ខេត្តសៀមរាប៖យ៉ាងហោចណាស់ មនុស្សម្នាក់ បានស្លាប់និង៣នាក់ទៀត រងរបួសធ្ងន់ស្រាល ដោយសារគោយន្តកន្ត្រៃ បុកម៉ូតូ២គ្រឿង។

ហេតុការណ៍បានកើតឡើងនៅវេលាម៉ោង០៨ព្រឹក ថ្ងៃទី០៦ ខែមករា ឆ្មាំ២០២១ ស្ថិតនៅភូមិគោកត្នោត ឃុំកណ្តែក ស្រុកប្រាសាទបាគងខេត្តសៀមរាប។

សមត្ថកិច្ចប្រាសាទបាគង បានឲ្យដឹងថាករណីគ្រោះថ្នាក់ចរាចរណ៍
នេះ រវាងគោយន្តកន្រ្តៃ និងម៉ូតូ២គ្រឿងបញ្រ្ជាសទិសគ្នា។
គោយន្តកន្រ្តៃ ម៉ាកគូបូតាពណ៌ក្រហម អ្នកបើកបរ រត់គេចខ្លួនបាត់បើកពីជើង ទៅត្បូង បុកម៉ូតូម៉ាកC៩០ពណ៌ខ្មៅ គ្មានស្លាកលេខ បើកបរឈ្មោះ ពុធ រ៉ាមី ភេទប្រុស អាយុ២៩ឆ្នាំ រស់នៅភូមិចុងកៅស៊ូ សង្កាត់ស្លក្រាម ក្រុងសៀមរាប របួសធ្ងន់ បើកពីជើង ទៅត្បូង មានអ្នកជិះជាមួយ២នាក់
១-ភត់ រី ភេទស្រីអាយុ៣០ឆ្នាំ(របួសធ្ងន់)
២-ស្លាប់កូនក្មេងស្រីអាយុ២ឆ្នាំ នៅមន្ទីរពេទ្យ។ ជនរងគ្រោះ រស់នៅភូមិចុងកៅស៊ូសង្កាត់ស្លក្រាម ក្រុងសៀមរាប។
បន្ទាប់មកគោយន្តកន្រ្តៃ ក៏បានទៅបុកម៉ូតូមួយទៀត ម៉ាកវេវ C១០០ ពណ៌ខ្មៅ ស្លាកលេខ ភ្នំពេញ ១BN ៦៧៤៥
ទិសដៅ ពីត្បួង ទៅជើង បើកបរដោយ
ឈ្មោះ សង់ សាន អាយុ១៨ឆ្នាំ ភេទប្រុស របួសស្រាល។

សមត្ថកិច្ចខេត្តបានឲ្យដឹងថាមូលហេតុ អ្នកបើកបរ គោយន្តកន្រ្តៃ បត់ខ្វះការប្រុងប្រយ័ត្ន។ សមត្ថកិច្ចបាននាំយកគោយន្តកន្រ្តៃ និងម៉ូតូ ទៅរក្សាទុកនៅអធិដ្ឋាននគរបាលស្រុកប្រាសាទបាគង ដើម្បីអនុវត្តតាមផ្លូវច្បាប់៕SRP

ខេត្តសៀមរាប៖បុរស៣នាក់ ត្រូវបានកម្លាំងអាវុធហត្ថខេត្តសៀមរាប ចាប់ខ្លួន ពាក់ព័ន្ធករណីគ្រឿងញៀន។

ការបង្ក្រាបនេះធ្វើឡើងវេលាម៉ោង១៤និង០០នាទីថ្ងៃទី០៦ខែមករា ឆ្នាំ ២០២១ ដោយកម្លាំងមូលដ្ឋានអាវុធហត្ថស្រុកពួក សហការ ជាមួយ អាវុធហត្ថខេត្តសៀមរាប ដឹកនាំដោយលោកវសេនីយ៍ត្រីធាវ ច័ន្ទដារ៉ា នាយករិយាល័យ ប្រឆាំងបទល្មើស គ្រឿងញៀនអាវុធហត្ថ ខេត្តសៀមរាប នៅចំណុចភូមិប្រយុទ្ធ ឃុំពួក ស្រុកពួក ខេត្តសៀមរាប។

ជនសង្ស័យ
១ឈ្មោះពៅ រក្សា(ហៅចិន)ភេទ ប្រុស អាយុ៣៤ឆ្នាំរស់នៅភូមិកោគស្រុក ឃុំពួក ស្រុកពួក ខេត្តសៀមរាប។ មុខរបរកម្មករសំណង់។

២ឈ្មោះពៅ ចាន់ថន ភេទប្រុស អាយុ១៧ឆ្នាំរស់នៅភូមិស្វាយដង្គុំ សង្កាត់ស្វាយដង្គំ ក្រុងសៀមរាប។ មុខរបរកម្មករសំណង់។

៣ឈ្មោះរៀន យ៉ាងពៅ ភេទប្រុស អាយុ១៧ឆ្នាំរស់នៅភូមិតាភុល សង្កាត់ស្វាយដង្គំ ក្រុងសៀមរាប។ មុខរបរកម្មករសំណង់។

អាវុធហត្ថបានឲ្យដឹងថា ករណីនេះ សមត្ថកិច្ច ដកហូត វត្ថុតាង ម្សៅក្រាមពណ៌សថ្លា(ម៉ាទឹកកក) ចំនួន០៣កញ្ចប់ ដាវ០២ដើម
ទូស័ព្ទ០៣គ្រឿង និងឧបករណ៍ប្រើប្រាស់មួយចំនួន។

បច្ចុប្បន្នជនសង្ស័យនិងវត្ថុតាងបញ្ជូនទៅការិយាល័យគ្រឿងញៀន អាវុធហត្ថខេត្តសៀមរាប អនុវត្តន៍និតិវិធី៕SRP

ខេត្តសៀមរាប៖លោកឡុង កុសល អ្នកនាំពាក្យ អាជ្ញាធរជាតិអប្សរា ត្រូវបាន ពលរដ្ឋ ចំនួន៧នាក់ ដាក់ពាក្យប្ដឹងទៅ តុលាការខេត្តសៀមរាប ដោយចោទប្រកាន់ពីបទ «រំលោភបំពាន នៅលើផ្ទៃដីកម្មសិទ្ធិ និងបំផ្លិចបំផ្លាញដំណាំ»។

នេះបើយោងតាម ពាក្យបណ្ដឹង ដែល បណ្ដាញ«សៀមរាបប៉ុស្ដិ៍» ទទួលបាននៅល្ងាចថ្ងៃទី០៥ ខែមករា ឆ្នាំ២០២១ម្សិលមិញ។

ជុំវិញបណ្ដឹង ចោទប្រកាន់នេះ «សៀមរាបប៉ុស្ដិ៍» នៅមិនទាន់ ទទួលបាន ការបកស្រាយ ពី លោកឡុង កុសល អ្នកនាំពាក្យ អាជ្ញាធរជាតិអប្សរា នៅឡើយទេ។ខាងក្រោមជាពាក្យបណ្ដឹងរបស់ពលរដ្ឋ ទាំង៧នាក់៖

ខេត្តសៀមរាប៖សមត្ថកិច្ច ក្រុងសៀមរាប បានរាយការណ៍ថា នៅវេលាម៉ោង២២និង៣០នាទី ថ្ងៃទី០៥ ខែមករាឆ្នាំ២០២១ នៅចំណុច រង្វង់ផ្លូវ៦០ម៉ែត្រ ស្ថិតនៅភូមិអញ្ចាញ សង្កាត់នគរធំ ក្រុងសៀមរាប ខេត្តសៀមរាប មានគ្រោះថ្នាក់ចរាចរណ៍ មួយ បង្កឡើងដោយខ្លួនឯង។

សមត្ថកិច្ចបានបន្តថាករណីនេះ រថយន្តម៉ាកកាមរី បាឡែនពណ៌ស្ករ ពាក់ស្លាក់លេខភ្នំពេញ ២AE ៨៩១៤ បើកបរដោយបុរសម្នាក់ មិនស្គាល់អត្តសញ្ញាណ ក្រោយកើតហេតុ ក៏បានជិះpass appគេចខ្លួនបាត់។

បើតាមសមត្ថកិច្ចបញ្ជាក់ថាមូលហេតុ បើកបរ ល្បឿនលឿនពេក បួងចង្កូតមិនទាន់ បណ្ដាលអោយធ្លាក់ប្រឡាយតែម្ដង។

បច្ចុប្បន្ន រថយន្ត ត្រូវបាន​កម្លាំង​ជំនាញ​ការិយាល័យ​ នគរបាលចរាចរណ៍ ផ្លូវគោក ខេត្តសៀមរាបយកមករក្សាទុក៕SRP

ខេត្តព្រះវិហារ៖រដ្ឋមន្រ្តីក្រសួងបរិស្ថាន លោកសាយ សំអាល់ បានថ្លែងប្រាប់ ឱ្យប្រជាលរដ្ឋផ្លាស់ប្តូរមុខរបរ ដែលធ្លាប់បរបាញ់សត្វ មកជាការចូលរួមចិញ្ចឹមសត្វជំនួសវិញ ព្រោះការបរបាញ់សត្វព្រៃ ជាអំពេីល្មេីសច្បាប់ ប្រឈមនិងទោសទណ្ឌចំពោះមុខច្បាប់។

រដ្ឋមន្ត្រី ក៏បានផ្តល់ជម្រើស ជូនប្រជាពលរដ្ឋ ក្នុងការចិញ្ចឹមសត្វយកសាច់ ដូចជាគោ ក្របី ហើយជាពិសេសនោះ គឺសត្វចៀម និងពពែ ជាសត្វដែលចិញ្ចឹម ក្នុងព្រៃសហគមន៍ បានយ៉ាងងាយស្រួល ដោយគ្រាន់តែចំណាយ ពេលវេលាតិច ចំណេញច្រើន។

រដ្ឋមន្ត្រីក្រសួងបរិស្ថានបានថ្លែងថា យើងខ្ញុំចង់ឃើញបងប្អូន ប្រជាពលរដ្ឋ មានចំណូលខ្ពស់ មានជីវភាព ធូរធារ ហើយនៅពេលបងប្អូនប្រជាពលរដ្ឋ មានបាន នោះនឹងមានការចូលរួមកាន់តែសកម្ម ក្នុងការការពារ និងអភិរក្សធនធានធម្មជាតិ ដែលយើងមាន។

រដ្ឋមន្ត្រីក្រសួងបរិស្ថាន ក៏បានណែនាំ និងពន្យល់បកស្រាយ ជូនដល់ ប្រជាពលរដ្ឋ សូមកុំបន្តមានទំនាស់ដីធ្លី កើតឡើងបន្តទៀត គឺត្រូវចូលរួមការពារ និងអភិរក្សព្រៃឈើ សត្វព្រៃដែលមាននៅក្នុងតំបន់នោះ ទាំងអស់គ្នា។

លោកថ្លែងយ៉ាងដូច្នេះ នៅព្រឹកថ្ងៃទី០៥ ខែមករា ឆ្នាំ២០២១ ក្នុងពេល ចូលរួមវេទិកាសាធារណៈ ពិភាក្សាលើ ករណី ប្រជាជនកាន់កាប់អាស្រ័យផលក្នុងដែនជំរកសត្វព្រៃ «ភ្នំត្នោត-ភ្នំពក» ស្រុកសង្គមថ្មី ខេត្តព្រះវិហារ ដែលរៀបចំឡេីងនៅទីចាត់ការដែនជម្រកសត្វព្រៃបឹងពែរ ភូមិអូពោធិ៍ ឃុំរមណីយ៍ ស្រុករវៀង ខេត្តព្រះវិហារ ដោយមានការចូលរួមពីថ្នាក់ដឹកនាំក្រសួងបរិស្ថាន សមាជិកគណៈកម្មាការទី៣នៃព្រឹទ្ធសភា និងរដ្ឋសភា អាជ្ញាធរខេត្តព្រះវិហារ និងខេត្តសៀមរាប មន្ទីរពាក់ព័ន្ធ កងកម្លាំងទាំងបី ។

ប្រជាពលរដ្ឋ ដែលបានមកចូលរួម បានសំណូមពរដល់ រដ្ឋមន្ត្រីក្រសួងបរិស្ថានសូមធ្វេីការដោះដូរដី ដែលបច្ចុប្បន្ន ពួកគាត់បានកំពុងអាស្រ័យផល លើដី សហគមន៍ និងខ្លះទៀត ជាប់ដីសហគមន៍ ដោយមានសត្វព្រៃបំផ្លាញដំណាំរបស់ពួកគាត់។

លោករដ្ឋមន្ត្រី ថានឹងរៀបចំដីបំរុងទុក សម្រាប់ដោះដូរជូនពួកគាត់ ដោយត្រូវនៅជិតនឹងសេវាសាធារណៈ មន្ទីពេទ្យ សាលារៀន និងវត្តអារាម ដើម្បីឱ្យពួកគាតរស់ នៅដោយមានភាពងាយស្រួល។

រដ្ឋមន្រ្តី ក៏បានជំរុញ ឱ្យមានការកំណត់ព្រំប្រទល់តំបន់ដែនជម្រកសត្វព្រៃ ឱ្យបានលឿន ពង្រឹង ការអប់រំ ប្រជាពលរដ្ឋ លេីកទឹកចិត្តឱ្យកូនចៅប្រជាពលរដ្ឋ បានរៀនសូត្រទាំងអស់គ្នា និងស្នេីឱ្យដាំដេីមឈេី ដែលឆាប់បានទទួលផល ដូចជាដំណាំអាកាស្យាជាដេីម៕SRP

ខេត្តសៀមរាប៖បុរសម្នាក់ ឡើងដផមឈើ ដើម្បីបាញ់សត្វ តែជាអកុសល កំភ្លើងច្នៃ រាលកៃ ត្រូវចំខ្លួនឯង ហើយធ្លាក់ចំថ្ម បណ្តាលឲ្យស្លាប់។

ហេតុការណ៍បានកើតឡើង វេលាម៉ោង១០និង១៥នាទី ថ្ងៃទី០៥ ខែមករា ឆ្នាំ២០២១ នៅចំណុចលើភ្នំបុស្សត្រា (ហៅភ្នំក្បាលខ្មោច) ចំងាយ១៤គីឡូម៉ែត្រ ពីភូមិជ្រៃ ឃុំខ្វាវ ស្រុកជីក្រែង។

សមត្ថកិច្ចស្រុកជីក្រែងបានឲ្យដឹងថា
ជនរងគ្រោះ មានឈ្មោះ រឿន រ៉ូ អាយុ២៧ឆ្នាំ មានទីលំនៅ ភូមិជ្រៃ ឃុំខ្វាវ ស្រុកជីក្រែង។

បើតាមសមត្ថកិច្ចថា មូលហេតុ
ជនរងគ្រោះ យកកាំភ្លើងឆ្នុក (កែច្នៃ)ឡើងចុងលើឈើ បាញ់សត្វ កម្ពស់ជាង១០ម៉ែត្រ បានរាលកៃដោយខ្លួនឯង ត្រូវចំពោះ ធ្លាក់ពី
លើដើមឈើផ្កាប់មុខប៉ះនិងថ្ម បណ្ដាលឲ្យ បែកក្បាលផ្នែកខាងមុខ ស្លាប់ភ្លាមៗ។

តាមការបំភ្លឺ របស់ក្រុមគ្រួសារសព « ជនរងគ្រោះ ពិតជាបានរាលកៃ អាវុធកៃច្នៃ ត្រូវខ្លួនឯង ហើយធ្លាក់ពីលើដើមឈើពិតប្រាកដមែន»៕SRP

ខេត្តកំពង់ចាម​៖ត្រសក់​ស្រូវ​ជា​​ដំណាំ​ម្យ៉ាង​ដែល​គេ​អាច​យកទៅ​កែច្នៃ​ជា​មុខ​ម្ហូប​​ច្រើន​យ៉ាង​ និង​រក្សា​ទុកឲ្យ​បាន​យូរ​ទៀត​ផង​ ដែរ​ប្រជាពលរដ្ឋ​មួយចំនួន រស់នៅក្នុងភូមិពោធិសាលាទី២ ឃុំ​ព្រែក​ក្របៅ​ ស្រុក​កងមាស​ ខេត្ត​កំពង់ចាម​ និយម​លេី​ការ​ដាំដុះ​ ដំណាំកសិកម្ម ប្រភេទនេះ ហើយ​ ទៅត្រាំទឹកអំបិល រួចដាក់ហាលថ្ងៃ ឲ្យបានស្ងួតល្អបន្តិច ទេីប​​លក់​បន្ត​ទៅ​ឲ្យ​អ្នក​ដ៏ទៃ​ ដេីម្បី​យក​ទៅ​កែច្នៃ​ជា​ម្ហូប​អាហារ​ តាមចំណង់ចំណូលចិត្ត ព្រោះ​វា​គ្មាន​សារធាតុ​គីមី​ ដែលធ្វើឲ្យប៉ះពាល់ ដល់សុខភាព នោះឡើយ។

បេី​តាម​ការ​រៀបរាប់​ ពីស្ត្រីម្នាក់ ​​ឈ្មោះ​ គង់​ សុភី​ ដែល​ជា​គ្រួសារ​ កសិករ នៅ​ភូមិ​ពោធិ​សាលា​ទី​២​ ដែលគាត់​មាន​ផ្ទៃ​ដី​ប្រមាណ​ ជាកន្លះហិកតា សម្រាប់​ ប្រកបមុខរបរដាំដំណាំ ត្រសក់ស្រូវ ក្រៅពីដី​ដំណាំ​រួមផ្សំ​ផ្សេងទៀត ដោយ​ដំបូងគឺ​​គាត់​បាន​ទៅ​ទិញ​គ្រាប់​ពូជ យកមកពីផ្សារ ដោយ​ក្នុង​១ប៉ុង​ ទម្ងន់​១ខាំ​ តម្លៃ​​១០ម៉ឺនរៀល ដែល​ក្នុង​២កំប៉ុង​ ​ដាំ​បានដី​កន្លះ​ហិកតា​ រួច​ស្រោច​ទឹក​ដាក់​ជី​តាម​ការ​កំណត់​ឲ្យ​បាន​ត្រឹមត្រូវ​ ក្នុង​រយៈពេល​៣៥ថ្ងៃ​ ​ទេីប​គាត់​​ទទួល​បាន​ផល​ ដែល​ល្អ​ជាង​ការ​ដាំដុះ​ តាមទម្លាប់នាពេលកន្លងមកនោះ។

កសិករ​ដដែល​បញ្ជាក់ទៀតថា ចំពោះ​ការ​ប្រកប​​មុខរបរ​ដាំ​ត្រសក់​ស្រូវ​​នេះ​ គឺ​គាត់​ទទួល​បាន​ផល​ជា​រៀងរាល់​ថ្ងៃ​ ក្នុង​រយៈពេល​ជាង​១ខែ​ឯណោះ​​ ដោយ​ក្នុង​ផ្ទៃ​ដី​កន្លះ​ហិកតា​ ដល់​ថ្ងៃ​ទទួល​ផល​​ដំបូង​ គឺបេះបាន​ប្រមាណ​ជា​៤០០គីឡូក្រាម​ ក្នុង​១ថ្ងៃ​ បន្ទាប់​មក​ធ្លាក់​ចុះ​នៅសល់​ជាង​៣០០គីឡូក្រាម​ និង​បន្ត​ធ្លាក់​​ចុះ​នៅ​សល់ជាង​២០០គីឡូក្រាម​ ព្រោះ​ដេីម​វា​ចាស់។​​​​​
ចំពោះ​ការ​​លក់​ចេញ​ក្នុង​គីឡូក្រាម​តម្លៃ​ចាប់​ពី​៧០០​រៀល​ ទៅ១០០០រៀល​​ ដែល​មិន​ពិបាក​យក​ទៅ​លក់​នៅ​ទី​ឆ្ងាយ​នោះឡើយ​។

ដោយឡែក​លោក​ លី​ វុទ្ធី​ រស់នៅ​ភូមិ​ពោធិ​សាលា​ទី​២​ ឃុំ​ព្រែក​ក្របៅ​ ស្រុក​កង​មាស​
បាន​ឲ្យ​ដឹង​ដែរ​ថា​ ចំពោះ​ការ​ផលិត​ ត្រសក់ត្រាំសម្រាប់ កែច្នៃជា ម្ហូបអាហារផ្សេងៗនេះ គឺ​លោក​ត្រូវ​ទិញ​ត្រសក់​ស្រស់​ ពីបងប្អូនប្រជាកសិករ ក្នុង​ភូមិ​ ដោយ​ទិញ​ចូល​ក្នុង​១គីឡូក្រាម​ តម្លៃ​ចាប់​ពី​៩០០រៀល​ ទៅ​១០០០រៀល​ ហើយ​យក​ទៅ​ដាក់​ត្រាំ​ទឹក​អំបិលសុទ្ធ ​(ដោយ​គ្មាន​លាយ​សារធាតុ​អ្វី​ផ្សេងនោះ​ទេ​) ហើយ​ដាក់​ហាលថ្ងៃ​ រយៈពេល​២ថ្ងៃ​ គឺ​អាច​លក់​ចេញ​បានក្នុង​១គីឡូក្រាម​ តម្លៃ​ចាប់​ពី​២០០០រៀល​ ទៅ២២០០រៀល ដោយ​ក្នុង​១ថ្ងៃ​ទិញ​ចូល​ និង​លក់​ចេញ​ ប្រមាណ​ជា​៧០០គីឡូក្រាម​ ទៅ​១០០០គីឡូក្រា​ម​ ឯណោះ​។

លោក​ លី​ វុទ្ធី​ បាន​បញ្ជាក់​ទៀត​ថា​ ប្រសិន​ជា​មាន​ម៉ាស៊ីន​សម្ងួត​ ការ​ផលិត​ត្រសក់​ស្រូវ​របស់​លោក​មួយ​នេះ​ គឺវា​កាន់តែ​មាន​ភាព​ ងាយស្រួល ដោយមិន​ចាំបាច់​ ឈរនៅហាលថ្ងៃប្រែ ចុះប្រែឡេីងទៀតទេ ហើយ​បើ​មាន​លទ្ធភាព​ផលិត​ ច្រកជាកំប៉ុង ទៀតនោះ វាកាន់តែល្អប្រសើរ ព្រោះ​មុខ​របរមួយ​នេះ​គឺ​វាអាច​ជួយ​កែប្រែ​ជីវភាព​គ្រួសាររបស់​គាត់​ បានយ៉ាងល្អប្រសើរ ថែមមួយកម្រិតផងដែរ៕SRP

ខេត្តសៀមរាប៖ឯកឧត្តមអ្នកឧកញ៉ា សៀង ណាំ តំណាងរាស្ដ្រមណ្ឌលសៀមរាប និងជាប្រធានក្រុមសម្ព័ន្ធមេត្រីភាពជាមួយវរសេនាតូចការពារព្រំដែនលេខ១របស់តំបន់ប្រតិបត្តិការសឹករងខេត្តសៀមរាប នៅព្រឹកថ្ងៃទី០៥ ខែមករា ឆ្នាំ២០២១ នេះ បានប្រគល់ថវិកាចំនួន៦៤០០ដុល្លារ អាមេរិកដល់វរសេនាតូចការពារព្រំដែនលេខ១ សម្រាប់សាងសង់អគារផ្ទះបាយថ្មី ដែលឈរជើងនៅចំណុចអូរកូនតឹង ក្នុងភូមិត្រពាំងក្រសាំង ឃុំស្រែណូយ ស្រុកវ៉ារិន។

ឯកឧត្ត ឧត្តមសេនីយ៏ទោ ស៊ីន ភាត់ មេបញ្ជាការតំបន់ប្រតិបត្ដិការសឹករងសៀមរាប បានថ្លែងអំណរគុណយ៉ាងធំធេងចំពោះ ឯកឧត្តមអ្នកឧកញ៉ា សៀង ណាំ សៀង ណាំ តំណាងរាស្ដ្រមណ្ឌលសៀមរាបរួមជាមួយសមាជិកក្រុមសម្ព័ន្ធមេត្រីភាពទាំងអស់ ដែលជានិច្ចកាលតែងតែឧបត្ថម្ភគាំទ្រដល់កងកម្លាំងពិសេសវរសេនាតូចការពារព្រំដែនលេខ១នេះ។
តំណាងឱ្យកងកម្លាំងទាំងអស់ នៃវរសេនាតូចការពារព្រំដែនលេខ១ បានប្តេជ្ញាថា និងខិតខំក្នុងកិច្ចការការពារជាតិមាតុភូមិឱ្យបានល្អ ជាពិសេសគឺតាមខ្សែបន្ទាត់ព្រំដែន។

ឯកឧត្តមអ្នកឧកញ៉ា សៀង ណាំ បានមានប្រសាសន៍ថា បើទោះបីប្រទេសកម្ពុជាក៏ដូចជាបណ្តាប្រទេសផ្សេងៗនៅលើពិភពលោកបានកំពុងជួបការលំបាកដោយសារការកូវីដ ក៍ប៉ុន្តែក្នុងនាមជាសម្ព័ន្ធមេត្រីភាព ឯកឧត្តមអ្នកឧកញ៉ាតែងតែគិតគូដល់កងកម្លាំងប្រដាប់អាវុធជានិច្ច ជាក់ស្តែងសកម្មភាពនៅពេលនេះស្រាប់ គឺបានបង្ហាញឱ្យឃើញពីការបង្កើតភាពស្និទ្ធស្នាល លើកទឹកចិត្ដ និងធ្វើឱ្យកងកម្លាំងមានភាពជឿជាក់ និងភាពកក់ក្ដៅក្នុងការរួមចំណែកការពារ ជាតិ សាសនា ព្រះមហាក្សត្រ ជាពិសេស គឺការពារបូរណភាពទឹកដី និងរដ្ឋធម្មនុញ្ញ ដែលជាច្បាប់កំពូលរបស់ជាតិ។

សូមបញ្ជាក់ថា នៅក្នុងរយៈពេលជាង១០ឆ្នាំមកនេះ ក្នុងនាមសម្ព័ន្ធមេត្រីភាព ឯកឧត្តមឧកញ៉ា សៀង ណាំ តំណាងរាស្ដ្រមណ្ឌលសៀមរាប និងជាប្រធានក្រុមសម្ព័ន្ធមេត្រីភាពជាមួយវរសេនាតូចការពារព្រំដែនលេខ១ របស់តំបន់ប្រតិបត្តិការសឹករងខេត្តសៀមរាប គឺបានជួយយ៉ាងច្រើន ដល់អង្គភាពមួយនេះ ទាំងផ្នែកស្បៀងអាហារ និងការងារអភិវឌ្ឍទីបញ្ជាការ ផងដែរ៕SRP

ខេត្តបាត់ដំបង៖ប្រជាពលរដ្ឋ រស់នៅភូមិតាង៉ែន និង អាជ្ញាធរ ឃុំតាគ្រាម ស្រុកបាណន់ ខេត្តបាត់ដំបង បានថ្លែងអំណអគុណ ដល់ក្រុមការងារអភិវឌ្ឍ ស្ថាបនាផ្លូវ របស់អង្គភាព
សុីម៉ាក់ ដែលបានមកជួយ ធ្វើផ្លូវឲ្យពួកគាត់បានធ្វើដំណើរ ទៅមក។ ជាពិសេសគឺការដឹកជញ្ជូនផលដំណាំផ្សេងៗ។ ម្យាងទៀត អង្គភាពសុីម៉ាក់ធ្វើផ្លូវនេះ ក៏មិនមានរ៉ៃរង្គាសនិងប៉ះពាល់ថវិកា ពីពួកគាត់ឡើយ។

ការជួសជុលផ្លូវនេះ គឺអង្គភាពស៊ីម៉ាក់ បានយកដីភ្នំឈូងស្វាយ មកធ្វើ គឺជាការស្នើសុំ របស់ប្រជាពលរដ្ឋ ខាងលើ ដោយសារតែផ្លូវរងការខូចកាលពីទឹកជំនន់ ជន់លិច កន្លងមកបណ្តាលឲ្យខូចផ្លូវអស់ជាច្រើន កន្លែងស្ថិតនៅត្រង់ចំណុចភូមិតាង៉ែន។

លោក ទិត សុផល ប្រធានគំរោងអភិវឌ្ឍ ស្ថាបនាផ្លូវថ្នល់ បានផ្តល់បទសម្ភាសន៍ ជាមួយក្រុមអ្នកយកព័ត៌មានថា៖ ចំពោះគ្រឿងចក្រ ដែលកំពុងយកដីគ្រួសក្រហម នៅត្រង់ចំំណុចខាងលើនេះ គឺរបស់អង្គភាព(សុីម៉ាក់)និងជាការស្នើសុំពីអាជ្ញាធរ ឃុំតាគ្រាម និងប្រជាពលរដ្ឋ ដើម្បីយកមកធ្វើផ្លូវ កាលដែលទឹកជំនន់លិចកន្លងមក។ ដោយគម្រោងធ្វើផ្លូវនេះ ជិតរួចរាល់ជាស្ថាពរ និងបន្តចុះទៅជួសជុលផ្លូវ នៅឯស្រុកសំឡូត បន្តទៀត។ ដើម្បីឲ្យប្រជាពលរដ្ឋ ងាយស្រួល ក្នុងការធ្វើដំណើរ ទៅមក​និងដឹកជញ្ជូនដំណាំ កសិផល ជាដើម។ល។

ការឆ្លើយតប ជាមួយ ប្រជាពលរដ្ឋ ក្នុងសហគមន៏ ភូមិអង្គត់ធ្នុង ឃុំតាគ្រាម ស្រុកបាណន់ លោក ហេង រតនា ប្រតិភូរាជរដ្ឋាភិបាល ទទួលបន្ទុកជាអគ្គនាយស៊ីម៉ាក់ បានផ្តល់ថវិកាផ្ទាល់ខ្លួន ដើម្បី ផ្តល់ជូនការអនុវត្ត ដោយការសាងសង់ផ្លូវលំនេះ ជាការផ្តល់ជូនរបស់លោកផ្ទាល់។

ដោយឡែក ក្នុងពេលខាងមុខ ស៊ីម៉ាក់ និងបន្តការជួសជុលឡើងវិញ លើកំណាត់ផ្លូវ ដែលស៊ីម៉ាក់បានអនុវត្តគម្រោង ដោយភ្នាក់ងារ ម្ចាស់ជំនួយ នៅក្នុងស្រុកសំឡូត និងស្រុករតនមណ្ឌល ដែលខូតខាត ដោយទឹកជំនន់កន្លងមក។

គួរបញ្ជាក់ដែរថាគំរោងអភិវឌ្ឍ ស្ថាបនាផ្លូវ របស់អង្គភាពសុីម៉ាក់ និងបន្តបេសកម្មទៅស្រុកផ្សេងទៀត ឲ្យតែមានការផ្តល់ដំណឹង ពីបញ្ហាផ្លូវ ថ្នល់ ស្ពាន ខូចខាត និងមានការស្នើសុំពីអាជ្ញាធរភូមិ ឃុំ ច្បាស់លាស់៕SRPដោយប៊ុនថេត

ខេត្តសៀមរាប៖បុរសពីរនាក់ បានស្លាប់ភ្លាមៗ ដោយគ្រោះថ្នាក់ចរាចរណ៍។

ហេតុការណ៍បានកើតឡើង នៅវេលាម៉ោង២២និង៥១នាទី ថ្ងៃទី ០៤ ខែមករាឆ្នាំ២០២១ នៅចំណុចបង្គោលគី
ឡូម៉ែត្រលេខ៣៨ លើផ្លូវជាតិលេខ៦៨ ស្ថិតនៅភូមិត្រុំខាងជើង ឃុំជ្រោយនាងងួន ស្រុកស្រីស្នំ
ខេត្តសៀមរាប។

សមត្ថកិច្ចស្រុកស្រីស្នំបានដឹងថា ករណីនេះ មិនដឹងបើកបរម៉ូតូបុកជាមួយអ្វីនោះទេ ហើយមិនដឹង មានទិសដៅពីណាទៅណាដែរ។ ពីព្រោះបុករួច ទាំងអ្នកបើកបរម៉ូតូនិងអ្នករួមដំណើរម្នាក់ស្លាប់ទាំង២នាក់។

សមត្ថកិច្ចបានបញ្ជាក់ថាតាមការសន្និដ្ឋាន ប្រហែលជនរងគ្រោះ បើកម៉ូតូ មានទិសដៅពីជើង ទៅត្បូង ហើយបុក ជាមួយយានយន្តផ្សេងទៀត ពីក្រោយពីព្រោះ (ក ម៉ូតូបាក់)។

ម៉ូតូម៉ាកហុងc១២៥
ពណ៌ខ្មៅ សេរី២០១៤ពាក់ស្លាកលេខឧត្ដរមានជ័យ១B-០៩១៤។

ជនរងគ្រោះទីឈ្មោះយឹម ខេវិន ភេទ
ប្រុសអាយុ២១ឆ្នាំមុខរបរ ធ្វើស្រែ នៅភូមិ
ចម្ការចេក ឃុំស្លែងស្ពាន ស្រុកស្រីស្នំ
(បើកបរមិនពាក់មួកសុវត្ថិភាព)ស្លាប់។
ទី២ឈ្មោះសក់ ណារីន ភេទប្រុស អាយុ២១ឆ្នាំ មុខរបរ បើកបរ ត្រាក់ទ័រ(ឈ្នួល) មិនពាក់មួកសុវត្ថិ
ភាព នៅភូមិសំពៅលូន ឃុំប្រាសាទ
ស្រុកព្រះនេត្រព្រះ ខេត្តបន្ទាយមានជ័យ័
(ស្លាប់)។ ចំណែកម៉ូតូរងការខូចធ្ងន់៕SRP

ភ្នំពេញ៖ថ្ងៃទី ០៥ ខែមករាឆ្នាំ ២០២១ ជាថ្ងៃខួបអាពាហ៍ពិពាហ៍ ៤៥ ឆ្នាំ របស់ សម្ដេចតេជោហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា។

សម្ដេច ហ៊ុនសែន បានសរសេរសារ នៅលើទំព័រហ្វេសប៊ុក របស់សម្ដេចនៅព្រឹកនេះថា៖
ថ្ងៃនេះគឺជាខួបអាពាហ៍ពិពាហ៍ ៤៥ ឆ្នាំ របស់ខ្ញុំ (៥មករា១៩៧៦-៥មករា២០២១)។

ខ្ញុំតែងតែគិតថាអ្វីដែលខ្ញុំនិងភរិយាបានឆ្លងកាត់ក្នុងសម័យសង្រ្គាមគឺពុំគួរឱ្យជឿថា ខ្ញុំអាចមានជីវិតរហូតមកដល់សព្វថ្ងៃនេះឡើយ។ ជីវិតយុទ្ធជនក្នុងភ្លើងសង្គ្រាម ពិសេសក្នុងរបបប្រល័យពូជសាសន៍ ប៉ុល ពត ដែលយើងត្រូវតស៊ូផ្ដួលរំលំដោយយកជីវិតធ្វើដើមទុន គឺមិនមែនជារឿងសាមញ្ញនោះឡើយ។

ជីវិតប្តីប្រពន្ធបន្ទាប់ពីរៀបការគ្មានទេដែលហៅថាសេចក្តីសុខ។ ខ្ញុំបានស្លាប់កូនទី១និងបែកគ្នាក្នុងពេលកូនទី២នៅក្នុងផ្ទៃម្តាយ៥ខែ រហូតជួបគ្នាជាថ្មី ដែលកូនប្រុសបង (ម៉ាណែត) ហៅខ្ញុំថាពូអស់រយៈពេល២ខែ។

ទាំងនេះគឺសុទ្ធតែរឿងរ៉ាវមិនគ្រាន់តែសម្រាប់ខ្ញុំនិងភរិយាប៉ុណ្ណោះទេ ប៉ុន្តែវាក៏ជារឿងរ៉ាវដែលបានកើតឡើងសំរាប់ប្រជាជនកម្ពុជាទូទាំងប្រទេសដែលបានឆ្លងកាត់ក្នុងសម័យនោះផង ដែរ។ “ទុក្ខស្រីប្តីព្រាត់” បានធ្វើឱ្យខ្ញុំនិងភរិយាស្រក់ទឹកភ្នែករាប់លានដំណក់។

ប៉ុន្តែទឹកភ្នែកនេះគឺបាននាំមកនូវការរស់រានមានជីវិតសម្រាប់ប្រជាជនទូទាំងប្រទេស រាប់ទាំងក្រុមគ្រួសារខ្ញុំដែរ។

ចាប់ផ្តើមពីប្តីប្រពន្ធដ៏កំសត់វ័យក្មេង២នាក់ រហូតមកដល់ពេលនេះយើងមានកូន និងចៅយ៉ាងច្រើន ប៉ុន្តែនៅតែចងចាំជានិច្ចចំពោះជីវិតតស៊ូដ៏លំបាកបំផុតរបស់ខ្ញុំនិងភរិយាជាទីស្រឡាញ់។
ខ្ញុំ និងភរិយា សូមជូនពរបងប្អូនជនរួមជាតិទូទាំងប្រទេស ជួបប្រទះតែសេចក្តីសុខ និងសំណាងល្អក្នុងឆ្នាំសកលថ្មី ២០២១ កុំបីខានឡើយ៕SRP

ខេត្តកំពង់ចាម៖រថយន្តដឹកឈើ របស់ក្រុមហ៊ុនស៊ីងបាយអូថេក១គ្រឿង បានក្រឡាប់ផ្ងារជើងធ្លាយចេញមកសុទ្ធតែឈើប្រភេទលេខ១ ប្រមាណជាង៣០ម៉ែត្រគូប ជ្រៀកជាបួនជ្រុង​ ប្រវែងជាង៣ម៉ែត្រ​ ខណៈ​ដែល​អ្នក​បេីកបរ​រថយន្ត​រងរបួស​ស្រាល​ម្នាក់​។

ហេតុការណ៍​នេះ​ បានកេីតមានឡើង នៅព្រឹកថ្ងៃទី០៤ ខែមករា​ ឆ្នាំ​២០២១​ នៅ​កំណាត់​ផ្លូវចូលភូមិគីឡូ៣​ ឃុំព្រែកកក់ ស្រុកស្ទឹងត្រង់​ ខេត្តកំពង់ចាម​។

ប្រភព​បាន​ឲ្យ​ដឹងថា​ រថយន្ត​ដឹក​ឈេី​ខាងលេី​ មាន​លិខិតច្បាប់អនុញ្ញាត​ ឲ្យដឹកជញ្ជួនឈេី ក្នុងមួយគ្រឿងប្រមាណជាង១៧ម៉ែត្រគូបតែប៉ុណ្ណោះ និងជាឈើប្រភេទឈេីលេខ៣ ចេញពីទឹកដីខេត្តក្រចេះឆ្ពោះទៅកាន់ខេត្តកណ្តាល។ ប៉ុន្តែបើតាមការកត់សម្គាល់ឈើប្រភេទសុក្រំ ស្រឡៅ កែច្នៃជារាងជ្រុងៗបែបនេះជាប្រភេទឈើនាំចេញទៅក្រៅប្រទេស។

ប្រភពពីប្រជាពលរដ្ឋ រស់នៅក្បែរកន្លែងកើតហេតុ បាន​ឲ្យ​ដឹង​ថា មានរថយន្តដឹកឈើដូច​រថយន្ត​ក្រឡាប់​នេះច្រើនគ្រឿងណាស់ ក្នុងមួយយប់ៗ ដែលធ្វើសកម្មភាព​បែបនេះ​ជាច្រើនខែមកហើយ គឺបើកបរលឿនៗណាស់​ដោយ​គ្របតង់បិទជិតផ្នែកទ្រុង ឬរឺម៉ក។

ជាក់ស្តែងរថយន្តដែលក្រឡាប់នេះ គឺគ្មានឧបសគ្គនៅខាងមុខឡើយ គឺបណ្តាលមកពីបើកបរលឿន ផ្លូវចុះចំណោត និងផ្លូវកោងទើបក្រឡាប់តែម្តង។

ជុំវិញករណីរថយន្តដឹកឈើក្រឡាប់ នេះ លោក ប្រាក់ ណូម៉ា នាយខណ្ឌរដ្ឋបាលព្រៃឈើកំពង់ចាម​ បាន​ឲ្យ​ដឹង​ថា រថយន្តដឹកឈើក្រឡាប់នេះ មានច្បាប់អនុញ្ញាតត្រឹមត្រូវ​ ចំពោះ​បើថា ដឹកលើសច្បាប់អនុញ្ញាត និងខុសប្រភេទពីលេខ៣ ទៅ​ជា​លេខ១នោះ​ លោកនឹង​ចាត់តាំង​មន្ត្រី​ជំនាញ​ចុះទៅវាស់វែងពិនិត្យជាក់ស្តែង​៕SRP