ខេត្តសៀមរាប៖មនុស្សមួយក្រុមបានទៅបាញ់សត្វ តែរបុរសម្នាក់បានស្លាប់ដោយសារតែរៀលកៃបាញ់ខ្លួនឯង។

ហេតុការណ៍បានកើតឡើងវេលាម៉ោង ១៥និង០០ នាទី ថ្ងៃទី ១០ ខែឧសភា ឆ្នាំ២០២២ នៅចំណុចបាញ់ខ្លា ស្ថិតនៅភូមិពពេល ឃុំតាសៀម ស្រុកស្វាយលើ ខេត្តសៀមរាប។

របាយការណ៍ររបស់សមត្ថកិច្ចខេត្តសៀមរាបបានដឹងថា ជនរងគ្រោះឈ្មោះ ឆង ឆន ភេទ ប្រុសអាយុ ៣៨ឆ្នាំ រស់នៅភូមិបុស្សធំ ឃុំខ្នារពោធិ៍ ស្រុកសូទ្រនិគម ខេត្តសៀមរាប។

របាយការណ៍បន្តថាយោងតាមការបំភ្លឺរបស់សាក្សីឈ្មោះ ភួង សុផាន់ ភេទប្រុស អាយុ ២៥ឆ្នាំរស់នៅភូមិពពេល ឃុំតាសៀម ស្រុកស្វាយលើ ខេត្តសៀមរាប ត្រូវជាមិត្តភ័ក្តបោះជនរងគ្រោះបានប្រាប់អោយដឹងថា៖ នៅថ្ងៃទី ១០ ខែឧសភា ឆ្នាំ២០២២ វេលាម៉ោង ១៣និង០០នាទីរសៀល ជនរងគ្រោះនិងខ្លួន មានគ្នាចំនួន ០៥នាក់ បានបបួលគ្នាទៅបាញ់រលក នៅក្នុងព្រៃចំណុចបាញ់ខ្លា ស្ថិតក្នុងភូមិពពេល ឃុំតាសៀម ស្រុកស្វាយលើ ខេត្តសៀមរាប។
ដោយមាន៖
១.ឈ្មោះ ឆង ឆន(សព) ភេទប្រុស អាយុ ៣៨ឆ្នាំ។
២.ឈ្មោះ ភួង សុផាន់ ភេទប្រុសអាយុ ២៥ឆ្នាំ
៣.ឈ្មោះ តាន់ ខើ ភេទប្រុស អាយុ ៣៤ឆ្នាំភូមិ ពពេល
៤.ឈ្មោះ ភុង វាសនា ភេទប្រុស អាយុ ២០ ឆ្នាំ
៥.ឈ្មោះ ប៉ិក ផាន់ណា ភេទ អាយុ ២៦ឆ្នាំ អ្នកទាំង៥នាក់ រស់នៅ ឃុំខ្នារពោធិ៍ ស្រុកសូទ្រនិគម ខេត្តសៀមរាប។

សាក្សីបន្តថាពេលទៅដល់ចំណុចត្រូវរកសត្វ នាំគ្នាចុះដើររកសត្វ តែរកមិនមានសត្វ សម្រាប់បាញ់នោះទេ ដល់ម៉ោង ១៥.០០ នាទីរសៀល ក៏បបួលគ្នាមកផ្ទះវិញ និងរៀបចំកាំភ្លើងកែច្នៃដាក់លើគោយន្តកន្ត្រៃវិញ ដោយ ឈ្នោះ តាន់ ខើ ភេទប្រុស កាន់កាំភ្លើងកែច្នៃ ១ដើម។ ២.ឈ្មោះ ភូង សុផាន់ ភេទប្រុស កាន់១ដើម។ ៣.ឈ្មោះ ឆង ឆន ភេទប្រុស (សព) កាន់កាំភ្លើង ២ដើម។ ពួកខ្លួនបានរៀបចំទុកដាក់កាំភ្លើងលើគោយន្តរួច នៅសល់តែឈ្មោះ ឆង ឆន (សព) យកកាំភ្លើងមកក្រោយគេ ស្រាប់តែឮសូរសម្លេងផ្ទុះផាំងពីក្រោយគោយន្ត ភ្លាមៗនោះពួកខ្លួនមើលទៅឃើញគាត់ (សព) ត្រូវរបួសដោយសាររៀលកៃកាំភ្លើងកែច្នៃចំភ្លៅខាងឆ្វេងធ្លាយ ពីម្ខាងទៅម្ខាង និងមានឈាមហូរច្រើន ក៏នាំគ្នាដឹកយកគាត់ទៅមន្ទីរពេទ្យស្រែណូយ។ ពេលទៅដល់ពេទ្យក៏បានសង្គ្រោះបានបន្តិច ពេទ្យក៏ប្រាប់ថាជនរងគ្រោះបានស្លាប់បាត់ទៅហើយ ដោយសារឈាមហូរចេញច្រើនពេក។ រួចពួកខ្លួនក៏ដឹកសពយកមកផ្ទះនៅភូមិបុស្សធំ ឃុំខ្នារពោធិ៍ ស្រុកសូទ្រនិគម ខេត្តសៀមរាប និង រាយការណ៍ជូនសមត្ថកិច្ចតែម្តង។

សមត្ថកិច្ចបញ្ជាក់ថាការពិនិត្យសាកសពផ្នែកក្បាល: ដងខ្លួន និង អវយវៈទាំងអស់ ពុំមានស្លាកស្នាម អ្វីពាក់ព័ន្ធ និងបទល្មេីសព្រហ្មទណ្ទផ្សេងទេ។ យោងតាមកិច្ចសហការរវាងកម្លាំងផ្នែកព្រហ្មទណ្ឌ និង ផ្នែកពិនិត្យ វិភាគកន្លែងកើតហេតុ ព្រមទាំងការបំភ្លឺរបស់សាក្សី សន្និដ្ឋានថា សពបានស្លាប់ដោយសាររៀលកៃកាំភ្លើងកែច្នៃស្លាប់ដោយខ្លួនឯងពិតប្រាកដមែន។ ក្រោយពិនិត្យចប់បានធ្វើកំណត់ហេតុប្រគល់សពឲ្យក្រុមគ្រួសារយកទៅធ្វើបុណ្យតាមប្រពៃណី៕SRP

ខេត្តសៀមរាប៖ការដេញថ្លៃធ្វើផ្លូវចំនួន២ខ្សែ នៅស្រុកសូនិគម ខេត្តសៀមរាប គម្រោងទី១ នៅឃុំដានរុន ជួសជុលផ្លូវដីសក្រាលក្រួសក្រហម ប្រវែង២គ.មទទឹង៥.៤ម៉ែត្រកម្រាស់ ០.១៥ម៉ែត្រ និងស្លាកគម្រោង២ បញ្ជាក់ដីសបំពេញតួ ផ្លូវត្រូវដឹកដាក់និងចាក់ដីក្រួសក្រហមសម្រាប់ជួសជុលផ្លូវ ព្រមទាំងដាក់លូរបាំងការពារផ្លូវនិងលាបថ្នាំ នៅថ្ងៃចន្ទទី ០៩ ខែឧសភាឆ្នាំ ២០២២ ហាក់បីមានភាពមិនប្រក្រតី។

ប្រភពបានឲ្យដឹងថា តម្លៃប៉ាន់ស្មាន.១៦៩.២៦០.៥៨១រៀល គម្រោងមួយនេះ គេសង្កេតឃើញថា មានការប្រកួតប្រជែង រហូតទៅដល់ 7 ក្រុមហ៊ុនឯណ្ណោះ ហើយអ្នកដែលដេញថ្លៃបាន ឈ្មោះម៉ូវ សុីថាយ មកពីក្រុមហ៊ុនម៉ៅការMSTតម្លៃដេញបាន ៩១.៩៩៨.៣០០រៀល គត់ ជាអ្នកទទួលបានគម្រោងហើយក៏អ្នកឈ្នះផងដែរ។

ចំណែកនៅគម្រោងទី 2 ដែលជាគម្រោង មានភាពមិនប្រក្រតីនោះ គឺឃុំកំពង់ឃ្លាំង សាងសង់ផ្លូវបេតុងមេប្រវែង០.២៨៨គ.ម មានទទឹង៥ម. កម្រាស់០.១៥ម ស្លាកសញ្ញាគម្រោង១ បញ្ជាក់.ប្រើប្រាស់ដែកថ្នាំងអំពៅ១០ម.ម តម្លៃប៉ាន់ស្មាន .១៦៤.៦៨៩.១២៩រៀលមានក្រុមហ៊ុនចំនួន 4 ដែលបានចូលដាក់ពាក្យដេញថ្លៃ ក្នងតម្លៃចចារគ្នា ចែកគ្នាស៊ីក្នុងគម្រោងឃុំកំពង់ឃ្លាំងនេះ។

ទី១.ម៉ូវ សុីថាយ មកពីក្រុមហ៊ុនMSTតម្លៃដាក់ដេញថ្លៃ១៦៤.០០០.០០០រៀល

ទី២ អ៊ុង លីសួរ មកពីក្រុមហ៊ុនអ៊ុង លីសួរ តម្លៃដាក់ដេញថ្លៃ១៦៤.៦០០.០០០រៀល

ទី៣ ទាត់ វ៉ាន់ដៀន មកពីក្រុមហ៊ុនអំឡីតម្លៃដាក់ដេញថ្លៃ១៦៤.៤៤៨.០០០រៀល

ទី៤ ហ៊ួរ ឆូយ មកពីក្រុមហ៊ុនហ៊ួរ ឆូយ តម្លៃដាក់ដេញថ្លៃបាន១៦៣.០០០.០០០. រៀលជាតម្លៃត្រូវរូវគ្នា ហើយជាអ្នកទទួលបានគម្រោងនិងជាមេចំណែកបោះលុយទឹកតែផងដែរ គឺក្រុមហ៊ុន ហ៊ួរ ឆូយ ដោយសង្កេតឃើញថា៖ មានតែ៤ ក្រុមហ៊ុន ដែលបានដាក់ដេញថ្លៃនៅក្នុងឃុំកំពង់ឃ្លាំង គឺជាក្រុមហ៊ុនដែលគេនិយាយត្រូវគ្នា និងចែកភាគហ៊ុនទឹកតែគ្នា ហើយជាជាវិញ្ញាសា ចម្លងគ្នាតែប៉ុណ្ណោះ។

ប្រភពបានបន្តថា នៅថ្ងៃដដែល ប្រជាពលរដ្ឋរស់នៅក្នុងឃុំកំពង់ឃ្លាំង ស្រុកសូទ្រនិគមខេត្តសៀមរាប បានឲ្យអ្នកសារព័ត៌មាន ដឹងថាពួកគាត់និងអស់សង្ឃឹមទៅលើអាជ្ញាធរឃុំនិងអាជ្ញាធរស្រុក ហាក់បីរួមគំនិតគ្នា ជាមួយក្រុមហ៊ុនម៉ៅការ ដេញថ្លៃ។

ជុំវិញការបែកធ្លាយគម្រោងដេញថ្លៃធ្វើផ្លូវ ខាងលើនេះ សៀមរាបប៉ុស្តិ៍ នៅពុំទាន់ទទួលបានការបកស្រាយបំភ្លឺពីអាជ្ញាធរនិងក្រុមហ៊ុននៅឡើយទេ៕SRP

ខេត្តបាត់ដំបង៖លោកសុខ លូ អភិបាលខេត្តបាត់ដំបង បានថ្លែងអំពាវនាវ ដល់ប្រជាពលរដ្ឋទាំងអស់ ត្រូវចូលរួមទាំងអស់គ្នាក្នុងការគោរព និងអនុវត្តនូវគោលនយោបាយ ភូមិឃុំមានសុវត្ថិភាព ឲ្យបានម៉ឺងម៉ាត់។ លោកក៏បានប្រាន់អាជ្ញាធរមានសមត្ថកិច្ច ឲ្យធានានិងរក្សាបាននូវសុខសន្តិភាព សុវត្ថិភាព ក្នុងការថែរក្សាសន្តិសុខ សណ្តាប់ធ្នាប់សង្គម ក្នុងមូលដ្ឋានរបស់ខ្លួន កុំឲ្យកើតឡើងបានផងដេរ។ 

លោកសុខ លូ អភិបាលខេត្តបាត់ដំបង និងជាប្រធានគណៈកម្មាធិការសាខាកាកបាទក្រហមកម្ពុជាខេត្ត

មានប្រសាសន៍បែបនេះ ក្នុងឱកាសលោកនិងលោកជំទាវ ព្រមទាំងមានការចូលរួមពីពាក់ព័ន្ធ អញ្ជើញសំណេះសំណាល សួរសុខទុក្ខ និងនាំយកអំណោយមនុស្សធម៌របស់សាខាកាកបាទក្រហមកម្ពុជា ផ្តល់ជូន ប្រជាពលរដ្ឋ ដែលងាយរងគ្រោះបំផុត ជនចាស់ជរាឥតទីពឹង ជនមានពិការភាព ស្ត្រីមេម៉ាយកូនច្រើនមានជីវភាពខ្វះខាតមកពីភូមិចំនួន ៣៥ភូមិនៃឃុំចំនួន៥ ក្នុងស្រុកឯកភ្នំ ខេត្តបាត់ដំបង  សរុបចំនួន ៣២០គ្រួសារ នៅថ្ងៃអង្គារ នេះ។

លោក ក៏បានបន្តអំពាវនាវដល់ប្រជាពលរដ្ឋ ឲ្យចូលរួមសហការជាមួយអាជ្ញាធរនិងសមត្ថកិច្ចពាក់ព័ន្ធ ក្នុងការរាយការណ៍ពេលជួបនឹងសកម្មភាពនានាពីការជួញដូរ ចែកចាយ និងប្រើប្រាស់គ្រឿងញៀន នៅតាមសហគមន៍ និងត្រូវបន្តការអប់រំកូនចៅ បុត្រា បុត្រីរបស់ខ្លួន គេចឲ្យឆ្ងាយអំពីគ្រឿងញៀន ដែលគ្រឿងញៀនជាឈ្លើងនៃសង្គម សង្គមមិនត្រូវការឡើយ។ ក្នុងនោះ សូមឱ្យប្រជាពលរដ្ឋចូលរួមបន្តអប់រំណែនាំកូនចៅរបស់ខ្លួនឱ្យបានជាប់ជាប្រចាំ ដើម្បីឱ្យពួកគេគោរពច្បាប់ចរាចរណ៍ ពិសេសក្នុងពេកបើកបរសូមកុំសេពគ្រឿងស្រវឹង ត្រូវពាក់មួកសុវត្ថិភាពរាល់ពេលបើកបរម៉ូតូ ទោះទៅណាជិតឬឆ្ងាយ និងពាក់ខ្សែក្រវ៉ាត់ឱ្យបានត្រឹមត្រូវពេលបើកបររថយន្ត ដើម្បីកាត់បន្ថយអត្រាគ្រោះថ្នាក់ចរាចរណ៍សម្រាប់ខ្លួនឯងនិងអ្នកដទៃ។

លោក សុខ លូ  នាំយកការផ្ដាំផ្ញើសួរសុខទុក្ខពីសំណាក់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន  ប្រធានកាកបាទក្រហមកម្ពុជា  ដែលសម្ដេចតែងតែមានការគិតគូរដល់ប្រជាពលរដ្ឋគ្រប់ៗរូប ពិសេសប្រជាពលរដ្ឋងាយរងគ្រោះនានា ពីសុខទុក្ខ និងជីវភាពរស់នៅប្រចាំថ្ងៃ ជាពិសេសផ្ញើ នូវក្តីនឹករលឹកចំពោះលោកតាលោកយាយ បងប្អូនប្រជាពលរដ្ឋផងដែរ។ 

ឆ្លៀតក្នុងឱកាសនោះផងដែរដែរ

លោក សុខ លូ ក៏បានថ្លែងអំណរគុណយ៉ាងជ្រាលចំពោះសប្បុរសជនគ្រប់មជ្ឈដ្ឋាន  ជាពិសេស សម្តេចក្រឡាហោម  ស  ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តបាត់ដំបង  ដែលបានបរិច្ចាគធនធានថវិកាប្រកបដោយទឹកចិត្តជ្រះថ្លាជូនកាកបាទក្រហមកម្ពុជា ក្នុងឱកាសទិវាពិភពលោកកាកបាទក្រហម និងអឌ្ឍចន្ទក្រហម ៨ ឧសភា ដើម្បីឱ្យសាខាកាកបាទក្រហមកម្ពុជាខេត្ត អាចចុះបំពេញប្រតិបត្តិការមនុស្សធម៌បានដូចនាពេលនេះ និងជាបន្តបន្ទាប់ទៀត។ 

លោក សុខ លូ ក៏រំលឹកដល់ប្រជាពលរដ្ឋទាំងអស់ ដែលមិនទាន់បានចាក់វ៉ាក់សាំងកូវីដ-១៩ ដូសជំរុគទី៣ ឬដូសជំរុញទី៤ សូមនាំគ្នារួសរាន់ចាក់ នៅតាមមណ្ឌលចាក់វ៉ាក់សាំងដែលនៅជិតភូមិ ឃុំរបស់ ប្រជាពលរដ្ឋរស់នៅ និងសូមកុំឲ្យមានការភ័យខ្លាចថាវ៉ាក់សាំងបង្កជាហានិភ័យដល់សុខភាព តាមរយៈការញ៉ុះញ៉ុងពីជនអគតិមួយចំនួន ដែលមិនចង់ឲ្យប្រទេសជាតិគេចផុតពីជំងឺកូវីដ-១៩ ព្រោះវ៉ាក់សាំង ជួយដល់ប្រជាពលរដ្ឋដែលមានសុខភាពខ្សោយ និងជួយពង្រឹងអង់ទីករបន្ថែមទៀត ដើម្បីឲ្យមានភាពស៊ាំក្នុងខ្លួនពីជំងឺកូវីដ-១៩។ 

សូមបញ្ជាក់ថា អំណោយដែលសាខាកាកបាទក្រហមកម្ពុជាខេត្ត ត្រូវបានផ្តល់ជូនដល់គ្រួសារនីមួយៗនូវ ៖ អង្ករ ២៥គីឡូក្រាម, មី ១កេស, ត្រីខ ១០កំប៉ុង, ទឹកបរិសុទ្ធ១កេស,ទឹកត្រី១យួរ ទឹកស៊ីអ៉ីវ១យួរ និងជែល១ដបផងដែរ៕SRP

ខេត្តកំពង់ចាម៖អភិបាលខេត្តកំពង់ចាម​ លោក​​ អ៊ុន​ ចាន់ដា​ បានជំរុញការរៀបចំ​ ទាំង​សកម្មភាព​ និង​ឯកសារ​នានា​ ដេីម្បី​គាំទ្រ​​ធ្វើយ៉ាងណា​ ឲ្យ​ដំណើរការ​បោះឆ្នោត​ជ្រើស​រើស​ក្រុមប្រឹក្សា​ ឃុំ សង្កាត់ អាណត្តិទី​៥ ឆ្នាំ​២០២២​ ដែល​នឹង​ប្រព្រឹត្ត​ទៅ​នៅថ្ងៃទី៥ ខែមិថុនា ខាងមុខនេះ​ ឲ្យ​មានភាព​ត្រឹមត្រូវ​ យុត្តិធម៌​ ​ស្របទៅ​តាមគោលការណ៍ លទ្ធិប្រជាធិបតេយ្យ នៅ​ថ្នាក់​ក្រោម​ជាតិ​។

 ថ្លែងជំរុញបែប​នេះ​​ ក្នុងកិច្ចប្រជុំសាមញ្ញលើកទី៣៦​ អាណត្តិទី៣ របស់ក្រុមប្រឹក្សាខេត្តកំពង់ចាម​ នៅថ្ងៃអង្គរនេះ។

អភិបាលខេត្ត​ ក៏​បាន​ក្រេីនរំលឹកដល់​មន្ត្រី​ពាក់ព័ន្ធ​ ឲ្យ​មាន​ភាព​ទទួល​ខុសត្រូវ​ ក្នុង​ការ​បំពេញ​ភារកិច្ច​តួនាទី​របស់​ខ្លួន​ ពោល​គឺ​ត្រូវ​ទទួល​នូវ​អ្វី​ដែល​ខ្លួន​​បាន​អនុវត្ត​ ​មិន​ថា​ខុស​ ឬក៏​ត្រូវ​ ​គឺ​ត្រូវ​ទទួលយក​ទាំងអស់​ កុំ​ទទួលយក​តែ​ត្រូវ​ ហើយ​អ្វី​ដែល​ខុស​រុញ​ទៅ​ឲ្យ​អ្នក​ដទៃ​។ ​

ក្នុងកិច្ចប្រជុំលោក​ ខ្លូត​ ផន​ ប្រធាន​ក្រុមប្រឹក្សា​ខេត្តកំពង់ចាម​ បាន​លើក​យក​សេចក្តី​ព្រាង​របៀបវារៈ​សំខាន់​ៗ​ មក​ពិភាក្សា​ រួមមាន​៖​ ១-ពិនិត្យ និងអនុម័តសេចក្តីព្រាងកំណត់ហេតុនៃកិច្ចប្រជុំសាមញ្ញលើកទី៣៥ អាណត្តិទី៣ របស់ក្រុមប្រឹក្សាខេត្ត។ ២-ពិនិត្យ ពិភាក្សា និងអនុម័តលើសេចក្តីព្រាងរបាយការណ៍បូកសរុបលទ្ធផលការងារប្រចាំខែមេសា និងទិសដៅការងារប្រចាំខែឧសភា ឆ្នាំ២០២២ របស់រដ្ឋបាលខេត្តកំពង់ចាម​៕SRP

ខេត្តសៀមរាប៖លោក នួន ពុទ្ឋារ៉ា អភិបាលក្រុងសៀមរាប ចាត់ទុកនូវសមិទ្ឋផលនៃផ្លូវមួយខ្សែនេះ ថាពិតជាមានអត្ថប្រយោជន៍យ៉ាងធំធេងណាស់ ក្នុងការរួមចំណែកបម្រើផលប្រយោជន៍ បងប្អូនប្រជាពលរដ្ឋក្នុងមូលដ្ឋាន ក៏ដូចជាសាធារណៈជន ទូទៅ ស្របតាមផែនការរបស់រដ្ឋបាលក្រុង រដ្ឋបាលខេត្ត។

លោក បន្តថាបញ្ហាផ្លូវជាអាទិភាពចម្បង  និងស្របតាមគោលនយោបាយ កសាងហេដ្ឋារចនាសម្ព័ន្ឋ របស់រាជរដ្ឋាភិបាល ក្នុងការអភិវឌ្ឍហេដ្ឋារចនាសម្ព័ន្ឋផ្លូវថ្នល់ ដើម្បីសម្រួលដល់ការធ្វើដំណើរ និងលើកស្ទួយកម្រិតជីវភាពរស់នៅរបស់ប្រជាពលរដ្ឋគ្រប់ទីកន្លែងផងដែរ។ ផ្លូវនេះជាឆ្អឹងខ្នង ជាសរសៃឈាមសេដ្ឋកិច្ចមួយយ៉ាងសំខាន់ ជួយលើកកម្ពស់ដល់វិស័យទេសចរណ៍ជាពិសេសរួមចំណែកលើកស្ទួយជីវភាពរស់នៅនិងជួយសម្រួលការធ្វើដំណើររបស់ប្រជាពលរដ្ឋ និងសិស្សានុសិស្ស ក្នុងការធ្វើដំណើរទៅសាលារៀននិងដឹកជញ្ជូនភោគផលផ្សេងៗផងដែរ។

លោកអភិបាលក្រុង ក៏សូមថ្លែងអំណរគុណយ៉ាងជ្រាលជ្រៅចំពោះសម្ដេចតេជោ ហ៊ុន សែន បានផ្ដល់វិកាកសាងហេដ្ឋារចនាសម្ព័ន្ឋផ្លូវ ៣៨ខ្សែ ដែលបានសាងសង់រួចរាល់ហើយនោះ ថាជាចំណងដៃដ៍ថ្លៃថ្លាថ្មីមួយទៀតសម្រាប់អ្នកក្រុងសៀមរាប ហើយសមិទ្ធិផលនោះបានជួយកែលំអរសោភណ្ឌភាពទីក្រុងសៀមរាប ឱ្យក្លាយជាទីក្រុងដ៏ទំនើប ពោរពេញដោយសោភ័ណភាព បរិស្ថានល្អសម្រាប់ការ រស់នៅសក្ដិសមជាទីក្រុងទេសចរណ៍ វប្បធម៌ និងប្រវត្តិសាស្ត្រ អាចទាក់ទាញភ្ញៀវទេសចរណ៍បានកាន់តែច្រើនសំដៅលើកស្ទួយសេដ្ឋកិច្ចជាតិ ឱ្យកាន់តែមានការរីកចម្រើន ព្រមទាំងធ្វើឱ្យប្រសើរឡើងដល់ការតភ្ជាប់ពីទីប្រជុំជនក្រុងសៀមរាបទៅកាន់តំបន់ដាច់ស្រយាលផងដែរ។ 

លោកមានប្រសាសន៍យ៉ាងដូច្នេះ នៅថ្ងៃចន្ទនេះ ក្នុងឱកាស សម្ពោធដាក់ប្រើប្រាស់ជាផ្លូវការ ផ្លូវបេតុងមួយខ្សែ មានប្រវែង ១,៨៧០ម៉ែត្រ ទទឹង៦ម កម្រាស់0,១៦ម៉ែត្រ រួមនឹងហេដ្ឋារចនាសម្ព័ន្ឋ ដូចជាបំពាក់អំពូលសូឡាតាមដងផ្លូវ លូរំដោះទឹកភ្លៀង និងសមទ្ធផលមួយចំនួនទៀត ដែលចំណាយថវិកាអស់ជាង ៣០ម៉ឺនដុល្លារ ស្ថិតនៅភូមិភ្នំក្រោម សង្កាត់សៀមរាប៕SRP

ខេត្តសៀមរាប៖ពិតជាសាហាវព្រៃផ្សៃណាស់ បុរសម្នាក់ត្រូវបានសមត្ថកិច្ចចាប់ខ្លួន ពាក់ព័ន្ធករណីរំលោភសម្លាប់។

អាជ្ញាធរស្រុកក្រឡាញ់បានប្រាប់សៀមរាប ប៉ុស្តិ៍ ថា ហេតុការណ៍ភ្ញាក់ផ្អើលបានកើតឡើង នៅវេលាម៉ោង០៦ និង៣០ នាទីព្រឹកនៅថ្ងៃទី០៩ ខែឧសភា ឆ្នាំ២០២២ នៅត្រង់ចំណុច វាលស្រែខាងជើងត្រពាំងកក់ ស្ថិតនៅភូមិរវៀង ឃុំស្រណាល ស្រុកក្រឡាញ់ ខេត្តសៀមរាប។

ជនរងគ្រោះឈ្មោះ ផុន ឃីម ភេទស្រីអាយុ១៣ឆ្នាំ រស់នៅភូមិរវៀង ឃុំស្រណាល ស្រុកក្រឡាញ់ ខេត្តសៀមរាប។

អាជ្ញាធរបានបន្តថា តាមព័ត៌មានពីឈ្មោះ ខ្វាវ លំ ភេទស្រីអាយុ៦៨ឆ្នាំ ត្រូវជាជីដូនសពបានឱ្យដឹងថា៖ នៅថ្ងៃទី០៨ ខែឧសភាឆ្នាំ២០២២ វេលាម៉ោងប្រហែល២១និង៣០ នាទី ចៅស្រីរបស់គាត់ឈ្មោះ ផុន ឃីម ឆ្នាំ បានចេញទៅឆ្លុះកង្កែបតែម្នាក់ឯងនៅក្នុងភូមិ បានប្រហែលមួយសន្ធុះគាត់ក៏ឃើញចៅស្រីរបស់គាត់បានយកកង្កែបមកទុកនៅផ្ទះ។ពេលនោះចៅស្រីរបស់គាត់បានសុំគាត់ទៅឆ្លុះកង្កែបទៀត ហើយបាននិយាយថាឈ្មោះ វឿ ភេទ ប្រុស បានប្រាប់ថានៅខាងលិចភូមិមានកង្កែបច្រើនណាស់ ពេលនោះចៅស្រីរបស់គាត់ បានទៅឆ្លុះកង្កែបទៀត លុះដល់ម៉ោងប្រហែល៣ ទៀបភ្លឺ គាត់ក៏បានក្រោករកចៅ តែមិនឃើញ ពេលនោះគាត់ក៏បានស្រែកហៅកូនចៅឲ្យជួយតាមរក តែដោយសារយប់ងងឹតពេករកមិនឃើញ លុះដល់ម៉ោង៥ព្រឹកទើបរកឃើញ ចៅស្រីរបស់ខ្លួនដេកស្លាប់នៅវាលស្រែ។

អាជ្ញាធរបានបញ្ជាក់ថាករណីនេះ កម្លាំងសមត្ថកិច្ចបានធ្វើការស្រាវជ្រាវ និងឃាត់ខ្លួនជនសង្ស័យ ជនសង្ស័យឈ្មោះ អុក វឿ ភេទប្រុស អាយុ៣១ ឆ្នាំ ស្រុកកំណើត ភូមិរវៀង ឃុំស្រណាល ស្រុកក្រឡាញ់ ខេត្តសៀមរាប។

បច្ចុប្បន្ន កម្លាំងសមត្ថកិច្ចបានកសាងសំណុំរឿងបញ្ជូនទៅការិយាល័យជំនាញចាត់ការតាមនីតិវិធី៕SRP

ខេត្តសៀមរាប៖ស្ត្រី​មេ​តុងទីន​ម្នាក់​ទើបតែ​ចុះ​ពីលើ​រថយន្ត ​ត្រូវចោរឆក់កាបូបលុយ​អស់ប្រាក់ប្រមាណ ជាង​១​ម៉ឺនដុល្លារ។

បើយោងតាម facebook ឈ្មោះ Veasna Lay និងជាអ្នកសារព័ត៌មាន បានរាយកាណ៍ពីក្រុងសៀមរាបអោយដឹង នៅព្រឹកថ្ងៃទី៨ ខែឧសភា ឆ្នាំ២០២២ថា, មាន​ករណី​ចោរ​មួយ​ក្រុម​បាន​ធ្វើ​សកម្មភាព​ឆក់​កាបូប​លុយ​ពី​ស្ត្រី​មេ​តុងទីន​ម្នាក់ យក​អស់ប្រាក់​ប្រមាណ​ជាង​១​ម៉ឺន​ដុល្លារ​អា​មេ​រិ​ក ខណៈ​ពេល​ស្ត្រី​រូប​នោះ បាន​ចុះ​ពីលើ​រថយន្ត។ សកម្មភាព នៃអំពើ​ឆក់​កាបូប​ខាងលើ​នេះ បាន​កើតឡើង​កាលពី​វេលា​ម៉ោង​៧​និង​៤៣​នាទី​យប់ ថ្ងៃ​ទី​៦ ខែឧសភា ឆ្នាំ​២០២២ កន្លងទៅនៅ​ចំណុច​លើ​ផ្លូវលំ​ក្បែរ​ហាង​ទា​កាញ់​ភូមិ​ខ្ញុំ ស្ថិត​ក្នុងភូមិ​ជន្លង់ សង្កាត់​សាលា​កំរើក ក្រុង​សៀមរាប ខេត្តសៀមរាប។ ហើយទើបនឹងត្រូវទាញពីកាមេរ៉ាសុវត្ថិភាពនៅថ្ងៃនេះ ដើម្បីអោយសមត្ថកិច្ចស្វែងរកចាប់ខ្លួន យកមកផ្តន្ទាទោស។

ជន​រង​គ្រោះ​ខាងលើ​មានឈ្មោះ យឿ​ន ពិសី ភេទ​ស្រី អាយុ​៣២​ឆ្នាំ មុខរបរ​លក់​ចាប់ហួយ និង​ជា​មេ​តុងទីន រស់នៅ​ភូមិ​បឹង សង្កាត់​ជ្រាវ ក្រុង​-​ខេត្តសៀមរាប។ នៅ​វេលា​ម៉ោង​កើតហេតុ​ខាងលើ ជន​រង​គ្រោះ​បាន​ជិះ​រថយន្ត​ធ្វើ​ដំណើរ​យក​ប្រាក់​ទៅ​បើក​ឲ្យ​អ្នកលេង​តុងទីន នៅ​ហាង​លក់​ស៊ុប (​ទា​កាញ់​ភូមិ​ខ្ញុំ​) ហើយ​ពេល​នោះ​ក៏​ស្រាប់តែ​មាន​ចោរ​ស្ទាវ​មួយ​ក្រុម​ មាន​គ្នា​២​នាក់​ជិះ​ម៉ូតូ​១​គ្រឿង ម៉ាក​ឌ្រី​ម ពណ៌​ខ្មៅ កាំ​បន្ទះ បាន​ធ្វើ​សកម្មភាព​ ឆក់​យក​កាបូបស្ពាយ​ចំហៀង​របស់​ជន​រង​គ្រោះ ខណៈ​ពេល​ជន​រង​គ្រោះ​ បាន​ចុះ​ពីលើ​រថយន្ត និង​មាន​កាន់​កាបូប​នៅ​នឹង​ដៃ​ដើរ​ចូល​ទៅ​ហាង ក្នុង​គោលបំណង​យក​លុយ​សម្រាប់​ទៅ​បើក​ឲ្យ​អ្នកលេង​តុងទីន រួម​គ្នា​ជា​ម្ចាស់​ហាង​ទា​កាញ់​ភូមិ​ខ្ញុំ​នោះ។

ប្រភព​ដដែល​បន្ត​ថា នៅ​ក្នុង​កាបូបស្ពាយ​របស់​ជន​រង​គ្រោះ​នោះ គឺ​មាន​ប្រាក់​ចំនួន ៤០ ៧០០ ០០០​រៀល (​គិត​ជា​ដុល្លារ​ប្រហែល ១០ ១៧៥ ដុល្លា​អា​មេ​រិ​ក​) ក្នុង​នោះ​ក៏​មាន​ប្រាក់​ចំនួន​៣៦ លាន​រៀល ត្រូវ​បើក​សម្រាប់​ដេញ​កើប​យក​តុងទីន​ ឲ្យ​ម្ចាស់​ហាង​ទា​កាញ់​ភូមិ​ខ្ញុំ ផង​ដែរ។ ក្រោយ​ធ្វើ​សកម្មភាព​ភាព ក្រុម​ចោរ​បាន​រត់គេច​ខ្លួន​បាត់ តែ​ទោះជា​យ៉ាងណា​ក្តី សមត្ថកិច្ច​បាន​កំណត់​មុខសញ្ញា​ក្រុម​ចោរ​២​នាក់​នោះ​ហើយ​តាម​រយៈ​កាមេរ៉ា​សុវត្ថិភាព ដូច្នោះ​សង្ឃឹមថា ជនល្មើស​មិន​អាច​គេច​ផុត​ពី​សំណាញ់​ច្បាប់​បាន​ទេ គង់តែ​ចូល​អន្ទាក់​សមត្ថកិច្ច​ជាក់​ជា​មិន​ខាន៕SRP

ខេត្តសៀមរាប៖សមត្ថកិច្ចជាន់ខ្ពស់ខេត្តសៀមរាប បានថ្លែងប្រាប់សៀមរាបប៉ុស្តិ៍ នៅថ្ងៃអាទិត្យនេះថា យុវជនម្នាក់ ឈ្មោះ ធរ សុធារិទ្ធ អាយុ ១៦ឆ្នាំ មុខរបរសិស្សថ្នាក់ទី១១ រៀននៅវិទ្យាល័យអង្គរ រស់នៅភូមិសាលាកំរើក សង្កាត់សាលាកំរើក ក្រុងសៀមរាប ត្រូវបានក្រុមចោរវាយប្លន់សម្លាប់ កាលពីម្សិលមិញ ដោយជនរងគ្រោះបានបាត់ទូរស័ព្ទ ១គ្រឿង ម៉ាក oppo ពណ៌ខ្មៅ។

ឃាតកម្ម ដ៏ឃោឃៅនេះ ត្រូវបានប្រជាពលរដ្ឋ ប្រទះឃើញសាកសព នៅក្រោមបង្គោលភ្លើងនៅវេលាម៉ោង០៥និង៣០ នាទី ថ្ងៃទី០៧ ខែឧសភាឆ្នាំ២០២២ នៅចំណុចបង្គោលភ្លើងនៅវាលស្រែស្ថិតនៅភូមិអារញ្ញ សង្កាត់សៀមរាប ក្រុងសៀមរាប។

សមត្ថកិច្ចបានថ្លែងបន្តថា នៅលើសាកសពដោយពិនិត្យឃើញបាក់ដើមដៃខាងស្តាំ និងនៅលើដងខ្លួនមានស្នាមជាំ ផងដែរ។

ករណីនេះសមត្ថកិច្ច បានបំភ្លឺរបស់សាក្សីនៅជិតកន្លែងកេីតហេតុ ដោយបញ្ជាក់ថា ជនរងគ្រោះត្រូវបានក្រុមជនសង្ស័យជិះមូតូ២គ្រឿង បានស្ទាក់វាយជនរងគ្រោះ កំពុងជិះកង់ម្នាក់ឯងនៅមុខផ្ទះរបស់ខ្លួន។

ពាក់ព័ន្ធករណីនេះ នៅវេលាម៉ោង១៤និង២០ នាទី ថ្ងៃទី០៧ ខែឧសភា ឆ្នាំ២០២២ កម្លាំងមន្ទីរស្រាវជ្រាវ និងបង្ក្រាបបទល្មើស និងកម្លាំងកងរាជអាវុធហត្ថ ក្រុងសៀមរាប ដឹកនាំដោយលោកគិម អាង ប្រធានមន្ទីរស្រាវជ្រាវ និងបង្ក្រាបបទល្មើស បានចាប់ខ្លួនជនសង្ស័យម្នាក់ពាក់ព័ន្ធនឹងករណី ឃាតកម្មខាងលើ។

ជនសង្ស័យ ឈ្មោះ សឿន ជីវ័ន ភេទប្រុស អាយុ ១៦ឆ្នាំ មុខរបរ កម្មករសំណង់ រស់នៅភូមិភ្នំក្រោម សង្កាត់សៀមរាប ក្រុងសៀមរាប បានឆ្លើយសារភាពថា រូបខ្លួនមានបក្ខពួក ០៥នាក់ទៀត ភេទប្រុស ពិតជាបាននាំគ្នាកាក់ជនរងគ្រោះ ដែលកំពុងជិះកង់ ដោយបាននាំគ្នាយកដំបងឈើជ្រុងវ៉ៃទៅលើជនរងគ្រោះ ហើយបានដឹកយកទៅទម្លាក់ទុកចោល នៅក្រោមបង្គោលភ្លើង ខាងជើងកន្លែងកើតហេតុមានចំងាយប្រហែល ៥០០ម៉ែត្រ ដោយពុំមានគំនុំអ្វីទេ ដោយមានគោលបំណងចង់យកសម្ភារពីជនរងគ្រោះ។

បច្ចុប្បន្នកម្លាំងជំនាញកសាងសំណុំរឿងបញ្ជូនទៅសាលាដំបូងតាមនីតិវិធី។ ចំណែកបក្សពួក នៅសល់ សមត្ថកិច្ចនិងតាមចាប់ខ្លួនយកមកផ្ដន្ទាទោសតាមផ្លូវច្បាប់។ ករណីនេះក្រោយពីបានឃាត់ខ្លួន ដកហូតវត្ថុតាង៖ ម៉ូតូដែលជនសង្ស័យជិះធ្វើសកម្មភាព២គ្រឿង ទី១. ម៉ាក EXCITER GP ១គ្រឿង។ ទី២. ម៉ាក HONDA DREAM ពណ៌ខ្មៅ ១គ្រឿង៕SRP

ខេត្តសៀមរាប៖សម្តេច ទៀ បាញ់ បានថ្លែងប្រាប់ក្រុមការងារ ឲ្យបន្តចុះតាមខ្នងផ្ទះប្រជាពលរដ្ឋ ដើម្បីឈ្វេងយល់ ពីជីវភាពរស់នៅ និង ពីសុខទុក្ខរបស់ប្រជាជន សំដៅដាក់ចេញគោលការណ៍ វិធានការដោះស្រាយ បានជាក់ស្តែង និង សមស្របជូនបងប្អូន។

សម្តេចទៀ បាញ់ បានលើកឡើងថា៖ ដើម្បីរក្សាឲ្យបាននូវប្រៀបឈ្នះ គឺក្រុមការងារទាំងអស់ ត្រូវបន្តនិងខិតខំចិញ្ចឹមចលនានយោបាយនៅមូលដ្ឋាន តាមរយៈការកសាងសមិទ្ធផលនានា និង ចូលរួមដោះស្រាយបញ្ហាប្រឈមតាមសំណើ និង សំណូមពរនានារបស់ប្រជាពលរដ្ឋ។

សម្តេច ទៀ បាញ់ ក៏បានស្នើដល់ក្រុមការងារគណបក្សប្រជាជនកម្ពុជាខេត្តសៀមរាបទាំងអស់ ត្រូវខិតខំបំផុសចលនាពង្រឹងសមាជិកបក្ស និង អ្នកគាំទ្រគណបក្ស ព្រមទាំងរៀបចំពិធីបញ្ចូលសមាជិកថ្មី ដែលបានកសាងរួចឲ្យបានសកម្មផុលផុសនៅគ្រប់មូលដ្ឋាន និង ត្រួតពិនិត្យ ពង្រឹងការគ្រប់គ្រង សមាជិកបក្សចាស់ ពង្រីកសមាជិកថ្មី ក្នុងមូលដ្ឋានខ្លួន ឲ្យបានច្បាស់លាស់ និង ត្រូវធ្វើការជួបជុំជាមួយសមាជិកបក្ស អ្នកគាំទ្រគណបក្សជាទ្រង់ទ្រាយតូចៗ តាមមូលដ្ឋានរបស់ខ្លួន ដើម្បីផ្សព្វផ្សាយអំពីស្នាដៃសមិទ្ធផល របស់គណបក្ស និង រាជរដ្ឋាភិបាល សំដៅលើកកម្ពស់ជំនឿ របស់សមាជិកបក្ស និង អ្នកគាំទ្រគណបក្សប្រជាជនកម្ពុជា។

សម្តេចបានគូសបញ្ជាក់ថា៖ ការបោះឆ្នោតជ្រើសរើស សមាជិកក្រុមប្រឹក្សាឃុំ-សង្កាត់អាណត្តិទី៥ នឹង ប្រព្រឹត្តទៅនៅថ្ងៃទី០៥ ខែមិថុនា ឆ្នាំ២០២២នេះ។ សម្តេចថា៖ ដើម្បីទទួលបានជ័យជម្នះ ជូនគណបក្សប្រជាជនកម្ពុជា នោះ ក្រុមការងារទាំងអស់ វាមិនមែនជាកិច្ចការដោយឡែករបស់បេក្ខជននោះទេ តែជាការងារដែលត្រូវមានកិច្ចសហការដឹកនាំ ពីក្រុមការងារគណបក្សគ្រប់ជាន់ថ្នាក់ ដើម្បីឲ្យការងារចលនា គណបក្សប្រជាជន នៅតាមមូលដ្ឋានប្រកបដោយប្រសិទ្ធភាព ដោយត្រូវខិតខំអនុវត្តន៍គ្រប់ការងារ ដែលត្រូវធ្វើបន្តតាមការណែនាំ របស់គណៈអចិន្ត្រៃយ៍ នៃគណៈកម្មាធិការកណ្តាល និងផែនការរបស់គណៈកម្មាធិការគណបក្សខេត្ត ក្រុង ស្រុក បានដាក់ចេញផងដែរ។

សម្តេច ក៏បានលើកនូវតួអង្គសំខាន់ចំនួន៤ ដែលនាំឲ្យឈ្នះលើការបោះឆ្នោត ជ្រើសរើសក្រុមប្រឹក្សាឃុំ សង្កាត់ពេលខាងមុខគឺ តួអង្គទី១ / បេក្ខជនឈរឈ្មោះក្រុមប្រឹក្សាឃុំ សង្កាត់ , តួអង្គទី២ /ប្រធានភូមិ អនុប្រធានភូមិ សមាជិកភូមិ , តួអង្គទី៣/នាយ នាយរងប៉ុស្តិ៍ និងមន្ត្រីប៉ុស្តិ៍ និង តួអង្គទី៤/ក្រុមការងារចុះជួយភូមិ ឃុំ សង្កាត់។ សម្តេចបានផ្តាំផ្ញើឲ្យ បេក្ខភាព ទាំងអស់ខិតខំបន្តយកចិត្តទុកដាក់ ផ្ដល់សេវារដ្ឋបាលសាធារណៈ ជូនបងប្អូនប្រជាពលរដ្ឋ ប្រកបដោយប្រសិទ្ធភាព គុណភាព ក្នុងការធ្វើការឲ្យបានល្អ ក្នុងការបម្រើប្រជាពលរដ្ឋឲ្យបានល្អ មានតម្លាភាព ទទួលខុសត្រូវខ្ពស់ និងយុត្តិធម៌ ដោយមិនមានការរើសអើង មិនប្រកាន់និន្នាការនយោបាយនោះឡើយ។

សម្តេចពិជ័យសេនា ទៀ បាញ់ ឧបនាយករដ្ឋមន្ត្រី និង ជាអនុប្រធានគណបក្សប្រជាជនកម្ពុជា និង ជាប្រធានក្រុមការងារថ្នាក់កណ្តាល ចុះជួយខេត្តសៀមរាប មានប្រសាសន៍បញ្ជាក់យ៉ាងដូច្នេះ ក្នុងឱកាសសំណេះសំណាលជាមួយបេក្ខភាពឈរ ឈ្មោះបោះឆ្នោតក្រុមប្រឹក្សាឃុំ-សង្កាត់ នៅថ្ងៃសៅរិ៍ម្សិលមិញ នៅសាលសន្និសិទ្ធ សណ្ឋាគារសុខាសៀមរាប៕SRP

ភ្នំពេញ៖ប្រមុខដឹកនាំកម្ពុជាសម្តេចតេជោ ហ៊ុន សែន បានអនុញ្ញាតឱ្យក្រសួងការពារជាតិ ជ្រើសរើស ក្របខណ្ឌទាហានថ្មីចំនួន ៤០២នាក់ ដើម្បីរៀបចំកងកាំជ្រួចការពារ ដែនអាកាសរយៈកម្ពស់មធ្យម ចំណុះបញ្ជាការដ្ឋានការពារអាកាស អគ្គបញ្ជាការដ្ឋាន។

នេះបើយោងតាមអនុក្រឹត្យដែលចុះហត្ថលេខាដោយសម្តេចតេជោ ហ៊ុន សែននាយករដ្ឋមន្ត្រី៕SRP

ខេត្តកំពង់ចាម​៖លោក​ឧត្តមសេនីយ៍ឯក ហ៊ុន ម៉ាណែត បានថ្លែងថា​៖ ចំពោះ​ការជួបជុំសប្បាយរីករាយ និងឱកាសធ្វើបុណ្យធ្វើទាន ក៏ដូចជាការកសាងសមិទ្ធផលនានារួមគ្នា ដែលយើងកំពុងចូលរួមអបអរសាទរនាពេលនេះ គឺជាផ្លែផ្កានៃការអនុវត្តមាគ៌ានយោបាយ ដ៏ត្រឹមត្រូវរបស់រាជរដ្ឋាភិបាល ដឹកនាំដោយគណបក្សប្រជាជនកម្ពុជា ដែលតាំងពីដើមរៀងមកតែងតែឈរនៅក្បែរប្រជាជន រួមសុខរួមទុក្ខជាមួយប្រជាជននៅក្នុងគ្រប់កាលៈទេសៈ ទាំងក្នុងបុព្វហេតុរំដោះជាតិ, ការពារជាតិ, ស្តារកសាងជាតិ, អភិវឌ្ឍជាតិ និងធានានរន្តរភាពនៃសន្តិភាពសម្រាប់ជាតិ។

លោក​ឧត្តមសេនីយ៍ឯក ហ៊ុន ម៉ាណែត បានថ្លែងបន្តថា​៖ទីវត្តអារាម ជាកន្លែងប្រមូលផ្តុំពុទ្ធសាសនិកជន ដែលមានជំនឿយ៉ាងមុតមាំលើ ព្រះពុទ្ធសាសនា សម្រាប់ជួបជុំធ្វើបុណ្យទានបំពេញកុសល, ជាទីពំនាក់អាស្រ័យសម្រាប់អ្នកគ្មានទីពឹងបង្អែក, ជាទីស្នាក់អាស្រ័យរបស់សិស្សានុសិស្សជាកូនចៅរបស់ប្រជាពលរដ្ឋក្រីក្រ, ជាទីបង្អែកខាងផ្លូវចិត្ត, ជាឃ្លាំងផ្ទុកចំណេះដឹង, ជាបណ្ណាល័យ ជាសារមន្ទីរនៃវប្បធម៌​ និងអក្សរសាស្រ្តជាតិ នាគ្រប់សម័យកាល​។

លោក​ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង មេបញ្ជាការកងទ័ពជើងគោក ថ្លែងបែបនេះក្នុងពិធីសម្ពោធឆ្លងមហាកុដិភ្លោះ និងសមិទ្ធផលនានា នៅវត្តសុវណ្ណគិរីរតនៈ ភ្នំប្រុស ស្ថិត​ក្នុង​ភូមិត្រពាំងចារ ឃុំក្រឡា ស្រុកកំពង់សៀម ខេត្តកំពង់ចាម នៅថ្ងៃសុក្រម្សិលមិញ។

លោកឧត្ដមសេនីយហ៊ុន ម៉ាណែត បាន​លេីកឡេីងថា​៖ ការដឹកនាំដោយធម៌ គឺ​ពិតជាសំខាន់ណាស់​ ដែល​រាជរដ្ឋាភិបាលសព្វថ្ងៃ បានដឹកនាំដោយផ្អែកលើគោលការណ៍នេះ សំដៅយ៉ាងណាឱ្យប្រជាពលរដ្ឋ ចេះរស់នៅដោយធម៌, ចេះគោរពគ្នា, ចេះស្រឡាញ់គ្នា, ចេះជួយយកអាសារគ្នា, មានគុណធម៌, មានសីលធម៌។​

លោក​ឧត្ដមសេនីយ៍ឯក​ ហ៊ុន​ ម៉ាណែត​​ បាន​បញ្ជក់​ថា​ សមិទ្ធផលទាំងនេះ ក៏ជាផ្នែកមួយនៃការចូលរួមចំណែកដោយមិនអាចខ្វះបានរបស់លោកយាយ លោកតា បងប្អូនប្រជាពលរដ្ឋ តាមរយៈការបំពេញនូវតួនាទីយ៉ាងសំខាន់ ក្នុងការអប់រំទូន្មានកូនចៅ និងបញ្ជូនពួកគាត់ឱ្យទៅសាលារៀនដើម្បីឱ្យពួកគាត់ក្លាយខ្លួនជាពលរដ្ឋល្អ មានមនសិការស្នេហាជាតិ និងស្មារតីទទួលខុសត្រូវលើជោគវាសនាខ្លួនឯង គ្រួសារ សង្គមជាតិ និងចូលរួមកសាងជាតិ ថែរក្សាការពារសន្តិភាព និងសមិទ្ធផលជាតិ និងខិតខំបំពេញកាតព្វកិច្ចជាពលរដ្ឋល្អតាមតួនាទីរៀងៗខ្លួន ជាពិសេស ការចូលរួមជ្រើសរើសអ្នកដឹកនាំប្រទេសបានត្រឹមត្រូវផងដែរ​៕SRP

ខេត្តបាត់ដំបង៖លោកសុខ លូ អភិបាលខេត្តបាត់ដំបង និងជាប្រធានគណៈកម្មាធិការសាខាកាកបាទក្រហមកម្ពុជាខេត្តបាត់ដំបង និងលោកជំទាវ និងក៏មានការអញ្ជើញចូលរួមពីឯកឧត្តម លោកជំទាវ លោក លោកស្រី គណៈកិត្តិយសសាខា គណៈកម្មាធិការសាខា អនុសាខា សប្បុរសជន នៅថ្ងៃសុក្រ នេះបានចុះសំណេះសំណាល សួរសុខទុក្ខ និងផ្ដល់ជូនអំណោយមនុស្សធម៌របស់សាខាកាកបាទក្រហមកម្ពុជា ផ្តល់ជូនប្រជាពលរដ្ឋដែលងាយរងគ្រោះបំផុត ចាស់ជរាឥតទីពឹង ជនមានពិការភាព ស្ត្រីមេម៉ាយកូនច្រើនមានជីវភាពខ្វះខាតចំនួន៦១០គ្រួសារ ក្នុងស្រុកចំនួន៣។

លោក សុខ លូ  បានសម្តែងនូវក្តីសប្បាយរីករាយ និបាននាំយកការផ្ដាំផ្ញើសួរសុខទុក្ខពីសំណាក់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន  ប្រធានកាកបាទក្រហមកម្ពុជា ដែលផ្តាំផ្ញើសួរសុខទុក្ខ ដោយក្តីអាណិតស្រឡាញ់ និងតែងតែធ្វើការគិតគូរពីសុខទុក្ខ និងជីវភាពរស់នៅប្រចាំថ្ងៃ ព្រមទាំងបានផ្ញើនូវក្តីនឹករលឹកចំពោះលោកតាលោកយាយ បងប្អូនប្រជាពលរដ្ឋទាំងអស់ ដែលរស់នៅតំបន់ដាច់ស្រយាលនេះប្រកបដោយមនោសញ្ចេតនាដ៏ជ្រាលជ្រៅបំផុត។ 

លោក សុខ លូ បានអំពាវនាវដល់ប្រជាពលរដ្ឋទាំងអស់ សូមបន្តថែទាំសុខភាពឱ្យបានល្អ ពិសាទឹកដាំឆ្អិនល្អ មានអនាម័យ ក្នុងការរស់នៅ និងប្រុងប្រយ័ត្ន ចំពោះការប្រែប្រួល អាកាសធាតុ ដូចជាគ្រោះធម្មជាតិ ខ្យល់ព្យុះ ខ្យល់កន្ត្រាក់ រន្ទះបាញ់ជាដើម និងសូមបន្តចូលរួមទប់ស្កាត់ជំងឺកូវីដ-១៩ និងចូលរួមចាក់វ៉ាក់សាំងដូសទី៣ ឬដូសទី៤ ឱ្យបានគ្រប់ៗគ្នា ជាពិសេសត្រូវចេះសាមគ្គីគ្នា ស្រឡាញ់គ្នាដូចបងប្អូន កាត់បន្ថយអំពើហិង្សាក្នុងគ្រួសារ និងត្រូវថែរក្សាសន្តិភាពដែលបានមកយ៉ាងលំបាកឱ្យបានគង់វង្ស ។ លោកក៏បានបន្តអំពាវនាវដល់ប្រជាពលរដ្ឋទាំងអស់ចូលរួមសហការ ជាមួយអាជ្ញាធរមានសមត្ថកិច្ចពាក់ព័ន្ធ ក្នុងការរាយការណ៍ពេលជួបនឹងសកម្មភាពនានា ពីការជួញដូរ ចែកចាយ និងប្រើប្រាស់គ្រឿងញៀន នៅតាមសហគមន៍ ការចំណាកស្រុកខុសច្បាប់ ដើម្បីមានការអន្តរាគមន៍បង្រ្កាប បានទាន់ពេលវេលា ព្រមទាំងចូលរួមក្នុងការលុបបំបាត់ការប្រើប្រាស់ និងជួញដូរគ្រឿងញៀនខុសច្បាប់ ក្នុងនោះ បន្តអប់រំកូនចៅ របស់ខ្លួនឱ្យបានជាប់ជាប្រចាំ ដើម្បីឱ្យពួកគេគោរពច្បាប់ចរាចរណ៍ ពិសេសក្នុងពេកបើកបរសូមកុំសេពគ្រឿងស្រវឹង ត្រូវពាក់មួកសុវត្ថិភាពរាល់ពេលបើកបរម៉ូតូ ទោះទៅណាជិតឬឆ្ងាយ និងពាក់ខ្សែក្រវ៉ាត់ឱ្យបានត្រឹមត្រូវពេលបើកបររថយន្ត ដើម្បីកាត់បន្ថយអត្រាគ្រោះថ្នាក់ចរាចរណ៍សម្រាប់ខ្លួនឯងនិងអ្នកដទៃ។ 

លោកសុខ លូ  បានថ្លែងអំណរគុណយ៉ាងជ្រាលចំពោះសប្បុរសជនគ្រប់មជ្ឈដ្ឋាន ដែលបានបរិច្ចាគធនធានថវិកា ក៏ដូចជាសម្ភារៈមួយចំនួន ដល់សាខាកាកបាទក្រហមកម្ពុជា ប្រកបដោយទឹកចិត្តជ្រះថ្លា ក្នុងឱកាសទិវាពិភពលោកកាកបាទក្រហម និងអឌ្ឍចន្ទក្រហម ៨ ឧសភា ដើម្បីឱ្យសាខាកាកបាទក្រហមកម្ពុជាខេត្ត អាចចុះបំពេញប្រតិបត្តិការមនុស្សធម៌បានដូចនាពេលនេះ និងជាបន្តបន្ទាប់ទៀត។ 

សូមបញ្ជាក់ថាពិធីនេះរៀបចំឡើងនៅទីតាំងចំនួន៣កន្លែងផ្សេងគ្នារួមមាន៖ 

-ទីតាំងទី ១ នៅសាលាស្រុកកំរៀង មានចំនួន២០០គ្រួសារ។

– ទីតាំងទី២ នៅសាលាឃុំមានជ័យ នៃស្រុកសំឡូត មានចំនួន ២១០គ្រួសារ។

-ទីតាំងទី៣ នៅបរិវេណវត្តស្តៅខាងកើត ឃុំស្តៅ ស្រុករតនមណ្ឌល ចំនួន២០០គ្រួសារ ដោយ

គ្រួសារនីមួយៗនូវ ៖ អង្ករ ២៥គីឡូក្រាម, មី ១កេស, ត្រីខ ១០កំប៉ុង, ទឹកបរិសុទ្ធវីឃែរ១កេស,ទឺកត្រី១យួរ ទឹកស៊ីអ៊ីវ១យួរ និងជែល១ដបផងដែរ៕SRP