ប្រធានមន្ទីរបរិស្ថានចំនួន ៤ ខេត្តជុំវិញព្រៃឡង់ បានរបូតតំណែង ក្នុងនោះប្រធានមន្ទីរបរិស្ថានខេត្តមួយចំនួនទៀតក៏ត្រូវបានផ្លាស់ប្ដូរផងដែរ។ នេះបើតាមលិខិតរបស់ក្រសួងមុខងារសាធារណៈ ដែលត្រូវបានចែកចាយជាសាធារណៈនៅព្រលប់ថ្ងៃចន្ទនេះ។

នេះបើតាមលិខិតរបស់ក្រសួងមុខងារសាធារណៈ ដែលចុះហត្ថលេខាដោយឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ លោកហ៊ុន ម៉ានី។

ខ-ស្នើសុំសម្រួលភារកិច្ចមន្ត្រីរាជការ ចំនួន ០៤នាក់ ពីប្រធានមន្ទីរបរិស្ថានរាជធានី ខេត្ត ឱ្យមកបម្រើការងារនៅទីស្តីការក្រសួងបរិស្ថាន ដូចមានរាយនាមខាងក្រោម៖

១- លោក តុប កក្កដា ពីប្រធានមន្ទីរបរិស្ថាន ខេត្តកំពង់ធំ ឱ្យមកបម្រើការងារនៅទីស្តីការក្រសួងបរិស្ថាន

២- លោក ឆាយ ខួងសាវុធ ពីប្រធានមន្ទីរបរិស្ថាន ខេត្តក្រចេះ ឱ្យមកបម្រើការងារនៅទីស្តីការក្រសួងបរិស្ថាន

៣- លោក ស្រេង ជាហេង ពីប្រធានមន្ទីរបរិស្ថាន ខេត្តស្ទឹងត្រែង ឱ្យមកបម្រើការងារនៅទីស្តីការក្រសួងបរិស្ថាន

៤- លោក សុង ច័ន្ទសុជាតិ ពីប្រធានមន្ទីរបរិស្ថាន ខេត្តព្រះវិហារ ឱ្យមកបម្រើការងារនៅទីស្តីការក្រសួងបរិស្ថាន។

ខ្ញុំបាទសូមគោរពអនុញ្ញាតបញ្ជាក់ជូនថា ការស្នើសុំតែងតាំងប្រធានមន្ទីរបរិស្ថានរាជធានី ខេត្ត ខាងលើ ជាការ ស្នើសុំតែងតាំងក្នុងមុខតំណែងដដែលឡើងវិញ ចំនួន ១៨នាក់ និងតែងតាំងក្នុងមុខតំណែងថ្មី ចំនួន ០៦នាក់ ជំនួសប្រធានមន្ទីរ បរិស្ថានខេត្តកំពង់ធំ ខេត្តមណ្ឌលគិរី ខេត្តស្ទឹងត្រែង ខេត្តពោធិ៍សាត់ ខេត្តព្រះវិហារ និងខេត្តក្រចេះ ដែលត្រូវបានសម្រួលភារកិច្ច ឱ្យមកបម្រើការងារនៅទីស្តីការក្រសួងបរិស្ថាន។ ដោយឡែកប្រធានមន្ទីរបរិស្ថានខេត្តព្រះសីហនុ ត្រូវបានតែងតាំងឱ្យកាន់ មុខតំណែងជាអភិបាលរង នៃគណៈអភិបាលខេត្តព្រះសីហនុ សាមីក្រសួងពុំទាន់បានស្នើសុំតែងតាំងថ្មីដោយត្រូវអនុវត្តតាម បែបបទនីតិវិធីនៃការតែងតាំងប្រធានមន្ទីរនៅពេលក្រោយ។

បន្ទាប់ពីបានពិនិត្យ ផ្ទៀងផ្ទាត់ឯកសារ និងលិខិតបទដ្ឋានគតិយុត្តពាក់ព័ន្ធរួចមក ក្រសួងមុខងារសាធារណៈ យល់ឃើញថា គួរឯកភាពតាមការស្នើសុំខាងលើ។

សេចក្តីដូចបានគោរពជម្រាបជូនខាងលើ សូម សម្តេចធិបតីនាយករដ្ឋមន្ត្រី មេត្តាពិនិត្យ សម្រេច និងផ្តល់អនុសាសន៍ណែនាំ ដោយសេចក្ដីអនុគ្រោះបំផុត។

សូម សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា មេត្តាទទួលការគោរពដ៏ខ្ពង់ខ្ពស់បំផុតពីខ្ញុំបាទ៕SRP

លោក នេត្រ ភក្ត្រា រដ្ឋមន្ត្រីក្រសួងព័ត៌មានបានអញ្ជើញជាអធិបតីក្នុងពិធីប្រកាសចូលកាន់មុខតំណែងលោក សុវណ្ណ វិទិត្យា ជាប្រធានមន្ទីរព័ត៌មានខេត្តបាតដំបងថ្មី ជំនួសលោក សួស សុភ័ក្រ្ត ដែលត្រូវទទួលភារកិច្ចថ្មី ជាសមាជិកក្រុមប្រឹក្សាខេត្តបាត់ដំបង។

ពិធីនេះបានធ្វើឡើងនៅសាលប្រជុំសាលាខេត្តបាត់ដំបង នាថ្ងៃទី១៣ ខែមករា ឆ្នាំ២០២៥ ដោយមានការចូលរួមជាអធិបតីពីសំណាក់លោក អ៊ុយ រី ប្រធានក្រុមប្រឹក្សាខេត្ត និងលោក សុខ លូ អភិបាលខេត្ត ព្រមទាំងមន្រ្តីរាជការតាមបណ្ដាមន្ទីរ អង្គភាពនានាយ៉ាងច្រើនកុះករ។

ក្នុងឱកាសនោះ លោក សុខ លូ បានកោតសរសើរ និងវាយតម្លៃខ្ពស់ចំពោះលទ្ធផលការងារ ដែលថ្នាក់ដឹកនាំគ្រប់លំដាប់ថ្នាក់នៃមន្ទីរព័ត៌មានខេត្ត ព្រមទាំងអាជ្ញាធរ និងសមត្ថកិច្ចពាក់ព័ន្ធរួមសហការគ្នាខិតខំបំពេញភារកិច្ចបម្រើរដ្ឋ និងប្រជាពលរដ្ឋទទួលបានលទ្ធផលល្អប្រសើរ ដើម្បីអភិវឌ្ឍន៍ខេត្តបាត់ដំបងឱ្យកាន់រីកចម្រើនបន្ថែមទៀត។

លោកសុខ លូ បានបន្តថា ការតែងតាំងផ្លាស់ប្ដូរមុខតំណែងមន្ត្រីរាជការសាធារណៈ គឺជាការផ្លាស់ប្ដូរបទពិសោធន៍តាមតម្រូវការចាំបាច់ ស្របតាមលិខិតបទដ្ឋានគតិយុត្តជាធរមាន ដើម្បីលើកកម្ពស់សមត្ថភាពការងារនិងការដឹកនាំគ្រប់គ្រងសំដៅធ្វើឱ្យមានកំណែទម្រង់ក្នុងប្រព័ន្ធការងារឱ្យកាន់តែប្រសើរឡើង។

អភិបាលខេត្ត ក៏បានថ្លែងកោតសរសើរចំពោះថ្នាក់ដឹកនាំ និងមន្ត្រីរាជការក្រោមឱវាទនៃមន្ទីរព័ត៌មានខេត្តបាត់ដំបងដែលកន្លងមកបានរួបរួមសាមគ្គីគ្នាខិតខំបំពេញការងារអស់សមត្ថភាពតាមជំនាញនីមួយៗ ក្នុងព្រឹត្តការណ៍ធំៗនានាព្រមទាំងបានបំពេញការងារជូនអង្គភាព រហូតសម្រេចបានលទ្ធផលគាប់ប្រសើរ ទោះបីនៅមានបញ្ហាប្រឈមមួយចំនួនដែលនៅសេសសល់ក៏ដោយ ក៏នឹងរួមគ្នាដោះស្រាយបញ្ហាប្រឈមទាំងអស់នោះដើម្បីគ្រប់គ្រងវិស័យព័ត៌មាន និងសោទស្សន៍ក្នុងខេត្តទប់ស្កាត់រាល់ព័ត៌មានក្លែងក្លាយ ព័ត៌មានប្រឌិត និងបន្សាបព័ត៌មានផ្សេងៗឱ្យបានទាន់ពេលវេលា និងមានប្រសិទ្ធភាព ស្របទៅតាមគោលនយោបាយ និងយុទ្ធសាស្ត្រថ្មីរបស់រាជរដ្ឋាភិបាលកម្ពុជា នីតិកាលទី៧ នៃរដ្ឋសភា។

នាកាសនោះ រដ្ឋមន្ត្រី នេត្រ ភក្ត្រា បានផ្ដាំផ្ញើដល់ប្រធានមន្ទីរព័ត៌មានដែលទើបតែងតាំងថ្មី ត្រូវបន្តខិតខំយកចិត្តទុកដាក់ សហការជាមួយមន្ទីរ អង្គភាពជុំវិញខេត្ត អាជ្ញាធរដែនដីគ្រប់លំដាប់ថ្នាក់ ដើម្បីរួមចំណែកក្នុងការអនុវត្តគោលនយោបាយរបស់រាជរដ្ឋាភិបាលកម្ពុជា ពាក់ព័ន្ធទៅលើវិស័យព័ត៌មាន ឱ្យមានប្រសិទ្ធភាពខ្ពស់។ ជាពិសេសត្រូវអនុវត្តភារកិច្ចរបស់ខ្លួនប្រកបដោយក្រមសីលធម៌វិជ្ជាជីវៈ មានឧត្តមគតិក្នុងការទទួលខុសត្រូវ។

រដ្ឋមន្ត្រី នេត្រ ភក្ត្រា បានថ្លែងថា សារព័ត៌មាន មានតួនាទីសំខាន់ណាស់ក្នុងសង្គម សម្រាប់ជាកញ្ចក់ឆ្លុះបញ្ចាំងពីទិដ្ឋភាពជាក់ស្តែង និងជាស្ពានចម្លងព័ត៌មានពីប្រជាពលរដ្ឋ ទៅថ្នាក់ដឹកនាំ និងពីថ្នាក់ដឹកនាំ មកប្រជាពលរដ្ឋវិញអំពីហេតុការណ៍ ស្ថានភាពនៅតាមមូលដ្ឋាននានា សេចក្តីត្រូវការ និងការស្នើសុំជាដើម។ ដើម្បីឱ្យការងារទាំងនេះប្រព្រឹត្តទៅរលូន លឿនរហ័ស និងមានប្រសិទ្ធភាពខ្ពស់ ប្រធានមន្ទីរព័ត៌មានថ្មីត្រូវរក្សាទំនាក់ទំនងល្អជាមួយស្ថាប័នរដ្ឋ ឯកជន ក្រុមហ៊ុន និងមន្ទីរនានាជុំវិញខេត្តឱ្យបានល្អ។

លោក សុវណ្ណ វិទិត្យា ប្រធានមន្ទីរព័ត៌មានដែលទើបប្រកាសចូលកាន់មុខតំណែង បានប្តេជ្ញាចិត្ត ស្មោះត្រង់ចំពោះជាតិ សាសនា ព្រះមហាក្សត្រ និងគោរពតាមរដ្ឋធម្មនុញ្ញ, ប្តេជ្ញារួមចំណែកយ៉ាងសកម្ម ក្នុងការអនុវត្តកម្មវិធីនយោបាយរបស់រាជរដ្ឋាភិបាលនីតិកាលទី៧ ដឹកនាំដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា, ខិតខំគោរព និងអនុវត្តតាមបទបញ្ជា គោលការណ៍ណែនាំចង្អុលបង្ហាញរបស់ថ្នាក់ដឹកនាំក្រសួងនិងរដ្ឋបាលខេត្ត , ប្តេជ្ញាប្រកាន់យកអភិក្រមបុរេសកម្ម ក្នុងការអនុវត្តការងារប្រកបដោយភាពផ្តួចផ្តើម និងច្នៃប្រឌិតស្របតាមបរិវត្តកម្មឌីជីថល ដើម្បីលើកកម្ពស់ការផ្សព្វផ្សាយជាវិជ្ជមាន នៅរដ្ឋបាលថ្នាក់ក្រោមជាតិឱ្យកាន់តែទូលំទូលាយ និងចូលរួមក្នុងការប្រយុទ្ធប្រឆាំងនឹងព័ត៌មានក្លែងក្លាយ។យកចិត្តទុកដាក់ក្នុងស្មារតីទទួលខុសត្រូវខ្ពស់ ព្យាយាម ប្រឹងប្រែងយកអស់ពីកម្លាំងកាយចិត្ត បញ្ញា ស្មារតី បន្តពង្រឹងវិន័យ និងពង្រីកសាមគ្គីភាព សហប្រតិបត្តិការ ឯកភាពផ្ទៃក្នុងរបស់មន្ទីរព័ត៌មានខេត្តបាត់ដំបង ឱ្យកាន់តែមានភាពរឹងមាំជាធ្លុងមួយដើម្បីគុណតម្លៃ និងផលប្រយោជន៍រួម, ប្តេជ្ញាអនុវត្តយ៉ាងខ្ជាប់ខ្ជួននូវតួនាទីភារកិច្ច របៀបរបបការងារ បែបបទនីតិវិធី សមត្ថកិច្ច និងលក្ខខណ្ឌការងាររបស់មន្ត្រី បុគ្គលិកសំដៅលើកកម្ពស់ប្រសិទ្ធិភាពការងារ, ប្តេជ្ញាអនុវត្តតាមតួនាទីភារកិច្ច និងកិច្ចការដទៃទៀតដែលក្រសួងព័ត៌មាន និងរដ្ឋបាលខេត្តបាត់ដំបង ប្រគល់ជូនព្រមទាំងធ្វើកិច្ចសហប្រតិបត្តិការជាមួយមន្ទីរ ស្ថាប័ន អង្គភាពនានា និងអាជ្ញាធរ មូលដ្ឋានគ្រប់លំដាប់ថ្នាក់ ក្នុងការពង្រីកវិស័យព័ត៌មាន និងសោតទស្សន៍ និងប្រែក្លាយតួនាទី មន្ទីរព័ត៌មានឱ្យក្លាយជាស្ថាប័នទំនាក់ទំនងសាធារណៈរបស់រដ្ឋបាលខេត្តបាត់ដំបង៕SRP

កម្ពុជាទទួលបានលទ្ធផលល្អប្រសើរ គួរឱ្យកត់សម្គាល់ ក្នុងការទប់ស្កាត់ជំងឺគ្រុនឈាម ក្នុងឆ្នាំ២០២៤

– ក្នុងឆ្នាំ២០២៣ ករណីជំងឺគ្រុនឈាមមានចំនួន ៣៥ ៣៩០នាក់ និងករណីស្លាប់ ៩៩នាក់

– ឆ្នាំ២០២៤ ករណីជំងឺគ្រុនឈាម មានចំនួន ១៨ ៩៨៧នាក់ គឺមានការថយចុះជាងឆ្នាំមុនចំនួន ១៦ ៤០៣នាក់ ឬថយ ៤៦% និងករណីស្លាប់ ៤៦នាក់ គឺមានការថយចុះជាងឆ្នាំមុនចំនួន ៥៣នាក់ ឬថយ ៥៤%។

បើប្រៀបធៀបនឹងចំនួនករណីជំងឺគ្រុនឈាមដែលបានព្យាករណ៍ដោយកម្មវិធីជាតិ ថាឆ្នាំ២០២៤ នេះជាឆ្នាំដែលអាចមានការរាតត្បាតជំងឺគ្រុនឈាមចំនួនប្រមាណ ៧៥ ០០០ករណីឈឺ មានន័យថា ឆ្នាំនេះបានកាត់បន្ថយ ករណីឈឺរហូតដល់ប្រមាណ ៥៦ ០០០នាក់ ស្មេីនឹងថយចុះប្រមាណជិត ៤ដងធៀបនឹងចំនួនព្យាករណ៍រាតត្បាត។

ការធ្វើបុរេសកម្មក្នុងការទប់ស្កាត់ការរីករាលដាលការចម្លងជំងឺគ្រុនឈាម ជាបទពិសោធន៍ចម្បងដែលចូលរួមចំណែកធ្វេីឱ្យទទួលបានជោគជ័យដ៏ធំ ក្នុងការកាត់បន្ថយបន្ទុកជំងឺគ្រុនឈាមក្នុងឆ្នាំ២០២៤ នេះ ក្រោមការដឹកនាំរបស់ សម្តេចធិបតីហ៊ុន ម៉ាណែត នាយករដ្ឋមន្រ្តី នាដេីមអាណត្តិទី៧នេះ៕SRP

«មិត្តអ្នកអាន» លោក រ៉េន អាទិត្យសិលវតា៖ លោក សម រង្ស៊ី នៅពីក្រោយឃាតកម្មលោក លិម គឹមយ៉ា យ៉ាងច្បាស់ក្រឡែត!

លោកសម រង្ស៊ី នៅពីក្រោយឃាតកម្ម ឯកឧត្ដម លីម គីមយ៉ា យ៉ាងច្បាស់ក្រឡែត! យោងតាមមូលហេតុខាងក្រោម៖

១-លោក លីម គីមយ៉ា គឺជាសមាជិកអតីតគណបក្សប្រឆាំងដែលមាននិន្នាការជាមួយលោកកឹម សុខា មិនមែនសម រង្ស៊ី

២-លោក លីម គីមយ៉ា មិនសប្បាយចិត្តនឹងនយោបាយដឹកនាំបន្តរបស់ សម រង្ស៊ី រហូតដល់មានការបង្ហោះជាសាធារណៈពី សម រង្ស៊ី

៣-លោក សម រង្ស៊ី បារម្ភថានឹងបាត់បង់ប្រជាប្រិយភាពនយោបាយ និងគ្មានអង្គហេតុដើម្បីប្រឆាំងបន្ត

ដូច្នេះ លោក សម រង្ស៊ី បានសហការជាមួយនឹងគណបក្សប្រឆាំងនៅប្រទេសថៃ ដើម្បីបង្កើតព្រឹត្តិការណ៍នេះឱ្យផ្ទុះទាំងនយោបាយក្នុងប្រទេសកម្ពុជា និងប្រទេសថៃ ធ្វើយ៉ាងណា៎គណបក្សដែលកំពុងកាន់អំណាចបាត់បងការគាំទ្រ ឬចោទប្រកាន់គណបក្សកាន់អំណាចនៅពីក្រោយ ការសម្លាប់នេះ។

នៅក្នុងប្រទេសថៃ ប្រធានបទដ៏ក្ដៅរបស់គេគឺ រដ្ឋាភិបាលដឹកនាំដោយកូនស្រីរបស់លោក ថាក់ស៊ីន គ្មានសមត្ថភាពក្នុងការដោះស្រាយបញ្ហា បែរជាឪពុកជាអ្នកដោះស្រាយវិញ ចំណែកឯ ប្រធានបទដ៏ក្ដៅគគុកនៅក្នុងប្រទេសកម្ពុជាវិញ ថ្នាក់ដឹកនាំរដ្ឋាភិបាលជាអ្នកនៅពីក្រោយការសម្លាប់លោក លីម គីមយ៉ា ។

ដោយឡែក ក្នុងករណីនេះ លោកសម រង្ស៊ី បានបង្កើតអង្គហេតុនេះឡើងមក បើទោះបីជា លោកលីម គីមយ៉ា ជាអតីតតំណាងរាស្រ្តគណបក្សសង្គ្រោះជាតិយ៉ាងនេះផង ហើយលោក លីម គីមយ៉ា ក៏មិនស្ថិតក្រោមបញ្ជានយោបាយរបស់ខ្លួនផង ក៏បង្កើត និងឈរនៅពីក្រោយការសម្លាប់លោក លីម គីមយ៉ា​ យ៉ាងព្រៃផ្សៃហើយ បោះដុំភ្លើងនយោបាយនេះ មកកម្ពុជា ជាពិសេសគំនុំចាញ់នយោបាយសម្ដេចតេជោផង ក៏សម្រេចចោទប្រកាន់សម្ដេចតេជោម្ដងហើយម្ដងទៀត (គឺធ្វើនយោបាយគំនុំ មិនគិតពីប្រយោជន៍ជាតិ)។

ចំណែកឯការចោទប្រកាន់ ឯកឧ.ឃួង ស្រេង វិញ ព្រោះដោយខឹងអភិបាលរាជធានីភ្នំពេញ ទាញសមាជិកសកម្មជននយោបាយរបស់ខ្លួនចុះចូលនឹងគណបក្សប្រជាជនជាច្រើននាក់ ទើបទាញ អភិបាលរាជធានី ចូលក្នុងអង្គហេតុនេះ ដើម្បីធ្វើឱ្យសកម្មជននយោបាយប្រឆាំងរបស់ខ្លួនមិនហ៊ានចុះចូលនឹងគណបក្សកាន់អំណាច៕SRP

ខេត្តកណ្ដាល៖លោកមេភូមិរួមនិងក្រុមប្រឹក្សាឃុំសន្លុង ស្រុកខ្សាច់កណ្ដាល ខេត្តកណ្តាល បានអះអាងដូចៗគ្នាថា ដីអាករឃុំរបស់រដ្ឋ ទំហំ៣ហិកតាកន្លះ ត្រង់ចំណុចជាប់និងទំនប់ខាងកើត « មេទឹកសំឡូង» ស្ថិតនៅភូមិសន្លុង ឃុំសន្លុង ស្រុកខ្សាច់កណ្ដាល ខេត្តកណ្តាល ត្រូវមេឃុំលក់ឱ្យឧកញ៉ា ចាប ហុងលី ជិត២០ម៉ឺនដុល្លារ…!។ បច្ចុប្បន្នដីនេះ បានក្លាយជាកម្មសិទ្ធិរបស់ឧកញ៉ា ចាប ហុងលី និងមាន(ប្លង់រឹង)អស់ហើយ។ នេះបើតាមសារព័ត៌មានក្នុងស្រុកមួយចំនួនបានធ្វើការចុះផ្សាយ។

ជុំវិញរឿងនេះប្រជាពលរដ្ឋបានបង្ហើបថាពួកខ្លួនពុំបានដឹងឮ និងឯកភាពឱ្យអាជ្ញាធរឃុំសន្លុង លក់ដីអាករឃុំរបស់រដ្ឋនោះទេ។ ផ្ទុយទៅវិញ ស្នាមមេដៃដែលពួកខ្លួនផ្ដិតកាលពីកន្លងមកនោះ គឺដើម្បីស្នើសុំរក្សាការពារដីរដ្ឋ (ដីបឹងមេទឹកសំឡូង)និងជួសជុលផ្លូវប៉ុណ្ណោះ…។ ក្នុងនោះ ប្រសិនបើអាជ្ញាធរនិងឈ្មួញយកមេដៃពួកគាត់ ទៅក្លែងបន្លំថា ឯកភាពឱ្យលក់ដីអាករឃុំរបស់រដ្ឋ គឺជារឿងបោកប្រាស់ទាំងស្រុង។

បើតាមពលរដ្ឋ ដីអាករឃុំសន្លុង ត្រង់ចំណុចខាងលើ គឺឃុំបានលក់ឱ្យឧកញ៉ា ចាប ហុងលី តម្លៃ៥ម៉ឺនដុល្លារ ក្នុង១ហិកតា សរុប៣ហិកតាកន្លះស្មើ១៧.៥០០០ដុល្លារ។ ដោយបច្ចុប្បន្ន ឧកញ៉ា ចាប ហុងលី កំពុងកាន់កាប់លើដីអាករឃុំសន្លុង និងបានជួលឱ្យពលរដ្ឋ ធ្វើស្រូវក្នុង១ហិកតាតម្លៃ៦០ម៉ឺនរៀល សម្រាប់រយៈពេល១ឆ្នាំម្ដង។

ពាក់ព័ន្ធករណីខាងលើ អ្នកសារព័ត៌មាន បានសុំការបំភ្លឺពីលោក ម៉ុន មឿង មេការ របស់ឧកញ៉ា ចាប ហុងលី ដោយលោកបានទទួលស្គាល់ថា លោកឧកញ៉ា ចាប ហុងលី ពិតជាបានទិញដីអាករឃុំសន្លុង ត្រង់ចំណុចខាងលើ ពីរដ្ឋបាលឃុំ ប្រាកដមែន ដោយផ្អែកថា ប្រជាពលរដ្ឋឯកភាពឱ្យលក់។

លោក ទឹម ទន មេភូមិសន្លុង បានថ្លែងថា មេឃុំសន្លុង ពិតជាបានលក់ដីអាករឃុំរបស់រដ្ឋ ត្រង់ចំណុចខាងលើប្រាកដមែន។ លោកមេភូមិបញ្ជាក់ថា ដីនោះលោកមេឃុំអាណត្តិមុនជាអ្នកលក់ ដោយយកលុយមកតម្កល់ទុកនៅសាលាឃុំ ហើយលោកស្រី ណេង ដាលីស មេឃុំថ្មីជាអ្នកចាត់ចែងដកប្រើប្រាស់។

ចំពោះលោក ថោង ស្រស់ អតីតមេឃុំនិងបច្ចុប្បន្នជាក្រុមប្រឹក្សាឃុំសន្លុង បានថ្លែងថា ដីអាករឃុំ ទំហំ៣ហិកតាកន្លះ ដែលជាប់និងទំនប់ ”មេទឹកសំឡូង” ស្ថិតនៅភូមិសន្លុង ឃុំសន្លុង ស្រុកខ្សាច់កណ្ដាល គឺឃុំបានលក់ឱ្យឧកញ៉ា ចាប ហុងលី ប្រាកដមែន ហើយមន្ត្រីជំនាញក៏បានចេញប្លង់រឹងឱ្យឧកញ៉ា ចាប ហុងលី រួចរាល់ហើយដែរ។

បើតាមលោក ថោង ស្រស់ ដីនោះឃុំលក់ឱ្យឧកញ៉ា ចាប ហុងលី តម្លៃ៥០.០០០ដុល្លារក្នុង១ហិកតា ក្នុងនោះ រដ្ឋបាលឃុំ ទើបនិងទទួលបានលុយគ្រប់ចំនួន នាពេលថ្មីៗនេះដែរទេ។ លោក ថោង ស្រស់ បញ្ជាក់ទៀតថា លុយទាំងនោះ គឺនៅលើលោកស្រីមេឃុំបច្ចុប្បន្ន ជាអ្នកកាន់កាប់។

ជុំវិញករណីនេះ អ្នកសារព័ត៌មានក៏បានសុំការបំភ្លឺពីលោកស្រី ណេង ដាលីស មេឃុំសន្លុង តាមប្រព័ន្ធTelegram ប៉ុន្តែលោកស្រី មិនបំភ្លឺនឹងមិនឆ្លើយតប ហើយពេលខលចូលក៏មិនទទួល។

ចំណែកលោក ហ៊ែល ម៉ូដេត ប្រធានការិយាល័យ រៀបចំដែនដី នគរូបនីយកម្មសំណង់ និងភូមិបាលស្រុកខ្សាច់កណ្ដាល បានថ្លែងប្រាប់ អ្នកសារព័ត៌មានថាលោកពុំបានដឹងទេ ពាក់ព័ន្ធការលក់ដីអាករឃុំខាងលើ។ ឯលោក ចេង ឌីណា អភិបាលស្រុកខ្សាច់កណ្ដាល ក៏បានថ្លែងស្រដៀងគ្នាដែរថា លោកពុំបានដឹងរឿងនោះឡើយ។

ក្នុងរឿងនេះ ពលរដ្ឋសុំស្នើដល់លោក គួច ចំរើន អភិបាលខេត្តកណ្ដាល លោកបណ្ឌិត ឱម យ៉ិនទៀង ទេសរដ្ឋមន្ត្រី ប្រធានអង្គភាពប្រឆាំងអំពើពុករលួយ អភិសន្តិបណ្ឌិត ស សុខា ឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃ លោក សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ជាពិសេស សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា មេត្តាចាត់វិធានការស្រាវជ្រាវ ពីភាពមិនប្រក្រតី នៃការយកដីអាករឃុំរបស់រដ្ឋ ទៅលក់ឱ្យក្លាយជាកម្មសិទ្ធិឯកជន និងសុំឱ្យស៊ើបអង្កេតលម្អិតរឿងលុយជិត២០ម៉ឺនដុល្លារ ដែលបានពីការលក់ដីខាងលើ ថា តើយកទៅប្រើប្រាស់ចំណាយលើអ្វីខ្លះឱ្យប្រាកដ.ទើបពលរដ្ឋស្ងប់ចិត្ត។ ព្រោះថា ការលក់ដីអាករឃុំសន្លុង ប្រជាពលរដ្ឋបានដឹងសឹងតែគ្រប់គ្នា ដោយម្នាក់ៗ រង់ចាំមើលចំណាត់ការពីថ្នាក់ដឹកនាំ៕SRP

ខេត្តសៀមរាប៖បុរសម្នាក់ជាបុគ្គលិកធ្វើការ នៅព្រលានយន្តហោះអន្តរជាតិសៀមរាបអង្គរ បានទទួលមរណភាពដោយគ្រោះថ្នាក់ចរាចរណ៍កាលពីយប់មិញ។

ហេតុការណ៍បានកើតឡើង វេលាម៉ោងជាង៩យប់ ថ្ងៃទី ១០ ខែមករា ឆ្នាំ២០២៥ នៅលើផ្លូវផ្ទះក្រហម ត្រង់ចំណុចមុខឈាងខាងលិចបាឡុងអង្គរ ស្ថិតក្នុងភូមិវាល សង្កាត់គោកចក ក្រុងសៀមរាប។

ទីភ្នាក់ងារសារព័ត៌មាន សៀមរាប ប៉ុស្តី បានរាយការណ៍ថា ជនរងគ្រោះជិះម៉ូតូ Honda ADV 160cc ពណ៌ស៊ីម៉ង់ ពាក់ផ្លាកលេខ សៀមរាប 1AS-4898 សង្ស័យបើកបរក្នុងល្បឿនលឿន ដួលហើយបុកផ្ទប់ជាមួយដើមឈើបណ្ដាលឲ្យស្លាប់ភ្លាមៗតែម្ដង។

សេចក្តីរាយការណ៍បានបន្តថា ជនរងគ្រោះ មានឈ្មោះ ពុទ្ធ ចិត្រា មានមុខរបរជាបុគ្គលិកនៅព្រលានយន្តហោះអន្តរជាតិសៀមរាបអង្គរ មាននៅបច្ចុប្បន្ន ភូមិគោកស្នួល ឃុំខ្នាត ស្រុកពួក ខេត្តសៀមរាប។

សមត្ថកិច្ចជំនាញនគរបាលចរាចរណ៍ខេត្តសៀមរាបមិនទាន់បញ្ជាក់លម្អិតអំពីមូលហេតុចំពោះហេតុការណ៍គ្រោះថ្នាក់ចរាចរណ៍ខាងលើនេះនៅឡើយទេ៕SRP

លោក ស៊ិន ចាន់ថុល អភិបាលស្រុកពួក មានប្រសាសន៍ថា ការចុះបញ្ជីដីធ្លីលក្ខណៈជាប្រព័ន្ធពិតជាមានសារៈសំខាន់ណាស់ សម្រាប់បងប្អូនប្រជាពលរដ្ឋនាពេលនេះ គឺដើម្បីឱ្យមានបណ្ណកម្មសិទ្ធិស្របច្បាប់គ្រប់ៗគ្នា ហើយការចុះបញ្ជីដីធ្លីនេះ គឺចុះបញ្ជីទាំងដីឯកជន និងដីរដ្ឋ ដែលអនុវត្តទៅតាមនីតិវិធី និងបច្ចេកវិទ្យាទំនើប មានតម្លាភាព និងការទទួលខុសត្រូវ ដែលប្រទេសជឿនលឿនលើពិភពលោកកំពុងអនុវត្ត ហើយមានប្រសិទ្ធភាពលើការគ្រប់គ្រងដីធ្លី។ ជាមួយគ្នានេះដែរលោកក៏បានអំពាវនាវ ដល់ប្រជាពលរដ្ឋ ដែលជាម្ចាស់ដីទាំងអស់ ត្រូវចូលរួមសហការ ជាមួយក្រុមការងារចុះបញ្ជីដីធ្លីមានលក្ខណៈជាប្រព័ន្ធ ដើម្បីជួយពន្លឿនការចុះវាស់វែងដីធ្លីឱ្យបានលឿន។

លោកមានប្រសាសន៍យ៉ាងដូច្នេះ នៅថ្ងៃសុក្រនេះ ក្នុងឱកាសប្រកាសកំណត់តំបន់ធ្វើការវិនិច្ឆ័យសម្រាប់ការចុះបញ្ជីដីធ្លីមានលក្ខណៈជាប្រព័ន្ធ ចំនួន៥ភូមិ ក្នុងស្រុកពួក ស្ថិតក្នុងឃុំយាង ស្រុកពួក មានភូមិសួនសា ភូមិចុងថ្នល់ ភូមិយាង ភូមិសុខសាន្ត និងភូមិកញ្ចន់គុយ។

លោក ប៊ូ ជាសម្បត្តិ អនុប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តសៀមរាប មានប្រសាសន៍ថា ការផ្សព្វផ្សាយជាសាធារណៈនូវដំណើរការចុះបញ្ជីដីធ្លីមានលក្ខណៈជាប្រព័ន្ធ រួមមាន៖ការកំណត់ព្រំដី ការវាស់វែង និងការវិនិច្ឆ័យ ដែលអនុវត្តផ្ទាល់ដោយមន្ត្រីជំនាញ នៃមន្ទីររៀបចំដែនដី សហការជាមួយអាជ្ញាធរដែនដី និងមន្ទីរអង្គភាពគ្រប់គ្រងដីរដ្ឋដែលពាក់ព័ន្ធ។ ការចុះបញ្ជីដីធ្លីមានលក្ខណៈជាប្រព័ន្ធ គឺជាការចុះកំណត់ព្រំដី វាស់វែង និងវិនិច្ឆ័យ ដើម្បីកសាងប្លង់សុរិយោដី និងបញ្ជីឈ្មោះម្ចាស់ដីហើយធ្វើការផ្ទៀងផ្ទាត់ឈ្មោះ ស្ថានភាពគ្រួសារ និងក្បាលដី ហើយផ្តល់សិទ្ធិចំពោះតែក្បាលដីណាដែលមិនមានទំនាស់ ឬមិនពាក់ព័ន្ធនឹងដីរដ្ឋ។

លោកអនុប្រធានមន្ទីរ បានស្នើឱ្យប្រជាពលរដ្ឋទាំងអស់ដែលជាម្ចាស់ដី ឬអ្នកកាន់កាប់ដីត្រូវចូលរួមបោះបង្គោលព្រំដីដោយបានឯកភាពព្រំរវាងអ្នកជាប់ព្រំហើយត្រូវត្រៀមរៀបចំឯកសារមួយចំនួនដែលពាក់ព័ន្ធជាមុនសិន មុននឹងដំណើរការនៃការកំណត់ព្រំវាស់វែង វិនិច្ឆ័យ ឈានចូលមកដល់ គឺដើម្បីឱ្យមន្រ្តីចុះបញ្ជីធ្វើបាននូវភាពសុក្រឹត ត្រឹមត្រូវទាំងលក្ខណៈបច្ចេកទេស និងទាំងលក្ខណៈច្បាប់។ លោកក៏សូមអំពាវនាវដល់បងប្អូនប្រជាពលរដ្ឋ ដែលបានមកចូលទាំងអស់ និងអាជ្ញាធរមូលដ្ឋាន សូមជួយធ្វើការជួយផ្សព្វផ្សាយបន្តដល់បងប្អូនប្រជាពលរដ្ឋដែលជាម្ចាស់ដីដែលពុំបានចួលរួមឱ្យបានដឹង និងចូលរួមបោះបង្គោលព្រំដីដោយបានឯកភាពព្រំរវាងអ្នកជាប់ព្រំ និងត្រៀមរៀបចំឯកសារមួយចំនួនដែលពាក់ព័ន្ធមួយចំនួនឱ្យបានគ្រប់ៗគ្នា៕SRP

ក្រសួងការពារជាតិ បានសំណើតម្រូវការពលទាហានថ្មី ចំនួន (២០០២នាក់) លើគម្រោងសេចក្ដីត្រូវការចាំបាច់ ចំនួន (៧.៨៧០នាក់) ដើម្បីបំពេញក្របខ័ណ្ឌកងឯកភាពចំណុះអគ្គបញ្ជាការនិងនាយកដ្ឋានវិស្វកម្មក្រសួងការពារជាតិ។

នេះបើតាមលិខិតរបស់ក្រសួងការពារជាតិ ចុះហត្ថលេខាដោយឯកឧត្តមនាយឧត្តមសេនីយ៍ ទៀ បាញ់ ឧបនាយករដ្ឋមន្ត្រីរដ្ឋមន្ត្រីក្រសួងការពារជាតិ គោរពជូនសម្ដេចធិបតីហ៊ុន ម៉ាណែត នាយករដ្ឋមន្ត្រី កាលពីថ្ងៃទី ០៨ ខែមករា ឆ្នាំ ២០២៥ ទីភ្នាក់ងារសារព័ត៌មាន សៀមរាប ប៉ុស្តិ៍ ទើបទទួលបាននៅថ្ងៃ ១០ខែមករា ឆ្នាំ២០២៥នេះ៕SRP

ខេត្តសៀមរាប៖បុរសអ្នកបើកម៉ូតូម្នាក់ត្រូវបានរថយន្តបុកចំពេញទំហឹងបណ្ដាលឲ្យរបួសខណ:បត់មិនប្រយ័ត្ន។ ហេតុការណ៍ នៅថ្ងៃទី០៩ ខែមករា ឆ្នាំ២០២៥ វេលាម៉ោង១៦និង៤០នាទី នៅចំណុចមុខមន្ទីរពេទ្យរ៉ូយ៉ាល់អង្គរ ស្ថិតនៅភូមិកសិកម្ម សង្កាត់ស្រង៉ែ ក្រុងសៀមរាប។

គ្រោះថ្នាក់ចរាចរណ៍នេះ រវាងរថយន្តនិង ម៉ូតូ ដោយ
រថយន្តម៉ាក TOYOTA FORTUNER ពណ៌ស ពាក់ផ្លាកលេខភ្នំពេញ 2AU-3677 បេីកបរដោយឈ្មោះ ម៉ៅ ចាន់ថ្លា ភេទស្រី អាយុ40ឆ្នាំ រស់នៅភូមិគោកដូង សង្កាត់ទឹកវិល ក្រុងសៀមរាប (ទិសដៅពីកេីតទៅលិច)។ ចំណែកម៉ូតូ ម៉ាក SUZUKI VIVA ពណ៌ ខ្មៅ ពាក់ផ្លាកលេខសៀមរាប 1E-1579 បេីកបរដោយឈ្មោះ សួន បញ្ញា ភេទប្រុសអាយុ៥៥ឆ្នាំ រស់នៅភូមិកសិកម្ម សង្កាត់ស្រង៉ែ ក្រុងសៀមរាប។ (ពាក់ មួក សុវត្ថិភាព ) (ទិសដៅ ពី កេីតទៅលិចបត់ឆ្វេង)។

សមត្ថកិច្ចបានប្រាប់ថាករណីនេះ បណ្ដាលឲ្យ អ្នកបេីកបរម៉ូតូរងរបួស ហើយត្រូវបានបញ្ជូនទៅមន្ទីរពេទ្យខេត្តសៀមរាប។តាមសន្និដ្ឋាន អ្នកបេីកបរម៉ូតូ 1E-1579 សៀមរាប បត់ឆ្វេងខ្វះការប្រុងប្រយ័ត្ន។ វត្ថុតាងបញ្ចូនទៅស្នាក់ការមាត់ស្ទឹងសៀមរាប៕SRP

ភ្នំពេញ៖សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជានៅព្រឹកថ្ងៃសុក្រ ថ្ងៃទី១០ ខែមករា ឆ្នាំ២០២៥ បានអញ្ជើញដឹកនាំកិច្ចប្រជុំ គណៈកម្មាធិការអចិន្ត្រៃយ៍ព្រឹទ្ធសភា នីតិកាលទី៥ លើរបៀបវារៈដូចខាងក្រោម៖

១- ពិនិត្យ និងសម្រេចលើសំណើរបស់គណៈកម្មការទី៦ ព្រឹទ្ធសភា សុំដាក់សេចក្ដីស្នើ វិសោធនកម្មបទបញ្ជាផ្ទៃក្នុងព្រឹទ្ធសភានៃព្រះរាជាណាចក្រកម្ពុជា ទៅក្នុងរបៀបវារៈ សម័យប្រជុំព្រឹទ្ធសភាជាវិសាមញ្ញ នីតិកាលទី៥។
២-ពិនិត្យសំណើរបស់សមាជិកព្រឹទ្ធសភា ស្នើសុំកោះប្រជុំព្រឹទ្ធសភាជាវិសាមញ្ញ។
៣- កំណត់កាលបរិច្ឆេទ របៀបវារៈ និងសមាសភាពលេខាធិការសម័យប្រជុំព្រឹទ្ធសភាជា វិសាមញ្ញ នីតិកាលទី៥។
៤- ផ្សេងៗ៕SRP

ខេត្តព្រះវិហារ៖រហូតមកដល់ថ្ងៃទី ១០ ខែមករា ឆ្នាំ២០២៥ នេះ គេនៅកុំទាន់ឃើញ ក្រសួងពាក់ព័ន្ធនាៗ ចេញសេចក្សីបំភ្លឺជុំវិញ ក្រុមហ៊ុនសុវណ្ណភូមិ វិនិយោគ កសិ.ឧស្សហកម្ម របស់ឧកញ៉ា អាន ម៉ាឌី នៅស្រុករវៀង ខេត្តព្រះវិហារ ឈូសឆាយចូលដីរដ្ឋរាប់រយហិកតា នៅឡើយទេ។ ប្រការដែលក្រសួងពាក់ព័ន្ធ រក្សាភាពស្ងប់ស្ងាត់ មិនបញ្ចេញប្រតិកម្ម ឆ្លើយតបទៅនឹងបណ្ដាញសារព័ត៌មាន ក្នុងស្រុកដែលបានផ្សព្វផ្សាយ យ៉ាងព្រោងព្រាតបែបនេះ គេនៅកុំទាន់ដឹងថា មានមូលហេតុអ្វីនោះដែរ ជាហេតុធ្វើឲ្យក្រុមហ៊ុនមួយនេះមានអំណាចកាន់តែខ្លាំងមិនញញើតនឹងច្បាប់ឡើយ។

កាលពីថ្មីៗ នេះ ក្រុមអ្នកស្រឡាញ់ព្រៃឈើនិងមន្ត្រីជំនាញនៃខេត្តព្រះវិហារ និងមន្ត្រីជំនាញនៃក្រសួងកសិកម្មរុក្ខា ប្រមាញ់ និងនេសាទ បានចុះទៅសិក្សាស្រាវជ្រាវ ទីតាំងឈូសឆាយដី របស់ក្រុមហ៊ុនសុវណ្ណភូមិ ដែលមានលោកឧកញ៉ាអាន ម៉ាឌី ជាម្ចាស់ក្រុមហ៊ុន បានដាក់គ្រឿងចក្រ ជាច្រើនគ្រឿង ធ្វើសកម្មភាព ឈូសឆាយចូលដីរដ្ឋ អស់ជាង៥០០ហិកតា នៅភូមិរំចេក ឃុំរមណីយ ស្រុករវៀង។

លោក តាន់ គឹមសួរ ប្រធានសមាគមយុវជនស្រលាញ់ធម្មជាតិ បានសរសេរបញ្ជាក់នៅលើ ទំព័រfacebook
លោកតាន់ គឹមសួរ (tan kimsour)ថា ខ្ញុំគិតថា បើរដ្ឋាភិបាល មិនមានវិធានការ សមស្រប ណាមួយទៅលើក្រុមហ៊ុនទាំងឡាយណា ដែលមានការឈូសបំពានទៅលើដីព្រៃរដ្ឋ (បំផ្លាញធនធានធម្មជាតិយ៉ាងសន្ធឹកសន្ធាប់) និងមិនគោរពតាមលក្ខខណ្ឌដែលរដ្ឋដាក់ឲ្យទេ មហាជន នឹងមិនមានការសប្បាយចិត្តទេ ដោយគិតថា នេះគឺជារឿងដែលអយុត្តិធម៌បំផុត ដែលប្រជាជនធម្មតា ប្រព្រឹត្តិបទល្មើសព្រៃឈើ បន្តិចបន្តួច មានការដាក់ទោស ចាប់ចងដោយមិនមានការលើកលែង រីឯក្រុមហ៊ុន ឈូសបំពានរាប់រយហិកតាបែរជាមិនមានចំណាត់ការ អ្វីទៅវិញ ឬ មានចំណាត់ការដែរ តែចំណាត់ ដែលមានការយោគយល់ទៅវិញ។ ហើយករណី ត្រីងៀតឆ្លៀតពង ឬកន្ទែលធំបន្លំដេក នឹងកើតមានឡើងជាបន្តបន្ទាប់។

លោកតាន់ គឹមសួរ បន្តថា ខ្ញុំបានរកឃើញថាក្រុមហ៊ុនសុវណ្ណភូមិ របស់លោកឧកញ៉ាអាន ម៉ាឌី នៅខេត្តព្រះវិហារ បានបំពាននូវលក្ខខណ្ឌ ដែលរដ្ឋ បានដាក់ជូនស្ទើរតែទាំងស្រុង (ខ្ញុំហ៊ាននិយាយ ខ្ញុំហ៊ានទទួលខុសត្រូវ លើសម្ដីរបស់ខ្ញុំ ចំពោះមុខច្បាប់)។

បើតាមលោកតាន់ គឹមសួរ បានបន្តថា នៅថ្ងៃទី ២៨ ខែធ្នូ ឆ្នាំ២០២៤ ខ្ញុំបាទ បានចុះទៅជាមួយមន្ត្រីជំនាញ រដ្ឋបាលព្រៃឈើថ្នាក់ជាតិ សហការជាមួយមន្ទីរបរិស្ថាន និងមន្ទីរកសិកម្ម រុក្ខាប្រមាញ់ និងនេសាទ ចុះទៅដល់ក្រុមហ៊ុនសុវណ្ណភូមិ នេះផ្ទាល់ ហើយបានសង្កេតឃើញថា ក្រុមហ៊ុន មិនបានអនុវត្តអនុវត្តតាមគោលការណ៍ ដែលក្រសួងបានដាក់ឲ្យ ៖

១/ មុនចាប់ផ្ដើមដំណើរការ ឈូសឆាយ ក្រុមហ៊ុនមិនបានសហការ ជាមួយមន្ទីរកសិកម្ម រុក្ខាប្រមាញ់ និងនេសាទខេត្តព្រះវិហារ ដើម្បីធ្វើការកំណត់ នូវតំបន់ឈូសឆាយ។

២/ ក្រុមហ៊ុន បានធ្វើការឈូសឆាយប៉ះនូវតំបន់ទ្រនាប់ដងអូរ ដែលក្រសួងមានការហាមប្រាមជាដាច់ខាត។

៣/ ឈូសបំផ្លាញដីព្រៃរក្សាទុករបស់រដ្ឋ អស់ជាច្រើនហិកតា។

៤/ មិនមានបិទ logo លើគ្រឿងចក្រ-យានយន្ត និងមិនបានអនុវត្ត តាមវិធានបច្ចេកទេស ជាធរមាន ដោយមាន មន្ទីរកសិកម្ម រុក្ខាប្រមាញ់ និងនេសាទខេត្តព្រះវិហារ ធ្វើការតាមដាន លើដំណើរការ ឈូសឆាយរបស់ក្រុមហ៊ុន។

៥/ មិនបានធ្វើការឈូសឆាយ ក្នុងមួយអនុតំបន់ម្ដង ហើយធ្វើការដាំដុះភ្លាម តាមលក្ខខណ្ឌ ដែលក្រសួងបានដាក់ឲ្យនោះទេ។

ខ្ញុំសង្ឃឹមយ៉ាងមុតមាំថា រដ្ឋាភិបាល នឹងមិនមានការយោគយល់ ចំពោះទង្វើត្រីងៀត ឆ្លៀតពង ឬដូចប្រសាសន៍ របស់សម្ដេចធិបតី នាយករដ្ធមន្ត្រី បានលើកឡើងថា កន្ទេលធំ បន្លំដេក នេះជាដាច់ខាត។

ជុំវិញ ការលើកឡើង របស់លោក តាន់ គឹមសួរ ប្រធានសមាគមយុវជនស្រលាញ់ធម្មជាតិ ដែលអះអាងថា
ក្រុមហ៊ុន សុវណ្ណភូមិ របស់ឧកញ៉ា អាន ម៉ាឌី នៅស្រុករវៀង ខេត្តព្រះវិហារ ឈូសឆាយប៉ះដីរដ្ឋរាប់រយហិកតា បែបបេះ ទីភ្នាក់ងារសារព័ត៌មាន សៀមរាប ប៉ុស្តិ៍ នៅមិនទាន់ទទួលបានការបំភ្លឺពីក្រសួងពាក់ព័ន្ធនិងក្រុមហ៊ុនសុវណ្ណភូមិ របស់លោកឧកញ៉ាអាន ម៉ាឌី នៅឡើយទេ រហូតមកដល់ថ្ងៃទី ១០ ខែមករា ឆ្នាំ ២០២៥ នេះ៕SRP

ខេត្តសៀមរាប៖លោកហ៊ី សាយ ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តសៀមរាប បានមានប្រសាសន៍ជំរុញនិងក្រើនរំលឹក ឲ្យប្រជាពលរដ្ឋ ដែលជាម្ចាស់ដី ទាំងអស់ត្រូវចូលរួមសហការ ជាមួយក្រុមការងារចុះបញ្ជីដីធ្លីមានលក្ខណៈជាប្រព័ន្ធ ដើម្បីជួយពន្លឿនការចុះវាស់វែងដីធ្លីឲ្យបានលឿន។

លោកមានប្រសាសន៍ ក្នុងវត្តវណ្ណារាម ហៅវត្តថ្មី នាថ្ងៃទី០៩ ខែមករា ឆ្នាំ ២០២៥ នេះនៅក្នុងពិធីប្រកាសផ្សព្វផ្សាយ កំណត់តំបន់វិនិច្ឆ័យ សម្រាប់ការចុះបញ្ជីដីធ្លី មានលក្ខណៈជាប្រព័ន្ធ ជូនដល់ប្រជាពលរដ្ឋ ក្នុងភូមិចំនួន១៣ នៃឃុំពង្រក្រោម ស្រុកជីក្រែង ខេត្តសៀមរាប រួមមាន៖ ភូមិពពេល ភូមិពង្រ១ ភូមិពង្រ២ ភូមិថ្មី ភូមិសំបូរ ភូមិអូររូង ភូមិពោធិ៍ ភូមិជ័យបូរ ភូមិផ្លុង ភូមិតាព័រ១ ភូមិតាព័រ២ ភូមិអូរខ្លុង និងភូមិដងផ្អាវ។

លោក ហ៊ី សាយ បានបន្តថា ការចុះបញ្ជីដីធ្លីមានលក្ខណៈជាប្រព័ន្ធ គឺជាការចុះកំណត់ព្រំដី វាស់វែង និងវិនិច្ឆ័យ ដើម្បីកសាងប្លង់សុរិយោដី និង បញ្ជីឈ្មោះម្ចាស់ដី ហើយធ្វើការផ្ទៀងផ្ទាត់ឈ្មោះ ស្ថានភាពគ្រួសារ និង ក្បាលដី ហើយផ្តល់សិទ្ធិចំពោះតែក្បាលដីណាដែលមិនមានទំនាស់ ឬ មិនពាក់ព័ន្ធនឹងដីរដ្ឋផងដែរ។

លោក ហ៊ី សាយ ក៏បានស្នើឲ្យប្រជាពលរដ្ឋទាំងអស់ដែលជាម្ចាស់ដី ឬអ្នកកាន់កាប់ដី ត្រូវបោះបង្គោលព្រំដី ដោយបានឯកភាពព្រំ រវាងអ្នកជាប់ព្រំ និងត្រៀមរៀបចំឯកសារមួយចំនួនដែលពាក់ព័ន្ធ នឹងអត្តសញ្ញាណម្ចាស់ដី រួមមាន៖ អត្តសញ្ញាណប័ណ្ណ សៀវភៅគ្រួសារ សៀវភៅស្នាក់នៅ សំបុត្រកំណើត សំបុត្រអាពាពិពាហ៍ និងអត្តសញ្ញាណក្បាលដីដូចជា៖ ប័ណ្ណកម្មសិទ្ធិ បង្កាន់ដៃទទួលពាក្យ លិខិតលក់ទិញ លិខិតផ្ទេរសិទ្ធ សេចក្តីសម្រេចរបស់តុលាការ ជាមុនសិន មុននឹងដំណើរការនៃការកំណត់ព្រំ វាស់វែង វិនិច្ឆ័យ ឈានចូលមកដល់ គឺដើម្បីឲ្យមន្រ្តីចុះបញ្ជី ធ្វើបាននូវភាពសុក្រឹត្យ ត្រឹមត្រូវទាំងលក្ខណៈបច្ចេកទេស និង ទាំងលក្ខណៈច្បាប់ផងដែរ។

លោក ធូ ចន្ថុល អភិបាលរងស្រុកជីក្រែង បានមានប្រសាសន៍ថា ការចុះបញ្ជីដីធ្លីលក្ខណៈជាប្រព័ន្ធនេះ ពិតជាមានសារៈសំខាន់ណាស់សម្រាប់បងប្អូនប្រជាពលរដ្ឋនាពេលនេះ គឺដើម្បីឲ្យមានប័ណ្ណកម្មសិទ្ធស្របច្បាប់គ្រប់ៗគ្នា ហើយការចុះបញ្ជីដីធ្លីនេះ គឺចុះបញ្ជីទាំងដីឯកជន និងដីរដ្ឋ ដែលអនុវត្តទៅតាមនីតិវិធី និងបច្ចេកវិទ្យាទំនើប មានតម្លាភាព និង ការទទួលខុស ត្រូវ ដែលប្រទេសជឿនលឿនលើពិភពលោក កំពុងអនុវត្ត ហើយមានប្រសិទ្ធភាពលើការគ្រប់គ្រងដីធ្លី។

លោកអភិបាលរងស្រុកជីក្រែង ក៏បានបញ្ជាក់បន្ថែមទៀតថា ដើម្បីឲ្យក្រុមការងារចុះបញ្ជីដីធ្លីសម្រេចបានជោគជ័យទៅបាន គឺទាមទារកិច្ចសហការរបស់បងប្អូនប្រជាពលរដ្ឋដែលម្ចាស់ដីផ្ទាល់ ត្រូវចូលរួមសហការចង្អុលបង្ហាញទីតាំងដី ព្រំដីផ្ដល់ព័ត៌មានផ្ទាល់មាត់ និងផ្តល់ឯកសារ ពាក់ព័ន្ធទាំងឡាយដែលជាតម្រូវការចាំបាច់បំផុត ដែលក្រុមការងារត្រូវតែប្រមូលទិន្នន័យឲ្យបានគ្រប់គ្រាន់តាមទម្រង់ និងនិតិវិធីដែលបានកំណត់។ ជាមួយគ្នានោះផងដែរលោកធូ ចន្ថុល ក៏បានអំពាវនាវដល់បងប្អូនប្រជាពលរដ្ឋ ដែលបានមកចូលទាំងអស់និងអាជ្ញាធរមូលដ្ឋាន សូមជួយធ្វើការផ្សព្វផ្សាយ បន្ត ដល់បងប្អូនប្រជាពលរដ្ឋ ដែលជាម្ចាស់ដីដែលពុំបានចួលរួមឲ្យបានដឹងនិងចូលរួមបោះបង្គោលព្រំដី ដោយបានឯកភាពព្រំ រវាងអ្នកជាប់ព្រំ និងត្រៀមរៀបចំឯកសារមួយចំនួនដែលពាក់ព័ន្ធមួយចំនួន ឲ្យបានគ្រប់ៗគ្នាផងដែរ៕SRP