងៗជំនាន់ក្រោយ។

ក្នុងឱកាសប្រារព្ធពិធីបញ្ចុះបឋមសិក្សាសាងសង់អគារសិក្សាថ្មីនេះ នាព្រឹកថ្ងៃទី១៩កុម្ភៈឆ្នាំ ២០២១នេះ សម្តេចប្រធានរដ្ឋសភា បានធ្វើការអំពាវនាវ ដល់មាតាបិតាសិស្សទំាងអស់ ត្រូវបញ្ជួនកូនទៅសិក្សាឱ្យបានគ្រប់គ្នា។

សម្តេចបានសង្កត់ធ្ងន់ថា «បើមានសាលារៀន ប៉ុន្តែមាតាបិតាសិស្ស មិនបានបញ្ជួនកូនទៅសិក្សានោះគ្មានទេ»។ ជាមួយគ្នានេះ សម្តេចបានអំពាវនាវដល់យុវជន ដែលជាទំពាំងស្នងឬស្សី ជាអ្នកបន្តវេនក្នុងការគ្រប់គ្រងនិងអភិវឌ្ឍប្រទេសជាតិ ត្រូវខិតខំប្រឹងប្រែងរៀនសូត្រឱ្យខ្ពង់ខ្ពស់ហើយក្លាយជាយុវជនគំរូ ដែលមានលក្ខណៈសម្បត្តិគ្រប់គ្រាន់ ទាំងចំណេះដឹង និងចរិយាសម្បត្តិ ដែលនឹងក្លាយជាអ្នកដឹកនាំនៅក្នុងពេលអនាគតទាំងការគ្រប់គ្រងស្ថាប័ន ក៏ដូចជាមេគ្រួសារផងដែរ។

ឆ្លៀតឱកាសនេះ សម្តេចប្រធានរដ្ឋសភា ក៏បានជម្រាបពលរដ្ឋ អាជ្ញាធរមូលដ្ឋានពីសភាពការប្រទេសជាតិ ការីកចម្រើនរបស់សង្គមជាតិនៅក្រោមម្លប់សុខសន្តភាព ពិសេសការវិវឌ្ឍន៍ៗ នៃជំងឺកូវីដ១៩។
សម្តេចបានលើកឡើងថា រាជរដ្ឋាភិបាលបានគ្រប់គ្រងនិងដោះស្រាយ វិបត្តិនេះ បានទាន់ពេលវេលា តាមរយៈការដាក់ចេញនូវយុទ្ធសាស្រ្ត និងវិធានការណ៍ច្បាស់លាស់ ម៉ឺងម៉ាត់ ម៉ត់ចត់ និងគ្រប់ជ្រុងជ្រោយ ដូចជាកម្មវិធីជំនួយសង្គម ពិសេសការឧបត្ថម្ភសាច់ប្រាក់ ជូនគ្រួសារក្រីក្រ និងជនងាយរងគ្រោះ ក្នុងអំឡុងកូវីដ១៩ ការឧបត្ថម្ភ សាច់ប្រាក់ ពលកម្ម ជូនកម្មករបាត់បង់ការងារ ការឧបត្ថម្ភសាច់ប្រាក់ ចំពោះស្រ្តីមានផ្ទៃពោះ និងក្មេងអាយុក្រោម ២ឆ្នាំ និងវិធានការអន្តរាគមន៍ផែ្នកសេដ្ឋកិច្ច ជាដើម។

ជាមួយគ្នានេះ រាជរដ្ឋាភិបាល បានកំពុងស្វះសែងរកវ៉ាក់សំាង ការពារ មកចាក់ជួនពលរដ្ឋដោយឥតគិតប្រាក់ នៅក្នុងនោះកាលពីពេលថ្មីៗនេះ កម្ពុជាបានទទួលបានវ៉ាក់សាំងពីមិត្តចិន ប្រមាណ ៦០ ម៉ឺនដូស ហើយបានកំពុងដំណើរចាក់ជូនបុគ្គលិកអាទិភាពនានា ជាពិសេសមន្រ្តីសុខាភិបាលជួរមុខ នគរបាល និងកងកម្លំាងប្រដាប់អាវុធគ្រប់ប្រភេទ ដែលជាអ្នកប្រឈមខ្លាំង និងផ្ទាល់ទៅនឹងជំងឺកូវីដ១៩។

សម្តេចប្រធានរដ្ឋសភា បានក្រើនរំឭកចំពោះអាជ្ញាធរមូលដ្ឋានគ្រប់លំដាប់ថ្នាក់ក្នុងខេត្តត្បូងឃ្មុំ ត្រូវបន្តរួមគ្នាធ្វើអន្តរាគមន៍ ដោះស្រាយបញ្ហាពលរដ្ឋឱ្យទាន់ពេលវេលាចំបញ្ហាចំពោះមុខ ជាពិសេសត្រូវបន្តជំរុញលើកទឹកចិត្តពលរដ្ឋអនុវត្តវិធានការពារជំងីកូវីដ១៩ ឱ្យបានខ្ជាប់ខ្ជូន មិនអាចធ្វេសប្រហែសបានឡើយដោយសារសកលោក នៅតែប្រឈមនឹងជំងឺរាតត្បាតនេះរៀងរាល់ថ្ងៃនៅឡើយ៕SRP

ខេត្តបាត់ដំបង៖រដ្ឋលេខាធិការទីស្តីការគណៈរដ្ឋមន្ត្រីនិងជាជំនួយការផ្ទាល់សម្ដេចតេជោហ៊ុនសែន នាយករដ្ឋមន្ត្រី លោកដួង តារា បានបញ្ជាក់នៅលើគណនេយ្យហ្វេសប៊ុកផ្លូវការ ថា
«ជនរងគ្រោះម្នាក់សន្លប់ធំដេកលើគ្រែពេទ្យ១៤ថ្ងៃ នៅមិនទាន់ដឹងខ្លួនដោយសាគ្រោះថ្នាក់ចរាចរណ៍»។

លោកដួង តារា បានលើកឡើងបន្តថា៖កាលពីយប់មិញប្រពន្ធជនរងគ្រោះបានស្នើសុំមកខ្ញុំជួយប្តីគាត់ដែលបានរងគ្រោះថ្នាក់ចរាចរណ៍ បង្កឡើងដោយ មន្រ្តីនគរបាល។

គ្រោះថ្នាក់ចរចារណ៍នេះបានកើតឡើងកាលពីថ្ងៃទី ៦ ខែកុម្ភៈ ឆ្នាំ២០២១ ហើយមកដល់ថ្ងៃទី ១៨ ខែកុម្ភៈ ម្សិលមិញ នៅមិនទាន់បានដោះស្រាយឬសំណងអ្វីឡើយដល់ជនរងគ្រោះ។ យប់មិញ ខ្ញុំបានទាក់ទងទៅមន្រ្តីនគរបាលនៅខេត្តបាត់ដំបង សុំអោយមានការទទួលខុសត្រូវដោះស្រាយជួយជនរងគ្រោះដែលពេលនេះកំពុងសន្លប់ធំ (១៤ថ្ងៃមកហើយ) នៅមិនទាន់ដឹងខ្លួននៅឡើយ។

ទើបកាលពីព្រឹកមិញនេះ មានការសម្របសម្រួលគ្នារវាងភាគីទាំង២ ហើយក៏បានឈានដល់ការយល់ព្រមបង់និង ទទួលសំណង។ ខ្ញុំពិតជាសោកស្តាយយ៉ាងខ្លាំងចំពោះគ្រោះថ្នាក់ចរាចរណ៍នេះ ដែលកំពុងធ្វើអោយជីវិតមនុស្សម្នាក់មិនដឹងថាស្លាប់ឬរស់នៅឡើយ។

មិនថាតែប្រជាពលរដ្ឋធម្មទេ ទោះបីយើងជាមន្រ្តីរាជការក៏ដោយ គឺត្រូវបើកបរមានការទទួលខុសត្រូវ បើបង្កគ្រោះថ្នាក់ហើយគឺត្រូវទទួលខុសត្រូវដោះស្រាយអោយភាគីទាំងសង្ខាងអាចទទួលយកបានដើម្បីបញ្ចប់បញ្ហា ព្រោះថាបើមិនដោះស្រាយពេលនេះទេ ក៏ត្រូវតែដោះនៅពេលណាមួយគឺចៀសមិនផុតទេ។

គ្រោះថ្នាក់ចរាចរណ៍អាចកើតមានគ្រប់វិនាទី ប្រសិនបើមិនមានការប្រុងប្រយ័ត្នទេនោះ។ ទោះបីយើងបើកបរលើផ្លូវត្រឹមត្រូវក៏ដោយ ក៏ត្រូវបង្កើនការប្រុងប្រយ័ត្នខ្ពស់បន្ថែមមួយកម្រិតទៀត ព្រោះគ្រោះថ្នាក់អាចកើតឡើងគ្រប់ទីកន្លែង។

ទន្ទឹមនឹងថែរក្សាសុវត្ថិភាពក្នុងការបើកបរ យើងត្រូវថែរក្សាសុវត្ថិភាពសុខភាពចៀសផុតពីជំងឺឆ្លងកូវីដ-១៩ ទាំងអស់គ្នា។

យើងចូលរួមកសាងអំពើល្អ ចែករំលែកក្តីស្រឡាញ់និងស្នាមញញឹម នឹងសូមមានចិត្តអាណិតស្រឡាញ់ពលរដ្ឋយើងគ្រប់ទីកន្លែងដោយគ្មានការរើសអើង៕SRP

ខេត្តកំពង់ធំ៖ស្ត្រីម្នាក់បានស្លាប់ បន្ទាប់ពីបញ្ជូនទៅដល់មន្ទីរពេទ្យ។ ចំណែក២នាក់ទៀតរងរបួសធ្ងន់ ខណៈកំពុងជិះម៉ូតូឌុបគ្នាត្រូវបានរថយន្តដឹកគ្រឿងចក្របុកចំពេញទំហឹង។

ហេតុការណ៍នេះ កើតឡើងនៅវេលាម៉ោង២និង៣០នាទីរសៀលថ្ងៃទី១៨ ខែកុម្ភ: ឆ្នាំ២០២១ តាមបណ្តោយផ្លូវជាតិលេខ៦ ស្ថិតក្នុងភូមិសំពង់ ឃុំប្រាសាទ ស្រុកសន្ទុក ខេត្តកំពង់ធំ។

សមត្ថកិច្ចបានបន្តថា ជនរងគ្រោះ ទី១ឈ្មោះ រឹន សុខណា ភេទស្រី អាយុ២៥(ស្លាប់) ទី២ឈ្មោះ មាន សុភ័ណ្ឌ ភេទស្រី អាយុ២១ឆ្នាំ (របួសធ្ងន់បាក់ដៃ)ទី៣ឈ្មោះមាន សៀវម៉ី អាយុ៤ឆ្នាំ
(របួសធ្ងន់ត្រូវជាក្មួយបង្កើត) អ្នកទាំង៣ មានទីលំនៅភូមិចំបក់ជ្រុំ ឃុំប្រាសាទ ស្រុកសន្ទុក ខេត្តកំពង់ធំ។

សមត្ថកិច្ចបានបញ្ជាក់ថា ករណីនេះ គេឃើញស្រ្តីរងគ្រោះ ជិះម៉ូតូឌុបគ្នា វ៉ាជែងរថយន្តខាងស្តាំហើយបត់ឡើងថ្នល់ជាតិវិញ អ្នកបើករថយន្តអកស៊័រជាន់ហ្វ្រាំងមិនជាប់ ក៏បុកតែម្ដង។ ចំណែកតៃកុងរថយន្តចុះរត់គេចខ្លួនបាត់។វត្ថុតាង ត្រូវបានសមត្ថកិច្ចយកទៅរក្សាទុក នៅអធិការដ្ឋាន នគរបាលស្រុកសន្ទុក ដើម្បីរងចាំធ្វើការដោះស្រាយ៕SRPអ៊ុងសំអាត

ភ្នំពេញ៖សម្ដេច ស ខេង បានបង្ហាញការកត់សំគាល់ថានៅឆ្នាំ២០២០កន្លងទៅ កម្ពុជា និងបណ្ដាប្រទេសផ្សេងទៀត សុទ្ធតែបានរងផលប៉ះពាល់ ដោយសារវិបត្តិនៃជំងឺកូវីដ-១៩ ទន្ទឹមនឹងនេះការអនុវត្តន៍ គោលដៅយុទ្ធសាស្ត្រ នីមួយៗ នៃផែនការថ្នាក់ជាតិ ស្ដីពីអត្តសញ្ញាណកម្ម ក៏រងផលប៉ះពាល់ផងដែរ។

សម្ដេច ស ខេង រដ្ឋមន្ត្រីក្រសួងមហាផ្ទៃ បង្ហាញបែបនេះ នៅព្រឹកថ្ងៃសុក្រ ទី១៩ ខែកុម្ភៈ ឆ្នាំ២០២១ នេះ ក្នុងឱកាស អញ្ជើញដឹកនាំកិច្ចប្រជុំលើកទី៥ នៃគណៈកម្មាធិការជាតិដឹកនាំតម្រង់ទិសការងារអត្រានុកូលដ្ឋាន ស្ថិតិអត្រានុកូលដ្ឋាន និងអត្តសញ្ញាណកម្ម (គ.ជ.ដ.អ) នៅទីស្ដីការក្រសួងមហាផ្ទៃ។

សម្ដេច ស ខេង បានគូសបញ្ជាក់នូវកិច្ចការចម្បងមួយចំនួន ដែលត្រូវខិតខំសម្រេច ឱ្យបានក្នុងដំណាក់កាលនេះ និងបានដឹកនាំឯកឧត្តម អស់លោក ជាសមាជិកគណៈកម្មាធិការជាតិ ដឹកនាំតម្រង់ទិសការងារអត្រានុកូលដ្ឋាន ស្ថិតិអត្រានុកូលដ្ឋាន និងអត្តសញ្ញាណកម្ម ពិនិត្យពិភាក្សាលើវឌ្ឍនភាព និងបញ្ហាប្រឈមមួយចំនួនទៀត៕SRP

ខេត្តសៀមរាប៖អាជ្ញាធរជាតិអប្សរា បានប្រកាសថានៅថ្ងៃទី២១ ខែកុម្ភៈ ឆ្នាំ២០២១ ខាងមុខនេះ នឹងបិទការចេញចូល នៅខ្លោងទ្វារ «តាកាវ» ជាបណ្តោះអាសន្ន ដើម្បីបើកការដ្ឋានជួសជុលឡើងវិញ។

ការជួសជុលនេះ ត្រូវបានសហការ ជាមួយវិស័យឯកជន ដែលប្រារព្ធឡើងក្រោមវត្តមានលោកជំទាវ ម៉ែន សំអន រដ្ឋមន្ត្រីក្រសួងទំនាក់ទំនងរដ្ឋសភា-ព្រឹទ្ធសភា និងអធិការកិច្ច និងជាតំណាង សម្តេចតេជោ ហ៊ុន សែន នាយករដ្ឋមន្ត្រី និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន។

បើតាមសេចក្ដីជូនដំណឹង របស់ អាជ្ញាធរជាតិអប្សរា បានបន្ថែមថា នៅថ្ងៃទី២១ខែកុម្ភៈខាងមុខនេះ អ្នកជំនាញចាប់ផ្ដើមជួសជុល ខ្លោងទ្វារ តាកាវ នេះ ដែលទទួលបានថវិកា ពីសប្បុរសជន។

អាជ្ញាធរសង្ឃឹមថា សាធារណជន ទាំងអស់នឹងយោគយល់ ហើយចូលរួមសហការ បានយ៉ាងល្អប្រសើរ ដើម្បីភាពរលូន នៃដំណើរការអភិរក្សសម្បត្តិដូនតាទាំងអស់គ្នា។

សូមជម្រាបថា ខ្លោងទ្វារ តាកាវ ជាខ្លោងទ្វារមួយក្នុងចំណោម ខ្លោងទ្វារ ទាំង៥ នៃក្រុងអង្គរធំ ដែលស្ថិតនៅទិសខាងលិច នៃប្រាសាទបាយ័ន។ ដោយសារអាយុកាល អាកាសធាតុ សង្គ្រាម កង្វះការថែទាំ និងការដុះដាលនៃដើមឈើ បណ្តាលឱ្យរូបចម្លាក់បង្កាន់ដៃយក្ស និងទេវតា ជាច្រើនដួលរលំ ហើយក៏បានធ្វើឱ្យរចនាសម្ពន្ធ របស់ខ្លោងទ្វារមួយភាគធំ ពិសេសរូបដំរីទាំង៤ បានរងនូវការខូចខាតជាខ្លាំង ដែលតម្រូវឱ្យមានការជួសជុល ដើម្បីសង្គ្រោះ និងអភិរក្ស។

សូមរំលឹកថា កាលពីខែមេសាឆ្នាំ២០២០ អគ្គនាយិកានៃក្រុមហ៊ុនហេងអភិវឌ្ឍន៍ បានប្រកាសថា ខ្លួនបានផ្ដល់ថវិកា ដល់អាជ្ញាធរជាតិអប្សរា ប្រមាណ៣០ម៉ឺនដុល្លារអាមេរិក ដើម្បីជួសជុលក្លោងទ្វារ ចូលបរិវេណ ក្រុងអង្គរធំ ពីខាងលិច ឬហៅថា ក្លោងទ្វារតាកៅ ស្ថិតនៅសង្កាត់គោកចក ក្រុងសៀមរាប។ ការឧបត្ថម្ភថវិកានេះ ធ្វើឡើងស្របពេល ដែលមអគ្គនាយិកា រូបនោះ ទស្សនាសមិទ្ធផល ដែលខ្លួនបានជួយជួសជុលកម្លងមក រួមមានប្រាសាទកណ្ដាល នៃប្រាសាទស្រះស្រង់ ជួសជុលរហាត់ទឹកនៅក្នុងរមណីយដ្ឋានអង្គរ។
លោកជំទាវ សៀង ចាន់ហេង អគ្គនាយិកាក្រុមហ៊ុនហេងអភិវឌ្ឍន៍ បានអោយដឹងថា ការឧបត្ថម្ភថវិកានេះ ដើម្បីលើកស្ទួយវប្បធម៌ជាតិ និងដើម្បីអភិរក្ស បេតិកភណ្ឌជាតិ អោយកាន់តែមានសោភណ្ឌភាព ស្រស់ស្អាត ឡើងវិញ និងធ្វើអោយមានការទាក់ទាញ អ្នកទេសចរណ៍ចូលទស្សនាប្រាសាទបុរាណ៕SRP

ខេត្តព្រះវិហារ៖លោក សេងលាង នាយផ្នែករដ្ឋបាលព្រៃឈើឆែប សហការ ជាមួយកម្លាំងកងរាជអាវុធហត្ថ ស្រុកឆែប និងប៉ូលិសប៉ុស្តិ៍រដ្ឋបាលឃុំម្លូព្រៃមួយ បង្ក្រាបឈើសន្និធិ (អញ្ញាតជន) ១កន្លែង ដោយគ្មានលិខិតអនុញ្ញាត ពីរដ្ឋបាលព្រៃឈើ។

ការបង្ក្រាបនេះ ធ្វើឡើងថ្ងៃទី១៨ ខែកុម្ភៈ ឆ្នាំ២០២១ ស្ថិតនៅភូមិពោធិ៍ទាប ឃុំម្លូព្រៃមួយ ស្រុកឆែប ខេត្តព្រះវិហារ តាមការណែនាំរបស់លោក នួន សុខុម នាយខណ្ឌរដ្ឋបាលព្រៃឈើព្រះវិហារ។

មន្ត្រីរដ្ឋបាលព្រៃឈើបានថ្លែងប្រាប់ថា ប្រតិបត្តិការនេះ សមត្ថកិច្ចបានដកហូត នូវឈើអារ ចម្រុះ ជាច្រើន យកទៅរក្សាទុក នៅស្នាក់ការថ្នាលបណ្ដុះ កូនឈើ ផ្នែករដ្ឋបាលព្រៃឈើឆែប ដើម្បីចាត់ការតាមនីតិវិធី៕SRP

ខេត្តកំពត៖ស្ពានដំរីផុង ស្ថិតនៅក្នុងភូមិកំពង់ចិន ឃុំស្ទឹងកែវ ស្រុកទឹកឈូ ខេត្តកំពត ដែលជាអំណោយដ៏ថ្លៃថ្លារបស់សម្ដេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ត្រូវបានដាក់សម្ពោធឲ្យប្រើប្រាស់ជាផ្លូវការ។

ពិធីសម្ពោធ នៅរសៀលថ្ងៃព្រហស្បតិ៍ ទី ១៨ ខែ កុម្ភៈ ឆ្នាំ ២០២១ នេះ ក្រោមវត្តមាន លោកជាវ តាយ អភិបាលខេត្តកំពត ដោយមានការអញ្ជើញចូលរួមពីអភិបាលរងខេត្ត ប្រធានមន្ទីរអង្គភាពជំនាញជុំវិញខេត្ត កងកម្លាំង លោកអភិបាលក្រុង ស្រុក អាជ្ញាធរមូលដ្ឋានភូមិឃុំ ព្រះសង្ឃ បងប្អូនប្រជាពលរដ្ឋ សរុបប្រមាណជា ៥០០ នាក់។

គូសបញ្ជាក់ដែរថា ស្ពានដំរីផុង មានប្រវែង ៤១ម៉ែត្រ ទទឹង ៣ម៉ែត្រ សាងសង់អំពីឈើ ប្រើប្រាស់ថវិកាចំនួន ៦៥ លានរៀល ស្ពាននេះ ជាហេដ្ឋារចនាសម្ព័ន្ធ យ៉ាងសំខាន់ តភ្ជាប់រវាងឃុំស្ទឹងកែវ ស្រុកទឹកឈូ ទៅកាន់ស្រុកឈូក បម្រើដល់បងប្អូនប្រជាពលរដ្ឋ ដឹកកសិផល និងការធ្វើដំណើរទៅកាន់សាលារៀន និងមន្ទីរពេទ្យរបស់សិស្ស និងបងប្អូនប្រជាពលរដ្ឋនៅមូលដ្ឋានផ្ទាល់៕SRP

ខេត្តកំពង់ចាម៖ក្នុងកិច្ចប្រជុំបូកសរុបលទ្ធផលការងារប្រចាំ​ឆ្នាំ​២០២០​ និង​លេីក​ទិសដៅ​អនុវត្ត​ឆ្នាំ​២០២១​ របស់​គណៈកម្មាធិការ​សហភាព​សហព័ន្ធ​យុវជន​កម្ពុជា​ខេត្តកំពង់ចាម នៅថ្ងៃទី១៨ ខែកុម្ភៈ​ ឆ្នាំ​២០២ ព្រឹកមិញ នេះ លោកអ៊ុន​ ចាន់ដា​ អភិបាលខេត្តកំពង់ចាម​ បាន​ថ្លែង​ថា​ គោលដៅ​សំខាន់​បំផុត​ របស់សហភាពសហព័ន្ធយុវជនកម្ពុជា គឺ​ការ​កសាង​កម្លាំង​ ធ្វើ​យ៉ាងណា​ឲ្យ​យុវជន​​របស់​យេីង​ ធ្វេី​​ការងារប្រកប​ដោយ​ឆន្ទៈ​​មុះមុត​ និង​ក្នុង​​ស្មារតី​​ស្មោះត្រង់​ ដេីម្បី​ចូលរួម​​ការពារ​រាជរដ្ឋាភិបាល​ ស្របច្បាប់ ក្រោម​ការ​ដឹកនាំ​ របស់ សម្តេចតេជោ ហ៊ុន​ សែន ព្រោះ​ឆន្ទៈ​នេះ​ហេីយ​ជា​មូលដ្ឋាន​គ្រឹះ​ សម្រាប់​ចូលរួម​​អភិវឌ្ឍន៍​ប្រទេស​ជាតិ​ របស់យើងឲ្យកាន់តែមានការរីកចម្រើន។

លោក អ៊ុន​ ចាន់ដា​ បាន​ថ្លែង​បន្តថា រដ្ឋបាល​ខេត្តកំពង់ចាម បាន​ផ្តល់ការគាំទ្រ និងសហការជានិច្ចចំពោះ ការអនុវត្តការងារ របស់ សហភាព​សហព័ន្ធ​យុវជន​កម្ពុជា​ គ្រប់​លំដាប់​ថ្នាក់ ដែលមានគោលដៅបម្រើផលប្រយោជន៍ សាធារណៈនៅគ្រប់មូលដ្ឋាន។​ ជាមួយគ្នានោះ​ រដ្ឋបាលខេត្តកំពង់ចាម ​ក៏មានការប្តេជ្ញាចិត្តខ្ពស់​ ក្នុងការចូលរួមចំណែកយ៉ាងខ្លាំងក្លា​ ប្រកបដោយ​ចក្ខុវិស័យវែងឆ្ងាយ​ ក្នុងការអនុវត្តការងាររបស់ខ្លួន ដោយត្រូវសហការ ជាមួយដៃគូអភិវឌ្ឍ នានា ទាំងវិស័យឯកជន អង្គការមិនមែនរដ្ឋាភិបាល និងអ្នកពាក់ព័ន្ធ ទាំងអស់ក្នុងសង្គម ក្នុងនោះយុវជន ដែលជាធនធានមនុស្សប្រកបដោយចំណេះ ជំនាញ និងឆន្ទៈស្រឡាញ់ការអភិវឌ្ឍសង្គមជាតិ និងជាអ្នកបន្តវេណ ក៏ត្រូវបានយកចិត្តទុកដាក់ផងដែរ។

ក្នុងឱកាសនេះដែរ លោកជំទាវ ដាំ ដារ៉ានី រដ្ឋលេខាធិការក្រសួងការពារជាតិ អនុប្រធានទី១ សហភាពសហព័ន្ធយុវជនកម្ពុជា​ បាន​ពាំនាំ​មក​នូវ​ប្រសាសន៍​ផ្តាំផ្ញេី​សាកសួរសុខទុកពី​សំណាក់​ លោក ហ៊ុន​ ម៉ានី​ ប្រធាន​សហភាព​សហព័ន្ធ​យុវជន​កម្ពុជា​ ហេីយ​ក៏​​បាន​ធ្វើ​ការ​សំណូមពរ​ដល់​ សហភាពសហព័ន្ធយុវជនកម្ពុជាខេត្តកំពង់ចាម​ ឲ្យ​ខិតខំ​ពង្រឹង​ ​និង​ពង្រីក​រចនាសម្ព័ន្ធ​របស់​ខ្លូន​​ ឲ្យ​មាន​ការ​​រីកចម្រើន​ ដេីម្បី​បំពេញ​បេសកកម្ម​ បម្រើដល់សង្គមជាតិ ជាពិសេស បន្តចូលរួមទប់ស្កាត់ការរីករាលដាលនៃជម្ងឺកូវីដ (Covid-19)៕SRP